48. viṣōpayōgīyaḥ

Adhikarana atha viShopayogIyo nAmAShTacatvAriMshodhyAyaH adhyAyapratij~jA (1) · Śloka 1

অথাতো বিষোপযোগীযং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

সর্বক্রিযাভিরসিধ্যতো জঙ্গমবিষস্য প্রসঙ্গেনান্যেষামপি রোগবিশেষাণামসিধ্যতাং স্থাবরবিষৈকসাধ্যত্বাত্ স্থাবরবিষস্য জঙ্গমবিষৈকসাধ্যত্বাচ্চ তদুপযোগমধিকৃত্যাধ্যায আরভ্যতে||১||

Adhikarana viShe prativiShayojanA (2) · Śloka 2

বিষে প্রতিবিষং যোজ্যং মন্ত্রতন্ত্রৈরসিধ্যতি| অতীতে পঞ্চমে বেগে সপ্তমস্যানতিক্রমে| প্রভোর্নিবেদ্য প্রযতো নৈব বাখ্যায কস্যচিত্||২||

মন্ত্রৈর্বিষহরৈস্তন্ত্রৈশ্চৌষধাদিভিরসিধ্যতি বিষে প্রতিবিষং বিজাতীযং যোজ্যম্| স্থাবরস্য জঙ্গমং জঙ্গমস্য স্থাবরমিত্যর্থঃ| কদেত্যাহ-পঞ্চমং বেগেঽতীতে অতিক্রান্তে সপ্তমে অনতিক্রান্তে চ সতি| প্রভো রাজ্ঞো নিবেদ্য উক্ত্বা| যথা-অহমস্য বিষেণ মুমূর্ষোস্তৃণীকৃতভূরিমন্ত্রতন্ত্রস্য জীবিতনিরাশবন্ধুবর্গস্য অতিস্তোকমপ্যনাশঙ্ক্যমানপ্রাণপ্রত্যাগমনস্য বিষেণ জীবিতং প্রার্থযিষ্য ইতি| এবমযমস্যাযুঃক্ষযেঽপি বরাকোঽযশসা ন যুজ্যতে| সিদ্ধে তু সুমহদ্যশ আসাদযতি| অথবা নৈব কস্যচিদেবমাখ্যায যদ্যযমস্মৈ বিষং যোক্ষ্যতি তর্হ্যৌষধমাত্রব্যাজেনাপি সিদ্ধৌ যশ এব অসিদ্ধৌ ত্বযশসঃ পূর্বস্মাদিব বিষাত্প্রসঙ্গো নেতি|| ২||

Adhikarana siddhamantratvamAvashyakam (3) · Śloka 3

সিদ্ধমন্ত্রধরঃ কৃত্বা ধরণীবন্ধমাদিতঃ| নহি মন্ত্রসহাযস্য বিষং যাত্যবিধেযতাম্||৩||

সিদ্ধমন্ত্রধরঃ সন্নাদিতো ধরণীবন্ধং প্রদেশরক্ষাং কৃত্বা বিষং যোজযেত্| ধরণীবন্ধহেতুর্ন হি মন্ত্রসহাযস্য ভিষজো বিষমবিধেযতাং যাতীতি|| ৩||

Adhikarana sthAvaraja~ggamaviShaguNaviparyastatA (4) · Śloka 4

শ্লেষ্মতুল্যগুণং প্রাযঃ স্থিরমূর্ধ্বগমং বিষম্| প্রাযঃ পিত্তগুণৈর্যুক্তমধোগামি চ জঙ্গমম্| গুণৈরিতি বিপর্যস্তৈর্নিহতস্তে পরস্পরম্| যুঞ্জ্যান্মূলবিষং তস্মাদ্দষ্টানাং পানলেপযোঃ||৪||

স্থিরং স্থাবরং বিষং গুণৈঃ শ্লেষ্মণস্তুল্যমূর্ধ্বগমঞ্চ| জঙ্গমং বিষং পিত্তেন গুণৈস্তুল্যমধোগামি চ| প্রাযোগ্রহণং বিষযব্যভিচারসূচনার্থম্ ইত্যনেন প্রকারেণ স্থাবরজঙ্গমে বিষে যতো গুণৈর্বিপর্যস্তৈঃ পরস্পরং বিপরীতে অতস্তে বিষং পরস্পরং নিহতঃ স্থাবরেণ জঙ্গমং হন্যতে জঙ্গমেন চ স্থাবরমিতি| তস্মাদ্ধেতোর্দষ্টানাং পানে লেপে চ মূলবিষং যুঞ্জ্যাত্|| ৪||

Adhikarana viShapIte sarpaiH daMshanam (5) · Śloka 5

বিষপীতং চ কুশলো দংশযেত্ পবনাশিভিঃ| ন বিষপ্রতিমং কিঞ্চিন্নির্বিষীকরণং বিষে||৫||

কুশলশ্চ বৈদ্যঃ পবনাশিভিঃ সর্পৈর্বিষপীতং দংশযেত্| বিষেঽন্যতরে দেহস্থিতে তদ্বিপরীতং বিষপ্রতিমং ন কিঞ্চিদন্যন্নির্বিষীকরণং বিদ্যতে|| ৫||

Adhikarana ja~ggame maulaviShamAtrA (sarpaviShe) (6) · Śloka 6

চতুর্ভিঃ ষড্ভিরষ্টাভির্হীনমধ্যোত্তমাং যবৈঃ| মাত্রাং বিষস্য মৌলস্য প্রযুঞ্জীত যথাযথম্||৬||

যদা চ জঙ্গমে বিষে মৌলং বিষং প্রযুজ্যতে তদা যথাযথং জঙ্গমাপেক্ষযা হীনমধ্যাধিকাং ত্রিবিধাং মাত্রাং প্রযুঞ্জীত| চতুর্ভির্যবৈর্হীনমাত্রা, ষড্ভির্মধ্যমা, অষ্টাভিরুত্তমা ইতি সর্পদষ্টে|| ৬||

Adhikarana kITavRushcikaviShayormaulamAtrAntaram (7) · Śloka 7

দষ্টস্য দ্বৌ যবৌ কীটৈস্তিলমাত্রং তু বৃশ্চিকৈঃ| নৈব ত্বক্সৃক্স্থে....................................||৭||

কীটৈর্দষ্টে তু দ্বৌ যবৌ মূলবিষস্য যুঞ্জ্যাত্| বৃশ্চিকৈর্দষ্টে তিলমাত্রম্| অসৃক্স্থিতে বিষে নৈব বিষান্তরং যুঞ্জ্যাত্|| ৭||

Adhikarana lUtAviShe maulaviShaM na peyam (8) · Śloka 8

....................................পানে তু লূতাদষ্টস্য নেষ্যতে| প্রচ্ছায লেপযেদ্দংশং তস্য জ্ঞাত্বা সুনিশ্চিতম্| সবিষে যুক্তমমৃতং বিষমেবাঽবিষে বিষম্| অবলে চাতিবলবদ্ব্যাপন্নং চ প্রযোগতঃ||৮||

লূতাদষ্টস্য পান এব বিষং নেষ্যতে অপিতু সুনিশ্চিতং লূতাদংশং জ্ঞাত্বা প্রচ্ছায লেপযেত্| সুনিশ্চিতত্বজ্ঞানায হেতুঃ সবিষে যুক্তং বিষমমৃতং ভবতি নির্বিষে তু বিষং বিষমেবেতি| তস্মাদ্যদি লূতাদংশঃ সাবিষস্ততো বিষলেপঃ| অন্যহেতুকাশ্চেত্ স্ফোটাদযো ন বিষলেপঃ কার্যঃ| যথাযথং মাত্রামিতি যদুক্তং তদেবোপবৃহ্যতে| অবলে চ বিষে অতিবলং বিষং বিষমেব ন ত্বৌষধম্| প্রযোগবশাত্তু ব্যাপন্নং বিষং বিষমেব ন ত্বমৃতম্|| ৮||

Adhikarana agadAdhikAraH (9) · Śloka 9

সবিষাবিষশঙ্কাযামগদানুপযোজযেত্| অবিরুদ্ধান্ প্রযুক্তো হি নির্বিষস্যাগদোঽগদঃ| তদ্বচ্চ সবিষস্যাপি ক্রিযাকালাতিপাততঃ| জানীযাদ্বিষসদ্ভাবং ভিষক্তস্মাত্প্রযত্নতঃ||৯||

যত্র তু সবিষো বা স্যাদবিষো বেত্যাশঙ্কা তত্রাবিরুদ্ধানগদানুপযোজযেত্ ন তু বিষম্| যতো নিশ্চিতং নির্বিষস্যাঽগদো গদো ব্যাধিঃ| তদ্বত্ সবিষস্যাপি ক্রিযাকালাতিপাতে প্রযুক্ত অগদো ব্যাধিঃ| তস্মাত্ ভাবাভাবাভ্যাং মাত্রাদিভিশ্চ যত্নতো বিষসদ্ভাবং জানীযাত্|| ৯||

Adhikarana prayojyAprayojyamaulaviShanirdeshaH (10) · Śloka 10

সাক্তুকং মুস্তকং শৃঙ্গী বালকং সর্ষপাহ্বযম্| বত্সনাভং চ কর্মণ্যং বিষং স্নিগ্ধং ঘনং গুরু| ন জাত্বন্যত্প্রযোক্তব্যং কালকূটং বিশেষতঃ||১০||

সাক্তুকাদিকং বিষং কর্মণ্যং কর্মণি সাধু স্নিগ্ধাদিগুণঞ্চ এভ্যোন্যন্ন জাতু প্রযোক্তব্যম্| কালকূটং বিশেষতো ন প্রযোক্তব্যম্|| ১০||

Adhikarana viShe~avacArite kRutyam (11) · Śloka 11

বিষেঽবচারিতে তীক্ষ্ণে পেযং ঘৃতমনন্তরম্| সভার্ঙ্গীদধিধূমোত্থশারিবাতণ্ডুলীযকম্| অগারধূমমঞ্জিষ্ঠাযষ্ট্যাহ্বৈর্বা সমন্বিতম্| লিহ্যাদ্বা মধুসর্পির্ভ্যাং চূর্ণিতামর্জুনত্বচম্||১১||

তীক্ষ্ণে বিষেঽবচারিতে অনন্তরমব্যবধানেন ঘৃতং পেযম্| কিম্ভূতং ঘৃতমিত্যাহ-সভাঙ্গর্যাদিকমথবাঽগারধূমাদিভিঃ সমন্বিতমথ বা অর্জুনত্বচং চূর্ণিতাং মধুসর্পির্ভ্যাং লিহ্যাত্|| ১১||

Adhikarana viShaprayogAH (12) · Śloka 12

ক্ষীরক্ষৌদ্রঘৃতৈর্যুক্তং পীতং হন্তি বিষং বিষম্| সসিন্দুবারতগরং মৃতসঞ্জীবনং বিষম্| শিরীষকুসুমং বক্রং বিষমাখুবিষাপহম্| দেবদারু নতং মাংসী দ্রামিলীবাকুচী বিষম্| কুষ্ঠং চ পানলেপাভ্যাং সমস্তবিষনাশনম্| মনশ্শিলাঞ্জনালৈলা সিন্দুবারামরাহ্বযম্| সরক্তা কুঙ্কুমবিষং ধ্মানং নিস্সংজ্ঞবোধনম্||১২||

ক্ষীরেত্যাদিনা বিষপ্রযোগঃ| বিষস্য মাত্রা তূক্তা| বিষং ক্ষীরাদিভির্যুক্তং পীতং বিষং হন্তি| সিন্দুবারতগরাভ্যাং যুক্তং পীতং বিষং মৃতসঞ্জীবনম্| শিরীষপুষ্পতগরাভ্যাং যুক্তং পীতং বিষমাখু বিষাপহং ভবতি| দেবদার্ব্যাদিভির্যুক্তং পীতং বিষং সমস্তবিষাণাং নাশনম্| মনশ্শিলাদিকং নাসাধ্মানং নিস্সংজ্ঞানাং বোধনম্| অলং হরিতালম্| অমরাহ্বযং দেবদারু| রক্তা মঞ্জিষ্ঠা|| ১২||

Adhikarana dAhe lepayogaH (13) · Śloka 13

দাহে বিষোদ্ভবে লেপঃ সক্তুক্ষীরঘৃতৈর্হিতঃ||১৩||

বিষোদ্ভবে দাহে সর্বাঙ্গসন্তাপে সক্ত্বাদিভির্লেপো হিতঃ| সক্তবো যবানাম্|| ১৩||

Adhikarana sarpaviShaprayogaH (14) · Śloka 14

যস্তু সংরোষিতো ভোগী ধূমং বক্ত্রাদ্বিমুঞ্চতি| দণ্ডাগ্রে পিশিতং বদ্ধ্বা বহুশস্তেন দংশযেত্| অশক্যমগদৈরন্যৈর্বিষপীতং চিকিত্সকঃ| পাযযেন্মাংসচূর্ণং তং জ্ঞাত্বা বিষবলাবলম্||১৪||

ক্রোধযিত্বা সর্পমুত্পন্নবক্ত্রধূপং চ কৃত্বা তেন দণ্ডবদ্ধং মাংসং দংশযেত্| তস্য মাংসস্য চুর্ণং পাযযেদ্যো বিষপীতস্তমন্যৈরগদৈরশক্যম্|| ১৪||

Adhikarana anyarogeShu rasAyaneShvapi ca viShaprayoganirdeshaH (15) · Śloka 15

অন্যেষ্বপি চ রোগেষু শেষোপাযপরিক্ষযে| বিষং যুঞ্জীত নিত্যং চ রসাযনগবেষিণঃ||১৫||

ন কেবলে বিষ এব বিষং যোজ্যং যাবদ্বিষাচ্ছেষাণামুপাযানাং পরিক্ষযে অসিদ্ধাবন্যেষ্বপি রোগেষু বিষং যোজ্যম্| যস্তু রসাযনগবেষী রসাযনমভিলষতি তস্য নিত্যং বিষং যোজ্যম্|| ১৫||

Adhikarana viShaprayogArhaH tadarthamAva shyakamRutvAdi (16) · Śloka 16

ঘৃতোপস্কৃতদেহস্য বিশুদ্ধস্য হিতাশিনঃ| সাত্ত্বিকস্যোদিতে ভানৌ যোজ্যং শীতবসন্তযোঃ| গ্রীষ্মেঽপ্যাত্যযিকে ব্যাধৌ...................||১৬||

ঘৃতোপস্কৃতাদিদেহস্য শীতবসন্তযোর্ভানাবুদিতে সূর্যোদযে প্রাতর্বিষং যোজ্যম্| আত্যযিকে তু ব্যাধৌ গ্রীষ্মেঽপি যোজ্যম্|| ১৬||

Adhikarana viShAnarhAH RutvAdi (17) · Śloka 17

..................................ংঅ চ বর্ষাসু দুর্দিনে| ন ক্রোধনে ন পিত্তার্ত্তে ন ক্লীবে রাজনি দ্বিজে| ক্ষুত্তৃষ্ণাশ্রমঘর্মাধ্বব্যাধ্যন্তরনিপীডিতে| গর্ভিণীবালবৃদ্ধেষু ন রূক্ষেষু ন মর্মসু||১৭||

বর্ষাসু দুর্দিনে চ বিষং ন যোজ্যম্| ক্রোধনাদিকে চ পুরুষে ন যোজ্যম্| তথা ক্ষুধাদিভির্নিপীডতে| ব্যাধ্যন্তরং বিষবিষযাদন্যো ব্যাধিঃ| সুবোধম্|| ১৭||

Adhikarana viShaprayoge varjanIyAni anyathA vyApadashca (18) · Śloka 18

অভ্যস্তেঽপি বিষে যত্নাদ্বর্জনীযান্ বিবর্জযেত্| কট্বম্লতৈললবণদিবাস্বপ্নাতপানলান্| রূক্ষমন্নং বিশেষেণ ভযং বাঽজীর্ণতঃ সদাঃ| দৃগ্বিভ্রমং কর্ণরুজামন্যাংশ্চানিলজান্ গদান্| বিষং রূক্ষাশিনঃ কুর্যান্মৃত্যুমেব ত্বজীর্ণতঃ||১৮||

বিষে অভ্যস্তে অপি সাত্ম্যীভূতেঽপি বর্জনীযান্ যত্নাদ্বিবর্জযেত্| বিশেষেণ তু রূক্ষমন্নম্| কিং তদিত্যাহ-কট্বম্লেত্যাদি| অজীর্ণতো বিশেষেণ ভযং গৃহীতব্যম্| রূক্ষাশিনো নরস্য বিষং দৃগ্বিভ্রমাদীন্ কুর্যাত্| অজীর্ণাত্তু মৃত্যুমেব|| ১৮||

Adhikarana haritAlaprayogaH (19) · Śloka 19

অলং গোমূত্রসংযুক্তমাতপে শোষযেত্ত্র্যহম্| বিষং বৃংহণমেতদ্ধি বিষস্যাদৌ প্রশস্যতে| তত্পিবেন্মস্তুনা বাতজ্বরে ক্ষীরেণ পৈত্তিকে| যুক্তং মূত্রেণ কফজে সর্বজে ত্রিফলাম্ভসা||১৯||

হরিতালস্য ভাবনাপ্রযোগশ্চ সুবোধঃ| তদিতি ভাবিতং হরিতালম্| সর্বজে সন্নিপাতজে|| ১৯||

Adhikarana viShamajvare saviShayogAH (20) · Śloka 20

লোধ্রচন্দনষড্গ্রন্থাশর্করাঘৃতমাক্ষিকৈঃ| ক্ষীরেণ চ বিষং যুক্তং জীর্ণজ্বরহরং পরম্| নিকুম্ভকুম্ভত্রিফলাসর্পির্মধুবিষৈঃ কৃতঃ| নিহন্তি মোদকো জীর্ণজ্বরমেহত্বগামযান্| শিখিকর্কিরসোপেতং বিষমজ্বরজিদ্বিষম্||২০||

লোধ্রাদিভির্যুক্তং বিষং পরং জীর্ণজ্বরহরম্| নিকুম্ভাদিভিঃ কৃতো মোদকো জীর্ণজ্বরাদিকং হন্তি| শিখিকর্কিরসযুক্তং বিষং বিষমজ্বরং জযতি| শিখী চিত্রকঃ| কর্কী কর্কটশৃঙ্গী|| ২০||

Adhikarana raktapitte saviShayogaH (21) · Śloka 21

বিষং যষ্ট্যাহ্বযং রাস্না সেব্যমুত্পলকন্দকম্| তণ্ডুলোদকপীতানি রক্তপিত্তস্য ভেষজম্||২১||

বিষাদিকং তণ্ডুলোদকেন পীতং রক্তপিত্তস্য ভেষজং ভবতি||২১||

Adhikarana duShTavraNe viShayogaH (22) · Śloka 22

বিষং রসাঞ্জনং ভার্ঙ্গী বৃশ্চিকালী মহাসহা| সবেদনে সপাকে চ ব্রণে দুষ্টে প্রলেপনম্||২২||

বিষাদিকং বেদনাদিযুক্তে দুষ্টব্রণে লেপনং যোজ্যম্|| ২২||

Adhikarana chardyAM viShayogaH (23) · Śloka 23

সিতাবিষক্ষীরতরুপ্রবালা মধুনা দ্রুতাঃ| শ্বাসহিধ্মাপহা লীঢাশ্ছর্দিঘ্ন্যস্তু বিষান্বিতাঃ| ক্ষৌদ্রোশীরমধুক্ষাররজনীকুটজত্বচঃ||২৩||

সিতাদিকং মধুনা লীঢং শ্বাসহিধ্মাহরম্| বিষান্বিতং ক্ষৌদ্রাদিকং লীঢং ছর্দিঘ্নম্| মধু যষ্টীমধু|| ২৩||

Adhikarana durnAmAdau viShayogaH (24) · Śloka 24

বিজযাপিপ্পলীমূলপিপ্পলীদ্বযচিত্রকৈঃ| পুষ্করাহ্বশঠীদ্রাক্ষাযবানীক্ষারদীপ্যকৈঃ| সিতাযষ্টীদ্বিবৃহতীসৈন্ধবৈঃ পালিকৈঃ পচেত্| সবিষার্দ্ধপলৈঃ প্রস্থং ঘৃতাত্তজ্জীর্ণভুক্পিবেত্| দুর্নামে হতুগুল্মার্মতিমিরক্রিমিপাণ্ডুতাঃ| গলগ্রহগ্রহোন্মাদকুষ্ঠানি চ নিযচ্ছতি||২৪||

বিজযাদিভিঃ পালিকৈর্বিষার্দ্ধপলযুক্তৈর্ঘৃতপ্রস্থং পচেত্| তদ্ঘৃতং জীর্ণভুক্পিবেত্ (জীর্ণং শীর্ণশাল্যন্নম্)| তচ্চ দুর্নামাদীনি নিযচ্ছতি নাশযতি|| ২৪||

Adhikarana udAvartAdau viShayogaH (25) · Śloka 25

কৃচ্ছ্রঘ্নাবিষপথ্যাগ্নিদন্তীদ্রাক্ষানিশাবিষাঃ| শিলাজতু বিষং মূত্রমুদাবর্তাশ্মরীহরম্||২৫||

বিষাদীন্যতিবিষান্তানি মূত্রকৃচ্ছ্রঘ্নানি| মূত্রশিলাজতুভ্যাং যুক্তং বিষমুদাবর্তাশ্মরীহরম্|| ২৫||

Adhikarana ashmaryAM viShayogaH (26) · Śloka 26

গোমূত্রক্ষারসিন্ধূত্থং বিষং পাষাণভেদকম্| বজ্রবদ্দারযত্যেতদেকতঃ পীতমশ্মরীম্||২৬||

গোমূত্রাদিকমেকতঃ পীতং বজ্রবদশ্মরীং দারযতি| 'গোমূত্রক্ষীরসিন্ধূত্থমি' তি চ পাঠঃ|| ২৬||

Adhikarana shUle viShayogaH (27) · Śloka 27

সমূলা পিপ্পলী মূত্রং বিষং শূলহরং তথা| বিষদ্রবন্তীমধুকদ্রাক্ষারাস্নাশঠীকণাঃ||২৭||

সমূলা মূলযুক্তা পিপ্পলী| পিপ্পলীমূলং মূত্রং বিষং চেতি শূলহরম্| তথৈব বিষদ্রবন্ত্যাদিকম্|| ২৭||

Adhikarana vRuddhau viShayogaH (28) · Śloka 28

এরণ্ডতৈলং ত্রিফলা গোমূত্রং চিত্রকো বিষম্| সর্পিষা সহিতং পীতং বাতাণ্ডত্বমপোহতি||২৮||

এরণ্ডতৈলাদিকং সর্পিষা সহিতং পীতং বাতাণ্ডত্বং বাতবৃদ্ধিমপোহতি নাশযতি|| ২৮||

Adhikarana gulmAdau viShayogaH (29) · Śloka 29

ত্রিফলাস্বর্জিকাক্ষারো বিষং গুল্মপ্রভেদনম্| বিষবেল্লমিসিক্ষীরং গুল্মপ্লীহনিবর্হণম্||২৯||

ত্রিফলাদিকং গুল্মস্য প্রভেদনং বিদারণং ভবতি| বিষাদিকং গুল্মপ্লীহ্নোর্নিবর্হণং নাশনম্| প্লীহা প্লীহোদরম্|| ২৯||

Adhikarana plIhodare viShayogaH (30) · Śloka 30

প্লীহোদরঘ্নং পযসা শতাহ্বা ক্রিমিজিদ্বিষম্||৩০||

পযসা ক্ষীরেণ যুক্তং শতাহ্বাদিকং প্লীহোদরঘ্নং ভবতি| ক্রিমিজিদ্বিডঙ্গম্|| ৩০||

Adhikarana kuShThe viShayogaH (31) · Śloka 31

বাযসীমূলনিষ্ক্বাথপীতং কুষ্ঠহরং বিষম্||৩১||

বাযস্যাঃ কাকোদুম্বরিকাযাঃ মূলানাং ক্বাথেন পীতং বিষং কুষ্ঠহরম্|| ৩১||

Adhikarana kuShThe viShayogAntaram (32) · Śloka 32

বাযস্যা রাজবৃক্ষত্বক্ত্রাযন্তী বাকুচীফলাত্| প্লীহঘ্নেভকণাভ্যাঞ্চ বিষং ক্বাথেন কুষ্ঠজিত্| অবল্গুজৈডগজযোর্বীজং ক্ষারদ্বযং বিষম্| লেপঃ সসৈন্ধবঃ পিষ্টো বারিণা কুষ্ঠনাশনঃ| চিত্রকার্কজটাহস্তিপিপ্পলীবাকুচীবিষৈঃ| গোমূত্রপিষ্টৈরন্যোঽন্যোমনোহ্বাস্নুক্পযোবিষৈঃ| সচন্দ্রলেখৈডগজকরঞ্জফলসৈন্ধবঃ| সব্যোষস্বর্জিকাক্ষারযবক্ষারনিশাদ্বযৈঃ| অগারধূমসহিতৈর্বস্তমূত্রেণ কল্কিতঃ||৩২||

বাযস্যাদীনাং ক্বাথেন পীতং বিষং কুষ্ঠজিত্| প্লীহঘ্নো রোহিষঃ| ইভকণা হস্তিপিপ্পলী| অবল্গুজবীজাদীনি বারিণা পিষ্টানি তৈঃ সৈন্ধবযুক্তো লেপঃ কুষ্ঠনাশনঃ স্যাত্| অবল্গুজঃ সোমরাজী| এডগজঃ প্রপুন্নাটঃ| অন্যো লেপশ্চিত্রকাদিভির্গোমূত্রপিষ্টৈর্ভবতি| চিত্রকার্কযোর্মূলম্| অন্যো লেপো মনোহ্বাদিভিরগারধূমান্তৈর্বস্তস্যাবের্মূত্রেণ কল্কিতৈর্ভবতি| মনোহ্বা মনশ্শিলা| স্নুক্পযঃ সুধাক্ষীরম্| চন্দ্রলেখাসোমরাজী|| ৩২||

Adhikarana vicarcikAdau viShayogaH (33) · Śloka 33

ভল্লাতকাগ্নিশম্যাকবিষৈর্গোমূত্রপেষিতৈঃ| লেপো বিচর্চিকাদদ্রুশতারুঃকিটিভাপহঃ| শম্যাকপত্রত্বঙ্মূলং বিষং তক্রং চ তদ্গুণম্||৩৩||

ভল্লাতকাদিভির্গোমূত্রপেষিতৈর্লেপো বিচর্চিকাদ্যাপহঃ| ভল্লাতকোঽরুষ্করঃ| অগ্নিশ্চিত্রকঃ| শম্যাকস্যারগ্বধস্য পত্রাদিকং তক্রপেষিতং তদ্গুণং ভল্লাতকাদিগুণং বিচর্চিকাদিঘ্নমিত্যর্থঃ||৩৩||

Adhikarana shvitrAdau viShayogaH (34) · Śloka 34

বিষভল্লাতকদ্বীপি গুঞ্জানিম্বফলৈর্জযেত্| লেপোঽম্লপিষ্টৈঃ শ্বিত্রাণি পুণ্ডরীকঞ্চ দারুণম্| বক্রকুষ্ঠরসদ্বীপিস্পৃক্কাপত্রৈলবালুকম্| পিষ্টং খদিরতোযেন ত্রিরাত্রমুষিতং পিবেত্| শ্বিত্রী বিষেণ সংসৃষ্টং ততঃ স্ফোটান্ কিলাসজান্| কণ্টকেন বিভিদ্যানুলেপৈর্লিম্পেত কৌষ্ঠিকৈঃ| অথবা করবীরার্কমূলবাকুচিকাবিষৈঃ| বস্তাম্বুপিষ্টৈঃ সদ্বীপিদ্বিপপিপ্পল্যরুষ্করৈঃ||৩৪||

বিষাদিভিরম্লৈঃ কাঞ্জিকাদিভিঃ পিষ্টৈর্লেপঃ শ্বিত্রাণি জযেত্| দারুণং পুণ্ডরীকাখ্যং কুষ্ঠঞ্চ| দ্বীপিশ্চিত্রকঃ| গুঞ্জানিম্বযোঃ ফলম্| বক্রাদিকং খদিরতোযেন পিষ্টং ত্রিরাত্রমুষিতং বিষেণ সংসৃষ্টং কৃত্বা শ্বিত্রী পিবেত্| রসঃ সর্জরসঃ বোলশ্চ| ততস্তেন কিলাসে যে স্ফোটা জাযন্তে তান্ কণ্টকেন বিভিদ্যানু পশ্চাত্ কুষ্ঠোক্তৈর্লেপৈর্লিম্পেত্| অথবা স্ফোটেষু ভিন্নেষু করবীরাদিভিররুষ্করান্তৈর্বস্তমূত্রেণ পিষ্টৈর্লিম্পেত্| দ্বিপপিপ্পলী হস্তিপিপ্পলী|| ৩৪||

Adhikarana savarNIkaraNam (35) · Śloka 35

লাক্ষাসুরাহ্বামঞ্জিষ্ঠাকুষ্ঠপদ্মকশারিবাঃ| গুঞ্জাফলং কুরবকো লাঙ্গলী বজ্রকন্দকঃ| বারাহীকন্দকাস্ফোতা সপ্তাহ্বগিরিকর্ণিকাঃ| অর্কাশ্বমারযোর্মূলং নাগপুষ্পং নতং নিশে| দন্তী বিষং সাতিবিষং পিপ্পলী মরিচানি চ| তৈস্তৈলং কটুতৈলং বা শ্বিত্রস্যাভ্যঞ্জনং পচেত্| সবর্ণীকরণং শ্রেষ্ঠমাস্তিকস্য বচো যথা||৩৫||

লাক্ষাদিভির্মরিচান্তৈস্তৈলং কটুতৈলং বা শ্বিত্রস্যাভ্যঞ্জনং পচেত্| এতচ্ছ্রেষ্ঠং সবর্ণীকরণম্| সুবোধম্|| ৩৫||

Adhikarana garbhapAtane pralepaH (36) · Śloka 36

বীরালাঙ্গলিকীদন্তীবিষপাষাণভেদকৈঃ| প্রযোজ্যো মূঢগর্ভাণাং প্রলেপো গর্ভমোচনঃ||৩৬||

বীরাদিভিঃ প্রলেপো মূঢগর্ভাণাং গর্ভপাতনঃ প্রযোজ্যঃ|| ৩৬||

Adhikarana vandhyatvaharaNayogaH (37) · Śloka 37

স্বরসং বীজপূরস্য বচাং ব্রাহ্মীরসং ঘৃতম্| বন্ধ্যা পিবন্তী সবিষং সুপুত্রৈঃ পরিবার্যতে||৩৭||

বীজপূরস্বরসাদিকং সবিষং বিষসহিতং পিবন্তী বন্ধ্যা স্ত্রী সুপুত্রৈঃ পরিবার্যতে|| ৩৭||

Adhikarana naShTashukrayogaH (38) · Śloka 38

নষ্টশুক্রঃ পযোদ্রাক্ষাকপিকচ্ছুবচাবিষম্||৩৮||

যস্তু নষ্টশুক্রঃ স দ্রাক্ষাদিযুক্তং পয উপযুঞ্জীতেত্যর্থঃ|| ৩৮||

Adhikarana netrarogeShu viShopayogaH (39) · Śloka 39

বিষং সর্পিঃ সিতাক্ষৌদ্রং তিমিরাপহমঞ্জনম্| বিষং চৈকমজাক্ষীরকল্কিতং ঘৃতধূপিতম্| বিষং ধাত্রীফলরসৈরসকৃত্ পরিভাবিতম্| অঞ্জনং শঙ্খসহিতং প্রগাঢতিমিরপ্রণুত্| বিষমিন্দ্রাযুধং স্তন্যে ঘৃষ্টং কাচজিদঞ্জনম্| বীজপূররসে ঘৃষ্টং বিষং তদ্বত্সিতাযুতম্| বিষং মাগধিকা দ্বে চ নিশে কাচঘ্নমঞ্জনম্| শুক্লার্মজিদ্বিষং কৃষ্ণাযুক্তং গোমূত্রভাবিতম্| সমুদ্রফেনস্ফটিককুরুবিন্দসুধাঞ্জনম্| কূর্মপৃষ্ঠঞ্চ তুল্যানি তেভ্যোঽর্দ্ধাংশা মনশ্শিলা| অর্দ্ধহীনানি মরিচসৈন্ধবাযোরজাংসি চ| অতো যথোত্তরং দদ্যাদযসা চ সমং বিষম্| রসক্রিযেযং মধুনা শুক্লপিল্লার্মকাচহৃত্| অভীক্ষ্ণং শীততোযেন সিঞ্চেন্নেত্রে বিষাঞ্জিতে| রসোনকন্দমরিচবিষসর্ষপসৈন্ধবৈঃ| পিল্লেঽক্ষি লিখিতং পূর্বং সুরসারসপেষিতঃ| পূরযেত্ সর্পিষা চানু সর্পিরেব চ পাযযেত্| মধূকসারমধুকবিষক্ষীরজলৈর্ঘৃতম্| পক্বং সন্তর্পণং শ্রেষ্ঠং রাত্র্যন্ধত্বে চিরোত্থিতে||৩৯||

বিষাদিকং তিমিরাপহমঞ্জনম্| একং কেবলং বিষমজাক্ষীরকল্কিতং ঘৃতধূপিতং চ শব্দাদঞ্জনম্| আমলকরসেনাসকৃদনেকবারং ভাবিতং বিষং শঙ্খেন যুক্তমঞ্জনং প্রগাঢং ঘনং তিমিরং প্রণুদতি| ইন্দ্রাযুধনামকং বিষং স্তন্যে ঘৃষ্টমঞ্জনং কাচজিদ্ ভবতি| বীজপূররসে ঘৃষ্টং বিষং সশর্করং তদ্বদিতি কাচজিদঞ্জনম্| তথৈব মাগধিকাদিভির্যুক্তং বিষমঞ্জনম্| পিপ্পলীযুক্তং বিষং গোমূত্রভাবিতং শুক্লজিদর্মজিচ্চাঞ্জনম্| সমুদ্রফেনাদীনি কূর্মপৃষ্ঠান্তানি পরস্পরতুল্যানি| তেভ্য একীকৃতেভ্যোঽর্দ্ধাংশা মনশ্শিলা| মরিচাদীনি যথোত্তরমর্দ্ধহীনানি| তেন মনশ্শিলাযা অর্দ্ধেন হীনং মরিচম্| তস্যার্দ্ধেন হীনং সৈন্ধবম্| তস্যার্দ্ধেনাঽযোরজঃ| অযোরজসা সমং বিষম্| মধুনা মাক্ষিকেণ কৃতেযং রসক্রিযা শুক্রাদিহৃত্| কুরুবিন্দো মুস্তঃ| বিষপ্রযোগাদঞ্জিতে শীততোযেনাভীক্ষ্ণং সিঞ্চেত্| পিল্লেঽক্ষি লিখিত্বা লশুনকন্দাদিভিঃ সুরসারসপেষিতৈঃ পূর্বং পূরযেত্| পশ্চাচ্চ সর্পিষা পূরযেত্| সর্পিরেব পাযযেচ্চ| সুরসা মূর্বা| মধূকসারাদিভির্ঘৃতং পক্বং চিরোত্থিতে রাত্র্যন্ধত্বে শ্রেষ্ঠং সন্তর্পণম্|| ৩৯||

Adhikarana shiroruji saviShayogaH (40) · Śloka 40

নস্যং শিরোরুক্শমনং প্রত্যক্পুষ্পী সিতা বিষম্| অথবা ঘৃতযষ্ট্যাহ্বশর্করাবিষসংযুতাঃ||৪০||

প্রত্যক্পুষ্প্যাদিকং নস্যং শিরুরুজাং শমনং নাশনম্| অথবা ঘৃতাদিকং বিষসংযুতং নস্যং শিরোরুক্শমনম্| প্রত্যক্পুষ্প্যপামার্গঃ||৪০||

Adhikarana pUtinAsAyAM yogaH (41) · Śloka 41

শুণ্ঠী পথ্যা বিষং পাঠা দ্রবন্তী পূতিনাসজিত্||৪১||

শুণ্ঠ্যাদিকং নস্যং পূতিনাসজিত্|| ৪১||

Adhikarana palitAdau viShayogaH (42) · Śloka 42

কটুতৈলং বিষং নস্যং পলিতারূংষিকাপহম্||৪২||

কটুতৈলাদি সুবোধম্|| ৪২||

Adhikarana karNashUle viShayogaH (43) · Śloka 43

স্বর্জিকাক্ষারসিন্ধূত্থশুক্তযুক্তং বিষং পরম্| কর্ণযোঃ পূরণং তীব্রকর্ণশূলনিবর্হণম্||৪৩||

স্বর্জিকাক্ষারাদিকং কর্ণপূরণং পরং তীব্রকর্ণশূলনিবর্হণম্||৪৩||

Adhikarana mukhAmayeShu viShayogaH (44) · Śloka 44

প্রপৌণ্ডরীকমঞ্জিষ্ঠাবিষসিন্ধুসমুদ্ভবৈঃ| নিহন্তি সাধিতং তৈলং গণ্ডূষেণ মুখামযান্||৪৪||

প্রপ্রৌণ্ডরীকাদিভিঃ সাধিতং তৈলং গণ্ডূষেণ মুখামযান্ নিহন্তি| সিন্ধুসমুদ্ভবং সৈন্ধবম্||৪৪||

Adhikarana skhaladvAci viShayogaH (45) · Śloka 45

দেবদারুবিষং সর্পির্গোমূত্রং কণ্টকারিকা| বাচঃ স্খলনতাং হন্তি পীতমিত্যাহ কাশ্যপঃ||৪৫||

দেবদার্বাদিকং পীতং বাচঃ স্খলনতাং স্খলনং হন্তীতি কাশ্যপ আহ|| ৪৫||

Adhikarana viShaprayogalAbhAH (46-48) · Śloka 48

শত্রুপ্রযুক্তা দ্বিষতো গরাদ্বা লূতাভুজঙ্গাখুগণাজরাযাঃ| অকালমৃত্যোর্গ্রহপাপ্মতো বা বিষাশিনো নাস্তি ভযং নরস্য||৪৬|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতা বষ্টাঙ্গসংগ্রহসংহিতাযামুত্তরতন্ত্রে বিষোপ যোগীযো নামাষ্টচত্বারিংশোঽধ্যাযঃ||৪৮||

বিষপ্রযোগগস্য প্রযোজনমুচ্যতে-বিষাশিনো নরস্য শত্রুণা প্রযুক্তাদ্বিষাত্ গরাচ্চ লূতাদিতশ্চ ভযং নাস্তীতি|| ৪৬|| ইতি শ্রীমন্মহামহোপাধ্যাযেন্দুবিরচিতাযামষ্টাঙ্গসংগ্রহ ব্যাখ্যাযাং শশিলেখাযামুত্তরতন্ত্রে অষ্টচত্বারিংশোঽধ্যাযঃ