Adhikarana 1 (1-2) · Śloka 2
athātaḥ sarpadaṣṭaviṣavijñānīyaṁ kalpaṁ vyākhyāsyāmaḥ ||1|| yathōvāca bhagavān dhanvantariḥ ||2||
अथातः सर्पदष्टविषविज्ञानीयं कल्पं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
jaṅgamaviṣāśrayēṣu mahāviṣatvēna sarpasyaivātra prādhānyāttaddaṣṭavijñānaṁ pratipādayitukāmaḥ prāha- athāta ityādi||1-2||
Adhikarana 2 (3) · Śloka 3
dhanvantariṁ mahāprājñaṁ sarvaśāstraviśāradam | pādayōrupasaṅgr̥hya suśrutaḥ paripr̥cchati ||3||
धन्वन्तरिं महाप्राज्ञं सर्वशास्त्रविशारदम् | पादयोरुपसङ्गृह्य सुश्रुतः परिपृच्छति ||३||
🔊 Audio coming soon
pādayōrupasaṅgr̥hya pādapatanaṁ kr̥tvētyarthaḥ||3||
Adhikarana 3 (4) · Śloka 4
sarpasaṅkhyāṁ vibhāgaṁ ca daṣṭalakṣaṇamēva ca | jñānaṁ ca viṣavēgānāṁ bhagavan ! vaktumarhasi ||4||
सर्पसङ्ख्यां विभागं च दष्टलक्षणमेव च | ज्ञानं च विषवेगानां भगवन् ! वक्तुमर्हसि ||४||
🔊 Audio coming soon
kiṁ paripr̥cchatītyāha- sarpasaṅkhyāmityādi| saṅkhyā gaṇanā, vibhāgō viśēṣabhāgaḥ pr̥thakkaraṇam| arhasi yōgyō bhavasi||4||
Adhikarana 4 (5-8) · Śloka 9
tasya tadvacanaṁ śrutvā prābravīdbhiṣajāṁ varaḥ | asaṅkhyā vāsukiśrēṣṭhā vikhyātāstakṣakādayaḥ ||5|| mahīdharāśca nāgēndrā hutāgnisamatējasaḥ | yē cāpyajasraṁ garjanti varṣanti ca tapanti ca ||6|| sasāgaragiridvīpā yairiyaṁ dhāryatē mahī | kruddhā niḥśvāsadr̥ṣṭibhyāṁ yē hanyurakhilaṁ jagat ||7|| namastēbhyō'sti nō tēṣāṁ kāryaṁ kiñciccikitsayā | yē tu daṁṣṭrāviṣā bhaumā yē daśanti ca mānuṣān ||8|| tēṣāṁ saṅkhyāṁ pravakṣyāmi yathāvadanupūrvaśaḥ |9|
तस्य तद्वचनं श्रुत्वा प्राब्रवीद्भिषजां वरः | असङ्ख्या वासुकिश्रेष्ठा विख्यातास्तक्षकादयः ||५|| महीधराश्च नागेन्द्रा हुताग्निसमतेजसः | ये चाप्यजस्रं गर्जन्ति वर्षन्ति च तपन्ति च ||६|| ससागरगिरिद्वीपा यैरियं धार्यते मही | क्रुद्धा निःश्वासदृष्टिभ्यां ये हन्युरखिलं जगत् ||७|| नमस्तेभ्योऽस्ति नो तेषां कार्यं किञ्चिच्चिकित्सया | ये तु दंष्ट्राविषा भौमा ये दशन्ति च मानुषान् ||८|| तेषां सङ्ख्यां प्रवक्ष्यामि यथावदनुपूर्वशः |९|
🔊 Audio coming soon
tasya tadvacanamityādi| vāsukiśrēṣṭhā vāsukiḥ śrēṣṭhō yēṣāṁ tē tathā| asti nō tēṣāṁ kāryaṁ kiñciccikitsayēti tēṣāṁ takṣakādīnāṁ cikitsayā kiñcit kāryaṁ nāsti| yē tu daṁṣṭrētyādi| anupūrvaśaḥ anukramēṇa||5-8||-
Adhikarana 5 (9-12) · Śloka 13
aśītistvēva sarpāṇāṁ bhidyatē pañcadhā tu sā ||9|| darvīkarā maṇḍalinō rājimantastathaiva ca | nirviṣā vaikarañjāśca trividhāstē punaḥ smr̥tāḥ ||10|| darvīkarā maṇḍalinō rājimantaśca pannagāḥ | tēṣu darvīkarā jñēyā viṁśatiḥ ṣaṭ ca pannagāḥ ||11|| dvāviṁśatirmaṇḍalinō rājimantastathā daśa | nirviṣā dvādaśa jñēyā vaikarañjāstrayastathā ||12|| vaikarañjōdbhavāḥ sapta citrā maṇḍalirājilāḥ |13|
अशीतिस्त्वेव सर्पाणां भिद्यते पञ्चधा तु सा ||९|| दर्वीकरा मण्डलिनो राजिमन्तस्तथैव च | निर्विषा वैकरञ्जाश्च त्रिविधास्ते पुनः स्मृताः ||१०|| दर्वीकरा मण्डलिनो राजिमन्तश्च पन्नगाः | तेषु दर्वीकरा ज्ञेया विंशतिः षट् च पन्नगाः ||११|| द्वाविंशतिर्मण्डलिनो राजिमन्तस्तथा दश | निर्विषा द्वादश ज्ञेया वैकरञ्जास्त्रयस्तथा ||१२|| वैकरञ्जोद्भवाः सप्त चित्रा मण्डलिराजिलाः |१३|
🔊 Audio coming soon
aśītirityādi| sā aśītiḥ| darvīkarāḥ phaṇāvantaḥ, maṇḍalinaḥ phaṇāvarjitā vividhamaṇḍalaiścitritāḥ, rājimantō rēkhāyuktāḥ phaṇāvarjitā īṣadviṣā gamālādayaḥ, nirviṣā viṣarahitāḥ dundubhigaurāhikādayaḥ; kēcit `nir’ śabdamīṣadarthē vyākhyānayanti, tēna nirviṣā īṣadviṣāḥ; yathā- anudarā kanyēti| vaikarañjāḥ saṅkīrṇajātāḥ, pr̥thagjātīyasarpiṇīpr̥thagjātīyasarpābhyāṁ jātā vaikarañjāḥ | ēṣvēva nirviṣavaikarañjayōrantarbhāvāt kathamaśītiḥ pūryata ityāha- tēṣvityādi| citrā maṇḍalirājilā vaikarañjōdbhavāḥ sapta bhavanti; tatra maṇḍalinaścatvāraḥ, rājilāstrayaḥ| atrāyamēva pāṭhō nyāyyaḥ, jējjaṭagayadāsaprabhr̥tibhiraṅgīkr̥tatvāt||9-12||-
Adhikarana 6 (13) · Śloka 14
pādābhimr̥ṣṭā duṣṭā vā kruddhā grāsārthinō'pi vā ||13|| tē daśanti mahākrōdhāstrividhaṁ bhīmadarśanāḥ |14|
पादाभिमृष्टा दुष्टा वा क्रुद्धा ग्रासार्थिनोऽपि वा ||१३|| ते दशन्ति महाक्रोधास्त्रिविधं भीमदर्शनाः |१४|
🔊 Audio coming soon
saṅkṣēpēṇa vibhāgaṁ pratipādya daṣṭasya daṁśanapūrvakatvāddaṁśanalakṣaṇaṁ pratipādayitukāmō daṁśasya kāraṇāni nirdiśannāha- pādābhimr̥ṣṭā ityādi| abhimr̥ṣṭā marditāḥ, duṣṭāḥ svabhāvaduṣṭāḥ, kruddhāḥ kupitāḥ, apiśabdō'trānuktasamuccayē, tēnātyāsannabhītaśaṅkitakrāntādayō grāhyāḥ| tē daśanti mahākrōdhāstrividhaṁ bhīmadarśanā iti sarpā mahākrōdhāḥ pracaṇḍakōpāḥ, ata ēva bhīmadarśanāḥ; trividhaṁ yathā bhavatyēvaṁ daśanti bhakṣayanti||13||-
Adhikarana 7 (14-19) · Śloka 19
sarpitaṁ raditaṁ cāpi tr̥tīyamatha nirviṣam | sarpāṅgābhihataṁ kēcidicchanti khalu tadvidaḥ ||14|| padāni yatra dantānāmēkaṁ dvē vā bahūni vā | nimagnānyalparaktāni yānyudvr̥tya karōti hi ||15|| cañcumālakayuktāni vaikr̥tyakaraṇāni ca | saṅkṣiptāni saśōphāni vidyāttat sarpitaṁ bhiṣak ||16|| rājyaḥ salōhitā yatra nīlāḥ pītāḥ sitāstathā | vijñēyaṁ raditaṁ tattu jñēyamalpaviṣaṁ ca tat ||17|| aśōphamalpaduṣṭāsr̥k prakr̥tisthasya dēhinaḥ | padaṁ padāni vā vidyādaviṣaṁ taccikitsakaḥ ||18|| sarpaspr̥ṣṭasya bhīrōrhi bhayēna kupitō'nilaḥ | kasyacit kurutē śōphaṁ sarpāṅgābhihataṁ tu tat ||19||
सर्पितं रदितं चापि तृतीयमथ निर्विषम् | सर्पाङ्गाभिहतं केचिदिच्छन्ति खलु तद्विदः ||१४|| पदानि यत्र दन्तानामेकं द्वे वा बहूनि वा | निमग्नान्यल्परक्तानि यान्युद्वृत्य करोति हि ||१५|| चञ्चुमालकयुक्तानि वैकृत्यकरणानि च | सङ्क्षिप्तानि सशोफानि विद्यात्तत् सर्पितं भिषक् ||१६|| राज्यः सलोहिता यत्र नीलाः पीताः सितास्तथा | विज्ञेयं रदितं तत्तु ज्ञेयमल्पविषं च तत् ||१७|| अशोफमल्पदुष्टासृक् प्रकृतिस्थस्य देहिनः | पदं पदानि वा विद्यादविषं तच्चिकित्सकः ||१८|| सर्पस्पृष्टस्य भीरोर्हि भयेन कुपितोऽनिलः | कस्यचित् कुरुते शोफं सर्पाङ्गाभिहतं तु तत् ||१९||
🔊 Audio coming soon
ētadēva daṁśatraividhyamuddiṣṭaṁ nirdiśannāha- sarpitamityādi| tēṣāṁ lakṣaṇamāha- padānītyādi| padāni kṣatāni| ēkamityādi| padēṣu yathōttaraṁ viṣabāhulyam| nimagnāni anudgatāni| yānyudvr̥tya karōti hi yāni padānyudvr̥tya unmōṭhya sarpaḥ karōti| cañcumālakayuktānīti upari piḍakāsadr̥śairācitānītyarthaḥ; gayī tu cañcumālikāḥ sarpadaṣṭasthānasya pārśvē vaṭaprarōhāgratulyā viṣōtpannā aṅkurā bhavantīti vyākhyānayati| vaikr̥tyakaraṇāni vikārabhāvavidhāyakāni| saṅkṣiptānītyādi| saṅkṣiptāni sūkṣmāṇi| sarpitam atyavagāḍham| rājya ityādi| rājyō rēkhāḥ, raditaṁ vilikhitamanavagāḍham, ata ēvālpaviṣam| aśōphamityādi| prakr̥tisthasyēti kāyavākcittēṣu svēna bhāvēnāvasthitasya| padaṁ padāni vēti ēkaṁ padaṁ bahūni vā padānītyarthaḥ| sarpaspr̥ṣṭasyētyādi| tuśabdaścārthē, tēna kaṇṭakādividdhē'pi śaṅkāviṣaṁ bhavati||14-19||
Adhikarana 8 (20-21) · Śloka 21
vyādhitōdvignadaṣṭāni jñēyānyalpaviṣāṇi tu | tathā'tivr̥ddhabālābhidaṣṭamalpaviṣaṁ smr̥tam ||20|| suparṇadēvabrahmarṣiyakṣasiddhaniṣēvitē | viṣaghnauṣadhiyuktē ca dēśē na kramatē viṣam ||21||
व्याधितोद्विग्नदष्टानि ज्ञेयान्यल्पविषाणि तु | तथाऽतिवृद्धबालाभिदष्टमल्पविषं स्मृतम् ||२०|| सुपर्णदेवब्रह्मर्षियक्षसिद्धनिषेविते | विषघ्नौषधियुक्ते च देशे न क्रमते विषम् ||२१||
🔊 Audio coming soon
sarpāvasthāviśēṣatō'lpaviṣatvamuddiśannāha- vyādhitētyādi| daṣṭāni bhakṣyasthānāni| viśiṣṭadēvasēvitē viśiṣṭauṣadhisēvitē ca dēśē'viṣatvamuddiśannāha- suparṇētyādi| suparṇō garuḍaḥ| bhūtāḥ svanāmaprasiddhāḥ||20-21||
Adhikarana 9 (22-24) · Śloka 24
rathāṅgalāṅgalacchatrasvastikāṅkuśadhāriṇaḥ | jñēyā darvīkarāḥ sarpāḥ phaṇinaḥ śīghragāminaḥ ||22|| maṇḍalairvividhaiścitrāḥ pr̥thavō mandagāminaḥ | jñēyā maṇḍalinaḥ sarpā jvalanārkasamaprabhāḥ ||23|| snigdhā vividhavarṇābhistiryagūrdhvaṁ ca rājibhiḥ | citritā iva yē bhānti rājimantastu tē smr̥tāḥ ||24||
रथाङ्गलाङ्गलच्छत्रस्वस्तिकाङ्कुशधारिणः | ज्ञेया दर्वीकराः सर्पाः फणिनः शीघ्रगामिनः ||२२|| मण्डलैर्विविधैश्चित्राः पृथवो मन्दगामिनः | ज्ञेया मण्डलिनः सर्पा ज्वलनार्कसमप्रभाः ||२३|| स्निग्धा विविधवर्णाभिस्तिर्यगूर्ध्वं च राजिभिः | चित्रिता इव ये भान्ति राजिमन्तस्तु ते स्मृताः ||२४||
🔊 Audio coming soon
idānīṁ cikitsōpayōgidarvīkarādiliṅgamuddiśannāha- rathāṅgētyādi| rathāṅgaṁ cakraṁ, lāṅgalaṁ halaṁ, dhāriṇa iti yatō rathāṅgādīnāmākr̥tiṁ dhārayanti| maṇḍalairityādi| pr̥thavō vistīrṇāḥ||22-24||
Adhikarana 10 (25-28) · Śloka 28
muktārūpyaprabhā yē ca kapilā yē ca pannagāḥ | sugandhayaḥ suvarṇābhāstē jātyā brāhmaṇāḥ smr̥tāḥ ||25|| kṣatriyāḥ snigdhavarṇāstu pannagā bhr̥śakōpanāḥ | sūryacandrākr̥ticchatralakṣma tēṣāṁ tathā'mbujam ||26|| kr̥ṣṇā vajranibhā yē ca lōhitā varṇatastathā | dhūmrāḥ pārāvatābhāśca vaiśyāstē pannagāḥ smr̥tāḥ ||27|| mahiṣadvīpivarṇābhāstathaiva paruṣatvacaḥ | bhinnavarṇāśca yē kēcicchūdrāstē parikīrtitāḥ ||28||
मुक्तारूप्यप्रभा ये च कपिला ये च पन्नगाः | सुगन्धयः सुवर्णाभास्ते जात्या ब्राह्मणाः स्मृताः ||२५|| क्षत्रियाः स्निग्धवर्णास्तु पन्नगा भृशकोपनाः | सूर्यचन्द्राकृतिच्छत्रलक्ष्म तेषां तथाऽम्बुजम् ||२६|| कृष्णा वज्रनिभा ये च लोहिता वर्णतस्तथा | धूम्राः पारावताभाश्च वैश्यास्ते पन्नगाः स्मृताः ||२७|| महिषद्वीपिवर्णाभास्तथैव परुषत्वचः | भिन्नवर्णाश्च ये केचिच्छूद्रास्ते परिकीर्तिताः ||२८||
🔊 Audio coming soon
idānīṁ brāhmaṇādijātiparijñānāyāha- muktārūpyētyādi| sūryādivattēṣāṁ lakṣma cihnaṁ, tathā ambujaḥ śaṅkhaḥ| tathā ca vr̥ddhavāgbhaṭaḥ- “bhōgē'rdhacandraśrīvatsaśaṅkhacakrahalāṅkitāḥ”- iti| dvīpī citrakaḥ||25-28||
Adhikarana 11 (29) · Śloka 31
kōpayantyanilaṁ jantōḥ phaṇinaḥ sarva ēva tu | pittaṁ maṇḍalinaścāpi kaphaṁ cānēkarājayaḥ ||29|| apatyamasavarṇābhyāṁ dvidōṣakaralakṣaṇam | jñēyau dōṣaiśca dampatyō... |31|
कोपयन्त्यनिलं जन्तोः फणिनः सर्व एव तु | पित्तं मण्डलिनश्चापि कफं चानेकराजयः ||२९|| अपत्यमसवर्णाभ्यां द्विदोषकरलक्षणम् | ज्ञेयौ दोषैश्च दम्पत्यो... |३१|
🔊 Audio coming soon
apatyamityādi| asamānavarṇābhyāṁ sarpasarpiṇībhyāṁ yat apatyaṁ vaikarañjākhyaṁ, taddvidōṣakaralakṣaṇaṁ jñēyaṁ; dvidōṣakarāṇi lakṣaṇāni yatra taddvidōṣakaralakṣaṇaṁ; ētēna vaikarañjasya dvidōṣakartr̥tvamuktam| apatyē yau dvidōṣau tau kayōrityāha- jñēyāviti|- jñēyau jñātavyau| dampatyōḥ pitr̥mātrōrityarthaḥ||29||-
Adhikarana 12 (30-31) · Śloka 31
...rviśēṣaścātra vakṣyatē ||30|| rajanyāḥ paścimē yāmē sarpāścitrāścaranti hi | śēṣēṣūktā maṇḍalinō divā darvīkarāḥ smr̥tāḥ ||31||
...र्विशेषश्चात्र वक्ष्यते ||३०|| रजन्याः पश्चिमे यामे सर्पाश्चित्राश्चरन्ति हि | शेषेषूक्ता मण्डलिनो दिवा दर्वीकराः स्मृताः ||३१||
🔊 Audio coming soon
ēṣāṁ madhyē kē kasmin kālē vicarantītyāha- viśēṣa ityādi| paścimē yāmē caturthē prahara ityarthaḥ| citrā atra rājimantaḥ| śēṣēṣu praharēṣu `rajanyā ēva’ iti śēṣaḥ||30-31||
Adhikarana 13 (32) · Śloka 32
darvīkarāstu taruṇā vr̥ddhā maṇḍalinastathā | rājimantō vayōmadhyā jāyantē mr̥tyuhētavaḥ ||32||
दर्वीकरास्तु तरुणा वृद्धा मण्डलिनस्तथा | राजिमन्तो वयोमध्या जायन्ते मृत्युहेतवः ||३२||
🔊 Audio coming soon
tēṣāṁ darvīkarādīnāmugraviṣatvē vayō'vasthāmuddiśannāha- darvīkarā ityādi| darvīkarādayō mr̥tyuhētavō jāyantē bhavantītyarthaḥ||32||
Adhikarana 14 (33) · Śloka 33
nakulākulitā bālā vāriviprahatāḥ kr̥śāḥ | vr̥ddhā muktatvacō bhītāḥ sarpāstvalpaviṣāḥ smr̥tāḥ ||33||
नकुलाकुलिता बाला वारिविप्रहताः कृशाः | वृद्धा मुक्तत्वचो भीताः सर्पास्त्वल्पविषाः स्मृताः ||३३||
🔊 Audio coming soon
tēṣāmēvālpaviṣatvē hētumāha- nakulākulitā ityādi| nakulēna ākulitāḥ kadarthitāḥ; vāriviprahatā vāriṇā jalēna viśēṣēṇa prahatā abhibhūtāḥ; muktatvacō muktakañcukāḥ, tathā bhītāḥ sarpā alpaviṣā bhavanti||33||
Adhikarana 15 (34) · Śloka 34
tatra, darvīkarāḥ- kr̥ṣṇasarpō, mahākr̥ṣṇaḥ, kr̥ṣṇōdaraḥ śvētakapōtō, mahākapōtō, balāhakō, mahāsarpaḥ, śaṅkhakapālō , lōhitākṣō, gavēdhukaḥ, parisarpaḥ, khaṇḍaphaṇaḥ, kakudaḥ, padmō, mahāpadmō, darbhapuṣpō, dadhimukhaḥ, puṇḍarīkō, bhrūkuṭīmukhō, viṣkiraḥ, puṣpābhikīrṇō, girisarpaḥ, r̥jusarpaḥ, śvētōdarō, mahāśirā, alagarda, āśīviṣa iti (1); maṇḍalinastu- ādarśamaṇḍalaḥ, śvētamaṇḍalō, raktamaṇḍalaḥ, citramaṇḍalaḥ, pr̥ṣatō, rōdhrapuṣpō, milindakō, gōnasō, vr̥ddhagōnasaḥ, panasō, mahāpanasō, vēṇupatrakaḥ, śiśukō madanaḥ, pālindiraḥ, piṅgalaḥ , tantukaḥ puṣpapāṇḍuḥ, ṣaḍaṅgō, agnikō babhruḥ, kaṣāyaḥ, kaluṣaḥ pārāvatō, hastābharaṇaḥ, citrakaḥ, ēṇīpada iti (2); rājimantastu- puṇḍarīkō rājicitrō, aṅgularājiḥ, bindurājiḥ, kardamakaḥ, tr̥ṇaśōṣakaḥ, sarṣapakaḥ śvētahanuḥ, darbhapuṣpaścakrakō, gōdhūmakaḥ, kikkisāda iti (3); nirviṣāstu- galagōlī, śūkapatrō, ajagarō, divyakō, varṣāhikaḥ, puṣpaśakalī, jyōtīrathaḥ, kṣīrikāpuṣpakō, ahipatākō, andhāhikō, gaurāhikō, vr̥kṣēśaya iti (4); vaikarañjāstu trayāṇāṁ darvīkarādīnāṁ vyatikarājjātāḥ, tadyathā- mākuliḥ, pōṭagalaḥ, snigdharājiriti | tatra, kr̥ṣṇasarpēṇa gōnasyāṁ vaiparītyēna vā jātō mākuliḥ; rājilēna gōnasyāṁ vaiparītyēna vā jātaḥ pōṭagalaḥ; kr̥ṣṇasarpēṇa rājimatyāṁ vaiparītyēna vā jātaḥ snigdharājiriti | tēṣāmādyasya pitr̥vadviṣōtkarṣō, dvayōrmātr̥vadityēkē (5) |34|
तत्र, दर्वीकराः- कृष्णसर्पो, महाकृष्णः, कृष्णोदरः श्वेतकपोतो, महाकपोतो, बलाहको, महासर्पः, शङ्खकपालो , लोहिताक्षो, गवेधुकः, परिसर्पः, खण्डफणः, ककुदः, पद्मो, महापद्मो, दर्भपुष्पो, दधिमुखः, पुण्डरीको, भ्रूकुटीमुखो, विष्किरः, पुष्पाभिकीर्णो, गिरिसर्पः, ऋजुसर्पः, श्वेतोदरो, महाशिरा, अलगर्द, आशीविष इति (१); मण्डलिनस्तु- आदर्शमण्डलः, श्वेतमण्डलो, रक्तमण्डलः, चित्रमण्डलः, पृषतो, रोध्रपुष्पो, मिलिन्दको, गोनसो, वृद्धगोनसः, पनसो, महापनसो, वेणुपत्रकः, शिशुको मदनः, पालिन्दिरः, पिङ्गलः , तन्तुकः पुष्पपाण्डुः, षडङ्गो, अग्निको बभ्रुः, कषायः, कलुषः पारावतो, हस्ताभरणः, चित्रकः, एणीपद इति (२); राजिमन्तस्तु- पुण्डरीको राजिचित्रो, अङ्गुलराजिः, बिन्दुराजिः, कर्दमकः, तृणशोषकः, सर्षपकः श्वेतहनुः, दर्भपुष्पश्चक्रको, गोधूमकः, किक्किसाद इति (३); निर्विषास्तु- गलगोली, शूकपत्रो, अजगरो, दिव्यको, वर्षाहिकः, पुष्पशकली, ज्योतीरथः, क्षीरिकापुष्पको, अहिपताको, अन्धाहिको, गौराहिको, वृक्षेशय इति (४); वैकरञ्जास्तु त्रयाणां दर्वीकरादीनां व्यतिकराज्जाताः, तद्यथा- माकुलिः, पोटगलः, स्निग्धराजिरिति | तत्र, कृष्णसर्पेण गोनस्यां वैपरीत्येन वा जातो माकुलिः; राजिलेन गोनस्यां वैपरीत्येन वा जातः पोटगलः; कृष्णसर्पेण राजिमत्यां वैपरीत्येन वा जातः स्निग्धराजिरिति | तेषामाद्यस्य पितृवद्विषोत्कर्षो, द्वयोर्मातृवदित्येके (५) |३४|
🔊 Audio coming soon
tajjātamēva vyatikaraṁ vivr̥ṇvannāha- tatra kr̥ṣṇasarpēṇētyādi| vaiparītyēna vēti gōnasēna puṁsā kr̥ṣṇasarpiṇyāṁ striyāmityarthaḥ| rājilēnētyādi| vaiparityaṁ pūrvavyākhyāvajjñēyam| kr̥ṣṇasarpēṇētyādi| ēṣāṁ madhyē yē'prasiddhāḥ sarpabhēdāstē sarvē nānādēśavāsibhyaḥ sarpahēlikādibhyō jñēyāḥ| tēṣāṁ vyatikarajānāṁ samatayā dvividhatvē prāptē dampatyōrēkasya viṣamutkarṣaṁ bhavatīti darśayannāha- tēṣāmityādi| ādyasya mākulēḥ, pitr̥vat kr̥ṣṇasarpavat| dvayōḥ pōṭagalasnigdharājikayōḥ; tatra pōṭagalasya mātā gōnasī, snigdharājikasya mātā rājimatī|(1-5)|34|
Adhikarana 16 (34) · Śloka 34
trayāṇāṁ vaikarañjānāṁ punardivyēlakarōdhrapuṣpakarājicitrakapōṭagalapuṣpābhikīrṇadarbhapuṣpavēllitakāḥ sapta; tēṣāmādyāstrayō rājilavat, śēṣā maṇḍalivat, ēvamētēṣāṁ sarpāṇāmaśītirvyākhyātā ||34||
त्रयाणां वैकरञ्जानां पुनर्दिव्येलकरोध्रपुष्पकराजिचित्रकपोटगलपुष्पाभिकीर्णदर्भपुष्पवेल्लितकाः सप्त; तेषामाद्यास्त्रयो राजिलवत्, शेषा मण्डलिवत्, एवमेतेषां सर्पाणामशीतिर्व्याख्याता ||३४||
🔊 Audio coming soon
vaikarañjēbhyastribhyō jātānāṁ divyēlakaprabhr̥tīnāṁ viṣaṁ kēṣāmanuyāyi bhavatīti darśayannāha- trayāṇāmityādi||34||
Adhikarana 17 (35) · Śloka 35
tatra mahānētrajihvāsyaśirasaḥ pumāṁsaḥ, sūkṣmanētrajihvāsyaśirasaḥ striyaḥ, ubhayalakṣaṇā mandaviṣā akrōdhā napuṁsakā iti ||35||
तत्र महानेत्रजिह्वास्यशिरसः पुमांसः, सूक्ष्मनेत्रजिह्वास्यशिरसः स्त्रियः, उभयलक्षणा मन्दविषा अक्रोधा नपुंसका इति ||३५||
🔊 Audio coming soon
sarpāṇāṁ puruṣādilakṣaṇamuddiśannāha- tatrētyādi||35||
Adhikarana 18 (36) · Śloka 36
tatra sarvēṣāṁ sarpāṇāṁ sāmānyata ēva daṣṭalakṣaṇaṁ vakṣyāmaḥ | kiṁ kāraṇaṁ? viṣaṁ hi niśitanistriṁśāśanihutavahadēśyamāśukāri muhartamapyupēkṣitamāturamatipātayati, na cāvakāśō'sti vāksamūhamupasartuṁ pratyēkamapi daṣṭalakṣaṇē'bhihitē sarvatra traividhyaṁ bhavati, tasmāt traividhyamēva vakṣyāmaḥ; ētaddhyāturahitamasammōhakaraṁ ca, api cātraiva sarvasarpavyañjanāvarōdhaḥ ||36||
तत्र सर्वेषां सर्पाणां सामान्यत एव दष्टलक्षणं वक्ष्यामः | किं कारणं? विषं हि निशितनिस्त्रिंशाशनिहुतवहदेश्यमाशुकारि मुहर्तमप्युपेक्षितमातुरमतिपातयति, न चावकाशोऽस्ति वाक्समूहमुपसर्तुं प्रत्येकमपि दष्टलक्षणेऽभिहिते सर्वत्र त्रैविध्यं भवति, तस्मात् त्रैविध्यमेव वक्ष्यामः; एतद्ध्यातुरहितमसम्मोहकरं च, अपि चात्रैव सर्वसर्पव्यञ्जनावरोधः ||३६||
🔊 Audio coming soon
niśitanistriṁśaḥ tīkṣṇaḥ khaṅgaḥ, aśaniḥ vajraṁ, hutavahō vahniḥ, dēśyaṁ tulyaṁ; āśukāri śīghravyāpakam| atipātayati śīghraṁ mārayatītyarthaḥ| na cāvakāśa ityādi avakāśaḥ kālavilambaḥ| upasartum anusartum| pratyēkamapītyādi| tasmāt pratisarpadaṣṭalakṣaṇaṁ na kr̥tamiti bhāvaḥ| ētattraividhyamasammōhakaraṁ cēti abhrāntijanakaṁ, `vaidyasya’ iti śēṣaḥ;| taduktaṁ,- “muhyanti vistarē mandāḥ” iti||36||
Adhikarana 19 (37) · Śloka 37
tatra, darvīkaraviṣēṇa tvaṅnayananakhadaśanavadanamūtrapurīṣadaṁśakr̥ṣṇatvaṁ raukṣyaṁ śirasō gauravaṁ sandhivēdanā kaṭīpr̥ṣṭhagrīvādaurbalyaṁ jr̥mbhaṇaṁ vēpathuḥ svarāvasādō ghurghurakō jaḍatā śuṣkōdgāraḥ kāsaśvāsau hikkā vāyōrūrdhvagamanaṁ śūlōdvēṣṭanaṁ tr̥ṣṇā lālāsrāvaḥ phēnāgamanaṁ srōtō'varōdhastāstāśca vātavēdanā bhavanti; maṇḍaliviṣēṇa tvagādīnāṁ pītatvaṁ śītābhilāṣaḥ paridhūpanaṁ dāhastr̥ṣṇā madō mūrcchā jvaraḥ śōṇitāgamanamūrdhvamadhaśca māṁsānāmavaśātanaṁ śvayathurdaṁśakōthaḥ pītarūpadarśanamāśukōpastāstāśca pittavēdanā bhavanti; rājimadviṣēṇa śuklatvaṁ tvagādīnāṁ śītajvarō rōmaharṣaḥ stabdhatvaṁ gātrāṇāmādaṁśaśōphaḥ sāndrakaphaprasēkaśchardirabhīkṣṇamakṣṇōḥ kaṇḍūḥ kaṇṭhē śvayathurghurghuraka ucchvāsanirōdhastamaḥpravēśastāstāśca kaphavēdanā bhavanti ||37||
तत्र, दर्वीकरविषेण त्वङ्नयननखदशनवदनमूत्रपुरीषदंशकृष्णत्वं रौक्ष्यं शिरसो गौरवं सन्धिवेदना कटीपृष्ठग्रीवादौर्बल्यं जृम्भणं वेपथुः स्वरावसादो घुर्घुरको जडता शुष्कोद्गारः कासश्वासौ हिक्का वायोरूर्ध्वगमनं शूलोद्वेष्टनं तृष्णा लालास्रावः फेनागमनं स्रोतोऽवरोधस्तास्ताश्च वातवेदना भवन्ति; मण्डलिविषेण त्वगादीनां पीतत्वं शीताभिलाषः परिधूपनं दाहस्तृष्णा मदो मूर्च्छा ज्वरः शोणितागमनमूर्ध्वमधश्च मांसानामवशातनं श्वयथुर्दंशकोथः पीतरूपदर्शनमाशुकोपस्तास्ताश्च पित्तवेदना भवन्ति; राजिमद्विषेण शुक्लत्वं त्वगादीनां शीतज्वरो रोमहर्षः स्तब्धत्वं गात्राणामादंशशोफः सान्द्रकफप्रसेकश्छर्दिरभीक्ष्णमक्ष्णोः कण्डूः कण्ठे श्वयथुर्घुर्घुरक उच्छ्वासनिरोधस्तमःप्रवेशस्तास्ताश्च कफवेदना भवन्ति ||३७||
🔊 Audio coming soon
darvīkarādisarpagaṇabhēdānāṁ sāmānyalakṣaṇōpadēśēna viśiṣṭalakṣaṇamavabudhyatē, tatsāmānyaṁ trividhalakṣaṇamuddiśannāha- tatra darvīkarētyādi| darvīkaraviṣēṇa tvaṅnakhādikr̥ṣṇatvādilakṣaṇāni bhavantīti sambandhaḥ| svarāvasādaḥ svarabhaṅgaḥ, ghurghurakō mārjāraśabdānukārī avyaktō dhvaniviśēṣaḥ, jaḍatā niḥspandatā, śūlōdvēṣṭanaṁ śūlēna kr̥tvā'ṅgamōṭanaṁ tāstā vātavēdanāḥ tōdanabhēdanādikāḥ| maṇḍalītyādi| paridhūpanaṁ sarvāṅgasantāpaḥ, madaḥ pūgaphalakhādanēnēva mattatvaṁ, māṁsānāmavaśātanaṁ śaṭitatvādgalanaṁ, daṁśakōthaḥ daṁśasya pūtibhāvaḥ, pītarūpadarśanaṁ sarvaṁ vastu pītābhaṁ paśyati, tāstāśca pittavēdanā ūṣacōṣādikāḥ| rājimadviṣēṇētyādi| ādaṁśaśōpha āsamantatō daṁśasya śōphā ityarthaḥ, prasēkaḥ kṣaraṇaṁ, ghurghurakaḥ avyaktaḥ śabdaviśēṣaḥ, tama andhakāraḥ; tāstāḥ kaṇḍvādyāḥ||37||
Adhikarana 20 (38) · Śloka 38
puruṣābhidaṣṭa ūrdhvaṁ prēkṣatē, adhastāt striyā sirāścōttiṣṭhanti lalāṭē, napuṁsakābhidaṣṭastiryakprēkṣī bhavati, garbhiṇyā pāṇḍumukhōdhmātaśca, sūtikayā kukṣiśūlārtaḥ sarudhiraṁ mēhatyupajihvikā cāsya bhavati, grāsārthinā'nnaṁ kāṅkṣati, vr̥ddhēna cirānmandāśca vēgāḥ, bālēnāśu mr̥davaśca, nirviṣēṇāviṣaliṅgaṁ, andhāhikēnāndhatvamityēkē, grasanāt ajagaraḥ śarīraprāṇaharō na viṣāt | tatra sadyaḥprāṇaharāhidaṣṭaḥ patati śāstrāśanihata iva bhūmau, srastāṅgaḥ svapiti ||38||
पुरुषाभिदष्ट ऊर्ध्वं प्रेक्षते, अधस्तात् स्त्रिया सिराश्चोत्तिष्ठन्ति ललाटे, नपुंसकाभिदष्टस्तिर्यक्प्रेक्षी भवति, गर्भिण्या पाण्डुमुखोध्मातश्च, सूतिकया कुक्षिशूलार्तः सरुधिरं मेहत्युपजिह्विका चास्य भवति, ग्रासार्थिनाऽन्नं काङ्क्षति, वृद्धेन चिरान्मन्दाश्च वेगाः, बालेनाशु मृदवश्च, निर्विषेणाविषलिङ्गं, अन्धाहिकेनान्धत्वमित्येके, ग्रसनात् अजगरः शरीरप्राणहरो न विषात् | तत्र सद्यःप्राणहराहिदष्टः पतति शास्त्राशनिहत इव भूमौ, स्रस्ताङ्गः स्वपिति ||३८||
🔊 Audio coming soon
adhunā puruṣādyabhidaṣṭalakṣaṇamāha- puruṣābhidaṣṭa ityādi| prēkṣatē iti pūrvasmādadhastādityanēna ca sambandhanīyam| napuṁsakābhidaṣṭa ityādi| sūtikā prasūtā| mēhati mūtrayati| vr̥ddhēna daṣṭasya cirakālēna vēgāstē ca mandā bhavanti| bālēnētyādi| andhēna ahinā daṣṭasyāndhatvaṁ ca dr̥śyatē ityēkē, anyē punaraviṣaprakaraṇādaviṣa ēvāyamityāhuḥ| andhāhiḥ jalabilaśāyīti prasiddhaḥ, aparē punaraparamēvāndhāhimāhuḥ| grasanādityādi| grasanāt gilanāt; śarīraprāṇaharaḥ śarīraharaḥ prāṇaharaśca bhavati, na viṣāt||38||
Adhikarana 21 (39) · Śloka 39
tatra sarvēṣāṁ sarpāṇāṁ viṣasya sapta vēgā bhavanti | tatra, darvīkarāṇāṁ prathamē vēgē viṣaṁ śōṇitaṁ dūṣayati, tat praduṣṭaṁ kr̥ṣṇatāmupaiti, tēna kārṣṇyaṁ pipīlikāparisarpaṇamiva cāṅgē bhavati; dvitīyē māṁsaṁ dūṣayati, tēnātyarthaṁ kr̥ṣṇatā śōphō granthayaścāṅgē bhavanti; tr̥tīyē mēdō dūṣayati, tēna daṁśaklēdaḥ śirōgauravaṁ svēdaścakṣurgrahaṇaṁ ca; caturthē kōṣṭhamanupraviśya kaphapradhānān dōṣān dūṣayati, tēna tandrāprasēkasandhiviślēṣā bhavanti; pañcamē'sthīnyanupraviśati prāṇamagniṁ ca dūṣayati, tēna parvabhēdō hikkā dāhaśca bhavati; ṣaṣṭhē majjānamanupraviśati grahaṇīṁ cātyarthaṁ dūṣayati, tēna gātrāṇāṁ gauravamatīsārō hr̥tpīḍā mūrcchā ca bhavati; saptamē śukramanupraviśati vyānaṁ cātyarthaṁ kōpayati kaphaṁ ca sūkṣmasrōtōbhyaḥ pracyāvayati, tēna ślēṣmavartiprādurbhāvaḥ kaṭīpr̥ṣṭhabhaṅgaḥ sarvacēṣṭāvighātō lālāsvēdayōratipravr̥ttirucchvāsanirōdhaśca bhavati | maṇḍalināṁ prathamē vēgē viṣaṁ śōṇitaṁ dūṣayati, tat praduṣṭaṁ pītatāmupaiti, tatra paridāhaḥ pītāvabhāsatā cāṅgānāṁ bhavati; dvitīyē māṁsaṁ dūṣayati, tēnātyarthaṁ pītatā paridāhō daṁśē śvayathuśca bhavati; tr̥tīyē mēdō dūṣayati, tēna pūrvavaccakṣurgrahaṇaṁ tr̥ṣṇā daṁśaklēdaḥ svēdaśca; caturthē kōṣṭhamanupraviśya jvaramāpādayati; pañcamē paridāhaṁ sarvagātrēṣu karōti, ṣaṣṭhasaptamayōḥ pūrvavat | rājimatāṁ prathamē vēgē viṣaṁ śōṇitaṁ dūṣayati tat praduṣṭaṁ pāṇḍutāmupaiti, tēna rōmaharṣaḥ śuklāvabhāsaśca puruṣō bhavati; dvitīyē māṁsaṁ dūṣayati, tēna pāṇḍutā'tyarthaṁ jāḍyaṁ śiraḥśōphaśca bhavati; tr̥tīyē mēdō dūṣayati, tēna cakṣurgrahaṇaṁ daṁśaklēdaḥ svēdō ghrāṇākṣisrāvaśca bhavati; caturthē kōṣṭhamanupraviśya manyāstambhaṁ śirōgauravaṁ cāpādayati; pañcamē vāksaṅgaṁ śītajvaraṁ ca karōti; ṣaṣṭhasaptamayōḥ pūrvavaditi ||39||
तत्र सर्वेषां सर्पाणां विषस्य सप्त वेगा भवन्ति | तत्र, दर्वीकराणां प्रथमे वेगे विषं शोणितं दूषयति, तत् प्रदुष्टं कृष्णतामुपैति, तेन कार्ष्ण्यं पिपीलिकापरिसर्पणमिव चाङ्गे भवति; द्वितीये मांसं दूषयति, तेनात्यर्थं कृष्णता शोफो ग्रन्थयश्चाङ्गे भवन्ति; तृतीये मेदो दूषयति, तेन दंशक्लेदः शिरोगौरवं स्वेदश्चक्षुर्ग्रहणं च; चतुर्थे कोष्ठमनुप्रविश्य कफप्रधानान् दोषान् दूषयति, तेन तन्द्राप्रसेकसन्धिविश्लेषा भवन्ति; पञ्चमेऽस्थीन्यनुप्रविशति प्राणमग्निं च दूषयति, तेन पर्वभेदो हिक्का दाहश्च भवति; षष्ठे मज्जानमनुप्रविशति ग्रहणीं चात्यर्थं दूषयति, तेन गात्राणां गौरवमतीसारो हृत्पीडा मूर्च्छा च भवति; सप्तमे शुक्रमनुप्रविशति व्यानं चात्यर्थं कोपयति कफं च सूक्ष्मस्रोतोभ्यः प्रच्यावयति, तेन श्लेष्मवर्तिप्रादुर्भावः कटीपृष्ठभङ्गः सर्वचेष्टाविघातो लालास्वेदयोरतिप्रवृत्तिरुच्छ्वासनिरोधश्च भवति | मण्डलिनां प्रथमे वेगे विषं शोणितं दूषयति, तत् प्रदुष्टं पीततामुपैति, तत्र परिदाहः पीतावभासता चाङ्गानां भवति; द्वितीये मांसं दूषयति, तेनात्यर्थं पीतता परिदाहो दंशे श्वयथुश्च भवति; तृतीये मेदो दूषयति, तेन पूर्ववच्चक्षुर्ग्रहणं तृष्णा दंशक्लेदः स्वेदश्च; चतुर्थे कोष्ठमनुप्रविश्य ज्वरमापादयति; पञ्चमे परिदाहं सर्वगात्रेषु करोति, षष्ठसप्तमयोः पूर्ववत् | राजिमतां प्रथमे वेगे विषं शोणितं दूषयति तत् प्रदुष्टं पाण्डुतामुपैति, तेन रोमहर्षः शुक्लावभासश्च पुरुषो भवति; द्वितीये मांसं दूषयति, तेन पाण्डुताऽत्यर्थं जाड्यं शिरःशोफश्च भवति; तृतीये मेदो दूषयति, तेन चक्षुर्ग्रहणं दंशक्लेदः स्वेदो घ्राणाक्षिस्रावश्च भवति; चतुर्थे कोष्ठमनुप्रविश्य मन्यास्तम्भं शिरोगौरवं चापादयति; पञ्चमे वाक्सङ्गं शीतज्वरं च करोति; षष्ठसप्तमयोः पूर्ववदिति ||३९||
🔊 Audio coming soon
vēgō viṣavēgō viṣagatiḥ| tatra darvīkarāṇāmityādi| cakṣurgrahaṇaṁ dr̥ṣṭyavarōdhaḥ| pañcamē ityādi| grahaṇī pittadharā kalā| pūrvavaditi darvīkāraviṣasya ṣaṣṭhasaptamayōrvēgayōryāni lakṣaṇāni tāni bhavantītyarthaḥ | ēvaṁ rājimatāmapi ṣaṣṭhasaptamavēgayōratidēśārthō bōddhavyaḥ||39||
Adhikarana 22 (40) · Śloka 40
bhavanti cātra- dhātvantarēṣu yāḥ sapta kalāḥ samparikīrtitāḥ | tāsvēkaikāmatikramya vēgaṁ prakurutē viṣam ||40||
भवन्ति चात्र- धात्वन्तरेषु याः सप्त कलाः सम्परिकीर्तिताः | तास्वेकैकामतिक्रम्य वेगं प्रकुरुते विषम् ||४०||
🔊 Audio coming soon
kutaḥ punaḥ saptaiva vēgā ityāha- bhavantītyādi| dhātvantarēṣu dhātumadhyēṣu, dhātugrahaṇamāśayōpalakṣaṇaṁ; tēnāyamarthaḥ- dhātvāśayāntaramaryādā yāḥ kalāḥ sapta prāguktā garbhavyākaraṇē tāsvēkaikāmatikramya saptasu dhātuṣu sapta vēgā bhavanti| tadyathā- rasaraktayōrantarasthāṁ kalāmatikramya raktē prathamavēgaḥ, raktamāṁsayōrantarasthāṁ kalāmatikramya dvitīyaḥ, māṁsamēdasōrantarasthāṁ kalāmatikramya tr̥tīyaḥ, mēdaḥkaphayōrantarasthāṁ kalāmatikramya caturthaḥ, kaphapurīṣayōrantarasthāṁ kalāmatikramya pañcamaḥ, purīṣapittayōrantarasthāṁ kalāmatikramya ṣaṣṭhaḥ, pittaśukrayōrantarasthāṁ kalāmatikramya saptama iti| yaiva kalā purīṣadharā saivāsthidharēti pañcamē asthanyanupraviśatītyaviruddhaṁ; ēvaṁ yaiva pittadharā saiva majjadharēti ṣaṣṭhē majjānamanupraviśatītyaviruddham||40||
Adhikarana 23 (41) · Śloka 41
yēnāntarēṇa tu kalāṁ kālakalpaṁ bhinatti hi | samīraṇēnōhyamānaṁ tattu vēgāntaraṁ smr̥tam ||41||
येनान्तरेण तु कलां कालकल्पं भिनत्ति हि | समीरणेनोह्यमानं तत्तु वेगान्तरं स्मृतम् ||४१||
🔊 Audio coming soon
vēgamabhidhāya vēgāntaramāha- yēnāntarēṇētyādi| yēnāntarēṇa yēna kālēna, kalām uktalakṣaṇāṁ, kālakalpaṁ mr̥tyusadr̥śaṁ viṣaṁ, bhinatti vidārayati, samīraṇēnōhyamānaṁ vāyunā prēryamāṇaṁ tattu vēgāntaraṁ bhūtasya bhaviṣyataśca vēgasya madhyabhūtaḥ kālastāvatpramāṇa ityarthaḥ||41||
Adhikarana 24 (42-45) · Śloka 45
śūnāṅgaḥ prathamē vēgē paśurdhyāyati duḥkhitaḥ | lālāsrāvō dvitīyē tu kr̥ṣṇāṅgaḥ pīḍyatē hr̥di ||42|| tr̥tīyē ca śirōduḥkhaṁ kaṇṭhagrīvaṁ ca bhajyatē | caturthē vēpatē mūḍhaḥ khādan dantān jahātyasūn ||43|| kēcidvēgatrayaṁ prāhurantaṁ caitēṣu tadvidaḥ | dhyāyati prathamē vēgē pakṣī muhyatyataḥ param ||44|| dvitīyē vihvalaḥ prōktastr̥tīyē mr̥tyumr̥cchati | kēcidēkaṁ vihaṅgēṣu viṣavēgamuśanti hi | mārjāranakulādīnāṁ viṣaṁ nātipravartatē ||45||
शूनाङ्गः प्रथमे वेगे पशुर्ध्यायति दुःखितः | लालास्रावो द्वितीये तु कृष्णाङ्गः पीड्यते हृदि ||४२|| तृतीये च शिरोदुःखं कण्ठग्रीवं च भज्यते | चतुर्थे वेपते मूढः खादन् दन्तान् जहात्यसून् ||४३|| केचिद्वेगत्रयं प्राहुरन्तं चैतेषु तद्विदः | ध्यायति प्रथमे वेगे पक्षी मुह्यत्यतः परम् ||४४|| द्वितीये विह्वलः प्रोक्तस्तृतीये मृत्युमृच्छति | केचिदेकं विहङ्गेषु विषवेगमुशन्ति हि | मार्जारनकुलादीनां विषं नातिप्रवर्तते ||४५||
🔊 Audio coming soon
manuṣyasya saptaviṣavēgaprasaṅgēna paśupakṣiṣvapi vēgaprasaṅkhyāmuddiśannāha- śūnāṅga ityādi| hr̥ṣṭāṅga uddharṣitaśarīraḥ, kēcidvēgatrayamityāhuḥ| kēcidācāryā `dhyāyati prathamē’ ityādipāṭhaṁ na paṭhanti||42-45||
Adhikarana puShpikA · Śloka 4
iti suśrutasaṁhitāyāṁ kalpasthānē sarpadaṣṭaviṣavijñānīyaṁ nāma caturthō'dhyāyaḥ ||4||
इति सुश्रुतसंहितायां कल्पस्थाने सर्पदष्टविषविज्ञानीयं नाम चतुर्थोऽध्यायः ||४||
🔊 Audio coming soon
iti śrīḍalha(hla)ṇaviracitāyāṁ nibandhasaṅgrahākhyāyāṁ suśrutavyākhyāyāṁ kalpasthānē caturthō'dhyāyaḥ||4||