Adhikarana 1 (1-2) · Śloka 2
অথাতো গর্ভিণীব্যাকরণং শারীরং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो गर्भिणीव्याकरणं शारीरं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
ধমনীব্যাকরণে শুক্রার্তবস্রোতঃসঙ্কীর্তনাচ্ছুক্রার্তবমূলস্য গর্ভস্য ব্যাকৃতস্যাশ্রযভূতা গার্ভিণী ব্যাকর্তুং যুজ্যত ইত্যাহ- অথাত ইত্যাদি||১-২||
Adhikarana 2 (3) · Śloka 3
গর্ভিণী প্রথমদিবসাত্ প্রভৃতি নিত্যং প্রহৃষ্টা শুচ্যলঙ্কৃতা শুক্লবসনা শান্তিমঙ্গলদেবতাব্রাহ্মণগুরুপরা চ ভবেত্, মলিনবিকৃতহীনগাত্রাণি ন স্পৃশেত্, দুর্গন্ধদুর্দর্শনানি পরিহরেত্, উদ্বেজনীযাশ্চ কথাঃ, শুষ্কং পর্যুষিতং কুথিতং ক্লিন্নং চান্নং নোপভুঞ্জীত, বহির্নিষ্ক্রমণং শূন্যাগারচৈত্যশ্মশানবৃক্ষাশ্রযান্ ক্রোধমযশস্করাংশ্চ ভাবানুচ্চৈর্ভাষ্যাদিকং চ পরিহরেদ্যানি চ গর্ভং ব্যাপাদযন্তি, ন চাভীক্ষ্ণং তৈলাভ্যঙ্গোত্সাদনাদীনি সেবেত, ন চাযাসযেচ্ছরীরং, পূর্বোক্তানি চ পরিহরেত্, শযনাসনং মৃদ্বাস্তরণং নাত্যুচ্চমপাশ্রযোপেতমসম্বাধং চ বিদধ্যাত্, হৃদ্যং দ্রবমধুরপ্রাযং স্নিগ্ধং দীপনীযসংস্কৃতং চ ভোজনং ভোজযেত্, সামান্যমেতদাপ্রসবাত্ ||৩||
गर्भिणी प्रथमदिवसात् प्रभृति नित्यं प्रहृष्टा शुच्यलङ्कृता शुक्लवसना शान्तिमङ्गलदेवताब्राह्मणगुरुपरा च भवेत्, मलिनविकृतहीनगात्राणि न स्पृशेत्, दुर्गन्धदुर्दर्शनानि परिहरेत्, उद्वेजनीयाश्च कथाः, शुष्कं पर्युषितं कुथितं क्लिन्नं चान्नं नोपभुञ्जीत, बहिर्निष्क्रमणं शून्यागारचैत्यश्मशानवृक्षाश्रयान् क्रोधमयशस्करांश्च भावानुच्चैर्भाष्यादिकं च परिहरेद्यानि च गर्भं व्यापादयन्ति, न चाभीक्ष्णं तैलाभ्यङ्गोत्सादनादीनि सेवेत, न चायासयेच्छरीरं, पूर्वोक्तानि च परिहरेत्, शयनासनं मृद्वास्तरणं नात्युच्चमपाश्रयोपेतमसम्बाधं च विदध्यात्, हृद्यं द्रवमधुरप्रायं स्निग्धं दीपनीयसंस्कृतं च भोजनं भोजयेत्, सामान्यमेतदाप्रसवात् ||३||
🔊 Audio coming soon
চৈত্যং দেবতাধিষ্ঠিতো বৃক্ষঃ, অন্যে বৌদ্ধালযমাহুঃ| শ্মশানং মৃতমর্ত্যদাহস্থানম্| পূর্বোক্তানি ঋতুমত্যাং নিষিদ্ধানি দিবাস্বপ্নাদীনি| অপাশ্রযোপেতং প্রতিবাহকসহিতম্, অসম্বাধমসঙ্কটং, বিদধ্যাত্ কুর্যাত্| হৃষ্টাদিস্বরূপা নিত্যং ভবেত্| মলিনাদি ন স্পৃশেদিতি নিষিদ্ধস্পর্শবর্জনং, দুর্গন্ধদুর্দর্শনাদিপরিহারেণ নিষিদ্ধগন্ধরূপবর্জনম্, উদ্বেজনীযাশ্চ কথা ইত্যনেন নিষিদ্ধশ্রুতিবর্জনং, শুষ্কপর্যুষিতেত্যাদিনা নিষিদ্ধরসবর্জনং, বহির্নিষ্ক্রমণাদিপরিহারেণ কাযক্রিযানিযমঃ, ক্রোধাদিপরিহারেণ মনঃক্রিযানিযমঃ, উচ্চৈর্ভাষ্যাদিপরিহারেণ বাগ্বিষযনিযমঃ| যানি চ গর্ভং ব্যাপাদযন্তীতি গর্ভাবক্রান্তাবুক্তানি গ্রাম্যধর্মযানবাহনাদীনি| বিহারং নিযম্যাহারং নিযমযন্নাহ- হৃদ্যং দ্রবমিত্যাদি| হৃদ্যমোজস্যত্বাত্, দ্রবং জীবনীযত্বাত্, মধুরং সকলশরীরধাতূনাং সাত্ম্যত্বাত্, উপযোজনীযম্| দ্রবাদীনামগ্নিমান্দ্যহেতুত্বাত্তত্প্রতীকারাযাহ- দীপনীযসংস্কৃতমিতি||৩||
Adhikarana 3 (4) · Śloka 4
বিশেষতস্তু গর্ভিণী প্রথমদ্বিতীযতৃতীযমাসেষু মধুরশীতদ্রবপ্রাযমাহারমুপসেবেত; বিশেষতস্তু তৃতীযে ষষ্টিকৌদনং পযসা ভোজযেত্, চতুর্থে দধ্না, পঞ্চমে পযসা, ষষ্ঠে সর্পিষেত্যেকে; চতুর্থে পযোনবনীতসংসৃষ্টমাহারযেজ্জাঙ্গলমাংসসহিতং হৃদ্যমন্নং চ ভোজযেত্, পঞ্চমে ক্ষীরসর্পিঃসংসৃষ্টং , ষষ্ঠে শ্বদংষ্ট্রাসিদ্ধস্য সর্পিষো মাত্রাং পাযযেদ্ যবাগূং বা, সপ্তমে সর্পিঃ পৃথক্পর্ণ্যাদিসিদ্ধম্, এবমাপ্যাযতে গর্ভঃ; অষ্টমে বদরোদকেন বলাতিবলাশতপুষ্পাপললপযোদধিমস্তুতৈললবণমদনফলমধুঘৃতমিশ্রেণাস্থাপযেত্ পুরাণপুরীষশুদ্ধ্যর্থমনুলোমনার্থং চ বাযোঃ, ততঃ পযোমধুরকষাযসিদ্ধেন তৈলেনানুবাসযেত্, অনুলোমে হি বাযৌ সুখং প্রসূযতে নিরুপদ্রবা চ ভবতি, অত ঊর্ধ্বং স্নিগ্ধাভির্যবাগূভির্জাঙ্গলরসৈশ্চোপক্রমেদাপ্রসবকালাত্; এবমুপক্রান্তা স্নিগ্ধা বলবতী সুখমনুপদ্রবা প্রসূযতে ||৪||
विशेषतस्तु गर्भिणी प्रथमद्वितीयतृतीयमासेषु मधुरशीतद्रवप्रायमाहारमुपसेवेत; विशेषतस्तु तृतीये षष्टिकौदनं पयसा भोजयेत्, चतुर्थे दध्ना, पञ्चमे पयसा, षष्ठे सर्पिषेत्येके; चतुर्थे पयोनवनीतसंसृष्टमाहारयेज्जाङ्गलमांससहितं हृद्यमन्नं च भोजयेत्, पञ्चमे क्षीरसर्पिःसंसृष्टं , षष्ठे श्वदंष्ट्रासिद्धस्य सर्पिषो मात्रां पाययेद् यवागूं वा, सप्तमे सर्पिः पृथक्पर्ण्यादिसिद्धम्, एवमाप्यायते गर्भः; अष्टमे बदरोदकेन बलातिबलाशतपुष्पापललपयोदधिमस्तुतैललवणमदनफलमधुघृतमिश्रेणास्थापयेत् पुराणपुरीषशुद्ध्यर्थमनुलोमनार्थं च वायोः, ततः पयोमधुरकषायसिद्धेन तैलेनानुवासयेत्, अनुलोमे हि वायौ सुखं प्रसूयते निरुपद्रवा च भवति, अत ऊर्ध्वं स्निग्धाभिर्यवागूभिर्जाङ्गलरसैश्चोपक्रमेदाप्रसवकालात्; एवमुपक्रान्ता स्निग्धा बलवती सुखमनुपद्रवा प्रसूयते ||४||
🔊 Audio coming soon
বিশেষত ইতি অতিশযেনেত্যর্থঃ| পরমতমাহ- বিশেষত ইত্যাদি| স্বমতমাহ- চতুর্থে ইত্যাদি| পৃথক্পর্ণ্যাদিঃ বিদারিগন্ধাদিঃ||৪||
Adhikarana 4 (5) · Śloka 5
নবমে মাসি সূতিকাগারমেনাং প্রবেশযেত্ প্রশস্তে তিথ্যাদৌ | তত্রারিষ্টং ব্রাহ্মণক্ষত্রিযবৈশ্যশূদ্রাণাং শ্বেতরক্তপীতকৃষ্ণেষু ভূমিপ্রদেশেষু বিল্বন্যগ্রোধতিন্দুকভল্লাতকনির্মিতসর্বাগারং যথাসঙ্খ্যং তন্মযপর্যঙ্কং সমুপলিপ্তভিত্তিং সুবিভক্তপরিচ্ছদং প্রাগ্দ্বারং দক্ষিণদ্বারং বাঽষ্টহস্তাযতং চতুর্হস্তবিস্তৃতং রক্ষামঙ্গলসম্পন্নং বিধেযম্ ||৫||
नवमे मासि सूतिकागारमेनां प्रवेशयेत् प्रशस्ते तिथ्यादौ | तत्रारिष्टं ब्राह्मणक्षत्रियवैश्यशूद्राणां श्वेतरक्तपीतकृष्णेषु भूमिप्रदेशेषु बिल्वन्यग्रोधतिन्दुकभल्लातकनिर्मितसर्वागारं यथासङ्ख्यं तन्मयपर्यङ्कं समुपलिप्तभित्तिं सुविभक्तपरिच्छदं प्राग्द्वारं दक्षिणद्वारं वाऽष्टहस्तायतं चतुर्हस्तविस्तृतं रक्षामङ्गलसम्पन्नं विधेयम् ||५||
🔊 Audio coming soon
তত্র তস্মিন্ প্রসবাবসরে| অরিষ্টং সূতিকাগৃহম্, এবম্ভূতং বিধেযমিতি সম্বন্ধঃ||৫||
Adhikarana 5 (6-7) · Śloka 7
জাতে হি শিথিলে কুক্ষৌ মুক্তে হৃদযবন্ধনে | সশূলে জঘনে নারী জ্ঞেযা সা তু প্রজাযিনী ||৬|| তত্রোপস্থিতপ্রসবাযাঃ কটীপৃষ্ঠং প্রতি সমন্তাদ্বেদনা ভবত্যভীক্ষ্ণং পুরীষপ্রবৃত্তির্মূত্রং প্রসিচ্যতে যোনিমুখাচ্ছ্লেষ্মা চ ||৭||
जाते हि शिथिले कुक्षौ मुक्ते हृदयबन्धने | सशूले जघने नारी ज्ञेया सा तु प्रजायिनी ||६|| तत्रोपस्थितप्रसवायाः कटीपृष्ठं प्रति समन्ताद्वेदना भवत्यभीक्ष्णं पुरीषप्रवृत्तिर्मूत्रं प्रसिच्यते योनिमुखाच्छ्लेष्मा च ||७||
🔊 Audio coming soon
জাত ইত্যাদি| সশূলে জঘনে সশূলাযাং কট্যাম্| প্রজাযিনী প্রসবমানা| তত্রোপস্থিতেত্যাদি||৬-৭||
Adhikarana 6 (8) · Śloka 8
প্রজনযিষ্যমাণাং কৃতমঙ্গলস্বস্তিবাচনাং কুমারপরিবৃতাং পুন্নামফলহস্তাং স্বভ্যক্তামুষ্ণোদকপরিষিক্তামথৈনাং সম্ভৃতাং যবাগূমাকণ্ঠাত্ পাযযেত্, ততঃ কৃতোপধানে মৃদুনি বিস্তীর্ণে শযনে স্থিতামাভুগ্নসক্থীমুত্তানামশঙ্কনীযাশ্চতস্রঃ স্ত্রিযঃ পরিণতবযসঃ প্রজননকুশলাঃ কর্তিতনখাঃ পরিচরেযুরিতি ||৮||
प्रजनयिष्यमाणां कृतमङ्गलस्वस्तिवाचनां कुमारपरिवृतां पुन्नामफलहस्तां स्वभ्यक्तामुष्णोदकपरिषिक्तामथैनां सम्भृतां यवागूमाकण्ठात् पाययेत्, ततः कृतोपधाने मृदुनि विस्तीर्णे शयने स्थितामाभुग्नसक्थीमुत्तानामशङ्कनीयाश्चतस्रः स्त्रियः परिणतवयसः प्रजननकुशलाः कर्तितनखाः परिचरेयुरिति ||८||
🔊 Audio coming soon
অশঙ্কনীযা যাসাং লজ্জাভযাদিকং ন করোতি গর্ভিণী||৮||
Adhikarana 7 (9) · Śloka 9
অথাস্যা বিশিখান্তরমনুলোমমনুসুখমভ্যজ্যানুব্রূযাচ্চৈতামেকা - সুভগে প্রবাহস্বেতি, নচাপ্রাপ্তাবী প্রবাহস্ব, ততো বিমুক্তে গর্ভনাডীপ্রবন্ধে সশূলেষু শ্রোণিবঙ্ক্ষণবস্তিশিরঃসু চ প্রবাহেথাঃ শনৈঃ শনৈঃ, ততো গর্ভনির্গমে প্রগাঢং, ততো গর্ভে যোনিমুখং প্রপন্নে গাঢতরমাবিশল্যভাবাত্; অকালপ্রবাহণাদ্বধিরং মূকং কুব্জং ব্যস্তহনুমূর্ধ্বাভিঘাতিনং কাসশ্বাসশোষোপদ্রুতং বিকটং বা জনযতি ||৯||
अथास्या विशिखान्तरमनुलोममनुसुखमभ्यज्यानुब्रूयाच्चैतामेका - सुभगे प्रवाहस्वेति, नचाप्राप्तावी प्रवाहस्व, ततो विमुक्ते गर्भनाडीप्रबन्धे सशूलेषु श्रोणिवङ्क्षणबस्तिशिरःसु च प्रवाहेथाः शनैः शनैः, ततो गर्भनिर्गमे प्रगाढं, ततो गर्भे योनिमुखं प्रपन्ने गाढतरमाविशल्यभावात्; अकालप्रवाहणाद्बधिरं मूकं कुब्जं व्यस्तहनुमूर्ध्वाभिघातिनं कासश्वासशोषोपद्रुतं विकटं वा जनयति ||९||
🔊 Audio coming soon
অথাস্যা ইত্যাদি| বিশিখান্তরম্ অপত্যমার্গম্| অনুলোমং লোমানুকূলম্| অনুসুখং যথাসুখম্| এতাং গর্ভিণীম্| একা উত্কৃষ্টা, অন্যে ‘ত্বেকা চতসৃণাং স্ত্রীণাং মধ্যে’ ইতি ব্যাখ্যানযন্তি| প্রবাহস্বেতি নিকুন্থনং কুরুঃ, ‘বাহ’ প্রযত্নে, ইত্যস্য ধাতোরাত্মনেপদিনঃ প্রযোগঃ| আবী প্রসববেদনা| ততো বিমুক্তে গর্ভনাডীপ্রবন্ধ ইতি গর্ভনাডীনাং প্রকৃষ্টো বন্ধস্তস্মিন্| স্বস্থানাদ্গর্ভস্য নিঃসরণায গমনং গর্ভনির্গমস্তস্মিন্ গর্ভনির্গমে| প্রগাঢমিত্যত্র প্রবাহেথা ইতি সম্বধ্যতে| আবিশল্যভাবাদিতি শল্যগ্রহণমপরাসহিতগর্ভপ্রাপ্ত্যর্থম্| অকালেত্যাদি| ব্যস্তহনুং বিঘটিতমুখসন্ধিম্| ঊর্ধ্বাভিঘাতিনম্ ঊর্ধ্বজত্রুগতরোগিণম্| উপদ্রুতম্ উপদ্রবৈর্ব্যাপ্তম্| বিকটম্ অযথাস্থাননিবেশিতাবযবম্||৯||
Adhikarana 8 (10) · Śloka 10
তত্র প্রতিলোমমনুলোমযেত্, প্রাঞ্জলমাকর্ষেত্ ||১০||
तत्र प्रतिलोममनुलोमयेत्, प्राञ्जलमाकर्षेत् ||१०||
🔊 Audio coming soon
তত্রেত্যাদি| প্রতিলোমতা চানেকপ্রকারা মূঢগর্ভনিদানোক্তযা দিশা জ্ঞাতব্যা| অনুলোমযেদিতি মূঢগর্ভচিকিত্সিতোক্তপ্রকারেণেত্যর্থঃ| অপ্রতিলোমং তু প্রাঞ্জলমাকর্ষেত্||১০||
Adhikarana 9 (11) · Śloka 11
গর্ভসঙ্গে তু যোনিং ধূপযেত্ কৃষ্ণসর্পনির্মোকেণ পিণ্ডীতকেন বা, বধ্নীযাদ্ধিরণ্যপুষ্পীমূলং হস্তপাদযোঃ, ধারযেত্ সুবর্চলাং বিশল্যাং বা ||১১||
गर्भसङ्गे तु योनिं धूपयेत् कृष्णसर्पनिर्मोकेण पिण्डीतकेन वा, बध्नीयाद्धिरण्यपुष्पीमूलं हस्तपादयोः, धारयेत् सुवर्चलां विशल्यां वा ||११||
🔊 Audio coming soon
গর্ভসঙ্গে ত্বিত্যাদি| হিরণ্যপুষ্পী কলিকারিকা, সুবর্চলা সূর্যভক্তা, বিশল্যা পাটলা||১১||
Adhikarana 10 (12) · Śloka 12
অথ জাতস্যোল্বং মুখং চ সৈন্ধবসর্পিষা বিশোধ্য, ঘৃতাক্তং মূর্ধ্নি পিচুং দদ্যাত্; ততো নাভিনাডীমষ্টাঙ্গুলমাযম্য সূত্রেণ বদ্ধ্বা ছেদযেত্, তত্সূত্রৈকদেশং চ কুমারস্য গ্রীবাযাং সম্যগ্ বধ্নীযাত্ ||১২||
अथ जातस्योल्बं मुखं च सैन्धवसर्पिषा विशोध्य, घृताक्तं मूर्ध्नि पिचुं दद्यात्; ततो नाभिनाडीमष्टाङ्गुलमायम्य सूत्रेण बद्ध्वा छेदयेत्, तत्सूत्रैकदेशं च कुमारस्य ग्रीवायां सम्यग् बध्नीयात् ||१२||
🔊 Audio coming soon
অথেত্যাদি| উল্বং জরাযুং, বিশোধ্য অপনীয; মুখং চ বিশোধ্য নির্মলীকৃত্য, তদপি মুখকণ্ঠগতজরাযুকফাপনযনেন| তদুক্তং- “জরাযুণা মুখে চ্ছন্নে কণ্ঠে চ কফবেষ্টিতে” (শা.২) ইতি| ব্রহ্মদেবস্তু ঘৃতাক্তমিতি পদং পরিত্যজ্য পিচুং দদ্যাদিত্যত্র ‘বলাতৈলাক্তমিতি শেষঃ’ ইতি ব্যাখ্যাতি| ততো নাভিনাডীমিতি আযম্য আকৃষ্য, গ্রীবাযাং সম্যগ্বধ্নীযাত্ স্রাবপরিহারার্থং; গযী তু ‘গর্ভনাডীমষ্টাঙ্গুলমাযম্য নাতিগাঢং নাতিশিথিলমগ্রে সূত্রেণাবধ্য বর্ধযিত্বা কুষ্ঠতৈলেন সিক্ত্বাঽপত্যমাশ্বাস্য মধুসর্পির্মিশ্রমঙ্গুল্যাঽনামিকযা কনকচূর্ণং লেহযেত্’- ইতি পঠতি||১২||
Adhikarana 11 (13) · Śloka 13
অথ কুমারং শীতাভিরদ্ভিরাশ্বাস্য জাতকর্মণি কৃতে মধুসর্পিরনন্তচূর্ণমঙ্গুল্যাঽনামিকযা লেহযেত্; ততো বলাতৈলেনাভ্যজ্য, ক্ষীরবৃক্ষকষাযেণ সর্বগন্ধোদকেন বা রূপ্যহেমপ্রতপ্তেন বা বারিণা স্নাপযেদেনং কপিত্থপত্রকষাযেণ বা কোষ্ণেন যথাকালং যথাদোষং যথাবিভবং চ ||১৩||
अथ कुमारं शीताभिरद्भिराश्वास्य जातकर्मणि कृते मधुसर्पिरनन्तचूर्णमङ्गुल्याऽनामिकया लेहयेत्; ततो बलातैलेनाभ्यज्य, क्षीरवृक्षकषायेण सर्वगन्धोदकेन वा रूप्यहेमप्रतप्तेन वा वारिणा स्नापयेदेनं कपित्थपत्रकषायेण वा कोष्णेन यथाकालं यथादोषं यथाविभवं च ||१३||
🔊 Audio coming soon
অথ কুমারমিত্যাদি| আশ্বাস্য যোনিযন্ত্রপীডনমূর্চ্ছিতম্| অনন্তচূর্ণং সুবর্ণচূর্ণং, তেন মিশ্রং মধ্বাদি লেহযেত্| চূর্ণপ্রমাণং তু জাতমাত্রস্য গুঞ্জামাত্রম্| সর্বগন্ধা এলাদিকাঃ| যথাকালং কালানতিক্রমেণ| কোষ্ণেন ঈষদুষ্ণেন| যথাদোষং দোষানতিক্রমেণ| ক্ষীরিবৃক্ষকষাযেণ পিত্তঘ্নেন, সর্বগন্ধোদকেন বা বাতঘ্নেন, বিভবানতিক্রমেণ রূপ্যহেমতপ্তেন বারিণা, কপিত্থপত্রকষাযেণ বা স্নাপযেত্| অত্র কেষুচিত্ পুস্তকেষু তু “মধুসর্পিরনন্তাব্রাহ্মীরসেন সুবর্ণচূর্ণমঙ্গুল্যাঽনামিকযা লেহযেত্”- ইত্যযং পাঠো দৃশ্যতে, পরমসৌ টীকাকারৈর্ন ব্যাখ্যাতঃ| বৃদ্ধবাগ্ভটেন ত্বন্যথা প্রাশনমভিহিতং; যথা- “ঐন্দ্রীব্রাহ্মীশঙ্খপুষ্পীবচাকল্কং মধুঘৃতোপেতং হরেণুমাত্রং কুশাভিমন্ত্রিতং সৌবর্ণেনাশ্বত্থপত্রেণ বা মেধাযুর্বলজননং প্রাশযেদ্ ব্রাহ্মীবচানন্তাশতাবর্যন্যতমচূর্ণং বা” (অ.সং.উ.১)- ইতি||১৩||
Adhikarana 12 (14-15) · Śloka 15
ধমনীনাং হৃদিস্থানাং বিবৃতত্বাদনন্তরম্ | চতূরাত্রাত্ত্রিরাত্রাদ্বা স্ত্রীণাং স্তন্যং প্রবর্ততে ||১৪|| তস্মাত্ প্রথমেঽহ্নি মধুসর্পিরনন্তমিশ্রং মন্ত্রপূতং ত্রিকালং পাযযেত্, দ্বিতীযে লক্ষ্মণাসিদ্ধং সর্পিঃ, তৃতীযে চ; ততঃ প্রাঙ্নিবারিতস্তন্যং মধুসর্পিঃ স্বপাণিতলসম্মিতং দ্বিকালং পাযযেত্ ||১৫||
धमनीनां हृदिस्थानां विवृतत्वादनन्तरम् | चतूरात्रात्त्रिरात्राद्वा स्त्रीणां स्तन्यं प्रवर्तते ||१४|| तस्मात् प्रथमेऽह्नि मधुसर्पिरनन्तमिश्रं मन्त्रपूतं त्रिकालं पाययेत्, द्वितीये लक्ष्मणासिद्धं सर्पिः, तृतीये च; ततः प्राङ्निवारितस्तन्यं मधुसर्पिः स्वपाणितलसम्मितं द्विकालं पाययेत् ||१५||
🔊 Audio coming soon
মধুসর্পির্মিশ্রং সুবর্ণচূর্ণ কুতো লেহযিতব্যমিত্যাহ- ধমনীনামিত্যাদি| অনন্তমিশ্রম্ অনন্তস্য সুবর্ণস্য গুঞ্জাপ্রমাণেন মিশ্রিতম্| মধুসর্পিষশ্চ মানং বক্ষ্যমাণং স্বপাণিতলসম্মিতং বোদ্ধব্যম্| তত ইত্যাদি| ততশ্চতুর্থে দিবসে প্রাতর্মধ্যাহ্নাদিলক্ষণে মধুসর্পিঃ প্রাশযেত্, তদনন্তরং চতুর্থদিবসস্য তৃতীযকালমারভ্য পঞ্চমাদিদিবসেষু যথেষ্টং স্তন্যপানং কারযেত্| কং? বালং; কিংবিশিষ্টং? প্রাঙ্নিবারিতস্তন্যং; প্রাক্ পুর্বং নিবারিতং স্তন্যং যস্য তং; বৃদ্ধবাগ্ভটে চ “অনন্তামিশ্রে মধুসর্পিষী” (অ.সং.উ.১) ইতি পাঠঃ, তত্র চানন্তা দূর্বা ব্যাখ্যাতা||১৪-১৫||
Adhikarana 13 (16) · Śloka 16
অথ সূতিকাং বলাতৈলাভ্যক্তাং বাতহরৌষধনিষ্ক্বাথেনোপচরেত্ | সশেষদোষাং তু তদহঃ পিপ্পলীপিপ্পলীমূলহস্তিপিপ্পলীচিত্রকশৃঙ্গবেরচূর্ণং গুডোদকেনোষ্ণেন পাযযেত্, এবং দ্বিরাত্রং ত্রিরাত্রং বা কুর্যাদাদুষ্টশোণিতাত্ | বিশুদ্ধে ততো বিদারিগন্ধাদিসিদ্ধাং স্নেহযবাগূং ক্ষীরযবাগূং বা পাযযেত্ত্রিরাত্রম্ | ততো যবকোলকুলত্থসিদ্ধেন জাঙ্গলরসেন শাল্যোদনং ভোজযেদ্বলমগ্নিবলং চাবেক্ষ্য | অনেন বিধিনাঽধ্যর্ধমাসমুপসংস্কৃতা বিমুক্তাহারাচারা বিগতসূতিকাভিধানা স্যাত্, পুনরার্তবদর্শনাদিত্যেকে ||১৬||
अथ सूतिकां बलातैलाभ्यक्तां वातहरौषधनिष्क्वाथेनोपचरेत् | सशेषदोषां तु तदहः पिप्पलीपिप्पलीमूलहस्तिपिप्पलीचित्रकशृङ्गवेरचूर्णं गुडोदकेनोष्णेन पाययेत्, एवं द्विरात्रं त्रिरात्रं वा कुर्यादादुष्टशोणितात् | विशुद्धे ततो विदारिगन्धादिसिद्धां स्नेहयवागूं क्षीरयवागूं वा पाययेत्त्रिरात्रम् | ततो यवकोलकुलत्थसिद्धेन जाङ्गलरसेन शाल्योदनं भोजयेद्बलमग्निबलं चावेक्ष्य | अनेन विधिनाऽध्यर्धमासमुपसंस्कृता विमुक्ताहाराचारा विगतसूतिकाभिधाना स्यात्, पुनरार्तवदर्शनादित्येके ||१६||
🔊 Audio coming soon
অথ সূতিকামিত্যাদি| বাতহরৌষধানি ভদ্রদার্বাদীনি| উপচরেত্ ‘পানপরিষেকাদিভিঃ’ ইতি শেষঃ| সশেষদোষামিত্যত্র দোষশব্দো রক্তবচনঃ| ততস্তৃতীযে চতুর্থে বা দিনে বিশুদ্ধে শোণিতে বিদারীগন্ধাদিক্বাথেন সিদ্ধাং স্নেহবহুলাং যবাগূমগ্নিবলমবেক্ষ্য ক্ষীরযবাগূং বা পাযযেত্| অধ্যর্ধমাসং ত্রীণি পক্ষাণি||১৬||
Adhikarana 14 (17) · Śloka 17
ধন্বভূমিজাতাং তু সূতিকাং ঘৃততৈলযোরন্যতরস্য মাত্রাং পাযযেত্ পিপ্পল্যাদিকষাযানুপানাং, স্নেহনিত্যা চ স্যাত্ত্রিরাত্রং পঞ্চরাত্রং বা বলবতী ; অবলাং যবাগূং পাযযেত্ত্রিরাত্রং পঞ্চরাত্রং বা | অত ঊর্ধ্বং স্নিগ্ধেনান্নসংসর্গেণোপচরেত্ ||১৭||
धन्वभूमिजातां तु सूतिकां घृततैलयोरन्यतरस्य मात्रां पाययेत् पिप्पल्यादिकषायानुपानां, स्नेहनित्या च स्यात्त्रिरात्रं पञ्चरात्रं वा बलवती ; अबलां यवागूं पाययेत्त्रिरात्रं पञ्चरात्रं वा | अत ऊर्ध्वं स्निग्धेनान्नसंसर्गेणोपचरेत् ||१७||
🔊 Audio coming soon
ধন্বেত্যাদি| জাঙ্গলদেশজাতাং তু সূতিকাং বুভুক্ষাযুতাং সাত্ম্যানুরোধেন ঘৃতস্য তৈলস্য বা মাত্রামহঃপরিণামিনীং পাযযেত্| জীর্ণে তু স্নেহে পূর্বোক্তৌষধসাধিতাং মাত্রযা পেযাং বা পাযযেত্| স্নেহনিত্যা চ স্যাদভ্যঙ্গাদিষু| কিযন্তি দিনানি ঘৃততৈলযোরন্যতরমাত্রাং পাযযেদিত্যাশঙ্ক্যাহ- ত্রিরাত্রমিত্যাদি| বলবতী বলযুক্তা সূতিকা| বলহীনাযাশ্চ কিং কর্তব্যমিত্যাশঙ্ক্যাহ- অবলামিত্যাদি| যবাগূমিতি ‘পূর্বোক্তৌষধসাধিতাং স্নেহযুক্তাম্’ ইতি শেষঃ| অত ঊর্ধ্বমিত্যাদি| স্নেহপানযবাগূপানাভ্যাং প্রেরিতত্রিরাত্রপঞ্চরাত্রাদূর্ধ্বং স্নিগ্ধেন পেযাদিক্রমেণ বহ্নের্বলস্য চ বৃংহণার্থং বাতজযার্থং চোপচরেত্| অত্রার্থে বৃদ্ধবাগ্ভটঃ- “অথ সূতিকাং বলাতৈলেনাভ্যজ্যাত্, বুভুক্ষিতাং চ পঞ্চকোলচূর্ণেন যবান্যুপকুঞ্চিকাচব্যচিত্রকব্যোষসৈন্ধবচূর্ণেন বা যুক্তামহঃপরিণামিনীং যথাসাত্ম্যং স্নেহমাত্রাং পাযযেত্, স্নেহাযোগ্যাং বাতহরৌষধক্বাথং হ্রস্বপঞ্চমূলীক্বাথং বা; পীতবত্যাশ্চ যমকেনাভ্যজ্য বেষ্টযেদুদরং বস্ত্রেণ, তথা ন বাযুরুদরে বিকৃতিমুত্পাদযত্যনবকাশত্বাত্, জীর্ণে তু স্নেহে পূর্বৌষধৈরেব সিদ্ধাং বিদার্যাদিগণক্বাথেন বা ক্ষীরেণ যবাগূং সুস্বিন্নাং দ্রবাং মাত্রযা পাযযেত্” (অ.সং.শা.৩)- ইতি||১৭||
Adhikarana 15 (18) · Śloka 18
প্রাযশশ্চৈনাং প্রভূতেনোষ্ণোদকেন পরিষিঞ্চেত্, ক্রোধাযাসমৈথুনাদীংশ্চ পরিহরেত্ ||১৮||
प्रायशश्चैनां प्रभूतेनोष्णोदकेन परिषिञ्चेत्, क्रोधायासमैथुनादींश्च परिहरेत् ||१८||
🔊 Audio coming soon
অপরমপি প্রসূতামধিকৃত্য সামান্যেন ক্রিযাবিশেষমাহ- প্রাযশশ্চেত্যাদি| এনাং স্ত্রিযং; পরিষিঞ্চেদ্ ধারযা, গর্ভক্ষোভকৃতরক্তস্রাবণার্থং বাতজযার্থং চ| আযাসো ব্যাযামঃ, মৈথুনং পুরুষসেবা, ক্রোধাদযঃ পঞ্চদশ আতুরোপদ্রবচিকিত্সিতোক্তাঃ||১৮||
Adhikarana 16 (19-20) · Śloka 20
মিথ্যাচারাত্ সূতিকাযা যো ব্যাধিরুপজাযতে | স কৃচ্ছ্রসাধ্যোঽসাধ্যো বা ভবেদত্যপতর্পণাত্ ||১৯|| তস্মাত্তাং দেশকালৌ চ ব্যাধিসাত্ম্যেন কর্মণা | পরীক্ষ্যোপচরেন্নিত্যমেবং নাত্যযমাপ্নুযাত্ ||২০||
मिथ्याचारात् सूतिकाया यो व्याधिरुपजायते | स कृच्छ्रसाध्योऽसाध्यो वा भवेदत्यपतर्पणात् ||१९|| तस्मात्तां देशकालौ च व्याधिसात्म्येन कर्मणा | परीक्ष्योपचरेन्नित्यमेवं नात्ययमाप्नुयात् ||२०||
🔊 Audio coming soon
উক্তাহারাচারব্যতিক্রমেণ কিং ভবতীত্যাহ- মিথ্যাচারাদিত্যাদি| অত্যপতর্পণাদিতি অসাধ্যভবনে হেতুঃ| তাং প্রসূতাং, দেশকালৌ পরীক্ষ্য ব্যাধিসাত্ম্যেন কর্মণা নিত্যমুপচরেদিতি সম্বন্ধঃ| অত্যযো বিনাশঃ| গযী তু ‘দেশকালৌকব্যাধিসাত্ম্যেন কর্মণা’ ইতি পঠিত্বা দেশাদিভিঃ সহ পৃথক্ সাত্ম্যশব্দং সম্বধ্নাতি; ওকসাত্ম্যমভ্যাসসাত্ম্যং, ওকশব্দোঽযম্ ‘উচ’ সমবায ইত্যনেন ধাতুনা ব্যুত্পাদিত ইতি ব্যাখ্যাতি||১৯-২০||
Adhikarana 17 (21) · Śloka 21
অথাপরাঽপতন্ত্যানাহাধ্মানৌ কুরুতে, তস্মাত্ কণ্ঠমস্যাঃ কেশবেষ্টিতযাঽঙ্গুল্যা প্রমৃজেত্, কটুকালাবুকৃতবেধনসর্ষপসর্পনির্মোকৈর্বা কটুতৈলবিমিশ্রৈর্যোনিমুখং ধূপযেত্, লাঙ্গলীমূলকল্কেন বাঽস্যাঃ পাণিপাদতলমালিম্পেত্, মূর্ধ্নি বাঽস্যা মহাবৃক্ষক্ষীরমনুসেচযেত্, কুষ্ঠলাঙ্গলীমূলকল্কং বা মদ্যমূত্রযোরন্যতরেণ পাযযেত্, শালমূলকল্কং বা পিপ্পল্যাদিং বা মদ্যেন, সিদ্ধার্থককুষ্ঠলাঙ্গলীমহাবৃক্ষক্ষীরমিশ্রেণ সুরামণ্ডেন বাঽঽস্থাপযেত্, এতৈরেব সিদ্ধেন সিদ্ধার্থকতৈলেনোত্তরবস্তিং দদ্যাত্, স্নিগ্ধেন বা কৃত্তনখেন হস্তেনাপহরেত্ ||২১||
अथापराऽपतन्त्यानाहाध्मानौ कुरुते, तस्मात् कण्ठमस्याः केशवेष्टितयाऽङ्गुल्या प्रमृजेत्, कटुकालाबुकृतवेधनसर्षपसर्पनिर्मोकैर्वा कटुतैलविमिश्रैर्योनिमुखं धूपयेत्, लाङ्गलीमूलकल्केन वाऽस्याः पाणिपादतलमालिम्पेत्, मूर्ध्नि वाऽस्या महावृक्षक्षीरमनुसेचयेत्, कुष्ठलाङ्गलीमूलकल्कं वा मद्यमूत्रयोरन्यतरेण पाययेत्, शालमूलकल्कं वा पिप्पल्यादिं वा मद्येन, सिद्धार्थककुष्ठलाङ्गलीमहावृक्षक्षीरमिश्रेण सुरामण्डेन वाऽऽस्थापयेत्, एतैरेव सिद्धेन सिद्धार्थकतैलेनोत्तरबस्तिं दद्यात्, स्निग्धेन वा कृत्तनखेन हस्तेनापहरेत् ||२१||
🔊 Audio coming soon
অথাপরেত্যাদি| কৃতবেধনঃ কোশাতকঃ| ‘শালমূলকল্কং’ ইত্যত্র ‘শালিমূলকল্কং’ ইতি কেচিত্||২১||
Adhikarana 18 (22) · Śloka 22
প্রজাতাযাশ্চ নার্যা রূক্ষশরীরাযাস্তীক্ষ্ণৈরবিশোধিতং রক্তং বাযুনা তদ্দেশগতেনাতিসংরুদ্ধং নাভেরধঃ পার্শ্বযোর্বস্তৌ বস্তিশিরসি বা গ্রন্থিং করোতি; ততশ্চ নাভিবস্ত্যুদরশূলানি ভবন্তি, সূচীভিরিব নিস্তুদ্যতে ভিদ্যতে দীর্যত ইব চ পক্বাশযঃ, সমন্তাদাধ্মানমুদরে মূত্রসঙ্গশ্চ ভবতীতি মক্কল্ললক্ষণম্ | তত্র বীরতর্বাদিসিদ্ধং জলমুষকাদিপ্রতীবাপং পাযযেত্, যবক্ষারচূর্ণং বা সুখোদকেন পিপ্পল্যাদিক্বাথেন বা, পিপ্পল্যাদিচূর্ণং বা সুরামণ্ডেন, বরুণাদিক্বাথং বা পঞ্চকোলৈলাপ্রতীবাপং, পৃথক্পর্ণ্যাদিক্বাথং বা ভদ্রদারুমরিচসংসৃষ্টং, পুরাণগুডং বা ত্রিকটুকচতুর্জাতককুস্তুম্বুরুমিশ্রং খাদেত্, অচ্ছং বা পিবেদরিষ্টমিতি ||২২||
प्रजातायाश्च नार्या रूक्षशरीरायास्तीक्ष्णैरविशोधितं रक्तं वायुना तद्देशगतेनातिसंरुद्धं नाभेरधः पार्श्वयोर्बस्तौ बस्तिशिरसि वा ग्रन्थिं करोति; ततश्च नाभिबस्त्युदरशूलानि भवन्ति, सूचीभिरिव निस्तुद्यते भिद्यते दीर्यत इव च पक्वाशयः, समन्तादाध्मानमुदरे मूत्रसङ्गश्च भवतीति मक्कल्ललक्षणम् | तत्र वीरतर्वादिसिद्धं जलमुषकादिप्रतीवापं पाययेत्, यवक्षारचूर्णं वा सुखोदकेन पिप्पल्यादिक्वाथेन वा, पिप्पल्यादिचूर्णं वा सुरामण्डेन, वरुणादिक्वाथं वा पञ्चकोलैलाप्रतीवापं, पृथक्पर्ण्यादिक्वाथं वा भद्रदारुमरिचसंसृष्टं, पुराणगुडं वा त्रिकटुकचतुर्जातककुस्तुम्बुरुमिश्रं खादेत्, अच्छं वा पिबेदरिष्टमिति ||२२||
🔊 Audio coming soon
প্রজাতাযা ইত্যাদি| প্রজাতাযাঃ প্রজননশোণিতসঞ্জনিতশূলো মক্কল্লঃ; অবরুদ্ধরক্তপাকজনিতো বিদ্রধিরপি মক্কল্লঃ, কার্যে কারণোপচারাত্| মক্কল্লচিকিত্সামাহ- তত্রেত্যাদি| জলং ক্বাথম্| যবক্ষারচূর্ণং সুখোদকেন মন্দাগ্নৌ, কফপ্রকৃতীনাং পিপ্পল্যাদিক্বাথেন, এবমন্যেঽপি যোগা দোষাদীনবেক্ষ্য যোজনীযাঃ| অচ্ছং কেবলম্| অরিষ্টম্ অভযারিষ্টাদিকম্||২২||
Adhikarana 19 (23) · Śloka 23
অথ বালং ক্ষৌমপরিবৃতং ক্ষৌমবস্ত্রাস্তৃতাযাং শয্যাযাং শাযযেত্, পীলুবদরীনিম্বপরূষকশাখাভিশ্চৈনং পরিবীজযেত্, মূর্ধ্নি চাস্যাহরহস্তৈলপিচুমবচারযেত্, ধূপযেচ্চৈনং রক্ষোঘ্নৈর্ধূপৈঃ, রক্ষোঘ্নানি চাস্য পাণিপাদশিরোগ্রীবাস্ববসৃজেত্, তিলাতসীসর্ষপকণাংশ্চাত্র প্রকিরেত্, অধিষ্ঠানে চাগ্নিং প্রজ্বালযেত্, ব্রণিতোপাসনীযং চাবেক্ষেত ||২৩||
अथ बालं क्षौमपरिवृतं क्षौमवस्त्रास्तृतायां शय्यायां शाययेत्, पीलुबदरीनिम्बपरूषकशाखाभिश्चैनं परिवीजयेत्, मूर्ध्नि चास्याहरहस्तैलपिचुमवचारयेत्, धूपयेच्चैनं रक्षोघ्नैर्धूपैः, रक्षोघ्नानि चास्य पाणिपादशिरोग्रीवास्ववसृजेत्, तिलातसीसर्षपकणांश्चात्र प्रकिरेत्, अधिष्ठाने चाग्निं प्रज्वालयेत्, व्रणितोपासनीयं चावेक्षेत ||२३||
🔊 Audio coming soon
অথ বালমিত্যাদি| ক্ষৌমং দুকূলম্| রক্ষোঘ্নৈধূপৈর্বচাদিভিঃ| অধিষ্ঠানে সূতিকাগারে| ব্রণিতোপাসনীযং চাবেক্ষেতেতি তেন প্রাক্শীর্ষশযনমজস্রদীপস্রগ্দামাদি সর্বমত্রাপি তত্রোক্তং বেদিতব্যম্||২৩||
Adhikarana 20 (24) · Śloka 24
ততো দশমেঽহনি মাতাপিতরৌ কৃতমঙ্গলকৌতুকৌ স্বস্তিবাচনং কৃত্বা নাম কুর্যাতাং যদভিপ্রেতং নক্ষত্রনাম বা ||২৪||
ततो दशमेऽहनि मातापितरौ कृतमङ्गलकौतुकौ स्वस्तिवाचनं कृत्वा नाम कुर्यातां यदभिप्रेतं नक्षत्रनाम वा ||२४||
🔊 Audio coming soon
তত ইত্যাদি| নক্ষত্রনামেতি নক্ষত্রদেবতাকৃতং নামেত্যর্থঃ||২৪||
Adhikarana 21 (25-27) · Śloka 27
ততো যথাবর্ণং ধাত্রীমুপেযান্মধ্যমপ্রমাণাং মধ্যমবযস্কা(সা)মরোগাং শীলবতীমচপলামলোলুপামকৃশামস্থূলাং প্রসন্নক্ষীরামলম্বৌষ্ঠীমলম্বোর্ধ্বস্তনীমব্যঙ্গামব্যসনিনীং জীবদ্বত্সাং দোগ্ধ্রীং বত্সলামক্ষুদ্রকর্মিণীং কুলে জাতামতো ভূযিষ্ঠৈশ্চ গুণৈরন্বিতাং শ্মামামারোগ্যবলবৃদ্ধযে বালস্য | তত্রোর্ধ্বস্তনী করালং কুর্যাত্, লম্বস্তনী নাসিকামুখং ছাদযিত্বা মরণমাপাদযেত্ | ততঃ প্রশস্তাযাং তিথৌ শিরঃস্নাতমহতবাসসমুদঙ্মুখং শিশুমুপবেশ্য ধাত্রীং প্রাঙ্মুখীং চোপবেশ্য দক্ষিণং স্তনং ধৌতমীষত্পরিস্রুতমভিমন্ত্র্য মন্ত্রেণানেন পাযযেত্ ||২৫|| ‘চত্বারঃ সাগরাস্তুভ্যং স্তনযোঃ ক্ষীরবাহিনঃ | ভবন্তু সুভগে নিত্যং বালস্য বলবৃদ্ধযে ||২৬|| পযোঽমৃতরসং পীত্বা কুমারস্তে শুভাননে | দীর্ঘমাযুরবাপ্নোতু দেবাঃ প্রাশ্যামৃতং যথা ||২৭||
ततो यथावर्णं धात्रीमुपेयान्मध्यमप्रमाणां मध्यमवयस्का(सा)मरोगां शीलवतीमचपलामलोलुपामकृशामस्थूलां प्रसन्नक्षीरामलम्बौष्ठीमलम्बोर्ध्वस्तनीमव्यङ्गामव्यसनिनीं जीवद्वत्सां दोग्ध्रीं वत्सलामक्षुद्रकर्मिणीं कुले जातामतो भूयिष्ठैश्च गुणैरन्वितां श्मामामारोग्यबलवृद्धये बालस्य | तत्रोर्ध्वस्तनी करालं कुर्यात्, लम्बस्तनी नासिकामुखं छादयित्वा मरणमापादयेत् | ततः प्रशस्तायां तिथौ शिरःस्नातमहतवाससमुदङ्मुखं शिशुमुपवेश्य धात्रीं प्राङ्मुखीं चोपवेश्य दक्षिणं स्तनं धौतमीषत्परिस्रुतमभिमन्त्र्य मन्त्रेणानेन पाययेत् ||२५|| ‘चत्वारः सागरास्तुभ्यं स्तनयोः क्षीरवाहिनः | भवन्तु सुभगे नित्यं बालस्य बलवृद्धये ||२६|| पयोऽमृतरसं पीत्वा कुमारस्ते शुभानने | दीर्घमायुरवाप्नोतु देवाः प्राश्यामृतं यथा ||२७||
🔊 Audio coming soon
তত ইত্যাদি| যথাবর্ণমিতি ব্রাহ্মণস্য ব্রাহ্মণীং, ক্ষত্রিযস্য ক্ষত্রিযামিত্যাদি| ধাত্রীমুপেযাত্ স্তনদাযিনীং সমীপং গচ্ছেত্, ‘ভিষক্ বালগ্রাহকো বা’ ইতি শেষঃ| শ্যামা হি প্রাযশঃ প্রচুরক্ষীরা ভবতি| উক্তবিপর্যাসেন দোষস্য দিঙ্মাত্রং দর্শযন্নাহ- তত্রেত্যাদি| ইতিশব্দোঽযমেবম্প্রকারে, তেনান্যেঽপি দোষা এবম্প্রকারাঃ স্বযমপ্যূহ্য জ্ঞাতব্যাঃ| অভিমন্ত্রণমাহ- চত্বার ইত্যাদি||২৫-২৭||
Adhikarana 22 (28) · Śloka 28
অতোঽন্যথা নানাস্তন্যোপযোগস্যাসাত্ম্যাদ্ব্যাধিজন্ম ভবতি ||২৮||
अतोऽन्यथा नानास्तन्योपयोगस्यासात्म्याद्व्याधिजन्म भवति ||२८||
🔊 Audio coming soon
নিযতধাত্র্যা অভাবে দোষং দর্শযন্নাহ- অতোঽন্যথেত্যাদি||২৮||
Adhikarana 23 (29) · Śloka 29
অপরিস্রুতেঽপ্যতিস্তব্ধস্তন্যপূর্ণস্তনপানাদুত্সুহিতস্রোতসঃ শিশোঃ কাসশ্বাসবমীপ্রাদুর্ভাবঃ | তস্মাদেবংবিধানাং স্তন্যং ন পাযযেত্ ||২৯||
अपरिस्रुतेऽप्यतिस्तब्धस्तन्यपूर्णस्तनपानादुत्सुहितस्रोतसः शिशोः कासश्वासवमीप्रादुर्भावः | तस्मादेवंविधानां स्तन्यं न पाययेत् ||२९||
🔊 Audio coming soon
কুত ঈষত্পরিস্রুতং স্তন্যং পাযযেদিত্যাশঙ্ক্য তদ্বিপর্যযে দোষং বক্তুমাহ- অপরিস্রুত ইত্যাদি| উত্সুহিতস্রোতস ইতি ঊর্ধ্বপূরিতস্রোতস ইত্যর্থঃ| ‘উত্স্নুহিতস্রোতস’ ইতি পাঠে তু ঊর্ধ্বং স্রুহিতমুদ্গীর্ণং স্রোতো যস্যেতি সমাসঃ||২৯||
Adhikarana 24 (30) · Śloka 30
ক্রোধশোকাবাত্সল্যাদিভিশ্চ স্ত্রিযাঃস্তন্যনাশো ভবতি | অথাস্যাঃ ক্ষীরজননার্থং সৌমনস্যমুত্পাদ্যযবগোধূমশালিষষ্টিকমাংসরসসুরাসৌবীরকপিণ্যাকলশুনমত্স্যকশেরুকশৃঙ্গাটক- বিসবিদারিকন্দমধুকশতাবরীনালিকালাবূকালশাকপ্রভৃতীনি বিদধ্যাত্ ||৩০||
क्रोधशोकावात्सल्यादिभिश्च स्त्रियाःस्तन्यनाशो भवति | अथास्याः क्षीरजननार्थं सौमनस्यमुत्पाद्ययवगोधूमशालिषष्टिकमांसरससुरासौवीरकपिण्याकलशुनमत्स्यकशेरुकशृङ्गाटक- बिसविदारिकन्दमधुकशतावरीनालिकालाबूकालशाकप्रभृतीनि विदध्यात् ||३०||
🔊 Audio coming soon
ক্রোধশোকেত্যাদি| অবাত্সল্যম্ অমমত্বম্| আদিশব্দাল্লঙ্ঘনব্যাযামাদযঃ| অথাস্যা ইত্যাদি| নালিকা শাকবিশেষঃ, ‘নালিকের’ ইতি ক্বচিত্ পাঠঃ||৩০||
Adhikarana 25 (31-33) · Śloka 33
অথাস্যাঃ স্তন্যমপ্সু পরীক্ষেত; তচ্চেচ্ছীতলমমলং তনু শঙ্খাবভাসমপ্সু ন্যস্তমেকীভাবং গচ্ছত্যফেনিলমতন্তুমন্নোত্প্লবতেঽবসীদতি বা তচ্ছুদ্ধমিতি বিদ্যাত্, তেন কুমারস্যারোগ্যং শরীরোপচযো বলবৃদ্ধিশ্চ ভবতি | ন চ ক্ষুধিতশোকার্তশ্রান্তপ্রদুষ্টধাতুগর্ভিণীজ্বরিতাতিক্ষীণাতিস্থূলবিদগ্ধভক্তবিরুদ্ধাহারতর্পিতাযাঃ স্তন্যং পাযযেত্; নাজীর্ণৌষধং চ বালং, দোষৌষধমলানাং তীব্রবেগোত্পত্তিভযাত্ ||৩১|| ভবন্তি চাত্র- ধাত্র্যাস্তু গুরুভির্ভোজ্যৈর্বিষমৈর্দোষলৈস্তথা | দোষা দেহে প্রকুপ্যন্তি ততঃ স্তন্যং প্রদুষ্যতি ||৩২|| মিথ্যাহারবিহারিণ্যা দুষ্টা বাতাদযঃ স্ত্রিযাঃ | দূষযন্তি পযস্তেন শারীরা ব্যাধযঃ শিশোঃ | ভবন্তি কুশলস্তাংশ্চ ভিষক্ সম্যগ্বিভাবযেত্ ||৩৩||
अथास्याः स्तन्यमप्सु परीक्षेत; तच्चेच्छीतलममलं तनु शङ्खावभासमप्सु न्यस्तमेकीभावं गच्छत्यफेनिलमतन्तुमन्नोत्प्लवतेऽवसीदति वा तच्छुद्धमिति विद्यात्, तेन कुमारस्यारोग्यं शरीरोपचयो बलवृद्धिश्च भवति | न च क्षुधितशोकार्तश्रान्तप्रदुष्टधातुगर्भिणीज्वरितातिक्षीणातिस्थूलविदग्धभक्तविरुद्धाहारतर्पितायाः स्तन्यं पाययेत्; नाजीर्णौषधं च बालं, दोषौषधमलानां तीव्रवेगोत्पत्तिभयात् ||३१|| भवन्ति चात्र- धात्र्यास्तु गुरुभिर्भोज्यैर्विषमैर्दोषलैस्तथा | दोषा देहे प्रकुप्यन्ति ततः स्तन्यं प्रदुष्यति ||३२|| मिथ्याहारविहारिण्या दुष्टा वातादयः स्त्रियाः | दूषयन्ति पयस्तेन शारीरा व्याधयः शिशोः | भवन्ति कुशलस्तांश्च भिषक् सम्यग्विभावयेत् ||३३||
🔊 Audio coming soon
অথাস্যাঃ স্তন্যমিত্যাদি| অবসীদতি বেত্যত্রাপি নিষেধঃ সম্বন্ধনীযঃ||৩১-৩৩||
Adhikarana 26 (34-36) · Śloka 36
অঙ্গপ্রত্যঙ্গদেশে তু রুজা যত্রাস্য জাযতে | মুহুর্মুহুঃ স্পৃশতি তং স্পৃশ্যমানে চ রোদিতি ||৩৪|| নিমীলিতাক্ষো মূর্ধস্থে শিরো রোগে ন ধারযেত্ | বস্তিস্থে মূত্রসঙ্গার্তো রুজা তৃষ্যতি মূর্চ্ছতি ||৩৫|| বিণ্মূত্রসঙ্গবৈবর্ণ্যচ্ছর্দ্যাধ্মানান্ত্রকূজনৈঃ | কোষ্ঠে দোষান্ বিজানীযাত্ সর্বত্রস্থাংশ্চ রোদনৈঃ ||৩৬||
अङ्गप्रत्यङ्गदेशे तु रुजा यत्रास्य जायते | मुहुर्मुहुः स्पृशति तं स्पृश्यमाने च रोदिति ||३४|| निमीलिताक्षो मूर्धस्थे शिरो रोगे न धारयेत् | बस्तिस्थे मूत्रसङ्गार्तो रुजा तृष्यति मूर्च्छति ||३५|| विण्मूत्रसङ्गवैवर्ण्यच्छर्द्याध्मानान्त्रकूजनैः | कोष्ठे दोषान् विजानीयात् सर्वत्रस्थांश्च रोदनैः ||३६||
🔊 Audio coming soon
ব্যাধিস্বরূপং প্রতিপাদযিতুমজ্ঞানাং বালানাং রোগজ্ঞানোপাযমাহ- অঙ্গপ্রত্যঙ্গেত্যাদি||৩৪-৩৬||
Adhikarana 27 (37) · Śloka 37
তেষু যথাভিহিতং মৃদ্বচ্ছেদনীযমৌষধং মাত্রযা ক্ষীরপস্য ক্ষীরসর্পিষা সংযুক্তং বিদধ্যাত্, ধাত্র্যাশ্চ কেবলং, ক্ষীরান্নাদস্যাত্মনি ধাত্র্যাশ্চ পূর্ববত্, অন্নাদস্য কষাযাদীনাত্মন্যেব ন ধাত্র্যাঃ ||৩৭||
तेषु यथाभिहितं मृद्वच्छेदनीयमौषधं मात्रया क्षीरपस्य क्षीरसर्पिषा संयुक्तं विदध्यात्, धात्र्याश्च केवलं, क्षीरान्नादस्यात्मनि धात्र्याश्च पूर्ववत्, अन्नादस्य कषायादीनात्मन्येव न धात्र्याः ||३७||
🔊 Audio coming soon
তেষু চ রোগেষু যথাবিহিতং যদ্যদৌষধং যত্র যত্র রোগে বিহিতং তত্তত্তত্র কুর্যাত্| তদপি মৃদু অতীক্ষ্ণম্, অচ্ছেদনীযং কফমেদসোরচ্ছেদকারি| মাত্রযা বক্ষ্যমাণযা| ক্ষীরসর্পিষা সহ বালস্য ক্ষীরসর্পিঃসাত্ম্যত্বাত্; ধাত্র্যাশ্চ কেবলমেব ন ক্ষীরযুক্তং নাপি সর্পির্যুক্তমিত্যর্থঃ| ক্ষীরান্নাদস্য পূর্ববত্ ক্ষীরসর্পিষা যুক্তং, ধাত্র্যাস্তু কেবলমেব||৩৭||
Adhikarana 28 (38) · Śloka 38
তত্র মাসাদূর্ধ্বং ক্ষীরপাযাঙ্গুলিপর্বদ্বযগ্রহণসম্মিতামৌষধমাত্রাং বিদধ্যাত্, কোলাস্থিসম্মিতাং কল্কমাত্রাং ক্ষীরান্নাদায, কোলসম্মিতামন্নাদাযেতি ||৩৮||
तत्र मासादूर्ध्वं क्षीरपायाङ्गुलिपर्वद्वयग्रहणसम्मितामौषधमात्रां विदध्यात्, कोलास्थिसम्मितां कल्कमात्रां क्षीरान्नादाय, कोलसम्मितामन्नादायेति ||३८||
🔊 Audio coming soon
তামেব মাত্রাং নির্দিশন্নাহ- তত্র মাসাদূর্ধ্বমিত্যাদি| অঙ্গুলিপর্বদ্বযগ্রহণসম্মিতামিতি ‘ক্ষীরাজ্যালোডিতৌষধস্য’ ইতি শেষঃ| তন্ত্রান্তরে চান্যথাঽভিহিতং; যথা- “প্রথমে মাসি জাতস্য শিশোর্ভেষজরক্তিকা| অবলেহ্যা তু কর্তব্যা মধুক্ষীরসিতাঘৃতৈঃ|| একৈকাং বর্ধযেত্তাবদ্যাবত্ সংবত্সরো ভবেত্| তদূর্ধ্বং মাষবৃদ্ধিঃ স্যাদ্যাবত্ ষোডশকাব্দিকঃ”- ইতি||৩৮||
Adhikarana 29 (39) · Śloka 39
যেষাং গদানাং যে যোগাঃ প্রবক্ষ্যন্তেঽগদঙ্করাঃ | তেষু তত্কল্কসংলিপ্তৌ পাযযেত শিশুং স্তনৌ ||৩৯||
येषां गदानां ये योगाः प्रवक्ष्यन्तेऽगदङ्कराः | तेषु तत्कल्कसंलिप्तौ पाययेत शिशुं स्तनौ ||३९||
🔊 Audio coming soon
প্রকারান্তরেণৌষধোপযোগমাহ- যেষাং গদানামিত্যাদি||৩৯||
Adhikarana 30 (40-41) · Śloka 41
একং দ্বে ত্রীণি চাহানি বাতপিত্তকফজ্বরে | স্তন্যপাযাহিতং সর্পিরিতরাভ্যাং যথার্থতঃ ||৪০|| ন চ তৃষ্ণাভযাদত্র পাযযেত শিশুং স্তনৌ | বিরেকবস্তিবমনান্যৃতে কুর্যাচ্চ নাত্যযাত্ ||৪১||
एकं द्वे त्रीणि चाहानि वातपित्तकफज्वरे | स्तन्यपायाहितं सर्पिरितराभ्यां यथार्थतः ||४०|| न च तृष्णाभयादत्र पाययेत शिशुं स्तनौ | विरेकबस्तिवमनान्यृते कुर्याच्च नात्ययात् ||४१||
🔊 Audio coming soon
জ্বরে বিশেষমাহ- একমিত্যাদি| স্তন্যপাযাহিতং সর্পিঃ, ‘সাত্ম্যাদ্দত্তং’ ইতি বাক্যশেষঃ| ইতরাভ্যাং ক্ষীরান্নাদান্নাদাভ্যাং, যথার্থতো যথাপ্রযোজনতঃ, হিতং সর্পিরিত্যর্থঃ| ন চেত্যাদি| অত্রেতি জ্বরে| অত্যযাদিতি বিনাশকারকাদ্বিকারাদ্বিনেত্যর্থঃ||৪০-৪১||
Adhikarana 31 (42) · Śloka 43
মস্তুলুঙ্গক্ষযাদ্যস্য বাযুস্তাল্বস্থি নামযেত্ | তস্য তৃড্দৈন্যযুক্তস্য সর্পির্মধুরকৈঃ শৃতম্ ||৪২|| পানাভ্যঞ্জনযোর্যোজ্যং শীতাম্বূদ্বেজনং তথা |৪৩|
मस्तुलुङ्गक्षयाद्यस्य वायुस्ताल्वस्थि नामयेत् | तस्य तृड्दैन्ययुक्तस्य सर्पिर्मधुरकैः शृतम् ||४२|| पानाभ्यञ्जनयोर्योज्यं शीताम्बूद्वेजनं तथा |४३|
🔊 Audio coming soon
তালুনি পতিতে চিকিত্সামাহ- মস্তুলুঙ্গক্ষযাদিত্যাদি| মস্তুলুঙ্গোঽবিলীনঘৃতাকারা মস্তকমজ্জা| মধুরকৈঃ শৃতমিতি কাকোল্যাদিভিঃ পক্বম্| শীতাম্বূদ্বেজনমিতি শীতাম্বুচুলকৈরাসেচনাত্ত্রাসনম্||৪২||-
Adhikarana 32 (43-44) · Śloka 44
বাতেনাধ্মাপিতাং নাভিং সরুজাং তুণ্ডিসঞ্জ্ঞিতাম্ ||৪৩|| মারুতঘ্নৈঃ প্রশমযেত্ স্নেহস্বেদোপনাহনৈঃ | গুদপাকে তু বালানাং পিত্তঘ্নীং কারযেত্ ক্রিযাম্ | রসাঞ্জনং বিশেষেণ পানালেপনযোর্হিতম্ ||৪৪||
वातेनाध्मापितां नाभिं सरुजां तुण्डिसञ्ज्ञिताम् ||४३|| मारुतघ्नैः प्रशमयेत् स्नेहस्वेदोपनाहनैः | गुदपाके तु बालानां पित्तघ्नीं कारयेत् क्रियाम् | रसाञ्जनं विशेषेण पानालेपनयोर्हितम् ||४४||
🔊 Audio coming soon
বাতেনাধ্মাপিতামিত্যাদি পানালেপনযোর্হিতমিত্যন্তং শ্লোকদ্বযং নিবন্ধকারৈর্ন পঠিতম্||৪৩-৪৪||
Adhikarana 33 (45) · Śloka 45
ক্ষীরাহারায সর্পিঃ পাযযেত্ সিদ্ধার্থকবচামাংসীপযস্যাপামার্গশতাবরীসারিবাব্রাহ্মীপিপ্পলীহরিদ্রাকুষ্ঠসৈন্ধবসিদ্ধং, ক্ষীরান্নাদায মধুকবচাপিপ্পলীচিত্রকত্রিফলাসিদ্ধম্, অন্নাদায দ্বিপঞ্চমূলীক্ষীরতগরভদ্রদারুমরিচমধুকবিডঙ্গদ্রাক্ষর্ধিব্রাহ্মীসিদ্ধং ; তেনারোগ্যবলমেধাযূংষি শিশোর্ভবন্তি ||৪৫||
क्षीराहाराय सर्पिः पाययेत् सिद्धार्थकवचामांसीपयस्यापामार्गशतावरीसारिवाब्राह्मीपिप्पलीहरिद्राकुष्ठसैन्धवसिद्धं, क्षीरान्नादाय मधुकवचापिप्पलीचित्रकत्रिफलासिद्धम्, अन्नादाय द्विपञ्चमूलीक्षीरतगरभद्रदारुमरिचमधुकविडङ्गद्राक्षर्धिब्राह्मीसिद्धं ; तेनारोग्यबलमेधायूंषि शिशोर्भवन्ति ||४५||
🔊 Audio coming soon
সর্পিঃসাত্ম্যত্বাদ্বালস্য স্বস্থেঽপি সর্পিরেব ভেষজসিদ্ধং দর্শযন্নাহ- ক্ষীরেত্যাদি| পযস্যা অর্কপুষ্পী||৪৫||
Adhikarana 34 (46-47) · Śloka 47
বালং পুনর্গাত্রসুখং গৃহ্ণীযাত্, ন চৈনং তর্জযেত্, সহসা ন প্রতিবোধযেদ্বিত্রাসভযাত্, সহসা নাপহরেদুত্ক্ষিপেদ্বা বাতাদিবিঘাতভযাত্, নোপবেশযেত্ কৌব্জ্যভযাত্, নিত্যং চৈনমনুবর্তেত প্রিযশতৈরজিঘাংসুঃ; এবমবিহতমনা হ্যভিবর্ধতে নিত্যমুদগ্রসত্ত্বসম্পন্নো নীরোগঃ সুপ্রসন্নমনাশ্চ ভবতি | বাতাতপবিদ্যুত্প্রভাপাদপলতাশূন্যাগারনিম্নস্থানগ্রহচ্ছাযাদিভ্যো দুর্গ্রহোপসর্গতশ্চ বালং রক্ষেত্ ||৪৬|| নাশুচৌ বিসৃজেদ্বালং নাকাশে বিষমে ন চ | নোষ্মমারুতবর্ষেষু রজোধূমোদকেষু চ ||৪৭||
बालं पुनर्गात्रसुखं गृह्णीयात्, न चैनं तर्जयेत्, सहसा न प्रतिबोधयेद्वित्रासभयात्, सहसा नापहरेदुत्क्षिपेद्वा वातादिविघातभयात्, नोपवेशयेत् कौब्ज्यभयात्, नित्यं चैनमनुवर्तेत प्रियशतैरजिघांसुः; एवमविहतमना ह्यभिवर्धते नित्यमुदग्रसत्त्वसम्पन्नो नीरोगः सुप्रसन्नमनाश्च भवति | वातातपविद्युत्प्रभापादपलताशून्यागारनिम्नस्थानग्रहच्छायादिभ्यो दुर्ग्रहोपसर्गतश्च बालं रक्षेत् ||४६|| नाशुचौ विसृजेद्बालं नाकाशे विषमे न च | नोष्ममारुतवर्षेषु रजोधूमोदकेषु च ||४७||
🔊 Audio coming soon
ইদানীং বালে পরিজনস্য করণীযং নির্দিশন্নাহ- বালমিত্যাদি| অনুবর্তেত অনুকূলযেত্| প্রিযশতৈর্বালক্রীডনকদানাদিভিরিত্যর্থঃ| অজিঘাংসুরিতি অহন্তুমিচ্ছুঃ সন্, ‘বালগ্রাহক’ ইতি শেষঃ| উক্তপ্রকারানুকূলনে ফলমাহ- এবমিত্যাদি| ‘পাদপলতাশূন্যাগার’ ইত্যত্র কেচিত্ ‘পাদপলতানানাগারনিম্নস্থানগৃহচ্ছাযা ’ ইতি পঠন্তি| নাশুচাবিত্যাদি| বিষমে নিম্নোন্নতপ্রদেশে||৪৬-৪৭||
Adhikarana 35 (48) · Śloka 48
ক্ষীরসাত্ম্যতযা ক্ষীরমাজং গব্যমথাপি বা | দদ্যাদাস্তন্যপর্যাপ্তের্বালানাং বীক্ষ্য মাত্রযা ||৪৮||
क्षीरसात्म्यतया क्षीरमाजं गव्यमथापि वा | दद्यादास्तन्यपर्याप्तेर्बालानां वीक्ष्य मात्रया ||४८||
🔊 Audio coming soon
স্ত্রীস্তন্যাভাবে চ ক্ষীরান্তরং নির্দিশন্নাহ- ক্ষীরসাত্ম্যতযেত্যাদি| আস্তন্যপর্যাপ্তেরিতি যাবত্ স্তন্যস্য পুনঃ পর্যাপ্তিঃ পরি সমন্ততো ভাবেন প্রাপ্তির্ভবতি, অথবা যাবত্ স্তন্যপানস্য যোগ্যতা তাবদিত্যর্থঃ||৪৮||
Adhikarana 36 (49) · Śloka 49
ষণ্মাসং চৈনমন্নং প্রাশযেল্লঘু হিতং চ ||৪৯||
षण्मासं चैनमन्नं प्राशयेल्लघु हितं च ||४९||
🔊 Audio coming soon
অন্নদানকালমাহ- ষণ্মাসমিত্যাদি| গযী তু ‘ষণ্মাসাত্’ ইতি পঠিত্বা ষণ্মাসাদূর্ধ্বমিতি ব্যাখ্যাতি||৪৯||
Adhikarana 37 (50) · Śloka 50
নিত্যমবরোধরতশ্চ স্যাত্ কৃতরক্ষ উপসর্গভযাত্; প্রযত্নতশ্চ গ্রহোপসর্গেভ্যো রক্ষ্যা বালা ভবন্তি ||৫০||
नित्यमवरोधरतश्च स्यात् कृतरक्ष उपसर्गभयात्; प्रयत्नतश्च ग्रहोपसर्गेभ्यो रक्ष्या बाला भवन्ति ||५०||
🔊 Audio coming soon
নিত্যমবরোধরত ইতি সততং পরিজনাবৃতোঽন্তঃপুরস্থো বা, কৃতরক্ষাক্রিযো ভবেত্| কুতঃ কারণাদিত্যাহ- উপসর্গভযাত্| অস্যৈবার্থস্য প্রযত্নকরণীযতাং দর্শযন্নাহ- প্রযত্নতশ্চেত্যাদি| রক্ষ্যা ইতি রক্ষণীযা ইত্যর্থঃ||৫০||
Adhikarana 38 (51) · Śloka 51
অথ কুমার উদ্বিজতে ত্রস্যতি রোদিতি নষ্টসঞ্জ্ঞো ভবতি নখদশনৈর্ধাত্রীমাত্মানং চ পরিণুদতি দন্তান্ খাদতি কূজতি জৃম্ভতে ভ্রুবৌ বিক্ষিপত্যূর্ধ্বং নিরীক্ষতে ফেনমুদ্বমতি সন্দষ্টৌষ্ঠঃক্রূরো ভিন্নামবর্চা দীনার্তস্বরো নিশি জাগর্তি দুর্বলো ম্লানাঙ্গো মত্স্যচ্ছুচ্ছ্রুন্দরিমত্কুণগন্ধো যথা পুরা ধাত্র্যাঃ স্তন্যমভিলষতি তথা নাভিলষতীতি সামান্যেন গ্রহোপসৃষ্টলক্ষণমুক্তং, বিস্তরেণোত্তরে বক্ষ্যামঃ ||৫১||
अथ कुमार उद्विजते त्रस्यति रोदिति नष्टसञ्ज्ञो भवति नखदशनैर्धात्रीमात्मानं च परिणुदति दन्तान् खादति कूजति जृम्भते भ्रुवौ विक्षिपत्यूर्ध्वं निरीक्षते फेनमुद्वमति सन्दष्टौष्ठःक्रूरो भिन्नामवर्चा दीनार्तस्वरो निशि जागर्ति दुर्बलो म्लानाङ्गो मत्स्यच्छुच्छ्रुन्दरिमत्कुणगन्धो यथा पुरा धात्र्याः स्तन्यमभिलषति तथा नाभिलषतीति सामान्येन ग्रहोपसृष्टलक्षणमुक्तं, विस्तरेणोत्तरे वक्ष्यामः ||५१||
🔊 Audio coming soon
কিং পুনর্গ্রহোপসর্গলক্ষণং তদাহ- অথ কুমার ইত্যাদি||৫১||
Adhikarana 39 (52) · Śloka 52
শক্তিমন্তং চৈনং জ্ঞাত্বা যথাবর্ণং বিদ্যাং গ্রাহযেত্ ||৫২||
शक्तिमन्तं चैनं ज्ञात्वा यथावर्णं विद्यां ग्राहयेत् ||५२||
🔊 Audio coming soon
তস্য কুমারস্য পুরুষার্থসাধনহেতুভূতাং ক্রিযাং নির্দিশন্নাহ- শক্তিমন্তং চেত্যাদি| শক্তিমন্তং বিদ্যার্জনক্লেশক্ষমম্| যথাবর্ণমিতি ব্রাহ্মণস্ত্রযীং, রাজন্যো দণ্ডনীতিং, বৈশ্যো বার্তামিতি||৫২||
Adhikarana 40 (53) · Śloka 53
অথাস্মৈ পঞ্চবিংশতিবর্ষায ষোডশদশবর্ষাং পত্নীমাবহেত্ পিত্র্যধর্মার্থকামপ্রজাঃ প্রাপ্স্যতীতি ||৫৩||
अथास्मै पञ्चविंशतिवर्षाय षोडशदशवर्षां पत्नीमावहेत् पित्र्यधर्मार्थकामप्रजाः प्राप्स्यतीति ||५३||
🔊 Audio coming soon
বিদ্যাগ্রহণবদ্ পরমপি কুমারস্য দৃষ্টাদৃষ্টকারণসাধনভূতং নির্দিশন্নাহ- অথাস্মৈ ইত্যাদি| আবহেত্ বিদধ্যাত্| কিমর্থমিত্যাহ- পিত্র্যেত্যাদি| পিতুর্হিতং কর্ম পিত্র্যং শ্রাদ্ধদানাদি, ধর্মঃ শ্রুতিস্মৃতিবিহিতং যজ্ঞাদ্যনুষ্ঠানম্, অর্থঃ সুবর্ণাদিঃ, কামঃ স্বেষু বিষযেষ্বিন্দ্রিযাণামানুকূল্যতঃ প্রবৃত্তিঃ, প্রজাঃ পুত্রপৌত্রাদযঃ||৫৩||
Adhikarana 41 (54-55) · Śloka 55
ঊনষোডশবর্ষাযামপ্রাপ্তঃ পঞ্চবিংশতিম্ | যদ্যাধত্তে পুমান্ গর্ভং কুক্ষিস্থঃ স বিপদ্যতে ||৫৪|| জাতো বা ন চিরং জীবেজ্জীবেদ্বা দুর্বলেন্দ্রিযঃ | তস্মাদত্যন্তবালাযাং গর্ভাধানং ন কারযেত্ ||৫৫||
ऊनषोडशवर्षायामप्राप्तः पञ्चविंशतिम् | यद्याधत्ते पुमान् गर्भं कुक्षिस्थः स विपद्यते ||५४|| जातो वा न चिरं जीवेज्जीवेद्वा दुर्बलेन्द्रियः | तस्मादत्यन्तबालायां गर्भाधानं न कारयेत् ||५५||
🔊 Audio coming soon
অপ্রাপ্তপঞ্চবিংশতেরূনষোডশবর্ষযা সহ সংযোগে দোষং দর্শযন্নাহ- ঊনষোডশবর্ষাযামিত্যাদি||৫৪-৫৫||
Adhikarana 42 (56) · Śloka 56
অতিবৃদ্ধাযাং দীর্ঘরোগিণ্যামন্যেন বা বিকারেণোপসৃষ্টাযাং গর্ভাধানং নৈব কুর্বীত | পুরুষস্যাপ্যেবংবিধস্য ত এব দোষাঃ সম্ভবন্তি ||৫৬||
अतिवृद्धायां दीर्घरोगिण्यामन्येन वा विकारेणोपसृष्टायां गर्भाधानं नैव कुर्वीत | पुरुषस्याप्येवंविधस्य त एव दोषाः सम्भवन्ति ||५६||
🔊 Audio coming soon
অতিবৃদ্ধাদিষ্বপি গর্ভাধাননিষেধমাহ- অতিবৃদ্ধাযামিত্যাদি| পুরুষস্যাপ্যেবংবিধস্য গর্ভাধানেঽনধিকার ইতি শেষঃ| কুতো গর্ভাধাননিষেধ ইত্যাহ- ত এবেত্যাদি| এতেন কুক্ষিস্থঃ স বিপদ্যত ইত্যাদিবাক্যোক্তাঃ||৫৬||
Adhikarana 43 (57) · Śloka 57
তত্র পূর্বোক্তৈঃ কারণৈঃ পতিষ্যতি গর্ভে গর্ভাশযকটীবঙ্ক্ষণবস্তিশূলানি রক্তদর্শনং চ | তত্র শীতৈঃ পরিষেকাবগাহপ্রদেহাদিভিরুপচরেজ্জীবনীযশৃতক্ষীরপানৈশ্চ | গর্ভস্ফুরণে মুহুর্মুহুস্তত্সন্ধারণার্থং ক্ষীরমুত্পলাদিসিদ্ধং পাযযেত্ | প্রস্রংসমানে সদাহপার্শ্বপৃষ্ঠশূলাসৃগ্দরানাহমূত্রসঙ্গাঃ, স্থানাত্ স্থানং চ প্রক্রামতি গর্ভে কোষ্ঠে সংরম্ভঃ, তত্র স্নিগ্ধশীতাঃ ক্রিযাঃ | বেদনাযাং মহাসহাক্ষুদ্রসহামধুকশ্বদংষ্ট্রাকণ্টকারিকাসিদ্ধং পযঃ শর্করাক্ষৌদ্রমিশ্রং পাযযেত্; মূত্রসঙ্গে দর্ভাদিসিদ্ধম্; আনাহে হিঙ্গুসৌবর্চললশুনবচাসিদ্ধম্ | অত্যর্থং স্রবতি রক্তে কোষ্ঠাগারিকাগারমৃত্পিণ্ডসমঙ্গাধাতকীকুসুমনবমালিকাগৈরিকসর্জরসরসাঞ্জনচূর্ণং মধুনাঽবলিহ্যাত্, যথালাভং ন্যগ্রোধাদিত্বক্প্রবালকল্কং বা পযসা পাযযেত্, উত্পলাদিকল্কং বা কশেরুশৃঙ্গাটকশালূককল্কং বা শৃতেন পযসা, উদুম্বরফলৌদককন্দক্বাথেন বা শর্করামধুমধুরেণ শালিপিষ্টং; ন্যগ্রোধাদিস্বরসপরিপীতং বা বস্ত্রাবযবং যোন্যাং ধারযেত্ | অথাদৃষ্টশোণিতবেদনাযাং মধুকদেবদারুমঞ্জিষ্ঠাপযস্যাসিদ্ধং পযঃ পাযযেত্, তদেবাশ্মন্তকশতাবরীপযস্যাসিদ্ধং বিদারিগন্ধাদিসিদ্ধং বা, বৃহতীদ্বযোত্পলশতাবরীসারিবাপযস্যামধুকসিদ্ধং বা; এবমুপক্রান্তাযা উপাবর্তন্তে রুজো গর্ভশ্চাপ্যাযতে | ব্যবস্থিতে চ গর্ভে গব্যেনোদুম্বরশলাটুসিদ্ধেন পযসা ভোজযেত্ | অতীতে লবণস্নেহবর্জ্যাভির্যবাগূভিরুদ্দালকাদীনাং পাচনীযোপসংস্কৃতাভিরুপক্রমেত যাবন্তো মাসা গর্ভস্য তাবন্ত্যহানি | বস্ত্যুদরশূলেষু পুরাণগুডং দীপনীযসংযুক্তং পাযযেদরিষ্টং বা | বাতোপদ্রবগৃহীতত্বাত্ স্রোতসাং লীযতে গর্ভঃ, সোঽতিকালমবতিষ্ঠমানো ব্যাপদ্যতে, তাং মৃদুনা স্নেহাদিক্রমেণোপচরেত্, উত্ক্রোশরসসংসিদ্ধামনল্পস্নেহাং যবাগূং পাযযেত্, মাষতিলবিল্বশলাটুসিদ্ধান্ বা কুল্মাষান্ ভক্ষযেন্মধুমাধ্বীকং চানুপিবেত্ সপ্তরাত্রম্ | কালাতীতস্থাযিনি গর্ভে বিশেষতঃ সধান্যমুদূখল মুসলেনাভিহন্যাদ্বিষমে বা যানাসনে সেবেত | বাতাভিপন্ন এব শুষ্যতি গর্ভঃ, স মাতুঃ কুক্ষিং ন পূরযতি মন্দং স্পন্দতে চ, তং বৃংহণীযৈঃ পযোভির্মাংসরসৈশ্চোপচরেত্ | শুক্রশোণিতং বাযুনাঽভিপ্রপন্নমবক্রান্তজীবমাধ্মাপযত্যুদরং, তং কদাচিদ্যদৃচ্ছযোপশান্তং নৈগমেষাপহৃতমিতি ভাষন্তে, তমেব কদাচিত্ প্রলীযমানং নাগোদরমিত্যাহুঃ; তত্রাপি লীনবত্ প্রতীকারঃ ||৫৭||
तत्र पूर्वोक्तैः कारणैः पतिष्यति गर्भे गर्भाशयकटीवङ्क्षणबस्तिशूलानि रक्तदर्शनं च | तत्र शीतैः परिषेकावगाहप्रदेहादिभिरुपचरेज्जीवनीयशृतक्षीरपानैश्च | गर्भस्फुरणे मुहुर्मुहुस्तत्सन्धारणार्थं क्षीरमुत्पलादिसिद्धं पाययेत् | प्रस्रंसमाने सदाहपार्श्वपृष्ठशूलासृग्दरानाहमूत्रसङ्गाः, स्थानात् स्थानं च प्रक्रामति गर्भे कोष्ठे संरम्भः, तत्र स्निग्धशीताः क्रियाः | वेदनायां महासहाक्षुद्रसहामधुकश्वदंष्ट्राकण्टकारिकासिद्धं पयः शर्कराक्षौद्रमिश्रं पाययेत्; मूत्रसङ्गे दर्भादिसिद्धम्; आनाहे हिङ्गुसौवर्चललशुनवचासिद्धम् | अत्यर्थं स्रवति रक्ते कोष्ठागारिकागारमृत्पिण्डसमङ्गाधातकीकुसुमनवमालिकागैरिकसर्जरसरसाञ्जनचूर्णं मधुनाऽवलिह्यात्, यथालाभं न्यग्रोधादित्वक्प्रवालकल्कं वा पयसा पाययेत्, उत्पलादिकल्कं वा कशेरुशृङ्गाटकशालूककल्कं वा शृतेन पयसा, उदुम्बरफलौदककन्दक्वाथेन वा शर्करामधुमधुरेण शालिपिष्टं; न्यग्रोधादिस्वरसपरिपीतं वा वस्त्रावयवं योन्यां धारयेत् | अथादृष्टशोणितवेदनायां मधुकदेवदारुमञ्जिष्ठापयस्यासिद्धं पयः पाययेत्, तदेवाश्मन्तकशतावरीपयस्यासिद्धं विदारिगन्धादिसिद्धं वा, बृहतीद्वयोत्पलशतावरीसारिवापयस्यामधुकसिद्धं वा; एवमुपक्रान्ताया उपावर्तन्ते रुजो गर्भश्चाप्यायते | व्यवस्थिते च गर्भे गव्येनोदुम्बरशलाटुसिद्धेन पयसा भोजयेत् | अतीते लवणस्नेहवर्ज्याभिर्यवागूभिरुद्दालकादीनां पाचनीयोपसंस्कृताभिरुपक्रमेत यावन्तो मासा गर्भस्य तावन्त्यहानि | बस्त्युदरशूलेषु पुराणगुडं दीपनीयसंयुक्तं पाययेदरिष्टं वा | वातोपद्रवगृहीतत्वात् स्रोतसां लीयते गर्भः, सोऽतिकालमवतिष्ठमानो व्यापद्यते, तां मृदुना स्नेहादिक्रमेणोपचरेत्, उत्क्रोशरससंसिद्धामनल्पस्नेहां यवागूं पाययेत्, माषतिलबिल्वशलाटुसिद्धान् वा कुल्माषान् भक्षयेन्मधुमाध्वीकं चानुपिबेत् सप्तरात्रम् | कालातीतस्थायिनि गर्भे विशेषतः सधान्यमुदूखल मुसलेनाभिहन्याद्विषमे वा यानासने सेवेत | वाताभिपन्न एव शुष्यति गर्भः, स मातुः कुक्षिं न पूरयति मन्दं स्पन्दते च, तं बृंहणीयैः पयोभिर्मांसरसैश्चोपचरेत् | शुक्रशोणितं वायुनाऽभिप्रपन्नमवक्रान्तजीवमाध्मापयत्युदरं, तं कदाचिद्यदृच्छयोपशान्तं नैगमेषापहृतमिति भाषन्ते, तमेव कदाचित् प्रलीयमानं नागोदरमित्याहुः; तत्रापि लीनवत् प्रतीकारः ||५७||
🔊 Audio coming soon
ইদানীং গর্ভস্রাবলক্ষণানি সহেতুকানি সপ্রতিকারাণ্যাহ- তত্রেত্যাদি| পূর্বোক্তৈরিতি মূঢগর্ভনিদানোক্তৈর্গ্রাম্যধর্মযানবাহনাদিভিঃ| গর্ভাশযাদিশূলানি গর্ভপাতনিমিত্তানিলজনিতানি; রক্তদর্শনং চামগর্ভান্বযং কৃচ্ছ্রসাধ্যম্| গযী তু গর্ভস্রংসনেনার্তববহস্রোতোমুখবিবৃতেরার্তবক্ষরণাদ্রক্তদর্শনমিত্যাহ| চিকিত্সামাহ- তত্রেত্যাদি| জীবনীযানি কাকোল্যাদীনি| পৃথক্ পৃথগবস্থাশ্রিতং চিকিত্সিতমাহ- গর্ভেত্যাদি| উত্পলরক্তোত্পলেত্যাদিরুত্পলাদিঃ| প্রস্রংসমানে পতনায কিঞ্চিচ্চলতি সদাহপার্শ্বশূলাদযো মূত্রসঙ্গান্তা ভবন্তি| কোষ্ঠে সংরম্ভ আমপচ্যমানপক্বাশযাদৌ ক্ষোভঃ| স্থানং চেতি চকারেণ পূর্বোক্তাঃ শূলাদযোঽপি| তেষু চিকিত্সামাহ- তত্রেত্যাদি| স্নিগ্ধশীতাঃ সাত্ম্যতো ন সর্বেষু| পার্শ্বশূলাদিষু চতুর্ষু ক্রিযাবিশেষং নির্দিশন্নাহ- বেদনাযামিত্যাদি| দর্ভাদিভিঃ সিদ্ধং তৃণপঞ্চমূলসিদ্ধম্| আনাহে লশুনসিদ্ধং পযো হিঙ্গুসৌবর্চলপ্রক্ষেপম্| অত্যর্থং স্রবতি রক্তে অসৃগ্দর ইত্যর্থঃ| কোষ্ঠবদাগারং কোষ্ঠাগারং, তেন চরতীতি কোষ্ঠাগারিকা গৃহকারিকা কীটবিশেষঃ, তদ্গৃহমৃত্তিকা| ঔদকাঃ কন্দাঃ কসেরুশালুকনদীমাষকাদযঃ| দৃষ্টশোণিতাযাং রুজি চিকিত্সাং নির্দিশ্যাদৃষ্টশোণিতাযাং চিকিত্সাং নির্দিশন্নাহ- অথাদৃষ্টশোণিতেত্যাদি| পযস্যা অর্কপুষ্পী| সিদ্ধং পযঃ ‘পাযযেত্’ ইতি সম্বন্ধঃ| অশ্মন্তকঃ কর্বুদারাকারঃ| উপাবর্তন্তে উপশমং যান্তি| গর্ভশ্চাপ্যাযতে রক্তস্রুতিকর্শিতঃ| ‘এবং ক্ষিপ্রমুপক্রান্তে নীরুজাযা উপাবর্ততে(ন্তে) গর্ভ আপ্যাযতে চ’ ইতি ক্বচিত্ পাঠঃ| তন্ত্রান্তরে চোপবিষ্টকাখ্যোঽযং গর্ভঃ কথিতঃ| তথা চ চরকে- “যস্যাঃ পুনরুষ্ণতীক্ষ্ণোপযোগাদ্গর্ভিণ্যা মহতি জাতসারে গর্ভে পুষ্পদর্শনমন্যো বা যোনিস্রাবঃ, তস্যা গর্ভো বৃদ্ধিং ন প্রাপ্নোতি নিঃস্রুতত্বাত্, স কালান্তরমবতিষ্ঠতে সস্পন্দশ্চ ভবতি, তমুপবিষ্টকমিত্যাচক্ষতে”- (চ.শা.৮) ইতি| ব্যবস্থিতে চেত্যাদি| উদুম্বরশলাটুসিদ্ধেনেতি উদুম্বরস্য কোমলৈঃ ফলৈঃ পক্বেন ক্ষীরেণ| ক্ষীরপাকস্তু তন্ত্রান্তরাভিহিতো যথা- “দ্রব্যাদষ্টগুণং ক্ষীরং ক্ষীরাত্তোযং চতুর্গুণম্| ক্ষীরাবশেষঃ কর্তব্যঃ ক্ষীরপাকে ত্বযং বিধিঃ”- ইতি| অতীতে ইত্যাদি| অতীতে পতিত ইত্যর্থঃ| উদ্দালক আরণ্যকোদ্রবঃ, এতচ্চ যবাগূদানং লঙ্ঘনপূর্বম্| তথাচ বাগ্ভটঃ- “আমান্বযে চ তত্রেষ্টং শীতং রূক্ষোপসংহিতম্| উপবাসো ঘনোশীরগুডূচ্যরলুধান্যকাঃ|| ক্বথিতাঃ সলিলে পানং তৃণধান্যাদিভোজনম্” (বা.শা.২)- ইতি| বস্ত্যুদরশূলেষ্বিত্যাদি| দীপনীযসংযুক্তং পঞ্চকোলচূর্ণসংযুক্তম্| অরিষ্টম্ অভযারিষ্টাদিকম্| উক্তরক্তপরিস্রুতিনিমিত্তোপবিষ্টকপ্রসঙ্গেনাপরাং চিরকালস্থাযিনীং গর্ভবিকৃতিং দর্শযন্নাহ- বাতেত্যাদি| লীযতে শ্লিষ্যতি; কুত ইত্যাহ- স্রোতসাং গর্ভনির্গমমার্গাণাং বাতোপদ্রবেণ সঙ্কোচাদিনা গৃহীতত্বাত্| ব্যাপদ্যতে বিনশ্যতীত্যর্থঃ| মৃদুনা অতীক্ষ্ণেন, তীক্ষ্ণস্য গর্ভোপঘাতকত্বাত্| স্নেহাদিনেত্যত্রাদিশব্দো ন ব্যবস্থাবাচী, তীক্ষ্ণস্বেদস্য বমনবিরেচনযোশ্চ গর্ভোপঘাতকত্বাত্; অত আদিশব্দঃ প্রধানবাচী, তেন স্নেহপ্রধানানুক্রমেণেত্যর্থঃ| অন্যে পুনর্মৃদুনেতি অচ্ছপানবর্জিতাবচারণাস্নেহেনেতি মন্যন্তে| তামেবাবচারণাং নির্দিশন্নাহ- উত্ক্রোশরসসংসিদ্ধামিত্যাদি| উত্ক্রোশঃ কুররভেদঃ, অনল্পস্নেহাং প্রভূতস্নেহাম্; অন্যে পুনরল্পস্নেহামিতি পঠন্তি তদসম্যক্, যবাগ্বাঃ পবনাবজযার্থমুপযুজ্যমানত্বাত্ পরতন্ত্রদর্শনাচ্চ| তদুক্তং চরকে- “যস্যাঃ পুনর্গর্ভঃ প্রসুপ্তো ন স্পন্দতে তাং শ্যেনমত্স্যগবযশিখিতাম্রচূডতিত্তিরীণামন্যতমস্য সর্পিষ্মতা রসেন মাষযূষেণ বা প্রভূতসর্পিষা ভোজযেত্” (চ.শা.৮) ইতি| বিল্বশলাটুসিদ্ধানিতি বিল্বস্য কোমলফলৈঃ সিদ্ধান্| এবং স্রোতসামবরোধহেতোর্বাতস্যোপশমবিধিমুক্ত্বা বাতোপশমমৃদুভূতানাং স্রোতসাং বিকাসার্থং বিধিং দর্শযন্নাহ- কালাতীত ইত্যাদি| লীন এবাযং বিধিঃ| বাতাভিপন্ন ইত্যাদি| বাতাভিপন্নো গর্ভঃ শুষ্যতি, নতু পুনর্লীনবন্মার্গাবরোধাত্তিষ্ঠতি | গর্ভশোষলক্ষণং পুনঃ কুক্ষেরপূরণং, বাতশোষণেনৈব বিহতৌজস্ত্বাদ্গর্ভো মন্দমেব চলতি| বৃংহণীযৈঃ পযোভিরিতি বৃংহণীযসংস্কৃতৈঃ ক্ষীরৈরিত্যর্থঃ| মাংসরসৈশ্চেতি চকারাল্লীনপ্রতিকারসমুচ্চযঃ| বৃদ্ধকাশ্যপেন শুষ্কলক্ষণমভিহিতং যথা- “গর্ভনাড্যাস্ত্ববহনাদল্পত্বাদ্বা রসস্য চ| চিরেণাপ্যাযতে গর্ভস্তথৈবাকালভোজনাত্|| অকুক্ষিপূরণং গর্ভস্পন্দনং মন্দমেব চ”- ইতি| অপরমপি বাতাভিপন্নং গর্ভং দর্শযন্নাহ- শুক্রেত্যাদি| শুক্রশোণিতমিতি বচনাদসঞ্জাতাঙ্গপ্রত্যঙ্গমেব, বাযুনাঽভিপ্রপন্নং বাযুনোপরুদ্ধম্, অবক্রান্তজীবং জীবোপগতম্, অত এবাকুথিতমবতিষ্ঠতে| শুক্রার্তবাবরোধকো বাযুরেবোদরমাধ্মাপযতি; তদাধ্মানং কদাচিদ্যদৃচ্ছযা অনিযতহেতুনা, উপশান্তং লীনীভূতং দৃষ্ট্বা নৈগমেষেণ বালগ্রহেণাপহৃতমিতি বদন্তি| বাতাভিপন্নমেব গর্ভাবস্থাবিশেষং দর্শযন্নাহ- তমেবেত্যাদি| তমেব বাতাভিপন্নমেব, পুনঃ পুনরনযা বৃত্ত্যা প্রবিলীযমানমল্পীভবন্তং নাগোদরমিতি ব্রুবতে| তত্রেতি নাগোদরে| অপিশব্দান্নৈগমেষাপহৃতেঽপি লীনোক্তঃ প্রতীকারঃ||৫৭||
Adhikarana 44 (58-62) · Śloka 62
অত ঊর্ধ্বং মাসানুমাসিকং বক্ষ্যামঃ- ||৫৮|| মধুকং শাকবীজং চ পযস্যা সুরদারু চ | অশ্মন্তকস্তিলাঃ কৃষ্ণাস্তাম্রবল্লী শতাবরী ||৫৯|| বৃক্ষাদনী পযস্যা চ লতা সোত্পলসারিবা | অনন্তা সারিবা রাস্না পদ্মা মধুকমেব চ ||৬০|| বৃহত্যৌ কাশ্মরী চাপি ক্ষীরিশুঙ্গাস্ত্বচো ঘৃতম্ | পৃশ্নিপর্ণী বলা শিগ্রুঃ শ্বদংষ্ট্রা মধুপর্ণিকা ||৬১|| শৃঙ্গাটকং বিসং দ্রাক্ষা কশেরু মধুকং সিতা | বত্সৈতে সপ্ত যোগাঃ স্যুরর্ধশ্লোকসমাপনাঃ | যথাসঙ্খ্যং প্রযোক্তব্যা গর্ভস্রাবে পযোযুতাঃ ||৬২||
अत ऊर्ध्वं मासानुमासिकं वक्ष्यामः- ||५८|| मधुकं शाकबीजं च पयस्या सुरदारु च | अश्मन्तकस्तिलाः कृष्णास्ताम्रवल्ली शतावरी ||५९|| वृक्षादनी पयस्या च लता सोत्पलसारिवा | अनन्ता सारिवा रास्ना पद्मा मधुकमेव च ||६०|| बृहत्यौ काश्मरी चापि क्षीरिशुङ्गास्त्वचो घृतम् | पृश्निपर्णी बला शिग्रुः श्वदंष्ट्रा मधुपर्णिका ||६१|| शृङ्गाटकं बिसं द्राक्षा कशेरु मधुकं सिता | वत्सैते सप्त योगाः स्युरर्धश्लोकसमापनाः | यथासङ्ख्यं प्रयोक्तव्या गर्भस्रावे पयोयुताः ||६२||
🔊 Audio coming soon
শাকো মহাবৃক্ষঃ কর্কশপত্রঃ, তস্য বীজম্| পযস্যা অর্কপুষ্পী, গযী তু পযস্যাং ক্ষীরবিদারীং ক্ষীরকাকোলীং বা ব্রূতে| অশ্মন্তকঃ কোবিদারসদৃশোঽম্লপত্রঃ ‘অম্ললোটক’ ইতি লোকে| তাম্রবল্লী রামতরুণী, মঞ্জিষ্ঠামপরে| লতা প্রিযঙ্গুঃ| অনন্তা উত্পলসারিবা| পদ্মা পদ্মচারিণী, ভার্গীমপরে| বৃহত্যৌ স্থূলফলা চণকবৃহতী চ| ক্ষীরিশুঙ্গাঃ ক্ষীরিবৃক্ষাণাং বটাদীনামবিকসিতাঃ প্রবালাঃ| মধুপর্ণী মধুযষ্টিকা| যথাসঙ্খ্যমিতি প্রথমমাসমারভ্য সপ্তমমাসান্ যাবদনুক্রমেণেত্যর্থঃ| পযোযুতা ইতি চূর্ণাদিপ্রযোগে এতে যোগাঃ পযসা যুতাঃ প্রযোজ্যা ইত্যর্থঃ||৫৮-৬২||
Adhikarana 45 (63-65) · Śloka 65
কপিত্থবৃহতীবিল্বপটোলেক্ষুনিদিগ্ধিকা | মূলানি ক্ষীরসিদ্ধানি পাযযেদ্ভিষগষ্টমে ||৬৩|| নবমে মধুকানন্তাপযস্যাসারিবাঃ পিবেত্ | ক্ষীরং শুণ্ঠীপযস্যাভ্যাং সিদ্ধং স্যাদ্দশমে হিতম্ ||৬৪|| সক্ষীরা বা হিতা শুণ্ঠী মধুকং সুরদারু চ | এবমাপ্যাযতে গর্ভস্তীব্রা রুক্ চোপশাম্যতি ||৬৫||
कपित्थबृहतीबिल्वपटोलेक्षुनिदिग्धिका | मूलानि क्षीरसिद्धानि पाययेद्भिषगष्टमे ||६३|| नवमे मधुकानन्तापयस्यासारिवाः पिबेत् | क्षीरं शुण्ठीपयस्याभ्यां सिद्धं स्याद्दशमे हितम् ||६४|| सक्षीरा वा हिता शुण्ठी मधुकं सुरदारु च | एवमाप्यायते गर्भस्तीव्रा रुक् चोपशाम्यति ||६५||
🔊 Audio coming soon
কপিত্থেত্যাদি| কপিত্থাদীনাং মূলানি ক্ষীরসিদ্ধান্যষ্টমে মাসি, নবমে মধুকাদযঃ সারিবান্তাঃ ক্ষীরসিদ্ধাঃ পিবেত্| পযস্যা ক্ষীরবিদারী| দশমে মাসি শুণ্ঠীপযস্যাভ্যাং ক্ষীরপাককল্পনযা সিদ্ধং ক্ষীরং হিতং ভবেত্, অথবা সক্ষীরাঃ শুণ্ঠ্যাদযঃ প্রশস্যন্তে; বাগ্ভটেঽপ্যেতৈঃ সিদ্ধং ক্ষীরং প্রতিপাদিতং; তথাচ- “কপিত্থবিল্ববৃহতীপটোলেক্ষুনিদিগ্ধিকা- | মূলৈঃ শৃতং প্রযুঞ্জীত ক্ষীরং মাসে তথাঽষ্টমে|| নবমে সারিবানন্তাপযস্যামধুযষ্টিভিঃ| যোজযেদ্দশমে মাসি ক্ষীরং সিদ্ধং পযস্যযা|| অথবা যষ্টিমধুকনাগরামরদারুভিঃ”- (বা.শা.২) ইতি| গযদাসেন চৈতে গর্ভস্রাবচিকিত্সিতযোগাঃ প্রাগেব গর্ভশ্চাপ্যাযত ইত্যনন্তরং পঠিতাঃ||৬৩-৬৫||
Adhikarana 46 (66) · Śloka 66
নিবৃত্তপ্রসবাযাস্তু পুনঃ ষড্ভ্যো বর্ষেভ্য ঊর্ধ্বং প্রসবমানাযা নার্যাঃ কুমারোঽল্পাযুর্ভবতি ||৬৬||
निवृत्तप्रसवायास्तु पुनः षड्भ्यो वर्षेभ्य ऊर्ध्वं प्रसवमानाया नार्याः कुमारोऽल्पायुर्भवति ||६६||
🔊 Audio coming soon
ইদানীং পূর্বগর্ভজন্মনো যা উত্তরগর্ভজননাবধিস্তামতিক্রম্য গর্ভগ্রাহিণ্যা দোষং দর্শযন্নাহ- নিবৃত্তেত্যাদি| এতেন ষড্ভ্যো বর্ষেভ্য ঊর্ধ্বং ‘নিবৃত্তপ্রসবা’ ইত্যুচ্যতে| ষট্সু ষডবযবেষু পঞ্চচতুস্ত্রিদ্বিবর্ষেষু গর্ভানুজননস্য জন্মকাল ইতি; কুতঃ পুনরস্যাঃ কুমারোঽল্পাযুর্ভবতি? উচ্যতে- গর্ভাশযযোন্যাদিদোষেণ হি নিবর্ততে প্রসবঃ; তত্র তচ্ছোধনক্রিযামন্তরেণাহারবিহারাদিগুণমাত্রেণ যদৃচ্ছযোপগৃহীতগর্ভাযা যোনিগর্ভাশযাদিষ্বনিঃস্ফোটিতদোষেষু জাতোঽল্পাযুরেবেতি||৬৬||
Adhikarana 47 (67) · Śloka 67
অথ গর্ভিণীং ব্যাধ্যুত্পত্তাবত্যযে ছর্দযেন্মধুরাম্লেনান্নোপহিতেনানুলোমযেচ্চ, সংশমনীযং চ মৃদু বিদধ্যাদন্নপানযোঃ, অশ্নীযাচ্চ মৃদুবীর্যং মধুরপ্রাযং গর্ভাবিরুদ্ধং চ, গর্ভাবিরুদ্ধাশ্চ ক্রিযা যথাযোগং বিদধীত মৃদুপ্রাযাঃ ||৬৭||
अथ गर्भिणीं व्याध्युत्पत्तावत्यये छर्दयेन्मधुराम्लेनान्नोपहितेनानुलोमयेच्च, संशमनीयं च मृदु विदध्यादन्नपानयोः, अश्नीयाच्च मृदुवीर्यं मधुरप्रायं गर्भाविरुद्धं च, गर्भाविरुद्धाश्च क्रिया यथायोगं विदधीत मृदुप्रायाः ||६७||
🔊 Audio coming soon
গর্ভব্যাঘাতকত্বেন নিষিদ্ধাযা বমনাদিক্রিযাযাঃ ক্বচিদত্যযকারিণি ব্যাধৌ মৃদুনা দ্রব্যেণ প্রতিপ্রসবং নির্দিশন্নাহ- অথ গর্ভিণীমিত্যাদি| অত্যযে বিনাশহেতৌ| অনুলোমযেচ্চেতি মধুরাম্লেনান্নোপহিতেনেতি সম্বন্ধঃ| আহারং নিযমযন্নাহ- অশ্নীযাচ্চেত্যাদি| বিহারমপ্যস্য নিযমযন্নাহ- গর্ভাবিরুদ্ধা ইত্যাদি| যথাযোগম্ অহীনাতিমিথ্যাযোগেনেত্যর্থঃ||৬৭||
Adhikarana 48 (68-70) · Śloka 70
সৌবর্ণং সুকৃতং চূর্ণং কুষ্ঠং মধু ঘৃতং বচা | মত্স্যাক্ষকঃ শঙ্খপুষ্পী মধু সর্পিঃ সকাঞ্চনম্ ||৬৮|| অর্কপুষ্পী মধু ঘৃতং চূর্ণিতং কনকং বচা | হেমচূর্ণানি কৈডর্যঃ শ্বেতা দূর্বা ঘৃতং মধু ||৬৯|| চত্বারোঽভিহিতাঃ প্রাশাঃ শ্লোকার্ধেষু চতুর্ষ্বপি | কুমারাণাং বপুর্মেধাবলবুদ্ধিবিবর্ধনাঃ ||৭০||
सौवर्णं सुकृतं चूर्णं कुष्ठं मधु घृतं वचा | मत्स्याक्षकः शङ्खपुष्पी मधु सर्पिः सकाञ्चनम् ||६८|| अर्कपुष्पी मधु घृतं चूर्णितं कनकं वचा | हेमचूर्णानि कैडर्यः श्वेता दूर्वा घृतं मधु ||६९|| चत्वारोऽभिहिताः प्राशाः श्लोकार्धेषु चतुर्ष्वपि | कुमाराणां वपुर्मेधाबलबुद्धिविवर्धनाः ||७०||
🔊 Audio coming soon
ইদানীং যোগান্তরৈঃ সহ কুমারস্য সুবর্ণচূর্ণং নির্দিশন্নাহ- সৌবর্ণমিত্যাদি| মত্স্যাক্ষকো ব্রাহ্মী ‘পত্তূর’ ইত্যেকে, অন্যে রক্তপুষ্পমানূপং ‘মত্স্যাক’ ইতি লোকে প্রসিদ্ধমাহুঃ| অর্কপুষ্পী পযস্যা অর্কসদৃশপযঃপুষ্পা লতৈব, শ্বেতদূর্বাবিশেষাং কেচিদাহুঃ, বৃক্ষজাতিমন্যে| কৈডর্যঃ পর্বতনিম্বঃ| সংবত্সরং যাবদেতে যোগাঃ প্রযোজ্যাঃ; অন্যে দ্বাদশবর্ষাণ্যাহুঃ| মাত্রা উক্তৈব| গযী তু প্রাক্তনমাত্রাপ্রতিপাদকং বাক্যমপঠিত্বা মাত্রাজ্ঞানার্থং বিশ্বামিত্রোক্তং বাক্যমভিদধতি; যথা- ‘বিডঙ্গফলমাত্রং তু জাতমাত্রস্য ভেষজম্| এতেনৈব প্রমাণেন মাসি মাসি প্রবর্ধিতম্|| কোলাস্থিমাত্রং ক্ষীরাদে দদ্যাদ্ভৈষজ্যকোবিদঃ| ক্ষীরান্নাদে কোলমাত্রমন্নাদে ডুম্বরোপমম্”- ইতি||৬৮-৭০||
Adhikarana puShpikA · Śloka 10
ইতি সুশ্রুতসংহিতাযাং শারীরস্থানে গর্ভিণীব্যাকরণং শারীরং নাম দশমোঽধ্যাযঃ ||১০|| ইতি ভগবতা শ্রীধন্বন্তরিণোপদিষ্টাযাং তচ্ছিষ্যেণ মহর্ষিণা সুশ্রুতেন বিরচিতাযাং সুশ্রুতসংহিতাযাং তৃতীযং শারীরস্থানং সমাপ্তম্ |
इति सुश्रुतसंहितायां शारीरस्थाने गर्भिणीव्याकरणं शारीरं नाम दशमोऽध्यायः ||१०|| इति भगवता श्रीधन्वन्तरिणोपदिष्टायां तच्छिष्येण महर्षिणा सुश्रुतेन विरचितायां सुश्रुतसंहितायां तृतीयं शारीरस्थानं समाप्तम् |
🔊 Audio coming soon
ইতি ভিষগ্বরশ্রীডল্হণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং শারীরস্থানে দশমোঽধ্যাযঃ সমাপ্তঃ||১০||