8. arśaścikitsitādhyayaḥ

Adhikarana adhyAyopakramaH · Śloka

অস্মাদনন্তরমর্শশ্চিকিত্সিতমারভ্যতে| সম্বন্ধশ্চাস্য নিদান এবোক্তঃ|

Adhikarana arshashcikitsitAdhyAyaH arshasAM dAhavishiH arshasAM dAhAnantaraM karavyam arshasAM ekaikasya saptAhAdupacAraH (2-9) · Śloka 9

অথতোঽর্শসাং চিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২|| ) কালে সাধারণে ব্যাভ্রে নাতিদুর্বলমর্শসম্| বিশুদ্ধকোষ্ঠং লঘ্বল্পমনুলোমনমাশিতম্||১|| শুচি কৃতস্বস্ত্যযনং মুক্তবিণ্মূত্রমব্যথম্| শযনে ফলকে বাঽন্যনরোত্সঙ্গে ব্যপাশ্রিতম্||২|| পূর্বেণ কাযেনোত্তানং প্রত্যাদিত্যগুদং সমম্| সমুন্নতকটীদেশমথ যন্ত্রণবাসসা||৩|| সক্থ্নোঃ শিরোধরাযাং চ পরিক্ষিপ্তমৃজু স্থিতম্| আলম্বিতং পরিচরৈঃ সর্পিষাঽভ্যক্তপাযবে||৪|| ততোঽস্মৈ সর্পিষাঽযক্তং নিদঘ্যাদৃজু যন্ত্রকম্| শনৈরনুসুখং পাযৌ, ততো দৃষ্ট্বা প্রবাহণাত্||৫|| যন্ত্রে প্রবিষ্টং দুর্নাম প্লোতগুণ্ঠিতযাঽনু চ| শলাকযোত্পীড্য ভিষক্ যথোক্তবিধিনা দহেত্||৬|| ক্ষারেণৈবার্দ্রমিতরত্ক্ষারেণ জ্বলনেন বা| মহদ্বা বলিনশ্ছত্ত্বা বীতযন্ত্রমথাতুরম্||৭|| স্বভ্যক্তপাযুজঘনমবগাহে নিধাপযেত্| নির্বাতমন্দিরস্থস্য ততোঽস্যাচারমদিশেত্||৮|| একৈকমিতি সপ্তাহাত্সপ্তাহাত্সমুপাচরেত্| |৯|

স০-সাধারণে-শরদ্বসন্তাদিকে কালে, তথা ব্যভ্রে-বিগতাব্দে| তথা নাতিদুর্বলমর্শসং-অপি তু কিঞ্চিত্সপ্রাণম্| অত্র যোগ্যপরত্বাত্ কৃত্বেত্যধ্যাহৃত্য সম্বন্ধঃ কার্যঃ| তথা বিশুদ্ধকোষ্ঠাদিকং কৃত্বা ততোঽস্মৈ-অর্শসায, যন্ত্রং নিদধ্যাদিতি| সঙ্গ্রহে চোক্তম্ (চি.অ.১০)-"অথ খলু বলবন্তমর্শোভিরুপদ্রুতং যথার্হস্নেহোপস্নিগ্ধস্বিন্নমনিলবেদনাবৃদ্ধিশমনার্থং স্নিগ্ধমুষ্ণমল্পমন্নং দ্রবপ্রাযং ভুক্তবন্তং শুচি কৃতস্বস্ত্যযনং মুক্তবিণ্মূত্রমব্যথং সমে শুচৌ বিবিক্তে দেশে সাধারণেব্যভ্রে কালে সমে ফলকে শয্যাযাং বা প্রত্যাদিত্যগুদমন্যস্যোত্সঙ্গেনিষণ্ণপূর্বকাযমুত্তানমুন্নতকটীকং যন্ত্রণশাটকেন পরিক্ষেপ্তগ্রীবাসক্থিসন্ধিদেশমলজ্জার্হৈরাপ্তপরিচারকৈঃ সুপরিগৃহীতং কৃত্বা ততোঽস্মৈ ঘৃতাভ্যক্তং যন্ত্রকং নিদ্ধ্যাত্|" ইতি| অর্শসমিতি অর্শাসি বিদ্যন্তে যস্যেত্যর্থঃ, অর্শআদিত্বাদচ্| কিম্ভূতম্ ? বিশুদ্ধো-বমনবিরেচনাদিনা, কোষ্ঠো যস্য তম্| তথা, অন্নমাশিতং কৃত্বা| কিম্ভূতম্ ? লঘু-স্বভাবাত্, অল্পং চমাত্রযা| তথা, অনুলোমনং-বাতবর্চসাং প্রাযেণ প্রবর্তকম্| তথা, শুচিং-মৃজ্জলাভ্যাং কৃত্বা| তথা, কৃতং স্বস্ত্যযনং যস্য তম্| তথা, মুক্তে-বিসৃষ্টে, বিণ্মূত্রে যেন তম্| তথা, অত্র্যথংব্যথারহিতমন্যেন ব্যাধিনাঽপীডিতম্| তথা, শযনে ব্যপাশ্রিতং-শয্যামাশ্রিত্য স্থিতম্| অথবা, ফলকে-আসনবিশেষে, ব্যপাশ্রিতম্| অথবা, অন্যনরোত্সঙ্গে ব্যপাশ্রিতম্| উত্সঙ্গবিশেষাত্স্থানকবিশেষঃ| নরোত্সঙ্গে ব্যপাশ্রিতমিত্যেবং সিদ্ধেঽন্যগ্রহণং বৈদ্যস্য নিরাসার্থম্| অন্যোত্সঙ্গে ব্যপাশ্রিতমিতি কথং কৃত্বা ? পূর্বেণ কাযেনোত্তানং কৃত্বা-নাধরেণ| তথা, প্রত্যাদিত্যগুদম্| প্রতি-আভিমুখ্যেন, আদিত্যং প্রত্যাদিত্যং গুদং যস্য তম্| যস্যাং দিশ্যাদিত্যো গতঃ তস্যাং দিশ্যর্শসেন সম্মুখং গুদং কৃত্বা স্থাতব্যমিত্যর্থঃ, সমং চ| তথা, সম্যগুন্নতঃ কটিদেশোযস্য তম্| অথ-সমুন্নতকটিদেশকরণাদনন্তরং, অর্শসং সক্থ্নোস্তথা শিরোধরাযাং পরিক্ষিপ্তং-সমন্তাত্ক্ষিপ্তমাক্রান্তং কৃত্বা| কেন ? যন্ত্রণবাসসা| যন্ত্রণার্থং বাসঃ-কার্পাসাদিমযং, যন্ত্রণবাসস্তেন| ঋজু-স্পষ্টং কৃত্বা, স্থিতম্| তথা, তমাতুরং পরিচারকৈরলম্বিতং-নিশ্চলং কৃত্বাঽবষ্টভ্য সম্যক্ স্থাপিতম্| ততঃ-অনন্তরং, অস্মৈ-দুর্নামবতে, সর্পিষাঽভ্যক্তপাযবে ঘৃতাভ্যাক্তং যন্ত্রকমৃজু-অনুসুখং কৃত্বা, শনৈর্নিদধ্যাত্-প্রণযেত্| ততঃ-অনন্তরং গুদপ্রণিহিতযন্ত্রান্তে, প্রবাহণাত্-প্রবাহণেনহেতুনা, যন্ত্রে প্রবিষ্টং দুর্নাম দৃষ্ট্বা| অথ(নু) [চ]-পশ্চাচ্চ, শলাকযা চৈলখণ্ডপ্রাবৃতদেহযোত্পীড্য-প্রকৃতত্বাদ্দুর্নাম ঊর্ধ্বং পীডযিত্বা| বৈদ্যো যথোক্তবিধিনা-সূত্রস্থানোদিতেন, ক্ষারেণার্দ্রমর্শো দহেত্| এবেত্যবধারণে| ক্ষারেণৈব নাগ্নিনা| ইতরত্শুষ্কং দুর্নাম, ক্ষারেণ জ্বলনেন বা দহেত্| যথোক্তবিধিনেত্যত্রাপি যোজ্যম্| মহদ্বেতি| বহুদ্দুর্নাম তু বলবতঃ পুংসঃ ছিত্ত্বা বা শস্ত্রেণ ক্ষারাগ্নিভ্যাং যথাযোগং দহেত্| অথ-অনন্তরং, আতুরং বীতযন্ত্রং বিধায স্বভ্যক্তপাযুজঘনমবগাহে নিধাপযেত্-তত্র নিহিতং বিদধ্যাদিত্যর্থঃ| ততঃ-অনন্তরং, অস্যাচারং-"উষ্ণোদকোপচারী স্যাত্" (হৃ.সূ.অ. ১৬/২৬) ইত্যাদিকং, আদিশেত্| একৈকং দুর্নাম ইতি-অনেন পূর্বোক্তেন প্রকারেণ, সপ্তাহাত্সমুপাচরেত্-ন তুল্যকালং সর্বাণি|

Adhikarana bahvarshasaH upacArakramaH (9-10) · Śloka 10

| প্রাগ্দক্ষিণং ততো বামমর্শঃ পৃষ্টাগ্রজং ততঃ||৯|| বহ্বর্শসঃ|১০|

অথৈষাং কর্মাদিক্রমং দর্শযিতুমাহ স০-বহ্বর্শসঃ প্রাক্-পূর্বং, দক্ষিণদেশস্থমর্শ উপাচরেত্| অনন্তরং বামং, ততঃ পৃষ্টাগ্রে জাতমুপাচরেত্|

Adhikarana sudagdhasya lakShaNam (10) · Śloka 10

সুদগ্ধস্য স্যাদ্বাযোরনুলোমতা| রুচিরন্নেঽগ্নিপটুতা স্বাস্থ্যং বর্ণবলোদযঃ||১০||

স০-সুদগ্ধস্যার্শসো বাতস্যানুলোমনং স্যাত্| তথা, অন্নেঽভিলাষঃ, অগ্নেঃ পাটবং তথা স্বাস্থ্যং বলবর্ণযোরুদ্ভূতিশ্চ|

Adhikarana bastishUle lepaH (11) · Śloka 11

বস্তিশূলে ত্বধো নাভের্লেপযেছ্লক্ষ্ণকল্কিতৈঃ| বর্ষাভূকুষ্ঠসুরভিমিশিলোহামরাহ্বযৈঃ||১১||

স০-বস্তি শূলে সতি পুনর্নামেরধঃ বর্ষাভ্বাদিভিঃ সুপিষ্টৈর্লেপযেত্|

Adhikarana shakRunmUtrapratIghAte kvAthaH shakRunmUtra kShIraM tailaM vA shakRunmUtra annaM snehASca (12-14) · Śloka 14

শকৃন্মূত্রপ্রতীঘাতে পরিষেকাবগাহযোঃ| বরণালম্বুষৈরণ্ডগোকণ্টকপুনর্নবৈঃ||১২|| সুষবীসুরভীভ্যাং চ ক্বাথমুষ্ণং প্রযোজযেত্| সস্নেহমথবা ক্ষীরং তৈলং বা বাতনাশনম্||১৩|| যুঞ্জীতান্নং শকৃদ্ভেদি স্নেহান্ বাতঘ্নদীপনান্| |১৪|

স০-শকৃতো মূত্রস্য চ প্রতীঘাতে-বিবন্ধে সতি, বরণাদিভিঃ ক্বাথং পরিষেকাবগাহযোরুষ্ণং সস্নেহং প্রযোজযেত্| অথবা, ক্ষীরং বাতনাশনম্| বলাতৈলদিকং তৈলং বা পরিষেকাবগাহযোঃ প্রযোজযেত্| অন্নং চ যবাদিকং শকৃদ্বিবন্ধঘ্নং তথা স্নেহান্ বাতঘ্নান্ দীপনাংশ্চ প্রযোজযেত্|

Adhikarana dAhAyonyArshasAM secanavidhiH dAhAyonyArshasAM stailam dAhAyonyArshasAM kShArakarmakaraM svedaH (14-17) · Śloka 17

| অথাপ্রযোজ্যদাহস্য নির্গতান্ কফবাতজান্||১৪|| সস্তম্ভকণ্ডূরুক্শোফানভ্যজ্য গুদকীলকান্| বিল্বমূলাগ্নিকক্ষারকুষ্ঠৈঃ সিদ্ধেন সেচযেত্||১৫|| তৈলেনাহিবিডালোষ্ত্রবরাহবসযাঽথবা| |কাসীসং সৈন্ধবং রাস্না শুণ্ঠী কুষ্ঠং চ লাঙ্গলী| শিলাভ্রকাশ্বমারং চ জন্তুহৃদ্দন্তিচিত্রকৌ||১|| হরিতালং তথা স্বর্ণক্ষীরী তৈশ্চ পচেত্সমৈঃ| তৈলং সুধার্কপযসী গবাং মূত্রে চতুর্গুণে||২|| এতদভ্যঙ্গতোঽর্শাংসি ক্ষারবত্পাতযেদ্দ্রুতম্| ক্ষারকর্মকরং হ্যেতন্ন চ দূষযতে বলিম্||৩|| ] স্বেদযেদনু পিণ্ডেন দ্রবস্বেদেন বা পুনঃ||১৬|| সক্তূনাং পিণ্ডিকাভির্বা স্নিগ্ধানাং তৈলসর্পিষা| রাস্নাযা হপুষাযা বা পিণ্ডৈর্বা কার্ষ্ণ্যগন্ধিকৈঃ||১৭||

স০-ন প্রযোজ্যো-নিষিদ্ধো, দাহো যস্যাসাবপ্রযোজ্যদাহো,-দাহানর্হঃ, তস্য, নির্গতান্-বহির্ভূতান্, তথা কফবাতজান্ গুদকীলকান্-অর্শাংসি, অভ্যজ্য বিল্বাদিসিদ্ধেন তৈলেন সেচযেত্| কিম্ভূতান্ ? সস্তম্ভকণ্ডূরুক্শোফান্, এবংভূতান্-নান্যলক্ষণান্| অথবা, বুঝঙ্গাদিবসযা সেচযেত্| অনুসেকাভ্যঙ্গাভ্যাং পশ্চাত্, পিণ্ডেন-পিণ্ডস্বেদেন, স্বেদযেত্| পিণ্ডস্বেদো মুনিনোক্তঃ| যথা (চ. সূ. অ. ১৪/২৫)- "তিলমাষকুলত্থান্নঘৃততৈলামিষৌদনৈঃ| পাযসৈঃ কৃশরৈর্মাংসৈঃ পিণ্ডস্বেদান্ প্রযোজযেত্||" ইতি যোজ্যম্| অথবা, দ্রবস্বেদেন-স্বেদবিধ্যুক্তেন, স্বেদযেত্| পুনঃ শব্দোঽত্র লৌকিক্যা উক্ত্যা প্রযুক্তঃ| যথা-"ইদং সারমিদং পুনরসারম্" ইতি| পিণ্ডস্বেদেনাথবা সক্তূনাং তৈলসর্পিষা স্নিগ্ধানাং পিণ্ডিকাভিঃ স্বেদযেত্| অথবা, রাস্নাযা হপুষাযা বা পিণ্ডৈঃ কার্শ্ণ্যগন্ধিকর্বা স্বেদযেত্| তৈলসর্পিষা স্নিগ্ধৈরিত্যত্রানুবর্তনীযম্| কৃষ্ণগন্ধাযা ইমে কার্ষ্ণ্যগন্ধিকাস্তৈঃ| অধ্যাত্মাদিত্বাঠ্ঠঞ্|

Adhikarana dAhAyonyArshasAM dhUpanam (18-19) · Śloka 19

অর্কমূলং শমীপত্রং নৃকেশাঃ সর্পকঞ্চুকম্| মার্জারচর্ম সর্পিশ্চ ধূপনং হিতমর্শসাম্||১৮|| তথাঽশ্বগন্ধা সুরসা বৃহতী পিপ্পলী ঘৃতম্| |১৯|

স০-অর্কমূলদি চর্মসর্পিরন্তং ধূপনং হিতম্| তথা, অশ্বগন্ধাদিকং পৃথগেব ধূপনং হিতম্|

Adhikarana dAhAyonyArshasAM gudajashAtanI vartiH (19-20) · Śloka 20

| ধান্যাম্লপিষ্টৈর্জীমূতবীজৈস্তজ্জালকং মৃদু||১৯|| লেপিতং ছাযযা শুষ্কং বর্তির্গুদজশাতনী| |২০|

স০-কাঞ্জিকেন পিষ্টৈর্জীমূতস্য-ইক্ষ্বাকোঃ, বীজৈস্তথা তস্য জীমূতফলস্য, জালকং তজ্জালকং-জালকাকরং(রঃ)ফলবহির্ভাগো, মৃদু-অকর্কশং, লেপিতং ছাযাশুষ্কমিত্যেষা বর্তির্গুদজশাতনী|

Adhikarana dAhAyonyArshasAM gudajashA anyA vartiH (20-21) · Śloka 21

| সজালমূলজীমূতলেহে বা ক্ষারসংযুতে||২০|| গুঞ্জাসূরণকূষ্মাণ্ডবীজৈর্বর্তিস্তথাগুণা| |২১|

স০-সজালমূলজীমূতেন কৃতো যো লেহস্তস্মিল্লেহে ক্ষারসংযুতে কৃতে সতি গুঞ্জাদিবীজৈঃ কৃত বর্তিস্তথাগুণা-গুদজশাতনী|

Adhikarana dAhAyonyArshasAM gudajashAtanA lepaH (21-26) · Śloka 26

স্নুক্ক্ষীরার্দ্রনিশালেপস্তথা, গোমূত্রকল্কিতৈঃ||২১|| কৃকবাকুশকৃত্কৃষ্ণানিশাগুঞ্জাফলৈস্তথা| স্নুক্ক্ষীরপিষ্টৈঃ ষড্গ্রন্থাহলিনীবারণাস্থিভিঃ||২২|| কুলীরশৃঙ্গিবিজযাকুষ্ঠারুষ্করতুত্থকৈঃ| শিগ্রুমূলকজৈর্বীজৈঃ পত্রৈরশ্বঘ্ননিম্বজৈঃ||২৩|| পীলুমূলেন বিল্বেন হিঙ্গুনা চ সমন্বিতৈঃ| কুষ্ঠং শিরীষবীজানি পিপ্পল্যঃ সৈন্ধবং গুডঃ||২৪|| অর্কক্ষীরং সুধাক্ষীরং ত্রিফলা চ প্রলেপনম্| আর্কং পযঃ সুধাকাণ্ডম্ কটুকালাবুপল্লবাঃ||২৫|| করঞ্জো বস্তমূত্রং চ লেপনং শ্রেষ্ঠমর্শসাম্| আনুবাসনিকৈর্লেপঃ পিপ্পল্যাদ্যৈশ্চ পূজিতঃ||২৬||

স০-স্নুক্ষীরেণার্দ্রা-আর্দ্রীকৃতা, নিশা-হরিদ্রা, তযা লেপঃ স্নুক্ক্ষীরার্দ্রনিশালেপঃ| তথা-পূর্বগুণঃ| গোমূত্রেণ কল্কিতৈঃ-পিষ্টৈঃ, কুক্কুটশকৃদাদিভির্লেপঃ পূর্বগুণঃ| স০-সুধাক্ষীরপিষ্টৈঃ ষড্গ্রন্থাদিভির্লেপো হিতঃ| পীলম্লেন বিল্বেন হিঙ্গুনা চ যুক্তৈর্লেপো হিতঃ| স০-কুষ্টদিত্রিফলান্তং প্রলেপনং পূর্বগুণম্| স০-অর্কক্ষীরাদিবস্তমূত্রান্তং প্রলেপনমর্শসাং ষ্রেষ্ঠং স্যাত্| স০-আনুবাসনিকৈরিতি অনুবাসনে ভবান্যনুবাসনিকানি, অধ্যাত্মাদিত্বাত্ ঠঞ্| তৈর্দ্রব্যৈঃ "পিপ্পলীং মদনং" (শ্লো ৮৯) ইত্যাদিভির্বক্ষ্যমাণৈর্লেপোঽর্শঃসু পূজিতঃ|

Adhikarana dAhAyonyArshasAM gudajashAtanA tailAni (27) · Śloka 27

এভিরেবৌষধৈঃ কুর্যাত্তৈলান্যভ্যঞ্জনায চ| |২৭|

স০-এভিরেব পূর্বোক্তৈর্লেপনদ্রব্যৈরভ্যঞ্জনানি তৈলানি চ কুর্যাত্|

Adhikarana dAhAyonyArshasAM dhUpanAdiBirduShTarUdhirasrAvaH (27-28) · Śloka 28

| ধূপনালেপনাভ্যঙ্গৈঃ প্রস্রবন্তি গুদাঙ্করাঃ||২৭|| সঞ্চিতং দুষ্টরুধিরং, ততঃ সম্পদ্যতে সুখী| |২৮|

স০-ধূপনাদিভির্গুদাঙ্কুরাঃ সঞ্চিতং দুষ্টং রুধিরং প্রস্রবন্তি| ততঃ-তেন স্রুতেন, সুখী রুজাবিরহাত্ সম্পদ্যতে|

Adhikarana dAhAyonyArshasAM jalaukAdiBiH (28-29) · Śloka 29

| অবর্তমানমুচ্ছূনকঠিনেভ্যো হরেদসৃক্||২৮|| অর্শোভ্যো জলজাশস্ত্রসূচীকূর্চৈঃ পুনঃ পুনঃ| |২৯|

স০-অর্শোভ্য উচ্ছূনকঠিনেভ্যো রুধিরমবর্তমানং জলৌকশস্ত্রাদিভিরসকৃদ্ধরেত্| শীতোষ্ণাদিরুপক্রমঃ কস্মাদত্র ন ক্রিযতে ? ইত্যাহ-

Adhikarana dAhAyonyArshasAM duShTaraktAvasecane kAraNam (29-30) · Śloka 30

| শীষ্ণস্নিগ্ধরূক্ষৈর্হি ন ব্যাধিরুপশাম্যতি||২৯|| রক্তে দুষ্টে ভিষক্ তস্মাদ্রক্তমেবাবসেচযেত্| |৩০|

স০-যস্মাত্ শীতাদিভিরুপক্রমৈরুপক্রান্তোঽর্শোব্যাধির্ন শাম্যতি রক্তে দুষ্টে সতি, তস্মাদ্ধেতো রক্তমেবাবসেচযেত্-ন তু শীতাদির্যোজ্যঃ|

Adhikarana arshonAshakaM takram (30-31) · Śloka 31

| যো জাতো গোরসঃ ক্ষীরাদ্বহ্নিচূর্ণাবচূর্ণিতাত্||৩০|| পিবংস্তমেব তেনৈব ভুঞ্জানো গুদজান্ জযেত্| |৩১|

স০-যো গোরসঃ ক্ষীরাজ্জাতঃ-উত্পন্নঃ| কিম্ভুতাত্ ? বহ্নিচূর্ণাবচূর্ণিতাত্-চিত্রকচূর্ণাবকীর্ণাত্| তমেব-গোরসং, পিবন্নরস্তেনৈব চ-গোরসেন, ভুঞ্জানো গুদজান্ জযেত্| 'বহুমূলাবচূর্ণিতাত্' ইতি ক্ব(কে)চিত্ পঠন্তি| বহুমূলা-শতাবরী|

Adhikarana arshonAshakaM cUrNam (31-32) · Śloka 32

কোবিদারস্য মূলানাং মথিতেন রজঃ পিবন্||৩১|| অশ্বন্ জীর্ণে চ পথ্যানি মুচ্যতে হতনামভিঃ|৩২|

স০-কোবিদারমূলচূর্ণং মথিতেন পিবন্ জীর্ণে চ তস্মিন্ পথ্যান্যশ্র্নন্ দুর্নামভির্মুচ্যতে-নশ্যন্তি তান্যস্যেত্যর্থঃ|

Adhikarana gugashvayathushUtai hiDgvAdi gugashvayathushUtai guDaharItakI gugashvayathushUtai pathyAdicUrNam gugashvayathushUtai kali~ggAdicUrNam gugashvayathushUtai tripaTvAdi cUrNam (32-34) · Śloka 34

| গুদশ্বযথুশূলার্থো মন্দাগ্নির্গৌল্মিকান্ পিবেত্||৩২|| হিঙ্গ্বাদীননুতক্রং বা খাদেঙ্গুডহরীতকীম্| তক্রেণ বা পিবেত্পথ্যাবেল্লাগ্নিকুটজত্বচঃ||৩৩|| কলিঙ্গমগধাজ্যোতিঃসূরণান্ বাংঽশবর্ধিতান্| কোষ্ণাম্বুনা বা ত্রিপটুব্যোষহিঙ্গ্বম্লবেতসম্||৩৪||

স০-গুদে শ্বযথুশূলার্থো মন্দাগ্নির্নরো গৌল্মিকান্-গুল্মচিকিত্সাভবান্, হিঙ্গ্বাদীন্ চূর্ণান্ (হৃ. চি. অ. ১৪১৩৯) পিবেত্| ইহ দ্রবানির্দেশাদনন্তরং চ মথিতশব্দশ্রবণাত্ অর্শোবিকারে চ হিঙ্গ্বাদীন্ চূর্ণান্ তক্রেণ বা পিবেদিতি যোজ্যম্| অনুতক্রং বা-তক্ড়নুপানাত্, গুডহরীতকীং ভক্ষযেত্| অথবা, পথ্যাদীংস্তক্রেণ পিবেত্| অথবা, কলিঙ্গাদীন্ অংশবর্ধিতান্ মূলদ্রব্যাপেক্ষযা ভাগেন যথোত্তরং বর্ধিতান্, তক্রেণ পিবেত্| জ্যোতিঃ-চিত্রকঃ| অথবা, উষ্ণজলেন ত্রিপট্বাদি পিবেত্|

Adhikarana gudashvayathushUlArte takratarpaNam gudashvayathushUlArte hapuShAdi cUrNam gudashvayathushUlArte pIluPalAni gudashvayathushUlArte nirannena takrapAnam (35-37) · Śloka 37

যুক্তং বিল্বকপিত্থাভ্যাং মহৌষধবিডেন বা| অরুষ্করৈর্যবান্যা বা প্রদদ্যাত্তক্রতর্পণম্||৩৫|| দদ্যাদ্বা হপুষাহিঙ্গুচিত্রকং তক্রসংযুতম্| মাসং তক্রানুপানানি খাদেত্পীলুফলানি বা||৩৬|| পিবেদহরহস্তক্রং নিরন্নো বা প্রকামতঃ| |৩৭|

স০-তক্রেণ তর্পণং-যবসক্তূন্, দদ্যাত্| কিম্ভূতম্ ? বিল্বকপিত্থাভ্যাং যুক্তমথবা মহৌষধবিডেন যুক্তং ভল্লাতকৈর্বা যুক্তমথবা যবান্যা বা যুক্তং প্রদদ্যাত্| তক্রতর্পণমেব বিল্বাদিভির্যথোক্তৈঃ সহ ভুঞ্জীত| নান্যত্কিঞ্চিদিতি সূচযিতুং প্রশব্দোঽত্র ন্যস্তঃ| অথবা, হপুষাদিকং তক্রান্বিতং দদ্যাত্| মাসং পীলুফলানি তক্রানুপানানি বা খাদেত্| অথবা, ইচ্ছযাঽহরহরনন্নাশী তক্রং পিবেত্|

Adhikarana atyarthaM mandAgnau takropacAra eva (37) · Śloka 37

| অত্যর্থং মন্দকাযাগ্নেস্তক্রমেবাবচারযেত্||৩৭||

স০-অত্যর্থং মন্দকাযাগ্নের্নরস্য সাযং প্রাতর্বা তক্রমেবাবচারযেদ্বৈদ্যো-নত্বন্নম্, অত এবৈবকারোঽত্র নির্দিষ্টঃ|

Adhikarana takropacArakAlaH ashaktau avalehikA peyA ca ataH paraM shAlyannam (38-40) · Śloka 40

সপ্তাহং বা দশাহং বা মাসার্ধং মাসমেব বা| বলকালবিকারজ্ঞো ভিষক্ তক্রং প্রযোজযেত্||৩৮|| সাযং বা লাজসক্তূনাং দদ্যাত্তক্রাবলেহিকাম্| জীর্ণে তক্রে প্রদদ্যাদ্বা তক্রপেযাং সসৈন্ধবম্||৩৯|| তক্রানুপানং সস্নেহং তক্রৌদনমতঃ পরম্| যূশৈ রসৈর্বা তক্রাড্যৈঃ শালীন্ ভুঞ্জীত মাত্রযা||৪০||

স০-সপ্তাহং দশাহং মাসার্ধং মাসং বা যাবত্ বলাদিবিদ্বৈদ্যো মথিতং যোজযেত্| অথবা, কেবলেন তক্রেণাশিতুমশক্তস্তদা সাযং-দিনান্তে, লাজসক্তূনাং সম্বন্ধিনীং তক্রাবলেহিকাং দদ্যাত্| অথবা, তক্রে জীর্ণে তক্রসিদ্ধাং পেযাং সৈন্ধবান্বিতাং দদ্যাত্| সৈন্ধবশব্দস্যান্তে শ্রুতত্বাদুভযোরপ্যবলেহিকাপেযযোঃ সৈন্ধবেনযোগো বেদ্যঃ| অতঃ পরং-অবলেহিকাপেযাতোঽনন্তরং, তক্রেণ সহৌদনমীষত্স্নেহং তক্রানুপনং দদ্যাত্| অথবা, যূষৈ রসৈর্বা তক্রভূযিষ্ঠৈঃ শালীন্ মাত্রযা ভুঞ্জীত| কার্যে ভক্তাদৌ কারণত্বেনোপচারাত্ শালীন্-ভক্তত্বেন পরিণতান্, দদ্যাদিতি বেদ্যম্| সর্বথাঽত্র তক্রপ্রযোগঃ প্রাযেণ পূজিত ইত্যত এবাহ-

Adhikarana takraprakArAH (41) · Śloka 41

রূক্ষমর্ধোদ্ধৃতস্নেহং যতশ্চানুদ্ধৃতং ঘৃতম্| তক্রং দোষাগ্নিবলবিত্রিবিস্ত্রিবিধং তত্প্রযোজযেত্||৪১||

স০-যথাযোগং কদাচিদ্রূক্ষং-নিঃশেষমুদ্ধৃতস্নেহং, অথবাঽর্ধোদ্ধৃতস্নেহং, কদাচিদনুদ্ধৃতং যস্মাদ্ধৃতম্, কারণে নবনীতে কার্যোপচারাদেবমুক্তম্, তত্-এতত্রিবিধিং, তক্রং দোষাদিবিত্ প্রযোজযেত্| তক্রপ্রযোগে কৃতে কো গুণঃ ? ইত্যাহ-

Adhikarana takraprayoge guNAH (42) · Śloka 42

ন বিরোহন্তি গুদজাঃ পুনস্তক্রসমাহতাঃ| নিষিক্তং তদ্ধি দহতি ভূমাবপি তৃণোলুপম্||৪২||

স০-তক্রেণ সমাহতাঃ-উন্মূলিতাঃ, গুদজাঃ পুনর্ন প্ররোহন্তি, সমূলা নশ্যন্তীত্যর্থঃ| কথমেতদবগম্যতে ? ইত্যাশঙ্ক্যাহ-হি-যস্মাত্, তত্-তক্রং, ভূমাবপি নিষিক্তং তৃণোলুপং বিশেষেণ দহত্যপুনরুত্পাদনাত্| ভূমাবপীত্যপিশব্দো ন কেবলং শরীরে, বাহ্যাযামপি ভুবীতি সন্দর্শনার্থঃ| সৃণোলুপং কঠিনং যদ্দহতি তদবশ্যমর্শাসি মৃদূনি মাংসপ্রাযাণি দহত্যেব|

Adhikarana tatropapattiH (43-45) · Śloka 45

স্রোতঃসু তক্রশুদ্ধেষু রসো ধাতূনুপৈতি যঃ| তেন পুষ্টির্বলং বর্ণঃ পরং তুষ্টিশ্চ জাযতে||৪৩|| বাতশ্লেষ্মবিকারাণাং শতং চ বিনিবর্ততে| |৪৫|

স০-বাতশ্লেষ্মাবৃতেষু স্রোতঃসু তক্রেণ শুদ্ধেষু সত্সু যো রসঃ-আহাররসো, ধাতূন্ উপৈতি-সম্প্রাপ্নোতি, তেন-রসেন প্রাপ্তেন, পুষ্ট্যাদযো জাযন্তে| তথা, বাতশ্লেষ্মবিকারাণাং শতং বিনিবর্ততে-শাম্যতি|

Adhikarana mathitavisheShapAne~arshaHkShayaH (44-45) · Śloka 45

| মথিতং ভাজনে ক্ষুদ্রবৃহতীফললেপিতে||৪৪|| নিশাং পর্যুষিতং পেযমিচ্ছদ্ভির্গুদজক্ষযম্| |৪৫|

স০-কণ্টকারিকাফললেপিতে ভাজনে মথিতং নিশাং স্থিত গুদজক্ষযমিচ্ছুভিঃ পেযম্|

Adhikarana takrAriShTam (45-48) · Śloka 48

| ধান্যোপকুঞ্চিকাজাজীহপুষাপিপ্পলীদ্বযৈঃ||৪৫|| কারবীগ্রন্থিকশঠীযবান্যগ্নিযবানকৈঃ| চূর্ণিতৈর্ঘৃতপাত্রস্থং নাত্যম্লং তক্রমাসুতম্||৪৬|| তক্রারিষ্টং পিবেজ্জাতং ব্যক্তাম্লকটু কামিতঃ| দীপনং রোচনং বর্ণ্যংকফবাতানুলোমনম্||৪৭|| গুদশ্বযথুকণ্ড্বর্তিনাশনং বলবর্ধনম্| |৪৮|

স০-ধান্যোপকুঞ্চিকাদিভিশ্চূর্ণিতৈর্ঘৃতপাত্রস্থং নাত্যম্লং তক্রমাসুতং কৃত্বাঽনন্তরং ব্যক্তাবম্লকটূ যস্য তদ্ ব্যক্তাম্লকটু, জাতং সত্তক্রারিষ্টং কামতঃ পিবেত্| তচ্চ পীতং দীপনাদিগুণং স্যাত্| অত্র চ তক্রে পলশতমাত্রে ধান্যকাদীনি পালিকানি দেযানীতি বৃদ্ধবৈদ্যব্যবহারঃ|

Adhikarana kumBavisheShe jAtaM takramarshauharam (48-49) · Śloka 49

| ত্বচং চিত্রকমূলস্য পিষ্ট্বা কুম্ভং প্রলেপযেত্||৪৮|| তক্রং বা দধি বা তত্র জাতমর্শোহরং পিবেত্| |৪৯|

স০-চিত্রকমূলস্য ত্বচং জলেন পিষ্ট্বা কুম্ভং প্রলেপযেত্| তক্রং তত্র জাতমথবা দধি জাতমর্শোহরং পিবেত্|

Adhikarana BArgyAdiShvapyeSha vidhiH (49) · Śloka 49

| ভার্ঙ্গ্যাস্ফোতামৃতাপঞ্চকোলেষ্বপ্যেষ সংবিধিঃ||৪৯||

স০-ভার্ঙ্গ্যাদিষ্বপ্যেষ সংবিধিঃ-এতত্ত্বগাদিভাজনলেপনাদিকং কার্যমিত্যর্থঃ

Adhikarana gajakaNAdiBiH saMskRutAH PalAmlAdayo dIpanAH (50-51) · Śloka 51

পিষ্টৈর্গজকণাপাঠাকারবীপঞ্চকোলকৈঃ| তুম্বর্বজাজীধনিকাবিল্বমধ্যৈশ্চ কল্পযেত্||৫০|| ফলাম্লান্ যমকস্নেহান্ পেযাযূষরসাদিকান্| এভিরেবৌষধৈঃ সাধ্যং বারি সর্পিশ্চ দীপনম্||৫১||

স০-হস্তিপিপ্পল্যাদিভিঃ পিষ্টৈঃ-কল্কিতৈঃ, তথা ফলঃ-বীজপূরাদিভিঃ, অম্লান্ যমকস্নেহাংস্তথা পেযাদিকান্ কুর্যাত্| এভিরেব-হস্তিপিপ্পল্যাদিভিঃ, বারি সাধ্যং-শ্রপণীযম্, সর্পিশ্চ সাধ্যম্, তচ্চ দ্বযং বহ্নের্দীপনং স্যাত্|

Adhikarana bhinnashakRutAmayaM kramaH (52) · Śloka 52

ক্রমোঽযং ভিন্নশকৃতাং| |৫২|

স০-অযং-পূর্বোক্তঃ, ক্রমো ভিন্নশকৃতাম্|

Adhikarana kaThinapurIShANAM kramo vakShayamANaH (52) · Śloka 52

বক্ষ্যতে গাঢবর্চসাম্| |৫২|

স০-কঠিনপুরীষাণাং তু বক্ষ্যতে-ভণিষ্যতে| তমেবাহ-

Adhikarana kaThina salavaNAvArUNIpAnamkaThina salavaNallavaBakShaNam (52-53) · Śloka 53

| স্নেহাড্যৈঃ সক্তুভির্যুক্তাং লবণাং বারুণীং পিবেত্||৫২|| লবণা এব বা তক্রসীধুধান্যাম্লবারুণীঃ| |৫৩|

স০-স্নেহাড্যৈঃ-বহুস্নেহসম্পৃক্তৈঃ, সক্তুভির্যুক্তাং লবণাং বারুণীং পিবেত্| তক্রাদীন্ বা লবণান্ পৃথক্ পৃথক্ যথাযোগং পিবেত্| এবশব্দোঽত্র কেবলানেবৈতান্ সক্তুরহিতান্ পিবেদিতি দ্যোতযতি|

Adhikarana kaThinakara~jjapallavaBakShaNam (53-54) · Śloka 54

| প্রাগ্ভক্তান্ যমকে ভৃষ্টান্ সক্তুভিশ্চাবচূর্ণিতান্||৫৩|| করঞ্জপল্লবান্ খাদেদ্বাতবর্চোনুলোমনান্| |৫৪|

স০-তথা, করঞ্জপল্লবান্ ভক্ষযেত্| কিম্ভূতান্ ? প্রাগ্ভক্তান্,- ভক্তাত্ প্রাক্, মযূরব্যংসকাদিত্বাত্সমাসঃ, করঞ্জপল্লবান্ ভুক্ত্ব্যমিত্যর্থঃ| কিম্ভূতান্? যমকেস্নেহদ্বযে, ভৃষ্টান্-পক্বান্, তথা সক্তুভিঃ সুষ্টু চূর্ণিতান্ তাংশ্চ ভুক্ত্বা বাতবর্চোনুলোমনান্|

Adhikarana kaThinapurIShANAM saguDanAgarAdiyogaH (54-55) · Śloka 55

| সগুডং নাগরং পাঠাং গুডক্ষারঘৃতানি বা||৫৪|| গোমূত্রাধ্যুষিতামদ্যাত্সগুডাং বা হরীতকীম্| |৫৫|

স০-তথা, গুডেন সহ শুণ্ঠীং পাঠাং বাঽশ্নীযাত্| অথবা, গুডযবক্ষারসর্পীষ্যদ্যাত্| গুডেন বা সহ হরীতকীমদ্যাত্| কিম্ভূতাম্ ? গোমূত্রেঽধ্যুষিতাম্|

Adhikarana kaThinapurIShANAM pathyAshatadvayayogAH (55-57) · Śloka 57

| পথ্যাশতদ্বযান্মূত্রদ্রোণেনামূত্রসঙ্ক্ষ্যাত্||৫৫|| পক্বাত্ খাদেত্সমধুনী দ্বে দ্বে হন্তি কফোদ্ভবান্| দুর্নামকুষ্ঠশ্বযথুগুল্মমেহোদরকৃমীন্||৫৬|| গ্রন্থ্যর্বুদাপচীস্থৌল্যপাণ্ডুরোগাড্যমারুতান্| |৫৭|

সং-পথ্যানাং শতদ্বযং পথ্যাশতদ্বযম্, তস্মাদ্গোমূত্রদ্রোণেন মূত্রসঙ্ক্ষ্যং যাবত্-মূত্রক্ষযাবধি, পক্বাত্ দ্বে দ্বে-পথ্যাখ্যে ফলে, খাদেত্| কিম্ভূতে ? সমধুনী-মাক্ষিকযুক্তে| পথ্যাশতদ্বযং চোপযুক্তং কফোদ্Vঅবানামযান্ দুর্নামাদীন্ হন্তি|

Adhikarana kaThinapurIShANAM ajashRu~ggImUlakalkayogaH (57-58) · Śloka 58

| অজশৃঙ্গীজটাকল্কমজামূত্রেণ যঃ পিবেত্||৫৭|| গুডবার্তাকভুক্ তস্য নশ্যন্ত্যাশু গুদাঙ্কুরাঃ| |৫৮|

স০-অজশৃঙ্গীমূলকল্কং যঃ পুরুষোঽজমূত্রেণ পিবেত্| কিম্ভূতঃ ? গুডবার্তাকভুক্-এতদাহারঃ, তস্য-পুরুষস্য, দ্রাক্ দুর্নামানি নশ্যন্তি|

Adhikarana kaThinapurIShANAM pathyAtakrayogaH kaThinapurIShANAM pathyApippalIyogaH kaThinapurIShANAM pathyAtrivRuddantIyogaH (58-60) · Śloka 60

| শ্রেষ্ঠারসেন ত্রিবৃতাং পথ্যাং তক্রেণ বা সহ||৫৮|| পথ্যাং বা পিপ্পলীযুক্তাং ঘৃতভৃষ্টাং গুডান্বিতাম্| অথবা সত্রিবৃদ্দন্তীং ভক্ষযেদনুলোমনীম্||৫৯|| হতে গুদাশ্রযে দোষে গুদজা যান্তি সঙ্ক্ষ্যম্| |৬০|

স০-শ্রেষ্ঠারসেন-ত্রিফলাক্বাথেন, ত্রিবৃতামদ্যাত্| অভযাং বা তক্রেণ সহাদ্যাত্| পথ্যাং বা পিপ্পলীযুক্তাং ঘৃতভৃষ্টাং গুডযুক্তাং ভুঞ্জীত| অথবা পথ্যাং ত্রিবৃদ্দন্তীভ্যাং সহানুলোমকৃতাং ভক্ষযেত্| গুদাশ্রযে দোষে হতে সতি গুদজাঃ সঙ্ক্ষযং য়ান্তি, আশ্রযাভাব আশ্রিতানুপপত্তেঃ| তস্মদনুলোমনমর্শঃসু হিতমিত্যর্থঃ|

Adhikarana kaThinapurIShANAM dADimasvarasAditakrayogaH pAThAtakrayogaH kaThinapurIShANAM citrakashuNThIsIdhuyogaHkaThinapurIShANAM hapuShAdi surAyogaH (60-62) · Śloka 62

| দাডিমস্বরসাজাজীযবানীগুডনাগরৈঃ||৬০|| পাঠযা বা যুতং তক্রং বাতবর্চোনুলোমনম্| সিধুং বা গৌডমথবা সচিত্রকমহৌষধম্||৬১|| পিবেত্সুরাং বা হপুষাপাঠাসৌবর্চলান্বিতাম্| |৬২|

স০-দাডিমাদিভির্যুক্তং তক্রং পাঠযা বাতবর্চোনুলোমনং স্যাট্| অথবা, সীধুং চিত্রকশুণ্ঠীযুতং পিবেত্| গৌডং বা চিত্রকশুণ্ঠীযুতং পিবেত্| অথবা, সুরাং হপুষাদিযুক্তাং পিবেত্|

Adhikarana kaThinapurIShANAM vardhamAnapippalItilakShIrayogaH (62-63) · Śloka 63

| দশাদিদশকৈর্বৃদ্ধাঃ পিপ্পলীর্দ্বিপিচুং তিলান্||৬২|| পীত্বা ক্ষীরেণ লভতে বলং দেহহুতাশযোঃ| |৬৩|

স০-দশাদিদশকৈর্বৃদ্ধাঃ পিপ্পলীস্তথা তিলান্ দ্বিপিচুং পীত্বা দেহস্য বহ্নেশ্চ বলং প্রাপ্নোতি| দশপিপ্পল্য আদি-প্রথমং দিনং, যেষাং দশকানাং ত এবম্| দশদযশ্চ তে দশকাশ্চ দশাদিদশকাঃ, তৈর্বৃদ্ধাঃ| প্রথমে দিনে দশপিপ্পলীস্তিলকর্ষদ্বযং চ ক্ষীরেণ পেযাঃ, অনন্তরং প্রতিদিনং দশদশ পিপ্পলীঃ পিপ্পলীবর্ধমান্যাযেন বৃদ্ধতি(দ্ধাস্তি)লকর্ষদ্বযেন সহ ক্ষীরেণ পীত্বা দেহস্যাগ্নেশ্চ বলং লভতে| অত্র কালস্যানির্দিষ্টত্বাদ্দেহাগ্নযোর্বলমিচ্ছতা যথেষ্টকালঃ প্রযোগঃ কার্যঃ| ক্ষীরস্য চাত্র প্রমাণানুক্তেঃ সামান্যপরিভাষযা "পেষ্যস্য কর্ষমালোড্যং তদ্দ্রবস্য পলত্রযে|" (হৃ.ক.অ.৬/১৩) ইতি পরিমাণং কল্প্যম্|

Adhikarana kaThinapurIShANAM duHsparshakAdipAThAyogaH (63-64) · Śloka 64

| দুঃস্পর্শকেন বিল্বেন যবান্যা নাগরেণ বা||৬৩|| একৈকেনাপি সংযুক্তা পাঠা হন্ত্যর্শসাং রুজম্| |৬৪|

স০-ধন্বযবাসকেন বিল্বেন যবান্যা শুণ্ঠ্যা বৈকৈকেনাপ্যেবং পাঠা যুক্তা দুর্নাম্রাং রুজং হন্তি| একৈকেনাপীত্যপিশব্দাত্ দ্বাভ্যাং ত্রিভিশ্চতুর্ভিশ্চ| একৈকেনেত্যেকশব্দস্য "একং বহুব্রীহিবত্" ইতি দ্বিত্ববহুব্রীহিবদ্ভাবাত্সুপো লুক্|

Adhikarana kaThinapurIShANAM aBayAriShTaH (64-68) · Śloka 68

| সলিলস্য বহে পক্ত্বা প্রস্থার্ধমভযাত্বচাম্||৬৪|| প্রস্থং ধাত্র্যা দশপলং কপিত্থানাং ততোঽর্ধতঃ| বিশালাং রোধ্রমরিচকৃষ্ণাবেল্লৈলবালুকম্||৬৫|| দ্বিপলাংশং পৃথ্কপাদশেষে পূতে গুডাত্তুলে| দত্ত্বা প্রস্থং চ ধাতক্যাঃ স্থাপযেদ্ধৃতভাজনে||৬৬|| পক্ষাত্স শীলিতোঽরিষ্টঃ করোত্যগ্নিং, নিহন্তি চ| গুদজগ্রহণীপাণ্ডুকুষ্ঠোদরগরজ্বরান্||৬৭|| শ্বযথুপ্লীহহৃদ্রোগগুল্মযক্ষ্মবমিকৃমীন্| |৬৮|

স০-সলিলস্য বহে-দ্রোণচতুষ্টযে, পক্ত্বা হরীতকীত্বচাং প্রস্থার্ধং-অষ্টপলানি, আমলকদলানাং প্রস্থং, কপিত্থস্য পলানিদশ, ততঃ-কপিত্থাত্, অর্ধেন বিশালং পঞ্চপলাং, রোধ্রাধিকং দ্বিপলাংশং পৃথক্পৃথগেতত্সর্বং পক্ত্বা তস্মিন্ পাদশেষে-দ্রোণশেষে, পূতে গালিতে চাস্মিন্ গুডাত্তুলে দ্বে দত্ত্বা ধাতক্যাঃ প্রস্থং চ ততো ঘৃতরূঢে ভাজনে স্থাপযেত্| পক্ষাদূর্ধ্বং শীলিতঃ সঃ-অভযারিষ্টসংজ্ঞঃ, অগ্নিং করোতি-দীপযতি, গুদজাদীংশ্চ হন্তি|

Adhikarana kaThinapurIShANAM dhanvAriShTaH (68-69) · Śloka 69

| জলদ্রোণে পচেদ্দন্তীদশমূলবরাগ্নিকান্||৬৮|| পালিকান্ পাদশেষে তু ক্ষিপেঙ্গুডতুলাং পরম্| পূর্ববত্সর্বমস্য স্যাদনুলোমিতরস্ত্বযম্||৬৯||

স০-জলস্য দ্রোণে দন্ত্যাদীন্ প্রত্যেকং পালিকান্ পচেত্| পাদশেষে চাস্মিন্ গুডাত্তুলাং ক্ষিপেত্| পরং-অন্যত্, সর্বমস্য-দন্ত্যরিষ্টস্য, পূর্ববত্-অভযারিষ্টতুল্যং ধাতকীপরিমাণঘৃতভাজনস্থাপনপক্ষোত্তরকালপানাদি, স্যাত্| আনুলোমীত্যাদি| আনুলোমীবাতবিবন্ধনুত্ অভযারিষ্টঃ| আযং পুনস্ততোঽপ্যানুলোমিতরঃ|

Adhikarana kaThinapurIShANAM durAlaBAriShTaH (70-71) · Śloka 71

পচেহুরালভাপ্রস্থং দ্রোণেঽপাং প্রাসৃতৈঃ সহ| দন্তীপাঠাগ্নিবিজযাবাসামলকনাগরৈঃ||৭০|| তস্মিন্ সিতাশতং দদ্যাত্পাদস্থেঽন্যচ্চ পূর্ববত্| লিম্পেত্কুম্ভং তু ফলিনীকৃষ্ণাচব্যাজ্যমাক্ষিকৈঃ||৭১||

সং-অপাং দ্রোণে ধন্বযাসপ্রস্থং দন্ত্যাদিভিঃ দ্বিপলিকৈঃ সহ পচেত্| তস্মিন্-পাদস্থে ক্বাথে, সিতাযাঃ শতং ক্ষিপেত্| অন্যত্-ধাতকীপরিমাণাদিকং, পূর্ববত্-অভযারিষ্টবত্, কার্যম্| লিম্পেদিত্যাদি| তুর্বিশেষে| বিশেষস্তু ফলিন্যাদিভিঃ কুম্ভং লিম্পেত্, যত্রাযং নিক্ষিপ্যতে দুরালভারিষ্ট ইতি|

Adhikarana kaThinapurIShANAM PalAmlAdighRutam (72-73) · Śloka 73

প্রাগ্ভক্তমানুলোম্যায ফলাম্লং বা পিবেদ্ধৃতম্| চব্যচিত্রকসিদ্ধং বা যবক্ষারগুডান্বিতম্||৭২|| পিপ্পলীমূলসিদ্ধং বা সগুডক্ষারনাগরম্| |৭৩|

স০-প্রাগ্ভক্তং-ভক্তাত্ পূর্বং, ঘৃতং ফলৈঃ-মাতুলুঙ্গাদিভিরনুলোমনপ্রাযৈঃ, অম্লং তৈঃ পক্বং পিবেত্| চব্যচিত্রকাভ্যাং সিদ্ধং পক্বং যবক্ষারগুডাভ্যাং যুক্তং ঘৃতং পিবেত্| অথবা, পিপ্পলীমূলসিদ্ধং গুডযবক্ষারনাগরসহিতং পিবেত্|

Adhikarana kaThinapurIShANAM pippalyAdighRutam (73-74) · Śloka 74

| পিপ্পলীপিপ্পলীমূলধানকাদাডিমৈর্ঘৃতম্||৭৩|| দঘ্না চ সাধিতং বাতশকৃন্মূত্রবিবন্ধনুত্| |৭৪|

স০-পিপ্পল্যাদিভির্দধিসহিতৈঃ সাধিতং ঘৃতং বাতশকৃন্মূত্রবিবন্ধজিত্|

Adhikarana kaThinapurIShANAM palAshakShArAdighRutam (74-75) · Śloka 75

| পলাশক্ষারতোযেন ত্রিগুণেন পচেদ্ধৃতম্||৭৪|| বত্সকাদিপ্রতীবাপমর্শোঘ্নং দীপনং পরম্| |৭৫|

স০-পলাশক্ষারস্য জলেন ত্রিগুণেন বত্সকাদিপ্রতীবাপং ঘৃতং পচেত্| তচ্চার্শোঘ্নং পরং দীপনং চ|

Adhikarana pa~jcakolAdighRutam (75-77) · Śloka 77

| পঞ্চকোলাভযাক্ষারযবানীবিডসৈন্ধবৈঃ||৭৫|| সপাঠাধান্যমরিচৈঃ সবিল্বৈর্দধিমদ্ধৃতম্| সাধযেত্ তজ্জযত্যাশু গুদবঙ্ক্ষ্ণবেদনাম্||৭৬|| প্রবাহিকাং গুদভ্রংশং মূত্রকৃচ্ছ্রং পরিস্রবম্| |৭৭|

স০-পঞ্চকোলাদিভির্দধিসহিতং ঘৃতং পচেত্| তচ্চ গুদাদি বেদনাদীন্ জযতি|

Adhikarana kaThinapurIShANAM cA~ggerIghRutam (77-79) · Śloka 79

| পাঠাজমোদধনিকাশ্বদংষ্ত্রাপঞ্চকোলকৈঃ||৭৭|| সবিল্বৈর্দনি চাঙ্গেরীস্বরসে চ চতুর্গুণে| হন্ত্যাজ্যং সিদ্ধমানাহং মূত্রকৃচ্ছ্রং প্রবাহিকাম্||৭৮|| গুদভ্রংশার্তিগুদজগ্রহণীগদমারুতান্| |৭৯|

স০-পাঠাদিভিশ্চাঙ্গেরীস্বরসে দঘ্নি চ চতুর্গুণে ঘৃতং পক্বং চাঙ্গেরীঘৃতম্| এতদানাহাদীন্ হন্তি|

Adhikarana kaThinapurIShANAM shikhitittiryAdimAM sarasAH (79-80) · Śloka 80

| শিখিতিত্তিরিলাবানাং রসানম্লান্ সুসংস্কৃতান্||৭৯|| দক্ষাণাং বর্তকানাং বা দদ্যাদ্বিঙ্বাতসঙ্গ্রহে| |৮০|

সং-ময়ুরতিত্তির্যাদীনাং সুসম্স্কৃতানম্লান্ মাংসরসান্ বিড্বাতসঙ্গ্রহনিবৃত্ত্যর্থং দদ্যাত্|

Adhikarana kaThinapurIShANAM vAstukAdi shAkam kaThinapurIShANAM raktashAlyannam kaThinapurIShANAM vya~jjanaM mAMsarasASca (80-85) · Śloka 85

| বস্তুকাগ্নিত্রিবৃদ্দন্তীপাঠাম্লীকাদিপল্লবান্||৮০|| অন্যচ্চ কফবাতঘ্নং শাকং চ লঘুমেদি চ| সহিঙ্গং যমকে ভৃষ্টং সিদ্ধং দধিসরৈঃ সহ||৮১|| দহ্নিকাপঞ্চকোলাভ্যাং পিষ্টাভ্যাং দাডিমাম্বুনা| আড়্দ্রিকাযাঃ কিসলযৈঃ শকলৈরাদ্রকস্য চ||৮২|| যুক্তমঙ্গারধূপেন হৃদ্যেন সুরভীকৃতম্| সজীরকং সমরিচং বিডসৌবর্চলোত্কটম্||৮৩|| বাতোত্তরস্য রূক্ষস্য মন্দাগ্নের্বদ্ধবর্চসঃ| কল্পযেদ্রক্তশাল্যন্নব্যঞ্জনং শাকবদ্রসান্||৮৪|| গোগোধাছগরোষ্ট্রাণাং বিশেষাত্ক্রব্যভোজিনাম্| |৮৫|

স০-বাস্তুকাদীনাংশাকং তথাঽপরমপি শাকং যত্কফবাতঘ্নং কোশাতকাদিকং, লঘু মেদি চ| তচ্চ সহিঙ্গু চ তথা যমকে ভৃষ্টং-সন্তলিতম্| তথা, দধিসরেণ ঢনিকাপঞ্চকোলাভ্যাং পিষ্টাভ্যাং দাডিমাম্বুনা চ সিদ্ধম্| তথা, আর্দ্রিকাযাঃ-ধনিকাযাঃ, কিসলযৈঃ-পল্লবৈঃ, যুক্তম্| তথা, আর্দ্রকস্য শকলৈর্যুক্তম্| তথা, হৃদ্যেন-মনঃপ্রিযেণ, অঙ্গারধূপেন-অঙ্গারৈর্যো ধূপো হিঙ্গ্বাদিনা প্রসিদ্ধস্তেন, সুরভীকৃতম্| তথা, সজীরকং সমরিচং বিডসৌবর্চললবণাভ্যামুত্কটং-অধিকং, বাতোত্তরস্য পবন্ফাধিকস্য পুরুষস্য, তথা রূক্ষস্য তথা মন্দাগ্রেস্তথা বদ্ধবর্চসঃ কল্পযেত্| রক্তশালিভক্তস্য ব্যঞ্জনং-তেমনাখ্যং, শাকবত্কল্পযেত্-শাকসংস্কারেণ কুর্যাদিত্যর্থঃ| ব্যঞ্জনানিতি পাঠে পুংস্ত্বং চিন্ত্যম্| তথা, রসান্| কেষাং রসান্ ? গোগোধাদীনাম্, বিশেষেণ ক্রব্যভোজিনাং-মাংসভক্ষিণাম্| তদেবমাহারং নিরুপ্য পানং নিরুপযন্নাহ-

Adhikarana madirAdikaM pAnam (85-87) · Śloka 87

| মদিরাং শাড়্করং গৌডং সীধুং তক্রং তুষোদকম্||৮৫|| অরিষ্টং মস্তু পানীযং, পানীযং বাঽল্পকং শৃতম্| ধান্যেন ধান্যশুণ্ঠীভ্যাং কণ্টকারিকযাঽথবা||৮৬|| অন্তে ভক্তস্য মধ্যে বা বাতবর্চোনুলোমনম্| |৮৭|

স০-মদিরাদি পানীযং-পাতব্যম্| অথবা, পানীযং-জলং, অতিশযেনাল্পং-অল্পকং, শৃতং যথাযোগং কদাচিদ্ধান্যেন কদাচিদ্ধান্যশুণ্ঠীভ্যাং কদাচিত্কণ্টকারিকযা শৃতং কদচিত্ভক্তম্যান্তে কদাচিন্মধ্যে, যোগ্যতাবশাদ্যেষাং মারুতাবিষ্টদিরুপত্বং তেষাং ভক্তস্য মধ্যে অন্যেশান্মন্তে, মদিরাদিপানং বাতবর্চোনুলোমনম্,-তযোরপ্রবর্তনোপারুঢযার্যথামাড়্গপ্রবর্তনমিত্যর্থঃ| বাতস্যানুলোমনং চ যত্তত্কফপিত্তযোরপ্যনুলোমনম্| পবনো হি ক্রিযাবানক্রিযাবতাং দেহগতানাং ভাবানামনুলোমনঃ সম্ভাব্যতে| তথা চ প্রাগভ্যধাযি (হৃ.সূ.অ. ১৯/৮৬)-"বিট্শ্লেষ্মপিত্তাদিমলোচ্চ্যানাং বিক্ষেপসংহারকরঃ স যস্মাত্|" ইত্যাদি| অর্শঃসু চানুলোমনং কার্যমিতি দশংযিতুমাহ-

Adhikarana viDvAtAdyanulomanasya Palam (87-88) · Śloka 88

| বিড্বাতকফপিত্তানামানুলোম্যে হি নির্মলে||৮৭|| গুদে শাম্যন্তি গুদজাঃ পাবকশ্চাভিবর্ধতে| |৮৮|

স০-যস্মাদ্বিড্বাতাদীনামানুলোম্যে সতি গুদং নির্মলং ভবতি| গুদে চ নির্মলে গুদজাঃ শাম্যন্তি| পাবকঃ-কাযাগ্নিশ্চ, অভিবর্ধতে যতস্তস্মাদর্শসাং বিড্বাতকফপিত্তানুলোমনং ভেষাজান্নপানাদি যত্তদ্দেযমিতি ভাবঃ|

Adhikarana udAvartAdiShu anuvAsanam (88-89) · Śloka 89

| উদাবর্তপরীতা যে যে চাত্যর্থং বিরূক্ষিতাঃ||৮৮|| বিলোমবাতাঃ শূলার্তাস্তেষ্বিষ্টমনুবাসনম্| |৮৯|

স০-যে পুরুষা উদাবর্তযুক্তা যে চাতিশযেন বিরুক্ষিতাস্তথা বিগুণপবনাঃ শূলপীডিতাশ্চ তেষ্বনুবাসনমিষ্টম্, তন্ত্রকৃতামিতি শেষঃ| তদেবানুবাসনমাহ-

Adhikarana anuvAsanayogaH (89-93) · Śloka 93

| পিপ্পলীং মদনং বিল্বং শতাহ্বাং মধুকং বচাম্||৮৯|| কুষ্ঠং শঠীং পুষ্করাখ্যং চিত্রকং দেবদারু চ| পিষ্ট্বাতৈলং বিপক্তব্যং দ্বিগুণক্ষীরসংযুতম্||৯০|| অর্শসাং মূঢবাতানাং তচ্ছ্রেষ্ঠমনুবাসনম্| গুদনিঃসরণং শূলং মূত্রকৃচ্ছ্রং প্রবাহিকাম্||৯১|| কট্যূরুপৃষ্ঠদৌর্বল্যমানাহং বঙ্ক্ষণাশ্রযম্| পিচ্ছাস্রাবং গুদে শোফং বাতবর্চোবিনিগ্রহম্||৯২|| উত্থানং বহুশো যচ্চ জযেত্তচ্চানুবাসনাত্| |৯৩|

স০-পিপ্পল্যাদীনি পিষ্ট্বা জলেন তৈলং দ্বিগুণক্ষীরেণ সংযুক্তং পক্তব্যম্| জলস্যাত্রানুক্তস্যাপি চতুর্গুণোঽশঃ প্রকল্প্যঃ| এবং হি দ্রব্যাণি সম্যক্ মুক্তরসানি স্যুঃ| তন্ত্রান্তরে চোক্তম্ "স্নেহে সক্ষীরমাংসাদ্যৈঃ পাকো যত্রেতিরঃ কচিত্| জলং চতুর্গুণং তত্র বীজাদানার্থমাবপেত্|| ন মুঞ্চতি রসং দ্রব্যং ক্ষীরাদিভিরুপস্কৃতম্| সম্যক্পাকোপ্ ন জাযেত তস্মাত্তোয বিনিক্ষিপেত্||" ইতি| তচ্চ-তৈলং, বিগুণপবনানামর্শসাং শ্রেষ্ঠং-হিতম্| অনুবা সনাচ্চ তত্-তৈলং, গুদনিঃসারণাদীন্ জযেত্|

Adhikarana athavA nirUhaH (93-94) · Śloka 94

| নিরুহং বা প্রযুঞ্জীত সক্ষীরং পাঞ্চমূলিকম্||৯৩|| সমূত্রস্নেহলবণং কল্কৈর্যুক্রং ফলাদিভিঃ| |৯৪|

স০-অথবা নিরুহং পাঞ্চমূলিকং সমানক্ষীরং মূত্রস্নেহলবণান্বিতং ফলাদিভিঃ-পূর্বোক্তৈঃ, কল্কৈর্যুক্তং প্রযুঞ্জীত| স চ পূর্বোক্তগুণঃ| সমানং ক্ষীরং যস্মিন্ তত্সক্ষীরম্| "সমানস্য ছন্দসি" ইতি যোগবিভাগাত্ সভাবঃ| সহ মূত্রস্নেহলবণৈর্বর্ততে সমূত্রস্নেহলবণস্তম্| "বোপসর্জনস্য" ইতি সভাবঃ| সহশব্দশ্চেষচ্ছব্দার্থঃ| অর্শসাং শুষ্কার্দ্রত্বেন দ্বৈবিধ্যম্| তত্র শুষ্কার্শসাং চিকিত্সিতমুক্ত্বা, অধুনা আর্দ্রাণাং রক্তার্শসামাহ-

Adhikarana raktArshasAM vAtakaPAnubandhe cikitsA (94-95) · Śloka 95

| অথ রক্তার্শসাং বীক্ষ্য মারুতস্য কফস্য বা||৯৪|| অনুবন্ধং ততঃ স্নিগ্ধং রূক্ষং বা যোজযেদ্ধিমম্| |৯৫|

স০-রক্তার্শসামধিকারে পিত্তস্য সর্বদাঽব্যভিচারিত্বাট্ কদাচিন্মারুতানুবন্ধং কদাচিত্কফানুবন্ধং স্বলিঙ্গতো বীক্ষ্য উপলভ্য, স্নিগ্ধং রূক্ষং বা পানান্নৌষধং যোজযেত্| এতচ্চোভযমপি শীতং-ন তূষ্ণম্, পিত্তস্যাত্র নিত্যং সন্নিহিতত্বাত্| বাতানুবন্ধং বীক্ষ্য স্নিগ্ধং, কফানুবন্ধং বীক্ষ্য রূক্ষং, চিকিত্সিতং যোজ্যম্| বাতানুবন্ধকফানুবন্ধযোর্লক্ষণমাহ-

Adhikarana vAtakaPAnubandhalakShaNam (95-97) · Śloka 97

| শকৃচ্ছযাবং খরং রূক্ষমধো নির্যাতি নানিলঃ||৯৫|| কট্যূরুগুদশূলং চ হেতুর্যদি চ রূক্ষণম্| তত্রানুবন্ধো বাতস্য শ্লেষ্মণো যদি বিট্ শ্লথা||৯৬|| শ্বেতা পীতা গুরুঃস্নিগ্ধা, সপিচ্ছঃ স্তিমিতো গুদঃ| হেতুঃ স্নিগ্ধগুরুর্বিদ্যাদ্যথাস্বং চাস্রলক্ষণাত্||৯৭||

স০-শকৃচ্ছ্যাবাদিশূলপর্যন্তং লক্ষণং যদা স্যাত্ তত্রানুবন্ধো বাতস্যেত্যববোধ্যম্| হেতুর্যদি রূক্ষণং-রূক্ষণং চেদ্ধেতুরাসেবিতঃ শকৃচ্ছ্যাবাদিলক্ষণং চোত্পন্নং তদা বাতানুবন্ধত্বং জ্ঞেযম্| তথৈব বিট্শ্লথাদিলক্ষণং স্নিগ্ধগুরুণা চ সেবিতেন হেতুনা সহিতং শ্লেষ্মণোঽনুবন্ধস্যানুমাপকম্| অস্রস্য লক্ষণাচ্চ-সিরাব্যধবিধ্যুক্তাত্ "বাতাছ্ছ্যাবারুণং" (হৃ.সূ.অ.৩৭/৪০) ইত্যাদিকাচ্চ লক্ষণাত্, বাতস্যানুবন্ধং বিদ্যাত্| "কফাত্ স্নিগ্ধং" (হৃ.সূ.অ. ৩৭/৪১) ইত্যাদিকাল্লক্ষণাত্ কফস্যানুবন্ধং বিদ্যাত্|

Adhikarana duShTe rakte shodhanAdi (98) · Śloka 98

দুষ্টেঽস্রে শোধনং কার্যং লঙ্ঘনং চ যথাবলম্| |৯৮|

স০-দুষ্টে-বাতাদিদূষিতে, অস্রে যথাবলং-বলানতিক্রমেণ, কদাচিল্লঙ্ঘনং শোধনং চ কার্যম্| বহুদোষস্য শোধনং, ইতরস্য লঙ্ঘনং-উপবাসলক্ষণং, কার্যম্|

Adhikarana raktasruterUpekShaNakAlaH (98) · Śloka 98

| যাবচ্চ দোষৈঃ কালুপ্যং স্রুতেস্তাবদুপেক্ষণম্||৯৮||

স০-যাবচ্চ দোষেণাস্রস্য কালুষ্যং-অনৈর্মল্যং সামদোষদুষ্টত্বাত্, তাবত্স্রুতেঃ প্রকৃতত্বাদস্রস্যোপেক্ষণং কার্যম্,-তথাভূতাযা রক্তস্রুতেঃ সঙ্ঘ্রহণায যত্নো ন কার্য ইত্যর্থঃ|

Adhikarana anantaraM tiktadravyopacAraH (99) · Śloka 99

দোষাণাং পাচনর্থং চ বহ্নিসন্ধুক্ষণায চ| সঙ্গ্রহায চ রক্তস্য পরং তিক্তৈরুপাচরেত্||৯৯||

স০-কালুষ্যরহিতাযা রক্তস্রুতেঃ পরং-অনন্তরং, দোষাণাং সামানাং পক্ত্যর্থ তথা বহ্নেঃ সন্ধুক্ষণায তথা রক্তস্য সঙ্ঘ্রহণার্থং তিক্তৈঃ-তিক্তরসাঘ্রাতৈদ্রব্যৈঃ, তমর্শসমুপাচরেত্, ইতি সামান্যোপক্রমো রক্তার্শোবিকারশান্ত্যর্থমুপদিষ্টঃ|

Adhikarana vAtolbaNe rakte snehaH (100) · Śloka 100

যত্তু প্রক্ষীণদোষস্য রক্তং বাতোল্বণস্য বা| স্নেহৈস্তত্সাধযেদ্যুক্তৈঃ পানাভ্যঞ্জনবস্তিষু||১০০||

স০-যত্পুনঃ প্রক্ষীণদোষস্য নিরামযস্য রক্তং স্রবেত্, বাতাধিকস্য বা পুরুষস্য যদ্রক্তং স্রবেত্, তত্স্নেহৈঃ পানাদিযুক্তৈঃ-দত্তৈঃ, চিকিত্সেত্|

Adhikarana pittolbaNe rakte kaShAyAH (101) · Śloka 101

যত্তু পিত্তোল্বণং রক্তং ঘর্মকালে প্রবর্ততে| স্তম্ভনীযং তদেকান্তান্ন চেদ্বাতকফানুগম্||১০১||

স০-যত্পুনঃ পিত্তোল্বণং রক্তং গ্রীষ্মতৌ প্রবর্ততে তদেকান্তেন-অবশ্যং, স্তম্ভনীযং-নোপেক্ষণীযম্, শীঘ্রকারিত্বাত্| কিং সর্বমেব ঘর্মতৌ রক্তং স্তম্ভনীযম্ ? নেত্যাহ-ন চেদ্বাতকফানুগম্,-বাতকফানুবদ্ধং তু লঙ্ঘনাদিভিরেব চিকিত্সেত|

Adhikarana kaPolbaNe cUrNakalkau (102-103) · Śloka 103

সকফেঽস্রে পিবেত্পাক্যং শুণ্ঠীকুটজবল্কম্| কিরাততিক্তকং শুণ্ঠীং ধন্বযাসং কুচন্দনম্||১০২|| দার্বীত্বঙ্ক্ষিম্বসেব্যানি ত্বচং বা দাডিমোদ্ভবাম্| |১০৩|

স০-কফানুগতে রক্তে শুণ্ঠীকুটজবল্কলং ক্বথিতং পিবেত্| কিরাততিক্তকাদিনা(কং) বা ক্বথিতং পিবেত্| অথবা, দাডিমজাং ত্বচং পিবেত্|

Adhikarana kaPolbaNe kuTajAvalehaH (103-104) · Śloka 104

| কুটজত্বক্ফলং তার্ক্ষ্যং মাক্ষিকং ঘুণবল্লভাম্||১০৩|| পিবেত্তণ্ডুলতোযেন কল্কিতং বা মযূরকম্| |১০৪|

স০-কুটজত্বচমিন্দ্রযবান্ রসাঞ্জনাদীংশ্চ তণ্ডুলজলেন পিবেত্| ঘুণপির্যাং(বল্লভাং)-অতিবিষাম্| অথবা, তেনৈব তণ্ডুলজলেন পিষ্টমপামার্গং পিবেত্|

Adhikarana kaPolbaNe dvitIyaH kuTajAvalehaH (104-108) · Śloka 108

| তুলাং দিব্যাম্ভসি পচেদার্দ্রাযাঃ কুটজত্বচঃ||১০৪|| নীরসাযাং ত্বচি ক্বাথে দদ্যাত্সূক্ষ্মরজীকৃতান্| সমঙ্গাফলিনীমোচরসান্ মুষ্ট্যংশকান্সমান্||১০৫|| তৈশ্চ শক্রযবান্ পূতে ততো দর্বীপ্রলেপনম্| পক্ত্বাঽবলেহং লীঢ্বা চ তং যথাগ্নিবলং পিবেত্||১০৬|| পেযাং মণ্ডং পযস্ছাগং গব্যং বা ছাগদুগ্ধভুক্| লেহোঽযং শমযত্যাশু রক্তাতীসারপাযুজান্||১০৭|| বলবদ্রক্তপিত্তং চ স্রবদূর্ধ্বমধোঽপি বা| |১০৮|

স০-কুটজত্বচ আর্দ্রাযাস্তুলাং দিব্যে-আন্তরিক্ষে জলে, পচেত্| দিবি ভবং দিব্যম্, দিগাদিত্বাদ্যত্| এতচ্চ দ্রব্যং সামান্যপরিভাষাপরিমাণকল্পনযৈব ক্বাথসামান্যপরিমাণেন চ ক্বথিতমেকত্বং প্রাপ্তমিতি তদপবাদার্থমাহ-নীরসাযামিত্যাদি| তাবত্পচেদ্যাবদেষা কুটজস্য ত্বক্ নীরসা স্যাত্| নীরসত্বং চ প্রাযেণাষ্টাংশশেষে ক্বাথে ভবতি| তস্যাং চ নীরসাযাং সত্যাং যত্পরিমাণঃ ক্বাথোঽবশিষ্যতে তস্মিন্ ক্বাথে শ্লক্ষ্ণচূর্ণীকৃতান্ সমঙ্ঘাদীন্ সুষ্ঠ্যংশকান্-পলপরিমাণান্, দদ্যাত্| তৈশ্চ সমঙ্গাদিভিঃ সর্বৈঃ সমানিন্দ্রযবান্ দদ্যাত্| ততঃ-অনন্তরং, পূতং,দর্বীপ্রলেপনং পক্ত্বা লীঢ্বা চ তং-অবলেহং, অনন্তরং যথাগ্নিবলংবলানুসারেণ, পেযাদিকং পিবেত্| কিম্ভূতঃ সন্ ? ছাগদুগ্ধভোজনঃ| অযং লেহো রক্তাতীসারং রকার্শাসি চ শমযতি| রক্তপিত্তং চ প্রবৃদ্ধমূর্ধ্বমধো বা স্রবত্ জযেত্|

Adhikarana kaPolbaNe rodhrAdiyogaH (108-113) · Śloka 113

| কুটজত্বক্ তুলাং দ্রোণে পচেদষ্টাংশশোষিতম্||১০৮|| কল্কীকৃত্য ক্ষিপেত্তত্র তাড়্ক্ষ্যশৈলং কটুত্রযম্| রোধ্রদ্বযং মোচরসং বলাং দাডিমজাং ত্বচম্||১০৯|| বিল্বকর্কটিকাং মুস্তং সমঙ্গাং ধাতকীফলম্| পলোন্মিতং দশপলং কুটজস্যৈব চ ত্বচঃ||১১০|| ত্রিংশত্পলানি গুডতো ঘৃতাত্পূতে চ বিংশতিঃ| তত্পক্বং লেহতাং যাতং ধান্যে পক্ষস্থিতং লিহন্||১১১|| সর্বার্শোগ্রহণীদোষশ্বাসকাসান্নিযচ্ছতি| |১১৩|

স০-বত্সকত্বক্ তুলাং জলদ্রোণে পচেদষ্টাংশশেষিতং যাবচ্চ| তত্র-আষ্টাংশশেষিতে ক্বাথে পূতে সতি, কল্কযিত্বা তাড়্ক্ষ্যশৈলাদীন্ পলপ্রমাণান্ ক্ষিপেত্| এবং ত্রিকটূনি| বিল্বকর্কটিকা লঘূনি বিল্বফালানী| কুটজত্বচশ্চ দশপলানি| গুডপলানি ত্রীম্শত্| ঘৃতস্য পলানি বিংশতিঃ| এতত্সর্বং লেহতাং যাতং পক্বং সত্ ধান্যরাশিমধ্যে মাসার্ধং স্থিতং তং লিহন্ সর্বানর্শঃপ্রমৃতীন্ জযেত্|

Adhikarana kaPolbaNe Ajadugdhena shAlyannam (112-113) · Śloka 113

| রোধ্রং তিলান্মোচরসং সমঙ্গাং চন্দনোত্পলম্||১১২|| পাযযিত্বাঽঽজদুগ্ধেন শালীংস্তেনৈব ভোজযেত্| |১১৩|

স০-রোধ্রাদিনজাদুগ্ধেন পাযযিত্বাঽঽতুরং শালীস্তেনাজক্ষীরেণ ভোজযেত্| এতচ্চোপযুক্তং পূর্বগুণম্|

Adhikarana kaPolbaNe yaShTacAhvAdicUrNam (113-115) · Śloka 115

| যষ্ট্যাহ্বপদ্মকানন্তাপযস্যাক্ষীরমোরটম্||১১৩|| সসিতামধু পাতব্যং শীততোযেন তেন বা| |১১৫|

স০-যষ্ট্যাহ্নাদি সশর্করামাক্ষিকং শীতজলেন তেনাজপযসা বা পাতব্যম্| ক্ষীরমোরটা-মধুরস্রবা|

Adhikarana kaPolbaNe rodhrAdi cUrNam (114-115) · Śloka 115

| রোধ্রকট্বঙ্গকুটজসমঙ্গাশাল্মলীত্বচম্||১১৪|| হিমকেসরযষ্ট্যাহ্বসেব্যং বা তণ্ডুলাম্বুনা| |১১৫|

স০-লোধ্রাদিকং তণ্ডুলাম্বুনা রক্তার্শঃসু পাতব্যম্| অথবা, চন্দননাগকেসরমধুকোশীরং তণ্ডুলাম্বসা পাত্বযং পূর্বোক্তনুগুণম্|

Adhikarana kapholbaNe atipravRutte shUle shoNite ca yavAnyAdicUrNam,kapholbaNe dugvikAdidhRutam kapholbaNe ghAtakyAdidhRutam kapholbaNe yavakShArAdidhRutam (115-117) · Śloka 117

| যবানীন্দ্রযবাঃ পাঠা বিল্বং শুণ্ঠী রসাঞ্জনম্||১১৫|| চূর্ণশ্চলে হিতঃ শূলে প্রবৃত্তে চাতি শোণিতে| দুগ্ধিকাকণ্টকারীভ্যাং সিদ্ধং সর্পিঃ প্রশস্যতে||১১৬|| অথবা ধাতকীরোধ্রকুটজত্বক্ফলোত্পলৈঃ| সকেসরৈর্যবক্ষারদাডিমস্বরসেন বা||১১৭||

স০-যবান্যাদীনাং চূর্ণো জলেন পীতো বাতে শূলে প্রবৃত্তে চাতিশযেন রক্তে হিতঃ| দুগ্ধিকাকণ্টকারীভ্যাং পক্বং সর্পিরস্মিন্বিষযে প্রশস্যতে| অথবা, ধাতক্যাদিভিঃ সিদ্ধং ঘৃতং হিতম্| যবক্ষারদাডিমস্বরসেন বা সিদ্ধং ঘৃতং হিতম্|

Adhikarana kaPolbaNe sharkarAdinavanItam (118) · Śloka 118

শর্করাম্ভোজকিঞ্জিল্কসহিতং সহ বা তিলৈঃ| অভ্যস্তং রক্তগুদজান্ নবনীতং নিযছ্ছতি||১১৮||

স০-শর্করাপদ্মকেসরসহিতমভ্যস্তং-বহূন্যহানি ভুক্তং, নবনীতং রক্তার্শাসি শমযতি| তিলৈর্বা সহাভ্বস্তং নবনীতং রক্তার্শাসি শমযতি|

Adhikarana kaPolbaNe shoNite shreShThmauShadham CAganavanItAdi (119-120) · Śloka 120

ছাগানি নবনীতাজ্যক্ষীরমাংসানি, জাঙ্গলঃ| অনম্লো বা কদম্লো বা সবাস্তুকরসো রসঃ||১১৯|| রক্তশালিঃ সরো দঘ্নঃ ষষ্টিকস্তরুণী সুরা| তরুণশ্চ সুরামণ্ডঃ শোণিতস্যৌষধং পরম্||১২০||

স০-ছাগসম্বন্ধীনি নবনীতাদীন তথা জাঙ্গলরসাদীনি রক্তস্য পরমৌষধম্| জাঙলো বা রসঃ স-বাস্তুকরসেন বর্তত ইতি সবাস্তুকরসঃ, অনম্লঃ-অম্লরহিতঃ, কদম্লঃ-ঈষদম্লো বা, আম্যস্তো রক্তগুদজান্নিযছ্ছতি| রক্তশালিঃ-তজ্জো ভক্ত ইত্যর্থঃ| দঘ্নঃ সরো-দপ্যুত্তরঃ| ষষ্টিকো ব্রীহিঃ| তরুণী সঞ্জাতমধুরপ্রাযা সুরা, [তরুণো সুরা]মণ্ডশ্চ| এতদ্রক্তজ্ঞাল্যাদি শোণিতস্য পরমৌষধম্|

Adhikarana kapholbaNe palANDuH (121) · Śloka 121

পেযাযূষরসাদ্যেষু পলাণ্ডুঃ কেবলোঽপি বা| স জযত্যুল্বণং রক্তং মারুতং চ প্রযোজিতঃ||১২১||

স০-পেযাদিষু প্রযোজিতঃ পলাণ্ডুঃ, কেবলো বা রক্তমত্যুল্বণং বাতং চ জযতি|

Adhikarana vAtajaye yatnaH (122) · Śloka 122

বাতোল্বণানি প্রাযেণ ভবন্ত্যস্নেঽতিনিঃসৃতে| অর্শাসি তস্মাদধিকং তজ্জযে যত্নমাচরেত্||১২২||

স০-প্রাযেণরক্তেঽতিস্রুতে বাতাধিকানি দুর্নামানি মতো ভবন্তি, তস্মাদ্ধেতোস্তজ্জযে-পবনযে, যত্নং কুর্যাত্|

Adhikarana prabale raktapitte shItopacAraH (123) · Śloka 123

দৃষ্ট্বাঽস্রপিত্তং প্রবলমবলৌ চ কফানিলৌ| শীতোপচারঃ কর্তব্যঃ সর্বথা তত্প্রশান্তযে||১২৩||

স০-রক্তপিত্তং প্রবৃদ্ধং দৃষ্ট্বা কফনিলৌ চাবলাবুপলভ্য তত্প্রশান্তযর্থং শীতোপচারঃ কর্তব্যঃ|

Adhikarana evamashame rasairghRutaishca tarpaNaM tailAdinAsecanaM ca (124-125) · Śloka 125

ন চেদেবং শমস্তস্য স্নিগ্ধোষ্ণৈস্তর্পযেত্ততঃ| রসৈঃ, কোষ্ণৈশ্চ সর্পির্ভিরবাপীডকযোজিতৈঃ||১২৪|| সেচযেত্তং কবোষ্ণৈশ্চ কামং তৈলপযোঘৃতৈঃ| |১২৫|

স০-যদ্যেবং শমো ন স্যাত্তদা রসৈস্তর্পযেত্| "রস ইত্যবিশেষোক্তৌ যোজ্যো মাংসভবো রসঃ|" কিম্ভূতৈঃ ? স্নিগ্ধোষ্ণৈঃ| তথা, কোষ্ণৈর্ঘৃতৈশ্চ পুনস্তর্পযেত্| কিম্ভূতৈঃ ? অবপীডকেনরোগানুত্পাদনীযোক্তেন (হৃ. সূ. অ. ৪/৬), প্রযোজিতৈঃ| তং চ কবোষ্ণৈর্যথাযোগং তৈলপযোঘৃতৈঃ সেচযেত্|

Adhikarana siddhaH picCAbastiH (125-129) · Śloka 129

| যবাসকুশকাশানাং মূলং পুষ্পং চ শাল্মলেঃ||১২৫|| ন্যগ্রোধোদুম্বরাশ্বত্থশুঙ্গাশ্চ দ্বিপলোন্মিতাঃ| ত্রিপ্রস্থে সলিলস্যৈতত্ক্ষীরপ্রস্থে চ সাধযেত্||১২৬|| ক্ষীরশেষে কষাযে চ তস্মিন্ পূতে বিমিশ্রযেত্| কল্কীকৃতং মোচরসং সমঙ্গা চন্দনোত্পলম্||১২৭|| প্রিযঙ্গুং কৌটজং বীজং কমলস্য চ কেসরম্| পিচ্ছাবস্তিরযং সিদ্ধঃ সঘৃতক্ষৌদ্রশর্করঃ||১২৮|| প্রবাহিকাগুদভ্রং শরক্তস্রাবজ্বরাপহঃ| |১২৯|

স০-যবাসাদীনাং মূলং শাল্মলেঃ পুষ্পং তথা ন্যগ্রোধাদীনাং চ শুঙ্গা এতদ্ দ্রব্যকদম্বকং প্রত্যেকং দ্বিপলপ্রমাণং জলপ্রস্থত্রযে ক্ষীরপ্রস্থে চ পাচযেত্| ক্ষীরশেষে চ কষাযে তস্মিন্ পূতে সতি কল্কীকৃতং মোচরসাদি মিশ্রযেত্| মোচরসাদযোঽত্র সত্রিভাগমাত্রশাণকর্ষমাত্রা গ্রাহ্যা. (?), বস্তিকল্পে কোশাতকাদৌ নিরুহে (হৃ. ক. অ. ৪/১৭) বিংশতিপলপ্রমাণে কার্ষিকাণামেব দ্রব্যাণামভ্যনুজ্ঞানাত্| অযং পিচ্ছাবস্তিঃ সিদ্ধো ঘৃতমাক্ষিকশর্করান্বিতঃ প্রবাহিকাদিহরঃ| অল্পযা মাত্রযা নিরুহো বস্তিরেব পিচ্ছাবস্তিরুচ্যতে|

Adhikarana anuvAsane snehaH (129-130) · Śloka 130

| যষ্ট্যাহ্বপুণ্ডরীকেণ তথা মোচরসাদিভিঃ||১২৯|| ক্ষীরদ্বিগুণিতঃ পক্বো দেযঃ স্নেহোঽনুবাসনম্| |১৩০|

স০-মধুযষ্টিকযা প্রপৌণ্ডরীকেণ তথা মোচরসাদিভিঃ-পূর্বোক্তৈঃ (শ্লো.১২৭) কল্কীকৃতৈঃ, ক্ষীরদ্বিগুণিতঃ পক্বঃ সন্ স্নেহোঽনুবাসনং দেযঃ|

Adhikarana cA~ggerIghRutam (130-133) · Śloka 133

| মধুকোত্পলরোধ্নাম্বু সমঙ্গা বিল্বচন্দনম্||১৩০|| চবিকাঽতিবিষা মুস্তং পাঠা ক্ষারো যবাগ্রজঃ| দার্বীত্বঙ্ক্ষাগরং মাংসী চিত্রকো দেবদারু চ||১৩১|| চাঙ্গেরীস্বরসে সর্পিঃ সাধিতং তৈস্ত্রিদোষজিত্| অর্শোতিসারগ্রহণীপাণ্ডুরোগজ্বরারুচৌ||১৩২|| মূত্রকৃচ্ছ্রে গুদভ্রংশে বস্ত্যানাহে প্রবাহণে| পিচ্ছাস্রাবেঽর্শসাং শূলে দেযং তত্পরমৌষধম্||১৩৩||

স০-মধুকাদিদ্রব্যৈঃ স্নেহচতুর্থভাগপ্রমাণৈশ্চাঙ্গেরীস্বরসে ঘৃতাচ্চতুর্গুণে ঘৃতং সাধিতং ত্রিদোষজিত্| অর্শঃপ্রভৃতিষ্বেতদ্ ঘৃতং দেযম্| যতঃ পরমৌষধম্|

Adhikarana madhurAmlAdInAM vyatAsena prayojanam (134) · Śloka 134

ব্যাত্যাসান্মধুরাম্লানি শীতোষ্ণানি চ যোজযেত্| নিত্যমগ্নিবলাপেক্ষী জযত্যর্শঃকৃতান্ গদান্||১৩৪||

স০-ব্যত্যাসেন-বিপর্যযেণ, মধুরাণ্যম্লানি চ শীতান্যুষ্ণানি চ নিত্যমগ্নিবলাপেক্ষী যোজযেত্| এবং চার্শঃকৃতামতিশযিনীং রুজং জযতি|

Adhikarana udAvarte svedaH udAvarte vartiH (135-137) · Śloka 137

উদাবর্তার্তমভ্যজ্য তৈলৈঃ শীতজ্বরাপহৈঃ| সুস্নিগ্ধৈঃ স্বেদযেত্পিণ্ডৈর্বর্তিমস্মৈ গুদে ততঃ||১৩৫|| অভ্যক্তাং তত্করাঙ্গুষ্ঠসন্নিভামনুলোমনীম্| দদ্যাচ্ছ্যামাত্রিবৃদ্দন্তীপিপ্পলীনীফলৈঃ||১৩৬|| বিচূর্ণিতৈর্দ্বিলবণৈর্গুডগোমূত্রসংযুতৈঃ| তদ্বন্মাগধিকারাঠগৃহধূমৈঃ সসর্ষপৈঃ||১৩৭||

স০-উদাবর্তেনার্তং নরং তৈলৈঃ শীতজ্বরাপহৈঃ-তগরাগুরুকুঙ্কুমাদিদ্রব্যসাধিতৈঃ, অভ্যজ্য সুস্নিগ্ধৈঃ পিণ্ডৈঃ স্বেদযেত্| ততঃ-স্বেদাদনন্তরম্, অস্মৈ-উদাবর্তবতে, গুদেঽভ্যক্তেঽভ্যক্তাং বর্তি দদ্যাত্| তত্করাঙ্গুষ্ঠসন্নিভাং-আতুরহস্তাঙ্গুষ্ঠসদৃশীম্| তথা, অনুলিমকরীং দদ্যাত্-ক্ষিপেত্| কৈঃ কৃতাং বর্তিম্ ? ইত্যাহ শ্যামেত্যাদি| শ্যামাদিভিঃ সৈন্ধবাক্ষলবণযুক্তৈঃ সূক্ষ্মরজীকৃতৈর্গুডগোমূত্রসংযুক্তৈঃ কৃতাং বর্তি ক্ষিপেত্| তথৈব মাগধিকামদনফলগৃহধূমসর্ষপৈর্গুডগোমূত্রান্বিতৈর্বর্তি ক্ষিপেত্|

Adhikarana udAvarte cUrNam (138) · Śloka 138

এতেষামেব বা চূর্ণং গুদে নাড্যা বিনির্ধমেত্| |১৩৮|

স০-অথবা, এতেষামেব-পূর্বোক্তানাং, চূর্ণং নাদ্যা গুদে বিনির্ধমেত্|

Adhikarana udAvarte snehabastiH (138-140) · Śloka 140

| তদ্বিঘাতে সুতীক্ষ্ণং তু বস্তিং স্নিগ্ধং প্রপীডযেত্||১৩৮|| ঋজূ কুর্যা-দশিরাবিণ্মূত্রমরুতোঽস্য সঃ| ভূযাঽনুবন্ধে বাতঘ্নের্বিরেচ্যঃ স্নেহরেচনৈঃ||১৩৯|| অনুবাস্যশ্চ রৌক্ষ্যাদ্ধি সঙ্গো মারুতবর্চসোঃ| |১৪০|

স০-তদ্বিবাতে-কার্যং কর্তুমশক্তে তস্মিংশ্রূর্ণে, বস্তি স্নিগ্ধং স্নেহবস্তিং, সুতীক্ষ্ণং দদ্যাত্| সঃ-বস্তিঃ, অস্য-আতুরস্য, গুদশিরাবিণ্মূত্রবাতাননুলোমযেত্| পুনরনুবন্ধে সতি স্নেহরেচনৈর্বিরেচনীযশ্চানুবাসনীযশ্চ| হি-যস্মাত্, রৌক্ষ্যাদ্ধেতোর্মরুতস্য পুরীষস্য চ সঙ্গো ভবতি|

Adhikarana udAvarte kalyANakakShAraH (140-143) · Śloka 143

| ত্রিপটুচিকটুশ্রেষ্ঠাদন্ত্যরুষ্করচিত্রকম্||১৪০|| জর্জরং স্নেহমূত্রাক্তমন্তর্ধূমং বিপাচযেত্| শরাবসন্ধৌ মৃল্লিপ্তে ক্ষারঃ কল্যাণকাহ্বযঃ||১৪১|| স পীতঃ সর্পিষা যুক্তো ভক্তে বা স্নিগ্ধভোজিনা| উদাবর্তবিবন্ধার্শোগুল্মপাণ্ডূদরকৃমীন্||১৪২|| মূত্রসঙ্গাশ্মরীশোফহৃদ্রোগগ্রহণীগদান্| মেহপ্লীহরুজানাহশ্বাসকাসাংশ্চ নাশযেত্||১৪৩||

স০-ত্রিপট্বাদি জর্জরীকৃতং-সূক্ষ্মীকৃতং, স্নেহমূত্রাভ্যামক্ত মন্তর্ধূমং কৃত্বা বিপাচযেচ্ছরাবসম্পুটে| অত এবাহ-শরাবসন্ধৌ মৃল্লিপ্ত ইতি| অযং চ কল্যাণকো নাম ক্ষারঃ সর্পিষা পীতঃ স্নেহভোজিনা বা ভক্তে যুক্তঃ সন্নুদাবর্তাদীন্ নাশযেত্|

Adhikarana udAvarte gADhavarcArshasAM proktaM cikitsitamapi (144) · Śloka 144

সর্বং চ কুর্যাদ্যত্প্রোক্তমর্শসাং গাঢবর্চসাম্| |১৪৪|

স০-যচ্চ গাঢবর্চসামর্শসাং প্রোক্তং তচ্চ সর্বং কুর্যাত্|

Adhikarana pUtikara~jjashuktam (144) · Śloka 144

দ্রোণেঽপাং পূতিবল্কদ্বিতুলমথ পচে- ত্পাদশেষে চ তস্মিন্ দেযাঽশীতিরুগুডস্য প্রতনুকরজসো ব্যোষতোঽষ্টৌ পলানি| এতন্মাসেন জাতং জনযতি পরমা- মূষ্মণঃ পক্তিশক্তিং শুক্তং কৃত্বাঽঽনুলোম্যং প্রজযতি গুদজ- প্লীহগুল্মোদরাণি||১৪৪||

স০-দ্বযোস্তুলযোঃ সমাহরো দ্বিতুলম্| পূতিকরঞ্জস্য ত্বচস্তুলাদ্বযং-পলশতদ্বযং, জলদ্রোণে পচেত্| তস্মিংশ্চ পাদশেষে সতি গুডস্যাশীতিঃ পলানি ক্ষেপ্তব্যানি| ত্রিকটুকস্য সূক্ষ্মচূর্ণস্যাষ্টৌ পলানি দেযানি| এতত্সর্বং মাসেন শুক্তং জাতং প্রবলমগ্নি কুরুতে| আনুলোম্যং কৃত্বা গুদজাদিণ্ জযতি| স্রগ্ধরাবৃত্তম্|

Adhikarana pUtikara~jjacukram (145-148) · Śloka 148

পচেত্তুলাং পূতিকরঞ্জবল্কাদ্ দ্বে মূলতশ্চিত্রককণ্টকার্যোঃ| দ্রোণত্রযঽপাং চরণাবশেষে পূতে শতং তত্র গুডস্য দদ্যাত্||১৪৫|| পলিকং চ সূচির্ণিতং ত্রিজাত ত্রিকটুগ্রন্থিকদাডিমাশ্মভেদম্| পুরপুষ্করমূলধান্যচব্যং হপুষামাড়্দ্রকমম্লবেতসং চ||১৪৬|| শীতীভুতং ক্ষৌদ্রবিংশত্যুপেত- মার্দ্রদ্রাক্ষাবীজপূরাদ্রকৈশ্চ| যুক্তং কামং গণ্ডিকাভিস্তথেক্ষোঃ সর্পিঃপাত্রে মাসমাত্রেণ জাতম্||১৪৭|| চুক্রং ক্রকচমিবেদং দুর্দাম্নাং বহ্নিদীপনং পরমম্| পাণ্ডুগরোদরগুল্মপ্লীহানাহাশ্মকৃচ্ছ্রঘ্নম্||১৪৮||

স০-পূতিকরঞ্জত্বচস্তুলামেকাং দ্বে চ তুলে চিত্রককণ্টকারীমূলযোর্জলদ্রোণত্রযে পচেত্| পাদশেষে চ তস্মিন্ পূতে গুডস্য পলশতং দদ্যাত্| উপজাতিবৃত্তম্| ত্রিজাতকাদি সূক্ষ্মরজীকৃতং প্রত্যেকং পলপ্রমাণং নিঃক্ষিপেত্| এতত্সর্বং চূর্ণিতং শ্লক্ষ্ণপিষ্টং দদ্যাত্| ঔপচ্ছন্দসিকং বৃত্তম্| এতচ্চ শীতীভুতং সত্ ক্ষৌদ্রবিংশত্যোপেতমার্দ্রদ্রাক্ষাদিভিশ্চোপেতমিক্ষুগণ্ডিকাভিশ্শ্চ যথেচ্ছং যুক্তং সর্পিঃপাত্রে মাসমাত্রেণ জাতং চুক্রমিতি বক্ষ্যমাণেন সম্বন্ধঃ| শুক্তমিদমর্শসাং ক্রকচমিব-করপত্রতুল্যং, কর্তনশক্তিসামার্থ্যাত্| তথা পরং বহ্নিদীপনং পাণ্ঢ্বাদিঘ্নং চ| শালিনীবৃত্তম্, আর্যা চ|

Adhikarana pIluPalashuktam (150) · Śloka 150

দ্রোণং পীলুরসস্য বস্ত্রগলিতং ন্যস্তং হবির্ভাজনে যুঞ্জীত দ্বিপলৈর্মদামধুফলাখর্জূরধাত্রীফলৈঃ| পাঠামাদ্রিদুরালভাম্লবিদুলব্যোষত্বগেলোল্লকৈঃ স্পৃক্কাকোললবঙ্গবেল্লচপলামূলাগ্নিকৈঃ পালিকৈঃ| গুডপলশতরোজিতং নিবাতে নিহিতমিদং প্রপিবংশ্চ পক্ষমাত্রাত্| নিশমযতি গুদাঙ্কুরান্ সুগুল্মা- ননলবলং প্রবলং করোতি চাশু||১৫০||

স০-পীলুফলানাং রসস্য দ্রোণং বস্ত্রপূতং সর্পির্ভাণ্ডে ন্যস্তং মদাদিভির্দ্বিপলপ্রমাণৈঃ পাঠাদিভিশ্চ পালিকৈর্যুঞ্জীত| মদাধাতকী| মধুফলা-দ্রাক্ষা| মাদ্রী-রেণুকা| বিদুলো-বেতসঃ| শার্দূলবিক্রীডিতম্| তথা গুডপলশতেন যোজিতং নিবাতে ধৃতং পক্ষমাত্রাদনন্তরং প্রপিবন্নর ইদমর্শাসি গুল্মং চ শমযতি| দ্রাগগ্নিবলং চ প্রকৃষ্টং বিধত্তে| পুষ্পিতাগ্রা|

Adhikarana dashamUlAdiguDaH (151-152) · Śloka 152

কৈকশো দশপলে দশমূলকুম্ভ পাঠাদ্বযার্কৌণবল্লভকট্ফলঘ্নাম্| দগ্ধে স্রুতেঽনু কলশেন জলেন পক্বে পাদাস্থতে গুডতুলাং, পলপঞ্চকং চ||১৫১|| বহ্নর্মুষ্টী দ্বে যবক্ষারতশ্চ| দর্বীমালিম্পন্ হন্তি লীঢো গুডোঽযং গুল্মপ্লীহার্শঃকুষ্ঠমেহাগ্নিসাদান্||১৫২||

স০-দশমূলাদীনাং প্রত্যেকং দশপলে দগ্ধে জলদ্রোণেন স্রুতে জলে পক্বে পাদশেষে চাস্মিন্ গুডতুলাং ব্যোষাদীনাং চ প্রত্যেকং পলপঞ্চকং দদ্যাত্| চিত্রকস্য পলদ্বযং যবক্ষারস্য চ পলদ্বযং দদ্যাত্| দর্বীমালিম্পন্ দর্বীলেপী সন্নযং গুডো লীঢো-ভক্ষিতো, গুল্মাদীন্ পরাকরোতি| বসন্ততিলকং বৈশ্বদেবীযং বৃত্তং চ|

Adhikarana citrakAvalehaH (153-154) · Śloka 154

তোযদ্রোণে চিত্রকমূলতুলার্ধং সাধ্যং যাবত্পাদদলস্থমথেদম্| অষ্টৌ দত্বা জীর্ণগুডস্য পলানি ক্বাথ্যং ভুযঃ সান্দ্রতযা সমমেতত্||১৫৩|| ত্রিকটুকমিসিপথ্যাকুষ্টমুস্তাবরাঙ্গ কৃমিরিপুদহনৈলাচূর্ণকীর্ণোঽবলেহঃ| জযতি গুদজকুষ্ঠপ্লীহগুল্মোদরাণি প্রবলযতি হুতাশং শশ্বদভ্যস্যমানঃ||১৫৪||

স০-তোযস্য দ্রোণে চিত্রকমূলস্য তুলার্ধং সাধ্যং যাবদষ্টাংশশেষমিদং স্যাত্| ততঃ পুরাণগুদপলান্যষ্তৌ দত্ত্বা পুনরপি ক্বাথ্যং যাবত্সান্দ্রত্বং গতম্| "ম্তৌ জ্যো ভদ্রা বেদবসূ চ বিরামঃ|" ত্রিকটুকাদিচূর্ণযুক্তোঽযং লেহো নিত্যমভ্যস্যমানো দারুণ(দুর্নাম) কুষ্ঠাদীনি জযতি| অগ্নিং চ প্রকৃষ্টং কুরুতে| মালিনীবৃত্তম্|

Adhikarana guDAdiguTikA (155) · Śloka 155

গুডব্যোষবরাবেল্লতিলারুষ্করচিত্রকৈঃ| অর্শাংসি হন্তি গুলিকা ত্বগ্বিকারং চ শীলিতা||১৫৫||

স০-গুডাদিভির্গুলিকা কৃতাঽভ্যস্তা দুর্নামানি হন্তি ত্বগ্বিকারং চ|

Adhikarana sUraNapuTapAkaH (156) · Śloka 156

মৃল্লিপ্তং সৌরণং কন্দং পক্ত্বাঽগ্নৌ পুটপাকবত্| অদ্যাট্সতৈললবণং দ্রুনামবিনিবৃত্তযে||১৫৬||

স০-সৌরণং কন্দং মৃদা লিপ্তমগ্নৌ পুটপাকবত্ পক্বং তৈললবণান্বিতমশ্নীযাদ্ দুর্নামোপশমায|

Adhikarana anyA sUraNaguTikA (157-158) · Śloka 158

মরিচপিপ্পলিনাগরচিত্রকান্ ক্রমবিবর্ধিতভাগসমাহৃতান্| শিখিচতুর্গুণসূতণযোজিতান্ কুরু গুডেন গুডান্ গুদজচ্ছিদঃ||১৫৭|| চূর্ণিকৃতাঃ ষোডশ সূরণস্য ভাগাস্ততোঽর্ধেন চ চিত্রকস্য| মহৌষধাদ্দ্বৌ মরিচস্য চৈকো গুডেন দুর্নামজযায পিণ্ডী||১৫৮||

স০-মরিচাদীন্ ক্রমবর্ধিতভাগান্ চিত্রকচতুর্গুণসূরণযোজিতান্ গুডান্ গুডেন কুরু গুদাঙ্কুরচ্ছিদঃ| দ্রুতবিলম্বিতম্| স০-সূক্ষ্মরজীকৃতাঃ সূরণভাগাঃ ষোডশ, চিত্রকভাগা অষ্টৌ, নাগরস্য দ্বৌ, মরিচস্য চৈকো, গুডেনৈষাং পিণ্ডী *কৃতা দুর্নামজযায স্যাত্| উপজাতিবৃত্তম্|

Adhikarana vaDavAmukhaScUrNaH (159) · Śloka 159

পথ্যানাগরকৃষ্ণাকরঞ্জবেল্লাগ্নিভিঃ সিতাতুল্যৈঃ| বডবামুখ ইব জরযতি বহুগুর্বপি ভোজনং চূর্ণঃ||১৫৯||

স০-পথ্যাদিভিঃ সিতাতুল্যৈশ্চূর্ণৌ বহু গুরু চ ভোজনং বডবামুখ ইব জরযতি| "আর্যাযাঃ পূর্বার্ধে যথোক্তমাত্রাদতোমযা লক্ষ্ম| গীতিং [ তত্র ] বিধিবিদো বদন্তি সংবীক্ষ্য তদিতরত্রাপি||"

Adhikarana kali~ggAdivaTikA (160) · Śloka 160

কলিঙ্গলাঙ্গলীকৃষ্ণাবহ্ন্যপামার্গতণ্ডুলৈঃ| ভূনিম্বসৈন্ধবগুডৈর্গুডা গুদজনাশনাঃ||১৬০||

স০-কলিঙ্গকাদিভির্গুডাঃ-বটিকাঃ, অর্শোঘ্নাঃ|

Adhikarana saindhavAdicUrNam (161) · Śloka 161

লবণোত্তমবহ্নিকলিঙ্গযবাং- শ্চিরিবিল্বমহাপিচুমন্দযুতান্| পিবি সপ্তদিনং মথিতালুডিতান্ যদি মর্দিতুমিচ্ছাস পাযুরুহাম্||১৬১||

স০-সৈন্ধবাদীনি তক্রালোডিতানি পিব যদ্যর্শাসি জিঘাংসসি| "অথ তোটকমব্ধিসকারচিতম্|"

Adhikarana shuShkArshaH su shreShThamauShadham ArdrArshaHsu shreShmauShadham sarvArshaHsu shreShmauShadham (162) · Śloka 162

শুষ্কেষু ভল্লাতকমগ্ন্যমুক্তং ভৈষজ্যমার্দ্রেষু তু বত্সকত্বক্| সর্বেষু সর্বর্তুষু কালশেয- মর্শঃসু বল্যং চ মলাপহং চ||১৬২||

স০-শুষ্কেষ্বর্শঃসু ভল্লাতকং ভৈষজ্যং অগ্ন্যং-প্রধানমুদিতম্| আড়্দ্রেষু পুনরর্শঃসু কুটজত্বগ্ভৈষজ্যমগ্ন্যং কথিতম্| সর্বেষ্বর্শঃসু-শুষ্কষ্বার্দ্রেষু চ, সর্বর্তুষু-সর্বকালং, কালশেযং-মথৈতং, অগ্ন্যং বল্যং-বলাবহং, মলাপহং-দোষাপহং চ| ইন্দ্রবজ্রাবৃত্তম্|

Adhikarana arshaHsu sevyAsevyam (163) · Śloka 163

ভিত্ত্বা বিবন্ধাননুলোমনায যন্মারুতস্যাগ্নিবলায যচ্চ| তদন্নপানৌশধমর্শসেন সেব্যং, বিবর্জ্যং বিপরীতমস্মাত্||১৬৩||

স০-বিবন্ধান্-স্ত্যানকফদিরুপান্, ভিত্ত্বা যত্-অন্নপানৌষধমাসেবিতং, মারুতস্যানুলোমনায-স্ববর্ত্মপ্রবর্তনায, তথা যচ্চাগ্নিবলায-অগ্নিবর্ধনায সম্পদ্যতে, তদেবান্নপানৌষধং দুর্নামবতা সেব্যম্| অস্মাত্-যথোক্তাত্, বিপরীতং-যদন্নপানৌষধং মারুতস্য বিবন্ধকরমগ্নিসাদনং চ তত্, তেন বিবর্জ্য-ন সে-ব্যম্| উপজাতিবৃত্তম্|

Adhikarana arshAdau visheSheNAgnirakShaNam (8) · Śloka 8

অর্শোতিসারগ্রহণীবিকারাঃ প্রাযেণ চান্যোন্যনিদানভূতাঃ| সন্নেঽনলে সন্তি, ন সন্তি দীপ্তে, রক্ষেদতস্তেষু বিশেষতোঽগ্নিম্||১৬৪|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা যামষ্টাঙ্গহৃদযসংহিতাযাং চতুর্থে চিকিত্সিত- স্থানেঽর্শশ্চিকিত্সিতং নামা ষ্টমোঽধ্যাযঃ||৮||

স০-অর্শোতিসারগ্রহণ্যোন্যনিদানভূতাঃ-পরস্পরং হেতুভূতাঃ, প্রাযেণ-বাহুল্যেন, অনলে চ সন্ন এতে রোগা ভবন্তি| দীপ্তে ত্বগ্নৌ ন সন্তি, যতস্ততঃ-অস্মাত্কারণাত্, তেষু বিশেষেষাগ্নি রক্ষেদিতি| ইন্দ্রবজ্রাবৃত্তম্| ইতি শ্রীমৃগাঙ্কদত্তপুত্র শ্রীমদরুণদত্তবিরচিতাযামষ্টাঙ্গহৃদযটী- কাযাং সর্বাঙ্গসুন্দরাখ্যাযাং চতুর্থে চিকিত্সিতস্থানেঽর্শ- শ্চিকিত্সিতং নামাষ্টমোঽধ্যাযঃ সমাপ্তঃ|| ৮||