6. cardihr̥drōgatr̥ṣṇācikitsitādhyāyaḥ

Adhikarana adhyAyopakramaH · Śloka

রাজযক্ষ্মচিকিত্সিতাদনন্তরং ছর্দ্যাদিচিকিত্সিতমারভ্যতে| যতো যক্ষ্মণ এব প্রাযেণৈত উপদ্রবভূতা জাযন্তে| অত এতদারম্ভো যুক্ত ইত্যাহ-

Adhikarana CardihradrogatRuShNAcikitsitAdhyAyaH CardiShu prAk la~gghanam,tato vamanam (2) · Śloka 2

অথাত-ছর্দিহৃদ্রোগতৃষ্ণাচিকিত্সিতং ব্যাখ্যাস্যামঃ ইতি হ স্মাহুরত্রেযাদযো মহর্ষযঃ| (গদ্যসূত্রে|২| ) আমাশযোত্ক্লেশভবাঃ প্রাযশ্চ্ছর্দ্যো হিতং ততঃ| লঙ্ঘনং প্রাগৃতে বাযোর্বমনং তত্র যোজযেত্||১|| বলিনো বহুদোষস্য বমতঃ প্রততং বহু| |২|

স০-উত্ক্লেশনং-উত্ক্লেশো,-দোষাণামুচ্ছূনাবস্থৈব| আমাশযোত্ক্লেশাত্ সম্ভবো-জন্ম, যাসাং তা আমাশযোত্ক্লেশভবাঃ প্রাযশ্চ্ছর্দ্যো যতস্তস্মাত্ প্রাক্-প্রথমং, লঙ্ঘনং হিতম্| প্রাযোগ্রহণং বাতজাযাং ছর্দ্যামামাশযোত্ক্লেশাসম্ভবার্থং বাযোরৃতে তদ্যোজযেত্| কার্যে কারণোপচারাদেবং নির্দিষ্টম্| বাতজাং হি ছর্দি মুক্ত্বাঽন্যাসু ছর্দিষু লঙ্ঘনং কার্যম্| লঙ্ঘনে কৃতেঽপ্যনু পশান্তবেগাসু তত্র-তাসু ছর্দিষু, বমনং কার্যম্| বলিনঃ পুংসো-ন দুর্বলস্য, অথবা বহুদোষস্য, তথা প্রততং-অনারতং, বহু বমতো বমনং যোজযেত্|

Adhikarana tato hRudyaM virecanam virecanaPalam tataH shamanauShadham rUkShadurbalasya shamanameva (2-3) · Śloka 3

| ততো বিরেকং ক্রমশো হৃদ্যং মদ্যৈঃ ফলাম্বুভিঃ||২|| ক্ষীরৈর্বা সহ স হ্যূর্ধ্বং গতং দোষং নযত্যধঃ| শমনং চৌষধং রূক্ষদুর্বলস্য তদেব তু||৩||

স০-ততো-বমনাদনন্তরং বিরেকৌষধং ক্রমশো-ন সহসা, যোজযেত্| কিম্ভূতং বিরেকদ্রব্যম্ ? হৃদ্যং-হৃদযায হিতম্| কৈঃ সহ ? মদ্যৈঃ-মার্দ্বীকাদিভিঃ| তথা, ফলাম্বুভিঃ-শোভনদ্রা ক্ষাদিফলনিষ্পাদিতবারিভিঃ| অথবা, ক্ষীরৈঃ-গোক্ষীরাদিভিঃ সহ| কিমেবং স্যাত্ ? ইত্যাহ-স হ্যূর্ধ্বমিত্যাদি| যস্মাত্সঃ-বিরেকঃ, ঊর্ধ্বং গতং দোষং ছর্দ্যনুগমধো নযতি| ন কেবলং শোধনং-বমনং বিরেচনং বা, তত্র যোজযেত্| যাবচ্ছমনমপি যদৌষধং তদপি তত্র যোজযেত্| রূক্ষদুর্বলস্য পুনঃ পুংসস্তদেব-শমনমেব, যোজযেত্, শোধনাসহত্বাত্|

Adhikarana CardiShu annashAkaPalAdikam (4-6) · Śloka 6

পরিশুষ্কং প্রিযং সাত্ম্যমন্নং লঘু চ শস্যতে| উপবাসস্তথা যূষা রসাঃ কাম্বলিকাঃ খলাঃ||৪|| শাকানি লেহা ভোজ্যানি রাগষাডবপানকাঃ| ভক্ষ্যাঃ শুষ্কা বিচিত্রাশ্চ ফলানি স্নানঘর্ষণম্||৫|| গন্ধাঃ_ সুগন্ধযো গন্ধফলপুষ্পান্নপানজাঃ| ভুক্তমাত্রস্য সহসা মুখে শীতাম্বুসেচনম্||৬||

স০-তত্র সর্বাস্বপি ছর্দিষু পরিশুষ্কাদিগুণযুক্তমন্নং শস্যতে| কাম্বলিকাদিলক্ষণং কৃতান্নবর্গে কথিতম্| তথা ফলানি, স্নানমুদ্বর্তনাদিরূপেণ ঘর্ষণং সুগন্ধযঃ-শোভনগন্ধাঃ, গন্ধদ্রব্যপুষ্পফলান্নপানজাঃ শস্যন্তে| তত্র গন্ধশব্দেন গন্ধদ্রব্যাণি| ভুক্তমাত্রস্য সহসা-ঝটিত্যেবাজ্ঞাতসঙ্কেতস্য, মুখে শীতাম্বুসেচনম্| ইতি সামান্যেন ছর্দীনামুপক্রমাঃ|

Adhikarana vAtajAyAM CardyAM ghRutam, vAtajAyAM vyoShAdyaM ghRutam, vAtajAyAM dADimAdyaM ghRutam, vAtajAyAM tulyAmbukShIram, vAtajAyAM vaiShkiro rasaH, vAtajAyAM snigdhaM Bojanam, vAtajAyAM snehavirecanam (7-10) · Śloka 10

অধুনা বিশেষেণাহ হন্তি মারুতজাং ছর্দিং সর্পিঃ পীতং সসৈন্ধবম্| কিঞ্চিদুষ্ণং বিশেষেণ সকাসহৃদযদ্রবাম্||৭|| ব্যোষত্রিলবণাঢ্যং বা সিদ্ধং বা দাডিমাম্বুনা| সশুণ্ঠীদধিধান্যেন শৃতং তুল্যাম্বু বা পযঃ||৮|| ব্যক্তসৈন্ধবসর্পির্বা ফলাম্লো বৈষ্কিরো রসঃ| স্নিগ্ধং চ ভোজনং শুণ্ঠীদধিদাডিমসাধিতম্||৯|| কোষ্ণং সলবণং চাত্র হিতং স্নেহবিরেচনম্| |১০|

স০-বাতজাং ছর্দিষং সর্পিঃ পীতং সৈন্ধবান্বিতং কিঞ্চিদুষ্ণং বিশেষেণ হন্তি| পীতং-ন তু লীঢম্, অশক্তত্বাত্| তথা চোক্তম্ (হৃ.চি.অ.৩/১১১)-"আক্রামত্যনিলং পীতং" ইতি| তস্মাত্ পীতং ঘৃতং ছর্দিং হন্তীতি যুক্তম্| অথবা ত্রিকটুত্রিলবণোত্কটং সর্পিঃ পীতং পূর্বোক্তগুণম্| দাডিমাম্বুন বা শুণ্ঠী দধিধান্যেন সহ সামান্যকল্পনযা সিদ্ধং ঘৃতং পীতং পূর্বোক্তগুণম্| জলতুল্যং বা পযঃ শৃতং পূর্ববত্| অথবা, বৈষ্কিরঃ-কুক্কুটাদিজো, রসো বহুসর্পিঃসৈন্ধবো মারুতজাং ছর্দিং হন্তি| কিম্ভূতঃ ? ফলেন-দাডিমমাতুলুঙ্গাদিনা, অম্লঃ-অম্লতাং প্রাপিতঃ| স্নিগ্ধং চ ভোজনং-অশনং, [শুণ্ঠী]দধিদাডিমেন সংস্কৃতং তু হিতং-ছর্দিং হন্তি| অত্র চ-মারুতচ্ছর্দিষি, স্নেহেন-এরণ্ডতৈলাদিনা, বিরেচনং স্নেহবিরেচনং কোষ্ণং সলবণং চ হিতম্|

Adhikarana pittajAyAM CardyAM drAkShAdi virecanam, pittajAyAM tailvakaM dhRutam, pittajAyAM shleShmasthAnagate pitte vamanam, pittajAyAM shuddhau annapAnam, pittajAyAM jambAmrAdikkAthaH, pittajAyAM sacandano dhAtrIrasaH, pittajAyAM mugdadalakvAtaH, pittajAyAM kolAdilehaH, pittajAyAMpathyAdilehatrayam (10-17) · Śloka 17

| পিত্তজাযাং বিরেকার্থং দ্রাক্ষেক্ষুস্বরসৈস্ত্রিবৃত্||১০|| সর্পির্বা তৈল্বকং যোজ্যং বৃদ্ধং চ শ্লেষ্মধামগম্| ঊর্ধ্বমেব হরেত্ পিত্তং স্বাদুতিক্তৈর্বিশুদ্ধিমান্||১১|| পিবেন্মন্থং যবাগূং বা লাজৈঃ সমধুশর্করাম্| মুদ্গজাঙ্গলজৈরদ্যাদ্ব্যঞ্জনৈঃ শালিষষ্টিকম্||১২|| মৃদ্ভৃষ্টলোষ্টপ্রভবং সুশীতং সলিলং পিবেত্| মুদ্গোশীরকণাধান্যৈঃ সহ বা সংস্থিতং নিশাম্||১৩|| দ্রাক্ষারসং রসং বেক্ষোর্গুডূচ্যম্বু পযোঽপি বা| জম্ব্বাম্রপল্লবোশীরবটশুঙ্গাবরোহজঃ||১৪|| ক্বাথঃ ক্ষৌদ্রযুতঃ পীতঃ শীতো বা বিনিযচ্ছতি| ছর্দিং জ্বরমতীসারং মূর্চ্ছাং তৃষ্ণাং চ দুর্জযাম্||১৫|| ধাত্রীরসেন বা শীতং পিবেন্মুদ্গদলাম্বু বা| কোলমজ্জসিতালাজামক্ষিকাবিট্কণাঞ্জনম্||১৬|| লিহ্যাত্ক্ষৌদ্রেণ পথ্যাং বা দ্রাক্ষাং বা বদরাণি বা| |১৭|

স০-পিত্তজাযাং ছর্দ্যাং বিরেকার্থং-বিরেকপ্রযোজনায, দ্রাক্ষেক্ষুস্বরসৈস্ত্রিবৃদ্দেযা| তৈল্বকং বা সর্পির্যোজ্যম্| পিত্তজে ছর্দিষি বৃদ্ধং শ্লেষ্মধামগং পিত্তমূর্ধ্বমেব হরেত্-বমনং তত্র দেযমিত্যর্থঃ| কৈর্দ্রব্যৈঃ ? স্বাদুতিক্তৈঃ| আতুরো বিশুদ্ধিমান্-কৃতবমনবিরেকো লাজৈর্মন্থং পিবেত্| কিম্ভূতম্ ? সমধুশর্করম্, অথবা যবাগূং লাজৈঃ সমধুশর্করাং পিবেত্| সমধুশর্করশ্চ সমধুশর্করা চেতি "পুমান্ স্ত্রিযা" ইত্যেকশেষঃ| তথা, মুদ্গজৈর্ব্যঞ্জনৈর্জাঙ্গলমাংসৈ (মাংসজৈ)শ্চ ব্যঞ্জনৈঃ শালিষষ্টিকমদ্যাত্| মৃদ্ভৃষ্টলোষ্টজং সুশীতলং জলং পিবেত্| মুদ্গাদিভির্বা সহ নিশাং স্থিতং জলং পিবেত্| দ্রাক্ষারসাদিং বা যথাযোগং পিবেত্| জম্ব্বাম্রাদিজঃ ক্বাথঃ ক্ষৌদ্রান্বিতঃ শীতো বা-শীতকষাযঃ, পীতঃ ক্ষৌদ্রযুতশ্ছর্দ্যাদীন্ হন্তি| মুদ্গদলৈঃ শৃতমম্বু মুদ্গদলাম্বু, তদ্ধাত্রীরসেন সহ পিবেত্| অথবা মুদ্গদলানামম্বু মুদ্গদলাম্বু, শীতং-শীতকষাযং, পিবেত্| কোলাদিকং ক্ষৌদ্রেণ লিহ্যাত্| পথ্যাং বা ক্ষৌদ্রেণ লিহ্যাত্| দ্রাক্ষাং বা বদরাণি বা লিহ্যাত্|

Adhikarana kaPajAyAM CardyAM nimbAdi vamanam, kaPajAyAM upavAsaH, kaPajAyAM AragvadhAdiniryUhaH, kaPajAyAM manthAH, annaM rAgAH, kaPajAyAM manaHshilAdilehaH, kaPajAyAM kapitthayogaH, kaPajAyAM durAlaBAlehaH, kaPajAyAM maricAdilehaH (17-21) · Śloka 21

| কফজাযাং বমেন্নিম্বকৃষ্ণাপিণ্ডীতসর্ষপৈঃ||১৭|| যুক্তেন কোষ্ণতোযেন, দুর্বলং চোপবাসযেত্| আরগ্বধাদিনির্যূহং শীতং ক্ষৌদ্রযুতং পিবেত্||১৮|| মন্থান্ যবৈর্বা বহুশশ্চ্ছর্দিঘ্নৌষধভাবিতৈঃ| কফঘ্নমন্নং হৃদ্যং চ রাগাঃ সার্জকভূস্তৃণাঃ||১৯|| লীঢং মনঃশিলাকৃষ্ণামরিচং বীজপূরকাত্| স্বরসেন কপিত্থস্য সক্ষৌদ্রেণ বমিং জযেত্||২০|| খাদেত্কপিত্থং সব্যোষং, মধুনা বা দুরালভাম্| লিহ্যান্মরিচচোচৈলাগোশকৃদ্রসমাক্ষিকম্||২১||

স০-কফজাযাং ছর্দ্যাং নিম্বাদিভির্যুক্তেন কোষ্ণজলেন বমেত্| দুর্বলং চ নরমুপবাসযেত্| আরগ্বধাদিনির্যূহং শীতং ক্ষৌদ্রান্বিতং পিবেত্| বহূন্ বারান্ ছর্দিঘ্নৌষধভাবিতৈর্যবৈর্মন্থান্ পিবেত্| কফঘ্নমন্নং হৃদ্যং চ ভুক্তং সদ্বমিং জযেত্| রাগাঃ সকুঠেরকভূস্তৃণা বমিং জযন্তি পীতাঃ| মনঃশিলাদিকং বীজপূরকরসেন সক্ষৌদ্রেণ বমিং জযেত্| কপিত্থস্য বা রসেন মাক্ষিকান্বিতেন মনঃশিলাদিকং লীঢং বমিং জযেত্| কপিত্থং বা সত্রিকটুকং মধুনা খাদেত্| ধন্বযবাসং বা মধুনা লিহ্যাত্|

Adhikarana dviShTArthajAyAmauShadham (22) · Śloka 22

অনূকূলোপচারেণ যাতি দ্বিষ্টার্থজা শমম্| |২২|

স০-দ্বিষার্থজা ছর্দির্মনসোঽনুকূলোপচারেণ শাম্যতি|

Adhikarana kRumijAyAmauShadham, sheShacCardirogANAmauShadham, CardyupadravANAmauShadham (22-23) · Śloka 23

| কৃমিজা কৃমিহৃদ্রোগগদিতৈশ্চ ভিষগ্জিতৈঃ||২২|| যথাস্বং পরিশেষাশ্চ, তত্কৃতাশ্চ তথাঽঽমযাঃ| |২৩|

স০-কৃমিভ্যো জাতা ছর্দিঃ কৃমিহৃদ্রোগগদিতৈরৌষধৈঃ শমং যাতি| ন কেবলং কৃমিজা ছর্দিরেব শমং যাতি| যথাস্বং পরিশেষা অপ্যামযাঃ-কৃমিহৃদ্রোগকৃতাঃ, তেঽপি কৃমিহৃদ্রোগগদিতৈর্ভেষজৈঃ শমং যান্তি|

Adhikarana prasaktAyAM CardyAmauShadham (23-25) · Śloka 25

ছর্দিপ্রসঙ্গেন হি মাতরিশ্বা ধাতুক্ষযাত্কোপমুপৈত্যবশ্যম্| কুর্যাদতোঽস্মিন্ বমনাতিযোগ- প্রোক্তং বিধিং স্তম্ভনবৃংহণীযম্||২৩|| সর্পির্গুডা মাংসরসা ঘৃতানি কল্যাণকত্র্যূষণজীবনানি| পযাংসি পথ্যোপহিতানি লেহাশ্ছর্দিং প্রসক্তাং প্রশমং নযন্তি||২৪|| ইতি ছর্দিচিকিত্সিতম্|২৫|

স০-হি-যস্মাত্, ছর্দিপ্রসঙ্গেন-অনুবন্ধেন, যো ধাতুক্ষযঃ তস্মাদ্ধেতোর্মাতরিশ্বা অবশ্যং কোপমাযাতি| অতো হেতোর্বমনাতিযোগপ্রোক্তং বিধিং স্তম্ভনং বৃংহণং চ কুর্যাত্, ন পুনস্তদুক্তমন্যং বিধিম্| ইন্দ্রবজ্রাবৃত্তম্| তথা, সর্পির্গুডাদযো দোষদূষ্যানুরোধতো যথাকালমুপযুক্তাশ্ছর্দিং প্রসক্তাং শমযন্তি| উপজাতিবৃত্তম্| তন্ত্রান্তরে(?)চোক্তম্ (হৃ.ক.অ.৩/২৫)-"অঞ্জনং চন্দনোশীরমজাসৃক্শর্করোদকম্| লাজচূর্ণৈঃ পিবেন্মন্থমতিযোগহরং পরম্||" ইতি|

Adhikarana vAtaje hradroge mastvAdi tailam (25-26) · Śloka 26

ছর্দিচিকিত্সিতাদনন্তরং হৃদ্রোগসাধনমুচ্যতে, হৃদ্রোগশব্দশ্রবণসম্বন্ধাত্| অথ হৃদ্রোগচিকিত্সিতম্| | হৃদ্রোগে বাতজে তৈলং মস্তুসৌবীরতক্রবত্||২৫|| পিবেত্সুখোষ্ণং সবিডং গুল্মানাহার্তিজিচ্চ তত্| |২৬|

স০-বাতজে হৃদ্রোগে তৈলং সুখোষ্ণং-কিঞ্চিদুষ্ণং, পিবেত্| কিম্ভূতম্ ? মস্তুসৌবীরতক্রাণি বিদ্যন্তে যস্মিংস্তদেবম্| তথা সহ বিডলবণেন সবিডং, গুল্মাদিজিত্|

Adhikarana vAtaje hRudroge lavaNatailam (26) · Śloka 26

| তৈলং চ লবণৈঃ সিদ্ধং সমূত্রাম্লং তথাগুণম্||২৬||

স০-লবণৈঃ-পঞ্চভিঃ সৈন্ধবাদিভিঃ, গোমূত্রেণ কাঞ্জিকেন চ তৈলং সামান্যপরিভাষযা পক্বং তথাগুণং-গুল্মাদিজিত্|

Adhikarana vAtaje hRudroge bilvAditailam (27-28) · Śloka 28

বিল্বং রাস্নাং যবান্ কোলং দেবদারুং পুনর্নবাম্| কুলত্থান্ পঞ্চমূলং চ পক্ত্বা তস্মিন্পচেজ্জলে||২৭|| তৈলং তন্নাবনে পানে বস্তৌ চ বিনিযোজযেত্| |২৮|

স০-বিল্বাদীনি জলে পক্ত্বা তস্মিন্ জলে ক্বাথীভূতে তৈলং পচেত্| তত্তৈলং নস্যে পানেঽনুবাসনে চ বিনিযোজযেত্| তচ্চ পূর্বসমম্|

Adhikarana vAtaje hRudroge shuNThyAdighRutam (28-29) · Śloka 29

| শুণ্ঠীবযস্থালবণকাযস্থাহিঙ্গুপৌষ্করৈঃ||২৮|| পথ্যযা চ শৃতং পার্শ্বহৃদ্রুজাগুল্মজিদ্ঘৃতম্| |২৯|

স০-শুণ্ঠ্যাদিভিঃ পক্বং চ ঘৃতং পার্শ্বহৃদ্রুজাদিজিত্| বযস্থা-আমলকী| কাযস্থা-কাকোলী|

Adhikarana vAtaje hRudroge sauvarcalAdighRutam (29-30) · Śloka 30

| সৌবর্চলস্য দ্বিপলে পথ্যাপঞ্চাশদন্বিতে||২৯|| ঘৃতস্য সাধিতঃ প্রস্থো হৃদ্রোগশ্বাসগুল্মজিত্| |৩০|

স০-সৌবর্চলস্য পলদ্বযে পথ্যাপঞ্চাশদ্যুক্তে সাধিতো ঘৃতপ্রস্থো হৃদ্রোগাদিজিত্|

Adhikarana vAtaje dADimAdicUrNam (30-31) · Śloka 31

| দাডিমং কৃষ্ণলবণং শুণ্ঠী হিঙ্গ্বম্লবেতসম্||৩০|| অপতন্ত্রকহৃদ্রোগশ্বাসঘ্নং চূর্ণমুত্তমম্| |৩১|

আ০ র০- চূর্ণমাহ-দাডীমমিতি| অপতন্ত্রকো-বাতব্যাধিনিদানোক্তঃ|

Adhikarana vAtaje puShkarAdikalkaH (31-32) · Śloka 32

| পুষ্করাহ্বশঠীশুণ্ঠীবীজপূরজটাভযাঃ||৩১|| পীতাঃ কল্কীকৃতাঃ ক্ষারঘৃতাম্ললবণৈর্যুতাঃ| বিকর্তিকাশূলহরাঃ|৩২|

স০-পুষ্করাহ্বাদযঃ কল্কীকৃতাঃ-পিষ্টাঃ, তথা ঘৃতাদিযুক্তাঃ পীতা বিকর্তিকাশূলহরাঃ| বিকর্তিকা-হৃদযস্যাবর্তচ্ছেদনিকা ইব রুগ্বিশেষঃ| হৃদ্রোগপ্রসঙ্গাদেতচিকিত্সাঽপ্যুক্তা|

Adhikarana vAtaje yavAnyAdikvAthaH,vAtaje yavakShArAdipAnam (32-1.5) · Śloka 1

ক্বাথঃ কোষ্ণশ্চ তদ্গুণঃ||৩২|| যবানীলবণক্ষারবচাজাজ্যৌষধৈঃ কৃতঃ| সপূতিদারুবীজাহ্বপলাশশঠিপৌষ্করৈঃ||৩৩|| (যবক্ষারো যবানী চ পিবেদুষ্ণেন বারিণা| এতেন বাতজং শূলং গুল্মং চৈব চিরোত্থিতম্||১|| ভিদ্যতে সপ্তরাত্রেণ পবনেন যথা ঘনঃ| )||১.৫||

স০-ক্বাথশ্চ কোষ্ণো যবান্যাদিভির্দেবদারুসহিতৈস্তদ্গুণো বিকর্তিকাশূলহরঃ| ঔষধং-শুণ্ঠী| বীজহ্বঃ-বীজসারম্, বীজপূরকমিত্যন্যে|

Adhikarana vAtaje pa~jjakolAdicUrNam (34-35) · Śloka 35

পঞ্চকোলশঠীপথ্যাগুডবীজাহ্বপৌষ্করম্| বারুণীকল্কিতং ভৃষ্টং যমকে লবণান্বিতম্||৩৪|| হৃত্পার্শ্বযোনিশূলেষু খাদেদ্গুল্মোদরেষু চ| |৩৫|

স০-পঞ্চকোলাদিকং বারুণ্যা-প্রসন্নযা সুরযা, কল্কিতংপিষ্টং, যমকে ভৃষ্টং সৈন্ধবযুতং হৃদাদিশূলেষু গুল্মাদিষু চ খাদেত্|

Adhikarana vAtaje snehasvedau (35) · Śloka 35

| স্নিগ্ধাশ্চেহ হিতাঃ স্বেদাঃ সংস্কৃতানি ঘৃতানি চ||৩৫||

স০-ইহ-বাতজে হৃদ্রোগে, স্বেদাশ্চ স্নিগ্ধা হিতাঃ| ঘৃতানি পক্বানি বা (চ)|

Adhikarana vAtaje pa~jcamUlAdipAnapa~jcakaM (36) · Śloka 36

লঘুনা পঞ্চমূলেন শুণ্ঠ্যা বা সাধিতং জলম্| বারুণীদধিমণ্ডং বা ধান্যাম্লং বা পিবেত্তৃষি||৩৬||

স০-তৃষি সত্যাং হ্রস্বেন পঞ্চমূলেন শুণ্ঠ্যা বা সাধিতং জলং পিবেত্| বারুণীমণ্ডং বা দধিমণ্ডং বা পিবেত্|

Adhikarana uktAnAmauShadhAnAM viShayaH (37) · Śloka 37

সাযামস্তম্ভশূলামে হৃদি মারুতদূষিতে| ক্রিযৈষা|৩৭|

স০-আযামঃ-আক্ষেপঃ, সহ আযামাদিভির্বর্ততে যদ্ হৃদযং তস্মিংস্তথাবিধে হৃদি তথা মারুতদূষিতে সতি ক্রিযৈষাচিকিত্সেযং পূর্বোক্তা|

Adhikarana sadravAyAmapramohe vAtahRudroge tittiryAdirasAH (37-38) · Śloka 38

| সদ্রবাযামপ্রমোহে তু হিতা রসাঃ||৩৭|| স্নেহাঢ্যাস্তিত্তিরিক্রৌঞ্চশিখিবর্তকদক্ষজাঃ| |৩৮|

স০-সদ্রবাযামপ্রমোহে পুনঃ হৃদি মারুতদূষিতে রসাস্তিত্তির্যাদিজাঃ| স্নেহাদ্যাঃ-বহুস্নেহাঃ, হিতাঃ|

Adhikarana sadravAyAmapramohe balAtailAdisnehacatuShkam (38-39) · Śloka 39

| বলাতৈলং সহৃদ্রোগঃ পিবেদ্বা সুকুমারকম্||৩৮|| যষ্ট্যাহ্বশতপাকং বা মহাস্নেহং তথোত্তমম্| |৩৯|

স০-সহৃদ্রোগো নরো বলাতৈলং পিবেত্| সুকুমারকং বা-প্রমেহোক্তং ঘৃতং, যষ্ট্যাহ্বং চ তচ্ছতপাকং চ যষ্ট্যাহ্বশতপাকং-শতকৃত্বঃ পক্বং তত্তৈলং বাতশোণিতোক্তং (হৃ.চি.অ.২২/৪১) পিবেত্| মহাসেন্হং তথোত্তমং পিবেত্|

Adhikarana sadravAyAmapramohe rAsnAdimahAsnehaH (39-41) · Śloka 41

তদেব চাহ | রাস্নাজীবকজীবন্তীবলাব্যাঘ্রীপুনর্নবৈঃ||৩৯|| ভার্ঙ্গীস্থিরাবচাব্যোষৈর্মহাস্নেহং বিপাচযেত্| দধিপাদং তথাম্লৈশ্চ লাভতঃ স নিষেবিতঃ||৪০|| তর্পণো বৃংহণো বল্যো বাতহৃদ্রোগনাশনঃ| |৪১|

স০-রাস্নাদিভিঃ কল্কীকৃতৈর্মহাস্নেহং দধিপাদং বিপাচযেত্| দধিপাদং চ দঘ্নঃ পাদঃ-চতুর্থভাগপ্রমাণো, যস্মিংস্তথাভূতম্| তথা, অম্লৈঃ-কাঞ্জিকাদিভিঃ, লাভতো-যথালাভম্| অনযৈব কল্পনযা সঃ-মহাস্নেহো, নিষেবিতস্তর্পণো বৃংহণো বল্যো বাতহৃদ্রোগঘ্নশ্চ স্যাত্|

Adhikarana dIpte~angau kShIrAdi hitam (41-42) · Śloka 42

| দীপ্তেঽগ্নৌ সদ্রবাযামে হৃদ্রোগে বাতিকে হিতম্||৪১|| ক্ষীরং দধিগুডঃ সর্পিরৌদকানূপমামিষম্| |৪২|

স০-দীপ্তেঽগ্নৌ সতি বাতহৃদ্রোগে সদ্রবাযামে সহ দ্রবেণ-কম্পনেন, আযামেন চ বর্ততে যস্তস্মিংস্তথাভূতে ক্ষীরাদি হিতম্| ঔদকামিষং-মত্স্যাদিমাংসম্, আনূপামিষং-গ্রাম্যবরাহাদিজং মাংসম্|

Adhikarana sheSheShu hRudrogeShvetadahitam (42-43) · Śloka 43

| এতান্যেব চ বর্জ্যানি হৃদ্রোগেষু চতুর্ষ্বপি||৪২|| শেষেষু, স্তম্ভজাড্যামসংযুক্তেঽপি চ বাতিকে| |৪৩|

স০-বাতহৃদ্রোগং মুক্ত্বাঽন্যেষু-শেষেষু, চতুর্ষু হৃদ্রোগেষ্বেতানি-ক্ষীরাদীনি, বর্জ্যানি-ন প্রযোজ্যানি| ন কেবলমেষ্বেতানি বর্জ্যানি, যাবত্স্তম্ভজাড্যামসংযুক্তে বাতিকেঽপি হৃদ্রোগ এতানি বর্জ্যানি|

Adhikarana sakaPe hRudroge virecanam (43) · Śloka 43

| কফানুবন্ধে তস্মিংস্তু রূক্ষোষ্ণামাচরেত্ক্রিযাম্||৪৩||

স০-তস্মিন্-বাতিকে হৃদ্রোগে, কফানুবন্ধে তু সতি রূক্ষোষ্ণাং ক্রিযাং সেবেত|

Adhikarana pittaje virecanAnantaraM peyAdikramaH, pittajekShatapittajvaroktaM shodhanam, pittaje kaTvImadhukakalkaH (44-45) · Śloka 45

পৈত্তে দ্রাক্ষেক্ষুনির্যাসসিতাক্ষৌদ্রপরূষকৈঃ| যুক্তো বিরেকো হৃদ্যঃ স্যাত্ক্রমঃ শুদ্ধে চ পিত্তহা||৪৪|| ক্ষতপিত্তজ্বরোক্তং চ বাহ্যান্তঃ পরিমার্জনম্| কট্বীমধুককল্কং চ পিবেত্সসিতমম্ভসা||৪৫||

স০-পৈত্তে হৃদ্রোগে দ্রাক্ষেক্ষুনির্যাসাদিযুক্তো বিরেকো হৃদ্যঃ স্যাত্| শুদ্ধে সত্যনন্তরং ক্রমঃ পিত্তহা স্যাত্, স তু পেযাদিকঃ কার্যঃ| ক্ষতে পিত্তজ্বরে চ যা বহিরন্তশ্চ শুদ্ধিরুক্তা সা চাত্র কার্যা| কটুকীমধুককল্কং শর্করান্বিতমম্ভসা পিবেত্|

Adhikarana pittaje shreyasyAdighRutam (46-47) · Śloka 47

শ্রেযসীশর্করাদ্রাক্ষাজীবকর্ষভকোত্পলৈঃ| বলাখর্জূরকাকোলীমেদাযুগ্মৈশ্চ সাধিতম্||৪৬|| সক্ষীরং মাহিষং সর্পিঃ পিত্তহৃদ্রোগনাশনম্| |৪৭|

স০-শ্রেযস্যাদিভিঃ সাধিতং ক্ষীরান্বিতং মাহিষং সর্পিঃ পিত্তহৃদ্রোগঘ্নম্| শ্রেযসী-হস্তিপিপ্পলী| মাহিষঘৃতস্যাত্র নির্দেশঃ শীততমত্বাত্|

Adhikarana pittaje prapauNDarIkAdi, pittaje svAduvargakRutaM ghRutam, pittaje anuvAsanabastiH (47-49) · Śloka 49

| প্রপৌণ্ডরীকমধুকবিসগ্রন্থিকসেরুকাঃ||৪৭|| সশুণ্ঠীশৈবলাস্তাভিঃ সক্ষীরং বিপচেদ্ঘৃতম্| শীতং সমধু তচ্চেষ্টং স্বাদুবর্গকৃতং চ যত্||৪৮|| বস্তিং চ দদ্যাত্সক্ষৌদ্রং তৈলং মধুকসাধিতম্| |৪৯|

স০-প্রপৌণ্ডরীকাদিভিঃ ক্ষীরযুতং পক্বং ঘৃতং শীতীভুতং সন্মাক্ষিকোপেতং তচ্চেষ্টমত্র রোগে| স্বাদুবর্গেণ-দ্রাক্ষাদিনা, যচ্চ কৃতং তচ্চ হিতম্| তথা, বস্তিং মধুকসাধিতং-মধুকেন পক্বং, মাক্ষিকান্বিতং দদ্যাত্|

Adhikarana pittaje picumandAdinA vamanam,pittaje kulatthAdi annapAnam (49-50) · Śloka 50

| কফোদ্ভবে বমেত্স্বিন্নঃ পিচুমন্দবচাম্ভসা||৪৯|| কুলত্থধন্বোত্থরসতীক্ষ্ণমদ্যযবাশনঃ| |৫০|

স০-কফোদ্ভবে হৃদ্রোগে স্বিন্নো নিম্ববচাভ্যাং ক্বথিতেন জলেন বমেত্ কুলত্থজাঙ্গলাদিরস(লরসাদি)ভুক্|

Adhikarana pittaje vacAdicUrNam, pittaje puShkarAdicUrNam, pittaje aBayAdikvAthaH (50-52) · Śloka 52

| পিবেচ্চূর্ণং বচাহিঙ্গুলবণদ্বযনাগরাত্||৫০|| সৈলাযবানককণাযবক্ষারাত্সুখাম্বুনা| ফলধান্যাম্লকৌলত্থযূষমূত্রাসবৈস্তথা||৫১|| পুষ্করাহ্বাভযাশুণ্ঠীশঠীরাস্নাবচাকণাত্| ক্বাথং তথাঽভযাশুণ্ঠীমাদ্রীপীতদ্রুকট্ফলাত্||৫২||

স০-চূর্ণং বচাদিভ্য উষ্ণোদকেন পিবেত্| যবানকো-যবানীভেদঃ| তথা, ফলধান্যাম্লদিভির্বৈকতরেণ(মেন)পিবেত্| তথা, পুষ্করাদেশ্চূর্ণং পূর্বোক্তৈরুষ্ণা(ম্ব্বা)দিভিঃ পিবেত্| তথা, হরীতক্যাদেঃ ক্বাথং পিবেত্|

Adhikarana pittaje rohitakAdilehaH (53-54) · Śloka 54

ক্বাথে রোহিতকাশ্বত্থখদিরোদুম্বরার্জুনে| সপলাশবটে ব্যোষত্রিবৃচ্চূর্ণান্বিতে কৃতঃ||৫৩|| সুখোদকানুপানশ্চ লেহঃ কফবিকারহা| |৫৪|

স০-রোহিতকাদীনাং ক্বাথে ত্রিকটুত্রিবৃচ্চূর্ণযুতে কৃতো লেহ উষ্ণোদকানুপানঃ কফবিকারহা| অর্শশ্চিকিত্সিতোক্তং (হৃ.চি.অ.৮/১০৪)-"তুলাং দিব্যাম্ভসি পচেত্" ইতি প্রমাণানুসারেণ পরিমাণমত্র নিরূপিতম্|

Adhikarana pittaje shleShmagulmoktaghRutAdIni, pittaje shilAhvAdirasAyanAni (54-55) · Śloka 55

| শ্লেষ্মগুল্মোদিতাজ্যানি ক্ষারাংশ্চ বিবিধান্ পিবেত্||৫৪|| প্রযোজযেচ্ছিলাহ্বং বা ব্রাহ্মং বাঽত্র রসাযনম্| তথাঽঽমলকলেহং বা প্রাশং বাঽগস্ত্যনির্মিতম্||৫৫||

স০-কফহৃদ্রোগে, শ্লেষ্মগুল্মে যানি গদিতান্যাজ্যানি-সর্পীষি, তত্রৈবোক্তান্ ক্ষারাংশ্চ নানাবিধাংস্তান্ পিবেত্| শিলাজতু প্রযোজযেত্| বা ব্রাহ্মং রসাযনং-রসাযনাধ্যাযোক্তম্ (হৃ.উ.অ.৩৯/১৫)| তথা, আমলকলেহং বা-রসাযনোক্তমেব চ্যবনপ্রাশাখ্যম্ (হৃ.উ.অ.৩৯/৩৩)| অথবা, প্রাশং-লেহং, অগস্ত্যনির্মিতং কাসচিকিত্সিতোক্তং (হৃ.চি.অ.৩/১২৭), প্রযোজযেত্|

Adhikarana shUlacikitsA, ajIrNashUlasya auShadham (56-57) · Śloka 57

স্যাচ্ছূলং যস্য ভুক্তেঽতি, জীর্যত্যল্পং, জরাং গতে| শাম্যেত্স কুষ্ঠকৃমিজিল্লবণদ্বযতিল্বকৈঃ||৫৬|| সদেবদার্বতিবিষৈশ্চূর্ণমুষ্ণাম্বুনা পিবেত্| |৫৭|

স০-যস্য-পুংসো, ভুক্তে-তত্কাল এব, অতি শূলং স্যাত্| জীর্যত্যন্নে-মধ্যমাযাং পাকাবস্থাযাং, অল্পং শূলং স্যাত্| জরাং গতে-কিট্টসারতযা পরিণতেঽন্নে, তু শাম্যেত্| সঃ-নরঃ, কুষ্ঠাদিভিশ্চূর্ণমুষ্ণাম্বুনা পিবেত্|

Adhikarana jIrNashUlasya auShadham, jIryacchUlasya auShadham (57-58) · Śloka 58

| যস্য জীর্ণেঽধিকং স্নেহৈঃ স বিরেচ্যঃ, ফলৈঃপুনঃ||৫৭|| জীর্যত্যন্নে, তথা মূলৈস্তীক্ষ্ণৈঃ শূলে সদাঽধিকে| |৫৮|

স০-যস্য-পুংসো, জীর্ণে সত্যধিকং শূলং ভবেত্, স স্নেহৈঃ-বিরেচনদ্রব্যসিদ্ধৈঃ, বিরেচনীযঃ| জীর্যত্যন্নে-পচ্যমানাবস্থাযাং, অধিকং শূলে সতি ফলৈর্বিরেচ্যঃ| তথা চ মুনিঃ(?)-"মৃদ্বীকাঽথ বিডঙ্গানি খর্জূরাণি পরূষকম্| আরগ্বধোঽথামলকং হরীতক্যো বিভীতকম্|| কম্পিল্লকোপচিত্রে চ ত্রপুসং চ মুকূলকম্| নীলিকা কুবলং পীলু ভবেত্ফলবিরেচনম্||" ইতি| যস্য পুনঃ সদাঽধিকমেব শূলং-কেবলং ন ভুক্তমাত্রে জীর্ণে জীর্যতি বা, সঃ-পুরুষো, মূলৈস্তীক্ষ্ণৈঃ-মূলবিরেচনৈর্দন্তীত্রিবৃচ্ছ্যামাসপ্তলাদিদ্রব্যৈঃ সমন্বিতৈঃ, বিরেচ্যঃ| তথা চোক্তম্-"সপ্তলাশঙ্খিনীদন্তীদ্রবন্তীগিরিকর্ণিকাঃ| ত্রিবৃচ্ছ্যামোদকীর্যা চ প্রকীর্যা ক্ষীরিণী তথা|| ছগলাণ্ডী গবাক্ষী চ কুচাক্ষী গিরিকর্ণিকা| মসূরবিদলা চৈব ভবেন্মূলবিরেচনম্||" ইতি|

Adhikarana rUddhagatAvanile anulomanam (58-59) · Śloka 59

| প্রাযোঽনিলো রুদ্ধগতিঃ কুপ্যত্যামাশযে গতঃ||৫৮|| তস্যানুলোমনং কার্যং শুদ্ধিলঙ্ঘনপাচনৈঃ| |৫৯|

স০-বাহুল্যেন মারুতো রুদ্ধমার্গ আমাশযং(যে) গতঃ কুপ্যতি| তস্য-মরুতঃ, শুদ্ধ্যাদিভিঃ-অবস্থাবশাদ্বযস্তৈঃ সমস্তৈর্বা, অনুলোমনং কার্যম্|

Adhikarana kRumije hRudroge auShadham (59-60) · Śloka 60

| কৃমিঘ্নমৌষধং সর্বং কৃমিজে হৃদযামযে||৫৯|| ইতি হৃদ্রোগচিকিত্সিতম্|৬০|

স০-কৃমিজে হৃদ্রোগে সর্বমেব চ কৃমিঘ্নমৌষধম্|

Adhikarana tRuShNAcikitsA, sarvAsu tRuShNAsu sAmAnyamauShadham (60-67) · Śloka 67

অথ তৃষ্ণাচিকিত্সিতম্| তৃষ্ণাসু বাতপিত্তঘ্নো বিধিঃ প্রাযেণ শস্যতে| সর্বাসু শীতো বাহ্যান্তস্তথা শমনশোধনঃ||৬০|| দিব্যাম্বু শীতং সক্ষৌদ্রং তদ্বদ্ভোমং চ তদ্গুণম্| নির্বাপিতং তপ্তলোষ্টকপালসিকতাদিভিঃ||৬১|| সশর্করং বা ক্বথিতং পঞ্চমূলেন বা জলম্| দর্ভফূর্বেণ মন্থশ্চ প্রশস্তো লাজসক্তুভিঃ||৬২|| বাট্যশ্চামযবৈঃ শীতঃ শর্করামাক্ষিকান্বিতঃ| যবাগূঃ শালিভিস্তদ্বত্কোদ্রবৈশ্চ চিরন্তনৈঃ||৬৩|| শীতেন শীতবীর্যৈশ্চ দ্রব্যৈঃ সিদ্ধেন ভোজনম্| হিমাম্বুপরিষিক্তস্য পযসা সসিতামধু||৬৪|| রসৈশ্চানম্ললবণৈর্জাঙ্গলৈর্ঘৃতভর্জিতৈঃ| মুদ্গাদীনাং তথা যূষৈর্জীবনীযরসান্বিতৈঃ||৬৫|| নস্যং ক্ষীরঘৃতং সিদ্ধং শীতৈরিক্ষোস্তথা রসঃ| নির্বাপণাশ্চ গণ্ডূষাঃ সূত্রস্থানোদিতা হিতাঃ||৬৬|| দাহজ্বরোক্তা লেপাদ্যা নিরীহত্বং মনোরতিঃ| মহাসরিদ্ধ্রদাদীনাং দর্শনরুমরণানি চ||৬৭||

স০-তৃষ্ণাসু সর্বাসু বাতপিত্তহরঃ সর্বোঽপি বিধিরিষ্যতে| তথা, বাহ্যতোঽভ্যন্তরে চ শীতো বিধিঃ| তথা, শমনং শোধনং চ শস্যতে| দিব্যাম্বু-আন্তরিক্ষং জলং, শীতং মাক্ষিকেণ সহ শস্যতে| ভৌমং চ জলং তদ্গুণং-দিব্যাম্বুসমানগুণং "শুচিপৃথ্বসিতশ্চেতে দেশে" (হৃ.সূ.অ.৫|৫) ইত্যাদিলক্ষণলক্ষিতম্, তচ্চ শস্যতে| তস্য-দিব্যজলস্যেব গুণা যস্য তত্তদ্গুণম্| তপ্তলোষ্টককপালসিকতাদিভিস্তপ্তং তন্নির্বাপিতং-শীতীকৃতং শস্যতে| অথবা, তদেব সমশর্করং শস্যতে| অথবা, দর্ভপূর্বেণ-তৃণাখ্যেন, পঞ্চমূলেন ক্বথিতং নির্বাপিতং শস্যতে| তথা, লাজসক্তুভিঃ কৃতো মন্থঃ প্রশস্তঃ| তথা, আমৈঃ-অভৃষ্টৈঃ, যবৈর্বাট্যঃ প্রশস্তঃ শীতীভূতঃ শর্করামাক্ষিকযুক্তঃ| যবাগূঃ শালিভিস্তথৈব শর্করামাক্ষিকান্বিতা শস্তা| তথা, চিরন্তনৈঃ কোদ্রবৈঃ শর্করামধুযুক্তা যবাগূঃ শস্তা| তথা, শীতেন-শীতীকৃতেন দ্রব্যেণ, শীতবীর্যৈশ্চ দ্রব্যৈঃ সিদ্ধেন ভোজনং হিতম্| অথবা, শীতজলৈঃ পরিষিক্তস্য পুংসঃ পযসা সশর্করামার্দ্বীকং ভোজনং হিতম্| অথবা ন কেবলং পযসা সাত্ম্যাদিবশান্মাংসরসৈর্জাঙ্লৈঃ কিঞ্চিদম্ললবণৈরৃতভর্জিতৈর্ভোজনং হিতম্| তথা, মুদ্গমসূরাদিকানাং যূষৈর্জীবনীযরসযুক্তৈর্ভোজনং হিতম্| তথা, শীতৈঃ-শীতবীর্যৈশ্চন্দনাদিভিঃ, তথেক্ষুরসে সিদ্ধং ক্ষীরঘৃতং নস্যং হিতম্| ক্ষীরোদ্ভবং ঘৃতং ক্ষীরঘৃতম্| তথা, সূত্রস্থানোদিতাঃ (অ.২২) নির্বাপণাঃ-রোপণাঃ, গণ্ডূষা হিতাঃ| তথা, দাহজ্বরে য উক্তা লেপাদ্যাঃ-"দূর্বাদিভির্বা পিত্তঘ্নৈঃ" (হৃ.চি.অ.১/১৩১) ইত্যাদিগ্রন্থনির্দিষ্টাঃ, তে চ হিতাঃ| তথা, নিরীহত্বং-নির্ব্যাপারত্বং হিতম্| তথা, মনসোরতিঃ-নির্বৃতত্বম্| তথা, মহাসরিতাং মহাহ্রদানাং-মহাতডাগানাং, চ দর্শনস্মরণানি হিতানি|

Adhikarana vAtajAyAM tRuShNAyAmauShadham (68) · Śloka 68

ইতি তৃষ্ণাসু সামান্যেন চিকিত্সিতমুক্তম্| বিশেষেণাহ তৃষ্ণাযাং পবনোত্থাযাং সগুডং দধি শস্যতে| রসাশ্চ বৃংহণাঃ শীতা বিদার্যাদিগণাম্বু চ||৬৮||

স০-পবনোত্থাযাং তৃষ্ণাযাং দধি গুডেন সহ শস্যতে| মাংসরসাশ্চ বৃংহণাঃ শস্তাঃ| তথা বিদার্যাদিগণাম্বু "বিদারিপঞ্চাঙ্গুল" (হৃ.সূ.অ.১৫/৯)ইত্যাদিভিঃ শৃতং তোযং-পানীযং, শস্তম্|

Adhikarana pittajAyAM auShadham (69-72) · Śloka 72

পিত্তাজাযাং সিতাযুক্তঃ পক্বোদুম্বরজো রসঃ| তত্ক্বাথো বা হিমস্তদ্বত্সারিবাদিগণাম্বু বা||৬৯|| তদ্বিধৈশ্চ গণৈঃ শীতকষাযান্ সসিতামধূন্| মধুরৈরৌষধৈস্তদ্বত্ ক্ষীরিবৃক্ষৈশ্চ কল্পিতান্||৭০|| বীজপূরকমৃদ্বীকাবটবেতসপল্লবান্| মূলানি কুশকাশানাং যষ্ট্যাহ্বং চ জলে শৃতম্||৭১|| জ্বরোদিতং বা দ্রাক্ষাদি পঞ্চসারাম্বু বা পিবেত্| |৭২|

স০-পিত্তোত্থাযাং শর্করান্বিতঃ পক্বোদুম্বরফলজো রসঃ, তেষাং-উদুম্বরাণাং বা ক্বাথো হিমঃ, তদ্বত্-সিতাযুক্তঃ, শস্যতে| তথৈব সারিবাদিগণাম্বু-"সারিবোশীর" (হৃ.সূ.অ.১৫|১১) ইত্যাদি প্রশস্যতে| তদ্বিধৈঃ-শীতবীর্যৈশ্চ, গণৈঃ কৃতান্ শীতকষাযান্ সসিতামাক্ষিকান্ পিবেত্| তথৈব মধুরৈঃ-দ্রাক্ষাদিভির্দ্রব্যৈঃ, কল্পিতান্| ক্ষীরিবৃক্ষৈশ্চ-অশ্বত্থন্যগ্রোধাদিভিঃ, কল্পিতান্ শীতকষাযান্ সশর্করামধূন্ পিবেত্| বীজপূরকাদিপল্লবান্ কুশকাশানাং মূলানি মধুকং চৈতজ্জলে শৃতং পিবেত্| শীতমিতি প্রকৃতত্বাদ্যোগ্যত্বাচ্চাত্র যোজ্যম্| অথবা, জ্বরচিকিত্সিতোক্তং [দ্রাক্ষাদি-] "দ্রাক্ষামধূক" (হৃ.চি.অ.১|৫৫) ইত্যাদিকং ফাণ্টং শীতকষাযং [বা] পিবেত্| পঞ্চসারাম্বু বা-"মধুখর্জূরমৃদ্বীকা" (হৃ.চি.অ.২/১৪) ইত্যাদি রক্তপিত্তচিকিত্সিতে পঠিতং, পিবেত্|

Adhikarana kaPajAyAM auShadham (72-74) · Śloka 74

| কফোদ্ভবাযাং বমনং নিম্বপ্রসববারিণা||৭২|| বিল্বাঢকীপঞ্চকোলদর্ভপঞ্চকসাধিতম্| জলং পিবেদ্রজন্যা বা সিদ্ধং সক্ষৌদ্রশর্করম্||৭৩|| মুদ্গযূষং চ সব্যোষপটোলীনিম্বপল্লবম্| যবান্নং তীক্ষ্ণকবলনস্যলেহাংশ্চ শীলযেত্||৭৪||

স০-শ্লেষ্মজাযাং তৃষ্ণাযাং নিম্বপত্রপানীযেন বমনং শস্তম্| বিল্বাদিভির্জলং সাধিতং কফতৃষ্ণাযাং পিবেত্| রজন্যা-হরিদ্রযা, জলং সিদ্ধং পিবেত্| সক্ষৌদ্রশর্করং কফতৃষ্ণাযাং মুদ্গযূষং চ ত্রিকটুপটোলনিম্বপল্লবান্বিতং পিবেত্| যবান্নং তীক্ষ্ণকবলং তীক্ষ্ণনস্যং তীক্ষ্ণলেহং চ শীলযেত্| শিম্বীধান্যম্| কচ্ছকঃ-তুমু(তূণী)কঃ| বঙ্গসেনে (তৃষা-শ্লো.২২)-"বিল্বাঢকীধাতকীপঞ্চকোলদর্ভেষু সিদ্ধং কফজাং নিহন্তি| "ইতি| যোগরত্নে-"বিল্বাঢকী[কন্যক] পঞ্চমূলদর্ভেষু সিদ্ধং কফজাং নিহন্তি|" ইতি| কচ্ছক(ধাতকি)-পঞ্চকোলযোঃ স্থানে লঘু [পঞ্চমূলম্]| বঙ্গসেনে(তৃষা. শ্লো.২৩)-"সজীরকাণ্যার্দ্রকশৃঙ্গবেরসৌবর্চলান্যর্ধজলপ্লুতানি| মদ্যানি হৃদ্যানি চ গন্ধবন্তি পীতানি সদ্যঃ শমযন্তি তৃষ্ণাম্||" ইতি|

Adhikarana sannipAtajAyAM auShadham,AmrajAyAM auShadham (75) · Śloka 75

সর্বৈরামাচ্চ তদ্ধন্ত্রী ক্রিযেষ্টা বমনং তথা| ত্র্যূষণারুষ্করবচাফলাম্লোষ্ণাম্বুমস্তুভিঃ||৭৫||

স০-সর্বৈরামাচ্চ তৃষ্ণাযাং সত্যাং তদ্ধন্ত্রী সন্নিপাতঘ্ন্যামঘ্নী চ ক্রিযেষ্টা| তথা চ বমনমিষ্টম্| ত্র্যূষণারুষ্করবচাদিযুক্তেন ফলাম্লেনোষ্ণজলেন বা মস্তুনা বা ইষ্টম্|

Adhikarana upavAsajAyAM auShadham (76) · Śloka 76

অন্নাত্যযান্মণ্ডমুষ্ণং হিমং মন্থং চ কালবিত্| |৭৬|

স০-অন্নাত্যযাত্-অন্নবিরহাত্, তৃষ্ণাযাং সত্যাং মণ্ডমুষ্ণং শীতং মন্থং চ কালপ্রকৃতিসাত্ম্যাদিবিত্ পিবেত্| বাতকফপ্রকৃতিনা উষ্ণো মণ্ডঃ পেযঃ| পিত্তশ্লেষ্মপ্রকৃতিনা বাতপিত্তপ্রকৃতিনা চ হিমো মন্থঃ পেযঃ| এবং কালসাত্ম্যাদিষু নিরুপ্যম্| "সক্তবঃ সর্পিষাঽভ্যক্তাঃ শীতোদকপরিপ্লুতাঃ| নাতিদ্রবা নাতি সান্দ্রা মন্থ ইত্যভিধীযতে||" ইতি|

Adhikarana shramajAyAM auShadham (76) · Śloka 76

| তৃষি শ্রমান্মাংসরসং মন্থং বা সসিতং পিবেত্||৭৬||

স০-শ্রমাত্তৃষি জাতাযাং মাংসরসং মদ্যং বা সশর্করং পিবেত্|

Adhikarana AtapajAyAM tRuShNAyAmau (77) · Śloka 77

আতপাত্সসিতং মন্থং যবকোলজসক্তুভিঃ| সর্বাণ্যঙ্গানি লিম্পেচ্চ তিলপিণ্যাককাঞ্জিকৈঃ||৭৭||

স০-আতপাত্তৃষি যবকোলোদ্ভবৈঃ সক্তুভিঃ সশর্করং মন্থং পিবেত্| সর্বাণি চাঙ্গানি তিলপিণ্যাককাঞ্জিকৈর্লিম্পেত্|

Adhikarana shItasnAnajAyAM tRuShNAyAmau (78) · Śloka 78

শীতস্নানাচ্চ মদ্যাম্বু পিবেত্তৃণ্মান্ গুডাম্বু বা| |৭৮|

স০-শীতস্নানাচ্চ তৃণ্মান্ মদ্যাম্বু পিবেত্| তৃণ্মানিতি মতুপি ময ইতি ণত্বে রূপম্| গুডজলং বা পিবেত্|

Adhikarana madyajAyAM tRuShNAyAmau (78) · Śloka 78

| মদ্যাদর্ধজলং মদ্যং স্নাতোঽম্ললবণৈর্যুতম্||৭৮||

স০-মদ্যাত্তৃণ্মানর্ধজলং মদ্যং স্নাতশ্চাম্ললবণাভ্যাং যুতং পিবেত্|

Adhikarana snehatIkShNAgnijAyAM tRuShNAyAmau (79) · Śloka 79

স্নেহতীক্ষ্ণতরাগ্নিস্তু স্বভাবশিশিরং জলম্| |৭৯|

স০-স্নেহেন তীক্ষ্ণতরোঽগ্নির্যস্য স নরস্তৃণ্মান্নিসর্গশীতলং জলং পিবেত্|

Adhikarana ajIrNasnehajAyAM tRuShNAyAmau (79) · Śloka 79

| স্নেহাদুষ্ণাম্ব্বজীর্ণাত্তু জীর্ণান্মণ্ডং পিপাসিতঃ||৭৯||

স০-স্নেহাত্ পুনরজীর্ণাত্ পিপাসিত উষ্ণাম্বু বা পিবেত্| জীর্ণাত্তু স্নেহত্তৃষি মণ্ডং পিবেত্|

Adhikarana snigdhAnnajAyAM tRuShNAyAmau (80) · Śloka 80

পিবেত্স্নিগ্ধান্নতৃষিতো হিমস্পর্ধি গুডোদকম্| |৮০|

স০-স্নিগ্ধান্নেন ভুক্তেন তৃষিতো হিমস্পর্ধি-তুহিনশীতলং, গুডোদকং পিবেত্|

Adhikarana gurvAdyannajAyAM tRuShNAyAmau (80) · Śloka 80

| গুর্বাদ্যন্নেন তৃষিতঃ পীত্বোষ্ণাম্বু তদুল্লিখেত্||৮০||

স০-গুর্বাদ্যন্নেন ভুক্তেন তৃষিতঃ পীত্বোষ্ণাম্বু তত্-গুর্বাদ্যন্নং, উদ্বমেত্|

Adhikarana rasakShayajAyAM tRuShNAyAmau (81) · Śloka 81

ক্ষযজাযাং ক্ষযহিতং সর্বং বৃংহণমৌষধম্| |৮১|

স০-ক্ষযজাযাং তৃষি ক্ষযে হিতং যদ্ বৃংহণমৌষধং তত্সর্বং হিতং-শস্তম্|

Adhikarana kRushAdijAyAM tRuShNAyAmauShadham (81) · Śloka 81

| কৃশদুর্বলরূক্ষাণাং ক্ষীরং ছাগো রসোঽথবা||৮১||

স০-কৃশাদীনাং তৃষি জাতাযং ক্ষীরং হিতম্| অথবা ছাগো রসো হিতঃ|

Adhikarana sordhvavAtAyAM tRuShNAyAmauShadham (82) · Śloka 82

ক্ষীরং চ সোর্ধ্ববাতাযাং ক্ষযকাসহরৈঃ শৃতম্| |৮২|

স০-সোর্ধ্ববাতাযাং তৃষি ক্ষযকাসহরৈঃ শৃতং ক্ষীরং হিতম্| চশব্দান্মাংসরসশ্চ|

Adhikarana rogopasargajAyAM tRuShNAyAmauShadham (82-83) · Śloka 83

| রোগোপসর্গাজ্জাতাযাং ধান্যাম্বু সসিতামধু||৮২|| পানে প্রশস্তং সর্বা চ ক্রিযা রোগাদ্যপেক্ষযা| |৮৩|

স০-রোগোপসর্গাজ্জাতাযাং তৃষি ধান্যাম্বু সসিতামাক্ষিকং পানে প্রশস্তম্| সর্বা চ ক্রিযা রোগাদ্যপেক্ষযা শস্তা|

Adhikarana pUrvAmayakShINajAyAM tvaritaM auShadham (6) · Śloka 6

| তৃষ্যন্ পূর্বামযক্ষীণো ন লভেত জলং যদি||৮৩|| মরণং দীর্ঘরোগং বা প্রাপ্নুযাত্ত্বরিতং ততঃ| সাত্ম্যান্নপানভৈষজ্যৈস্তৃষ্ণাং তস্য জযেত্পুরা||৮৪|| তস্যাং জিতাযামন্যোঽপি ব্যাধিঃ শক্যশ্চিকিত্সিতুম্| ৮৪ ১/২| ইতি তৃষ্ণারোগচিকিত্সিতম্| ইতি শ্রিবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টঙ্গহৃদযসংহিতাযাং চতুর্থে চিকিত্সিতস্থানে ছর্দিহৃদ্রোগতৃষ্ণাচিকিত্সিতং নাম ষষ্ঠোঽধ্যাযঃ||৬||

স০-পূর্বামযেন ক্ষীণঃ সন্ তৃষ্ণক্-পিপাসিতো, যদি জলং ন লভেত তদা মরণং দীর্ঘরোগং বা প্রাপ্নুযাত্| ততশ্চ হেতোস্ত্বরিতং-শীঘ্রতরং, তস্য-নরস্য, পূর্বমন্যেভ্যো রোগেভ্যঃ সাত্ম্যান্ন পানভেষজৈস্তৃষং জযেত্, ততোঽপরং রোগম্| কিমেবং ক্রিযতে ? ইত্যাহ-তস্যাং তৃষি জিতাযাং সত্যামন্যোঽপি রোগ উপক্রমিতুং শক্যঃ| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে ছর্দিহৃদ্রোগতৃষ্ণাচিকিত্সিতং নাম ষষ্ঠোঽধ্যাযঃ সমাপ্তঃ|| ৬||