10. grahaṇīdōṣacikitsitādhyāyaḥ

Adhikarana adhyAyopakramaH · Śloka

অতীসারচিকিত্সিতাদনন্তরং গ্রহণীদোষচিকিত্সিতমুচ্যতে, নিদানসামান্যাত্| তথা চ প্রাগুক্তম্ (হৃ. চি. অ. ৮/১৬৪)-"অর্শোতিসারগ্রহণীবিকারাঃ" ইত্যাদি, অত আহ-

Adhikarana grahaNIdoShacikitsitAdhyAyaH (2-3) · Śloka 3

অথাতো গ্রহণীদোষচিকিত্সিতং ব্যাখ্যাস্যমঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে||২|| )||৩||

স০-গ্রহণ্যামাশ্রিতো দোষো গ্রহণীদোষঃ,-তদাশ্রিতস্থানোদিতকারী বাতাদ্যন্যতমঃ, তস্য চিকিত্সিতং গ্রহণীদোষচিকিত্সিতম্| শেষং পূর্ববত্|

Adhikarana grahaNIdoShe~ajIrNavadatIsAravaccopacAraH (1) · Śloka 1

গ্রহণীমাশ্রিতং দোষমজীর্ণবদুপাচরেত্| অতীসারোক্তবিধিনা তস্যামং চ বিপাচযেত্||১||

স০-গ্রহণিমাশ্রিতং দোষমজীর্ণবদুপাচরেত্-তত্তুল্যসাধনেন লঙ্ঘনো(নাদ্যু)ক্তোপচারাদিনোপক্রমেত্| অতীসারোক্তবিধিনা তস্য-গ্রহণিদোষবতঃ পুংসো, যথাদোষমাং বিপাচযেত্|

Adhikarana vAtaje grahaNIdoShe yavAgvAdyannam (2) · Śloka 2

অন্নকালে যবাগ্বাদি পঞ্চকোলাদিভির্যুতম্| বিতরেত্পটুলঘ্বন্নং পুনর্যোগাংশ্চ দীপনান্||২||

স০-অন্নকালে-সম্যগ্ জাতাযং ক্ষুধি, যবাগ্বাদ্যন্নং-পেযাবিলেপ্যোদনলক্ষণং, বিতরেত্-দদ্যাত্| কিম্ভূতম্ ? পঞ্চকোলাদিভির্যুতম্| আদিশব্দেনান্যৈরপ্যেবংপ্রকারৈর্দ্রব্যৈর্দীপনাদিগুণযুক্তৈর্যুক্তম্| তথা, পটু-লবণম্, লঘু-উভযথা মাত্রযা প্রকৃত্যা চ| পুনঃ-ভূযো, দীপনান্ ষাডবাদীন্ যোগান্ বিতরেত্|

Adhikarana vAtaje sAme peyA, jalaM takraM ca (3) · Śloka 3

দদ্যাত্সাতিবিষাং পেযামামে সাম্লাং সনাগরাম্| পানেঽতীসারবিহিতং বারি তক্রং সুরাদি চ||৩||

স০-তথা, আমে সতি পেযাং দদ্যাত্| কিম্ভূতাম্ ? নাগরাতিবিষাযুতাম্| তথা, সাম্লাং-ঈষদম্লাম্| পানেঽতীসারবিহিতং বারি তক্রং সুরাদি চ সাত্ম্যাদিবশাদ্ যথাযোগ্যং তস্মৈ দদ্যাত্|

Adhikarana vAtaje sAme takrasya tridoShaharatvam (4-5) · Śloka 5

গ্রহণীদোষিণাং তক্রং দীপনগ্রাহিলাঘবাত্| পথ্যং, মধুরপাকিত্বান্ন চ পিত্তপ্রদূষণম্||৪|| কষাযোষ্ণবিকাশিত্বাদ্রূক্ষত্বাচ্চ কফে হিতম্| বাতে স্বাদ্বম্লসান্দ্রত্বাত্সদ্যস্কমবিদাহি তত্||৫||

স০-গ্রহণিদোষিণাং তক্রং পথ্যম্| কস্মাত্ ? দীপনগ্রাহিলাঘবাত্| দীপনগ্রাহিশব্দযোরত্র ভাবপ্রধানযোর্নির্দেশঃ, যথা "হ্যেকযোর্দ্বিবচনৈকবচনে" ইত্যত্র| অত এবৈতৌ ভাবপ্রত্যান্তেন লাঘবশব্দেন সহ নির্দিষ্টৌ| ভাষ্যকারস্ত্বাহ-"দ্বন্দ্বাত্পরো যঃ শ্রূযতে স সর্বৈঃ সম্বধ্যতে|" ইতি| তেন দীপনগ্রাহিশব্দযোরপি ভবপ্রত্যযার্থসম্বন্ধো ভবতীতি| মধুরপাকিত্বাত্ পিত্তপ্রদূষণং চ ন ভবতি| নচপদেন প্রকর্ষদূষণং পিত্তস্য তক্রং নিষিধ্যতে| তেনার্থাত্ কিঞ্চিত্ পিত্তকরমিত্যুক্তং ভবতি| কষাযোষ্ণবিকাশিত্বাদ্রূক্ষত্বাচ্চ কফে হিতম্| তক্রং রূক্ষত্বাচ্চেতি পৃথঙ্ক্ষির্দেশাদ্রূক্ষত্বস্য তক্রগতস্য যথা কফে হিতত্বং দ্রব্যস্বভাবান্ন তথা কষাযাদীনামেতদ্ দ্যোতযতি| বাতে স্বাদ্বম্লসান্দ্রত্বাত্তক্রং পথ্যম্| কিম্ভূতম্ ? সদ্যস্কং-সদ্যোবিলোডিতম্, অত এব ন বিদাহি| ননু, গ্রহণীদোষিণাং তক্রং পথ্যমিত্যেতাবদস্তু| কিং হেতুনির্দেশেন ? অত্রোচ্যতে| লঘ্বাদিগুণেভ্যঃ প্রাঙ্ক্ষিরূপিত্তেভ্যোঽধিকান্ বিকাশিত্বমধুরপাকাদীনভিধাতুং দীপনাদযোঽপি তত্প্রসঙ্গান্নির্দিষ্টাঃ| অপি চ, গ্রহণীদোষিণাং তক্রং পথ্যম্ যথা দীপনাদিগুণযোগাত্তথান্যদপি যদ্দ্রব্যমেবংগুণং গ্রহণীদোষচিকিত্সিতে নোক্তং তদপি গ্রহণীদোষিণাং পথ্যমিতি হেতুনির্দেশেন দ্যোত্যতে| দ্রব্যস্বভাবাত্তু বিশেষেণ গ্রহণীদোষিণাং তক্রং পথ্যমিতি| এষ চ ন্যাযোঽনত্রাপি সহেতুকদ্রব্যকথনে যোজ্যঃ| কিঞ্চ যত্তদোর্নিত্যাভিসম্বন্ধাদেবংনির্দেশাচ্চাযমর্থোঽবতিষ্ঠতে,- যদেবংবিধং তক্রং তদ্ গ্রহণীদোষিণাং পথ্যম্, নান্যাদ্রুশং যদনুদ্ধৃতস্নেহমথবাঽর্ধোদ্ধৃতস্নেহং তথাঽতিজাতত্বাদম্লং তথাঽসদ্যস্কং বিদাহি চ, তত্সর্বং গ্রহণীদোষিণামপথ্যমেব| তক্রে চ রূক্ষস্বাদ্বম্লাদযো গুণাঃ পরস্পরবিরুদ্ধা আপি দ্রব্যপ্রভাবাত্ কফবিজযিত্বং বাতবিজযিত্বং চ যথাযোগং কুর্বন্ত্যেব স্বং স্বং কর্ম, যথা সত্বরজস্তমঃসংজ্ঞা গুণাঃ|

Adhikarana vAtaje sAme amlAdicUrNam (6-7) · Śloka 7

চতুর্ণাং প্রস্থমম্লানাং ত্র্যূষণাচ্চ পলত্রযম্| লবণানাং চ চত্বারি শর্করাযাঃ পলাষ্টকম্||৬|| তচ্চূর্ণং শাকসূপান্নরাগাদিষ্ববচারযেত্| কাসাজীর্ণারুচিশ্বাসহৃত্পাণ্ডুপ্লীহগুল্মনুত্||৭||

স০-অম্লানাং চতুর্ণাং-কোলদাডিমবৃক্ষাম্লচুক্রিকাণাং, প্রস্থম্| কেচিত্তু বৃক্ষাম্লাম্লবেতসদাডিমবদরাণামিত্যাহুঃ| ত্রিকটুকাত্ পলত্রযম্| লবণানাং চ চত্বারি পলানি| শরকরাযাঃ পলান্যষ্টৌ| তদেতচ্চূর্ণং শাকাদিষ্ববচারযেত্-মিশ্রযেত্| তচ্চ কাসাদিজিত্|

Adhikarana vAtaje sAme nAgarAdikvAthakalkau, nAgaraharItakIcUrNe, vacAdicUrNam (8-9) · Śloka 9

নাগরাতিবিষামুস্তং পাক্যমামহরং পিবেত্| উষ্ণাম্বুনা বা তত্কল্কং নাগরং বাঽথবাঽভযাম্||৮|| সসৈন্ধবম্ বচাদিং বা তদ্বন্মদিরযাঽথবা| |৯|

স০-নাগরাদি পাক্যং ক্বাথযিত্বাঽঽমঘ্নং পিবেত্| অথবা, তেষাং-নাগরাদীনাং, কল্কমুষ্ণাম্বুনা পিবেত্| অথবা, শুণ্ঠীমুষ্ণাম্বুনা পিবেত্ হরীতকীং ব| বচাদিগণং বা সৈন্ধবান্বিতং তদ্বত্-উষ্ণাম্বুনা, পিবেত্| বচাদিমেব মদিরযা বা পিবেত্|

Adhikarana vAtaje sAme sapravAhe biDalavaNAdi cUrNam (9-10) · Śloka 10

| বর্চস্যামে সপ্রবাহে পিবেদ্বা দাডিমাম্বুনা||৯|| বিডেন লবণং পিষ্টং বিল্বচিত্রকনাগরম্| সামে কফানিলে কোষ্ঠরুক্করে কোষ্ণবারিণা||১০||

স০-পুরীষ আমে তথা সপ্রবাহে বিডেনোপলক্ষিতং লবণং বিডলবণং পিষ্টং দাডিমাম্বুনা বা পিবেত্| সামে বাতকফে কোষ্ঠরুজাকরে বিল্বাদীনি কোষ্ণবারিণা পিবেত্|

Adhikarana vAtaje sAme kali~ggAdicUrNam pathyAdicUrNam (11-12) · Śloka 12

কলিঙ্গহিঙ্গ্বতিবিষাবচাসৌবর্চলাভযম্| ছর্দিহৃদ্রোগশূলেষু পেযমুষ্ণেন বারিণা||১১|| পথ্যাসৌবর্চলাজাজীচূর্ণং মরিচসংযুতম্| |১২|

স০-ছর্দ্যাদিষু কলিঙ্গাদিকং কোষ্ণেন বারিণা পেযম্| পথ্যাদিকং চূর্ণং সমরিচমুষ্ণজলেন পিবেত্| পূর্বগুণম্|

Adhikarana vAtaje sAme pippalyAdicUrNam (12-14) · Śloka 14

| পিপ্পলীং নাগরং পাঠাং সারিবাং বৃহতীদ্বযম্||১২|| চিত্রকং কৌটজং ক্ষারং তথা লবণপঞ্চকম্| চূর্ণীকৃতং দধিসুরাতন্মণ্ডোষ্ণাম্বুকাঞ্জিকৈঃ||১৩|| পিবেদগ্নিবিবৃদ্ধ্যর্থং কোষ্ঠবাতহরং পরম্| |১৪|

স০-পিপ্পল্যাদিকং সূক্ষ্মরজীকৃতং দধ্যাদিভিরগ্নিদীপ্ত্যর্থং পিবেত্| তস্যাঃ সুরাযা মণ্ডস্তন্মণ্ডঃ| কোষ্ঠবাতহরং চৈতচ্চূর্ণং স্যাত্|

Adhikarana vAtaje sAme lavaNapa~jcakAdi guTikA (14-15) · Śloka 15

| পটুনি পঞ্চ দ্বৌ ক্ষারৌ মরিচং পঞ্চকোলকম্||১৪|| দীপ্যকং হিঙ্গুগুলিকা বীজপূররসে কৃতা| কোলদাডিমতোযে বা পরং পাচনদীপনী||১৫||

স০-লবণপঞ্চকাদিভির্গুটিকা বীজপূররসে কৃতা কোলদাডিমজলে বা কৃতাঽতিশযেন পাচনী দীপনী চ স্যাত্|

Adhikarana vAtaje sAme tAlIsAdiguTikA (16-21) · Śloka 21

তালীসপত্রচবিকামরিচানাং পলং পলম্| কৃষ্ণাতন্মূলযোর্দ্বে দ্বে পলে শুণ্ঠী পলত্রযম্||১৬|| চতুর্জাতমুশীরং চ কর্ষাংশং শ্লক্ষ্ণচূর্ণিতম্| গুডেন বটকান্ কৃত্বা ত্রিগুণেন সদা ভজেত্||১৭|| মদ্যযূষরসারিষ্টমস্তুপেযাপযোনুপঃ| বাতশ্লেষ্মাত্মনাং ছর্দিগ্রহণীপার্শ্বহৃদ্রুজাম্||১৮|| জ্বরশ্বযথুপাণ্ডুত্বগুল্মপানাত্যযার্শসাম্| প্রসেকপীনসশ্বাসকাসানাং চ নিবৃত্তযে||১৯|| অভযাং নাগরস্থানে দদ্যাত্তত্রৈব বিড্গ্রহে| ছর্দ্যাদিষু চ পৈত্তেষু চতুর্গুণসিতান্বিতাঃ||২০|| পক্বেন বটকাঃ কার্যা গুডেন সিতযাঽপি বা| পরং হি বহ্নিসম্পর্কাল্লঘিমানং ভজন্তি তে||২১||

স০-তালীসপত্রাদীনাং প্রত্যেকং পলম্| পিপ্পলী পলে দ্বে| পিপ্পলীমূলস্য দ্বে| শুণ্ঠী পলত্রযম্| চতুর্জাতমুশীরং চ পৃথক্ কর্ষভাগম্| গুডেন ত্রিগুণেন বটকান্ কৃত্বা মদ্যাদীন্ পিবন্ সদা ভজেত্| কিমর্থমিত্যাহ-বাতকফাত্মকচ্ছর্দ্যাদীনাং শান্ত্যর্থম্| তত্র চ (ত্রৈব)-এতেষ্বেব চ বটকেষু, বিড্গ্রহে-বিড্বিবন্ধে সতি, অভযাং নাগরস্থানে দদ্যাত্| ছর্দ্যাদিষু পূর্বোক্তেষু পিত্তোদ্ভবেষু সত্সু গুডবর্জং চতুর্গুণসিতযা যুক্তা বটকাঃ কার্যাঃ| বটকানাং বিধানমাহ-পক্বেন গুডেন বটকাঃ কার্যাঃ, সিতযা বা পক্বযা কার্যাঃ| কিমিতি পক্বেন ক্রিযন্তে ? ইত্যাহ-যস্মাত্কারণাদগ্নিসম্পর্কাত্ তে-বটকাঃ, পরং লঘুত্বং ভজন্তি| লঘোর্ভাবো লঘিমা, "পৃথ্বাদিভ্য ইমনিচ্|" "টেঃ" ইতি টিলোপঃ|

Adhikarana vAtaje nirAme ghRutam, nirUhabastiH, virecanam (22-24) · Śloka 24

সামচিকিত্সামুক্ত্বা নিরামচিকিত্সাং বিশেষেণাহ অথৈনং পরিক্বামং মারুতগ্রহণীগদম্| দীপনীযযুতং সর্পিঃ পাযযেদল্পশো ভিষক্||২২|| কিঞ্চিত্সন্ধুক্ষিতে ত্বগ্নৌ সক্তবিণ্মূত্রমারুতম্| দ্ব্যহং ত্র্যহং বা সংস্নেহ্য স্বিন্নাভ্যক্তং নুরূহযেত্||২৩|| তত এরণ্ডতৈলেন সর্পিষা তৈল্বকেন বা| সক্ষারেণানিলে শান্তে স্রস্তদোষং বিরেচযেত্||২৪||

স০-মারুতগ্রহণীগদা বিদ্যন্তে যস্যেতি "অর্শআদিত্বাত্(ভ্যোঽ)অচ্"| এনং-মারুতগ্রহণীগদবন্তং, দীপনীযৌষধযুতং-পঞ্চকোলপ্রাযদ্রব্যান্বিতং, বহ্নিসন্ধুক্ষণার্থমল্পমাত্রযা ঘৃতং পাযযেত্| কিঞ্চিত্সন্ধুক্ষিতে-মনাক্ সন্দীপিতে, ত্বগ্নৌ সতি সক্তবিণ্মূত্রপবনং নরং দ্বে দিনে ত্রীণি বা সস্নেহ্য-স্নেহযিত্বা, অনন্তরং স্বিন্নাভ্যক্তং কৃত্বা নিরুহযেত্| ততো-নিরুহাদনন্তরং, মারুতে শান্তে সত্যেরণ্ডতৈলেনাথবা তৈল্বকেন (হৃ.চি.অ.২৯১৩২) ঘৃতেন সক্ষারেণ স্রস্তদোষং-প্রচ্যুতদোষং, বিরেচযেত্|

Adhikarana vAtaje nirAme anuvAsanam, anantaraM laghvannam (25-26) · Śloka 26

শুদ্ধরূক্ষাশযং বদ্ধবর্চস্কং চানুবাসযেত্| দীপনীযাম্লবাতঘ্নসিদ্ধতৈলেন তং ততঃ||২৫|| নিরূঢং চ বিরিক্তং চ সম্যক্চাপ্যনুবাসিতম্| লঘ্বন্নপ্রতিসংযুক্তং সর্পিরভ্যাসযেত্পুনঃ||২৬||

স০-শুদ্ধো রূক্ষ আশযো যস্য স এবম্, তথা বদ্ধং বর্চঃ-পুরীষং যস্য তম্, শুদ্ধরূক্ষাশযমিতিহেতৌ প্রথমা, শুদ্ধরূক্ষাশযত্বেন বদ্ধবর্চস্কমিত্যর্থঃ| তথাবিধং নরমনুবাসযেত্| কেন ? দীপনীযানি-নাগরাদীনি, অম্লনি-বৃক্ষাম্লমাতুলুঙ্গদাডিমাদীনি, বাতঘ্নানি-কুষ্ঠরাস্রৈরণ্ডাদীনি, তৈর্দীপনীযাম্লবাতঘ্নৈঃ সিদ্ধতৈলেন| নিরূঢং বিরিক্তং চ বিধিনা চানুবাসিতং মাত্রযেত্যর্থঃ, সম্যক্ চাপ্যনুবাসিতং লঘ্বন্নপ্রতিসংযুক্তং পুনঃ সর্পিঃ শীলযেত্|

Adhikarana vAtaje nirAme pa~jcamUlAdighRutam (27-30) · Śloka 30

পঞ্চমূলাভযাব্যোষপিপ্পলীমূলসৈন্ধবৈঃ| রাস্নাক্ষারদ্বযাজাজীবিডাঙ্গশঠিভির্ঘৃতম্||২৭|| শুক্তেন মাতুলুঙ্গস্য স্বরসেনার্দ্রকস্য চ| শুষ্কমূলককোলাম্লচুক্রিকাদাডিমস্য চ||২৮|| তক্রমস্তুসুরামণ্ডসৌবীরকতুষোদকৈঃ| কাঞ্জিকেন চ তত্পক্বমগ্নিদীপ্তিকরং পরম্||২৯|| শূলগুল্মোদরশ্বাসকাসানিলকফাপহম্| |৩০|

স০-পঞ্চমূলাদিভিঃ কল্কৈর্দ্রব্যৈঃ শুক্তাদিভির্দ্রবদ্রব্যৈঃ সামান্যপরিভাষযা ঘৃতং পচেত্| পঞ্চমূলমিহ মহদ্গ্রাহ্যম্, সুতরাং বাতঘ্নত্বাত্| এতচ্চ ঘৃতং পরমগ্নিদীপ্তিকরং শূলাদিঘ্নম্|

Adhikarana vAtaje nirAme bIjapUrakaghRutam (30) · Śloka 30

| সবীজপূরকরসং সিদ্ধং বা পাযযেদ্ধৃতম্||৩০||

স০-বীজপূরকরসেন সহ সিদ্ধং বা ঘৃতং পাযযেত্|

Adhikarana vAtaje nirAme aBya~jjanArthaM tailam (31) · Śloka 31

তৈলমভ্যঞ্জনার্থং চ সিদ্ধমেভিশ্চলাপহম্| |৩১|

স০-এভিঃ পঞ্চমূলাদিভির্ঘৃতৌষধৈঃ সিদ্ধং তৈলং বাঽভ্যঞ্জনার্থং হিতম্|

Adhikarana vAtaje shleShmAvRutavAtAdau cUrNam (31-32) · Śloka 32

| এতেষামৌষধানাং বা পিবেচ্চূর্ণং সুখাম্বুনা||৩১|| বাতে শ্লেষ্মাবৃতে সামে কফে বা বাযুনোদ্ধতে| |৩২|

স০-এতেষামৌষধানাং পঞ্চমূলাদীনাং চূর্ণমুষ্ণাম্বুনা বা পিবেত্| কস্যামবস্থাযামিত্যাহ-বাতে| কিম্ভূতে? শ্লেষ্মাবৃতে, তথা সামে কফে বা, বাতেনোদ্ধতে সামে বা|

Adhikarana pittaje grahaNIdoShe vamanavirekau tiktAdyannaM cUrNasnehASca (32-33) · Śloka 33

অধুনা পিত্তগ্রহণীরোগচিকিত্সামাহ | অগ্নের্নির্বাপকং পিত্তং রেকেণ বমনেন বা||৩২|| হত্বা তিক্তলঘুগ্রাহিদীপনৈরবিদাহিভিঃ| অন্নৈঃ সন্ধুক্ষযেদগ্নিং চূর্ণৈঃ স্নেহৈশ্চ তিক্তকৈঃ||৩৩||

স০-অগ্নিপিত্তযোর্গ্রহণ্যাশ্রযত্বাদ্ দ্রবত্বাচ্চ যদগ্নেঃ প্লাবকং পিত্তমূর্ধ্বাধঃ প্রপন্নং তদ্যথাসন্নদেশং বমনেন বিরেকেণ বা হত্বা, আনন্তরং তমগ্নিমন্নৈস্তিক্তলঘুগ্রাহিদীপনৈঃ সন্ধুক্ষযেত্| কিম্ভূতৈঃ ? অবিদাহিভিঃ,-ন তু সামান্যেন দীপনৈঃ| ন কেবলমেবংবিধৈরন্নৈরগ্নিং সন্ধুক্ষযেত্, তথা চ চূর্ণৈঃ স্নেহৈশ্চ তং সন্ধুক্ষযেত্| কিম্ভূতৈঃ ? তিক্তকৈঃ-তিক্তদ্রব্যভূযিষ্ঠৈশ্চূর্ণৈস্তিক্তদ্রব্যসাধিতৈঃ স্নেহৈশ্চ|

Adhikarana pittaje grahaNIdoShe paTolAdi cUrNam (34-37) · Śloka 37

পটোলনিম্বত্রাযন্তীতিক্তাতিক্তকপর্পটম্| কুটজত্বক্ফলং মূর্বা মধুশিগ্রুফলং বচা||৩৪|| দার্বীত্বক্পদ্মকোশীরযবানীমুস্তচন্দনম্| সৌরাষ্ট্র্যতিবিষাব্যোষত্বগেলাপত্রদারু চ||৩৫|| চূর্ণিতং মধুনা লেহ্যং পেযং মদ্যৈর্জলেন বা| হৃত্পাণ্ডুগ্রহণীরোগগুল্মশূলারুচিজ্বরান্||৩৬|| কামলাং সন্নিপাতং চ মুখরোগাংশ্চ নাশযেত্| |৩৭|

স০-মধুশিগ্রুঃ-সোভাঞ্জনকবিশেষঃ, তস্য ফলং শ্বেতমরিচাখ্যম্| এতত্পটোলাদিকং চূর্ণিতং মধুনা লেহ্যমথবা জলেন পেযং মদ্যৈর্বা| তচ্চ হৃদ্রোগাদীন্ নাশযেত্|

Adhikarana pittaje grahaNIdoShe BUnimbAdi cUrNam (37-39) · Śloka 39

| ভূনিম্বকটুকামুস্তাত্র্যূষণেন্দ্রযবান্ সমান্||৩৭|| দ্বৌ চিত্রকাদ্বত্সকত্বগ্ভাগান্ ষোডশ চূর্ণযেত্| গুডশীতাম্বুনা পীতং গ্রহণীদোষগুল্মনুত্||৩৮|| কামলাজ্বরপাণ্ডুত্বমেহারুচ্যতিসারজিত্| |৩৯|

স০-ভূনিম্বাদ্যান্ সমভাগান্ চিত্রকাত্ দ্বৌ কুটজত্বচাং ষোডশ ভাগাংশ্চূর্ণযেত্| তদেতচ্চূর্ণং গুডযুতেন শীতাম্বুনা পীতং গ্রহণীরোগাদিহরম্|

Adhikarana pittaje grahaNIdoShe nAgarAdicUrNam (39-41) · Śloka 41

| নাগরাতিবিষামুস্তাপাঠাবিল্বং রসাঞ্জনম্||৩৯|| কুটজত্বক্ফলং তিক্তা ধাতকী চ কৃতং রজঃ| ক্ষৌদ্রতণ্ডুলবারিভ্যাং পৈত্তিকে গ্রহণীগদে||৪০|| প্রবাহিকার্শোগুদরুগ্রক্তোত্থানেষু চেষ্যতে| |৪১|

স০-নাগরাদিদ্রব্যং চূর্ণিতং ক্ষৌদ্রতণ্ডুলজলাভ্যাং সহ পৈত্তিকগ্রহণীরোগ ইষ্যতে, প্রবাহিকাদিষু চ|

Adhikarana pittaje grahaNIdoShe candanAdighRutam, kuShThoktaMtiktakaghRutam (41-44) · Śloka 44

| চন্দনং পদ্মকোশীরং পাঠাং মূর্বাং কুটন্নটম্||৪১|| ষড্গ্রন্থাসারিবাস্ফোতাসপ্তপর্ণাটারূষকান্| পটোলোদুম্বরাশ্বত্থবটপ্লক্ষকপীতনান্||৪২|| কটুকাং রোহিণীং মুস্তাং নিম্বং চ দ্বিপলাংশকান্| দ্রোণেঽপাং সাধযেত্তেন পচেত্সর্পিঃ পিচূন্মিতৈঃ||৪৩|| কিরাততিক্তেন্দ্রযববীরামাগধিকোত্পলৈঃ| পিত্তগ্রহণ্যাং তত্পেযং কুষ্ঠোক্তং তিক্তকং চ যত্||৪৪||

স০-চন্দনাদিদ্রব্যং প্রত্যেকং দ্বিপলাংশকমপাং দ্রোণে পচেত্| তেন ক্বাথেন পিচুপ্রমাণৈশ্চ কিরাততিক্তাদিভিঃ কল্কৈঃ সর্পিঃ পচেত্| কুটন্নটঃ-শ্যোনাকঃ| আস্ফোতা-উত্পলসারিবা| কপীতনো-বানীরঃ| অত্র চ সর্পিঃপ্রমাণং ক্বাথাপেক্ষযা দ্বাত্রিংশত্পলানি কল্প্যানি, ন তু কল্কাপেক্ষযা পঞ্চ পলানি| ক্বাথাদিদ্রবদ্রব্যস্য স্নেহপাকে প্রাধান্যাত্| যতঃ ক্বাথাদিদ্রবমন্তরেণ স্নেহপাকোঽপি নোপপদ্যতে, ন তু তথা কল্কং বিনা| তস্মাত্ ক্বাথস্য প্রাধান্যাত্ ক্বাথাপেক্ষযৈব সর্পির্গ্রাহ্যম্| তত্-এতদ্ঘৃতং, পিত্তগ্রহণ্যাং পেযম্| যচ্চ কুষ্ঠচিকিত্সিতে (চি. অ. ১৯/২) গদিতং তিক্তকং ঘৃতং তচ্চ পেযম্| চশব্দো মহাতিক্তকস্যাপি গ্রহণার্থঃ|

Adhikarana shleShmaje grahaNIdoShe vamanam, kaTvamlAdiBiragnivardhanam (45) · Śloka 45

গ্রহণ্যাং শ্লেষ্মদুষ্টাযাং তীক্ষ্ণৈঃ প্রচ্ছর্দনে কৃতে| কট্বম্ললবণক্ষারৈঃ ক্রমাদগ্নিং বিবর্ধযেত্||৪৫||

স০-শ্লেষ্মদুষ্টাযাং গ্রহণ্যাং তীক্ষ্ণৈর্দ্রব্যৈঃ প্রচ্ছর্দনে-বমনে, কৃতে সতি প্রথমং কট্বম্ললবণক্ষারৈরগ্নিং বিবর্ধযেত্|

Adhikarana shleShmaje grahaNIdoShe pa~jcakolAdisiddhaM peyAdyannam (46) · Śloka 46

পঞ্চকোলাভযাধান্যপাঠাগন্ধপলাশকৈঃ| বীজপূরপ্রগাঢৈশ্চ সিদ্ধৈঃ পেযাদি কল্পযেত্||৪৬||

স০-পঞ্চকোলাদিভিঃ সিদ্ধৈঃ-ক্বথিতৈঃ, পেযাদিকং কল্পযেত্| গন্ধপলাশং-গন্ধপত্রম্|

Adhikarana shleShmaje madhUkapuShpAdyAsavaH (47-50) · Śloka 50

দ্রোণং মধূকপুষ্পাণাং বিডঙ্গং চ ততোঽর্ধতঃ| চিত্রকস্য ততোঽর্ধং চ তথা ভল্লাতকাঢকম্||৪৭|| মঞ্জিষ্ঠাঽষ্টপলং চৈতজ্জলদ্রোণত্রযে পচেত্| দ্রোণশেষং শৃতং শীতং মধ্বর্ধাঢকসংযুতম্||৪৮|| এলামৃণালাগুরুভিশ্চন্দনেন চ রূষিতে| কুম্ভে মাসং স্থিতং জাতমাসবং তং প্রযোজযেত্||৪৯|| গ্রহণীং দীপযত্যেষ বৃংহণঃ পিত্তরক্তনুত্| শোষকুষ্ঠকিলাসানাং প্রমেহাণাং চ নাশনঃ||৫০||

স০-মধূককুসুমানাং দ্রোণম্| ততো-মধূকপুষ্পেভ্যঃ, অর্ধেন বিডঙ্গম্| ততো-বিডঙ্গাত্, চিত্রকস্যার্ধম্| ভল্লাতকস্য চাঢকম্| মঞ্জিষ্ঠাযাঃ পলান্যষ্টৌ| এতত্সর্বং পানীযদ্রোণত্রযে পচেত্| এতচ্চ দ্রোণশেষং শৃতং শীতং মধুনোঽর্ধাঢকেন সংযুক্তমেলাদিভিঃ কুম্মে রূষিতে-লিপ্তে, মাসং স্থিতং তং-এবংবিধং জাতং, আসবং প্রযোজযেত্| এষঃ-আসবো, গ্রহণীং দীপযতি বৃংহণো রক্তপিত্তাদিনাশনঃ|

Adhikarana shleShmaje grahaNIdoShe madhUkapuShpasvarasAsavaH (51-52) · Śloka 52

মধূকপুষ্পস্বরসং শৃতমর্ধক্ষযীকৃতম্| ক্ষৌদ্রপাদযুতং শীতং পূর্ববত্সন্নিধাপযেত্||৫১|| তত্পিবন্ গ্রহণীদোষান্ জযেত্সর্বান্ হিতাশনঃ| |৫২|

স০-মধূকপুষ্পাণাং কুডবস্বরসং চ ক্বথিতমর্ধক্ষযীকৃতং-অর্ধাবশেষং, শীতং মাক্ষিকচতুর্থভগযুতং পূর্ববত্-পূর্বেণ তুল্যমেলাদিরূষিতে ভাণ্ডে মাসং যাবত্, সন্নিধাপযেত্-সম্যক্ স্থাপযেত্| "মধূকপুষ্পকুডবং" ইত্যাদি যোঽযং পরিমাণনির্দেশঃ স ইহ মাত্রাদিক্প্রদর্শনপরঃ| অনযা দিশাঽযং সন্ধাতব্যো বহুঃ, ন ত্বেতাবান্| অন্যথা হ্যল্পসম্ভৃতত্বাদযমাসবো ন শোভনঃ স্যাত্| অন্যত্র ত্বাসবারিষ্টলেহাদৌ পরিপূর্ণত্বাত্ যথানির্দিষ্টৈব মাত্রা যথোক্তগুণকলাপং করোতি, ন ন্যূনাধিকেতি বেদ্যম্| তত্ এতত্, পিবন্নাতুরো হিতভোজী সন্ সর্বান্ গ্রহণীদোষান্ জযতি|

Adhikarana shleShmaje grahaNIdoShe drAkShAdisvarasAsavAH (52) · Śloka 52

| তদ্বদ্দ্রাক্ষেক্ষুখর্জূরস্বরসানাসুতান্ পিবেত্||৫২||

স০-[তদ্বত্-] যথৈষ মধূকপুষ্পক্বাথ আসুতস্তথৈব, দ্রাক্ষাদিস্বরসানাসুতান্ পিবেত্| যথা চ মধূকপুষ্পাণাং ক্বাথ আদিষ্টো গ্রন্থকৃতা তথৈব দ্রাক্ষাদীনাং স্বরসাভবে ক্বাথো গ্রাহ্যাঃ, তস্য দিক্প্রদর্শনপরত্বাত্|

Adhikarana shleShmaje grahaNIdoShe hi~ggvAdikShAraH (53-56) · Śloka 56

হিঙ্গুতিক্তাবচামাদ্রীপাঠেন্দ্রযবগোক্ষুরম্| পঞ্চকোলং চ কর্ষাংশং পলাংশং পটুপঞ্চকম্||৫৩|| ঘৃততৈলদ্বিকুডবে দধ্নঃ প্রস্থদ্বযে চ তত্| আপোথ্য ক্বাথযেদগ্নৌ মৃদাবনুগতে রসে||৫৪|| অন্তর্ধূমং ততো দগ্ধ্বা চূর্ণীকৃত্য ঘৃতাপ্লুতম্| পিবেত্পাণিতলং তস্মিন্ জীর্ণে স্যান্মধুরাশনঃ||৫৫|| বাতশ্লেষ্মামযান্ সর্বান্ হন্যাদ্বিষগরাংশ্চ সঃ| |৫৬|

স০-হিঙ্গ্বাদি কর্ষপ্রমাণং লবণানি পঞ্চ পলপ্রমাণানি| তদেতদ্ঘৃততৈলযোঃ কুডবদ্বযে দধিপ্রস্থদ্বযে চাপোথ্য-সঙ্ক্ষুদ্য, মৃদাবগ্নৌ ক্বাথযেত্| রসে চানুগতে-প্রবিষ্টে সতি, অনন্তরমন্তর্ধূমং কলশে দগ্ধ্বা ততশ্চূর্ণীকৃত্য কর্ষমাত্রং ঘৃতালোডিতং পিবেত্| তস্মিন্ জীর্ণে মধুরভোজী স্যাত্| স চ-ক্ষারো, বাতকফরোগাদীন্ হন্তি|

Adhikarana shleShmaje grahaNIdoShe BUnimbAdikShAraH (56-57) · Śloka 57

| ভূনিম্বং রোহিণীং তিক্তাং পটোলং নিম্বপর্পটম্||৫৬|| দগ্ধ্বা মাহিষমূত্রেণ পিবেদগ্নিবিবর্ধনম্| |৫৭|

স০-ভুনিম্বাদীনি দগ্ধ্বা মাহিষমূত্রেণ পিবেত্| তচ্চ পীতং বহ্নিং বর্ধযতি|

Adhikarana shleShmaje grahaNIdoShe haridrAdikShAraH (57-58) · Śloka 58

| দ্বে হরিদ্রে বচা কুষ্ঠং চিত্রকঃ কটুরোহিণী||৫৭|| মুস্তা চ ছাগমূত্রেণ সিদ্ধঃ ক্ষারোঽগ্নিবর্ধনঃ| |৫৮|

স০-কটুরোহিণী-কটুকা| হরিদ্রাদ্বযাদেশ্ছাগমূত্রেণ সিদ্ধঃ পূর্ববদগ্নিবৃদ্ধিকৃত্ ক্ষারঃ|

Adhikarana shleShmaje grahaNIdoShe sudhAkANDAdikShAraguTikA (58-60) · Śloka 60

| চতুষ্পলং সুধাকাণ্ডাত্রিপলং লবণত্রযাত্||৫৮|| বার্তাককুডবং চার্কাদষ্টৌ দ্বে চিত্রকাত্পলে| দগ্ধ্বা রসেন বার্তাকাদ্গুটিকা ভোজনোত্তরাঃ||৫৯|| ভুক্তমন্নং পচন্ত্যাশু কাসশ্বাসার্শসাং হিতাঃ| বিসূচিকাপ্রতিশ্যাযহৃদ্রোগশমনাশ্চ তাঃ||৬০||

স০-সুধাস্তম্ভাচ্চত্বারি পলানি, লবণত্রযাত্রীণি পলানি, পক্বশুষ্কবার্তাককুডবম্, অর্কাদষ্টৌ পলানি, চিত্রকপলে দ্বে, এতত্সর্বং দগ্ধ্বা, ততো বার্তাকানাং রসেন কৃতা গুলিকা ভুক্তং উপযুক্তং, ভোজনং পচন্ত্যাশু| কাসাদিভ্যো হিতাঃ| বিসূচিকাদিঘ্ন্যশ্চ স্মৃতাঃ|

Adhikarana shleShmaje grahaNIdoShe mAtulu~ggAdicUrNam (61-62) · Śloka 62

মাতুলুঙ্গশঠীরাস্নাকটুত্রযহরীতকি| স্বর্জিকাযাবশূকাখ্যৌ ক্ষারৌ পঞ্চপটূনি চ||৬১|| সুখাম্বুপীতং তচ্চূর্ণং বলবর্ণাগ্নিবর্ধনম্| |৬২|

স০-মাতুলুঙ্গাদিকং চূর্ণমুষ্ণোদকেন পীতং বলাদিবর্ধনম্|

Adhikarana shleShmaje savAte mAtulu~ggAdighRutam, dhAnvantarAdighRutAni (62-63) · Śloka 63

| শ্লৈষ্মিকে গ্রহণীদোষে সবাতে তৈর্ঘৃতং পচেত্||৬২|| ধান্বন্তরং ষট্পলং চ ভল্লাতকঘৃতাভযম্| |৬৩|

স০-শ্লৈষ্মিকে গ্রহণীদোষে বাতান্বিতে তৈঃ-মাতুলুঙ্গাদিভিঃ, ঘ্রুতং পচেত্| অথবা, ধান্বন্তরং ঘৃতং-প্রমেহচিকিত্সিতে "দশমূলশঠী" (চি. অ. ১২/১৯) ইত্যাদিকম্| ষট্পলং-রাজযক্ষ্যচিকিত্সিতে "পঞ্চকোলযবক্ষার" (চি. অ. ৫/২২) ইত্যাদিকম্| ভল্লাতকঘৃতং-গুল্মোক্তং "ভল্লাতকানাং দ্বিপলং" (চি. অ. ১৪/৮০) ইত্যাদিকম্| অভয্ঘৃতং-উদরচিকিত্সিতে "হরীতকীসূক্ষ্মরজঃ" (চি. অ. ১৫/২৮) ইত্যাদিকম্|

Adhikarana shleShmaje savAte biDAdikShAraghRutam (63-65) · Śloka 65

| বিডকাচোষলবণস্বর্জিকাযাবশূকজান্||৬৩|| সপ্তলাং কণ্টকারীং চ চিত্রকং চৈকতো দহেত্| সপ্তকৃত্বঃ স্রুতস্যাস্য ক্ষারস্যার্ধাঢকে পচেত্||৬৪|| আঢকং সর্পিষঃ পেযং তদগ্নিবলবৃদ্ধযে| |৬৫|

স০-বিডলবণং কাচলবণং-কৃষ্ণলবণং, ক্ষারলবণং স্বর্জিকাদীংশ্চৈকস্মিন্ কৃত্বা দহেত্| সপ্তবারানস্য ক্ষারস্য স্রুতস্য চার্ধাঢকে সর্পিষ আঢকং পচেত্| তদ্ঘৃতমগ্নিবলাদিবৃদ্ধযে পেযম্|

Adhikarana sanipAtaje grahaNIdoShe pa~jcakarmANi (65) · Śloka 65

| নিচযে পঞ্চকর্মাণি যুঞ্জ্যাচ্চৈতদ্যথাবলম্||৬৫||

স০-নিচযে-সন্নিপাতজে গ্রহণীদোষে, পঞ্চকর্মাণি-বমনবিরেচনাস্থাপনানুবাসননস্যানি, যথাবলং যুঞ্জ্যাত্| যদ্যপি শিরোবিরেচনাখ্যস্য কর্মণো বাহুল্যেন গ্রহণীদোষে প্রযোজনং ন তথা দৃশ্যতে যথা বমনাদীনাম্, তথাঽপি ভূযস্ত্বমুররীকৃত্য পঞ্চকর্মাণীত্যুক্তম্| চশব্দাদ্যদেতদ্ধহণীত্রযে প্রতিদোষমাশ্রিত্যোক্তং কর্ম তদপি নিচযোত্থে গ্রহণীদোষে যুঞ্জ্যাত্|

Adhikarana mandAgnau pratidoShaM pratyavasthaM ca cikitsitam (66-68) · Śloka 68

ইতি গ্রহণিদোষস্য চতুর্বিধস্য চিকিত্সামাভিধাযেদানীং প্রতিপুরুষং প্রতিদোষং মন্দাগ্নিত্বমাশ্রিত্য যথাবস্থং চিকিত্সিতং নির্দিশন্নাহ প্রসেকে শ্লৈষ্মিকেঽল্পাগ্নের্দীপনং রূক্ষতিক্তকম্| যোজ্যং কৃশস্য ব্যত্যাসাত্স্নিগ্ধরূক্ষং কফোদযে||৬৬|| ক্ষীণক্ষামশরীরস্য দীপনং স্নেহসংযুতম্| দীপনং বহুপিত্তস্য তিক্তং মধুরকৈর্যুতম্||৬৭|| স্নেহোঽম্ললবণৈর্যুক্তো বহুবাতস্য শস্যতে| |৬৮|

স০-প্রসেকো দ্বিবিধঃ-বাতিকঃ শ্লৈষ্মিকশ্চ| তত্র মন্দাগ্নেঃ শ্লৈষ্মপ্রকোপজে প্রসেকে দীপনং রূক্ষতিক্তং যদ্ দ্রব্যং তত্প্রযোজ্যম্, ন ঘৃতং নাপি মধুরাম্ললবণাদিকম্| শ্লেষ্মজপ্রসেকস্য চ লক্ষণম্ (হৃ.চি.অ.৫/৬৩)- "শ্লেষ্মণোঽতিপ্রসেকেন বাযুঃ শ্লেষ্মাণমস্যতি|" ইত্যাদি| কৃশস্য পুনর্মন্দাগ্নেঃ কফোদযে সতি ব্যত্যাসাত্ পর্যাযেণ ব্যতিকর্মব্যবহারার্থঃ| ব্যত্যাসাত্ স্নিগ্ধরূক্ষং যোজ্যম্,-স্নিগ্ধং যোজযিত্বা রূক্ষং যোজ্যং রূক্ষং যোজযিত্বা স্নিগ্ধং যোজ্যমিত্যর্থঃ| যদি হি কৃশে বহুকফে রূক্ষে চ নরে রূক্ষমেব যুঞ্জ্যাত্, ততো রূক্ষে কেবলে যুজ্যমানে কার্শ্যস্য বৃদ্ধিঃ স্যাত্| অথ স্নেহমেব যুঞ্জযাত্, ততঃ স্নেহে কেবলে যুজ্যমানে কফবৃদ্ধিঃ স্যাত্| ইতি ব্যত্যাসেন স্নিগ্ধরূক্ষমুপযোজ্যম্| ক্ষীণক্ষামশরীরস্য তু কফোদযে দীপনং দ্রব্যং-পঞ্চকোলাদিকং, স্নেহৈঃ-ঘৃতাদিভিঃ, সংযুতং স্নেহসংযুক্তং যুঞ্জ্যাত্| বহুপিত্তস্য মন্দাগ্রেস্তিক্তং মধুরকৈর্দ্রব্যৈর্যুক্তং দীপনং যোজ্যম্| বহুবাতসয্ মন্দাগ্নের্নরস্য স্নেহোঽম্ললবণৈর্যুক্তঃ প্রাযেণ শস্যতে|

Adhikarana mandAgnau sneha eva shreShThaM BeShajam (68-69) · Śloka 69

স্নেহস্য মন্দাগ্নিবিষযেভ্যোঽন্যদ্রব্যেভ্যঃ প্রাযেণ প্রাধান্যং সর্বপুরুষং প্রতি দ্যোতযিতুমিদং ব্রূতে | স্নেহমেব পরং বিদ্যাদ্দুর্বলানলদীপনম্||৬৮|| নালং স্নেহসমিদ্ধস্য শমাযান্নং সুগুর্বপি| |৬৯|

স০-এবেত্যবধারণে| পরং-প্রধানং, স্নেহমেব মন্দাগ্রের্বিদ্যাত্, ন ততোঽন্যদ্ দ্রব্যম্| তস্মান্মন্দাগ্নের্দোষপ্রতিপক্ষভুতৈরৌষধৈর্যুক্তঃ স্নেহো বাহুল্যেন পথ্যঃ| অত এবেদং কারণং নির্দিশন্নাহ-নালমিত্যাদি| যস্মাত্ স্নেহোদ্দীপিতস্যাগ্রেঃ সুষ্ঠু গুর্বপ্যন্নং শমায নালং-পর্যাপ্তম্| তস্মাত্ স্নেহ এব দুর্বলানলদীপনায শ্রেষ্ঠঃ|

Adhikarana mandAgnau kaphe kShINe ghRutam (69-71) · Śloka 71

| যোঽঽল্পাগ্নিত্বাত্কফে ক্ষীণে বর্চঃ পক্বমপি শ্লথম্||৬৯|| মুঞ্চেত্পট্বৌষধযুতং স পিবেদল্পশো ঘৃতম্| তেন স্বমার্গমানীতঃ স্বকর্মণি নিযোজিতঃ||৭০|| সমানো দীপযত্যগ্নিমগ্নেঃ সন্ধুক্ষকো হি সঃ| |৭১|

স০-যঃ-নরঃ, অল্পাগ্নিত্বাত্কফে ক্ষীণে সতি পুরীষং পক্বমপি শিথিলং মুঞ্চেত্, সঃ-নরঃ, অল্পমল্পং ঘৃতং পিবেত্| কিম্ভুতম্ ? পট্বৌষধযুতং-সৈন্ধবশুণ্ঠীযুক্তম্| তেন-সর্পিষা, সমানঃ স্বমার্গমানীয স্বকর্মণি-অন্নপচনাখ্যে, নিযোজিতোঽগ্নিং সন্দীপযতি| যতোঽসৌ-সমানঃ, অগ্নে সন্ধুক্ষকঃ|

Adhikarana mandAgnau kaThinamale lavaNaghRutam (71-72) · Śloka 72

| পুরীষং যশ্চ কৃচ্ছ্রেণ কঠিনত্বাদ্বিমুঞ্চতি||৭১|| স ঘৃতং লবণৈর্যুক্তং নরোঽন্নাবগ্রহং পিবেত্| |৭২|

স০-যশ্চ-পুরুষঃ, পুরীষং কাঠিন্যাত্-সংহতত্বাদ্ধেতোঃ,কৃচ্ছ্রেণ মুঞ্চতি| সঃ-নরঃ, লবণৈঃ পঞ্চভির্যুক্তং ঘৃতং পিবেত্| কিম্ভূতম্ ? অন্নাবগ্রহং,-অন্নেনাবগ্রহঃ সহসোর্ধ্বকাযগমনপ্রতিবন্ধোঽবষ্টম্ভো যস্য তদেবম্| ঘৃতং পীত্বাঽন্নং ভোক্তব্যমিত্যর্থঃ|

Adhikarana mandAgnau rUkShatve dIpanaM ghRutaM tailaM vA (72) · Śloka 72

| রৌক্ষ্যান্মন্দেঽনলে সর্পিস্তৈলং বা দীপনৈঃ পিবেত্||৭২||

স০-রৌক্ষ্যাদ্ধেতোর্মন্দেঽগ্নৌ সতি সর্পিরথবা তৈলং দীপনীযৈর্যুতং পিবেত্|

Adhikarana mandAgnau snehAtiyoge kShArAdayaH (73) · Śloka 73

ক্ষারচূর্ণাসবারিষ্টান্ মন্দে স্নেহাতিপানতঃ| |৭৩|

স০-স্নেহাতিপানাদ্ধেতোর্মন্দেঽগ্নৌ সতি ক্ষারাদীন্ পিবেত্|

Adhikarana mandAgnau udAvartaje nirUhasneha bastayaH (73) · Śloka 73

| উদাবর্তাত্তু যোক্তব্যা নিরূহস্নেহবস্তযঃ||৭৩||

স০-উদাবর্তাত্পুনর্মন্দেঽগ্নৌ সতি নিরূহস্নেহবস্তযঃ প্রযোক্তব্যাঃ|

Adhikarana mandAgnau doShAtivRuddhije SuddhiH peyAdikramaSca (74) · Śloka 74

দোষাতিবৃধ্দ্যা মন্দেঽগ্নৌ সংশুদ্ধোঽন্নবিধিং চরেত্| |৭৪|

সং-দোষাঽতিবৃদ্ধযা মন্দেঽগ্নৌ সতি বমনবিরেচনাদিভির্হৃ তদোষঃ কৃতসংশুদ্ধিরন্নবিধিং-পেযাদিক্রমং, আচরেত্|

Adhikarana mandAgnau vyAdhimuktasya GRutameva (74) · Śloka 74

| ব্যাধিমুক্তস্য মন্দেঽগ্নৌ সর্পিরেব তু দীপনম্||৭৪||

স০-ব্যাধিমুক্তস্য মন্দেঽগ্নৌ সর্পিরেব দীপনং স্যাত্, নান্যত্তথদ্রব্যম্|

Adhikarana mandAgnau adhvAdije yavAgUghRutam (75) · Śloka 75

অধ্বোপবাসক্ষমত্বৈর্যবাগ্বা পাযযেদ্ধৃতম্| অন্নাবপীডিতং বল্যং দীপনং বৃহণং চ তত্||৭৫||

স০-অধ্বোপবাসক্ষামত্বৈর্মন্দেঽগ্নৌ যবাগ্বা সহ ঘৃতং পাযযেত্, বৈদ্য ইতি শেষঃ| কিম্ভূতম্ ? অন্নেনাবপীডিতমন্নাবপীডিতম্, মধ্যভক্তং ঘৃতমিত্যর্থঃ| এবং পীতং বল্যং বৃহণং দীপনং চ তদ্ভবতি|

Adhikarana mandAgnau dIrghakAlaje sAmlA mAMsarasAH (76-77) · Śloka 77

দীর্ঘকালপ্রসঙ্গাত্তু ক্ষামক্ষীণকৃশান্নরান্| প্রসহানাং রসৈঃ সাম্লৈর্ভোজযেত্পিশিতাশিনাম্||৭৬|| লঘূষ্ণকটুশোধিত্বাদ্ দীপযন্ত্যাশু তেঽনলম্| মাংসোপচিতমাংসত্বাত্পরং চ বলবর্ধনাঃ||৭৭||

স০-দীর্ঘকালপ্রসঙ্গাত্তু মন্দেঽগ্নৌ সত্যসম্যগাহাররসপরিণত্যা হেতুভূতযা ক্ষামক্ষীণকৃশান্নরান্ পিশিতাশিনাং-প্রসহাদীনাং, রসৈঃ সাম্লৈর্ভোজযেত্| কস্মাত্তানেতান্ ভোজযেত্? ইত্যাহ-লঘূষ্ণেত্যাদি| লঘুত্বাদুষ্ণত্বাত্কটুত্বাচ্ছোধনত্বাচ্চ তে রসাঃ শীঘ্রমগ্নিং দীপযন্তি| ভাবপ্রধাননির্দেশঃ পূর্ববচ্চাত্র যোজ্যঃ| ননু, প্রাগভ্যধাযি (হৃ. সূ. অ. ৬/৬১)- "গুরুষ্ণস্নিগ্ধমধুরা বর্গাশ্চাতো যথোত্তরম্|" ইতি| ইহ চ প্রসহানাং লঘুত্বমুচ্যতে| তদিমে বচসী পরস্পরং ব্যাঘ্নাতে| অত্র ব্রূমঃ| লাঘবশব্দোঽত্র ক্রিযাবিশেষার্থঃ| ধাবনপ্লবনলঙ্ঘনাদিকা চেষ্টা, তস্যাঃ পাটববিশেষো লাঘবম্| যথা চ প্রাগধ্যগীষ্ট (হৃ. সূ. অ. ২/১০)-"লাঘবং কর্মসামর্থ্য" ইতি| এবং চাত্রাবিরোধঃ| হেতুনির্দেশাদন্যেঽপ্যেবংপ্রাযা যে মাং সরসাস্তানপ্যেতান্ ভোজযেদিতি| তে চ-প্রসহাঃ, মাংসোপচিতমাংসত্বাদ্ধেতোঃ সুষ্ঠু বলং বর্ধযন্তি|

Adhikarana mandAgnau yathAvasthaM snehAdayaH (78) · Śloka 78

স্নেহাসবসুরারিষ্টচূর্ণক্বাথাহিতাশনৈঃ| সম্যক্ প্রযুক্তৈর্দেহস্য বলমগ্নেশ্চ বর্ধতে||৭৮||

স০-স্নেহাদিভিঃ সম্যক্ প্রযুক্তৈঃ শরীরস্যাগ্নেশ্চ বলং বর্ধতে| তস্মাত্ স্নেহাদযো যথাবস্থং প্রযোজ্যা ইতি ভাবঃ|

Adhikarana mandAgnau sasneha AhAraH (79) · Śloka 79

অধুনা স্নেহস্যাগ্নিবৃদ্ধিকরত্বং দৃষ্টান্তেন দর্শযতি দীপ্তো যথৈব স্থাণুশ্চ বাহ্যোঽগ্নিঃ সারদারুভিঃ| সস্নেহৈর্জাযতে তদ্বদাহারৈঃ কোষ্ঠগোঽনলঃ||৭৯||

স০-যথা-যেন প্রকারেণ, সারদারুভিঃ-শমীখদিরাদিভিঃ, সস্নেহৈর্বাহ্যোঽগ্নিদীপ্তঃ স্থাণুঃ-স্থিরশ্চ, জাযতে| তথৈব কোষ্ঠগোঽগ্নিঃ সস্নেহৈঃ পথ্যরূপৈরাহারৈঃ পটুতরঃ স্থিরশ্চ সম্পদ্যতে|

Adhikarana mandAgnau aBojanAtiBojananiShedhaH (80) · Śloka 80

নাভোজনেন কাযাগ্নির্দীপ্যতে নাতিভোজনাত্| যথা নিরিন্ধনো বহ্নিরল্পো বাঽতীন্ধনাবৃতঃ||৮০||

স০-নাভোজনেন কাযাগ্নির্দীপ্যতে| ন চাতিভোজনেন| অত্রৈব দৃষ্টন্তমাহ-যথা বাহ্যোঽগ্নির্নিরিন্ধনো ন দীপ্যতে নশ্যতি| অল্পোঽগ্নির্বাহ্যোঽতীন্ধনেন-বহুভির্দারুভিঃ, আবৃতো নশ্যতি,-ন দীপ্যতে| এবং কোষ্ঠাগ্নিরপ্যভোজনাতিভোজনাভ্যাং নশ্যতি,-ন দীপ্যত ইত্যর্থঃ|

Adhikarana atyagneH (Basmakasya) saMprAptiH, lakShaNam (81-82) · Śloka 82

যদা ক্ষীণে কফে পিত্তং স্বস্থানে পবনানুগম্| প্রবৃদ্ধং বর্ধযত্যগ্নিং তদাঽসৌ সানিলোঽনলঃ||৮১|| পক্ত্বাঽন্নমাশু ধাতূংশ্চ সর্বানোজশ্চ সঙ্ক্ষিপন্| মারযেত্স্যাত্স না স্বস্থো ভুক্তে জীর্ণে তু তাম্যতি||৮২||

স০-যস্মিন্ কালে কফে ক্ষীণে-ক্ষযং যাতে, অত এব স্বস্থানে-আমাশযাখ্যে, পিত্তং বৃদ্ধম্| কিম্ভূতম্ ? পবনানুগম্| মারুতেন গমনস্বভাবেন পশ্চাদ্যুক্তম্| অত এব তত্পিত্তমগ্নিং বর্ধযতি| তদা-তস্মিন্কালে, অসাবনলো-জাঠরাগ্নিঃ, সানিলঃ-পবনসহিতো, অন্নং পক্ত্বাঽনন্তরং পক্তব্যাভাবাত্ সর্বান্ ধাতূন্ পক্ত্বা, আশু পুরুষং মারযেত্| কিং কুর্বন্ ? ওজশ্চ সঙ্ক্ষিপন্-সংহরন্, বিনাশযন্নিত্যর্থঃ| ননু, পিত্তানিলযোর্দ্বযোঃ প্রকৃতত্বাত্ সপিত্তানিলোঽনল ইতি বক্তুং যুক্তং স্যাত্| মৈবম্| "পিত্তং বহ্নির্বহ্নিজং বা" (হৃ. শা. অ. ৩/৯০) ইতি কৃত্বা তদানীং জঠরাগ্নিনা সহৈকতাং প্রাপ্তং পিত্তমিতি সানিলোঽনল ইতি নির্দিষ্টম্| সঃ-অত্যগ্নিপীডিতো, না-পুরুষো, ভুক্তে স্বস্থঃ স্যাত্| জীর্ণে তু তাম্যতি-উপতপ্যতে| অনেকার্থত্বাদ্ধাতূনামুপ তাপার্থস্তাম্যতিঃ| তমকলক্ষণেঽপি প্রাগধ্যগীষ্ট|

Adhikarana atyagneH upadravAH (83) · Śloka 83

তৃট্কাসদাহমূর্চ্ছাদ্যা ব্যাধযোঽত্যগ্নিসম্ভবাঃ| |৮৩|

স০-তৃষ্ণাদযো রোগা অত্যগ্নেঃ সম্ভবন্তি|

Adhikarana atyagneH gurUsnigdhAdyannapAnAni (83-84) · Śloka 84

তমত্যিগ্নিং গুরুস্নিগ্ধমন্দসান্দ্রহিমস্থিরৈঃ||৮৩|| অন্নপানৈর্নযেচ্ছান্তিং দীপ্তমগ্নিমিবাম্বুভিঃ| |৮৪|

স০-তমত্যগ্নিং-ভস্মকাখ্যং, গুরুস্নিগ্ধাদিভিরন্নপানৈঃ শান্তি নযেত্| কমিব ? দীপ্তং-ইদ্দমগ্নিং বাহ্যং, যথা জলৈঃ|

Adhikarana atyagneH ajIrNe~api Bojanam (84-85) · Śloka 85

| মুহুর্মুহুরজীর্ণেঽপি ভোজ্যান্যস্যোপহারযেত্||৮৪|| নিরিন্ধনোঽন্তরং লব্ধ্বা যথৈনং ন বিপাদযেত্| |৮৫|

স০-মুহুর্মুহুঃ-ক্ষণেক্ষণে, অজীর্ণেঽপি ভোজ্যনি-কৃশরাদীনি, উপহারযেত্-আহারার্থ প্রকল্পযেত্| অজীর্ণেঽপীত্যপিশব্দাত্ কিমুত জীর্ণে ভোজ্যানুপহারযেদিতি| কিমিত্যেবং ক্রিযতে ? ইত্যাহ-যস্মাত্তস্মাত্তথা তেন প্রকারেণাজীর্ণেঽপি পুনঃ পুনরাহা রোপযোগেন নিরিন্ধনোঽগ্নিরন্তরং-অবকাশং, লব্ধ্বা যথা এনং ন বিপাদযেত্|

Adhikarana atyagneH kRusharAdyannam audakAnUpamAMsAni visheShato matsyAH (85-86) · Śloka 86

| কৃশরাং পাযসং স্নিগ্ধং পৈষ্টিকং গুডবৈকৃতম্||৮৫|| অশ্নীযাদৌদকানূপপিশিতানি ভৃতানি চ| মত্স্যান্ বিশেষতঃ শ্লক্ষ্ণান্ স্থিরতোযচরাশ্চ যে||৮৬||

স০-কৃশরামিত্যাদীনি ভুঞ্জীত| গুডবৈকৃতমিতি| বিকৃতমেব বৈকৃতম্, প্রজ্ঞাদিত্বাদণ্| তথৈদকানাং-মত্স্যকচ্ছপাদীনাং পিশিতানি, তথাঽঽনূপানি-বরাহাদীনাম্, ভৃতানি-মেদুরাণী, ভক্ষযেত্| বিশেষেণ মত্স্যান্| শ্লক্ষ্ণান্-অপরুষান্| চশব্দাদ্যে চ স্থিরতোযচরাঃ-অবহজ্জলাশ্রিতাঃ, তানপ্যশ্নীযাত্|

Adhikarana atyagneH AvikaM mAMsam (87) · Śloka 87

আবিকং সুভৃতং মাংসমদ্যাদত্যগ্নিবারণম্| |৮৭|

স০-আবিকং মাংসং সুভ্রুতং-অতীবমেদুরং, অত্যগ্নিবারণমদ্যাত্|

Adhikarana atyagneH tRuShAyAM payoghRutAdipAnam, shyAmAdivirecanam, pAyasaBojanam (87-89) · Śloka 89

| পযঃ সহমধূচ্ছিষ্টং ঘৃতং বা তৃষিতঃ পিবেত্||৮৭|| গোধূমচূর্ণং পযসা বহুসর্পিঃপরিপ্লুতম্| আনূপরসযুক্তান্ বা স্নেহাংস্তৈলবিবর্জিতান্||৮৮|| শ্যামাত্রিবৃদ্বিপক্বং বা পযো দদ্যাদ্বিরেচনম্| অসকৃত্পিত্তহরণং পাযসপ্রতিভোজনম্||৮৯||

স০-তথা, তৃষিতঃ সন্ পযঃ পিবেত্| কিম্ভুতম্ ? সহমধূচ্ছিষ্টং-সমদনং, সর্পির্বা এবংভুতং পিবেত্| গোধূমচূর্ণং বহুঘৃতং ক্ষীরেণালোডিতং পিবেত্| অথবা, আনুপমাংসরসান্বিতান্ স্নেহান্ পিবেত্| কিম্ভূতান্ ? তৈলবিবর্জিতান্| তৈলস্য পিত্তকৃত্ত্বান্নিষেধঃ| অথবা, শ্যামাত্রিবৃন্দ্যাং বিপক্বং ক্ষীরং বিরেচনং দদ্যাত্| তথা, পুনঃ পুনঃ পিত্তস্য হরণং পাযসস্য প্রতিভোজনং হিতম্|

Adhikarana atyagneH sAmAnyacikitsA (90) · Śloka 90

যত্কিঞ্চিদ্গুরু মেদ্যং চ শ্লেষ্মকারি চ ভোজনম্| সর্বং তদ্যগ্নিহিতং ভুক্ত্বা চ স্বপনং দিবা||৯০||

স০-যত্কিঞ্চিদ্গুরু ভোজনং যন্মেদস্করং শ্লেষ্মকরং চ, তদত্যগ্নযে হিতম্| ভুক্ত্বা চ যদ্দিবা স্বপনং তচ্চ হিতম্|

Adhikarana atyagneH AhAradoShAdiH pacanakramaH (91) · Śloka 91

আহারমগ্নিঃ পচতি দোষানাহারবর্জিতঃ| ধাতূন্ ক্ষীণেশু দোষেষু জীবিতং ঢাতুসঙ্ক্ষযে||৯১||

স০-অগ্নিঃ পূর্বমাহারং পচতি| আহাররহিতস্ত্বগ্নির্দোষান্ পচতি| তদভাবাদ্ধাতূন্ পচতি| ধাতুসঙ্ক্ষযে সতি জীবিতং পচতি-নাশযতীত্যর্থঃ|

Adhikarana agnibalasya shaktiH agneH pAlanam tasya phalam (10) · Śloka 10

এতত্প্রকৃত্যৈব বিরুদ্ধমন্নং সংযোগসংস্কারবশেন চেদম্| ইত্যাদ্যবিজ্ঞায যথেষ্টচেষ্টাশ্চরন্তি যত্সাঽগ্নিবলস্য শক্তিঃ||৯২|| তস্মাদগ্নিং পালযেত্সর্বযত্নৈ স্তস্মিন্নষ্টে যাতি না নাশমেব| দোষৈর্গ্রস্তে গ্রস্যতে রোগসঙ্ঘৈর্যুক্তে তু স্যান্নীরুজো দীর্ঘজীবী||৯৩|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং চতুর্থে চিকিত্সিত স্থানে গ্রহণিদোষচিকিত্সিতং নাম দশমোঽধ্যাযঃ||১০||

স০-এতদন্নং প্রকৃত্যা[এব]-স্বভাবেনৈব, বিরুদ্ধমপথ্যম্ যথা-করমর্দকদধিসর্ষপশাকফাণিতশুষ্কমাংসবিরূঢকামমূল-কলকুচাদিকম্| সংযোগবিরুদ্ধং যথা-ক্ষীরমম্লেন সহ, আনূপমামিষং মাষৈঃ সহ, ইত্যাদি| সংস্কারবিরুদ্ধং যথা-হারীতমাংসং হারিদ্রশূলপ্রোতং হারিদ্রবহ্নিনা পাচিতমিত্যাদি| এবমিদং প্রকৃত্যা দিবিরুদ্ধং সংযোগস্য সংস্কারস্য চ বশেন-সামর্থ্যেন, চেদং বিরুদ্ধম্| আদিগ্রহণান্মাত্রাকালাদিপরিগ্রহঃ| তত্র মাত্রাবিরুদ্ধং যথা-মধুঘৃতং সমাংশম্| কালবশেনেদং যথা-রাত্রিপর্যুষিতা কাকমাচী| পাত্রবশেনেদং যথা-কাংস্যে দশাহমুষিতম্ সর্পিঃ| ইত্যাদ্যবিজ্ঞায-অবুদ্ধ্বাঽপর্যালোচ্য, যথেষ্টচেষ্টাঃ-যথাভিলাষমা হারমাসেবমানাঃ, যচ্চরন্তি সাঽগ্নিবলস্য শক্তিঃ-সামর্থ্যম্| যত এবং তস্মাদগ্নিং পালযেত্, সর্বযত্নৈঃ-অখিলক্রিযানুষ্ঠানৈঃ, তস্মিন্-অগ্নৌ, নষ্টে-ক্ষীণে, না-পুরুষো, নাশং যাতি| দোষৈর্গ্রস্তে বহ্নৌ না-পুরুষো, রোগসঙ্ঘৈর্গ্রস্যতে-পীড্যতে| যুক্তে-স্বস্থে, পুনরগ্নৌ নীরুজো দীর্ঘজীবী চ ভবেদিতি| উপজাতিশালিন্যৌ বৃত্তে| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে গ্রহণীদোষচিকিত্সিতং নাম দশমোঽধ্যাযঃ সমাপ্তঃ|| ১০||