2. raktapittacikitsitādhyāyaḥ

Adhikarana adhyAyopakramaH · Śloka

জ্বরচিকিত্সিতাদনন্তরং রক্তপিত্তচিকিত্সিতমুচ্যতে| যতো মহেশ্বরস্য ললাটাজ্জ্বরো বভূব, তত্সন্তাপাদ্রক্তপিত্তমিত্যুক্তম্| অতো রক্তপিত্তচিকিত্সিতস্যৈবারম্ভো যুক্তঃ| তথা, নিদানে যদ্বিশেষেণ নোক্তং তদিহ বিশেষেণ স্পষ্টং কৃত্বা নিদানাভিপ্রাযমপি ভণ্যতে, রক্তপিত্তস্য ক্ষিপ্রকারিত্বাত্|

Adhikarana raktapittacikitsitA~adhyAyaH raktapittasya sAdhyatvam (2-1) · Śloka 1

অথাতো রক্তপৈত্তচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২| ) ঊর্ধ্বগং বলিনোঽবেগমেকদোষানুগং নবম্| রক্তপিত্তং সুখে কালে সাধযেন্নিরুপদ্রবম্||১||

স০-বলিনো-বলবতঃ পুংসো ন স্ত্রিযাঃ, যদুত্পন্নমূর্ধ্বগং রক্তপিত্তং তত্সাধযেত্-উপক্রমেত্| তথা যদেবোর্ধ্বগমবেগং-অবেগবত্, তথৈকো দোষঃ-কফাখ্যঃ, অনুগঃ-অনুবলো, যস্য তদেকদোষানুগম্| নিদানেঽপ্যুক্তম্ (হৃংই.অ.৩/৮)-"ঊর্ধ্বং সাধ্যং কপাদ্যস্মাত্" ইতি| তথা নবং-অচিরোত্পন্নং, তথা যত্সুখে কালে- তদ্ব্যাধিপ্রতিপক্ষভূতে হেমন্তে শিশিরে বা জাতং, তথা যন্নিরুপদ্রবং-বিকৃতবিজ্ঞানীযাধ্যাধ্যাযোক্তৈঃ (হৃ.শা.অ.৫/৭৪)" রক্তপিত্তংভৃশং রক্তং" ইত্যাদিগ্রন্থনির্দিষ্টৈরুপদ্রবৈ রহিতম্| অতো লক্ষণাদ্যদ্বিপর্যযলক্ষণমূর্ধ্বগমপি রক্তপিত্তং তদর্থাদসাধ্যং যাপ্যং বা স্যাদিতি গম্যতে|

Adhikarana raktapittasya yApyatvam (2) · Śloka 2

অধোগং যাপ্যযেদ্রক্তম্ যচ্চদোষদ্বযানুগম্| শান্তং শান্তং পুনঃ কুপ্যন্মার্গান্মার্গান্তরং চ যত্||২||

স০-অধোগং রক্তপিত্তমূর্ধ্বগরক্তপিত্তোক্তৈকদোষানুগাদিবিশেষণবিষিষ্টমপি যাপযেত্| যচ্চ দোষদ্বযানুগং-বাতকফাভ্যাং হীনবলাভ্যামনুগতমূর্ধ্বগমপি, তচ্চ যাপযেত্|

Adhikarana raktapittasya asAdhyatvam (3) · Śloka 3

অতিপ্রবৃত্তং মন্দাগ্নেস্ত্রিদোষং দ্বিপথং ত্যজেত্| |৩|

স০-শান্তং শান্তং-অতিশযেন শান্তং, পুনঃ কুপ্যত্-কোপং গচ্ছত্, ঊর্ধ্বগমেকদোষানুগমধোগং বা ত্যজেত্| অথ মার্গাত্-ঊর্ধ্বাত্ নাসাক্ষিকর্ণাস্যলক্ষণাত্, মার্গান্তরং-গুদমেঢ্রলক্ষণং, যত্-গচ্ছ্হত্, এবং যত্প্রবৃত্তং তচ্চ ত্যজেত্| যদিতি ইণঃ শতরি ইণো যণিতি যাদেশে যদিতি রূপম্| তথা অতিপ্রবৃত্তমূর্ধ্বমার্গাধোমার্গাদ্বা যদ্রক্তপিত্তং তত্ত্যজেত্, রক্তস্য প্রাণাযতনত্বাত্| উক্তং চ-"জীবিতং প্রাণিনাং তত্র রক্তে তিষ্ঠতি তিষ্ঠতি|" ইতি| তথা, মন্দাগ্নের্যত্প্রবৃত্তমধোগমূর্ধ্বগং ব তদপি বিরুদ্ধোপক্রমত্বাত্ত্যজেত্| তথা হি,-মন্দাগ্নেঃ কটুকাম্লোষ্ণরূক্ষতীক্ষ্ণাদ্যৌষধমগ্নিসন্ধুক্ষণং যত্তদ্ধিতম্, রক্তপিত্তে চাতো বিপরীতপ্রাযং যত্তত্পথ্যম্| তথা, ত্রিদোষমূর্ধ্বগমধোগং বা তদপি ত্যজেত্, বিষমত্বাত্| যতো ন তদ্বমনবিষযং ভবতুমর্হতি নাপি বিরেচনবিষযম্|

Adhikarana la~gghanIyabRuMhaNIyashodhanIyashamanIyaviBAgaH (3-4) · Śloka 4

| জ্ঞাত্বা নিদানমযনং মলাবনুবলৌ বলম্||৩|| দেশকালাদ্যবস্থাং চ রক্তপিত্তে প্রযোজযেত্| লঙ্ঘনং বৃংহণং বাঽঽদৌ শোধনং শমনং তথা||৪||

স০-নিদানাদি জ্ঞাত্বাঽনন্তরং রক্তপিত্তে-ঊর্ধ্বগেঽধোগে বা, আদৌ-প্রথমত এব, লঙ্ঘনং প্রযোজযেত্, অথবা বৃংহণং, অথবা শোধনং শমনং বা| তত্র নিদানং-তীক্ষ্ণোষ্ণকট্বম্লাদিসেবনম্, এতজ্জ্ঞানং হি তন্নিদানবর্জন উপযুজ্যতে| তথা চ বক্ষ্যতি (শ্লো.২৪)-"যত্কিঞ্চিদ্রক্তপিত্তস্য নিদানং তচ্চ বর্জযেত্|" ইতি| অযনং-ঊর্ধ্বাঘোলক্ষণং জ্ঞাত্বা| তথা চ বক্ষ্যতি (শ্লো.৮)- "রক্তে সপিচ্ছে সকফে গ্রথিতে কণ্ঠমার্গগে| লিহ্যান্মাক্ষিকসর্পির্ভ্যাং ক্ষারমুত্পলনালজম্||" ইতি| তথা (শ্লো.৪৭)- "গুদাগমে বিশেষেণ শোণিতে বস্তিরিষ্যতে|" ইত্যাদি| তথা, পিত্তাখ্যস্য মলস্যাত্র মূলভূতত্বাত্সামর্থ্যাত্ মলৌ-বাতকফাখ্যৌ, অনুবলৌ জ্ঞাত্বা চিকিত্সাবিশেষং প্রযোজযেত্| তথা চ বক্ষ্যতি (শ্লো.৩৬)-"রক্তপিত্তং ন চেচ্ছাম্যেত্তত্র বাতোল্বণে পযঃ| যুঞ্জযাচ্ছাগং" ইত্যাদি| তথা, বলং জ্ঞাত্বা| যতো বক্ষ্যতি (শ্লো. ১৩)- "যথাস্বং মন্থপেযাদিঃ প্রযোজ্যো রক্ষতা বলম্|" ইতি| দেশো-দ্বিবিধঃ শারীরো ভূমিদেশশ্চ| তত্র শারীরো-মুখনাসাদ্যবযবরূপঃ| ঊর্ধ্বগে হি রক্তপিত্তে সত্যপি নাসাপ্রবৃত্তে বিশেষেণান্যদৌষধমন্যপ্রবৃত্তেঽন্যত্| তথা, অধোগে রক্তপিত্তে সত্যপি গুদপ্রবৃত্তেঽন্যদৌষধং মেঢ্রপ্রবৃত্তে চান্যত্| ভূমিদেশশ্চ-ত্রিবিধোব্যাখ্যাতো জাঙ্গলানূপসাধারণভেদেন| তত্র জাঙ্গলেঽন্যধৌষধমনূপেঽন্যত্ সাধারণে চান্যত্| কালো-মুহূর্তাদিঃ শীতোষ্ণবর্ষলক্ষণ আবস্থিকশ্চ| তথা চ শীতে কালেঽন্যাদৃসমৌষধমন্যস্মিন্ কালেঽন্যাদৃষমৌষধং রক্তপিত্তে| আদিগ্রহণেনানলাহা রসত্ত্বসাত্ম্যবযঃপ্রকৃতিপ্রভৃতযো গৃহ্যন্তে| অবস্থাং চ জ্ঞাত্বা অবস্থাবশাত্, রক্তপিত্তস্য হ্যবস্থাবিশেষেণান্যদৌষধং স্যাত্|

Adhikarana shodhyatve~api la~gghanashAmyabRuMhaNashAmyaviBAgaH (5-6) · Śloka 6

সন্তর্পণোত্থং বলিনো বহূদোষস্য সাধযেত্| ঊর্ধ্বভাগং বিরেকেণ বমনেন ত্বধোগতম্||৫|| শমনৈর্বৃংহণৈশ্চান্যল্লঙ্ঘ্য বৃংহ্যানবেক্ষ্য চ| |৬|

স০-সন্তর্পণোত্থং বলিনো বহুদোষস্য নরস্য রক্তপিত্তমূর্ধ্বগং বিরেকেণ সাধযেত্, অধোগতং তু বমনেন সাধযেত্| অন্যতপতর্পণোত্থং রক্তপিত্তং দুর্বলস্যাল্পদোষস্যোর্ধ্বগং শমনৈরধোগং বৃংহণৈরুপাচরেত্| বৃংহণৈর্বা শমনৈঃ| ন চেদং চিকিত্সিতং নিরপেক্ষং যুঞীতেত্যাহ-লঙ্ঘ্যবৃংহ্যানবেক্ষ্য চেতি| লঙ্ঘনাদুত্পন্নমধোগমপি শমনৈরুপাচরেত্| বৃংহণাদুত্পন্নমূর্ধ্বগমপি লঙ্হ্ঘনৈরুপাচরেদিত্যর্থঃ|

Adhikarana shamanauShadham (6-7) · Śloka 7

| ঊর্ধ্বং প্রবৃত্তে শমনৌ রসৌ তিক্তকষাযকৌ||৬|| উপবাসশ্চ নিঃশুণ্ঠীষডঙ্গোদকপাযিনঃ| |৭|

স০-ঊর্ধ্বং প্রবৃত্তে রক্তপিত্তে শুণ্ঠীরহিতং ষডঙ্গোদকং পিবতঃ পুংসস্তিক্তকষাযৌ রসৌ শমনম্| তথা, উপবাসঃ|

Adhikarana bRuMhaNauShadham (7) · Śloka 7

| অধোগে রক্তপিত্তে তু বৃংহণৌ মধুরো রসঃ||৭||

স০-অধোগে তু রক্তপিত্তে বৃংহণো মধুরো রসো হিতঃ|

Adhikarana UrdhvagAdhogayoH pathyaviBAgaH (8) · Śloka 8

ঊর্ধ্বগে তর্পণং যোজ্যং প্রাক্ চ পেযা ত্বধোগতে| |৮|

স০-ঊর্ধ্বগে রক্তপিত্তে প্রাক্-পূর্বং, তর্পণং যোজ্যম্, তথাসাত্ম্যত্বাত্| এবমধোগে রক্তপিত্তে প্রাক্ পেযা যোজ্যা|

Adhikarana ashuddharaktasya stamBananiShedhaH shuddharaktasya stamBanam (8-9) · Śloka 9

| আশ্নতো বলিনোঽশুদ্ধং ন ধার্যং তদ্ধি রোগকৃত্||৮|| ধারযেদন্যথা শীঘ্রমগ্নিবচ্ছীঘ্রকারি তত্| |৯|

স০-বলিনো নরস্যাশ্নতো রক্তমশুদ্ধং-দুষ্টং, ন ধার্যং-ন স্তম্ভনীযম্| তদ্ধি ঘৃতং সিরাব্যধবিধ্যুক্তান্ বিসর্পবিদ্রধিপ্লীহাদীন্ রোগান্ করোতি| অন্যথা-বিধিবিপর্যযে সতি দুর্বলস্যাভোজনস্য চ, শীঘ্রং ধারযেত্| যস্মাদগ্নিবচ্ছীঘ্রং মরণকারি তত্-রক্তমস্তম্ভিতং, স্যাত্|

Adhikarana virecanauShadham (9-10) · Śloka 10

| ত্রিবৃচ্ছ্যামাকষাযেণ কল্কেন চ সশর্করম্||৯|| সাধযেদ্বিধিবল্লেহং লিহ্যাত্পাণিতলং ততঃ| |১০|

স০-ত্রিবৃতা-শুক্লগোপীত্যুচ্যতে| শ্মামা-মালবিকা ত্রিবৃদুচ্যতে| তযোঃ কষাযেণ তথা তযোরেব [কল্কেন] মাত্রামাশ্রিত্যৈতদুক্তম্| অত্র চ কণ্টকারিকালেহবত্ (হৃ.চি.অ.৩/৬২) ক্বাথকল্কশর্করাণাং পরিমাণং বেদ্যমিতি বৃদ্ধবৈদ্যব্যবহারঃ|

Adhikarana virecanAntaradvayam (10-11) · Śloka 11

| ত্রিবৃতা ত্রিফলা শ্যামা পিপ্পলী শর্করা মধু||১০|| মোদকঃ সন্নিপাতোর্ধ্বরক্তশোফজ্বরাপহঃ| ত্রিবৃত্সমসিতা তদ্বত্ পিপ্পলীপাদসংযুতা||১১||

স০-তথা ত্রিবৃতাদিভির্মোদকো-বটকঃ| শর্করাপরিমাণং চ পদ্মকাদ্যচূর্ণবদববোধ্যম্| স চ মোদকঃ সন্নিপাতোর্ধ্বরক্তশোফজ্বরহৃদ্ভবতি| পূর্বোক্তস্য লেহস্য বিষযনির্দেশাদেব বিষযো বেদ্যঃ| ত্রিবৃত্সমসিতা পিপ্পলীপাদসংযুতা তদ্বত্-সন্নিপাতাদি হৃদিত্যর্থঃ|

Adhikarana vamanapa~jcakam (12-13) · Śloka 13

বমনং ফলসংযুক্তং তর্পণং সসিতামধু| সসিতং বা জলং ক্ষৌদ্রযুক্তং বা মধুকোদকম্||১২|| ক্ষীরং বা রসমিক্ষোর্বা| |১৩|

স০-মদনফলেন সংযুক্তং তর্পণং সিতামধুভ্যাং সহ বমনে দেযম্, বাতকোপভযাদিত্যভিপ্রাযঃ| অথবা সশর্করং ফল সংযুক্তং, [অথবা] মধুকোদকমথবা ক্ষৌদ্রসংযুক্তং, অথবা ক্ষীরং, অথবেক্ষুরসম্| সর্বমেতত্ মদনফলসংযুক্তং পৃথক্ প্রত্যেকং দেযম্|

Adhikarana shuddhasya pathyam (13) · Śloka 13

শুদ্ধস্যানন্তরো বিধিঃ| যথাস্বং মন্থপেযাদিঃ প্রযোজ্যো রক্ষতা বলম্||১৩||

স০-ঊর্ধ্ব[গ]রক্তপিত্তিনোঽধোগরক্তপিত্তিনো বা যথাক্রমং বিরেকবমনাভ্যাং শুদ্ধস্যানন্তরং [যথাস্বং-] যথাযোগং যথাবিধি, মন্থপেযাদিঃ প্রযোক্তব্যঃ,-ঊর্ধ্বগে মন্থাদিরধোগে পেযাদিরিতি যথার্থঃ|

Adhikarana manthadvayam (14) · Śloka 14

মন্থো জ্বরোক্তো দ্রাক্ষাদিঃ, পিত্তঘ্নৈর্বা ফলৈঃ কৃতঃ| |১৪|

স০-মন্থো জ্বরোক্তো দ্রাক্ষাদিঃ-"দ্রাক্ষামধূকমধুক" (হৃ. চি. অ. ১/৫৫) ইত্যাদিঃ| পিত্তঘ্নৈর্বা-দ্রাক্ষামলকক্রাশ্মর্যমধুকাদিভিঃ, ফলৈঃ কৃতঃ প্রযোক্তব্যঃ|

Adhikarana manthAntaradvayam (14-15) · Śloka 15

| মধুখর্জূরমৃদ্বীকাপরূষকসিতাম্ভসা||১৪|| মন্থো বা পঞ্চসারেণ সঘৃতৈর্লাজসক্তুভিঃ| দাডিমামলকাম্লো ব মন্দাগ্ন্যম্লাভিলাষিণাম্||১৫||

স০-অথবা মধ্বাদিনা দ্রব্যপঞ্চকেন কৃতেন পঞ্চসারাখ্যেন লাজসক্তুভিঃ সসর্পিষ্কৈর্মন্থো হিতঃ| মন্দাগ্নীনামম্লাভিলাষিণাং চ দাডিমামলকাভ্যামম্লশ্চ মন্থঃ প্রযোক্তব্যঃ| 'অধোগে প্রাক্পেযা প্রযোজ্যা' ইত্যুক্তম্| অতস্তা এব পেযা ব্রূতে-

Adhikarana peyAsaptakam (16-18) · Śloka 18

কমলোত্পলকিঞ্জল্কপৃশ্নিপর্ণীপ্রিযঙ্গুকাঃ| উশীরং শাবরং রোধ্রং শৃঙ্গবেরং কুচন্দনম্||১৬|| হীবেরং ধাতকীপুষ্পং বিল্বমধ্যং দুরালভা| অর্ধার্ধৈর্বিহিতাঃ পেযা বক্ষ্যন্তে পাদযৌগিকাঃ||১৭|| ভূনিম্বসেব্যজলদা মসূরাঃ পৃশ্নিপর্ণ্যপি| বিদারিগন্ধা মুদ্গাশ্চ বলা সর্পির্হরেণুকাঃ||১৮||

স০-কমলোত্পলেত্যাদিভির্বর্গৈরর্ধশ্লোকৈঃ পেযা বিহিতাঃ| পাদযৌগিকা বক্ষ্যন্তে| ভূনিম্বসেব্যেত্যাদযঃ|

Adhikarana uktAnAM peyAnAM prakArAntaram,mAMsarasAH (19-20) · Śloka 20

জাঙ্গলানি চ মাংসানি শীতবীর্যাণি সাধযেত্| পৃথকপৃথগ্জলে তেষাং যবাগূঃ কল্পযেদ্রসে||১৯|| শীতাঃ সশর্করাক্ষৌদ্রাস্তদ্বন্মাংসরসানপি| ঈষদম্লাননম্লান্ বা ঘৃতভৃষ্টান্ সশর্করান্||২০||

স০-মাংসানি জাঙ্গলানি শীতবীর্যাণী-শশাদিসবন্ধীনি, পূর্বোক্তপেযৌষধানাং পৃথক্পৃথগ্জলে সাধযেত্| অনন্তরং তস্মিন্ রসে যবাগূঃ কল্পযেত্| কীদৃশীঃ ? শীতাস্তথা সশর্করাক্ষৌদ্রাঃ| তদ্বদিত্যনেন শীতত্বং মাংসরসানামতিদিশতি, ন তু সশর্করাক্ষৌদ্রত্বমপি, অযোগার্হত্বাত্| অত এবাহ-তান্ মাংসরসান্ ঈষদম্লানম্লাভিলাষিণঃ, অনম্লাভিলাষিণোঽনম্লানেব| তথা, ঘৃতভৃষ্টান্ সশর্করান্-শর্করাযুক্তান্|

Adhikarana dhAnyAni shAkAni ca (21) · Śloka 21

শূকশিম্বীভবং ধান্যং রক্তে শাকং চ শস্যতে| অন্নস্বরূপবিজ্ঞানে যদুক্তং লঘু শীতলম্||২১||

স০-তথা, শূকশিম্বীজং, ধান্যং শাকং চ রক্তপিত্তে শস্যতে| অন্নস্বরূপবিজ্ঞানীযেঽধ্যাযে (সূ.অ. ৬) যদুক্তং লঘু চ শীতলং চ|

Adhikarana pAnArthamudakam (22) · Śloka 22

পূর্বোক্তমম্বু পানীযং পঞ্চমূলেন বা শৃতম্| লঘুনা শৃতশীতং বা মধ্বম্ভো বা ফলাম্বু বা||২২||

স০-পূর্বোক্তমম্বু-ষডঙ্গং শুণ্ঠীরহিতং, পানীযং-পাতব্যম্| অথবা লঘুনা পঞ্চমূলেন শৃতম্| পানীযস্য শ্রপণে তন্ত্রকারৈর্বিধিরুক্তঃ| যথা-"কর্ষং গৃহীত্বা দ্রব্যস্য ক্বাথযেত্প্রাস্থিকেঽম্ভসি| অর্ধশৃতং প্রযোক্তব্যং জলপাকে ত্বযং বিধিঃ||" ইতি| কেবলং বা জলং শৃতশীতং হিতম্| মধ্বম্ভো-মাক্ষিকযুক্তং পানীযম্| ফলাম্বু বা-দ্রাক্ষাভির্বা পিত্তঘ্নৈঃ ফলৈঃ কৃতম্|

Adhikarana vibaddhe mAMsarasatrayam (23) · Śloka 23

শশঃ সবাস্তুকঃ শস্তো বিবন্ধে| |২৩|

স০-শশঃ-শশস্য মাংসং, সহবাস্তুকেন বিড্বিবন্ধে সতি রক্তপিত্তিনঃ শস্তঃ|

Adhikarana mArutAdhike mAMsarasatrayam (23-24) · Śloka 24

তিত্তিরিঃ পুনঃ| উদুম্বরস্য নির্যূহে সাধিতো মারুতেঽধিকে||২৩|| প্লক্ষস্য বর্হিণস্তদ্বন্ন্যগ্রোধস্য চ কুক্কুটঃ| |২৪|

স০-তিত্তিরিস্তু মারুতেঽধিক উদুম্বরস্য ক্বাথে সাধিতঃ শস্তঃ| প্লক্ষস্য ক্বাথে সাধিতো বর্হিণো-মযূরঃ, তদ্বত্-মারুতেঽধিকে শস্তঃ| বর্হিণ ইতি "ফলবর্হাভ্যামিনচ্|" তথৈবন্যগ্রোধস্য নির্যূহে কুক্কুটঃ শস্তঃ| উদুম্বরাদিক্বাথসাধনং তিত্থির্যাদীনামৌষ্ণ্যং প্রতিহন্তুম্|

Adhikarana varjanIyam (24) · Śloka 24

| যত্কিঞ্চিদ্রক্তপিত্তস্য নিদানং তচ্চ বর্জযেত্||২৪||

স০-যত্কিঞ্চিদ্রক্তপিত্তস্য কারণং-যেন সেবিতেন তজ্জাতং, তচ্চ বর্জযেত্-পরিহরেত্|

Adhikarana shamanauShadhatrayam (25-26) · Śloka 26

বাসারসেন ফলিনীমৃদ্গোধ্রাঞ্জনমাক্ষীকম্| পিত্তাসৃক্ শমযেত্পীতং, নির্যাসো বাঽটরূষকাত্||২৫|| শর্করামধুসংযুক্তঃ কেবলো বা, শৃতোঽপি বা| বৃষঃ সদ্যো জযত্যস্রং, স হ্যস্য পরমৌষধম্||২৬||

সং-বাসকস্য রসেন ফলিন্যাদিকং পীতং রক্তপিত্তং শমযতি| অথবা, অটরূষকস্য রসঃ শর্করামধুযুক্তঃ পীতো রক্তপিত্তং জযেত্| অথবা কেবলো বাসারসঃ| অথবা ক্বথিতো বৃষঃ শীঘ্রং রক্তং জযেত্| স বৃষো যস্মাদস্য-রক্তস্য, পরমৌষধম্|

Adhikarana kvAthatrayam (27-28) · Śloka 28

পটোলমালতীনিম্বচন্দনদ্বযপদ্মকম্| রোধ্রো বৃষস্তন্দুলীযঃ কৃষ্ণা মৃন্মদযন্তিকা||২৭|| শতাবরী গোপকন্যা কাকোল্যৌ মধুযষ্টিকা| রক্তপিত্তহরাঃ ক্বাথাস্ত্রযঃ সমধুশর্করাঃ||২৮||

স০-পটোলাদযোঽর্ধশ্লোকাস্ত্রযঃ ক্বাথা মধুশর্করাযুতা রক্তপিত্তং জযন্তীতি যোজ্যম্| অত্র চ বাসক আর্দ্রোঽপি দ্বিগুণো ন যোজ্যঃ| এবং হ্যুক্তং তন্ত্রান্তরে-"বাসাকুটজকূষ্মাণ্ডশতপুষ্পাসহাচরাঃ| নিত্যমার্দ্রাঃ প্রযোক্তব্যাস্তথাঽপি দ্বিগুণা ন তে||" ইতি|

Adhikarana kvAthAntaram lehaH (29) · Śloka 29

পলাশবল্কক্বাথো বা সুশীতঃ শর্করান্বিতঃ| লিহ্যাদ্বা মধুসর্পিভ্যাং গবাশ্বশকৃতো রসম্||২৯||

স০-অথবা পলাশত্বক্ক্বাথঃ শীতঃ শর্করাযুতঃ পূর্বোক্তগুণঃ| অথবা মধুসর্পিভ্যাং গবাশ্বশকৃতো রসং পিবেত্| গবাশ্চেতি "অবড্ স্ফোটাযনস্য" ইত্যবঙাদেশঃ|

Adhikarana grathite rakte lehaH (30) · Śloka 30

সক্ষৌদ্গং গ্রথিতে রক্তে লিহ্যাত্পারাবতাচ্ছকৃত্| |৩০|

স০-গ্রথিতে-গ্রন্থিমতি, রক্তপিত্তে পারাবতস্য শকৃত্ ক্ষৌদ্গেণ সহ লিহ্যাত্|

Adhikarana atiyoge rUdhirapAnam atiyoge yakRuBakShaNam (30-31) · Śloka 31

| অতিনিঃ স্রুতরক্তশ্চ ক্ষৌদ্গেণ রুধিরং পিবেত্||৩০|| জাঙ্গলং, ভক্ষযেদ্বাঽঽজমামং পিত্তযুতং যকৃত্| |৩১|

স০-অতিনিঃস্রুতরক্তশ্চ জাঙ্গলং রক্তং ক্ষৌদ্গেণ সহ পিবেত্| আজং যকৃদপক্বং পিত্তযুতং ভক্ষযেত্|

Adhikarana atiyoge shItakaShAyaH (31-32) · Śloka 32

| চন্দনোশীরজলদলাজমুদ্গকণাযবৈঃ||৩১|| বলাজলে পর্যুষিতৈঃ কষাযো রক্তপিত্তহা| |৩২|

স০-চন্দানাদিভির্বলাজলে পর্যুষিতৈঃ কষাযো রক্তপিত্তজিত্|

Adhikarana atiyoge shItakaShAyAntaradvayam (32-34) · Śloka 34

| প্রসাদশ্চন্দনাম্ভোজসেব্যমৃদ্ভৃষ্টলোষ্টজঃ||৩২|| সুশীতঃ সসিতাক্ষৌদ্রঃ শোণিতাতিপ্রবৃত্তিজিত্| আপোথ্য বা নবে কুম্ভে প্লাবযেদিক্ষুগণ্ডিকাঃ||৩৩|| স্থিতং তদ্গুপ্তমাকাশে রাত্রিং প্রাতঃ স্রুতং জলম্| মধুমদ্বিকচাম্ভোজকৃতোত্তংসং চ তদ্গুণম্||৩৪||

স০-চন্দনাদিজঃ প্রসাদ সুশীতঃ শর্করামাক্ষিকাভ্যাং সহ রক্তস্যাতিপ্রবৃত্তিং জযেত্|সং-ইক্ষুগণ্ডিকা আপোথ্য ভৃশমাদৌ সঙ্কুট্য জলে প্লাবযেত্| নবে কুম্ভে রাত্রিমাকাশে গুপ্তং-কীটাদ্যুপহতং যথা ন স্যাত্তথা. স্থিতং তত্-ইক্ষুগণ্ডিকাজলং, প্রাতঃ স্রুতং সমাক্ষিকং বিকসিতপদ্মেন কৃতশেখরং তদ্গুণং-পূর্ববদ্গুণমিত্যর্থঃ|

Adhikarana pittajvaroktASca kaShAyAH (35) · Śloka 35

যে চ পিত্তজ্বরে চোক্তাঃ কষাযাস্তাংশ্চ যোজযেত্| |৩৫|

স০-পিত্তজ্বরে চ যে কষাযা উক্তাঃ-"শক্রযবাঘনম্| কটুকা চেতি সক্ষৌদ্গা" (হৃ. চি. অ. ১/৫২) ইত্যাদযঃ, তাংশ্চ-কষাযান্, অত্র যোজযেত্|

Adhikarana jIrNaraktapittacikitsA CAgakShIraprayogaH,gavyakShIraprayogatrayam (35-38) · Śloka 38

| কষাযৈর্বিবিধৈরেভির্দীপ্তেঽগ্নৌ বিজিতে কফে||৩৫|| রক্তপিত্তং ন চেচ্ছাম্যেত্তত্র বাতোল্বণে পযঃ| যুঞ্জযাচ্ছাগং শৃতং, তদ্বদ্গব্যং পঞ্চগুণেঽম্ভসি||৩৬|| পঞ্চমূলেন লঘুনা শৃতং বা সসিতামধু| জীবকর্ষভকদ্রাক্ষাবলাগোক্ষুরনাগরৈঃ||৩৭|| পৃথক্পৃথক্শৃতং ক্ষীরং সঘৃতং সিতযাঽথবা| |৩৮|

স০-এভির্বিবিধৈঃ-নানাপ্রকারৈঃ কষাযৈঃ, অগ্নৌ দীপ্তে কফে চ বিজিতে সতি যদি রক্তপিত্তং ন শাম্যতি, তদা তত্র বাতোল্বণে রক্তপিত্তে সতি পঞ্চগুণেঽম্ভসি শৃতং ছাগং পযো যুঞ্জযাত্| পঞ্চগুণেঽম্ভসি গব্যং ক্ষীরং ক্বথিতং তদ্বত্-তেন ছাগেন সমানগুণং, তচ্চ যুঞ্জযাত্| অথবা লঘুনা পঞ্চমূলেন শৃতং গব্যং সশর্করামধু তদ্গুণম্| তথা, জীবকর্ষভকাদিভিঃ পৃথক্ পৃথক্ শৃতং সহ ঘৃতেনাথবা শর্করযা সহ তদ্গুণম্|

Adhikarana mUtramArgage kShIram (38-39) · Śloka 39

| গোকণ্টকাভীরুশৃতং পর্ণিনীভিস্তথা পযঃ||৩৮|| হন্ত্যাশু রক্তং সরুজং বিশেষান্মূত্রমার্গগম্| |৩৯|

স০-গোকণ্টকাদিভিস্তথা [ পর্ণিনীভিঃ-] শালিপর্ণীপৃশ্নিপর্ণীমুদ্গপর্ণীমাষপর্ণীভিঃ, শৃতং শীঘ্রমেব রক্তং সবেদনং হন্তি| বিশেষেণ মূত্রমার্গগতম্| বিষেষগ্রহণাদন্যমার্গগমপি রক্তং হন্তীতি দ্যোতযতি|

Adhikarana viNmArgage kShIracatuShTayam (39-40) · Śloka 40

| বিণ্মার্গগে বিশেষেণ হিতং মোচরসেন তু||৩৯|| বটপ্ররোহৈঃ শুঙ্গৈর্বা শুণ্ঠ্যুদীচ্যোত্পলৈরপি| |৪০|

স০-বিণ্মার্গগে-গুদগতে, রক্তপিত্তে তু বিশেষেণ মোচরসেন শৃতং ক্ষীরং হিতম্| বটপ্ররোহৈর্বা শৃতং ক্ষীরং, অথবা বটশুঙ্গৈঃ-প্রথমোদ্ভূতমুকুলিতৈঃ পল্লবপ্রাযৈঃ, শুণ্ঠ্যুদীচ্যোত্পলৈর্বা শৃতং পযো হিতম্|

Adhikarana raktAkaShAyAH sapayaskAH (40) · Śloka 40

| রক্তাতিসারদুর্নামচিকিত্সাং চাত্র কল্পযেত্||৪০||

স০-রক্তশব্দস্যাতিসারদুর্নাম্রোঃ সম্বন্ধঃ| রক্তাতিসারস্য রক্তার্শসশ্চ, যা চিকিত্সা তামত্র-রক্তে, যোজযেত্|

Adhikarana pUrvoktakaShAyasiddhAni ghRutAni (41) · Śloka 41

পীত্বা কষাযান্ পযসা ভুঞ্জীত পযসৈব চ| কষাযযোগৈরেভির্বা বিপক্বং পাযযেদ্ধৃতম্||৪১||

স০-কষাযান্-পূর্বোক্তান্, পযসা পীত্বা পযসৈবাশ্নিযাত্| স০-এতৈর্বা কষাযাখ্যৈর্যোগৈর্বিপক্বং ঘৃতং রক্তপিত্তিনং পাযযেত্|

Adhikarana vAsAghRutam (42-44) · Śloka 44

সমূলমস্তকং ক্ষুণ্ণং বৃষমষ্টগুণেঽম্ভসি| পক্ত্বাঽষ্টাংশাবশেষেণ ঘৃতং তেন বিপাচযেত্||৪২|| তত্পুষ্পগর্ভং তচ্ছীতং সক্ষৌদ্গং পিত্তশোণিতম্| পিত্তগুল্মজ্বরশ্বাসকাসহৃদ্রোগকামলাঃ||৪৩|| তিমিরভ্রমবীসর্পস্বরসাদাংশ্চ নাশযেত্| |৪৪|

স০-মূলপল্লবাদিযুক্তং ক্ষুণ্ণং-চূর্ণিতং, বৃষমষ্টগুণে জলে পক্ত্বা তেন-আষ্টাশাবশেষেণ ক্বাথেন, ঘৃতং বিপাচযেত্| কিম্ভূতম্ ? তত্পুষ্পগর্ভম্| তস্য-বৃষস্য, পুষ্পাণী গর্ভঃ-কল্কো, যস্য তদেবম্| তচ্চ শীতিভূতং ক্ষৌদ্গেণ সহ পিত্তশোণিতাদীন্নাশযেত্|

Adhikarana palAshaghRutam trAyamANAghRutam (44-45) · Śloka 45

| পলাশবৃন্তস্বরসে তদ্গর্ভং চ ঘৃতং পচেত্||৪৪|| সক্ষৌদ্রং তচ্চ রক্তঘ্নং, তথৈব ত্রাযমাণযা| |৪৫|

স০-পলাশবৃন্তানাং স্বরসে তদ্গর্ভং-পলাশবৃন্তকল্কং, ঘৃতং পচেত্| তচ্চ ক্ষৌদ্রেণ সহ রক্তঘ্নং ভবতি| তদ্বদেব ত্রাযমাণযা শৃতং রক্তপিত্তঘ্নম্|

Adhikarana raktapittavisheShe kShAracatuShTayam (45-46) · Śloka 46

| রক্তে সপিচ্ছে সকফে গ্রথিতে কণ্ঠমার্গগে||৪৫|| লিহ্যান্মাক্ষিকসর্পির্ভ্যাং ক্ষারমুত্পলনালজম্| পৃথক্পৃথক্ তথাঽম্ভোজরেণুশ্যামামধূকজম্||৪৬||

স০-রক্তে পিচ্ছাবতি, পিচ্ছা-শাল্মল্যা রসসদৃশী, তথা সকফে, তথা গ্রথিতে-গ্রন্থিসদৃশে, তথা কণ্ঠমার্গগে সতি, ক্ষারমুত্পলনালজং মাক্ষিকসর্পির্ভ্যাং লিহ্যাত্| ননু, ক্ষারস্য তৈক্ষ্ণ্যাদিগুণযোগাদ্রক্তপিত্তে ন যুক্ত উপযোগঃ| তত্কথমিহ তমনুমেনে তন্ত্রকৃত্ ? ব্রূমঃ| উত্পলাদীনি শীতস্বভাবানি| তত্সমুত্থশ্চ ক্ষারঃ সযোনিমনুকরোতি| তথা চোক্তম্ (হৃ.শা.অ. ১/৪)- "কারণানুবিধাযিত্বাকার্যাণাং তত্স্বভাবতা|" ইতি| ক্ষারস্বরূপং চ বিষ্যন্দনাত্মকং ধত্তে| তদেবং কণ্ঠমার্গগস্য কফানুবন্ধস্য গ্রথিতস্য রক্তস্য ক্ষারো ঘৃতমাক্ষিকাভ্যাং সংযুক্তো বিষ্যন্দনপূর্বং শোধযত্যেব, ন তু তস্য কোপায স্যাদিতি যুক্তোঽত্র ক্ষারোপযোগঃ| অম্ভোজরেণ্বাদিজং চ পৃথক্ পৃথক্ তথা মাক্ষিকঘৃতাভ্যাং লিহ্যাত্|

Adhikarana gudapravRutte rakte bastiH (47) · Śloka 47

গুদাগমে বিশেষেণ শোণিতে বস্তিরিষ্যতে| |৪৭|

স০-গুদাগমে রক্তে বিশেষেণ বস্তিরিষ্যতে|

Adhikarana ghrANapravRutte rakte nasyam (47-49) · Śloka 49

| ঘ্রাণগে রুধিরে শুদ্ধে নাবনং চানুষেচযেত্||৪৭|| কষাযযোগান্ পূর্বোক্তান্ ক্ষীরেক্ষ্বাদিরসাপ্লুতান্| ক্ষীরাদীন্সসিতাংস্তোযং কেবলং বা জলং হিতম্||৪৮|| রসো দাডিমপুষ্পাণামাম্রাস্থ্নঃ শাড্বলস্য বা| |৪৯|

স০-ঘ্রাণগে রুধিরে শুদ্ধে সতি নাবনমনুষেচযেত্-নস্যং দদ্যাত্| কষাযযোগান্ পূর্বোক্তান্-বাসকাদীন্, ঘ্রাণগেঽনুষেচযেত্| কিম্ভূতান্? ক্ষীরেক্ষ্বাদিরসেনাপ্লুতান্-সদ্রবান্| আদিশব্দেন মাংসরসঘৃতাদি গৃহ্যতে| ক্ষীরাদীন্ বা সশর্করান্ দদ্যাত্| তথা তোযমর্থাত্সসিতং, বা কেবলং জলং হিতমিতি| তথা দাডিমপুষ্পাণাং রসঃ, তথা চূতফলাস্থ্নঃ, তথা দূর্বাযা রসো, নস্যং পৃথক্পৃথক্ হিতম্|

Adhikarana pradehABya~jjanAdayaH (49) · Śloka 49

| কল্পযেচ্ছীতবর্গং চ প্রদেহাভ্যঞ্জনাদিষু||৪৯||

স০-শীতবীর্যবর্গং চ প্রলেপাভ্যঞ্জনাদিষু কল্পযেত্|

Adhikarana pittajvarauShadhaM kShatakShINauShadhaM ca raktapitte hitam (2) · Śloka 2

যচ্চ পিত্তজ্বরে প্রোক্তং বহিরন্তশ্চ ভেষজম্| রক্তপিত্তে হিতং তচ্চ ক্ষতক্ষীণে হিতং চ যত্||৫০|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতা- যামষ্টাঙ্গহৃদযসংহিতাযাং চতুর্থে চিকিত্সিত স্থানে রক্তপিত্তচিকিত্সিতং নাম দ্বিতীযোঽধ্যাযঃ||২||

স০-যচ্চ পিত্তজ্বরেঽভিহিতমৌষধং বহিরন্তরে, তচ্চ রক্তপিত্তে হিতম্| তথা, যচ্চ ক্ষতে ক্ষীণে চ হিতং তদপি রক্তপিত্তে হিতমিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটী- কাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে রক্তপিত্তচিকিত্সিতং নাম দ্বিতীযা- ধ্যাযঃ সমাপ্তঃ|| ২||