15. udaracikitsitādhyāyaḥ

Adhikarana adhyAyopakramaH · Śloka

অস্মাদনন্তরমুদরচিকিত্সিতং প্রক্রম্যতে| সম্বন্ধশ্চাস্য গুল্মোত্পত্তৌ কিল যথা বাযুঃ প্রধানং কারণং প্রাযঃ, তথা স এবোদরাণামপি, ইত্যাহ-

Adhikarana udaracikitsitAdhyAyaH udare nityaM virecanam (2-1) · Śloka 1

অথাত উদরচিকিত্সিতং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২| ) দোষাতিমাত্রোপচযাত্স্রোতোমার্গনিরোধনাত্| সম্ভবত্যুদরং তস্মান্নিত্যমেনং বিরেচযেত্||১||

স০-দোষাণামতিমাত্রমুপচযো-বৃদ্ধিঃ, তস্মাত্ স্রোতসাং মার্গাঃ-মুখরূপাণি ছিদ্রাণি, তেষাং নিরোধাচ্চ ভবত্যুদরং যতঃ, তস্মাদেনং-উদরিণং, অভীক্ষ্ণং বিরেচযেত্| প্রাযেণ বাতপ্রধানত্বাদস্য ব্যাধেঃ স্নিগ্ধং বিরেচনমাহ-

Adhikarana udare eraNDatailam udare gavyaM mAhiShaM vA udare gokaraBIkShIravRuttiH (2-3) · Śloka 3

পাযযেত্তৈলমৈরণ্ডং সমূত্রং সপযোঽপি বা| মাসং দ্বৌ বাঽথবা গব্যং মূত্রং মাহিষমেব বা||২|| পিবেদ্গোক্ষীরভুক্ স্যাদ্বা করভীক্ষীরবর্তনঃ| দাহানাহাতিতৃণ্মূর্চ্ছাপরীতস্তু বিশেষতঃ||৩||

স০-তৈলমৈরণ্ডং গোমূত্রান্বিতং ক্ষীরযুতং বা মাসমেকমথবা দ্বৌ মাসৌ পাযযেত্| দোষাদিবশাদ্ গব্যং মূত্রং মাহিষং বা মূত্রং পিবেত্| অথবা গোক্ষীরভুগ্ভবেত্| করভীক্ষীরবর্তনো বা স্যাত্| দাহাদিযুতস্তু বিশেষেণৈবংবৃত্তিঃ স্যাত্|

Adhikarana udare rUkShatvAdiyute ghRutAni (4) · Śloka 4

রূক্ষাণাং বহুবাতানাং দোষসংশুদ্ধিকাঙ্ক্ষিণাম্| স্নেহনীযানি সর্পীংষি জঠরঘ্নানি যোজযেত্||৪||

স০-রূক্ষাদীনাং স্নেহনীযানি সর্পীংষ্যুদরহন্তৄণি যোজযেত্|

Adhikarana udare ShaTPalaM dashamUlAdisiddham (5) · Śloka 5

ষট্পলং দশমূলাম্বুমস্তুহ্যাঢকসাধিতম্| |৫|

স০-"পঞ্চকোলযবক্ষার" (হৃ. চি. অ. ৫|২২) ইতি ষট্পলং দশমূলাম্বুনা মস্তুনো হ্যাঢকেন চ সংধিতং ঘৃতপ্রস্থং ষট্পলোপলক্ষণলক্ষিতং যোজযেত্|

Adhikarana udare nAgarAdi ghRutatailam (5-6) · Śloka 6

| নাগরত্রিপলং প্রস্থং ঘৃততৈলাত্তথাঽঽঢকম্||৫|| মস্তুনঃ সাধযিত্বৈতত্পিবেত্সর্বোদরাপহম্| কফমারুতসম্ভূতে গুল্মে চ পরমং হিতম্||৬||

স০-শুণ্ঠ্যাঃ পলত্রযং, প্রস্থং ঘৃততৈলাত্, মস্তুন আঢকমেতত্সাধযিত্বা সর্বোদরাপহং পিবেত্| কফমারুতোত্থে চ গুল্মে সুষ্ঠু হিতমেতত্|

Adhikarana udare gomUtra ghRutam (7) · Śloka 7

চতুর্গুণে জলে মূত্রে দ্বিগুণে চিত্রকাত্পলে| কল্কে সিদ্ধং ঘৃতপ্রস্থং সক্ষারং জঠরী পিবেত্||৭||

স০-সর্পিষঃ প্রস্থং তদপেক্ষযা চতুর্গুণে জলে গোমূত্রে দ্বিগুণে চিত্রকপলে কল্কে সিদ্ধং সযবক্ষারমুদরী পিবেত্|

Adhikarana udare yavAdisiddhaM ghRutam (8) · Śloka 8

যবকোলকুলত্থানাং পঞ্চমূলস্য চাম্ভসা| সুরাসৌবীরকাভ্যাং চ সিদ্ধং বা পাযযেদ্ধৃতম্||৮||

স০-যবাদিক্বাথেন সুরাকাঞ্জিকাভ্যাং সিদ্ধং বা ঘৃতং পাযযেত্|

Adhikarana udare snigdhAya alpoktaM virecanam (9) · Śloka 9

এভিঃ স্নিগ্ধায সঞ্জাতে বলে শান্তে চ মারুতে| স্রস্তে দোষাশযে দদ্যাত্কল্পদৃষ্টং বিরেচনম্||৯||

স০-এভিঃ স্নেহৈঃ স্নিগ্ধায নরায বলে চ সঞ্জাতে সতি পবনে চ শান্তে স্রস্তে দোষাশযে সতি কল্পোক্তং বিরেচনং দদ্যাত্|

Adhikarana udare paTolamUlAdicUrNam (10-12) · Śloka 12

পটোলমূলং ত্রিফলাং নিশাং বেল্লং চ কার্ষিকম্| কম্পিল্লনীলিনীকুম্ভভাগান্ দ্বিত্রিচতুর্গুণান্||১০|| পিবেত্সঞ্চূর্ণ্য মূত্রেণ পেযাপূর্বং ততো রসৈঃ| বিরিক্তো জাঙ্গলৈরদ্যাত্ততঃ ষড্দিবসং পযঃ||১১|| শৃতং পিবেদ্ব্যোষযুতং পীতমেবং পুনঃপুনঃ| হন্তি সর্বোদরাণ্যেতচ্চূর্ণং জাতোদকান্যপি||১২||

স০-পটোলমূলাদি কার্ষিকং কম্পিল্লাদীনাং ভাগান্ ক্রমেণ দ্বিত্রিচতুর্গুণান্ সঞ্চূর্ণ্য গোমূত্রেণ পিবেত্| অনন্তরং বিরিক্তঃ সন্ পেযাং ভুক্ত্বা জাঙ্গলমাংসরসৈঃ শাল্যাদিকমদ্যাত্| ততঃ-অনন্তরং, ষড্দিবসানি ক্বথিতং ক্ষীরং ত্রিকটুযুতং পিবেত্| এবং পুনঃপুনরেতত্পীতং সর্বোদরাণি জাতসলিলান্যপি হন্তি|

Adhikarana udare gavAkShyAdi cUrNam (13) · Śloka 13

গবাক্ষীং শঙ্খিনীং দন্তীং তিল্বকস্য ত্বচং বচাম্| পিবেত্কর্কন্ধুমৃদ্বীকাকোলাম্ভোমূত্রসীধুভিঃ||১৩||

স০-গবাক্ষ্যাদিকং চূর্ণং কর্কন্ধ্বাদিজলমূত্রসীধ্বন্যতমেন পিবেত্|

Adhikarana udare nArAyaNacUrNam (14-21) · Śloka 21

যবানি হপুষা ধান্যং শতপুষ্পোপকুঞ্চিকা| কারবী পিপ্পলীমূলমজগন্ধা শঠী বচা||১৪|| চিত্রকোঽজাজিকং ব্যোষং স্বর্ণক্ষীরী ফলত্রযম্| দ্বৌ ক্ষারৌ পৌষ্করং মূলং কুষ্ঠং লবণপঞ্চকম্||১৫|| বিডঙ্গং চ সমাংশানি দন্ত্যা ভাগত্রযং তথা| ত্রিবৃদ্বিশালে দ্বিগুণে সাতলা চ চতুর্গুণা||১৬|| এষ নারাযণো নাম চূর্ণো রোগগণাপহঃ| নৈনং প্রাপ্যাভিবর্ধন্তে রোগা বিষ্ণুমিবাসুরাঃ||১৭|| তক্রেণোদরিভিঃ পেযো গুল্মিভির্বদরাম্বুনা| আনাহবাতে সুরযা বাতরোগে প্রসন্নযা||১৮|| দধিমণ্ডেন বিট্সঙ্গে দাডিমাম্ভোভিরর্শসৈঃ| পরিকর্তে সবৃক্ষাম্লৈরুষ্ণাম্বুভিরজীর্ণকে||১৯|| ভগন্দরে পাণ্ডুরোগে কাসে শ্বাসে গলগ্রহে| হৃদ্রোগে গ্রহণীদোষে কুষ্ঠে মন্দেঽনলে জ্বরে||২০|| দংষ্ট্রাবিষে মূলবিষে সগরে কৃত্রিমে বিষে| যথার্হং স্নিগ্ধকোষ্ঠেন পেযমেতদ্বিরেচনম্||২১||

স০-যবান্যাদীনি বিডঙ্গপর্যন্তানি সমাংশানি| দন্ত্যা ভাগাস্ত্রযঃ| ত্রিবৃদ্বিশালযোর্দ্বৌ দ্বৌ ভাগৌ| সাতলাযাশ্চ চত্বারঃ| এষ চূর্ণো নারাযণো নাম রোগগণাপহঃ| এনং চূর্ণং প্রাপ্য রোগা নাভিবর্ধন্তে| কং ক[ইব] ? যথা বিষ্ণুমিবাসুরাঃ| উদরিভিরেষ তক্রেণ পেযঃ| গুল্ম্যাদিভির্বদরাম্ব্বাদিভিঃ পেযঃ| ভগন্দরাদিষ্বেতদ্যথার্হং স্নেহপীতেন বিরেচনং পেযম্|

Adhikarana udare hapuShAdicUrNam (22-25) · Śloka 25

হপুষাং কাঞ্চনক্ষীরীং ত্রিফলাং নীলিনীফলম্| ত্রাযন্তীং রোহিণীং তিক্তাং সাতলাং ত্রিবৃতাং বচাম্||২২|| সৈন্ধবং কাললবণং পিপ্পলীং চেতি চূর্ণযেত্| দাডিমত্রিফলামাংসরসমূত্রসুখোদকৈঃ||২৩|| পেযোঽযং সর্বগুল্মেষু প্লীহ্নি সর্বোদরেষু চ| শ্বিত্রে কুষ্ঠেষ্বজরকে সদনে বিষমেঽনলে||২৪|| শোফার্শঃপাণ্ডুরোগেষু কামলাযাং হলীমকে| বাতপিত্তকফাংশ্চাশু বিরেকেণ প্রসাধযেত্||২৫||

স০-হপুষাদিকমেতচূর্ণং দাডিমাদিরসৈঃ পেযম্| গুল্মাদিষু বিরেকেণ চৈতদাশু বাতপিত্তকফান্ সম্প্রসাধযেত্| কাললবণং-কৃষ্ণলবণম্|

Adhikarana udare nIlinyAdi cUrNam (26) · Śloka 26

নীলিনীং নিচুলং ব্যোষং ক্ষারৌ লবণপঞ্চকম্| চিত্রকং চ পিবেচ্চূর্ণং সর্পিষোদরগুল্মনুত্||২৬||

স০-নীলিন্যাদিকং চূর্ণং সর্ষিষা পিবেত্| উদরগুল্মঘ্নম্|

Adhikarana udare Atyayike snehavirecakaH (27-28) · Śloka 28

পূর্ববচ্চ পিবেদ্দুগ্ধং ক্ষামঃ শুদ্ধোঽন্তরাঽন্তরা| কারভং গব্যমাজং বাদদ্যাদাত্যযিকে গদে||২৭|| স্নেহানেব বিরেকার্থে দুর্বলেভ্যো বিশেষতঃ| |২৮|

স০-পূর্ববচ্চ-যথা পটোলমূলাদিকে চূর্ণে (শ্লো. ১০) কথিতং, তথৈব শুদ্ধঃ ক্ষামঃ সন্ জাঙ্গলরসাদনন্তরমন্তরাঽন্তরা-মধ্যে মধ্যে, দুগ্ধং পিবেত্| কারভং গব্যং ছাগং বা ক্ষীরম্| স০-আত্যযিকে রোগে বিরেকার্থে স্নেহানেব দদ্যাত্| দুর্বলেভ্যো বা বিশেষেণ|

Adhikarana udare Atyayike harItakIghRutam (28-31) · Śloka 31

| হরীতকীসূক্ষ্মরজঃপ্রস্থযুক্তং ঘৃতাঢকম্||২৮|| অগ্নৌ বিলাপ্য মথিতং খজেন যবপল্লকে| নিধাপযেত্ততো মাসাদুদ্ধৃতং গালিতং পচেত্||২৯|| হরীতকীনাং ক্বাথেন দধ্না চাম্লেন সংযুতম্| উদরং গরমষ্ঠীলামানাহং গুল্মবিদ্রধী||৩০|| হন্ত্যেতত্কুষ্ঠমুন্মাদমপস্মারং চ পানতঃ| |৩১|

স০-হরীতকীসূক্ষ্মচূর্ণপ্রস্থযুক্তং ঘৃতস্যাঢকমগ্নৌ বিলাপ্য খজেনালোডিতং যবপল্লকে-যবরাশিমধ্যে, নিধাপযেত্| ততো মাসাদনন্তরমুদ্ধৃতং গালিতং হরীতকীনাং ক্বাথেন-সামান্যপরিভাষোক্তপ্রমাণেন, অম্লেন দধ্না সংযুতং চ পচেত্| এতচ্চ পানেনোদরাদীন্ হন্তি|

Adhikarana udare Atyayike snukkShIraghRutam (31-32) · Śloka 32

| স্নুক্ঽঽক্ষীরযুক্তাদ্গোক্ষীরাচ্ছৃতশীতাত্ খজেনাহতাত্||৩১|| যজ্জাতমাজ্যং স্নুক্ঽঽক্ষীরসিদ্ধং তচ্চ তথাগুণম্| |৩২|

স০-স্নুক্ষীরমিশ্রিতাদ্গোক্ষীরাচ্ছৃতশীতাত্ খজেনাহতাত্ যজ্জাতং সর্পিস্তত্স্নুক্ক্ষীরপক্বং পূর্বগুণম্|

Adhikarana udare Atyayike trivRutsiddhaM ghRutam (32-33) · Śloka 33

| ক্ষীরদ্রোণং সুধাক্ষীরপ্রস্থার্ধসহিতং দধি||৩২|| জাতং মথিত্বা তত্সর্পিস্ত্রিবৃত্সিদ্ধং চ তদ্গুণম্| |৩৩|

স০-ক্ষীরদ্রোণং স্নুক্ক্ষীরপ্রস্থার্ঘেন যুতং দধি জাতং মথিত্বা তত্সর্পিস্ত্রিবৃতাপক্বং পূর্বগুণম্|

Adhikarana udare Atyayike payaH siddhaM ghRutam (33-34) · Śloka 34

| তথা সিদ্ধং ঘৃতপ্রস্থং পযস্যষ্টগুণে পিবেত্||৩৩|| স্নুক্ক্ষীরপলকল্কেন ত্রিবৃতাষট্পলেন চ| |৩৪|

স০-তথা সিদ্ধং-পূর্ববত্পক্বং, ঘৃতপ্রস্থং ক্ষীরেঽষ্টগুণে স্নুক্ষীরপলকল্কেন ত্রিবৃতাষট্পলেন চ সিদ্ধং পিবেত্|

Adhikarana udare Atyayike ghRutAdInAM paScAt peyAdipAnam (34) · Śloka 34

| এষাং চানু পিবেত্পেযাং রসং স্বাদু পযোঽথবা||৩৪||

স০-এষাং চ ঘৃতাদীনাং পশ্চাত্ পেযাদীন্ পিবেত্|

Adhikarana udare jIrNe ghRute viriktasya SuNThI jalAdi pAnam (35) · Śloka 35

ঘৃতে জীর্ণে বিরিক্তশ্চ কোষ্ণং নাগরসাধিতম্| পিবেদম্বু ততঃ পেযাং ততো যূষং কুলত্থজম্||৩৫||

স০-ঘৃতে জীর্ণে বিরিক্তশ্চ সন্ কোষ্ণং শূণ্ঠীসাধিতং জলং পিবেত্| অনন্তরং পেযাং পিবেত্| কুলত্থযূষং চ পিবেত্|

Adhikarana udare evaM tryahaM rUkShatve punaH punaH sarpiShpAnam (36) · Śloka 36

পিবেদ্রূক্ষস্ত্র্যহং ত্বেবং ভূযো বা প্রতিভোজিতঃ| পুনঃপুনঃ পিবেত্সর্পিরানুপূর্ব্যাঽনযৈব চ||৩৬||

স০-এবং ত্র্যহং রূক্ষঃ সন্ পুনরপি প্রতিভোজিতঃ পুনঃপুনরনেনৈব ক্রমেণ সর্পিঃ পিবেত্|

Adhikarana udare etAni ghRutAni gulmAdInAM shAntaye (37) · Śloka 37

ঘৃতান্যেতানি সিদ্ধানি বিদধ্যাত্কুশলো ভিষক্| গুল্মানাং গরদোষাণামুদরাণাং চ শান্তযে||৩৭||

স০-এতানি-প্রাগুক্তানি, সিদ্ধানি ঘৃতানি কুশলো বৈদ্যঃ কুর্বীত গুল্মাদীনাং শান্তযে|

Adhikarana udare AnAhaBedanaM ghRutam (38) · Śloka 38

পীলুকল্কোপসিদ্ধং বা ঘৃতমানাহভেদনম্| তৈল্বকং নীলিনীসর্পিঃ স্নেহং বা মিশ্রকং পিবেত্||৩৮||

স০-পীলুকল্কপক্বং ঘৃতমানাহভেদনং পিবেত্| তৈল্বকং (হৃ. চি. অ. ২১|৩২) বা নীলিনীঘৃতং (হৃ. চি. অ. ১৪|৫৫) মিশ্রকং (হৃ. চি. অ. ১৪|৮৯) বা স্নেহং পিবেত্|

Adhikarana udare hRutadoShe shAlyodanam (39) · Śloka 39

হৃতদোষঃ ক্রমাদশ্নন্ লঘুশাল্যোদনপ্রতি| |৩৯|

স০-হৃতদোষঃ ক্রমেণ শাল্যোদনমতিলঘুগুণযুক্তমল্পং খাদেত্| এবং সংসর্জনক্রম আদরিতব্যঃ|

Adhikarana udare doSha SeShanivRuttaye harItakIsahasram udare doSha pippalIsahasram udare doSha pippalIvardhamAnam udare doSha shilAjatuH udare doSha gugguluH udare doSha tulyArdrakarasaM kShIram (39-41) · Śloka 41

| উপযুঞ্জীত জঠরী দোষশেষনিবৃত্তযে||৩৯|| হরীতকীসহস্রং বা গোমূত্রেণ পযোনুপঃ| সহস্রং পিপ্পলীনাং বা স্নুক্ঽঽক্ষীরেণ সুভাবিতম্||৪০|| পিপ্পলীবর্ধমানং বা ক্ষীরাশী বা শিলাজতু| তদ্বদ্বা গুগ্গুলুং ক্ষীরং তুল্যার্দ্রকরসং তথা||৪১||

স০-জঠরী দোষশেষস্য নিবৃত্তযে হরীতকীসহস্রং গোমূত্রেণাসকৃদ্ভাবিতং পযোনুপঃ সন্ খাদেত্| অথবা, স্নুহীদুগ্ধেনাসকৃদ্ভাবিতং পিপ্পলী সহস্রমুপযুঞ্জীত| পিপ্পলীবর্ধমানং বা রসাযনবিধানেনোপযুঞ্জীত| অথবা, দুগ্ধাশনঃ সন্নদ্রিজমুপযুঞ্জীত| তথৈব গুগ্গুলুং প্রযুঞ্জীত| তথা, তুল্যার্দ্রকরসং ক্ষীরমুপযুঞ্জীত|

Adhikarana udare doSha citrakadevadArUkalkaH (42) · Śloka 42

চিত্রকামরদারুভ্যাং কল্কং ক্ষীরেণ বা পিবেত্| মাসং যুক্তস্তথা হস্তিপিপ্পলীবিশ্বভেষজম্||৪২||

স০-অথবা, চিত্রকদেবদারুণোঃ কল্কং ক্ষীরেণ পিবেত্| তথা, মাসং হস্তিপিপ্পলীবিশ্বভেষজকল্কং যুক্তো-নিযতঃ সন্, ক্ষীরেণ পিবেত্|

Adhikarana udare viDa~ggAdikalkayuktaM payaH (43) · Śloka 43

বিডঙ্গং চিত্রকো দন্তি চব্যং ব্যোষং চ তৈ পযঃ| কল্কৈঃ কোলসমৈঃ পীত্বা প্রবৃদ্ধমুদরং জযেত্||৪৩||

স০-বিডঙ্গাদিভিঃ কল্কৈঃ কোলপ্রমাণৈরালোডিতং পযঃ পীত্বা প্রবৃদ্ধমুদরং জযেত্|

Adhikarana udare snuhIkShIrAdiyuktamnnam udare snuhIkShIrAdikRutA utkArikA (44) · Śloka 44

ভোজ্যং ভুঞীত বা মাসং স্নুহীক্ষীরঘৃতান্বিতম্| উত্কারিকাং বা স্নুক্ক্ষীরপীতপথ্যাকণাকৃতাম্||৪৪||

স০-স্নুক্ক্ষীরঘৃতান্বিতং ভোজ্যং-আহারং, মাসং বা ভুঞ্জীত| স্নুক্ক্ষীরসিদ্ধং ঘৃতং স্নুক্ক্ষীরঘৃতম্, স্নুক্ক্ষীরযুতং বা ঘৃতং স্নুক্ক্ষীরঘৃতম্| উত্কারিকাং বা স্নুক্ক্ষীরযুতাং ভুঞ্জীত| উত্কারিকাং-রোটিকাম্|

Adhikarana udare pArshvashUlAdau bilvakShAstailamudare pArshva TiNkAdikShAratailam (45-46) · Śloka 46

পার্শ্বশূলমুপস্তম্ভং হৃদ্গ্রহং চ সমীরণঃ| যদি কুর্যাত্ ততস্তৈলং বিল্বক্ষারান্বিতং পিবেত্||৪৫|| পক্বং বা টিণ্টুকবলাপলাশতিলনালজৈঃ| ক্ষারৈঃ কদল্যপমার্গতর্কারীজৈঃ পৃথক্কৃতৈঃ||৪৬||

স০-সমীরণঃ পার্শ্বশূলাদিকং যদি কুর্যাত্ ততস্তৈলং বিল্বাদিযুতং পিবেত্| অথবা, মযূরজঙ্ঘাদিজৈঃ ক্ষারৈঃ কদল্যপামার্গতর্কারীজৈঃ পৃথক্কৃতৈঃ পক্বং তৈলং পিবেত্|

Adhikarana udare vAtAvRute kaPAdau eraNDatailam (47) · Śloka 47

কফে বাতেন পিত্তে বা তাভ্যাং বাঽপ্যাবৃতেঽনিলে| বলিনঃ স্বৌষধযুতং তৈলমেরণ্ডজং হিতম্||৪৭||

স০-কফে বাতেনাবৃতে, তাভ্যাং-কফপিত্তাভ্যাং বাঽঽবৃতেঽনিলে সতি, বলিনো নরস্য স্বৌষধযুতমেরণ্ডতৈলং হিতম্|

Adhikarana udare vAtAvRute kaPAdau devadArvAdilepaH (48) · Śloka 48

দেবদারুপলাশার্কহস্তিপিপ্পলিশিগ্রুকৈঃ| সাশ্বকর্ণৈঃ সগোমূত্রৈঃ প্রদিহ্যাদুদরং বহিঃ||৪৮||

স০-দেবদার্বাদিভির্গোমূত্রসহিতৈরুদরং বাহ্যতঃ প্রলিম্পেত্|

Adhikarana udare vAtAvRute vRuScikAlyAdi kvAthasecanam (49) · Śloka 49

বৃশ্চিকালীবচাশুণ্ঠীপঞ্চমূলপুনর্নবাত্| বর্ষাভূধান্যকুষ্ঠাচ্চ ক্বাথৈর্মূত্রৈশ্চ সেচযেত্||৪৯||

স০-বৃশ্চিকাল্যাদীনাং ক্বাথৈর্মূত্রৈশ্চ জঠরং সেচযেত্|

Adhikarana udare viriktamlAne svedo veShTanaM ca (50) · Śloka 50

বিরিক্তম্লানমুদরং স্বেদিতং সাল্বণাদিভিঃ| বাসসা বেষ্টযেদেবং বাযুর্নাধ্মাপযেত্পুনঃ||৫০||

স০-উদরং বিরিক্তম্লানং সাল্বণাদিভিঃ স্বেদিতং ততো বস্ত্রেণ বেষ্টযেত্| এবং কৃতে সতি বাযুর্ন পুনরাধ্মাপযেত্|

Adhikarana udare punarAdhmAne snigdhA nirUhAH (51) · Śloka 51

সুবিরিক্তস্য যস্য স্যাদাধ্মানং পুনরেব তম্| সুস্নিগ্ধৈরম্ললবণৈর্নিরূহৈঃ সমুপাচরেত্||৫১||

স০-সুবিরিক্তস্য নরস্য যস্য পুনরাধ্মানং স্যাত্, তং-উদারিণং নরং, পুনরেব নিরূহৈঃ সুস্নিগ্ধৈরম্ললবণৈশ্চোপাচরেত্|

Adhikarana udare sAvaraNe tIkShNA nirUhAH (52) · Śloka 52

সোপস্তম্ভোঽপি বা বাযুরাধ্মাপযতি যং নরম্| তীক্ষ্ণাঃ সক্ষারগোমূত্রাঃ শস্যন্তে তস্য বস্তযঃ||৫২||

স০-সহোপস্তম্ভেন-কফাদ্যাধারকেণ, বর্ততে সোপস্তম্ভো বাযুর্যং নরমাধ্মাপযতি, তস্য তীক্ষ্ণা বস্তযঃ ক্ষারগোমূত্রাভ্যাং সহ শস্যন্তে|

Adhikarana udare iti sAmAnyacikitsA (53) · Śloka 53

ইতি সামান্যতঃ প্রোক্তাঃ সিদ্ধা জঠরিণাং ক্রিযাঃ| |৫৩|

স০-ইতি-এবং, সামান্যেনোদরিণাং ক্রিযাঃ সিদ্ধাঃ প্রোক্তাঃ|

Adhikarana vAtodare vidAryAdighRutena snigdhaM sveditaM tailvakAdinA virecayet (53-54) · Śloka 54

| বাতোদরেঽথ বলিনং বিদার্যাদিশৃতং ঘৃতম্||৫৩|| পাযযেত ততঃ স্নিগ্ধং স্বেদিতাঙ্গং বিরেচযেত্| বহুশস্তৈল্বকেনৈনং সর্পিষা মিশ্রকেণ বা||৫৪||

স০-বাতোদরে সতি বলবন্তং পুরুষং বিদার্যাদিগণেন পক্বং ঘৃতং পাযযেত্| অনন্তরং স্নিগ্ধং স্বেদিতশরীরমেনং বহুশস্তৈল্বকেন ঘৃতেন (হৃ. চি. অ. ২১|৩২) বিরেচযেত্| মিশ্রকেণ (হৃ. চি. অ. ১৪|৮৯) বা ঘৃতেন বিরেচযেত্|

Adhikarana udare saMsarjane kRute balArthaM kShIram,udare labdhe bale kShIravarjanam (55) · Śloka 55

কৃতে সংসর্জনে ক্ষীরং বলার্থমবচারযেত্| প্রাগুত্ক্লেশান্নিবর্ত্যং চ বলে লব্ধে ক্রমাত্পযঃ||৫৫||

স০-কৃতে সংসর্জনে সতি ক্ষীরং বলদানায দদ্যাত্| উত্ক্লেশাত্ প্রাক্-প্রাযেণ কফোপচিতেরুত্ক্লেশং দৃষ্ট্বাঽনন্তরং, বলে লব্ধে সতি ক্রমেণ ক্ষীরং নিবর্তযেত্-ন সহসৈব|

Adhikarana udare tato yUShAdiBiragnivardhanam udare sodAvartai AsthApanam (56-57) · Śloka 57

যূষৈ রসৈর্বা মন্দাম্ললবণৈরেধিতানলম্| সোদাবর্তং পুনঃ স্নিগ্ধস্বিন্নমাস্থাপযেত্ততঃ||৫৬|| তীক্ষ্ণাধোভাগযুক্তেন দাশমূলিকবস্তিনা| |৫৭|

স০-ততঃ-অনন্তরমুদীরিণং যূষাদিভিঃ সমিদ্ধাগ্নিমুদাবর্তবন্তং পুনরপি স্নিগ্ধস্বিন্নং দাশমূলিকবস্তিনা নিরূহযেত্| দাশমূলিকো বস্তিঃ-"দ্বিপঞ্চমূলত্রিফলাফলবিল্বানি পাচযেত্|" (হৃ. ক. অ. ৪|৩৪) ইত্যাদিঃ কল্পোক্তঃ| তেন কিম্ভূতেন ? তীক্ষ্ণাধোভাগযুক্তেন| অধোভাগো-অধস্তাচ্ছরীরে, যুক্তো-যোগ্যঃ| তীক্ষ্ণাশ্চাসাবধোভাগযুক্তশ্চ, তেন|

Adhikarana udare rUkShatvAdiyukte anuvAsanam udare avirecyatve shamanA bastvAdayaH (57-59) · Śloka 59

| তিলোরুবূকতৈলেন বাতঘ্নাম্লশৃতেন চ||৫৭|| স্ফুরণাক্ষেপসন্ধ্যস্থিপার্শ্বপৃষ্ঠত্রিকার্তিষু| রূক্ষং বদ্ধশকৃদ্বাতং দীপ্তাগ্নিমনুবাসযেত্||৫৮|| অবিরেচ্যস্য শমনা বস্তিক্ষীরঘৃতাদযঃ| |৫৯|

স০-রূক্ষং বদ্ধশকৃদ্বাতং দীপ্তানলং তিলৈরণ্ডতৈলেন বাতঘ্নৈর্দ্রব্যৈরম্লৈশ্চ শৃতেনানুবাসযেত্| স্ফুরণাদিসদ্ভাবে সত্যবিরেচ্যস্যোদরিণো নরস্য শমনা বস্ত্যাদযঃ প্রযোজ্যাঃ| [ অবিরেচ্যাঃ- ] "ন তু রেচ্যো নবজ্বরী " (হৃ. সূ. অ. ১৮|১০) ইত্যাদযো বিরেচনবিধাবুক্তাঃ|

Adhikarana pittodare svAdusiddhaghRutena snehanam pittodare syAmAdighRutena virecanam pittodare nyagrodhAdikAthena virecanam pittodare nyagrodhAdisnehena anuvAsanam (59-61) · Śloka 61

| বলিনং স্বাদুসিদ্ধেন পৈত্তে সংস্নেহ্য সর্পিষা||৫৯|| শ্যামাত্রিভণ্ডীত্রিফলাবিপক্বেন বিরেচযেত্| সিতামধুঘৃতাঢ্যেন নিরূহোঽস্য ততো হিতঃ||৬০|| ন্যগ্রোধাদিকষাযেণ স্নেহবস্তিশ্চ তচ্ছৃতঃ| |৬১|

স০-বলবন্তং পুরুষং পৈত্তে জঠরে সতি মধুরবর্গসিদ্ধেন ঘৃতেন সংস্নেহ্য শ্যামাদিভির্বিপক্বেন সর্পিষা বিরেচযেত্| শ্যামা-মালবিকা ত্রিবৃত্| ত্রিভণ্ডী-কাশী ত্রিবৃত্| অনন্তরং শর্করামাক্ষিকঘৃতবহুলেন ন্যগ্রোধাদিকষাযেণাস্য-আতুরস্য, নিরূহো হিতঃ| [ তথা, ] তেনৈব-ন্যগ্রোধাদিনা, [শৃতো- ] বিপক্বঃ, স্নেহবস্তিঃ-অনুবাসনো, হিতঃ| ননু, বলিনমিত্যযুক্তম্| যতঃ প্রাগভ্যধাযি (হৃ. নি. অ. ১২|৪)- "নষ্টচেষ্টাবলাহারাঃ" ইতি| অত্রোচ্যতে| ভেষজবেগসহিষ্ণুমাত্রত্বমত্র বলবত্ত্বং পরিকল্প্য বলিনমিত্যুক্তম্, ন তু প্রকৃষ্টবলবন্তমিত্যদোষঃ|

Adhikarana pittodare durbalasya pUrvamanuvAsya kShIrabastiBiH shodhanam (61) · Śloka 61

| দুর্বলং ত্বনুবাস্যাদৌ শোধযেত্ক্ষীরবস্তিভিঃ||৬১||

স০-দুর্বলং তু নরং প্রাগনুবাস্য ক্ষীরবস্তিভিঃ শোধযেত্|

Adhikarana pittodareagnibale jAte punaH punaH trivRutkalkakShIrAdi nA virecanam pittodare sakaPe samUtrakShIreNa pittodare savAtesatiktAjya kShIreNa pittodare eShAmanyatamakShIreNAnnaBojanam pittodare pAyasena jaTharopanAhaH (62-64) · Śloka 64

জাতে চাগ্নিবলে স্নিগ্ধং ভূযো ভূযো বিরেচযেত্| ক্ষীরেণ সত্রিবৃত্কল্কেনোরুবূকশৃতেন বা||৬২|| সাতলাত্রাযমাণাভ্যাং শৃতেনারগ্বধেন বা| সকফে বা সমূত্রেণ সতিক্তাজ্যেন সানিলে||৬৩|| পযসাঽন্যতমেনৈষাং বিদার্যাদিশৃতেন বা| ভুঞ্জীত জঠরং চাস্য পাযসেনোপনাহযেত্||৬৪||

স০-অগ্নিবলে চ জাতে স্নিগ্ধং সন্তং পুনঃপুনর্বিরেচযেত্| কেন ? ক্ষীরেণ| ত্রিবৃচ্চূর্ণযুতেনৈরণ্ডশৃতেন বা ক্ষীরেণ সাতলাত্রাযন্তীভ্যাং বা শৃতেন কর্ণিকারেণ বা শৃতেন| পিত্তোদরিণঃ সুতরাং বলাপেক্ষিত্বাদ্ঽঽদুর্বলমিত্যুক্তম্| কফযুতে পিত্তে সমূত্রেণ ক্ষীরেণৈষামন্যতমেন শৃতেন, সানিলে পিত্তে তিক্তাজ্যেন সহ পযসা পূর্বোক্তদ্রব্যাণামন্যতমেন শৃতেন বিরেচযেত্| তিক্তদ্রব্যযুতমাজ্যং তিক্তাজ্যম্, কুষ্ঠোক্তং তিক্তঘৃতং বা| বিদার্যাদিশৃতেন বা পযসা ভুঞ্জীত-ভোজনং কুর্বীত| জঠরং চাস্য পাযসেনোপনাহযেত্|

Adhikarana pittodare kShIrabastivirecanani punaHpunaH (65) · Śloka 65

পুনঃ ক্ষীরং পুনর্বস্তিং পুনরেব বিরেচনম্| ক্রমেণ ধ্রুবমাতিষ্ঠন্ যত্তঃ পিত্তোদরং জযেত্||৬৫||

স০-পুনঃ ক্ষীরং পুনর্বস্তিং পুনরেব বিরেচনং ক্রমেণ ধ্রুবমাতিষ্ঠন্-আচরন্, যত্তো-যত্নবান্ সন্, পিত্তোদরং জযেত্| পুনঃ ক্ষীরমিত্যাদিষু পুনঃশব্দো বীপ্সার্থঃ| এতচ্চ ক্রমেণ ধ্রুবমাতিষ্ঠন্নিত্যতো লব্ধম্|

Adhikarana kaPodare vatsakAdighRutenasnehanam kaPodare svigne snukShIraghRutena virecanam kaPodare kaTukShArayuktairannaiH saMsarjanam (66-67) · Śloka 67

বত্সকাদিবিপক্বেন কফে সংস্নেহ্য সর্পিষা| স্বিন্নং স্নুক্ষীরসিদ্ধেন বলবন্তং বিরেচিতম্||৬৬|| সংসর্জযেত্কটুক্ষারযুক্তৈরন্নৈঃ কফাপহৈঃ| |৬৭|

স০-কফে-কফোদরে, বত্সকাদিবিপক্বেন সর্পিষা সংস্নেহ্য স্বিন্নং সন্তং স্নুক্ষীরসিদ্ধেন ঘৃতেন বলিনং বিরেচিতং সন্তং সংসর্জযেত্-পেযাদ্যন্নৈরুপক্রমেত্| কিম্ভূতৈঃ ? কটুক্ষারদ্রব্যযুতৈরন্নৈঃ কফঘ্নৈঃ| কটুক্ষারযুতানাং কফঘ্নত্বেঽপি কফঘ্নৈরিত্যুক্তমতিশযার্থম্|

Adhikarana kaPodare muShkakAdikvAthena nirUhaH kaPodare etaCRutasnehena anuvAsanam kaPodare vyoShadugdhAdinA Bojanam (67-68) · Śloka 68

| মূত্রত্র্যূষণতৈলাঢ্যো নিরূহোঽস্য ততো হিতঃ||৬৭|| মুষ্ককাদিকষাযেণ স্নেহবস্তিশ্চ তচ্ছৃতঃ| ভোজনং ব্যোষদুগ্ধেন কৌলত্থেন রসেন বা||৬৮||

স০-ততঃ-সংসর্জনাদনন্তরং, নিরূহো গোমূত্রত্রিকটুকতৈলবহুলো মুষ্ককাদিবর্গক্বাথেনাস্য-কফোদরিণো, হিতঃ| স্নেহবস্তিঃ-অনুবাসনম্, তেনৈব শৃতো হিতঃ| ভোজনং ব্যোষযুক্তেন দুগ্ধেন সহ হিতং কুলত্থরসেন বা|

Adhikarana kaPodare staimityAdau ariShTakShArAH (69) · Śloka 69

স্তৈমিত্যারুচিহৃল্লাসে মন্দেঽগ্নৌ মদ্যপায চ| দদ্যাদরিষ্টান্ ক্ষারাংশ্চ কফস্ত্যানস্থিরোদরে||৬৯||

স০-মদ্যপায নরায মন্দেঽগ্নৌ স্তৈমিত্যাদৌ চ সত্যরিষ্টান্ ক্ষারাংশ্চ দদ্যাত্| কফেন স্ত্যানং জঠরং যস্য তস্মিন্নিদং কার্যম্|

Adhikarana kaphodare staimityAdau hi~ggvAdikShArAHau (70-73) · Śloka 73

হিঙ্গূপকুল্যে ত্রিফলাং দেবদারু নিশাদ্বযম্| ভল্লাতকং শিগ্রুফলং কটুকাং তিক্তকং বচাম্||৭০|| শুণ্ঠীং মাদ্রীং ঘনং কুষ্ঠং সরলং পটুপঞ্চকম্| দাহযেজ্জর্জরীকৃত্য দধিস্নেহচতুষ্কবত্||৭১|| অন্তর্ধূমং ততঃ ক্ষারাদ্বিডালপদকং পিবেত্| মদিরাদধিমণ্ডোষ্ণজলারিষ্টসুরাসবৈঃ||৭২|| উদরং গুল্মমষ্ঠীলাং তূন্যৌ শোফং বিসূচিকাম্| প্লীহহৃদ্রোগগুদজানুদাবর্তং চ নাশযেত্||৭৩||

স০-হিড্গ্বাদিকং জর্জরীকৃত্য দধিস্নেহচতুষ্কযুতমন্তর্ধূমং দাহযেত্| তস্মাত্ ক্ষারাদ্বিডালপদকং মদিরাদিভিঃ পিবেত্| এষ চ ক্ষার উদরগুল্মাদীন্ নাশযেত্|

Adhikarana kaPodare ariShTagomUtrAdayaH (74) · Śloka 74

জযেদরিষ্টগোমূত্রচূর্ণাযস্কৃতিপানতঃ| সক্ষারতৈলপানৈশ্চ দুর্বলস্য কফোদরম্||৭৪||

স০-দুর্বলস্য নরস্য কফোদরমরিষ্টাদিপানেন জযেত্| অযস্কৃতিঃ-প্রমেহচিকিত্সিতে (অ. ১২|২৯) প্রোক্তা, ক্ষারযুততৈলপানৈশ্চ জযেত্|

Adhikarana kaPodare mUlakabIjAdiBirUpanAhaH kaPodare aBIkShNaM svedaH (75) · Śloka 75

উপনাহ্যং সসিদ্ধার্থকিণ্বৈর্বীজৈশ্চ মূলকাত্| কল্কিতৈরুদরং স্বেদমভীক্ষ্ণং চাত্র যোজযেত্||৭৫||

স০-তথা, উপনাহ্যং জঠরমস্যৈতৈঃ মূলকবীজৈঃ কল্কিতৈঃ সসর্ষপকিণ্বৈঃ| তথা, নিত্যং স্বেদমত্র যোজযেত্|

Adhikarana sanipAtodare pratyAkhyAyakriyA (76) · Śloka 76

সন্নিপাতোদরে কুর্যান্নাতিক্ষীণবলানলে| দোষোদ্রেকানুরোধেন প্রত্যাখ্যায ক্রিযামিমাম্||৭৬||

স০-সন্নিপাতোদরে-অর্থাত্সন্নিপাতোদরবতি নরে, নাতিক্ষীণবলানলেঽধিদোষানুরোধেন-তদ্বশেনৈব, ক্রিযামিমাং-অনন্তরোক্তাং, কুর্যাত্| কিং কৃত্বা ? প্রত্যাখ্যায,-এতদুদরমশক্যপ্রতীকারমিত্যেবমুক্ত্বা| অথোপক্রমমাহ-

Adhikarana sanipAtodare dantIdravantItailapAnam (77) · Śloka 77

দন্তীদ্রবন্তীফলজং তৈলং পানে চ শস্যতে| |৭৭|

স০-দন্ত্যাদিতৈলং পানে চ শস্যতে|

Adhikarana sanipAtodare kriyAnivRutte kAkAdanyAdikalkaH (77-78) · Śloka 78

| ক্রিযানিবৃত্তে জঠরে ত্রিদোষে তু বিশেষতঃ||৭৭|| দদ্যাদাপৃচ্ছ্য তজ্জ্ঞাতীন্ পাতুং মদ্যেন কল্কিতম্| মূলং কাকাদনীগুঞ্জাকরবীরকসম্ভবম্||৭৮||

স০-ক্রিযামতিক্রান্তে জঠরে বিশেষেণ ত্রিদোষজে তস্য-উদরিণো বন্ধূন্, পৃষ্ট্বা-যথৈতদ্বিষং বিষমং কিং জীবযত্যুত মারযতীতি সন্দেহ ইত্যাদ্যুক্ত্বা, প্রযোজ্যং বক্ষ্যমাণং চৈতত্| পাতুমিত্যাদি| কাকাদন্যাদিজং মূলং কল্কিতং মদ্যেন পাতুং দদ্যাত্| ককাদনী-কাকণন্তিকা|

Adhikarana sanipAtodare kriyAsthAvaraM viShaM sarpaviShaM vA (79-81) · Śloka 81

পানভোজনসংযুক্তং দদ্যাদ্বা স্থাবরং বিষম্| যস্মিন্ বা কুপিতঃ সর্পো বিমুঞ্চতি ফলে বিষম্||৭৯|| তেনাস্য দোষসঙ্ঘাতঃ স্থিরো লীনো বিমার্গগঃ| বহিঃ প্রবর্ততে ভিন্নো বিষেণাশু প্রমাথিনা||৮০|| তথা ব্রজত্যগদতাং শরীরান্তরমেব বা| |৮১|

স০-অথবা পানভোজনসংযুক্তং স্থাবরং বিষং দদ্যাত্| তেন যস্মিন্ ফলে সর্পঃ কুপিতো বিষং মুঞ্চতি তদ্বা দদ্যাত্| তেন-বিষেণ প্রমাথিনা, অস্য দোষসঙ্ঘাতো ভিন্নো বহিঃ প্রবর্ততে| কিম্ভূতঃ ? স্থিরস্তথা লীনো ধাত্বাদিষু তথা উন্মার্গগামী| তথা-তেন প্রকারেণানুষ্ঠিতেন, উদর্যগদতাং-নির্ব্যাধিতাং, ব্রজতি| শরীরান্তরং বা যাতি-ম্রিযত ইত্যর্থঃ|

Adhikarana sanipAtodare hRutadoSha shItAmbusnAnaM payaH pAnaM peyAM vAtetrivRucCAkA diBakShaNaM (81-83) · Śloka 83

| হৃতদোষং তু শীতাম্বুস্নাতং তং পাযযেত্পযঃ||৮১|| পেযাং বা ত্রিবৃতঃ শাকং মণ্ডূক্যা বাস্তুকস্য বা| কালশাকং যবাখ্যং বা খাদেত্স্বরসসাধিতম্||৮২|| নিরম্ললবণস্নেহং স্বিন্নাস্বিন্নমনন্নভুক্| মাসমেকং ততশ্চৈব তৃষিতঃ স্বরসং পিবেত্||৮৩||

স০-হৃতদোষং চ তং শীতজলেন স্নাতং সন্তং পযঃ শীতং পাযযেত্| পেযামথবা ত্রিবৃচ্ছাকং মণ্ডূকীশাকং বাস্তুকশাকং কালশাকং যবশাকং বা খাদেত্| কিম্ভূতম্ ? স্বরসেন সাধিতম্, তথাঽম্ললবণস্নেহবর্জিতম্, তথা স্বিন্নাস্বিন্নম্| অনন্নভোজী সন্, স্বিন্নাস্বিন্নমিতি "ক্তেন নবিশিষ্টেন" ইতি সমাসঃ, মাসমেকং যাবদেতদশ্নীযাত্| তৃষিতঃ সন্ স্বরসং-প্রকৃতত্বাত্তচ্ছাকস্য, পিবেত্|

Adhikarana sanipAtodare evaM nirhate doShe auShTraM kShIram (84) · Śloka 84

এবং বিনির্হৃতে শাকৈর্দোষে মাসাত্ পরং ততঃ| দুর্বলায প্রযুঞ্জীত প্রাণভৃত্কারভং পযঃ||৮৪||

স০-এবং শাকবিশেষেণ দোষে নির্হৃতে-প্রাযেণ জলাখ্যে, ততঃ-অনন্তরং, মাসাত্ পরং দুরলায পুরুষায কারভং ক্ষীরং প্রাণকরং প্রযুঞ্জীত|

Adhikarana plIhodare vAmabAhau sirAmokShaH (85) · Śloka 85

প্লীহোদরে যথাদোষ স্নিগ্ধস্য স্বেদিতস্য চ| সিরাং ভুক্তবতো দধ্না বামবাহৌ বিমোক্ষযেত্||৮৫||

স০-প্লীহোদরে দোষানুসারেণ স্নিগ্ধস্য স্বেদিতস্য চ দধ্না ভুক্তবতঃ সিরাং বামে বাহৌ বিমোক্ষযেত্|

Adhikarana plIhodare labdhabale samudrashuktikShAraH plIhodare labdhakara~jjakShAraH plIhodare labdha shigrukvAthaH plIhodare labdhahi~ggvAdicUrNakShArAjyam (86-88) · Śloka 88

লব্ধে বলে চ ভূযোঽপি স্নেহপীতং বিশোধিতম্| সমুদ্রশুক্তিজং ক্ষারং পযসা পাযযেত্তথা||৮৬|| অম্লস্রুতং বিডকণাচূর্ণাঢ্যং নক্তমালজম্| সৌভাঞ্জনস্য বা ক্বাথং সৈন্ধবাগ্নিকণান্বিতম্||৮৭|| হিড্গ্বাদিচূর্ণং ক্ষারাজ্যং যুঞ্জীত চ যথাবলম্| |৮৮|

স০-বলে চ জাতে পুনরপি স্নেহপীতং বিশোধিতং সন্তং ক্ষারং সমুদ্রশুক্তযুত্থং পযসা পাযযেত্| তথা করঞ্জজং ক্ষারমম্লৈঃ-কাঞ্জিকাদিভিঃ স্রুতং, বিডকণাচূর্ণভূযিষ্ঠং পাযযেত্| অথবা, সৌভাঞ্জনস্য ক্বাথম্ সৈন্ধবাদিযুতং পিবেত্| হিড্গ্বাদিজং চূর্ণং ক্ষারং তথা ঘৄতং-ষট্পলাদি, যথাবলং প্রযুঞ্জীত| ননু, যথাবলং ইহোচ্যতে| প্রাক্ চাভ্যধাযি (হৃ. নি. অ. ১২|৪)- "নষ্টচেষ্টাবলাহারাঃ" ইতি| তদিমে বাক্যে পরস্পরং ব্যাঘ্নাতে| ব্রূমঃ| বলশব্দেনেহ ভেষজবলং সোঢুং শক্তং যদ্বলমাত্রং তদিহ পরিকল্পিতম্| পূর্বং চ প্রকৃষ্টং যদ্বলং তদ্বিবক্ষিতমিতি নাত্র পূর্বাপরব্যাহতত্বম্|

Adhikarana plIhodare labdhabale pippalyAdicUrNam (88-89) · Śloka 89

| পিপ্পলীনাগরং দন্তীসমাংশং দ্বিগুণাভযম্||৮৮|| বিডার্ধাংশযুতং চূর্ণমিদমুষ্ণাম্বুনা পিবেত্| |৮৯|

স০-পিপ্পলীনাগরযোর্দ্বাবংশৌ, দন্ত্যা দ্বৌ ভাগৌ, হরীতক্যাশ্চ দ্বৌ ভাগৌ, বিডলবণস্যার্ধভাগঃ, ইত্যেবং চূর্ণমুষ্ণাম্বুনা পিবেত্|

Adhikarana plIhodarelabdhabale viDa~ggAdiBUtiH (89-90) · Śloka 90

| বিডঙ্গং চিত্রকং সক্তূন্ সঘৃতান্ সৈন্ধবং বচাম্||৮৯|| দগ্ধ্বা কপালে পযসা গুল্মপ্লীহাপহং পিবেত্| |৯০|

স০-বিডঙ্গাদিকং কপালে-কর্পরে, দগ্ধ্বা ক্ষীরেণ গুল্মপ্লীহঘ্নং পিবেত্|

Adhikarana plIhodare labdhabale badarakapatralepaH (90-91) · Śloka 91

| তৈলোন্মিশ্রৈর্বদরকপত্রৈঃ সম্মার্দিতৈঃ সমুপনদ্ধঃ||৯০|| মুসলেন পীডিতোঽনু চ যাতি প্লীহা পযোভুজো নাশম্| |৯১|

স০-বদরকস্য পত্রৈস্তৈলমিশ্রিতৈঃ সুষ্রু মর্দিতৈঃ সমুপনদ্ধঃ, অনু-পশ্চাচ্চ, মুসলেন পীডিতঃ প্লীহা ক্ষীরাশিনো নাশং ব্রজতি| উপগীতিঃ|

Adhikarana plIhodarelabdhabale rohItakalatAyogaH (91-92) · Śloka 92

| রোহীতকলতাঃ ক্লৃপ্তাঃ খণ্ডশঃ সাভযা জলে||৯১|| মূত্রে বাঽঽসুনুযাত্তচ্চ সপ্তরাত্রস্থিতং পিবেত্| কামলাপ্লীহগুল্মার্শঃ কৃমিমেহোদরাপহম্||৯২||

রোহীতকলতাঃ লতাঃ খণ্ডং ক্লৃপ্তাঃ সহরীতকীর্জলে মূত্রে বাঽঽসুনুযাত্| তচ্চ সপ্তরাত্রং স্থিতং জলং মূত্রং বা পিবেত্| হরীতক্যশ্চ লেহবদ্ভুঞ্জীত| তত্পীতং কামলাদিঘ্নম্|

Adhikarana plIhodarelabdhabale rohItakaghRutam (93-95) · Śloka 95

রোহীতকত্বচঃ কৃত্বা পলানাং পঞ্চবিংশতীম্| কোলদ্বিপ্রস্থসংযুক্তং কষাযমুপকল্পযেত্||৯৩|| পালিকৈঃ পঞ্চকোলৈস্তু তৈঃ সমস্তৈশ্চ তুল্যযা| রোহীতকত্বচা পিষ্টৈর্ঘৃতপ্রস্থং বিপাচযেত্||৯৪|| প্লীহাভিবৃদ্ধিং শমযত্যেতদাশু প্রযোজিতম্| |৯৫|

স০-রোহীতকত্বচঃ পলানাং পঞ্চবিংশতিং কৃত্বা বদরপ্রস্থদ্বযসংযুক্তং কষাযমবতারযেত্| পঞ্চকোলৈঃ পালিকৈস্তৈঃ সমস্তৈঃ পঞ্চকোলৈঃ রোহীতকত্বচা তুল্যযা পিষ্টৈর্ঘৃতপ্রস্থং বিপাচযেত্| এতদ্ধৃতং প্রযোজিতং প্লীহাভিবৃদ্ধিং দ্রাগেব শমযতি|

Adhikarana plIhodarelabdhabale kadalyAditailam (95-96) · Śloka 96

| কদল্যাস্তিলনালানাং ক্ষারেণ ক্ষুরকস্য চ||৯৫|| তৈলং পক্বং জযেত্পানাত্প্লীহানং কফবাতজম্| |৯৬|

স০-কদল্যাদীনাং ক্ষারেণ তৈলং পক্বং পানেন কফবাতোত্থং প্লীহানং পরাকরোতি|

Adhikarana plIhodarelabdhabale vAtakaPolbaNe gulmavadagnikarma (96-97) · Śloka 97

| অশান্তৌ গুল্মবিধিনা যোজযেদগ্নিকর্ম চ||৯৬|| অপ্রাপ্তপিচ্ছাসলিলে প্লীহ্নি বাতকফোল্বণে| |৯৭|

স০-এবমপ্যনুপশান্তৌ বাতকফোত্থে প্লীহ্ন্যসঞ্জাতপিচ্ছোদকে গুল্মবিধানেনাগ্নিকর্ম যোজযেত্|

Adhikarana plIhodare labdhabale pittolbaNe jIvanIyasarpirAdi (97-98) · Śloka 98

| পৈত্তিকে জীবনীযানি সর্পীংষি ক্ষীরবস্তযঃ||৯৭|| রক্তাবসেকঃ সংশুদ্ধিঃ ক্ষীরপানং চ শস্যতে| |৯৮|

পৈত্তিকে-পিত্তেল্বণে, প্লীহ্নি জীবনীযগণসাধিতানি সর্পীংষি তথা ক্ষীরবস্তিরক্তাবসেকাদি চ শস্যতে| "সিরাং ভুক্তবতো দধ্না বামবাহৌ বিমোক্ষযেত্|" (শ্লো. ৮৫) ইত্যনেনৈব রক্তাবসেকস্যোক্তত্বাত্ পুনর্বচনং প্রকর্ষার্থম্| পিত্তাধিক্যে হি রক্তাতিবৃদ্ধিঃ| তস্মাদতিরক্তস্রাবো যোজ্য ইতি প্রতিপাদনার্থমেতদুক্তম্|

Adhikarana yakRududare dakShiNabhuje sirAmokShaH (98) · Śloka 98

| যকৃতি প্লীহবত্কর্ম দক্ষিণে তু ভুজে সিরাম্||৯৮||

স০-যকৃতি প্লীহবত্ কর্ম কার্যম্| সিরাং পুনর্দক্ষিণে বাহৌ দদ্যাত্|

Adhikarana yakRududare anyatsarvaM plIhavat baddhodare svedA nrUho~anuvAsanaM ca baddhodare paristraMsInyannAni baddho tIkShNaM virecanam baddho udAvartaharaM vAtandhaM ca karma (99-100) · Śloka 100

স্বিন্নায বদ্ধোদরিণে মূত্রতীক্ষ্ণৌষধান্বিতম্| সতৈললবণং দদ্যান্নিরূহং সানুবাসনম্||৯৯|| পরীস্রংসীনি চান্নানি তীক্ষ্ণং চাস্মৈ বিরেচনম্| উদাবর্তহরং কর্ম কার্যং যচ্চানিলাপহম্||১০০||

স০-বদ্ধোদরিণে পুরুষায স্বিন্নায গোমূত্রতীক্ষ্ণৌষধযুতং তৈলসৈন্ধবাভ্যাং সহ নিরূহং দদ্যাত্, সানুবাসনং-পূর্বমনুবাসনং পশ্চাচ্চেত্যর্থঃ| উদরীণঃ স্বেদনিষেধাদ্বদ্ধোদরিণঃ স্বেদানুজ্ঞানমপবাদ ইতি নৈতত্পূর্বাপরব্যাহতম্| পরিস্রংসীনি-অনুলোমকারণ্যন্নানি, অস্মৈ চ-জঠরিণে, তীক্ষ্ণং চ বিরেচনং দদ্যাত্| উদাবর্তহরং কর্ম কার্যম্| যচ্চ বাত্ঘ্নং তচ্চ কার্যম্|

Adhikarana Cidrodare svedaM vinA kaPo daravat Cidro jAtaM jAtaM jalaM svAvyam (101) · Śloka 101

ছিদ্রোদরমৃতে স্বেদাচ্ছ্লেষ্মোদরবদাচরেত্| জাতং জাতং জলং স্রাব্যমেবং তদ্যাপযেদ্ভিষক্||১০১||

স০-ছিদ্রোদরং স্বেদমন্তরেণ শ্লেষ্মোদরবদুপক্রমেত্| যদা তু কথঞ্চিদ্রসশ্ছিদ্রেভ্যঃ পরিস্রবন্ জঠরমাপূরযিত্বা জলং ভবেত্তদা তজ্জাতং সলিলং স্রাব্যম্| ন চ সকৃদেব স্রাব্যমিতি প্রতিপাদনার্থং বীপ্সা, জাতং জাতং জলং স্রাব্যমিতি| কিযন্তং কালং স্রাব্যম্ ? ইত্যাহ-এবমিত্যাদি| এবং-অনেন প্রকারেণ, তত্-বদ্ধোদরং, যাপযেত্| স্বাস্থ্যমিতি যোগ্যতযাঽত্র সম্বধ্যতে, তেনৈব স্বাস্থ্যং প্রাপযেদিতি বোধ্যম্| ন তু যাপ্যং বিদধ্যাদিতি ব্যাখ্যেযম্, ন হি যাপ্যমুদরমস্তি|

Adhikarana udakodare abdoShaharANi udakodaredIpanIyaH kaPaghnaScAhAraH (102-103) · Śloka 103

অপাং দোষহরাণ্যাদৌ যোজযেদুদকোদরে| মূত্রযুক্তানি তীক্ষ্ণানি বিবিধক্ষারবন্তি চ||১০২|| দীপনীযৈঃ কফঘ্নৈশ্চ তমাহারৈরুপাচরেত্| |১০৩|

স০-উদকোদরে পূর্বমপাং দোষহরাণি যোজযেত্| তানি সর্বাণি গোমূত্রযুক্তানি তথা তীক্ষ্ণানি তথা বিবিধাঃ ক্ষারা বিদ্যন্তে যেষু তানি বিবিধক্ষারবন্তি, অনেকক্ষারযুক্তানীত্যর্থঃ| ননু, অপামিত্যনর্থকম্, "যোজযেদুদকোদরে" ইত্যনেনৈবোদকহরত্বস্য সিদ্ধত্বাত্| অত্রোচ্যতে| অপাং চ হর্ণানি যশ্চ তত্র সংসৃষ্টো দোষোঽদ্ভিস্তস্য চ হরণানি জলসংসৃষ্টদোষহরণানীতি প্রতিপাদযিতুমুক্তম্| আদাবিতি নির্দেশাত্ পশ্চাদ্বাতাদিদোষানুসারেণ চোপক্রমঃ কার্য ইতি দ্যোতযতি| তথা ভোজনৈর্দীপনীযৈঃ কফাপহৈশ্চোপাচরেত্|

Adhikarana udakodare chAgakarIShakShArAdiguTikAo (103-106) · Śloka 106

| ক্ষারং ছোগকরীষাণাং স্রুতং মূত্রেঽগ্নিনা পচেত্||১০৩|| ঘনীভবতি তস্মিংশ্চ কর্ষাংশং চূর্ণিতং ক্ষিপেত্| পিপ্পলী পিপ্পলীমূলং শুণ্ঠী লবণপঞ্চকম্||১০৪|| নিকুম্ভকুম্ভত্রিফলাস্বর্ণক্ষীরীবিষাণিকাঃ| স্বর্জিকাক্ষারষড্গ্রন্থাসাতলাযবশূকজম্||১০৫|| কোলাভা গুটিকাঃ কৃত্বা ততঃ সৌবীরকাপ্লুতাঃ| পিবেদজরকে শোফে প্রবৃদ্ধে চোদকোদরে||১০৬||

স০-ক্ষারং ছাগকরীষাণাং মূত্রে স্রুতং চাগ্নিনা পচেত্| অস্মিংশ্চ ক্ষারজলে ঘনীভবতি সতি কর্ষাংশং রজীকৃতং পিপ্পল্যাদিকং ক্ষিপেত্| ততঃ-তস্মাত্ক্ষারাত্, গুলিকাঃ কোলাভাঃ কৃত্বা সৌবীরকালোডিতা অজরকাদৌ পিবেত্|

Adhikarana baddhacCidrodakodareShu auShadhairaprashameShu shastrakarma (107) · Śloka 107

ইত্যৌষধৈরপ্রশমে ত্রিষু বদ্ধোদরাদিষু| প্রযুঞ্জীত ভিষক্ শস্ত্রমার্তবন্ধুনৃপার্থিতঃ||১০৭||

স০-ইতি-এবং, ঔষধৈরশান্তৌ সত্যাং ত্রিষু বদ্ধচ্ছিদ্রোদকোদরেষু বৈদ্য আর্তজ্ঞাতিভির্নৃপেণ চাভ্যার্থিতঃ সন্ শস্ত্রং প্রযুঞ্জীত|

Adhikarana baddhacCidrodakodareShu shastrakarma vidhiH (108-112) · Śloka 112

স্নিগ্ধস্বিন্নতনোর্নাভেরধো বদ্ধক্ষতান্ত্রযোঃ| পাটযেদুদরং মুক্ত্বা বামতশ্চতুরঙ্গুলাত্||১০৮|| চতুরঙ্গুলমানং তু নিষ্কাস্যান্ত্রাণি তেন চ| নিরীক্ষ্যাপনযেদ্বালমললেপোপলাদিকম্||১০৯|| ছিদ্রে তু শল্যমুদ্ধৃত্য বিশোধ্যান্ত্রপরিস্রবম্| মর্কোটৈর্দংশযেচ্ছিদ্রং তেষু লগ্নেষু চাহরেত্||১১০|| কাযং মূর্ধ্নোঽনু চান্ত্রাণি যথাস্থানং নিবেশযেত্| অক্তানি মধুসর্পির্ভ্যামথ সীব্যেদ্বহির্ব্রণম্||১১১|| ততঃ কৃষ্ণমৃদাঽঽলিপ্য বধ্নীযাদ্যষ্টিমিশ্রযা| নিবাতস্থঃ পযোবৃত্তিঃ স্নেহদ্রোণ্যাং বসেত্ততঃ||১১২||

স০-বদ্ধক্ষতান্ত্রযোঃ-বদ্ধোদরে ছিদ্রোদরে চ, স্নিগ্ধস্বিন্নশরীরস্য নাভেরধ উদরং চতুরঙ্গুলাদ্বামেন মুক্ত্বা চতুরঙ্গুলপ্রমাণং পাটযেত্| তেন চ-ছিদ্রেণ, অন্ত্রাণি বহির্নিষ্কাস্য বালমললেপোপলাদিকমপনযেদিতি বদ্ধোদরোপক্রমঃ| ছিদ্রোদরোপক্রমমাহ-ছিদ্রে তু পরীস্রাবিণি শল্যমুদ্ধৃত্য পরিস্রবমাত্রং বিশোধ্যানন্তরং মর্কোটৈশ্ছিদ্রং দংশযেত্| তেষু চ-মর্কোটেষু, ভক্ষযিতুং লগ্নেষু মূর্ধ্নঃ-শিরসোঽপরং, কাযং মর্কোটানামাকর্ষেত্| অনু [চ]-পশ্চাচ্চ, অন্ত্রাণি মধুসর্পির্ভ্যামক্তানি যথাস্থানং স্থাপযেত্| [অথ-] অনন্তরং, বহির্ব্রণং সীব্যেত্| বহিঃশব্দনির্দেশাদাভ্যন্তরগতং ন সীব্যেদিতি গম্যতে| ততঃ-অনন্তরং, কৃষ্ণমৃদা মধুযষ্টিকামিশ্রযাঽঽলিপ্য বধ্নীযাত্| অনন্তরং নিবাতস্থঃ ক্ষীরবৃত্তিঃ সন্ স্নেহদ্রোণ্যাং বসেত্| অধুনা জলোদরস্যান্যেষামপি জাতজলানাং জঠরাণাং চিকিত্সার্থমাহ-

Adhikarana sajale udare jalasrAvaNavidhiH sajale niHsrute peyA (113-117) · Śloka 117

সজলে জঠরে তৈলৈরভ্যক্তস্যানিলাপহৈঃ| স্বিন্নস্যোষ্ণাম্বুনাঽঽকক্ষমুদরে পট্টবেষ্টিতে||১১৩|| বদ্ধচ্ছিদ্রোদিতস্থানে বিধ্যেদঙ্গুলমাত্রকম্| নিধায তস্মিন্নাডীং চ স্রাবযেদর্ধমম্ভসঃ||১১৪|| অথাস্য নাডীমাকৃষ্য তৈলেন লবণেন চ| ব্রণমভ্যজ্য বধ্বা চ বেষ্টযেদ্বাসসোদরম্||১১৫|| তৃতীযেঽহ্নি চতুর্থে বা যাবদাষোডশং দিনম্| তস্য বিশ্রম্য বিশ্রম্য স্রাবযেদল্পশো জলম্||১১৬|| বিবেষ্টযেদ্গাঢতরং জঠরং বাসসা শ্লথম্| নিঃস্রুতে লঙ্ঘিতঃ পেযামস্নেহলবণাং পিবেত্||১১৭||

স০-সজলে জঠরিণো জঠরে তৈলৈঃ-তিলানাং তৈলৈঃ সর্ষপৈরণ্ডতৈলাদিভিশ্চ, অনিলঘ্নৈরভ্যক্তস্য তথোষ্ণাম্বুনা স্বিন্নস্যাকক্ষং-কক্ষান্তং যাবত্, উদরে পট্টেন-বস্ত্রেণ বেষ্টিতে, তদুদরং বস্ত্রেণৈব বেষ্টযিত্বা বদ্ধচ্ছিদ্রোদরযোর্যত্কথিতং স্থানং তস্মিন্ স্থানেঽঙ্গুলপ্রমাণং বিধ্যেত্| তস্মিংশ্চ ছিদ্রে নাডীং নিধায জলস্যোদরস্থস্যার্ধং স্রাবযেত্| জলস্রাবাদনন্তরমস্য-উদরিণো, নাডীমাকৃষ্য সলবণেন তৈলেন ব্রণমভ্যজ্য বদ্ধ্বা চ বাসসা জঠরং বেষ্টযেত্| তৃতীযে দিবসেঽথবা চতুর্থে যাবদাষোডশং দিনং তস্য-উদরিণো, বিশ্রম্য বিশ্রম্যাল্পশঃ-অল্পমল্পং কৃত্বা, জলং-দোষং, স্রাবযেত্| সহসা হি প্রচুরজলস্রাবণাদপাযঃ স্যাত্| তস্মাত্ স্রুতিদিবসাদনন্তরং তৃতীযে চতুর্থে পঞ্চমাদৌ বা দিনে শরীরবলাবলমপেক্ষ্য ষোডশদিনং মর্যাদীকৃত্য জলস্রাবণং কার্যম্| জঠরং চ শিথিলং বাসসা গাঢতরং বিবেষ্টযেত্| নিঃস্রুতে চ জলেঽসৌ জঠরী লঙ্ঘিতঃ সন্ পেযামস্নেহলবণাং&ল্ত্; পিবেত্| নঞত্র ঈষদর্থঃ| ঈষত্ স্নেহলবণং ক্লেদরক্ষার্থং বাতকোপরক্ষার্থং চ| অন্যথা হি 'রূক্ষাং নির্লবণাং পিবেত্' ইত্যেবং নির্দেশমাচার্যঃ কুর্যাত্|

Adhikarana sajale udare AsaMvatsaraM vartanakramaH (118-119) · Śloka 119

স্যাত্ক্ষীরবৃত্তিঃ ষণ্মাসাংস্ত্রীন্ পেযাং পযসা পিবেত্| ত্রীংশ্চান্যান্ পযসৈবাদ্যাত্ ফলাম্লেন রসেন বা||১১৮|| অল্পশোঽস্নেহলবণং জীর্ণং শ্যামাককোদ্রবম্| প্রযতো বত্সরেণৈবং বিজযেত জলোদরম্||১১৯||

স০-ষণ্মাসান্ ক্ষীরবৃত্তিঃ স্যাত্| ত্রীন্ মাসান্ ক্ষীরপেযাং পিবেত্| ত্রীংশ্চান্যান্ মাসান্ পযসৈব জীর্ণং শ্যামাককোদ্রবমদ্যাত্| ফলাম্লেন বা মাংসরসেন| কথম্ ? অল্পমল্পম্| তথা, ঈষত্ স্নেহলবণম্| [এবং-] অনেন প্রকারেণ, প্রযতঃ সলিলোদরং বত্সরেণ বিজযেত্|

Adhikarana sajale udare pathye yantrito jitendriyashcaudare (120) · Śloka 120

বর্জ্যেষু যন্ত্রিতো দিষ্টে নাত্যদিষ্টে জিতেন্দ্রিযঃ| |১২০|

স০-বর্জ্যেষ্বাহারবিহারাদিষ্বত্যর্থোষ্ণাম্ললবণাদিষু (শ্লো. ১২৫) যন্ত্রিত উদরী স্যাত্| দিষ্টে-কথিতেঽন্নপানাদৌ, নাতিযন্ত্রিতঃ স্যাত্| অদিষ্টে-অকথিতে পুনরন্নপানাদৌ, জিতেন্দ্রিযঃ স্যাত্-অলোলুপেন তত্র ভবিতব্যমিত্যর্থঃ| জলোদরচিকিত্সাপ্রসঙ্গেন সর্বোদরচিকিত্সামাহ-

Adhikarana sarvodare vAtAdishamanI kriyA (120-121) · Śloka 121

| সর্বমেবোদরং প্রাযো দোষসঙ্ঘাতজং যতঃ||১২০|| অতো বাতাদিশমনী ক্রিযা সর্বত্র শস্যতে| |১২১|

স০-সর্বমেবোদরং বাহুল্যেন দোষসঙ্ঘাতোত্থং যস্মাত্তস্মাত্ সর্বত্রোদরে বাতাদিশমনী ক্রিযা প্রশস্যতে| প্রাযোগ্রহণং কিঞ্চিত্ প্রাক্তনকর্মনিমিত্তমুদরং নাবশ্যং দোষসঙ্ঘাতজমিতি|

Adhikarana sarvodare dIpano laghushcAhAraH (121-122) · Śloka 122

| বহ্নির্মন্দত্বমাযাতি দোষৈঃ কুক্ষৌ প্রপূরিতে||১২১|| তস্মাদ্ভোজ্যানি ভোজ্যানি দীপনানি লঘূনি চ| সপঞ্চমূলান্যল্পাম্লপটুস্নেহকটূনি চ||১২২||

স০-বহ্নির্মন্দত্বং যত আগচ্ছতি দোষৈরুদরে প্রপূরিতে সতি তস্মাত্কারণাত্ ভোজ্যানি-আহারাঃ, ভোজ্যানি-ভক্ষযিতব্যানি, জঠরিভির্দীপনানি লঘূনি চ| তথা সহ পঞ্চমূলেন তথাঽল্পাম্লাদযো যেষু তানি|

Adhikarana sarvodare gomUtraBAvitaShaShTikataNDulayavAgUBojanam (123-124) · Śloka 124

ভাবিতানাং গবাং মূত্রে ষষ্টিকানাং চ তণ্ডুলৈঃ| যবাগূং পযসা সিদ্ধাং প্রকামং ভোজযেন্নরম্||১২৩|| পিবেদিক্ষুরসং চানু জঠরাণাং নিবৃত্তযে| স্বং স্বং স্থানং ব্রজন্ত্যেষাং বাতপিত্তকফাস্তথা||১২৪||

স০-গোমূত্রে ভাবিতানাং ষষ্টিকানাং তণ্ডুলৈর্যবাগূং ক্ষীরেণ সিদ্ধাং প্রকামং-ইচ্ছযা, নরং ভোজযেত্| অনু-পশ্চাত্, ইক্ষুরসং চ পিবেদুদরাণাং শান্ত্যর্থম্| তথা বাতপিত্তকফাশ্চৈষাং-উদরিণাং, স্বং স্বং স্থানং ব্রজন্তি|

Adhikarana sarvodare tadanu dakShurasapAnam sarvo varjyAni (125-126) · Śloka 126

অত্যর্থোষ্ণাম্ললবণং রূক্ষং গ্রাহি হিমং গুরু| গুডং তৈলকৃতং শাকং বারি পানাবগাহযোঃ||১২৫|| আযাসাধ্বদিবাস্বপ্নযানানি চ পরিত্যজেত্| |১২৬|

স০-অত্যর্থোষ্ণাম্ললবণাদিকং জঠরী ত্যজেত্| বারি পানাবগাহযোর্যদি ত্যজেত্ তর্হি কিং পেযম্ ? ইত্যাহ-

Adhikarana sarvodare takrapAnam aShTodareShu takravisheShaH (126-129) · Śloka 129

| নাত্যচ্ছসান্দ্রমধুরং তক্রং পানে প্রশস্যতে||১২৬|| সকণালবণং বাতে, পিত্তে সোষণশর্করম্| যবানীসৈন্ধবাজাজীমধুব্যোষৈঃ কফোদরে||১২৭|| ত্র্যূষণক্ষারলবণৈঃ সংযুতং নিচযোদরে| মধুতৈলবচাশুণ্ঠীশতহ্বাকুষ্ঠসৈন্ধবৈঃ||১২৮|| প্লীহ্নি, বদ্ধে তু হপুষাযবানীপট্বজাজিভিঃ| সকৃষ্ণামাক্ষিকং ছিদ্রে, ব্যোষবত্সলিলোদরে||১২৯||

স০-তক্রমীষদচ্ছসান্দ্রমধুরং পানে প্রশস্যতে| তচ্চ পবনে সপিপ্পলীসৈন্ধবং শ্রেষ্ঠম্| পিত্তে সমরিচশর্করম্| যবান্যাদিভিঃ সহ্স্ কফোদরে হিতম্| ত্রিকটুকাদিভিঃ সংযুক্তং সন্নিপাতোদরে| মধুতৈলাদিভিঃ প্লীহোদরে| হপুষাদিভির্যুতং বদ্ধোদরে| পিপ্পলীমধুযুতং ছিদ্রোদরে| জলোদরে ব্যোষযুতং শ্রেষ্ঠম্|

Adhikarana aShTodareShu gauravAdiyuktAnAM vAtakaPArtAnAM takrAmRUtam (130) · Śloka 130

গৌরবারোচকানাহমন্দবহ্ন্যতিসারিণাম্| তক্রং বাতকফার্তানামমৃতত্বায কল্পতে||১৩০||

স০-বাতকফার্তানাং গৌরবারোচকাদিযুতানাং তক্রমমৃতত্বায কল্পতে-সম্পদ্যতে| এতচ্চ ব্রুবন্ বাতকফযোঃ শুদ্ধাবপি দেযমিতি দ্যোতযতি|

Adhikarana aShTodareShu sarveShAM prayogANAmanu kShIram (131) · Śloka 131

প্রযোগাণাং চ সর্বেষামনু ক্ষীরং প্রযোজযেত্| স্থৈর্যকৃত্সর্বধাতূনাং বল্যং দোষানুবন্ধহৃত্||১৩১||

স০-সর্বেষাং চ প্রযোগাণামনু ক্ষীরং প্রযোজযেত্| তচ্চ ক্ষীরং সর্বধাতূনাং স্থিরত্বং করোতি| তথা বল্যং স্যাদ্দোষানুবন্ধত্বং হরতি|

Adhikarana aShTodareShu BeShajakShINA~ggAnAM kShIraM amRutam (15) · Śloka 15

ভেষজাপচিতাঙ্গানাং ক্ষীরমেবামৃতাযতে| ১৩১ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং চতুর্থে চিকিত্সিতস্থানে উদরচিকিত্সিতং নাম পঞ্চদশোঽধ্যাযঃ||১৫||

স০-ভেষজেনাপচিতং শরীরং যেষাং তেষাং ক্ষীরমেবামৃতত্বায সম্পদ্যত ইতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং চতুর্থে চিকিত্সিতস্থানে উদরচিকিত্সিতং নাম পঞ্চদশোঽধ্যাযঃ সমাপ্তঃ|| ১৫||