6. dravyakalpādhyāyaḥ

Adhikarana adhyAyopakramaH · Śloka

অথ ভেষজকল্পো ব্যাখ্যাতুমারভ্যতে| বস্তিব্যাপদাং হ্যুত্পন্নানাং সিদ্ধিঃ-সাধনং, সদ্ভেষজপ্রযোগাত্|

Adhikarana dravyakalpAdhyAyaH (2) · Śloka 2

অপি চ সর্বেষাং রোগাণং যা সিদ্ধিঃ-প্রশমোপাযঃ, সোঽপি সদ্ভেষজপ্রযোগাদেব| ইত্যাহ অথাতো দ্রব্যকল্পং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)|২|

স০-ভেষজস্য কল্পো-যোজনা, ভেষজকল্পঃ| শেষং পূর্ববত্|

Adhikarana auShadhasya deshaH guNaH (1-4) · Śloka 4

ধন্বে সাধারণে দেশে সমে সন্মৃত্তিকে শুচৌ| শ্মশানচৈত্যাযতনশ্বভ্রবল্মীকবর্জিতে|১| মৃদৌ প্রদক্ষিণজলে কুশরোহিষসংস্তৃতে| অফালকৃষ্টেঽনাক্রান্তে পাদপৈর্বলবত্তরৈঃ||২|| শস্যতে ভেষজং জাতং, যুক্তং বর্ণরসাদিভিঃ| জন্ত্বজগ্ধং দবাদগ্ধমবিদগ্ধং চ বৈকৃতৈঃ||৩|| ভূতৈশ্ছাযাযাতপাম্ব্বাদ্যৈর্যথাকালং চ সেবিতম্| অবগাঢমহামূলমুদীচীং দিশমাশ্রিতম্||৪||

স০-ধন্বদেশে, তথা সাধারণে দেশে, তথা সমে-অনিম্নোন্নতে, তথা সন্মৃত্তিকে, তথা শ্মশানাদিবর্জিতে, চৈত্যং-দিনচর্যাধ্যাযে (হৃ. সূ. অ. ২/৩৩) উক্তম্| তথা মৃদৌ-সুস্পর্শে, তথা প্রদক্ষিণং-অনুকূলং জলং যস্মিন্, তথা কুশরোহিষসংস্তৃতে, তথাঽফালকুষ্টে-খিলে, তথা বৃক্ষৈর্মহত্তরৈরনাক্রান্তে দেশে, যদ্ভেষজং জাতং যুক্তং যথাস্বম্ বর্ণরসাদিভিঃ, তদ্ভেষজং শস্যতে| তথা জন্তুভিঃ- কীটৈঃ, অজগ্ধং-অভক্ষিতং, দবেন-দাবাগ্নিনা, অদগ্ধং-অপ্রুষ্টং, তথাঽবিদগ্ধং বৈকৃতৈর্ভূতৈঃ-স্বভাবং পরিত্যজ্য ধর্মবাধাদ্বিকৃতৈরাকাশা(পৃথিব্যা)দিভির্যদনাসেবিতং তদবিদগ্ধম্| বিকৃতমেব বৈকৃতম্, প্রজ্ঞাদিত্বাদণ্| তথা ছাযাদিভির্যথাকালং কালমনতিক্রম্য সেবিতং, যদা তস্যভেজষস্য বৃদ্ধৌ ছাযাদীনামন্যতমং বস্তুজাতমুপযুজ্যতে তদা তেন সেবিতমিত্যর্থঃ| তথাঽবগাঢং-দূরং গতং, মহত্-পৃথু, মূলং যস্য তদবগাঢমহামূলম্| তথোদিচীং-উত্তরাং, দিশমাশ্রিতং-তামাশ্রিত্য স্থিতম্|

Adhikarana auShadhasya grahaNasthApanAvacAraNAvadhiH (1-7) · Śloka 7

|মহেন্দ্ররামকৃষ্ণানাং ব্রাহ্মণানাং গবামপি| তপসা তেজসা বাঽপি প্রশাম্যধ্বং শিবায বৈ||১|| মন্ত্রেণানেন মতিমান্ সর্বমপ্যৌষধং নযেত্| ] অথ কল্যাণচরিতঃ শ্রাদ্ধঃ শুচিরুপোষিতঃ| গৃহ্ণীযাদৌষধং সুস্থং স্থিতং কালে চ কল্পযেত্||৫|| সক্ষীরং তদসম্পত্তাবনতিক্রান্তবত্সরম্| ঋতে গুডঘৃতক্ষৌদ্রধান্যকৃষ্ণাবিডঙ্গতঃ||৬|| পযো বাষ্কযণং গ্রাহ্যং বিণ্মূত্রং তচ্চ নীরুজাম্| বযোবলবতাং ধাতুপিচ্ছশৃঙ্গখুরাদিকম্||৭||

স০-অথেত্যানন্তর্যমঙ্গলসূচকম্| ভেষজমেবংবিধং বিদিত্বাঽনন্তরং কল্যাণং-স্বস্ত্যযনাদি, চরিতং-অনুষ্ঠিতং, যেনাসৌ কল্যাণচরিতঃ, তথা শ্রাদ্ধঃ-ভেষজহরণং প্রতি শ্রদ্ধাবান্, তথা শুচিঃ-স্নানাদিনা শুদ্ধঃ তথোপোষিতঃ-কৃতোপবাসঃ, এবংবিধমৌষধমেবংবিধঃ পুমান্ গৃহ্ণীযাত্| তচ্চ ভেষজং [সুস্থং-] স্বস্থং কৃত্বা, স্থিতং কালে সক্ষীরং-আর্দ্রং, কল্পযেত্| তদসম্পত্তৌ তু তথাবিধস্য সক্ষীরস্যৌষধস্যাসম্পত্তৌ, অনতিক্রান্তবত্সরং ভেষজং কল্পযেত্| কিং সর্বং দ্রব্যমনতিক্রান্তবত্সরং কল্পযেত্? ঋত ইত্যাদি| গুডাদীন্ বর্জযিত্বা পরমৌষধমনতিক্রান্তবত্সরং কল্পযেত্| গুডাদীংস্তু অতিক্রান্তবত্সরান্ কল্পযেত্| ক্ষীরং বষ্কযণ্যাঃ সম্বন্ধি গ্রাহ্যম্| বিট্ মূত্রং চ, তচ্চক্ষীরং চ, নীরুজং-অপগতদোষং, গ্রাহ্যম্| বযোবলবতাং ধাতুপিচ্ছাদিকং গ্রাহ্যম্| আদিগ্রহণাত্ চিকিত্সিতোপযোগি কেশনখচর্মাদিকং গৃহ্যতে| বযঃশব্দোপাদানাত্ বিশিষ্টং তরুণং বযো গৃহ্যতে, ন হ্যবযাঃ কশ্চিদস্তি|

Adhikarana kaShAyayonayaH pa~jcarasAH, kalpanA pa~jcadhaiva (8-9) · Śloka 9

কষাযযোনযঃ পঞ্চ রসা লবণবর্জিতাঃ| রসঃ কল্কঃ শৃতঃ শীতঃ ফাণ্টশ্চেতি প্রকল্পনা||৮|| পঞ্চধৈব কষাযাণাং পূর্বং পুর্বং বলাধিকা| |৯|

স০-কষাযস্য যোনযঃ-আকরাঃ, লবণবর্জিতা মধুরাদযঃ পঞ্চ রসাঃ| তেভ্য এব কষাযাঃ-স্বরসাদযঃ, পঞ্চ সম্ভবন্তি| লবণস্য তু স্বরসকল্পনাযোগো ন সম্ভবতি, সদৈব শুষ্করূপত্বাত্| কল্ককল্পনাঽপি ন সম্ভবতি, যতো যদ্ দ্রব্যং দ্রবেণ সিক্তং পীণ্ডীভবতি ন তু বিলীযতে তত্ কল্কসংজ্ঞামাসাদযতি| তথা যদ্ দ্রব্যং ক্বাথযিত্বা জলাদুদ্ধ্রিযতে দ্রব্যাবযবাস্তূদকমনুপ্রবিশন্তি, তত্রৈব শৃতকল্পনা| লবণস্য তু বিলীনরূপত্বাদেবং ন সম্ভবতি ইতি শৃতকল্পনাযা অপ্যসম্ভবঃ| এবং শীতফাণ্টযোরপ্যনেনৈব ন্যাযেনাসম্ভব ইত্যুক্তং লবণবর্জ্যা রসাঃ কষাযযোনয ইতি| মুনিনাঽপ্যুক্তং (চ. সূ. অ. ৪/৬)-["কল্পনাবশতঃ পঞ্চানাং রসানাং কষাযসংজ্ঞাব্যবহার ইতি| লবণস্য কল্পনাযোগাভাবাত্ ] মধুরকষাযোঽম্লকষাযস্তিক্তকষাযঃ কটু কষাযঃ কষাযকষাযশ্চেতি|" ইতি| রসানাং স্বরসাদি কল্পনাযোগো ন সম্ভবতি| উক্তং চৈতত্| তস্মাত্ গুণগুণিনোরভেদোপচারাদিহ রসগ্রহণেন তদাশ্রযাণাং দ্রব্যাণাং গ্রহণং মন্তব্যম্| রসঃ কল্কঃ শৃতঃ শীতঃ ফাণ্টশ্চেতি প্রকল্পনা পঞ্চধৈব কষাযাণাং স্বরসাদীনাম্| সা চ কল্পনা পূর্বং পূর্বং-যথাপূর্বং, বলাধিকা-অধিকশক্তিঃ| এবং ফাণ্টাখ্যা কল্পনা সবলা| ততোঽপ্যধিকশক্তিঃ শীতাখ্যা| ততোঽপ্যধিকবীর্যা শৃতাখ্যা| ততোঽপ্যধিকশক্তিঃ কল্কাখ্যা| কল্কাখ্যাযাং চূর্ণাখ্যাযাশ্চ কল্পনাযা অন্তর্ভাবাদপৃথগ্গ্রহণম্| কল্কাখ্যাযাশ্চ কল্পনাযাঃ স্বরসাখ্যা কল্পনা অধিকশক্তিঃ| ননু, চূর্ণাদনন্তরং কল্কঃ ক্রিযতে ন তু কল্কাদনন্তরং চূর্ণম্| তস্মাত্ পঞ্চানাং কল্পনানাং মধ্যে চূর্ণকল্পনৈব নির্দেষ্টুং যুক্তা, ন তু কল্ককল্পনা| যুক্তমাহ ভবান্| কিন্তু লবণস্য কষাযসংজ্ঞাযাং সমাবেশো মাভূদিতি কল্পনানাং মধ্যে কল্ক ইতি নির্দেশঃ কৃতো ন চূর্ণ ইতি| তস্মাল্লবণে ন সম্ভবতি কষাযসংজ্ঞাসমাবেশঃ|

Adhikarana svarasalakShaNam (9-10) · Śloka 10

| সদ্যঃসমুদ্ধৃতাত্ ক্ষুণ্ণাদ্যঃ স্রবেত্পটপীডিতাত্||৯|| স্বরসঃ স সমুদ্দিষ্টঃ| |১০|

স০-সদ্যঃ-তত্ক্ষণং, সমভূমেঃ সম্যগুদ্ধৃতং-উত্খাতং, অনন্তরং ক্ষুণ্ণং-পিষ্টং, সদ্যঃসমুদ্ধৃতক্ষুণ্ণং, তস্মাদ্বস্ত্রপীডিতাদ্যঃ স্রবেত্ স স্বরসঃ কল্পনাকষাযঃ সমুদ্দিষ্টঃ-সংজ্ঞাযাং সঙ্কেতিতঃ|

Adhikarana kalkalakShaNam, cUrNalakShaNam (10) · Śloka 10

কল্কঃ পিষ্টো দ্রবাপ্লুতঃ| চূর্ণোঽপ্লুতঃ|১০|

স০-দ্রবেণাঽঽপ্লুতঃ পিষ্টঃ সন্ কল্ক ইতি কল্পনাকষাযঃ সঙ্কেতিতঃ| যত্ দ্রব্যং দ্রবেণ অপ্লুতং-শুষ্কমেব পিষ্টং, স কল্পনাকষাযশ্চূর্ণ ইতি গদিতঃ| তেন কল্কস্যৈবাযং ভেদ ইতি, নাসৌ কল্পনেতি শঙ্কনীযম্|

Adhikarana shRutalakShaNam (10) · Śloka 10

| শৃতঃ ক্বাথঃ|১০|

স০-যত্ দ্রব্যং দ্রবেণাঽঽপ্লুত্য শৃতং স কল্পনাকষাযঃ ক্বাথ ইতি কথ্যতে|

Adhikarana shItalakShaNam (10) · Śloka 10

| শীতো রাত্রিং দ্রবে স্থিতঃ||১০||

স০-যত্ দ্রব্যং দ্রবে সকলাং রাত্রিং স্থিতং স কল্পনাকষাযঃ শীত ইত্যুচ্যতে|

Adhikarana PANTalakShaNam (11) · Śloka 11

সদ্যোঽভিষুতপূতস্তু ফাণ্টঃ| |১১|

স০-যত্ দ্রব্যং দ্রবেঽভিষুত্য সদ্যঃ পূতং ক্রিযতে স কল্পনাকষাযঃ ফাণ্ট ইতি সঙ্কেতিতঃ|

Adhikarana kalpanAnAM mAnAnAM ca viShayaBedAH (11-12) · Śloka 12

তন্মানকল্পনে| যুঞ্জ্যাদ্ব্যাধ্যাদিবলতস্তথা চ বচনং মুনেঃ||১১|| মাত্রাযা ন ব্যবস্থাঽস্তি ব্যাধিং কোষ্ঠং বলং বযঃ| আলোচ্য দেশকালৌ চ যোজ্যা তদ্বচ্চ কল্পনা||১২||

স০-মানং চ কল্পনা চ মানকল্পনে, তেষাং-স্বরসাদীনাং, মানকল্পনে [তন্মানকল্পনে]| তে ব্যাধ্যাদিবলেন যুঞ্জযাত্| আদিশব্দেন কোষ্ঠবলাদীনাং গ্রহণম্| তত্র সম্যগ্রসবীর্যাদীন্ দোষধাত্বাদ্যালোচ্য প্রথমমনন্তরং ব্যাধ্যাদিবলং চ, ততঃ স্বরসাদীনাং মানকল্পনে যুঞ্জ্যাত্, ন নিযমং কৃত্বেত্যত আহ-তথা চ বচনং মুনেঃ| মাত্রাযা ন ব্যবস্থাঽস্তি ব্যাধিং কোষ্ঠং বলং বযঃ| আলোচ্য দেশকালৌ চ যোজ্যা তদ্বচ্চ কল্পনেতি|

Adhikarana svarasasya madhyamaM mAnam (13) · Śloka 13

মধ্যং তু মানং নির্দিষ্টং স্বরসস্য চতুষ্পলম্| |১৩|

স০-মধ্যমং মানং-মাত্রা, স্বরসস্য চতুষ্পলম্|

Adhikarana peShyasya madhyamaM mAnam (13) · Śloka 13

| পেষ্যস্য কর্ষমালোড্যং তদ্ দ্রবস্য পলত্রযে||১৩||

স০-পেষ্যস্য-উভযরূপস্য কল্কস্য চূর্ণস্য বা, কর্ষং মধ্যমং মানম্| তচ্চ-পেষ্যস্য কর্ষং, দ্রবস্য পলত্রযে প্রক্ষিপ্যালোড্যম্|

Adhikarana kvAthasya madhyamaM mAnam (14) · Śloka 14

ক্বাথং দ্রব্যপলে কুর্যাত্প্রস্থার্ধং পাদশেষিতম্| |১৪|

স০-ক্বাথং দ্রব্যপলে, দ্রবস্য প্রকৃতত্বাত্ তস্য প্রস্থার্ধং দত্ত্বা, তচ্চ শ্রপণেন পাদশেষং কুর্যাত্|

Adhikarana shItasya madhyamaM mAnam (14) · Śloka 14

| শীতং পলে পলৈঃ ষড্ভিঃ|১৪|

স০- শীতং কষাযং পলে দ্রব্যস্য, ষড্ভিঃ পলৈর্দ্রবস্য, কুর্যাত্|

Adhikarana PANTasya madhyamaM mAnam (14) · Śloka 14

| চতুর্ভিস্তু ততোঽপরম্||১৪||

স০-ততঃ-শীতকষাযাত্, অপরং-ফাণ্টাখ্যং প্রকৃতত্বাত্ দ্রব্যস্য পলে চতুর্ভির্দ্রবস্য পলৈঃ কুর্যাত্| পঞ্চবিধাযাং কষাযকল্পনাযাং মধ্যমং মানম্| অস্মাচ্চ মানাত্ দেশকালাদীন্ সমীক্ষ্যোনাধিকভাবো মাত্রাযাঃ স্ববুদ্ধ্যা কল্প্যঃ|

Adhikarana snehapAke madhyamaM mAnam (15) · Śloka 15

স্নেহপাকে ত্বমানোক্তৌ চতুর্গুণবিবর্ধিতম্| কল্কস্নেহদ্রবং যোজ্যম্|১৫|

স০-স্নেহপাকে বিধাতব্যে কল্কস্নেহদ্রবাণামমানোক্তৌ-মান বচনস্য বিশিষ্টস্যানির্দেশে, চতুর্গুণবিবর্ধিতং কল্কস্নেহদ্রবং যোজ্যম্| কল্কশ্চ স্নেহশ্চ দ্রবশ্চ তেষাং সমাহারঃ কল্কস্নেহদ্রবম্| তদেবং কল্কাত্ স্নেহশ্চ্তুর্গুণঃ স্নেহাত্ দ্রবশ্চতুর্গুণ ইতি বোধ্যম্| পঞ্চপ্রভৃতি তু দ্রবং পৃথক্ স্নেহসমং দদ্যাদিত্যত্র যোজ্যমিতি|

Adhikarana snehapAke shaunakamatam (15-16) · Śloka 16

| অধীতে শৌনকঃ পুনঃ||১৫|| স্নেহেসিধ্দ্যতি শুদ্ধাম্বুনিঃক্বাথস্বরসৈঃ ক্রমাত্| কল্কস্য যোজযেদংশং চতুর্থং ষষ্ঠমষ্টমম্||১৬||

স০-শৌনকাখ্যস্তু তন্ত্রকৃদধীতে-এবং পঠতি| স্নেহ ইত্যাদি| স্নেহঃ কদাচিচ্ছুদ্ধাম্বুনা পচ্যতে কদাচিন্নিঃক্বাথেন কদাচিত্স্বরসেনেতি| তৈঃ শুদ্ধাম্বুনিঃক্বাথস্বরসৈঃ স্নেহে সিদ্ধ্যতি সতি ক্রমেণ কল্কস্যাংশং চতুর্থং ষষ্ঠমষ্টমং যোজযেদিতি|

Adhikarana snehapAke visheShaH (17) · Śloka 17

পৃথক্ স্নেহসমং দদ্যাত্পঞ্চপ্রভৃতি তু দ্রবম্| |১৭|

স্০- স্নেহপাকলক্ষণমধুনা লক্ষযন্নাহ-

Adhikarana pakvasnehasya lakShaNam (17-18) · Śloka 18

| নাঙ্গুলিগ্রাহিতা কল্কে ন স্নেহেঽগ্নৌ সশব্দতা||১৭|| বর্ণাদিসম্পচ্চ যদা তদৈনং শীঘ্রমাহরেত্| ঘৃতস্য ফেনোপশমস্তৈলস্য তু তদুদ্ভবঃ||১৮||

স০-কল্কবিষযেঽঙ্গুলিগ্রাহিত্বং যদা ন ভবতি, অগ্নৌ প্রক্ষিপ্তে বা স্নেহে সশব্দতা-চটচটাযিত্বং ন ভবতি, তথা বর্ণগন্ধরসস্পর্শানাং যদা সম্পত্-শুভত্বং স্যাত্, তদা-তস্মিন্ কালে, অশ্যামলচ্ছাযামন্তং স্নেহং শীঘ্রমাহরেত্| অগ্রিতঃ স্নেহস্য কটাহস্থিতস্য স কালোঽবতরণ ইত্যর্থঃ| অন্যদপি স্নেহপাকলক্ষণমস্তি-ঘৃতস্যেতি| ঘৃতাখ্যস্য স্নেহস্য সম্যক্পাকং প্রাপ্তস্য ফেনোপশমো যদা জাযতে, তৈলাখ্যস্য চ স্নেহস্য পচ্যমানস্য তদুদ্ভবঃ-ফেনোত্পত্তিঃ স্যাত্, তদা ঘৃততৈলযোঃ পাকো ভবতি|

Adhikarana pakvalehasya lakShaNam (19) · Śloka 19

লেহস্য তন্তুমত্তাঽপ্সু মজ্জনং সরণং ন চ| |১৯|

স০-লেহস্য পাকং প্রাপ্তস্য তন্তুমত্তা-তন্তুপ্রাদুর্ভাবঃ পাকঃ| তথাঽপ্সু মজ্জনং পাকলক্ষণং সরণাসরণরূপতযা দ্বিধা সম্ভবত্যত ইদমাহ-সরণং ন চ| সর্বলেহস্যাপ্সু মজ্জনং ভবতি ন তু সরণং-অবযবশো গমনম্, তথাঽপি তস্য পাকঃ সম্পন্ন ইতি বেদ্যম্|

Adhikarana snehapAkaBedAH (19-21) · Śloka 21

| পাকস্তু ত্রিবিধো মন্দশ্চিক্কণঃ খরচিক্কণঃ||১৯|| মন্দঃ কল্কসমে কিট্টে চিক্কণো মদনোপমে| কিঞ্চিত্সীদতি কৃষ্ণে চ বর্ত্য(র্তি)মানে চ পশ্চিমঃ||২০|| দগ্ধোঽত ঊর্ধ্বং নিষ্কার্যঃ স্যাদামস্ত্বগ্নিসাদকৃত্| |২১|

স০-পাকস্ত্রিপ্রকারো মন্দশ্চিক্কণঃ খরচিক্কণাখ্যঃ [ চ ]| স্নেহপাকবিধৌ কিট্টাখ্যে বস্তুজাতে কল্কসমে যথা কল্কোঽঙ্গুলিনাঽবষ্টভ্নাতি, তথা কিট্টেঽপি স্নেহপাকস্যাঙ্গুলিগ্রাহিতা ন ভবতি, স স্নেহপাকো মন্দ উচ্যতে| মদনোপমে কিট্টে সত্যেবমঙ্গুলিগ্রাহিণি স্নেহপাকস্য স চিক্কণঃ পাকঃ| কিঞ্চিত্-ঈষত্, কিট্টে সীদতি সতি তথা বর্ণতঃ কৃষ্ণে চ তস্মিন্, তথা বর্ত্য(র্তি)মানে-বর্তিমা(তাং)গচ্ছতি সতি, পশ্চিমঃ-খরচিক্কণাখ্যঃ পাকঃ| অতঃ অস্মাত্ খরচিক্কণাত্, ঊর্ধ্বং-অনন্তরং, দগ্ধো ভবতি স্নেহঃ| স চ নিষ্কার্যঃ স্যাত্-যথানিরূপিতকার্যকরণো ন ভবেত্, নির্বীর্যত্বাত্| আমঃ-ঈষত্পাকঃ স্নেহঃ, পুনরগ্নিসাদকৃত্|

Adhikarana mRudukharacikkaNAnAM viShayaBedAH (21) · Śloka 21

| মৃদুর্নস্যে, খরোঽভ্যঙ্গে, পানে বস্তৌ চ চিক্কণঃ||২১||

স০-মৃদুঃ-মন্দপাকঃ স্নেহো, নস্যে-তদ্বিষযে, প্রযোজ্যঃ| খরঃ-খরচিক্কণঃ স্নেহঃ, অভ্যঙ্গে-তদ্বিষযে, প্রযোজ্যঃ| পানে তথা বস্তৌ-তদ্বিষযে, চিক্কণঃ প্রযোজ্যঃ|

Adhikarana mAnaBedAH (22) · Śloka 22

অধুনা মানসঙ্খ্যাযাঃ যথাস্বং সংজ্ঞাসংবিধানার্থমাহ শাণং পাণিতলং মুষ্টিং কুডবং প্রস্থমাঢকম্| দ্রোণং বহং চ ক্রমশো বিজানীযাচ্চতুর্গুণম্||২২||

স০-শাণাদযো বহপর্যন্তাঃ ক্রমেণ চতুর্গুণাঃ পাণিতলাদিসংজ্ঞা বেদ্যাঃ|

Adhikarana ArdradravayormAnavisheShaH (23) · Śloka 23

দ্বিগুণং যোজযেদার্দ্রং কুডবাদি তথা দ্রবম্| |২৩|

স০-শুষ্কার্দ্রযোরেকস্মিন্ যোগে তুল্যপরিমাণেন নির্দিষ্টযোঃ শুষ্কদ্রব্যাদার্দ্রং দ্রব্যং দ্বিগুণং দত্ত্বা যোজযেত্| শুষ্কার্দ্রযোর্বা দ্রব্যযোস্তুল্যপরিমাণনির্দিষ্টযোঃ শুষ্কদ্রব্যাভাবে সত্যার্দ্রং দ্রব্যং দ্বিগুণং কৃত্বা যোজযেত্| শুষ্কদ্রবদ্রব্যযযোরেকস্মিন্ যোগে তুল্যপরিমাণেন নির্দিষ্টযোঃ শুষ্কদ্রব্যাত্ দ্রবদ্রব্যম্ কুডবাদিপরিমাণ সংজ্ঞযা নির্দিষ্টং দ্বিগুণং কৃত্বা যোজযেত্|

Adhikarana anuktadravAdau jalAdiyojanA (23-25) · Śloka 25

| পেষণালোডনে বারি স্নেহপাকে চ নির্দ্রবে||২৩|| কল্পযেত্সদৃশান্ ভাগান্ প্রমাণং যত্র নোদিতম্| কল্কীকুর্যাচ্চ ভৈষজ্যমনিরূপিতকল্পনম্||২৪|| অঙ্গানুক্তৌ তু মূলং স্যাদপ্রসিদ্ধৌ তদেব তু| |২৫|

স০-নির্দ্রবে-অনুক্তদ্রবে, পেষণালোডনার্থং বারি যোজযেত্| স্নেহপাকে চানুক্তদ্রবে বার্যেব যোজযেত্| যত্র যত্র প্রযোগে দ্রব্যাণাং পরিমাণং বিশিষ্টং নোক্তং তত্র তত্র দ্রব্যাণাং সদৃশান্ ভাগান্ কল্পযেত্|

Adhikarana mAnasaMj~jAntaram (1-29) · Śloka 29

| ষড্বংশ্যস্তু মরীচী স্যাত্, ষণ্মরীচ্যস্তু সর্ষপঃ| তণ্ডুলঃ সর্ষপাস্ত্বষ্টৌ, ধান্যমাষস্তু তৌ, যবঃ||১|| তাবণ্ডিকা চতুর্ভিস্তৈর্মাষকঃ শাণকস্তথা| ] দ্বৌ শাণৌ বটকঃ কোলং বদরং দ্রংক্ষণশ্চ, তৌ||২৫|| অক্ষম্ পিচুঃ পাণিতলং সুবর্ণং কবলগ্রহঃ| কর্ষো বিডালপদকং তিন্দুকঃ পাণিমানিকা||২৬|| শব্দান্যত্বমভিন্নেঽর্থে শুক্তিরষ্টমিকা পিচূ| পলং প্রকুঞ্চো বিল্বং চ মুষ্টিরাম্রং চতুর্থিকা||২৭|| দ্বে পলে প্রসৃতস্তৌ দ্বাবঞ্জলিস্তৌ তু মানিকা| আঢকং ভাজনং কংসো, দ্রোণঃ কুম্ভো ঘটোঽর্মণম্||২৮|| তুলা পলশতং, তানি বিংশতির্ভার উচ্যতে| |২৯|

স০-দ্বৌ শাণৌ বটকঃ কোলং বদরং দ্রংক্ষণশ্চেত্যত্র শব্দান্যত্বম্, ন তু তত্ত্বতো ভেদঃ| তৌ দ্বৌ দ্রংক্ষণাবক্ষং তথা পিচুস্তথা পাণিতলং তথা সুবর্ণং তথা কবলগ্রহস্তথা কর্ষস্তথা বিডালপদং তথা তিন্দুকস্তথা পাণিমানিকা, ইত্যত্রাভিন্নেঽর্থে শব্দানেকত্বম্| তথা দ্বৌ পিচূ শক্তিস্তথাঽষ্টমিকা, ইত্যত্রাপি শব্দান্যত্বমর্থস্যৈক্যে সতি| পলং প্রকুঞ্চো বিল্বং চ মুষ্টিরাম্রং চতুর্থিকা, ইত্যত্রাপি শব্দানাং বৈলক্ষণ্যে সতি নার্থতো ভেদঃ| দ্বে পলে প্রসৃত ইত্যুচ্যতে| তৌ দ্বৌ প্রসৃতাবঞ্জলিঃ কথ্যতে| তৌ দ্বাবঞ্জলী মানিকা,- অষ্টৌ পলানীত্যেব| আঢকাদীনাং শব্দনাং স্বরূপতো ভিন্নানাং নার্থতো ভেদঃ| তথৈব দ্রোণাদীনাং শব্দানাম্| পলশতং তুলা নিগদ্যতে| তানি-পলশতনি, বিংশতির্ভার উচ্যতে| ক্বাথাদীনাং তূত্তমাদিমাত্রাঃ সঙ্গ্রহাদবধার্যাঃ| সঙ্গ্রহে ত্বেবং পঠ্যতে (ক. অ. ৮)- "ক্বাথো নির্যূহঃ| তত্র ভেদ্যান্যৌষধান্যণুশো ভেদযিত্বা ছেদ্যানি চ ছেদযিত্বা প্রক্ষাল্যোদকেন শুচৌ রূক্ষাযামধঃপ্রলিপ্তাযাং তাম্রাযোমৃন্মযাদ্যন্যতমাযাং স্থাল্যাং সমাবাপ্য বহ্বল্পপানীযগ্রাহিতামৌষধানামাকলয্য যাবতা মুক্তরসতা স্যাত্ তাবদুদকমাসেচযেচ্ছোষযেচ্চ| [অগ্রাবধিশ্রযেত্| যাবন্মাত্রোদকদানে তথা তদবশিষ্টত্বে চ তত্র নিযমসামর্থ্যাত্ ক্বাথ্যদ্রব্যপরিমাণস্য| অত্রেযত্পরিমাণানি দ্রব্যাণি, উদকমিযত্প্রমাণং, তদবশিষ্টতা চেযত্প্রমাণা, ইতি ন নিযমোক্তিরেবংবিধা বিদ্যতে| কিং তর্হি? অভ্যূহনীযমেতত্সর্বমিতি| অত্র বিধিঃ|] অথাগ্নাবধিশ্রিত্য মহত্যাসনে সুখোপবিষ্টঃ সর্বতঃ সততমবলোকযন্ দর্ব্যা চ বিঘট্টযন্ মৃদুনা চ পরিতঃ সমুপগচ্ছতাঽনলেন সাধযেত্| অবতার্য চ সুপরিস্রুতং যথার্হস্পর্শং প্রযুঞ্জীত| ক্ষীরাদিসহিতং চ দ্রব্যং ন সম্যঙ্মুক্তরসং ভবতীতি বারিক্বাথপূর্বকং ক্ষীরাদ্যৈস্তদুপদেশেঽনুপদগ্ধং ক্বাথযেত্| শীতসলিলাপ্লুতং তু নিশাপর্যুষিতং পূতং শীতঃ কষাযঃ| উষ্ণাম্ভসি ক্ষুণ্ণাভিষুতঃ পূতঃ ফাণ্ট ইতি| তত্র সম্যগ্রসবীর্যাদীন্যৌষধস্য সমীক্ষ্য ব্যাধ্যাতুরাদিবলতশ্চ নির্যাসাদীনাং কল্পনাং মাত্রাং চ সংপ্রযোজযেত্| তথা চ কেচিদাহুঃ| মাত্রাযা ন ব্যবস্থাঽস্তি ব্যাধিং কোষ্ঠং বলং বযঃ| আলোচ্য দেশকালৌ চ ভৈষজ্যমবচারযেত্|| [ এবং চ সর্বমভ্যূহ্যাত্র কর্তব্যং নিশ্চিতং কৃত্বোক্তেন বিধিনেতি| ] এতদেবমুপদিষ্টং বুদ্ধিমতাং জ্ঞানপ্রবোধায| যথা তু সর্বে ভিষজো বিজ্ঞাস্যন্তি তথৈবোপদেক্ষ্যত ইতি| নির্যাসে মধ্যমা মাত্রা চতুষ্পলম্| কল্কচূর্ণযোঃ কর্ষঃ পলত্রযং তদালোডনে| নির্যূহে ভেষজপলমুদকার্ধপ্রস্থেঽধিশত্য পাদশেষমবতারযেত্| শীতফাণ্টযোরৌষধপলং ষড্ভিশ্চতুর্ভিরম্বুপলৈরাসুতমিতি|" ইতি| তথা শাণপরিমাণস্য পাণিতলবাচকস্য [ চ ] কিমপি পরিমাণং নোক্তং যেনাসৌ [ ন ] পরিচ্ছিদ্যত ইতি ন বাচ্যম্, সঙ্গ্রহে তত্পরিমাণস্যোক্তত্বাত্| তত্র হ্যেবমুক্তম্ ( সং.ক.অ.৮)-"ষড্বংশ্যো মরীচী| তাঃ ষট্ মরীচ্যঃ সর্ষপ উচ্যতে| অষ্টৌ সর্ষপাস্তণ্ডুলঃ| তৌ দ্বৌ তণ্ডুলাবেকো ধান্যমাষঃ| তৌ দ্বৌ ধান্যমাষৌ যবঃ| অতঃ পরং চতুর্গুণবৃধ্দ্যাঽণ্ডিকামাষকশাণকর্ষপলকুডবপ্রস্থাঢকদ্রোণবহাঃ কল্প্যন্তে| [ এবং চতুর্ভির্মাষকৈঃ শাণস্য পরিমাণং পরিচ্ছিদ্যতে| ] ধরণং তু পলস্য দশমো ভাগঃ| মাষকস্য তু পর্যাযো হেমঃ| কর্ষস্য ষোডশিকা| আঢকস্য তু পর্যাযাঃ কংসঃ পাত্রং ভাজনং চ| দ্রোণস্য পর্যাযো নল্বণঃ, তথা অর্মণঃ, তথোন্মানঃ, তথা ঘটঃ কুম্ভঃ কলশশ্চ| দ্রোণদ্বযস্য চ শূর্পঃ|" ইতি|

Adhikarana shailaBedAddravyavisheShaH (6) · Śloka 6

হিমবদ্বিন্ধ্যশৈলাভ্যাং প্রাযো ব্যাপ্তা বসুন্ধরা||২৯|| সৌম্যং পথ্যং চ তত্রাদ্যমাগ্নেযং বৈন্ধ্যমৌষধম্| ২৯ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং পঞ্চমে কল্পসিদ্ধিস্থানে দ্রব্যকল্পো নাম ষষ্ঠোঽধ্যাযঃ||৬||

স০-হিমবত্পর্বতেন বিন্ধ্যশৈলেন চ বাহুল্যেন বসুন্ধরা ব্যাপ্তা| তত্র-তযোর্মধ্যাত্, আদ্যং-হৈমবতমৌষধং, সৌম্যং পথ্যং চ স্বভাবাদ্ভবতি| বৈন্ধ্যং চৌষধমাগ্নেযং-ন তথা দেহস্য সদা পথ্যং, স্যাদিতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং পঞ্চমে কল্পসিদ্ধিস্থানে দ্রব্যকল্পো নাম ষষ্ঠোঽধ্যাযঃ সমাপ্তঃ|| ৬||