5. vastivyāpatsiddhiradhyāyaḥ

Adhikarana adhyAyopakramaH (1) · Śloka 1

অস্মাদনন্তরং বস্তিব্যাপত্সিদ্ধির্ব্যাখ্যাযতে||১||

আ০ র০-

Adhikarana bastivyApatsiddhiradhyAyaH (2) · Śloka 2

অথাতো বস্তিব্যাপত্সিদ্ধিং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)|২|

স০-অথাত ইতি পূর্ববত্| (অসম্যক্ প্রযুক্তেষু বস্তিষু যা ব্যাপদঃ, তাসাং সাধনাযাস্যাধ্যাযস্যারম্ভঃ|)

Adhikarana nirUhavyApadaH, ayogavyApadaH, vibandhAkhyA vyApattatsiddhiSca (1-6) · Śloka 6

অস্নিগ্ধস্বিন্নদেহস্য গুরুকোষ্ঠস্য যোজিতঃ| শীতোঽল্পস্নেহলবণদ্রব্যমাত্রো ঘনোঽপি বা||১|| বস্তিঃ সঙ্ক্ষোভ্য তং দোষং দুর্বলত্বাদনির্হরন্| করোত্যযোগং তেন স্যাদ্বাতমূত্রশকৃদগ্রহঃ||২|| নাভিবস্তিরুজা দাহো হৃল্লেপঃ শ্বযথুর্গুদে| কণ্ডূর্গণ্ডানি বৈবর্ণ্যমরতির্বহ্নিমার্দবম্||৩|| ক্বাথদ্বযং প্রাগ্বিহিতং মধ্যদোষেঽতিসারিণি| উষ্ণস্য তস্মাদেকস্য তত্র পানং প্রশস্যতে||৪|| ফলবর্ত্যস্তথা স্বেদাঃ কালং জ্ঞাত্বা বিরেচনম্| বিল্বমূলত্রিবৃদ্দারুযবকোলকুলত্থবান্||৫|| সুরাদিমূত্রবান্ বস্তিঃ সপ্রাক্পেষ্যস্তমানযেত্| |৬|

স০-অস্ত্রিগ্ধাদিগুণস্য পুংসঃ শিশিরস্তথাঽল্পস্নেহলবণোঽল্পদ্রব্যমাত্রঃ-অল্পদ্রব্যকল্পঃ(ল্কঃ), তথা ঘনো-বহুদ্রব্যকল্কো, বস্তির্যোজিতঃ সন্ বস্তিসাধ্যং দোষং সঙ্ক্ষোভ্য দুর্বলত্বাদনির্হরন্ অযোগং করোতি| তেন-অযোগেন, বাতাদিগ্রহঃ স্যাত্| প্রাক্-অতিসারচিকিত্সিতে (চি. অ. ৯/৬) ক্বাথদ্বযং-পাচনযুগুলং-মধ্য দোষেঽতিসারিণি বিহিতং ভূতীকপিপ্পল্যাদিরেকো বিল্বধনিকো দ্বিতীযঃ, তস্মাত্-ক্বাথদ্বযাত্, একস্য-অন্যতরস্য ক্বাথস্যোষ্ণস্য, তত্রাবস্থাযাং পানং প্রশস্যতে, তথা ফলবর্তযঃ স্বেদাশ্চ নানাবিধাঃ, অবস্থাশ্চ জ্ঞাত্বা বিরেচনং শস্যতে| তথা বিল্বাদিমান্ বস্তিস্তথা সুরাদিমান্ বস্তিঃ, সপ্রাক্পেষ্যঃ-"বলাং গুডূচীং" (ক. অ. ৪/১) ইত্যাদৌ বস্তৌ যঃ পেষ্যো যবান্যাদিকৃত্ তেন প্রাক্পেষ্যেণ সহ বর্তত ইতি সপ্রাক্পেষ্যঃ| তমত্র দত্তবস্তিনোত্ক্লিষ্টং দোষমানযেত্-আকর্ষযেত্|

Adhikarana AdhmAnAkhyA vyApattatsiddhiSca (6-10) · Śloka 10

| যুক্তোঽল্পবীর্যো দোষাঢ্যে রূক্ষে ক্রূরাশযেঽথবা||৬|| বস্তির্দোষাবৃতো রূদ্ধমার্গো রুন্ধ্যাত্সমীরণম্| স বিমার্গোঽনিলঃ কুর্যাদাধ্মানং মর্মপীডনম্||৭|| বিদাহং গুদকোষ্ঠস্য মুষ্কবঙ্ক্ষণবেদনাম্| রুণদ্ধি হৃদযং শূলৈরিতশ্চেতশ্চ ধাবতি||৮|| স্বভ্যক্তস্বিন্নগাত্রস্য তত্র বর্তিং প্রযোজযেত্| বিল্বাদিশ্চ নিরূহঃ স্যাত্পীলুসর্ষপমূত্রবান্||৯|| সরলামরদারুভ্যাং সাধিতং চানুবাসনম্| |১০|

স০-দোষাঢ্যে তথা রূক্ষে ক্রূরকোষ্ঠে বা বস্তিরল্পবীর্যো দত্তো দোষৈঃ-বায্বাদ্যবরকৈরাবৃতঃ, অনন্তরং স বস্তী রুদ্ধমার্গঃ-প্রতিহতগতিপ্রসরণো, বাযুং রুন্ধ্যাত্| সোঽনিলো বিমার্গগ আধ্মানং কুর্যাত্| তথা হৃদযাদীনাং মর্মণাং ব্যধনং-পীডনং, তথা গুদকোষ্ঠস্য বিদাহং, তথা মুষ্কবঙ্ক্ষণবেদনাং চ কুর্যাত্| তথা শূলৈঃ-নানাবিধাভির্ভগ্নরুদ্ধমৃদিতপীডিতাবনদ্ধাদিভিঃ পীডাভিঃ, হৃদযং রুণদ্ধি-আবৃণোতি| হৃদযমাবৃত্যানন্তরম্, ইতশ্চেতশ্চ-অনিযতে দেশে, ধাবতি পবনঃ| তত্র-অবস্থাবিশেষে, সুষ্ট্বভ্যক্তাঙ্গস্য স্বিন্নাঙ্গস্য চ ফলবর্তিং প্রযোজযেত্| বিল্বাদিকশ্চ নিরুহঃ স্যাত্ পীলুসর্ষপমূত্রবান্| সরলদেবদারুভ্যাং সাধিতং তৈলং চানুবাসনং স্যাত্|

Adhikarana UrdhvamArUtAkhyA vyApattatsiddhiSca (10-21) · Śloka 21

| কুর্বতো বেগসংরোধং পীডিতো বাঽতিমাত্রযা||১০|| অস্নিগ্ধলবণোষ্ণো বা বস্তিরল্পোঽল্পভেষজঃ| মৃদুর্বা মারুতেনোর্ধ্বং বিক্ষিপ্তো মুখনাসিকাত্||১১|| নিরেতি মূর্চ্ছাহৃল্লাসতৃড্দাহাদীন্ প্রবর্তযন্| মূর্চ্ছাবিকারং দৃষ্ট্বাঽস্য সিঞ্চেচ্ছীতাম্বুনা মুখম্||১২|| ব্যেজদাক্লমনাশাচ্চ প্রাণাযামং চ কারযেত্| পৃষ্ঠপার্শ্বোদরং মৃজ্যাত্ করৈরুষ্ণৈরধোমুখম্||১৩|| কেশেষূত্ক্ষিপ্য ধুন্বীত ভীষযেদ্ব্যালদংষ্ট্রিভিঃ| শস্ত্রোল্কারাজপুরুষৈর্বস্তিরেতি তথা হ্যধঃ||১৪|| পাণিবস্ত্রৈর্গলাপীডং কুর্যান্ন ম্রিযতে তথা| প্রাণোদাননিরোধাদ্ধি সুপ্রসিদ্ধতরাযনঃ||১৫|| অপানঃ পবনো বস্তিং তমাশ্বেবাপকর্ষতি| কুষ্ঠক্রমুককল্কং চ পাযেতাম্লসংযুতম্||১৬|| ওষ্ণ্যাত্তৈক্ষ্ণ্যাত্সরত্বাচ্চ বস্তিং সোঽস্যানুলোমযেত্ গোমূত্রেণ ত্রিবৃত্পথ্যাকল্কং বাঽধোনুলোমনম্||১৭|| পক্বাশযস্থিতে স্বিন্নে নিরূহো দাশমূলিকঃ| যবকোলকুলত্থৈশ্চ বিধেযো মূত্রসাধিতৈঃ||১৮|| বস্তির্গোমূত্রসিদ্ধৈর্বা সামৃতাবংশপল্লবৈঃ| পূতীকরঞ্জত্বক্পত্রশঠীদেবাহ্বরোহিষৈঃ||১৯|| সতৈলগুডসিন্ধূত্থো বিরেকৌষধকল্কবান্| বিল্বাদিপঞ্চমূলেন সিদ্ধো বস্তিরুরঃস্থিতে||২০|| শিরঃস্থে নাবনং ধূমঃ প্রচ্ছাদ্যং সর্ষপৈঃ শিরঃ| |২১|

স০-বেগসংরোধং-বেগবিধারণং, কুর্বতঃ পুংসো যঃ পীডিতো বস্তিরতিমাত্রযা বা পীডিতোঽস্নিগ্ধলবণোষ্ণো বা তথাঽল্পো মাত্রযা, অল্পভেষজশ্চ মৃদুর্বা, স তথাভূতো মারুতেনোর্ধ্বং ক্ষিপ্তো মূখনাসিকাত্ নিরেতি-নির্গচ্ছতি| মূর্চ্ছাদীন্ প্রবর্তযেত্(যন্)| অস্য তু-তথাবিধবস্তেঃ পুরুষস্য, মূর্চ্ছাদিবিকারং দৃষ্ট্বা শীতাম্বুনা মুখং সিঞ্চেত্| তথা ক্লমনাশং যাবত্ তং তালবৃন্তাদিনা বীজযেত্| তথা তং পুরুষং প্রাণাযামং চ কারযেত্, প্রাণাযামেন হ্যূর্ধ্বং বিক্ষিপ্তো বস্তিরধো যাতি| উষ্ণৈঃ করৈঃ পৃষ্ঠং পার্শ্বমুদরং চ মৃজ্যাত্| তথা তং পুরুষমধোমুখং কৃত্বা কেশৈরুত্ক্ষিপ্যোর্ধ্বং নীত্বা বপুর্ধুন্বীত| তথা ব্যালাদিভির্ভীষযেত্| তথোর্ধ্বং প্রবৃত্তো বস্তির্যস্মাদধো গচ্ছতি| তথা পাণিবস্ত্রৈর্গলাপীডং কুর্যাদ্যথা ন ম্রিযেত| এবং সতি প্রাণোদাননিরোধঃ সম্পদ্যতে, প্রাণোদাননিরোধাদ্যস্মাদধোগঃ সুপ্রসিদ্ধতরাযনো ভূত্বাঽপানো বাযুস্তং বস্তিং দ্রাগেবাপকর্ষতি-ঊর্ধ্বাদধঃ ক্ষিপতি| সুষ্ঠু-প্রকর্ষেণ, প্রসিদ্ধতরমযনং যস্য স সুপ্রসিদ্ধতরাযনঃ| কুষ্ঠাদিকল্কং চাম্লসংযুতং পাযযেত্| [ সঃ ] কল্কঃ, অস্য-আতুরস্য, উষ্ণাদিগুণযোগাত্তং বস্তিমনুলোমযেত্| ত্রিবৃতাদিকল্কং পীতং গোমূত্রেণাধোনুলোমনম্| পক্বাশযস্থিতে দোষে স্নিগ্ধে (স্বিন্নে) নিরুহো দাশমূলিকো বিধাতব্যঃ| যবাদিভিশ্চ গোমূত্রসাধিতৈর্বস্তির্বিধেযঃ| অথবা গোমূত্রসিদ্ধৈর্গুডূচ্যাদিভিস্তৈলগুডসৈন্ধবযুক্তো বস্তির্বিরেকদ্রব্যকল্কবান্ বিধেযঃ| উরসি স্থিতে বিল্বাদিপঞ্চমূলেন সিদ্ধো বস্তির্বিধাতব্যঃ| শিরসি স্থিতে বস্তৌ নস্যং ধূমশ্চ, শিরশ্চ সর্ষপকল্কেন প্রচ্ছাদনীযম্|

Adhikarana atiyogavyApadaH (21-23) · Śloka 23

| বস্তিরত্যুষ্ণতীক্ষ্ণাম্লঘনোঽতিস্বেদিতস্য বা||২১|| অল্পে দোষে মৃদৌ কোষ্ঠে প্রযুক্তো বা পুনঃপুনঃ| অতিযোগত্বমাপন্নো ভবেত্কুক্ষিরুজাকরঃ||২২|| বিরেচনাতিযোগেন স তুল্যাকৃতিসাধনঃ| |২৩|

স০-অত্যুষ্ণতীক্ষ্ণাম্লঘনো বস্তিঃ প্রযুক্তোঽতিস্বেদিতস্য বা পুংসোঽল্পে দোষে তথা মৃদৌ কোষ্ঠে মুহুর্মুহুঃ প্রযুক্তত্বাদতিযোগত্বং প্রাপ্তোঽযম্ কুক্ষিরুগ্জনকঃ স্যাত্| সঃ-তথাবিধো বস্তিঃ, বিরেচনাতিযোগেন তুল্যে-সদৃশে, লক্ষণচিকিত্সিতে যস্য স এবং স্যাত্|

Adhikarana kukShishUlAkhyA vyApattatsiddhiSca sravAkhyA vyApattatsiddhiSca (23-28) · Śloka 28

| বস্তিঃ ক্ষারাম্লতীক্ষ্ণোষ্ণলবণঃ পৈত্তিকস্য বা||২৩|| গুদং দহন্ লিখন্ ক্ষিণ্বন্ করোত্যস্য পরিস্রবম্| স বিদগ্ধং স্রবত্যস্রং বর্ণৈঃ পিত্তং চ ভূরিভিঃ||২৪|| বহুশশ্চাতিবেগেন মোহং গচ্ছতি সোঽসকৃত্| রক্তপিত্তাতিসারঘ্নী ক্রিযা তত্র প্রশস্যতে||২৫|| দাহাদিষু ত্রিবৃত্কল্কং মৃদ্বীকাবারিণা পিবেত্| তদ্ধি পিত্তশকৃদ্বাতান্ হৃত্বা দাহাদিকান্ জযেত্||২৬|| বিশুদ্ধশ্চ পিবেচ্ছীতাং যবাগূং শর্করাযুতাম্| যুঞ্যাদ্বাঽতিবিরিক্তস্য ক্ষীণবিট্কস্য ভোজনম্||২৭|| মাষযূষেণ কুল্মাষান্ পানং দধ্যথবা সুরাম্| সিদ্ধির্বস্ত্যাপদামেবং|২৮|

স০-ক্ষারাম্লতীক্ষ্ণোষ্ণলবণো বস্তিঃ প্রযুক্তঃ পৈত্তিকস্য বা প্রযুক্তো গুদং দহন্নিব বিলিখন্নিব ক্ষিপন্নিবাস্য-নরস্য, পরিস্রবং করোতি| সঃ-পুরুষঃ, তদা বিদগ্ধমস্রং স্রবতি| তথা বহুষো-বহূন্ বারান্, অতিবেগেন ভূরিভিঃ- বহুভিঃ, বর্ণৈঃ পিত্তং স্রবতি| তথা মোহমসকৃদ্ গচ্ছতি| তত্রাবস্থাযাং রক্তপিত্তঘ্নী তথা রক্তাতিসারঘ্নী ক্রিযা চ প্রশস্যতে| দাহমোহাদিষু ত্রিবৃত্কল্কং দ্রাক্ষাজলেন পিবেত্| যস্মাত্ তত্-ত্রিবৃত্কল্কযুতং দ্রাক্ষাবারি, পিত্তশকৃদ্বাতান্ হত্বা দাহাদীন্ জযেত্| বিশুদ্ধশ্চ সশর্করাং শীতাং পেযাং পিবেত্| অতিবিরিক্তস্য ক্ষীণপুরীষস্য পুংসঃ কুল্মাষান্ মাষযূষেণ সহ ভোজনং যুঞ্জ্যাত্| দধ্যথবা সুরাং পানং দদ্যাত্| বস্ত্যাপদাং-নিরুহব্যাপত্তীনাং, এবং সিদ্ধিঃ-চিকিত্সিতং, স্যাত্|

Adhikarana anuvAsanavyApadaH (28) · Śloka 28

| স্নেহবস্তেস্তু বক্ষ্যতে||২৮||

স০-স্নেহবস্তেঃ-অনুবাসনস্য, সিদ্ধির্বক্ষ্যতে|

Adhikarana tatra pa~jcavyApadAM kAraNam (29-30) · Śloka 30

শীতোঽল্পো বাঽধিকে বাতে পিত্তেঽত্যুষ্ণঃ কফে মৃদুঃ| অতিভুক্তে গুরুর্বর্চঃসঞ্চযেঽল্পবলস্তথা||২৯|| দত্তস্তৈরাবৃতঃ স্নেহো নাযাত্যভিভবাদপি| |৩০|

স০-শীতো বস্তিরল্পো বাঽধিকে বাতে দত্তঃ, তথা পিত্তেঽত্যুষ্ণঃ, তথা কফে মৃদুঃ, অযোগঃ সম্পদ্যতে| অতিভুক্তে গুরুর্বস্তির্দত্তঃ, তথা বর্চসঃ-পুরীষস্য, সঞ্চযেঽল্পবলঃ-উভযথা মাত্রযা বীর্যতশ্চ, দত্তঃ, তৈঃ-শীতাদিকারণাদ্বাতাদিভিঃ, স্নেহবস্তিরাবৃতো নাযাতি-গুদমার্গান্ন প্রত্যাগচ্ছতি, অভিভবাদপ্যেতৈরেব|

Adhikarana vAtAvRutasya lakShaNaM cikitsitaM ca (30-33) · Śloka 33

| স্তম্ভোরুসদনাধ্মানজ্বরশূলাঙ্গমর্দনৈঃ||৩০|| পার্শ্বরুগ্বেষ্টনৈর্বিদ্যাদ্বাযুনা স্নেহমাবৃতম্| স্নিগ্ধাম্ললবণোষ্ণৈস্তং রাস্নাপীতদ্রুতৈলিকৈঃ||৩১|| সৌবীরকসুরাকোলকুলত্থযবসাধিতৈঃ| নিরূহৈর্নির্হরেত্সম্যক্ সমূত্রৈঃ পাঞ্চমূলিকৈঃ||৩২|| তাভ্যামেব চ তৈলাভ্যাং সাযং ভুক্তেঽনুবাসযেত্| |৩৩|

স০-স্তম্ভোরুসাদাদিভির্বাযুনা স্নেহমাবৃতং বিদ্যাত্| তং এবংবিধং, স্নেহং-স্নেহবস্তিং, নিরুহৈঃ সম্যক্ স্নিগ্ধাম্ললবণোষ্ণৈর্নির্হরেত্| তানেব নিরূহানাহ-সৌবীরকসুরাদিসাধিতৈস্তথা গোমূত্রান্বিতৈস্তথা পঞ্চমূলনির্বৃত্তৈঃ পঞ্চমূলক্বাথবদ্ভিরিত্যর্থঃ| তথা রাস্না চ পীতদ্রুশ্চ রাস্নাপীতদ্রূ, তাভ্যাং সাধিতে তৈলে রাস্নাপীতদ্রুতৈলে, তে বিদ্যতে যেষাং নিরূহাণাং তৈঃ, ক্বচিত্পুটকে রাস্নাতৈলং ক্বচিদ্ধরিদ্রাতৈলং যোজ্যমিত্যর্থঃ| তাভ্যমিতি দ্বিবচননির্দেশাত্ পৃথগেতত্ তৈলদ্বযমুপযোগীতি গম্যতে| চ-সমুচ্চযে, ন কেবলং তং নিরূহযেত্, রাস্নাতৈলেন পীতদ্রুতৈলেন বা দোষাদ্যনুরোধাদনুবাসযেচ্চ| সাযং ভুক্তে-ন তু প্রাতর্ভুক্তে|

Adhikarana pittAvRutasya lakShaNaM cikitsitaM ca (33-34) · Śloka 34

| তৃড্দাহরাগসম্মোহবৈবর্ণ্যতমকজ্বরৈঃ||৩৩|| বিদ্যাত্পিত্তাবৃতং স্বাদুতিক্তৈস্তং বস্তিভির্হরেত্| |৩৪|

স০-তং তৃড্দাহাদিভিঃ পিত্তাবৃতং স্নেহবস্তিং বিদ্যাত্| স্বাদুতিক্তৈর্বস্তিভির্বিনির্হরেত্|

Adhikarana kaPAvRutasya lakShaNaM cikitsitaM ca (34-36) · Śloka 36

| তন্দ্রাশীতজ্বরালস্যপ্রসেকারুচিগৌরবৈঃ||৩৪|| সম্মূর্চ্ছাগ্লানিভির্বিদ্যাচ্ছ্লেষ্মণা স্নেহমাবৃতম্| কষাযতিক্তকটুকৈঃ সুরামূত্রোপসাধিতৈঃ||৩৫|| ফলতৈলযুতৈঃ সাম্লৈর্বস্তিভিস্তং বিনির্হরেত্| |৩৬|

স০-তন্দ্রাদিভিঃ কফাবৃতং স্নেহবস্তিং বিদ্যাত্| তং কষাযকটুতিক্তকৈঃ সুরামূত্রোপসাধিতৈঃ ফলতৈলযুতৈঃ সাম্লৈর্বস্তিভিঃ নিরূহৈঃ, বিনির্হরেত্| ফলানাং-উষ্ণবীর্যাণামক্ষোটাদীনাং, তৈলং ফলতৈলম্| কেচিত্তুং ফলং-মদনফলং, তিলতৈলং চ, তাভ্যাং যুতাস্তৈরিতি ব্যাচক্ষতে|

Adhikarana atyashanAvRutasya lakShaNaM cikitsitaM ca (36-38) · Śloka 38

| ছর্দিমূর্চ্ছারুচিগ্লানিশূলনিদ্রাঙ্গমর্দনৈঃ||৩৬|| আমলিঙ্গৈঃ সদাহৈস্তং বিদ্যাদত্যশনাবৃতম্| কটূনাং লবণানাং চ ক্বাথৈশ্চূর্ণৈশ্চ পাচনম্||৩৭|| মৃদুর্বিরেকঃ সর্বং চ তত্রামবিহিতং হিতম্| |৩৮|

স০-ছর্দ্যাদিভিরামলিঙ্গৈর্দাহযুতৈঃ স্নেহমত্যশনাবৃতং বিদ্যাত্| কটূনাং লবণানাং চ ক্বাথৈশ্চূর্ণৈশ্চ পাচনং হিতম্| তথা মৃদুভিঃ-অতীক্ষ্ণৈঃ, বিরেকঃ| তথা তস্মিন্ সর্বমামবিহিতমৌষধং হিতম্|

Adhikarana viDAvRutasya lakShaNaM cikitsitaM ca (38-40) · Śloka 40

| বিণ্মূত্রানিলসঙ্গার্তিগুরুত্বাধ্মানহৃদ্গ্রহৈঃ||৩৮|| স্নেহং বিডাবৃতং জ্ঞাত্বা স্নেহস্বেদৈঃ সবর্তিভিঃ| শ্যামাবিল্বাদিসিদ্ধৈশ্চ নিরুহৈঃ সানুবাসনৈঃ||৩৯|| নির্হরেদ্বিধিনা সম্যগুদাবর্তহরেণ চ| |৪০|

স০-বিণ্মূত্রাদিভির্বিডাবৃতং স্নেহং বিদিত্বা, স্নেহাদিভিস্তথা শ্যামাদিভিঃ সিদ্ধৈর্নিরূহৈরনুবাসনৈশ্চ, তথোদাবর্তহরেণ বিধিনা, সম্যগ্ নির্হরেত্|

Adhikarana aBuktAdidattasya lakShaNaM cikitsitaM ca (40-43) · Śloka 43

| অভুক্তে শূনপাযৌ বা পেযামাত্রাশিতস্য বা||৪০|| গুদে প্রণিহিতঃ স্নেহো বেগাদ্ধাবত্যনাবৃতঃ| ঊর্ধ্বং কাযং ততঃ কণ্ঠাদূর্ধ্বেভ্যঃ খেভ্য এত্যপি||৪১|| মূত্রশ্যামাত্রিবৃত্সিদ্ধো যবকোলকুলত্থবান্| তত্সিদ্ধতৈলো দেযঃ স্যান্নিরূহঃ সানুবাসনঃ||৪২|| কণ্ঠাদাগচ্ছতঃ স্তম্ভকণ্ঠগ্রহবিরেচনৈঃ| ছর্দিঘ্নীভিঃ ক্রিযাভিশ্চ তস্য কুর্যান্নিবর্হণম্||৪৩||

স০-অভুক্তে স্নেহবস্তিঃ, তথা শূনঃ পাযুর্যস্য তস্মিন্ প্রণিহিতো বস্তিঃ, অথবা পেযামাত্রমেবাশিতং যেন স পেযামাত্রাশিতস্তস্য গুদে প্রণিহিতঃ স্নেহবস্তিঃ, অনাবৃতঃ সন্ বেগাদূর্ধ্বং কাযং ধাবতি| ততঃ কণ্ঠাদূর্ধ্বেভ্যশ্চ খেভ্যঃ এতি-পততি| তত্র গোমূত্রাদিসিদ্ধো যো যবাদিমান্ ক্বাথস্তেন ক্বাথেন সিদ্ধতৈলৈর্নিরূহমনুবাসনং [ চ ] দদ্যাত্| কণ্ঠাদাগচ্ছতঃ স্নেহস্য স্তম্ভকণ্ঠগ্রহাদিভিশ্ছর্দিঘ্নীভিঃ ক্রিযাভিশ্চ তন্নির্হরণং কুর্যাত্|

Adhikarana Amadattasya lakShaNaM cikitsitaM ca (44-45) · Śloka 45

নাপক্বং প্রণযেত্স্নেহং গুদং স হ্যুপলিম্পতি| ততঃ কুর্যাত্সরুঙ্মোহকণ্ডূশোফান্, ক্রিযাঽত্র চ||৪৪|| তীক্ষ্ণো বস্তিস্তথা তৈলমর্কপত্ররসে শৃতম্| |৪৫|

স০-অপক্বং স্নেহং ন দদ্যাত্| যস্মাত্ সঃ-অপক্বঃ স্নেহো, গুদমুপলিম্পতি| ততঃ-উপলিপ্তে গুদে, রুজাভিঃ সহ মোহাদীন্ কুর্যাত্| অত্র চিকিত্সিতং তীক্ষ্ণো বস্তিস্তথাঽর্কপত্ররসে শৃতং তৈলম্|

Adhikarana savAtapraNayanasya lakShaNaM cikitsitaM ca (45-46) · Śloka 46

| অনুচ্ছ্বাস্য তু বদ্ধে বা দত্তে নিঃশেষ এব বা||৪৫|| প্রবিশ্য ক্ষুভিতো বাযুঃ শূলতোদকরো ভবেত্| তত্রাভ্যঙ্গো গুদে স্বেদো বাতঘ্নান্যশনানি চ||৪৬||

স০-অনুচ্ছ্বাস্য বস্তের্বদনে বদ্ধে সতি, অথবা নিঃশেষং দত্তে সতি, প্রবিশ্যান্তরে বাযুঃ কুপিতঃ শূলতোদকরঃ স্যাত্| তস্মিন্নভ্যঙ্গো গুদে স্বেদশ্চ, তথা বাতহন্তৃণি ভোজনানি চ|

Adhikarana atidrutotkShiptayoH lakShaNaM cikitsitaM ca (47-48) · Śloka 48

দ্রুতং প্রণীতে নিষ্কৃষ্টে সহসোত্ক্ষিপ্ত এব বা| স্যাত্ কটীগুদজঙ্ঘোরুবস্তিস্তম্ভার্তিভেদনম্||৪৭|| ভোজনং তত্র বাতঘ্নং স্বেদাভ্যঙ্গাঃ সবস্তযঃ| |৪৮|

স০-শীঘ্রং প্রণীতে নিষ্কৃষ্টে সহসোত্ক্ষিপ্তে চ কট্যাদিষু স্তম্ভপীডাভেদনানি স্যুঃ| তত্র বাতঘ্নমশনং স্বেদোঽভ্যঙ্গশ্চ|

Adhikarana ulluptasya lakShaNaM cikitsitaM ca (48-49) · Śloka 49

| পীড্যমানেঽন্তরা মুক্তে গুদে প্রতিহতোঽনিলঃ||৪৮|| উরঃশিরোরুজং সাদমূর্বোশ্চ জনযেদ্বলী| বস্তিঃ স্যাত্তত্র বিল্বাদিফলশ্যামাদিমূত্রবান্||৪৯||

স০-পীড্যমানে বস্তিপুটকেঽন্তরা-মধ্য এব, কদাচিত্তস্মিন্ মুক্তে, গুদেঽনিলঃ প্রতিহতো বলবান্ উরঃশিরোরুজমূরুসাদং চ জনযেত্| তত্র বিল্বাদিভির্বস্তির্মদনফলশ্যামাদিমান্ স্যাত্|

Adhikarana ativegasya lakShaNaM cikitsitaM ca (50) · Śloka 50

অতিপ্রপীডিতঃ কোষ্ঠে তিষ্ঠত্যাযাতি বা গলম্| তত্র বস্তির্বিরেকশ্চ গলপীডাদি কর্ম চ||৫০||

স০-অতিপ্রপীডিতো বস্তিপুটকঃ কোষ্ঠে তিষ্ঠতি, গলং বাঽঽযাতি| তত্র বস্তির্বিরেকশ্চ গলপীডাদি চ কর্ম শস্যতে|

Adhikarana vamanAdishuddhasya visheShato~apacAraniShedhaH (51-52) · Śloka 52

বমনাদ্যৈর্বিশুদ্ধং চ ক্ষামদেহবলানলম্| যথাঽণ্ডং তরুণং পূর্ণং তৈলপাত্রং যথা তথা||৫১|| ভিষক্ প্রযত্নতো রক্ষেত্সর্বস্মাদপচারতঃ| |৫২|

স০-বমনবিরেকাদ্যৈশ্চ বিশুদ্ধং ক্ষামদেহং ক্ষামবলং ক্ষামানলং চ পুরুষং বৈদ্যঃ প্রযত্নেন সর্বস্মাদপচারাদ্রক্ষেত্| কিমিব? যথা তরুণং-অভিনবং জাতমণ্ডং, যথা চ তৈলপূর্ণং পাত্রং রক্ষ্যতে, তথা প্রযত্নেন রক্ষেত্|

Adhikarana shuddhasyopacAraH (5) · Śloka 5

| দদ্যান্মধুরহৃদ্যানি ততোঽম্ললবণৌ রসৌ||৫২|| স্বাদুতিক্তৌ ততো ভূযঃ কষাযকটুকৌ ততঃ| অন্যোন্যপ্রত্যনীকানাং রসানাং স্নিগ্ধরূক্ষযোঃ||৫৩|| ব্যত্যাসাদুপযোগেন ক্রমাত্তং প্রকৃতিং নযেত্| সর্বংসহঃ স্থিরবলো বিজ্ঞেযঃ প্রকৃতিং গতঃ||৫৪|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং পঞ্চমে কল্পসিদ্ধিস্থানে বস্তিব্যাপত্সিদ্ধির্নাম পঞ্চমোঽধ্যাযঃ||৫||

স০- তস্মিন্ মধুরহৃদ্যানি দদ্যাত্| অনন্তরমম্ললবণৌ রসৌ, ততঃ স্বাদুতিক্তরসৌ, ততঃ কষাযকটুকরসৌ দদ্যাত্| অন্যোন্যপ্রত্যনীকানাং-পরস্পরপ্রতিপক্ষাণাং রসানাং, তথা স্নিগ্ধরূক্ষযোরন্যোন্যপ্রত্যনীকযোঃ, ব্যত্যাসাত্-বিপর্যযাত্, উপযোগেন-যথাস্বমুপযোগেন, যথা-মধুররসমুপযুজ্য পুনরম্লাদ্যন্যতমং তত্প্রতিপক্ষং যুঞ্জ্যাত্, অম্লমুপযুজ্য পুনর্মধুরাদ্যন্যতমং তত্প্রতিপক্ষং যুঞ্জ্যাত্, এবং স্নিগ্ধরূক্ষযোরুপযোগং কুর্যাত্| তথা তং পুরুষং বমনাদিভির্বিশুদ্ধং, প্রকৃতিং যথোচিতাং স্বাং নযেত্| সর্বংসহঃ-অশেষক্ষমঃ, তথা স্থিরবলঃ, প্রকৃতিং প্রাপ্তঃ পুমান্ বেদ্যঃ| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং পঞ্চমে কল্পসিদ্ধিস্থানে বস্তিব্যাপত্সিদ্ধির্নাম পঞ্চমোঽধ্যাযঃ সমাপ্তঃ|| ৫||