6. madātyayādinidanādhyāyaḥ

Adhikarana adhyAyopakramaH · Śloka

রাজযক্ষ্মনিদানাদনন্তরং মদাত্যযনিদানারম্ভঃ| যতো যথা রাজযক্ষ্মা দোষত্রযজস্তথা মদাত্যযোঽপি| বক্ষ্যতি হি তত্র (শ্লো. ১৪) - "সর্বেঽপি সর্বৈর্জাযন্তে ব্যপদেশস্তু ভূযসা|" ইতি|

Adhikarana madAtyayAdinidAnAdhyAyaH (2) · Śloka 2

তস্মান্মদাত্যযনিদানমুচ্যত ইত্যাহ - - - - অথাতো মদাত্যযাদিনিদানং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| গদ্যসূত্রে||২||

স০-পূর্ববদ্ব্যাখ্যা|

Adhikarana madyasya guNAH (1) · Śloka 1

তীক্ষ্ণোষ্ণরূক্ষসূক্ষ্মাম্লং ব্যবায্যাশুকরং লঘু| বিকাষি বিশদং মদ্যমোজসোঽস্মাদ্বিপর্যযঃ||১||

স০-তীক্ষ্ণোষ্ণাদিগুণং মদ্যম্| অস্মাত্-মদ্যাত্, ওজসো বিপর্যযো-বৈপরীত্যম্, যথা-মন্দশীতস্নিগ্ধসান্দ্রমধুরস্থিরচিরকৃদ্গুরুশ্লক্ষ্ণপিচ্ছিলত্বম্|

Adhikarana madyaguNa evotkarShato viShe~api (2) · Śloka 2

তীক্ষ্ণাদযো বিষেঽপ্যুক্তাশ্চিত্তোপপ্লাবিনো গুণাঃ| জীবিতান্তায জাযন্তে বিষে তূত্কর্ষবৃত্তিতঃ||২||

স০-এত এব তীক্ষ্ণাদযো দশ গুণা বিষেঽপ্যুক্তাঃ| চিত্তমুপপ্লাবিতুং শীলং যেষাং তে চিত্তোপপ্লাবিনঃ,-চিত্তবিভ্রমকারিণঃ| ন কেবলং মদ্য ইত্যপিশব্দার্থঃ| ননু, যদি ত এব তীক্ষ্ণাদযো গুণা বিষে, ত এব মদ্যে, তত্কথং বিষস্থা এব তীক্ষ্ণাদযো মারযন্তি ন মদ্যস্থাঃ ? ইত্যত্র যুক্তিমাহ-জীবিতান্তাযেত্যাদি| বিষস্থাস্তীক্ষ্ণাদযো যে গুণাস্তে মারণায সম্পদ্যতে, উত্কর্ষবৃত্তিতঃ-উত্কর্ষবর্তনাত্|

Adhikarana prathamamadasya lakShaNam (3-4) · Śloka 4

কথং কৃত্বা মদ্যং চেতো বিকারং নযতি ? ইত্যাহ - - - - তীক্ষ্ণাদিভির্গুণৈর্মদ্যং মন্দাদীনোজসো গুণান্| দশভির্দশ সঙ্ক্ষোভ্য চেতো নযতি বিক্রিযাম্||৩|| আদ্যে মদে| |৪|

স০-তীক্ষ্ণাদিভির্দশভির্গুণৈর্মন্দাদীনোজসঃ সম্বন্ধিনো গুণান্ সঙ্ক্ষোভ্য-সমন্তাদ্দুষ্টতামাপাদ্য, চেতো বিক্রিযাং-বিকারং নযতি, আদ্যে মদে| ননু, তীক্ষ্ণাদিভির্মন্দাদীনিত্যেতাবদেবাস্তু, কিং দশভির্দশেত্যনেন? পাঠাদেব হি দশসঙ্খ্যাঽবগমিষ্যতে| অস্ত্যেতত্| কিন্তু সর্বৈরেব তীক্ষ্ণাদিভিঃ সর্বানপি মন্দাদীন্ সঙ্ক্ষোভ্য চেতো বিক্রিযাং মদ্যং নযতি, ন তু কিযদ্ভিরপি তীক্ষ্ণাদিভিঃ কিযত এব মন্দাদীন্, ইতি প্রতিপাদনায সঙ্খ্যাগ্রহণম্| উত্কর্ষতারতম্যতস্ত্বস্ত্যেব বিশেষঃ, তেন সর্বত্র মদেনৈব তুল্যঃ ক্ষোভ ইতি বেদ্যম্| আদ্যে চ মদে যথাস্বং প্রবোধজনকে পুমান্ স্থিতো মদ্যপানাত্তাদাত্বিকং সুখং সমধিগচ্ছতীত্যনুক্তমপি সম্ভাব্যতে| তথা চ মুনিঃ (চ. চি. অ. ২৪|৬৪)- "পঞ্চস্বর্থেষু কান্তেষু যা রতিঃ প্রথমে মদে| যূনাং বা স্থবিরাণাং বা তস্যা নাস্ত্যুপমা ভুবি||" ইতি|

Adhikarana dvitIyamadasya lakShaNam (4) · Śloka 4

দ্বিতীযে তু প্রমাদাযতনে স্থিতঃ| দুর্বিকল্পহতো মূঢঃ সুখমিত্যধিমুচ্যতে||৪||

স০-অনন্তরং দ্বিতীযে তু মদে স্থিতঃ-প্রাপ্তঃ, স্বার্থৈর্দুষ্টৈস্তৈস্তৈর্বিকল্পৈর্হতঃ-পুরুষার্থাদ্বিনষ্টঃ, অত এব মূঢঃ-কার্যাকার্যানভিজ্ঞঃ, সুখমিত্যধিমুচ্যতে-সুখমিতি জ্ঞানেন প্রথমমদোত্পন্নেন তদানীমধিমুচ্যতে-অধিকং কৃত্বা তেন সুখেন পরিত্যজ্যতে| তাদাত্বিকমাদ্যং সুখং নানুভবতি, ওজসো বিহতত্বাত্| অন্যে ত্বাহুঃ,-অবমুচ্যতে-নিশ্চিনোতি সুখমেতদিত্যভিনিবিশতে| কিম্ভূতে মদে স্থিতঃ ? প্রমাদাযতনে, প্রমাদানাং-সাহসানামিহামুত্র চাশুভহেতূনাং, [ আযতনে- ] স্থানে|

Adhikarana dvitIyatRutIyasandhisthitasya lakShaNam (5) · Śloka 5

মধ্যমোত্তমযোঃ সন্ধিং প্রাপ্য রাজসতামসঃ| নিরঙ্কুশ ইব ব্যালো ন কিঞ্চিন্নাচরেজ্জডঃ||৫||

স০-মধ্যমোত্তমযোঃ-দ্বিতীযতৃতীযযোঃ, সন্ধিং প্রাপ্য-অন্তরং লব্ধ্বা, পুরুষো রাজসতামসো ন কিঞ্চিদশুভং নাচরেত্-অপি তু সর্বমশুভমাচরেত্| রাজসসহিতস্তামসো রাজসতামসঃ| শাকপার্থিবাদিত্বাত্ মধ্যম (উত্তর) পদলোপী সমাসঃ, রাজসো বা তামসো বেত্যর্থঃ| রাজসতামসগ্রহণাত্ সাত্বিকঃ পুরুষো নেদৃশীমবস্থাং প্রাপ্নোতীতি গমযতি| নিরঙ্কুশ ইব ব্যালঃ| যথা,-ব্যালো-দুষ্টহস্তী, জডো-বধিরঃ, তথা নিরঙ্কুশো, ন কিঞ্চিদশুভং নাচরেত্, উন্মার্গপ্রবৃত্তত্বাত্| তন্ত্রান্তরে চৈবমুক্তম্-"সাত্বিকে শৌচদাক্ষিণ্যহর্ষমণ্ডনলালসঃ| গীতাধ্যযনসৌভাগ্যসুরতোত্সাহকৃন্মদঃ|| রাজসে দুঃখশীলত্বমাত্মত্যাগং সসাহসম্| কলহং সানুবন্ধং চ করোতি পুরুষে মদঃ|| অশৌচনিদ্রামাত্সর্যাগম্যাগমনলোলতাঃ| অসত্যভাষণং চাপি কুর্যাদ্বৈ তামসে মদঃ||" ইতি| ব্যালগ্রহণাদ্যঃ শুদ্ধস্বভাবো হস্তী স সৃণিরহিতোঽপি কদাচিদ্ধস্ত্যারোহশব্দশ্রবণাত্ কালোচিতং সঙ্কেতমুপলভ্য যুক্তমাচরত্যেবেতি, অতো ব্যালো নিরঙ্কুশ ইতি দ্বিতযমুপন্যস্তম্| তেজসঃ কিঞ্চিচ্ছেষত্বাত্ নিন্দ্যামিমামবস্থাং প্রাপ্তঃ|

Adhikarana tRutIyamadasya lakShaNam (6-7) · Śloka 7

অত এবাহ - - - - ইযং ভূমিরবদ্যানাং দৌঃশীল্যস্যেদমাস্পদম্| একোঽযং বহুমার্গাযা দুর্গতের্দেশিকঃ পরম্||৬|| নিশ্চেষ্টঃ শববচ্ছেতে তৃতীযে তু মদে স্থিতঃ| মরণাদপি পাপাত্মা গতঃ পাপতরাং দশাম্||৭||

স০-অবদ্যানাং-নিন্দ্যানাং, ইযং-মদাবস্থা, ভূমিঃ-আকরঃ| তথা, দৌঃশীল্যস্য-অসমাহিতত্বস্য, ইদং-মদাবস্থান্তরং, আস্পদং-আবসথঃ| একোঽযং-মদবিশেষো, বহুমার্গাযাঃ-অনেকমুখাযা দুর্গতেঃ, পরং কৃত্বা দেশিকঃ-আচার্যঃ| স০-তৃতীযে-উত্তমে মদে, স্থিতো নরস্তেজসো বিহতত্বাত্ নিশ্চেষ্টঃ-চেষ্টযা কাযবাঙ্মনোলক্ষণযা রহিতঃ, অত এব শববচ্ছেতে-মৃতানুকল্পঃ স্বপিতি| এবং চ সত্যসৌ পাপাত্মা মরণাদপি পাপতরামবস্থাং প্রাপ্তঃ| যতো মৃতো মরণাত্সমনন্তরমেব শরীরান্তরং প্রাপ্য সুখাদীন্ বিন্দতে| তৃতীযাং মদাবস্থাং প্রাপ্তস্তু পুরুষোঽপরশরীরাপ্রাপ্তের্ন কথাঞ্চিত্ সুখাদ্যনুভবতীতি মরণাদপ্যস্য নিকৃষ্টত্বম্|

Adhikarana madyashIlananiShedhaH (8) · Śloka 8

ধর্মাধর্মং সুখং দুঃখমর্থানর্থং হিতাহিতম্| যদাসক্তো ন জানাতি কথং তচ্ছীলযেদ্বুধঃ||৮||

স০-যস্মিন্নাসক্তো-যদাসক্তো, ধর্মাদীন্ ন জানাতি| তত্-তথাবিধং মদ্যং, বুধো-মতিমান্, কথং শীলযেত্-অভ্যসেত্| তত্র ধর্মো-দানাধ্যযনদেবগুরুপূজাদিকঃ| অধর্মো-হিংসাদিঃ| সুখং-আহ্লাদকোঽনুভবঃ| দুঃখং-উপতাপঃ| অর্থঃ-উভযলোকহিতম্| অনর্থঃ-অহিতম্| শীলযেদিত্যনেন তত্রাসক্তিং নিষেধতি, ন তু মদ্যপানমপি|

Adhikarana madye~atipIte mohAdayaH (9-10) · Śloka 10

মদ্যে মোহো ভযং শোকঃ ক্রোধো মৃত্যুশ্চ সংশ্রিতাঃ| সোন্মাদমদমূর্চ্ছাযাঃ সাপস্মারাপতানকাঃ||৯|| যত্রৈকঃ স্মৃতিবিভ্রংশস্তত্র সর্বমসাধু যত্| |১০|

স০-মদ্যেঽতিপীতে মোহাদযঃ সংশ্রিতাঃ-আশ্রিতাঃ, মদ্যাতিপানাদনন্তরং মোহাদীনাং সদ্ভাবাত্| অথবা কিমত্র বহুনাঽভিহিতেন| যত্র-যস্মিন্ মদ্যে, স্মৃতের্বিভ্রংশো-লোপঃ, তত্র যত্কিঞ্চিদ্বিদ্যতে তত্সর্বমসাধু-অশোভনম্| যত্রৌজসৌ ন বিহতির্হৃত্প্রবোধশ্চ স প্রথমো মদঃ| যত্রাল্পা বিহতিরোজসঃ স মধ্যমঃ| যত্র সর্বস্যৌজসৌ বিহতিঃ স উত্তমঃ| তথা চ মুনিঃ (চ. চি. অ. ২৪|৩৫) - "ওজস্যবিহতে পূর্বো হৃদি চ প্রতিবোধিতে| মধ্যমো বিহতেঽল্পে তু বিহতে তূত্তমো মদঃ||" ইতি|

Adhikarana ayuktiyuktamadyasya trivargAdinAshakatvam (10-11) · Śloka 11

| অযুক্তিযুক্তমন্নং হি ব্যাধযে মরণায বা||১০|| মদ্যং ত্রিবর্গধীধৈর্যলজ্জাদেরপি নাশনম্| |১১|

স০-যস্মাদযুক্ত্যা যোজিতমন্নমপি-যত্প্রাণকরং তদপি, কর্মবশাদ্ব্যাধযে মরণায বা সম্পদ্যতে| মদ্যং ত্বযুক্তিযোজিতং ত্রিবর্গাদেরপি নাশনম্| যুক্তিপীতং পুনস্তদেব ত্রিবর্গাদীনাং সাধনমিত্যপিশব্দেন দ্যোতযতি|

Adhikarana madyapAnasya viShayaH (11-12) · Śloka 12

তামেব যুক্তিং বক্ষ্যমাণেন গ্রন্থেন প্রতিপাদযন্নাহ - - - - | নাতিমাদ্যন্তি বলিনঃ কৃতাহারা মহাশনাঃ||১১|| স্নিগ্ধাঃ সত্ত্ববযোযুক্তা মদ্যনিত্যাস্তদন্বযাঃ| মেদঃকফাধিকা মন্দবাতপিত্তা দৃঢাগ্নযঃ||১২||

স০-যত এবংবিধা নরা নাতিমাদ্যন্তি, ততো বলবদ্ভিঃ পুরুষৈঃ কৃতাহারৈর্মহাশনৈঃ স্নিগ্ধৈঃ সত্বযুক্তৈর্বযোযুক্তর্মদ্যোচিতৈস্তদন্বযৈঃ-মদ্যপকুলপ্রসূতৈঃ, মেদোধিকৈঃ কফাধিকৈঃ স্বল্পবাতপিত্তৈর্দৃঢাগ্নিভিঃ-অপকারসহিষ্ণ্বগ্নিভিঃ, মদ্যং পেযম্, নাতো বিপর্যস্তৈঃ, ইত্যন্যতন্ত্রকারকথিতাযা যুক্তেরত্রৈবান্তর্ভাবোঽনেন তন্ত্রকৃতা কৃতঃ|

Adhikarana madyapAnasyAviShayaH (13-17) · Śloka 17

বিপর্যযেঽতিমাদ্যন্তি বিশ্রব্ধাঃ কুপিতাশ্চ যে| মদ্যেন চাম্লরূক্ষেণ সাজীর্ণে বহুনাঽতি চ||১৩|| বাতাত্পিত্তাত্কফাত্সর্বৈশ্চত্বারঃ স্যুর্মদাত্যযাঃ| সর্বেঽপি সর্বৈর্জাযন্তে ব্যপদেশস্তু ভূযসা||১৪|| সামান্যং লক্ষণং তেষাং প্রমোহো হৃদযব্যথা| বিড্ভেদঃ প্রততং তৃষ্ণা সৌম্যাগ্নেযো জ্বরোঽরুচিঃ||১৫|| শিরঃপার্শ্বাস্থিরুক্কম্পো মর্মভেদস্ত্রিকগ্রহঃ| উরোবিবন্ধস্তিমিরং কাসঃ শ্বাসঃ প্রজাগরঃ||১৬|| স্বেদোঽতিমাত্রং বিষ্টম্ভঃ শ্বযথুশ্চিত্তবিভ্রমঃ| প্রলাপশ্চর্দিরুত্ক্লেশো ভ্রমো দুঃস্বপ্নদর্শনম্||১৭||

স০-যথানির্দিষ্টাদ্বৈপরিত্যেন, যথা-অবলিনো যাবদদৃঢাগ্নয ইতি| তথা, বিশ্রব্ধাঃ-অমৃতমিবেদং স্পৃহণীযং সুরেভ্যঃ পেপীযতেঽস্মাভিরিতি তদ্গতমনসো বিশ্বস্তাঃ, তথা কুপিতাঃ-ক্রুদ্ধাঃ, যে তেঽতিমাদ্যন্তি| মদ্যেনেত্যাদি| অম্লরূক্ষেণ চ মদ্যেন পীতেন সর্ব এবাতিমাদ্যন্তি| অত্র চাত্যম্লেনেতি বেদ্যম্, মদ্যস্য সর্বস্যৈবাম্লপ্রাযত্বাত্| রূক্ষেণ-ন ত্বীষত্স্নিগ্ধেন| তথা, সাজীর্ণে-সশব্দ ঈষদর্থে ঈষদজীর্ণে, তস্মিন্নেব মদ্যে পীতেঽতিমাদ্যন্তি| তথা, অতিবহুনা পীতেন মদ্যেনাতিমাদ্যন্তি| স০-বাতাদিভিঃ পৃথক্ঽঽস্থিতৈর্দোষৈঃ সন্নিপাতেন চেতি চত্বারো মদাত্যযা বস্তুস্বভাবাজ্জাযন্তে, নোনাধিকাঃ| সর্বেঽপি মদাত্যযাঃ সর্বৈরপি দোষৈর্জাযন্তে| ভূযসা-বাহুল্যেন তু, ব্যপদেশঃ-সংজ্ঞা ভবতি, অযং বাতমদাত্যযো যাবত্ সন্নিপাতমদাত্যযোঽযমিতি| স০-তেষাং-মদাত্যযানাং, সামান্যং লক্ষণং-অবিভাগেন [চিহ্নম্], প্রমোহাদিদুঃস্বপ্নদর্শনপর্যন্তম্|

Adhikarana vAtajasya lakShaNam (18) · Śloka 18

বিশেষাজ্জাগরশ্বাসকম্পমূর্ধরুজোঽনিলাত্| স্বপ্নে ভ্রমত্যুত্পততি প্রেতৈশ্চ সহ ভাষতে||১৮||

স০-বাতেন মদাত্যযে জাগরাদিকং প্রেতৈঃ সহ ভাষত ইতি পর্যন্তং স্যাত্|

Adhikarana pittajasya lakShaNam (19) · Śloka 19

পিত্তাদ্দাহজ্বরস্বেদমোহাতীসারতৃড্ভ্রমাঃ| দেহো হরিতহারিদ্রো রক্তনেত্রকপোলতা||১৯||

স০-পিত্তেন মদাত্যযে দাহাদিকং রক্তনেত্রকপোলতাপর্যন্তং স্যাত্|

Adhikarana kaphajasya lakShaNam (20) · Śloka 20

শ্লেষ্মণা ছর্দিহৃল্লাসনিদ্রোদর্দাঙ্গগৌরবম্| ||২০||

স০-শ্লেষ্মণা মদাত্যযে ছর্দ্যাদিকমঙ্গগৌরবপর্যন্তং স্যাত্|

Adhikarana tridoShajasya lakShaNam (1) · Śloka 1

| সর্বজে সর্বলিঙ্গত্বম্||১||

স০-সর্বজে মদাত্যযে সর্বলিঙ্গত্বং ভবতি|

Adhikarana dhvaMsakavikShayayornidAnam (20-21) · Śloka 21

সম্প্রতি ধ্বংসকবিক্ষযৌ লক্ষযতি - - - - | মুক্ত্বা মদ্যং পিবেত্তু যঃ||২০|| সহসাঽনুচিতং বাঽন্যত্তস্য ধ্বংসকবিক্ষযৌ| ভবেতাং মারুতাত্কষ্টৌ দুর্বলস্য বিশেষতঃ||২১||

স০-উচিতং মদ্যং মুক্ত্বা-চিরং কালং পরিত্যজ্য, যঃ পুরুষস্তদেব সহসা-অতিমাত্রযা পিবেত্, অথবাঽন্যদ্যন্মদ্যং যদনুচিতং-অসাত্ম্যং মদ্যং, তত্সহসা-অতিমাত্রং পিবেত্, তস্য-পুরুষস্য, ধ্বংসকবিক্ষযৌ ব্যাধী মারুতাদ্ভবেতাং-জাযেযাতাম্| কিম্ভূতৌ ? কষ্টৌ,-কৃচ্ছ্রসাধ্যৌ| দুর্বলস্য পুনঃ পুংসস্তৌ বিশেষেণ ভবেতাম্|

Adhikarana dhvaMsakasya lakShaNam (22) · Śloka 22

ধ্বংসকে শ্লেষ্মনিষ্ঠীবঃ কণ্ঠশোষোঽতিনিদ্রতা| শব্দাসহত্বং তন্দ্রা চ|২২|

স০-ধ্বংসকে শ্লেষ্মনিষ্ঠীবাদযঃ স্যুঃ|

Adhikarana vikShayasya lakShaNam (22-23) · Śloka 23

| বিক্ষযেঽঙ্গশিরোতিরুক্||২২|| হৃত্কণ্ঠরোগঃ সম্মোহঃ কাসস্তৃষ্ণা বমির্জ্বরঃ| |২৩|

স০-বিক্ষযে অঙ্গশিরোতিরুগাদ্যাঃ স্যুঃ|

Adhikarana nivRuttamadyasya phalam (23-1) · Śloka 1

| নিবৃত্তো যস্তু মদ্যেভ্যো জিতাত্মা বুদ্ধিপূর্বকৃত্||২৩|| বিকারৈঃ স্পৃশ্যতে জাতু ন স শারীরমানসৈঃ| |২৪| ইতি মদাত্যযনিদানম্||১||

স০-শারীরমানসানাং রোগাণাং মদ্যং কারণমিতি কৃত্বা যঃ পুমান্ জিতাত্মা মদ্যেভ্যো নিবৃত্তো বুদ্ধিপূর্বকৃত্-বিমৃশ্যকারী, স কদাচিচ্ছারীরৈর্মানসৈর্বা বিকারৈর্ন স্পৃশ্যতে-নাক্রম্যতে| ইতি মদাত্যযঃ|

Adhikarana madamUrcchAyasannyAsAnAM hetutrayamadhiShTAnatrayaM balottaratvaM ca (24-25) · Śloka 25

অথ মদ্যবচ্চেতোবিহতিকারণসামান্যান্মদাদীন্ লক্ষযতি - - - - | রজোমোহাহিতাহারপরস্য স্যুস্ত্রযো গদাঃ||২৪|| রসাসৃক্ঽঽচেতনাবাহিস্রোতোরোধসমুদ্ভবাঃ| মদমূর্চ্ছাযসন্ন্যাসা যথোত্তরবলোত্তরাঃ||২৫||

স০-রজঃপ্রধানস্য মোহপ্রধানস্য তথাঽপথ্যাহারপরস্য ত্রযো গদাঃ স্যুঃ-জাযেরন্| কিম্ভূতাঃ ? রসশ্চাসৃক্ চ চেতনা চ, তা বহন্তি যানি স্রোতাংসি, তেষাং রোধঃ সমুদ্ভবো-হেতুঃ, যেষাং তে রসাসৃক্ঽঽচেতনাবাহিস্রোতোরোধসমুদ্ভবাঃ| মদমূর্ছাযসন্ন্যাসাঃ-এতত্সংজ্ঞাঃ| তে চ যথোত্তরবলোত্তরাঃ| যো য উত্তরো যথোত্তরম্, বলস্যোত্তরং-উত্কর্ষঃ, যথোত্তরং বলোত্তরং যেষাং ত এবম্| মদান্মূর্ছাযো বলবান্ তস্মাদপি সন্ন্যাস ইত্যর্থঃ|

Adhikarana madaH saptavidhaH (26) · Śloka 26

অথ মদং লক্ষযতি - - - - অথ মদনিদানম্| মদোঽত্র দোষৈঃ সর্বৈশ্চ রক্তমদ্যবিষৈরপি| |২৬|

স০-অত্র-এষু মদাদিষু মধ্যে, মদঃ সপ্তধা,-পৃথগ্দোষৈঃ সন্নিপাতেন রক্তেন মদ্যেন বিষেণ চ|

Adhikarana vAtajasya lakShaNam (26-27) · Śloka 27

| সক্তানল্পদ্রুতাভাষশ্চলঃ স্খলিতচেষ্টিতঃ||২৬|| রূক্ষশ্যাবারুণতনুর্মদে বাতোদ্ভবে ভবেত্| |২৭|

স০-বাতোদ্ভবে মদে সতি পুমান্ সক্তানল্পদ্রুতাভাষণাদিলক্ষণো ভবেত্|

Adhikarana pittajasya lakShaNam (27) · Śloka 27

| পিত্তেন ক্রোধনো রক্তপীতাভঃ কলহপ্রিযঃ||২৭||

স০-পিত্তেন ক্রোধনাদিলক্ষণঃ|

Adhikarana kaphajasya lakShaNam (29) · Śloka 29

স্বল্পসম্বদ্ধবাক্পাণ্ডুঃ কফাদ্ধ্যানপরোঽলসঃ| ||২৯||

স০-কফাত্ স্বল্পসম্বদ্ধবাগাদিলক্ষণঃ|

Adhikarana sannipAtajasya lakShaNam (28) · Śloka 28

| সর্বাত্মা সন্নিপাতেন|২৮|

স০-সর্বাত্মা-সর্বদোষলক্ষণঃ, সন্নিপাতেন|

Adhikarana raktajasya lakShaNam (28-29) · Śloka 29

| রক্তাত্স্তব্ধাঙ্গদৃষ্টিতা||২৮|| পিত্তলিঙ্গং চ| |২৯|

স০-রক্তাত্-রক্তমদাত্, স্তব্ধদৃষ্টিতা তথা পিত্তমদলিঙ্গং চ স্যাত্|

Adhikarana madyajasya lakShaNam (29) · Śloka 29

মদ্যেন বিকৃতেহাস্বরাঙ্গতা| |২৯|

স০-মদ্যেন মদে বিকৃতা চেষ্টা তথা স্বরস্য বিকৃতত্বমঙ্গস্য চ|

Adhikarana viShajasya lakShaNam (29) · Śloka 29

| বিষে কম্পোঽতিনিদ্রা চ সর্বেভ্যোঽভ্যধিকস্তু সঃ||২৯||

স০-বিষে-বিষোত্থে মদে, কম্পোঽতিনিদ্রা চ স্যাত্| স চ-বিষমদঃ, সর্বেভ্যোঽধিকঃ|

Adhikarana raktajAdiShu doShAnubandhaH (30-2) · Śloka 2

লক্ষযেল্লক্ষণোত্কর্ষাদ্বাতাদীন্ শোণিতাদিষু| |৩০| ইতি মদনিদানম্||২||

স০-শোণিতাদ্যুত্থেষু মদেষু বাতাদীন্ লক্ষযেত্-জানীযাত্| কুতঃ ? লক্ষণোত্কর্ষাত্-স্বস্বলক্ষণোত্কর্ষেণ|

Adhikarana mUrchAyashcaturvidhaH, vAtajasya lakShaNam (30-31) · Śloka 31

অথ মূর্চ্ছাযং লক্ষযতি - - - - অথ মূর্চ্ছাযনিদানম্| | অরুণং কৃষ্ণনীলং বা খং পশ্যন্প্রবিশেত্তমঃ||৩০|| শীঘ্রং চ প্রতিবুধ্যেত হৃত্পীডা বেপথুর্ভ্রমঃ| কার্শ্যং শ্যাবারুণা ছাযা মূর্ছাযে মারুতাত্মকে||৩১||

স০-মারুতোদ্ভবে মূর্ছাযে অরুণাদ্যন্যতমবর্ণমাকাশং পশ্যন্ পুমাংস্তমঃ প্রবিশেত্-মূঢাবস্থাং প্রাপ্নোতি| শীঘ্রং চ প্রতিবুধ্যেত-সংজ্ঞাং লভেত্| হৃত্পীডাবেপথুভ্রমযুতস্তথা কার্শ্যাদি চ স্যাত্|

Adhikarana pittajasya lakShaNam (32-33) · Śloka 33

পিত্তেন রক্তং পীতং বা নভঃ পশ্যন্ বিশেত্তমঃ| বিবুধ্যেত চ সস্বেদো দাহতৃট্তাপপীডিতঃ||৩২|| ভিন্নবিণ্নীলপীতাভো রক্তপীতাকুলেক্ষণঃ| |৩৩|

স০-পিত্তেন মূর্ছাযে রক্তং পীতং বা নভঃ পশ্যংস্তমঃ পুমান্ বিশেত্-মূঢাবস্থাং প্রাপ্নুযাত্| সহ স্বদেন বিবুধ্যেত-সংজ্ঞাং লভতে| তথা দাহাদিপীডিতস্তথা ভিন্নবিডাদিকঃ|

Adhikarana kaphajasya lakShaNam (33-34) · Śloka 34

| কফেন মেঘসংকাশং পশ্যন্নাকাশমাবিশেত্||৩৩|| তমশ্চিরাচ্চ বুধ্যেত সহৃল্লাসঃ প্রসেকবান্| গুরুভিঃ স্তিমিতৈরঙ্গৈরার্দ্রচর্মাবনদ্ধবত্||৩৪||

স০-কফেন মূর্চ্ছাযে মেঘাভমাকাশং পশ্যংস্তম আবিশেত্, চিরেণ চ বুধ্যেত-সংজ্ঞা লভতে| হৃল্লাসাদিমান্, তথাঽঽদ্রেণ চর্মণাঽবনদ্ধো-বেষ্টিত ইব|

Adhikarana tridoShajasya lakShaNam (35-36) · Śloka 36

সর্বাকৃতিস্ত্রিভির্দোষৈরপস্মার ইবাপরঃ| পাতযত্যাশু নিশ্চেষ্টং বিনা বীভত্সচেষ্টিতৈঃ||৩৫|| ইতি মূর্চ্ছাযনিদানম্|৩৬|

স০-ত্রিভির্দোষৈর্যো মূর্চ্ছাযঃ সর্বাকারঃ সোঽপরোঽপস্মার ইবাশু-শীঘ্রমেব, পুরুষং নিশ্চেষ্টং পাতযতি| বিনা বীভত্সচেষ্টিতৈঃ-অপস্মারোত্থানি নিন্দ্যানি চেষ্টিতানি বর্জযিত্বা, অন্যত্সর্বং সমানম্|

Adhikarana madamUrchAyayorauShadhaM vinA nivRuttiH,sanyAsasyauShadhaikanivartyatvam (36) · Śloka 36

ইদানীং সন্ন্যাসং লক্ষযিতুমাহ - - - - অথ সন্ন্যাসনিদানম্| দোষেষু মদমূর্চ্ছাযাঃ কৃতবেগেষু দেহিনাম্| স্বযমেবোপশাম্যন্তি, সন্ন্যাসো নৌষধৈর্বিনা||৩৬||

স০-মদাশ্চ মূর্চ্ছাযাশ্চ মদমূর্চ্ছাযাঃ, কৃতবেগেষু দোষেষু সত্সু স্বযমেব-ঔষধং বিনাঽপি, শাম্যন্তি| সন্ন্যাসঃ পুনরৌষধৈর্বিনা ন শান্তিমেতি|

Adhikarana saMnyAsasya saMprAptiH saMnyAsasya lakShaNam (37-38) · Śloka 38

বাগ্দেহমনসাং চেষ্টামাক্ষিপ্যাতিবলা মলাঃ| সন্ন্যাসং সন্নিপতিতাঃ প্রাণাযতনসংশ্রযাঃ||৩৭|| কুর্বন্তি, তেন পুরুষঃ কাষ্ঠীভূতো মৃতোপমঃ| ম্রিযেত শীঘ্রং শীঘ্রং চেচ্চিকিত্সা ন প্রযুজ্যতে||৩৮||

স০-বাক্ চ দেহশ্চ মনশ্চ, তেষাং চেষ্টাং-যথাস্বলক্ষণাং, আক্ষিপ্য মলাঃ-বাতপিত্তকফাঃ, সন্নিপতিতাঃ সন্তঃ-ত্রয এককার্যোদ্যতাঃ, সন্ন্যাসং কুর্বন্তি| কিম্ভূতাঃ ? অতিবলাস্তথা প্রাণাযতনসংশ্রযাঃ,-বিশেষেণ হৃদযাশ্রযাঃ| তেন-সন্ন্যাসেন, পুরুষঃ কাষ্ঠীভূতঃ-স্থাণুকুড্যকল্পঃ, তথা মৃতোপমঃ-তত্সদৃশো ভূত্বা, অনন্তরং শীঘ্রং ম্রিযেত| যদি শীঘ্রং চিকিত্সা ন প্রযুজ্যতে| ম্রিযেত ইতি সম্ভাবনাযাং লিঙ্|

Adhikarana saMnyAsastvarayA cikitsyaH (39-3) · Śloka 3

শীঘ্রং চিকিত্সনাজ্জীবেত্, ইত্যত্রৈবোদাহরণার্থমাহ - - - - অগাধে গ্রাহবহুলে সলিলৌঘ ইবাতটে| সন্ন্যাসে বিনিমজ্জন্তং নরমাশু নিবর্তযেত্||৩৯|| ইতি সন্ন্যাসনিদানম্||৩||

স০-অগাধে-অতলস্পর্শে, সলিলৌঘে, তথা গ্রাহবহুলে-মকরাদিপ্রাণহরপ্রাণিভূযসি, তথাঽতটে-অরোধসি| তথা তস্মিন্নিমজ্জন্তং নরমাশু-শীঘ্রং, নিবর্তযেত্-তস্মাদুদ্ধরেত্, এবং সন্ন্যাসেঽপি নিমজ্জন্তং নরমাশু নিবর্তযেত্| অনেনোদাহরণেন মদা(হা)ত্যযত্বমস্য ব্যাধেঃ প্রদর্শযন্ স্বল্পকালহাপনমপ্যত্র ব্যাধৌ ন কার্যমিতি দ্যোতযতি|

Adhikarana yuktiviyuktasya madyapAnasya phalam (40) · Śloka 40

ইদানীং মদাত্যযনিদানত্বান্মদ্যস্য মদ্যেনৈবোপসংহারং কুর্বন্নাহ - - - - মদমানরোষতোষপ্রভৃতিভিররিভির্নিজৈঃ পরিষ্বঙ্গঃ| যুক্তাযুক্তং চ সমং যুক্তিবিযুক্তেন মদ্যেন||৪০||

স০-যুক্তিবিযুক্তেন মদ্যেন মদাদিভির্নিজৈঃ-সহজাতৈঃ, [অরিভিঃ-] শত্রুভির্দৃষ্টাদৃষ্টবিনাশকারিভিঃ, পরিষ্বঙ্গঃ-অতিসংশ্লেষো, ভবতি| ন কেবলং মদ্যেন মদাদ্যতিসঙ্গঃ, যাবদ্যুক্তাযুক্তং সমং-তুল্যং, সম্পদ্যতে| যুক্তমনুষ্ঠেযম্, অযুক্তমননুষ্ঠেযম্, তদুভযং সমং জাযতে, কার্যাকার্যং ন জানাতীত্যর্থঃ| যতশ্চৈবং ততো মদ্যপানে যুক্তের্গরীযস্ত্বম্| যুক্তিশ্চ প্রাগেব দর্শিতা| "আর্যাদ্বিতীযদলভবলক্ষ্ম প্রতিনিযতমবগম্য| উভযত্রাপ্যুপগীতিং বদন্তি যত্যংশকৈর্গদিতৈঃ||"

Adhikarana yuktiyuktasya madyapAnasya Palam (6) · Śloka 6

পুনরপি যুক্তিং প্রদর্শযন্নাহ - - - - বলকালদেশসাত্ম্যপ্রকৃতিসহাযামযবযাংসি| প্রবিভজ্য তদনুরূপং যদি পিবতি ততঃ পিবত্যমৃতম্||৪১|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং তৃতীযে নিদানস্থানে মদাত্যযাদিনিদানং নাম ষষ্ঠোঽধ্যাযঃ||৬||

স০-বলকালাদীন্ প্রবিভজ্য-বুদ্ধ্যা বিমৃশ্য, তদনুরূপং-তদ্যোগ্যং, যদি পিবতি ততোঽমৃতং পিবতি| মদ্যব্যাজেনামৃতমাস্বাদযতীত্যর্থঃ| আর্যা| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং তৃতীযে নিদানস্থানে মদাত্যযাদিনিদানং নাম ষষ্টোঽধ্যাযঃ সমাপ্তঃ|| ৬||