29. śastrakarmavidhiradhyāyaḥ

Adhikarana adhyAyopakramaH · Śloka

অস্মাদনন্তরং শস্ত্রকর্মবিধ্যধ্যাযঃ প্রস্তূযতে| যতোঽনন্তরাতীতেঽধ্যাযে (শ্লো. ২৫)-"শস্ত্রেণ বা বিশস্যাদৌ" ইত্যুক্তম্| অতস্তস্যৈব শস্ত্রকর্মণো বিধানং বক্তুং যুক্তমিত্যাহ-

Adhikarana shastrakarmavidhiradhyAyaH (2) · Śloka 2

অথাতঃ শস্ত্রকর্মবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে|২|

স০-শস্ত্রস্য কর্ম শস্ত্রকর্ম,- শস্ত্রাবচারণক্রিযা, তস্য বিধিঃ-ইতিকর্তব্যতা, শস্ত্রকর্মবিধিঃ, তম্| শেষং পূর্ববত্| ননু, যদ্যযং শস্ত্রকর্মবিধিঃ, ততঃ শস্ত্রকর্মগ্রন্থ এবাদৌ নির্দেষ্টুং যুক্তঃ, (শ্লো. ১৪)- "প্রাক্ শস্ত্রকর্মণশ্চেষ্টং ভোজযেদন্নমাতুরম্|" ইত্যাদি| ন তু "ব্রণঃ সঞ্জাযতে প্রাযঃ" ইত্যাদি| অত্রোচ্যতে| শস্ত্রকর্মবিধেঃ পূর্বং বিষযো নির্দিষ্টুং যুক্তঃ| যতঃ শস্ত্রকর্মবিধেরুপাযোঽযম্, ইত্যস্যৈব পূর্বমুপন্যাসো যুক্ত ইত্যাহ-

Adhikarana shastrakarmaviShayasya vraNasyotpattiH vraNasyotpattipratibandhaH (1-2) · Śloka 2

ব্রণঃ সঞ্জাযতে প্রাযঃ পাকাচ্ছ্বথুপূর্বকাত্| তমেবোপচরেত্তস্মাদ্রক্ষন্ পাকং প্রযত্নতঃ||১|| সুশীতলেপসেকাস্রমোক্ষসংশোধনাদিভিঃ| |২|

স০-প্রাযো ব্রণঃ পাকাত্ সঞ্জাযতে| কিম্ভূতাত্ ? শ্বযথুঃ পূর্বো যস্য পাকস্য স শ্বযথুপূর্বকঃ, তস্মাত্| শ্বযথুপাকমন্তরেণাপি শস্ত্রাদ্যভিঘাতাত্ ব্রণো জাযত ইতি প্রাযোগ্রহণম্| যস্মাচ্ছ্বযাথুপূর্বকাত্ পাকাত্ ব্রণঃ সঞ্জাযতে, অতস্তমেব-শ্বযথুং, উপচরেত্-উপক্রমেত্| কিং কুর্বন্ ? পাকং প্রযত্নেন রক্ষন্| কথম্ ? সুশীতলেপসেকাদিভিঃ| সুশীতাভ্যাং-স্পর্শতো বীর্যতশ্চ, লেপসেকাভ্যাম্| তথা, রক্তমোক্ষণেন| তথা, সংশোধনেন-বমনেন বিরেকেণ চ| আদিগ্রহণাত্ কষাযপানঘৃতপানাদীনাং গ্রহণম্| তস্য চ শোফস্যামপচ্যমানপক্বাখ্যাতিস্তিস্রোঽবস্থা ভবন্তীত্যাহ-

Adhikarana apakvasya shvayathorlakShaNam (2) · Śloka 2

| শোফোঽল্পোঽল্পোষ্মরুক্সামঃসবর্ণঃ কঠিনঃ স্থিরঃ||২||

স০-আমো যঃ শোফঃ সঃ প্রমাণতোঽল্পঃ| তথা, অল্পোষ্মা| তথা, অল্পরুক্-অল্পশূলঃ| তথা, সবর্ণঃ-ত্বক্সমানবর্ণঃ| তথা, কঠিনো-ন মৃদুঃ, পক্ববত্| তথা, স্থিরো-ন পক্ববচ্চলঃ| স আমঃ সাম ইতি "সোঽচি লোপে চেত্পাদপূরণম্" ইতি সুলোপঃ|

Adhikarana pacyamAnasya lakShaNam (3-4) · Śloka 4

পচ্যমানো বিবর্ণস্তু রাগী বস্তিরিবাততঃ| স্ফুটতীব সনিস্তোদঃ সাঙ্গমর্দবিজৃম্ভিকঃ||৩|| সংরম্ভারুচিদাহোষাতৃড্জ্বরানিদ্রতান্বিতঃ| স্ত্যানং বিষ্যন্দযত্যাজ্যং ব্রণবত্স্পর্শনাসহঃ||৪||

স০-স শোফঃ পচ্যমানো বিবর্ণো-ন ত্বক্সমানবর্ণঃ| তথা রাগী-লোহিতবর্ণঃ| তথা, বস্তিরিবাততঃ-স্তব্ধো বাতপূর্ণদৃতিবত্| ছাগাদীনাং তু মূত্রাধারো বস্তিরিত্যুচ্যতে| তথা, স্ফুটতীব| { তথা, } সনিস্তোদঃ-সহ নিস্তোদেন বর্তত ইতি সনিস্তোদঃ| নিযতপ্রবন্ধপ্রবৃত্তা রূক্-নিস্তোদো, বিচ্ছিন্না তু শূলমিত্যুচ্যতে| সাঙ্গেত্যাদি| অঙ্গানাং মর্দঃ- ক্ষোভঃ, সহাঙ্গমর্দবিজৃম্ভিকাযাং বর্তত ইতি সাঙ্গমর্দবিজৃম্ভিকঃ| তথা, সংরম্ভাদিভির্যুতঃ| অন্বিতশব্দেন প্রত্যেকং সংরম্ভাদীনাং সম্বন্ধঃ| সংরম্ভো-বাগ্বিষযাতীতানাং স্বসংবেদ্যানামনেকরূপাণাং পীডনবিঘট্টনচ্ছেদনভেদনদংশনাদীনাং রূজাং প্রাদুর্ভাবঃ| সর্বাঙ্গীণস্তীব্রো-দাহঃ| অরতিমান্ দাহ উষা উচ্যতে| তথা, স পচ্যমানো ঘৃতং স্ত্যানমুপযুক্তং বিলীনযতি| তথা, স্পর্শনং ন সহতে ব্রণবত্|

Adhikarana pakvasyalakShaNam (5-6) · Śloka 6

পক্বেঽল্পবেগতা গ্লানিঃ পাণ্ডুতা বলিসম্ভবঃ| নামোঽন্তেষূন্নতির্মধ্যে কণ্ডূশোফাদিমার্দবম্||৫|| স্পৃষ্টে পূযস্য সঞ্চারো ভবেদ্বস্তাবিবাম্ভসঃ| |৬|

স০-পক্বে সতি, অল্পবেগতা ভবতি, ন তু সংরম্ভঃ| তথা, গ্লানিঃ-ম্লানত্বম্| তথা, পাণ্ডুত্বং বলীনাং চোদ্ভবঃ| তথা, অন্তেষু-পর্যন্তেষু, নামো-নিম্নত্বম্, মধ্য উন্নতিঃ| নামোঽন্তেষ্বিত্যুক্ত্যৈব মধ্য উন্নতিত্বং লব্ধমেব, উন্নতিগ্রহণং ত্বতিশযার্থম্, তেনোত্তুণ্ডিত্বং গম্যতে| তথা, কণ্ড্বাদিমৃদুত্বং স্যাত্| তথা, স্পৃষ্টে তস্মিন্ সতি পূযস্য সঞ্চারো ভবতি, বস্তেরন্তঃস্থিতস্য যথাঽম্ভসঃ সঞ্চারঃ|

Adhikarana pAkasya raktadoShatrayakAryatvam (6-7) · Śloka 7

| শূলং নর্তেঽনিলাদ্দাহঃ পিত্তাচ্ছোফঃ কফোদযাত্||৬|| রোগো রক্তাচ্চ পাকঃ স্যাদতো দোষৈঃ সশোণিতৈঃ| |৭|

স০-বাতং বিনা শূলং ন ভবতি| পিত্তমন্তরেণ দাহো ন স্যাত্| কফোদযাদ্বিনা শোফো ন স্যাত্| শোফঃ কফাদিতি বক্তব্য উদযগ্রহণং বিশেষদ্যোতনার্থম্| রক্তাদৃতে-রক্তং বিনা, রাগস্য লৌহিত্যস্য সম্ভবো ন| তেন কফাধিকৈঃ সর্বৈর্দোষৈঃ শোণিতসহিতৈঃ শ্বযথুপাকঃ স্যাদিতি গম্যতে|

Adhikarana atipakvasya lakShaNam (7-8) · Śloka 8

| পাকেঽতিবৃত্তে সুষিরস্তনুত্বগ্দোষভক্ষিতঃ||৭|| বলীভিরাচিতঃ শ্যাবঃ শীর্যমাণতনূরুহঃ| |৮|

স০-পাকে চাতিবৃত্তে-অতিক্রান্তে, সুষিরোঽন্তস্থঃ শোফদেশঃ সম্পদ্যতে| তথা, তনুঃ-তন্বী, ত্বক্ যস্মিন্ স তনুত্বক্| তথা, দোষভক্ষিতঃ-পূযবান্, দোষশব্দেনেহ পূয উচ্যতে, তেন ভক্ষিতত্বাত্ সুষিরত্বং তনুত্বক্ত্বং চাস্য| তথা, বলীভিরাচিতো-ব্যাপ্তঃ| তথা, শ্যামবর্ণঃ| তথা, শীর্যমাণতনূরুহঃ-পতদ্রোমা|

Adhikarana raktapAkasya lakShaNam (8-10) · Śloka 10

| কফজেষু তু শোফেষু গম্ভীরং পাকমেত্যসৃক্||৮|| পক্বলিঙ্গং ততোঽস্পষ্টং যত্র স্যাচ্ছীতশোফতা| ত্বক্সাবর্ণ্যং রুজোঽল্পত্বং ঘনস্পর্শত্বমশ্মবত্||৯|| রক্তপাকমিতি ব্রূযাত্তং প্রাজ্ঞো মুক্তসংশযঃ| |১০|

স০-যদ্যপি ত্রিভিরেব দোষৈঃ শোণিতান্বিতৈঃ পাকো জাযতে, তথাঽপি কফজেষ্বিত্যুক্তেরধিকতরকফেষ্বিতি গম্যতে| কফজেষ্বিতি বহুবচননির্দেশাত্ দেহদেশবহুত্বাদ্যেষু দেহদেশেষ্বসৌ কফো জাযতে, তেষু কফজেষু শোফেষু গম্ভীরং-দুর্লক্ষ্যমতিশযেনান্তর্নিগূঢত্বাত্, অসৃক্ পাকমেতি| অত এব পক্বলিঙ্গং-পক্বলক্ষণং, অস্পষ্টং দুর্লক্ষ্যং, স্যাত্| তথা, যত্র শীতগুণযোগাত্, শীতশ্চাসৌ শোফশ্চ শীতশোফঃ, তস্য ভাবঃ শীতশোফতা| তথা, ত্বক্সমানবর্ণত্বম্| তথা, রুজঃ স্তোকত্বম্| তথা, ঘনস্পর্শত্বং-নিবিডস্পর্শতা স্যাত্, অশ্মবত্-হস্তাদিনা স্পৃষ্টে পাষাণতুল্যঃ স্পর্শ উপলভ্যতে| তং-তথাভূতং শ্বযথুপাকং, রক্তপাকমিত্যেবং প্রাজ্ঞো-ধীমান্, ব্রূযাত্-ন তু শোফং পক্বমিতি কথযেত্| কথম্ ? মুক্তসংশযঃ,- শোণিতং পক্বং নাত্র শোফ ইত্যেবং বদেদিত্যর্থঃ|

Adhikarana dAraNapATanayorviShayobhedaH (10-11) · Śloka 11

| অল্পসত্ত্বেঽবলে বালে পাকাদ্বাঽত্যর্থমুদ্ধতে||১০|| দারণং মর্মসন্ধ্যাদিস্থিতে চান্যত্র পাটনম্| |১১|

স০-স্তোকে সত্ত্বে সতি, তথা দুর্বলে, তথা বালে, এতেষু জাতে শ্বযথৌ, তথা পাকাদ্বাঽত্যর্থমুদ্ধতে-অতিক্রান্তে চ শ্বযথৌ, দারণং কার্যম্; ব্রণপ্রতিষেধোদ্দিষ্টৈর্দারণদ্রব্যৈঃ (হৃ. উ. অ. ২৫|৩৭)| যথা-"গুগ্গুল্বতসিগেন্দতস্বর্ণক্ষীরীকপোতবিট্| ক্ষারৌষধানি ক্ষারাশ্চ পক্বশোফবিদারণম্||" ইতি| ন কেবলমল্পসত্ত্ব ইত্যাদিকে শ্বথৌ দারণং কার্যম্, যাবত্ চশব্দাত্ মর্মসন্ধ্যাদিস্থিতে চ শ্বযথৌ দারণং কার্যম্, ন পাটনং শস্ত্রেণ| অন্যত্রেতি দারণবিষযানির্দিষ্টে স্থানে শস্ত্রেণ পাটনং কার্যম্|

Adhikarana apakvasya dAraNapATananiShedhaH (11-12) · Śloka 12

| আমচ্ছেদে সিরাস্নাযুব্যাপদোঽসৃগতিস্রুতিঃ||১১|| রূজোঽতিবৃদ্ধির্দরণং বিসর্পো বা ক্ষতোদ্ভবঃ| |১২|

স০-আমস্য শোফস্য শস্ত্রেণ ছেদে সতি সিরাস্নাযুব্যাপদো ভবন্তি| তথা, অসৃজোঽতিস্রাবঃ স্যাত্| তথা, রুজাযা বিবৃদ্ধিঃ| তথা, দরণং বিসর্পো বা ক্ষতোত্থঃ স্যাত্|

Adhikarana pakvasyAcCedane doShaH (12-13) · Śloka 13

| তিষ্ঠন্নন্তঃ পুনঃ পূযঃ সিরাস্নায্বসৃগামিষম্||১২|| বিবৃদ্ধো দহতি ক্ষিপ্রং তৃণোলপমিবানলঃ| |১৩|

স০-অন্তঃ-অন্তরে, তু পূযস্তিষ্ঠন্ সন্ সিরাদীনি দহতি| কঃ কমিব ? অনলস্তৃণোলপমিব|

Adhikarana AmapakvalakShaNAnaBij~jAnindA (13-14) · Śloka 14

| যশ্ছিনত্ত্যামমজ্ঞানাদ্যশ্চ পক্বমুপেক্ষতে||১৩|| শ্বপচাবিব বিজ্ঞেযৌ তাবনিশ্চিতকারিণৌ| |১৪|

স০-যঃ-পুরুষঃ (বৈদ্যঃ), অজ্ঞানাত্-মোহাত্, আমং- অপক্বং, ছিনত্তি| যশ্চ পক্বমুপেক্ষতে-ন পাটযতি| তৌ-নরৌ, শ্বপচতুল্যৌ বেদ্যৌ, আতুরব্যাপাদনাত্| তদ্বযাপাদনং তু কুতো বিধত্তঃ ? ইত্যাহ-অনিশ্চিতকারিণৌ,-অসমীক্ষ্যবিধাযিনৌ যতঃ|

Adhikarana shastrakarmaNaH pUrvaM BojanAdi (14-15) · Śloka 15

| প্রাক্ শস্ত্রকর্মণশ্চেষ্টং ভোজযেদন্নমাতুরম্||১৪|| পানপং পাযযেন্মদ্যং তীক্ষ্ণং যো বেদনাক্ষমঃ| ন মূর্চ্ছত্যন্নসংযোগান্মত্তঃ শস্ত্রং ন বুধ্যতে||১৫||

স০-শস্ত্রকর্মণঃ প্রাক্-পূর্বং, আতুরমিষ্টমন্নং-যদ্ব্রণেঽপথ্যমপি, তদ্বলাধানার্থং ভোজযেত্| তথা, যো বেদনাক্ষমঃ-শস্ত্রব্যথামসহিষ্ণুঃ, তমাতুরং মদ্যোচিতং তীক্ষ্ণং-তীব্রমদং, মদ্যং পাযযেত্| এবং সতি যত্স্যাত্তদাহ-ন মূর্চ্ছত্যন্নসংযোগাদিত্যাদি| যতোঽন্নোপযোগান্ন মুহ্যতি| পরং তীক্ষ্ণমদ্যপানান্মত্তঃ সন্ শস্ত্রং-ন্যস্তমঙ্গে, ন বুধ্যতে-ন চেতযতে, তত্কদর্থনযা ক্লিশ্যত ইত্যর্থঃ|

Adhikarana mUDhagarBAdau BojanAdiniShedhaH (16) · Śloka 16

অন্যত্র মূঢগর্ভাশ্মমুখরোগোদরাতুরাত্| |১৬|

স০-অশ্মশব্দেনাশ্মরী গৃহ্যতে| মূঢগর্ভাদিভির্য আতুরস্তং বর্জযিত্বেষ্টভোজনং মদ্যপানং চ কারযিতব্যম্|

Adhikarana shastrakarmavidhiH BojanAdiniShedhaH (16-18) · Śloka 18

| অথাহৃতোপকরণং বৈদ্যঃ প্রাঙ্মুখমাতুরম্||১৬|| সম্মুখো যন্ত্রযিত্বাঽঽশু ন্যস্যেন্মর্মাদি বর্জযন্| অনুলোমং সুনিশিতং শস্ত্রমাপূযদর্শনাত্||১৭|| সকৃদেবাহরেত্তচ্চ| |১৮|

স০-অথশব্দেন মঙ্গলবাচিনা সঙ্গ্রহোক্তমর্থং সূচযতি| যথা (সূ. অ. ৩৮)- "সুমুহূর্তে চ দধ্যক্ষতান্নপানরুক্মরত্নার্চিতবিপ্রং প্রণতেষ্টদেবতং" ইত্যাদি| আহৃতং-ঢৌকিতং সমীপানীতং, উপকরণং-তত্কালযোগ্যং যন্ত্রশস্ত্রাগ্নিজাম্ববৌষ্ঠপিচুপ্লোতস্নেহমধুকল্কাদিকং, যস্য তম্, আতুরং প্রাঙ্মুখং-পূর্বাভিমুখং, বৈদ্যঃ সম্মুখঃ-প্রত্যঙ্মুখো, যন্ত্রযিত্বা শস্ত্রমাশু-ন বিলম্বিতং, ন্যস্যেত্-নিক্ষিপেত্| মর্মাদি বর্জযন্-মর্মসিরাসন্ধ্যাদীন্ পরিহরন্| তথা, অনুলোমং কৃত্বা-ন প্রাতিলোম্যেন| কিম্ভূতং শস্ত্রম্ ? সুনিশিতং-অতিতীক্ষ্ণম্| তচ্চ শস্ত্রমাপূযদর্শনাত্ ন্যসেত্,-ন ত্বধিকম্| তত্ কিং তত্রৈব স্থাপ্যম্ ? তচ্চ সকৃদেব-ন বহূন্ বারান্, আহরেত্-আকর্ষেত্|

Adhikarana pATanapramANam pATanasthAnam (18-21) · Śloka 21

পাকে তু সুমহত্যপি| পাটযেত্ দ্ব্যঙ্গুলং সম্যদ্ব্যঙ্গুলত্র্যঙ্গুলান্তরম্||১৮|| এষিত্বা সম্যগেষিণ্যা পরিতঃ সুনিরূপিতম্| অঙ্গুলীনালবালৈর্বা যথাদেশং যথাশযম্||১৯|| যতো গতাং গতিং বিদ্যাদুত্সঙ্গো যত্র যত্র চ| তত্র তত্র ব্রণং কুর্যাত্সুবিভক্তং নিরাশযম্||২০|| আযতং চ বিশালং চ যথা দোষো ন তিষ্ঠতি| |২১|

স০-পাকে তু সুমহত্যপি পাটযেত্| দ্ব্যঙ্গুলং-দ্ব্যঙ্গুলপরিমাণং ব্রণং, সম্যক্ কুর্যাত্,-নাধিকম্| দ্ব্যঙ্গুলেত্যাদি| অঙ্গুলদ্বযমথবাঽঙ্গুলত্রযমন্তরীকৃত্য পুনরন্যং ব্রণং কুর্যাত্,-ন ত্বাসন্নম্| তথা, এষিণ্যা সম্যগেষিত্বা-গবেশযিত্বা, পরিতঃ-সমন্তাত্, সুনিরূপিতং-সুপর্যালোচিতম্| ন কেবলমেষিণ্যা, যাবদঙ্গুল্যা, নালেন-পদ্মোত্পলাদিজেন, বালৈর্বা-বরাহাদিসম্বন্ধিভিঃ, অন্বেষ্য যথাদেশং যথাশযং ব্রণং কুর্যাত্| তং চ প্রদেশং দর্শযিতুমাহ-যত ইত্যাদি| যতো যস্মিন্ প্রদেশে গতাং-দূরযাতাং, গতিং-নাডীং, জানীযাত্ তস্মিন্ প্রদেশে ব্রণং কুর্যাত্| যত্র যত্র শ্বযথুপ্রদেশে, উত্সঙ্গং-উন্নতিং, বিদ্যাত্ তত্র তত্র প্রদেশে ব্রণং কুর্যাত্| কিংভূতং ব্রণম্ ? সুষ্ঠু বিভক্তৌ পার্শ্বাপরপার্শ্বাদিবিভাগৌ যস্য তং তথাবিধম্| তথা, নিরাশযম্,-ন বিদ্যত আশযঃ-পূযাদের্দোষস্য স্থানং, যস্য তথাভূতং নিরাশযং কুর্যাত্| তথা, আযতং-দীর্ঘম্, তথা বিশালং-বিস্তির্ণং, কুর্যাত্| এবং কৃতে সতি দোষঃ-পূযাখ্যো, ন তিষ্ঠতি-ন স্থিতিং লভতে|

Adhikarana pATane vaidyagatasAmagrI (21-22) · Śloka 22

| শৌর্যমাশুক্রিযা তীক্ষ্ণং শস্ত্রমস্বেদবেপথূ||২১|| অসম্মোহশ্চ বৈদ্যস্য শস্ত্রকর্মণি শস্যতে| |২২|

স০-বৈদ্যস্য শস্ত্রকর্মণি শৌর্যং-পাটনাদৌ বীর্যং, শস্যতে| তথা, আশুক্রিযা-চতুরহস্ততা| তথা, তীক্ষ্ণশস্ত্রতা| তথা, স্বেদশ্চ বেপথুশ্চ, ন বিদ্যমানৌ তৌ যস্য স এবম্, স্বেদাভাবঃ কম্পাভাবশ্চেত্যর্থঃ| তথা, অসম্মোহঃ-তত্কালোচিতকার্যকরণে সম্যক্প্রবৃত্তিঃ| ননু, "শৌর্যং বৈদ্যস্য শস্যতে" ইত্যুক্ত্যৈব স্বেদকম্পাভাবঃ প্রত্যপাদি| তথা চ স্বেদবেপথূ ভীরোরেব সম্ভবতঃ, ন শূরস্য| ইত্যনর্থকং "অস্বেদবেপথূ" ইতি| অত্রাচক্ষ্মহে সত্যমেবৈতৌ বীরুগুণৌ, কিন্তূষ্ণকালবশাত্ প্রকৃতিবশাদ্বা যস্য স্বেদবেপথূ ভবতঃ, তত্পরিহারার্থমেতদুক্তম্| সস্বেদস্য হি বৈদ্যস্য শস্ত্রকর্মকর্তুমুদ্যতস্য শস্ত্রগ্রহণমেব ন তথা সম্পদ্যতে, তদ্বত্সকম্পস্যাপি| তস্মাত্তত্পরিহারো যুক্তঃ|

Adhikarana lalATAdau tiryak pATanam (22-23) · Śloka 23

| তির্যক্ছিন্দ্যাল্ললাটাভ্রূদন্তবেষ্টকজত্রুণি||২২|| কুক্ষিকক্ষাক্ষিকূটৌষ্ঠকপোলগলবঙ্ক্ষণে| |২৩|

স০-ললাটাদিদেশেষু তির্যক্ ছেদঃ কার্যঃ| দন্তবেষ্টকো দন্তপিণ্ডিকা দন্তাধার উচ্যতে|

Adhikarana pradeshAntare tiryakpATananiShedhaH (23) · Śloka 23

| অন্যত্র ছেদনাত্তির্যক্ সিরাস্নাযুবিপাটনম্||২৩||

স০-অন্যত্র প্রদেশে তির্যক্ ছেদনাত্ সিরাণাং স্নাযূনাং চ ব্যাপত্তিঃ স্যাত্|

Adhikarana pATanAnantaraM kartavyam (24-28) · Śloka 28

শস্ত্রেঽবচারিতে বাগ্ভিঃ শীতাম্ভোভিশ্চ রোগিণম্| আশ্বাস্য পরিতোঽঙ্গুল্যা পরিপীড্য ব্রণং ততঃ||২৪|| ক্ষালযিত্বা কষাযেণ প্লোতেনাম্ভোঽপনীয চ| গুগ্গুল্বগুরুসিদ্ধার্থহিঙ্গুসর্জরসান্বিতৈঃ||২৫|| ধূপযেত্পটুষড্গ্রন্থানিম্বপত্রৈর্ঘৃতপ্লুতৈঃ| তিলকল্কাজ্যমধুভির্যথাস্বং ভেষজেন চ||২৬|| দিগ্ধাং বর্তিং ততো দদ্যাত্তৈরেবাচ্ছাদযেচ্চ তাং| ঘৃতাক্তৈঃ সক্তুভিশ্চোর্ধ্বং ঘনাং কবলিকাং ততঃ||২৭|| নিধায যুক্ত্যা বধ্নীযাত্পট্টেন সুসমাহিতম্| পার্শ্বে সব্যেঽপসব্যে বা নাধস্তান্নৈব চোপরি||২৮||

স০-শস্ত্রেঽবচারিতে-ন্যস্তে সতি, বাগ্ভিঃ-তত্কালোচিতার্ভির্মধুরাভিঃ 'স্বস্থো জাতোঽসি' ইত্যেবংপ্রাযাভিঃ, তথা শীতাম্ভোভিঃ-পরিষেকাদিভিঃ, আতুরমাশ্বাস্য, অনন্তরং ব্রণং পরিতঃ-সমন্তাত্, অঙ্গুল্যা পরিপীড্য-পূযাদিদোষং নির্হার্য, অনন্তরং কষাযেণ-মধুযষ্ট্যাদিসাধিতেন, ক্ষালযিত্বা, ততঃ প্লোতেনকার্পাসাদিজবস্ত্রখণ্ডেন, জলমপনীয-পানীযার্দ্রতাং নির্হৃত্য, অনন্তরং ব্রণং গুগ্গুল্বাদিভির্নিম্বপত্রান্তৈর্ধূপযেত্| কিম্ভূতৈঃ ? ঘৃতপ্লুতৈঃ|- প্লুতগ্রহণাদ্বহুঘৃতৈরিতি দ্যোতযতি| সঙ্গ্রহে চোক্তম্ (সূ. অ. ৩৮)- "গুগ্গুল্বাদিভিরেবং শযনাসনাদি দ্বিরহ্নো ধূপযেত্|" ইতি| ততঃ-অনন্তরং, বর্তিং-কার্পাসাদিমযীং, ব্রণান্তর্দদ্যাত্-প্রবেশযেত্, বৈদ্যঃ| কিম্ভূতাম্ ? দিগ্ধাম্| কৈঃ ? তিলকল্কাজ্যমধুভিঃ,-বাতব্রণে তিলপিষ্টদিগ্ধাং, পিত্তব্রণে ঘৃতদিগ্ধাং, কফব্রণে মধুদিগ্ধাম্| কেচিত্তু সর্বৈরেব তৈর্যুগপদ্দিগ্ধামিত্যাহুঃ| ন চ কেবলং তিলাদিভিঃ, যাবত্ যথাস্বং-যত্ যস্য দোষস্য স্বং ভেষজং, তেন চ দিগ্ধাম্| তৈরেব-তিলকল্কাদিভিঃ, ব্রণান্তঃপ্রবিষ্টাং তাং-বর্তিং, আচ্ছাদযেত্-স্থগযেত্| ঊর্ধ্বং-তদুপরিষ্টাত্, ঘৃতযুক্তৈঃ সক্তুভিরাচ্ছাদযেত্| সঙ্গ্রহে চোক্তম্ (সূ. অ. ৩৮)-"নাতিভৃষ্টযবসক্তুভির্ঘৃতাক্তৈর্ভাজনান্তেঽম্ভসা দক্ষিণাঙ্গুলীভিঃ সুমৃদিতৈরবচ্ছাদ্য" ইতি| ততো- ব্রণান্তঃপ্রবিষ্টবর্তিচ্ছাদনাদনন্তরং, কবলিকাং-বহুবস্ত্রখণ্ডপুটনির্বর্তিতাং, নিধায-সংস্থাপ্য, পট্টেন-নিবিডবস্ত্রখণ্ডেন, প্রকৃতত্বাত্ ব্রণং বধ্নীযাত্| কথম্ ? যুক্ত্যা-দোষকালানুগুণযা| অত এব সঙ্গ্রহে জগাদ (সূ.অ.৩৮)-"বাতশ্লেষ্মোদ্ভবাংস্তত্র দ্বিস্ত্রির্বা বেষ্টযেদ্ব্রণান্| সকৃদেব পরিক্ষপ্য পিত্তরক্তাভিঘাতজান্|| শস্ত্রক্ষতরুজাযাং তু প্রততাযাং যষ্টীমধুকসর্পিষোষ্ণেন ব্রণং সিঞ্চেত্| উদকুম্ভাচ্চাপো গৃহীত্বা প্রোক্ষযন্ পরিত উপচরেত্|" ইতি| কথং বধ্নীযাত্ ? সুসমাহিতং কৃত্বা-নাবহেলযা, বামপার্শ্বে দক্ষিণপার্শ্বে বা| অধস্তাত্ ন বধ্নীযাত্, নৈব চোপরি-ঊর্ধ্বং, বধ্নীযাত্, নৈব চোপরি-ঊর্ধ্বং, বধ্নীযাত্|

Adhikarana paTTakavalikAvikeshikAnAM visheShaH (29) · Śloka 29

শুচিসূক্ষ্মদৃঢাঃ পট্টাঃ কবল্যঃ সবিকেশিকাঃ| ধূপিতা মৃদবঃ শ্লক্ষ্ণা নির্বলীকা ব্রণে হিতাঃ||২৯||

স০-তথা শুচযঃ সূক্ষ্মসূত্রা দৃঢাশ্চ পট্টাঃ, তথা কবলিকাঃ সবিকেশিকাশ্চ ব্রণে হিতাঃ| কিম্ভূতাঃ ? ধূপিতাঃ, তথা মৃদবঃ, তথা শ্লক্ষ্ণাঃ, তথা বলীরহিতাঃ|

Adhikarana rakShA baliSca (30) · Śloka 30

কুর্বীতানন্তরং তস্য রক্ষাং রক্ষোনিষিদ্ধযে| বলিং চোপহরেত্তেভ্যঃ|৩০|

স০-অনন্তরং [ তস্য-] রোগিণঃ কৃতশস্ত্রকর্মণো, ব্রণে রক্ষাং কুর্যাত্| কিমর্থম্ ? রক্ষোনিষিদ্ধযে-পিশিতাশনরাক্ষসাদিনিষেধায| তেভ্যশ্চ-রক্ষোভ্যো, বলিমুপহরেত্-দদ্যাত্|

Adhikarana auShadhividhAraNam (30-31) · Śloka 31

| সদা মূর্ধ্না চ ধারযেত্||৩০|| লক্ষ্মীং গুহামতিগুহাং জটিলাং ব্রহ্মচারিণীম্| বচাং ছ্হত্রামতিচ্ছ্হত্রাং দূর্বাং সিদ্ধার্থকানপি||৩১||

স০-সর্বকালং চৌষধীর্মূর্ধ্না ধারযেত্| তা এবাহ-লক্ষ্মীমিত্যাদি| লক্ষ্মীং-পদ্মচারিণীম্| গুহাং-পৃশ্নিপর্ণীম্| অতিগুহাং-শালিপর্ণাম্| জটিলাং-মাংসীম্| ব্রহ্মচরিণীং-ব্রহ্মযষ্টিকাম্| বচাং-উগ্রগন্ধাম্| ছত্রাং-শতপুষ্পাম্| অতিচ্ছত্রাং-বিষাণিকাম্|

Adhikarana AhAravihAraniyamaH (32) · Śloka 32

ততঃ স্নেহদিনেহোক্তং তস্যাচারং সমাদিশেত্| |৩২|

স০-ততঃ-অনন্তরং, তস্য ব্রণিনঃ, আচারমাদিশেত্| কথমম্ ? স্নেহদিনেহোক্তম্,-স্নেহস্য দিনং স্নেহদিনং, স্নেহপানোপলক্ষিতমহঃ, তত্রেহা-চেষ্টা, তস্যামুক্তং-স্নেহপানবিধ্যুপদিষ্টং "উষ্ণোদকোপচারী স্যাত্" ইত্যাদিকম্|

Adhikarana vraNe divAsvapnaniShedhaH (32) · Śloka 32

| দিবাস্বপ্নো ব্রণে কণ্ডূরাগরুক্শোফপূযকৃত্||৩২||

স০-দিবাস্বপ্নো ব্রণে কণ্ড্বাদিকৃত্| তস্মাত্ ব্রণিনাঽহঃ স্বপ্নো ন সেব্যঃ|

Adhikarana vraNe strIsa~gganiShedhaH (33-1) · Śloka 1

স্ত্রীণাং তু স্মৃতিসংস্পর্শদর্শনৈশ্চলিতস্রুতে| শুক্রে ব্যবাযজান্ দোষানসংসর্গেঽপ্যবাপ্নুযাত্||৩৩|| (ব্রণে শ্বযথুরাযাসাত্ স চ রাগশ্চ জাগরাত্| তৌ চ রুক্ চ দিবাস্বাপাত্তাশ্চ মৃত্যুশ্চ মৈথুনাত্)||১||

স০-স্ত্রীণাং তু স্মৃতিসংস্পর্শদর্শনৈঃ পূর্বং স্বস্থানচ্চলিতং পশ্চাত্স্রুতং তস্মিংশ্চলিতস্রুতে শুক্রে সত্যসংসর্গেঽপি-তাসামসম্বন্ধেঽপি মৈথুনমন্তরেণাপি, ব্যবাযজান্-মৈথুনোত্থান্, দোষানবাপ্নুযাত্| তস্মাত্ স্ত্রীস্মরণসংস্পর্শদর্শনানি বর্জ্যানীত্যর্থঃ|

Adhikarana vraNe bhojanam,vraNe BojanaviSeShaH (34-37) · Śloka 37

ভোজনং চ যথাসাত্ম্যং যবগোধূমষষ্টিকাঃ| মসূরমুদ্গতুবরীজীবন্তীসুনিষণ্ণকাঃ||৩৪|| বালমূলকবার্তাকতণ্ডুলীযকবাস্তুকম্| কারবেল্লককর্কোটপটোলকটুকাফলম্||৩৫|| সৈন্ধবং দাডিমং ধাত্রী ঘৃতং তপ্তহিমং জলম্| জীর্ণশাল্যোদনং স্নিগ্ধমল্পমুষ্ণোদকোত্তরম্||৩৬|| ভুঞ্জানো জাঙ্গলৈর্মাংসৈঃ শীঘ্রং ব্রণমপোহতি| |৩৭|

স০-ভোজনং যথাসাত্ম্যং-যদ্যস্য সাত্ম্যং যবাদি, তথা জীবন্ত্যাদিশাকং চ, তথা সৈন্ধবাদিকং, পুরাণশালিভক্তং স্নিগ্ধং-স্নেহং, তথাঽল্পং, জাঙ্গলৈর্মাংসৈঃ সহ ভুঞ্জান উষ্ণোদকোত্তরং যথাভবতি, এবং ব্রণী শীঘ্রং ব্রণমপোহতি|

Adhikarana viShamAshanasamashanAdhyAshananiShedhaH (37-38) · Śloka 38

| অশিতং মাত্রযা কালে পথ্যং যাতি জরাং সুখম্||৩৭|| অজীর্ণাত্ত্বনিলাদীনাং বিভ্রমো বলবান্ ভবেত্| ততঃ শোফরুজাপাকদাহানাহানবাপ্নুযাত্||৩৮||

স০-মাত্রযা কালে ভুক্তং পথ্যং সুখেন জরাং যাতি| তস্মাত্ পথ্যং মাত্রযা কালে ভোক্তব্যম্| অজীর্ণং তু ন কথঞ্চিত্ কার্যম্| যতোঽজীর্ণাত্ বাতাদীনাং বলবান্ বিভ্রমঃ-ক্ষোভঃ, স্যাত্| { ততঃ- } তস্মাত্ক্ষোভাত্, শোফাদীন্ প্রাপ্নুযাত্|

Adhikarana navadhAnyAdivargaH navadhAnyAderatyapathyatvam (39-40) · Śloka 40

নবং ধান্যং তিলান্ মাষান্ মদ্যং মাংসমজাঙ্গলম্| ক্ষীরেক্ষুবিকৃতীরম্লং লবণং কটুকং ত্যজেত্||৩৯|| যচ্চান্যদপি বিষ্টম্ভি বিদাহি গুরু শীতলম্| বর্গোঽযং নবধান্যাদির্ব্রণিনঃ সর্বদোষকৃত্||৪০||

স০-নবধান্যাদি ত্যজেত্| যতোঽযং নবধান্যাদিবর্গো ব্রণিনঃ সর্বান্ দোষান্ করোতি| সঙ্গ্রহে চোক্তম্ (সূ.অ.৩৮)-"নবধান্যমাষকলাযকুলত্থনিষ্পাবশিম্বীশীতাম্বুমদ্যেক্ষুক্ষিরপিষ্টতিলবিকৃতিশুষ্কশাকপিশিতহরিতঁকাম্ললবণকটুকক্ষারান্পামিষাণি বর্জযেত্|" ইতি| শীতলং-শীতাম্ব্বাদি|

Adhikarana madyasya tato~apathyatvam (41) · Śloka 41

মদ্যং তীক্ষ্ণোষ্ণরূক্ষাম্লমাশু ব্যাপাদযেদ্ব্রণম্| |৪১|

স০-মদ্যং তীক্ষ্ণোষ্ণাদিগুণং দ্রাক্ ব্রণং ব্যাপাদযেত্| তস্মাত্ মদ্যমীদৃশং বর্জ্যম্, নাপরম্| তথা চ তন্ত্রান্তরে-"সস্নেহং মধুরপ্রাযং নাতিতীক্ষ্ণমকর্কশম্| তনু যত্সুখপেযং চ মার্দ্বীকেষু তদুত্তমম্||" ইত্যুক্তম্| তস্মাত্ মার্দ্বীকাদিপ্রাযং রোধ্রাসবাদিকং বা যন্মদ্যং তস্সাত্ম্যত্বাত্কিঞ্চিত্ পেযমেব|

Adhikarana vraNashushrUShaNam (41-43) · Śloka 43

| বালোশীরৈশ্চ বীজ্যেত ন চৈনং পরিঘট্টযেত্||৪১|| ন তুদেন্ন চ কণ্ডূযেচ্চেষ্টমানশ্চ পালযেত্| স্নিগ্ধবৃদ্ধদ্বিজাতীনাং কথাঃ শ্রুণ্বন্মনঃপ্রিযাঃ||৪২|| আশাবান্ ব্যাধিমোক্ষাযা ক্ষিপ্রং ব্রণমপোহতি| |৪৩|

স০-বালোশীরৈশ্চৈনং ব্রণং বীজযেত্| ন চৈনং পরিঘট্টযেত্| তথা ন ব্যথযেত্| নাপি কণ্ডূযেত্| {চেষ্টমানঃ-ক্রিযাসু} ব্যাপারং কুর্বন্, ব্রণং পালযেত্-রক্ষেত্| তথা স্নিগ্ধাদীনাং কথাশ্চিত্তপ্রিযা আকর্ণযন্ রোগমুক্তযে বিহিতাশোঽহ্নায ব্রণমপোহতি|

Adhikarana tRutIye divase prakShAlanAdikam dvitIye prakShAlanAdiniShedhaH niShedhAtikrame doShaH (43-44) · Śloka 44

| তৃতীযেঽহ্নি পুনঃ কুর্যাদ্ব্রণকর্ম চ পূর্ববত্||৪৩|| প্রক্ষালনাদি, দিবসে দ্বিতীযে নাচরেত্তথা| তীব্রব্যথো বিগ্রথিতশ্চিরাত্সংরোহতি ব্রণঃ||৪৪||

স০-তৃতীযে চ দিবসে পুনরপি প্রক্ষালনাদি কর্ম পূর্ববত্পূর্বেণ ব্রণকর্মণা তুল্যং, কুর্যাত্| দ্বিতীযে তু দিবসে প্রক্ষালনাদি নাচরেত্| কিমিত্যাহ-তথেত্যাদি| তথা-তেন প্রকারেণ, ব্রণস্তীব্রব্যথঃ সম্পদ্যতে| তথা, বিগ্রথিতঃ-স প্রদেশো বহুভির্গ্রন্থিভির্যুক্তঃ স্যাত্| তথা, ব্রণাশ্চিরাত্-চিরেণ কালেন, সংরোহতি-সংরোহং যাতি রূঢঃ সম্পদ্যতে|

Adhikarana snigdhAdivikeshikAyAH kalkasya ca niShedhaH (45) · Śloka 45

স্নিগ্ধাং রূক্ষাং শ্লথাং গাঢাং দুর্ন্যস্তাং চ বিকেশিকাম্| ব্রণে ন দদ্যাত্কল্কং বা|৪৫|

স০-ব্রণে-ব্রণাখ্যে আধারে, স্নিগ্ধাদিগুণযুক্তং বিকেশিকাংব্রণান্তঃপ্রবেশযোগ্যাং বর্তিং, ন দদ্যাত্| শ্লথাং-শিথিলাম্, গাঢাং-নিবিডাম্, দুর্ন্যস্তাং-বিষমন্যস্তাং| অত্র চাতিশব্দোঽর্থবশাদ্গম্যমানো বোধ্যঃ| অত এব সঙ্গ্রহে স্পষ্টং কৃত্বোবাচ (সূ.অ. ৩৮)- {"অতিস্নিগ্ধরূক্ষমতিশ্লথমতিগাঢম্| } অতিস্নেহাত্ক্লেদঃ|" ইতি| কল্কং বা-কল্কমপ্যতিস্নিগ্ধাদিগুণযুক্তং ব্রণে ন যোজযেত্| পিষ্টমৌষধং দ্রবাপ্লুতং কল্ক ইত্যুচ্যতে (হৃ.ক.অ.৬|১০)| কিমিতি স্নিগ্ধাদিগুণযুক্তাং বিবেশিকাং কল্কং বা ন দদ্যাত্ ? ইত্যাহ-

Adhikarana niShedhAtikrame doShaH (45-47) · Śloka 47

| স্নেহাত্ক্লেদো বিবর্দ্ধতে||৪৫|| মাংসচ্ছেদোঽতিরুগ্রৌক্ষ্যাদ্বরণং শোণিতাগমঃ| শ্লথাতিগাঢদুর্ন্যাসৈর্ব্রণবর্ত্মাবঘর্ষণম্||৪৬|| ঘ্|৪৭|

স০-যতোঽতিস্নেহাত্ ক্লেদবৃদ্ধিঃ| অতরূক্ষত্বাচ্চ মাংসচ্ছেদোঽতিব্যথা চ, তথা বিদারণং রক্তস্রাবশ্চ| শ্লথাদিগুণযুক্তেন চ ব্রণমার্গস্যাবঘর্ষণং স্যাত্| বিকেশিকা ব্রণে কস্মাদ্ধীযতে ? ইত্যাহ-

Adhikarana vikeshikAyA guNaH (47) · Śloka 47

সপূতিমাংসং সোত্সঙ্গং সগতিং পূযগর্ভিণম্| ব্রণং বিশোধযেচ্ছীঘ্রং স্থিতা হ্যন্তর্বিকেশিকা||৪৭||

স০-বিকেশিকা ব্রণান্তরে স্থিতা পূত্যাদিযুক্তং ব্রণং বিশোধযেত্| অতোঽসৌ যোজ্যা| কীদৃগ্ব্রণং ? পূতিযুক্তমাংসম্, সোত্সঙ্গং-উন্নতম্, পূযাদিভক্ষিতমাংসাদিপ্রদেশঃ শূন্যো দেহস্য গতিরুচ্যতে, {সগতিং-} গতিযুক্তম্, পূযশ্চাসৌ গর্ভশ্চ, স বিদ্যতে যস্য স পূযগর্ভী তং চ|

Adhikarana apakvapATane cikitsA (48) · Śloka 48

ব্যম্লং তু পাটিতং শোফং পাচনৈঃ সমুপাচরেত্| ভোজনৈরুপনাহৈশ্চ নাতিব্রণবিরোধিভিঃ||৪৮||

স০-ব্যম্লং-বিদগ্ধং পক্বাপক্বং ব্রণং, পক্বমিত্যজ্ঞানাত্ পাটিতম্| তথাবিধিং শ্বযথুং পাচনৈরন্নপানৈস্তথাবিধৈশ্চোপনাহৈঃ-সাত্বণকিণ্বাদিকল্পিতৈঃ, উপাচরেত্| ন চ সর্বৈরেবাবিশেষেণ পাচনৈরুপাচরেদিত্যাহ-নাতীত্যাদি| ব্রণাতিবিরোধীনি যানি শ্বযথুপাচনানি-অম্লকটুকতীক্ষ্ণোষ্ণলবণপ্রাযাণি দ্রব্যাণি তথৈবংপ্রাযাণি ভোজনানি, ন তৈরুপাচরেত্| অপি তু কিঞ্চিদেব ব্রণবিরোধীনি যানি তৈরুচিতৈরুপক্রমেদিতি বোধ্যম্, নাতিশব্দপ্রযোগাত্|

Adhikarana sIvanasya viShayaH (49-51) · Śloka 51

সদ্যঃ সদ্যোব্রণান্ সীব্যেদ্বিবৃতানভিঘাতজান্| মেদোজাল্লিখিতান্ গ্রন্থীন্ হ্রস্বাঃ পালীশ্চ কর্ণযোঃ||৪৯|| শিরোক্ষিকূটনাসৌষ্ঠগণ্ডকর্ণোরুবাহুষু| গ্রীবাললাটমুষ্কস্ফিঙ্মেঢ্রপাযূদরাদিষু||৫০|| গম্ভীরেষু প্রদেশেষু মাংসলেষ্বচলেষু চ| |৫১|

স০-সদ্যোব্রণানভিঘাতজান্ বিবৃতান্-বিস্তীর্ণমুখান্, সদ্যঃ-তত্ক্ষণাদেব, সীব্যেত্| সঙ্কুচিতবদনাস্তু তে ন সীব্যাঃ| অভিঘাতাজ্জন্ম যেষাং তানেবম্| সদ্যোব্রণানিতি সদ্যোগ্রহণমভিঘাতজেষ্বপি চিরকালস্থিতেষু নাযং বিধিরিতি দ্যোতযতি| মেদোজান্ গ্রন্থীন্ লিখিতান্-শস্ত্রলিখিতান্, সূচ্যা সীব্যেত্| কর্ণযোশ্চ হ্রখাঃ পালীর্লিখিতাঃ সীব্যেত্| শিরোক্ষিপ্রভৃতিষু প্রদেশেষু প্রভূতমাংসেষ্বচলেষু চ স্থিতান্ ব্রণান্ সীব্যেত্|

Adhikarana sIvanAviShayaH (51-52) · Śloka 52

| ন তু বঙ্ক্ষণকক্ষাদাবল্পমাংসে চলে ব্রণান্||৫১|| বাযুনির্বাহিণাঃ শল্যগর্ভান্ ক্ষারবিষাগ্নিজান্| |৫২|

স০-বঙ্ক্ষণাদিস্থিতানাং ব্রণানাং গম্ভীরাদিপ্রদেশত্বাত্সীবনং প্রাপ্তং তন্নিষিধ্যতে| মাংসলেষু স্থিরেষু চ ব্রণান্ সীব্যেদিত্যুক্ত্যৈবাল্পমাংসে চলে স্থানে ব্রণান্ন সীব্যেদিত্যর্থে লব্ধে, অল্পমাংসাংশ্চলাংশ্চ ব্রণান্ ন সীব্যেদিতি বচনমতিশযার্থম্| জাতুচিদভিঘাতজান্ বিবৃতানপ্যেবংবিধান্ ব্রণান্ ন সীব্যেদিতি গমযতি| তথা, বাযুং নির্বহন্তি-নিঃশ্বসন্তি, তান্ বাযুনির্বাহিণো ন সীব্যেত্| তথা শল্যং গর্ভে যেষাং তান্ শল্যগর্ভান্, তথা ক্ষারবিষাগ্নিভ্যো জাতান্ ব্রণান্ ন সীব্যেত্| সীবনাত্পূর্বং যত্ক্রিযতে তদ্দর্শযতি-

Adhikarana sIvanasya vidhiH (52-54) · Śloka 54

| সীব্যেচ্চলাস্থিশুষ্কাস্রতৃণরোমাপনীয তু||৫২|| প্রলম্বি মাংসং বিচ্ছিন্নং নিবেশ্য স্বনিবেশনে| সন্ধ্যস্থি চ স্থিতে রক্তে স্নায্বা সূত্রেণ বল্কলৈঃ||৫৩|| সীব্যেন্ন দূরে নাসন্নে গৃহ্ণন্নাল্পং ন বা বহু| |৫৪|

স০-স্থানাচ্চলিতমস্থ্যপনীয-নিরস্য, তথা শুষ্করক্তং তৃণানি রোমাণি চাপাস্য, তথা শস্ত্রাদিনা প্রকর্ষেণ লম্বি ব্রণে যদ্বিদ্যতে মাংসং তত্ স্বনিবেশনে-আত্মীযে স্থানে, নিবেশ্য-সংস্থাপ্য, তথা সন্ধ্যস্থি স্বে স্থানে সংস্থাপ্য, স্থিতে রক্তে অস্ত্রবদ্রূপত্বং প্রাপ্তে সতি, ব্রণং সীব্যেত্| কেন ? স্নায্বাদিনা, তথা বল্কলৈঃ| বল্কলানি-শণাশ্মন্তকাদিত্বগুদ্ভবানি, তৈঃ| কথং সীব্যেত্ ? ন দূরে-ন বিপ্রকৃষ্টে, ন চাসন্নে-নাতিনিকটে নাল্পং ব্রণাংশং ন চ বহু গৃহ্ণন্|

Adhikarana sIvanAnantaraM kartavyam (54-55) · Śloka 55

| সান্ত্বযিত্বা ততশ্চার্তং ব্রণে মধুঘৃতদ্রুতৈঃ||৫৪|| অঞ্জনক্ষৌ মজমষীফলিনীশল্লকীফলৈঃ| সরোধ্রমধুকৈর্দিগ্ধে যুঞ্জ্যাদ্বন্ধাদি পূর্ববত্||৫৫||

স০-ততঃ-তস্মাত্সীবনাদনন্তরং, আতুরং সান্ত্বযিত্বা- সমাশ্বাস্য শীতাম্বুস্পর্শব্যজনাদিভিঃ, অনন্তরমুক্তৈর্লিপ্তে ব্রণে সতি| কৈঃ ? অঞ্জনাদিভিঃ| কিম্ভূতৈঃ ? মধুঘৃতাভ্যাং দ্রুতৈঃ-আলোডিতৈঃ| পূর্ববদ্বন্ধাদি যুঞ্জ্যাত্,- তৃতীযান্তাদ্বতিঃ, পূর্বোদ্দিষ্টেন কর্মণা তুল্যং কষাযক্ষালনাদি কবলিকাদিকং চ যোজ্যমিত্যর্থঃ|

Adhikarana shuShkaM vraNamArdaM kRutvA sIvyet (56) · Śloka 56

ব্রণে নিঃশোণিতৌষ্ঠো যঃ কিঞ্চিদেবাবলিখ্য তম্| সঞ্জাতরুধিরং সীব্যেত্সন্ধানং হ্যস্য শোণিতম্||৫৬||

স০-অবিদ্যমানশোণিতৌ ওষ্টৌ-পার্শ্বৌ, যস্য তমেবংভূতং ব্রণং কিঞ্চিদেব-ঈষন্মাত্রমেব শস্ত্রেণাবলিখ্য, তং সঞ্জাতরুধিরং সন্তং সীব্যেত্, ন ত্বেবমেব| যস্মাদস্য-ব্রণস্য, সন্ধানং শোণিতমেব|

Adhikarana bandhanasya sAdhanAni (57-59) · Śloka 59

বন্ধনানি তু দেশাদীন্ বীক্ষ্য যুঞ্জীত তেষু চ| আবিকাজিনকৌশেযমুষ্ণম্, ক্ষৌ মং তু শীতলম্||৫৭|| শীতোষ্ণম্ তূলসন্তানকার্পাসস্নাযুবল্কজম্| তাম্রাযস্ত্রপুসীসানি ব্রণে মেদঃকফাধিকে||৫৮|| ভঙ্গে চ যুঞ্জ্যাত্ফলকং চর্মবল্ককুশাদি চ| |৫৯|

স০-বধ্যতে ব্রণ এভিরিতি বন্ধনানি,- আবিকাজিনাদীনি, তেষু-ব্রণেষু, দেশকালসাত্ম্যাদীন্ বীক্ষ্য-নিরূপ্য, যথাযোগমাবিকাদ্যন্যতমং যুঞ্জ্যাত্| তেষাং চ বন্ধনানাং স্বরূপমাহ-আবিকেত্যাদি| অবিরেবাবিকঃ, তস্যেদমাবিকম্| "অবেঃ কঃ" ইতি কঃ, "তস্যেদম্" ইত্যণ্| অজিনং-চর্ম| কোশাত্সম্ভূতং-কৌশেযম্| "কোষাঢ্ঢঞ্" ইতি ঢঞ্| আবিকাদিকং বন্ধনত্রযমুষ্ণং-উষ্ণবীর্যম্| ক্ষৌ মং তু বন্ধনং শীতলং-শীতবীর্যম্| তূলসন্তানাদিজং শীতোষ্ণং-উভযস্বভাবম্| তূলং শাল্মল্যাদিজং তস্য সন্তানঃ-সন্ততিঃ সূত্ররূপতা, তেন নিষ্পাদিতম্| মেদঃকফাধিকে ব্রণে তাম্রাদীনি বন্ধনার্থং যুঞ্জ্যাত্| ভঙ্গে-অস্থিভঙ্গে| ন কেবলং তাম্রাদীনি মেদঃকফাধিকে ব্রণে যুঞ্জযাত্, যাবচ্চশব্দাত্তানি ভঙ্গেঽপি যুঞ্জ্যাত্| ন চ কেবলং ভঙ্গে তাম্রাদীনি যুঞ্জ্যাত্, যাবত্ফলকাদি চ যুঞ্জ্যাত্| কুশাশব্দেন বংশাদিকম্বিকোচ্যতে| অধুনা বন্ধপ্রকারান্নির্দিশতি-

Adhikarana bandhanaprakArAH (59-61) · Śloka 61

স্বনামানুগতাকারা বন্ধাস্তু দশ পঞ্চ চ||৫৯|| কোশস্বস্তিকমুত্তোলীচীনদামানুবেল্লিতম্| খট্বাবিবন্ধস্থগিকাবিতানোত্সঙ্গতোষ্ফণাঃ||৬০|| যমকং মণ্ডলাখ্যং চ পঞ্চাঙ্গী চেতি যোজযেত্| (বিদধ্যাত্তেষু তেষ্বেব কোশমঙ্গুলিপর্বসু| স্বস্তিকং কর্ণকক্ষাদিস্তনেষূক্তং চ সন্ধিষু||১|| মুত্তোলীং মেঢ্রগ্রীবাদৌ যুঞ্জ্যাচ্চীনমপাঙ্গযোঃ| সম্বাধেঽঙে তথা দাম, শাখাস্বেবানুবেল্লিতম্||২|| খট্টাং গণ্ডে হনৌ শঙ্খে, বিবন্ধং পৃষ্ঠকোদরে| অঙ্গুষ্ঠাঙ্গুলিমেঢ্রাগ্রে স্থগিকামন্ত্রবৃদ্ধিষু||৩|| বিতানং পৃথুলাঙ্গাদৌ তথা শিরসি চেরযেত্| বিলম্বিনি তথোত্সঙ্গং, নাসৌষ্ঠচিবুকাদিষু||৪|| গোষ্ফণং সন্ধিষু তথা, যমকং যমিকে ব্রণে| বৃত্তেঽঙ্ঘে মণ্ডলাখ্যং, চ পঞ্চাঙ্গী চোর্ধ্বজত্রুষু||৫|| ) যো যত্র সুনিবিষ্টঃ স্যাত্তং তেষাং তত্রে বুদ্ধিমান্||৬১||

স০-স্বং চ তন্নাম চ স্বনাম, তেনানুগতঃ-অনুবদ্ধঃ, আকারঃ-সংস্থানবিশেষো, যেষাং তে পঞ্চদশ বন্ধা বক্ষ্যমাণাঃ| তুশব্দোঽবধারণার্থঃ| অর্থাত্ পঞ্চদশৈবেতি, ন ন্যূনাঃ| কোশাদযঃ পঞ্চাঙ্গ্যন্তাঃ| তেষাং-বন্ধানাং মধ্যে, যো-বন্ধবিশেষো, যত্র-যস্মিন্দেহদেশে, সুনিবিষ্টো ভবেত্, তং-বন্ধং কোশাদিকং, তত্র-তস্মিন্দেশে, যোজযেত্| তত্র কোশোঽঙ্গুলীপর্বসু চর্মাদিকৃতঃ| স্বস্তিকং সন্ধিকূর্চভ্রূস্তনান্তরক্ষাক্ষিকপোলকর্ণেষু| মুত্তোলী গ্রীবামেঢ্রযোঃ| চীনমপাঙ্গযোঃ| দাম সম্বাধেঽঙ্গে বঙ্ক্ষণাদৌ| অনুবেল্লিতং শাখাসু| খট্বা হনুসন্ধিগণ্ডেষু| বিবন্ধমুদরোরুপৃষ্ঠেষু| স্থগিকাঽঙ্গুষ্ঠাঙ্গুলীমঢ্রান্ত্রমূত্রবৃদ্ধিষু| বিতানং মূর্দ্ধাদৌ পৃথুলেঽঙ্গে| উত্সঙ্গমঙ্গবিশেষে লম্বিনি বাহ্বাদৌ| গোষ্ফণং নাসৌষ্ঠচিবুকসক্থিষু| যমকং যমলব্রণযোঃ| মণ্ডলং বৃত্তেঽঙ্গে| পঞ্চাঙ্গী জত্রূর্ধ্বমিতি যোজনা কার্যা| সম্প্রত্যেষাং বন্ধানাং গাঢশিথিলাদিবন্ধত্বং দেশাদ্যনুরোধান্নিরূপযতি-

Adhikarana pradeshavisheSheNa bandhanavisheShaH (62-66) · Śloka 66

বধ্নীযাদ্গাঢমূরুস্ফিক্কক্ষাবঙ্ক্ষণমূর্ধসু| শাখাবদনকর্ণারঃপৃষ্ঠপার্শ্বগলোদরে||৬২|| সমং মেহনমুষ্কে চ, নেত্রে সন্ধিষু চ শ্লথম্| বধ্নীযাচ্ছ্হিথিলস্থানে বাতশ্লেষ্মোদ্ভবে সমম্||৬৩|| গাঢমেব সমস্থানে, ভৃশং গাঢং তদাশযে| শীতে বসন্তেঽপি চ তৌ মোক্ষণীযৌ ত্র্যহাত্র্যহাত্||৬৪|| পিত্তরক্তোত্থযোর্বন্ধো গাঢস্থানে সমো মতঃ| সমস্থানে শ্লথো, নৈব শিথিলস্যাশযে তথা||৬৫|| সাযংপ্রাতস্তযোর্মোক্ষো গ্রীষ্মে শরদি চেষ্যতে| |৬৬|

স০-ঊরুস্ফিগাদিষু দেশেষু গাঢং বন্ধং বধ্নীযাত্, ন তু শ্লথম্| শাখাবদনাদিষু সমং বন্ধং বধ্নীযাত্| চশব্দান্মেহনে মুষ্কযোশ্চ সমমেব| নেত্রে-নযনে, তথাঽস্থিসন্ধিষু শিথিলং বন্ধং বধ্নীযাত্| শিথিলস্থানে শিথিলো বন্ধ উপদিষ্টঃ তত্র স্থানে যৌ ব্রণৌ বাতশ্লেষ্মোদ্ভবৌ তৌ সমং কৃত্বা বধ্নীযাত্, ন গাঢং ন শিথিলম্| সমস্থানে সমো বন্ধ উপদিষ্টঃ, তত্র স্থানে বাতশ্লেষ্মোদ্ভবৌ ব্রণৌ গাঢমেব বধ্নীযাত্| ভৃশমিত্যাদি| তদিত্যনেন গাঢাশযঃ পরামৃশ্যতে| গাঢবন্ধোদ্দিষ্টে স্থানে বাতশ্লেষ্মোদ্ভবৌ ব্রণৌ ভৃশং-সুতরাং, গাঢং বধ্নীযাত্| তৌ-বাতশ্লেষ্মোদ্ভবৌ ব্রণৌ, শীতে-হেমন্তশিশিরাখ্যে কালে, বসন্তে চ ত্র্যহাত্ত্র্যহাত্-ত্রিদিনং ত্রিদিনমন্তরীকৃত্য, মোক্ষণিযৌ-মোক্ষণার্হৌ ভবতঃ| পিত্তরক্তোত্থযোর্ব্রণযোর্গাঢবন্ধস্থানে সমো বন্ধো মতঃ, ন শিথিলঃ| সমস্থানে যত্র সমো বন্ধঃ উপদিষ্টঃ শাখাবদনাদৌ, তত্রস্থযোঃ পিত্তরক্তোত্থযোর্ব্রণযোঃ শিথিলো বন্ধঃ কার্যঃ| শিথিলস্য বন্ধস্যাশযে যত্র শিথিলো বন্ধঃ কার্য ইত্যুক্তং, তত্র নৈব বন্ধঃ কার্য ইতি| এবকারোঽবধারণার্থঃ কৃতঃ| তযোঃ-পিত্তরক্তোত্থযোঃ, সাযংপ্রাতর্দ্বৌ কালৌ মোক্ষ ইষ্যতে| গ্রীষ্মে শরদি চান্যদোষোত্থব্রণস্যাপি সাযংপ্রাতর্মোক্ষ ইষ্যতে| ন তু বন্ধেন বিনা ব্রণো ধার্য ইত্যাহ-

Adhikarana bandhAkaraNe doShaH (66-67) · Śloka 67

| অবদ্ধো দংশমশকশীতবাতাদিপীডিতঃ||৬৬|| দুষ্টিভবেচ্চিরং চাত্র ন তিষ্ঠেত্স্নেহভেষজম্| কৃচ্ছ্হ্রেণ শুদ্ধিং রূঢিং বা যাতি রূঢো বিবর্ণতাম্||৬৭||

স০-অবদ্ধো ব্রণো দংশাদিভিঃ পীডিতো-ব্যথিতঃ, তথাঽঽদিশব্দাত্ রজোধূমাদিভিশ্চ ব্যথিতঃ, অদুষ্টোঽপি দুষ্টীভবতি| অত্র চ-ব্রণে, বন্ধমন্তরেণ ব্রণঘ্নঃ স্নেহ উপযোজিতো ভেষজং চোপযোজিতং চিরং ন তিষ্ঠেত্| বন্ধং চ বিনা সম্যগুপচর্যমাণোঽপি ব্রণঃ কষ্টেন শুদ্ধিং যাতি| রূঢিং চ কৃচ্ছ্রেণ যাতি| রূঢোঽপি সন্ বিবর্ণতাং যাতি, ন শরীরবর্ণতাম্| ইত্যবন্ধনাদ্দোষাঃ| ইদানীং বন্ধনাদ্গুণানাহ-

Adhikarana bandhakaraNe guNaH (68-70) · Śloka 70

বদ্ধস্তু চূর্ণিতো ভগ্নো বিশ্লষ্টঃ পাটিতোঽপি বা| ছিন্নস্নাযুসিরোঽপ্যাশু সুখং সংরোহতি ব্রণঃ||৬৮|| উত্থানশযনাদ্যাসু সর্বেহাসু ন পীড্যতে| উদ্বৃত্তৌষ্ঠঃ সমুত্সন্নো বিষমঃ কঠিনোঽতিরুক্||৬৯|| সমো মৃদুররুক্ শীঘ্রং ব্রণঃ শুধ্যতি রোহতি| |৭০|

স০-তুরবধারণে| বদ্ধ এব ব্রণো বন্ধমাহাত্ম্যাত্, চূর্ণিতঃ-অস্থিসমাশ্রিতো ব্রণঃ, তথা ভগ্নঃ-অস্থিসমাশ্রিত এব ব্রণঃ, তথা বিশ্লষ্টঃ-সন্ধিস্থানাদন্যস্থানগতো ব্রণো নেত্রাদিস্থঃ, তথা পাটিতঃ-সর্বদেশস্থিতোঽপি, তথা ছিন্নস্নাযুসিরোঽপ্যাশু ব্রণঃ সুখং সম্যগ্রোহতি| তথোত্থানশযনাদ্যাসু সর্বাস্বীহাসু-চেষ্টাসু, ন পীড্যতে-ন ব্যথতে| ঊর্ধ্বং বৃত্তৌ-বর্তুলৌ, ওষ্ঠৌ যস্য স উদ্বৃত্তৌষ্ঠঃ, ন সমঃ| তথা, সমুত্সন্নঃ-সমান্তাদুচ্ছূনরূপো যো ব্রণো ন সমঃ| তথা, বিষমঃ উদ্বৃত্তৌষ্ঠসমুত্সন্নাভ্যাং ব্যতিরিক্তো বিষমসংস্থানঃ| তথা, কঠিনো-যো ব্রণো ন মৃদুঃ| তথা, অতিরুক্ চ যো ব্রণঃ| স সর্ব উদ্বৃত্তৌষ্ঠাদিঃ পঞ্চপ্রকারোঽপি বন্ধমাহাত্ম্যাত্ অশুভরূপতাং হিত্বা ব্রণঃ { সমো মৃদুররুক্ চ ভবতি, তথা } শীঘ্রং শুদ্ধিং যাতি রোহতি| ননু, উদ্বৃত্তৌষ্ঠসমুত্সন্নাবপি বিষমকঠিনশব্দেনৈব (ব্দাভ্যামেব) গ্রহীষ্যেতে, কিমেতাভ্যামুপাত্তাভ্যাং ? অস্ত্যেবৈতত্| কিন্ত্বনযোঃ পৃথঙ্নির্দেশেনাতিদুশ্চিকিত্স্যতরত্বং গমযতি|

Adhikarana vraNavisheShe lepasya patrAcCAdanam (70-72) · Śloka 72

| স্থিরাণামল্পমাংসানাং রৌক্ষ্যাদনুপরোহতাম্||৭০|| প্রচ্ছ্হাদ্যমৌষধং পত্রৈর্যথাদোষং যথর্তু চ| অজীর্ণতরুণাচ্ছ্হিদ্রৈঃ সমন্তাত্সুনিবেশিতৈঃ||৭১|| ধৌতৈরকর্কশৈঃ ক্ষীরিভূর্জার্জুনকদম্বজৈঃ| |৭২|

স০-স্থিরাণাং ব্রণানাং দীর্ঘকালানুষঙ্গিণাং, তথাঽল্পমাংসানাং-অনুপচিতপললানাং, অত এব হেতোঃ, তথা রৌক্ষ্যাদনুপরোহতাং-রূঢিমগচ্ছতাং, ঔষধং-কল্কস্নেহাদিকং যদুপযুজ্যতে, তত্ পত্রৈঃ ক্ষীরিভূর্জার্জুনকদম্বজৈঃ প্রচ্ছদ্যং-স্থগিতব্যম্| যথাদোষং-দোষানতিক্রমেণ, যথর্তু-ঋত্বনতিক্রমেণ চ, তদ্বশাদ্যথাযোগম্| যথা-বাতব্রণে শীততা স্নিগ্ধোষ্ণৈঃ পত্রৈঃ, পিত্তব্রণে ঘর্মকালে শীতস্বভাবৈঃ, কফব্রণে উষ্ণকালে রূক্ষোষ্ণপ্রাযৈঃ এবং চ প্রাবৃষি কালে মিশ্রদোষে চ কল্পনীযম্| কিম্ভূতৈঃ পত্রৈঃ ? অজীর্ণানি-অজর্জরাণি, তরুণানি-প্রত্যগ্রাণি, অচ্ছিদ্রাণি-ছিদ্ররহিতানি, তৈরজীর্ণতরুণাচ্ছিদ্রৈঃ| তথা, সমন্তাত্-সর্বতঃ সুষ্ঠু নিবেশিতৈঃ| তথা, ধৌতৈঃ-জলাদিনা নির্মলীকৃতৈঃ| তথা, অকর্কশৈঃ-অকঠিনৈঃ|

Adhikarana vraNavisheShe bandhananiShedhaH (72-74) · Śloka 74

| কুষ্ঠিনামগ্নিদগ্ধানাং পিটিকামধুমেহিনাম্||৭২|| কর্ণিকাশ্চোন্দুরুবিষে ক্ষারদগ্ধা বিষান্বিতাঃ| বন্ধনীযা ন মাংস্পাকে গুদপাকে চ দারুণে||৭৩|| শীর্যমাণাঃ সরুগ্দাহাঃ শোফাবস্থাবিসর্পিণঃ| |৭৪|

স০-কুষ্ঠ্যাদীনাং যে ব্রণাস্তে ন বন্ধনীযাঃ| তথা, উন্দুরুবিষে যাঃ কর্ণিকাঃ কোঠরূপাঃ, তাশ্চ ন বন্ধনীযাঃ| তথা, ক্ষারদগ্ধা যে ব্রণাস্তথা বিষদগ্ধা যে ব্রণাস্তে চ ন বন্ধনীযাঃ| তথা, মাংস্পাকে ব্রণাস্তথা দারুণে চ গুদপাকে-ন গুদপাকমাত্রে, ব্রণাস্তে চ ন বন্ধনীযাঃ| মাংস্পাক ইতি "মাংসস্য পচিযুড্ঘঞোঃ" ইত্যলোপঃ| তথা, শীর্যমাণাঃ-শদনাবস্থাং ভজমানাঃ, তথা সরুগ্দাহাঃ তথা শোফাবস্থাঃ-অনেকাবস্থা ভজন্তোঽপি যে শোফাবস্থাবস্থিতাঃ, তথা বিসর্পিণো-বিসর্পাবস্থাস্থিতাঃ তে চ ন বন্ধনীযাঃ| ইদানীং সকৃমীণাং ব্রণানাং চিকিত্সামাহ-

Adhikarana vraNe kRumipratIkAraH (74-77) · Śloka 77

| অরক্ষযা ব্রণে যস্মিন্ মক্ষিকা নিক্ষিপেত্কৃমীন্||৭৪|| তে ভক্ষযন্তঃ কুর্বন্তি রুজাশোফাস্রসংস্রবান্| সুরসাদিং প্রযুঞ্জীত তত্র ধাবনপূরণে||৭৫|| সপ্তপর্ণকরঞ্জার্কনিম্বরাজাদনত্বচঃ| গোমূত্রকল্কিতো লেপঃ সেকঃ ক্ষারাম্বুনা হিতঃ||৭৬|| প্রচ্ছ্হাদ্য মাংসপেশ্যা বা ব্রণং তানাশু নির্হরেত্| |৭৭|

স০-অরক্ষযা-অপালনেন. যস্মিন্ ব্রণে মক্ষিকা কৃমীন্নিক্ষিপেত্| তে-তত্রস্থাঃ কৃমযো, ব্রণং ভক্ষযন্তো রুজাদীন্ কুর্বন্তি| তত্র-সকৃমৌ ব্রণে, সুরসাদিগণং ধাবনপূরণে-তন্নিমিত্তং, প্রযুঞ্জীত| ধাবনং চ পূরণং চ তস্মিন্| তথা তস্মিন্ব্রণে সপ্তপর্ণাদীনাং ত্বচো গোমূত্রকল্কিতাঃ-পিষ্টাঃ, লেপো হিতঃ| তথা, ক্ষারাম্বুনা সেকো হিতঃ| অথবা মাংসপেশ্যা ব্রণং প্রচ্ছদ্য, তান্-কৃমীন্, আশু নির্হরেত্|

Adhikarana ashuddhasya ropaNaniShedhaH (77-78) · Śloka 78

| ন চৈনং ত্বরমাণোঽন্তঃ সদোষমুপরোহযেত্||৭৭|| সোঽল্পেনাপ্যপচারেণ ভূযো বিকুরুতে যতঃ| |৭৮|

স০-ন চৈনং-ব্রণমন্তঃ সদোষং ত্বরমাণো বৈদ্য উপরোহযেত্| কস্মাত্ ? ইত্যাহ-স ইত্যাতি| যতো-যস্মাত্, সঃ-অন্তঃ স্থিতদোষো ব্রণো, রূঢোঽপি ভূযঃ-পুনঃ, স্তোকেনাপ্যপচারেণ বিকৃতিং যাতি|

Adhikarana rUDhavraNasya saptamAsAvadhirniyamaH (78-79) · Śloka 79

| রূঢেঽপ্যজীর্ণব্যাযামব্যবাযাদীন্ বিবর্জযেত্||৭৮|| হর্ষং ক্রোধং ভযং চাপি যাবদাস্থৈর্যসম্ভবাত্| আদরেণানুবর্ত্যোঽযং মাসান্ ষট্ সপ্ত বা বিধিঃ||৭৯||

স০-রূঢেঽপি সত্যজীর্ণাদীন্ বিবর্জযেত্| { স্থৈর্যং যাবত্ হর্ষাদীন্ বর্জযেত্| } অযং-অজীর্ণব্যাযামব্যবাযাদিপরিবর্জনলক্ষণো, বিধিঃ ষট্ সপ্ত বা মাসান্ আদরেণ-যত্নবতা, অনুবর্ত্যঃ-অনুষ্ঠাতব্যঃ|

Adhikarana anuktaM svayamUhanIyam (29) · Śloka 29

উত্পদ্যমানাসু চ তাসু তাসু বার্তাসু দোষাদিবলানুসারী| তৈস্তৈরুপাযৈঃ প্রযতশ্চিকিত্সে দালোচযন্ বিস্তরমুত্তরোক্তম্||৮০|| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং সূত্রস্থানে শস্ত্রকর্মবিধির্নামৈকোনত্রিংশোঽধ্যাযঃ||২৯||

স০- যথা,- মক্ষিকাভিঃ কৃমিনিক্ষেপাত্ কৃমিপ্রাবল্যে জাতে চিকিত্সা বিহিতা| তথা, অন্যাস্বপি তাসু তাসু বার্তাসু অবস্থাস্বনির্দিষ্টস্বরূপাভিধানাসু, উত্পদ্যমানাসু, তৈস্তৈঃ- উক্তানুক্তৈঃ, উপাযৈঃ- সাধনৈঃ, চিকিত্সেদ্বৈদ্যঃ| কিম্ভূতো বৈদ্যঃ ? দোষাদিবলানুসারী,-দোষাদীনাং বলং দোষাদিবলম্, আদিশব্দাদ্দেশকালাদযো গৃহ্যন্তে, তদনুসরত্যেবংবিদো যো বৈদ্যঃ সঃ| তথা, প্রযতি-যত্নপরঃ| তথা, উত্তরে- উত্তরতন্ত্রে ব্রণভঙ্গবিধানে, উক্তং-নির্দিষ্টং, বিস্তরমালোচযন্-নিরূপযন্, ন তু যদৃচ্ছযেতি ভাবঃ| ইন্দ্রবজ্রাবৃত্তম্| ইতি শ্রীমৃকাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদযটীকাযাং সর্বাঙ্গসুন্দরাখ্যাযাং সূত্রস্থানে শস্ত্রকর্মবিধির্নামৈকোনত্রিংশোঽধ্যাযঃ সমাপ্তঃ|| ২৯||