5. bhūtapratiṣēdhādhyāyaḥ

Adhikarana bhUtapratiShedhAdhyAyaH||5| (2-3) · Śloka 3

ಅಥಾತೋ ಭೂತಪ್ರತಿಷೇಧಂ ವ್ಯಾಖ್ಯಾಸ್ಯಾಮಃ| ಇತಿ ಹ ಸ್ಮಾಹುರಾತ್ರಯಾದಯೋ ಮಹರ್ಷಯಃ| (ಗದ್ಯಸೂತ್ರೇ||೨|| )||೩||

ಭೂತಗ್ರಹವಿಜ್ಞಾನಾದನನ್ತರಂ ಭೂತಸ್ಯ ಪ್ರತಿಷೇಧಂ-ಚಿಕಿತ್ಸಿತಂ, ಉಚ್ಯತೇ| ನನು, ನಿದಾನಚಿಕಿತ್ಸಿತಪದಾಭ್ಯಾಂ ಪ್ರಸಿದ್ಧತರಾಭ್ಯಾಂ ಪೂರ್ವವತ್ಕಿಮಿತೀದಂ ತನ್ತ್ರಕೃತಾ ನೋಪನಿಬದ್ಧಮ್ ? ಇತಿ ಕೇಚಿಚ್ಚೋದ್ಯಮಚೂಚುದನ್| ತಾನ್ ಸಞ್ಚಕ್ಷ್ಮಹೇ| ಶಾಸ್ತ್ರಕಾರಸ್ಯಾಸ್ಯೇದೃಶೀ ಪ್ರತಿಜ್ಞಾ,-ಸೂತ್ರಶಾರೀರನಿದಾನ ಚಿಕಿತ್ಸಿತಕಲ್ಪೋತ್ತರಾಖ್ಯೈಃ ಷಡ್ಭಿಃ ಸ್ಥಾನೈಸ್ತನ್ತ್ರಮಿದಮಭಿಧೇಯಮಿತಿ| ತದೇವಂ ಯದ್ಯುತ್ತರೇ ಸ್ಥಾನೇಽಪಿ ಕಿಞ್ಚಿನ್ನಿದಾನಚಿಕಿತ್ಸಿತಪದಾಭ್ಯಾಮಭಿಧೀಯತೇ, ತತಃ ಷಟ್ಸ್ಥಾನಕಮಿದಂ ತನ್ತ್ರಮಿತಿ ಪ್ರತಿಜ್ಞಾಂ ವ್ಯಾಹನ್ಯಾತ್| ತಸ್ಮಾದಯಂ ವಿರಚನಾಪ್ರಕಾರವಿಶೇಷಃ ಕೃತಃ|

Adhikarana ahiMsecchaM bhUtaM japAdibhirjayet (1) · Śloka 1

ಭೂತಂ ಜಯೇದಹಿಂಸೇಚ್ಛಂ ಜಪಹೋಮಬಲಿವ್ರತೈಃ| ತಪಃಶೀಲಸಮಾಧಾನದಾನಜ್ಞಾನದಯಾದಿಭಿಃ||೧||

ಸ೦-ಅಹಿಂಸಾಕಾಮಂ ಭೂತಂ ಜಪಾದಿಭಿರ್ಜಯೇತ್|

Adhikarana sarvagrahanASakaM hiMgvAdi ghRutaM tailaM vA (2-8) · Śloka 8

ಹಿಙ್ಗುವ್ಯೋಷಾಲನೇಪಾಲೀಲಶುನಾರ್ಕಜಟಾಜಟಾಃ| ಅಜಲೋಮೀ ಸಗೋಲೋಮೀ ಭೂತಕೇಶೀ ವಚಾ ಲತಾ||೨|| ಕುಕ್ಕುಟೀ ಸರ್ಪಗನ್ಧಾಖ್ಯಾ ತಿಲಾಃ ಕಾಣವಿಕಾಣಿಕೇ| ವಜ್ರಪ್ರೋಕ್ತಾ ವಯಃಸ್ಥಾ ಚ ಶೃಙ್ಗೀ ಮೋಹನವಲ್ಲ್ಯಪಿ||೩|| ಸ್ರೋತೋಜಾಞ್ಜನರಕ್ಷೋಘ್ನಂ ರಕ್ಷೋಘ್ನಂ ಚಾನ್ಯದೌಷಧಮ್| ಖರಾಶ್ವಶ್ವಾವಿದುಷ್ಟ್ರರ್ಕ್ಷಗೋಧಾನಕುಲಶಲ್ಯಕಾತ್||೪|| ದ್ವೀಪಿಮಾರ್ಜಾರಗೋಸಿಂಹವ್ಯಾಘ್ರಸಾಮುದ್ರಸತ್ತ್ವತಃ| ಚರ್ಮಪಿತ್ತದ್ವಿಜನಖಾ ವರ್ಗೇಽಸ್ಮಿನ್ ಸಾಧಯೇದ್ಘೃತಮ್||೫|| ಪುರಾಣಮಥವಾ ತೈಲಂ ನವಂ ತತ್ಪಾನನಸ್ಯಯೋಃ| ಅಭ್ಯಙ್ಗೇ ಚ ಪ್ರಯೋಕ್ತವ್ಯಮೇಷಾಂ ಚೂರ್ಣಂ ಚ ಧೂಪನೇ||೬|| ಏಭಿಶ್ಚ ಗುಟಿಕಾಂ ಯುಞ್ಜ್ಯಾದಞ್ಜನೇ ಸಾವಪೀಡನೇ| ಪ್ರಲೇಪೇ ಕಲ್ಕಮೇತೇಷಾಂ ಕ್ವಾಥಂ ಚ ಪರಿಷೇಚನೇ||೭|| ಪ್ರಯೋಗೋಽಯಂ ಗ್ರಹೋನ್ಮಾದಾನ್ ಸಾಪಸ್ಮಾರಾಞ್ಶಮಂ ನಯೇತ್| |೮|

ಸ೦-ಹಿಙ್ಗ್ವಾದಯ ಔಷಧಮ್| ಆಲಂ-ಹರಿತಾಲಮ್| ನೇಪಾಲೀ- ಕಸ್ತೂರಿಕಾ| ಜಟಾ-ಜಟಾಮಾಂಸೀ| ಅಜಲೋಮೀ-ಶ್ವೇತದೂರ್ವಾ| ಗೋಲೋಮೀ-ದೂರ್ವಾ| ಲತಾ-ಪ್ರಿಯಙ್ಗುಃ| ಕುಕ್ಕುಟೀ-ಶಿತಿವಾರಕಃ| ಸರ್ಪಗನ್ಧಾಖ್ಯಾ-ನಾಕುಲೀ| ಕಾಣವಿಷಾ(ಕಾ)ಣಿಕೇ-ಕಾಕೋಲೀಕ್ಷೀರಕಾಕೋಲ್ಯೌ| ಶೃಙ್ಗೀ-ಅತಿವಿಷಾ| ಮೋಹನವಲ್ಲೀ-ವನ್ದಾಕಃ| ಅನ್ಯದಪಿ ರಕ್ಷೋಘ್ನಂ ಗುಗ್ಗುಲ್ವಾದಿಕಮೌಷಧಮ್| ತಥಾ ಗರ್ದಭತುರಙ್ಗಾದಿಭ್ಯಶ್ಚರ್ಮಾದಯಃ| ಸಾಮುದ್ರಸತ್ತ್ವತೋ-ಜಲಧಿಜನ್ತೋಃ| ತದೇತಸ್ಮಿನ್ ಹಿಙ್ಗ್ವಾದಿವರ್ಗೇ, ಘೃತಂ ಪುರಾಣಮಥವಾ ನವಂ ತೈಲಂ ಪಚೇತ್-ಸಾಧಯೇತ್| ತಚ್ಚ-ಘೃತಂ ತೈಲಂ ವಾ, ಸಿದ್ಧಂ ಪಾನೇ ನಸ್ಯೇಽಭ್ಯಙ್ಗೇ ಚ ಪ್ರಯೋಜ್ಯಮ್| ಏಷಾಂ ದ್ರವ್ಯಾಣಾಂ ಚ ಚೂರ್ಣಂ ಧೂಪನೇ ಪ್ರಯೋಜ್ಯಮ್| ಏಭಿಶ್ಚೂರ್ಣೈರ್ಗುಟಿಕಾಮಞ್ಜನೇಽವಪೀಡನೇ ಚ ಯುಞ್ಜ್ಯಾತ್| ಏತೇಷಾಂ ಚ ದ್ರವ್ಯಾಣಾಂ ಕಲ್ಕಂ ಪ್ರಲೇಪೇ ಕ್ವಾಥಂ ಪರಿಷೇಚನೇ ಚ ಯುಞ್ಜ್ಯಾತ್| ಅಯಂ ಪ್ರಯೋಗೋ ಗ್ರಹಾದೀನ್ ಶಮಯೇತ್|

Adhikarana sarvagrahanAshakaM gajAhvAdikalkaH (8-9) · Śloka 9

| ಗಜಾಹ್ವಾಪಿಪ್ಪಲೀಮೂಲವ್ಯೋಷಾಮಲಕಸರ್ಷಪಾನ್||೮|| ಗೋಧಾನಕುಲಮಾರ್ಜಾರಝಷಪಿತ್ತಪ್ರಪೇಷಿತಾನ್| ನಾವನಾಭ್ಯಙ್ಗಸೇಕೇಷು ವಿದಧೀತ ಗ್ರಹಾಪಹಾನ್||೯||

ಸ೦-ಹಸ್ತಿಪಿಪ್ಪಲ್ಯಾದೀನಿ(ನ್) ಗೋಧಾದಿಪಿತ್ತಪಿಷ್ಟಾನಿ(ನ್) ನಸ್ಯಾಭ್ಯಙ್ಗಸೇಕೇಷು ಗ್ರಹಾಪಹಾನ್ ಕುರ್ಯಾತ್| ಮೂಲಂ-ಪುಷ್ಕರಮೂಲಮ್| ಝಷೋ ಜಲಚರಭೇದಃ|

Adhikarana sarvagrahanASakaM siddhArthakaM ghRutam (10-13) · Śloka 13

ಸಿದ್ಧಾರ್ಥಕವಚಾಹಿಙ್ಗುಪ್ರಿಯಙ್ಗುರಜನೀದ್ವಯಮ್| ಮಞ್ಜಿಷ್ಠಾ ಶ್ವೇತಕಟಭೀ ವರಾ ಶ್ವೇತಾಽದ್ರಿಕರ್ಣಿಕಾ||೧೦|| ನಿಮ್ಬಸ್ಯ ಪತ್ರಂ ಬೀಜಂ ತು ನಕ್ತಮಾಲಶಿರೀಷಯೋಃ| ಸುರಾಹ್ವಂ ತ್ರ್ಯೂಷಣಂ ಸರ್ಪಿರ್ಗೋಮೂತ್ರೇ ತೈಶ್ಚತುರ್ಗುಣೇ||೧೧|| ಸಿದ್ಧಂ ಸಿದ್ಧಾರ್ಥಕಂ ನಾಮ ಪಾನೇ ನಸ್ಯೇ ಚ ಯೋಜಿತಮ್| ಗ್ರಹಾನ್ ಸರ್ವಾನ್ನಿಹನ್ತ್ಯಾಶು ವಿಶೇಷಾದಾಸುರಾನ್ ಗ್ರಹಾನ್||೧೨|| ಕೃತ್ಯಾಲಕ್ಷ್ಮೀವಿಷೋನ್ಮಾದಜ್ವರಾಪಸ್ಮಾರಪಾಪ್ಮ ಚ| |೧೩|

ಸ೦-ಸರ್ಷಪಾದಿ ಗೋಮೂತ್ರೇ ಚತುರ್ಗುಣೇ ಸರ್ಪಿಃ ಸಿದ್ಧಂ ಸಿದ್ಧಾರ್ಥಕಸಂಜ್ಞಂ ಪಾನೇ ನಸ್ಯೇ ಚ ಯೋಜಿತಂ ಸರ್ವಾನ್ ಗ್ರಹಾನ್ ದ್ರಾಕ್ ನಾಶಯತಿ| ವಿಶೇಷೇಣಾಸುರಗ್ರಹಾನ್ ಕೃತ್ಯಾದೀಂಶ್ಚ| ಶ್ವೇತಕಟಭೀ-ಶ್ವೇತಗುಞ್ಜಾ| ಶ್ವೇತಾಽದ್ರಿಕರ್ಣಿಕಾ-ಶುಕ್ಲಾ ಗಿರಿಕರ್ಣಿಕಾ|

Adhikarana sarvagrahanASakaM agadaH (13-14) · Śloka 14

| ಏಭಿರೇವೌಷಧೈರ್ಬಸ್ತವಾರಿಣಾ ಕಲ್ಪಿತೋಽಗದಃ||೧೩|| ಪಾನನಸ್ಯಾಞ್ಜನಾಲೇಪಸ್ನಾನೋದ್ಧರ್ಷಣಯೋಜಿತಃ| ಗುಣೈಃ ಪೂರ್ವವದುದ್ದಿಷ್ಟೋ ರಾಜದ್ವಾರೇ ಚ ಸಿದ್ಧಿಕೃತ್||೧೪||

ಸ೦-ಏಭಿರೇವ ದ್ರವ್ಯೈಶ್ಛಾಗಮೂತ್ರೇಣ ಕಲ್ಪಿತೋಽಗದಃ ಪಾನಾದಿಷು ಯೋಜಿತೋ ಗುಣೈಃ ಪೂರ್ವೇಣ ತುಲ್ಯ ಉಕ್ತೋ ರಾಜದ್ವಾರೇ ಚ ಸಿದ್ಧಿಕರಃ ಸ್ಯಾತ್|

Adhikarana sarvagrahanASakaM siddhArthakAdiguDAH (15-17) · Śloka 17

ಸಿದ್ಧಾರ್ಥಕವ್ಯೋಷವಚಾಶ್ವಗನ್ಧಾ- ನಿಶಾದ್ವಯಂ ಹಿಙ್ಗುಪಲಾಣ್ಡುಕನ್ದಃ| ಬೀಜಂ ಕರಞ್ಜಾತ್, ಕುಸುಮಂ ಶಿರೀಷಾತ್ ಫಲಂ ಚ ವಲ್ಕಂ ಚ ಕಪಿತ್ಥವೃಕ್ಷಾತ್||೧೫|| ಸಮಾಣಿಮನ್ಥಂ ಸನತಂ ಸಕುಷ್ಠಂ ಸ್ಯೋನಾಕಮೂಲಂ ಕಿಣಿಹೀ ಸಿತಾ ಚ| ಬಸ್ತಸ್ಯ ಮೂತ್ರೇಣ ಸುಭಾವಿತಂ ತತ್ ಪಿತ್ತೇನ ಗವ್ಯೇನ ಗುಡಾನ್ ವಿದಧ್ಯಾತ್||೧೬|| ದುಷ್ಟವ್ರಣೋನ್ಮಾದತಮೋನಿಶಾನ್ಧಾ- ನುದ್ಬನ್ಧಕಾನ್ ವಾರಿನಿಮಗ್ನದೇಹಾನ್| ದಿಗ್ಧಾಹತಾನ್ ದರ್ಪಿತಸರ್ಪದಷ್ಟಾಂ- ಸ್ತೇ ಸಾಧಯನ್ತ್ಯಞ್ಜನನಸ್ಯಲೇಪೈಃ||೧೭||

ಸ೦-ಸಿದ್ಧಾರ್ಥಕಾದಿ ಬಸ್ತಮೂತ್ರೇಣ ಸುಭಾವಿತಂ ಗವ್ಯೇನ ಪಿತ್ತೇನ ಗುಡಾನ್-ಗುಡಕಾನ್, ಕುರ್ಯಾತ್| ತೇ ಚ-ಗುಡಕಾಃ, ಅಞ್ಜನನಸ್ಯಲೇಪೈರ್ದುಷ್ಟವ್ರಣಾದೀನ್ ಸಾಧಯನ್ತಿ| ಉಪಜಾತಿವೃತ್ತೇ ಇನ್ದ್ರವಜ್ರಾ ಚ|

Adhikarana skandAdigrahanAshakaM kArpAsAsthyAdidhUpanam (18) · Śloka 18

ಕಾರ್ಪಾಸಾಸ್ಥಿಮಯೂರಪತ್ರಬೃಹತೀನಿರ್ಮಾಲ್ಯಪಿಣ್ಡೀತಕ- ತ್ವಙ್ಮಾಂಸೀವೃಷದಂಶವಿಟ್ತುಷವಚಾಕೇಶಾಹಿನಿರ್ಮೋಕಕೈಃ| ನಾಗೇನ್ದ್ರದ್ವಿಜಶೃಙ್ಗಹಿಙ್ಗುಮರಿಚೈಸ್ತುಲ್ಯೈಃ ಕೃತಂ ಧೂಪನಂ ಸ್ಕನ್ದೋನ್ಮಾದಪಿಶಾಚರಾಕ್ಷಸಸುರಾವೇಶಜ್ವರಘ್ನಂ ಪರಮ್||೧೮||

ಸ೦-ಕಾರ್ಪಾಸಾಸ್ಥ್ಯಾದಿಭಿಃ ಕೃತಂ ಧೂಪನಂ ಸ್ಕನ್ದಾದಿಘ್ನಂ ಪರಂ ಸ್ಯಾತ್| ನಿರ್ಮಾಲ್ಯಂ-ಮಹಾದೇವಸಮ್ಬನ್ಧಿ| ವೃಷದಂಶವಿಟ್-ಮಾರ್ಜಾರವಿಷ್ಠಾ| ಶಾರ್ದೂಲವಿಕ್ರೀಡಿತಂ ವೃತ್ತಮ್|

Adhikarana sarvagrahaghnaM bhUtarAvaM ghRutaM (19) · Śloka 19

ತ್ರಿಕಟುಕದಲಕುಙ್ಕುಮಗ್ರನ್ಥಿಕಕ್ಷಾರಸಿಂಹೀ- ನಿಶಾದಾರುಸಿದ್ಧಾರ್ಥಯುಗ್ಮಾಮ್ಬುಶಕ್ರಾಹ್ವಯೈಃ ಸಿತಲಶುನಫಲತ್ರಯೋಶೀರತಿಕ್ತಾವಚಾ- ತುತ್ಥಯಷ್ಟೀಬಲಾಲೋಹಿತೈಲಾಶಿಲಾಪದ್ಮಕೈಃ| ದಧಿತಗರಮಧೂಕಸಾರಪ್ರಿಯಾಹ್ವಾವಿಷಾಖ್ಯಾ- ವಿಷಾತಾರ್ಕ್ಷ್ಯಶೈಲೈಃ ಸಚವ್ಯಾಮಯೈಃ ಕಲ್ಕಿತೈರ್ಘೃತಮನವಮಶೇಷಮೂತ್ರಾಂಶಸಿದ್ಧಂ ಮತಂ ಭೂತರಾವಾಹ್ವಯಂ ಪಾನತಸ್ತದ್ ಗ್ರಹಘ್ನಂ ಪರಮ್||೧೯||

ಸ೦-ತ್ರಿಕಟುಕಾದಿಭಿಃ ಕಲ್ಕಿತೈಃ ಪುರಾಣಂ ಸರ್ಪಿರಶೇಷಮೂತ್ರಾಣಾಂ- ಗೋಮೂತ್ರಾದೀನಾಂ, ಅಂಶೈಃ ಭಾಗೈಃ, ಸಿದ್ಧಂ ಭೂತರಾವಸಂಜ್ಞಂ ಮತಮ್| ತತ್ ಪಾನೇ(ನತಃ) ಪರಂ ಗ್ರಹಘ್ನಂ ಸ್ಯಾತ್| ದಲಂ-ತಮಾಲಪತ್ರಮ್| ಸಿದ್ಧಾರ್ಥಯುಗ್ಮಂ-ಪೀತಕೃಷ್ಣಭೇದೇನ| ತುತ್ಥಂ-ಕರ್ಪಾರಿಕಾತುತ್ಥಮ್| ಶಕ್ರಾಹ್ವಯಾಃ-ಇನ್ದ್ರಯವಾಃ| ಸಿತಲಶುನಂ-ಶುಕ್ಲರಸೋನಮ್| ಪ್ರಿಯಾಹ್ವಾ-ಕಙ್ಗುಣಿಕಾ| ವಿಷಾಖ್ಯಾ-ಅತಿವಿಷಾ| ವಿಷಾ-ಕಾಕೋಲೀ| "ಪ್ರಥಮಕ ಇಹ ದಣ್ಡಕಶ್ಚಣ್ಡವೃಷ್ಟಿಪ್ರಯಾತೋ ನದ್ವಯಾನಾಪ್ಯನಾಪ್ಯರೈಃ ಸಪ್ತಭಿಃ| ಪ್ರತಿಪದಮಿಹ ವೃದ್ಧಿರೇಫವೃದ್ಧ್ಯಾ ಸ್ಯುರರ್ಣಾರ್ಣವವ್ಯಾಲಬೀಮೂತಲೀಲಾಕರೋದ್ದಾಮಶಙ್ಖಾದಯಃ||

Adhikarana sarvagrahaghnaM mahAbhUtarAvaM ghRutam (20) · Śloka 20

ನತಮಧುಕರಞ್ಜಲಾಕ್ಷಾಪಟೋಲೀಸಮಙ್ಗಾವಚಾ- ಪಾಟಲೀಹಿಙ್ಗುಸಿದ್ಧಾರ್ಥಸಿಂಹೀನಿಶಾಯುಗ್ಲತಾರೋಹಿಣೀ- ಬದರಕಟುಫಲತ್ರಿಕಾಕಾಣ್ಡದಾರುಕೃಮಿಘ್ನಾಜಗನ್ಧಾ- ಮರಾಙ್ಕೋಲ್ಲಕೋಶಾತಕೀಶಿಗ್ರುನಿಮ್ಬಾಮ್ಬುದೇನ್ದ್ರಾಹ್ವಯೈಃ| ಗದಶುಕತರುಪುಷ್ಪಬೀಜೋಗ್ರಯಷ್ಟ್ಯದ್ರಿಕರ್ಣೀನಿಕುಮ್ಭಾ- ಗ್ನಿಬಿಲ್ವೈಃ ಸಮೈಃಕಲ್ಕಿತೈರ್ಮೂತ್ರವರ್ಗೇಣ ಸಿದ್ಧಂ ಘೃತಂ ವಿಧಿವಿನಿಹಿತಮಾಶು ಸರ್ವೈಃ ಕ್ರಮೈರ್ಯೋಜಿತಂ ಹನ್ತಿ ಸರ್ವಗ್ರಹೋನ್ಮಾದಕುಷ್ಠಜ್ವರಾಂಸ್ತನ್ಮಹಾಭೂತರಾವಂ ಸ್ಮೃತಮ್||೨೦||

ಸ೦-ನತಾದಿಭಿರ್ಮೂತ್ರವರ್ಗೇಣ-ಗೋಮೂತ್ರಾದಿಮೂತ್ರಕದಮ್ಬಕೇನ, ಸರ್ಪಿಃ ಪಕ್ವಂ ವಿಧಿವಿನಿಹಿತಂ ಸರ್ವೈಃ ಕ್ರಮೈಃ-ಅಭ್ಯಙ್ಗಪಾನನಸ್ಯಾದಿಭಿಃ, ಯೋಜಿತಂ ಶೀಘ್ರಂ ಸರ್ವಾನ್ ಗ್ರಹಾದೀನ್ ಹನ್ತಿ| ಏತಚ್ಚ ಮಹಾಭೂತರಾವಸಂಜ್ಞಂ ಘೃತಮ್| ದಣ್ಡಕೋ ವ್ಯಾಲಾಖ್ಯಃ|

Adhikarana grahagrahaNadine balyAdi (21) · Śloka 21

ಗ್ರಹಾ ಗೃಹ್ಣನ್ತಿ ಯೇ ಯೇಷು ತೇಷಾಂ ತೇಷು ವಿಶೇಷತಃ| ದಿನೇಷು ಬಲಿಹೋಮಾದೀನ್ ಪ್ರಯುಞ್ಜೀತ ಚಿಕಿತ್ಸಕಃ||೨೧||

ಸ೦-ಯೇಷು ದಿನೇಷು ಗ್ರಹಾ ಗೃಹ್ಣನ್ತಿ ತೇಷು ದಿನೇಷು ತೇಷಾಂ ಗ್ರಹಾಣಾಂ ವಿಶೇಷೇಣ ಬಲಿಹೋಮಾದೀನ್ ಭಿಷಕ್ ಪ್ರಯುಞ್ಜೀತ|

Adhikarana sarvagrahANAM sAmAnyo vidhiH (22) · Śloka 22

ಸ್ನಾನವಸ್ತ್ರವಸಾಮಾಂಸಮದ್ಯಕ್ಷೀರಗುಡಾದಿ ಚ| ರೋಚತೇ ಯದ್ಯದಾ ಯೇಭ್ಯಸ್ತತ್ತೇಷಾಮಾಹರೇತ್ತದಾ||೨೨||

ಸ೦-ಸ್ನಾನವಸ್ತ್ರಾದಿ ಯದ್ಯೇಭ್ಯೋ ಗ್ರಹೇಭ್ಯೋ ರೋಚತೇ ತತ್ತೇಭ್ಯಸ್ತಸ್ಮಿನ್ ದಿನೇ ದದ್ಯಾತ್|

Adhikarana surAdibhyo balidAnasthAnAni (23) · Śloka 23

ರತ್ನಾನಿ ಗನ್ಧಮಾಲ್ಯಾನಿ ಬೀಜಾನಿ ಮಧುಸರ್ಪಿಷೀ| ಭಕ್ಷ್ಯಾಶ್ಚ ಸರ್ವೇ ಸರ್ವೇಷಾಂ ಸಾಮಾನ್ಯೋ ವಿಧಿರಿತ್ಯಯಮ್||೨೩||

ಸ೦-ತಥಾ ರತ್ನಾದೀನಿ ತಥಾ ಬೀಜಾನಿ-ಯವಾದೀನಿ, ಮಧುಸರ್ಪಿಷೀ ಸರ್ವೇ ಚ ಭಕ್ಷ್ಯಾಃ ಸರ್ವೇಷಾಂ ಗ್ರಹಾಣಾಮ್| ಇತ್ಯಯಂ ಸಾಮಾನ್ಯೋ ವಿಧಿಃ|

Adhikarana devAnAmiShTo baliH (24-28) · Śloka 28

ಸುರರ್ಷಿಗುರುವೃದ್ಧೇಭ್ಯಃ ಸಿದ್ಧೇಭ್ಯಶ್ಚ ಸುರಾಲಯೇ| ದಿಶ್ಯುತ್ತರಸ್ಯಾಂ ತತ್ರಾಪಿ ದೇವಾಯೋಪಹರೇದ್ಬಲಿಮ್||೨೪|| ಪಶ್ಚಿಮಾಯಾಂ ಯಥಾಕಾಲಂ ದೈತ್ಯಭೂತಾಯ ಚತ್ವರೇ| ಗನ್ಧರ್ವಾಯ ಗವಾಂ ಮಾರ್ಗೇ ಸವಸ್ತ್ರಾಭರಣಂ ಬಲಿಮ್||೨೫|| ಪಿತೃನಾಗಗ್ರಹೇ ನದ್ಯಾಂ ನಾಗೇಭ್ಯಃ ಪೂರ್ವದಕ್ಷಿಣೇ| ಯಕ್ಷಾಯ ಯಕ್ಷಾಯತನೇ ಸರಿತೋರ್ವಾ ಸಮಾಗಮೇ||೨೬|| ಚತುಷ್ಪಥೇ ರಾಕ್ಷಸಾಯ ಭೀಮೇಷು ಗಹನೇಷು ಚ| ರಕ್ಷಸಾಂ ದಕ್ಷಿಣಸ್ಯಾಂ ತು ಪೂರ್ವಸ್ಯಾಂ ಬ್ರಹ್ಮರಕ್ಷಸಾಮ್||೨೭|| ಶೂನ್ಯಾಲಯೇ ಪಿಶಾಚಾಯ ಪಶ್ಚಿಮಾಂ ದಿಶಮಾಸ್ಥಿತೇ| |೨೮|

ಸ೦-ಸುರಾದಿಭ್ಯಃ ಪಞ್ಚಭ್ಯಃ ಸುರಾಲಯೇ ಬಲಿಂ ದದ್ಯಾತ್| ತತ್ರಾಪಿ ದೇವಾಯೋತ್ತರಸ್ಯಾಂ ಬಲಿಮುಪಹರೇತ್| ದೈತ್ಯಭೂತಾಯ ಪಶ್ಚಿಮಾಯಾಂ ದಿಶಿಚತ್ವರೇ ಬಲಿಮುಪಹರೇತ್| ಗವಾಂ ಪಥಿ ವಸ್ತ್ರಾಭರಣಸಹಿತಂ ಬಲಿಂ ಗನ್ಧರ್ವಾಯೋಪಹರೇತ್| ಪಿತೃನಾಗಗ್ರಹೇಭ್ಯೋ ನದ್ಯಾಂ ಬಲಿಂ ದದ್ಯಾತ್| ನಾಗೇಭ್ಯಃ ಪೂರ್ವದಕ್ಷಿಣದೇಶೇ ಬಲಿಂ ದದ್ಯಾತ್| ಯಕ್ಷಾಯ ಯಕ್ಷಪ್ರಾಸಾದೇ ಅಥವಾ ಸರಿತೋಃ-ನದ್ಯೋಃ, ಸಮಾಗಮೇ ಬಲಿಮುಪಹರೇತ್| ರಾಕ್ಷಸಶಬ್ದೇನೇಹ ಬ್ರಹ್ಮರಾಕ್ಷಸೋ ಗೃಹ್ಯತೇ| ರಾಕ್ಷಸಾಯ ಚತುಷ್ಪಥೇ ಭಯಾನಕೇಷು ವನೇಷು ಚ ಬಲಿಂ ದದ್ಯಾತ್| ದಕ್ಷಿಣಸ್ಯಾಂ ತು ದಿಶಿ ರಾಕ್ಷಸಾನಾಂ ಬಲಿಂ ದದ್ಯಾತ್| ಪೂರ್ವಸ್ಯಾಂ ದಿಶಿ ಬ್ರಹ್ಮರಕ್ಷಸಾಮ್| ಶೂನ್ಯಾಲಯೇ ಪಶ್ಚಿಮಾಂ ದಿಶಮಾಸ್ಥಿತೇ ಪಿಶಾಚಾಯ ಬಲಿಂ ದದ್ಯಾತ್|

Adhikarana devagrahamokShaNaM hiMgvAdighRutam (28-30) · Śloka 30

| ಶುಚಿಶುಕ್ಲಾನಿ ಮಾಲ್ಯಾನಿ ಗನ್ಧಾಃ ಕ್ಷೈರೇಯಮೋದನಮ್||೨೮|| ದಧಿ ಛತ್ರಂ ಚ ಧವಲಂ ದೇವಾನಾಂ ಬಲಿರಿಷ್ಯತೇ| ಹಿಙ್ಗುಸರ್ಷಪಷಡ್ಗ್ರನ್ಥಾವ್ಯೋಷೈರರ್ಧಪಲೋನ್ಮಿತೈಃ||೨೯|| ಚತುರ್ಗುಣೇ ಗವಾಂ ಮೂತ್ರೇ ಘೃತಪ್ರಸ್ಥಂ ವಿಪಾಚಯೇತ್| ತತ್ಪಾನನಾವನಾಭ್ಯಙ್ಗೈರ್ದೇವಗ್ರಹವಿಮೋಕ್ಷಣಮ್||೩೦||

ಸ೦-ಶುಚಿಶುಕ್ಲಮಾಲ್ಯಾದಿಕಂ ಚ ದೇವಾನಾಂ ಬಲಿರಿಷ್ಯತೇ| ಸ೦-ಹಿಂಗ್ವಾದಿಭಿರರ್ಧಪಲಿಕೈಃ ಸರ್ಪಿಃಪ್ರಸ್ಥಂ ಚತುರ್ಗುಣೇ ಗೋಮೂತ್ರೇ ವಿಪಾಚಯೇತ್| ತತ್ಪಾನಾದಿಭಿರ್ದೇವಗ್ರಹವಿಮೋಕ್ಷಣಂ ಸ್ಯಾತ್|

Adhikarana devagrahamokShaNaM vacAdinasyA~jjanam (31) · Śloka 31

ನಸ್ಯಾಞ್ಜನಂ ವಚಾಹಿಙ್ಗುಲಶುನಂ ಬಸ್ತವಾರಿಣಾ| |೩೧|

ಸ೦-ವಚಾಹಿಙ್ಗುಲಶುನಂ ಛಾಗಮೂತ್ರೇಣ ನಸ್ಯಮಞ್ಜನಂ ಚ ದದ್ಯಾತ್|

Adhikarana daityAnAmiShTo baliH (31) · Śloka 31

| ದೈತ್ಯೇ ಬಲಿರ್ಬಹುಫಲಃ ಸೋಶೀರಕಮಲೋತ್ಪಲಃ||೩೧||

ಸ೦-ದೈತ್ಯಗ್ರಹೇ ಬಲಿರ್ಬಹೂನಿ ಫಲಾನಿ ಯಸ್ಮಿನ್, ತಥೋಶೀರಕಮಲೋತ್ಪಲೈರ್ಯುಕ್ತೋ ದೇಯಃ|

Adhikarana nAgAnAmiShTo baliH nAgAnAmiShTo SvetapatrAdinasyA~jjanam (32-34) · Śloka 34

ನಾಗಾನಾಂ ಸುಮನೋಲಾಜಗುಡಾಪೂಪಗುಡೌದನೈಃ| ಪರಮಾನ್ನಮಧುಕ್ಷೀರಕೃಷ್ಣಮೃನ್ನಾಗಕೇಸರೈಃ||೩೨|| ವಚಾಪದ್ಮಪುರೋಶೀರರಕ್ತೋತ್ಪಲದಲೈರ್ಬಲಿಃ| ಶ್ವೇತಪತ್ರಂ ಚ ರೋಧ್ರಂ ಚ ತಗರಂ ನಾಗಸರ್ಷಪಾಃ||೩೩|| ಶೀತೇನ ವಾರಿಣಾ ಪಿಷ್ಟಂ ನಾವನಾಞ್ಜನಯೋರ್ಹಿತಮ್| |೩೪|

ಸ೦-ನಾಗಾನಾಂ ಸುಮನೋಲಾಜಾದಿಭಿರ್ಬಲಿರ್ದೇಯಃ| ಶ್ವೇತಪತ್ರಾದಯಃ ಶೀತಲಜಲಪಿಷ್ಟಾ ನಸ್ಯೇಽಞ್ಜನೇ ಚ ಹಿತಾಃ| ಶ್ವೇತಪತ್ರಂ ಶುಕ್ಲ ಪುಣ್ಡರೀಕಮ್|

Adhikarana yakShANAmiShTo baliH (34-35) · Śloka 35

| ಯಕ್ಷಾಣಾಂ ಕ್ಷೀರದಧ್ಯಾಜ್ಯಮಿಶ್ರಕೌದನಗುಗ್ಗುಲು||೩೪|| ದೇವದಾರೂತ್ಪಲಂ ಪದ್ಮಮುಶೀರಂ ವಸ್ತ್ರಕಾಞ್ಚನಮ್| ಹಿರಣ್ಯಂ ಚ ಬಲಿರ್ಯೋಜ್ಯೋ|೩೫|

ಸ೦-ಯಕ್ಷಾಣಾಂ ಕ್ಷೀರಾದಿಭಿರ್ಬಲಿರ್ಯೋಜ್ಯಃ|

Adhikarana yakShANAM mUtrAdi pAnanasyA~jjanam (35-36) · Śloka 36

| ಮೂತ್ರಾಜ್ಯಕ್ಷೀರಮೇಕತಃ||೩೫|| ಸಿದ್ಧಂ ಸಮೋನ್ಮಿತಂ ಪಾನನಾವನಾಭ್ಯಞ್ಜನೇ ಹಿತಮ್| |೩೬|

ಸ೦-ಗೋಮೂತ್ರಕ್ಷೀರಘೃತಂ ತುಲ್ಯಪ್ರಮಾಣಮೇಕಸ್ಮಿನ್ ಪಕ್ವಂ ನಸ್ಯಾಭ್ಯಞ್ಜನಯೋರ್ಹಿತಮ್|

Adhikarana yakShANAM harItakyAdi pAnanasyA~jjanam (36-37) · Śloka 37

| ಹರಿತಕೀ ಹರಿದ್ರೇ ದ್ವೇ ಲಶುನೋ ಮರಿಚಂ ವಚಾ||೩೬|| ನಿಮ್ಬಪತ್ರಮ್ ಚ ಬಸ್ತಾಮ್ಬುಕಲ್ಕಿತಂ ನಾವನಾಞ್ಜನಮ್| |೩೭|

ಸ೦-ಹರೀತಕ್ಯಾದಿ ಛಾಗಮೂತ್ರೇಣ ಪಿಷ್ಟಂ ನಾವನಾಞ್ಜನೇ ಹಿತಮ್|

Adhikarana brahmarAkShasAnAmiShTo baliH (37-38) · Śloka 38

| ಬ್ರಹ್ಮರಕ್ಷೋಬಲಿಃ ಸಿದ್ಧಂ ಯವಾನಾಂ ಪೂರ್ಣಮಾಢಕಮ್||೩೭|| ತೋಯಸ್ಯ ಕುಮ್ಭಃ ಪಲಲಂ ಛತ್ರಂ ವಸ್ತ್ರಂ ವಿಲೇಪನಮ್| ||೩೮||

ಸ೦-ಪಕ್ವಂ ಯವಾನಾಮಾಢಕಂ-ಪಾತ್ರಂ, ಪೂರ್ಣಂ ಜಲಕುಮ್ಭಃ ಪಲಲಂ ಛತ್ರಂ ವಸ್ತ್ರಂ ಪ್ರಲೇಪನಮಿತಿ ಬ್ರಹ್ಮರಾಕ್ಷಸಾಯ ಬಲಿಂ ದದ್ಯಾತ್| ಯವಾನಾಂ ಪೂರ್ಣಂ ಸಿದ್ಧಮಾಢಕಂ-ಪಕ್ವಪಾತ್ರಂ, ಯವೈಃ ಪೂರ್ಣಂ ಪಕ್ವಪಾತ್ರಮಿತ್ಯರ್ಥಃ| ಪೂರಣಾರ್ಥೇಽತ್ರಷಷ್ಠೀ| ಆಢಕಶಬ್ದೋಽತ್ರ ಪಾತ್ರವಾಚಕೋ ನ ತು ಮಾನವಾಚಕಃ| ಪಕ್ವಪಾತ್ರಂ-ಪಕ್ವಶರಾವಮಿತಿ

Adhikarana rAkShasAnAM naktamAlAdyagadaH (41-43) · Śloka 43

| ನಕ್ತಮಾಲಶಿರೀಷತ್ವಙ್ಮೂಲಪುಷ್ಪಫಲಾನಿ ಚ||೪೧|| ತದ್ವಚ್ಚ ಕೃಷ್ಣಪಾಟಲ್ಯಾ ಬಿಲ್ವಮೂಲಂ ಕಟುತ್ರಿಕಮ್| ಹಿಂಗ್ವಿನ್ದ್ರಯವಸಿದ್ಧಾರ್ಥಲಶುನಾಮಲಕೀಫಲಮ್||೪೨|| ನಾವನಾಞ್ಜನಯೋರ್ಯೋಜ್ಯೋ ಬಸ್ತಮೂತ್ರಯುತೋಽಗದಃ| |೪೩|

ಸ೦-ನಕ್ತಮಾಲಾದಿಕಂ ಬಸ್ತಮೂತ್ರೇಣ ಯುತಮಗದೋ ನಸ್ಯಾಭ್ಯಞ್ಜನಯೋರ್ಯೋಜ್ಯಃ|

Adhikarana rAkShasAnAM naktamAlAdighRutam (43-44) · Śloka 44

| ಏಭಿರೇವ ಘೃತಂ ಸಿದ್ಧಂ ಗವಾಂ ಮೂತ್ರೇ ಚತುರ್ಗುಣೇ||೪೩|| ರಕ್ಷೋಗ್ರಹಾನ್ ವಾರಯತೇ ಪಾನಾಭ್ಯಞ್ಜನನಾವನೈಃ| |೪೪|

ಸ೦-ಏಭಿರೇವ ದ್ರವ್ಯೈರ್ಘೃತಂ ಗೋಮೂತ್ರೇ ಚತುರ್ಗುಣೇ ಸಿದ್ಧಂ ಪಾನಾದಿಭೀ ರಕ್ಷೋಗ್ರಹನಿವಾರಣಂ ಸ್ಯಾತ್|

Adhikarana piSAcAnAmiShTo baliH (44-45) · Śloka 45

| ಪಿಶಾಚಾನಾಂ ಬಲಿಃ ಸೀಧುಃ ಪಿಣ್ಯಾಕಃ ಪಲಲಂ ದಧಿ||೪೪|| ಮೂಲಕಂ ಲವಣಂ ಸರ್ಪಿಃ ಸಭೂತೌದನಯಾವಕಮ್| |೪೫|

ಸ೦-ಪಿಶಾಚಾನಾಂ ಸೀಧ್ವಾದಿಭಿರ್ಬಲಿರ್ದೇಯಃ|

Adhikarana pishAcAnAmiShTo haridrAdighRutam (45-47) · Śloka 47

| ಹರಿದ್ರಾದ್ವಯಮಞ್ಜಿಷ್ಠಾಮಿಶಿಸೈನ್ಧವನಾಗರಮ್||೪೫|| ಹಿಙ್ಗುಪ್ರಿಯಙ್ಗುತ್ರಿಕಟುರಸೋನತ್ರಿಫಲಾ ವಚಾ| ಪಾಟಲೀಶ್ವೇತಕಟಭೀಶಿರೀಷಕುಸುಮೈರ್ಘೃತಮ್||೪೬|| ಗೋಮೂತ್ರಪಾದಿಕಂ ಸಿದ್ಧಂ ಪಾನಾಭ್ಯಞ್ಜನಯೋರ್ಹಿತಮ್| |೪೭|

ಸ೦-ಹರಿದ್ರಾದ್ವಯಾದಿಭಿರ್ಗೋಮೂತ್ರಪಾದಿಕಂ ಘೃತಂ ಪಕ್ವಂ ಪಾನಾಭ್ಯಞ್ಜನಯೋರ್ಹಿತಮ್|

Adhikarana pishAcAnAmiShTo haridrAdi nAvanA~jjanam (47) · Śloka 47

| ಬಸ್ತಾಮ್ಬುಪಿಷ್ಟೈಸ್ತೈರೇವ ಯೋಜ್ಯಮಞ್ಜನನಾವನಮ್||೪೭||

ಸ೦-ಬಸ್ತಾಮ್ಬುಪಿಷ್ಟೈರೇತೈರೇವ ದ್ರವ್ಯೈರ್ನಸ್ಯಮಞ್ಜನಂ ಚ ಹಿತಮುಕ್ತಮ್|

Adhikarana devarShipitRugandharve varjyAvarjyam (48) · Śloka 48

ದೇವರ್ಷಿಪಿತೃಗನ್ಧರ್ವೇ ತೀಕ್ಷ್ಣಂ ನಸ್ಯಾದಿ ವರ್ಜಯೇತ್| ಸರ್ಪಿಷ್ಪಾನಾದಿ ಮೃದ್ವಸ್ಮಿನ್ ಭೈಷಜ್ಯಮವಚಾರಯೇತ್||೪೮||

ಸ೦-ದೇವರ್ಷಿಪಿತೃಗನ್ಧರ್ವೇ ತೀಕ್ಷ್ಣಂ ನಸ್ಯಾದಿ ನ ಯೋಜಯೇತ್| ಮೃದು ಸರ್ಪಿಷ್ಪಾನಾದಿಕಮೌಷಧಮತ್ರ ಯೋಜ್ಯಮ್|

Adhikarana pishAcAdRute sarveShvanukUlAcaraNam (49) · Śloka 49

ಋತೇ ಪಿಶಾಚಾತ್ಸರ್ವೇಷು ಪ್ರತಿಕೂಲಂ ಚ ನಾಚರೇತ್| ಸವೈದ್ಯಮಾತುರಂ ಘ್ನನ್ತಿ ಕ್ರುದ್ಧಾಸ್ತೇ ಹಿ ಮಹೌಜಸಃ||೪೯||

ಸ೦-ಸರ್ವೇಷು ಚ ಗ್ರಹೇಷು ಪಿಶಾಚಮನ್ತರೇಣ ಪ್ರತಿಕೂಲಂ ನಾಚರೇತ್| ತೇ ಹಿ ದೇವಾದಯೋ ಮಹೌಜಸಃ ಪ್ರತಿಕೂಲಾಚರಣಾತ್ ಕ್ರುದ್ಧಾಃ ಸನ್ತಃ ವೈದ್ಯಸಹಿತಮಾತುರಂ ಘ್ನನ್ತಿ|

Adhikarana sarvagrahanASako ISvarAdi japaH (50-51) · Śloka 51

ಈಶ್ವರಂ ದ್ವಾದಶಭುಜಂ ನಾಥಮಾರ್ಯಾವಲೋಕಿತಮ್| ಸರ್ವವ್ಯಾಧಿಚಿಕಿತ್ಸಾಂ ಚ ಜಪನ್ ಸರ್ವಗ್ರಹಾನ್ ಜಯೇತ್||೫೦|| ತಥೋನ್ಮಾದಾನಪಸ್ಮಾರಾನನ್ಯಂ ವಾ ಚಿತ್ತವಿಪ್ಲವಮ್| |೫೧|

ಸ೦-ಈಶ್ವರಂ ದ್ವಾದಶಭುಜಂ ನಾಥಮಾರ್ಯಾವಲೋಕಿತಂ ತಥಾ ಸರ್ವವ್ಯಾಧಿಚಿಕಿತ್ಸಿತಮಿತ್ಯಾದಿ ಜಪನ್ ಸರ್ವಾನ್ ಗ್ರಹಾನುನ್ಮಾದಾದೀಂಶ್ಚ ಪರಾಕರೋತಿ|

Adhikarana sarvagrahanAshako mAyUrImahAvidyAshravaNam (51) · Śloka 51

| ಮಹಾವಿದ್ಯಾಂ ಚ ಮಾಯೂರೀಂ ಶುಚಿಂ ತಂ ಶ್ರಾವಯೇತ್ಸದಾ||೫೧||

ಸ೦-ಮಾಯುರೀಂ ಮಹಾವಿದ್ಯಾಂ ತಂ-ಗ್ರಹಗೃಹೀತಂ, ಶುಚಿಂ ಸನ್ತಂ ಸತತಂ ಶ್ರಾವಯೇತ್|

Adhikarana sarvagrahanAshako bhUteshAdipUjanaM tanmantrajapashca (52) · Śloka 52

ಭೂತೇಶಂ ಪೂಜಯೇತ್ ಸ್ಥಾಣುಂ ಪ್ರಮಥಾಖ್ಯಾಂಶ್ಚ ತದ್ಗಣಾನ್| ಜಪನ್ ಸಿದ್ಧಾಂಶ್ಚ ತನ್ಮನ್ತ್ರಾನ್ ಗ್ರಹಾನ್ ಸರ್ವಾನಪೋಹತಿ||೫೨||

ಸ೦-ತಥಾ ಸ್ಥಾಣುಂ ಭೂತಾಧಿಪಂ ಪೂಜಯೇತ್| ತಥಾ ತಸ್ಯ ಗಣಾನ್ ಪ್ರಮಥಸಂಜ್ಞಾನ್ ಪೂಜಯೇತ್ ಗ್ರಹಾನ್ ಪರಾಕರೋತಿ| | ಸಿದ್ಧಾಂಶ್ಚ ತನ್ಮನ್ತ್ರಾನ್ ಜಪನ್ ಸರ್ವಾನ್

Adhikarana sarvagrahanAshako vakShamANAdhyAyayorukta upakramaH (5) · Śloka 5

ಯಚ್ಚಾನನ್ತರಯೋಃ ಕಿಞ್ಚಿದ್ವಕ್ಷ್ಯತೇಽಧ್ಯಾಯಯೋರ್ಹಿತಮ್| ಯಚ್ಚೋಕ್ತಮಿಹ ತತ್ಸರ್ವಂ ಪ್ರಯುಞ್ಜೀತ ಪರಸ್ಪರಮ್||೫೩|| ಇತಿ ಶ್ರೀವೈದ್ಯಪತಿಸಿಂಹಗುಪ್ತಸೂನುಶ್ರೀಮದ್ವಾಗ್ಭಟವಿರ- ಚಿತಾಯಾಮಷ್ಟಾಙ್ಗಹೃದಯಸಂಹಿತಾಯಾಂ ಷಷ್ಠೇ ಉತ್ತರ- ಸ್ಥಾನೇ ಭೂತಪ್ರತಿಷೇಧೋ ನಾಮ ಪಞ್ಚಮೋಽಧ್ಯಾಯಃ||೫||

ಸ೦-ಯದಪ್ಯ್ನನ್ತರಯೋರಧ್ಯಾಯಯೋಃ-ಉನ್ಮಾದಾಪಸ್ಮಾರಪ್ರತಿಷೇಧಾಖ್ಯಯೋಃ, ವಕ್ಷ್ಯತಿ-ಭಣಿಷ್ಯತಿ, ತಚ್ಚಾತ್ರ ಹಿತಮ್| ಯಚ್ಚ,[ಇಹ-]ಅಸ್ಮಿನ್ನಧ್ಯಾಯೇ, ದೇವಗ್ರಹಾದೀನಾಂ ಪೃಥಕ್ ಚಿಕಿತ್ಸಿತಂ ಕಥಿತಂ ತದಪಿ ಪರಸ್ಪರಂ ಗ್ರಹಾಣಾಂ ಪ್ರಯುಞ್ಜೀತೇತಿ| ಇತಿ ಶ್ರೀಮೃಗಾಙ್ಕದತ್ತಪುತ್ರಶ್ರೀಮದರುಣದತ್ತವಿರಚಿತಾಯಾಮಷ್ಟಾಙ್ಗಹೃದಯ- ಟೀಕಾಯಾಂ ಸರ್ವಾಙ್ಗಸುನ್ದರಾಖ್ಯಾಯಾಂ ಷಷ್ಠೇ ಉತ್ತರಸ್ಥಾನೇ ಭೂತ- ಪ್ರತಿಷೇಧೋ ನಾಮ ಪಞ್ಚಮೋಽಧ್ಯಾಯಃ ಸಮಾಪ್ತಃ|| ೫||