33. guhyarōgavijñānīyādhyāyaḥ

Adhikarana adhyAyopakramaH · Śloka

Adhikarana guhyarogavij~jAnIyAdhyAyaH - guhyarogANAM nidAnaM samprAtpistrayoviMshatividhatvaM ca (2-5) · Śloka 5

অথাতো গুহ্যরোগবিজ্ঞানীযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২|| স্ত্রীব্যবাযনিবৃত্তস্য সহসা ভজতোঽথবা| দোষাধ্যুষিতসঙ্কীর্ণমলিনাণুরজঃ পথাম্||১|| অন্যযোনিমনিচ্ছন্তীমগম্যাং নবসূতিকাম্| দূষিতং স্পৃশতস্তোযং রতান্তেষ্বপি নৈব বা||২|| বিবর্ধযিষযা তীক্ষ্ণান্ প্রলেপাদীন্ প্রযচ্ছতঃ| মুষ্টিদন্তনখোত্পীডাবিষবচ্ছূকপাতনৈঃ||৩|| বেগনিগ্রহদীর্ঘাতিখরস্পর্শবিঘট্টনৈঃ| দোষা দুষ্টা গতা গুহ্যং ত্রযোবিংশতিমামযান্||৪|| জনযন্ত্যুপদংশাদীন্| |৫|

স০- বনিতাসম্ভোগান্নিবৃত্তস্য সহসা-অকস্মাদেব, স্ত্রীব্যবাযং ভজতঃ| কেচিত্ করাদিনৈব ব্যবাযাভাসং কুর্বন্তি তন্নিবৃত্ত্যৈ স্ত্রীগ্রহণম্| অথবেতি বক্ষ্যমাণগুণাং স্ত্রিযং সেবমানস্য| কিম্ভূতাম্ ? বাতাদ্যধিষ্ঠিতস্তথা সঙ্কীর্ণঃ-সঙ্কটো, মলিনোঽণুঃ-সূক্ষ্মো, রজোমার্গো যস্যাস্তাং তথাবিধাং স্ত্রিযম্| তথাঽন্যযোনি-মহিষ্যাদিম্| তথাঽনভিলষন্তীম্| তথাঽগম্যাং-ভগিন্যাদিম্| তথা নবপ্রসূতাম্| তথা দূষিতং সবিষজন্ত্বাদিভির্জলং স্পৃশতো, রতান্তেষ্বপি নৈব বা জলং স্পৃশতঃ| বিবর্ধযিতুমিচ্ছযা তীক্ষ্ণান্ প্রলেপসেকাদীন্ বা প্রকৃতত্বাত্ গুহ্যে প্রযচ্ছতঃ| তথা মুষ্ট্যাদিপাতনৈস্তথা বেগরোধনেন তথা দীর্ঘাতিখরস্পর্শনেন চ যানি বিঘট্টনানি, তৈরেব দোষা দুষ্টা গুহ্যং প্রাপ্তাস্ত্রযোবিংশতি বক্ষ্যমাণান্ উপদংশাদীন্ কুর্বন্তি|

Adhikarana 1 upadaMshasya pa~jcavidhatvam (5) · Śloka 5

উপদংশোঽত্র পঞ্চধা| পৃথগ্দোষৈঃ সরুধিরৈঃ সমস্তৈশ্চ|৫|

স০- অত্র-এষু মধ্যে, উপদংশঃ পঞ্চপ্রকারঃ| কথম্? ইত্যাহ-দোষৈঃ পৃথক্ ত্রযঃ, রক্তেন চতুর্থঃ, সন্নিপাতেন পঞ্চমঃ|

Adhikarana 1 vAtajasya upadaMshasya lakShaNam (5-6) · Śloka 6

| অত্র মারুতাত্||৫|| মেঢ্রে শোফো রুজশ্চিত্রাঃ স্তম্ভস্ত্বক্পরিপোটনম্| |৬|

স০-এষাং মধ্যে বাতেনোপদংশে মেঢ্রে শোফো ভবতি| দারুণাঃ পীডাঃ স্তম্ভস্তথা ত্বচঃ পরিপোটনম্|

Adhikarana 2 pittajasya upadaMshasya lakShaNam (6) · Śloka 6

| পক্বোদুম্বরসঙ্কাশঃ পিত্তেন শ্বযথুর্জ্বরঃ||৬||

স০-পিত্তেন শ্বযথুঃ পক্বোদুম্বরফলনিভো জ্বরশ্চ স্যাত্|

Adhikarana 3 kaphajasya upadaMshasya lakShaNam (7) · Śloka 7

শ্লেষ্মণা কঠিনঃ স্নিগ্ধঃ কণ্ডূমান্ শীতলো গুরুঃ| |৭|

স০-শ্লেষ্মণা শ্বযথুঃ কঠিনাদিগুণঃ স্যাত্|

Adhikarana 4 raktajasya upadaMshasya lakShaNam (7) · Śloka 7

| শোণিতেনাসিতস্ফোটসম্ভবোঽস্রস্রুতির্জ্বরঃ||৭||

স০-লোহিতেন কৃষ্ণস্ফোটসম্ভবাদযঃ স্যুঃ|

Adhikarana 5 sarvajasya upadaMshasya lakShaNam (8) · Śloka 8

সর্বজে সর্বলিঙ্গত্বং শ্বযথুর্মুষ্কযোরপি| তীব্রা রুগাশুপচনং দরণং কৃমিসম্ভবঃ||৮||

স০- সর্বদোষজে সর্বলিঙ্গত্বং শ্বযথুশ্চ মুষ্কযোঃ স্যাত্| তীব্রা রুক্ শীঘ্রপাকাদিশ্চ|

Adhikarana eteShAM sAdhyAsAdhyatvam (9) · Śloka 9

যাপ্যো রক্তোদ্ভবস্তেষাং মৃত্যবে সন্নিপাতজঃ| |৯|

স০-এতেষাং মধ্যে রক্তজো যাপ্যঃ| সন্নিপাতোত্থো মৃত্যুহেতুঃ|

Adhikarana 2 arshasAM lakShaNam (9-11) · Śloka 11

| জাযন্তে কুপিতৈর্দোষৈর্গুহ্যাসৃক্পিশিতাশ্রযৈঃ||৯|| অন্তর্বহির্বা মেঢ্রস্য কণ্ডূলা মাংসকীলকাঃ| পিচ্ছিলাস্রস্রবা যোনৌ তদ্বচ্চ চ্ছত্রসন্নিভাঃ||১০|| তেঽর্শাংস্যুপেক্ষযা ঘ্নন্তি মেঢ্রপুংস্ত্বং ভগার্তবম্| |১১|

সং-দোষৈর্গুহ্যরক্তমাংসাশ্রযৈঃ ক্রুদ্ধৈর্মেঢ্রস্যান্তর্বহির্বা কণ্ডূলা মাংসকীলকাঃ-শঙ্কবো, জাযন্তে| তথা পিচ্ছিলরক্তস্রাবিণঃ| তথৈব যোনৌ ছত্রসদৃশাঃ স্যুঃ| তে মাংসকীলা অর্শাংসি গদ্যন্তে| উপেক্ষিতাশ্চ মেঢ্রে জাতাঃ পুংস্ত্বং ঘ্নন্তি| ভগে জাতা আর্তবং ঘ্নন্তি|

Adhikarana 3 sarShapikAnAM lakShaNam (11-12) · Śloka 12

| গুহ্যস্য বহিরন্তর্বা পিটিকাঃ কফরক্তজাঃ||১১|| সর্ষপামানসংস্থানা ঘনাঃ সর্ষপিকাঃ স্মৃতাঃ| |১২|

স০-গুহ্যস্য বাহ্যতোঽন্তরে বা কফরক্তজাঃ পিটিকাঃ সর্ষপপ্রমণাঃ সর্ষপাকারা ঘনাঃ সর্ষপিকাঃ স্মৃতাঃ|

Adhikarana 4 avamanthasya lakShaNam (12-13) · Śloka 13

| পিটিকা বহবো দীর্ঘা দীর্যন্তে মধ্যতশ্চ যাঃ||১২|| সোঽবমন্থঃ কফাসৃগ্ভ্যাং বেদনারোমহর্ষবান্| |১৩|

স০-পিটিকা বহবো দীর্ঘা মধ্যে চ যা দীর্যন্তে, সোঽবমন্থো বেদনারোমাঞ্চবান্ কফরক্তাভ্যাং স্যাত্|

Adhikarana 5 kumbhIkAyAH lakShaNam (13) · Śloka 13

| কুম্ভীকা রক্তপিত্তোত্থা জাম্ববাস্থিনিভাঽঽশুজা||১৩||

স০-জাম্ববাস্থিরূপা কুম্ভীকা রক্তপিত্তোদ্ভবা শীঘ্রোত্পত্তিশ্চ|

Adhikarana 6 alajyAH lakShaNam (14) · Śloka 14

অলজীং মেহবদ্বিদ্যাদ্| |১৪|

স০-অলজীং প্রমেহে যথা, তথাঽস্মিন্নপি বিদ্যাত্|

Adhikarana 7 uttamAyAH lakShaNam (14) · Śloka 14

উত্তমাং পিত্তরক্তজাম্| পিটিকাং মাষমুদ্গাভাং|১৪|

স০-উত্তমাখ্যাং পিত্তরক্তজাং মেঢ্রপিটিকাং মাষসমাং মুদ্গাভাং বিদ্যাত্|

Adhikarana 8 puShkarikAyAH lakShaNam (14-15) · Śloka 15

| পিটিকা পিটিকাচিতা||১৪|| কর্ণিকা পুষ্করস্যেব জ্ঞেযা পুষ্করিকেতি সা| |১৫|

স০- পিটিকাচিতা যা পিটিকা স্যাত্, তথা পদ্মকর্ণিকাকারা পুষ্করকর্কটাভা, তাং পুষ্করিকেতি বিদ্যাত্|

Adhikarana 9 saMvyUDhapiTikAyAH lakShaNam (15) · Śloka 15

| পাণিভ্যাং ভৃশসংব্যূঢে সংব্যূঢপিটিকা ভবেত্||১৫||

স০- হস্তাভ্যামতিশযেন সংব্যূঢে-ঘৃষ্টে সতি, সংব্যূঢপিটিকাখ্যা স্যাত্|

Adhikarana 10 mRuditasya lakShaNam (16) · Śloka 16

মৃদিতং মৃদিতং বস্ত্রসংরব্ধং বাতকোপতঃ| |১৬|

স০-মৃদিতং-মলিতং, বস্ত্রসংরব্ধং-বাসসা ক্ষোভিতং, বাতকোপান্মৃদিতং স্যাত্|

Adhikarana 11 aShThIlikAyAH lakShaNam (16) · Śloka 16

| বিষমা কঠিনা ভুগ্না বাযুনাঽষ্ঠীলিকা স্মৃতা||১৬||

স০-যা পিটিকা বিষমা সমুন্নতা তথা কঠিনা কুটিলা চ পবনেনাষ্ঠীলিকা গদিতা|

Adhikarana 12 nivRuttasya lakShaNam (17-18) · Śloka 18

বিমর্দনাদিদুষ্টেন বাযুনা চর্ম মেঢ্রজম্| নিবর্ততে সরুগ্দাহং ক্বচিত্পাকং চ গচ্ছতি||১৭|| পিণ্ডিতং গ্রন্থিতং চর্ম তত্প্রলম্বমধো মণেঃ| নিবৃত্তসংজ্ঞং সকফং কণ্ডূকাঠিন্যবত্তু তত্||১৮||

স০-বাযুনা বিমর্দনাদিদুষ্টেন মেঢ্রজং চর্ম সরুগ্দাহং নিবর্ততে| ক্বচিত্-কদাচিত্, পাকমপি যাতি| তত্-চর্ম, মণেরধঃ পিণ্ডিতং গ্রন্থিতং প্রলম্বং চ স্যাত্| তত্সকফং-কফেন তু সহ, কণ্ডূকাঠিন্যযুতং নিবৃত্তসংজ্ঞং স্যাত্|

Adhikarana 13 avapATikAyAH lakShaNam (19) · Śloka 19

দুরুঢং স্ফুটিতং চর্ম নির্দিষ্টমবপাটিকা| |১৯|

স০-কৃচ্ছ্রেণ রোহতি যচ্চ দুঃস্ফুটিতং চর্ম, তত্ কথিতমবপাটিকা|

Adhikarana 14 niruddhamaNeH lakShaNam (19-20) · Śloka 20

| বাতেন দূষিতং চর্ম মণৌ সক্তং রুণদ্ধি চেত্||১৯|| স্রোতো মূত্রং ততোঽভ্যেতি মন্দধারমবেদনম্| মণের্বিকাশরোধশ্চ স নিরুদ্ধমণির্গদঃ||২০||

স০- বাতেন চর্ম দূষিতং মণৌ সক্তং চেত্ স্রোতো রুণদ্ধি| ততো মন্দধারমরুজং মূত্রমেতি| মণেশ্চ বিকাশরোধঃ| স এবং বিধো রোগো নিরুদ্ধমণিসংজ্ঞঃ|

Adhikarana 15 grathitasya lakShaNam (21) · Śloka 21

লিঙ্গং শূকৈরিবাপূর্ণং গ্রথিতাখ্যং কফোদ্ভবম্| |২১|

স০-লিঙ্গং শূকৈরাকীর্ণমিব স্যাত্, তদ্ গ্রথিতসংজ্ঞং কফজম্|

Adhikarana 16 sparshahAneH lakShaNam (21) · Śloka 21

| শূকদূষিতরক্তোত্থা স্পর্শহানিস্তদাহ্বযা||২১||

স০-শূকদূষিতরক্তোদ্ভবা স্পর্শহানিঃ, সা স্পর্শহানিসংজ্ঞা|

Adhikarana 17 shataponakasya lakShaNam (22) · Śloka 22

ছিদ্রৈরণুমুখৈর্যত্তু মেহনং সর্বতশ্চিতম্| বাতশোণিতকোপেন তং বিদ্যাচ্ছতপোনকম্||২২||

স০-যত্পুনর্মেঢ্রং ছিদ্রৈঃ সূক্ষ্মমুখৈঃ সর্বতঃ-পরিতঃ, চিতং বাতশোণিতকোপাত্, তং শতপোনকং বিদ্যাত্|

Adhikarana 18 tvakpAkasya lakShaNam (23) · Śloka 23

পিত্তাসৃগ্ভ্যাং ত্বচঃ পাকস্ত্বক্পাকো জ্বরদাহবান্| |২৩|

স০-পিত্তরক্তাভ্যাং ত্বচঃ পাকো জ্বরদাহান্বিতস্ত্বক্পাকাখ্যঃ|

Adhikarana 19 mAMsapAkasya lakShaNam (23) · Śloka 23

| মাংস্পাকঃ সর্বজঃ সর্ববেদনো মাংসশাতনঃ||২৩||

স০-সর্বদোষোত্থো মাংস্পাকাখ্যঃ সর্ববেদনো মাংসশাতনঃ|

Adhikarana 20 raktArbudasya lakShaNam (24) · Śloka 24

সরাগৈরসিতৈঃ স্ফোটৈঃ পিটিকাভিশ্চ পীডিতম্| মেহনং বেদনা চোগ্রা তং বিদ্যাদসৃগর্বুদম্||২৪||

স০-ঈষল্লোহিতৈঃ কৃষ্ণৈঃ স্ফোটৈঃ পিটিকাভিশ্চ পীডিতং লিঙ্গং বেদনাশ্চ দারুণাঃ, তং-এবংবিধং, রক্তার্বুদং জানীযাত্|

Adhikarana 21 mAMsArbudasya lakShaNam (25) · Śloka 25

মাংসার্বুদং প্রাগুদিতং| |২৫|

স০-মাংসার্বুদং পূর্বমুক্তং গ্রন্থ্যাদিরোগবিজ্ঞানীযে(উ. অ.২৯)| তচ্চ ত্রিদোষজম্|

Adhikarana 22 vidradheH lakShaNam (25) · Śloka 25

বিদ্রধিশ্চ ত্রিদোষজঃ| |২৫|

স০-বিদ্রধিশ্চ ত্রিদোষজঃ| স উক্তো বিদ্রধ্যাদিনিদানে (নি. অ. ১১/৯)|

Adhikarana 23 tilakAlakAnAM lakShaNam (25-26) · Śloka 26

| কৃষ্ণানি ভূত্বা মাংসানি বিশীর্যন্তে সমন্ততঃ||২৫|| পক্বানি সন্নিপাতেন তান্ বিদ্যাত্তিলকালকান্| |২৬|

স০-লিঙ্গে কৃষ্ণানি মাংসানি ভূত্বা পরিতো বিশীর্যন্তে পক্বানি সন্নিপাতেন| তান্-এবংপ্রকারান্, তিলকালকান্ বিদ্যাত্|

Adhikarana eteShAM sAdhyAsAdhyatvam (26-27) · Śloka 27

| মাংসোত্থমর্বুদং পাকং বিদ্রধিং তিলকালকান্||২৬|| চতুরো বর্জযেদেষাং শেষাংশ্ছীঘ্রমুপাচরেত্| |২৭|

স০- এষাং মধ্যে মাংসার্বুদাদীংশ্চতুরস্ত্যজেত্-নোপক্রমেত্| শেষান্-ষোডশ রোগান্, শীঘ্রমুপক্রমেত্|

Adhikarana yonivyApado viMshatividhatvam (27) · Śloka 27

| বিংশতির্ব্যাপদো যোনের্জাযন্তে দুষ্টভোজনাত্||২৭||

স০- যোনের্ব্যাপদো বিংশতির্দুষ্টাহারাদ্ভবন্তি|

Adhikarana 1 vAtikyAH lakShaNam (28-31) · Śloka 31

বিষমস্থাঙ্গশযনভৃশমৈথুনসেবনৈঃ| দুষ্টার্তবাদপদ্রব্যৈর্বীজদোষেণ দৈবতঃ||২৮|| যোনৌ ক্রুদ্ধোঽনিলঃ কুর্যাদ্ রুক্তোদাযামসুপ্ততাঃ| পিপীলিকাসৃপ্তিমিব স্তম্ভং কর্কশতাং স্বনম্||২৯|| ফেনিলারুণকৃষ্ণাল্পতনুরূক্ষার্তবস্ত্রুতিম্| স্রসং বঙ্ক্ষণপার্শ্বাদৌ ব্যথাং গুল্মং ক্রমেণ চ||৩০|| তাংস্তাংশ্চ স্বান্ গদান্ ব্যাপদ্বাতিকী নাম সা স্মৃতা| |৩১|

স০- বিষমস্থাঙ্গশযনাদিভির্যোনৌ পবনঃ কুপিতো রুজাদীন্ কুর্যাত্| তথা পিপীলিকোপসর্পণমিব স্তম্ভং কর্কশতাং স্বনং, তথা ফেনিলাদিগুণার্তবস্রুতিং, তথা বঙ্ক্ষণাদৌ ভ্রংশং রুজাং, ক্রমেণ চ গুল্মং কুর্যাত্| তংস্তাংশ্চ-অনেকবিধান্, রোগন্ কুর্যাত্| সা-এবংবিধা, ব্যাপত্ বাতিকী স্মৃতা|

Adhikarana 2 aticaraNAyAH lakShaNam (31) · Śloka 31

| সৈবাতিচরণা শোফসংযুক্তাঽতিব্যবাযতঃ||৩১||

স০-সৈবাতিচরণা শ্বযথুযুতাঽতিব্যবাযাত্ স্যাত্|

Adhikarana 3 prAkcaraNAyAH lakShaNam (32) · Śloka 32

মৈথুনাদতিবালাযাঃ পৃষ্ঠজঙ্গোরুবঙ্ক্ষণম্| রুজন্ সন্দূষযেদ্যোনিং বাযুঃ প্রাক্চরণেতি সা||৩২||

স০- মৈথুনাদতিবালাযাঃ পবনঃ পৃষ্ঠজঙ্ঘোরুবঙ্ক্ষণং পীডযন্ যোনিং সন্দূষযেত্| প্রাক্চরণেতি সা স্যাত্|

Adhikarana 4 udAvRuttAyAH lakShaNam (33-34) · Śloka 34

বেগোদাবর্তনাদ্যোনিং প্রপীডযতি মারুতঃ| সা ফেনিলং রজঃ কৃচ্ছ্রাদুদাবৃত্তং বিমুঞ্চতি||৩৩|| ইযং ব্যাপদুদাবৃত্তা| |৩৪|

স০-বেগোদাবর্তনেন মারুতো যোনিং প্রকর্ষেণ পীডযতি| ততঃ সা-যোনিঃ, ফেনিলং রজঃ কৃচ্ছ্রাদুদাবৃত্তং বিসৃজতি| এষা ব্যাপদুদাবৃত্তাখ্যা|

Adhikarana 5 jAtaghnyAH lakShaNam (34) · Śloka 34

জাতঘ্নী তু যদাঽনিলঃ| জাতং জাতং সুতং হন্তি রৌক্ষ্যাদ্দুষ্টার্তবোদ্ভবম্||৩৪||

স০- যদা তু বাযুঃ সুতমুত্পন্নমুত্পন্নং রৌক্ষ্যাদ্দুষ্টার্তবজং হন্তি, তদা জাতঘ্নী স্যাত্|

Adhikarana 6 antarmukhyAH lakShaNam (35-36) · Śloka 36

অত্যাশিতাযা বিষমং স্থিতাযাঃ সুরতে মরুত্| অন্নেনোত্পীডিতো যোনেঃ স্থিতঃ স্রোতসি বক্রযেত্||৩৫|| সাস্থিমাংসং মুখং তীব্ররুজমন্তর্মুখীতি সা| |৩৬|

স০-অতিসুহিতাযা বিষমং স্থিতাযা নিধুবনে পবনোঽন্নেনোত্পীডিতো যোনেঃ সম্বন্ধিনি স্রোতসি স্থিতো মুখং যোনেরেব বক্রীকুর্যাত্, অস্থিমাংসেন সহ দারুণপীডং, সাঽন্তর্মুখীত্যুচ্যতে|

Adhikarana 7 sUcImukhyAH lakShaNam (36-37) · Śloka 37

| বাতলাহারসেবিন্যাং জনন্যাং কুপিতোঽনিলঃ||৩৬|| স্ত্রিযো যোনিমণুদ্বারাং কুর্যাত্সূচীমুখীতি সা| |৩৭|

স০- বাতলাহারসেবিন্যাং মাতরি বাযুঃ কুপিতঃ স্ত্রিযো গর্ভস্থাযাঃ সূক্ষ্মদ্বারাং যোনি কুর্যাত্| সূচীমুখী সা স্যাত্|

Adhikarana 8 shuShkAkhyAyAH lakShaNam (37-38) · Śloka 38

| বেগরোধাদৃতৌ বাযুর্দুষ্টো বিণ্মূত্রসঙ্গ্রহম্||৩৭|| করোতি যোনেঃ শোষং চ শুষ্কাখ্যা সাঽতিবেদনা| |৩৮|

স০-ঋতৌ বেগধারণাদ্বাযুর্দুষ্টো বিণ্মূত্রসঙ্গ্রহং করোতি| যোনেঃ শোষং চ করোতি| সা শুষ্কসংজ্ঞাঽতিরুজা স্যাত্|

Adhikarana 9 vAminyAH lakShaNam (38-39) · Śloka 39

| ষডহাত্ সপ্তরাত্রাদ্বা শুক্রং গর্ভাশযান্মরুত্||৩৮|| বমেত্সরুঙ্ নীরুজো বা যস্যাঃ সা বামিনী মতা| |৩৯|

স০-ষডহেনাথবা সপ্তাহেন গর্ভাশযাদ্বাযুঃ সরুজো নীরুজো বা যস্যাঃ শুক্রং বমেত্, সা বামিনী গদিতা|

Adhikarana 10 ShaNDhAyAH lakShaNam (39-40) · Śloka 40

| যোনৌ বাতোপতপ্তাযাং স্ত্রীগর্ভে বীজদোষতঃ||৩৯|| মৃদ্বেষিণ্যস্তনী চ স্যাত্ ষণ্ঢসংজ্ঞাঽনুপক্রমা| |৪০|

স০-বাতোপতপ্তাযাং যোনৌ স্ত্রীগর্ভে বীজদোষান্নরদ্বেষিণী স্তনরহিতা চ স্ত্রী স্যাত্| স ষণ্ঢসংজ্ঞাঽনুপক্রমা|

Adhikarana 11 mahAyonyAH lakShaNam (40-41) · Śloka 41

| দুষ্টো বিষ্টভ্য যোন্যাস্যং গর্ভকোষ্ঠং চ মারুতঃ||৪০|| কুরুতে বিবৃতাং স্রস্তাং বাতিকীমিব দুঃখিতাম্| উত্সন্নমাংসাং তামাহুর্মহাযোনিং মহারুজাম্||৪১||

স০-পবনো দুষ্টো যোন্যাস্যং বিষ্টভ্য গর্ভকোষ্ঠং চ বিবৃতমুখীং ভ্রষ্টাং বাতিকীমিব সুদুঃখামুত্সৃষ্টপিশিতাং প্রকৃতত্বাদ্যোনিং কুরুতে| তাং মহারুজাং মহাযোনিং বদন্তি|

Adhikarana 12 paittikyAH lakShaNam (42-43) · Śloka 43

যথাস্বৈর্দূষণৈর্দুষ্টং পিত্তং যোনিমুপাশ্রিতম্| করোতি দাহপাকোষাপূতিগন্ধিজ্বরান্বিতাম্||৪২|| ভৃশোষ্ণভূরিকুণপনীলপীতাসিতার্তবাম্| সা ব্যাপত্ পৈত্তিকী|৪৩|

স০-যথাযোগং দূষণৈঃ-সর্বরোগনিদানাদ্যুক্তৈঃ, দুষ্টং পিত্তং যোনৌ স্থিতং যোনিং দাহাদ্যন্বিতাং করোতি, তথা ভৃশোষ্ণাদিগুণযুতার্তবাম্| সা পৈত্তিকী ব্যাপত্|

Adhikarana 13 raktayonyAH lakShaNam (43) · Śloka 43

| রক্তযোন্যাখ্যাঽসৃগতিস্রুতেঃ||৪৩||

স০-রক্তযোন্যাখ্যা রক্তস্যাতিস্রুতেঃ স্যাত্|

Adhikarana 14 shlaiShmikyAyAH lakShaNam (44-45) · Śloka 45

কফোঽভিষ্যন্দিভিঃ ক্রুদ্ধঃ কুর্যাদ্যোনিমবেদনাম্| শীতলাং কণ্ডুলাং পাণ্ডুপিচ্ছিলাং তদ্বিধস্রুতিম্||৪৪|| সা ব্যাপচ্ছ্লৈষ্মিকী| |৪৫|

স০- শ্লেষ্মাঽভিষ্যন্দকরণহেতুভিঃ কুপিতো যোনিং পীডারহিতাং শীতলাদিগুণাং তথা তদ্বিধা-পাণ্ডুপিচ্ছিলা, স্রুতির্যস্যাস্তাং তথাবিধাং কুর্যাত্| সা-এবংবিধা, ব্যাপত্ শ্লৈষ্মিকী স্যাত্|

Adhikarana 15 lohitakShayAyAH lakShaNam (45) · Śloka 45

বাতপিত্তাভ্যাং ক্ষীযতে রজঃ| সদাহকার্শ্যবৈবর্ণ্যং যস্যাঃ সা লোহিতক্ষযা||৪৫||

স০-যস্যাঃ বাতপিত্তাভ্যাং রজঃ ক্ষীযতে দাহকার্শ্যবৈবর্ণ্যযুতং, সা লোহিতক্ষযাখ্যা|

Adhikarana 16 pariplutAyAH lakShaNam (46-48) · Śloka 48

পিত্তলাযা নৃসংবাসে ক্ষবথূদ্গারধারণাত্| পিত্তযুক্তেন মরুতা যোনির্ভবতি দূষিতা||৪৬|| শূনা স্পর্শাসহা সার্তির্নীলপীতাস্রবাহিনী| বস্তিকুক্ষিগুরুত্বাতিসারারোচককারিণী||৪৭|| শ্রোণিবঙ্ক্ষণরুক্তোদজ্বরকৃত্ সা পরিপ্লুতা| |৪৮|

স০- পিত্তলাযাঃ স্ত্রিযা নরসংযোগে ক্ষবথূদ্গারধারণাত্ পিত্তান্বিতেন বাযুনা যোনির্দূষিতা শূনাদিগুণা বস্ত্যাদিগুরুত্বাদিবিধাযিনী তথা শ্রোণ্যাদিতোদকরী স্যাত্| সা পরিপ্লুতাখ্যা|

Adhikarana 17 upaplutAyAH lakShaNam (48-49) · Śloka 49

| বাতশ্লেষ্মামযব্যাপ্তা শ্বেতপিচ্ছিলবাহিনী||৪৮|| উপপ্লুতা স্মৃতা যোনিঃ| |৪৯|

স০- বাতশ্লেষ্মরোগেণ ব্যাপ্তা শুক্লপিচ্ছিলস্রাবিণী যোনিরুপপ্লুতা স্যাত্|

Adhikarana 18 viplutAyAH lakShaNam (49) · Śloka 49

বিপ্লুতাখ্যা ত্বধাবনাত্| সঞ্জাতজন্তুঃ কণ্ডূলা কণ্ড্বা চাতিরতিপ্রিযা||৪৯||

স০- অক্ষালনাত্তু যোনিঃ সম্ভূতকৃমিঃ কণ্ডূযুতা, কণ্ড্বা চ হেতুনা সুতরাং সুরতাভিলাষিণী বিপ্লুতাখ্যা|

Adhikarana 19 karNinyAH lakShaNam (50-51) · Śloka 51

অকালবাহনাদ্বাযুঃ শ্লেষ্মরক্তবিমূর্চ্ছিতঃ| কর্ণিকাং জনযেদ্যোনৌ রজোমার্গনিরোধিনীম্||৫০|| সা কর্ণিনী| |৫১|

স০-মরুদকালবাহনাত্ কফরক্তমিশ্রিতো যোনৌ কর্ণিকাং রজোমার্গনিরোধিনীং কুর্যাত্| সা কর্ণিনী গদ্যতে|

Adhikarana 20 sAnnipAtikyAH lakShaNam (51) · Śloka 51

ত্রিভির্দোষৈর্যোনিগর্ভাশযাশ্রিতৈঃ| যথাস্বোপদ্রবকরৈর্ব্যাপত্সা সান্নিপাতিকী||৫১||

স০-ত্রিভির্দোষৈর্যোনিগর্ভাশযাশ্রিতৈর্যথাযোগমুপদ্রবকারিভির্যা ব্যাপত্ সা সান্নিপাতিকী স্যাত্|

Adhikarana iti yonirogAH yaiH shukraM necchati, garbhaM na gRuhNAti asRugdarAdi rogAMshca prApnoti (33) · Śloka 33

ইতি যোনিগদা নারী যৈঃ শুক্রং ন প্রতীচ্ছতি| ততো গর্ভং ন গৃহ্ণাতি রোগাংশ্চাপ্নোতি দারুণান্||৫২|| অসৃগ্দরার্শোগুল্মাদীনাবাধাংশ্চানিলাদিভিঃ| ৫২ ১/২| ইতি শ্রীবৈদ্যপতিসিংহগুপ্তসূনুশ্রীমদ্বাগ্ভটবিরচিতাযামষ্টাঙ্গহৃদযসংহিতাযাং ষষ্ঠে উত্তরস্থানে গুহ্যরোগবিজ্ঞানীযো নাম ত্রযস্ত্রিংশোঽধ্যাযঃ||৩৩||

স০- ইতি- সমাপ্তৌ| এবং যোনিরোগাঃ 'কথিতাঃ' ইতি শেষঃ| যৈরামযৈর্যোনিঃ শুক্রং ন প্রতীচ্ছতি| ততো গর্ভং নাদত্তে| রোগাংশ্চ দারুণানসৃগ্দরাদীনশ্রুতে| বাতপিত্তকফৈশ্চাবাধান্-পীডাবিশেষান্, প্রাপ্নোতি| ইতি শ্রীমৃগাঙ্কদত্তপুত্রশ্রীমদরুণদত্তবিরচিতাযামষ্টাঙ্গহৃদয টীকাযাং সর্বাঙ্গসুন্দরাখ্যাযাং ষষ্ঠ উত্তরস্থানে গুহ্যরোগবিজ্ঞানীযো নাম ত্রযাস্ত্রিংশোঽধ্যাযঃ সমাপ্তঃ|| ৩৩||