39. rasāyanavidhiradhyāyaḥ

Adhikarana rasAyanavidhiradhyAyaH ------- rasAyanasya phalam, rasAyanasya niruktiH (2) · Śloka 2

অধুনা পূর্বোক্তহেতুসম্বন্ধং রসাযনাধ্যাযং জিগদিষুরাহ অথাতো রসাযনবিধিমধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ| (গদ্যসূত্রে)||২|| দীর্ঘমাযুঃ স্মৃতিং মেধামারোগ্যং তরুণং বযঃ| প্রভাবর্ণস্বরৌদার্যং দেহেন্দ্রিযবলোদযম্||১|| বাক্সিদ্ধিং বৃষতাং কান্তিমবাপ্নোতি রসাযনাত্| লাভোপাযো হি শস্তানাং রসাদীনাং রসাযনম্||২||

স০- দীর্ঘাযুঃপ্রভৃতীন্ রসাযনাদধিগচ্ছতি| কস্মাদেতানি রসাযনাল্লভ্যন্তে? ইত্যাহ-লাভোপায ইতি| যস্মাত্ শ্রেষ্ঠানাং রসরুধিরাদীনাং যো লাভোপাযঃ, স রসাযনমুচ্যতে|

Adhikarana rasAyanasya prayogakAlAdiH (3) · Śloka 3

পূর্বে বযসি মধ্যে বা তত্প্রযোজ্যং জিতাত্মনঃ| স্নিগ্ধস্য স্রুতরক্তস্য বিশুদ্ধস্য চ সর্বথা||৩||

স০-তত্-রসাযনং, জিতাত্মনঃ পুরুষস্যাদ্যে বযসি-অতিবাল্যাতিক্রান্তমাত্রে, অথবা মধ্যমে বযসি প্রযোজ্যম্| কীদৃশস্য পুংসঃ ? স্নিগ্ধেত্যাদি| স্নিগ্ধাদিগুণযুক্তস্য, তথা সর্বথা অধ উপরিষ্টাচ্চ শুদ্ধস্য|

Adhikarana rasAyanasya niShphalatvam (4) · Śloka 4

অবিশুদ্ধে শরীরে হি যুক্তো রাসাযনো বিধিঃ| বাজীকরো বা মলিনে বস্ত্রে রঙ্গ ইবাফলঃ||৪||

স০-যস্মাদবিশুদ্ধে শরীরে রাসাযনো বিধিরুপযুক্তো বাজীকরো বোপযুক্তো নিষ্ফলঃ স্যাত্| যথা মলিনে বস্ত্রে রঙ্গঃ| মলিনং হি বস্ত্রং ন রজ্যতে|

Adhikarana rasAyanasya dvividhatvam (5) · Śloka 5

রসাযনানাং দ্বিবিধং প্রযোগমৃষযো বিদুঃ| কুটীপ্রাবেশিকং মুখ্যং বাতাতপিকমন্যথা||৫||

স০-মুনযো রসাযনানাং প্রযোগং দ্বিপ্রকারং জানন্তি| তত্র মুখ্যং কুটীপ্রবেশনির্বৃত্তম্| বাতাতপিকমন্যথা-অমুখ্যমিত্যর্থঃ|

Adhikarana rasAyanArthaM kuTI (6-7) · Śloka 7

পুরে প্রাপ্যোপকরণে হর্ম্যনির্বাতনির্ভযে| দিশ্যুদীচ্যাং শুভে দেশে ত্রিগর্ভাং সূক্ষ্মলোচনাম্||৬|| ধূমাতপরজোব্যালস্ত্রীমূর্খাদ্যবিলঙ্ঘিতাম্| সজ্জবৈদ্যোপকরণাং সুমৃষ্টাং কারযেত্কুটীম্||৭||

স০-ক্ব তত্কুর্বীত ? পুরে, প্রাপ্যোপকরণীযে, হর্ম্যং-ধবলগৃহং, নিবাতং নির্ভযং চ যস্মিন্ তস্মিন্, তথোদীচ্যাং দিশি, শুভে-দুর্ভিক্ষমরকাদিরহিতে, কুটীং ত্রিগর্ভাং কারযেত্| প্রথমমেকং গৃহম্, তস্যাভ্যন্তরে দ্বিতীযম্, তস্যাভ্যন্তরে তৃতীযম্, এবং ত্রিগর্ভা| ত্রযো গর্ভাঃ-অন্তরাণি, যস্যা ইতি কৃত্বা| তথা সূক্ষ্মগবাক্ষাম্| তথা ধূমাদিভিরবিলিঙ্ঘিতাং-অনাক্রান্তাম্| তথা প্রগুণানি বৈদ্যোপকরণানি-ভেষজাদীনি, যস্যাং তাং তথাবিধাম্| সুমৃষ্টাং-উপলেপনাদিকরণেন শুদ্ধাম্|

Adhikarana puNye~ahni kuTIpraveshaH, rasAyanasevanakarturniyamAH (8-10) · Śloka 10

অথ পুণ্যেঽহ্নি সম্পূজ্য পূজ্যাংস্তাং প্রবিশেচ্ছুচিঃ| তত্র সংশোধনৈঃ শুদ্ধঃ সুখী জাতবলঃ পুনঃ||৮|| ব্রহ্মচারী ধৃতিযুতঃ শ্রদ্দধানো জিতেন্দ্রিযঃ| দানশীলদযাসত্যব্রতধর্মপরাযণঃ||৯|| দেবতানুস্মৃতৌ যুক্তো যুক্তস্বপ্নপ্রজাগরঃ| প্রিযৌষধঃ পেশলবাগারভেত রসাযনম্||১০||

স০- অথ-কৃতমঙ্গলঃ, শুভে দিবসে শুচিঃ পূজ্যান্-গুরুমিত্রাদীন্, সম্পূজ্য তাং-পূর্বোপবর্ণিতাং কুটীং, প্রবিশেত্| তস্যাং কুট্যাং কৃতসন্নিবেশঃ সংশোধনৈঃ শুদ্ধঃ| সুখী-অরোগঃ| এতচ্চ বাহুল্যেনোক্তম্| শিলাজতুচ্যবনপ্রাশাদীনাং ব্যাধিষ্বপ্যনুজ্ঞাতত্বাত্| তথা চ বক্ষযতি (শ্লো.১৪২)-"ন সোঽস্তি রোগো ভুবি সাধ্যরূপো জত্বশ্মজং যং ন জযেত্প্রসহ্য|" ইতি| তথা (শ্লো.৩৯)-"ইত্যেষ চ্যবনপ্রাশো যং প্রাশ্য চ্যবনো মুনিঃ| জর্জরিতোঽপ্যাসীন্নারীনযননন্দনঃ|| কাসং শ্বাসং ক্ষযং শোফং বৈস্বর্যং চ ব্যপোহতি||" ইতি| পুনর্জাতবলং ইতি প্রকৃতিবলেন যো বলবান্নাসীত্তস্য সংশোধনেন বলহীনত্বেন পুনর্জাতবলো বৃংহণাহারাদিনা যদা, স তদা রসাযনমারভেতেত্যর্থঃ| অসঞ্জাতবলো হ্যুত্কৃষ্টবীর্যাণাং রসাযনানাং বীর্যং সোঢুং ন ক্ষমত ইতি পুনর্জাতবল ইত্যুক্তম্| ব্রহ্মচারীত্যুক্তং নিবৃত্তস্ত্রীসঙ্গপরম্| তথা জাতসন্তোষঃ| শ্রদ্ধালুরলোলুপশ্চ| তথা দানরতঃ দযাদিতত্পরঃ| তথা দেবতাভক্তঃ| যুক্তৌ স্বপ্নপ্রজাগরৌ যস্য স এবম্| তথা ভেষজানুরাগবান্ মধুরবচনঃ|

Adhikarana rasAyane pUrvaM harItakyAdivirecanam (11-12) · Śloka 12

হরীতকীমামলকং সৈন্ধবং নাগরং বচাম্| হরিদ্রাং পিপ্পলীং বেল্লং গুডং চোষ্ণাম্বুনা পিবেত্||১১|| স্নিগ্ধস্বিন্নো নরঃ পূর্বং, তেন সাধু বিরিচ্যতে| |১২|

স০- হরীতক্যাদিকং যোগমুষ্ণজলেন প্রাক্ স্নিগ্ধস্বিন্নো নরঃ পিবেত্| তেন যোগেন সম্যগ্ বিরিচ্যতে|

Adhikarana tataH shuddhasharIrAya ghRutAnvitaM yAvakaM deyam (12-13) · Śloka 13

| ততঃ শুদ্ধশরীরায কৃতসংসর্জনায চ||১২|| ত্রিরাত্রং পঞ্চরাত্রং বা সপ্তাহং বা ঘৃতান্বিতম্| দদ্যাদ্যাবকমাশুদ্ধেঃ পুরাণশকৃতোঽথবা||১৩||

স০- অনন্তরং, শুদ্ধদেহায কৃতপেযাদিকক্রমায চ ত্রিরাত্রং পঞ্চরাত্রং বা সপ্তাহং বা সর্পির্যুতং যাবকং দদ্যাত্| অথবা পুরাণশকৃতঃ শুদ্ধিং যাবত্ তাবদ্যাবকং সসর্পিষ্কং দদ্যাত্| ত্রিবিধমলাপেক্ষযা ত্রিবিধং পরিজ্ঞানম্,-হীনপুরীষস্য ত্রিরাত্রম্, মধ্যপুরীষস্য পঞ্চরাত্রম্, উত্কৃষ্টপুরীষস্য সপ্তরাত্রমিতি| তথা হি [মধ্য]বহুবর্চস্কস্য পঞ্চরাত্রেণ সপ্তরাত্রেণ বা মলঃ শুদ্ধ্যতি, অল্পমলস্য ত্রিরাত্রেণৈব, ইতি ত্রিবিধং পরিজ্ঞানং যুক্তম্| বহুতরমলস্য বহুতরৈরেবাহোভিঃ শুদ্ধিঃ স্যাদিত্যুক্তবান্'আশুদ্ধেঃ পুরাণশকৃতোঽথবা' ইতি|

Adhikarana itthaM saMskRutakoShThasya yaugikaM rasAyanaM deyam (14) · Śloka 14

ইত্থং সংস্কৃতকোষ্ঠস্য রসাযনমুপাহরেত্| যস্য যদ্যৌগিকং পশ্যেত্সর্বমালোচ্য সাত্ম্যবিত্||১৪||

স০-এবং সংস্কৃতকোষ্ঠস্য নরস্য যস্য যদ্রসাযনং যৌগিকমুপলভ্যতে, সাত্ম্যজ্ঞো ভিষক্ সর্বমালোচ্য তস্য তদ্রসাযনমুপাহরেত্| ["হরণাত্ সর্বতোগাণং যাঽসাবুক্তা হরীতকী| পথ্যত্বাত্সর্বধাতূনাং পথ্যা, শিবতযা শিবা|| যস্মাদ্বিজযতে ব্যাধীন্ সমগ্রান্ বিজযা ততঃ| অভযং সর্বরোগেভ্যো ভবত্যাযুশ্চ শাশ্বতম্|| যতঃ শীলযতামেনাং তেনেযমভযা স্মৃতা| নবা বৃত্তা ঘনা স্নিগ্ধা গুর্বী মজ্জতি চাপ্সু যা|| বালস্য সা প্রযোক্তব্যা নবনীতসমন্বিতা| বাতে সসর্পির্লবণা পিত্তে সগুডশর্করা|| কফে সপিপ্পলীক্ষৌদ্রা সর্বদা সা প্রশস্যতে|" ইতি বৃদ্ধবাগ্ভটাত্ (সং.উ. অ. ৪৯)|]

Adhikarana brAhmaM rasAyanam (15-23) · Śloka 23

পথ্যাসহস্রং ত্রিগুণধাত্রীফলসমন্বিতম্| পঞ্চানাং পঞ্চমূলানাং সার্ধং পলশতদ্বযম্||১৫|| জলে দশগুণে পক্ত্বা দশভাগস্থিতে রসে| আপোথ্য কৃত্বা ব্যস্থীনি বিজযামলকান্যথা||১৬|| বিনীয তস্মিন্নির্যূহে যোজযেত্কুডবাংশকম্| ত্বগেলামুস্তরজনীপিপ্পল্যগুরুচন্দনম্||১৭|| মণ্ডূকপর্ণীকনকশঙ্খপুষ্পীবচাপ্লবম্| যষ্ট্যাহ্বযং বিডঙ্গং চ চূর্ণিতং তুলযাঽধিকম্||১৮|| সিতোপলার্ধভারং চ পাত্রাণি ত্রীণি সর্পিষঃ| দ্বে চ তৈলাত্ পচেত্সর্বং তদগ্নৌ লেহতাং গতম্||১৯|| অবতীর্ণং হিমং যুঞ্জ্যাদ্বিংশৈঃ ক্ষৌদ্রশতৈস্ত্রিভিঃ| ততঃ খজেন মথিতং নিদধ্যাদ্ ঘৃতভাজনে||২০|| যা নোপরুন্ধ্যাদাহারমেকং মাত্রাঽস্য সা স্মৃতা| ষষ্টিকঃ পযস চাত্র জীর্ণে ভোজনমিষ্যতে||২১|| বৈখানসা বালখিল্যাস্তথা চান্যে তপোধনাঃ| ব্রহ্মণা বিহিতং ধন্যমিদং প্রশ্য রসাযনম্||২২|| তন্দ্রাশ্রমাক্লমবলীপলিতামযবর্জিতাঃ| মেঘাস্মৃতিবলোপেতা বভূবুরমিতাযুষঃ||২৩||

স০- অভযানাং সহস্রমামলকসহস্রত্রিতযযুতম্| তথা পঞ্চানাং পঞ্চমূলানাং পলশতদ্বযং সার্ধং সলিলে দশগুণে পক্ত্বা দশাংশস্থিতে রস আপোথ্য-মৃদিত্বা, হরীতক্যামলকানি ব্যস্থীনি কৃত্বা তস্মিন্ ক্বাথে প্রক্ষিপ্য কুডবপ্রমাণং ত্বগেলাদিকং চূর্ণিতং যোজযেত্| কনকং-নাগকেসরম্| ব্যস্থীনীতি "নপুংসকমনপুংসকেন" ইত্যেকশেষঃ| পলশতেনাধিকং শর্করাযা অর্ধভারম্, ঘৃতস্য ত্রীণ্যাঢকানি, দ্বে চাঢকে তৈলাত্, তত্সর্বং বহ্নৌ পচেত্| তচ্চ লেহতাং গতমবতীর্ণং শীতং ক্ষৌদ্রশতৈস্ত্রিভির্বিংশত্যধিকৈর্যুঞ্জীত| বিংশৈরিতি 'বিংশতেঃ পূরণে' ইতি পূরণেঽর্থে ডিভিঃ| 'বিংশতের্ডিত্' ইতি টিলোপে বিংশশব্দঃ| অনন্তরং খজেনালোডিতং ঘৃতভাণ্ডে নিদধ্যাত্| যা-মাত্রা, একমাহারং-সাযংতনং, নোপরুন্ধ্যাত্ সাঽস্য রসাযনস্য মাত্রা স্মৃতা| আহারমেকমিতি বচনাচ্চ প্রথমাহারকালস্য রসাযনমাত্রযাঽবশ্যমুপরোধঃ কার্য ইতি বেদযতি| অস্মিংশ্চ লেহে জীর্ণে ষষ্টিকঃ ক্ষীরেণ সহ ভোজনমিষ্টম্| বৈখানসাদযো ব্রহ্মণা নির্মিতমেতদুপযুজ্য রসাযনং তন্দ্রাদিবর্জিতা মেধাদিযুতা অমিতজীবিতাশ্চাভূবন্| ধন্যমিতি ধনায হিতম্| ননু, রসাযনস্য ধনার্জনোপাযত্বাভাবাত্ কথং ধন্যত্বম্ ? অত্র ব্রূমঃ| কার্যে কারণোপচারাদেবমুক্তম্| তথা হি রসাযনমিদমামযঘ্নত্বাদারোগ্যে চ সতি মেধাস্মৃত্যাযুক্তস্য ধনাযোদ্যমং কুর্বতোঽবশ্যং ধনসম্প[ম্প্রা]ত্তিরিতি যুক্তমেব| ননু, আমযবর্জৈতা ইত্যনেনৈবোক্তার্থত্বাত্ তন্দ্রাদিগ্রহণমবাচ্যমেব| অত্রাচক্ষমহে| আমযবর্জিতে স্বাস্থ্যানুবৃত্তিকরণসামর্থ্যমস্য রসাযনস্যাবাদীত্তন্ত্রকৃত্| তন্দ্রাদিগ্রহণং চ রোগনাশেঽপ্যস্য জ্যাযস্ত্বমিতি প্রতিপাদনার্থম্| ["অভযামলকবিভীতকপঞ্চাত্মকপঞ্চমূলনির্যূহে| বল্লীপলাশকরসে দ্বিগুণে ক্ষীরেঽষ্টগুণে চ বিপচেত|| ঘৃতস্য কুম্ভং মধুকং মধূকং কাকোলিযুগ্মং চ বলাং স্বগুপ্তাম্| সক্ষীরশুক্লামৃষভং সজীবং সুখাম্বুপস্তচ্চ পিবেদ্গুণাঢ্যম্|| (সম্. উ. অ. ৪৯)"]

Adhikarana abhayAmalakaM rasAyanam (24-27) · Śloka 27

অভযামলকসহস্রং নিরামযং পিপ্পলীসহস্রযুতম্| তরুণপলাশক্ষরদ্রবীকৃতং স্থাপযেদ্ভাণ্ডে||২৪|| উপযুক্তে চ ক্ষারে ছাযাসংশুষ্কচূর্ণিতং যোজ্যম্| পাদাংশেন সিতাযাশ্চতুর্গুণাভ্যাং মধুঘৃতাভ্যাম্||২৫|| তদ্ঘৃতকুম্ভে ভূমৌ নিধায ষণ্মাসসংস্থমুদ্ধৃত্য| প্রাহ্ণে প্রাশ্য যথানলমুচিতাহারো ভবেত্সততম্||২৬|| ইত্যুপযুঞ্জ্যাশেষং বর্ষশতমনামযো জরারহিতঃ| জীবতি বলপুষ্টিবপুঃস্মৃতিমেধাদ্যন্বিতো বিশেষেণ||২৭||

স০- অভযামলকানাং সহস্রং দৃঢং কণাসহস্রান্বিতমজীর্ণপলাশক্ষারদ্রবীকৃতং ভাজনে স্থাপযেত্| ক্ষারে চোপযুক্তে সতি ছাযাযাং শুষ্কং চূর্ণিতং চ শর্করাযাশ্চতুর্থাংশেন চতুর্গুণাভ্যাং ঘৃতমাক্ষীকাভ্যাং যোজ্যম্| এতদ্ঘৃতকুম্ভে নিধায ভূমৌ ষণ্মাসস্থিতং সমুদ্ধৃত্য পূর্বাহ্ণে যথাগ্নি ভুক্ত্বা সাত্ম্যাহারঃ সদা স্যাত্| তিস্র আর্যাঃ| এবমেতত্সর্বমুপযুজ্য সংবত্সরশতং নীরোগো জরারহিতো জীবতি| বিশেষেণ বলাদিযুতঃ| গীতিরার্যা|

Adhikarana AmalakaM rasAyanam (28-32) · Śloka 32

নীরুজার্দ্রপলাশস্য ছিন্নে শিরসি তত্ক্ষতম্| অন্তর্দ্বিহস্তং গম্ভীরং পূর্যমামলকৈর্নবৈঃ||২৮|| আমূলং বেষ্টিতং দর্ভৈঃ পদ্মিনীপঙ্কলেপিতম্| আদীপ্য গোমযৈর্বন্যৈর্নির্বাতে স্বেদযেত্ততঃ||২৯|| স্বিন্নানি তান্যামলকানি তৃপ্ত্যা খদেন্নরঃ ক্ষৌদ্রঘৃতান্বিতানি| ক্ষীরং শৃতং চানু পিবেত্প্রকামং তেনৈব বর্তেত চ মাসমেকম্||৩০|| বর্জ্যানি বর্জ্যানি চ তত্র যত্নাত্ স্পৃশ্যং চ শীতাম্বু ন পাণিনাঽপি| একাদশাহেঽস্য ততো ব্যতীতে পতন্তি কেশা দশনা নখাশ্চ||৩১|| অথাল্পকৈরেব দিনৈঃ সুরূপঃ স্ত্রীষ্বক্ষযঃ কুঞ্জরতুল্যবীর্যঃ| বিশিষ্টমেধাবলবুদ্ধিসত্ত্বো ভবত্যসৌ বর্ষসহস্রজীবী||৩২||

স০-নীরুজো-জন্ত্বাদিভিরনুপদ্রুতো, যঃ পলাশস্তস্য শিরসি ছিন্নেঽন্তর্দ্বিহস্তমাত্রং তত্ক্ষতং-সুষিরীকৃতং, গম্ভীরং নবৈরামলকৈঃ পূরণীযম্| পূর্ণং যাবদ্দর্ভৈর্বেষ্টিতং পদ্মিনীকর্দমেন লেপিতং তত আরণ্যৈর্গোমযৈরাদীপ্য নিবাতে স্বেদযেত্| তানি চামলকানি স্বিন্নানি ক্ষৌদ্রঘৃতযুতানি তৃপ্ত্যা পুরুষঃ খাদেত্| পশ্চাদ্দুগ্ধং ক্বথিতং বহু পিবেত্| তেনৈব চ দুগ্ধেন মাসমেকং বর্তেত| ইন্দ্রবজ্রা| রসাযনবিধৌ যান্যুক্তানি ক্ষারাদীনি বর্জ্যানি তানি পরিহর্তব্যানি যত্নেন| হস্তেনাপি শিশিরং জলং ন স্পর্শযিতব্যম্| ততোঽস্য রসাযনবিধাতুরেকাদশেঽহ্নি ব্যতিক্রান্তে কেশাদযঃ পতন্তি| ততোঽল্পকৈরেব দিনৈ রূপবাংস্তরুণীবিষয অক্ষযশক্তির্গজসমানসামর্থ্য উত্কৃষ্টমেধাদিরসৌ ভবতি| বর্ষসহস্রজীবী চ| উপজাতী বৃত্তে|

Adhikarana cyavanaprAsho rasAyanam (33-41) · Śloka 41

দশমূলবলামুস্তজীবকর্ষভকোত্পলম্| পর্ণিন্যৌ পিপ্পলী শৃঙ্গী মেদা তামলকী ত্রুটিঃ||৩৩|| জীবন্তী জোঙ্গকং দ্রাক্ষা পৌষ্করং চন্দনং শঠী| পুনর্নবর্দ্ধিকাকোলীকাকনাসামৃতাদ্বযম্||৩৪|| বিদারী বৃষমূলং চ তদৈকধ্যং পলোন্মিতম্| জলদ্রোণে পচেত্পঞ্চ ধাত্রীফলশতানি চ||৩৫|| পাদশেষং রসং তস্মাদ্ব্যস্থীন্যামলকানি চ| গৃহীত্বা ভর্জযেত্তৈলঘৃতাদ্ দ্বাদশভিঃ পলৈঃ||৩৬|| মত্স্যণ্ডিকাতুলার্ধেন যুক্তং তল্লেহবত্ পচেত্| স্নেহার্ধং মধু সিদ্ধে তু তবক্ষীর্যাশ্চতুষ্পলম্||৩৭|| পিপ্পল্যা দ্বিপলং দদ্যাচ্চতুর্জাতং কণার্ধিতম্| অতোঽবলেহযেন্মাত্রাং কুটীস্থঃ পথ্যভোজনঃ||৩৮|| ইত্যেষ চ্যবনপ্রাশো যং প্রাশ্য চ্যবনো মুনিঃ| জরাজর্জরিতোঽপ্যাসীন্নারীনযনন্দনঃ||৩৯|| কাসং শ্বাসং জ্বরং শোষং হৃদ্রোগং বাতশোণিতম্| মূত্রশুক্রাশ্রযান্ দোষান্ বৈস্বর্যং চ ব্যপোহতি||৪০|| বালবৃদ্ধক্ষতক্ষীণকৃশানামঙ্গবর্ধনঃ| মেধাং স্মৃতিং কান্তিমনামত্ব- মাযুঃপ্রকর্ষং পবনানুলোম্যম্| স্ত্রীষু প্রহর্ষং বলমিন্দ্রিযাণা- মগ্নেশ্চ কুর্যাদ্বিধিনোপযুক্তঃ||৪১||

স০-দশমূলাদিকং পলোন্মিতমৈকধ্যং তোযদ্রোণ আমলকশতানি পঞ্চ পচেত্| তস্মাচ্চতুর্থাশং রসং বিগতাস্থীনি চামলকান্যাদায তৈলঘৃতযোঃ প্রত্যেকং দ্বাদশভিঃ পলৈর্ভর্জযেত্| শর্করাতুলার্ধেনান্বিতং তদেতত্সর্বং লেহমিব পচেত্| স্নেহস্যার্ধং পক্বে শীতে মধু তথা তবক্ষীরীচতুষ্পলং কণাদ্বিপলং কণার্ধেন চতুর্জাতং চ দদ্যাত্| অতো-লেহাত্, মাত্রাং কুটীস্থিতঃ পথ্যান্যশ্নন্নব লেহযেত্| ইতি-এবং প্রকারঃ, অযং চ্যবনপ্রাশাখ্যো লেহঃ| যং লেহং, প্রাশ্য চ্যবনসংজ্ঞো মুনির্জরাক্রান্তোঽপি তরুণীলোচনরঞ্জন অসীত্| অযং লেহঃ কাসাদীন্ ব্যপোহতি| "উপসর্গাদস্যত্যূহ্যোর্বা বচনম্ (র্বেতি বাচ্যম্)" ইতি তঙ্| বালাদীনামঙ্গবৃদ্ধিকৃত্| মেধাদীংশ্চ বিদধ্যাত্ বিধিনা রসাযনোক্তেনোপযুক্তোঽযম্| ইন্দ্রবজ্রাবৃত্তম্|

Adhikarana triPalA rasAyanam (42-43) · Śloka 43

মধুকেন তবক্ষীর্যা পিপ্পল্যা সিন্ধুজন্মনা| পৃথগ্লোহৈঃ সুবর্ণেন বচযা মধুসর্পিষা||৪২|| সিতযা বা সমা যুক্তা সমাযুক্তা রসাযনম্| ত্রিফলা সর্বরোগঘ্নী মেধাযুঃস্মৃতিবুদ্ধিদা||৪৩||

স০-মধুকেন সমা-তুল্যা, যুক্তা ত্রিফলা তথা সমৈঃ সর্বৈঃ, যুক্তা-উপযুক্তা, রসাযনং সর্বরোগঘ্নী মেধাদিদা চ স্যাত্| তবক্ষীর্যাদীনাং প্রত্যেকং ত্রিফলাঙ্গত্বেন রসাযনানি নিরুপ্যাণি| সিন্ধুজন্মনা-সৈন্ধবেন, লোহাঃ-রূপ্যং তাম্রং সীসং ত্রপু অয ইতি পঞ্চ, তৈঃ সুবর্ণেন চ, পৃথগ্যুক্তা বরা রসাযনমিতি যোজ্যম্| মধুসর্পিষেত্যেকবচননির্দেশাদ্ দ্বাভ্যামপি যুগপদ্যোগ একং রসাযনং বেদ্যম্|

Adhikarana maNDUkaparNyAdIni rasAyanam (44-45) · Śloka 45

মণ্ডূকপর্ণ্যাঃ স্বরসং যথাগ্নি ক্ষীরেণ যষ্টীমধুকস্য চূর্ণম্| রসং গুডূচ্যাঃ সহমূলপুষ্প্যাঃ কল্কং প্রযুঞ্জীত চ শঙ্খপুষ্প্যাঃ||৪৪|| অযুষ্প্রদান্যামযনাশনানি বলাগ্নিবর্ণস্বরবর্ধনানি| মেধ্যানি চৈতানি রসাযনানি মেধ্যা বিশেষেণ তু শঙ্খপুষ্পী||৪৫||

স০-মণ্ডূকপর্ণীস্বরসং প্রযুঞ্জীত, অগ্নিবলাপেক্ষযা| দুগ্ধেন মধুযষ্টীচূর্ণং যুঞ্জীত| তথা গুডূচ্যা রসং প্রযুঞ্জীত| তথা সহ মূলপুষ্পাভ্যাং বর্ততে সহমূলপুষ্পী, তস্যাঃ শঙ্খপুষ্প্যাশ্চ কল্কং প্রযুঞ্জীত| ইত্যেতানি রসাযনান্যাযুষ্প্রদানি রোগঘ্নানি বলাদি বর্ধনানি মেধাযৈ হিতানি চ| অতিশযেন শঙ্খপুষ্পী মেধ্যা| উপজাতী বৃত্তে|

Adhikarana naladAdi ; vAgmitvAdi karam (46-47) · Śloka 47

নলদং কটুরোহিণী পযস্যা মধুকং চন্দনসারিবোগ্রগন্ধাঃ| ত্রিফলা কটুকত্রযং হরিদ্রে সপটোলং লবণং চ তৈঃ সুপিষ্টৈঃ||৪৬|| ত্রিগুণেন রসেন শঙ্খপুষ্প্যাঃ সপযস্কং ঘৃতনল্বণং বিপক্বম্| উপযুজ্য ভবেজ্জডোঽপি বাগ্মী শ্রুতধারী প্রতিভানবানরোগঃ||৪৭||

স০ -নলদাদিভিঃ সুপিষ্টৈঃ সামান্যপরিভাষোক্তপ্রমাণাত্ত্রিগুণেন শঙ্খপুষ্পীরসেন ঘৃতস্যাঢকং(স্য দ্রোণং) ক্ষীরসহিতং বিপক্বং প্রশ্য জডোঽপি নরো বাগ্মী শ্রুতধরঃ সপ্রতিভো নিরামযশ্চ স্যাত্| ঔপচ্ছন্দসিকে বৃত্তে|

Adhikarana pa~jcAravindaM rasAyanam pauruShAdikaram (48) · Śloka 48

পৈষ্যৈর্মৃণালবিসকেসরপত্রবীজৈঃ সিদ্ধং সহেমশকলং পযসা চ সর্পিঃ| পঞ্চারবিন্দমিতি তত্প্রথিতং পৃথিব্যাং প্রভ্রষ্টপৌরুষবলপ্রতিভৈর্নিষেব্যম্||৪৮||

স০-মৃণালাদিভিঃ কল্কৈঃ সুবর্ণশকলান্বিতং হৈযংগবীনং সক্ষীরং পক্বং পঞ্চারবিন্দমিতি পঞ্চারবিন্দানি যস্মিন্নিতি সমাসঃ, এবমগ্রেঽপি কার্যঃ| এতদ্ঘৃতং নষ্টশুক্রাদিভির্নিষেবিতব্যম্, এতন্নিষেবণে নৈতানে স্যুরিত্যর্থঃ|

Adhikarana catuShkuvalayaM rasAyanam medhyam (49) · Śloka 49

যন্নালকন্দদলকেসরবদ্বিপক্বং নীলোত্পলস্য তদপি প্রথিতং দ্বিতীযম্| সর্পিশ্চতুষ্কুবলযং সহরিণ্যপত্রং মেধ্যং গবামপি ভবেত্ কিমু মানুষাণাম্||৪৯||

স০-যদ্ঘৃতং নীলোত্পলস্য নালাদিমত্ কাঞ্চনশকলান্বিতং সক্ষীরং বিপক্বং তদপি চতুষ্কুবলযং প্রসিদ্ধম্| গবামপিজডানামপি, এতন্মেধ্যম্| কিং পুনর্মানুষাণাম্ ? তেষাং সমেধানামতিশযেনেত্যর্থঃ| বসন্ততিলকে বৃত্তে|

Adhikarana brAhmyAdi rasAyanamkuShThAdinGnam (50-53) · Śloka 53

ব্রাহ্মীবচাসৈন্ধবশঙ্খপুষ্পী- মত্স্যাক্ষকব্রহ্মসুবর্চলৈন্দ্র্যঃ| বৈদেহিকা চ ত্রিযবাঃ পৃথক্স্যু- র্যবৌ সুবর্ণস্য তিলো বিষস্য||৫০|| সর্পিষশ্চ পলমেকত এত- দ্যোজযেত্পরিণতে চ ঘৃতাঢ্যম্| ভোজনং সমধু বত্সরমেবং শীলযন্নধিকধীস্মৃতিমেধঃ||৫১|| অতিক্রান্তজরাব্যাধিতন্দ্রালস্যশ্রমক্লমঃ| জীবত্যব্দশতং পূর্ণং শ্রীতেজঃকান্তিদীপ্তিমান্||৫২|| বিশেষতঃ কুষ্ঠকিলাসগুল্ম বিষজবরোন্মাদগরোদরাণি| অথর্বমন্ত্রাদিকৃতাশ্চ কৃত্যাঃ শাম্যন্ত্যনেনাতিবলাশ্চ বাতাঃ||৫৩||

স০-ব্রাম্হ্যাদযস্ত্রিযবপ্রমাণাঃ পৃথক্ স্যুঃ| মত্স্যাক্ষকঃপত্তূরঃ| সুবর্ণস্য যবৌ দ্বৌ| তিল একো বিষস্য| ঘৃতস্য চ পলম্| এতদেকতো যোজযেত্| জীর্ণে চাস্মিন্ ভেষজে বহুঘৃতং ভোজনং সমাক্ষিকং যোজযেত্| এবং বর্ষং শীলযন্ বিপুলবুদ্ধ্যাদিকঃ স্যাত্| উপজাতিস্বাগতে বৃত্তে| জরাদিরহিতঃ পূর্ণলক্ষ্যাদিকো বর্ষশতং জীবতি| বিশেষেণ কুষ্ঠাদযোঽনেন শাম্যন্তি, অতিবলা বাতাশ্চ| উপজাতিঃ|

Adhikarana nAdabalArasAyanam (54-55) · Śloka 55

শরন্মুখে নাগবলাং পুষ্যযোগে সমুদ্ধরেত্| অক্ষমাত্রং ততো মূলাচ্চূর্ণিতাত্পযসা পিবেত্||৫৪|| লিহ্যান্মধুঘৃতাভ্যাং ব ক্ষীরবৃত্তিরনন্নভুক্| এবং বর্ষপ্রযোগেণ জীবেদ্বর্ষশতং বলী||৫৫||

স০-শরদাদৌ পুষ্যনক্ষত্রে নাগবলামূলং সমুদ্ধরেত্| তস্মান্মূলাচ্চূর্ণিতাদক্ষমাত্রং-কর্ষমাত্রং, দুগ্ধেন পিবেত্, মাক্ষিকাজ্যাভ্যাং বা লিহ্যাত্, ক্ষীরবর্তনোঽনন্নাশী| এবং বর্ষপ্রযোগেণ বলবান্ সন্ বর্ষশতং জীবেত্|

Adhikarana gokShurakarasAyanam (56-57) · Śloka 57

ফলোন্মুখো গোক্ষুরকঃ সমূল- শ্ছাযাবিশুষ্কঃ সুবিচূর্ণিতাঙ্গঃ| সুভবিতঃ স্বেন রসেন তস্মা- ন্মাত্রাং পরাং প্রাসৃতিকীং পিবেদ্যঃ||৫৬|| ক্ষীরেণ তেনৈব চ শালিমশ্নন্ জীর্ণে ভবেত্স দ্বিতুলোপযোগাত্| শক্তঃ সুরূপঃ সুভগঃ শতাযুঃ কামী কুকুদ্মানিব গোকুলস্থঃ||৫৭||

স০-গোক্ষুরকঃ ফলাভিমুখো মূলযুতশ্ছাযাবিশুষ্কঃ শ্লক্ষ্ণচূর্ণিতঃ স্বরসেন সুভাবিতঃ| তস্মাত্-গোক্ষুরকাত্, মাত্রাং প্রাসৃতিকীং পরাং যঃ ক্ষীরেণ পিবেত্, পরিণতে তস্মিন্ দুগ্ধেনৈব চ শালীন্ ভক্ষযেত্, স পুরুষঃ পলশতদ্বযোপযোগাত্ শক্ত্যাদিগুণঃ স্যাত্| উপজাতীন্দ্রবজ্রাবৃত্তে|

Adhikarana vArAhIkandarasAyanAni (58-59) · Śloka 59

বারাহীকন্দমাড়্দ্রাদ্রং ক্ষীরেণ ক্ষীরপঃ পিবেত্| মাসং নিরন্নো মাসং চ ক্ষীরান্নাদো জরাং জযেত্||৫৮|| তত্কন্দশ্লক্ষ্ণচূর্ণং বা স্বরসেন সুভাবিতম্| ঘৃতক্ষৌদ্রপ্লুতং লিহ্যাত্তত্পক্বং বা ঘৃতং পিবেত্||৫৯||

স০-বারাহ্যাঃ-বৃদ্ধদারকস্য, মূলমত্যার্দ্রং দুগ্ধেন মাসং পিবেত্| জীর্ণেঽপি ক্ষীরপো নিরন্নঃ স্যাত্| অপরং চ মাসং ক্ষীরান্নাশী সন্ জরাং জযতি| সং-তস্যাঃ-বারাহ্যাঃ, মূলং শ্লক্ষ্ণচূর্ণং বা স্বরসেন সুষ্ঠু ভাবিতং ঘৃতমাক্ষিকাপ্লুতং লিহ্যাত্| তেন বা মূলকল্কেন পক্বং ঘৃতং পিবেত্ পূর্বগুণম্|

Adhikarana vidAryAdirasAyanAni (60-61) · Śloka 61

তদ্বদ্বিদার্যতিবলাবলামধুকবাযসীঃ| শ্রেযসীশ্রেযসীযুক্তাপথ্যাধাত্রীস্থিরামৃতাঃ||৬০|| মণ্ডূকীশঙ্খকুসুমাবাজিগন্ধাশতাবরীঃ| উপযুঞ্জীত মেধাধীবযঃ স্থৈর্যবলপ্রদাঃ||৬১||

স০-বিদার্যাদীংশ্চ পৃথক্ পৃথক্ তদ্বত্-বৃদ্ধদারকবত্ সর্পির্দুগ্ধ(র্মধু)যুতান্, মেধাদ্যাবহানুপযুঞ্জীত| ততশ্চোপযুক্তা বযঃস্থৈর্যাদিপ্রদাঃ স্যুঃ|

Adhikarana citrakarasAyanam (62-65) · Śloka 65

যথাস্বং চিত্রকঃ পুষ্পৈর্জ্ঞেযঃ পীতসিতাসিতৈঃ| যথোত্তরং স গুণবান্ বিধিনা চ রসাযনম্||৬২|| ছাযাশুষ্কং ততো মূলং মাসং চূর্ণীকৃতং লিহন্| সর্পিষা মধুসর্পির্ভ্যাং পিবন্ বা পযসা যতিঃ||৬৩|| অম্ভসা বা হিতান্নাশী শতং জীবতি নীরুজঃ| মেধাবী বলবান্ কান্তো বপুষ্মান্ দীপ্তপাবকঃ||৬৪|| তৈলেন লীঢো মাসেন বাতান্ হন্তি সুদুস্তরান্| মূত্রেণ শ্বিত্রকুষ্ঠানি পীতস্তক্রেণ পাযুজান্||৬৫||

স০-চিত্রকো যথাযোগং পুষ্পৈঃ পীতৈঃ শুক্লৈঃ কৃষ্ণৈশ্চ যথোত্তরং গুণবান্ বেদিতব্যঃ| বিধিনা চ প্রযুক্তো রসাযনং স্যাত্| সং-তস্মাচ্চিত্রকাত্ মূলং ছাযাশুষ্কং মাসং চূর্ণীকৃতং ঘৃতেন মধুঘৃতাভ্যাং বা লিহ্যাত্| পযসা বা ব্রহ্মচারী পিবেত্| পানীযেন বা হিতান্নভোজনঃ সন্ পিবেত্| সুখী মেধাবান্ বলবান্ রমণীযো বপুষ্মান্ দীপ্তাগ্নিঃ সমাঃ শতং জীবতি| সং-তৈলেন লীঢশ্চিত্রকো মাসেন দারুণান্ বাতান্ জযতি| গোমূত্রেণ পীতঃ শ্বিত্রকুষ্ঠানি হন্তি| তক্রেণ পীতোঽর্শাংসি জযেত্|

Adhikarana BallAtakasahasrarasAyanam (66-71) · Śloka 71

ভল্লাতকানি পুষ্টানি ধান্যরাশৌ নিধাপযেত্| গ্রীষ্মে সংগৃহ্য হেমন্তে স্বাদুস্নিগ্ধহিমৈর্বপুঃ||৬৬|| সংস্কৃত্য তান্যষ্টগুণে সলিলেঽষ্টৌ বিপাচযেত্| অষ্টাংশশিষ্টং তত্ক্বাথং সক্ষীরং শীতলং পিবেত্||৬৭|| বর্ধযেত্প্রত্যহং চানু তত্রৈকৈকমরুষ্করম্| সপ্তরাত্রত্রযং যাবত্ ত্রীণি ত্রীণি ততঃ পরম্||৬৮|| আচত্বারিংশতস্তানি হ্রাসযেদ্দ্বৃদ্ধিবত্ততঃ| সহস্রমুপযুঞ্জীত সপ্তাহৈরিতি সপ্তভিঃ||৬৯|| যন্ত্রিতাত্মা ঘৃতক্ষীরশালিষষ্টীকভোজনঃ| তদ্বত্ত্রিগুণিতং কালং প্রযোগান্তেঽপি চাচরেত্||৭০|| আশেষো লভতেঽপূর্বা বহ্নের্দীপ্তিং বিশেষতঃ| প্রমেহকৃমিকুষ্ঠার্শোমেদোদোষবিবর্জিতঃ||৭১||

স০-ভল্লাতকানি সুনিষ্পন্নানি গ্রীষ্মে সংগৃহ্য ধান্যরাশৌ নিধাপযেত্| হেমন্তে মধুরস্নিগ্ধশীতলৈঃ সংস্কৃতশরীরস্তান্যষ্টাবষ্টগুণে জলে ক্বাথযেত্| তত্ক্বাথমষ্টাংশশেষং ক্ষীরসহিতং শীতং পিবেত্| পশ্চাত্তস্মিন্ প্রতিদিনং চৈকৈকং ভল্লাতকং বর্ধযেত্-অধিকীকৃত্য ক্বাথযেদিত্যর্থঃ| সপ্তরাত্রত্রযং যাবত্| সপ্তরাত্রত্রযাত্ পরতস্ত্রীণি ত্রীণ্যরুষ্করাণি চত্বারিংশতং যাবদ্বর্ধযেত্| অনন্তরং তানি-অরুষ্করাণি, বৃদ্ধিবদ্ধ্রাসযেত্| ইতি-এবং, সপ্তভিঃ সপ্তাহৈঃ সহস্রমুপযুঞ্জীত| যন্ত্রিতাত্মা পুরুষো ঘৃতক্ষীরশালিষষ্টিকভোজনঃ| তথৈব চ ভল্লাতকপ্রযোগান্ত একবিংশতিসপ্তাহান্ ঘৃতক্ষীরশালিষষ্টিকভোজনং কুর্যাত্| এবং কৃতভল্লাতকপ্রযোগোঽপূর্বাঃ-অভিলষিতা দযিতাঃ, আশিষো লভতে, তথা বিশেষেণ বহ্নিপাটবম্| প্রমেহাদিবর্জিতশ্চ স্যাত্|

Adhikarana bhallAtakasvarasarasAyanam (72-74) · Śloka 74

পিষ্টস্বেদনমরুজৈঃ পূর্ণং ভল্লাতকৈর্বিজর্জরিতৈঃ| ভূমিনিখাতে কুম্ভে প্রতিষ্ঠিতং কৃষ্ণমৃল্লিপ্তম্||৭২|| পরিবারিতং সমন্তাত্পচেত্ততো গোমযাগ্নিনা মৃদুনা| তত্স্বরসো যশ্চ্যবতে গৃহ্ণীযাত্তং দিনেঽন্যস্মিন্||৭৩|| অমুমুপযুজ্য স্বরসং মধ্বষ্টমভাগিকং দ্বিগুণসর্পিঃ| পূর্ববিধিযন্ত্রিতাত্মা প্রাপ্নোতি গুণান্ স তানেব||৭৪||

স০-পিষ্টং শালিচূর্ণং স্বেদ্যতেঽস্মিন্নিতি পিষ্টস্বেদনং,- ভাণ্ডম্| তদরুজৈঃ-দৃঢৈঃ, ভল্লাতকৈস্তথা বিজর্জরিতৈঃ পূর্ণং সত্ কৃতচ্ছিদ্রং ভূমিনিখাতে কুম্ভে প্রতিষ্ঠিতং কৃষ্ণমৃত্তিকযা লিপ্তমনন্তরং গোমযাগ্নিনা মৃদুনা পরিবারিতং পচেত্| তত্স্বরসো যস্তত্র ধরানিখাতে কুম্ভে পতেত্, তমন্যস্মিন্নহনি গৃহ্ণীযাত্| অমুং-পূর্বোক্তং, স্বরসং মাক্ষিকাষ্টমভাগং দ্বিগুণঘৃতং পূর্ববিধিনা যন্ত্রিতাত্মা সন্নুপযুজ্য, তানেব-পূর্বোক্তান্, গুণান্ প্রাপ্নোতি| আর্যাস্তিস্রঃ, মধ্যমাঽত্র মুখচপলা|

Adhikarana bhallAtakaghRutarasAyanam (75-78) · Śloka 78

পুষ্টানি পাকেন পরিচ্যুতানি ভল্লাতকান্যাঢকসম্মিতানি| ঘৃষ্ট্বেষ্টিকাচূর্ণকণৈর্জলেন প্রক্ষাল্য সংশোষ্য চ মারুতেন||৭৫|| জর্জরাণি বিপচেজ্জলকুম্ভে পাদশেষধৃতগালিতশীতম্| তদ্রসং পুনরপি শ্রপযেত ক্ষীরকুম্ভসহিতং চরণস্থে||৭৬|| সর্পিঃ পক্বং তত্র তুল্যপ্রমাণং যুঞ্জ্যাত্স্বেচ্ছং শর্করাযা রজোভিঃ| একীভূতং তত্খজক্ষোভণেন স্থাপ্যং ধান্যে সপ্তরাত্রং সুগুপ্তম্||৭৭|| তমমৃতরসপাকং যঃ প্রগে প্রাশমশ্নন্ অনু পিবতি যথেষ্টং বারি দুগ্ধং রসং বা| স্মৃতিমতিবলমেধাসত্ত্বসারৈরুপেতঃ কনকনিচযগৌরঃ সোঽশ্নুতে দীর্ঘমাযুঃ||৭৮||

স০-সুনিষ্পন্নানি ভল্লাতকানি পাকেন পরিচ্যুতান্যাঢকসম্মিতানি ইষ্টিকাচূর্ণকণৈর্ঘৃষ্টানি জলেন প্রক্ষাল্য, মারুতেন সংশোষ্য-ন ত্বাতপে, ততো জর্জরাণি জলদ্রোণে বিপচেত্| পাদশেষধৃতগালিতং শীতং চ তদ্রসং পুনরপি ক্ষীরদ্রোণসহিতং পচেত্| [তত্র-] তস্মিন্ পাদশেষস্থে, তুল্যপ্রমাণং সর্পিঃ পক্বং শর্করাচূর্ণেন যুতং যথেচ্ছং প্রকৃত্যাদিবশাদ্যুঞ্জীত| তচ্চ খজলোডনেনৈকীভূতং ধান্যমধ্যে সপ্তরাত্রং সুগুপ্তং স্থাপ্যম্| ইন্দ্রবজ্রাস্বাগতাশালিন্যো বৃত্তানি| তমমৃতরসতুল্যপাকং যঃ পূর্বাহ্ণে প্রাশং-লেহং, ভক্ষযন্ পশ্চাদ্যথেষ্টং জলং ক্ষীরং মাংসরসং বা পিবতি, স স্মৃত্যাদিযুতঃ সুবর্ণৌঘগৌরো দীর্ঘমাযুঃ প্রাপ্নোতি| মালিনী|

Adhikarana bhallAtakasiddhatailaM kuShThaghnam (79) · Śloka 79

দ্রোণেঽংভসো ব্রণকৃতাং ত্রিশতাদ্বিপক্বাত্ ক্বাথাঢকে পলসমৈস্তিলতৈলপাত্রম্| তিক্তাবিষাদ্বযবরাগিরিজন্মতার্ক্ষ্যৈঃ সিদ্ধং পরং নিখিলকুষ্ঠনিবর্হণায||৭৯||

স০-জলদ্রোণে ব্রণকৃতাং ভল্লাতকানাং শতত্রযাদ্বিপক্বাত্ ক্বাথস্যাঢকেঽবশিষ্টে তিলতৈলাঢকং তিক্তাদিভিঃ পালিকৈঃ কল্কিতৈঃ পক্বং নিঃশেষকুষ্ঠনিষূদনায পরং-শ্রেষ্ঠম্| বসন্ততিলকম্|

Adhikarana bhallAtako AmalakashuktyAdibhirAyuShkaraH (80) · Śloka 80

সহামলকশুক্তিভির্দধিসরেণ তৈলেন বা গুডেন পযসা ঘৃতেন যবসক্তুভির্বা সহ| তিলেন সহ মাক্ষিকেণ পললেন সূপেন বা বপুষ্করমরুষ্করং পরমমেধ্যমাযুষ্করম্||৮০||

স০-আমলকত্বগাদিভিরেকাদশভিঃ সহ প্রত্যেকং ভল্লাতকমুপযুক্তং প্রশস্তশরীরকরণকারণম্| তথা পরং-অতিশযেন, মেধ্যমাযুষ্প্রদং চ স্যাত্| পৃথ্বীবৃত্তম্|

Adhikarana bhallAtako yathAvidhiprayukto~amRutakalpaH (81) · Śloka 81

ভল্লাতকানি তীক্ষ্ণানি পাকীন্যগ্নিসমানি চ| ভবন্ত্যমৃতকল্পানি প্রযুক্তানি যথাবিধি||৮১||

স০-ভল্লাতকানি তীক্ষ্ণানি সুনিষ্পন্নানি দহনতুল্যানি তানি যথাবিধি প্রযুক্তান্যমৃততুল্যানি ভবন্তি|

Adhikarana bhallAtakasya kaphajarogAdinAshatve prashaMsA (82) · Śloka 82

কফজো ন স রোগোঽস্তি ন বিবন্ধোঽস্তি কশ্চন| যং ন ভল্লাতকং হন্যাচ্ছীঘ্রমগ্নিবলপ্রদম্||৮২||

স০-শ্লেষ্মোত্থো রোগঃ স নাস্তি, বিবন্ধশ্চ স কশ্চিদপি ন বিদ্যতে, যং-রোগং বিবন্ধং বা, ভল্লাতকং দ্রুততরং পটুতরদহনকরং ন হন্যাত্|

Adhikarana BllAkasya vAtArapavidhAne~api kulatthAdi varjanam (83) · Śloka 83

বাতাতপবিধানেঽপি বিশেষেণ বিবর্জযেত্| কুলত্থদধিশুক্তানি তৈলাভ্যঙ্গাগ্নিসেবনম্||৮৩||

স০-বাতাতপবিধাবপি ভল্লাতকস্য কুলত্থাদীনি বিশেষেণ বর্জযেত্|

Adhikarana tuvarakatailaM kuShThaghnam (84-91) · Śloka 91

বৃক্ষাস্তুবরকা নাম পশ্চিমার্ণবতীরজাঃ| বীচীতরঙ্গবিক্ষোভমারুতোদ্ধূতপল্লবাঃ||৮৪|| তেভ্যঃ ফলান্যাদদীত সুপক্বান্যম্বুদাগমে| মজ্জ্ঞঃ ফলেভ্যশ্চাদায শোষযিত্বাঽবচূর্ণ্য চ||৮৫|| তিলবত্ পীডযেদ্ দ্রোণ্যাং, ক্বাথযেদ্বা কুসুম্ভবত্| তত্তৈলং সম্ভৃতং ভূযঃ পচেদাসলিলক্ষযাত্||৮৬|| অবতার্য করীষে চ পক্ষমাত্রং নিধাপযেত্| স্নিগ্ধস্বিন্নো হৃতমলঃ পক্ষাদুদ্ধৃত্য তত্ততঃ||৮৭|| চতুর্থভক্তান্তরিতঃ প্রাতঃ পাণিতলং পিবেত্| মন্ত্রেণানেন পূতস্য তৈলস্য দিবসে শুভে||৮৮|| "মজ্জসার মহাবীর্য সর্বান্ ধাতূন্ বিশোধয| শঙ্খচক্রগদাপাণিস্ত্বামাজ্ঞাপযতেঽচ্যুতঃ||৮৯|| তেনাস্যোর্ধ্বমধস্তাচ্চ দোষা যান্ত্যসকৃত্ততঃ| সাযমস্নেহলবণাং যবাগূং শীতলাং পিবেত্||৯০|| পঞ্চাহানি পিবেত্তৈলমিত্থং বর্জ্যান্ বিবর্জযন্| পক্ষং মুদ্গরসান্নাশী সর্বকুষ্ঠৈর্বিমুচ্যতে||৯১||

স০-তুবরসংজ্ঞা বৃক্ষাস্তুবরকাঃ পশ্চিমসমুদ্রতটোদ্ভূতাঃ| বীচীত্যাদিনা বিশেষণেন তোযনিধিনিকটতরত্বং প্রতিপাদযতি| তেভ্যো বৃক্ষেভ্যো জলদাগমে সুপক্বানি ফলানি গৃহ্ণীযাত্| ফলেভ্যোঽপি মজ্জ্ঞো গৃহীত্বা শোষযিত্বা সুষ্ঠু চূর্ণযিত্বা চ তিলবদ্ দ্রোণ্যাং পীডযেত্| কুসুম্ভবদ্বা ক্বাথযেত্জ্| তচ্চ তৈলং সিদ্ধং পুনঃ পচেত্তোযক্ষযং যাবত্| পক্বং চাবর্তায করীষে মাসার্ধং নিধাপযেত্| যন্ত্রপীডিতং তু প্রকৃত্যৈব নিস্তোযং তৈলং তদক্বথিতমেব নিধাপযেত্| ততঃ-পক্ষাদনন্তরং, তৈলমুদ্দ্ধৃত্য স্নিগ্ধস্বিন্নো হৃতদোষো মন্ত্রেণানেন মজ্জসারেত্যাদিনা পবিত্রিতস্য তৈলস্য শুভদিবসে চতুর্থেন ভক্তেনান্তরিতোঽহর্মুখে কর্ষং পিবেত্| তেন তৈলেনাস্য পুংস ঊর্ধ্বমধশ্চ পুনঃ পুনর্দোষা যান্তি| অনন্তরমপরাহ্ণেঽস্নেহলবণাং যবাগূং শিশিরাং পিবেত্| ইত্থং-অনেন প্রকারেণ, পরিহার্যান্ পরিহরন্ পঞ্চ দিবসানি তৈলং পিবেত্| পক্ষং মুদ্গরসান্নভোজনঃ সর্বকুষ্ঠৈর্বিমুচ্যতে|

Adhikarana tuvarakatailaM khadirakvAthasiddhaM kuShThaghnam (92-93) · Śloka 93

তদেব খদিরক্বাথে ত্রিগুণে সাধু সাধিতম্| নিহিতং পূর্ববত্পক্ষং পিবেন্মাসং সুযন্ত্রিতঃ||৯২|| তেনাভ্যক্তশরীরশ্চ কুর্বন্নাহারমীরিতম্| | ভিন্নস্বরং রক্তনেত্রং শীর্ণাঙ্গং কৃমিভক্ষিতম্| ] অনেনাশু প্রযোগেণ সাধযেত্কুষ্ঠিনং নরম্||৯৩||

স০-তদেব-তুবরাস্থিতৈলং, খদিরক্বাথেন ত্রিগুণেন সম্যক্পক্বং পূর্ববত্-করীষে পক্ষং নিহিতং, মাসং সুযন্ত্রিতঃ পিবেত্| তেন চ তৈলেনাভ্যক্তশরীরো ভোজনং পূর্বোক্তং মুদ্গরসান্নং বিদধ্যাত্| এতেন প্রযোগেণ শীঘ্রং কুষ্ঠবন্তং পুরুষমুপক্রমেত্|

Adhikarana tuvarakatailaM sarpirmadhuyutaM dvishatAyuShkaram (94) · Śloka 94

সর্পির্মধুযুতং পীতং তদেব খদিরাদ্বিনা| পক্ষং মাংসরসাহারং করোতি দ্বিশতাযুষম্||৯৪||

স০-তদেব-তুবরাস্থিতৈলং, খদিরমন্তরেণ ঘৃতমধুযুতং পক্ষং পীতং সন্মাংসরসাহারং নরং দ্বিশতাযুষং বিধত্তে|০

Adhikarana tuvarakatailaM nasyopayojitaM trishatAyuShkaram (95) · Śloka 95

তদেব নস্যে পঞ্চাশদ্দিবসানুপযোজিতম্| | বলীপলিতনির্মুক্তং স্থিরস্মৃতিকচদ্বিজম্| ] বপুষ্মতং শ্রুতধরং করোতি ত্রিশতাযুষম্||৯৫||

স০-তদেব তৈলং নস্যে পঞ্চাশদ্বাসরান্ সেবিতং বরশরীরং শ্রুতধরং ত্রিবর্ষশতাযুষং পুরুষং করোতি|

Adhikarana pippalIrasAyanam (96) · Śloka 96

পঞ্চাষ্টৌ সপ্ত দশ বা পিপ্পলীর্মধুসর্পিষা| রসাযনগুণান্বেষী সমামেকাং প্রযোজযেত্||৯৬||

স০-পঞ্চ পিপ্পলীরথবা সপ্তাষ্টৌ বা দশ বা মাক্ষিকসর্পির্ভ্যাং রসাযনগুণমভিলষ্য বর্ষমেকং প্রযোজযেত্|

Adhikarana anyaM pippalI rasAyanam (97-98) · Śloka 98

তিস্রস্তিস্রস্তু পূর্বাহ্ণে ভুক্ত্বাঽগ্রে ভোজনস্য চ| পিপ্পল্যঃ কিংশুকক্ষারভাবিতা ঘৃতভর্জিতাঃ||৯৭|| প্রযোজ্যা মধুসম্মিশ্রা রসাযনগুণৈষিণা| |৯৮|

স০-পলাশক্ষারভাবিতাঃ পিপ্পল্যঃ সর্পিষা ভর্জিতা মাক্ষিকান্বিতাস্তিস্রঃ পূর্বাহ্ণে, তিস্রো ভুক্ত্বা, তিস্রো ভোজনস্যাগ্রে, প্রযোজ্যাঃ রসাযনগুণং কামযমানেন|

Adhikarana vardhamAnapippalIsahasram (98-1) · Śloka 1

| ক্রমবৃদ্ধ্যা দশাহানি দশপৈপ্পলিকং দিনম্||৯৮|| বর্ধযেত্পযসা সার্ধং তথৈবাপনযেত্পুনঃ| জীর্ণৌষধশ্চ ভুঞ্জীত ষষ্টিকং ক্ষীরসর্পিষা||৯৯|| পিপ্পলীনাং সহস্রস্য প্রযোগোঽযং রসাযনম্| পিষ্টাস্তা বলিভিঃ পেযাঃ শৃতা মধ্যবলৈর্নরৈঃ||১০০|| | শীতীকৃতা হীনবলৈর্বীক্ষ্য দোষামযান্ প্রতি| ]||১||

স০-দশ দিনানি দশপৈপ্পলিকং দিনং ক্রমবৃদ্দ্যা ক্ষীরেণ সহ যোজযেত্, বর্ধমানা দশ পিপ্পলীঃ প্রযোজযেদিত্যর্থঃ| তথৈব দশপৈপ্পলিকং দিনং পযসা সহাপনযেত্| পরিণতভেষজশ্চ ষষ্টিকং দুগ্ধঘৃতেনাদ্যাত্| অযং-এবংপ্রকারঃ, সহস্রপিপ্পলীনাং প্রযোগো রসাযনং স্যাত্| তাঃ-পিপ্পল্যঃ, পিষ্টাঃ সত্যো বলবদ্ভির্নরৈঃ পাতব্যাঃ, মধ্যবলৈর্নরৈঃ ক্বথিতাঃ পেযাঃ|

Adhikarana vardhamAnapippalIsahasradvayam (101) · Śloka 101

তদ্বচ্চ ছাগদুগ্ধেন দ্বে সহস্রে প্রযোজযেত্| |১০১|

স০-তদ্বচ্চেতি অনেনৈব ক্রমেণ ছাগক্ষীরেণ সহ দ্বে সহস্রে প্রযোজযেত্|

Adhikarana eShAM pippalIprayogANAM phalam (101-102) · Śloka 102

| এভিঃ প্রযোগৈঃ পিপ্পল্যঃ কাসশ্বাসগলগ্রহান্||১০১|| যক্ষ্মমেহগ্রহণ্যর্শঃপাণ্ডুত্ববিষমজ্বরান্| ঘ্নন্তি শোফং বমিং হিধ্মাং প্লীহানং বাতশোণিতম্||১০২||

স০-এভিঃ-পূর্বোক্তৈঃ প্রযোগৈঃ, পিপ্পল্য উপযুক্তাঃ কাসাদীংশ্ছোফাদীংশ্চ জযন্তি|

Adhikarana lohapAtralIptapippalI prayogaH (103) · Śloka 103

বিল্বার্ধমাত্রেণ চ পিপ্পলীনাং পাত্রং প্রলিম্পেদযসো নিশাযাম্| প্রাতঃ পিবেত্তত্সলিলাঞ্জলিভ্যাং বর্ষং যথেষ্টাশনপানচেষ্টঃ||১০৩||

স০-পিপ্পলীকর্ষদ্বযমাত্রেণ নিশাযাং লোহপাত্রং লিম্পেত্| তচ্চ জলাঞ্জলিযুগেন প্রাতঃ পিবেত্ সংবত্সরং স্বেচ্ছাভোজনপানক্রিযঃ| এতচ্চ রসাযনং পূর্বগুণম্| ইন্দ্রবজ্রা ব্রত্তম্|

Adhikarana lohapAtralIptanAM shuNThacAdInAM prayogaH (104-105) · Śloka 105

শুণ্ঠীবিডঙ্গত্রিফলাগুডূচী- যষ্টীহরিদ্রাতিবলাবলাশ্চ| মুস্তাসুরাহ্বাগুরুচিত্রকাশ্চ সৌগন্ধিকং পঙ্কজমুত্পলানি||১০৪|| ধবাশ্বকর্ণাসনবালপত্র- সারাস্তথা পিপ্পলিবত্ প্রযোজ্যাঃ| লোহোপলিপ্তাঃ পৃথগেব জীবে- ত্সমাঃ শতং ব্যাধিজরাবিমুক্তঃ||১০৫||

স০-শুণ্ঠ্যাদীন্ পৃথগেব পিপ্পলীরিব লোহোপলিপ্তানুপযুজ্য বর্ষশতং রোগজরারহিতো জীবতি|

Adhikarana eShAM rasAyanAnAM dviguNaprakarShakaraH prayogaH (106) · Śloka 106

ক্ষীরাঞ্জলিভ্যাং চ রসাযনানি যুক্তান্যমূন্যাযসলেপনানি| কুর্বন্তি পূর্বোক্তগুণপ্রকর্ষ- মাযুঃপ্রকর্ষং দ্বিগুণং ততশ্চ||১০৬||

স০-অমূনি-পূর্বোক্তানি রসাযনানি, লোহলেপনানি ক্ষীরাঞ্জলিভ্যাং-দুগ্ধপলাষ্টকেন, উপযুক্তানি পূর্বোক্তগুণাতিশযমাযুঃ প্রকর্ষং চ ততো দ্বিগুণং বিদধতি| আদ্যন্তে ইন্দ্রবজ্রাখ্যে, মধ্যমং তূপজাতিঃ|

Adhikarana somarAjIrasAyanam (107) · Śloka 107

অসনখদিরযূষৈর্ভাবিতাং সোমরাজীং মধুঘৃতশিখিপথ্যালোহচূর্ণৈরুপেতাং| শরদমবলিহানঃ পারিণামান্ বিকারাং- স্ত্যজতি মিতহিতাশী তদ্বদাহারজাতান্||১০৭||

স০-অসনাদিক্বাথেন ভাবিতাং বাকুচীং মাক্ষিকাদিভির্যুক্তাং বর্ষমবিলহন্ পারিণামান্-বযঃপরিণতিজান্, বিকারান্ জহাতি| তথা হিতমিতভোজন আহারজান্ বিকারাংস্ত্যজতি| মালিনী|

Adhikarana anyaM somarAjIrasAyanam kuShThaghnam (108) · Śloka 108

তীব্রেণ কুষ্ঠেন পরীতমূর্তি- র্যঃ সোমরাজীং নিযমেন খাদেত্| সংবত্সরং কৃষ্ণতিলদ্বিতীযাং স সোমরাজীং বপুষাঽতিশেতে||১০৮||

স০-দারুণেন কুষ্ঠেন ব্যাপ্তদেহো যঃ শশাঙ্কলেখাং কৃষ্ণতিলযুতাং নিযমেন বত্সরং ভক্ষযেত্, স চন্দ্রকান্তিং শরীরেণ জযেত্| উপজাতিঃ|

Adhikarana anyaM somarAjIrasAyanam kuShThaghnam (109-110) · Śloka 110

যে সোমরাজ্যা বিতুষীকৃতাযা- শ্চূর্ণৈরূপেতাত্ পযসঃ সুজাতাত্| উদ্ধৃত্য সারং মধুনা লিহন্তি তক্রং তদেবানু পিবন্তি চান্তে||১০৯|| কুষ্ঠিনঃ শীর্যমাণাঙ্গাস্তে জাতাঙ্গুলিনাসিকাঃ| ভান্তি বৃক্ষা ইব পুনঃ প্ররূঢনবপল্লবাঃ||১১০||

স০-যে পুরুষা বিতুষীকৃতাযা ইন্দুরাজ্যাশ্চূর্ণৈর্যুক্তাত্ ক্ষীরাত্ সুজাতাত্ সারং-নবনীতাখ্যং, উদ্ধৃত্য মাক্ষিকেণ সহ লিহন্তি, পশ্চাত্ তদেব তক্রং চ যে পিবন্তি, তে কুষ্ঠবন্তঃ শীর্যমাণশরীরাঃ সমুদ্ভূতাঙ্গুলিঘ্রাণাঃ শোভন্তে| তরব ইব ভূযঃ সঞ্জাতপ্রত্যগ্রপল্লবাঃ| ইন্দ্রবজ্রা|

Adhikarana rasonasyotpattiH (1-112) · Śloka 112

| শীতবাতহিমদগ্ধতনূনাং স্তব্ধভগ্নকুটিলব্যথিতাস্থ্নাম্| ভেষজস্য পবনোপহতানাং বক্ষ্যতে বিধিরতো লশুনস্য||১|| ] রাহোরমৃতচৌর্যেণ লূনাদ্যে পতিতা গলাত্| অমৃতস্য কণা ভূমৌ তে রসোনত্বমাগতাঃ||১১১|| দ্বিজা নাশ্নন্তি তমতো দৈত্যদেহসমুদ্ভবম্| সাক্ষাদমৃতসম্ভূতের্গ্রামণীঃ স রসাযনম্||১১২||

অথ লশুনকল্পমাচষ্টে- সং-স্বর্ভানোরমৃতাপহরণাপরাধেন কণ্ঠাচ্ছিন্নাদ্যেঽমৃতস্য বিন্দবো ধরিত্র্যাং পতিতাস্তে লশুনত্বং প্রাপ্তাঃ| য(অ)-অস্মাদ্ধেতোঃ, দৈত্যদেহোত্থং লশুনমতো দ্বিজা ন ভক্ষযন্তি| সাক্ষাচ্চামৃতসম্ভূতত্বাদ্ধেতোরসৌ রসোনো রসাযনং গ্রামণীঃ শ্রেষ্ঠঃ|

Adhikarana doShovisheSheNa lashunashIlanakAlaH (113-114) · Śloka 114

শীলযেল্লশুনং শীতে, বসন্তেঽপি কফোল্বণঃ| ঘনোদযেঽপি বার্তাতঃ, সদা বা গ্রীষ্মলীলযা||১১৩|| স্নিগ্ধশুদ্ধতনুঃ শীতমধুরোপস্কৃতাশযঃ| তদুত্তংসাবতংসাভ্যাং চর্চিতানুচরাজিতঃ||১১৪||

স০-শীতে-হেমন্তশিশিরযোঃ, লশুনং শীলযেত্| কফাধিকো বসন্তেঽপি শীলযেত্| বাতোত্তরো বর্ষাস্বপি শীলযেত্| সর্বদৈব বা বাতার্তৌ গ্রীষ্মর্তুচর্যাচরণেন শীলযেত্| কীদৃশঃ সন্ ? স্নিগ্ধা শুদ্ধা চ তনুর্যস্য স এবম্| তথা শীতলৈর্মধুরৈশ্চোপস্কৃতঃ-সংস্কৃতঃ, আশযো যস্য স এবম্| তথা তস্য-লশুনস্য, শেখরকর্ণপূরাভ্যাং মণ্ডিতা অনুচরাঃ-সেবকাঃ, অঙ্গণে যস্য স তথা|

Adhikarana lashunasvarasavidhiH kaNThanADIshuddhaye (115-119) · Śloka 119

তস্য কন্দান্ বসন্তান্তে হিমবচ্ছকদেশজান্| অপনীতত্বচো রাত্রৌ তিমযেন্মদিরাদিভিঃ||১১৫|| তত্কল্কস্বরসং প্রাতঃ শুচিতান্তবপীডিতম্| মদিরাযাঃ সূরূঢাযাস্ত্রিভাগেন সমন্বিতম্||১১৬|| মদ্যস্যান্যস্য তক্রস্য মস্তুনঃ কাঞ্জিকস্য বা| তত্কাল এব বা যুক্তং যুক্তমালোচ্য মাত্রযা||১১৭|| তৈলসর্পির্বসামজ্জক্ষীরমাংসরসৈঃ পৃথক্| ক্বাথেন বা যথাব্যাধি রসং কেবলমেব বা||১১৮|| পিবেদ্গণ্ডূষমাত্রং প্রাক্ কণ্ঠনাডীবিশুদ্ধযে| |১১৯|

স০-তস্য-লশুনস্য, কন্দান্ বসন্তঋতজাংস্তথা হিমবেদ্দেশজাংশ্ছকদেশজান্ বা উদ্ধৃতত্বচো রাত্রৌ মদিরাবীজপূররসাদিভিস্তিমযেত্-ক্লেদযেত্| তত্কল্কস্য স্বরসং ধৌতবস্ত্রপীডিতং মদিরাযাঃ সুরুঢাযাস্ত্রিভাগেন যুতং, মদ্যাদের্বা ত্রিভাগেন যুতং, অথবা তস্মিন্নেব কালে সুরাদিভির্যুতং, মাত্রযা-দেশকালাতুরাদ্যপেক্ষিণ্যা, আলোচ্য-নিরূপ্য, তৈলাদিভির্বা পৃথক্ যুক্তং যদি বা ক্বাথেন যথাব্যাধিবশাদ্যুক্তং, কেবলমেব বা রসং, প্রাক্-পূর্বং, গণ্ডূষমাত্রং পিবেত্ গলনাডীবিশোধনায|

Adhikarana lashunarasasevane vamimUrcCAyayormukhe shItalajasekaH lashunarasasevane vedanAyAM svedanam (119-120) · Śloka 120

| প্রততং স্বেদনং চানু বেদনাযাং প্রশস্যতে||১১৯|| শীতাম্বুসেকঃ সহসা বমিমূর্চ্ছাযযোর্মুখে| |১২০|

স০-বেদনাযাং সত্যাং সততং স্বেদনং শ্রেষ্ঠম্| তথা বমৌ মূর্চ্ছাযে চ সহসা-ঝটিত্যেব, শীতলজলসেকো মুখে শস্যতে|

Adhikarana lashunarasasevane klamApAye sheSharasapAnam (120) · Śloka 120

| শেষং পিবেত্ ক্লমাপাযে স্থিরতাং গত ওজসি||১২০||

স০-শেষং রসং ক্লান্তেরপগম ওজসি স্থৈর্যং প্রাপ্তে সতি পিবেত্|

Adhikarana lashunarasasevane vidAhaparihArArthaM shItAnulepanAdi (121) · Śloka 121

বিদাহপরিহারায পরং শীতানুলেপনঃ| ধারযেত্সাম্বুকণিকা মুক্তাকর্পূরমালিকাঃ||১২১||

স০-বিদাহোপশান্তযেঽতিশীতানুলেপনঃ স্যাত্| তথা মুক্তামালিকাঃ কর্পূতমালিকাশ্চ সজলকণা ধারযেত্|

Adhikarana lashunarasasevane parAmAtrAdi (122) · Śloka 122

কুডবোঽস্য পর মাত্রা তদর্ধং কেবলস্য তু| পলং পিষ্টস্য তন্মজ্জ্ঞঃ সভক্তং প্রাক্ চ শীলযেত্||১২২||

স০-অস্যোত্তমা মাত্রা সুরাসহিতস্য কুডবঃ| কেবলস্য তু রসস্য কুডবার্ধং পরং মাত্রা| তন্মজ্জ্ঞঃ পিষ্টস্য পলং পরামাত্রা| সভক্তং প্রাক্ চাহারাত্ তচ্ছীলযেত্|

Adhikarana lashunarasasevane jIrNaSAlyodanaBojanAdi (123) · Śloka 123

জীর্ণশাল্যোদনং জীর্ণে শঙ্খকুন্দেন্দুপাণ্ডুরম্| ভুঞ্জীত যূষৈঃ পযসা রসৈর্বা ধন্বচারিণাম্||১২৩||

স০-পুরাণশালিভক্তং পরিণতে শঙ্খাদিবত্ সিতং যূষাদিভিঃ সাত্ম্যাদিবশাত্ ভুঞ্জীত|

Adhikarana lashunarasasevane madyAdipAnam (124) · Śloka 124

মদ্যমেকং পিবেত্তত্র তৃট্প্রবন্ধে জলান্বিতম্| অমদ্যপস্ত্বারনালং ফলাম্বু পরিসিক্থকাম্||১২৪||

স০-তত্র চ তৃষি জাতাযাং কেবলং মদ্যং জলযুতং পিবেত্| অমদ্যপস্তু নরো ধান্যাম্লাদীনি পিবেত্| পরিসিক্থিকা-সট্টকবিশেষঃ, কিট্টিরিতি ক্বচিত্প্রসিদ্ধা|

Adhikarana lashunakalkarasAyanam (125) · Śloka 125

তত্কল্কং বা সমঘৃতং ঘৃতপাত্রে খজাহতম্| স্থিতং দশাহাদশ্নীযাত্তদ্বদ্বা বসযা সমম্||১২৫||

স০-অথবা তস্য-লশুনস্য, কল্কং তুল্যঘৃতং খজেনালোডিতং ঘৃতভাণ্ডে স্থিতং দশাহাদূর্ধ্বং ভুঞ্জীত| তথৈব বসযা সহ স্থিতং দশাহাদূর্ধ্বং ভুঞ্জীত|

Adhikarana lashunagarbhashUlyamAMsarasAyanam (126) · Śloka 126

বিকঞ্চুকপ্রাজ্যরসোনগর্ভান্ সশূল্যমাংসান্ বিবিধোপদংশান্| নিমর্দকান্ বা ঘৃতশুক্তযুক্তান্ প্রকামমদ্যাল্লঘু তুচ্ছমশ্নন্||১২৬||

স০-বিকঞ্চুকো-বিগতত্বগ্, যঃ প্রাজ্যঃ-প্রভূতো লশুনঃ, স গর্ভো যেষাং তাংস্তথাবিধান্, তথা সহশূল্যমাংসেন সশূল্যমাংসান্, তথা নানাবিধরুচকান্, ঈদৃশান্ বা নিমর্দকান্ ঘৃতশুক্তকান্বিতান্, যথেচ্ছং লঘু তথা তুচ্ছং-অল্পং, ভুঞ্জানঃ| উপেন্দ্রবজ্রাবৃত্তম্|

Adhikarana pittaraktavihInasamastAvaraNA vRuteshuddhe ca vAyau lashunAtparaM dravyaM na vidyates (127) · Śloka 127

পিত্তরক্তবিনির্মুক্তসমস্তাবরণাবৃতে| শুদ্ধে বা বিদ্যতে বাযৌ ন দ্রব্যং লশুনাত্পরম্||১২৭||

স০-বাতে লশুনাত্পরমন্যদ্ দ্রব্যং ন বিদ্যতে| কিম্ভূতে ? পিত্তরক্তবিহীনসকলাবরণাবৃতে| শুদ্ধে-কেবলে বা, পবনেঽপরং দ্রব্যং ন বিদ্যতে|

Adhikarana priyAmbuguDadugdhAdernarasya rasono vyApattaye (128) · Śloka 128

প্রিযাম্বুগুডদুগ্ধস্য মাংসমদ্যাম্লবিদ্বিষঃ| অতিতিক্ষোরজীর্ণং চ রসোনো ব্যাপদে ধ্রুবম্||১২৮||

স০-লশুনং প্রিযজলাদের্নরস্য, মাংসাদিদ্বেষিণঃ, তথাঽজীর্ণমতিতিক্ষোঃ, নিশ্চযেন ব্যাপত্তযে স্যাত্|

Adhikarana lashunaprayogAnte mRudu virecanam (129) · Śloka 129

পিত্তকোপভযাদন্তে যুঞ্জ্যান্মৃদু বিরেচনম্| রসাযনগুণানেবং পরিপূর্ণান্ সমশ্রুতে||১২৯||

স০-লশুনপ্রযোগান্তে চ পিত্তকোপভযাত্ মৃদু-অতীক্ষ্ণং বিরেচনং চ কারযেত্| এবং-অনেন প্রকারেণ যুক্তে রসোনে, রসাযনগুণান্ পরিপূর্ণান্ প্রাপ্নোতি| [ "আমাম্বুপানেক্ষুবিকারমত্স্যযানাধ্ববাতাতপভাষ্যচিন্তাঃ| স্বপ্নং দিবা জাগরণং নিশাসু পিষ্টং ব্যবাযং দধি চাত্র নেচ্ছেত্|| পাণ্ডূদরোরঃক্ষতশোফতৃষ্ণাপানাত্যযচ্ছর্দিবিষব্রণেষু| পৈত্তে বিকাড়্রেঽক্ষিগদেঽতিসারে ক্ষামে শরীরে চ স বর্জনীযঃ||" ইতি বৃদ্ধবাগ্ভটাত্| রসোনস্যোপরি এতানি বিরুদ্ধানি| ]

Adhikarana shilAjatuna utpattiH (130) · Śloka 130

অধুনা শিলাজতুকল্পং ব্রূতে গ্রীষ্মেঽর্কতপ্তা গিরযো জতুতুল্যং বমন্তি যত্| হেমাদিষড্ধাতুরসং প্রোচ্যতে তচ্ছিলাজতু||১৩০||

স০ -গ্রীষ্মে ঋতৌ গিরযো রবিতপ্তা জতুতুল্যং যত্ বমন্তিক্ষরন্তি, সুবর্ণাদযশ্চ তে ষড্ধাতবশ্চ তেষাং রসং, তত্ শিলাজতু গদ্যতে|

Adhikarana shilAjatuna lakShaNam shilAjatuna prAshastyam (131) · Śloka 131

সর্বং চ তিক্তকটুকং নাত্যুষ্ণং কটু পাকতঃ| ছেদনং চ বিশেষেণ লৌহং তত্র প্রশস্যতে||১৩১||

স০-সর্বং-ষড্ধাতুজমপি, গিরিজং তিক্তকটুকং ন চাতিশযেনোষ্ণং পাকে কটুকং ছেদনং চ বিশেষেণ| তত্র মধ্যে লৌহং শিলাজং প্রশস্যতে|

Adhikarana shreShThasya shilAjatuna lakShaNam (132) · Śloka 132

গোমূত্রগন্ধি কৃষ্ণং গুগ্গুল্বাভং বিশর্করং মৃত্স্নম্| স্নিগ্ধমনম্লকষাযং মৃদু গুরু চ শিলাজতু শ্রেষ্ঠম্||১৩২||

স০-গোমূত্রগন্ধ্যাদিগুণং শিলাজতু বরং স্যাত্|

Adhikarana lohapAtre shilAjatuna bhAvanA prakAraH (133-135) · Śloka 135

ব্যাধিব্যাধিতসাত্ম্যং সমনুস্মরন্ ভাবযেদযঃপাত্রে| প্রাক্ কেবলজলধৌতং শুষ্কং ক্বাথৈস্ততো ভাব্যম্||১৩৩|| সমগিরিজমষ্টগুণিতে নিঃক্বাথ্যং ভাবনৌষধং তোযে| তন্নির্যূহেঽষ্টাংশে পূতোষ্ণে প্রক্ষিপেদ্ গিরিজম্||১৩৪|| তত্সমরসতাং যাতং সংশুষ্কং প্রক্ষিপেদ্রসে ভূযঃ| স্বৈঃ স্বৈরেবং ক্বাথৈর্ভাব্যং বারান্ ভবেত্সপ্ত||১৩৫||

স০-ব্যাধিশ্চ ব্যাধিতশ্চ তযোঃ সাত্ম্যং-উপশযং, সমনুস্মরন্ লোহপাত্রে গিরিজং ভাবযেত্| কথম্ ? ইত্যাহ-পূর্বং কেবলজলেন ধৌতং ততঃ শুষ্কং সত্ ক্বাথৈর্ভাবনীযম্| সং-সমং গিরিজং যস্মিন্ ভাবনৌষধে তদেবমষ্টগুণে জলে নিঃক্বাথ্যম্| তত্ক্বাথেঽষ্টাংশশেষে পূতোষ্ণে সতি শিলাজতু প্রক্ষিপেত্| তত্সমরসতাং প্রাপ্তং শুষ্কং পুনা রসে প্রক্ষিপেত্| এবং স্বৈঃ স্বৈঃ ক্বাথৈঃ সপ্ত বারান্ ভাবনীযম্| আর্যাশ্চতস্রঃ|

Adhikarana shilAjatuna sevanavidhiH (136-138) · Śloka 138

অথ স্নিগ্ধস্য শুদ্ধস্য ঘৃতং তিক্তকসাধিতম্| ত্র্যহং যুঞ্জীত গিরিজমেকৈকেন তথা ত্র্যহম্||১৩৬|| ফলত্রযস্য যূষেণ পটোল্যা মধুকস্য চ| যোগং যোগ্যং ততস্তস্য কালাপেক্ষং প্রযোজযেত্||১৩৭|| শিলাজমেবং দেহস্য ভবত্যত্যুপকারম্| গুণান্ সমগ্রান্ কুরুতে সহসা ব্যাপদং ন চ||১৩৮||

স০ -অথ গিরিজমেবং ভাবযিত্বা স্নিগ্ধস্য শুদ্ধস্য চ নরস্য তিক্তকসাধিতং ঘৃতং দিবসত্রযমুপযুঞ্জীত| ননু, যদি স্নিগ্ধশুদ্ধ এবাসৌ, তত্কিমিতি পুনঃ সর্পির্যুজ্যতে ? ব্রূমঃ| কৃতঘৃতস্য শিলাজতুবিধানং সুতরাং শস্তম্| তথা চোক্তম্-"যথা হি কবচী শস্ত্রং পরেভ্যঃ সহতেঽধিকম্| তথা স্নেহাধিকে গাত্রে সেব্যমানং শিলাজতু||" ইত্যাদি| তথা একৈকেন বক্ষ্যমাণেন সহ, শৈলজং ত্র্যহমুপযুঞ্জ্যাত্| ত্রিফলাযাঃ ক্বাথেন ত্র্যহং, পটোল্যাশ্চ ক্বাথেন ত্র্যহং, মধুযষ্ট্যাশ্চ ক্বাথেন ত্রিদিবসম্| অনন্তরং যোগ্যং যোগং কালাদীনপেক্ষ্য প্রযোজযেত্| এবং অনেন বিধিনা, গিরিজং যুক্তং শরীরস্যোপকারকতরং স্যাত্| সকলান্ গুণান্ বিধত্তে| অক্স্মাদেব চ ব্যাপদং ন করোতি|

Adhikarana shilAjatuna hInamadhyottamo yogaH (139) · Śloka 139

একত্রিসপ্তসপ্তাহং কর্ষমর্ধপলং পলম্| হীনমধ্যোত্তমো যোগঃ শিলাজস্য ক্রমান্মতঃ||১৩৯||

সং-একং সপ্তাহং ত্রিসপ্তাহং সপ্তসপ্তাহমিতি কালযোগঃ, কর্ষমর্ধপলং পলমিতি মাত্রাযোগঃ, ইতি দ্বযেঽপ্যত্র যথাক্রমং হীনমধ্যোত্তমত্বম্| একশ্চ ত্রযশ্চ সপ্ত চ তেষাং সপ্তাহমিতি সমাসঃ| মুনিনাঽপ্যুক্তম্ (চ. চি. অ. ১ পা. ৩/৫৪)- "প্রযোগঃ সপ্তসপ্তাহাস্ত্রয একশ্চ কালতঃ| নির্দিষ্টস্ত্রিবিধস্তস্য বরো মধ্যোঽবরস্তথা|| পলমর্ধপলং কর্ষং মাত্রা তস্য ত্রিধামতা|" ইতি|

Adhikarana rAsAyanaphalaH shilAjatuprayogaH (140-141) · Śloka 141

সংস্কৃতং সংস্কৃতে দেহে প্রযুক্তং গিরিজাহ্বযম্| যুক্তং ব্যস্তৈঃ সমস্তৈর্বা তাম্রাযোরূপ্যহেমভিঃ||১৪০|| ক্ষীরেণালোডিতং কুর্যাচ্ছীঘ্রং রাসাযনং ফলম্| কুলত্থান্ কাকমাচীং চ কপোতাংশ্চ সদাত্যজেত্||১৪১||

স০-সংস্কৃতং-পবনাদিহরৈর্দ্রব্যৈর্ভাবিতং, সংস্কৃতে দেহে-স্নেহনশোধনৈঃ কৃতসংস্কারে শরীরে, শিলাজতু প্রযুক্তং প্রযুক্তং তাম্রাদিভিঃ সমুদিতৈর্ব্যস্তৈর্বা যুক্তং দুগ্ধেনালোডিতং ক্ষিপ্রমেব রসাযনফলং বিদধ্যাত্| কুলত্থাদীনি কৃততত্প্রযোগঃ সদৈব জহ্যাত্| খরণাদে কাকমাচীকপোতৌ ন বর্জিতৌ| তদ্বচনং হি-"শুষ্কামিষং বিরুঢং পিষ্টং শুক্তম্ বিদাহি গুরু চান্যত্| পানাশনং কুলত্থান্ বিশেষতো বর্জযেচ্চাত্র||" ইত্যাদি| মুনিনাঽপি নৈতৌ বর্জিতৌ| তথা চ তদ্গ্রন্থঃ (চ. চি. অ. ১ পা.৩/৬২) _"শিলাজতুপ্রযোগেষু বিদাহীনি গুরূণি চ| বর্জযেত্সর্বকালেষু কুলত্থাংশ্চ সদা ত্যজেত্||" ইতি| বিদাহ্যাদিবর্জনং রসাযনকালাদ্ দ্বিগুণং কালং বিধেযম্| কুলত্থাংশ্চ যাবজ্জীবমিত্যেকে| অন্যে তু বদন্তি সদাশব্দেন সংবত্সর উচ্যতে| যতো য এতে ষড্ ঋতবঃ| এতাবানেব কালো, ন ষাড্ ঋতুব্যতিরিক্তোঽন্যঃ কালোঽস্তীতি তেষামযমভিপ্রাযঃ| ননু, বিদাহিগুর্বাদিভ্যঃ কিমিতি কুলত্থানামধিকঃ পরিহার ইষ্যতে ? ব্রূমঃ| পাষাণভেদে কুলত্থানামধিকতরস্বভাবত্বাত্| তথা হি-সন্তপ্তকুলত্থজলেনাপ্লুতানাং পাষাণানাং পাষাণহন্তৃভিঃ সুখেনৈব বিদারণং দৃষ্টম্| শিলাজতু চ গিরিজমিত্যুক্তম্| অতঃ শিলাজতুপ্রযোগাত্ তন্মযমেব শরীরং সম্পদ্যতে| তেন তস্য কুলত্থা বাধাবিধাযিনঃ, ইতি পরিহারস্তেষামধিকঃ কৃতঃ|

Adhikarana sarvaroganAshane shilAjatusAmarthyam,guggulukalpaH (142) · Śloka 142

ন সোঽস্তি রোগো ভুবি সাধ্যরূপো জত্বশ্মজং যং ন জযেত্ প্রসহ্য| তত্ কালযোগৈর্বিধিবত্ প্রযুক্তং স্বস্থস্য চোর্জাং বিপুলাং দধাতি||১৪২||

স০ -অত্র ভূলোকগ্রহণং সকলভূলোকপরিগ্রহার্থম্| অন্যথা কশ্চিদেব দেশো গৃহ্যেত, ন ত্বশেষো ভূলোকঃ| রূপগ্রহণেন সাধ্যঃ সবিকল্পোঽপি গৃহ্যতে, তেন কৃচ্ছ্রসাধ্যোঽপি গৃহ্যতে| রূপ পদমন্তরেণ তু সুখসাধ্য এব কেবলো গৃহ্যেত| প্রসহ্যেত্যনেন শীঘ্রতরং নিশ্চিতং চ রোগজযং করোতীতি গমযতি| তদযং ভাবঃ,-কুষ্ঠঘ্নানি মূত্রকৃচ্ছ্রহরাণি বা যথৌষধানি তেষাং শমযতি, ততঃ ক্ষিপ্রতরং নিশ্চিতং চ রোগজযং করোতি গিরিজমিতি| ন স রোগো সাধ্যরূপো বিদ্যতে, যং শিলাজতু প্রসহ্য ন জযেত্| গিরিজং কালযোগেন চ বিধিনা প্রযুক্তং নীরুজস্য পুরুষস্য মহতীমূর্জাং চ করোতি| উপজাতিঃ| অত এব সঙ্গ্রহে জগাদ (উ. অ. ৪৯)-"জ্বরী জ্বরঘ্নাম্বুদপর্পটাদেঃ ক্বাথেন রক্তী মধুযষ্টিকাযাঃ| শোষী রসৈঃ ক্রব্যভুগামিষোত্থৈর্মাযূরমাংসৈঃ পযসা চ কার্শ্যে|| মধ্বম্বুনা মেদসি সংপ্রবৃদ্ধে ক্ষীরেণ পর্যাকুলবুদ্ধিসত্ত্বঃ| পাণ্ডৌ সশোফে জঠরে সকৃচ্ছ্রে পিবেচ্ছিলাজং মহিষীজলেন|| অশ্ম বীরতরাদ্যেন কুষ্ঠং খদিরবারিণা| বিষং বিষঘ্নৈরগদৈর্হন্ত্যেবং তদ্যথামযম্|| শৈলজত্রিকটুকটুক্ষৌদ্রক্ষৌদ্রধাতূন্ বিষেবতে| ক্ষীরোদনাশী যো জীর্ণে যক্ষ্মণা ন স বাধ্যতে|| সুভাবিতাং সারজলৈস্তুলাং পীত্বা শিলোদ্ভবাত্| সারাম্বুনৈব ভুঞ্জানঃ শালীন্ জাঙ্গলজৈ রসৈঃ|| অপোহ্য মধুমেহাখ্যমন্তকং রোগসঙ্করম্| বপুর্বর্ণবলোপেতঃ শতং জীবত্যনামযঃ|| অমরমন্দিরমন্দরসম্ভবাত্ পলশতং গিরিজাদুপযোজয| যদি জরামযদুঃখবিবর্জিতাং সুচিরমিচ্ছসি জীবিতসন্তিতম্|| দশগুণমুপযুঙ্ক্তে যঃ শতং শৈলজাতাল্লঘুহিতমিতভোজী বর্জযন্ বর্জনীযান্| সততসমনুষক্তান্ বর্জিতান্ বৈদ্যবৃন্দৈর্বিধমতি স গদৌঘান্নেক্ষতে চাযুষোঽন্তম্||" ইতি| শিবগুটিকা চাত্রৈবোক্তা (সং. উ. অ. ৪৯)| যথা-"শিলাহ্বাত্ ষোডশপলং ত্রিস্ত্রিরেকত্র ভাবযেত্| বরাযা দশমূলস্য গুডূচ্যাঃ কর্কটস্য চ|| বলাযা মধুযষ্ট্যাশ্চ রসে গব্যে চ বারিণি| ক্ষীরে সকৃত্ ক্রমেণৈবং সপ্তকৃত্বস্তথা পুনঃ|| কাকোলিযুগ্মঘনপুষ্করবহ্নিরাস্নামেদাযুগর্দ্ধিচবিকাগজপিপ্পলীনাম্| পাঠাদ্বিজীবকনিকুম্ভবিদারিযুগ্মবীরাবরীমধুফলাংশুমতীদ্বযানাম্|| পলিকানামব্দ্রোণে সিদ্ধানাং পাদশেষিতে ক্বাথে| ভাবিতমিত্থং গিরিজং দ্বিপলৈশ্চূর্ণীকৃতৈর্যুঞ্জ্যাত্|) কর্কটশৃঙ্গীধাত্রীব্যোষৈস্তালীসপত্রকুডবেন| চূর্ণপলেন বিদার্যাস্ত্বক্ক্ষীর্যাঃ কর্ষযুগ্মেন|| কুডবেন চতুর্জাতাত্তৈলঘৃতক্ষৌদ্রশর্করাভিশ্চ| দ্বিপলাদিদ্বিগুণাভিঃ কুর্যাদ্গুলিকাস্ততোঽক্ষসমাঃ|| তাঃ শুষ্কা নবকুম্ভে জাতীপুষ্পাধিবাসিতে স্থাপ্যাঃ| তাসামেকাং খাদেত্ প্রতিদিনমনুপানমত্রেষ্টম্|| ক্ষীররসদাডিমাম্ভোমার্দ্বীকসুরাসবান্যতমম্| জীর্ণেঽন্নং লঘু ভোজ্যং যূষপযঃপিশিতনির্যূহৈঃ|| সপ্তাহমাত্রমেবং সর্বান্নীনঃ ক্রমাদ্ভবেত্পরতঃ| ভক্তস্যান্তে প্রাগ্বা গুলিকা ন বিরুধ্যতে চৈষা|| নিরপাযা ভূরিফলা পরিহারসুখোপযোজিতা জযতি| প্রবলমপি বাতশোণিতমূরুস্তম্ভং জ্বরং দীর্ঘম্|| ভগমূত্রশুক্রদোষপ্লীহযকৃদ্রক্তপাণ্ডুহৃদ্রোগান্| বর্ধ্মবমিগুল্মপীনসহিধ্মাকাসারুচিশ্বাসান্|| বিদ্রধিমুদরং কুষ্ঠং শ্বিত্রং ষাণ্ঢ্যং ক্ষযং মদং মূর্চ্ছাম্| উন্মাদমপস্মারং মুখনেত্রশিরোগদাংস্তাংস্তান্|| আনাহমতীসারং হলীমকং কামলাগ্রহণিরোগান্| গ্রন্থ্যর্বুদান্ সপিডকান্ ভগন্দরং গণ্ডমালাং চ|| অতিকার্শ্যমতিস্থৌল্যং স্বেদমপি শ্লীপদং গুদে কীলান্| দংষ্ট্রাবিষং সমূলং গরপ্রযোগান্ সুঘোরাংশ্চ|| অভিচারমরাতিকৃতং দুঃস্বপ্নং ভৌতিকীং তথা বাধাম্| পাপ্মালক্ষ্মীং চেযং গুলিকা শমযেচ্ছিবা নাম|| বৃষ্যাঽঽযুষ্যা ধন্যা কান্তিযশঃ শ্রীবিবোধনী মেধ্যা| কুরুতে নৃপবল্লভতাং জযং বিবাদে চ বক্ত্রস্থা|| জিতখলতিবলীপলিতং জীবযতি সুখং শতদ্বযং শরদাম্| বর্ষদ্বযপ্রযোগাদ্বর্ষশতচতুষ্টযং জীবেত্||" [ইতি|] খরনাদে তূক্তম্-"কনকাদ্রজতাত্তাম্রাদযসঃ সীসাত্তথা ত্রপুণঃ| গিরিবিবরনিঃসৃতং তত্ক্বাথস্নিগ্ধাতিমৃদুমৃত্স্নম্|| জত্বাভং চ শিলাজতু বিদ্যাদেতজ্জডাত্মকং গিরিজম্| সংরক্তপীতবর্ণং সতিক্তমধুরং রসে কটুবিপাকি|| শীতং কনকশিলাজতু বিশেষতঃ শ্লেষ্মপিত্তঘ্নম্|| শ্বেতং চ তিক্তমধুরং পাচনবল্লেখনং শীতম্| কিঞ্চিল্লবণং বিদ্যা(রূপ্যা)দ্বিশেষতো বাতপিত্তঘ্নম্|| শিতিকণ্ঠতুল্যবর্ণং তীক্ষ্ণোষ্ণং লেখনং বিপাককটু| কিঞ্চিল্লবণং তাম্রাত্মকং স্মৃতং কফকৃ(হৃ)দ্বিশেষেণ|| গুগ্গুলুকাভং স্নিগ্ধং তিক্তং লবণং সরং বিশদতীক্ষ্ণম্|| কটুপাকিনাতিশীতং ত্রিমলঘ্নং ত্বাযসং শ্রেষ্ঠম্|| স্বাকরসমানবর্ণে সীসত্রপুসম্ভবে শিলাজতুনী|| অল্পান্তরকর্মগুণে কৃষ্ণাযসজাচ্ছিলাজতুনঃ|| গোমূত্রগন্ধমসিতং গুগ্গুলুকাভং বিশর্করং মৃত্স্নম্| স্নিগ্ধমনম্লকষাযং শিলোদ্ভবং সর্বকর্মণ্যম্||" ইত্যত্র গুরুমৃদুগুণৌ নোক্তৌ| তথোক্তম্-"সস্নেহলবণভাবাদ্বাতঘ্নং পিত্তনুত্ সরত্বাত্তত্| রসপাকযোঃ কটুত্বাত্তৈক্ষ্ণ্যাচ্চ শ্লেষ্মমেদোঘ্নম্|| কটুতীক্ষ্ণত্বাদ্দীপনমগ্নেরুদ্দীপনান্মলান্ পচতি| তিক্তত্বাদ্রক্তঘ্নং কটুতৈক্ষ্ণৌষ্ণ্যাত্ কৃমিঘ্নং চ|| শোভনভাবাদ্দৃষ্যং স্নিগ্ধত্বাত্ পৌষ্টিকং চ বল্যং চ| আযুষ্যং চ বিষঘ্নং মঙ্গল্যমমৃতান্বযত্বাচ্চ|| শোধনভাবাত্ স্রোতোধাত্বিন্দ্রিযবুদ্ধিশোধনং বর্ণ্যম্| পুত্র্যং চ বৃষ্যভাবান্মেধ্যং যোনিস্বভাবাচ্চ||" ইত্যাদি| তথা "ভাবিতমন্যৈর্দ্রব্যৈর্বীর্যোত্কর্ষাদ্বিশেষকর্মণ্যম্| তত্ স্যাত্তস্মাদ্ভাব্যং বাতাদিহরৌষধকষাযৈঃ|| 'রাস্নাদশমূলবলাপুনর্নবৈরণ্ডশুণ্ঠিমধুকানাম্| ক্বাথেন ভাবিতং তদ্বিশেষতো বাতরোগঘ্নম্|| দ্রাক্ষা ভীরুপটোলীত্রাযন্তিগুডূচিজীবনীযানাম্| ক্বাথেন ভাবিতং তদ্বিশেষতঃ পিত্তরোগঘ্নম্|| ত্রিফলাবচাবিডঙ্গকরঞ্জ ঘনমুখ্যপঞ্চমূলানাম্| সহপঞ্চকোলাকানাং ক্বাথেন কফামযে ভাব্যম্|| লঘুপঞ্চমূলশুণ্ঠীদ্রাক্ষাকাশ্মর্যবাজিগন্ধানাম্| সুগুডূচিশরবলানাং রসেন পিত্তানিলগদেষু|| ঘনকুষ্ঠবচাত্রিফলাসুরদারুবিডঙ্গপঞ্চকোলানাম্| রজনীমরিচাতিবিষাযুক্তানাং বাতকফজেষু|| পাঠাপটোলনিম্বত্রিফলাঘনকুটজসপ্তপর্ণানাম্| ত্রাযন্ত্যমৃতাতিবিষাসহিতানাং পিত্তকফজেষু (সং. উ. অ. ৪৯)||" ত্রিমলেষু যথাদোষং যোগানেতান্ বিকল্প্য ভাব্যং স্যাত্| প্রাক্কেবলজলধৌতং শুষ্কং ক্বাথৈস্ততো ভাব্যম্|| গিরিজং চতুর্গুণজলং ক্বাথ্যং স্যাদ্ভাবনৌষধং তত্র| চতুর্থশেষে ক্বাথে পূতোষ্ণে প্রক্ষিপেদ্গিরিজম্||" ইতি| অত্র চতুর্গুণজলস্যৌষধস্য ক্বাথেন মুক্তরসতা ন তথা স্যাদিতি বাগ্ভটোক্তমেবাষ্টগুণজলক্বাথেন কার্যমিতি মন্যামহে| তথোক্তম্-"সলিলবিশুদ্ধাদ্গিরিজাত্ পিবেদরোগঃ ফলত্রিকরসেন| মাত্রাং ক্রমাভিবৃদ্ধাং ত্র্যহং পটোলস্য চ রসেন|| মূত্রেণ গবাং তদ্বত্ ত্র্যহং কষাযেণ মধুকস্য|" ইতি| "রোগান্বিতেষু গিরিজং জলশুদ্ধং ভাবিতং কষাযৈশ্চ| দোষব্যাধিবলাতুরকালাপেক্ষী প্রযুঞ্জীত|| জীর্ণৌষধঃ সুখোদকপরিষিক্তো মাংসরসপযোযূষৈঃ| রক্তাদিষষ্টিকৌদনমনবমরোগো গদী বাঽদ্যাত্|| ব্যাধ্যাতুরদোষবলং দৃষ্ট্বা তস্য ত্রিধা প্রযোগঃ স্যাত্| শ্রেষ্ঠস্ত্রিষষ্টিরাত্রং মাসো মধ্যস্ত্রিসপ্তরাত্রমবরঃ|| পানাবগাহযোঃ স্যাদ্দিব্যং শৈলোদ্ভবং কৌপম্|" মুনিস্ত্বস্য চতুর্ধাতুজত্বমেব সংগিরতে| তথা চ তদ্গ্রন্থঃ (চ. চি. অ. ১ পা. ২/৪৭)- "অনম্লং চ কষাযং চ কাতুপাকে শিলাজতু| নাত্যুষ্ণশীতং চাতুভ্যশ্চতুর্ভ্যস্তস্য সম্ভবঃ||| হেম্নঃ সরজতাত্তাম্রাদ্বরং কৃষ্ণাযসাদপি|" ইতি| সঙ্গ্রহে চ গুগ্গুলুকল্পোঽভিহিতঃ| যথা (উ. অ. ৪৯)- "দানবেন্দ্রবিজিতান্ পুরা সুরান্ ভ্রষ্টকান্তিধৃতিশৌর্যতেজসঃ| বীক্ষ্য বিষ্ণুরমৃতং কিলাসৃজদ্গুগ্গুলুং বলবপুর্জযপ্রদম্|| অদ্যাপ্যতঃ সুরগণাঃ কিল ধূপমুখ্যান্ হিত্বা বরাগুরুতুরুষ্কহিমেন্দুদর্পান্| নির্দহ্যমানবপুষোঽপি শিখাং পিবন্তো গন্ধেন যস্য মুদিতা দধতি প্রসাদম্|| স যোগবাহী স শিবঃ স সার্বঃ সর্বর্তুসেব্যঃ সুখশীলনীযঃ| হর্তা জরাপাপ্মমলামযানাং কর্তাঽগ্নিমেধাস্মৃতিপাটবানাম্|| গন্ধোত্কটঃ স দাহে স্নিগ্ধদ্রবপিচ্ছিলো বিগতশল্যঃ| মহিষাখ্যঃ পুষ্পরাগস্ফটিকাসিতনীরদচ্ছাযঃ|| যঃ পদ্মরাগরাগো যঃ কনকচ্ছেদপাতলো যো বা| জযতীন্দ্রনীলমমলং ভগ্নোঽপ্যতিকান্তিমত্ত্বেন|| শ্রেষ্ঠঃ প্রযোগোঽস্য তুলা পলান্নৈবাধিকং পিবেত্| আত্রেযমুনিগীতশ্চ মন্ত্রোঽযং কর্মসিদ্ধিকৃত্|| 'ভগবান্ পুণ্ডরীকাক্ষো দেবাশ্চ সপুরন্দরাঃ| আজ্ঞাপযন্তি সম্যক্ত্বাং প্রভাবং চাদিশন্তি তে|| জরামরণদুঃখেভ্যো যথা তেঽভ্যুত্থিতাঃ সুরাঃ| উপযোক্তুস্তথৈবাস্য ভব ত্বং হি মহাবলঃ||' ইতি| পঞ্চমূলস্য মহতঃ ক্বাথেন হিতভোজিনা| গুগ্গুলুঃ শীলিতো হন্তি সর্বান্ বাতকফামযান্|| লঘীযসোঽপি তদ্বচ্চ সুখোষ্ণেন জলেন বা| মস্তুধান্যাম্লমদ্যৈর্বা বচাদেঃ সলিলেন বা|| বরণাদেস্তু বাধির্যং দন্তকর্ণশিরোরুজঃ| স্বরভেদোদরশ্চাসবর্ধ্মান্তর্গুল্মবিদ্রধীন্|| বাতপিত্তাস্ররোগেষু বৃংহণার্থিনি চেষ্যতে| ক্বাথেন বাজিগন্ধাযা জীবনীযগণস্য বা|| ক্বাথেনোত্পলমৃদ্বীকারক্তচন্দনজন্মনা| বাতপিত্তং নিহন্ত্যেষ পদ্মকাদিগণস্য বা|| চব্যকুষ্ঠবিডঙ্গানাং যবান্যা নাগরস্য বা| প্রসারণ্যাশ্চ তোযেন গুগ্গুলুঃ কফবাতজিত্|| ত্র্যূষণাগ্নিঘনবেল্লবরাভির্ভক্ষযন্ সমধৃতং মহিষাক্ষম্| আশু হন্তি কফমারুতমেদোদোষজান্ বলবতোঽপি বিকারান্|| পটোলনিম্বত্রিফলাগুডূচীগাযত্রিরাত্রিদ্বযবীজকানাম্| ক্বাথৈঃ পৃথক্ পথ্যপরস্য হন্তি মাসেন ঘোরান্ কফপিত্তরোগান্|| বিশেষাচ্ছোফবীর্সর্পদুষ্টব্রণভগন্দরান্| শুক্রার্তবমনোদোষপ্রমেহশ্বিত্রপাণ্ডুতাঃ|| পটোলারিষ্টনির্যূহপিষ্টস্তুল্যরসাঞ্জনঃ| গলরোগাপচীব্যঙ্গগ্রন্থিস্থৌল্যকৃমিপ্রণুত্|| শিলাজতুসমঃ পীতঃ পযসা বাতশোণিতম্| নিবর্তযত্যতিবলং ক্ষীরমাংসঘৃতাশিনঃ|| রসেন পযসা মূত্রৈর্বাতপিত্তকফাপহঃ| ব্রাহ্মীমণ্ডূকশঙ্খানাং পৃথঙ্হ্ মেধাদিকৃদ্রসৈঃ|| মাগধিকাগ্নিবিডঙ্গকলিঙ্গৈর্বিল্বধৃতৈঃ সবচাপলষট্কৈঃ| গুগ্গুলুনা সদৃশেন সমেতৈঃ ক্ষৌদ্রযুতৈঃ সকলামযনাশঃ|| পিবেত্পলশতং যোঽস্য বিধিনা নিযতো যতিঃ| নাকালমৃত্যোর্ন ব্যাধের্ন তস্য জরসো ভযম্|| কল্পযেদোষধৈঃ স্বৈঃ স্বৈর্ব্যাধিষু ব্যাধিনাশনৈঃ| শিলাজতুবিধানং চ গুগ্গুলোঃ সর্বমিষ্যতে|| গুণনিধিরপি কুর্যাত্ সোঽতিমাত্রোপযুক্তস্তিমিরবদনশোষক্লীবতাকার্শ্যমেহান্| শমলশিথিলভাবং দেহরৌক্ষ্যং চ তস্মাদ্রজনিচরনিষেবী স্যান্ন রোগেষ্বমীষু||" [ইতি|]

Adhikarana kuTIpraveshavidherviShayaH,sauryamArUtikavidherviShayaH (143) · Śloka 143

কুটীপ্রবেশঃ ক্ষণিনাং পরিচ্ছদবতাং হিতঃ| অতোঽন্যথা তু যে তেষাং সৌর্যমারুতিকো বিধিঃ||১৪৩||

স০-ক্ষণিনাং-ব্যাপারকরণং প্রতি স্বতন্ত্রাণাম্, তথা পরিচ্ছদবতাং-সপরিবারাণাম্, কুটীপ্রবেশলক্ষণো বিধির্হিতঃ| অতঃ-অস্মাত্, যেঽন্যথা-পরতন্ত্রাঃ পরিবাররহিতাঃ, তেষাং সৌর্যমারুতিকো বিধির্হিতঃ|

Adhikarana ato vAtAtapasahA yogAH (144) · Śloka 144

বাতাতপসহা যোগা বক্ষ্যন্তেঽতো বিশেষতঃ| সুখোপচারা ভ্রংশেঽপি যে ন দেহস্য বাধকাঃ||১৪৪||

স০-অতঃ-অস্মাচ্চ হেতোঃ, যে বাতাতপসহা যোগাস্তে বিশেষেণ বক্ষ্যন্তে| তথা যে ন দুঃখাবহাঃ, ভ্রংশেঽপি-ব্যাপত্তাবপি, শরীরস্য ন পীডাকৃতঃ|

Adhikarana vayaH sthApakAH shItodakAdiyogAH (145) · Śloka 145

শীতোদকং পযঃ ক্ষৌদ্রং ঘৃতমেকৈকশো দ্বিশঃ| ত্রিশঃ সমস্তমথবা প্রাক্ পীতং স্থাপযেদ্বযঃ||১৪৫||

স০-শিশিরজলাদিকমেকৈকশো দ্বিশস্ত্রিশো বা প্রাগ্ভোজনাত্ পীতং বযঃ স্থাপযেত্| তেন শীতাম্ভো বা, ক্ষীরং বা, মধু-মাক্ষিকং বা, সর্পির্বা, পীতমথবা শীতাম্ভঃপযসী, শীতজলক্ষৌদ্রে, শীতদলঘৃতে, ইত্যেবং যথাসম্ভবং দ্বে সংযুক্তে প্রাক্পীতেঽথবা ত্রীণি সংযুক্তানি পীতানি সমস্তং বা চতুষ্টযমিত্যেবমবতিষ্ঠতে|

Adhikarana varShashatajIvano harItakIyogaH (146) · Śloka 146

গুডেন মধুনা শুণ্ঠ্যা কৃষ্ণযা লবণেন বা| দ্বে দ্বে খাদন্ সদা পথ্যে জীবেদ্বর্ষশতং সুখী||১৪৬||

স০-গুডাদিনা প্রত্যেকং দ্বে দ্বে হরীতক্যৌ সর্বদা ভক্ষযন্ সমাশতং সুখং জীবেত্|

Adhikarana cirasthAyibalakaro kIyogAH (147) · Śloka 147

হরীতকীং সর্পিষি সম্প্রতাপ্য সমশ্নতস্তত্ পিবেতো ঘৃতং চ| ভবেচ্চিরস্থাযি বলং শরীরে সকৃত্ কৃতং সাধু যথা কৃতজ্ঞে||১৪৭||

স০-ঘৃতে হরীতকীং সম্যক্ তাপযিত্বা ভক্ষযতস্তচ্চ ঘৃতং পিবতো দেহেঽতিদৃঢং বলং স্থিরতরং ভবেত্| যথা কৃতজ্ঞে নরে সকৃত্-একবারং, শোভনং কৃতং চিরস্থাযি ভবেত্| উপেন্দ্রবজ্রা|