Adhikarana adhyAyopakramaH · Śloka
🔊 Audio coming soon
adhunā viṣatantramucyatē, sadyaḥprāṇahāritvēna tulyasādharmyāt|
35. viṣapratiṣēdhādhyāyaḥ
Adhikarana viShapratiShedhAdhyAyaH (2) · Śloka 2
athātō viṣapratiṣēdhaṁ vyākhyāsyāmaḥ| iti ha smāhurātrēyādayō maharṣayaḥ| (gadyasūtrē)|2|
View original
अथातो विषप्रतिषेधं व्याख्यास्यामः| इति ह स्माहुरात्रेयादयो महर्षयः| (गद्यसूत्रे)|२|
🔊 Audio coming soon
tatra viṣasya prāgutpattidarśanārthamāha-
Adhikarana viShayasya prAgutpattidarshanam (1-3) · Śloka 3
mathyamānē jalanidhāvamr̥tārthaṁ surāsuraiḥ| jātaḥ prāgamr̥tōtpattēḥ puruṣō ghōradarśanaḥ||1|| dīptatējāścaturdaṁṣṭrō harikēśō'nalēkṣaṇaḥ| jagadviṣaṇṇaṁ taṁ dr̥ṣṭvā tēnāsau viṣasaṁjñitaḥ||2|| huṁkr̥tō brahmaṇā mūrtī tataḥ sthāvarajaṅgamē| sō'dhyatiṣṭhannijaṁ rūpamujjhitvā vañcanātmakam||3||
View original
मथ्यमाने जलनिधावमृतार्थं सुरासुरैः| जातः प्रागमृतोत्पत्तेः पुरुषो घोरदर्शनः||१|| दीप्ततेजाश्चतुर्दंष्ट्रो हरिकेशोऽनलेक्षणः| जगद्विषण्णं तं दृष्ट्वा तेनासौ विषसंज्ञितः||२|| हुंकृतो ब्रह्मणा मूर्ती ततः स्थावरजङ्गमे| सोऽध्यतिष्ठन्निजं रूपमुज्झित्वा वञ्चनात्मकम्||३||
🔊 Audio coming soon
sa0- samudrē surāsurairamr̥tārthaṁ vilōḍyamānē'mr̥tōtpattēḥ pūrvaṁ puruṣō dāruṇadr̥ṣṭiḥ samiddhadhāmā caturdaṁṣṭrō harivarṇakacō dahanatulyanētrō jātaḥ| taṁ puruṣaṁ dr̥ṣṭvā bhuvanaṁ viṣādaṁ gatam| ata ēvāsau jagadviṣadanāt viṣasaṁjñaḥ| brahmaṇa huṁkr̥tastu sannasau vañcanasvabhāvaṁ svaṁ rūpaṁ hitvā sthāvarajaṅgamākhyē mūrtī adhitasthau| puruṣarupī tiṣṭhēdasau tatō brahmā śāpaṁ dadyāt|
Adhikarana sthAvaraM viShaM kandeShvativIryam (4) · Śloka 4
sthiramatyulbaṇaṁ vīryē yatkandēṣu pratiṣṭhitam| kālakūṭēndravatsākhyaśr̥ṅgīhālāhalādikam||4||
View original
स्थिरमत्युल्बणं वीर्ये यत्कन्देषु प्रतिष्ठितम्| कालकूटेन्द्रवत्साख्यशृङ्गीहालाहलादिकम्||४||
🔊 Audio coming soon
sa0-yadviṣaṁ sthiraṁ-sthāvaraṁ, kandēṣu pratiṣṭhitaṁ vīryē atyulbaṇaṁ tat kālakūṭādibhēdabhinnam| phalādiṣvapi tad bhavati, kintu kandē vīryātikr̥t| ādiśabdēna saṅgrahōktā bhēdā gr̥hyantē| yathā (saṁ.u. a. 40)-"kālakūṭaṁ vatsanābhaṁ sāktukaṁ vālakaṁ kardamakaṁ vairāṭaṁ mustakaṁ śr̥ṅgī puṇḍarīkaṁ mahāviṣaṁ hālāhalaṁ markaṭakaṁ karkaṭaṁ kāśapuṣpakamindrāyudhaṁ tathā tailam|" iti (tyādi) bhēdāḥ prakīrtitāḥ| ēṣāṁ tu lakṣaṇaṁ tatrōktam| tadahi vistarataragranthaśaṅkayā nōktam|
Adhikarana ja~ggamaM viShaM sarpAdidaMShTrAsu dAruNam (5) · Śloka 5
sarpalūtādidaṁṣṭrāsu dāruṇaṁ jaṅgamaṁ viṣam| |5|
View original
सर्पलूतादिदंष्ट्रासु दारुणं जङ्गमं विषम्| |५|
🔊 Audio coming soon
sa0- sarpādidaṁṣṭrāsu tu yadvyavasthitaṁ tajjaṅgamam| tacca dāruṇam| daṁṣṭrētyupalakṣaṇārtham, nakhaviṣāṇamūtrādīnāmapi purō viṣatvēna vakṣyamāṇatvāt|
Adhikarana iti dviprakAramakRutrimaM viSham (5) · Śloka 5
| sthāvaraṁ jaṅgamaṁ cēti viṣaṁ prōktamakr̥trimam||5||
View original
| स्थावरं जङ्गमं चेति विषं प्रोक्तमकृत्रिमम्||५||
🔊 Audio coming soon
sa0-sthāvaraṁ jaṅgamaṁ cēti dviprakāraṁ viṣamakr̥trimam|
Adhikarana kRutrimaM tu garasaMj~jam kRutrimasya lakShaNam (6-7) · Śloka 7
kr̥trimaṁ garasaṁjñaṁ tu kriyatē vividhauṣadhaiḥ| hanti yōgavaśēnāśu cirācciratarācca tat||6|| śōphapāṇḍūdarōnmādadurnāmādīn karōti vā| |7|
View original
कृत्रिमं गरसंज्ञं तु क्रियते विविधौषधैः| हन्ति योगवशेनाशु चिराच्चिरतराच्च तत्||६|| शोफपाण्डूदरोन्माददुर्नामादीन् करोति वा| |७|
🔊 Audio coming soon
sa0- garasaṁjñaṁ tu kr̥trimam| yasmāttat kriyatē| ata ēva vividhāni vakṣyamāṇānyauṣadhāni yasmiṁstadēvam| tacca yōgavaśācchīghraṁ hanti| tathā vividhayōgavaśāccirācciraṁ hanti| śōphādīṁśca vidhattē|
Adhikarana viShasya guNA ekAdasha (7-8) · Śloka 8
atha viṣaguṇānnirdiśati | tīkṣṇōṣṇarūkṣaviśadaṁ vyavāyyāśukaraṁ laghu||7|| vikāṣi sūkṣmamavyaktarasaṁ viṣamapāki ca| |8|
View original
अथ विषगुणान्निर्दिशति | तीक्ष्णोष्णरूक्षविशदं व्यवाय्याशुकरं लघु||७|| विकाषि सूक्ष्ममव्यक्तरसं विषमपाकि च| |८|
🔊 Audio coming soon
sa0- tatsarvaṁ viṣaṁ tīkṣṇādiguṇaṁ syāt| guṇanirdēśanādasya raukṣyādvātamuṣṇatvāt pittaṁ karōtīti jñāpyatē| nanu, raukṣyādibhirguṇairvāyōḥ kōpō na yujyatē, raukṣyādīnāṁ guṇatvādvāyōśca dravyatvāt| brūmaḥ| vāyōryē raukṣyādayō guṇāstēṣāmēva viṣasthai raukṣyādibhirguṇairvr̥ddhiḥ kriyatē| tē ca vāyōrātmabhūtāḥ, tannāśē vāyōrnāśaḥ syāt, yathā tantunāśē paṭanāśaḥ| tasmādyuktaḥ pavanasya raukṣyādibhirguṇaiḥ prakōpaḥ| ēvaṁ pittē'pi yōjyam| kaṭvamlādikathanē'pi viṣasyāvyaktarasatvam, anēkarasasambhavādēkasyāpi ca vyaktasyānupalabdhēḥ| vyavāyitvaṁ cāsya drāgēvākhilakāyasya vyāptēḥ| tathā apāki,-viṣasya hi mantratantrābhyāmantarēṇa pākābhāvāt, pakvē'pyannē viṣasyāpakvasyēvōpalabdhēḥ| ata ēva śamitamapi kiñcitkāraṇaṁ prāpya punaḥ kupyati|
Adhikarana viShamojoviparItaguNam ,viShaM nRuNAM sadyojIvitaharam (8-9) · Śloka 9
| ōjasō viparītaṁ tat tīkṣṇādyairanvitaṁ guṇaiḥ||8|| vātapittōttaraṁ nr̥ṇāṁ sadyō harati jīvitam| |9|
View original
| ओजसो विपरीतं तत् तीक्ष्णाद्यैरन्वितं गुणैः||८|| वातपित्तोत्तरं नृणां सद्यो हरति जीवितम्| |९|
🔊 Audio coming soon
saṁ-tathā viṣamōjasō viparītaṁ tīkṣṇādibhirdaśabhirguṇairyuktam| tīkṣṇādyairanvitamiti hētau prathamā| tīkṣṇādiguṇayuktatvādōjasō viparītamityarthaḥ| tathā vātapittōtaraṁ narāṇāṁ drāgēva jīvitaṁ harati|
Adhikarana tara hetuH (9-10) · Śloka 10
kutaḥ ? ityāha | viṣaṁ hi dēhaṁ samprāpya prāg dūṣayati śōṇitam||9|| kaphapittānilāṁścānu samaṁ dōṣān sahāśayān| tatō hr̥dayamāsthāya dēhōcchēdāya kalpatē||10||
View original
कुतः ? इत्याह | विषं हि देहं सम्प्राप्य प्राग् दूषयति शोणितम्||९|| कफपित्तानिलांश्चानु समं दोषान् सहाशयान्| ततो हृदयमास्थाय देहोच्छेदाय कल्पते||१०||
🔊 Audio coming soon
sa0- yasmādviṣaṁ śarīraṁ prāpya pūrvaṁ raktaṁ sarvaśarīragataṁ dūṣayati, paścāt kaphapittavātānāśayasahitān dūṣayati| anantaraṁ kaphādibhiḥ samamēva hr̥dayamāśritya śariranāśāya sampadyatē| nanu, viṣasya tīkṣṇādibhirguṇairyugapat tridōṣakōpitvādraktakōpitvācca pūrvaṁ śōṇitaṁ dūṣayati paścātrīn dōṣāniti yaduktaṁ tadayuktimadiva dr̥śyatē| atra bhaṇāmaḥ viṣaprabhāvēṇa raktamākr̥ṣṭaṁ pūrvaṁ saha tēna saṁyuktaṁ viṣēṇa dūṣyatē, tatō yugapadēva dōṣatrayakōpaḥ, tatō dōṣaiḥ śōṇitēna saha hr̥dayaṁ vyāpya sarvasrōtāṁsi baddhvā dēhōcchēdāya pravartata iti na kiñcidatrānupapannam|
Adhikarana sthAvaraviShasya prathamavegasya lakShaNam (11) · Śloka 11
sthāvarasyōpayuktasya vēgē pūrvē prajāyatē| jihvāyāḥ śyāvatā stambhō mūrcchā trāsaḥ klamō vamiḥ||11||
View original
स्थावरस्योपयुक्तस्य वेगे पूर्वे प्रजायते| जिह्वायाः श्यावता स्तम्भो मूर्च्छा त्रासः क्लमो वमिः||११||
🔊 Audio coming soon
sa0-sthāvarasya viṣasyōpayuktasya prathamē vēgē rasanāśyāvatādi jāyatē|
Adhikarana sthAvaraviShasya dvitIyavegasya lakShaNam (12) · Śloka 12
dvitīyē vēpathuḥ svēdō dāhaḥ kaṇṭhē ca vēdanā| viṣaṁ cāmāśayaṁ prāptaṁ kurutē hr̥di vēdanām||12||
View original
द्वितीये वेपथुः स्वेदो दाहः कण्ठे च वेदना| विषं चामाशयं प्राप्तं कुरुते हृदि वेदनाम्||१२||
🔊 Audio coming soon
sa0- dvitīyē vēgē vēpathvādayaḥ| viṣaṁ cāmāśayaṁ prāptaṁ hr̥dayē vēdanāṁ vidhattē|
Adhikarana sthAvaraviShasya tRutIyavegasya lakShaNam (13-14) · Śloka 14
tāluśōṣastr̥tīyē tu śūlaṁ cāmāśayē bhr̥śam| durbalē haritē śūnē jāyētē cāsya lōcanē||13|| pakvāśayagatē tōdahidhmākāsāntrakūjanam| |14|
View original
तालुशोषस्तृतीये तु शूलं चामाशये भृशम्| दुर्बले हरिते शूने जायेते चास्य लोचने||१३|| पक्वाशयगते तोदहिध्माकासान्त्रकूजनम्| |१४|
🔊 Audio coming soon
sa0- tr̥tīyē ca vēgē tāluśōṣaḥ āmāśayē'tirujā syāt| nētrē cāsya durbalādiguṇē bhavataḥ| pakvāśayagatē tōdādayaḥ syuḥ|
Adhikarana sthAvaraviShasya caturthavegasya lakShaNam (14) · Śloka 14
| caturthē jāyatē vēgē śirasaścātigauravam||14||
View original
| चतुर्थे जायते वेगे शिरसश्चातिगौरवम्||१४||
🔊 Audio coming soon
sa0- caturthē vēgē mūrdhnō'tigurutvaṁ jāyatē| caśabdāt pūrvōktā rasanāśayāvatādayaḥ syuḥ| ēvamagrē'pi caśabdārthō bōdhyaḥ|
Adhikarana sthAvaraviShasya pa~jcamavegasya lakShaNam (15) · Śloka 15
kaphaprasēkō vaivarṇyaṁ parvabhēdaśca pañcamē| sarvadōṣaprakōpaśca pakvādhānē ca vēdanā||15||
View original
कफप्रसेको वैवर्ण्यं पर्वभेदश्च पञ्चमे| सर्वदोषप्रकोपश्च पक्वाधाने च वेदना||१५||
🔊 Audio coming soon
sa0- pañcamē vēgē kaphaprasēkādiḥ| sarvadōṣāṇāṁ prakōpaḥ| pūrvōktāśca| pakvāśayē vyathā ca|
Adhikarana sthAvaraviShasya ShaShThavegasya lakShaNam (16) · Śloka 16
ṣaṣṭhē saṁjñāpraṇāśaśca subhr̥śaṁ cātisāryatē| |16|
View original
षष्ठे संज्ञाप्रणाशश्च सुभृशं चातिसार्यते| |१६|
🔊 Audio coming soon
sa0- ṣaṣṭhē vēgē cētanāyāḥ praṇāśō'tiśayēnātisāraśca|
Adhikarana sthAvaraviShasya saptamavegasya lakShaNam (16) · Śloka 16
| skandhapr̥ṣṭhakaṭībhaṅgō bhavēnmr̥tyuśca saptamē||16||
View original
| स्कन्धपृष्ठकटीभङ्गो भवेन्मृत्युश्च सप्तमे||१६||
🔊 Audio coming soon
sa0- saptamē skandhādibhaṅgaḥ, saptānāṁ dhātūnāṁ dūṣaṇānmr̥tyuśca syāt|
Adhikarana prathame viShavege vamanAdi (17) · Śloka 17
prathamē viṣavēgē tu vāntaṁ śītāmbusēcitam| sarpirmadhubhyāṁ saṁyuktamagadaṁ pāyayēd drutam||17||
View original
प्रथमे विषवेगे तु वान्तं शीताम्बुसेचितम्| सर्पिर्मधुभ्यां संयुक्तमगदं पाययेद् द्रुतम्||१७||
🔊 Audio coming soon
sa0- prathamē viṣavēgē tu kr̥tavamanaṁ śiśirajalasēcitaṁ śīghramēvāgadaṁ saghr̥tamākṣikaṁ pāyayēt|
Adhikarana dvitIye viShavege vamanavirecanAdi (18) · Śloka 18
dvitīyē pūrvavadvāntaṁ viriktaṁ cānu pāyayēt| |18|
View original
द्वितीये पूर्ववद्वान्तं विरिक्तं चानु पाययेत्| |१८|
🔊 Audio coming soon
sa0- dvitīyē viṣavēgē pūrvavat-śītāmbusēcitaṁ, vāntaṁ viriktaṁ cānu-paścāt, agadaṁ pāyayēt|
Adhikarana tRutIye viShavege agadapAnAdi (18) · Śloka 18
| tr̥tīyē'gadapānaṁ tu hitaṁ nasyaṁ tathā'ñjanam||18||
View original
| तृतीयेऽगदपानं तु हितं नस्यं तथाऽञ्जनम्||१८||
🔊 Audio coming soon
sa0- tr̥tīyē vēgē'gadapānaṁ nasyamañjanaṁ ca hitam|
Adhikarana caturthe viShavege sasnehAgadapAnam (19) · Śloka 19
caturthē snēhasaṁyuktamagadaṁ pratiyōjayēt| |19|
View original
चतुर्थे स्नेहसंयुक्तमगदं प्रतियोजयेत्| |१९|
🔊 Audio coming soon
sa0- caturthē vēgē snēhasaṁyutamagadaṁ pratiyōjayēt|
Adhikarana pa~jcame viShavege samadhukakvAthAdi yukto~agadaH (19) · Śloka 19
| pañcamē madhukakvāthamākṣikābhyāṁ yutaṁ hitam||19||
View original
| पञ्चमे मधुकक्वाथमाक्षिकाभ्यां युतं हितम्||१९||
🔊 Audio coming soon
sa0- pañcamē vēgē madhuyaṣṭikākvāthamākṣikābhyāṁ yuktamagadaṁ hitam|
Adhikarana ShaShThe viShavege atIsAravatsiddhiH (20) · Śloka 20
ṣaṣṭhē'tisāravatsiddhiḥ| |20|
View original
षष्ठेऽतिसारवत्सिद्धिः| |२०|
🔊 Audio coming soon
sa0- ṣaṣṭhē vēgē'tisāratulyā cikitsā|
Adhikarana saptame viShavege avapIDAdi (20) · Śloka 20
avapīḍastu saptamē| mūrdhni kākapadaṁ kr̥tvā sāsr̥gvā piśitaṁ kṣipēt||20||
View original
अवपीडस्तु सप्तमे| मूर्ध्नि काकपदं कृत्वा सासृग्वा पिशितं क्षिपेत्||२०||
🔊 Audio coming soon
sa0- saptamē vēgē'vapīḍō-rōgānutpādanīyōktō (hr̥.sū. a. 4/6), dēyaḥ| athavā mastakē kākapadaṁ kr̥tvā saraktaṁ piśitaṁ nyasēt|
Adhikarana vegAntare sarvaviShaghnI koshAtakyAdiyavAgUH (21-23) · Śloka 23
kōśātakyagnikaḥ pāṭhā sūryavalyamr̥tābhayāḥ| śēluḥ śirīṣaḥ kiṇīhī haridrē kṣaudrasāhvayā||21|| punarnavē trikaṭukaṁ br̥hatyau sārivē balā| ēṣāṁ yavāgūṁ niryuhē śītāṁ saghr̥tamakṣikām||22|| yuñjyādvēgāntarē sarvaviṣaghnīṁ kr̥takarmaṇaḥ| |23|
View original
कोशातक्यग्निकः पाठा सूर्यवल्यमृताभयाः| शेलुः शिरीषः किणीही हरिद्रे क्षौद्रसाह्वया||२१|| पुनर्नवे त्रिकटुकं बृहत्यौ सारिवे बला| एषां यवागूं निर्युहे शीतां सघृतमक्षिकाम्||२२|| युञ्ज्याद्वेगान्तरे सर्वविषघ्नीं कृतकर्मणः| |२३|
🔊 Audio coming soon
sa0- kōśātakyādīnāṁ kvāthē yavāgūṁ siddhāṁ śītāṁ sasarpiṣkamākṣikāṁ yuñjayāt| sūryavallī-karavīrakākārapuṣpī| kṣaudrasāhvayaṁ-vaṭamākṣikam| vēgāntarē-vēgamadhyē, sarvaviṣaghnīm| kr̥taṁ karma yasya tasyaivaṁ kāryam|
Adhikarana vegAntare sarva madhUkAdiyavAgUH (23) · Śloka 23
| tadvanmadhūkamadhukapadmakēsaracandanaiḥ||23||
View original
| तद्वन्मधूकमधुकपद्मकेसरचन्दनैः||२३||
🔊 Audio coming soon
sa0- madhūkādikvāthē pēyāṁ śītāṁ saghr̥tamākṣikāṁ yuñjyāt|
Adhikarana sarvaviSheShu candrodayo nAmAgadaH (24-32) · Śloka 32
añjanaṁ tagaraṁ kuṣṭhaṁ haritālaṁ manaḥśilā| phalānī trikaṭu spr̥kkā nāgapuṣpaṁ sakēsaram||24|| harēṇurmadhukaṁ māṁsī rōcanā kākamālikā| śrīvēṣṭakaṁ sarjarasaḥ śatāhvā kuṅkumaṁ balā||25|| tamālapatratālīsabhūrjōśīraniśādvayam| kanyōpavāsinī snātā śuklavāsā madhudrutaiḥ||26|| dvijānabhyarcya taiḥ puṣyē kalpayēdagadōttamam| vaidyaścātra tadā mantraṁ prayatātmā paṭhēdimam||27|| "namaḥ puruṣasiṁhāya namō nārāyaṇāya ca| yathā'sau nābhijānāti raṇē kr̥ṣṇaparājayam||28|| ētēna satyavākyēna agadō mē prasidhyatu| namō vaidūryamātē huluhulu rakṣa māṁ sarvaviṣēbhyaḥ||29|| gauri gāndhāri cāṇḍāli mātaṅgi svāhā| " piṣṭē ca dvitīyō mantraḥ "harimāyi svāhā||30|| " aśēṣaviṣavētālagrahakārmaṇapāpmasu| marakavyādhidurbhikṣayuddhāśanibhayēṣu ca||31|| pānanasyāñjanālēpamaṇibandhādiyōjitaḥ| ēṣa candrōdayō nāma śāntisvastyayanaṁ param||32|| |vāsavō vr̥tramavadhītsamāliptaḥ kilāmunā| ]||32||
View original
अञ्जनं तगरं कुष्ठं हरितालं मनःशिला| फलानी त्रिकटु स्पृक्का नागपुष्पं सकेसरम्||२४|| हरेणुर्मधुकं मांसी रोचना काकमालिका| श्रीवेष्टकं सर्जरसः शताह्वा कुङ्कुमं बला||२५|| तमालपत्रतालीसभूर्जोशीरनिशाद्वयम्| कन्योपवासिनी स्नाता शुक्लवासा मधुद्रुतैः||२६|| द्विजानभ्यर्च्य तैः पुष्ये कल्पयेदगदोत्तमम्| वैद्यश्चात्र तदा मन्त्रं प्रयतात्मा पठेदिमम्||२७|| "नमः पुरुषसिंहाय नमो नारायणाय च| यथाऽसौ नाभिजानाति रणे कृष्णपराजयम्||२८|| एतेन सत्यवाक्येन अगदो मे प्रसिध्यतु| नमो वैदूर्यमाते हुलुहुलु रक्ष मां सर्वविषेभ्यः||२९|| गौरि गान्धारि चाण्डालि मातङ्गि स्वाहा| " पिष्टे च द्वितीयो मन्त्रः "हरिमायि स्वाहा||३०|| " अशेषविषवेतालग्रहकार्मणपाप्मसु| मरकव्याधिदुर्भिक्षयुद्धाशनिभयेषु च||३१|| पाननस्याञ्जनालेपमणिबन्धादियोजितः| एष चन्द्रोदयो नाम शान्तिस्वस्त्ययनं परम्||३२|| |वासवो वृत्रमवधीत्समालिप्तः किलामुना| ]||३२||
🔊 Audio coming soon
sa0- añjanādīni dravyāṇi| kanyā kr̥tōpavāsā snātāśuklavastrā taiḥ-pūrvōktairdravyaiḥ, mākṣikasiktaiḥ puṣyanakṣatrē viprān pūjayitvā'nantaramagadavaramimaṁ kalpayēt| vaidyaśca samīpasthō mantraṁ nama ityādikaṁ paṭhēt| piṣṭē cāgadē dvitīyō mantrō harimāyyādikō'tra yōjyaḥ| nikhilēṣu viṣādiṣu pānādimaṇibandhādi yōjitō'yaṁ candrōdayō nāmāgadaḥ paraṁ śāntaṁ(nti) svastyayanam|
Adhikarana dUShIviShasya lakShaNam dUShIviShArtasya lakShaNam (33-36) · Śloka 36
jīrṇaṁ viṣaghnauṣadhibhirhataṁ vā dāvāgnivātātapaśōṣitaṁ vā| svabhāvatō vā na guṇaiḥ suyuktaṁ dūṣiviṣākhyāṁ viṣamabhyupaiti||33|| vīryālpabhāvādavibhāvyamētat kaphāvr̥taṁ varṣagaṇānubandhi| tēnārditō bhinnapurīṣavarṇō duṣṭāsrarōgī tr̥ḍarōcakārtaḥ||34|| mūrcchan vaman gadgadavāk vimuhyan bhavēcca dūṣyōdaraliṅgajuṣṭaḥ| āmāśayasthē kaphavātarōgī pakvāśayasthē'nilapittarōgī||35|| bhavēnnarō dhvastaśirōruhāṅgō vilūnapakṣaḥ sa yathā vihaṅgaḥ| sthitaṁ rasādiṣvathavā vicitrān karōti dhātuprabhavān vikārān||36||
View original
जीर्णं विषघ्नौषधिभिर्हतं वा दावाग्निवातातपशोषितं वा| स्वभावतो वा न गुणैः सुयुक्तं दूषिविषाख्यां विषमभ्युपैति||३३|| वीर्याल्पभावादविभाव्यमेतत् कफावृतं वर्षगणानुबन्धि| तेनार्दितो भिन्नपुरीषवर्णो दुष्टास्ररोगी तृडरोचकार्तः||३४|| मूर्च्छन् वमन् गद्गदवाक् विमुह्यन् भवेच्च दूष्योदरलिङ्गजुष्टः| आमाशयस्थे कफवातरोगी पक्वाशयस्थेऽनिलपित्तरोगी||३५|| भवेन्नरो ध्वस्तशिरोरुहाङ्गो विलूनपक्षः स यथा विहङ्गः| स्थितं रसादिष्वथवा विचित्रान् करोति धातुप्रभवान् विकारान्||३६||
🔊 Audio coming soon
sa0- yadviṣaṁ purāṇaṁ, viṣaghnauṣadhibhirvā hatavīryaṁ, yadvā dāvāgnītyādibhiḥ śōṣitaṁ, svabhavēnaiva vā guṇairna suṣṭhu yuktaṁ, tad dūṣīviṣasaṁjñāmupaiti| tathā vīryasyālpatvādētadavibhāvyaṁ-alakṣyam| tathā kaphēnāvr̥taṁ varṣavr̥ndaṁ ca tatsthāyi| tēna-dūṣīviṣēṇa, pīḍitō bhinnapurīṣavarṇādikaḥ syāt| tathā mūrcchāṁ gacchan vamannasphuṭavāk tathā vimuhyan tathā dūṣyēnōpalakṣita udarē yāni liṅgāni (hr̥.ni. a. 12/20), taiḥ sēvitaśca bhavēt| āmāśayasthē dūṣīviṣē kaphavātarōgī syāt pakvāśayasthē dūṣīviṣē'nilapittarōgī syāt| upajātayaḥ| dhvastāḥ kacāḥ śarīraṁ ca yasya sa dhvastaśirōtuhāṅgō vilūnapakṣaḥ pakṣīva bhavēt| rasādiṣu ca sthitaṁ nānāvidhān dhātuprabhavān vikārān karōti| upēndravajrāvr̥ttam|
Adhikarana dUShIviShasya niruktiH (37) · Śloka 37
prāgvātājīrṇaśītābhradivāsvapnāhitāśanaiḥ| duṣṭaṁ dūṣayatē dhātūnatō dūṣīviṣaṁ smr̥tam||37||
View original
प्राग्वाताजीर्णशीताभ्रदिवास्वप्नाहिताशनैः| दुष्टं दूषयते धातूनतो दूषीविषं स्मृतम्||३७||
🔊 Audio coming soon
sa0-tacca purōvātādibhirduṣṭaṁ saddhātūn dūṣayati yataḥ, tatō'pi hētōrdūṣīviṣaṁ smr̥tam|
Adhikarana dUShIviShArte svedaH shodhanaM ca (38) · Śloka 38
dūṣīviṣārtaṁ susvinnamūrdhvaṁ cādhaśca śōdhitam| dūṣīviṣārimagadhaṁ lēhayēnmadhunā''plutam||38||
View original
दूषीविषार्तं सुस्विन्नमूर्ध्वं चाधश्च शोधितम्| दूषीविषारिमगधं लेहयेन्मधुनाऽऽप्लुतम्||३८||
🔊 Audio coming soon
sa0-dūṣīviṣapīḍitaṁ naraṁ susvinnamūrdhvamadhastācca śōdhitaṁ santaṁ dūṣīviṣāri-vakṣyamāṇaṁ, mākṣikēṇāplutamagadaṁ lēhayēt|
Adhikarana dUShIviShArte dUShIviShArirnAmAgadaH (39-40) · Śloka 40
tamēvāha pippalyō dhyāmakaṁ māṁsī rōdhramēlā suvarcikā| kuṭannaṭaṁ nataṁ kuṣṭhaṁ yaṣṭī candanagairikam||39|| dūṣīviṣārirnāmnā'yaṁ na cānyatrāpi vāryatē| |40|
View original
तमेवाह पिप्पल्यो ध्यामकं मांसी रोध्रमेला सुवर्चिका| कुटन्नटं नतं कुष्ठं यष्टी चन्दनगैरिकम्||३९|| दूषीविषारिर्नाम्नाऽयं न चान्यत्रापि वार्यते| |४०|
🔊 Audio coming soon
sa0- pippalyādikō'yamagadō nāmnā dūṣīviṣāriḥ| na cānyasminnapi vāryatē| kintu viśēṣēṇa prayujyatē|
Adhikarana viShaliptashastraviddhasya lakShaNam (40-44) · Śloka 44
| viṣadigdhēna viddhastu pratāmyati muhurmuhuḥ||40|| vivarṇabhāvaṁ bhajatē viṣādaṁ cāśu gacchati| kīṭairivāvr̥taṁ cāsya gātraṁ cimicimāyatē||41|| śrōṇipr̥ṣṭhaśiraḥskandhasandhayaḥ syuḥ savēdanāḥ| kr̥ṣṇaduṣṭāsravisrāvī tr̥ṇmūrcchājvaradāhavān||42|| dr̥ṣṭikāluṣyavamathuśvāsakāsakaraḥ kṣaṇāt| āraktapītaparyantaḥ śyāvamadhyō'tirugvraṇaḥ||43|| śūyatē pacyatē sadyō gatvā māṁsaṁ ca kr̥ṣṇatām| praklinnaṁ śīryatē'bhīkṣṇaṁ sapicchilaparisravam||44||
View original
| विषदिग्धेन विद्धस्तु प्रताम्यति मुहुर्मुहुः||४०|| विवर्णभावं भजते विषादं चाशु गच्छति| कीटैरिवावृतं चास्य गात्रं चिमिचिमायते||४१|| श्रोणिपृष्ठशिरःस्कन्धसन्धयः स्युः सवेदनाः| कृष्णदुष्टास्रविस्रावी तृण्मूर्च्छाज्वरदाहवान्||४२|| दृष्टिकालुष्यवमथुश्वासकासकरः क्षणात्| आरक्तपीतपर्यन्तः श्यावमध्योऽतिरुग्व्रणः||४३|| शूयते पच्यते सद्यो गत्वा मांसं च कृष्णताम्| प्रक्लिन्नं शीर्यतेऽभीक्ष्णं सपिच्छिलपरिस्रवम्||४४||
🔊 Audio coming soon
sa0-viṣadigdhēna-viṣaliptēna śastrēṇa, viddhō naraḥ punaḥpunaḥ pratāmyati| tathā vaivarṇyaṁ prayāti| drāgēva viṣādamēti| asya ca-viṣadigdhēna viddhasya, śarīraṁ kīṭairiva vyāptaṁ cimicimāyatē| śrōṇyādayaścāsya sarujāḥ syuḥ kr̥ṣṇaṁ duṣṭaṁ ca raktaṁ kṣarati| tr̥ḍādiyutaḥ kṣaṇēnaiva ca dr̥ṣṭikāluṣyādikaraḥ syāt| tathā vraṇa īṣadraktaprayantaḥ śyāvamadhyō mahārujaḥ syāt| tathā śūyatē pākaṁ yāti| tēṣāṁ sadya ēva ca māṁsaṁ kr̥ṣṇatāṁ gatvā praklinnaṁ saddīryatē nityamēva picchilayutaṁ parisravaṁ kuryāt|
Adhikarana viShashastraviddhe hRudayAvaraNam, shalyAharaNapUrvakovraNadAhaH, muShkakAdikShAreNa pratisAraNam, shukanAsAdibhirlepaH (45-47) · Śloka 47
kuryādamarmaviddhasya hr̥dayāvaraṇaṁ drutam| śalyamākr̥ṣya taptēna lōhēnānu dahēd vraṇam||45|| athavā muṣkakaśvētāsōmatvaktāmravallitaḥ| śirīṣād gr̥dhranakhyāśca kṣārēṇa pratisārayēt||46|| śukanāsāprativiṣāvyāghrīmūlaiśca lēpayēt| |47|
View original
कुर्यादमर्मविद्धस्य हृदयावरणं द्रुतम्| शल्यमाकृष्य तप्तेन लोहेनानु दहेद् व्रणम्||४५|| अथवा मुष्ककश्वेतासोमत्वक्ताम्रवल्लितः| शिरीषाद् गृध्रनख्याश्च क्षारेण प्रतिसारयेत्||४६|| शुकनासाप्रतिविषाव्याघ्रीमूलैश्च लेपयेत्| |४७|
🔊 Audio coming soon
sa0- amarmaviddhasya hr̥dayāvaraṇaṁ drutaṁ vidadhīta| sa0- śalyamākr̥ṣya taptēna lōhēna vraṇaṁ paścāddahēt| athavā muṣkakādikṣārēṇa pratisārayēt| śukanāsādibhiśca lēpayēt vraṇam|
Adhikarana viSha kITadaShTacikitsA ca (47) · Śloka 47
| kīṭadaṣṭacikitsāṁ ca kuryāttasya yathārhataḥ||47||
View original
| कीटदष्टचिकित्सां च कुर्यात्तस्य यथार्हतः||४७||
🔊 Audio coming soon
sa0-tasya ca-digdhaphalaviddhasya, kīṭadaṣṭacikitsitaṁ yathāyōgaṁ kuryāt|
Adhikarana viSha vraNe pUtimAMse pittavisarpavatkriyA (48) · Śloka 48
vraṇē tu pūtipiśitē kriyā pittavisarpavat| |48|
View original
व्रणे तु पूतिपिशिते क्रिया पित्तविसर्पवत्| |४८|
🔊 Audio coming soon
sa0-vraṇē ca pūtimāṁsē pittavisarpa iva cikitsā kāryā|
Adhikarana garaviShadAyakAH (48-49) · Śloka 49
| saubhāgyārthaṁ striyō bhartrē rājñē vā'rāticōditāḥ||48|| garamāhārasampr̥ktaṁ yacchantyāsannavartinaḥ| |49|
View original
| सौभाग्यार्थं स्त्रियो भर्त्रे राज्ञे वाऽरातिचोदिताः||४८|| गरमाहारसम्पृक्तं यच्छन्त्यासन्नवर्तिनः| |४९|
🔊 Audio coming soon
saṁ-nānākāntāḥ yōṣitaḥ patyē saubhāgyārthaṁ rājñaśca(rājñē vā) nikaṭavartinō narāścārātiprēritā garayuktaṁ bhōjanaṁ dadati|
Adhikarana garasya lakShaNam (49-50) · Śloka 50
| nānāprāṇyaṅgaśamalaviruddhauṣadhibhasmanām||49|| viṣāṇāṁ cālpavīryāṇāṁ yōgō gara iti smr̥taḥ| |50|
View original
| नानाप्राण्यङ्गशमलविरुद्धौषधिभस्मनाम्||४९|| विषाणां चाल्पवीर्याणां योगो गर इति स्मृतः| |५०|
🔊 Audio coming soon
sa0-nānāprakāraprāṇyaṅgaśakr̥tāṁ tathā viruddhauṣadhibhasmanāṁ viṣāṇāṁ ca stōkavīryāṇāṁ yō yōgaḥ, sa gara iti smr̥taḥ|
Adhikarana garArtasya lakShaNam (50-54) · Śloka 54
| tēna pāṇḍuḥ kr̥śō'lpāgniḥ kāsaśvāsajvarārditaḥ||50|| vāyunā pratilōmēna svapnacintāparāyaṇaḥ| mahōdarayakr̥tplīhī dīnavāgdurbalō'lasaḥ||51|| śōphavān satatādhmātaḥ śuṣkapādakaraḥ kṣayī| svapnē gōmāyumārjāranakulavyālavānarān||52|| prāyaḥ paśyati śuṣkāṁśca vanaspatijalāśayān| manyatē kr̥ṣṇamātmānaṁ gaurō, gōraṁ ca kālakaḥ||53|| vikarṇanāsānayanaṁ paśyēttadvihatēndriyaḥ| |54|
View original
| तेन पाण्डुः कृशोऽल्पाग्निः कासश्वासज्वरार्दितः||५०|| वायुना प्रतिलोमेन स्वप्नचिन्तापरायणः| महोदरयकृत्प्लीही दीनवाग्दुर्बलोऽलसः||५१|| शोफवान् सतताध्मातः शुष्कपादकरः क्षयी| स्वप्ने गोमायुमार्जारनकुलव्यालवानरान्||५२|| प्रायः पश्यति शुष्कांश्च वनस्पतिजलाशयान्| मन्यते कृष्णमात्मानं गौरो, गोरं च कालकः||५३|| विकर्णनासानयनं पश्येत्तद्विहतेन्द्रियः| |५४|
🔊 Audio coming soon
sa0- tēna garēṇa pāṇḍvādiguṇaḥ kāsādipīḍitaśca syāt| vātēna pratilōmēna yuktastathā svapnacintāparaḥ syāt| tathā br̥hajjaṭharayakr̥tplīhavān dīnavāgādiguṇaśca syāt| svapnē śr̥gālādīn paśyati| prāyēṇa śuṣkavr̥kṣōdapānāni lōkatē| ātmānaṁ ca gauraḥ san kr̥ṣṇaṁ manyatē| kr̥ṣṇaśca gauraṁ manyatē| tēna-garaviṣēṇa, vihatēndriyaḥ san vikarṇaghrāṇacakṣuṣaṁ paśyēt|
Adhikarana garArtasya cikitsitAbhAve sadyo nAshaH (54-55) · Śloka 55
| ētairanyaiśca bahubhiḥ kliṣṭō ghōrairupadravaiḥ||54|| garārtō nāśamāpnōti kaścitsadyō'cikitsitaḥ| |55|
View original
| एतैरन्यैश्च बहुभिः क्लिष्टो घोरैरुपद्रवैः||५४|| गरार्तो नाशमाप्नोति कश्चित्सद्योऽचिकित्सितः| |५५|
🔊 Audio coming soon
sa0-ētaiḥ-uktairupadravaiḥ, aparaiścānuktairdāruṇaiḥ kliṣṭaḥ san garapīḍitaḥ kaścidacikitsitaḥ sadya ēva nāśamaśnutē|
Adhikarana garArte vamanaM pathyapAnabhojanaM suvarNashIlanaM ca (55-56) · Śloka 56
| garārtō vāntavān bhuktvā tatpathyaṁ pānabhōjanam||55|| śuddhahr̥cchīlayēddhēma sūtrasthānavidhēḥ smaran| |56|
View original
| गरार्तो वान्तवान् भुक्त्वा तत्पथ्यं पानभोजनम्||५५|| शुद्धहृच्छीलयेद्धेम सूत्रस्थानविधेः स्मरन्| |५६|
🔊 Audio coming soon
sa0- garāturaḥ kr̥tavamanaḥ san tat-pūrvōktaṁ, pathyaṁ pānabhōjanaṁ bhuktvā śuddhahr̥dayaḥ suvarṇaṁ śīlayēt| kiṁ kurvan ? sūtrasthānōktavidhēḥ-"śuddhē hr̥di tataḥ śāṇaṁ hēmacūrṇasya dāpayēt|" (hr̥.sū. a. 7/28) iti smaran| vidhēḥ smarannityatra "adhīgartha-" ityādinā vidhiśabdāt karmaṇi ṣaṣṭhī|
Adhikarana garArte tApyasuvarNalehaH (56-57) · Śloka 57
| śarkarākṣaudrasaṁyuktaṁ cūrṇaṁ tāpyasuvarṇayōḥ||56|| lēhaḥ praśamayatyugraṁ sarvayōgakr̥taṁ viṣam| |57|
View original
| शर्कराक्षौद्रसंयुक्तं चूर्णं ताप्यसुवर्णयोः||५६|| लेहः प्रशमयत्युग्रं सर्वयोगकृतं विषम्| |५७|
🔊 Audio coming soon
sa0-mākṣīkadhātukāñcanayōścūrṇaṁ śarkarāmākṣikānvitaṁ lēhō dāruṇaṁ garayōgajaṁ viṣaṁ hanti|
Adhikarana garArte hatAgnau mUrvAdicUrNam (57-58) · Śloka 58
| mūrvāmr̥tānatakaṇāpaṭōlīcavyacitrakān||57|| vacāmustaviḍaṅgāni takrakōṣṇāmbumastubhiḥ| pibēdrasēna vā'mlēna garōpahatapāvakaḥ||58||
View original
| मूर्वामृतानतकणापटोलीचव्यचित्रकान्||५७|| वचामुस्तविडङ्गानि तक्रकोष्णाम्बुमस्तुभिः| पिबेद्रसेन वाऽम्लेन गरोपहतपावकः||५८||
🔊 Audio coming soon
sa0-mūrvādīni takrādibhiramlēna vā-bījapūrarasādirasēna, garōpahatāgniḥ pumān pibēt|
Adhikarana garArte pArAvatAmiShAdishRutaM jalam (59) · Śloka 59
pārāvatāmiṣaśaṭhīpuṣkarāhvaśr̥taṁ himam| garatr̥ṣṇārujākāsaśvāsahidhmājvarāpaham||59||
View original
पारावतामिषशठीपुष्कराह्वशृतं हिमम्| गरतृष्णारुजाकासश्वासहिध्माज्वरापहम्||५९||
🔊 Audio coming soon
sa0- pārāvatāmiṣādibhiḥ śr̥taṁ śītaṁ jalaṁ garatr̥ṣṇādighnam|
Adhikarana viShasa~gkaTasya lakShaNam (60) · Śloka 60
viṣaprakr̥tikālānnadōṣadūṣyādisaṅgamē| viṣasaṅkaṭamuddiṣṭaṁ śatasyaikō'tra jīvati||60||
View original
विषप्रकृतिकालान्नदोषदूष्यादिसङ्गमे| विषसङ्कटमुद्दिष्टं शतस्यैकोऽत्र जीवति||६०||
🔊 Audio coming soon
sa0-viṣaprakr̥tyādiyōgē sati viṣasaṅkaṭaṁ kathitam| [atra-] asmiṁśca viṣasaṅkaṭē, viṣārtaḥ śatamadhya ēkō jīvēt| tatra viṣaprakr̥tiḥ-pittaprakr̥tiḥ| kālō-varṣāḥ| viṣānnaṁ-sarṣapādi| viṣadōṣaḥ-pittam| dūṣyaṁ-raktam| ādiśabdēna sātmyādīnāṁ grahaṇam|
Adhikarana viShavRuddhihetavaH kShudhAdayaH (61-63) · Śloka 63
kṣuttr̥ṣṇāgharmadaurbalyakrōdhaśōkabhayaśramaiḥ| ajīrṇavarcōdravatāpittamārutavr̥ddhibhiḥ||61|| tilapuṣpaphalāghrāṇabhūbāṣpaghanagarjitaiḥ| hastimūṣikavāditraniḥsvanairviṣasaṅkaṭaiḥ||62|| purōvātōtpalāmōdamadanairvardhatē viṣam| |63|
View original
क्षुत्तृष्णाघर्मदौर्बल्यक्रोधशोकभयश्रमैः| अजीर्णवर्चोद्रवतापित्तमारुतवृद्धिभिः||६१|| तिलपुष्पफलाघ्राणभूबाष्पघनगर्जितैः| हस्तिमूषिकवादित्रनिःस्वनैर्विषसङ्कटैः||६२|| पुरोवातोत्पलामोदमदनैर्वर्धते विषम्| |६३|
🔊 Audio coming soon
sa0- kṣudhādibhirviṣaṁ vr̥ddhimēti|
Adhikarana varShAsu viShavRuddheH kAraNam,sharadi viShasya mandavIryatve hetuH (63-64) · Śloka 64
| varṣāsu cāmbuyōnitvātsaṁklēdaṁ guḍavadgatam||63|| visarpati ghanāpāyē, tadagastyō hinasti ca| prayāti mandavīryatvaṁ viṣaṁ tasmāddhanātyayē||64||
View original
| वर्षासु चाम्बुयोनित्वात्संक्लेदं गुडवद्गतम्||६३|| विसर्पति घनापाये, तदगस्त्यो हिनस्ति च| प्रयाति मन्दवीर्यत्वं विषं तस्माद्धनात्यये||६४||
🔊 Audio coming soon
sa0- prāvr̥ṣi ca jalaprabhavatvādviṣaṁ saṁklēdaṁ guḍavad yāti| visarpati-prasarati, ghanāpāyē-vigatavarṣāsamayē| tat-viṣaṁ, agastyō hinasti-alpaśakti karōti| tasmādghanātyayē-śaratsamayē, mandavīryatvaṁ prayāti|
Adhikarana iti prakRutyAdyAlocya karmAcaraNam (65) · Śloka 65
iti prakr̥tisātmyartusthānavēgabalābalam| alōcya nipuṇaṁ buddhyā karmānantaramācarēt||65||
View original
इति प्रकृतिसात्म्यर्तुस्थानवेगबलाबलम्| अलोच्य निपुणं बुद्ध्या कर्मानन्तरमाचरेत्||६५||
🔊 Audio coming soon
sa0-iti-ēvaṁ pūrvōktēna prakārēṇa, prakr̥tyādikaṁ buddhvā-yatnēna nirūpya, tataḥ karma kuryāt|
Adhikarana shlaiShmike viShe vamanAdibhiH shamanam (66) · Śloka 66
ślaiṣmikaṁ vamanairuṣṇarūkṣatīkṣṇaiḥ pralēpanaiḥ| kaṣāyakaṭutiktaiśca bhōjanaiḥ śamayēdviṣam||66||
View original
श्लैष्मिकं वमनैरुष्णरूक्षतीक्ष्णैः प्रलेपनैः| कषायकटुतिक्तैश्च भोजनैः शमयेद्विषम्||६६||
🔊 Audio coming soon
sa0-ślaiṣmikaṁ viṣaṁ vamanairuṣṇādiguṇaiḥ pralēpaiścēddaśairbhōjanaiśca kaṣāyādiguṇaiḥ śāntiṁ nayēt|
Adhikarana paittike viShe virecanAdibhiH shamanam (67) · Śloka 67
paittikaṁ sraṁsanaiḥ sēkapradēhairbhr̥śaśītalaiḥ| kaṣāyatiktamadhurairghr̥tayuktaiśca bhōjanaiḥ||67||
View original
पैत्तिकं स्रंसनैः सेकप्रदेहैर्भृशशीतलैः| कषायतिक्तमधुरैर्घृतयुक्तैश्च भोजनैः||६७||
🔊 Audio coming soon
sa0-paittikaṁ viṣaṁ virēcanaistathā'tiśītalaiḥ sēkaiḥ pralēpaiśca tathā bhōjanaiḥ kaṣāyatiktamadhurairājyayutaiśca śamayēt|
Adhikarana vAtike viShe svAdvAdyAhArAdibhiH shamanam (68) · Śloka 68
vātātmakaṁ jayētsvādusnigdhāmlalavaṇānvitaiḥ| saghr̥tairbhōjanairlēpaistathaiva piśitāśanaiḥ||68||
View original
वातात्मकं जयेत्स्वादुस्निग्धाम्ललवणान्वितैः| सघृतैर्भोजनैर्लेपैस्तथैव पिशिताशनैः||६८||
🔊 Audio coming soon
sa0-vātikaṁ madhurādiyuktaiḥ sasarpiṣkairbhōjanairlēpairmāṁsabhōjanaiśca jayēt|
Adhikarana sarvaviSheShu sarvAvastheShu ghRutatulyaM bheShajaM nAsti visheShAt vAte~adhike (69-70) · Śloka 70
nāghr̥taṁ sraṁsanaṁ śastaṁ pralēpō bhōjyamauṣadham| sarvēṣu sarvāvasthēṣu viṣēṣu na ghr̥tōpamam||69|| vidyatē bhēṣajaṁ kiñcidviśēṣāt prabalē'nilē| |70|
View original
नाघृतं स्रंसनं शस्तं प्रलेपो भोज्यमौषधम्| सर्वेषु सर्वावस्थेषु विषेषु न घृतोपमम्||६९|| विद्यते भेषजं किञ्चिद्विशेषात् प्रबलेऽनिले| |७०|
🔊 Audio coming soon
sa0- viṣē sraṁsanaṁ-virēcanaṁ, pralēpō vā bhōjyamauṣadhaṁ vā nāghr̥taṁ śastam| kiṁ tarhi ? sarvamēva tat saghr̥taṁ śastam| sa0- sarvēṣu viṣēṣu sarvāvasthēṣu ca ghr̥tatulyaṁ nānyadauṣadhaṁ kimapyasti| viśēṣēṇa ca vātē'tiriktē|
Adhikarana kaphapittavAtagataviShANAM sAdhyAsAdhyatvam (35) · Śloka 35
| ayatnācchlēṣmagaṁ sādhyaṁ, yatnāt pittāśayāśrayam||70|| suduḥsādhyamasādhyaṁ vā vātāśayagataṁ viṣam| 70 1/2| iti śrīvaidyapatisiṁhaguptasūnuśrīvadvāgbhaṭaviraci- tāyāmaṣṭāṅgahr̥dayasaṁhitāyāṁ ṣaṣṭhē uttarasthānē viṣapratiṣēdhō nāma pañcatriṁśō'dhyāyaḥ||35||
View original
| अयत्नाच्छ्लेष्मगं साध्यं, यत्नात् पित्ताशयाश्रयम्||७०|| सुदुःसाध्यमसाध्यं वा वाताशयगतं विषम्| ७० १/२| इति श्रीवैद्यपतिसिंहगुप्तसूनुश्रीवद्वाग्भटविरचि- तायामष्टाङ्गहृदयसंहितायां षष्ठे उत्तरस्थाने विषप्रतिषेधो नाम पञ्चत्रिंशोऽध्यायः||३५||
🔊 Audio coming soon
sa0- kaphagataṁ viṣamalpayatnēna sādhyam| pittāśayāśrayaṁ yatnēna sādhyam| vātāśayāśritaṁ suṣṭhu duḥkhēna sādhyatē'sādhyaṁ vā syāditi| iti śrīmr̥gāṅkadattaputraśrīmadaruṇadattaviracitāyāmaṣṭāṅgahr̥dayaṭī- kāyāṁ sarvāṅgasundarākhyāyāṁ ṣaṣṭhē uttarasthānē viṣapratiṣēdhō nāma pañcatriṁśō'dhyāyaḥ samāptaḥ|| 35||