24. dvividhōpakramaṇīyaḥ

Adhikarana athAto dvividhopakramaNIyo nAma caturviMsho&dhyAyaH pratij~jA (1) · Śloka 1

অথাতো দ্বিবিধোপক্রমণীযং নামাধ্যাযং ব্যাখ্যাস্যামঃ| ইতি হ স্মাহুরত্রেযাদযো মহর্ষযঃ||১||

পূর্বেঽধ্যাযে ব্যাধিনির্ঘাতনমুক্তম্| অত্র তু তস্যৈব দ্বৈবিধ্যপ্রদর্শনার্থমধ্যাযারম্ভঃ-অথাত ইত্যাদি|| ১||

Adhikarana upakramasya dvaividhyaM tatparyAyau ca (2) · Śloka 2

উপক্রম্যস্য হি দ্বিত্বাদ্ দ্বিধৈবোপক্রমো মতঃ| একঃ সন্তর্পণস্তত্র দ্বিতীযশ্চাপতর্পণঃ| বৃংহণো লঙ্ঘনশ্চেতি তত্পর্যাযাবুদাহৃতৌ||২||

উপক্রমশ্চিকিত্সেতি পর্যাযৌ| দ্বিবিধ এবোপক্রমঃ| কুতঃ ? উপক্রমস্য ব্যাধিতস্য সন্তর্প্যাপতর্প্যাভেদাদ্ দ্বৈবিধ্যাত্|| ২||

Adhikarana bRuMhaNala~gghanasvarUpaM tayormahAbhUtasa~ggatishca (3) · Śloka 3

বৃংহণং যদ্ বৃহত্বায লঙ্ঘনং লাঘবায যত্| দেহস্য ভবতঃ প্রাযো ভৌমাপমিতরচ্চ তে||৩||

বৃংহণমিত্যাদিনা বৃংহণলঙ্ঘনযোশশব্দযোরন্বর্থতাং বদন্ সন্তর্পণাপতর্পণযোঃ স্বরূপং বক্তি| যদ্দেহস্য শরীরস্য বৃহত্বায কল্পতে তত্ বৃংহণম্| তথা দেহস্য যল্লাঘবায কল্পতে তল্লঙ্ঘনম্| তে চ বৃংহণলঙ্ঘনে ভৌমাপমিতরচ্চ ভবতঃ| তেনৈতদুক্তং ভবতি-ভৌমাপং বৃংহণং মতম্| ইতরদাগ্নেযবাযব্যনাভসং লঙ্ঘনমিতি|| ৩||

Adhikarana snehanAdInAmapi bRuMhaNala~gghanayorevAntarbhAvaHgh (4) · Śloka 4

স্নেহনং রূক্ষণং কর্ম স্বেদনং স্তম্ভনঞ্চ যত্| ভূতানাং তদপি দ্বৈধ্যাদ্ দ্বিতযং নাতিবর্ততে||৪||

বহূপক্রমবাদিনং প্রতীদমুচ্যতে-স্নেহনমিত্যাদি| স্নেহনং রূক্ষণঞ্চ যত্ কর্ম উপক্রমঃ| তথা স্বেদনং স্তম্ভনঞ্চ যত্ কর্ম তত্ কর্মচতুষ্টযং ভূতানামগ্নীষোমাত্মকরূপদ্বৈবিধ্যাত্ দ্বিতযং বৃংহণলঙ্ঘনাখ্যং নাতিবর্ততে| তেনৈতদুক্তং ভবতি-স্নেহনস্তম্ভনে সৌম্যত্বাত্ বৃংহণবর্গে পততঃ| রূক্ষণস্বেদনে চাগ্নেযত্বাল্লঙ্ঘন ইতি| শোধনাঙ্গস্য স্নেহস্য লঙ্ঘনফলত্বাল্লঙ্ঘনত্বম্| তত্কালন্তু বৃংহণত্বমেব এবং স্বেদাদীনামপি বিচার্যম্| তস্মাদ্ দ্বাবেবোপক্রমৌ|| ৪||

Adhikarana la~gghanaM dvividham (5) · Śloka 5

শোধনং শমঞ্চেতি দ্বিধা তত্রাপি লঙ্ঘনম্||৫||

তত্র লঙ্ঘনং শোধনশমনভেদেন দ্বিবিধম্| শোধনং শমনঞ্চ|

Adhikarana shodhanalakShaNantasya pa~jcavidhatva~jca (6) · Śloka 6

যদীরযেদ্বহির্দোষান্ পঞ্চধা শোধনঞ্চ তত্| নিরূহো বমনং কাযশিরোরেকোঽস্রবিস্রুতিঃ||৬||

কিমুচ্যত ইত্যাহ-যদীরযেদিত্যাদিনা| পঞ্চধা পঞ্চভির্বমনাদিভিঃ প্রকারৈর্যদৌষধমন্তশ্শরীরস্থান্ দোষান্ বাতাদীন্ বহিরীরযেত্ তচ্ছোধনম্| নিরূহ ইত্যাদিনা পঞ্চপ্রকারান্ দর্শযতি| নিরুদ্ধো গুদপ্রণিধেযমৌষধং ক্বাথস্নেহাদি| বমনং, কাযবিরেকশিশরোবিরেকঃ| অস্রবিস্রুতিরিতি|| ৬||

Adhikarana shamanalakShaNantasya saptavidhatva~jcabRuMhaNasyAvasthAyAM shamanatvam (7) · Śloka 7

ন শোধযতি যদ্দোষান্ সমান্নোদীরযত্যপি| সমীকরোতি বিষমান্ শমনং তচ্চ সপ্তধা| পাচনং দীপনং ক্ষুত্তৃড্ব্যাযামাতপমারুতাঃ| বৃংহণং শমনন্ত্বেব বাযোঃ পিত্তানিলস্য চ||৭||

শমনং পুনর্যদৌষধমনন্তরোক্তেন প্রকারেণ দোষান্নাশযতি| সমাংশ্চ দোষান্নোদীরযতি নোত্ক্লেশযতি| বিষমান্ প্রবৃদ্ধান্ সমীকরোতি স্বরূপেণ স্থাপযতি| তচ্ছমনম্| বিষমশব্দঃ সমান্ নোদীরযত্যপীতি বাক্যসামার্থ্যাদ্ বৃদ্ধাবেব বর্ততে| তচ্চ শমনং সপ্তভিঃ প্রকারৈঃ পাচনত্বাদিভির্ভবতি| পাচনত্বাদীনাং দোষশমনত্বমুক্তম্| তচ্চ বাযৌ বাতপিত্তে চাসৌম্যত্বান্ন সম্ভবতীত্যাহ বৃংহণমিত্যাদি| যদ্যপি শমনং লঙ্ঘনং তথাপি বাযৌ বাতপিত্তে চ বৃংহণমেব যথোক্তলক্ষণং শমনম্| পিত্তস্য তু কেবলস্যাস্বরূপত্বাল্লঙ্ঘনমেব শমনম্| বাতশ্লেষ্মণোস্তু বাযোঃ শৈত্যাদ্যোগবাহিত্বাচ্চ লঙ্ঘনমেব কফেঽপি চ| সুবোধম্|| ৭||

Adhikarana bRuMhyAH bRuMhaNAni ca (8) · Śloka 8

বৃংহযেদ্ব্যাধিভৈষজ্যমদ্যস্ত্রীশোককর্শিতান্| ভারাধ্বোরঃক্ষতক্ষীণরূক্ষদুর্বলবাতলান্| গর্ভিণীসূতিকাবালবৃদ্ধান্ গ্রীষ্মেঽপরানপি| মাংসক্ষীরসিতাসর্পির্মধুরস্নিগ্ধবস্তিভিঃ| স্বপ্নশয্যাসুখাভ্যঙ্গস্নাননির্বৃতিহর্ষণৈঃ||৮||

ননু চ ক্ব বৃংহণং বিধেযং ক্ব বা লঙ্ঘনমিত্যাহ-বৃংহযেদিত্যাদি| ব্যাধ্যাদিকর্শিতান্ বৃংহযেত্| ক্ষীণশব্দস্য ভারাদিভিঃ সম্বন্ধঃ| তথা গ্রীষ্মে অপরান্ সর্বানিত্যর্থঃ| কেন বৃংহযেদিত্যাহ-মাংসেত্যাদি| ইতি বৃংহণীযানি|| ৮||

Adhikarana la~gGyAH (9) · Śloka 9

মেহামদোষাতিস্নিগ্ধজ্বরোরুস্তম্ভকুষ্ঠিনঃ| বিসর্পবিদ্রধিপ্লীহশিরঃ কণ্ঠাক্ষিরোগিণঃ| স্থূলাংশ্চ লঙ্ঘযেন্নিত্যং শিশিরে ত্বপরানপি||৯||

মেহাদীন্ লঙ্ঘযেদিতি সম্বন্ধঃ| নিত্যমেব ন তু কদাচিত্| শিশিরে ত্বপরানপি ল~ঘ্ঘযেত্| শ্লেষ্মচযভযাত্| অপরানিতি ব্যাধিতানাং গ্রহণম্| অন্যথা স্বস্থবৃত্তে শিশিরে হেমন্তবিধিস্সবিশেষৈ র্নির্দিষ্টঃ|| ৯||

Adhikarana sthUlAdibhedena la~gghanabhedAH (10) · Śloka 10

তত্র সংশোধনৈঃ স্থৌল্যবলপিত্তকফাধিকান্| আমদোষজ্বরচ্ছর্দিরতীসারহৃদামযৈঃ| বিবন্ধগৌরবোদ্গারহৃল্লাসাদিভিরাতুরান্| মধ্যস্থৌল্যাদিকান্ প্রাযঃ পূর্বং পাচনদীপনৈঃ| এভিরেবামযৈরার্তান্ হীনস্থৌল্যবলাদিকান্| ক্ষুত্তৃষ্ণানিগ্রহৈর্দোষৈস্ত্বার্তান্ মধ্যবলৈর্দৃঢান্| সমীরণাতপাযাসৈঃ কিমুতাঽল্পবলৈর্নরান্||১০||

কেন লঙ্ঘনেন তান্ লঙ্ঘযেদিতি আহ-তত্রেত্যাদি| আমদোষাদিভির্ব্যাধিভিরাতুরান্ স্থৌল্যাদিভিঃ স্থূলত্বাদিভির্গুণৈরধিকান্ উত্কৃষ্টস্থৌল্যবলাদিকান্ সতঃ পূর্বং প্রথমং পাচনৈর্দীপনৈশ্চ লঙ্ঘযেত্| ততো যথার্হেণ লঙ্ঘনেন প্রাযোগ্রহণং দোষবলাদ্যপেক্ষযা নিযমস্যাসর্ববিষযত্বপ্রদর্শনার্থম্| তথা এভিরেবামদোষাদিভিরামযৈরার্তান্ হীনস্থৌল্যবলাদিকান্ সতঃ ক্ষুত্তৃষ্ণানিগ্রহৈর্লঙ্ঘযেত্| তথা সর্বব্যাধিতান্ মধ্যবলৈরপি দোষৈর্বাতাদিভিরার্তান্ সমীরণাদিভির্লঙ্ঘযেত্| কিমুতাল্পবলৈর্দোষৈরার্তান্|| ১০||

Adhikarana la~gghanIyeShu bRuMhaNaniShedhaH deshAdivashAttadanumatishca (11) · Śloka 11

ন বৃংহযেল্লঙ্ঘনীযান্ বৃংহ্যাংস্তু মৃদু লঙ্ঘযেত্| যুক্ত্যা বা দেশকালাদিবলতস্তানপাচরেত্||১১||

লঙ্ঘনীযান্ লঙ্ঘনার্হান্ ব্যাধীন্ ন কদাচন বৃংহযেত্| যতস্তে বৃংহণেন স্বল্পেনাপি পরাং বৃদ্ধিমাযান্তি| যে তু ব্যাধযো বৃংহণীযাস্তান্ মৃদু স্বল্পং লঙ্ঘযেত্| বৃংহণোপযোগযোগ্যতাপাদনাযাঽগ্নিসন্ধুক্ষণায চ| লঘুতাতিশযোত্পত্তযে বাঽথবা তান্ বৃংহণীযান্ লঙ্ঘনীযাংশ্চ দেশকালাদ্যবেক্ষ্য যুক্ত্যোপচরেত্| তেনৈতদুক্তং ভবতি-দেশকালাদ্যপেক্ষযা লঙ্ঘনীযানপি বৃংহযেত্| তথা চ শ্বোবম্যস্য মত্স্যাদযঃ প্রযুজ্যন্ত এব তথা দেশাদ্যপেক্ষযা বৃংহণীযানপি লঙ্ঘযেদিতি|| ১১||

Adhikarana bRuMhatila~gGitalakShaNAni (12) · Śloka 12

বৃংহিতে স্যাদ্বলং পুষ্টিস্তত্সাধ্যামযসঙ্ক্ষযঃ| বিমলেন্দ্রিযতা সর্গো মলানাং লাঘবং রুচিঃ| ক্ষুত্তৃট্সহোদযশ্শুদ্ধহৃদযোদ্গারকণ্ঠতা| ব্যাধিমার্দবমুত্সাহস্তন্দ্রানাশশ্চ লঙ্ঘিতে||১২||

ননু বৃংহিতো লঙ্ঘিতশ্চ কথং জ্ঞেয ইত্যাহ-বৃংহিতে স্যাদিত্যাদি| বৃংহিতে পুরুষে বলং পুষ্টিশ্চ স্যাত্| তথা তত্সাধ্যানাং বৃংহণসাধ্যা-নামামযানাং সঙ্ক্ষযশ্চ স্যাত্| বিমলেন্দ্রিযতাদীনাঞ্চ স্যাদিত্যনেন সম্বন্ধঃ| ল~ঘ্ঘিতে কিমিত্যাহ-ক্ষুত্তৃডিত্যাদি| ক্ষুত্তৃষোস্সহৈককালমুদযঃ| তথা শুদ্ধহৃদযতা শুদ্ধোদ্গারতা শুদ্ধকণ্ঠতা ব্যাধের্লঙ্ঘনসাধ্যস্য মার্দবমুত্সাহশ্চ স্যাদিতি প্রত্যেকমভিসম্বধ্যতে| তেনৈতদুক্তং ভবতি-ক্ষুত্তৃট্সহোদযাদীনাং সমস্তানাং নির্দেশো দোষদেশাদ্যনুরোধেনৈকস্য দ্বযোস্ত্রিচতুরাণাং সর্বেষাঞ্চ লঙ্ঘিতলক্ষণত্বদ্যোতনার্থম্| অন্যথৈষামশেষাণামেব লক্ষণা নামুত্পত্তৌ ল~ঘ্ঘিতলক্ষণত্বং ভবেদিতি|| ১২||

Adhikarana atibRuMhite~atila~gGite ca doShAH (13) · Śloka 13

অনপেক্ষিতমাত্রাদিসেবিতে কুরুতস্তু তে| অতিস্থৌল্যাতিকার্শ্যাদীন্ বক্ষ্যন্তে তে চ সৌষধাঃ| রূপং তৈরেব চ জ্ঞেযমতিবৃংহিতলঙ্ঘিতে||১৩||

অনপেক্ষিতেত্যাদি| তে বৃংহণলঙ্ঘনে মাত্রাদ্যনপেক্ষযা কৃতে অতিস্থৌল্যাদীনতিকার্শ্যাদীংশ্চ কুরুতঃ| অস্মিন্নেবাধ্যাযে তে ব্যাধযো বক্ষ্যন্তে| তেষামৌষধং চ বক্ষ্যতে| তথা তৈরেবাতিস্থৌল্যাদিভিরতিকার্শ্যাদিভিশ্চ করণভূতৈর্যথাসঙ্খ্যেনাতিবৃংহিতেঽতিলঙ্ঘিতে চ লক্ষণং জানীযাদিতি বৃংহণলঙ্ঘনাতিযোগলক্ষণম্|

Adhikarana atisthaulyanidAnasamprAptilakShaNAni atisthUlasvarUpam (14) · Śloka 14

তত্র শোধনমুদ্দিশ্য স্থৌল্যাদ্যাঃ প্রাগুদাহৃতাঃ| গুর্বাদিবৃদ্ধসংলীনশ্লেষ্মমিশ্রোঽন্নজো রসঃ| আম এব শ্লথীকুর্বন্ ধাতূন্ স্থৌল্যমুপানযেত্| অতিস্থৌল্যাদতিক্ষুত্তৃট্প্রস্বেদশ্বাসনিদ্রতাঃ| আযাসাক্ষমতা জাড্যমল্পাযুর্বলবেগতা| দৌর্গন্ধ্যং গদ্গদত্বঞ্চ ভবেন্মেদোঽতিপুষ্টিতঃ| স্রোতঃ সু মেদোরুদ্ধেষু বাযুঃ কোষ্ঠে বিশেষতঃ| চরন্ প্রজ্বলযত্যগ্নিং ক্ষুত্তৃষৌ স্তস্ততোঽধিকম্| স্থূলং কোটরবদ্দৃদ্ধৌ দহতোঽগ্ন্যনিলৌ চ তম্| স্বেদবাহিসিরামূলভাবাদ্বিষ্যন্দনাদপি| মেদসঃ শ্লেষ্মযোগাচ্চ ভবতি স্বেদভূরিতা| কোষ্ঠ এব বিপক্বেঽস্য সংরুদ্ধস্রোতসো রসে| সর্বত্রালব্ধবৃত্তিত্বাত্প্রাযো মেদঃ প্রচীযতে| তচ্ছেষোঽল্পরসোঽল্পত্বান্নালং রক্তাদিপুষ্টযে| তুল্যেঽপি বায্বাদিচযে প্রাক্চিতং চীযতেতরাম্| মেদস্তেনাঽসমস্তেন ধাতূনাং বিদধাতি তত্| শ্বাসাদীনচিরাচ্চান্যান্ জ্বরোদরভগন্দরান্| মেহোরুস্তম্ভপিটকা বিদ্রধিপ্রভৃতীন্ গদান্| অযথোপচযোত্সাহশ্চলস্ফিগুদরস্তনঃ| অতিস্থূলঃ স্মৃতো .....................||১৪||

তত্রাতিবৃংহণেন যে জাযন্তেঽতিস্থৌল্যাদযঃ তে প্রাক্ পূর্বং রোগানুত্পাদনীযে সংশোধনভেষজদ্বেষোদ্ভবত্বেনাতিস্থৌল্যাগ্নিসদনেত্যাদিনোদাহৃতাঃ| যত্ত্বস্মিন্নেবাধ্যাযে বক্ষ্যন্ত ইত্যুক্তং তচ্চিকিত্সানুরোধাত্| তত্রাতিস্থৌল্যপ্রাধান্যাদত্র গুর্বাদীত্যাদিনা হেতুস্বরূপকথনং ক্রিযতে| তত্রান্নরসঃ স্থৌল্যমুপানযেত্ কুর্যাত্| কিঙ্কুর্বন্নাহ-ধাতূন্ রক্তাদীন্ শ্লথীকুর্বন্নিবিডভাবমাপাদযন্| কিম্ভূতো রসঃ গুর্বাদিভিস্সৌম্যৈস্সাত্ম্যৈর্বৃদ্ধেন সংলীনেন চ শ্লেষ্মণামিশ্রস্সংলীনোঽনুত্ক্লিষ্টরূপঃ| অত এবামঃ অপরিপূর্ণপাকঃ ততশ্চাঽতিস্থৌল্যাদতিক্ষুদাদিগদ্গদত্বান্তং ভবেত্| তস্মিংশ্চাতিস্থৌল্যে মেদোবৃদ্ধিকারণৈরাহারাদিভির্যদি মেদসোঽন্যধাত্বপেক্ষযাঽতিশযেন পুষ্টির্ভবতি ততো মেদোঽতিপুষ্টিতো হেতোর্বাযোশ্শাখাসঞ্চরণায স্রোতোমুখেষু মেদসা রুদ্ধেষু সত্সু বাযুরন্যত্রাগচ্ছন্ কোষ্ঠ এব চরন্ তত্রস্থমেবাগ্নি যতঃ প্রজ্বলযত্যতো হেতোঃ স্থূলেষু পুরুষেষু ক্ষুত্তৃষৌ অধিকং স্তৌ ভবতঃ| তৌ চ মহাস্রোতস্থিতাবগ্ন্যনিলৌ স্থূলং দহতঃ| যথা কোটরং তরুমগ্ন্যনিলৌ দহতস্তদ্বদিতি| তত্র চ স্থূলে স্বেদভূরিতা ভবতি| কুত আহ-মেদসঃ স্বেদবাহিসিরামূলভাবাদ্বিষ্যন্দনাচ্ছ্লেষ্মযোগাচ্চ| বিষ্যন্দনং স্রুতিস্বরূপত্বম্| ননু চোক্তং স্থূলস্য মেদোঽতিপুষ্টিং যাতীতি| তত্ কথমিত্যাহ-কোষ্ঠ এবেত্যাদি| অস্য স্থূলস্য মেদঃকারণৈঃ স্বশক্ত্যা সমৃদ্ধেন উপলেপাত্মকেন মেদসা রুদ্ধেষু রসবহস্রোতস্সু প্রত্যহমন্নরসে কোষ্ঠ এব বিপক্বে সতি যতস্স রসস্সর্বধাতুষ্বপ্রাপ্তবৃত্তির্ভবতি| গুরুমধুরাদিভিশ্চ মেদস্সাদৃশ্যং ভজতে| অতোঽস্য পুরুষস্য মেদ এব প্রচীযতে তেন রসেন| তথা তস্মান্মেদসশ্শেষোঽপি রসো রক্তাদিধাতুপঞ্চকপুষ্টযে স্বল্পত্বান্নালং ন পর্যাপ্তঃ| ননু চ কথং রসরক্তাভ্যামপ্রবৃদ্ধাভ্যাং মেদসো বৃদ্ধিঃ ? কথঞ্চ মেদসি বৃদ্ধেঽস্থ্যাদীনি বৃদ্ধিন্নযান্তীতি ? যত উক্তং পূর্বো ধাতুঃ পরং কুর্যাদ্ বৃদ্ধঃ ক্ষীণশ্চ তদ্বিধমিতি| তথা ধাত্বাহারাশ্চ ধাতব ইতি| তস্মাদ্যাবত্সর্বে ধাতবো ন ক্ষীণা বৃদ্ধা বা তাবদেকস্য বৃদ্ধিক্ষযৌ দুরুপপাদকাবিত্যত্রোচ্যতে| ন হ্যেষ এব পক্ষঃ যত্ পূর্বধাতূপমর্দেনানেন পরধাতুসম্ভবঃ অন্যধাতূদ্ভবঃ| অপি তু যুগপদন্নরসেন সকলধাতূনাং পরিপোষোঽপি| তন্ত্রান্তরে বক্ষ্যতে| তত্রৈব যথোক্তং বিজ্ঞাস্যতে| ভবতু নামৈবম্| যত্র তু ক্রমেণ পূর্বধাতূপমর্দনেনান্যধাতূদ্ভবস্তত্র কেবলস্য মেদসঃ কথং বৃদ্ধিরত্রাপ্যুচ্যতে| ন হি কেবলমেব মেদশ্চীযতে| অপিতু রক্তাদযোঽপি চীযন্ত এব| মেদঃ পুনঃ পূর্বকারণশক্ত্যতিশযেন বৃদ্ধং সত্ পুনরন্যধাত্বপেক্ষযা সুতরাং বর্ধত ইতি| এতদেবাহ-তুল্যেঽপীত্যাদি| অতস্তেন ধাতূনামসমত্বেন কারণেন মেদঃ স্থূলস্য শ্বাসাদীন্ জনযতি| অতিস্থূলঃ কীদৃশ উচ্যত ইত্যাহ-অথথোপচযেত্যাদি| উপচযেনাবযবসংহননেন সদৃশ উত্সাহো যস্য স যথোপচযোত্সাহঃ| ন যথোপচযোত্সাহঃ অযথোপচযোত্সাহঃ| অঙ্গৈর্মহান্ উত্সাহেন তু স্তোক ইত্যর্থঃ| চলাঃ স্ফিগাদযো যস্য স তথাবিধঃ তাদৃশঃ পুরুষোঽতিস্থূলঃ স্মৃতঃ|| ১৪||

Adhikarana atisthaulye AhArauShadhAdi (15) · Śloka 15

...........................যোজ্যং তত্রান্নং মারুতাপহম্| শ্লেষ্মমেদোহরং যচ্চ কুলত্থা যবকা যবাঃ| জূর্ণশ্যামাকমুদ্গাদ্যাঃ পানেঽরিষ্টাং মধূদকম্| মস্তু তক্রঞ্চ তীক্ষ্ণোষ্ণং রূক্ষং ছেদি চ ভেষজম্| চিন্তাব্যবাযব্যাযামশোধনাস্বপনং ভজেত্| দেহাপেক্ষী তথা রূক্ষং স্নানমুদ্বর্তনাদি চ| মধুনা ত্রিফলাং লিহ্যাদ্গুডূচীমভযাং ঘনম্| রসাঞ্জনস্য মহতঃ পঞ্চমূলস্য গুগ্গুলোঃ| শিলাহ্বস্য প্রযোগশ্চ সাগ্নিমন্থরসো হিতঃ| বিডঙ্গং নাগরং ক্ষারঃ কাললোহরজো মধু| যবামলকচূর্ণঞ্চ যোগোঽতিস্থৌল্যদোষজিত্| মদনং ত্রিফলা মুস্তা সপ্তাহ্বারিষ্টবত্সকম্| সপাঠারগ্বধং পীতমতিবৃংহণরোগজিত্| তদ্বদ্বত্সকশম্যাকদেবদারুনিশাদ্বযম্| সমুস্তপাঠাখদিরত্রিফলানিম্বগোক্ষুরম্| মদনাদীনি চালেপঃ স্নানাদিষ্বপি যোজযেত্| হিঙ্গুগোমেদকব্যোষকুষ্ঠক্রৌঞ্চাস্থিগোক্ষুরম্| এলাবৃক্ষকষড্গ্রন্থাখরাশ্বোপলভেদকম্| তক্রেণ দধিমণ্ডেন পীতং কোলরসেন বা| মূত্রকৃচ্ছ্রং কৃমীন্ মেহং স্থূলতাঞ্চ ব্যপোহতি| কৃমিঘ্নত্রিফলং তৈলসক্তুত্র্যূষণদীপ্যকৈঃ| লোহোদকাপ্লুতো মন্থঃ শস্তো বৃংহণরোগিণাম্| ব্যোষকট্বীবরাশিগ্রুবিডঙ্গাতিবিষাস্থিরাঃ| হিঙ্গুসৌবর্চলাজাজীযবানীধান্যচিত্রকাঃ| নিশে বৃহত্যৌ হপুষা পাঠা মূলঞ্চ কেম্বুকাত্| এষাং চূর্ণং মধু ঘৃতং তৈলং চ সদৃশাংশকম্| সক্তুভিঃ ষোডশগুণৈর্যুক্তং পীতং নিহন্তি তত্| অতিস্থৌল্যাদিকান্সর্বান্ রোগানন্যাংশ্চ তদ্বিধান্| হৃদ্রোগকামলাশ্বিত্রশ্বাসকাসগলগ্রহান্| বুদ্ধিমেধাস্মৃতিকরং সন্নস্যাগ্নেশ্চ দীপনম্| যোজ্যং তথা যথাব্যাধি স্বেদাসৃক্স্রাবণান্যপি||১৫||

তত্রাতিস্থূলে মারুতাপহমন্নং যোজ্যম্| তথা যচ্চান্নাদিকং শ্লেষ্মমেদোহরং তত্সর্বং যোজ্যম্| তথা কুলত্থাদযঃ| পানে ত্বরিষ্টাদীনি| ভেষজমৌষধং যত্ কিঞ্চিত্ তীক্ষ্ণত্বাদিযুক্তম্| তথাতিস্থূলো দেহমপেক্ষ্য যথোচিতাংশ্চিন্তাব্যবাযব্যাযামাদীন্ ভজেত্| অস্বপ্নং নিদ্রাপ্রতিষেধঃ তথা রূক্ষস্নানাদীন্যপি ভজেত্| তথা ত্রিফলাগুডূচ্যাদীনামন্যতমং মধুনা লিহ্যাত্| তথা রসাঞ্জনাদীনাং চ প্রযোগ অগ্নিমন্থরসসহিতোঽতিস্থূলে হিতঃ| বিডঙ্গাদিযোগঃ সর্বসমভাগোঽতিস্থৌল্যদোষজিত্| মদনাদ্যৌষধদশকং সমভাগং জলেন পীতমতিবৃংহণোদ্ভবান্ রোগান্নাশযতি| বত্সকাদি গোক্ষুরকান্তং তদ্বন্মদনাদিদশকবদতিবৃংহণরোগজিত্| তথা মদনাদীন্যনন্তরপঠিতানি ক্বাথাদিনা স্নানানুলেপোদ্ধর্ষাদিষ্বপি যোজযেত্| তথা হিঙ্গ্বাদ্যুপলভেদান্তং তক্রাদীনামন্যতমেন পীতং মূত্রকৃচ্ছ্রাদীনপোহতি| তথা কৃমিঘ্নাদ্যৌষধদশকেন সমভাগেন কৃতো লোহোদকেন শস্ত্রভাজনোষিতপানীযেনাপ্লুতো মন্থোঽতিবৃংহণোত্থরোগাণাং পথ্যঃ| ব্যোষাদীন্যৌষধানি চতুর্বিশতিঃ পরস্পরসমভাগানীত্যযমেকো ভাগঃ| তত্সমো মধুনো দ্বিতীযঃ| ঘৃতস্য তৃতীযঃ| তৈলস্য চতুর্থঃ| এষাং চতুর্ণাং ভাগানাং মিশ্রীভূতানাং ষোডশগুণা যবসক্তবঃ| অযং মন্থঃ পীতঃ সন্ অতিস্থৌল্যাদিকান্ যথাপঠিতান্ সর্বান্ রোগান্ নিহন্তি| অন্যাংশ্চ তদ্বিধান্ বৃংহণোত্থানিত্যর্থঃ| তথা হৃদ্রোগাদীন্ নিহন্তি| বুদ্ধ্যাদিকরঃ| সন্নস্য চাগ্নের্দীপন ইতি| তথা তেষু বৃংহণোত্থেষু রোগেষু যথাব্যাধি ব্যাধেঃ সাদৃশ্যেন ক্রমেণ স্বেদরক্তস্রাবাদ্যপি যোজ্যম্|

Adhikarana atili~gGitalakShaNAni atikRushAsyAyAsAdyasahatvam kRushasulaBA vyAdhayaH (16) · Śloka 16

অতিকার্শ্য ভ্রমঃ কাসস্তৃষ্ণাধিক্যমরোচকঃ| স্নেহাগ্নিনিদ্রাদৃক্শ্রোত্রশুক্রৌজঃ ক্ষুত্স্বরক্ষযঃ| বস্তিহৃন্মূর্দ্ধজঙ্ঘোরুত্রিকপার্শ্বরুজা জ্বরঃ| প্রলাপোর্ধ্বানিলগ্লানিচ্ছর্দিপর্বাস্থিভেদনম্| বর্চোমূত্রগ্রহাদ্যাশ্চ জাযন্তেঽতিবিলঙ্ঘনাত্| অতিকার্শ্যেন নাযাসবর্ষশীতোষ্ণতৃট্ক্ষুধঃ| তৃপ্তিব্যাধ্যৌষধমদান্ সহতেঽল্পবলত্বতঃ| শ্বাসকাসক্ষযপ্লীহগুল্মার্শোবহ্নিমন্দতাঃ| কৃশং প্রাযশ্চ ধাবন্তি রক্তপিত্তানিলামযাঃ||১৬||

অতিলঙ্ঘনোত্থা অতিকার্শ্যাদযো বক্ষ্যন্ত ইত্যুক্তমিত্যুচ্যতে-অতিকার্শ্যমিত্যাদি| স্নেহাদীনাং ক্ষযশব্দেন সমাসঃ| বস্ত্যাদীনাং রুজাশব্দেন| মূত্রগ্রহাদ্যাশ্চেত্যত্রাদিগ্রহণেন নানাবিধানাং বাতজানাং রোগাণাং গ্রহণম্| এতে হ্যতিকার্শ্যাদযোঽতিলঙ্ঘনাজ্জাযন্তে| তত্র চাতিকার্শ্যস্য প্রাধান্যাত্ পৃথগুক্তিঃ| এতেনাতি কার্শ্যেন হেতুনা যদা ত্ববলত্বং ততোঽল্পবলত্বতো হেতোরাযাসাদীন্ পুরুষো ন সহতে| মদশব্দস্য ব্যাধ্যৌষধাভ্যাং সমাসঃ| তথা কৃশং পুরুষং শ্বাসাদযোঽন্যে চ রক্তপিত্তানিলজা আমযা ধাবন্তি| তমতিকৃশমাযান্তীত্যর্থঃ|| ১৬||

Adhikarana sthaulyAtkArshyasya varatvantatra hetushca (17) · Śloka 17

কার্শ্যমেব বরং স্থৌল্যান্ন হি স্থূলস্য ভেষজম্| বৃংহণং ল~ঘ্গনং নালমতিমেদোঽগ্নিবাতজিত্| মধুরস্নিগ্ধসৌহিত্যৈর্যত্ সৌখ্যেন চ নশ্যতি| ক্রশিমা স্থবিমাত্যন্তবিপরীতনিষেবণৈঃ||১৭||

যদ্যপ্যযং কার্শ্যাখ্যো মহান্ রোগস্তথাপ্যতিস্থৌল্যাত্ কার্শ্যমেব বরং কুত এবমিত্যাহ-ন হীত্যাদি| অতিস্থূলস্য হি ভেষজমতিমেদসোঽগ্নের্বাযোশ্চ নাশনং যত্তত্ সাধু| তথাবিধং চাতিমেদোঽগ্নিবাতজিদ্ ভেষজমতিস্থূলসাধনং ন বৃংহণং পর্যাপ্তং নাপি লঙ্ঘনম্| তেনৈতদুক্তং ভবতি-অতিস্থূলায যদি বৃংহণং দীযতে তদগ্নিবাতজিদ্ভবতি| ন তু মেদোজিদথ লঙ্ঘনং তদ্ধি মেদোজিদ্ভবতি ন ত্বগ্নিবাতজিদিতি| তস্মাদতিস্থৌল্যস্য দুশ্চিকিত্স্যত্বাত্ কার্শ্যমেব বরম্| তথাযমপরঃ কার্শ্যবরত্বে হেতুঃ| যন্মধুরাদিভিঃ প্রিযসুখৈঃ ক্রশিমা নশ্যতি| স্থবিমাত্যন্তং তচ্চিত্তদেহবিপরীতানাং ব্যাযামচিন্তাদীনাং নিষেবণৈরিতি|| ১৭||

Adhikarana atikRushalakShaNam (18) · Śloka 18

শুষ্কস্ফিগুদরগ্রীবঃ স্থূলপর্বা সিরা ততঃ| উচ্যতেঽতিকৃশঃ...............................||১৮||

শুষ্কস্ফিগিত্যাদিনাতিকৃশলক্ষণমুচ্যতে| এবংবিধো হি পুরুষোঽতিকৃশ ইত্যুচ্যতে|| ১৮||

Adhikarana atikArshye BeShajam prakRuShTabRuMhaNopAyAH (19) · Śloka 19

.....................তত্র প্রাগুক্তো বৃংহণো বিধিঃ| অশ্বগন্ধাবিদার্যাদ্যা বৃষ্যাশ্চৌষধযো হিতাঃ| অচিন্তযা হর্ষণেন ধ্রুবং সন্তর্পণেন চ| স্বপ্নপ্রসঙ্গাচ্চ কৃশো বরাহ ইব পুষ্যতি||১৯||

তত্রাতিকৃশে স বিধির্হিতো যঃ পূর্বস্মিন্নধ্যাযে বৃংহণত্বেনোক্তঃ| তথাশ্বগন্ধাদ্যাশ্চ মধুরবৃংহণা নানাবিধৈঃ প্রযোগৈরৌষধযো হিতাঃ| তথাতিকৃশোঽচিন্তাপ্রভৃতিভিঃ কারণৈঃ পুষ্যতি পুষ্টিং প্রাপ্নোতি| তথা স্বপ্নপ্রসঙ্গেন চ পুষ্যতি বরাহ ইব| যথা বরাহঃ সূকরঃ স্বপ্নপ্রসঙ্গাত্ পুষ্যত্যেবং কৃশোঽপীতি|| ১৯||

Adhikarana cirakShINasadyaHkShINayorupakrame visheShaH (20) · Śloka 20

লঙ্ঘনোত্থেষু রোগেষু শেষেষ্বপ্যুপকল্পযেত্| যত্তদাত্বে সমর্থং স্যাদ্যচ্চাভ্যাসেন পুষ্টযে| সদ্যঃ ক্ষীণো যতঃ সদ্যো বৃংহণেনোপচীযতে| চিরং ক্রমেণ চ ক্ষীণস্তদভ্যাসেন তত্র চ| বৃংহণং তত্র মাত্রাগ্নিবলাদীন্বীক্ষ্য যোজযেত্||২০||

অতিকার্শ্যস্য চিকিত্সামুক্ত্বা অন্যেষ্বপি লঙ্ঘনোত্থেষু বিবক্ষুরিদমাহ-লঙ্ঘনোত্থেষ্বিত্যাদি| শেষেষ্বপি লঙ্ঘনোত্থেষু কার্শ্যাদবশিষ্টেষু ভ্রমকাসাদিষূপকল্পযেত্| কিমিত্যাহ-যত্তদাত্ব ইত্যাদি| তদাত্বে তত্কালং প্রযোগানন্তর্যেণৈব যদ্রোগোপশমনে সমর্থং স্যাত্ যচ্চৌষধাদিকমভ্যাসেন পুষ্টযে ভবতি তদপ্যুপকল্পযেদিতি সম্বন্ধঃ| কুতো দ্বিবিধমুপকল্পযেদিত্যাহ-যতঃ সদ্যঃ ক্ষীণঃ সদ্য এবোপযুক্তেন বৃংহণেনোপচযং প্রাপ্নোতি| যঃ পুনঃ চিরং বহুকালং ক্রমেণ চ ক্ষীণঃ স তদভ্যাসেন বৃংহণাভ্যাসেনোপচীযত ইত্যর্থঃ| তস্মাদুভযমপি যোজযেত্|| ২০||

Adhikarana bRuMhaNe mAMsasya rasakShIrAdInA~jca prayogaH (21) · Śloka 21

ন হি মাংসসমং কিঞ্চিদন্যদ্ দেহবৃহত্ত্বকৃত্| মাংসাদমাংসং মাংসেন সম্ভৃতত্বাদ্ বিশেষতঃ| ক্রব্যান্মাংসরসাংস্তস্মাদ্দকলাবণিকান্ লঘূন্| বেশবারীকৃতৈস্তদ্বজ্জাঙ্গলৈশ্চ কৃতাকৃতান্| রসাংস্তথা চ ক্ষীরাদীন্ তর্পণাংস্তর্পণান্ পুনঃ| যুঞ্জ্যাত্কৃশানাং জ্বরিণাং কাসিনাং মূত্রকৃচ্ছ্রিণাম্| তৃষ্যতামূর্ধ্ববাতানাং মূঢমারুতবর্চসাম্||২১||

মাংসেন সমং চান্যন্ন কিঞ্চিদ্ দেহস্য বৃংহণত্বকৃত্সম্ভবতি| মাংসাদানামামিষভুজাং প্রাণিনাং সিংহাদীনাং সম্বন্ধিঃ মাংসং মৃগাদিমাংসেন সম্ভৃতত্বাদ্বিশেষতো বৃংহণত্বকৃদিতি সম্বন্ধঃ| যস্মাদ্যত এবমুক্তমতঃ ক্রব্যান্মাংসানাং রসান্ দকলাবণিকান্ ল~ঘ্ঘনোত্থেষু রোগেষু যুঞ্জ্যাত্| তথা জাঙ্গলৈরপি মাংসৈর্বেশবারীকৃতৈরতিসূক্ষ্মচ্ছিন্নৈঃ কৃতানকৃতাংশ্চ রসান্ যুঞ্জ্যাত্| তথা ক্ষীরাদীনপি সন্তর্পণান্ যুঞ্জ্যাত্| আদিগ্রহণেনেক্ষুরসাদীনাং গ্রহণম্| তথা কৃশানাং জ্বরিতাদীনাং তর্পণাদীন্যপি যুঞ্জ্যাত্| অনেন হি তর্পণশব্দেন সক্তব উচ্যন্তে|| ২১||

Adhikarana santarpaNAH manthayogAH (22) · Śloka 22

সমৈঃ কৃষ্ণাসিতাতৈলক্ষৌদ্রাদ্যৈদ্বর্যংশতর্পণৈঃ| মন্থস্তদ্বত্সিতাক্ষৌদ্রমদিরাসক্তুযোজিতঃ| ফাণিতং সক্তবঃ সর্পির্দধিমণ্ডোঽম্লকাঞ্জিকম্| তর্পণং মূত্রকৃচ্ছ্রঘ্নমুদাবর্ত্তহরং পরম্| মন্থঃ খর্জূরমৃদ্বীকাবৃক্ষাম্লাম্লীকদাডিমৈঃ| পরূষকৈঃ সামলকৈঃ সদ্যস্তৃষ্ণাদিরোগজিত্| স্বাদুরম্লো জলকৃতঃ সস্নেহো রূক্ষ এব বা| সদ্যঃ সন্তর্পণো মন্থঃ স্থৈর্যবর্ণবলপ্রদঃ||২২||

তত্র কৃষ্ণাদিভিঃ সমভাগৈর্মিশ্রিতৈর্দ্বিগুণতর্পণৈঃ কৃতো মন্থঃ পূর্বেষু রোগেষু হিতঃ| তথা সিতাদিভির্মন্থস্তদ্বদ্বিজ্ঞেযঃ যথোপপাদঃ কৃতঃ সন্ তথা ফাণিতাদিভিঃ কৃতঃ প্রযোগঃ পরমত্যর্থং তর্পণো মূত্রকৃচ্ছ্রঘ্ন উদাবর্তহরশ্চ| তথা খর্জূরাদিভিঃ সমভাগৈঃ কৃতো মন্থঃ সদ্যস্তৃষ্ণাদিরোগজিত্| তথা যঃ কশ্চিজ্জলকৃতো মন্থঃ স্বাদুর্বাঽম্লো বা সস্নেহো রূক্ষোঽপিবা স সর্বো মন্থঃ সদ্য এব সন্তর্পণো দেহস্থৈর্যাদিপ্রদশ্চ|| ২২||

Adhikarana sthUlakRushayorAhAraH (23) · Śloka 23

গুরু চাতর্পণং স্থূলে বিপরীতং হিতং কৃশে| যবগোধূমমুভযোস্তদ্যোগ্যাহিতকল্পনম্||২৩||

অনন্তরমধ্যাযার্থমুপসংহরতি| স্থূলে পুরুষে গুর্বপতর্পণঞ্চাহারং যোজ্যম্| কৃশে ত্বেতদ্বিপরীতং লঘু সন্তর্পণঞ্চেত্যর্থঃ| তথৈবোভযোরপি কৃশস্থূলযোর্যবগোধূমং হিতম্| কিম্ভূতম্| তদ্যোগ্যাহিতকল্পনম্| তদ্যোগ্যা কৃশস্থূলযোগ্যা আহিতা উত্পাদিতা সংস্কারাদিকা কল্পনা যস্মিন্যবগোধূমে তত্তথোক্তম্| তেনৈতদুক্তং ভবতি-যদা স্থূলায যবগোধূমং দীযতে তদা স্থূলযোগ্যযৈবাপতর্পণার্হযা কল্পনযা| যদা তু তদেব যবগোধূমং কৃশায দীযতে তদা কৃশযোগ্যযৈব সন্তর্পণযা কল্পনযেতি ব্যাধিভূতযোঃ স্থৌল্য কার্শ্যযোশ্চিকিত্সা|| ২৩||

Adhikarana sahajasthaulyakArshyayoshcikitsAtideshaH (24) · Śloka 24

স্যৌল্যকার্শ্যে প্রকৃত্যাপি স্যাতাং তত্রাঽপ্যযং বিধিঃ| সততং ব্যাধিততযা সদা যোজ্যো বিভজ্য চ||২৪||

যত্র তু পুরুষাণাং প্রকৃত্যা সহজত্বেন স্থৌল্যকার্শ্যে স্যাতাম্ তত্রাপ্যযমেবাঽনন্তরোক্তো বিধির্বিভজ্য বিকল্প্য যথোচিতং সদৈব যোজ্যঃ সততব্যাধিতত্বাদ্ধেতোঃ| তেনৈতদুক্তং ভবতি-যদ্যপি স্থৌল্যং কার্শ্যং বা কেষাঞ্চিত্ স্বভাবেনৈব ভবতি| তথাঽপি তে স্বভাবেনৈব ব্যাধিতা উচ্যন্তে| অত এব তেষামযং বিধিঃ সদা যোজ্যঃ|| ২৪||

Adhikarana mAtrayA bRuMhaNala~gGanayoH sevanaPalam (25) · Śloka 25

মাত্রাদিযুক্তে সেবেত যস্তু ল~ঘ্ঘনবৃংহণে| সমধাত্বগ্নিদেহোঽসৌ সমসংহননো ভবেত্| দৃঢেন্দ্রিযবলত্বাচ্চ ন দ্বন্দ্বৈরভিভূযতে||২৫||

তথা যঃ পুরুষো মাত্রাদিযোগেনাতিযোগাযোগং পরিরক্ষন্ বৃংহণলঙ্ঘনে সেবেত| অসৌ পুরুষঃ সমধাত্বগ্নিদেহঃ সন্ সমসংহননো ভবেত্| সমা ধাত্বাদযো যস্য স তথোক্তঃ| দেহস্য সমত্বমঙ্গানামনূনাধিকতাং, সমসংহননত্বং দেহসঙ্ঘাতসমত্বম্| ন ক্বচিত্ স্থৌল্যং নাপি কার্শ্যমিতি| স চ পুরুষো দৃঢেন্দ্রিযত্বাদ্ধেতোর্দ্বন্দ্বৈর্দুঃখৈরাতপাদিভির্নাভিভূযতে|| ২৫||

Adhikarana sarvopakramANAM la~gGanabRuMhaNayorevAntarBAvaH (26-27) · Śloka 27

দোষগত্যাতিরিচ্যন্তে গ্রাহিভেদ্যাদিভেদতঃ| উপক্রমা ন তু দ্বিত্বাদ্ভিন্না অপি গদা ইব||২৬|| ইতি শ্রীবৈদ্যপতিসিংহগুপ্তস্য সূনোর্বাগ্ভটস্য কৃতৌ অষ্টাঙ্গসংগ্রহসংহিতাযাং সূত্রস্থানে দ্বিবিধো- পক্রমণিযোনাম চতুর্বিশোঽধ্যাযঃ||২৭||

ননু বহবো গ্রাহ্যাদয উপক্রমাঃ শাস্ত্রে দৃষ্টাঃ তত্ কিমিত্যুক্তং দ্বিধৈবোপক্রম ইত্যাহ-দোষগত্যেত্যাদি| পরস্পরং ভিন্না অপ্যুপক্রমা বিলক্ষণযা দোষগত্যা হেতুভূতযা গ্রাহ্যাদিভেদাদতিরিচ্যন্তে| ন তু যথোক্তাদ্ দ্বিত্বাদতিরিচ্যন্তে| যথা গদা ব্যাধযো ভিন্না অপি সন্তো দ্বিত্বালঙ্ঘ্যবৃংহ্যাখ্যাদগ্নীষোমাত্মকত্বান্নাতিবর্তন্তে| তদ্বদুপক্রমাঃ| তেনৈতদুক্তং ভবতি- লঙ্ঘনবৃংহণে এব দোষগতিবিশেষেণ গ্রাহ্যাদিবিশেষং প্রাপ্নুত ইতি|| ২৬|| ইতি শ্রীমন্মহামহোপাধ্যাযেন্দুবিরচিতাযাম্ অষ্টাঙ্গসংগ্রহব্যাখ্যাযাং শশিলেখাযাং সূত্রস্থানে চতুর্বিংশোঽধ্যাযঃ