4. bālagrahapratiṣēdhaḥ

Adhikarana atha bAlagrahapratiShedho nAma caturtho~adhyAyaH - avataraNikA · Śloka

ಗ್ರಹಾಣಾಂ ಸ್ವರೂಪಮುಕ್ತ್ವಾ ತೇನೈವ ಕ್ರಮೇಣ ಚಿಕಿತ್ಸಾಂ ಪ್ರದರ್ಶಯಿತುಮಧ್ಯಾಯ ಆರಭ್ಯತೇ

Adhikarana pratij~jA (1) · Śloka 1

ಅಥಾತೋ ಬಾಲಗ್ರಹಪ್ರತಿಷೇಧಂ ನಾಮಾಧ್ಯಾಯಂ ವ್ಯಾಖ್ಯಾಸ್ಯಾಮಃ| ಇತಿ ಹ ಸ್ಮಾಹುರಾತ್ರೇಯಾದಯೋ ಮಹರ್ಷಯಃ||೧||

Adhikarana sAdhyagrahe sAmAnyacikitsA (2) · Śloka 2

ಗ್ರಹೇಷು ಸಾಧ್ಯೇಷು ಶಿಶುಂ ವಿವಿಕ್ತೇ ಶರಣೇ ಸ್ಥಿತಮ್| ತ್ರಿರಹ್ನಾ ಮುಷ್ಟಸಂಸಿಕ್ತೇ ಸದಾ ಸನ್ನಿಹಿತಾನಲೇ| ವಿಕೀರ್ಣಭೂತಿಕುಸುಮಬೀಜಪತ್ರಾನ್ನಸರ್ಷಪೇ| ರಕ್ಷೋಘ್ನತೈಲಜ್ವಲಿತಪ್ರದೀಪಹತಪಾಪ್ಮನಿ| ವ್ಯವಾಯಮದ್ಯಪಿಶಿತನಿವೃತ್ತಪರಿಚಾರಕೇ| ಪುರಾಣಸರ್ಪಿಷಾಭ್ಯಕ್ತಂ ಪರಿಷಿಕ್ತಂ ಸುಖಾಮ್ಬುನಾ| ಸಾಧಿತೇನ ಬಲಾನಿಮ್ಬವೈಜಯನ್ತೀನೃಪದ್ರುಮೈಃ| ಪಾರಿಭದ್ರಕಕಟ್ವಙ್ಗಜಮ್ಬೂವರಣಕತ್ತೃಣೈಃ| ಕಪೋತವಙ್ಕಾಪಾಮಾರ್ಗಪಾಟಲೀಮಧುಶಿಗ್ರುಭಿಃ| ಕಾಕಜಙ್ಘಾಮಹಾಶ್ವೇತಾಕಪಿತ್ಥಕ್ಷೀರಿಪಾದಪೈಃ| ಸಕದಮ್ಬಕರಞ್ಚೈಶ್ಚ ಧೂಪಂ ಸ್ನಾತಸ್ಯ ಚಾಚರೇತ್| ದ್ವೀಪಿವ್ಯಾಘ್ರಾಹಿಸಿಂಹರ್ಕ್ಷಚರ್ಮಭಿರ್ಘೃತಮಿಶ್ರಿತೈಃ||೨||

ಸಾಧ್ಯೇಷು ಗ್ರಹೇಷು ನ ತು ದುಃಸಾಧ್ಯೇಷು ಶಿಶುಮೇವಂ ಕುರ್ಯಾತ್| ಅಹ್ನಾ ದಿನೇನ ತ್ರೀನ್ ವಾರಾನ್ ಯದಾ ಮೃಷ್ಟಂ ಸಂಸಿಕ್ತಂ ಚ ತಸ್ಮಿನ್| ವಿವಿಕ್ತೇ ಜನಾದಿರಹಿತೇ| ಶರಣೇ ಗೃಹೇ ಸ್ಥಿತಂ ಕುರ್ಯಾತ್| ಸದಾ ಸನ್ನಿಹಿತೋಽನಲೋ ಯಸ್ಮಿನ್| ತಥಾ ವಿಕೀರ್ಣಂ ವಿಕ್ಷಿಪ್ತಂ ಭೂತ್ಯಾದಿಕಂ ಯಸ್ಮಿನ್| ಭೂತಿರ್ಭಸ್ಮ| ರಕ್ಷೋಘ್ನೈಸ್ತೈಲೈರ್ಯೇ ಜ್ವಲಿತಾ ಪ್ರದೀಪಾಸ್ತೈರ್ಹತಃ ಪಾಪ್ಮಾ ಯತ್ರ| ವ್ಯವಾಯಾದಿತೋ ನಿವೃತ್ತಾಃ ಪರಿಚಾರಿಕಾ ಯತ್ರ| ವ್ಯವಾಯೋ ಮೈಥುನಮ್| ಪುರಾಣಸರ್ಪಿಷಾಽಭ್ಯಕ್ತಂ ಸುಖಾಮ್ಬುನೋಷ್ಣೋದಕೇನ| ಪರಿಷಿಕ್ತಂ ಸ್ನಾತಮ್| ಕುರ್ಯಾದಿತಿ ಕಿರ್ಯಾಪದಮತ್ರ ಲಭ್ಯತೇ| ಅಥ ವಾ ಸ್ನಾತಸ್ಯ ಚಾಚರೇದಿತ್ಯನೇನೈವ ಚಕಾರೇಣ ಯಥಾಕಥಂ ಚಿದಾಚರೇದಿತ್ಯೇತತ್ ಕ್ರಿಯಾಪದಂ ಬೋದ್ಧವ್ಯಮ್| ಕಿಮ್ಭೂತೇನ ಸುಖಾಮ್ಬುನಾ ಆಹ-ಬಲಾದಿಭಿಃ ಕದಮ್ಬಾನ್ತೈಃ ಸಾಧಿತೇನ| ವೈಜಯನ್ತ್ಯಗ್ನಿಮನ್ಥಃ| ನೃಪದ್ರುಮ ಆರಗ್ವಧಃ| ಪಾರಿಭದ್ರಕಃ ಕಣ್ಟಕಕಿಂಶುಕಃ ಕಟ್ವಙ್ಗಃ ಸ್ಯೋನಾಕಃ| ಕತ್ತೃಣಂ ಭೂತೀಕಮ್| ಕಪೋತಪಙ್ಕಾ ಸುವರ್ಚಲಾ| ಕಾಕಜಙ್ಘಾ ಲೋಮಶಪಾದಿಕಾ| ಮಹಾಶ್ವೇತಾ ನೀಲಪುಷ್ಪೀ ಗಿರಿಕರ್ಣಿಕಾ| ಕ್ಷೀರಿಪಾದಪಾ ವಟಾದಯಃ| ಸ್ನಾತಸ್ಯ ಚ ದ್ವೀಪ್ಯಾದಿಚರ್ಮಭಿರ್ಘೃತಮಿಶ್ರಿತೈರ್ಧೂಪಮಾಚರೇತ್|| ೨||

Adhikarana sarvagrahe dhUpAH (3) · Śloka 3

ಪೂತೀದಶಾಙ್ಗಸಿದ್ಧಾರ್ಥವಚಾಭಲ್ಲಾತದೀಪ್ಯಕೈಃ| ಸಕುಷ್ಠೈಃ ಸಘೃತೈರ್ಧೂಪಃ ಸರ್ವಗ್ರಹವಿಮೋಕ್ಷಣಃ| ಸರ್ಷಪಾನಿಮ್ಬಪತ್ರಾಣಿ ಮೂಲಮಶ್ವಖುರಾದ್ವಚಾ| ಭೂರ್ಜಪತ್ರಂ ಘೃತಂ ಧೂಪಃ ಸರ್ವಗ್ರಹನಿಬರ್ಹಣಃ||೩||

ಪೂತ್ಯಾದಿಭಿರ್ಧೂಪಃ ಸರ್ವಗ್ರಹವಿಮೋಕ್ಷಣಃ| ಸರ್ಷಪಾದಿಭಿರ್ಧೂಪಃ ಸರ್ವಗ್ರಹನಿಬರ್ಹಣಃ| ಅಶ್ವಖುರಾ ಗಿರಿಕರ್ಣೀ ತತೋ ಮೂಲಮ್|| ೩||

Adhikarana anantAdighRutam (4) · Śloka 4

ಅನನ್ತಾಮ್ರಾಸ್ಥಿತಗರಂ ಮರಿಚಂ ಮಧುರೋ ಗಣಃ| ಸೃಗಾಲವಿನ್ನಾ ಮುಸ್ತಾ ಚ ಕಲ್ಕಿತೈಸ್ತೈರ್ಘೃತಂ ಪಚೇತ್| ದಶಮೂಲರಸಕ್ಷೀರಯುಕ್ತಂ ತದ್ ಗ್ರಹಜಿತ್ ಪರಮ್||೪||

ಅನನ್ತಾದಿಭಿಃ ಕಲ್ಕಿತೈರ್ದಶಮೂಲಕ್ವಾಥೇನ ಕ್ಷೀರೇಣ ಚ ಘೃತಂ ಪಾಚಯೇತ್| ತತ್ಪರಂ ಗ್ರಹಜಿತ್| ಅನನ್ತಾ ಯವಾಸಕಃ| ಸೃಗಾಲವಿನ್ನಾ ಪೃಶ್ನಿಪರ್ಣೀ|| ೪||

Adhikarana sarvagrahe rAsnAdighRutam (5) · Śloka 5

ರಾಸ್ನಾದ್ವ್ಯಂಶುಮತೀ ವಢ್ರಪಞ್ಚಮೂಲಬಲಾಘನಾತ್| ಕ್ವಾಥೇ ಸರ್ಪಿಃ ಪಚೇತ್ಪಿಷ್ಟೈಃ ಶಾರಿವಾವ್ಯೋಷಚಿತ್ರಕೈಃ| ಪಾಠಾವಿಡಙ್ಗಮಧುಕಪಯಸ್ಯಾಹಿಙ್ಗುದಾರುಭಿಃ| ಸಗ್ರನ್ಥಿಕೈಃ ಸೇನ್ದ್ರಯವೈಃ ಶಿಶೋಸ್ತತ್ಸತತಂ ಹಿತಮ್| ಸರ್ವರೋಗಗ್ರಹಹರಂ ದೀಪನಂ ಬಲವರ್ಣದಮ್||೫||

ರಾಸ್ನಾದಿಕಷಾಯೇ ಶಾರಿವಾದಿಭಿಃ ಪಿಷ್ಟೈಃ ಸರ್ಪಿರ್ವಿಪಾಚಯೇತ್| ತತಃ ಸುಬೋಧಮ್| ವಢ್ರಪಞ್ಚಮೂಲಂ ಮಹತ್ಪಞ್ಚಮೂಲಮ್|| ೫||

Adhikarana sarvagrahe sArivAdighRutAni (6) · Śloka 6

ಸಾರಿವಾಸುರಾಭಿರ್ಬ್ರಾಹ್ಮೀಶಙ್ಖಿನೀಕುಷ್ಠಸರ್ಷಪೈಃ| ವಚಾಶ್ವಗನ್ಧಾಸುರಸಾಯುಕ್ತೈಃ ಸರ್ಪಿರ್ವಿಪಾಚಯೇತ್| ತನ್ನಾಶಯೇದ್ ಗ್ರಹಾನ್ ಸರ್ವಾನ್ ಪಾನೇನಾಭ್ಯಞ್ಜನೇನ ಚ| ಯೋಜಯೇದ್ ಭೂತವಿದ್ಯಾಯಾಂ ಯಾನ್ಯುಕ್ತಾನಿ ಘೃತಾನಿ ಚ||೬||

ಸಾರಿವಾದಿಭಿಃ ಸರ್ಪಿರ್ವಿಪಾಚಯೇತ್| ತತ್ ಪಾನೇನಾಭ್ಯಞ್ಜನೇನ ಚ ಸರ್ವಾನ್ ಗ್ರಹಾನ್ ನಾಶಯೇತ್| ಯಾನಿ ಚ ಘೃತಾನಿ ವಕ್ಷ್ಯಮಾಣಾಯಾಂ ಭೂತವಿದ್ಯಾಯಾಮುಕ್ತಾನಿ ತಾನ್ಯಪಿ ಯೋಜಯೇತ್|| ೬||

Adhikarana pratisarABimantraNam (7) · Śloka 7

ಹಸ್ತಮಾತ್ರಂ ಶುಚೌ ದೇಶೇ ಗೋಮಯೇನೋಪಲೇಪಯೇತ್| ತತ್ರಾಕ್ಷತಾನಾಞ್ಚೋಕ್ಷಾಣಾಂ ಸ್ಥಾಪ್ಯಂ ಪಾತ್ರಂ ಸದಕ್ಷಿಣಮ್| ನಿರ್ಧೂಮಶ್ಚಾನಲಸ್ತೋಯಂ ಗುಗ್ಗುಲುಃ ಸರ್ಪಿರಾಹುತಿಃ| ಶುಕ್ಲಂ ಪುಷ್ಪಂ ಬಲಿರ್ಧೂಪೋ ದೂರ್ವಾ ಶ್ವೇತಾಶ್ಚ ಸರ್ಷಪಾಃ| ಪ್ರಾಙ್ಮುಖೋಽಥ ಶುಚಿರ್ವೈದ್ಯಸ್ತ್ರಿವರ್ಣಾಮಥವಾ ಸಿತಾಮ್| ಉಪವಿಷ್ಟಃ ಪ್ರತಿಸರಾಂ ಗೃಹೀತ್ವಾ ವೇಷ್ಟಯೇತ್ತಯಾ| ಭೂರ್ಜೇ ರೋಚನಯಾ ವಿದ್ಯಾಂ ಲಿಖಿತಾಮಪರಾಜಿತಾಮ್| ವಿಧಿನಾ ಸಾಧಿತಾಂ ಭೂತೈಃ ಸರ್ವೈರಪ್ಯಪರಾಜಿತಾಮ್| ಲಕ್ಷ್ಮಣಾದಿಪರೀವಾರಾಂ ನಿತ್ಯಾನುಸ್ಮೃಸೇವಿತಾಮ್| ಲಕ್ಷ್ಮಣಾಸಹದೇವಾಖ್ಯಾನಾಗದನ್ತೀಕಟಮ್ಭರಾ| ಮರ್ಕಟೀ ಕರ್ಕಟೀ ಲಮ್ಬಾ ಬೃಹತೀ ಕಣ್ಟಕಾರಿಕಾ| ಖರನಾಸಾ ಮೃಗೋರ್ವಾರುರ್ಮಹಾಶ್ವೇತಾ ಶತಾವರೀ| ಉದಙ್ಮುಖಸ್ಯ ಬಾಲಸ್ಯ ಬಧ್ನೀಯಾತ್ತಾಂ ತತೋ ಗಲೇ| ತದಭಾವೇ ದೃಢಂ ಕ್ಷೌಮಸೂತ್ರಂ ಮನ್ತ್ರಮಿದಂ ಜಪನ್||೭||

ಹಸ್ತಮಾತ್ರಮಿತ್ಯಾದಿನಾ ಪ್ರತಿಸರಾಬನ್ಧನೋಪಕರಣವಿಧಾನಂ ಸುಬೋಧಮ್| ಚೋಕ್ಷಾಣಾಂ ನಿರ್ಮಲಾನಾಮ್| ಅಥ ಪ್ರಾಙ್ಮುಖೋ ವೈದ್ಯಸ್ತ್ರಿವರ್ಣಾಂ ಸಿತರಕ್ತಪೀತಾಂ ಸಿತಾಮೇವ ವಾ ಪ್ರತಿಸರಾಂ ಕಾರ್ಪಾಸಸೂತ್ರವೇಣಿಕಾಂ ಗೃಹೀತ್ವಾ ಭೂರ್ಜಲಿಖಿತಾಮಪರಾಜಿತಾಖ್ಯಾಂ ವಿದ್ಯಾಂ ಲಕ್ಷ್ಮಣಾದ್ದ್ಯೌಷಧಿಪರಿವಾರಾಂ ನಿತ್ಯಂ ಚ ಸ್ವಾನುಸ್ಮೃತ್ಯಾ ವೈದ್ಯೇನ ಸೇವಿತಾಂ ತಯಾ ಪ್ರತಿಸರಯಾ ವೇಷ್ಟಯೇತ್| ಕಿಮ್ಭೂತಾಮಪರಾಜಿತಾಂ ಸರ್ವೈರಪಿ ಭೂತೈರ್ನ ಪರಾಜಿತಾಮ್| ಕಾಸ್ತಾ ಲಕ್ಷ್ಮಣಾದಯ ಇತ್ಯಾಹ| (ನಿ) 'ಲಕ್ಷ್ಮಣಾ ಪುತ್ರನನನೀ ರಕ್ತಬಿನ್ದುಚ್ಛದಾ ತಥಾ|' ಸಹದೇವಾ ಬಲಾ| ನಾಗದನ್ತೀ ಹಸ್ತಿದನ್ತೀ| ಕಟಮ್ಭರಾ ಗಿರಿಕರ್ಣೀ| ಮರ್ಕಟೀ ಕಪಿಕಚ್ಛೂಃ| ಸ್ವನಾಮಿಕಾ ಚ ಕರ್ಕಟೀ ಬಿಲ್ವಾದಿಃ ಲಮ್ಬಾ ಕಟುಕಾಲಾಬುನೀ| ಖರನಾಸಾಭ್ರಮ್| ಮೃಗೋರ್ವಾರುರ್ಗವಾಕ್ಷೀ| ಮಹಾಶ್ವೇತಾ ನೀಲಪುಷ್ಪೀ ಗಿರಿಕರ್ಣಿಕಾ| ತತೋಽನನ್ತರಂ ತಾಂ ವೇಷ್ಟಿತಾಂ ಬಧ್ನಾಮೀತ್ಯಾದಿಮನ್ತ್ರಂ ಜಪನ್ ವೈದ್ಯ ಉದೀಚ್ಯಭಿಮುಖಸ್ಯ ಬಾಲಸ್ಯ ಗಲೇ ಬಧ್ನೀಯಾತ್| ತಸ್ಯಾ ಅಪರಾಜಿತಾಯಾ ಅಭಾವೇ ದೃಢಂ ಕ್ಷೌಮಸೂತ್ರಂ ಬಧ್ನೀಯಾತ್| ಅನ್ಯೇ ತು ಕ್ಷೌಮಸೂತ್ರಸ್ಯೈವ ಮನ್ತ್ರಂ ವದನ್ತಿ|| ೭||

Adhikarana pratisarAbandhanamantraH (8) · Śloka 8

ಬಧ್ನಾಮ್ಯಹಂ ಪ್ರತಿಸರಾಂ ನಮಸ್ಕೃತ್ವಾ ಸ್ವಯಮ್ಭುವೇ| ಬಾಲಾನಾಂ ರಕ್ಷಣಾರ್ಥಾಯ ಶಿವಾಂ ಪೂರ್ವರ್ಷಿನಿರ್ಮಿತಾಮ್| ಇನ್ದ್ರೋಽನುಮನ್ಯತಾಂ ತುಭ್ಯಂ ಯೇ ಚ ತಸ್ಯಾನುಚಾರಿಣಃ| ವಜ್ರಾಶನಿಧರಾ ಭೂತಾ ಮೇಘವೃನ್ದಾನುಸಾರಿಣಃ| ಐರಾವತಸ್ಕನ್ಧಗತಂ ಯೇಽನುಯಾನ್ತಿ ಪುರನ್ದರಮ್| ಯಮೋ ವೈವಸ್ವತೋ ರಾಜಾ ಯೇ ಚ ತಸ್ಯಾನುಚಾರಿಣಃ| ಮೇಷಸೂಕರಸಿಂಹೋಷ್ಟ್ರಖರವಾಜಿಸಮಾನನಾಃ| ಕಾಲಾ ಕಾಲಾಯಸೈಃ ಪಾಶೈಃ ಸ್ತಬ್ಧಾಕ್ಷಾ ಭ್ರುಕುಟೀಮುಖಾಃ| ಶಕ್ತಿಮುದ್ಗರಹಸ್ತಾಶ್ಚ ಖಡ್ಗಪಾಶಧರಾಶ್ಚ ಯೇ| ಪಾಶಭೃದ್ವರುಣೋ ರಾಜಾ ತೋಯಭೂಃ ಸಾಗರಾಲಯಃ| ಶಾರದಾಭ್ರಘನಾಕಾರಾ ಯೇ ಚ ತಸ್ಯಾನುಚಾರಿಣಃ| ಮಹೋರ್ಮಿಮನ್ತಂ ವೇಗೇನ ಕ್ಷೋಭಯನ್ತಿ ಸರಿತ್ಪತಿಮ್| ಧನಾಧಿಪೋ ವೈಶ್ರವಣಃ ಸರ್ವಯಕ್ಷಾಧಿಪೋ ವಿಭುಃ| ನಾನಾಕಾರಾಶ್ಚ ಯೇ ಭೂತಾಸ್ತಸ್ಯೈವಾನುಚರಾಃ ಸದಾ| ಆದಿತ್ಯಾ ವಸವೋ ರುದ್ರಾ ಮರುತಶ್ಚಾಶ್ವಿನಾವಪಿ| ಏತೇ ಸರ್ವೇಽನುಮನ್ಯನ್ತಾಮಿಮಾಂ ಪ್ರತಿಸರಕ್ರಿಯಾಮ್| ದೀರ್ಘಮಾಯುರರೋಗಂ ಚ ತವ ದಾಸ್ಯನ್ತಿ ಸ್ವಸ್ತಿ ತೇ| ಸ್ವಸ್ತಿ ತೇ ಭಗವಾನ್ ಬ್ರಹ್ಮಾ ಸ್ವಸ್ತಿ ನಾರದಪರ್ವತೌ| ಸ್ವಸ್ತಿ ವೇದಾಶ್ಚ ಯಜ್ಞಾಶ್ಚ ಅಗ್ನೀಷೋಮೌ ಚ ಸ್ವಸ್ತಿ ತೇ| ಸ್ವಸ್ತಿ ತೇ ಶ್ರೀರ್ಧೃತಿಃ ಕೀರ್ತಿರ್ಲಕ್ಷ್ಮೀರ್ಮೇಧಾಕ್ಷಮಾದ್ಯುತಿಃ| ಸ್ವಸ್ತಿ ತುಷ್ಟಿಶ್ಚ ಪುಷ್ಟಿಶ್ಚ ವಪುರ್ಹ್ರೀರ್ಬುದ್ಧಿರೇವ ಚ| ಸ್ವಸ್ತಿ ರುದ್ರೋ ವಿಶಾಖಶ್ಚ ಸ್ಕನ್ದಃ ಶಕ್ತಿಧರಶ್ಚ ತೇ| ಸ್ವಸ್ತಿ ಧಾತಾ ವಿಧಾತಾ ಚ ಸುಪರ್ಣಶ್ಚ ಮಹಾಬಲಃ| ಸ್ವಸ್ತಿ ದೇವಾಶ್ಚ ಯಕ್ಷಾಶ್ಚ ಮಾ ಚ ತೇ ಪಾಪಮಾಗತಮ್| ದುರ್ವ್ಯಾಹೃತಾನಿ ದುಃಸ್ವಪ್ನಂ ಮನಸಾ ಚಿನ್ತಿತಾನಿ ಚ| ದುಷ್ಟಾದೀನಾಂ ಭಯಕೃತೋ ವಾಚಃ ಪ್ರತಿಹತಾ ಮಯಾ| ರಕ್ಷಾ ಪ್ರತಿಸರಾ ತುಭ್ಯಂ ಬದ್ಧೇಯಂ ಪಾಪಘಾತಿನೀ| ನಿರ್ವೃತಸ್ತ್ವಂ ನಿರುದ್ವೇಗೋ ಜೀವ ವರ್ಷಶತಂ ಸುಖೀ||೮||

ಬಧ್ನಾಮೀತ್ಯಾದಿಭಿಶ್ಚತುರ್ದಶಭಿಃ ಶ್ಲೋಕೈರ್ಮನ್ತ್ರೋ ನಿಗದವ್ಯಾಖ್ಯಾತಃ ಕಿಞ್ಚಿತ್ ಪ್ರದರ್ಶ್ಯತೇ| ಸ್ವಯಮ್ಭುವೇ ಬ್ರಹ್ಮಣೇ ನಮಸ್ಕೃತ್ವಾ ಪ್ರತಿಸರಾಂ ಬಧ್ನಾಮಿ ಬಾಲಾನಾಂ ರಕ್ಷಣಾಯ| ಕಿಮ್ಭೂತಾಮಾಹ ಶಿವಾಂ ಶ್ರೇಯಸ್ಕರೀಂ ಪೂರ್ವರ್ಷಿನಿರ್ಮಿತಾಮ್| ಹೇ ಬಾಲ! ತುಭ್ಯಂ ಪ್ರತಿಸರಾಮಿನ್ದ್ರೋಽನುಮನ್ಯತಾಮಙ್ಗೀಕರೋತು| ವಜ್ರಾಶನಿಧರತ್ವಾದಿಗುಣಾಶ್ಚ ತಸ್ಯೇನ್ದ್ರಸ್ಯಾನುಚಾರಿಣೋ ಯೇ ಭೂತಾ ಐರಾವತಸ್ಕನ್ಧಗತಂ ಪುರನ್ದರಮಿನ್ದ್ರಮನುಯಾನ್ತಿ| ಯಮೋಽನುಮನ್ಯತಾಂ ಯೇ ಚ ತದನುಚರಾ ಮೇಷಾದ್ಯಾನನಾಃ ಕೃಷ್ಣಾದಿರೂಪಾಶ್ಚ| ವಾರುಣೋಽನುಮನ್ಯತಾಂ ತದನುಚರಾಶ್ಚ| ಸಾಗರ ಆಲಯೋ ಯಸ್ಯ| ಮಹೋರ್ಮೀತ್ಯಾದಿ ವರುಣಾನುಚರವಿಶೇಷಣಮ್| ಧನಾಧಿಪಶ್ಚ ತದನುಚರಾಶ್ಚ| ಆದಿತ್ಯಾಶ್ಚ| ಇತಿ ಸರ್ವೇ ಇಮಾಂ ಪ್ರತಿಸರಕ್ರಿಯಾಮನುಮನ್ಯ-ತಾಮ್| ತವ ಶಿಶೋಸ್ತೇ ದೀರ್ಘಮಾಯುರರೋಗಂ ಚ ದಾಸ್ಯನ್ತಿ| ರವಸ್ತೀತ್ಯಾದ್ಯಾಶೀಃ ಪದಮ್| ತೇ ಶಿಶೋಃ ಪಾಪಂ ದುರ್ವ್ಯಾಹೃತಾದಿಕಂ ಚ ಮಾಗಮತ್| ದುಷ್ಟಾದೀನಾಂ ವಾಚೋ ಭಯಙ್ಕರಾ ಮಯಾ ಪ್ರತಿಹತಾಃ| ಇಯಂ ಚ ಪಾಪಘಾತಿನೀ ರಕ್ಷಾ ಪ್ರತಿಸರಾ ತವ ಬದ್ಧಾ| ಅನಯಾ ಚ ತ್ವಂ ನಿರ್ವೃತೋ ನಿರುದ್ವೇಗಶ್ಚ ಸುಖೀ ವರ್ಷಶತಂ ಜೀವ|| ೮||

Adhikarana balivitaraNam (9) · Śloka 9

ಅಪೂಪಪೂಪಸಂಯಾವಸ್ವಸ್ತಿಕಾಲೋಪಿಕಾದಯಃ| ಪಾಯಸೋ ಮಿಶ್ರಕಃ ಸಿದ್ಧೋ ಗುಡಪೂರೋ ಹರಿದ್ರಕಃ| ಕೃಸರೋ ಯಾವಕಃ ಕ್ಷೌದ್ರಂ ಪಲಲಂ ಲವಣಂ ಹವಿಃ| ದಧಿಕುಲ್ಮಾಷನಿಷ್ಪಾವೋ ರಕ್ತೋ ಭೂತೌದನಃ ಪಯಃ| ಪಕ್ವಾಮಮಾಂಸರುಧಿರಮತ್ಸ್ಯಸಕ್ತುಸುರಾಸವಾಃ| ಗನ್ಧಂ ಮಾಲ್ಯಂ ಫಲಂ ಹೇಮ ಧೂಪಃ ಸಪುರಕುನ್ದುರುಃ| ಸುರಸಾರ್ಜಕನಿರ್ಗುಣ್ಡೀಕುಸುಮಂ ಚ ಸಪಲ್ಲವಮ್| ಬಲಿಃ ಸುಶಸ್ತೈರ್ದೇಯಃ ಸ್ಯಾದ್ಭವನಸ್ಯ ಚತುರ್ದಿಶಮ್| ಚತುಷ್ಕಚೈತ್ಯತ್ರಿಪಥದೇವಾಯತನಗೋಪುರೇ| ರೇಖಾವೃಕ್ಷೋದಪಾನೇ ಚ ಸನ್ಧ್ಯಯೋರ್ದೀಪವಾನ್ ನಿಶಿ||೯||

ಬಾಲನಿವಾಸಭವನಸ್ಯ ಚತುರ್ದಿಶಮಪೂಪಾದಿಕಶ್ಚ ಬಲಿರ್ದೇಯಃ| ಅಪೂಪಾ ಮಣ್ಡಕಾಃ| ತ ಏವ ಸಗುಡಾಃ ಸ್ನೇಹಸಿದ್ಧಾಃ ಪೂಪಾಃ| ಸಂಯಾವೋ ಯವೌದನಃ| ಸ್ವಸ್ತಿಕಾಃ ಸ್ವಸ್ತಿಕಾಕೃತಯಃ ಪಿಷ್ಟವಿಕಾರಾಃ| ಲೋಪಿಕಾಃ ಸಪೂರಾಃ ಪಿಷ್ಟಸ್ವಿನ್ನಾಃ| ಮಿಶ್ರಕಸ್ತಣ್ಡುಲಾವರಾನ್ನೌದನಃ| ಸಿದ್ಧಃ ಸಿದ್ಧೌದನಃ| ಗುಡಪೂರಃ ಪ್ರಸಿದ್ಧಃ| ಹರಿದ್ರಕಃ ಪೀತಭಕ್ಷಃ| ಹವಿರ್ಘೃತಮ್| ಪಲಲಂ ತಿಲಕಲ್ಕಃ| ರಕ್ತೌದನೋ ರಕ್ತಮಿಶ್ರೋ ಭೂತೌದನಃ| ಭೂತೌದನೋ ಮಾಂಸಮಿಶ್ರಃ| ಚತುಷ್ಕಾದಿಷು ಚ ಬಲಿರ್ದೇಯಃ| ಚತುಷ್ಕಂ ಚತುಃಶಾಲಮ್| ರೇಖಾಮಣ್ಡಲಂ ಮನ್ಯೇ| ಉದಪಾನಂ ಕೂಪಸರಃ| ನಿಶಿ ದೀಪವಾನ್ ಬಲಿರ್ದೇಯಃ||೯||

Adhikarana maNDalavidhAnaM balimantrashca (10) · Śloka 10

ಅಥಾಪತಿತಗೋವರ್ಚಃ ಪ್ರಲಿಪ್ತೇ ದರ್ಭಾಸಂಸ್ತೃತೇ| ವೃತ್ತೇ ವಾ ಚತುರಸ್ರೇ ವಾ ಮಣ್ಡಲೇ ಕುಸುಮೋಜ್ಜ್ವಲೇ| ನಾನಾಗ್ರಹಪರೀವಾರಂ ಭಿಷಗ್ಭೂತಪತಿಂ ಲಿಖೇತ್| ತಂ ಪ್ರತಿಪ್ರಾಙ್ಮುಖೋ ವಿದ್ಯಾಂ ಪಠನ್ನುಪಹರೇದ್ಬಲಿಮ್| ನಮೋ ವಿಮಾರಕಸ್ಯ| ನಮಃ ಕುಮಾರಙ್ಗಾಯ| ನಮಃ ಸಪ್ತಾನಾಂ ಮಾತೄಣಾಮ್| ನಮಃ ಸ್ಕನ್ದಾಯ| ಏಷ ಪರಿಗ್ರಹಮನ್ತ್ರಃ| ಮಾತೄಣಾಮಾವಾಹನಂ ಚ| ಹಿಲಿಹಿಲಿನಿಮಾಪಟಲಿನಿ ಸ್ವಾಹಾ| ಅನೇನ ಸಪ್ತಕೃತ್ವಃ ಪರಿಜಪಿತೇನ ಪಾನೀಯಚುಲುಕೇನಾತ್ಮಾಭ್ಯುಕ್ಷಯಿತವ್ಯಃ| ಏವಮಾತ್ಮರಕ್ಷಾ ಕೃತಾ ಭವತಿ||೧೦||

ಅಥೇತ್ಯಾದಿನಾ ಮಣ್ಡಲವಿಧಾನಮ್| ಅಪತಿತಗೋವರ್ಚೋ ಯತ್ಪತದೇವ ಗೋರ್ಗೃಹೀತಮ್| ವೃತ್ತಂ ವರ್ತುಲಂ ಮಣ್ಡಲಮ್| ಚತುರಸ್ರಂ ಚತುಷ್ಕೋಣಮ್| ಭೂತಪತಿರ್ಭಗವಾನ್ ಮಹಾದೇವಃ| ತಂ ಮಣ್ಡಲೇ ಚಿತ್ರಕರ್ಮಣಾ ಲಿಖೇತ್| ತಂ ಪ್ರತಿ ಪ್ರಾಙ್ಮುಖ ಇತ್ಯರ್ಥಃ| ನಮ ಇತ್ಯಾದಿಕಾಂ ವಿದ್ಯಾಂ ಪಠನ್ ತಸ್ಮೈ ಭಗವತೇ ನಾನಾವಿಧಂ ಬಲಿಮುಪಹರೇತ್| ನಮ ಇತ್ಯಾದಿ ಬಲಿಪರಿಗ್ರಹಮನ್ತ್ರಃ| ಏವಮೇವ ಮಾತೃಣಾಮಾವಾಹನಮಾಹ್ವಾನಮ್| ಹಿಲ್ಯಾದಿಕೇನ ಸಪ್ತವಾರಾನ್ ಯತ್ಪರಿಜಪಿತಂ ಪಾನೀಯಚುಲುಕಂ ತೇನಾತ್ಮಾಭ್ಯುಕ್ಷಯಿತವ್ಯಃ| ಅಭ್ಯುಕ್ಷಣಂ ಸಮನ್ತಾದ್ಬಿನ್ದುಭಿಃ ಸೇಚನಮ್| ಅನೇನಾಭ್ಯುಕ್ಷಣೇನಾತ್ಮನೋ ರಕ್ಷ ಕೃತಾ ಭವತಿ|| ೧೦||

Adhikarana grahasannidhAyakaH mantraH (11) · Śloka 11

ಗ್ರಹಾಣಾಂ ಸನ್ನಿಧಾನಾಯ ಬಲೇಶ್ಚ ಪ್ರತಿಪತ್ತಯೇ| ಸತ್ಯಸನ್ಧಾನಸಂಯುಕ್ತಮಿಮಂ ಮನ್ತ್ರಂ ಪಠೇದನು| ಪ್ರಜಾಪತೌ ಚ ಯತ್ಸತ್ಯಂ ಯತ್ಸತ್ಯಮಮರೇಶ್ವರೇ| ಧರ್ಮರಾಜೇ ಚ ಯತ್ಸತ್ಯಂ ಯಚ್ಚ ಸತ್ಯಂ ಜಲಾಧಿಪೇ| ಯತ್ಸತ್ಯಮಗ್ನಿಹೋತ್ರೇಷು ಸತ್ಯಂ ಯಚ್ಛ್ರೋತ್ರಿಯೇಷು ಚ| ಪತಿವ್ರತಾಸು ಯತ್ಸತ್ಯಮೀಶ್ವರೇ ಚ ಮಹಾತ್ಮನಿ| ಏತೈಸ್ತು ಸತ್ಯಸಮಯೈರ್ಗುಹ್ಯಕಾಃ ಸತ್ಯವಾದಿನಃ| ದರ್ಶಯಧ್ವಂ ಸ್ವರೂಪಾಣಿ ಸತ್ಯಂ ರಕ್ಷತು ಸರ್ವತಃ| ಆಮನ್ತ್ರಿತಾ ಮಯಾ ಸೌಮ್ಯಾಃ ಸೌಮ್ಯರೂಪಾಃ ಪ್ರತೀಚ್ಛತ| ಬಲಿಂ ಚೋಪಹೃತಂ ಸರ್ವಂ ಸರ್ವೇ ಕೌಮಾರಕಾ ಗ್ರಹಾಃ| ದರ್ಶಯಧ್ವಂ ಸ್ವರೂಪಾಣಿ ಬಲಿಶ್ಚ ಪ್ರತಿಗೃಹ್ಯತಾಮ್||೧೧||

ಅನನ್ತರಂ ಪ್ರಜಾಪತಾವಿತ್ಯಾದಿಮನ್ತ್ರಂ ಪಠೇತ್| ಕಿಮರ್ಥಮಿತ್ಯಾಹ ಗ್ರಹಾಣಾಂ ಸನ್ನಿಧಾನಂ ಕರ್ತುಂ ತೇಷಾಮೇವ ಚ ಬಲೇಃ ಪ್ರತಿಪತ್ತ್ಯರ್ಥಂ ಚ| ಕಿಮ್ಭೂತಂ ಮನ್ತ್ರಮಾಹ| ಸತ್ಯಸನ್ಧಾನಸಂಯುತಮ್| ಏವಂ ಹೀಷ್ಟಸಿದ್ಧಿರ್ಭವತಿ| ಪಞ್ಚಭಿಃ ಶ್ಲೋಕೈರ್ಮನ್ತ್ರಃ| ಏತೈಃ ಸತ್ಯೈರ್ಗುಹ್ಯಕಾ ಭೂತವಿಶೇಷಾಃ| ಸತ್ಯವಾದಿನಃ ಸ್ವರೂಪಾಣಿ ದರ್ಶಯಧ್ವಂ ಯೇ ಮಯಾ ಅಭಿಮನ್ತ್ರಿತಾಃ| ಸತ್ಯಂ ರಕ್ಷತ ಬಲಿಂ ಚ ಪ್ರತೀಚ್ಛತ ಮಯೋಪಹ್ವತಮ್| ಕೌಮಾರಕಗ್ರಹಾಶ್ಚ ಸರ್ವೇ ಸ್ವರೂಪಾಣಿ ದರ್ಶಯಧ್ವಂ ಬಲಿಶ್ಚ ಪ್ರತಿಗೃಹ್ಯತಾಮ್|| ೧೧||

Adhikarana kulavidyApAThaH (12) · Śloka 12

ತತಶ್ಚಾನು ಪಠೇದೇನಾಂ ಕುಲವಿದ್ಯಾಂ ಸಮಾಹಿತಃ| ಔಲಾ ನೀಲಾ ಖಲಾ ಕಾಲಾ ನಕುಲಾ ಗ್ರಹಕಾರಿಕಾ| ಸೇನಾ ಸುಸೇನಾ ಮಾತಾ ಚ ಮಹಾಸೇನಾ ಯಶಸ್ವಿನೀ| ಕೃತಮಾಲಾ ಕ್ಷತಶಿರಾ ಏತಾಸ್ತು ಗ್ರಹಮಾತರಃ| ಕುಮಾರವಚನಾಚ್ಛೀಘ್ರಂ ಪ್ರಮುಞ್ಚನ್ತು ಶಿಶುನ್ತ್ವಿಮಮ್| ಕಾಲಕಲ್ಪಾ ಜ್ವಲಚ್ಛಕ್ತಿಃ ಕಿಙ್ಕಿಣೀಜಾಲಭೂಷಿತಾ| ಕುಮಾರವಚನಾದ್ ದೂತೀ ಸಮ್ಪ್ರಾಪ್ತಾ ಮುಚ್ಯತಾಂ ಶಿಶುಃ| ಪತಾಕಾ ಕುಕ್ಕುಟಃ ಛತ್ರಂ ಘಣ್ಟಾವರ್ಹಧರಃ ಶಿಖೀ| ಶರಸ್ತಮ್ಭಶ್ಚ ತೇ ಮುದ್ರಾ ಮುಚ್ಯತಾಂ ಮಾತರಃ ಶಿಶುಃ| ಗನ್ಧಂ ಧೂಪಂ ಚ ಮಾಲ್ಯಂ ಚ ಕುಮಾರಸ್ತೇ ಪ್ರಯಚ್ಛತಿ| ನ ಸ್ಥಾತವ್ಯಂ ತದಾಘ್ರಾಯ ಸ್ವಾಂ ಗತಿಂ ಗಚ್ಛ ಮಾ ಚಿರಮ್| ಧಾತ್ರ್ಯಾಃ ಸರ್ವಾಃ ಕುಮಾರಸ್ಯ ಸಙ್ಗತಾ ಗನ್ಧಮಾದನೇ| ರಕ್ತಧ್ವಜಪತಾಕಸ್ಯ ರಕ್ತಾಂಶುಕನಿವಾಸಿನಃ| ಕುಮಾರಸ್ಯಾಲಯಂ ತತ್ರ ಯಾತ ಬಾಲಂ ವಿಮುಞ್ಚತ| ಷಣ್ಮುಖೋ ದ್ವಾದಶಾಕ್ಷೋ ವೈ ತಸ್ಮಿನ್ ಕಾಲೇ ವೃತೋ ವರಮ್| ವೀರಃ ಕುಮಾರಧಿಪತಿಸ್ತವ ಪುತ್ರೋಽಭಿಷಿಚ್ಯತಾಮ್| ಬ್ರಾಹ್ಮಣೋ ಬ್ರಾಹ್ಮಣಾನಾನ್ತು ಸರ್ವವೇದವಿದಾಂ ವರಃ| ಯಕ್ಷರಾಕ್ಷಸನಾಗಾನಾಂ ಗನ್ಧರ್ವಾಸುರಯೋರಪಿ| ಪಿಶಾಚಭೂತಸಙ್ಘಾನಾಂ ವ್ಯಾಧೀನಾಂ ಚ ಸ ಈಶ್ವರಃ| ಆಜ್ಞಾಪಯತಿ ವಃ ಸ್ಕನ್ದೋ ಗಮ್ಯತಾಂ ಗನ್ಧಮಾದನಮ್| ಗ್ರಹೋ ಯಃ ಕೋಪಯೇದಾಜ್ಞಾಂ ಕುಮಾರಸ್ಯ ಯಶಸ್ವಿನಃ| ಸ್ಥಾನಾಚ್ಚ್ಯುತಃ ಸ ವೈ ಕ್ಷಿಪ್ರಂ ಬಾಹ್ಯಃ ಪರಿಷದೋ ಭವೇತ್||೧೨||

ತತೋಽನನ್ತರಂ ಸಮಾಹಿತಃ ವೈದ್ಯಃ ಸಾರ್ಧರ್ದಶಭಿಃ ಶ್ಲೋಕೈಃ ಕುಲವಿದ್ಯಾಂ ಪಠೇತ್| ಅಸ್ಯಾರ್ಥಃ ಕೌಲಾದಯಸ್ತ್ರಯೋದಶ ಗ್ರಹಮಾತರಃ| ಭಗವತ್ಕುಮಾರವಚಾದಿಮಂ ಶಿಶುಂ ಶೀಘ್ರಂ ಪ್ರಮುಞ್ಚನ್ತು| ಕುಮಾರವಚನಾತ್ ಕಾಲಕಲ್ಪಾದಿಗುಣಾ ದೂತೀ ಸಮ್ಪ್ರಾಪ್ತಾ ಶಿಶುರ್ಮುಚ್ಯತಾಮಿತಿ| ಕಿಙ್ಕಿಣೀಜಾಲಂ ಸೂಕ್ಷ್ಮಘಣ್ಟಾಸಮೂಹಃ| ಪತಾಕಾದಿಕಾ ಮುದ್ರಾಸ್ತೇ ತುಭ್ಯಮ್| ಹೇ ಮಾತರಃ| ಶಿಶುರ್ಮುಚ್ಯತಾಂ ತೇ ಇತಿ ಬಹೂನಾಂ ಪ್ರಯೋಗೋ ಮನ್ತ್ರತ್ವಾತ್| ತೇ ಕುಮಾರೋ ಗನ್ಧಾದಿಕಂ ಪ್ರಯಚ್ಛತಿ| ತದಾಘ್ರಾಯ ಸ್ವಾಂ ಗತಿಂ ಗಚ್ಛ| ಮಾಚಿರಂ ಶೀಘ್ರಮ್| ಕುಮಾರಧಾತ್ರ್ಯಃ ಸರ್ವಾಃ ಗನ್ಧಮಾದನೇ ಸಙ್ಗತಾಃ| ರಕ್ತಧ್ವಜಾದಿಮತಃ ಕುಮಾರಸ್ಯ ತತ್ರಾಲಯಮ್| ತತ್ರ ಯಾತೋ ಬಾಲಂ ವಿಮುಞ್ಚತ| ಶೇಷಸ್ಯ ಪಾಠ ಏವ ಶರಣಮ್| ಯೋ ಗ್ರಹಃ ಕುಮಾರಸ್ಯ ಯಶಸ್ವಿನ ಆಜ್ಞಾಂ ಕೋಪಯೇತ್ ಸಃ ಕ್ಷಿಪ್ರಮೇವ ಸ್ಥಾನಾಚ್ಚ್ಯುತಃ ಪರಿಷದಃ ಸ್ವ-ವೃನ್ದಾದ್ ಬಾಹ್ಯೋ ಭವೇದಿತಿ ಕುಲವಿದ್ಯಾ|| ೧೨||

Adhikarana homavidhiH (13) · Śloka 13

ಬಲೇರನನ್ತರಂ ಕುರ್ಯಾದ್ಧೋಮಮಭ್ಯರ್ಚ್ಯ ಪಾವಕಮ್| ಪುಷ್ಪೈರ್ಭಕ್ಷ್ಯೈಶ್ಚ ವಿವಿಧೈಶ್ಚರುಣಾ ಲೋಹಿತೈಸ್ತಥಾ| ಗನ್ಧೈರ್ಗುಗ್ಗುಲುಧೂಪೈಶ್ಚ ಸಮಿಧಃ ಖದಿರಾದಥ| ಶತಮಷ್ಟೋತ್ತರಂ ಹವ್ಯಮಥವಾ ಚನ್ದನದ್ರುಮಾತ್||೧೩||

ತತೋ ಬಲೇರನನ್ತರಂ ಪಾವಕಮಭ್ಯರ್ಚ್ಯ ಪುಷ್ಪಾದಿಭಿರ್ಹೋಮಂ ಕುರ್ಯಾತ್| ತತೋ ಹವ್ಯಮನ್ನಂ ಗನ್ಧೈರ್ಗನ್ಧದ್ರವ್ಯೈರ್ಲೋಹಿತೈಃ ಖದಿರಸಮಿಧಾಂ ಚನ್ದನಸಮಿಧಾಂ ಚಾಷ್ಟೋತ್ತರಂ ಶತಂ ಹವ್ಯಮ್||೧೩||

Adhikarana havanamantraH (14) · Śloka 14

ಅಗ್ನಿದಣ್ಡಂ ಪ್ರವಕ್ಷ್ಯಾಮಿ ಸರ್ವಗ್ರಹವಿಮೋಕ್ಷಣಮ್| ಬ್ರಹ್ಮಣ್ಯನ್ತ್ವನಲಂ (ತ್ವಮಲಂ) ದೇವಂ ಹವ್ಯಕವ್ಯಪ್ರತೀಚ್ಛಕಮ್| ದೇವಾನಾಂ ಪ್ರಾಙ್ಮುಖಂ (ಪ್ರಮುಖಂ) ಸ್ವಸ್ತಿ ಸ್ವಾಹಾಪಹರತಿ ದ್ರುತಮ್| ಸನ್ನಸ್ರವಿದ್ಯೋ ದಹನಃ ಪಾವಕಃ ಸರ್ವಭಕ್ಷಣಃ| ತ್ವಂ ಹಿ ಯಜ್ಞಶ್ಚ ಯೂಪಶ್ಚ ತ್ವಂ ಹಿ ಧರ್ಮವತಾಂ ಗತಿಃ| ಹಿರಣ್ಯರೇತಾ ದೇವಸ್ತ್ವಂ ತ್ವಂ ಹಿ ವೇದವಿದಾಂ ಗತಿಃ| ದುರ್ವೃತ್ತಾನಾಂ ವಿನಾಶಾಯ ತ್ವಂ ಸಮುತ್ಪಾದಿತಃ ಸುರೈಃ| ದಹ ಸಂಗ್ರಹದೇವತ್ವಮಿದಂ ದುಷ್ಟಸ್ಯ ನಿಗ್ರಹಮ್| ಅಗ್ನಯೇ ಸ್ವಾಹಾ| ಮಹಾಗ್ನಯೇ ಸ್ವಾಹಾ| ತ್ವಂ ಹಿ ಶಾನ್ತಿಕರೋ ವಹ್ನಿಸ್ತ್ವಂ ಮಾರುತಹರೋದನಃ| ಹರಿಪ್ರಧಾನಗತಿರಾಸೀದಿಮಂ ನಿಗೃಹ್ಯ ಗುಹ್ಯಕಮುತ್ಸಾದಯತೇಜಸಾ| ತ್ವಂ ಮಮ ವಶ್ಯಂ ಚ ತಂ ಕುರು ದುಷ್ಟಗ್ರಹನಿವಾರಣಂ ಸರ್ವೋಪದ್ರವೇಷು ಚ| ತ್ವಯಾ ಕೃತೇನ ಹೋಮೇನ ಶೀಘ್ರಂ ಶಾನ್ತಿಃ ಪ್ರಜಾಯತೇ| ಆಯಾಹಿ ವಹ್ನೇ ದೇವಾನಾಂ ತ್ವಂ ಹಿ ವಕ್ತ್ರಂ ಪುರಾತನಮ್| ತೇನ ಸತ್ಯೇನ ದೇವೇಶ ಇಸ ಸಾಧಯ ಮೇ ಗ್ರಹಮ್| ನಮೋಽಸ್ತು ತೇ ಹವ್ಯವಾಹನ ದಣ್ಡಂ ಪ್ರದರ್ಶಯ ದಹ ದಹ ದರ್ಶ ದರ್ಶ ತೇಜ ತೇಜ ಮೋಟಯ ಮೋಟಯ ಅಪಸ್ಮಾರಮುದ್ಘಾಟಯ ಕುಮಾರ ಪಿಶಾಚ-ರೇವತೀ-ರೋದನ-ತ್ರಾಸನ-ವಿತ್ರಾಸನ-ಕಮ್ಪನ-ಉತ್ಕ- ಮ್ಪನ-ವಿಜೃಮ್ಭಣ-ದೇವ-ಯಕ್ಷ-ಗನ್ಧರ್ವ-ಭೂತ-ನಾಗ-ರಾಕ್ಷಸ- ಸನ್ತರ್ಜನದಣ್ಡ-ನಾವಿಧೂಸಾರಯ ಭಗವನ್ನಗ್ನಿದಣ್ಡ ಅಗ್ನಿವೀರ್ಯ ನಮಸ್ತೇಜಸಾ ಸ್ವೇನ ತ್ಯಕ್ತಮುತ್ಸಾದಯ ಸ್ವಾಹಾ| (ಭುರ್ಭುವಾಯ ಸ್ವಾಹಾ) ಭೂರ್ಭುವಸ್ಸ್ವಸ್ಸ್ವಾಹಾ| ದೀಪ್ತತೇಜಸೇ ಸ್ವಾಹಾ| ಹವ್ಯ ವಾಹನಾಯ ಸ್ವಾಹಾ| ಯಮಾಯ ಸ್ವಾಹಾ| ನಶ್ಯನ್ತ್ಯನೇನ ಹೋಮೇನ ಸಮಸ್ತಾ ಬಾಲಕಗ್ರಹಾಃ||೧೪||

ಅಗ್ನಿದಣ್ಡೋ ಮನ್ತ್ರೋ ಯಮಾಯ ಸ್ವಾಹೇತ್ಯೇವಮನ್ತಃ| ಅನೇನಾನನ್ತರೋಕ್ತೇನ ಮನ್ತ್ರೇಣ ಹೋಮೇನ ಸಮಸ್ತಾ ಬಾಲಕಗ್ರಹಾ ನಶ್ಯನ್ತಿ|| ೧೪||

Adhikarana siddhilakShaNam (15-16) · Śloka 16

ತತ್ರಾಗ್ನಾವರುಣೇ ತಾಮ್ರೇ ತಪ್ತಹೇಮಸಮಾರ್ಚಿಷಿ| ತಾರಾವೈಡೂರ್ಯಸದೃಶೇ ಶಶಿವಿದ್ಯುತ್ಸಮಪ್ರಭ| ಘೃತಮಣ್ಡಾಭವರ್ಣೇ ವಾ ಗನ್ಧೇನ ಚ ಘೃತೋಪಮೇ| ಕೇತಕೋತ್ಪಲದಧ್ಯಾಭೇ ಧ್ರುವಮಾರೋಗ್ಯಮಾದಿಶೇತ್| ಅನಾರೋಗ್ಯಂ ತು ನೀಲೇಽಗ್ನೌ ಕಪಿಲೇ ಭಸ್ಮನಿಷ್ಪ್ರಭೇ| ಕೃಷ್ಣೇ ಕಪೋತೇ ದುರ್ಗನ್ಧೇ ಮತ್ಸ್ಯಪೂಯಾಸ್ರಗನ್ಧಿಕೇ| ವಚಾಲಶುನಗನ್ಧಾಭೇ ವಿಸ್ರೇ ಕರ್ದಮಗನ್ಧಿಕೇ||೧೫|| ಇತಿ ವೈದ್ಯಪತಿಸಿಂಹಗುಪ್ತಸ್ಯ ಸೂನೋರ್ವಾಗ್ಭಟಸ್ಯ ಕೃತಾ ವಷ್ಟಾಙ್ಗಸಂಗ್ರಹಸಂಹಿತಾಯಾಮುತ್ತರತನ್ತ್ರೇ ಬಾಲ ಗ್ರಹಪ್ರತಿಷೇಧೋ ನಾಮ ಚತುರ್ಥೋಽಧ್ಯಾಯಃ||೧೬||

ತತ್ರಾಗ್ನಾವಿತ್ಯಾದಿ ಸಿದ್ಧಲಕ್ಷಣಂ ತಪ್ತಹೇಮಾರುಣಾದಿರೂಪೇಽಗ್ನೌ ಧ್ರುವಮವಶ್ಯಮಾರೋಗ್ಯಮಾದಿಶೇತ್| ನೀಲಾದಿರೂಪೇಽಗ್ನಾವಾತುರಸ್ಯಾನಾರೋಗ್ಯಮಾದಿಶೇತ್| ಇತಿ ಶ್ರೀಮನ್ಮಹಾಮಹೋಪಾಧ್ಯಾಯೇನ್ದುವಿರಚಿತಾಯಾ ಮಷ್ಟಾಙ್ಗಸಂಗ್ರಹವ್ಯಾಖ್ಯಾಯಾಂ ಶಶಿಲೇಖಾಯಾಮುತ್ತರತನ್ತ್ರೇ ಚತುರ್ಥೋಽಧ್ಯಾಯಃ