8. bhūtapratiṣēdhaḥ

Adhikarana atha bhUtapratiShedho nAmAShTamo~adhyAyaH - avataraNikA · Śloka

ಉಕ್ತಕ್ರಮೇಣೈವ ಭೂತಾನಾಂ ಚಿಕಿತ್ಸಿತಂ ಪ್ರದರ್ಶಯಿತುಮಧ್ಯಾಯ ಆರಭ್ಯತೇ||

Adhikarana pratij~jA (1) · Śloka 1

ಅಥಾತೋ ಭೂತಪ್ರತಿಷೇಧಂ ನಾಮಾಧ್ಯಾಯಂ ವ್ಯಾಖ್ಯಾಸ್ಯಾಮಃ| ಇತಿ ಹ ಸ್ಮಾಹುರಾತ್ರೇಯಾದಯೋ ಮಹರ್ಷಯಃ||೧||

Adhikarana sAdhyeShu sAmAnyopakramaH (2) · Śloka 2

ಭೂತಂ ಜಯೇದಹಿಂಸೇಚ್ಛುಂ ಜಪಹೋಮಬಲಿವ್ರತೈಃ| ತಪಶ್ಶೀಲಸಮಧಾನಜ್ಞಾನದಾನದಯಾದಿಭಿಃ||೨||

ಅಹಿಂಸೇಚ್ಛುಂ ಸಾಧ್ಯಂ ರತಿಕಾಮಂ ಬಲಿಕಾಮಂ ಚ ಭೂತಂ ಜಪಪ್ರಭೃತಿಭಿರ್ಜಯೇತ್||೨||

Adhikarana hi~gvAdivargaprayogaH (3) · Śloka 3

ಹಿಙುವ್ಯೋಷಾಲನೈಮಾಲೀಲಶುನಾರ್ಕಜಟಾಜಟಾಃ| ಅಜಲೋಮೀ ಸಗೋಲೋಮೀ ಭೂತಕೇಶೀ ವಚಾ ಲತಾ| ಕುಕ್ಕುಟೀಸರ್ಪಗನ್ಧಾಖ್ಯಾ ತಿಲಾಃ ಕಾಣವಿಕಾಣಕೇ| ವಜ್ರಪ್ರೋಕ್ತಾ ವಯಸ್ಥಾ ಚ ಶೃಙ್ಗೀ ಮೋಹನವತ್ಯಪಿ| ಸ್ರೋತೋಜಾಞ್ಜನರಕ್ಷೋಘ್ನಂ ರಕ್ಷೋಘ್ನಂ ಚಾನ್ಯದೌಷಧಮ್| ಖರಾಶ್ವಶ್ವಾವಿಡುಷ್ಟ್ರರ್ಕ್ಷಗೋಧಾನಕುಲಶಲ್ಯಕಾತ್| ದ್ವೀಪಿಮಾರ್ಜಾರಗೋಸಿಂಹವ್ಯಾಘ್ರಸಾಮುದ್ರಸತ್ವತಃ| ಚರ್ಮಪಿತ್ತದ್ವಿಜನಖಾ ವರ್ಗೇಽಸ್ಮಿನ್ ಸಾಧಯೇದ್ ಘೃತಮ್| ಪುರಾಣಾಮಥವಾ ತೈಲಂ ನವಂ ತತ್ಪಾನನಸ್ಯಯೋಃ| ಅಭ್ಯಙ್ಗೇ ಚ ಪ್ರಯೋಕ್ತವ್ಯಮೇಷಾಂ ಚೂರ್ಣಂ ಚ ಧೂಪನೇ| ಏಭಿಶ್ಚ ಗುಲಿಕಾಂ ಯುಞ್ಜ್ಯಾದಞ್ಜನೇ ಸಾವಪೀಡನೇ| ಪ್ರಲೇಪೇ ಕಲ್ಕಮೇತೇಷಾಂ ಕ್ವಾಥಂ ಚ ಪರಿಷೇಚನೇ| ಪ್ರಯೋಗೋಽಯಂ ಗ್ರಹೋನ್ಮಾದಾನ್ಸಾಸ್ಪಸ್ಮಾರಾನ್ ಶಮಂ ನಯೇತ್||೩||

ಹಿಙ್ಗ್ವಾದೌ ವರ್ಗೇ ಪುರಾಣಂ ಘೃತಂ ಸಿದ್ಧಂ ನವಂ ತೈಲಂ ವಾ ಪಾನನಸ್ಯಯೋರಭ್ಯಙ್ಗೇ ಚ ಪ್ರಯೋಕ್ತವ್ಯಮ್| ನೈಪಾಲೀ ಮನಃಶಿಲಾ| ಅರ್ಕಜಟಾ ಅರ್ಕಮೂಲಮ್| ಜಟಾ ಮಾಂಸೀ| ಅಜಲೋಮೀ ಮೇಷವಿಲೋಚನಾ| ಗೋಲೋಮೀ ದೂರ್ವಾ| ಭೂತಕೇಶೀ ಶುಕ್ಲಾ ನಿರ್ಗುಣ್ಡೀ| ಲತಾ ಶತಪುಷ್ಪಾ| ಕುಕ್ಕುಟೀ ರಸಾಯನೋಕ್ತಲಕ್ಷಣಾ| ಸರ್ಪಗನ್ಧಾ ಗನ್ಧನಾಕುಲೀ| ಕಾಣಾ ಕಾಕೋಲೀ| ವಿಕಾಣಾ ಕ್ಷೀರಕಾಕೋಲೀ| ವಜ್ರಪ್ರೋಕ್ತಾ ಸುಧಾ| ವಯಸ್ಥಾಂ ಆಮಲಕಮ್| ಶೃಙ್ಗೀ ಕರ್ಕಟಶೃಙ್ಗೀ| ಮೋಹನವಲ್ಲೀ ಬ್ರಾಹ್ಮೀ ಶಿರೀಷಶ್ಚ| ರಕ್ಷೋಘ್ನಂ ಸರ್ಷಪಮ್| ಅನ್ಯದ್ರಕ್ಷೋಘ್ನಮೌಷಧಂ ವಚಾದಿ ಯಥಾಲಾಭಮ್| ಖರಾದೀನಾಂ ತ್ರಯೋದಶಾನಾಂ ಸಾಮುದ್ರಾಣಾಂ ಚ ಸತ್ತ್ವಾನಾಂ ಪ್ರಾಣಿನಾಂ ಯಥಾಲಾಭಂ ಚರ್ಮಾದಿಕಮ್| ಏಷಾಮಿತ್ಯೇಭಿರಿತಿ ಚ ಹಿಙ್ಗ್ವಾದೀನಾಂ ಪರಾಮರ್ಶಃ| ಅವಪೀಡನಂ ಕಲ್ಕಾದಿನಸ್ಯಮ್| ಸುಬೋಧಮ್||೩||

Adhikarana gajAhvAdiyogaH (4) · Śloka 4

ಗಜಾಹ್ವಾಪಿಪ್ಪಲೀಮೂಲವ್ಯೋಷಾಮಲಕಸರ್ಷಪಾನ್| ಗೋಧಾನಕುಲಮಾರ್ಜಾರಶಶಪಿತ್ತಪ್ರಪೇಷಿತಾನ್| ನಾವನಾಭ್ಯಙ್ಗಸೇಕೇಷು ವಿದಧೀತ ಗ್ರಹಾಪಹಾನ್||೪||

ಗಜಾಹ್ವಾದೀನ್ ಗೋಧಾದಿಪಿತ್ತಪ್ರಪೇಷಿತಾನ್ ನಾವನಾದಿಷು ಗ್ರಹಾಪಹಾನ್ ವಿದಧೀತ| ಗಜಾಹ್ವಾ ಹಸ್ತಿಪಿಪ್ಪಲೀ||೪||

Adhikarana ashvAdiviDyogaH (5) · Śloka 5

ಅಶ್ವಶ್ವಾಶ್ವತರೋಲೂಕಕಙ್ಕಗೃಧ್ರಸೃಗಾಲಜಾ| ವಿಟ್ಖರೋಷ್ಟ್ರವರಾಹಾಶ್ಚ ತಯಾ ತೈಲಂ ವಿಪಾಚಿತಮ್| ಪಿಷ್ಟಯಾ ಬಸ್ನಮೂತ್ರೇಣ ನಾವನಾದಿಷು ಪೂಜಿತಮ್||೫||

ಅಶ್ವಾದೀನಾಂ ದಶಾನಾಂ ವಿಶಾ ಪುರೀಷೇಣ ವಸ್ತಮೂತ್ರಪಿಷ್ಟಯಾ ತೈಲಂ ವಿಪಾಚಿತಂ ನಾವನಾದಿಷು ಪೂಜಿತಮ್| ಅಶ್ವತರೋ ವೇಸರಃ||೫||

Adhikarana shirIShAdya~jjanam (6) · Śloka 6

ಶಿರೀಷಪುಷ್ಪಂ ಲಶುನಂ ಶುಣ್ಠೀಂ ಸಿದ್ಧಾರ್ಥಕಂ ವಚಾಮ್| ಮಞ್ಜಿಷ್ಠಾಂ ದ್ವೇ ನಿಶೇ ಕೃಷ್ಣಾಂ ಬಸ್ತಮೂತ್ರೇಣ ಪೇಷಯೇತ್| ಛಾಯಾಶುಷ್ಕಾ ಕೃತಾ ವರ್ತಿಃ ಮತ್ಸ್ಯಪಿತ್ತದ್ರುತಾಞ್ಜನಮ್||೬||

ಶಿರೀಷಾದಿಭಿರ್ಬಸ್ತಮೂತ್ರಪಿಷ್ಟೈಃ ಕೃತಾ ವರ್ತಿಃ ಛಾಯಾಶುಷ್ಕಾ ಸತೀ ಪ್ರಯೋಗಕಾಲೇ ಮತ್ಸ್ಯಪಿತ್ತೇನ ದ್ರುತಾ ಭೂತೇಷ್ವಞ್ಜನಮ್||೬||

Adhikarana naktamAlaPalAdya~jjanam (7) · Śloka 7

ನಕ್ತಮಾಲಫಲಂ ವ್ಯೋಷಂ ಬಿಲ್ವಸ್ಯೋನಾಕಯೋರ್ಜಟಾ| ಹರಿದ್ರೇ ಚ ಕೃತಾ ವರ್ತಿಃ ಪೂರ್ವವನ್ನಯನಾಞ್ಜನಮ್| ವಯಸ್ಥಾಹಿಙ್ಗುಕಟುಕಾಷಡ್ಗ್ರನ್ಥಾಸೈನ್ಧವಂ ತಥಾ||೭||

ನಕ್ತಮಾಲಫಲಾದಿಭಿಃ ಕೃತಾ ವರ್ತಿಃ ಪೂರ್ವವದಿತಿ ಬಸ್ತಮೂತ್ರಪಿಷ್ಟಾ ಶುಷ್ಕಾ ಚ ಮತ್ಸ್ಯಪಿತ್ತೇನ ದ್ರುತಾ ನಯನಾಞ್ಜನಮ್| ನಕ್ತಮಾಲಃ ಕರ್ಣಿಕಾರಃ| ಜಟಾ ಮೂಲಮ್| ವಯೇಸ್ಥೇತ್ಯಾದಿ| ತಥಾ ಪೂರ್ವವನ್ನಯನಞ್ಜನಮ್| ವಯಸ್ಥಾ ಆಮಲಕಮ್| ಷಡ್ಗ್ರನ್ಥಾ ವಚಾ|| ೭||

Adhikarana siddhArthakAdisarpiragadashca (8) · Śloka 8

ಸಿದ್ಧಾರ್ಥಕವಚಾಹಿಙ್ಗುಪ್ರಿಯಙ್ಗುರಜನೀದ್ವಯಮ್| ಮಞ್ಜಿಷ್ಠಾಶ್ವೇತಕಟಭ್Vಈವರಾಶ್ವೇತಾದ್ರಿಕರ್ಣಿಕಾ| ನಿಮ್ಬಸ್ಯ ಪತ್ರಂ ಬೀಜಂ ತು ನಕ್ತಮಾಲಶಿರೀಷಯೋಃ| ಸುರಾಹ್ವಂ ತ್ರ್ಯೂಷಣಂ ಸರ್ಪಿರ್ಗೋಮೂತ್ರೇ ತೈಶ್ಚತುರ್ಗುಣೇ| ಸಿದ್ಧಂ ಸಿದ್ಧಾರ್ಥಕಂ ನಾಮ ಪಾನೇ ನಸ್ಯೇ ಚ ಯೋಜಿತಮ್| ಗ್ರಹಾನ್ಸರ್ವಾನ್ನಿಹನ್ತ್ಯಾಶು ವಿಶೇಷಾದಾಸುರಾನ್ ಗ್ರಹಾನ್| ಕೃತ್ಯಾಲಕ್ಷ್ಮೀವಿಷೋನ್ಮಾದಜ್ವರಾಪಸ್ಮಾರಪಾಪ್ಮಜಿತ್| ಏಭಿರೇವೌಷಧೈರ್ಬಸ್ತವಾರಿಣಾ ಕಲ್ಪಿತೋಽಗದಃ| ಪಾನನಸ್ಯಾಞ್ಜನಾಲೇಪಸ್ನಾನೋದ್ಘರ್ಱ್ಷಣಯೋಜಿತಃ| ಗುಣೈಃ ಪೂರ್ವವದುದ್ದಿಷ್ಟೋ ರಾಜದ್ವಾರೇ ಚ ಸಿದ್ಧಿಕೃತ್||೮||

ಸಿದ್ಧಾರ್ಥಕಾದಿಭಿಃ ಕಲ್ಕೀಕೃತೈಶ್ಚತುರ್ಗುಣೇ ಗೋಮೂತ್ರೇ ಸಿದ್ಧಂ ಸರ್ಪಿರ್ನಾಮ್ನಾ ಸಿದ್ಧಾರ್ಥಕಮ್| ಗ್ರಹಾನ್ ಸರ್ವಾನ್ ಸುರಾದೀನ್ ನಿಹನ್ತಿ| ಆಸುರಾನ್ ಗ್ರಹಾನ್ ವಿಶೇಷಾನ್ನಿಹನ್ತಿ| ಕೃತ್ಯಾದಿಘ್ನಞ್ಚ| ಕೃತ್ಯಾ ಆಭಿಚಾರದೇವತಾ| ಏಭಿರಿತಿ ಸಿದ್ಧಾರ್ಥಕಾದಿಭಿರ್ವಸ್ತಮೂತ್ರೇಣಾಗದಃ ಪಾನಾದಿಯೋಜಿತೋ ಗುಣೈಃ ಪೂರ್ವವತ್| ಸುಬೋಧಮ್|| ೮||

Adhikarana siddhArthakAdiguDAH (9) · Śloka 9

ಸಿದ್ಧಾರ್ಥಕವ್ಯೋಷವಚಾಶ್ವಗನ್ಧಾ ನಿಶಾದ್ವಯಂ ಹಿಙ್ಗುಪಲಾಣ್ಡುಕನ್ದಮ್| ಬೀಜಂ ಕರಞ್ಜಾತ್ಕುಸುಮಂ ಶೀರಿಷಾತ್ ಫಲಞ್ಚ ವಲ್ಕಞ್ಚಕಪಿತ್ಥವೃಕ್ಷಾತ್| ಸಮಾಣಿಮನ್ಥಂ ಸನತಂ ಸಕುಷ್ಠಂ ಸ್ಯೋನಾಕಮೂಲಂ ಕಿಣಿಹೀ ಸಿತಾ ಚ| ಬಸ್ತಸ್ಯ ಮೂತ್ರೇಣ ಸುಭಾವಿತಂ ತತ್ ಪಿತ್ತೇನ ಗವ್ಯೇನ ಗುಡಾನ್ ವಿದಧ್ಯಾತ್| ದುಷ್ಟಗ್ರಹೋನ್ಮಾದತಮೋ ನಿಶಾನ್ಧಾ ನುದ್ಬನ್ಧಕಾನ್ ವಾರಿನಿಮಗ್ನದೇಹಾನ್| ದಿಗ್ಧಾಹನಾನ್ ದರ್ಪಿತಸರ್ಪದಷ್ಟಾಂ ಸ್ತೇ ಸಾಧಯನ್ತ್ಯಞ್ಜನನಸ್ಯಲೇಪೈಃ||೯||

ಸಿದ್ಧಾರ್ಥಕಾದ್ಯನೇಕವಾರಂ ಬಸ್ತಮೂತ್ರೇಣ ಭಾವಿತಂ ಗೋಪಿತ್ತೇನ ಗುಡಾನ್ ಕುರ್ಯಾತ್| ತೇ ಗುಡಾ ಅಞ್ಜನಾದಿಭಿರ್ದುಷ್ಟಗ್ರಹಾದೀನ್ ಸಾಧಯನ್ತಿ| ವಲ್ಕಂ ತ್ವಕ್| ಮಾಣಿಮನ್ಥಂ ಸೈನ್ಧವಮ್| ಸ್ಯೋನಾಕಸ್ಯ ಮಯೂರಜಙ್ಘಸ್ಯ ಮೂಲಮ್| ಕಿಣಿಹೀ ಗಿರಿಕರ್ಣಿಕಾ| ಸಾ ತು ಸಿತಾ ಶುಕ್ಲಾ| ತಮಸ್ತಿಮಿರಮ್| ಉದ್ಬನ್ಧಕೋ ಗಲಬನ್ಧೇನ ಮೃತಕಲ್ಪಃ| ತದ್ವಜ್ಜಲನಿಮಗ್ನದೇಹಃ| ವಿಷಲಿಪ್ತೇನ ಶಸ್ತ್ರೇಣಾಹತೋ ದಿಗ್ಧಾಹತಃ||೯||

Adhikarana kArpAsAsthyAdidhUpanam (10) · Śloka 10

ಕಾರ್ಪಾಸಾಸ್ಥಿಮಯೂರಪತ್ರಬೃಹತೀನಿರ್ಮಾಲ್ಯಪಿಣ್ಡೀತಕ ತ್ವಗ್ವಾಂಶೀವೃಷದಂಶವಿಟ್ತುಷವಚಾಕೇಶಾಹಿನಿರ್ಮೋಚನೈಃ| ನಾಗೇನ್ದ್ರದ್ವಿಜಶೃಙ್ಗಹಿಙ್ಗುಮರಿಚೈಸ್ತುಲ್ಯೈಃ ಕೃತಂ ಧೂಪನಂ ಸ್ಕನ್ದೋನ್ಮಾದಪಿಶಾಚರಾಕ್ಷಸಸುರೋವೇಶಗ್ರಹಘ್ನಂ ಪರಮ್||೧೦||

ಕಾರ್ಪಾಸಾಸ್ಥ್ಯಾದಿಭಿಸ್ತುಲ್ಯೈಃ ಸಮಭಾಗೈಃ ಕೃತಂ ಧೂಪನಂ ಸ್ಕನ್ದಗ್ರಹಾದಿಘ್ನಮ್| ನಿರ್ಮಾಲ್ಯಂ ಸ್ಪೃಕ್ಕಾ| ಪಿಣ್ಡೀತಕೋ ಮದನಃ||೧೦||

Adhikarana bhUtarAvaM ghRutam (11) · Śloka 11

ತ್ರಿಕಟುಕದಲಕುಙ್ಕುಮಗ್ರನ್ಥಿಕಕ್ಷಾರಸಿಂಹೀ ನಿಶಾದಾರುಸಿದ್ಧಾರ್ಥಯುಗ್ಮಾಮ್ಬುಶಕ್ರಾಹ್ವಯೈಃ| ಸಿತಲಶುನಫಲತ್ರಯೋಶೀರತಿಕ್ತಾವಚಾ ತುತ್ಥಯಷ್ಟೀಬಲಾಲೋಹಿತೈಲಾಶಿಲಾಪದ್ಮಕೈಃ| ದಧಿತಗರಮಧೂಕಸಾರಪ್ರಿಯಾಹ್ವಾವಿಷಾಖ್ಯಾ ವಿಷಾತಾರ್ಕ್ಷ್ಯಶೈಲೈಃ ಸಚವ್ಯಾಮಯೈಃ ಕಲ್ಕಿತೈಃ| ಘೃತಮನವಮಶೇಷಮೂತ್ರಾಂಶಸಿದ್ಧಂ ಮತಂ ಭೂತರಾವಾಹ್ವಯಂ ಪಾನತಸ್ತದ್ಗ್ರಹಘ್ನಂ ಪರಮ್||೧೧||

ತ್ರಿಕಟುಕಾದಿಭಿಸ್ತುಲ್ಯೈಃ ಸಮಭಾಗೈಃ ಕಲ್ಕಿತೈರಶೇಷಮೂತ್ರಾಂಶಸಿದ್ಧಮಷ್ಟಾನಾಂ ಮೂತ್ರಾಣಾಮಂಶೇನ ಭಾಗೇನ ಪಕ್ವಮಾಜ್ಯಮನವಂ ಪುರಾಣಂ ನಾಮ್ನಾ ಭೂತರಾವಮ್| ತತ್ಪಾನಾತ್ಪರಂ ಗ್ರಹಘ್ನಮ್| ಗ್ರನ್ಥಿಕಂ ಪಿಪ್ಪಲೀಮೂಲಮ್| ಸಿಂಹೀ ಬೃಹತೀ| ಸಿದ್ಧಾರ್ಥಯುಗ್ಮಂ ರಕ್ತಶ್ವೇತಭೇದೇನ| ಸಿತಂ ಚನ್ದನಮ್| ಲೋಹಿತಾ ಮಞ್ಜಿಷ್ಠಾ| ದಧಿ ಶ್ರೀವಾಸಮ್| ಪ್ರಿಯಾಹ್ವಾ ಪ್ರಿಯಙ್ಗುಃ| ವಿಷಾಖ್ಯಾ ಲಾಙ್ಗಲೀ| ವಿಷಾ ಅತಿವಿಷಾ| ಆಭಯಂ ಕುಷ್ಠಮ್| ತ್ರಿಂಶದ್ವರ್ಣೈಃ ಪೂರ್ಣಪಾದಸ್ತ್ವರ್ಣಾಖ್ಯೋಯಂ ಹಿ ದಣ್ಡಕಃ|| ೧೧||

Adhikarana mahAbhUtarAvaM ghRutam (12) · Śloka 12

ನತಮಧುಕಕರಞ್ಜಲಾಕ್ಷಾಪಟೋಲೀಸಮಙ್ಗಾವಚಾ ಪಾಟಲೀಹಿಙ್ಗುಸಿದ್ಧಾರ್ಥಸಿಂಹೀನಿಶಾಯುಗ್ಲತಾರೋಹಿಣೈಃ| ಬದರಕಟ್ಫಲತ್ರಿಕಾಕಾಣ್ಡದ್ರುಕ್ರಿಮಿಘ್ನಾಜಗ ನ್ಧಾಮರಾಙ್ಕೋಲಕೋಶಾತಕೀಶಿಗ್ರುನಿಮ್ಬಾಮ್ಬುದೇನ್ದ್ರಾಹ್ವಯೈಃ| ಗದಶುಕತರುಪುಷ್ಪಬೀಜೋಗ್ರಯಷ್ಟ್ಯಾದ್ರಿಕರ್ಣೀನಿಕು ಮ್ಭಾಗ್ನಿಬಿಲ್ವೈಃ ಸಮೈಃ ಕಲ್ಕಿತೈರ್ಮೂತ್ರವರ್ಗೇಣ ಸಿದ್ಧಂ ಘೃತಮ್| ವಿಧಿವಿನಿಹಿತಮಾಶು ಸರ್ವೈಃ ಕ್ರಮೈರ್ಯೋಜಿತಂ ಹನ್ತಿ ಸ ರ್ವಗ್ರಹೋನ್ಮಾದಕುಷ್ಠಜ್ವರಂಸ್ತನ್ಮಹಾಭೂತರಾವಂ ಸ್ಮೃತಮ್||೧೨||

ನತಾದಿಭಿಃ ಸಮೈಃ ಕಲ್ಕಿತೈರ್ಘೃತಂ ಮೂತ್ರವರ್ಗೇಣಾಷ್ಟಭಿರ್ಮೂತ್ರೈಃ ಸಿದ್ಧಂ ವಿಧಿನಾ ಚ ಪಾತ್ರೇ ನಿಹಿತಂ ಸರ್ವೈಶ್ಚ ಪಾನಾದಿಭಿಃ ಕ್ರಮೈರ್ಯೋಜಿತಂ ಸರ್ವ ಗ್ರಹಾದೀನ್ ಹನ್ತಿ ನಾಮ್ನಾ ಮಹಾಭೂತರಾವಂ ಸ್ಮೃತಮ್| ಸಮಙ್ಗಾ ಮಞ್ಜಿಷ್ಠಾ| ಸಿಂಹೀ ಬೃಹತೀ| ನಿಶಾಯುಗ್ದಾರ್ವೀ ಪಿಣ್ಡಾಹರಿದ್ರಾ ಚ| ಲತಾ ಶಾರಿವಾ ಶತಪುಷ್ಪಾ ಚ| ರೋಹಿಣೀ ಕಟುರೋಹಿಣೀ| ಕಟು ಮರಿಚಮ್| ಫಲತ್ರಿಕಂ ತ್ರಿಫಲಾ| ದಾರುರ್ದೇವದಾರುಃ| ಅಮರಾ ನಿರ್ಗುಣ್ಡೀ| ಅಙ್ಕೋಲೋಽಙ್ಕೋಲಃ| ಅಮ್ಬುದೋ ಮುಸ್ತಃ| ಇನ್ದ್ರಾಹ್ವಯಃ ಇನ್ದ್ರವೃಕ್ಷಃ| ಗದಂ ಕುಷ್ಠಮ್| ಶುಕತರುಃ ಶಿರೀಷಃ| ಬೀಜೋಗ್ರೋ ವಂಶಃ| ಅದ್ರಿಕರ್ಣೀ ಗಿರಿಕರ್ಣೀ| ನಿಕುಮ್ಭೋ ದನ್ತೀ| ಅಗ್ನಿಶ್ಚಿತ್ರಕಃ| ಷಟ್ತ್ರಿಂಶದ್ವರ್ಣಪಾದೋಽಯಂ ವ್ಯಾಲಾಖ್ಯೋ ದಣ್ಡಕಃ ಸ್ಮೃತಃ|| ೧೨||

Adhikarana balihomAdyarthe kAlanirdeshaH (13) · Śloka 13

ಗ್ರಹಾ ಗೃಹ್ಣನ್ತಿ ಯೇ ಯೇಷು ತೇಷಾಂ ತೇಷು ವಿಶೇಷತಃ| ದಿನೇಷು ಬಲಿಹೋಮಾದೀನ್ ಪ್ರಯುಞ್ಜೀತ ಚಿಕಿತ್ಸಕಃ||೧೩||

ಪೂರ್ವಾಧ್ಯಾಯೋಕ್ತಪ್ರಕಾರೇಣ ಗ್ರಹಾ ಭೂತಾ ಯೇಷು ದಿನೇಷು ಗೃಹ್ಣನ್ತಿ ತೇಷ್ವೇವ ದಿನೇಷು ವಿಶೇಷತಸ್ತೇಷಾಂ ಬಲ್ಯಾದೀಶ್ಚಿಕಿತ್ಸಕಃ ಪ್ರಯುಞ್ಜೀತ| ವಿಶೇಷಶಬ್ದಾದನ್ಯದಾಪೀತಿ||೧೩||

Adhikarana balyupaharaNArthaM sAmAnyavidhiH (14) · Śloka 14

ಸ್ನಾನವಸ್ತ್ರವಸಾಮಾಂಸಮದ್ಯಕ್ಷೀರಗುಡಾದಿ ಚ| ರೋಚತೇ ಯದ್ಯದಾ ಯೇಭ್ಯಸ್ತಾನೇಷಾಮಾಹರೇತ್ತದಾ| ರತ್ನಾನಿ ಗನ್ಧಮಾಲ್ಯಾನಿ ಬೀಜಾನಿ ಮಧುಸರ್ಪಿಷೀ| ಭಕ್ಷ್ಯಾಶ್ಚ ಸರ್ವೇ ಸರ್ವೇಷಾಂ ಸಾಮಾನ್ಯೋ ವಿಧಿರಿತ್ಯಯಮ್||೧೪||

ಯೇಭ್ಯೋ ಗ್ರಹೇಭ್ಯಃ ಸ್ನಾನಾದಿಕಂ ಯದೈವ ರೋಚತೇ ತದೈವಾಹರೇದುಪನಯೇತ್| ರತ್ನಾದಿಕಂ ಸರ್ವೇಷಾಂ ಗ್ರಹಾಣಾಂ ಸಾಮಾನ್ಯಃ ಸಾಧಾಱ್ರಣೋ ವಿಧಿಃ||೧೪||

Adhikarana balyupaharaNArthaM deshanidarshanam (15) · Śloka 15

ಸುರರ್ಷಿಗುರುವೃದ್ಧೇಭ್ಯಃ ಸಿದ್ಧೇಭ್ಯಶ್ಚ ಸುರಾಲಯೇ| ದಿಶ್ಯುತ್ತರಸ್ಯಾಂ ತತ್ರಾಪಿ ದೇವಾಯೋಪಹರೇತ್ ಬಲಿಮ್| ಪಶ್ಚಿಮಾಯಾಂ ಯಥಾಕಾಲಂ ದೈತ್ಯಭೂತಾಯ ಚತ್ವರೇ| ಗನ್ಧರ್ವಾಯ ಗವಾಂ ಮಾರ್ಗೇ ಸವಸ್ತ್ರಾಭರಣಂ ಬಲಿಮ್| ಪಿತೃನಾಗಗ್ರಹೇ ನದ್ಯಾಂ ನಾಗೇಭ್ಯಃ ಪೂರ್ವದಕ್ಷಿಣೇ| ಯಕ್ಷಾಯ ಯಕ್ಷಾಯತನೇ ಸರಿತೋರ್ವಾ ಸಮಾಗಮೇ| ಚತುಷ್ಪಥೇ ರಾಕ್ಷಸಯೋರ್ಭೀಮೇಷು ಗಹನೇಷು ವಾ| ರಕ್ಷಸಾಂ ದಕ್ಷಿಣಸ್ಯಾಂ ತು ಪೂರ್ವಸ್ಯಾಂ ಬ್ರಹ್ಮರಕ್ಷಸಾಮ್| ಶೂನ್ಯಾಲಯೇ ಪಿಶಾಚಾಯ ಪಶ್ಚಿಮಾಂ ದಿಶಮಾಸ್ಥಿತೇ||೧೫||

ಸುರಾದಿಭ್ಯಃ ಪಞ್ಚಭ್ಯಃ ಸುರಾಲಯೇ ಬಲಿಸ್ತತ್ರಾಪಿ ತೇಷ್ವಪಿ ಉತ್ತರಸ್ಯಾಂ ದಿಶಿದೇವೇಷು ವಿಶೇಷಃ| ದೈತ್ಯಭೂತಾಯ ಚತ್ವರೇ ತ್ರಿಪಥೇ ಪಶ್ಚಿಮಾಯಾಮ್ ದಿಶಿ| ಗವಾಂ ಮಾರ್ಗೇ ವಸ್ತ್ರಾಭರಣಯುಕ್ತೋ ಗನ್ಧರ್ವಾಯ ಬಲಿಃ| ಪಿತೃಗ್ರಹೇ ನಾಗಗ್ರಹೇ ಚ ನದ್ಯಾಂ ಬಲಿಃ| ನಾಗಾನಾಂ ವಿಶೇಷಮಾಹ- ನಾಗೇಭ್ಯಃ ಪೂರ್ವದಕ್ಷಿಣಾಯಾಂ ದಿಶಿ| ಯಕ್ಷಾಯ ಯಕ್ಷಾಯತನೇ ಯಕ್ಷಾಯತನಂ ಯಕ್ಷದೇವತಾಕ್ಷೇತ್ರಮ್| ಯದ್ವಾ ವಟವಿಟಪಿಮೂಲಂ ತತ್ರ ಯಕ್ಷಾಧಿವಾಸಸ್ಯ ಪ್ರಸಿದ್ಧತ್ವಾತ್| ಸರಿತೋಃ ಸಮಾಗಮೋ ನದ್ಯೋಃ ಸಙ್ಗಮಃ| ರಾಕ್ಷಸಯೋರಿತಿ ರಾಕ್ಷಸಾನಾಂ ಬ್ರಹ್ಮ-ರಾಕ್ಷಸಾನಾಂ ಚ ಚತುಷ್ಪಥೇ ವಾ ಭೀಷಣೇಷು ವಾ ಗಹನೇಷು ಕಾನನೇಷು| ತಯೋರೇವ ದಿಕ್ ಸಬೋಧಾ| ಪಶ್ಚಿಮಾಂ ದಿಶಮಾಸ್ಥಿತೇ ಶೂನ್ಯಾಲಯೇ ಪಿಶಾಚಾಯ ಬಲಿಃ ಸರ್ವತ್ರ ದಿಗ್ವಿಭಾಗ ಆತುರಗೃಹಾಪೇಕ್ಷಯೇತಿ|| ೧೫||

Adhikarana devAnAM baliH (16) · Śloka 16

ಶುಚಿಶುಕ್ಲಾನಿ ಮಾಲ್ಯಾನಿ ಗನ್ಧಾಃ ಕ್ಷೈರೇಯಮೋದನಮ್| ದಧಿಚ್ಛತ್ರಂ ಚ ಧವಲಂ ದೇವಾನಾಂ ಬಲಿರಿಷ್ಯತೇ||೧೬||

ದಿಗ್ದೇಶಮುಕ್ತ್ವಾ ಶುಚೀತ್ಯಾದಿನಾ ಬಲಿರುಚ್ಯತೇ| ಶುಚಿಮಾಲ್ಯಾದಿಕಂ ದೇವಾನಾಂ ಬಲಿರಿಷ್ಯತೇ||೧೬||

Adhikarana devagrahe pAnAdyupacArAH (17) · Śloka 17

ಹಿಙ್ಗುಸರ್ಷಪಷಡ್ಗ್ರನ್ಥಾವ್ಯೋಷೈರರ್ಧಪಲೋನ್ಮಿತೈಃ| ಚತುರ್ಗುಣೇ ಗವಾಂ ಮೂತ್ರೇ ಘೃತಪ್ರಸ್ಥಂ ವಿಪಾಚಯೇತ್| ತತ್ಪಾನನಾವನಾಭ್ಯಙ್ಗೈರ್ದೇವಗ್ರಹವಿಮೋಕ್ಷಣಮ್| ನಸ್ಯಾಞ್ಜನಂ ವಚಾಹಿಙ್ಗುಲಶುನಂ ಬಸ್ತವಾರಿಣಾ||೧೭||

ಹಿಙ್ಗ್ವಾದಿಭಿರರ್ಧಪಲೋನ್ಮಿತೈರ್ಘೃತಪ್ರಸ್ಥಂ ಚತುರ್ಷು ಗೋಮೂತ್ರಪ್ರಸ್ಥೇಷು ವಿಪಾಚಯೇತ್| ತದ್ ಘೃತಂ ಪಾನಾದಿಭಿರ್ದೇವಗ್ರಹವಿಮೋಕ್ಷಣಮ್| ಷಡ್ಗ್ರನ್ಥಾ ವಚಾ| ವಚಾದಿಕಂ ಬಸ್ತಮೂತ್ರೇಣ ಸಹ ನಸ್ಯಂ ಚಾಞ್ಜನಂ ಚ ದೇವಗ್ರಹವಿಮೋಕ್ಷಣಮಿತಿ ಸಮ್ಬನ್ಧಃ| ಇತಿ ದೇವಾನಾಮ್||೧೭||

Adhikarana daitye balivisheShaH (18) · Śloka 18

ದೈತ್ಯೇ ಬಲಿರ್ಬಹುಫಲಃ ಸೋಶೀರಕಮಲೋತ್ಪಲಃ||೧೮||

ಬಹಫಲಾದಿಯುಕ್ತೋ ದೈತ್ಯೇ ಬಲಿಃ| ಇತಿ ದೈತ್ಯೇ|| ೧೮||

Adhikarana nAgAnAM balyAdivisheShAH (19) · Śloka 19

ನಾಗಾನಾಂ ಸುಮನೋಲಾಜಗುಡಾಪೂಪಗುಡೌದನೈಃ| ಪರಮಾನ್ನಮಧುಕ್ಷೀರಕೃಷ್ಣಮೃನ್ನಾಗಕೇಸರೈಃ| ವಚಾಪದ್ಮಪುರೋಶೀರರಕ್ತೋತ್ಪಲದಲೈರ್ಬಲಿಃ| ಶ್ವೇತಪತ್ರಂ ಚ ಲೋಧ್ರಂ ಚ ತಗರಂ ನಾಗಸರ್ಷಪಾಃ| ಶೀತೇನ ವಾರಿಣಾ ಪಿಷ್ಟಂ ನಾವನಾಞ್ಜನಯೋರ್ಹಿತಮ್||೧೯||

ಸುಮನಃಪ್ರಭೃತಿಭಿರ್ನಾಗಾನಾಂ ಬಲಿಃ ಗುಡಾಪೂಪಃ ಸೋಮಾಲಕಮ್| ಪರಮಾನ್ನಂ ಪಾಯಸಮ್| ಪುರೋ ಗುಗ್ಗುಲುಃ| ರಕ್ತೋತ್ಪಲಂ ರಕ್ತೋತ್ಪಲಕುಸುಮಮ್| ಇತಿ ನಾಗಾನಾಮ್|| (ಶ್ವೇತಪತ್ರಮಿತ್ಯಾದಿ| ಶೀತೇನಾನುಷ್ಣೇನ ಜಲೇನ ಪಿಷ್ಟಂ ಶ್ವೇತಪತ್ರಾದಿಕಂ ನಾವನಾಞ್ಜನಯೋರ್ನಾವನೇಽಞ್ಜನೇ ಚ ಹಿತಂ ನಾಗಗ್ರಹವಿಮೋಕ್ಷಣಮಿತ್ಯರ್ಥಃ| ಶ್ವೇತಪತ್ರಂ (ವೇಲ್ಲಿಯಿಲ) ಶ್ವೇತಪದ್ಮಮಿತಿ ಕೇಚಿತ್| ನಾಗಂ ನಖಮ್| ಸರ್ಷಪಂ ಹ್ರಸ್ವಸರ್ಷಪಮ್| ನಪುಂಸಕಮನಪುಂಸಕೇನೈಕವಚ್ಚಾನ್ಯತರಸ್ಯಾಮಿತಿ ಹಿತಶಬ್ದಸ್ಯ ಕ್ಲೀಬತ್ವಮೇಕತ್ವಂ ಚ| ಇತಿ ಕೈರಲೀ ವ್ಯಾಖ್ಯಾ|| ೧೯||

Adhikarana yakShANAM balyAdivisheShAH (20) · Śloka 20

ಯಕ್ಷಾಣಾಂ ಕ್ಷೀರದಧ್ಯಾಜ್ಯಮಿಶ್ರಕೌದನಗುಗ್ಗುಲುಃ| ದೇವದಾರುತ್ಪಲಂ ಪದ್ಮಮುಶೀರಂ ವಸ್ತ್ರಕಾಞ್ಚನಮ್| ಹಿರಣ್ಯಂ ಚ ಬಲಿರ್ಯೋಜ್ಯೋ ಮೂತ್ರಾಜ್ಯಕ್ಷೀರಮೇಕತಃ| ಸಿದ್ಧಂ ಸಮೋನ್ಮಿತಂ ಪಾನನಾವನಾಭ್ಯಞ್ಜನೇ ಹಿತಮ್| ಹರೀತಕೀ ಹರಿದ್ರೇ ದ್ವೇ ಲಶುನೋ ಮರಿಚಂ ವಚಾ| ನಿಮ್ಬಪತ್ರಞ್ಚ ಬಸ್ತಾಮ್ಬುಕಲ್ಕಿತಂ ನಾವನಾಞ್ಜನಮ್||೨೦||

ಕ್ಷೀರಾದಿಕಂ ಹಿರಣ್ಯಾನ್ತಂ ಯಕ್ಷಾಣಾಂ ಬಲಿಃ| ಮಿಶ್ರಕೌದನಂ ಮಾಂಸಮಿಶ್ರಮೋದನಮ್| ವಸ್ತ್ರಕಾಞ್ಚನಂ ಹಿರಣ್ಯಂ ಸ್ವರ್ಣಮ್| ನಾಗಕೇಸರಮಿತಿ ಕೇಚಿತ್| ಮೂತ್ರಂ ಘೃತಂ ಕ್ಷೀರಂ ಚ ಸಮೋನ್ಮಿತಂ ತುಲ್ಯಮೇಕತ್ರ ಮಿಶ್ರೀಭಾವೇನ ಸಿದ್ಧಂ ಪಾನಾದೌ ಹಿತಮ್| ಹರೀತಕ್ಯಾದಿಕಂ ಬಸ್ತಮೂತ್ರೇಣ ಕಲ್ಕಿತಂ ನಾವನಮಞ್ಜನಂ ಚ ನಾವನಾಞ್ಜನವಿಷಯೇ ಹಿತಮ್| ಇತಿ ಯಕ್ಷಾಣಾಮ್||೨೦||

Adhikarana brahmarakShasAM balyAdivisheShAH (21) · Śloka 21

ಬ್ರಹ್ಮರಕ್ಷೋ ಬಲಿಃ ಸಿದ್ಧಂ ಯವಾನಾಂ ಪೂರ್ಣಮಾಢಕಮ್| ತೋಯಸ್ಯ ಕುಮ್ಭಃ ಪಲಲಂ ಛತ್ರಂ ವಸ್ತ್ರಂ ವಿಲೇಪನಮ್| ಗಾಯತ್ರೀವಿಂಶತಿಪಲಕ್ವಾಥೇಽರ್ಧಪಲಿಕೈಃ ಪಚೇತ್| ತ್ರ್ಯೂಷಣತ್ರಿಫಲಾಹಿಙ್ಗುಷಡ್ಗ್ರನ್ಥಾಮಿಸಿಸರ್ಷಪೈಃ| ಗೋಮೂತ್ರೇ ತ್ರಿಗುಣೇ ಪಾನನಸ್ಯಾಭ್ಯಙ್ಗೇಷು ತದ್ಧಿತಮ್||೨೧||

ಯವಾನಾಂ ಪೂರ್ಣಮನ್ಯೂನಾಧಿಕಮಾಢಕಂ ಸಿದ್ಧಂ ಕಲ್ಕಿತಂ ತೋಯಕುಮ್ಭಾದಿಕಂ ಚ ಬ್ರಹ್ಮರಕ್ಷಸೋ ಬಲಿರ್ಭವತಿ| ಆಢಕಂ ಷೋಡಶಕುಡವಪ್ರಮಾಣಮ್| ತೋಯಸ್ಯ ಕುಮ್ಭೋ ದ್ರೋಣಃ| ಪಲಲಂ ಮಾಂಸಮ್| ವಿಲೇಪನಂ ಚನ್ದನಾದ್ಯನುಲೇಪನಮ್| ಗಾಯತ್ರೀವಿಂಶತಿಪಲಸ್ಯ ಖದಿರಪಲವಿಂಶತೇಃ ಕ್ವಾಥೇ ಕ್ವಾಥಪರಿಭಾಷಯಾ ಕೃತೇ ತ್ರ್ಯೂಷಣಾದಿಭಿರರ್ಧಪಲೈಃ ಸಹ ಸಪ್ತ ಕುಡವಾನ್ ಸರ್ಪಿಷಸ್ತ್ರಿಗುಣೇ ಗೋಮೂತ್ರೇ ಪಚೇತ್| ತತ್ ಪಕ್ವಂ ಘೃತಂ ಬ್ರಹ್ಮರಕ್ಷಸಾಂ ಪಾನಾದಿಷು ಹಿತಮ್| ಲಶುನಂ ಸಿತಲಶುನಮ್| ಇತಿ ಬ್ರಹ್ಮರಕ್ಷಸಾಮ್||೨೧||

Adhikarana rakShasAM balyAdivisheShAH (22) · Śloka 22

ರಕ್ಷಸಾಂ ಪಲಲಂ ಶುಕ್ಲಂ ಕುಸುಮಂ ಮಿಶ್ರಕೌದನಮ್| ಬಲಿಃ ಪಕ್ವಾಮಮಾಂಸಾನಿ ನಿಷ್ಪಾವಾ ರುಧಿರೋಕ್ಷಿತಾಃ| ನಕ್ತಮಾಲಶಿರೀಷತ್ವಙ್ಮೂಲಪುಷ್ಪಫಲಾನಿ ಚ| ತದ್ವಚ್ಚ ಕೃಷ್ಣಪಾಟಲ್ಯಾ ಬಿಲ್ವಮೂಲಂ ಕಟುತ್ರಿಕಮ್| ಹಿಙಿಗ್ವನ್ದ್ರಯವಸಿದ್ಧಾರ್ಥಲಶುನಾಮಲಕೀಫಲಮ್| ನಾವನಾಞ್ಜನಯೋರ್ಯೋಜ್ಯೋ ಬಸ್ತಮೂತ್ರದ್ರುತೋಽಗದಃ| ಏಭಿರೇವ ಘೃತಂ ಸಿದ್ಧಂ ಗವಾಂ ಮೂತ್ರೇ ಚತುರ್ಗುಣೇ| ರಕ್ಷೋಗ್ರಹಾನ್ ವಾರಯತೇ ಪಾನಾಭ್ಯಞ್ಜನನಾವನೈಃ||೨೨||

ಪಲಲಾದಿಕಂ ರುಧಿರೋಕ್ಷಿತನಿಷ್ಪಾವಾನ್ತಂ ರಕ್ಷಸಾಂ ಬಲಿಃ ಬಲಿಸಾಧನಮ್| ಪಲಲಂ ತಿಲಚೂರ್ಣಮ್| ಮಿಶ್ರಕೌದನಂ ಮಾಂಸೇನ ಸಹ ಪಕ್ವಮೋದನಮ್| ಪಕ್ವಾನ್ಯಾಮಾನಿ ಚ ಮಾಂಸಾನಿ| ರುಧಿರೇಣ ರಕ್ತೋನೋಕ್ಷಿತಃ ಸಿಕ್ತಾಃ| ನಕ್ತಮಾಲಶಿರೀಷತ್ವಗಾದಿಕಂ ಬಸ್ತಮೂತ್ರದ್ರುತೋಽಗದೋ ರಕ್ಷಸಾಂ ನಾವನಾಞ್ಜನಯೋರ್ನಾವನವಿಷಯೇ ಚ ಯೋಜ್ಯಃ| ನಕ್ತಮಾಲಃ ಕರ್ಣಿಕಾರಃ| ಕೃಷ್ಣಪಾಟಲೀ ಕೃಷ್ಣಪುಷ್ಪಾ ಪಾಟಲೀ| ಏಭಿರೇವ ನಕ್ತಮಾಲತ್ವಗಾದಿಭಿಶ್ಚತುರ್ಗುಣೇ ಗೋಮೂತ್ರೇ ಸಿದ್ಧಂ ಪಕ್ವಂ ಘೃತಂ ಪಾನಾದಿಭೀ ರಕ್ಷೋಗ್ರಹಾನ್ ವಾರಯತೇ ರುಣಾದ್ಧಿ| ಇತಿ ರಕ್ಷಸಾಮ್|| ೨೨||

Adhikarana pishAcAnAM balyAdivisheShAH (23) · Śloka 23

ಪಿಶಾಚಾನಾಂ ಬಲಿಃ ಸೀಧುಃ ಪಿಣ್ಯಾಕಃ ಪಲಲಂ ದಧಿ| ಮೂಲಕಂ ಲವಣಂ ಸರ್ಪಿಃ ಸಭೂತೌದನಯಾವಕಮ್| ಹರಿದ್ರಾದ್ವಯಮಞ್ಜಿಷ್ಠಾಮಿಸಿಸೈನ್ಧವನಾಗರಮ್| ಹಿಙ್ಗುಪ್ರಿಯಙ್ಗುತ್ರಿಕಟುರಸೋನತ್ರಿಫಲಾವಚಾಃ| ಪಾಟಲೀಶ್ವೇತಕಟಭೀಶಿರೀಷಕುಸುಮೈರ್ಘೃತಮ್| ಗೋಮೂತ್ರಪಾದಿಕಂ ಸಿದ್ಧಂ ಪಾನಾಭ್ಯಞ್ಜನಯೋರ್ಹಿತಮ್| ಬಸ್ತಾಮ್ಬುಪಿಷ್ಟೈಸ್ತೈರೇವ ಯೋಜ್ಯಮಞ್ಜನನಾವನಮ್||೨೩||

ಸೀಧ್ವಾದಿ ಯಾವಕಾನ್ತಂ ಪಿಶಾಚಾನಾಂ ಬಲಿಃ| ಸೀಧುರಿಕ್ಷುಕೃತಂ ಮದ್ಯಮ್| ಪಿಣ್ಯಾಕಸ್ತಿಲಕಲ್ಕಃ| ಪಲಲಂ ಮಾಂಸಮ್| ಮೂಲಕಂ ತತ್ಸಂಜ್ಞಂ ಶಾಕಮ್| ಭೂತೌದನಂ ಮಾಂಸೌದನಮ್| ಯಾವಕಂ ವಾಟ್ಯಮ್| ಪಾಟಲ್ಯಾದಿಭಿಃ ಕೃತೇ ಕ್ವಾಥೇ ಹರಿದ್ರಾದ್ವಯಾದಿಕಂ ಕಲ್ಕೀಕೃತ್ಯ ಗೋಮೂತ್ರಚತುರ್ಭಾಗಯುಕ್ತಂ ಸಿದ್ಧಂ ಘೃತಂ ಪಾನೇಽಭ್ಯಞ್ಜನೇ ಚ ಪಿಶಾಚಾನಾಂ ಪಿಶಾಚಗ್ರಹಗೃಹೀತಾನಾಂ ಹಿತಮ್| ಶ್ವೇತಕಟಭೀ ಸುಷವೀ| ಪುಲ್ಲಾನೀತಿ ಭಾಷಾಯಾಮ್| ಬಸ್ತಾಮ್ಬುನಾವಿಮೂತ್ರೇಣ ಪಿಷ್ಟೈಸ್ತೈರೇವ ಹರಿದ್ರಾದ್ವಯಾದಿಭಿರಞ್ಜನಂ ನಾವನಂ ಚ ಯೋಜ್ಯಮ್| ಇತಿ ಪಿಶಾಚಾನಾಮ್||೨೩||

Adhikarana tIkShNapratikUlopacAraniShedhavisheShAH (24) · Śloka 24

ದೇವರ್ಷಿಪಿತೃಗನ್ಧರ್ವೇ ತೀಕ್ಷ್ಣಂ ನಸ್ಯಾದಿ ವರ್ಜಯೇತ್| ಸರ್ಪಿಷ್ಪಾನಾದಿ ಮೃದ್ವಸ್ಮಿನ್ ಭೈಷಜ್ಯಮವಚಾರಯೇತ್| ಋತೇ ಪಿಶಾಚಾತ್ಸರ್ವೇಷು ಪ್ರತಿಕೂಲಂ ಚ ನಾಚರೇತ್| ಸವೈದ್ಯಮಾತುರಂ ಘ್ನನ್ತಿ ಕ್ರುದ್ಧಾಸ್ತೇ ಹಿ ಮಹೌಜಸಃ||೨೪||

ದೇವಾದಿಚತುಷ್ಟಯೇ ತೀಕ್ಷ್ಣಮಸಹನೀಯಂ ನಸ್ಯಾದಿಕಂ ವರ್ಜಯೇತ್| ಅಸ್ಮಿಂಶ್ಚತುಷ್ಟಯೇ ಸರ್ಪಿಷ್ಪಾನಾದಿಕಂ ಸರ್ವಂ ಚ ಭೈಷಜ್ಯಂ ಮೃದ್ವತೀಕ್ಷ್ಣಮವಚಾರಯೇತ್ ಪ್ರಯೋಜಯೇತ್| ಸರ್ಪಿಷ್ಪಾನಾದೀತ್ಯತ್ರಾದಿಶಬ್ದೇನ ನಾವನಾಭ್ಯಙ್ಗಾದಿಪರಿಗ್ರಹಃ| ಸರ್ವೇಷು ಗ್ರಹೇಷು ಪ್ರತಿಕೂಲಂ ನ ಕಿಞ್ಚಿದಪ್ಯಾಚರೇತ್ ಪಿಶಾಚಾದೃತೇ ಪಿಶಾಚಂ ವರ್ಜಯಿತ್ವಾ| ತೇ ಸುರಾದಯಃ ಪಿಶಾಚವರ್ಜಿತಾ ಮಹೌಜಸೋಽನಿರ್ದೇಶ್ಯಶಕ್ತಿವಿಶೇಷಾ ಯತಃ ಪ್ರತಿಕೂಲಾಚರಣೇನ ಕ್ರುದ್ಧಾಃ ಸವೈದ್ಯಮಾತುರಂ ಘ್ನನ್ತಿ|| ೨೪||

Adhikarana cittaviplave japAdyupacArAH (25) · Śloka 25

ಈಶ್ವರಂ ದ್ವಾದಶಭುಜಂ ನಾಥಮಾರ್ಯಾವಲೋಕಿತಮ್| ಸರ್ವವ್ಯಾಧಿಚಿಕಿತ್ಸಾಂ ಚ ಜಪನ್ಸರ್ವಗ್ರಹಾಞ್ಜಯೇತ್| ತಥೋನ್ಮಾದಾನಪಸ್ಮಾರಾನನ್ಯಂ ವಾ ಚಿತ್ತವಿಪ್ಲವಮ್| ಮಹಾವಿದ್ಯಾಂ ಚ ಮಾಯೂರೀಂ ಶುಚಿಸ್ತಂ ಶ್ರಾವಯೇತ್ಸದಾ| ಭೂತೇಶಂ ಪೂಜಯೇತ್ಸ್ಥಾಣುಂ ಪ್ರಮಥಾಖ್ಯಾಂಶ್ಚ ತದ್ಗಣಾನ್| ಜಪನ್ ಸಿದ್ಧಾಂಶ್ಚ ತನ್ಮಾತ್ರಾನ್ ಗ್ರಹಾನ್ ಸರ್ವಾನಪೋಹತಿ||೨೫||

ನಾಥಮಾರ್ಯಾವಲೋಕಿತಾಖ್ಯಂ ಧ್ಯಾತ್ವಾ ಸರ್ವವ್ಯಾಧಿಚಿಕಿತ್ಸಾಂ ವಿದ್ಯಾಂ ಜಪನ್ ಸಮಾಹಿತಃ ಪೌನಃಪುನ್ಯೇನೋಚ್ಚರನ್ ಸರ್ವಗ್ರಹಾನುನ್ಮಾದಾದೀಂಶ್ಚ ಜಯೇತ್| ಈಶ್ವರಾದಿಕಂ ತಸ್ಯೈವ| (ಈಶ್ವರಮಿತಿ)| ದ್ವಾದಶಭುಜಂ ದ್ವಾದಶಸಙ್ಖ್ಯೈರ್ಭುಜೈರ್ಯುತಂ ಆರ್ಯಾವಲೋಕಿತಂ ಆರ್ಯಯಾ ಪಾರ್ವತ್ಯಾ ಅವಲೋಕಿತಮಾರ್ಯಾಸಹಿತಮಿತ್ಯರ್ಥಃ| ನಾಥಂ ಲೋಕೈಕನಾಥಮೀಶ್ವರಂ ಮಹಾದೇವಂ ಧ್ಯಾತ್ವಾ ಸರ್ವವ್ಯಾಧಿಚಿಕಿತ್ಸಾಂ ಲಕ್ಷಣಯಾ ಸರ್ವವ್ಯೋಧೇಃ ಪ್ರಾಯಶ್ಚಿತ್ತಭೂತಂ ಶ್ರೀಪಞ್ಚಾಕ್ಷರಾದಿಕಂ ಮನ್ತ್ರಂ ಜಪನ್ ಸಮಾಹಿತಃ ಪೌನಃಪುನ್ಯೋನೋಚ್ಚರನ್ ಸರ್ವಗ್ರಹಾನ್ ಪಞ್ಚಸಪ್ತಾಷ್ಟಾದಶವಿಧಾನುನ್ಮಾದಾನ್ ವಕ್ಷ್ಯಮಾಣಲಕ್ಷಣಾನಪಸ್ಮಾ ರಾನಪಸ್ಮಾರಗ್ರಹಾನನ್ಯಂ ವಾ ಯೇನ ಕೇನಾಪಿ ಹೇತುನೋತ್ಪನ್ನಂ ಚಿತ್ತವಿಪ್ಲವಂ ಬುದ್ಧಿ ವಿಭ್ರಂಶಂ ಜಯೇಚ್ಛಮಯೇತ್| ಇತಿ ಕೈರಲೀ)| ತಂ ಚಾತುರಂ ಶುಚಿರ್ವೈದ್ಯೋ ಮಾಯೂರೀಂ ಮಹಾವಿದ್ಯಾಂ ಸದಾ ಶ್ರಾವಯೇತ್| ('ಶುಚಿಂ ತಂ ಶ್ರಾವಯೇತ್ಸದಾ' ಇತಿ ಚ ಪಾಠಃ| ಮಹಾವಿದ್ಯಾಮಿತಿ| ಶುಚಿಂ ಕಾಯವಾಙ್ಹ್ಮನೋವ್ಯಾಪಾರಶುದ್ಧಂ ತಮಾತುರಂ ಮಹಾವಿದ್ಯಾಂ ಬುದ್ಧದೇವತಾಖ್ಯಾಂ ಮಾಯುರೀಂ ತ್ವರಿತಾಂ ಸದಾನವರತಂ ಶ್ರಾವಯೇತ್ ತಂ ಪ್ರತಿ ಬ್ರೂಯಾತ್| ಇತಿ ಕೈರಲೀ)| ಭೂತೇಶಮಿತಿ| ಭೂತನಾಥವಿಗ್ರಹಂ ಸ್ಥಾಣುಞ್ಚ ಭಗವನ್ತಂ ಮಹೇಶ್ವರಂ ಪ್ರಮಥಾಖ್ಯಾಂಸ್ತದ್ಗಣಾಂಶ್ಚ ಪೂಜಯೇತ್| ತದಿತಿ ಸ್ಥಾಣುಪರಾಮರ್ಶಃ| (ಭೂತೇಶಮಿತಿ| ಭೂತೇಶಂ ಸರ್ವಭೂತಾನಾಮೀಶಂ ಸ್ಥಾಣುಂ ಮಹಾದೇವಂ ಪ್ರಮಥಾಖ್ಯಾನ್ ಭೂತಪ್ರಮಥಗುಹ್ಯಕಾದಿಷು ಮಧ್ಯೇ ಪ್ರಮಥಾಖ್ಯಾನ್ ಗಣಾಂಶ್ಚ ತದಿತಿ ಸ್ಥಾಣುಪರಾಮರ್ಶಃ ಪೂಜಯೇತ್ ಬಲಿಕರ್ಮಾದಿಪೂಜಾವಿಶೇಷೈಃ ಪ್ರಸಾದಯೇತ್| ಜಪನ್ನಿತಿ| ಸಿದ್ಧಾನ್ ಪ್ರಸಿದ್ಧಾಂಸ್ತನ್ಮನ್ತ್ರಾನಘೋರಾದೀನಿತಿ ಪಾಟ್ಯಕಾರಃ| ಗ್ರನ್ಥಾನ್ತರೇಽನ್ಯಥಾ ಪ್ರೋಕ್ತಂ ಚ - ವ್ಯೋಮಾ ವಾಪೀ ಮಹಾವಿದ್ಯಾ ಮಹಾಪಾಶುಪತಸ್ತಥಾ| ಫೇನಲಾಕ್ಷೀ ವಜ್ರಗಾನ್ಧಾರೀ ಮಾಲಿನಿ ಮನ್ತ್ರಸಂಹಿತಾ| ತಥಾ ಚಿವಿಡನಾಸಾ ಚ ಶೂಲಿನೀ ಚೇತಿ ಕೀರ್ತಿತಾಃ| ತನ್ತ್ರೇ ಸಿದ್ಧಾ ಮಹಾಮನ್ತ್ರಾ ಗ್ರಹಾಣಾಂ ನಿಗ್ರಹಾ ಹಿತಾಃ| ಇತಿ ತಾನ್ ಮನ್ತ್ರಾನ್ ಜಪನ್ ಸರ್ವಾನ್ ಗ್ರಹಾನಪೋಹತಿ| ಇತಿ ಕೈರಲೀ) ||೨೫||

Adhikarana atideshena cikitsAnirdeshaH (8) · Śloka 8

ಯಚ್ಚಾನನ್ತರಯೋಃ ಕಿಞ್ಚಿದ್ವಕ್ಷ್ಯತೇಽಧ್ಯಾಯಯೋರ್ಹಿತಮ್| ಯಚ್ಚೋಕ್ತಮಿಹ ತತ್ಸರ್ವಂ ಪ್ರಯುಞ್ಜೀತ ಪರಸ್ಪರಮ್||೨೬|| ಇತಿ ವೈದ್ಯಪತಿಸಿಂಹಗುಪ್ತಸ್ಯ ಸೂನೋರ್ವಾಗ್ಭಟಸ್ಯ ಕೃತಾವಷ್ಟಾಙ್ಗಸಂಗ್ರಹಸಂಹಿತಾಯಾಮುತ್ತರತನ್ತ್ರೇ ಭೂತಪ್ರತಿವೇಧೋ ನಾಮಾಷ್ಟಮೋಽಧ್ಯಾಯಃ||೮||

ಯಚ್ಚೇತ್ಯಾದಿನೋನ್ಮಾದಾಪಸ್ಮಾರಯೋರ್ಭೂತಾನಾಞ್ಚ ಸಾಧಾರಣೀ ಚಿಕಿತ್ಸಾ ಬೋದ್ಧವ್ಯೇತ್ಯುಕ್ತಮ್| (ಯಚ್ಚೇತಿ| ಅನನ್ತರಯೋರುನ್ಮಾದಾಪಸ್ಮಾರಪ್ರತಿಷೇಧಯೋರ್ಯದ್ಧಿತಂ ಚಿಕಿತ್ಸಿತಂ ವಕ್ಷ್ಯತೇ ಇಹ ಭೂತಪ್ರತಿಷೇಧೇ ಯದುಕ್ತಂ ಚ ತತ್ಸರ್ವಂ ಕರ್ಮ ಪರಸ್ಪರಂ ವ್ಯತ್ಯಸ್ಯ ಪ್ರಯೋಜಯೇತ್| ತಚ್ಚೇತಿ ಚ ಶಬ್ದೇನ ಅಸ್ಮಿನ್ನಾಧ್ಯಾಯೇ ದೇವದಾನವಗ್ರಹದೀನುದ್ದಿಶ್ಯ ಪ್ರೋಕ್ತಂ ಕರ್ಮಪಿ ಪರಸ್ಪರಂ ಪ್ರಯುಞ್ಜೀತೇತಿ ದ್ಯೋತಿತಮ್| ಇತಿ ಕೈರಲೀ)||೨೬|| ಇತಿ ಶ್ರೀಮನ್ಮಹಾಮಹೋಪಾಧ್ಯಾಯೇನ್ದುವಿರಚಿತಾಯಾ- ಮಷ್ಟಾಙ್ಗಸಂಗ್ರಹವ್ಯಾಖ್ಯಾಯಾಂ ಶಶಿಲೇಖಾಯಾಮುತ್ತರತನ್ತ್ರೇ ಅಷ್ಟಮೋಽಧ್ಯಾಯಃ ||೮||