Adhikarana atha mukharogapratiShedho nAma ShaDviMsho~adhyAyaH - pratij~jA (1) · Śloka 1
অথাত মুখরোগপ্রতিষেধং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||
अथात मुखरोगप्रतिषेधं नामाध्यायं व्याख्यास्यामः| इति ह स्माहुरात्रेयादयो महर्षयः||१||
🔊 Audio coming soon
উক্তক্রমেণৈব মুখরোগাণাং চিকিত্সাং প্রদর্শযিতুমধ্যায আরভ্যতে||১||
Adhikarana khaNDauShThacikitsA (2) · Śloka 2
স্নিগ্ধস্বিন্নস্য খণ্ডৌষ্ঠস্যৌষ্ঠান্তৌ বিলিখ্য সুশ্লিষ্টৌ ক্ষৌমসূত্রেণ সীব্যেত্| শতধৌতঘৃতাভ্যক্তাং চাস্মৈ কবলিকাং ব্রণস্যোপরি দদ্যাত্| প্রক্লিন্নং চ ব্রণং ব্রণচিকিত্সযা সাধযেত্||২||
स्निग्धस्विन्नस्य खण्डौष्ठस्यौष्ठान्तौ विलिख्य सुश्लिष्टौ क्षौमसूत्रेण सीव्येत्| शतधौतघृताभ्यक्तां चास्मै कवलिकां व्रणस्योपरि दद्यात्| प्रक्लिन्नं च व्रणं व्रणचिकित्सया साधयेत्||२||
🔊 Audio coming soon
তৈলনস্যান্তং খণ্ডৌষ্ঠসাধনম্| স্নিগ্ধস্বিন্নস্য পুংসঃ খণ্ডৌষ্ঠস্যোষ্ঠান্তৌ সদ্বৈদ্যো বিলিখ্য সুশ্লিষ্টৌ কৃত্বা সূত্রেণ সীব্যেত্| সুবোধম্||২||
Adhikarana khaNDauShThacikitsA (3) · Śloka 3
জ্যোতিষ্মতীলোধ্রমধুকপটোলোত্পলকাকমাচীশ্রাবণীসারিবাভিস্তৈলং বিপক্বমভ্যঞ্জনাচ্ছোধনরোপণম্| তথা বাতহরমধুরৌষধসিদ্ধং তৈলং নস্যম্||৩||
ज्योतिष्मतीलोध्रमधुकपटोलोत्पलकाकमाचीश्रावणीसारिवाभिस्तैलं विपक्वमभ्यञ्जनाच्छोधनरोपणम्| तथा वातहरमधुरौषधसिद्धं तैलं नस्यम्||३||
🔊 Audio coming soon
জ্যোতিষ্মত্যাদিভির্বিপক্বং তৈলমভ্যঙ্গাত্ খণ্ডৌষ্ঠব্রণস্য শোধনং রোপণং চ| জ্যোতিষ্মতী কঙ্গুণিকা| বাতহরৈর্ভদ্রদার্বাদিভির্মধুরবর্গেণ চ সূত্রোক্তেন সিদ্ধং তৈলং নস্যং তথা শোধনং রোপণং চ||৩||
Adhikarana vAtauShThakopacikitsA (4) · Śloka 4
বাতজ ওষ্ঠকোপে দেবদারুগুগ্গুলুসর্জরসমধূচ্ছিষ্টসিদ্ধেন মহাস্নেহেনাভ্যঙ্গঃ| তেনৈব সমধুকচূর্ণেন প্রতিসারণম্| তসভ্যক্তেন পিচুনা প্রচ্ছদনম্| এরণ্ডপল্লবৈঃ ক্ষীরক্বথিতৈর্নাডীস্বেদঃ| খণ্ডৌষ্ঠোক্তং নাবনং শিরোঽভ্যঙ্গশ্চ||৪||
वातज ओष्ठकोपे देवदारुगुग्गुलुसर्जरसमधूच्छिष्टसिद्धेन महास्नेहेनाभ्यङ्गः| तेनैव समधुकचूर्णेन प्रतिसारणम्| तसभ्यक्तेन पिचुना प्रच्छदनम्| एरण्डपल्लवैः क्षीरक्वथितैर्नाडीस्वेदः| खण्डौष्ठोक्तं नावनं शिरोऽभ्यङ्गश्च||४||
🔊 Audio coming soon
শিরোঽভ্যঙ্গশ্চেত্যেবমন্তং বাতৌষ্ঠকোপে| মহাস্নেহঃ চতুষ্টযম্| তেনৈবেতি দেবদার্বাদিসিদ্ধমহাস্নেহেন মধুযষ্টীচূর্ণযুক্তেন প্রতিসারণম্| রসক্রিযা কল্কশ্চূর্ণশ্চেতি ত্রিবিধং প্রতিসারণং পূর্বমুক্তম্| পিচুঃ কার্পাসচুলুকম্||৪||
Adhikarana pittauShThakopacikitsA chatauShThe ca (5) · Śloka 5
পিত্তোত্থেঽভিঘাতজে চ জলৌকোভির্বিস্রাবণম্| পত্তঙ্গযষ্টীচ্ছিন্নরুহাবিপক্বং সর্পিরভ্যঙ্গঃ| মধুমধূকলোধ্রসর্জরসৈঃ প্রতিসারণম্| পিত্তবিদ্রধিবচ্চ চিকিত্সা||৫||
पित्तोत्थेऽभिघातजे च जलौकोभिर्विस्रावणम्| पत्तङ्गयष्टीच्छिन्नरुहाविपक्वं सर्पिरभ्यङ्गः| मधुमधूकलोध्रसर्जरसैः प्रतिसारणम्| पित्तविद्रधिवच्च चिकित्सा||५||
🔊 Audio coming soon
পিত্তজ ওষ্ঠকোপে তথাঽভিঘাতজে ক্ষতজে চ পিত্তবিদ্রধিচিকিত্সান্তম্| সুবোধম্||৫||
Adhikarana raktauShThakopacikitsA (6) · Śloka 6
রক্তজেঽপ্যচিরোত্থিতে পৈত্তিকবত্ প্রতিকুর্যাত্|৬|
रक्तजेऽप्यचिरोत्थिते पैत्तिकवत् प्रतिकुर्यात्|६|
🔊 Audio coming soon
রক্তজে পৈত্তিকবত্ রক্তৌষ্ঠকোপস্যাসাধ্যত্বোক্তেরচিরোত্থিত ইতি বিশেষণম্||৬||
Adhikarana kaphauShThakopacikitsA (6) · Śloka 6
কফজে জলৌকোভিঃ শাকাদিপত্রৈর্বা রক্তং বিস্রাব্য ব্যোষপাঠাযবক্ষারস্বর্জিকাক্ষারৈঃ সক্ষৌদ্রৈঃ প্রতিসারযেত্| কুষ্ঠতগরদন্তীশ্যামাবিডহরিতালবিডঙ্গৈর্বা| স্বেদনস্য ধূমকবলাংশ্চ কফঘ্নানবচারযেত্||৬||
कफजे जलौकोभिः शाकादिपत्रैर्वा रक्तं विस्राव्य व्योषपाठायवक्षारस्वर्जिकाक्षारैः सक्षौद्रैः प्रतिसारयेत्| कुष्ठतगरदन्तीश्यामाबिडहरितालविडङ्गैर्वा| स्वेदनस्य धूमकवलांश्च कफघ्नानवचारयेत्||६||
🔊 Audio coming soon
কফঘ্নস্বেদাদ্যুপচারণান্তং কফৌষ্ঠকোপে| তত্র প্রথমং জলৌকোভিঃ শাকাখ্যতরূপত্রেণ বা রক্তবিস্রাবণম্| ততো ব্যোষাদিভিঃ সক্ষৌদ্রৈঃ প্রতিসারণমিতি সম্বন্ধঃ||৬||
Adhikarana medoShThakopacikitsA (7) · Śloka 7
মেদোজে দন্তচ্ছদং স্বেদযিত্বা বৃদ্ধিপত্রেণ বিপাট্য শুদ্ধমেদসমগ্নিমুপচরেত্| কফজোক্তৈশ্চ প্রতিসারণম্| জলার্বুদোক্তং রোপণম্||৭||
मेदोजे दन्तच्छदं स्वेदयित्वा वृद्धिपत्रेण विपाट्य शुद्धमेदसमग्निमुपचरेत्| कफजोक्तैश्च प्रतिसारणम्| जलार्बुदोक्तं रोपणम्||७||
🔊 Audio coming soon
রোপণান্তং মেদোষ্ঠ্কোপে| দন্তশ্ছদ ওষ্ঠঃ| শুদ্ধমেদসং সমগ্নিনামুপচরেত্| কফজোক্তৈর্ব্যোষাদিভিঃ প্রতিসারণম্| জলার্বুদোক্তং হরিদ্রাদিবিপক্বং তৈলং ব্রণরোপণম্||৭||
Adhikarana jalArbudacikitsA (8) · Śloka 8
জলার্বুদং ভিত্বা বিশোধ্য ত্রিকটুকটুকাতেজোবতীযবক্ষারস্বর্জিকাসৈন্ধবকাসীসচূর্ণৈঃ সক্ষৌদ্রৈঃ প্রতিসারযেত্| অবগাঢমতিবৃদ্ধং বা ক্ষারেণাগ্নিনা বা দহেদ্ধরিদ্রালোধ্রমধুকমালতীহরেণুতগরৈর্বিপক্বং তৈলং রোপণম্||৮||
जलार्बुदं भित्वा विशोध्य त्रिकटुकटुकातेजोवतीयवक्षारस्वर्जिकासैन्धवकासीसचूर्णैः सक्षौद्रैः प्रतिसारयेत्| अवगाढमतिवृद्धं वा क्षारेणाग्निना वा दहेद्धरिद्रालोध्रमधुकमालतीहरेणुतगरैर्विपक्वं तैलं रोपणम्||८||
🔊 Audio coming soon
জলার্বুদং ভিত্বা ঋজ্ববগাঢঞ্চ শস্ত্রং ন্যস্য বিশোধ্য অন্তর্মলাপনযনপ্রক্ষালনাদিনা সক্ষৌদ্রৈস্ত্রিকটুকাদিভিঃ প্রতিসারণং কুর্যাত্| অবগাঢং ক্ষারেণাতিবৃদ্ধমগ্নিনা বা দহেত্| সুবোধম্| সন্নিপাতমাংসৌষ্ঠকোপৌষ্ঠার্বুদান্যসাধ্যান্যুক্তানি| ইত্যোষ্ঠ্রোগাঃ||৮||
Adhikarana gaNDAlajIcikitsA (9) · Śloka 9
গণ্ডালজীমপক্বাং শোফবদ্বিদগ্ধামুপনাহ্য পক্বাং বিদার্য ব্রণবত্ সাধযেত্||৯||
गण्डालजीमपक्वां शोफवद्विदग्धामुपनाह्य पक्वां विदार्य व्रणवत् साधयेत्||९||
🔊 Audio coming soon
ব্রণবত্ সাধযেদিত্যন্তং গণ্ডালজ্যাম্| ইতি গণ্ডরোগঃ|| ৯||
Adhikarana SItadantacikitsA (10) · Śloka 10
শীতদন্তস্যোষ্ণাম্বুস্বিন্নস্য ব্রীহিমুখেন পালীং লিখিত্বা পিচুতৈলেন দহেত্| প্রতিসারযেচ্চ প্রিযঙ্গুজম্ব্বস্থিদাডিমত্বক্ত্রিফলারসাঞ্জনসৈন্ধবশুণ্ঠীমুস্তচূর্ণৈঃ সমধুঘৃতৈঃ| ক্ষীরিবৃক্ষকষাযো গণ্ডূষঃ| অণুতৈলং নস্যম্||১০||
शीतदन्तस्योष्णाम्बुस्विन्नस्य व्रीहिमुखेन पालीं लिखित्वा पिचुतैलेन दहेत्| प्रतिसारयेच्च प्रियङ्गुजम्ब्वस्थिदाडिमत्वक्त्रिफलारसाञ्जनसैन्धवशुण्ठीमुस्तचूर्णैः समधुघृतैः| क्षीरिवृक्षकषायो गण्डूषः| अणुतैलं नस्यम्||१०||
🔊 Audio coming soon
অণুতৈলনস্যান্তং শীতাখ্যে দন্তরোগে| শীতো দালন ইতি পর্যাযৌ| প্রতিসারযেচ্চ| কেনেত্যাহ প্রিযঙ্গ্বাদীনাং চূর্ণেঃ সমধুঘৃতৈঃ||১০||
Adhikarana dantaharSha - dantabhedayoshcikitsA (11) · Śloka 11
দন্তহর্ষে ভেদে চ বাতহরসিদ্ধং তৈলমেলাকুষ্ঠপাটলীত্বগ্বিপক্বো মজ্জা বা গণ্ডূষঃ| স্নিগ্ধাশ্চ নস্যাদযঃ||১১||
दन्तहर्षे भेदे च वातहरसिद्धं तैलमेलाकुष्ठपाटलीत्वग्विपक्वो मज्जा वा गण्डूषः| स्निग्धाश्च नस्यादयः||११||
🔊 Audio coming soon
স্নিগ্ধাশ্চ নস্যাদয ইত্যন্তং দন্তহর্ষদন্তভেদযোঃ| এলাদিবিপক্বো মজ্জা বিজ্ঞেযঃ||১১||
Adhikarana dantacAlacikitsA (12) · Śloka 12
দন্তচালে দশমূলক্বাথেন তৈলসর্পির্বসাক্ষৌদ্রৈশ্চ কবলঃ| পিপ্পলীসৈন্ধবতুত্থলোধ্রপত্তঙ্গস্রোতোজমুস্তাত্রিফলাঃ প্রতিসারণম্| নিযতং চ স্নৈহিকধূমপাযী স্নিগ্ধমধুরাহারো বিস্রাবণপরঃ স্যাত্| চন্দনপদ্মকমধুকবিদারীকশেরুকনীলোত্পলমৃদ্বীকাজীবকর্ষভসশর্করাণাং প্রত্যেকং পলেন ক্ষীরেণ চ মাংসরসাদ্বিগুণেন তৈলপ্রস্থং বিপাচযেত্| এতন্নস্যগণ্ডূষপ্রযোগাত্পরং দশননযনশ্রবণবলকরম্||১২||
दन्तचाले दशमूलक्वाथेन तैलसर्पिर्वसाक्षौद्रैश्च कवलः| पिप्पलीसैन्धवतुत्थलोध्रपत्तङ्गस्रोतोजमुस्तात्रिफलाः प्रतिसारणम्| नियतं च स्नैहिकधूमपायी स्निग्धमधुराहारो विस्रावणपरः स्यात्| चन्दनपद्मकमधुकविदारीकशेरुकनीलोत्पलमृद्वीकाजीवकर्षभसशर्कराणां प्रत्येकं पलेन क्षीरेण च मांसरसाद्विगुणेन तैलप्रस्थं विपाचयेत्| एतन्नस्यगण्डूषप्रयोगात्परं दशननयनश्रवणबलकरम्||१२||
🔊 Audio coming soon
শ্রবণবলকরমিত্যেবমন্তং দন্তচালে| দশমূলক্বাথেন বা তৈলাদিভির্বা কবলগ্রহঃ| পিপ্পল্যাদিভিঃ প্রতিসারণম্| অত্র চাল আতুরো নিযতং সদা স্নৈহিকাখ্যধূমপাযী স্যাত্| স্নিগ্ধমধুরাহারো বিস্রাবণপরশ্চ| বিস্রাবণং বিরেচনম্| চন্দনাদিনা তৈলং নস্যগণ্ডূষযোরিতি|| ১২||
Adhikarana adhidantacikitsA (13) · Śloka 13
অধিদন্তকং ক্ষারেণালিপ্য জর্জরং বিজ্ঞায কৃমিদন্তকবিধিনোত্পাট্য তদ্বদেবোপচরেত্| অনবস্থিতশোণিতঞ্চ দগ্ধ্বা ব্রণবদুপক্রমেত||১৩||
अधिदन्तकं क्षारेणालिप्य जर्जरं विज्ञाय कृमिदन्तकविधिनोत्पाट्य तद्वदेवोपचरेत्| अनवस्थितशोणितञ्च दग्ध्वा व्रणवदुपक्रमेत||१३||
🔊 Audio coming soon
ব্রণবদুপক্রমেতেত্যেবমন্তমধিদন্তে| জর্জরং ত্যক্তস্থৈর্যম্| কৃমিদন্তস্যোত্পাটনবিধিনোপচরণং চাত্রৈব বক্ষ্যতে| অনবস্থিতশোণিতমনবরুদ্ধশোণিতম্||১৩||
Adhikarana dantaSarkarAcikitsA (14) · Śloka 14
দন্তশর্করাং দন্তমূলান্যপীডযন্ দন্তলেখনেন বিলিখ্য ক্ষারতৈলেনাবসেচযেত্| মূষাকূর্পপাটলীত্বক্চূর্ণেন প্রতিসারণম্| সদা চ দন্তধাবনাদীন্ সেবেত| দন্তহর্ষোক্তং চ কুর্যাত্||১৪||
दन्तशर्करां दन्तमूलान्यपीडयन् दन्तलेखनेन विलिख्य क्षारतैलेनावसेचयेत्| मूषाकूर्पपाटलीत्वक्चूर्णेन प्रतिसारणम्| सदा च दन्तधावनादीन् सेवेत| दन्तहर्षोक्तं च कुर्यात्||१४||
🔊 Audio coming soon
দন্তহর্ষোক্তং চ কুর্যাদিত্যেবমন্তং দন্তশর্করাযাম্| দন্তমূলান্যপীডযন্ রক্ষন্| দন্তলেখনং নাম শস্ত্রং শস্ত্রবিধ্যুক্তম্| ক্ষারতৈলং ক্ষারপক্বং তৈলম্| মূষা সুবর্ণাদ্যাবর্ত্তনী| কূর্পং প্রস্তরচূর্ণম্| দন্তহর্ষোতং বাতহরসিদ্ধমিত্যাদিকম্||১৪||
Adhikarana dantakapAlikAcikitsA (15) · Śloka 15
কপালিকাযামেতদেব বিশেষতঃ শীলযেত্||১৫||
कपालिकायामेतदेव विशेषतः शीलयेत्||१५||
🔊 Audio coming soon
কপালিকাখ্যে দন্তরোগে এতদেব দন্তশর্করোক্তং বিশেষেণ শীলযেত্||১৫||
Adhikarana kRumidantacikitsA (16) · Śloka 16
কৃমিদন্তকে সুষিরং গুডেন মধূচ্ছিষ্টেন সর্পিষা বা পূরযিত্বা তপ্তযা কুব্জশলাকযা দহেত্| সপ্তচ্ছদার্কক্ষীরং বা পূরণম্| সর্ষপকরঞ্জতৈলম্||১৬||
कृमिदन्तके सुषिरं गुडेन मधूच्छिष्टेन सर्पिषा वा पूरयित्वा तप्तया कुब्जशलाकया दहेत्| सप्तच्छदार्कक्षीरं वा पूरणम्| सर्षपकरञ्जतैलम्||१६||
🔊 Audio coming soon
শীতোপচারশ্চ সুতরামিত্যেবমন্তং কৃমিদন্তাখ্যে| সুষিরমন্তঃশূন্যং কৃমিদন্তস্থং গুডাদ্যন্যতমেন পূরযিত্বা কুব্জযা শলাকযা দহেত্| সপ্তচ্ছদক্ষীরাদ্যন্যতমপূরণং রুজমপহরতীত্যুর্ররেণ সম্বধ্যতে||১৬||
Adhikarana kRumidantacikitsA (17) · Śloka 17
হিঙ্গুবিডঙ্গস্বর্জিকাকট্ফলকাসীসকুষ্ঠচূর্ণস্তান্তববদ্ধো দন্তস্যোপরি তিষ্ঠন্ রুজমপহরতি| কুন্দুরুষ্কচূর্ণো বা| এভিরেব চ সিদ্ধং তৈলং গণ্ডূষঃ| দৃঢগূঢমূলমাংসে সরুজে বিস্রাবণম্| ভগ্নস্ফুটিতবিবর্ণসুপ্তচলস্য সরুজস্য চ||১৭||
हिङ्गुविडङ्गस्वर्जिकाकट्फलकासीसकुष्ठचूर्णस्तान्तवबद्धो दन्तस्योपरि तिष्ठन् रुजमपहरति| कुन्दुरुष्कचूर्णो वा| एभिरेव च सिद्धं तैलं गण्डूषः| दृढगूढमूलमांसे सरुजे विस्रावणम्| भग्नस्फुटितविवर्णसुप्तचलस्य सरुजस्य च||१७||
🔊 Audio coming soon
হিঙ্গ্বাদিচূর্ণস্তান্তবে বস্ত্রে বদ্ধো দন্তস্যোপরি তিষ্ঠন্ রুজমপহরতি| কুন্দুরুষ্কচূর্ণো বা তান্তবাববদ্ধঃ এভিরিতি হিঙ্বাদিভিঃ দৃঢ ইত্যাদিকং কৃমিদন্তবিশেষণম্| বিস্রাবণং রক্তস্য||১৭||
Adhikarana kRumidantacikitsA (18) · Śloka 18
এবমনুপশমে সন্দংশযন্ত্রেণ দন্তমাযতং গৃহীত্বা বিচাল্য শস্ত্রেণ পার্শ্বেভ্যো মোক্ষযিত্বোদ্ধরেত্| দন্তনির্ঘাতনেনোত্পীড্য মুদ্গরেণাশ্মনা বা নির্ঘাতযেত্| ন তূত্তরং দন্তম্||১৮||
एवमनुपशमे सन्दंशयन्त्रेण दन्तमायतं गृहीत्वा विचाल्य शस्त्रेण पार्श्वेभ्यो मोक्षयित्वोद्धरेत्| दन्तनिर्घातनेनोत्पीड्य मुद्गरेणाश्मना वा निर्घातयेत्| न तूत्तरं दन्तम्||१८||
🔊 Audio coming soon
এবমনন্তরোক্তক্রিযযাঽনুপশমে দন্তমুদ্ধরেত্| কথমিত্যাহ-সন্দংশযন্ত্রেণেত্যাদি| সন্দংশযন্ত্রং যন্ত্রশস্ত্রবিধেঃ স্মর্তব্যম্| উত্তরদন্তপাল্যামুদ্ভূতং দন্তং নৈবোদ্ধরেত্ ||১৮||
Adhikarana kRumidantacikitsA (19) · Śloka 19
তস্যোদ্ধরণাত্ ছোণিতাত্যযঃ ততশ্চোন্দ্রিযভ্রংশো বাতব্যাধির্বা||১৯||
तस्योद्धरणात् छोणितात्ययः ततश्चोन्द्रियभ्रंशो वातव्याधिर्वा||१९||
🔊 Audio coming soon
কুত ইত্যাহ-তস্যেত্যাদি| শোণিতাত্যযো রক্তক্ষযঃ| ততশ্চেতি শোণিতাত্যযাত্||১৯||
Adhikarana kRumidantacikitsA (20) · Śloka 20
প্রক্ষালিতমুখশ্চ সমধুকচূর্ণং তৈলং মধু বা গণ্ডূষং ধারযেত্||২০||
प्रक्षालितमुखश्च समधुकचूर्णं तैलं मधु वा गण्डूषं धारयेत्||२०||
🔊 Audio coming soon
প্রক্ষালিত ইত্যাদিনা দন্তোদ্ধরণানন্তরকরণীযমাহ| অনুক্তদ্রবত্বাত্ কেবলজলেন প্রক্ষালিতমুখস্সন্ মধুকচূর্ণযুক্তং তৈলং মাক্ষিকং বা গণ্ডূষং ধারযেত্| মধুকং যষ্টিমধুকম্ ||২০||
Adhikarana kRumidantacikitsA (21) · Śloka 21
বিদারীমধুকশ্রৃঙ্গাটককশোরুকাভিঃ তৈলং দশগুণে পযসি সিদ্ধং নস্যম্||২১||
विदारीमधुकश्रृङ्गाटककशोरुकाभिः तैलं दशगुणे पयसि सिद्धं नस्यम्||२१||
🔊 Audio coming soon
বিদারীমধুকাদিভিঃ কল্কিতৈর্দশগুণে ক্ষীরে সিদ্ধং তৈলং নস্যং হিতম্| শ্রৃঙ্গাটকো জলকন্দবিশেষঃ||২১||
Adhikarana kRumidantacikitsA (22) · Śloka 22
উত্তরদন্তোদ্ধরণেঽপ্যযমেব প্রতীকারঃ| শীতোপচারশ্চ সুতরাম্||২২||
उत्तरदन्तोद्धरणेऽप्ययमेव प्रतीकारः| शीतोपचारश्च सुतराम्||२२||
🔊 Audio coming soon
যত্র চাজ্ঞানাদুত্তরো দন্ত উদ্ধৃতস্তত্রাপ্যযমেব বিধিঃ| অত্র তু সুতরাং শীতোপচারঃ কার্যঃ| করালশ্যাবাবসাধ্যাবুক্তাবিতি দন্তরোগাঃ||২২||
Adhikarana SItAdacikitsA (23) · Śloka 23
শীতাদে শোণিতং বিস্রাব্য রসাঞ্জনমুস্তত্রিফলার্জুনত্বক্প্রিযঙ্গুমহৌষধকাযং গণ্ডূষং ধারযেত্| এভিরেব চ সক্ষৌদ্রৈঃ প্রতিসারণম্| মধুরবর্গসিদ্ধং তৈলং নস্যম্| তেজোবতীব্যোষহরিদ্রাদ্বযকুষ্ঠপাঠাকটুরোহিণীলোধ্রসমঙ্গামুস্তৈঃ প্রতিসারণং সর্বদন্তমাংসামযেষু কণ্ডূশ্বযথুবেদনারক্তস্রুতিহরম্| তথা ব্যোষযবক্ষারমনশ্শিলাসৈন্ধবদার্বীত্বগ্ভিঃ| এভিরেবৌষধৈর্গুটিকা সর্বমুখরোগহরা||২৩||
शीतादे शोणितं विस्राव्य रसाञ्जनमुस्तत्रिफलार्जुनत्वक्प्रियङ्गुमहौषधकायं गण्डूषं धारयेत्| एभिरेव च सक्षौद्रैः प्रतिसारणम्| मधुरवर्गसिद्धं तैलं नस्यम्| तेजोवतीव्योषहरिद्राद्वयकुष्ठपाठाकटुरोहिणीलोध्रसमङ्गामुस्तैः प्रतिसारणं सर्वदन्तमांसामयेषु कण्डूश्वयथुवेदनारक्तस्रुतिहरम्| तथा व्योषयवक्षारमनश्शिलासैन्धवदार्वीत्वग्भिः| एभिरेवौषधैर्गुटिका सर्वमुखरोगहरा||२३||
🔊 Audio coming soon
এভির্গুটিকা সর্বমুখরোগহরেত্যেবমন্তং শীতাদাখ্যে| রসাঞ্জনাদিকষাযো গণ্ডূষঃ| এভিরেবেতি রসাঞ্জনাদিভিঃ| মধুরবর্গঃ সূত্রোক্তস্তেন সাধিতং তৈলং নস্যম্| তেজোবত্যাদিচূর্ণং সর্বদন্তমাংসামযেষু কণ্ড্বাদিহরম্| ব্যোষাদিভিস্তথেতি তেজোবত্যাদিচূর্ণবত্| এভিরেবেতি ব্যোষাদিভিঃ|| ২৩||
Adhikarana upakuSacikitsA (24) · Śloka 24
উপকুশে সুখোষ্ণাম্বুস্বিন্নান্যুত্সন্নানি দন্তমাংসান্যবলিখেন্মণ্ডলাগ্রেণ শাকাদিপত্রৈর্বা| ততঃ সুখোষ্ণো ঘৃতমণ্ডস্তৈলং বা গণ্ডূষঃ| মরিচকুষ্ঠমধুকপ্রিযঙ্গুলাক্ষাপত্তঙ্গগৈরিকরসাঞ্জনশুণ্ঠীসৈন্ধবৈর্মধুঘৃতমণ্ডযুক্তৈঃ প্রতিসারণম্| পৃথক্পর্ণীবিডঙ্গবিদারীমধুকপযস্যাসুরদারুবিপক্বং তৈলং গণ্ডূষো নস্যঞ্চ| অধুরবর্গসিদ্ধমেব বা সর্পিঃ পুনঃ পুনশ্চ রুধিরাবসেকঃ||২৪||
उपकुशे सुखोष्णाम्बुस्विन्नान्युत्सन्नानि दन्तमांसान्यवलिखेन्मण्डलाग्रेण शाकादिपत्रैर्वा| ततः सुखोष्णो घृतमण्डस्तैलं वा गण्डूषः| मरिचकुष्ठमधुकप्रियङ्गुलाक्षापत्तङ्गगैरिकरसाञ्जनशुण्ठीसैन्धवैर्मधुघृतमण्डयुक्तैः प्रतिसारणम्| पृथक्पर्णीविडङ्गविदारीमधुकपयस्यासुरदारुविपक्वं तैलं गण्डूषो नस्यञ्च| अधुरवर्गसिद्धमेव वा सर्पिः पुनः पुनश्च रुधिरावसेकः||२४||
🔊 Audio coming soon
রুধিরাবসেকান্তমুপকুশাখ্যে সুবোধম্| উত্সন্নান্যত্যুত্সন্নানি|| ২৪||
Adhikarana dantapuppuTakacikitsA (25) · Śloka 25
দন্তপুপ্পুটকে স্বিন্নছিন্নভিন্নবিলিখিতে স্বর্জিকামধুকশুণ্ঠীসৈন্ধবৈঃ প্রতিসারণম্||২৫||
दन्तपुप्पुटके स्विन्नछिन्नभिन्नविलिखिते स्वर्जिकामधुकशुण्ठीसैन्धवैः प्रतिसारणम्||२५||
🔊 Audio coming soon
দন্তপুপ্পুটাখ্যে পূর্বমুষ্ণাম্বুধারণেব সংস্বেদ্য পুনশ্ছেদভেদনং কৃত্বানন্তরং সতি স্বর্জিকাদিচূর্ণৈঃ প্রতিসারণং কুর্যাত্||২৫||
Adhikarana dantavidradhicikitsA (26) · Śloka 26
দন্তবিদ্রধৌ তিক্তকটুকষাযোষ্ণৈঃ সমূত্রৈঃ কবলো লেপশ্চ| বৃশ্চিকালীকুষ্ঠকটুকাযবক্ষারৈঃ প্রতিসারণম্| তং চ পাকতো রূক্ষশীতৈরন্তর্বহিঃ প্রযুক্তৈর্বারযেত্| পক্বে তু পাটনমবগাঢে দাহঃ| ত্রিফলাসুমনোরিষ্টক্বাথো গণ্ডূষঃ| যষ্টীমধুকসিদ্ধঃ সর্পির্মণ্ডো নস্যম্||২৬||
दन्तविद्रधौ तिक्तकटुकषायोष्णैः समूत्रैः कवलो लेपश्च| वृश्चिकालीकुष्ठकटुकायवक्षारैः प्रतिसारणम्| तं च पाकतो रूक्षशीतैरन्तर्बहिः प्रयुक्तैर्वारयेत्| पक्वे तु पाटनमवगाढे दाहः| त्रिफलासुमनोरिष्टक्वाथो गण्डूषः| यष्टीमधुकसिद्धः सर्पिर्मण्डो नस्यम्||२६||
🔊 Audio coming soon
সর্পির্মণ্ডো নস্যমিত্যেবমন্তং দন্তবিদ্রধৌ| তিক্তাদিরসৈর্দ্রব্যৈর্মূত্রযুক্তৈঃ কবলো লেপনঃ| বৃশ্চিকাল্যাদিভিঃ প্রতিসারণম্| বৃশ্চিকালী উষ্ট্রধূমকঃ| তং চ বিদ্রধিমন্তর্বহিশ্চ প্রযুক্তৈঃ রূক্ষশীতৈঃ পাকতো বারযেত্| অশক্ত্যা তু পক্বে পাটনমবগাঢে কঠিনে দাহঃ| ত্রিফলাদিক্বাথো গণ্ডূষঃ|| সুবোধম্||২৬||
Adhikarana suShiracikitsA (27) · Śloka 27
সুষিরে ছিন্নলিখিতে লোধ্রমুস্তত্রিফলাকিংশুকপতঙ্গতার্ক্ষ্যশৈলশতপুষ্পাকট্ফলৈরবঘর্ষঃ| তেষামেব ক্বাথে গণ্ডূষঃ| ক্ষীরিবৃক্ষকিংশুকামলকানাং বা| গৈরিকোত্পলমধূকসারিবাচন্দনপ্রপৌণ্ডরীকশর্করাঽনন্তালোধ্রাগরুসিদ্ধং তৈলং নাবনম্||২৭||
सुषिरे छिन्नलिखिते लोध्रमुस्तत्रिफलाकिंशुकपतङ्गतार्क्ष्यशैलशतपुष्पाकट्फलैरवघर्षः| तेषामेव क्वाथे गण्डूषः| क्षीरिवृक्षकिंशुकामलकानां वा| गैरिकोत्पलमधूकसारिवाचन्दनप्रपौण्डरीकशर्कराऽनन्तालोध्रागरुसिद्धं तैलं नावनम्||२७||
🔊 Audio coming soon
তৈলং নাবনমিত্যেবমন্তং সুষিরাখ্যে| ছিন্নস্য শেষে লেখনম্| লোধ্রাদিভিরবঘর্ষণম্| তেষামিতি লোধ্রাদীনাং ক্ষীরিবৃক্ষাদীনাং বা ক্বাথো গণ্ডূষঃ| গৈরিকাদিসিদ্ধং তৈলং নাবনম্||২৭||
Adhikarana adhimAMsacikitsA (28) · Śloka 28
অধিমাংসকমচিরোত্থিতং স্রাবযেত্| বিবৃদ্ধন্তু বডিশেন মুচুট্যা বা গৃহীত্বা মণ্ডলাগ্রেণ ছিত্বা তীক্ষ্ণৈঃ প্রতিসারযেত্| কটুতীক্ষ্ণৈঃ কবলস্তৈলং বা যবক্ষারাবচূর্ণিতম্||২৮||
अधिमांसकमचिरोत्थितं स्रावयेत्| विवृद्धन्तु बडिशेन मुचुट्या वा गृहीत्वा मण्डलाग्रेण छित्वा तीक्ष्णैः प्रतिसारयेत्| कटुतीक्ष्णैः कवलस्तैलं वा यवक्षारावचूर्णितम्||२८||
🔊 Audio coming soon
তৈলং যবক্ষারাবচূর্ণিতমিত্যেবমন্তমধিমাংসে| সুবোধম্||২৮||
Adhikarana vidarBacikitsA (29) · Śloka 29
বিদর্ভে দন্তমূলানি শস্ত্রেণ বিশোধ্য ক্ষারং প্রযুজ্য ঘৃতমণ্ডং গণ্ডূষে দদ্যাত্| লোধ্রপত্তঙ্গমঞ্জিষ্ঠামধুকচূর্ণঃ প্রতিসারণম্| কাকোলীযষ্টীমধুশর্করাবিপক্বং তৈলং নাবনম্||২৯||
विदर्भे दन्तमूलानि शस्त्रेण विशोध्य क्षारं प्रयुज्य घृतमण्डं गण्डूषे दद्यात्| लोध्रपत्तङ्गमञ्जिष्ठामधुकचूर्णः प्रतिसारणम्| काकोलीयष्टीमधुशर्कराविपक्वं तैलं नावनम्||२९||
🔊 Audio coming soon
বিদর্ভে শস্ত্রেণ মণ্ডলাগ্রনাম্না দন্তমূলানি বিশোধ্য ক্ষারং প্রযুজ্য গণ্ডূষে ঘৃতমণ্ডং দদ্যাত্| লোধ্রাদিভিঃ প্রতিসারণং কাকোল্যাদিবিপক্বং তৈলং নাবনং চ||২৯||
Adhikarana dantanADIcikitsA (30-33) · Śloka 33
দন্তনাডীমেষযিত্বা সংবৃতাং শস্ত্রেণ বিবৃতযিত্বা তদাশ্রিতং দন্তমশেষমুদ্ধৃত্য শলাকযা দহেত্| কুব্জামবগাঢামনেকগতিং বা গুডমধুসিক্থান্যতমপূর্ণাম্| ততঃ ক্ষীরিবৃক্ষকষাযেণ গণ্ডূষং ধারযেত্| তত্সিদ্ধেন বা তৈলেন||৩০|| দন্তীখদিরসারমদনস্বাদুকণ্টকক্বাথে লোধ্রবালকোশীরদেবদারুমঞ্জিষ্ঠামধুকল্কবিপক্বং তৈলং সর্ষপতৈলং বা নাডীশোধনরোপণম্||৩১|| প্রপৌণ্ডরীকহরিদ্রাদ্বযমধুকমধূচ্ছিষ্টলোধ্রকটুকীশর্করাপদ্মকচন্দনমূর্বোপোদকাবাস্তুকতণ্ডুলীযকমঞ্জিষ্ঠাম্লীকাকপিত্থপত্রৈর্বা||৩২|| নস্যং চ বিডঙ্গমধুকমুস্তনির্গুণ্ডীখদিরমঞ্জিষ্ঠোশীরসুরতরুসিদ্ধং তৈলম্| ধূমাসৃক্স্রাবণনাবনানি শীলযেত্| নাডীসাধনং চেক্ষেত||৩৩||
दन्तनाडीमेषयित्वा संवृतां शस्त्रेण विवृतयित्वा तदाश्रितं दन्तमशेषमुद्धृत्य शलाकया दहेत्| कुब्जामवगाढामनेकगतिं वा गुडमधुसिक्थान्यतमपूर्णाम्| ततः क्षीरिवृक्षकषायेण गण्डूषं धारयेत्| तत्सिद्धेन वा तैलेन||३०|| दन्तीखदिरसारमदनस्वादुकण्टकक्वाथे लोध्रवालकोशीरदेवदारुमञ्जिष्ठामधुकल्कविपक्वं तैलं सर्षपतैलं वा नाडीशोधनरोपणम्||३१|| प्रपौण्डरीकहरिद्राद्वयमधुकमधूच्छिष्टलोध्रकटुकीशर्करापद्मकचन्दनमूर्वोपोदकावास्तुकतण्डुलीयकमञ्जिष्ठाम्लीकाकपित्थपत्रैर्वा||३२|| नस्यं च विडङ्गमधुकमुस्तनिर्गुण्डीखदिरमञ्जिष्ठोशीरसुरतरुसिद्धं तैलम्| धूमासृक्स्रावणनावनानि शीलयेत्| नाडीसाधनं चेक्षेत||३३||
🔊 Audio coming soon
নাডীসাধনং চেক্ষেতেত্যন্তং দন্তনাড্যাম্| সংবৃতাং দন্তনাডীমেষিণ্যা এষযিত্বাঽনন্তরং শস্ত্রেণ বিবৃতাং কৃত্বা তদাশ্রিতং দন্তং সন্দংশকদন্তনির্ঘাতযোরন্যতরেণাশেষমুদ্ধৃত্যাঽগ্নিতপ্তযা শলাকযা দহেত্| কুব্জাং বক্রামবগাঢামন্তরতিপ্রবিষ্টামনেকগতিং বা নাডীং গুডাদ্যন্যতমপূর্ণাং কৃত্বা দহেত্| অনন্তরং ক্ষীরিবৃক্ষাণাং বটাশ্বত্থপ্লক্ষসদাফলানাং কষাযেণ তত্সিদ্ধেন তৈলেন বা গণ্ডূষং ধারযেত্| দন্ত্যাদিভিঃ সাধিতং তৈলং নাডীশোধনং রোপণং চ| অথবা কেবলং সর্ষষতৈলম্| প্রপৌণ্ডরীকাদিভির্বা সিদ্ধং তৈলং পূর্বগুণম্| পত্রশব্দস্যোপোদকাদিভিঃ সম্বন্ধঃ| বিডঙ্গাদিভিঃ সিদ্ধং তৈলং নস্যম্| ধূমাদীনি চ শীলযেত্| নীডীব্রণচিকিত্সিতং চেক্ষেত তদুক্তোপক্রমবিধানায| মহাসুশিরো নিচযান্নাডী চাসাধ্যে| ইতি দন্তমূলরোগাঃ|| ৩০-৩৩||
Adhikarana jihvAkaNTakacikitsA (34) · Śloka 34
বাতজেষু জিহ্বাকণ্টকেষু বাতৌষ্ঠকোপোক্তো বিধিঃ| পিত্তজেষু বিঘৃষ্টস্রুতরুধিরেষু স্বাদুভির্দ্রব্যৈরবঘর্ষণগণ্ডূষনাবনানি কুর্যাত্| তদ্বত্ কফজেষু তীক্ষ্ণৈঃ||৩৪||
वातजेषु जिह्वाकण्टकेषु वातौष्ठकोपोक्तो विधिः| पित्तजेषु विघृष्टस्रुतरुधिरेषु स्वादुभिर्द्रव्यैरवघर्षणगण्डूषनावनानि कुर्यात्| तद्वत् कफजेषु तीक्ष्णैः||३४||
🔊 Audio coming soon
বাতজেষু জিহ্বাকণ্টকেষু বাতৌষ্ঠকোপে যো বিধির্মহাস্নেহাভ্যঙ্গপ্রতিসারণাদিরুক্তস্স কার্যঃ| পিত্তজেষু বিঘর্ষণেন দুষ্টরক্তবিস্রাবণং ততশ্চ স্বাদুভির্দ্রব্যৈরবঘর্ষণাদীনি কুর্যাদিতি| তদ্বত্ কফজেষু| তীক্ষ্ণৈরিত্যনেনৈতদুক্তং কফজেষু জিহ্বাকণ্টকেষ্ববঘর্ষণেন স্রুতদুষ্টরুধিরেষু তীক্ষ্ণৈর্দ্রব্যৈরবঘর্ষণাদীনি কুর্যাদিতি||৩৪||
Adhikarana jihvAlasacikitsA (35) · Śloka 35
জিহ্বালসে নবোত্থিতে তীক্ষ্ণাঃ প্রতিসারণাদযঃ| ন চাত্র শস্ত্রমবচারযেত্| সিরাং তু বিধ্যেত্||৩৫||
जिह्वालसे नवोत्थिते तीक्ष्णाः प्रतिसारणादयः| न चात्र शस्त्रमवचारयेत्| सिरां तु विध्येत्||३५||
🔊 Audio coming soon
সিরাং তু বিধ্যেদিত্যেবমন্তমলসে| তস্য চাসাধ্যত্বোক্তের্নব ইতি বিশেষণম্||৩৫||
Adhikarana adhijihvopajihvayoScikitsA (36) · Śloka 36
অধিজিহ্বামুন্নম্য বডিশেন গৃহীত্বা মণ্ডলাগ্রেণ ছিন্দ্যাত্| তীক্ষ্ণাশ্চ নস্যাদযঃ| উপজিহ্বাং শাকপত্রেণাঙ্গুলিশস্ত্রেণ বা বিস্রাব্য যবক্ষারেণ প্রতিসারযেত্||৩৬||
अधिजिह्वामुन्नम्य बडिशेन गृहीत्वा मण्डलाग्रेण छिन्द्यात्| तीक्ष्णाश्च नस्यादयः| उपजिह्वां शाकपत्रेणाङ्गुलिशस्त्रेण वा विस्राव्य यवक्षारेण प्रतिसारयेत्||३६||
🔊 Audio coming soon
অধিজিহ্বাযামুপজিহ্বাযাং চ ছেদনবিস্রাবণাদি| সুবোধম্| ইতি জিহ্বারোগাঃ||৩৬||
Adhikarana galaSuNDikAcikitsA (37) · Śloka 37
গলশুণ্ডিকা কফঘ্নৈরুপাচরেত্| বৃদ্ধাযাং তূর্বারুবীজনিভমসিরাততমগ্রমুপরিজিহ্বযা নিবিষ্টং বডিশেন মুচুট্যা বা বস্ত্রবেষ্টিতাভ্যাং বামাঙ্গুষ্ঠপ্রদেশিনীভ্যাং গৃহীত্বা মণ্ডলাগ্রেণ নাত্যগ্রে নাতিমূলে ছিন্দ্যাত্| অগ্রচ্ছেদাদনুপশমঃ শোফো লালাদিবৃদ্ধির্বা| অতিচ্ছেদাচ্ছোণিতক্ষযেণ মরণম্| সম্যক্ চ্ছিন্নাযাং পূর্ববত্ প্রতিসারণাদযঃ||৩৭||
गलशुण्डिका कफघ्नैरुपाचरेत्| वृद्धायां तूर्वारुबीजनिभमसिराततमग्रमुपरिजिह्वया निविष्टं बडिशेन मुचुट्या वा वस्त्रवेष्टिताभ्यां वामाङ्गुष्ठप्रदेशिनीभ्यां गृहीत्वा मण्डलाग्रेण नात्यग्रे नातिमूले छिन्द्यात्| अग्रच्छेदादनुपशमः शोफो लालादिवृद्धिर्वा| अतिच्छेदाच्छोणितक्षयेण मरणम्| सम्यक् च्छिन्नायां पूर्ववत् प्रतिसारणादयः||३७||
🔊 Audio coming soon
গলশুণ্ডিকা কফঘ্নৈঃ কফহরৈর্দ্রব্যৈরুপাচরেত্ চিকিত্সেত্| বৃদ্ধাযামিতি গলশুণ্ডিকাযাং উর্বারোঃ কর্কটিকাযাঃ বীজেন সদৃশং সিরারহিতং প্রদেশং বডিশাদিনা গ্রাহ্যম্| নাত্যগ্রেঽতিমূলে চ ছিন্দ্যাদিত্যত্র হেতুমাহ-অগ্র ইত্যাদি| পূর্ববদিতি তীক্ষ্ণৈরুপজিহ্বাত্||৩৭||
Adhikarana atideshena tAlusa~gghAtAdInAM cikitsA (38) · Śloka 38
তালুসঙ্ঘাতে পুপ্পুটে কচ্ছপে চ নবে বিধিরযম্| শস্ত্রকর্মণি তু বিশেষঃ| অত্র হি বিলেখনম্||৩৮||
तालुसङ्घाते पुप्पुटे कच्छपे च नवे विधिरयम्| शस्त्रकर्मणि तु विशेषः| अत्र हि विलेखनम्||३८||
🔊 Audio coming soon
তালুসঙ্ঘাতে তথা পুপ্পুটে তথা নবে কচ্ছপে চাযমেব গলশুণ্ডিকোক্তো বিধিঃ| অত্র তালুসঙ্ঘাতাদিকে শস্ত্রকর্মণ্যেব বিশেষঃ| অত্র হি ত্রযে শস্ত্রেণ বিলেখনং গলশুণ্ডিকাযাং তু ছেদনমিতি||৩৮||
Adhikarana tAlupAkacikitsA (39) · Śloka 39
তালুপাকে ত্বপক্বস্য শ্বযথোঃ কাসীসরসাঞ্জনক্ষৌদ্রঃ প্রতিসারণম্| মধুরকষাযৈঃ শীতৈর্গণ্ডূষঃ| পক্বস্য মণ্ডলাগ্রেণাষ্টাপদবত্ ভেদনম্| তীক্ষ্ণৈরবঘর্ষণম্| পটোলারিষ্টজাতীকরবীরগুডূচীবৃষকটুকাহরিদ্রাদ্বযবেত্রাগ্রকণ্টকারিকাক্বাথঃ কবলো মধু তৈলং চ||৩৯||
तालुपाके त्वपक्वस्य श्वयथोः कासीसरसाञ्जनक्षौद्रः प्रतिसारणम्| मधुरकषायैः शीतैर्गण्डूषः| पक्वस्य मण्डलाग्रेणाष्टापदवत् भेदनम्| तीक्ष्णैरवघर्षणम्| पटोलारिष्टजातीकरवीरगुडूचीवृषकटुकाहरिद्राद्वयवेत्राग्रकण्टकारिकाक्वाथः कवलो मधु तैलं च||३९||
🔊 Audio coming soon
তালুপাকে তু অপক্বস্য পাকাবস্থামপ্রাপ্তস্য শ্বযথোঃ শোফস্য কাসীসাদিভিঃ প্রতিসারণং কুর্যাত্| রসাঞ্জনং তার্ক্ষযম্| শীতৈঃ স্পর্শতো বীর্যতশ্চ মধুরাদিভিরৌষধৈর্গণ্ডূষো ধার্যঃ| অষ্টাপদবদিতি অষ্টাপদং চতুরঙ্গপীঠম্| তত্ কোষ্ঠাকৃতিছেদনমষ্টাপদবত্ ভেদনম্| তীক্ষ্ণৈর্মরিচাদিভিরবঘর্ষণম্| পটোলাদিক্বাথে মধুতৈলং চ কবলঃ||৩৯||
Adhikarana tAluSoShacikitsA (40) · Śloka 40
তালুশোষে মধুকপিপ্পলীনাগরসিদ্ধং সর্পিরুত্তরভক্তিকং সতৃষ্ণঃ পিবেত্| অম্লৈশ্চাস্য গণ্ডূষঃ| পযস্যা মধুকমধূলিকাবিপক্বং ক্ষীরসর্পির্নস্যম্| স্নিগ্ধো ধূমঃ| তৃষ্ণাঘ্নমন্নপানম্||৪০||
तालुशोषे मधुकपिप्पलीनागरसिद्धं सर्पिरुत्तरभक्तिकं सतृष्णः पिबेत्| अम्लैश्चास्य गण्डूषः| पयस्या मधुकमधूलिकाविपक्वं क्षीरसर्पिर्नस्यम्| स्निग्धो धूमः| तृष्णाघ्नमन्नपानम्||४०||
🔊 Audio coming soon
তালুশোষে সতৃষ্ণস্তৃষ্ণাসহিতো মধুকাদিসিদ্ধং সর্পির্ঘৃতমুত্তরভক্তিকং পিবেত্| উত্তরং ভক্তং যস্য তদুত্তরভক্তিকং ভক্তাত্পূর্বমিত্যর্থঃ| অস্য তালুশোষবতোঽম্লৈরম্লদ্রব্যৈর্গণ্ডূষঃ পযস্যাদিসিদ্ধং ক্ষীরাদ্ গৃহীতং সর্পির্নস্যং স্নিগ্ধধূমাদি চ হিতম্| ইতি তালুরোগাঃ|| ৪০||
Adhikarana kaNTharoge sAdhAraNacikitsA (41) · Śloka 41
কণ্ঠরোগেষু তু জ্বরাদ্যনুপদ্রুতেষু কটুতীক্ষ্ণৈর্নস্যাবঘর্ষণগণ্ডূষাদযঃ সিরাব্যধো রসাঞ্জনেন্দ্রযবদার্বীনিম্বক্বাথং পানম্| ব্যোষযবক্ষারদার্বীরসাঞ্জনতেজোবতীপাঠানিম্বত্বক্ত্রিফলাচিত্রকৈঃ শুক্তগোমূত্রক্বথিতৈঃ কবলো গুটিকা বা প্রতিসারণম্| তালীসপত্রগৃহধূমপঞ্চকোলকৈলমরিচপলাশমুষ্ককক্ষারযবক্ষারৈর্যবক্বাথেন গুটিকাঃ কৃতাঃ সর্বকণ্ঠরোগেষ্বমৃতোপমাঃ||৪১||
कण्ठरोगेषु तु ज्वराद्यनुपद्रुतेषु कटुतीक्ष्णैर्नस्यावघर्षणगण्डूषादयः सिराव्यधो रसाञ्जनेन्द्रयवदार्वीनिम्बक्वाथं पानम्| व्योषयवक्षारदार्वीरसाञ्जनतेजोवतीपाठानिम्बत्वक्त्रिफलाचित्रकैः शुक्तगोमूत्रक्वथितैः कवलो गुटिका वा प्रतिसारणम्| तालीसपत्रगृहधूमपञ्चकोलकैलमरिचपलाशमुष्ककक्षारयवक्षारैर्यवक्वाथेन गुटिकाः कृताः सर्वकण्ठरोगेष्वमृतोपमाः||४१||
🔊 Audio coming soon
কণ্ঠরোগেষু জ্বরাদ্যুপদ্রবরহিতেষু কটুতীক্ষ্ণৈরৌষধৈর্নস্যাদযঃ| সিরাব্যধেনাসৃঙ্মোক্ষঃ| রসাঞ্জনাদিক্বাথঃ পানম্| রসাঞ্জনং তার্ক্ষ্যম্| ইন্দ্রযবঃ কলিঙ্গঃ| শুক্তগোমূত্রসাধিতৈর্ব্যোষাদিভিঃ কবলঃ প্রতিসারণং বা| তালীসাদিভির্যবক্ষারান্তৈর্যবক্বাথেন কৃতা গুটিকাঃ সর্বকণ্ঠরোগেষ্বমৃতোপমাঃ| ইতি সাধারণচিকিত্সা||৪১||
Adhikarana vAtarohiNIcikitsA (42) · Śloka 42
অথ বাতরোহিণীকামান্তর্বহিঃ স্বিন্নামঙ্গুলিশস্ত্রকেণ মধুলবণগর্ভেণ বা নখেন বিস্রাব্য তীক্ষ্ণৈঃ প্রতিসারযেত্| মহাপঞ্চমূলক্বথো গন্ডুষঃ| এলাপুনর্নবসিংহীকপিত্থকল্কপযোবিপক্বং তৈলং গণ্ডূষো নাবনং চ||৪২||
अथ वातरोहिणीकामान्तर्बहिः स्विन्नामङ्गुलिशस्त्रकेण मधुलवणगर्भेण वा नखेन विस्राव्य तीक्ष्णैः प्रतिसारयेत्| महापञ्चमूलक्वथो गन्डुषः| एलापुनर्नवसिंहीकपित्थकल्कपयोविपक्वं तैलं गण्डूषो नावनं च||४२||
🔊 Audio coming soon
অথেতি মঙ্গলে দুষ্করপ্রতিক্রিযত্বান্মঙ্গলপূর্বকং বাতরোহিণিকামুপক্রমেত্| অন্তরভ্যন্তরে বহির্বহির্ভাগে চ স্বিন্নামঙ্গুলিশস্ত্রেণ মধ্বাদিগর্ভেণ নখেন বা বিস্ত্রাব্য তীক্ষ্ণৈর্মরিচশুণ্ঠ্যাদিভি প্রতিসারযেত্| মহাপঞ্চমূলং বিল্বাদি তত্ক্বাথো গণ্ডূষঃ| এলাদিকল্কেন পযসা চ বিপক্বং তৈলং গণ্ডূষো নাবনং চ||৪২||
Adhikarana pittarohiNIcikitsA (43) · Śloka 43
পিত্তজামপ্যেবং বিস্রাব্য পতঙ্গশর্করালোধ্রপ্রিযঙ্গুভিঃ প্রতিসারযেত্| এষামেব কষাযো গণ্ডূষঃ| দ্রাক্ষাপরূষকোশীরমধুকচন্দনক্বাথো বা| ত্রিফলাতিল্বকশ্যামাশ্রীপর্ণীত্বঙ্মধুযষ্টিকাভির্দশগুণে পযসি সিদ্ধং সর্পির্নস্যকবলভোজনেষু||৪৩||
पित्तजामप्येवं विस्राव्य पतङ्गशर्करालोध्रप्रियङ्गुभिः प्रतिसारयेत्| एषामेव कषायो गण्डूषः| द्राक्षापरूषकोशीरमधुकचन्दनक्वाथो वा| त्रिफलातिल्वकश्यामाश्रीपर्णीत्वङ्मधुयष्टिकाभिर्दशगुणे पयसि सिद्धं सर्पिर्नस्यकवलभोजनेषु||४३||
🔊 Audio coming soon
পিত্তজাং রোহিণীমপ্যেবমঙ্গুলিসস্ত্রেণ নখেন বা বিস্রাব্য পতঙ্গাদিভিঃ প্রতিসারযেত্| এষাং পতঙ্গাদীনামেব বা ক্বাথে দ্রাক্ষাদিক্বাথো বা গণ্ডূষঃ| ত্রিফলাদিভির্ঘৃতাদ্দশগুণে ক্ষীরে সিদ্ধং সর্পির্নস্যাদিষু হিতম্|| ৪৩||
Adhikarana raktajarohiNIcikitsA (44) · Śloka 44
রক্তজামপ্যেবং প্রত্যাখ্যাযোপক্রমেত্||৪৪||
रक्तजामप्येवं प्रत्याख्यायोपक्रमेत्||४४||
🔊 Audio coming soon
রক্তজাঽসাধ্যোক্তা তাং প্রত্যাখ্যায ন সেত্স্যতীতি প্রত্যাখ্যায চিকিত্সেদেব ন তূপেক্ষেত| এবমিতি পিত্তরোহিণীচিকিত্সযা||৪৪||
Adhikarana kaParohiNIcikitsA (45) · Śloka 45
শ্লৈষ্মিকীং স্বেদযিত্বা বিলিখ্য কটুকবর্গেণাগারধূমত্রিফলাসৈন্ধবযুক্তেন প্রতিসারযেত্| তদ্বিধাশ্চ গণ্ডূষাঃ| নিম্বজাত্যপামার্গবিডঙ্গবিপক্বং তৈলং নস্যম্||৪৫||
श्लैष्मिकीं स्वेदयित्वा विलिख्य कटुकवर्गेणागारधूमत्रिफलासैन्धवयुक्तेन प्रतिसारयेत्| तद्विधाश्च गण्डूषाः| निम्बजात्यपामार्गविडङ्गविपक्वं तैलं नस्यम्||४५||
🔊 Audio coming soon
শ্লৈষ্মিকীং স্বেদযিত্বা বিলিখ্য চাগারধূমাদিযুক্তেন কটুকবর্গেণ প্রতিসারযেত্| অগারধূমং ধূমমলম্| কটুকবর্গঃ সূত্রোক্তঃ| তদ্বিধা অগারধূমাদিযুক্তকটুকবর্গকৃতাঃ| নিম্বাদিসিদ্ধং তৈলং নস্যম্||৪৫||
Adhikarana atideSena SAlUkavRundatuNDikerIgilAyUnAM cikitsA (46) · Śloka 46
শালূকবৃন্দতুণ্ডিকেরীগিলাযুষ্বেষ এব বিধিঃ||৪৬||
शालूकवृन्दतुण्डिकेरीगिलायुष्वेष एव विधिः||४६||
🔊 Audio coming soon
শালূকাদিচতুষ্টযেষ্বপি এষ এব কফরোহিণ্যুক্তো বিধিঃ||৪৬||
Adhikarana galavidradhicikitsA (47) · Śloka 47
গলবিদ্রধৌ বিস্রাবিতাযাং লোধ্রবরারসাঞ্জনপতঙ্গগৈরিকরোচনাপিপ্পলীসৈন্ধবচূর্ণৈরবঘর্ষণম্| এভিরেব ক্বথিতৈর্গণ্ডূষঃ| কিরাততিক্তলোধ্রদার্বীশতপুষ্পানিম্বপত্রকুষ্ঠৈলাগুডূচীচিত্রকতগরমুস্তাক্বাথকল্কবিপক্বং তৈলং নাবনম্||৪৭||
गलविद्रधौ विस्रावितायां लोध्रवरारसाञ्जनपतङ्गगैरिकरोचनापिप्पलीसैन्धवचूर्णैरवघर्षणम्| एभिरेव क्वथितैर्गण्डूषः| किराततिक्तलोध्रदार्वीशतपुष्पानिम्बपत्रकुष्ठैलागुडूचीचित्रकतगरमुस्ताक्वाथकल्कविपक्वं तैलं नावनम्||४७||
🔊 Audio coming soon
তৈলং নাবনমিত্যেবমন্তং গলবিদ্রধৌ| বিস্রাবিতাযাং শস্ত্রেণ বিশোধিতাযাং সত্যাং লোধ্রাদিচূর্ণৈরবঘর্ষণম্| এভিরেব লোধ্রাদিভির্জলে ক্বথিতৈর্গণ্ডূষশ্চ হিতঃ| বরা শ্রেষ্ঠা| রসাঞ্জনং তার্ক্ষ্যম্| কিরাততিক্তকাদিক্বাথকল্কপক্বং তৈলং নাবনম্ ||৪৭||
Adhikarana vAtagalagaNDacikitsA (48) · Śloka 48
গলগণ্ডমনিলজং স্বেদযিত্বা বিস্রাবযেত্ রূঢব্রণঞ্চ তিলপ্রিযাললট্বামূলকশণাতসীবীজৈরুপনাহযেত্| তিল্বকাগ্নিমন্থপুনর্নবকালামৃতাসৌ ভাঞ্জনকগজপিপ্পল্যেকৈষিকার্কমূলকরঘাটকপুষ্পৈঃ সুরাম্লপিষ্টৈঃ পুনঃ পুনর্লেপযেত্| নিম্বগুডূচীকুটজহংসপাদীকৃষ্ণাবলাদ্বযদেবদারুসিদ্ধং চ তৈলং পাযযেত্||৪৮||
गलगण्डमनिलजं स्वेदयित्वा विस्रावयेत् रूढव्रणञ्च तिलप्रियाललट्वामूलकशणातसीबीजैरुपनाहयेत्| तिल्वकाग्निमन्थपुनर्नवकालामृतासौ भाञ्जनकगजपिप्पल्येकैषिकार्कमूलकरघाटकपुष्पैः सुराम्लपिष्टैः पुनः पुनर्लेपयेत्| निम्बगुडूचीकुटजहंसपादीकृष्णावलाद्वयदेवदारुसिद्धं च तैलं पाययेत्||४८||
🔊 Audio coming soon
তৈলং পাযযেদিত্যেবমন্তমনিলজে গলগণ্ডে| বাতজং গলগণ্ডং তাপাদ্যন্যতমস্বেদেন স্বেদযিত্বা জলূকাদ্যন্যতমেন রক্তং বিস্রাবযেত্| রূঢব্রণং চানুবন্ধপরিহারার্থং তিলাদিভিরুপনাহযেত্| লট্বা লম্বা, অতসী উমা, উপনাহঃ পিণ্ডবন্ধঃ| সুরাম্লপিষ্টৌস্তিল্বকাদিভিঃ পুনঃ পুনর্লেপযেত্| অগ্নিমন্থস্তর্কারী, কালা নীলিনী, (নি) `নীলিন্যুক্তা নীলিকা নীলপত্রী নীলা নীলী নীলযষ্টী বিষঘ্নী| চণ্ডাল্যান্যারাজনী ভারবাহী কালা কালী চাস্পৃশা শোধনী চ|' সৌভাঞ্জনকঃ শিগ্রুঃ| একৈষীকা মহাদূর্বা ত্রিবৃদ্ধা| করঘাটো মদনঃ| (নি) মদনং রাঢঃ পিণ্ডী করঘাটঃ শল্যকঃ ফলং জগদুঃ| নিম্বাদিসিদ্ধং তৈলং পাযযেচ্চ| হংসপাদী ত্রিপাদী||৪৮||
Adhikarana SleShmagalagaNDacikitsA (49) · Śloka 49
শ্লৈষ্মিকেঽপ্যযমেব বিধিঃ তীক্ষ্ণতরাশ্চ স্বেদপ্রলেপাদযঃ| বিশল্যাতিবিষাবিষাণিকাশুকনাসাজগন্ধাগুঞ্জাফলকটুকালাবুভিঃ পলাশক্ষারাম্বুপিষ্টৈঃ সুখোষ্ণো লেপঃ| বত্সকাদিনা পঞ্চলবণযুক্তেন সিদ্ধং তৈলং পানম্| তীক্ষ্ণাংশ্চ বমনাদীন শীলযেত্| পর্যাযতশ্চ স্বেদং শোণিতাবসেচনং চ| তথানুপশমে পাচযিত্বা ব্রণাবদুভাবপ্যুপাচরেত্| যবান্নমুদ্গাদিযূহাংশ ব্যোষোত্কটান্ পানভোজনযোর্বিদধ্যাত্||৪৯||
श्लैष्मिकेऽप्ययमेव विधिः तीक्ष्णतराश्च स्वेदप्रलेपादयः| विशल्यातिविषाविषाणिकाशुकनासाजगन्धागुञ्जाफलकटुकालाबुभिः पलाशक्षाराम्बुपिष्टैः सुखोष्णो लेपः| वत्सकादिना पञ्चलवणयुक्तेन सिद्धं तैलं पानम्| तीक्ष्णांश्च वमनादीन शीलयेत्| पर्यायतश्च स्वेदं शोणितावसेचनं च| तथानुपशमे पाचयित्वा व्रणावदुभावप्युपाचरेत्| यवान्नमुद्गादियूहांश व्योषोत्कटान् पानभोजनयोर्विदध्यात्||४९||
🔊 Audio coming soon
কফজে গলগণ্ডেঽপ্যযমেব বাতগলগণ্ডোক্তো বিধিঃ কর্তব্যঃ| বাতজে স্বেদাদযোঽল্পা অত্র ত্বধিকাঃ| পলাশক্ষারাম্বুপিষ্টা বিশল্যাদ্যা লেপঃ| বিশল্যা লাঙ্গলীবিষাণিকা ঋষভকঃ, শুকনাসা শুকাখ্যা, কটুকালাবুস্তুম্বী, পঞ্চলবণযুক্তেন বত্সকাদিনা পক্বং তৈলং পিবেত্| তীক্ষ্ণান্ কফঘ্নানিত্যর্থঃ| তথানুপশমে এবমপ্যশান্তৌ| উভাবপীতি বাতজং কফজং চ| যবান্নাদীংশ্চ ব্যোষোত্কটান্ পানে ভোজনে চ দদ্যাত্||৪৯||
Adhikarana medojagalagaNDacikitsA (50) · Śloka 50
মেদোজে স্বিন্নস্য সিরাং বিধ্যেত্| পূর্বোক্তাঃ প্রলেপাঃ প্রাতঃ প্রাতশ্চাসনাদিসাররজো গোমূত্রেণ পিবেত্| এবমপ্যশান্তৌ শস্ত্রেণ বিদার্য মেদো বিশোধ্য সীব্যেত্| দাহযোগ্যং বা বসাঘৃতক্ষৌদ্রান্যতমেন যথাবদ্দহেত্| রোচনাকাসীসতুত্থকচূর্ণাবচূর্ণিতং তৈলং ব্রণশোধনরোপণম্| অসনাদিসারগোপুরীষভস্মযুক্তং বা||৫০||
मेदोजे स्विन्नस्य सिरां विध्येत्| पूर्वोक्ताः प्रलेपाः प्रातः प्रातश्चासनादिसाररजो गोमूत्रेण पिबेत्| एवमप्यशान्तौ शस्त्रेण विदार्य मेदो विशोध्य सीव्येत्| दाहयोग्यं वा वसाघृतक्षौद्रान्यतमेन यथावद्दहेत्| रोचनाकासीसतुत्थकचूर्णावचूर्णितं तैलं व्रणशोधनरोपणम्| असनादिसारगोपुरीषभस्मयुक्तं वा||५०||
🔊 Audio coming soon
গোপুরীষভস্মযুক্তং বেত্যন্তং মেদোজে| মেদোভবে গলগণ্ডে স্বেদিতস্য সূত্রোদিতামূরুগাং সিরাং বিধ্যেত্| পূর্বোক্তাঃ প্রলেপা বাতজে কফজে চ গলগণ্ডে উক্তাঃ| অসনাদিগণচূর্ণং প্রাতঃ প্রাতর্গোমূত্রেণ পিবেত্| এবমপ্যশান্তৌ তথানুপশমে দাহযোগ্যং বসাদ্যন্যতমেন যথাবিদ্বিধিবদ্দহেত্| রোচনাদিচূর্ণাবচূর্ণিতং তৈলং ব্রণশোধনং রোপণং চ ভবতি| অসনাদিসারাদিযুক্তং তৈলং বা ||৫০||
Adhikarana mukhapAkeShu sAdhAraNacikitsA (51) · Śloka 51
মুখপাকেষু সামান্যতস্ত্রিফলাক্বাথো মধুমানন্যে চ| তিক্তকটুককষাযা মুখধাবনাঃ| মৃদ্বীকাপাঠাজাতীমাতুলুঙ্গার্জুনপুত্রজীবকপল্লবানামনভ্যবহরতা চবর্ণম্||৫১||
मुखपाकेषु सामान्यतस्त्रिफलाक्वाथो मधुमानन्ये च| तिक्तकटुककषाया मुखधावनाः| मृद्वीकापाठाजातीमातुलुङ्गार्जुनपुत्रजीवकपल्लवानामनभ्यवहरता चवर्णम्||५१||
🔊 Audio coming soon
মুখপাকেষু সাধারণং চিকিত্সিতমাহ| মুখপাকেষু সক্ষৌদ্রা মুখধাবনাঃ প্রযোজ্যাঃ| কে ত ইত্যাহ-ত্রিফলাক্বাথশ্চান্যে তিক্তকটুককষাযাশ্চ| অথবা মৃদ্বীকাদিজীবকপল্লবান্তানাং চর্বণম্, তেষাং নিগিরণং ন কর্তব্যম্| পল্লবোভিনবোত্পন্নং পত্রম্||৫১||
Adhikarana mukhapAkeShu sAdhAraNacikitsA (52) · Śloka 52
দারুহরিদ্রার্ধতুলাং বিংশতিগুণেঽম্ভসি শ্রপযিত্বা তং ক্বাথং সগৈরিকমাদর্বীপ্রলেপাত্ সাধিতং ক্ষৌদ্রযুক্তং ঘৃতভাজনে নিদধ্যাত্| এতন্নিষ্ঠীবনং সর্বমুখামযনাডীঘ্নম্| অযমেব চ পৃথক্কল্পো যষ্টীমধুকপটোলিনিম্বাটরূষকজাতীলোধ্রারিমেদত্রিফলাজম্বূখদিরত্বচাম্||৫২||
दारुहरिद्रार्धतुलां विंशतिगुणेऽम्भसि श्रपयित्वा तं क्वाथं सगैरिकमादर्वीप्रलेपात् साधितं क्षौद्रयुक्तं घृतभाजने निदध्यात्| एतन्निष्ठीवनं सर्वमुखामयनाडीघ्नम्| अयमेव च पृथक्कल्पो यष्टीमधुकपटोलिनिम्बाटरूषकजातीलोध्रारिमेदत्रिफलाजम्बूखदिरत्वचाम्||५२||
🔊 Audio coming soon
দারুহরিদ্রাযা অর্ধতুলাং পঞ্চাশত্ পলানি তেভ্যো বিংশতিগুণমম্ভঃপলসহস্রং তস্মিন্ ক্বাথযিত্বা তং ক্বাথং গৈরিকসহিতমাদর্বীপ্রলেপাত্ দর্বীপ্রলেপং যাবত্ সাধিতং পক্বং মধুনা যুক্তং ঘৃতলিপ্তভাজনে স্থাপযেত্| সুবোধম্| যষ্টীমধুকাদীনামযমেব দারুহরিদ্রাবিহিত এব পৃথক্ কল্পঃ কার্যঃ||৫২||
Adhikarana mukhapAkeShu sAdhAraNacikitsA (53) · Śloka 53
যবক্ষারভাগাঃ সপ্ত সুবর্ণগৈরিকাদ্ ভাগদ্বযং মূর্বাকটুকাতিবিষাঽঽমলকানামেকো ভাগস্তত্ সর্বং কুতলক্ষারোদকপিষ্টং গুটিকাঃ কৃত্বা খাদেন্নিষ্ঠীবেচ্চ||৫৩||
यवक्षारभागाः सप्त सुवर्णगैरिकाद् भागद्वयं मूर्वाकटुकातिविषाऽऽमलकानामेको भागस्तत् सर्वं कुतलक्षारोदकपिष्टं गुटिकाः कृत्वा खादेन्निष्ठीवेच्च||५३||
🔊 Audio coming soon
যবক্ষারস্য ভাগা অংশাঃ সপ্ত| সুবর্ণগৈরিকাত্ গৈরিকবিশেষাত্ ভাগদ্বযং মূর্বাদীনাং প্রত্যেকমেকো ভাগস্তত্ সর্বং কুতলক্ষারোদকপিষ্টং কৃত্বা গুটিকাঃ কার্যাস্তাঃ খাদেন্নিষ্ঠীবেচ্চ| তাঃ পূর্বগুণাঃ| কুতকস্তিলকাণ্ডঃ দগ্ধস্য তস্য ক্ষারঃ||৫৩||
Adhikarana mukhapAkeShu sAdhAraNacikitsA (54) · Śloka 54
খদিরসারতুলামরিমেদতুলাদ্বযং চ তোযবহেঽষ্টভাগাবশেষং ক্বাথযেদবতারিতং পরিস্রুতং চ পুনরাঘনীভাবাত্| ঘনীভূতেশীতে চ কার্ষিকাণি শ্লক্ষ্ণীকৃতানি প্রক্ষিপেচ্চন্দনপদ্মকোশীরবালকমঞ্জিষ্ঠাধাতকীমুস্তপ্রপৌণ্ডরীকমধুকত্রিফলাচাতুর্জাতকলাক্ষানলদতার্ক্ষ্যশৈললোধ্রদ্বিরজনীসমঙ্গাপাঠাকট্ফলৈলেযপত্তঙ্গাগরুগৈরিকাঞ্জনানি| পালিকাংশ্চ জাতীফললবঙ্গকঙ্কোলকবুকান্| কর্প্পূরার্দ্ধকুডবং চ| তা গুটিকা বদনস্থাঃ সর্বান্ মুখরোগান্ জযন্তি| সৌরভং সৌমনস্যং রুচিং চ জনযন্তি||৫৪||
खदिरसारतुलामरिमेदतुलाद्वयं च तोयवहेऽष्टभागावशेषं क्वाथयेदवतारितं परिस्रुतं च पुनराघनीभावात्| घनीभूतेशीते च कार्षिकाणि श्लक्ष्णीकृतानि प्रक्षिपेच्चन्दनपद्मकोशीरवालकमञ्जिष्ठाधातकीमुस्तप्रपौण्डरीकमधुकत्रिफलाचातुर्जातकलाक्षानलदतार्क्ष्यशैललोध्रद्विरजनीसमङ्गापाठाकट्फलैलेयपत्तङ्गागरुगैरिकाञ्जनानि| पालिकांश्च जातीफललवङ्गकङ्कोलकबुकान्| कर्प्पूरार्द्धकुडवं च| ता गुटिका वदनस्थाः सर्वान् मुखरोगान् जयन्ति| सौरभं सौमनस्यं रुचिं च जनयन्ति||५४||
🔊 Audio coming soon
খদিরেত্যাদি| খদিরস্য তুলা পলশতমরিমেদসোঽহিমারস্য তুলাদ্বযং দ্বে পলশতে চ তোযবহেঽপাং ঘটচতুষ্টকে| ঘটোদ্বাদশাধিকানি পঞ্চপলশতানি| অষ্টভাগবশেষমষ্টাংশাবশেষং ক্বাথযেত্| অবতরিতং চুল্লীতপরিস্রুতং গালিতঞ্চ তং পুনরাঘনীভাবাত্ ঘনীভাবাবধি ক্বাথযেত্| ঘনীভূতে শীতে চ সতি কার্ষিকাণি কর্ষপ্রমাণানি শ্লক্ষ্ণচূর্ণীকৃতানি চন্দনাদীন্যৌষধানি প্রক্ষিপেত্| পালিকান্ পলপ্রমাণান্ জাতীফলাদীন্ কর্পূরস্যার্দ্ধকুডবং দ্বে পলে চ| ততো গুটিকাঃ কুর্যাত্| বদনস্থাস্তাঃ সকলান্ মুখরোগান্ জযন্তি সৌরভাদীংশ্চ জনযন্তি||৫৪||
Adhikarana mukhapAkeShu sAdhAraNacikitsA (55) · Śloka 55
এষামেব চ কলককষাযৈস্তৈলং সাধিতং কবলে নিযুঞ্জ্যাত্||৫৫||
एषामेव च कलककषायैस्तैलं साधितं कवले नियुञ्ज्यात्||५५||
🔊 Audio coming soon
এষামেব খদিরসারাদীনাং কল্কৈঃ কষাযেণ চ সাধিতং পক্বং তৈলং কবলে কবলধারণে নিযুঞ্জ্যাদ্যোজযেত্||৫৫||
Adhikarana vAtajamukhapAke visheShopakramaH (56) · Śloka 56
তত্র বাতজে মুখপাকে দশমূলকাকোলীরাস্নামধুকসারিবাক্বাথেন কুষ্ঠকল্কেন চ সিদ্ধং তৈলং নস্যং গণ্ডূষশ্চ| স্নৈহিকো ধূমঃ| পিপ্পল্যেলালবণোত্তমৈঃ প্রতিসারযেত্||৫৬||
तत्र वातजे मुखपाके दशमूलकाकोलीरास्नामधुकसारिवाक्वाथेन कुष्ठकल्केन च सिद्धं तैलं नस्यं गण्डूषश्च| स्नैहिको धूमः| पिप्पल्येलालवणोत्तमैः प्रतिसारयेत्||५६||
🔊 Audio coming soon
বাতাদিজেষু মুখপাকেষু বিশেষোপক্রমমাহ-তত্রেত্যাদি| বাতজে মুখপাকে দশমূলাদিক্বাথেন কুষ্ঠকল্কেন চ সিদ্ধং পক্বং তৈলং নস্যং হিতং গণ্ডূষশ্চ| স্নৈহিকো ধূমঃ সূত্রোদিতঃ| পিপ্পল্যাদিভিঃ প্রতিসারণং রসক্রিযাদিভেদেন বিবিধম্||৫৬||
Adhikarana paittikamukhapAke visheShopakramaH (57) · Śloka 57
পৈত্তিকে ক্ষীরেক্ষুরসদ্রাক্ষাশর্করোদকৈর্গণ্ডূষঃ| মধুরদ্রব্যসিদ্ধং পযঃ পানং কবলো নস্যং চ| পদ্মকসমঙ্গামঞ্জিষ্ঠালোধ্রধাতকীবিপক্বঃ সর্পির্মণ্ডো নাবনম্| মদযন্তি কাপত্রৈর্নিষ্ঠীবনং চ||৫৭||
पैत्तिके क्षीरेक्षुरसद्राक्षाशर्करोदकैर्गण्डूषः| मधुरद्रव्यसिद्धं पयः पानं कवलो नस्यं च| पद्मकसमङ्गामञ्जिष्ठालोध्रधातकीविपक्वः सर्पिर्मण्डो नावनम्| मदयन्ति कापत्रैर्निष्ठीवनं च||५७||
🔊 Audio coming soon
পিত্তজে মূখপাকে ক্ষীরাদিভির্গণ্ডূষঃ| অসঞ্চার্যা তু যা মাত্রা স গণ্ডূষ ইতি সূত্রোক্তলক্ষণঃ| মধুরদ্রব্যাণি মধুরদ্রব্যস্কন্ধনির্দিষ্টানি ঘৃতমধ্বাদীনি তৈঃ সিদ্ধং ক্ষীরং পানাদিষু হিতম্| পদ্মকাদিসিদ্ধো ঘৃতমণ্ডো নাবনং নস্যম্| সুবোধম্| মদযন্তিকা ধাতকী||৫৭||
Adhikarana kaphajamukhapAke visheShopakramaH (58) · Śloka 58
কফজে কটুকক্ষারলবণৈঃ প্রতিসারণম্| স্থিরাসু তু পিটকাসু প্রাক্শাকাদিপত্রেণ লেখনম্| মুষ্ককপলাশামলকীক্ষারগোমূত্রৈর্গণ্ডূষঃ| তদ্বিপক্বং চ তৈলম্| নির্গুণ্ডীফণিজ্জকার্জকসুরসপত্রৈর্নিষ্ঠীবনম্| দেবদারুপাঠাতিবিষাদন্তীন্দ্রযবকটুকাগোমূত্রেণ কল্কিতাঃ ক্বথিতা বা পীতাঃ সর্বকফামযান্ নিঘ্নন্তি||৫৮||
कफजे कटुकक्षारलवणैः प्रतिसारणम्| स्थिरासु तु पिटकासु प्राक्शाकादिपत्रेण लेखनम्| मुष्ककपलाशामलकीक्षारगोमूत्रैर्गण्डूषः| तद्विपक्वं च तैलम्| निर्गुण्डीफणिज्जकार्जकसुरसपत्रैर्निष्ठीवनम्| देवदारुपाठातिविषादन्तीन्द्रयवकटुकागोमूत्रेण कल्किताः क्वथिता वा पीताः सर्वकफामयान् निघ्नन्ति||५८||
🔊 Audio coming soon
কফজে মুখপাকে কটুকাদিভিঃ প্রতিসারণম্| স্থিরাসু পিটকাসু তু লেখনাদিকং কর্ম সুবোধম্| দেবদার্বাদযো গোমূত্রেণ পীতাঃ সর্বকফামযঘ্নাঃ||৫৮||
Adhikarana raktajamukhapAke visheShopakramaH (59) · Śloka 59
রক্তজে পিত্তবত্ সিদ্ধিঃ| সর্বজে যথাদোষোদযম্| রোচনাকাসীসসৌরাষ্ট্রিকারসাঞ্জনানি মোচরসো মধু চৈকতো বিপক্বং লোহভাজনস্থং কল্কং বিশুষ্কং চূর্ণীকৃতং মধুনা ব্রণলেপং কুর্যাত্||৫৯||
रक्तजे पित्तवत् सिद्धिः| सर्वजे यथादोषोदयम्| रोचनाकासीससौराष्ट्रिकारसाञ्जनानि मोचरसो मधु चैकतो विपक्वं लोहभाजनस्थं कल्कं विशुष्कं चूर्णीकृतं मधुना व्रणलेपं कुर्यात्||५९||
🔊 Audio coming soon
রক্তজে মুখপাকে পিত্তমুখপাকবত্ সিদ্ধিঃ সাধনম্| সর্বজে সন্নিপাতজে মুখপাকে যথাদোষোদযমুত্কৃষ্টদোষানতিক্রমেণ চিকিত্সা| রসাঞ্জনাদি চৈকতো বিপক্বমেকস্মিন্ পাত্রে কৃত্বা পক্বং লোহপাত্রস্থাং কল্কং বিশুহ্কং কৃত্বা চূর্ণীকৃতং মধুনা সহ ব্রণে লেপং কুর্যাত্| রোচনা গোরোচনা||৫৯||
Adhikarana arbudacikitsA (60) · Śloka 60
অথ সর্বসরমর্বুদমচিরোত্থিতমবৃদ্ধং মণ্ডলাগ্রেণ ছিত্বা মুষ্ককভস্মনা মধুমিশ্রেণ প্রতিসারযেত্ স্বর্জিকাশুণ্ঠীচূর্ণেন বা| মধু তৈলং নিম্বগুডূচীক্বাথশ্চ গণ্ডূষঃ| যবান্নভোজী তীক্ষ্ণানি কবলাভ্যঙ্গনস্যযাচরেত্||৬০||
अथ सर्वसरमर्बुदमचिरोत्थितमवृद्धं मण्डलाग्रेण छित्वा मुष्ककभस्मना मधुमिश्रेण प्रतिसारयेत् स्वर्जिकाशुण्ठीचूर्णेन वा| मधु तैलं निम्बगुडूचीक्वाथश्च गण्डूषः| यवान्नभोजी तीक्ष्णानि कवलाभ्यङ्गनस्ययाचरेत्||६०||
🔊 Audio coming soon
অথেত্যাদিনাঽর্বুদচিকিত্সা| অচিরোত্থিতমিত্যসাধ্যত্বাদ্বিশেষণম্| মণ্ডলাগ্রেণ শস্ত্রেণ ছিত্বা মধুমিশ্রেণ মুষ্ককভস্মনা স্বর্জিকাদিচূর্ণেন বা প্রতিসারযেদিতি সম্বন্ধঃ| মধ্বাদিগণ্ডূষঃ সুবোধঃ| যবান্নং ভুঞ্জানঃ তীক্ষ্ণানি কবলাদীন্যাচরেত্||৬০||
Adhikarana pUtimukhacikitsA (61) · Śloka 61
পূতিমুখং স্নিগ্ধস্বিন্নং বামযিত্বা শিরোবিরেকৈরুপাচরেত্| ততঃ স্বর্জিকাহিঙ্গুগৃহধূমমনশ্শিলৈলাশুণ্ঠীবিডঙ্গতেজোবতীভির্গুটিকাঃ কৃত্ব্রা মধুদ্রুতা মুখপরিশোধনার্থং দদ্যাত্| সমঙ্গাধাতকীপদ্মলোধ্রপ্রিযঙ্গুচূর্ণৈঃ সলিলমবচূর্ণিতং মুখধাবনম্| শীতাদোপকুশোক্তং চ কুর্যাত্| নস্যধূমকবলাংশ্চ শীলযেত্||৬১||
पूतिमुखं स्निग्धस्विन्नं वामयित्वा शिरोविरेकैरुपाचरेत्| ततः स्वर्जिकाहिङ्गुगृहधूममनश्शिलैलाशुण्ठीविडङ्गतेजोवतीभिर्गुटिकाः कृत्व्रा मधुद्रुता मुखपरिशोधनार्थं दद्यात्| समङ्गाधातकीपद्मलोध्रप्रियङ्गुचूर्णैः सलिलमवचूर्णितं मुखधावनम्| शीतादोपकुशोक्तं च कुर्यात्| नस्यधूमकवलांश्च शीलयेत्||६१||
🔊 Audio coming soon
শিলযেদিত্যন্তং পূত্যাস্যাখ্যে| পূতিমুখং পূর্বং স্নিগ্ধং পশ্চাত্ সিবন্নমনন্তরং বামযিত্বা শিরোবিরেকৈর্বিরেচননস্যৈরুপাচরেদুপক্রমেত্| তত ইতি শিরোবিরেচনস্য পশ্চাত্ স্বর্জিকাদিভির্গুটিকাঃ কৃত্বা মধুনা দ্রবীকৃতা মুখপরিশোধনায দদ্যাত্| সমঙ্গাদিচূর্ণৈরবচূর্ণিতং সলিলং মুখস্য ধাবনং ক্ষালনম্| শীতাদোপকুশযোর্যত্কিঞ্চিদুক্তং তদপি কুর্যাত্||৬১||
Adhikarana sAmAnyopadeshaH (62) · Śloka 62
ভবতি চাত্র মুখদন্তমূলগলজাঃ প্রাযো রোগাঃ কফস্ত্রভূযিষ্ঠাঃ| তস্মাত্তেষামসকৃদ্রুধিরং বিস্রাবযেদ্ দুষ্টম্||৬২||
भवति चात्र मुखदन्तमूलगलजाः प्रायो रोगाः कफस्त्रभूयिष्ठाः| तस्मात्तेषामसकृद्रुधिरं विस्रावयेद् दुष्टम्||६२||
🔊 Audio coming soon
মুখাদিজা রোগাঃ প্রাযো বাহুল্যেন যতঃ কফাস্রভূযিষ্ঠাঃ ভবন্তি তস্মাত্তেষাং মুখাদিরোগাণাং দুষ্টং রুধিরমসকৃত্স্রাবযেত্ ||৬২||
Adhikarana sAmAnyopadeshaH (63) · Śloka 63
কাযশিরসোর্বিরেকো বমনং কবলগ্রহাঃ কটুকতিক্তাঃ| প্রাযঃ শস্তং তেষাং কফরক্তহরং তথা কর্ম| যবতৃণধান্যং ভক্তং বিদলৈঃ ক্ষারোষিতৈরপস্নেহাঃ| যূষা ভক্ষ্যাশ্চ হিতা যচ্চান্যছ্লেষ্মনাশায||৬৩||
कायशिरसोर्विरेको वमनं कवलग्रहाः कटुकतिक्ताः| प्रायः शस्तं तेषां कफरक्तहरं तथा कर्म| यवतृणधान्यं भक्तं विदलैः क्षारोषितैरपस्नेहाः| यूषा भक्ष्याश्च हिता यच्चान्यछ्लेष्मनाशाय||६३||
🔊 Audio coming soon
কাযশিরোবিরেকাদেঃ শস্তমিত্যনেন সম্বন্ধঃ| ভক্তং যবতৃণধান্যং চ| বিদলৈঃ খণ্ডসস্যৈঃ ক্ষারোদক উষিতৈরপগতস্নেহা যূষাদযো হিতাঃ| যচ্চ কিঞ্চিচ্ছ্লেষ্মনাশায তত্সর্বং হিতম্||৬৩||
Adhikarana sAmAnyopadeshaH (64-26) · Śloka 26
প্রাণানিলপথসংস্থাঃ শ্বসিতমপি নিরুন্ধতে প্রমাদবতঃ| কণ্ঠামযাশ্চিকিত্সিতমতো দ্রুতং তেষু কুর্বীত||৬৪|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতাবষ্টাঙ্গসংগ্রহসংহিতাযামুত্তরতন্ত্রে মুখরোগপ্রতিষেধো নাম ষড্বিংশোঽধ্যাযঃ||২৬||
प्राणानिलपथसंस्थाः श्वसितमपि निरुन्धते प्रमादवतः| कण्ठामयाश्चिकित्सितमतो द्रुतं तेषु कुर्वीत||६४|| इति वैद्यपतिसिंहगुप्तस्य सूनोर्वाग्भटस्य कृतावष्टाङ्गसंग्रहसंहितायामुत्तरतन्त्रे मुखरोगप्रतिषेधो नाम षड्विंशोऽध्यायः||२६||
🔊 Audio coming soon
এতে চ কণ্ঠামযাঃ প্রাণানিলস্য পথি স্থিতাঃ প্রমাদস্য কর্তুঃ শ্বসিতমপি যতো নিরুন্ধতে অতস্তেষু দ্রুতং শীঘ্রং চিকিত্সিতং কুর্বীতেতি|| ৬৪|| ইতি শ্রীমন্মহামহোপাধ্যাযেন্দুবিরচিতাযামষ্টাঙ্গসংগ্রহব্যাখ্যাযাং শশিলেখাযামুত্তরতন্ত্রে ষড্বিংশোঽধ্যাযঃ||