45. pratyēkalūtāpratiṣēdhaḥ

Adhikarana atha pratyekalUtApratiShedho nAma pa~jcacatvAriMsho~adhyAyaH, adhyAyapratij~jA (1) · Śloka 1

অথাতঃ প্রত্যেক লূতাপ্রতিষেধং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

সামান্যেন লূতানাং চিকিত্সাবিধানুমুক্ত্বা যথাপ্রধানং প্রত্যেকং চিকিত্সাং প্রদর্শযিতুমধ্যায আরভ্যতে|| ১||

Adhikarana kapilAlakShaNaM pratiShedhashca (2) · Śloka 2

আদংশে পিটকা তাম্রা ভবেত্কপিলযা স্থিরা| লসীকা রোমকূপেষু দাহোষ্ণৌ মূর্ধ্নি গৌরবম্| পাননস্যাঞ্জনালেপসেকেষ্বত্র প্রযোজযেত্| নিশাপদ্মককুষ্ঠৈলাকরঞ্চককুভত্বচঃ| স্থিরার্কপর্ণ্যপামার্গব্রাহ্মীজ্বলননাকুলীঃ| অথবা কুষ্ঠপত্তঙ্গনখজোঽঙ্গককুঙ্কুমম||২||

কপিলাখ্যযা লূতাযা আদংশে তাম্রা স্থিরা চ পিটকা ভবেন্মূর্ধগৌরবান্তং চ| অত্র নিশাদিকং নাকুল্যন্তং পানাদিষু যোজযেদথবা কুষ্ঠাদিকং কুঙ্কুমান্তম্| ককুভোঽর্জুনঃ| অর্কপর্ণ্যলর্কঃ|| ২||

Adhikarana agnimukhIlakShaNam pratiShedhashca (3) · Śloka 3

অগ্নিমুখ্যাতিরুক্স্ফোটঃ সম্ভবত্যগ্নিদগ্ধবত্| অগ্নিজ্বালাসমানেন প্রস্বিদ্যতি বিষোষ্মণা| তৃড্দাহকম্পমূর্চ্ছাবান্ পিত্তাস্রমতিসার্যতে| যোজযেত্পূর্ববত্তত্র প্রত্যাখ্যায ত্বরান্বিতঃ| কুষ্ঠলামজ্জকোশীরমধুকং মধুকং মধু| লাভতঃ শীতবীর্যাণি তালীসং গোপকন্যকাম্||৩||

অগ্নিমুখ্যাখ্যযা লূতযা আদংশে অতিরুক্স্ফোটঃ সম্ভবতি যথাঽগ্নিদগ্ধে| অগ্নিজ্বালাসদৃশেন চ বিষোষ্মণা পুরুষঃ প্রস্বিদ্যতি| তৃডাদিমাংশ্চ রক্তপিত্তমতিসার্যতে| তত্রাগ্নিমুখ্যাং প্রত্যাখ্যানং কৃত্বা ত্বরযা পূর্ববত্ কপিলাবত্ পানাদিকং যোজযেত্| শীতবীর্যাণি চন্দনোশীরাদীনি চ লাভতো যথালাভম্| তালীসাদিকং চ|| ৩||

Adhikarana pItAlakShaNaM pratiShedhashca (4) · Śloka 4

পীতযা পীতবিণ্মূত্রদংশক্লেদাক্ষিদর্শনঃ| মূর্চ্ছাচ্ছর্দিশিরোদুঃখজ্বরারোচকশূলবান্| তত্রেষ্টাঃ কটভোশীরমুঞ্জাবঞ্জুলপাবকাঃ| বংশকাশার্জুনকুশাঃ শিরীষকিণিহীত্বচঃ| অথবা বন্যবাহ্লীককুষ্ঠকেসরজোঙ্গকম্||৪||

পীতাখ্যযা লূতযা আদংশে সতি পুরুষ পীতবর্ণৈর্বিডাদিভির্মূচ্ছাদিভিশ্চ যুক্তো ভবতি| তত্র কটভাদিকং পানাদিষু যোজযেত্| অথবা বন্যাদিকম্| কটভা কটভী| জোঙ্গকং কৃষ্ণাগরু|| ৪||

Adhikarana padmAlakShaNaM pratiShedhashca (5) · Śloka 5

পদ্মাভঃ পদ্মযা স্ফোটো ভিন্নোঽভিন্নঃ পুনর্ভবেত্| ক্লিদ্যত্যাশু স্রবত্যুষ্ণং ক্লেদস্পর্শেঽতিরুক্করঃ| তত্র পদ্মোত্পলান্নালো হিমবেতসবঞ্জুলাঃ| সমৃণালাঃ সকুমুদাঃ সক্ষৌদ্রঘৃতশর্করাঃ||৫||

পদ্মাখ্যযা আদংশে পদ্মাভঃ স্ফোটো ভবতি| ভিন্নোঽপি সন্ পুনরভিন্নো ভবতি| স চ স্ফোট আশু ক্লিদ্যত্যুষ্ণং চ ক্লেদং স্রবতি| স্পর্শে চাতিরুক্করো ভবতি| তত্র পদ্মোত্পলাদিকং শর্করান্তং পানাদিষু|| ৫||

Adhikarana mUtraviShAlakShaNaM pratiShedhashca (6) · Śloka 6

পূতির্মূত্রবিষাদংশো বিসর্পী কৃষ্ণশোণিতঃ| শ্বাসকাসজ্বরচ্ছর্দিমূর্চ্ছাদাহ্ভ্রমান্বিতঃ| মনশ্শিলালমধুকমধুকোত্পলচন্দনম্| কুষ্ঠলামজ্জকোশীরপদ্মকং তত্র ভেষজম্||৬||

মূত্রবিষাযাঃ পূতির্দংশো ভবতি বিসর্পাদ্যন্বিতশ্চ| তত্র মনশ্শিলাদিকং পানাদিষু ভেষজম্|| ৬||

Adhikarana shvetAlakShaNaM pratiShedhashca (7) · Śloka 7

আদংশে শ্বেতযা শ্বেতা পিটকা ভৃশকণ্ডুলা| দাহমূর্চ্ছাজ্বররুজাবিসর্পক্লেদকারিণী| তত্রেষ্টাঃ শীতরাস্নৈলাহরেণুনলবঞ্জুলাঃ| কুষ্ঠমাংসী নতোশীরকান্তাধ্যামকপদ্মকাঃ||৭||

শ্বেতাখ্যযা আদংশে শ্বেতা কণ্ডূলা দাহাদিকারিণী চ পিটকা ভবতি| তত্র শীতাদিকং পানাদিষ্বিষ্টম্| শীতং চন্দনম্|| ৭||

Adhikarana kRuShNAlakShaNaM pratiShedhashca (8) · Śloka 8

আদংশঃ কৃষ্ণযা কৃষ্ণো বিড্গন্ধিঃ কলেদশোফবান্| উত্থাপ্যতে কৃষ্ণমসৃগ্দুষ্টম্ তত্র চ ভেষজম্| মহাসুগন্ধা সর্পাক্ষী বক্রৈলা গন্ধনাকুলী||৮||

কৃষ্ণাখ্যযা আদংশঃ কৃষ্ণবর্ণঃ পুরীষগন্ধিঃ ক্লদশোফযুক্তশ্চ ভবতি| দুষ্টম্ কৃষ্ণং চাসৃগুত্থাপ্যতে বিরেচ্যতে| তত্র মহাসুগন্ধাদিকং ভেষজম্| মহাসুগন্ধা রাস্না| বক্রং তগরম্| গন্ধনাকুলী(নি) সূক্ষ্মপত্রা পরা জ্ঞেযা সর্পাক্ষী গন্ধনাকুলী|| ৮||

Adhikarana pANDuralakShaNam pratiShedhashca (9) · Śloka 9

শূনঃ পাণ্ডুরযা দংশঃ শোফো বক্ত্রস্য গৌরবম্| জ্বরো বিঘূর্ণনং জৃম্ভা শিরোরুক্ তত্র ভেষজম্| মূলং বারুণপুষ্পাযা রোচনা গোশকৃদ্রসঃ||৯||

পাণ্ডুরযা দংশঃ শূনো ভবতি| বক্ত্রশোফো গৌরবাদিকং চ| তত্র বারুণপুষ্পামূলাদি ভেষজম্| বারুণপুষ্পা বিশালা|| ৯||

Adhikarana raktapadikAlakShaNaM pratiShedhashca (10) · Śloka 10

আপাণ্ডুপিটকো দংশঃ শোফবান্ রক্তপাদযা| অস্রস্রুত্তত্র নলদসেব্যোদীচ্যহিমং মধু||১০||

রক্তপাদাখ্যযা দংশ আপাণ্ডুভিঃ পিটকাভির্যুক্তঃ শোফবাংশ্চ ভবতি অস্রস্রুচ্চ| তত্র নলদাদিকং ভেষজম্| নলদং মাংসী| সেব্যমুশীরম্| উদীচ্যং বালকম্| হিমং চন্দনম্|| ১০||

Adhikarana bhRu~ggalakShaNaM pratiShedhashca (11) · Śloka 11

ভৃঙ্গাভো ভৃঙ্গযা দংশঃ পিটকা দাহরুক্করী| কোঠৈশ্চ চীযতে গাত্রং তত্র শস্তং ভিষগ্জিতম্| অঙ্কোলসারং ফলিনী গবাং পিত্তং মিসির্গদঃ||১১||

ভৃঙ্গাখ্যযো দংশো ভৃঙ্গাভো ভ্রমরবর্ণঃ পিটকা চ দাহরুক্করী ভবতি| গাত্রং চ কোঠৈশ্চীযতে| তত্রাঙ্কোলসারদিকং ভিষগ্জিতমৌষধং শস্তম্| ফলিনী প্রিযঙ্গুঃ| মিসিঃ শতপুষ্পা| গদঃ কুষ্ঠম্| অঙ্কোলবৃক্ষাঃ প্রসিদ্ধস্তস্য সারঃ|| ১১||

Adhikarana pi~ggAlakShaNaM pratiShedhashca (12) · Śloka 12

পিঙ্গযা বহ্নিদগ্ধাভো দংশঃ স্ফোটো বহুস্রুতিঃ| তীব্রশোফজ্বররুজাহৃত্পীডাদাহতৃড্যুতঃ| তত্রাঽগদঃ সিতা গুন্দ্রা মল্লিকা মধুকোত্পলম্| জীবকঃ ক্ষীরিণাং শুঙ্গা দ্বিহিমং নাগকেসরম্||১২||

পিঙ্গাখ্যযা দংশোঽগ্নিদগ্ধাভো ভবতি| স্ফোটশ্চ বহুস্রুতিস্তীব্রশোফাদিভির্যুক্তো ভবতি| তত্র সিতাদিকমগদঃ|| ১২||

Adhikarana trimaNDalAlakShaNaM pratiShedhashca (13) · Śloka 13

ত্রিমণ্ডলাযা বহলো দংশঃ কৃষ্ণং স্রবত্যসৃক্| অরুচির্নেত্রযোর্দাহঃ কলুষস্রুতিদৃষ্টিতা| বিবিধৈর্মণ্ডলৈশ্চাস্য শরীরমুপচীযতে| তত্রার্কমূলদ্বিনিশাসুরালাপৃশ্নিপর্ণিকাঃ| দধিত্থনাকুলব্রাহ্মীজ্যোতিষ্মত্যো হিতোঽগদঃ||১৩||

ত্রিমণ্ডলাখ্যাযা দংশো বহলো ঘনো ভবতি| কৃষ্ণবর্ণঞ্চ রক্তং ক্ষরতি স্রবতি| অরুচ্যাদিকং চ ভবতি| অস্য চাতুরস্য শরীরং বিবিধৈর্নানাবিধৈর্মণ্ডলৈরুপচীযতে| তত্রার্কমূলাদিকমগদঃ|| ১৩||

Adhikarana pUtigandhAlakShaNaM pratiShedhashca (14) · Śloka 14

আদংশঃ পূতিগন্ধাযা বিসর্পক্লেদদাহবান্| অলজীসন্নিভো রুগ্বান্ বিবদ্ধপিটকাচিতঃ| ভার্ঙ্গীনিদিগ্ধিকানিম্বপাটলীসিন্দুবারকম্| দূর্বা হরিদ্রে বাসা চ পূতিগন্ধা বিষাপহম্||১৪||

পূতিগন্ধাখ্যাযা আদংশো বিসর্পাদিমানলজীসদৃশত্বাদিযুক্তশ্চ ভবতি| ভার্ঙ্গ্যাদিকং তু পূতিগন্ধা বিষাপহম্|| ১৪||

Adhikarana vIrAlakShaNaM pratiShedhashca (15) · Śloka 15

চিত্রমণ্ডলবান্ দংশঃ পিটকাজালকাবৃতঃ| বীরাযা মুর্ধরুক্ শীতজ্বরান্নদ্বেষসংযুতঃ| হরিদ্রে নলদং কুষ্ঠমেলা সুরসমঞ্জরী| তগরঞ্চ শ্বপিত্তেন পিষ্টং বীরাবিষাপহম্||১৫||

বীরাখ্যাযা দংশশ্চিত্রৈর্মণ্ডলৈর্যুক্তো ভবতি| পিটকাজালকৈরাবৃতো মূর্ধরুগাদিভির্যুক্তশ্চ| শ্বপিত্তেন পিষ্টং হরিদ্রাদ্বযাদিকং তু পানাদিভির্বীরাবিষাপহং ভবতি|| ১৫||

Adhikarana kumudAlakShaNaM pratiShedhashca (16) · Śloka 16

দংশঃ কুমুদযা দাহস্ফোটস্ফুরণতোদবান্| পিচ্ছিলক্লেদবিস্রাবী সশ্বাসস্সগলগ্রহঃ| প্রত্যাখ্যাযাত্র কুর্বীত সামান্যোক্তং ক্রিযাক্রমম্||১৬||

কুমুদাখ্যযা দংশো দাহাদিমান্ পিচ্ছিলক্লেদস্রাবী শ্বাসগলগ্রহাভ্যাং যুক্তশ্চ ভবতি| শ্বাসস্তমকশ্বাসঃ| অত্র প্রত্যাখ্যানং কৃত্বা সামান্যোক্তং পূর্বাধ্যাযবিহিতং ক্রিযাক্রমং চিকিত্সিতং কুর্যাত্|| ১৬||

Adhikarana alaviShAlakShaNaM pratiShedhashca (17) · Śloka 17

ভবন্ত্যলবিষাদংশে পীতলোহিতমণ্ডলাঃ| পিটকাঃ সর্ষপপ্রখ্যাস্তালুশোষো রুজা জ্বরঃ| ছর্দির্দাহঃ শিরঃ কম্পস্তত্র সেব্যঃ সমাক্ষিকঃ| সকাসীসকহ্নীবেরঃ সপিপ্পলিবটাঙ্কুরঃ||১৭||

অলবিষযা দংশে পীতাদিগুণাঃ সর্ষপ্রমাণাঃ পিটকা ভবন্তি| তালুশোষদিকঞ্চ| তত্র সেব্যাদিকং বটাঙ্কুরান্তং ভেষজম্| সেব্যমুশীরম্| বটাঙ্কুরো বটপ্ররোহঃ|| ১৭||

Adhikarana raktAlakShaNaM pratiShedhashca (18) · Śloka 18

রক্তান্তো রক্তযা দংশঃ সপাণ্ডুপিটকাজ্বরঃ| শ্বেতোঽতিসারঃ শ্বসনং দাহঃ ক্লেদঃ সশোণিতঃ| শস্তং শেলবর্জুনাম্রাতাত্ত্বঙ্মূলং সিন্দুবারতঃ||১৮||

রক্তাখ্যযা লূতযা দংশো রক্তান্তো ভবতি| পাণ্ডুবর্ণাভি পিটকাভির্জ্বরেণ চ যুক্তঃ| অতিসারশ্চ শ্বেতো ভবতি| শ্বসনাদিকং চ| অত্র শ্লেষ্মাতকত্বগাদিকং সিন্দুবারমূলান্তং শস্তম্| সিন্দুবারঃ প্রশস্তঃ|| ১৮||

Adhikarana citrAlakShaNaM pratiShedhashca (19) · Śloka 19

আদংশে চিত্রযা রক্তা পিটকা বিসৃতা স্থিরা| পর্বভেদশিরস্তাপজ্বরশোফা বিসর্পিণী| ভিন্না কৃষ্ণত্বমভ্যেতি পীতাস্রাবা মহাব্রণা| তত্রেষ্টাঃ কুষ্ঠনলদশিরীষনলরেণুকাঃ||১৯||

চিত্রাখ্যযা আদংশে রক্তাদিগুণা পিটকা ভবতি| সা চ স্বযং ভিন্না কৃষ্ণত্বমভ্যেতি প্রাপ্নোতি| পীতাস্রাবা মহাব্রণা চ ভবতি| তত্র কুষ্ঠাদিকমিষ্টম্|| ১৯||

Adhikarana santAnikAlakShaNaM pratiShedhashca (20) · Śloka 20

দংশে চ সন্তানিকযা শূলমাকুলতাশ্রুণঃ| প্রদরাক্ষেপকৌ তত্র কেসরং ক্ষীরিণাং ত্বচঃ| আম্রস্য সিন্দুবারস্য মূলমশ্মন্তকস্য চ||২০||

সন্তানিকাখ্যযা দংশে শূলাদিকমাক্ষেপকান্তং ভবতি| প্রদরং স্ত্রিযোঽতিরজঃ| আক্ষেপকো বাতব্যাধিঃ| তত্র নাগকেসরাদিকং ভেষজম্| মূলশব্দস্যাম্রাদ্যশ্মন্তকান্তৈঃ সম্বন্ধঃ|| ২০||

Adhikarana mecakAlakShaNaM pratiShedhashca (21) · Śloka 21

পিটকা মেচকা দংশমধ্যে জতুকণোপমা| জ্বরঃ শোফোঽত্র বারুণ্যা রোচনা রজনীদ্বযম্||২১||

মেচকাখ্যাযাঃ সম্বন্ধিনো দংশস্য মধ্যে জতুকণোপমা পিটকা জ্বরঃ শোফশ্চ ভবতি| অত্র বারুণ্যাদিকং ভেষজম্| বারুণীন্দ্রবারুণী|| ২১||

Adhikarana kasanAlakShaNaM pratiShedhashca (22) · Śloka 22

রাজীমান্ কসনা দংশঃ শিরোরুক্ শ্বাসকাসবান্| শীতপিচ্ছিলরক্তস্রুদ্রক্তোক্তং তত্র ভেষজম্||২২||

কসনাখ্যযা দংশো রাজীমান্ শিরোরুগাদিযুক্তশ্চ ভবতি| তত্র রক্তাখ্যদংশোক্তং ভেষজম্|| ২২||

Adhikarana kAkANDIlakShaNaM pratiShedhashca (23) · Śloka 23

পাণ্ডুরক্তোঽতিরুগ্দংশঃ কাকাণ্ড্যাঃ স্মৃতিমোষকৃত্| হিধ্মা শ্বসনতৃণ্মূর্চ্ছানিদ্রাক্ষেপকহৃদ্গদাঃ||২৩||

কাকাণ্ড্যা দংশঃ পাণ্ডুরক্তত্বাদিগুণো ভবতি| স্মৃতিমোষকৃচ্চ| হিধ্মাদযশ্চ ভবন্তি| ইতঃ প্রভৃত্যসাধ্যত্বাচ্চিকিত্সা নোচ্যতে| নিদ্রাক্ষেপঃ সহৃদ্গদঃ ইতি চ পাঠঃ|| ২৩||

Adhikarana eNapadIlakShaNaM pratiShedhashca (24) · Śloka 24

রক্তান্তস্ত্বেণপাদাযা দংশঃ কৃষ্ণতিলাকৃতিঃ| দাহমোহাগ্নিবীসর্পতৃড্বমিশ্বাসকাসবান্||২৪||

এণপাদাযা দংশঃ পর্যন্তেষু লোহিতঃ কৃষ্ণতিলাকৃতির্দাহাদিমাংশ্চ ভবতি|| ২৪||

Adhikarana lAjavarNAlakShaNaM pratiShedhashca (25) · Śloka 25

পূতিঃ শ্যাবোঽতিরুক্ সাসৃগাদংশো লাজবর্ণযা| শীতজ্বরসমুত্থানো দাহমূর্চ্ছাতিসারবান্||২৫||

লাজবর্ণযা দংশঃ পূত্যাদিগুণো ভবতি| শীতজ্বরহেতুর্দাহাদিমাংশ্চ|| ২৫||

Adhikarana vaidehIlakShaNaM pratiShedhashca (26) · Śloka 26

অগ্নিদগ্ধনিভো দংশো বৈদেহ্যা ভৃশবেদনঃ| গম্ভীরঃ সজ্বরস্তীক্ষ্ণমোহো হৃদযপীডনম্||২৬||

বৈদেহ্যা দংশ অগ্নিদগ্ধনিভত্বাদিগুণো ভবতি|| ২৬||

Adhikarana jAlinIlakShaNaM pratiShedhashca (27) · Śloka 27

ঊর্ধ্বরাজীচিতো দংশো জালিন্যাস্তীব্রশোফরুক্| উদীর্ণতৃড্ভ্রমশ্বাসস্তম্ভমোহোঽবদীর্যতে||২৭||

জালিন্যা দংশ ঊর্ধ্বরাজীচিতত্বাদিযুক্তো ভবতি| উদীর্ণা বৃদ্ধাস্তৄডাযো যস্মিন্| অবদীর্যতে ভিদ্যতে|| ২৭||

Adhikarana mAlAguNAlakShaNaM pratiShedhashca (28) · Śloka 28

রক্তো মালাগুণাদংশো ধূমগন্ধিঃ সতীব্ররুক্| দীর্যতে পার্শ্বতস্তৈস্তৈঃ সংরব্ধৈর্মণ্ডলৈর্যুতঃ| অন্তর্দাহো বহিঃ শৈত্যমাধ্মানং মূত্রকৃচ্ছ্রতা| মূর্চ্ছাপ্রলাপাতীসারজ্বরাঃ প্রাণান্তকারিণঃ||২৮||

মালাগুণাযা দংশো ধূমগন্ধত্বাদিযুক্তো ভবতি| অস্যাং চ লূতাযামন্তর্দাহাদযঃ প্রাণানামন্তকারিণঃ|| ২৮||

Adhikarana sauvarNikAlakShaNaM pratiShedhashca (29) · Śloka 29

ধ্মাতঃ সৌবর্ণিকাদংশঃ স্যন্দতে মত্স্যগন্ধিকঃ| শিরোঽক্ষিরুগ্জ্বরঃ কাসস্তৃষ্ণা শোফো বমির্ভ্রমঃ||২৯||

সৌবর্ণিকাখ্যাযা দংশো ধ্মাতত্বাদিগুণো ভবতি| শিরোরুগাদিকঞ্চ||২৯||

Adhikarana asAdhyeShvapi cikitsAyAH dik (30) · Śloka 30

অসাধ্যানামপি হিতং প্রত্যাখ্যাযাশু যোজযেত্| দোষোচ্ছ্রাযবিশেষেণ ছেদদাহাদিবর্জিতম্||৩০||

যাসামসাধ্যত্বাচ্চিকিত্সা নোক্তা তাসামসাধ্যানামপি প্রত্যাখ্যানং কৃত্বা দোষোচ্ছ্রাযবিশেষবশেন হিতং চিকিত্সিতং যোজযেত্| ছেদদাহদিকং বর্জযিত্বা|| ৩০||

Adhikarana lUtAnusAraM daMshadeshanidarshanam (31-45) · Śloka 45

কপিলা তত্র নাসাযামগ্নিদর্শতি জত্রুণি| পীতা তু গণ্ডযোঃ পদ্মা দক্ষিণাংসেঽথ কক্ষযোঃ| লূতা মূত্রবিষা শ্বেতা চিবুকে কালিকাক্ষিণি| পাণ্ডুরা দক্ষিণস্কন্ধে করযো রক্তপাদিকা| বামপার্শ্বে দশেদ্ ভৃঙ্গা বামাংসে পিঙ্গলা দশেত্| ত্রিমণ্ডলোদরে পূতিঃ পৃষ্ঠে বীরা তু দক্ষিণে| বাহৌ নাভ্যাং কুমুদিকা বামস্কন্ধেঽলসংজ্ঞিতা| কণ্ঠে রক্তা ললাটে তু চিত্রা সন্তানিকৌষ্ঠযোঃ| মেচকা মূর্ধ্নি কসনাদ্ধস্তযোঃ কক্ষমূলযোঃ| কাকাণ্ড্যেণী তু হৃদযে লাজবর্ণা স্তনান্তরে| বাহুসন্ধিষু বৈদেহী লূতাঽপাঙ্গে তু জালিনী| মালাগুণাখ্যা গ্রীবাযাং সৌবর্ণী কর্ণমূলযোঃ| ইতি ক্ষেত্রাণি নিযতান্যত্যুদীর্ণবিষাঃ পুনঃ| পরক্ষেত্রেঽপি বর্তন্তে রাজানোঽতিবলা ইব||৩১|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতা বষ্টাঙ্গসংগ্রহসংহিতাযামুত্তরতন্ত্রে প্রত্যেকলূতা প্রতিষেধো নাম পঞ্চচত্বারিংশোঽধ্যাযঃ||৪৫||

ইতি বৈদ্যপতিসিংহগুপ্তস্য সূনোর্বাগ্ভটস্য কৃতা বষ্টাঙ্গসংগ্রহসংহিতাযামুত্তরতন্ত্রে প্রত্যেকলূতা প্রতিষেধো নাম পঞ্চচত্বারিংশোঽধ্যাযঃ||৪৫|| যস্মিন্ দেহদেশ যা লূতা দশতি সা কপিলেত্যাদিনা ক্রমেণ প্রদর্শ্যতে| তত্র তাসাং লূতানাং মধ্যে কপিলা নাম লূতা নাসাযাং দশতি| এবমগ্নিরিত্যাদি| ব্যাখ্যাসমম্| ইত্যেতানি নাসাদীনি ক্ষেত্রাণি কপিলাদীনাং লূতানাং নিযতানি| যাস্ত্বত্যুদীর্ণবিষা ভবন্তি তা লূতাঃ পরক্ষেত্রেঽপি বর্তন্তে যথাতিবলা রাজান ইতি| ইতি শ্রীমন্মহামহোপাধ্যাযেন্দুবিরচিতাযা মষ্টাঙ্গসংগ্রহব্যাখ্যাযাং শশিলেখাযা মুত্তরতন্ত্রে পঞ্চচত্বারিংশোঽধ্যাযঃ