Adhikarana atha sarpaviShapratiShedho nAma dvAtriMsho~adhyAyaH, pratij~jA (1) · Śloka 1
অথাতঃ সর্পবিষপ্রতিষেধং নামাধ্যাযং ব্যাখ্যাস্যামঃ| ইতি হস্ স্মাহুরাত্রেযাদযো মহর্ষযঃ||১||
अथातः सर्पविषप्रतिषेधं नामाध्यायं व्याख्यास्यामः| इति हस् स्माहुरात्रेयादयो महर्षयः||१||
🔊 Audio coming soon
উক্তক্রমেণ সর্পাণাং বিষহেতূপচারেণ চিকিত্সাং প্রদর্শযিতুমধ্যায আরভ্যতে|| ১||
Adhikarana viShacikitsAyAH shIghrArambhakatvam (2) · Śloka 2
মাত্রাশতং বিষং স্থিত্বা দংশে দষ্টস্য দেহিনঃ| দেহং প্রক্রমতে ধাতূন্ রুধিরাদীন্ প্রদূষযত্| এতস্মিন্নন্তরে কর্ম দংশস্যোত্কর্ত্তনাদিকম্| কুর্যাচ্ছীঘ্রং যথা দেহে বিষবল্লী ন রোহতি||২||
मात्राशतं विषं स्थित्वा दंशे दष्टस्य देहिनः| देहं प्रक्रमते धातून् रुधिरादीन् प्रदूषयत्| एतस्मिन्नन्तरे कर्म दंशस्योत्कर्त्तनादिकम्| कुर्याच्छीघ्रं यथा देहे विषवल्ली न रोहति||२||
🔊 Audio coming soon
শীঘ্রং চিকিত্সাকরণে হেতুরুচ্যতে-মাত্রাশতমিত্যাদি| দষ্টস্য দেহনো বিষং দংশে মাত্রাশতং স্থিত্বা রুধিরাদীন্ ধাতূন্ প্রদূষযদ্দেহে প্রক্রমেত| এতস্মিন্ মাত্রাশতাখ্যেঽন্তরেঽবসরে দংশস্যোত্কর্ত্তনপ্রক্ষালনালেপনবন্ধনাদিকং কর্ম শীঘ্রং কুর্যাদ্যথা দেহে বিষবল্লী ন রোহতি| বল্লির্হি রূঢা সত্যসংশযং সফলা সুদূরবিস্তারা ভবতি|| ২||
Adhikarana daShTamAtre karttavyaM kRutyam (3) · Śloka 3
দষ্টমাত্রো দশেদাশু তমেব পবনাশিনম্| লোষ্ঠং মহীং বা দশনৈশ্ছিত্বা বানু সসম্ভ্রমম্| নিষ্ঠীবেন সমালিম্পেদ্দংশং কর্ণমলেন বা| দংশস্যোপরি বধ্নীযাদরিষ্টাং চতুরঙ্গুলে| ক্ষৌমাদিভির্বেণিকযা সিদ্ধৈর্মন্ত্রৈশ্চ মন্ত্রবিত্||৩||
दष्टमात्रो दशेदाशु तमेव पवनाशिनम्| लोष्ठं महीं वा दशनैश्छित्वा वानु ससम्भ्रमम्| निष्ठीवेन समालिम्पेद्दंशं कर्णमलेन वा| दंशस्योपरि बध्नीयादरिष्टां चतुरङ्गुले| क्षौमादिभिर्वेणिकया सिद्धैर्मन्त्रैश्च मन्त्रवित्||३||
🔊 Audio coming soon
দষ্টমাত্রস্তু পুরুষো হীনকালমেব পবনাশিনং যেন সর্পেণাসৌ দষ্টস্তং দন্তৈর্দশেত্| তদপ্রাপ্তৌ তু লোষ্ঠং দশেত্ ভূমিং বা| ব্যাখ্যাসমম্| অরিষ্টেতি মন্ত্রসূত্রবেণিকাযা নাম| (দংশাদ্বিষং যাবন্ন ক্রামতি শরীরং তাবদিত্যর্থঃ| ইতি জেজ্জটঃ)|| ৩||
Adhikarana bandhasvarUpam (4) · Śloka 4
বন্ধো দেশানুসারেণ নাতিগাঢশ্লথো হিতঃ| দংশপূতিত্বশোফাদীন্ কুরুতে হ্যতিপীডিতঃ| অশক্তঃ শিথিলো রোদ্ধুং বিষং দেশান্তরং ব্রজন্||৪||
बन्धो देशानुसारेण नातिगाढश्लथो हितः| दंशपूतित्वशोफादीन् कुरुते ह्यतिपीडितः| अशक्तः शिथिलो रोद्धुं विषं देशान्तरं व्रजन्||४||
🔊 Audio coming soon
বন্ধশ্চ দেহদেশানুসারেণ হিতো যো নাতিগাঢশ্লথঃ| দেশানুসারগ্রহণং বিনা অশক্তো ভবতি|| ৪||
Adhikarana bandhaguNaH (5) · Śloka 5
অম্বুবত্ সেতুবন্ধেন বন্ধেন স্তভ্যতে বিষম্| ন বহন্তি সিরাশ্চাস্য বিষং বন্ধাভিপীডিতাঃ||৫||
अम्बुवत् सेतुबन्धेन बन्धेन स्तभ्यते विषम्| न वहन्ति सिराश्चास्य विषं बन्धाभिपीडिताः||५||
🔊 Audio coming soon
বন্ধেন চ বিষং তথা স্তভ্যতে যথা সেতুবন্ধেন সলিলম্| অস্য চ দষ্টস্য বন্ধেনাভিপীডিতাঃ সত্যঃ সিরা বিষং ন বহন্তি|| ৫||
Adhikarana daMshasyoddharaNaM tatphala~jca (6) · Śloka 6
নিষ্পীড্য চোদ্ধরেদ্দংশং মর্মসন্ধ্যগতং তথা| ন জাযতে বিষাবেগো বীজনাশাদিবাঙ্কুরঃ| মর্মগে প্রাপ্নুযান্মৃত্যুং সন্ধিস্থে বিকলাঙ্গতাম্||৬||
निष्पीड्य चोद्धरेद्दंशं मर्मसन्ध्यगतं तथा| न जायते विषावेगो बीजनाशादिवाङ्कुरः| मर्मगे प्राप्नुयान्मृत्युं सन्धिस्थे विकलाङ्गताम्||६||
🔊 Audio coming soon
এবঞ্চ বন্ধযিত্বা সর্বতঃ পারিমাণ্ডল্যেন দংশং নিষ্পীড্য শস্ত্রেণ দংশমুদ্ধরেত্| তচ্চোদ্ধরেদ্যন্মর্মণি সন্ধৌ বা ন গতম্| তথা দংশোদ্ধরণেন প্রথম এব বিষবেগো ন জাযতে যথা বীজনাশাদঙ্কুরঃ| মর্মগে দংশ উদ্ধৃতে আতুরো মৃত্যুং প্রাপ্নুযাত্| সন্ধিস্থে তূদ্ধৃতে বিকলাঙ্গতাং প্রাপ্নুযাত্| (যত্র প্রদেশে বন্ধো ন যুজ্যতে তত্র ছিন্দ্যাদিতি জেজ্জটঃ)|| ৬||
Adhikarana daMshadahanaM tatphala~jca (7) · Śloka 7
দংশং মণ্ডলিনাং মুক্ত্বা পিত্তলত্বাদথাপরম্| প্রতপ্তৈর্হেমলোহাদ্যৈর্দ্দহেদাশূল্মুকেন বা| করোতি ভস্মসাত্সদ্যো বহ্নিঃ কিন্নাম ন ক্ষণাত্||৭||
दंशं मण्डलिनां मुक्त्वा पित्तलत्वादथापरम्| प्रतप्तैर्हेमलोहाद्यैर्द्दहेदाशूल्मुकेन वा| करोति भस्मसात्सद्यो वह्निः किन्नाम न क्षणात्||७||
🔊 Audio coming soon
অথবোত্কর্ত্তনস্য চিরসাধ্যত্বাদ্দংশং প্রতপ্তের্হেমাদিভির্দ্দহেদুল্মুকেন বা জ্বলত্কাষ্ঠেন দহেত্| কিং সর্বং দংশং দহেন্নেত্যাহ| অপি তু মণ্ডলিনাং সম্বন্ধিতং দংশং মুক্ত্বা বর্জযিত্বা| তদ্বর্জনে হেতুঃ পিত্তলত্বম্| পিত্তং হ্যগ্নিনা বিরুদ্ধ্যতে| অথাপরং শেষং দহেত্| করোতীত্যাদিনা অগ্নিনা দংশদাহস্যাতিশযপ্রদর্শনম্|| ৭||
Adhikarana daMshasyAcUShaNam (8) · Śloka 8
আচূষেত্ পূর্ণবক্ত্রো বা মৃদ্ভস্মাগদগোমযৈঃ| প্রচ্ছাযান্তররিষ্টাযাং মাংসলং তু বিশেষতঃ||৮||
आचूषेत् पूर्णवक्त्रो वा मृद्भस्मागदगोमयैः| प्रच्छायान्तररिष्टायां मांसलं तु विशेषतः||८||
🔊 Audio coming soon
অথবা দংশং নোদ্ধরেন্নাপি দহেদপি তু মৃদাদিভি পূর্ণমুখঃ সন্ বৈদ্য আচূষেত্| কথমিত্যাহ-অরিষ্টাযা অন্তর্বন্ধস্যান্তরতো দংশভাগে প্রচ্ছায শস্ত্রেণ প্রচ্ছানং কৃত্বা| মাংসলং তু দংশং বিশেষেণ প্রচ্ছাযাচূষেত্|| ৮||
Adhikarana agadalepaH (9) · Śloka 9
অঙ্গং সহৈব দংশেন লেপযেদগদৈর্মুহুঃ| চন্দনোশীরযুক্তেন সলিলেন চ সেচযেত্||৯||
अङ्गं सहैव दंशेन लेपयेदगदैर्मुहुः| चन्दनोशीरयुक्तेन सलिलेन च सेचयेत्||९||
🔊 Audio coming soon
সর্বং চাঙ্গং সহৈব দংশেন মুহুরগদৈরালেপযেত্| চন্দনাদিযুক্তেন জলেন সেচযেচ্চ|| ৯||
Adhikarana sirAvedhaH tasya visheShatA (10) · Śloka 10
বিষে প্রবিসৃতে বিধ্যেত্সিরাং সা পরমা ক্রিযা| রক্তে নিহ্রিযমাণে হি কৃত্স্নং নিহ্রিযতে বিষম্| দুষ্টে হি ব্যাপ্নুযাদঙ্গং ধ্রুবং মৃত্যুর্ভবত্যতঃ| সিরাব্যধোদিতৈরস্রমপ্রবৃত্তং প্রবর্ত্তযেত্| স্তম্ভযেদতিবৃত্তং চ তৈরেব প্রাণরক্ষযা||১০||
विषे प्रविसृते विध्येत्सिरां सा परमा क्रिया| रक्ते निह्रियमाणे हि कृत्स्नं निह्रियते विषम्| दुष्टे हि व्याप्नुयादङ्गं ध्रुवं मृत्युर्भवत्यतः| सिराव्यधोदितैरस्रमप्रवृत्तं प्रवर्त्तयेत्| स्तम्भयेदतिवृत्तं च तैरेव प्राणरक्षया||१०||
🔊 Audio coming soon
অরক্ষযা দেশান্তরং প্রবিসৃতে বিষে সিরাং বিধ্যেত্ সা পরমা ক্রিযা| সিরাবেধক্রিযোত্কৃষ্টা চিকিত্সেত্যর্থঃ| রক্ত ইত্যাদি| যস্মাদ্ দুষ্টে রক্তে নিহ্রিযমাণে কৃত্স্নং সর্বং বিষং নিহ্রিযতে| রক্তে দুষ্টে বিষমঙ্গং ব্যাপ্নুযাদতো ধ্রুবমবশ্যং মৃত্যুর্ভবতি| বিষদুষ্টস্য রক্তস্যানির্হরণে বিষস্য দেহব্যাপ্ত্যা মৃত্যুর্ভবতীত্যর্থঃ| সিরাব্যধোদিতৈরিত্যাদি সুবোধম্| (সিরেত্যাদি| অপ্রবৃত্তং রক্তং সিরাব্যধোদিতৈস্তগরাদিভিঃ)|| ১০||
Adhikarana raktasya saviShanirviShatvaparIkShaNam (11) · Śloka 11
দুর্গন্ধং সবিষং রক্তমগ্নৌ চটচটাযতে| যথাদোষং বিশুদ্ধং চ পূর্ববল্লক্ষযেদসৃক্||১১||
दुर्गन्धं सविषं रक्तमग्नौ चटचटायते| यथादोषं विशुद्धं च पूर्ववल्लक्षयेदसृक्||११||
🔊 Audio coming soon
রক্তস্য সবিষনির্বিষত্ববিশেষমাহ-দুর্গন্ধমিত্যাদি| পূর্ববদিতি সিরাব্যধোক্তেন প্রকারেণ| (বিষসহিতং রক্তং দুর্গন্ধযুক্তং ভবতি অগ্নৌ নিষিক্তং চটচটাযতে চটচটাশব্দং কুরুতে| যথাদোষমিতি ত্রিদোষজুষ্টং বিশুদ্ধং তৈরজুষ্টং চ রক্তং পূর্ববত্ সিরাব্যধবিধ্যুক্তলক্ষণেন লক্ষযেজ্জানীযাত্)|| ১১||
Adhikarana shRu~ggajalaukasoH prayogaH (12) · Śloka 12
সিরাস্বদৃশ্যমানাসু যোজ্যাঃ শৃঙ্গজলৌকসঃ||১২||
सिरास्वदृश्यमानासु योज्याः शृङ्गजलौकसः||१२||
🔊 Audio coming soon
সিরাস্বদৃশ্যমানাসু শোফাদিনা অনুপলভ্যমানাসু|| ১২||
Adhikarana shoNitastambhanam (13) · Śloka 13
শোণিতং স্রুতশেষং চ প্রবিলীনং বিষোষ্মণা| লেপসেকৈঃ সুবহুশঃ স্তম্ভযেদ্ ভৃশশীতলৈঃ||১৩||
शोणितं स्रुतशेषं च प्रविलीनं विषोष्मणा| लेपसेकैः सुबहुशः स्तम्भयेद् भृशशीतलैः||१३||
🔊 Audio coming soon
শোণিতমিতি| স্তম্ভযেত্ সৌম্যত্বমাপাদযেত্| স্রুতশেষং প্রস্থাত্ পরমনির্হরণীযত্বাত্ স্রুতাবশিষ্টং বিষোষ্মণা প্রবিলীন শোণিতং সুবহুশঃ পৌনঃ পুন্যেন প্রযুক্তৈর্ভৃশশীতলৈরত্যন্তশীতলৈর্লেপসেকৈঃ স্তম্ভযেত্)|| ১৩||
Adhikarana askannaraktadoShAH (14) · Śloka 14
অস্কন্নে বিষবেগাদ্ধি মূর্চ্ছাযমদহৃদ্দ্রবাঃ| ভবন্তি তান্ জযেচ্ছীতৈর্বীজেচ্চারোমহর্ষতঃ||১৪||
अस्कन्ने विषवेगाद्धि मूर्च्छायमदहृद्द्रवाः| भवन्ति तान् जयेच्छीतैर्वीजेच्चारोमहर्षतः||१४||
🔊 Audio coming soon
অস্কন্ন ইত্যাদি| অস্কন্নে প্রবিলীনরূপে| (অস্কন্নে অস্ত্যানেস্রে রক্তে বিষবেগান্মূর্চ্ছাযাদযো ভবন্তি যস্মাত্তস্মাত্তান্ শীতৈর্লেপাদিভির্জযেত্| আরোমহর্ষতঃ যাবদ্রোমাঞ্চোত্পত্তিস্তাবদ্বীজেত্ বীজনং চ কুর্যাত্)|| ১৪||
Adhikarana hRudayAvaraNam (15) · Śloka 15
বিষং কর্ষতি তীক্ষ্ণত্বাদ্ হৃদযং তস্য গুপ্তযে| পিবেদ্ ঘৃতং ঘৃতক্ষৌদ্রমগদং বা ঘৃতাপ্লুতম্| মজ্জানং গোমযরসং ভস্মাম্ভঃ কৃষ্ণমৃজ্জলম্| ঐকধ্যং পঞ্চগব্যং বা দধি গৈরিকবারি বা| খাদেদ্বা কোবিদারার্কশিরীষকটভীচ্ছদান্| ছাগমেষবরাহাসৃক্শিশুস্থবিরযোষিতঃ| পিবেযুর্গর্ভিণী শীতমধুরান্ পযসাগদান্| তথা মূর্চ্ছাদযো ন স্যুর্বিষং চাশ্বেতিনানিলম্||১৫||
विषं कर्षति तीक्ष्णत्वाद् हृदयं तस्य गुप्तये| पिबेद् घृतं घृतक्षौद्रमगदं वा घृताप्लुतम्| मज्जानं गोमयरसं भस्माम्भः कृष्णमृज्जलम्| ऐकध्यं पञ्चगव्यं वा दधि गैरिकवारि वा| खादेद्वा कोविदारार्कशिरीषकटभीच्छदान्| छागमेषवराहासृक्शिशुस्थविरयोषितः| पिबेयुर्गर्भिणी शीतमधुरान् पयसागदान्| तथा मूर्च्छादयो न स्युर्विषं चाश्वेतिनानिलम्||१५||
🔊 Audio coming soon
বিষমিতি| কর্ষতি হিনস্তি| তস্যেতি হৃদযস্য গুপ্তযে রক্ষার্থম্| (বিষং তীক্ষ্ণত্বাদ্ধৃদযং কর্ষতি বিলিখতি তস্য হৃদযস্য গুপ্তযে রক্ষার্থং ঘৃতং বা ঘৃতযুক্তং মধু বা ঘৃতালোডিতমগদং বিষঘ্নৌষধং বা পিবেত্| (মজ্জানমিত্যাদি| মজ্জাদিকমথ বৈকধ্যমেকতঃ কৃত্বা পঞ্চগব্যং দধ্যাদি বা পিবেত্ অথবা কোবিদারাদিচ্ছদান্ খাদেত্| কোবিদারঃ কাঞ্চনারঃ| শিশুস্থবিরযোষিতো যথাক্রমং ছাগাদ্যসৃক্ পিবেযুঃ| গর্ভিণী তু পযসা শীতাদিগুণানগদান্ পিবেত্| তথেত্যাদি সুবোধম্)|| ১৫||
Adhikarana vamanam (16) · Śloka 16
হৃদযাবরণেনাস্য শ্লেষ্মা হৃদ্যুপচীযতে| প্রবৃত্তগৌরবোত্ক্লেশহৃল্লাসং বামযেত্ততঃ| দ্রবৈঃ কাঞ্জিককৌলত্থতৈলমদ্যাদিবর্জিতৈঃ| বমনৈর্বিষহৃদ্ভিশ্চ নৈবং ব্যাপ্নোতি তদ্বপুঃ||১৬||
हृदयावरणेनास्य श्लेष्मा हृद्युपचीयते| प्रवृत्तगौरवोत्क्लेशहृल्लासं वामयेत्ततः| द्रवैः काञ्जिककौलत्थतैलमद्यादिवर्जितैः| वमनैर्विषहृद्भिश्च नैवं व्याप्नोति तद्वपुः||१६||
🔊 Audio coming soon
হৃদযাবরণেনেত্যাদি সুবোধম্| তত ইত্যুপচিতে শ্লেষ্মণি| (হৃদযাবরণেন ঘৃতাদিপানাদ্ধৃদযাচ্ছাদনেনাস্য বিষার্ত্তস্য হৃদযে শ্লেষ্মা বিষস্য রক্তদূষণানন্তরং কফদূষকত্বাত্তেন দূষিতঃ কফ উপচীযতে আচ্ছাদিতহৃযতত্বাদ্দেহোচ্ছেদাসমর্থতযা কেবলং বৃদ্ধিমেব প্রাপ্নোতি| ততঃ সবিষস্য শ্লেষ্মণ উপচযাদ্ধেতোরুদ্ভূতগৌরবাদিকং নরং কাঞ্জিকাদিবর্জিতৈর্দ্রবৈঃ কাঞ্জিকাদীনাং তীক্ষ্ণাদিগুণতযা বিষসাম্যাদ্বর্জিতৈরন্যৈর্দ্রবৈর্বিষহরৈর্বমনদ্রব্যৈশ্চ বামযেত্| এবং কৃতে সতি তদ্বিষং বপুঃ শরীরে ন ব্যাপ্নোতি সন্ধিবিশ্লেষসংজ্ঞানাশাদিবিষোপদ্রবং ন গচ্ছতীত্যর্থঃ)|| ১৬||
Adhikarana sarpaviShasAmAnyacikitsopasaMhAraH (17) · Śloka 17
ভুজঙ্গদোষপ্রকৃতিস্থানবেগবিশেষতঃ| সুসূক্ষ্মং সম্যগালোচ্য বিশিষ্টাং চাচরেত্ক্রিযাম্||১৭||
भुजङ्गदोषप्रकृतिस्थानवेगविशेषतः| सुसूक्ष्मं सम्यगालोच्य विशिष्टां चाचरेत्क्रियाम्||१७||
🔊 Audio coming soon
সর্পবিষাণাং সামান্যক্রিযামুপসংহরন্নাহ-ভুজঙ্গেতি| ভুজঙ্গানাং সর্পাণাং দোষাদিবিশেষান্ সুসূক্ষ্মং সম্যগালোচ্য সূক্ষ্মযা বুদ্ধ্যা পুনঃ পুনর্বিচার্য জ্ঞাত্বা বিশিষ্টাং দোষপ্রকৃত্যাদিসাধারণীং ক্রিযাং চিকিত্সাং চাচরেত্| চঃ সমুচ্যতে| দোষো বাতাদিঃ| প্রকৃতির্বিষপ্রকৃতিঃ| স্থানং দংশস্থানম্| বেগো বিষবেগঃ|| ১৭||
Adhikarana darvIkaraviShacikitsA (18) · Śloka 18
সিন্দুবারকমূলানি রসেন স্বেন পেষযেত্| মধুযুক্তোঽযমগদঃ পানং দর্বীকৃতাং বিষে| সিন্দুবারকমূলানি শ্বেতা চ গিরিকর্ণিকা| পানং দর্বীকরৈর্দষ্টে নস্যং মধু সপাকলম্| কৃষ্ণসর্পেণ দষ্টস্য লিম্পেদ্দংশং হৃতেঽসৃজি| চারটীনাকুলীভ্যাং বা তীক্ষ্ণমূলবিষেণ বা| পানং চ ক্ষৌদ্রমঞ্জিষ্ঠাগৃহধূমযুতং ঘৃতম্||১৮||
सिन्दुवारकमूलानि रसेन स्वेन पेषयेत्| मधुयुक्तोऽयमगदः पानं दर्वीकृतां विषे| सिन्दुवारकमूलानि श्वेता च गिरिकर्णिका| पानं दर्वीकरैर्दष्टे नस्यं मधु सपाकलम्| कृष्णसर्पेण दष्टस्य लिम्पेद्दंशं हृतेऽसृजि| चारटीनाकुलीभ्यां वा तीक्ष्णमूलविषेण वा| पानं च क्षौद्रमञ्जिष्ठागृहधूमयुतं घृतम्||१८||
🔊 Audio coming soon
দর্বীকরাদীনাং প্রত্যেকং চিকিত্সামাহ-সিন্দুবারকস্য মূলানি স্বেন রসেন সিন্দুবারকরসেন পেষযেত্| মধুনা যুক্তোঽযমগদো দর্বীকৃতাং দর্বীকরসর্পাণাং বিষে পানং হিতম্| সিন্দুবারকো নির্গুণ্ডী| শ্বেতা শ্বেতবচা| মধু মাক্ষিকম্| পাকলং কুষ্ঠম্| (দর্বীকরসর্পৈঃ দষ্টে সতি সিন্দুবারকমূলাদিকং পানং হিতম্| অনুক্তদ্রবত্বাজ্জলালোডিতম্| কুষ্ঠসহিতং মাক্ষিকং নস্যঞ্চ). চারটী পদ্মচারিণী| নাকুলী সর্পসুগন্ধা| তীক্ষ্ণমূলবিষেণ বা তীক্ষ্ণং যন্মূলবিষং বত্সনাভাদি তেনেত্যর্থঃ| (কৃষ্ণসর্পো দর্বীকরবিশেষস্তেন দষ্টস্য দংশং দংশব্রণম্ অসৃজি রক্তে জলূকাদিনা হৃতেঽপনীতে চারটীনাকুলীভ্যাং বাথব তীক্ষ্ণমূলবিষেণ বা লিম্পেত্| চারটী গুঞ্জা| নাকুলী চবিকা রাস্না বা| তীক্ষ্ণমূলবিষং বজ্রনাকাদি)| ক্ষৌদ্রাদ্যন্বিতং ঘৃতং পানং চ পানবিষযে হিতমিত্যর্থঃ|| ১৮||
Adhikarana taNDulIyAdyagadaH (19) · Śloka 19
তণ্ডুলীযককাশ্মর্যকিণিহীগিরিকর্ণিকাঃ| মাতুলুঙ্গী সিতা শেলুঃ পাননস্যাঞ্জনে হিতঃ| অগদঃ ফণিনাং ঘোরে বিষে রাজীমতামপি||১৯||
तण्डुलीयककाश्मर्यकिणिहीगिरिकर्णिकाः| मातुलुङ्गी सिता शेलुः पाननस्याञ्जने हितः| अगदः फणिनां घोरे विषे राजीमतामपि||१९||
🔊 Audio coming soon
তণ্ডুলীযক ইতি| কিণিহী কটভী| গিরিকর্ণিকা গিরিকদম্বঃ| সিতা শ্বেতবচা| শেলুঃ শ্লেষ্মাতকঃ| (তণ্ডুলীযকাদিভিঃ কৃতোঽগদঃ ফণিনাং দর্বীকরাণাং রাজীমতামপি ঘোরে বিষে পানাদৌ হিতঃ| অগদো গুলিকাদ্যন্যতমো যোগবিশেষঃ)||১৯||
Adhikarana maNDaliviShacikitsA (20) · Śloka 20
সমাঃ সুগন্ধামৃদ্বীকাশ্বেতাখ্যাগজকর্ণিকাঃ| অর্দ্ধাশং সৌরসং পত্রং কপিত্থং বিল্বদাডিমম্| সক্ষৌদ্রো মণ্ডলিবিষে বিশেষাদগদো হিতঃ| পঞ্চবল্কবরাযষ্টী নাগপুষ্পৈলবালুকম্| জীবকর্ষভকৌ শীতং সিতা পদ্মকমুত্পলম্| সক্ষৌদ্রো হিমবান্নাম হন্তি মণ্ডলিনাং বিষম্| লেপাচ্ছ্বযথুবীসর্পবিস্ফোটজ্বরদাহহা| কাশ্মর্যং বটশৃঙ্গাণি জীবকর্ষভকৌ সিতাম্| মঞ্জিষ্ঠাং মধুকং চেতি দষ্টো মণ্ডলিনা পিবেত্||২০||
समाः सुगन्धामृद्वीकाश्वेताख्यागजकर्णिकाः| अर्द्धाशं सौरसं पत्रं कपित्थं बिल्वदाडिमम्| सक्षौद्रो मण्डलिविषे विशेषादगदो हितः| पञ्चवल्कवरायष्टी नागपुष्पैलवालुकम्| जीवकर्षभकौ शीतं सिता पद्मकमुत्पलम्| सक्षौद्रो हिमवान्नाम हन्ति मण्डलिनां विषम्| लेपाच्छ्वयथुवीसर्पविस्फोटज्वरदाहहा| काश्मर्यं वटशृङ्गाणि जीवकर्षभकौ सिताम्| मञ्जिष्ठां मधुकं चेति दष्टो मण्डलिना पिबेत्||२०||
🔊 Audio coming soon
সমা ইতি| সুগন্ধা গন্ধনাকুলী| শ্বেতাখ্যা শ্বেতবচা| গজকর্ণিক কুমারী সল্লকী বা| সুগন্ধাদিকং পরস্পরং সমম্| অর্দ্ধংশেন সুরসপত্রচতুষ্টযমিতি যাবত্| সুরসস্তুলসী| (সুগন্ধাদযঃ সমাঃ সমাংশাঃ| সৌরসপত্রাদিকমর্দ্ধাশং সুগন্ধাদিভ্যোঽর্দ্ধপ্রমাণম্| পালিকেষু সুগন্ধাদিষু সুরসপত্রাদিকমর্ধপলপ্রমাণমিত্যর্থঃ| এভিঃ কৃতঃ ক্ষৌদ্রসহিতোঽগদো বিশেষেণ মণ্ডলিবিষে হিতঃ)| পঞ্চবল্ক ইতি| পঞ্চবল্কং সল্লকী ঝির্ঝীণীজম্বূধবশাল্মলীনাং ত্বচঃ| শীতং চন্দনম্| সিতা শ্বেতবচা কটভী বা| (পঞ্চবল্কাদিকো মাক্ষিকসহিতো হিমবানিতি| প্রসিদ্ধোঽযমগদো মণ্ডলিনাং বিষং হন্তি| লেপাচ্ছোফাদিহা চ ভবতি| পঞ্চবল্কোঽত্র সল্লক্যাদযঃ| সল্লকীঝির্ঝিণীজম্বূধবশাল্মলিকাত্বচঃ| পঞ্চবল্কলসংজ্ঞোঽযং মুনিভিঃ পরিকীর্তিতঃ)| বটশ্রৃঙ্গাণি বটাঙ্কুরাণি| সিতা শ্বেতবচা| (মণ্ডলিনা দষ্টো নরঃ কাশ্মর্যাদিমধুকান্তমিত্যুক্তমগদং অনুক্তদ্রবত্বাজ্জলে সমালোড্য পিবেত্)|| ২০||
Adhikarana gonasaviShacikitsA (21) · Śloka 21
বংশত্বগ্বীজকটুকা পাটলীবীজনাগরম্| শিরীষবীজাতিবিষে মূলং গাবেধুকং বচাম্| পিষ্টো গোবারিণাষ্টাঙ্গো হন্তি গোনসজং বিষম্||২১||
वंशत्वग्बीजकटुका पाटलीबीजनागरम्| शिरीषबीजातिविषे मूलं गावेधुकं वचाम्| पिष्टो गोवारिणाष्टाङ्गो हन्ति गोनसजं विषम्||२१||
🔊 Audio coming soon
বংশত্বগ্বীজ ইতি| ত্বগ্বীজে বংশস্য| কটুকা তিক্তালাবুনী| গোবারিণা গোমূত্রেণ| গোনসা ঘর্মতপ্তানাং গবাং নাসিকোদ্ভবাঃ| (বংশত্বগাদির্গোবারিণা গোমূত্রেণ পিষ্টোঽষ্টাঙ্গোঽষ্টদ্রব্যকৃতত্বাদষ্টাঙ্গাখ্যোঽযমগদো গোনসজং বিষং হন্তি| বংশত্বক্কটুকবীজমিতি চ পাঠঃ)|| ২১||
Adhikarana rAjilaviShacikitsA (22) · Śloka 22
কটুকাতিবিষাকুষ্ঠগৃহধূমহরেণুকাঃ| সক্ষৌদ্রব্যোষতগরা ঘ্নন্তি রাজীমতাং বিষম্||২২||
कटुकातिविषाकुष्ठगृहधूमहरेणुकाः| सक्षौद्रव्योषतगरा घ्नन्ति राजीमतां विषम्||२२||
🔊 Audio coming soon
কটুকেতি| কটুকা লম্বা| (ক্ষৌদ্রাদ্যুপেতাঃ কটুকাদযঃ পানাদিনা রাজীমতাং বিষং ঘ্নন্তি| কটুকা কটুকরোহিণী)|| ২২||
Adhikarana kANDacitrAviShacikitsA (23) · Śloka 23
নিখনেত্কাণ্ডচিত্রাযা দংশং যামদ্বযং ভুবি| উদ্ধৃত্য প্রচ্ছিতং সর্পির্দ্ধান্যমৃদ্ভ্যাং প্রলেপযেত্| পিবেত্ পুরাণং চ ঘৃতং বরাচূর্ণাবচূর্ণিতম্| জীর্ণে বিরক্তে ভুঞ্জীত যবান্নং সূপসংস্কৃতম্||২৩||
निखनेत्काण्डचित्राया दंशं यामद्वयं भुवि| उद्धृत्य प्रच्छितं सर्पिर्द्धान्यमृद्भ्यां प्रलेपयेत्| पिबेत् पुराणं च घृतं वराचूर्णावचूर्णितम्| जीर्णे विरक्ते भुञ्जीत यवान्नं सूपसंस्कृतम्||२३||
🔊 Audio coming soon
নিখনেদিতি| কাণ্ডচিত্রাযাঃ সর্পবিশেষস্য দংশং দংষ্ট্রাব্রণম্| (কাণ্ডচিত্রা রাজিলবিশেষঃ তস্য দংশং দংষ্ট্রাপ্রদেশং ভুবি ভুবং খনিত্বা তত্র নখনেত্| নিক্ষিপ্য মৃদা পূরযিত্বা যামদ্বযং প্রতিপাল্য পশ্চাদুদ্ধৃত্য প্রচ্ছিতং সূত্রোদিতবিধানেন প্রচ্ছানং কৃত্বা সর্পির্ধান্যমৃদ্ভিযাং প্রলেপযেত্| ধান্যমৃত্ ধান্যমূলমৃত্তিকা| ততো বরাচূর্ণাবচূর্ণিতং ত্রিফলাচূর্ণযুক্তং পুরাণং ঘৃতং পিবেচ্চ| ঘৃতে জীর্ণে বিরিক্তঃ কৃতবিরেচনঃ সূপসংস্কৃতং সূপোপেতং যবান্নং ভুঞ্জীত| সূপস্তক্রাংদিভিঃ সিদ্ধ উপদংশবিশেষঃ| সর্পির্ধান্যমৃদ্ভিঃ প্রলেপযেত্| 'যবান্নং যূষসংস্কৃতম্' ইত্ পাঠভেদঃ)|| ২৩||
Adhikarana vyantaradaShTacikitsA (24) · Śloka 24
করবীরার্ককুসুমমূললাঙ্গলিকাকণাঃ| কল্কযেদারনালেন পাঠামরিচসংযুতাঃ| এষ ব্যন্তরদষ্টানামগদঃ সার্বকার্মিকঃ||২৪||
करवीरार्ककुसुममूललाङ्गलिकाकणाः| कल्कयेदारनालेन पाठामरिचसंयुताः| एष व्यन्तरदष्टानामगदः सार्वकार्मिकः||२४||
🔊 Audio coming soon
করবীরার্কযোঃ কুসুমং মূলং চ লাঙ্গলিকাদিচারনালেন কাঞ্জিকেন কল্কযেত্ পেষযেত্| এষোঽগদ ঔষধযোগো ব্যন্তরসর্পদষ্টানাং সার্বকার্মিকঃ সর্বকর্মোপযোগী পাননস্যাঞ্জনালেপাদৌ হিত ইত্যর্থঃ||২৪||
Adhikarana shirIShapuShpAdiyogaH (25) · Śloka 25
শিরীষপুষ্পস্বরসে সপ্তাহং মরিচং সিতম্| ভাবিতং সর্পদষ্টানাং পাননস্যাঞ্জনে হিতম্||২৫||
शिरीषपुष्पस्वरसे सप्ताहं मरिचं सितम्| भावितं सर्पदष्टानां पाननस्याञ्जने हितम्||२५||
🔊 Audio coming soon
সিতং মরিচং শিগ্রুবীজম্| মরিচাবান্তরজাতির্বা| (শিরীষকুসুমরসে সপ্তাহং সপ্তবাসরান্ ভাবিতং পেষিতং সিতং মরিচং শিগ্রুবীজং সর্পদষ্টানাং সর্বেষাং পানাদৌ হিতম্)|| ২৫||
Adhikarana vakrakuShThAdipAnam (26) · Śloka 26
দ্বিপলং বক্রকুষ্ঠাভ্যাং ঘৃতক্ষৌদ্রং চতুষ্পলম্| অপি তক্ষকদষ্টানাং পানমেতত্সুখপ্রদম্||২৬||
द्विपलं वक्रकुष्ठाभ्यां घृतक्षौद्रं चतुष्पलम्| अपि तक्षकदष्टानां पानमेतत्सुखप्रदम्||२६||
🔊 Audio coming soon
বক্রকুষ্ঠে মিশ্রীভূতে দ্বিপলম্| তথৈব ঘৃতক্ষৌদ্রং চতুষ্পলম্| তগরকুষ্ঠযোরেকৈকং পলং চূর্ণযিত্বা প্রত্যেকং দ্বিপলপ্রমিতযোর্ঘৃতক্ষৌদ্রযোঃ সমালোড্য পীতং তক্ষকদষ্টানামপি সুখকরম্| অত্রাপিশব্দেন তক্ষকবিষস্য দুর্নিবার্যত্বমস্যাগদস্য প্রভাবাধিক্যং চ দ্যোত্যতে|| ২৬||
Adhikarana gRuhadhUmAdipAnam (27) · Śloka 27
গৃহধূমং হরিদ্রে দ্বে সমূলং তণ্ডুলীযকম্| অপি বাসুকিনা দষ্টঃ পিবেন্মধুঘৃতাপ্লুতম্||২৭||
गृहधूमं हरिद्रे द्वे समूलं तण्डुलीयकम्| अपि वासुकिना दष्टः पिबेन्मधुघृताप्लुतम्||२७||
🔊 Audio coming soon
বাসুকিনা দষ্টোঽপি গৃহধূমাদিকং মধুঘৃতাপ্লুতং পিবেত্|| ২৭||
Adhikarana rasAdigate viShe pAnam (28) · Śloka 28
রক্তং মাংসঞ্চ গোধাযাঃ শুষ্কং চূর্ণীকৃতং হিতম্| বিষে রসগতে পানং কপিত্থরসসংযুতম্| শেলুমূলত্বগগ্রাণি বাদরোদুম্বরাণি চ| কটভ্যাশ্চ পিবেদ্রক্তগতে মাংসগতে পুনঃ| সক্ষৌদ্রং খাদিরারিষ্টং কৌটজং মূলমম্ভসা| সর্বেষ্বপি বলাযুগ্মং মধুকং মদনং নতম্||২৮||
रक्तं मांसञ्च गोधायाः शुष्कं चूर्णीकृतं हितम्| विषे रसगते पानं कपित्थरससंयुतम्| शेलुमूलत्वगग्राणि बादरोदुम्बराणि च| कटभ्याश्च पिबेद्रक्तगते मांसगते पुनः| सक्षौद्रं खादिरारिष्टं कौटजं मूलमम्भसा| सर्वेष्वपि बलायुग्मं मधुकं मदनं नतम्||२८||
🔊 Audio coming soon
বিষে রসগতে সতি গোধাযা রক্তং মাংসং চ শুষ্কং চূর্ণীকৃতং কপিত্থরসসংযুতং পানং হিতম্| রক্তগতে সতি শেলুমূলাদীনি কপিত্থরসসংযুতানি পিবেত্| মাংসগতে খদিরাদিমূলং সক্ষৌদ্রং ক্ষৌদ্রসহিতমম্ভসা পিবেত্| সর্বেষু রসাদিধাতুত্রযগতেষ্বপি বলাযুগ্মাদিকমম্ভসা পিবেত্| মদনং মদনফলম্|| ২৮||
Adhikarana shirogataviShe cikitsA (29) · Śloka 29
শিরোগতে বিষে মূলং নস্যকর্মণি যোজযেত্| বন্ধুজীবস্য ভাঙ্গর্যাশ্চ সুরসস্যাসিতস্য চ| অথবা পিল্লীহিঙ্গুবৃশ্চিকালীমনশিশলাঃ| শিরীষবীজাপামার্গলবণং চেতনাকরম্| কল্কশ্চূর্ণোঽথবা কৃষ্ণক্ষবকাতিবিষোষণাত্||২৯||
शिरोगते विषे मूलं नस्यकर्मणि योजयेत्| बन्धुजीवस्य भाङ्गर्याश्च सुरसस्यासितस्य च| अथवा पिल्लीहिङ्गुवृश्चिकालीमनशिशलाः| शिरीषबीजापामार्गलवणं चेतनाकरम्| कल्कश्चूर्णोऽथवा कृष्णक्षवकातिविषोषणात्||२९||
🔊 Audio coming soon
শিরোগতে বিষে বন্ধুজীবাদিমূলং পৃথঙ্নস্যকর্মণি যোজযেত্| অথবা পিপ্পল্যাদি মনশ্শিলান্তম্| শিরীষাদিকং চেতনাকরং ভবতি| কৃষ্ণাদীনাং কল্কশ্চূর্ণো বা|| ২৯||
Adhikarana akShigataviShacikitsA (30) · Śloka 30
পিপ্পলীমরিচক্ষারবচাসৈন্ধবশিগ্রুকাঃ| পিষ্টা রোহিতপিত্তেন ঘ্নন্ত্যক্ষিগতমঞ্জনাত্| চন্দনং মধুকং মাংসী পিপ্পলীমরিচোত্পলম্| সৈন্ধবং চাঞ্জনং শ্রেষ্ঠং গবাং পিত্তেন কল্কিতম্||৩০||
पिप्पलीमरिचक्षारवचासैन्धवशिग्रुकाः| पिष्टा रोहितपित्तेन घ्नन्त्यक्षिगतमञ्जनात्| चन्दनं मधुकं मांसी पिप्पलीमरिचोत्पलम्| सैन्धवं चाञ्जनं श्रेष्ठं गवां पित्तेन कल्कितम्||३०||
🔊 Audio coming soon
রোহিতপিত্তেন পিষ্টাঃ পিপ্পল্যাদযোঽঞ্জনাদক্ষিগতং বিষং ঘ্নন্তি| রোহিতো মত্স্যবিশেষঃ| গোপিত্তেন পিষ্টং চন্দনাদিকং শ্রেষ্ঠমঞ্জনম্||৩০||
Adhikarana bhojavaitaraNaproktama~jjanam (31) · Śloka 31
নক্তমালফলং ব্যোষং বিল্বমূলং নিশাদ্বযম্| পুষ্পং চ সৌরসং পিষ্টমঞ্জনং বস্তবারিণা| ভোজবৈতরণোদ্দিষ্টং বিষসুপ্তপ্রবোধনম্||৩১||
नक्तमालफलं व्योषं बिल्वमूलं निशाद्वयम्| पुष्पं च सौरसं पिष्टमञ्जनं बस्तवारिणा| भोजवैतरणोद्दिष्टं विषसुप्तप्रबोधनम्||३१||
🔊 Audio coming soon
বস্তবারিণাঽজামূত্রেণ পিষ্টং নক্তমালফলাদিকং ভোজবৈতরণেনোদ্দিষ্টং কল্পিতমঞ্জনং বিষসুপ্তানাং প্রবোধনম্|| ৩১||
Adhikarana gAruDA~jjanam (32) · Śloka 32
বারিগুঞ্জাফলোশীরং নেত্রযোর্বিষদুষ্টযোঃ| অঞ্জনং বারিণা পিষ্টং গারুডং গরুডোপমম্||৩২||
वारिगुञ्जाफलोशीरं नेत्रयोर्विषदुष्टयोः| अञ्जनं वारिणा पिष्टं गारुडं गरुडोपमम्||३२||
🔊 Audio coming soon
বারিণা পিষ্টং বারিগুঞ্জাফলাদিকং বিষদুষ্টযোর্নেত্রযোর্গারুডং নামাঞ্জনং গরুডোপমং চ|| ৩২||
Adhikarana cUrNA~jjanam (33) · Śloka 33
সমুদ্রফেনং মরিচং কণাসৌবীরকাঞ্জনম্| চূর্ণাঞ্জনং সসিন্ধূত্থং বিষোপহতচক্ষুষাম্||৩৩||
समुद्रफेनं मरिचं कणासौवीरकाञ्जनम्| चूर्णाञ्जनं ससिन्धूत्थं विषोपहतचक्षुषाम्||३३||
🔊 Audio coming soon
সিন্ধূত্থসহিতং সমুদ্রফেনাদিকং বিষোপহতচক্ষুষাং চূর্ণাঞ্জনং হিতমিতি শেষঃ|| ৩৩||
Adhikarana AmAshayagataviShacikitsA (34) · Śloka 34
কপিত্থমাংসং সসিতাক্ষৌদ্রং কণ্ঠগতে বিষে| লিহ্যাদামাশযগতে তাভ্যাং চূর্ণপলং নতাত্||৩৪||
कपित्थमांसं ससिताक्षौद्रं कण्ठगते विषे| लिह्यादामाशयगते ताभ्यां चूर्णपलं नतात्||३४||
🔊 Audio coming soon
বিষে কণ্ঠগতে সতি সসিতাক্ষৌদ্রং কপিত্থমাংসং লিহ্যাত্| আমাশযগতে সতি তাভ্যাং সিতাক্ষৌদ্রাভ্যাং সহ নতাদ্বক্রাত্ চূর্ণপলং লিহ্যাত্| লিহ্যাদিত্যুভযত্রাপি সম্বধ্যতে|| ৩৪||
Adhikarana pakvAshayagataviShacikitsA (35) · Śloka 35
বিষে পক্বাশযগতে মঞ্জিষ্ঠা রজনীদ্বযম্| পিপ্পলীং চ সমং পিষ্ট্বা গব্যপিত্তেন পাযযেত্||৩৫||
विषे पक्वाशयगते मञ्जिष्ठा रजनीद्वयम्| पिप्पलीं च समं पिष्ट्वा गव्यपित्तेन पाययेत्||३५||
🔊 Audio coming soon
পক্বাশযগতে বিষে মঞ্জিষ্ঠাদিপিপ্পল্যন্তং সমং সমাংশং গব্যপিত্তেন্ পিষ্ট্বা পাযযেত্|| ৩৫||
Adhikarana kaNThagataviShacikitsA (36) · Śloka 36
পিপ্পলীনাগরক্ষারং নবনীতেন মূর্চ্ছিতম্| প্রবৃদ্ধে কণ্ঠগে দদ্যাচ্ছ্লেষ্মণি প্রতিসারণম্||৩৬||
पिप्पलीनागरक्षारं नवनीतेन मूर्च्छितम्| प्रवृद्धे कण्ठगे दद्याच्छ्लेष्मणि प्रतिसारणम्||३६||
🔊 Audio coming soon
বিষবতঃ কণ্ঠগতে শ্লেষ্মণি প্রবৃদ্ধে প্রবৃদ্ধে পিপ্পল্যাদি নবনীতমিশ্রং প্রতিসারণং দদ্যাত্|| ৩৬||
Adhikarana viShasa~gkrAmaNam (37) · Śloka 37
জযেত্সঙ্ক্রামণৈরাশু বিষং শিরসি সংশ্রিতম্| দদ্যাদধস্তাদ্দষ্টস্য মূর্ধ্নি কাকপদে কৃতে| কাকদক্ষশিখিচ্ছাগগব্যমাহিষকৌক্কুটম্| বিল্বপ্রমাণং মাংসাস্রমূর্ধ্বদষ্টস্য পাদযোঃ| বিষং সঙ্ক্রমতে তত্র নিহন্যাচ্ছীঘ্রমন্যথা||৩৭||
जयेत्सङ्क्रामणैराशु विषं शिरसि संश्रितम्| दद्यादधस्ताद्दष्टस्य मूर्ध्नि काकपदे कृते| काकदक्षशिखिच्छागगव्यमाहिषकौक्कुटम्| बिल्वप्रमाणं मांसास्रमूर्ध्वदष्टस्य पादयोः| विषं सङ्क्रमते तत्र निहन्याच्छीघ्रमन्यथा||३७||
🔊 Audio coming soon
শিরঃস্থিতং বিষং সংক্রামণৈরাশু শীঘ্রং জযেত্| অধঃ কাযে দষ্টস্য মূর্ধ্নি কাকপদং কাকপদাকৃতি ছেদং কৃত্বা তত্র কাকাদ্যন্যতমং বিল্বপ্রমাণং পলমাত্রং মাংসাস্রং দদ্যাত্ ক্ষিপেত্| তত্র মাংসাসৃজি বিষং সংক্রমত ইতি শরীরে চ লাঘবং যাতি| অন্যথা শরীর এব তিষ্ঠন্ শীঘ্রং হন্যাত্| এবমূর্ধ্বকাযে দষ্টস্য পাদযোরপি|| ৩৭||
Adhikarana tIkShNanasyA~jjanottaraM kRutyam (38) · Śloka 38
তীক্ষ্ণনস্যাঞ্জনান্তে চ ভূরিমাত্রং পিবেদ্ ঘৃতম্| বিষং হি নেত্রং রূক্ষস্য তীক্ষ্ণৈর্হন্তি সমীরিতম্| বামযেত ততশ্চৈনং বিষশেষোপশান্তযে| শ্লেষ্মলং শ্লেষ্মলৈর্দষ্টং নাভেরূর্ধ্বং বিশেষতঃ||৩৮||
तीक्ष्णनस्याञ्जनान्ते च भूरिमात्रं पिबेद् घृतम्| विषं हि नेत्रं रूक्षस्य तीक्ष्णैर्हन्ति समीरितम्| वामयेत ततश्चैनं विषशेषोपशान्तये| श्लेष्मलं श्लेष्मलैर्दष्टं नाभेरूर्ध्वं विशेषतः||३८||
🔊 Audio coming soon
অত্র চ বিষে তীক্ষ্ণযোর্নস্যাঞ্জনযোঃ প্রযোগান্তে ভূরিমাত্রং বহুমাত্রং ঘৃতং পিবেত্| যস্মান্নেত্রস্থিতং বিষং রূক্ষস্য সতস্তীক্ষ্ণৈরঞ্জনৈঃ সমীরিতং নেত্রং হন্তি| ততোঽনন্তরমেনং বিশেষোপশান্তযে বামযেত্| শ্লেষ্মলং পুরুষং শ্লেষ্মলৈঃ শূর্দ্রৈর্দ্রষ্টং বিষোপশান্ত্যর্থং বামযেত্| নাভেশ্চোর্ধ্বং দষ্টং বিশেষতো বামযেত্|| ৩৮||
Adhikarana vamanam (39) · Śloka 39
ধামার্গবঃ শক্রযবাঃ সর্ষপা মদনং মধু| সৈন্ধবং বমনং কোষ্ণং বিষে শ্লেষ্মাশযাশ্রিতে| সুরসং সর্পবেতালীমীশ্বরাং গৌরসর্ষপম্| পটোলনিম্বপত্রং চ পিবেত্ সক্ষৌদ্রসৈন্ধবম্| শুকাহ্বাজালিনীদন্তীমদনেক্ষ্বাকুকৌটজম্| কালা লাঙ্গলিকা তিক্তা বমনং তণ্ডুলাম্বুনা||৩৯||
धामार्गवः शक्रयवाः सर्षपा मदनं मधु| सैन्धवं वमनं कोष्णं विषे श्लेष्माशयाश्रिते| सुरसं सर्पवेतालीमीश्वरां गौरसर्षपम्| पटोलनिम्बपत्रं च पिबेत् सक्षौद्रसैन्धवम्| शुकाह्वाजालिनीदन्तीमदनेक्ष्वाकुकौटजम्| काला लाङ्गलिका तिक्ता वमनं तण्डुलाम्बुना||३९||
🔊 Audio coming soon
তদেব্ বমনমাহ| সুরসাদিকং ধামার্গবাদি বমনং সুবোধম্| সক্ষৌদ্রসৈন্ধবং বমনং পিবেত্| সর্পবেতালী মঞ্জার্যাখ্যা সুরসাদিকং মহাবেতালী চ| শুকাহ্বাদিভিস্তণ্ডুলাম্বুনা বমনম্| ইতি শ্লেষ্মণি||৩৯||
Adhikarana paittike virecanam (40) · Śloka 40
পৈত্তিকং পৈত্তিকৈর্দষ্টমধো নাভের্বিশেষতঃ| বিষে পিত্তাশযগতে পাযযেত বিরেচনম্| সনীলীফলদাং দন্তীং পযসা মস্তুনাঽথবা| শ্লক্ষ্ণচূর্ণীকৃতং কুম্ভং ক্বাথেন ত্রৈফলেন বা| ক্ষীরেণ বা ত্রিবৃচ্ছ্যামাসুরসানীলিনীরজঃ| পিণ্ডীতকফলং ব্যোষং ত্রিবৃদ্বেল্লং হরীতকী| বিরেচনং কফপ্রাযে লবণং মূত্রসম্প্লুতম্| ঘৃতাপ্লুতং সলবণং মারুতে নীলিনীফলম্| শযানঃ শযনে ছিদ্রে বিরেচ্যো বিষপীডিতঃ| মুহুরুত্তিষ্ঠতো হ্যস্য বিষং দূষযতেঽনিলম্| পিবেদ্বান্তো বিরিক্তো বা যবাগূং বিষনাশিনীম্||৪০||
पैत्तिकं पैत्तिकैर्दष्टमधो नाभेर्विशेषतः| विषे पित्ताशयगते पाययेत विरेचनम्| सनीलीफलदां दन्तीं पयसा मस्तुनाऽथवा| श्लक्ष्णचूर्णीकृतं कुम्भं क्वाथेन त्रैफलेन वा| क्षीरेण वा त्रिवृच्छ्यामासुरसानीलिनीरजः| पिण्डीतकफलं व्योषं त्रिवृद्वेल्लं हरीतकी| विरेचनं कफप्राये लवणं मूत्रसम्प्लुतम्| घृताप्लुतं सलवणं मारुते नीलिनीफलम्| शयानः शयने छिद्रे विरेच्यो विषपीडितः| मुहुरुत्तिष्ठतो ह्यस्य विषं दूषयतेऽनिलम्| पिबेद्वान्तो विरिक्तो वा यवागूं विषनाशिनीम्||४०||
🔊 Audio coming soon
পৈত্তিকং পুরুষং পৈত্তিকৈর্দষ্টং বিরেচনং পাযযেত্| অধো নাভের্দষ্টং পিত্তাশযগতে চ বিষে বিশেষেণ পাযযেত চ নীলিনীফলৈর্যুক্তাং দন্তীং পযসা ক্ষীরেণাথবা মস্তুনা| অথবা ত্রিফলাক্বাথেন দ্রবন্তীচূর্ণম্| অথবা ত্রিবৃতাদীনাং রজশ্চূর্ণং ক্ষীরেণ| পিণ্ডীতকফলাদিকং লবণান্তং মূত্রসংপ্লুতং শ্লেষ্মপ্রাযে পিত্তে বিরেচনং পাযযেত্| পিণ্ডীতকফলং মদনফলম্| মারুতেঽধিকে নীলিনীফলং ঘৃতাপ্লুতং বিরেচনম্| বিষপীডিতঃ সর্বঃ শযনে ছিদ্রে সচ্ছিদ্রে শযানো বিরেচ্যঃ| ছিদ্রং শয্যাযাং গুদপ্রদেশে কার্যম্| যতো বিরেচনার্থং মুহুরুত্তিষ্ঠতো বিষং কর্তৃ অনিলং দূষযতে| সুবোধম্| বিষনাশিনী যবাগূঃ পুর্বোক্তা|| ৪০||
Adhikarana vAtAshayagataviShacikitsA (41) · Śloka 41
বিষে বাতাশযগতে সর্পিষঃ পানমিষ্যতে| আদ্যপশ্চিমযোর্যচ্চ প্রোক্তং বিষনিষেধযোঃ||৪১||
विषे वाताशयगते सर्पिषः पानमिष्यते| आद्यपश्चिमयोर्यच्च प्रोक्तं विषनिषेधयोः||४१||
🔊 Audio coming soon
বাতাশযগতে ব্যাখ্যাসমম্| আদ্যপশ্চিমৌ বিষনিষেধৌ স্থাবরবিষপ্রথমসপ্তমবেগৌ|| ৪১||
Adhikarana darvIkaraviShavegeShu cikitsA (42) · Śloka 42
অথ দর্বীকৃতাং বেগে পূর্বে বিস্রাব্য শোণিতম্| অগদং মধুসর্পির্ভ্যাং সংযুক্তং ত্বরিতং পিবেত্| দ্বিতীযে বমনং কৃত্বা তদ্বদেবাগদং পিবেত্| বিষাপহে প্রযুঞ্জীত তৃতীযেঽঞ্জননাবনে| পিবেচ্চতুর্থে পূর্বোক্তাং যবাগূং বমনে কৃতে| ষষ্ঠপঞ্চমযোঃ শীতৈর্দিগ্ধসিক্তমভীক্ষ্ণশঃ| পাযযেদ্বমনং তীক্ষ্ণং যবাগূং চ যথোদিতাম্| অগদং সপ্তমে তীক্ষ্ণং যুঞ্জ্যাদঞ্জননস্যযোঃ| কৃত্বাবগাঢং শস্ত্রেণ মুর্ধ্নি কাকপদং ততঃ| মাংসং সরুধিরং তস্য চর্ম বা তত্র নিক্ষিপেত্||৪২||
अथ दर्वीकृतां वेगे पूर्वे विस्राव्य शोणितम्| अगदं मधुसर्पिर्भ्यां संयुक्तं त्वरितं पिबेत्| द्वितीये वमनं कृत्वा तद्वदेवागदं पिबेत्| विषापहे प्रयुञ्जीत तृतीयेऽञ्जननावने| पिबेच्चतुर्थे पूर्वोक्तां यवागूं वमने कृते| षष्ठपञ्चमयोः शीतैर्दिग्धसिक्तमभीक्ष्णशः| पाययेद्वमनं तीक्ष्णं यवागूं च यथोदिताम्| अगदं सप्तमे तीक्ष्णं युञ्ज्यादञ्जननस्ययोः| कृत्वावगाढं शस्त्रेण मुर्ध्नि काकपदं ततः| मांसं सरुधिरं तस्य चर्म वा तत्र निक्षिपेत्||४२||
🔊 Audio coming soon
অথেত্যাদিনা বেগক্রমেণোচ্যতে| ব্যাখ্যাসমম্| অবগাঢমন্তঃ-প্রবিষ্টম্| (অথ বেগলক্ষণদর্শনানান্তরং দর্বীকরসর্পাণাং প্রথমে বেগে জলূকাদিনা রক্তমপনীয মধুঘৃতোপেতং বিষঘ্নমৌষধং শীঘ্রং পিবেত্| দ্বিতীযে বেগে কৃতবমনঃ সন্ সর্পির্মধূপেতমেবাগদং পিবেত্| তৃতীযে বেগে তণ্ডুলীযকাদি বিষহরদ্রব্যৈরঞ্জননাবনে যুঞ্জ্যাত্| চতুর্থে বেগে বমনানন্তরং পূর্বোক্তাং কোশাতকেত্যাদিনা কৃতাং যবাগূং পিবেত্| ষষ্ঠপঞ্চমবেগযোঃ শীতৈশ্চন্দনোশীরাদিশীতদ্রব্যৈর্দিগ্ধং পুনঃ পুনঃ প্রলিপ্তং দূর্বাগোজিহ্বাদিস্বরসশীতোদকাদিভিস্তদ্বদেব সিক্তং চ তীক্ষ্ণং তীক্ষ্ণদ্রব্যকৃতং বমনৌষধং তণ্ডুলীযককোশাতক্যাদিভিঃ সিদ্ধাং যবাগূং চ পাযযেত্| সপ্তমে বেগে অঞ্জননস্যযোস্তীক্ষ্ণমগদং যুঞ্জ্যাত্| মূর্ধ্নি শস্ত্রেণাবগাঢং কাকপদং কৃত্ব কাকপদাকৃত্যাঽবগাঢং ছিত্বাঽনন্তরং তস্য দষ্টস্য তত্র কাকপদে সরক্তং মাংসং চর্ম বা নিক্ষিপেত্| নিক্ষিপ্য বিষং তস্মিন্ সঙ্ক্রামযেদিত্যর্থঃ)|| ৪২||
Adhikarana maNDalivegacikitsA (43) · Śloka 43
তৃতীযে বামিতঃ পেযাং বেগে মণ্ডলিনাং পিবেত্| অতীক্ষ্ণমগদং ষষ্ঠে গণং বা পদ্মকাদিকম্||৪৩||
तृतीये वामितः पेयां वेगे मण्डलिनां पिबेत्| अतीक्ष्णमगदं षष्ठे गणं वा पद्मकादिकम्||४३||
🔊 Audio coming soon
তৃতীযাত্ ষষ্ঠাচ্চ শেষেষু মণ্ডলিনাং সামর্থ্যাত্ পূর্ববত্| (মণ্ডলিসর্পাণাং তৃতীযে বেগে কৃতবমনঃ সন্ বিষঘ্নীং পেযাং পিবেত্| ষষ্ঠে বেগে অতীক্ষ্ণং মৃদুদ্রব্যকৃতমগদমৌষধযোগং শোধনাদিগণোক্তং পদ্মকাদিগণং বা পিবেত্)|| ৪৩||
Adhikarana rAjilavegacikitsA (44) · Śloka 44
আদ্যেঽবগাঢং প্রচ্ছায বেগে দষ্টস্য রাজিলৈঃ| অলাবুনা হরেদ্রক্তং পুর্ববচ্চাগদং পিবেত্| ষষ্ঠে বেগেঽঞ্জনং তীক্ষ্ণমবপীডং চ যোজযেত্| অনুক্তেষু চ বেগেষু ক্রিযাং দর্বীকরোদিতাম্||৪৪||
आद्येऽवगाढं प्रच्छाय वेगे दष्टस्य राजिलैः| अलाबुना हरेद्रक्तं पुर्ववच्चागदं पिबेत्| षष्ठे वेगेऽञ्जनं तीक्ष्णमवपीडं च योजयेत्| अनुक्तेषु च वेगेषु क्रियां दर्वीकरोदिताम्||४४||
🔊 Audio coming soon
অবগাঢং ঘনম্| রাজীমতাং শেষেষু বেগেষু পূর্ববত্ দর্বীকরবত্| এতদেবোচ্যতে অনুক্তেষ্বিত্যাদিনা| (আদ্য ইতি| রাজিলসর্পৈর্দষ্টস্য আদ্যে প্রথমে বেগে অবগাঢং সম্যগ্রক্তাপনযনার্থমামাংসমিত্যর্থঃ| প্রচ্ছায প্রচ্ছানং কৃত্বা অলাবুনা রক্তং হরেত্| পূর্ববত্ মধুসর্পিঃ সংযুক্তং বিষঘ্নমৌষধং পিবেচ্চ| ষষ্ঠে বেগে তীক্ষ্ণতমমতিশযেন তীক্ষ্ণমঞ্জনমবপীডননস্যং চ যোজযেত্| অত্রানুক্তেষু মণ্ডলিনাং প্রথম-দ্বিতীয-চতুর্থ-পঞ্চম-সপ্তমবেগেষু| রাজীমতাং দ্বিতীয-তৃতীয-চতুর্থ-পঞ্চম-সপ্তমবেগেষু চ দর্বীকরবেগোক্তচিকিত্সামেব যোজযেত্)|| ৪৪||
Adhikarana garbhiNyAdau sirAvyadhaniShedhaH (45) · Śloka 45
গর্ভিণীবালবৃদ্ধেষু মৃদু বিধ্যেত্ সিরাঞ্চ ন||৪৫||
गर्भिणीबालवृद्धेषु मृदु विध्येत् सिराञ्च न||४५||
🔊 Audio coming soon
গর্ভিণ্যাদিষু সর্বং মৃদু শস্যতে| সিরাঃ চ ন বিধ্যেত্| (গর্ভিণ্যাদিষু মৃদ্বতীক্ষ্ণমঞ্জনাদিকং যুঞ্জ্যাত্ সিরাবেধং তু ন কুর্যাত্)||৪৫||
Adhikarana vajrAkhyaM cUrNam (46) · Śloka 46
ত্বঙ্মনোহ্বা নিশে বক্রং রসঃ শার্দূলজো নখঃ| তমালঃ কেসরং শীতং পীতং তণ্ডুলবারিণা| হন্তি সর্ববিষাণ্যেতদ্বজ্রং বজ্রমিবাসুরান্||৪৬||
त्वङ्मनोह्वा निशे वक्रं रसः शार्दूलजो नखः| तमालः केसरं शीतं पीतं तण्डुलवारिणा| हन्ति सर्वविषाण्येतद्वज्रं वज्रमिवासुरान्||४६||
🔊 Audio coming soon
সর্ববিষাণাং সামান্যচিকিত্সামাহ-ত্বগাদিচূর্ণং নাম্না বজ্রম্| সুবোধম্| বক্রং তগরম্| শীতং চন্দনম্| (ত্বগাদিশীতান্তমৌষধং পিষ্টং তণ্ডুলবারিণ্যালোড্য পীতং বজ্রসংজ্ঞিতমেতদৌষধং সর্বসর্পবিষাণি নাশযতি| শক্রেণ প্রেরিতং কুলিশমসুরানিব)||৪৬||
Adhikarana tArkShyo agadaH (47) · Śloka 47
প্রপৌণ্ডরীকং কটুকা দেবদারুসুবর্চিকা| কালানুসারী স্থৌণেযশৈলেযধনপদ্মকম্| কুটন্নটৈলাপুন্নাগনতকুষ্ঠপ্রিযঙ্গুকম্| লোধ্রগুগ্গুলুতালীসপিপ্পলীস্বর্ণগৈরিকম্| সিন্দুবারঃ সিতঃ শুণ্ঠী ধ্যামকং লবণোত্তমম্| শ্লক্ষ্ণচূর্ণীকৃতং শৃঙ্গে নিদধ্যান্মাক্ষিকদ্রুতম্| তার্ক্ষ্যস্তার্ক্ষ্যোপমঃ পাননাবনাভ্যঞ্জনাঞ্জনৈঃ| অগদস্তক্ষকস্যাপি বিষবেগং নিবর্ত্তযেত্||৪৭||
प्रपौण्डरीकं कटुका देवदारुसुवर्चिका| कालानुसारी स्थौणेयशैलेयधनपद्मकम्| कुटन्नटैलापुन्नागनतकुष्ठप्रियङ्गुकम्| लोध्रगुग्गुलुतालीसपिप्पलीस्वर्णगैरिकम्| सिन्दुवारः सितः शुण्ठी ध्यामकं लवणोत्तमम्| श्लक्ष्णचूर्णीकृतं शृङ्गे निदध्यान्माक्षिकद्रुतम्| तार्क्ष्यस्तार्क्ष्योपमः पाननावनाभ्यञ्जनाञ्जनैः| अगदस्तक्षकस्यापि विषवेगं निवर्त्तयेत्||४७||
🔊 Audio coming soon
প্রপৌণ্ডরীকাদিভিস্তার্ক্ষ্যনামাগদঃ সুবোধঃ| শৃঙ্গং গোঃ| (প্রপৌণ্ডরীকমিত্যাদি| কালানুসারী কালানুসারি বা| কুটন্নটঃ স্যোনাকঃ| সিতঃ সিন্দুবারঃ শ্বেতনির্গুণ্ডী| ধ্যামকং কত্তৃণম্| ইতি সুশৃতটীকা)|| ৪৭||
Adhikarana lodhrAdyagadaH (48) · Śloka 48
লোধ্রং শিরীষপুষ্পাণি সমঙ্গা হিঙ্গু রেণুকাঃ| কণোষণৈলা নেপালী বচা যষ্টী মধূত্পলম্| সিন্দুবারকমন্দারমূলং বীজং করঞ্জজম্| জ্যোতিষ্মতী নতং কুষ্ঠং শ্বেতা চ গিরিকর্ণিকা| চূর্ণিতঃ কন্যযা ক্ষৌদ্রগোপিত্তাভ্যাং চ বর্ত্তিতঃ| অগদো হন্তি সর্পাখুকণভং চ সৃগালজম্| বিডালকাণ্ডচিত্রোত্থং বিষং ভূতগ্রহং জ্বরম্| অপস্মারগ্রহোন্মাদগুল্মাজীর্ণং বিষূচিকাম্||৪৮||
लोध्रं शिरीषपुष्पाणि समङ्गा हिङ्गु रेणुकाः| कणोषणैला नेपाली वचा यष्टी मधूत्पलम्| सिन्दुवारकमन्दारमूलं बीजं करञ्जजम्| ज्योतिष्मती नतं कुष्ठं श्वेता च गिरिकर्णिका| चूर्णितः कन्यया क्षौद्रगोपित्ताभ्यां च वर्त्तितः| अगदो हन्ति सर्पाखुकणभं च सृगालजम्| बिडालकाण्डचित्रोत्थं विषं भूतग्रहं ज्वरम्| अपस्मारग्रहोन्मादगुल्माजीर्णं विषूचिकाम्||४८||
🔊 Audio coming soon
লোধ্রাদিঃ সুবোধঃ| সমঙ্গা মঞ্জিষ্ঠা| রেণুকা হরেণুঃ| নেপালী মনশ্শিলা| যষ্টীমধুর্মধুযষ্টী| মন্দারঃ পারিভদ্রঃ|| ৪৮||
Adhikarana bilvamUlAdyagadaH (49) · Śloka 49
বিল্বস্য মূলং সুরসস্য পুষ্পং ফলং করঞ্জস্য নতং সুরাহ্বম্| ফলত্রযং ব্যোষনিশাদ্বযং চ বস্তস্য মূত্রেণ সুসূক্ষ্মপিষ্টম্| ভুজঙ্গলূতোন্দুরুবৃশ্চিকাদ্যৈ র্বিষূচিকাজীর্ণগরজ্বরৈশ্চ| আর্ত্তান্নরান্ ভূতবিধর্ষিতাংশ্চ স্বস্থীকরোত্যঞ্জনপাননস্যৈঃ||৪৯||
बिल्वस्य मूलं सुरसस्य पुष्पं फलं करञ्जस्य नतं सुराह्वम्| फलत्रयं व्योषनिशाद्वयं च बस्तस्य मूत्रेण सुसूक्ष्मपिष्टम्| भुजङ्गलूतोन्दुरुवृश्चिकाद्यै र्विषूचिकाजीर्णगरज्वरैश्च| आर्त्तान्नरान् भूतविधर्षितांश्च स्वस्थीकरोत्यञ्जनपाननस्यैः||४९||
🔊 Audio coming soon
বস্তস্যাবের্মূত্রেণ সুসূক্ষ্মমতিশ্লক্ষ্ণং পিষ্টং বিল্বমূলাদিকমঞ্জনাদিভির্ভুজঙ্গাদ্যৈর্বিষূচিকাদ্যৈশ্চার্ত্তান্ ভূতবিধর্ষিতাংশ্চ নরান্ স্বস্থীকরোতি| সুরসপুষ্পং সুরসমঞ্জরী|| ৪৯||
Adhikarana mahAgadaH (50) · Śloka 50
ত্রিবৃদ্বিশল্যা মধুকং নিশে লবণপঞ্চকম্| মঞ্জিষ্ঠা ত্র্যূষণং তদ্বত্ কল্কযেত্ স মহাগদঃ||৫০||
त्रिवृद्विशल्या मधुकं निशे लवणपञ्चकम्| मञ्जिष्ठा त्र्यूषणं तद्वत् कल्कयेत् स महागदः||५०||
🔊 Audio coming soon
ত্রিবৃদাদিকো মহাগদঃ সুবোধঃ| বিশল্যা গর্ভপাতনী| তদ্বত্ কল্কযেদিত্যনেন পেষণাদি সর্বং পুর্ববদ্ বোদ্ধব্যম্|| ৫০||
Adhikarana ArShabhaH agadaH (51) · Śloka 51
মাংসীহরেণুত্রিফলামুরুঙ্গী মধুযষ্টিকা| মঞ্জিষ্ঠা পদ্মকাশোককুষ্ঠতালীসচন্দনম্| সুগন্ধিকৈলা কিণিহী ত্বক্পটোলী মৃগাদিনী| ভার্ঙ্গীং বিডঙ্গং পালিন্দী পাঠা ক্রোষ্টুকমেখলা| পুষ্পমারুষ্করং পত্রং সৌরসং ক্রমুকং পুরম্| পিত্তং নকুলমার্জারগোধাশল্যকসূকরাত্| পৃষতাচ্চিত্রপত্রাচ্চ গোশৃঙ্গে পুর্ববত্ স্থিতঃ| যত্র গেহে ন তত্রাহিকীটাদিভ্যো ভযোদ্ভবঃ| এতেন ভেরীপটহাঃ পতাকাশ্চ প্রলেপিতাঃ| আর্ষভেণ বিষং ঘ্নন্তি স্পর্শশ্রবণদর্শনৈঃ||৫১||
मांसीहरेणुत्रिफलामुरुङ्गी मधुयष्टिका| मञ्जिष्ठा पद्मकाशोककुष्ठतालीसचन्दनम्| सुगन्धिकैला किणिही त्वक्पटोली मृगादिनी| भार्ङ्गीं विडङ्गं पालिन्दी पाठा क्रोष्टुकमेखला| पुष्पमारुष्करं पत्रं सौरसं क्रमुकं पुरम्| पित्तं नकुलमार्जारगोधाशल्यकसूकरात्| पृषताच्चित्रपत्राच्च गोशृङ्गे पुर्ववत् स्थितः| यत्र गेहे न तत्राहिकीटादिभ्यो भयोद्भवः| एतेन भेरीपटहाः पताकाश्च प्रलेपिताः| आर्षभेण विषं घ्नन्ति स्पर्शश्रवणदर्शनैः||५१||
🔊 Audio coming soon
মাংস্যাদিভিরার্ষভনামাগদঃ সুবোধঃ| নকুলাদি চিত্রপত্রান্তৈঃ সহ পিত্তমিতি সম্বধ্যতে| পূর্ববদিতি প্রপৌণ্ডরীকাদ্যগদবত্| এতেনার্ষভনাম্নাঽগদেন প্রলেপিতা ভের্যাদযঃ স্পর্শাদিভির্বিষং ঘ্নন্তি| (মুরুঙ্গী সৌভাঞ্জনকঃ| সুগন্ধিকা সর্পগন্ধিকা| কিণিহী কটভী| মৃগাদিনী ইন্দ্রবারুণী| পালিন্দী ত্রিবৃত্| ক্রোষ্টুকমেখলা পৃশ্নিপর্ণী| ক্রমুকং পূগফলম্| পুরং গুগ্গুলুঃ| পৃষতো হরিণঃ| চিত্রপত্রো মযূরঃ| ইতি সুশ্রুতটীকাযাম্|| ৫১||
Adhikarana viShasheShabhayam (52) · Śloka 52
প্রলেপাদ্যৈশ্চ নিশ্শেষং দংশাদপ্যুদ্ধরেদ্বিষম্| ভূযো বেগায জাযেত শেষং দূষীবিষায বা||৫২||
प्रलेपाद्यैश्च निश्शेषं दंशादप्युद्धरेद्विषम्| भूयो वेगाय जायेत शेषं दूषीविषाय वा||५२||
🔊 Audio coming soon
সর্বং বিষং প্রলেপাদ্যৈর্দংশাদপি নিশ্শেষং হরেদ্যতঃ নিশ্শেষং বিষং ভূযো বেগায দূষীবিষায বা জাযতে| (প্রলেপঃ আলেপঃ| আদিশব্দেন সেকরক্তমোক্ষণাদিপরিগ্রহঃ)|| ৫২||
Adhikarana viShApAye doShacikitsA (53) · Śloka 53
বিষাপাযেঽনিলং ক্রুদ্ধং স্নেহাদিভিরুপাচরেত্| তৈলমদ্যকুলত্থাম্লবর্জ্যৈঃ পবননাশনৈঃ| পিত্তং পিত্তজ্বরহরৈঃ কষাযস্নেহবস্তিভিঃ| সমাক্ষিকেণ বর্গেণ কফমারগ্বধাদিনা||৫৩||
विषापायेऽनिलं क्रुद्धं स्नेहादिभिरुपाचरेत्| तैलमद्यकुलत्थाम्लवर्ज्यैः पवननाशनैः| पित्तं पित्तज्वरहरैः कषायस्नेहबस्तिभिः| समाक्षिकेण वर्गेण कफमारग्वधादिना||५३||
🔊 Audio coming soon
বিষাপাযেঽপি তত্কারণকুপিতদোষপ্রশমনোপাযমাহ-বিষাপাযে বিষাপগমে বমনাদিভিঃ ক্রুদ্ধমনিলং তৈলাদিবর্জ্যৈঃ পবননাশনৈঃ স্নেহাদিভিরুপাচরেত্| তৈলাদীনাং পবনাপহরত্বেঽপি প্রতিষেধঃ| বিষাপাযে পিত্তং ক্রুদ্ধং পিত্তজ্বরহরৈঃ কষাযাদিভির্জযেত্| (কষাযঃ ষডঙ্গাদিঃ স্নেহস্তিক্তকাদিঃ)| বিষাপায এব কফং ক্রুদ্ধং সমাক্ষিকেণারগ্বধাদিনা বর্গেণ কষাযাদ্যুপযুক্তেন জযেত্|| ৫৩||
Adhikarana sarpA~ggAbhihatasha~gkAviShayoshcikitsA (54) · Śloka 54
সিতা বৈগন্ধিকো দ্রাক্ষা পযস্যা মধুকং মধু| পানং সমন্ত্রপূতাম্বুপ্রোক্ষণং সান্ত্বহর্ষণম্| সর্পাঙ্গাভিহতে যুঞ্জ্যাত্তথা শঙ্কাবিষার্দিতে||৫৪||
सिता वैगन्धिको द्राक्षा पयस्या मधुकं मधु| पानं समन्त्रपूताम्बुप्रोक्षणं सान्त्वहर्षणम्| सर्पाङ्गाभिहते युञ्ज्यात्तथा शङ्काविषार्दिते||५४||
🔊 Audio coming soon
সর্পাঙ্গাভিহতশঙ্কাবিষযোশ্চিকিত্সামাহ-সিতাদিকং পানং সমন্ত্রপূতাম্বুপ্রোক্ষণাদিকং চ সর্পাঙ্গাভিহতাক্ষ্যে শঙ্কাবিষপীডিতে চ যুঞ্জ্যাত্| (বৈগন্ধিকস্ত্রিজাতকশ্চতুর্জাতকো বা মন্ত্রপূতেন জলেন প্রোক্ষণং সান্ত্বনাদিকং চ ইতি জেজ্জটঃ)|| ৫৪||
Adhikarana rakShAprayojanam (55) · Śloka 55
পূতনাপ্রেতকূষ্মাণ্ডপিশাচাদ্যা নরদ্বিষঃ| হন্যুরৌষধবীর্যাণি রক্ষাকর্মণ্যবারিতাঃ| তস্মাদ্রক্ষাং প্রযুঞ্জীত রক্ষোগণনিবারিণীম্||৫৫||
पूतनाप्रेतकूष्माण्डपिशाचाद्या नरद्विषः| हन्युरौषधवीर्याणि रक्षाकर्मण्यवारिताः| तस्माद्रक्षां प्रयुञ्जीत रक्षोगणनिवारिणीम्||५५||
🔊 Audio coming soon
সর্বত্র বক্ষ্যমাণাং রক্ষাং রক্ষসাং গণানাং চ নিবারিণীং প্রযুঞ্জীত| বিষাদিরক্ষাকর্মণি পূতনাদযো নরদ্বিষো মনুষ্যশত্রবঃ অবতারিতাঃ সন্তঃ ঔষধবীর্যাণি হন্যুঃ অতো হেতোঃ রক্ষোগণনিবারিণীং রক্ষাং প্রযুঞ্জীত|| ৫৫||
Adhikarana rakShAvidhAnam (56) · Śloka 56
গোমযেন সুসম্মৃষ্টে ধূপাগরুসুধূপিতে| গন্ধমাল্যোপহারাদ্যৈর্গৃহে পূজিতদৈবতে| সূত্রকারান্সমভ্যর্চ্য শঙ্করাস্তিককাশ্যপান্| সন্তর্প্য হব্যকব্যাভ্যাং সমিদ্ধাননলদ্বিজান্| প্রাঙ্মুখাযোপবিষ্টায বিষার্ত্তায চিকিত্সকঃ| উত্তরাভিমুখো যুঞ্জ্যাদ্বিদ্যাং মন্ত্রাণি ভেষজম্| সমপ্রমাণৈর্হরিতৈর্দর্ভৈঃ প্রাগভিমন্ত্রিতৈঃ| অচ্ছিন্নাগ্রৈঃ সমূলৈশ্চ কুর্যাত্তস্যাপমার্জনম্| ব্রাহ্মাদ্যৈরগদৈরেনং নিত্যমেবানুলেপযেত্| সঞ্জীবনাদীন্ পানাদৌ দংশলেপে চ যোজযেত্| পূর্ণকুম্ভং সকুসুমং সর্ষপান্ ছাগলং পযঃ| শস্ত্রং দূর্বাং মধু ঘৃতং কুর্যাদ্দষ্টস্য মূর্দ্ধতঃ| এবং শাম্যতি সপ্তাহাদ্বিষমাত্মবতঃ সতঃ||৫৬||
गोमयेन सुसम्मृष्टे धूपागरुसुधूपिते| गन्धमाल्योपहाराद्यैर्गृहे पूजितदैवते| सूत्रकारान्समभ्यर्च्य शङ्करास्तिककाश्यपान्| सन्तर्प्य हव्यकव्याभ्यां समिद्धाननलद्विजान्| प्राङ्मुखायोपविष्टाय विषार्त्ताय चिकित्सकः| उत्तराभिमुखो युञ्ज्याद्विद्यां मन्त्राणि भेषजम्| समप्रमाणैर्हरितैर्दर्भैः प्रागभिमन्त्रितैः| अच्छिन्नाग्रैः समूलैश्च कुर्यात्तस्यापमार्जनम्| ब्राह्माद्यैरगदैरेनं नित्यमेवानुलेपयेत्| सञ्जीवनादीन् पानादौ दंशलेपे च योजयेत्| पूर्णकुम्भं सकुसुमं सर्षपान् छागलं पयः| शस्त्रं दूर्वां मधु घृतं कुर्याद्दष्टस्य मूर्द्धतः| एवं शाम्यति सप्ताहाद्विषमात्मवतः सतः||५६||
🔊 Audio coming soon
গোমযেনেত্যাদিনা পূতনাদীনাং রক্ষা সুবোধা| গন্ধাদ্যৈশ্চন্দনাদিভিঃ| পূজিতা দেবতা যস্মিন্ গৃহে তত্তথোক্তম্| সূত্রকারানিতি শঙ্করাদিবিশেষণম্| দেবদেযং হব্যম্| পিতৃদেযং কব্যম্| ব্রাহ্মসঞ্জীবনাদযোঽগদা বিষপ্রতিষেধোক্তাঃ| দষ্টস্য মূর্দ্ধতঃ শয্যাশিরোভাগে পূর্ণকুম্ভাদিকং কুর্যাত্| আত্মবান্ সত্ত্ববান্|| ৫৬||
Adhikarana viShaghnaM dhAraNam (57) · Śloka 57
কর্কেতনং মরকতং বজ্রং বারণমৌক্তিকম্| বৈডূর্যং গর্দভমণিং পিচুকাং বিষমুষ্টিকাম্| হিমবদ্গিরিসম্ভূতাং সোমরাজীং পুনর্নবাম্| তথা দ্রোণং মহাদ্রোণং মানসীং সর্পজং মণিম্| বিষাণি বিষশান্ত্যর্থং বীর্যবন্তি চ ধারযেত্||৫৭||
कर्केतनं मरकतं वज्रं वारणमौक्तिकम्| वैडूर्यं गर्दभमणिं पिचुकां विषमुष्टिकाम्| हिमवद्गिरिसम्भूतां सोमराजीं पुनर्नवाम्| तथा द्रोणं महाद्रोणं मानसीं सर्पजं मणिम्| विषाणि विषशान्त्यर्थं वीर्यवन्ति च धारयेत्||५७||
🔊 Audio coming soon
(ইদানীং যেষাং চ ধারণাত্ প্রভাবোপহতং বিষং বিষত্বং জহাতি তান্যভিদধাতি| কর্কেতনমিত্যাদি ইতি জেজ্জটঃ|) কর্কেতনাদীনি কেচিন্মণযঃ| কানিচিদৌষধানি| বীর্যবন্তি বিষাণীত্যেতত্সর্বং বিষশান্ত্যর্থং ধারযেত্| ('কর্কেতনং পদ্মরাগবিশেষ' ইতি জেজ্জটঃ|) কর্কেতন মাণিক্যম্| বারণস্য মস্তকোদ্ভূতমৌক্তিকং বারণমৌক্তিকম্| গর্দভমণিঃ ধূমবর্ণরত্নবিশেষঃ| পিচুকা রত্নপুষ্পেতি কাচিদৌষধিঃ| বিষমূষিকা তন্নামধেযা পরমৌষধিঃ| বিষমূষিকেতি পাঠঃ| হিমবদ্গিরিসম্ভূতা শ্বেতবচা| হিমবদ্গিরিসম্ভূতা সোমরাজীতি কেচিত্| দ্রোণং বৈকুণ্ঠম্| মহাদ্রোণং শ্বেতবৈকুণ্ঠম্| মানসী মণ্ডূকপর্ণী| ব্রহ্মীতি কেচিত্| সর্পফণোদ্ভূতো মণিঃ সর্পজমণিঃ|| ৫৭||
Adhikarana chatryAdidhAraNam (58-42) · Śloka 42
ছত্রী ঝর্ঝরপাণিশ্চ চরেদ্রাত্রৌ বিশেষতঃ| তচ্ছাযাশব্দবিত্রস্তাঃ প্রণশ্যন্তি ভুজঙ্গমাঃ||৫৮|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতা বষ্টাঙ্গসংগ্রহসংহিতাযামুত্তরতন্ত্রে সর্পবিষ প্রতিষেধো নাম দ্বিচত্বারিংশোঽধ্যাযঃ||৪২||
छत्री झर्झरपाणिश्च चरेद्रात्रौ विशेषतः| तच्छायाशब्दवित्रस्ताः प्रणश्यन्ति भुजङ्गमाः||५८|| इति वैद्यपतिसिंहगुप्तस्य सूनोर्वाग्भटस्य कृता वष्टाङ्गसंग्रहसंहितायामुत्तरतन्त्रे सर्पविष प्रतिषेधो नाम द्विचत्वारिंशोऽध्यायः||४२||
🔊 Audio coming soon
ছত্রী ঝর্ঝরপাণিশ্চ নিত্যং চরেত্| রাত্রৌ তু বিশেষতঃ| ঝর্ঝরং ঝণঝণাযমানং লোহমযং কটকাকারম্| তযোশ্ছত্রঝর্ঝরযোর্যথাসঙ্খ্যেন ছাযাশব্দাভ্যাং ত্রস্তা ভুজঙ্গমা নশ্যন্ত্যদর্শনং যান্তি| (সর্বদা প্রমাদপূর্বং সঞ্চরণং নিষিধ্যত ইতি জেজ্জটঃ|) ছত্রবান্ ঝর্ঝরহস্তশ্চ সদা সঞ্চরেত্ নিশি বিশেষাত্| ছত্রমাতপম্| ঝর্ঝরপাণিঃ সশব্দহস্তঃ| প্রণশন্ত্যদর্শনং যান্তি| ণশ্ অদর্শন ইতি ধাতুঃ|| ৫৮|| ইতি শ্রীমন্মহামহোপাধ্যাযেন্দুবিরচিতাযা মষ্টাঙ্গসংগ্রহব্যাখ্যাযাং শশিলেখাযা মুত্তরতন্ত্রে দ্বিচত্বারিংশোঽধ্যাযঃ