18. sarvagākṣirōgavijñānīyaḥ

Adhikarana atha sarvAkShirogavij~jAnIyo nAmAShTAdasho~adhyAyaH - pratij~jA (1) · Śloka 1

অথাতঃ সর্বাক্ষিরোগবিজ্ঞানীযং নামাধ্যাযং ব্যাখ্যাস্যামঃ| ইতি হ স্মাহুরাত্রেযাদযো মহর্ষযঃ||১||

নেত্রস্যাঽবযববিভাগেন রোগনির্ণযং কৃত্বা রোগাণাং ব্যাপিনাং হেত্বাদিকং প্রদর্শযিতুমধ্যায আরভ্যতে||১||

Adhikarana vAtABiShyandalakShaNam (2) · Śloka 2

বাতেন নেত্রেঽভিষ্যণ্ণে নাসানাহোঽল্পশোফতা| শঙ্খাক্ষিভ্রূললাটাস্যতোদস্ফুরণভেদনম্| শুষ্কাল্পা দূষিকা শীতমল্পং চাশ্রু চলা রুজঃ| নিমিষোন্মেষণং কৃচ্ছ্রাজ্জন্তূনামিব সর্পণম্| অক্ষ্যাধ্মাতমিবাভাতি সূক্ষ্মৈশ্শল্যৈরিবাচিতম্| স্নিগ্ধোষ্ণৈশ্চোপশমনম্.......................||২||

বাতেন নেত্রেঽভিষ্যণ্ণে আর্দ্রীভূতে নাসানাহাদিকং ভবতি| সুবোধম্| উপশমনং স্বাস্থ্যলাভঃ| এষ রোগোঽভিষ্যন্দ উচ্যতে|

Adhikarana vAtAdhimanthaH (3) · Śloka 3

.....................সোঽভিষ্যন্দ উপেক্ষিতঃ| অধিমন্থো ভবেত্তত্র কর্ণযোর্নদনং ভ্রমঃ| অরণ্যেব চ মথ্যন্তে ললাটাক্ষিভ্রুবাদযঃ||৩||

এষ চোপেক্ষিতঃ সন্ বাতেনৈবাধিমন্থো ভবেত্| তত্র বাতাধিমন্থে কর্ণনাদাদিকং লিঙ্গম্| অরণী যাজ্ঞিকানাং ঘর্ষণেনাগ্ন্যুত্পাদনে মন্থনকাষ্ঠম্||৩||

Adhikarana vAtajahatAdhimanthaH (4) · Śloka 4

হতাধিমন্থঃ সোঽপি স্যাত্প্রমাদাত্তেন বেদনাঃ| অনেকরূপা জাযন্তে ব্রণো দৃষ্টৌ চ দৃষ্টিহা||৪||

স চাধিমন্থঃ প্রমাদাদপচারাদ্ধতাধিমন্থাখ্যঃ স্যাত্| তেন চ হতাধিমন্থেনানেকরূপা বেদনা রুজো জাযন্তে| দৃষ্টিমণ্ডলে চ দর্শনহা ব্রণো জাযতে||৪||

Adhikarana anyatovAtaH (5) · Śloka 5

মন্যাক্ষিশঙ্খতো বাযুরন্যতো বা প্রবর্তযেত্| ব্যথাং তীব্রামপৈচ্ছিল্যরাগশোফং বিলোচনম্| সঙ্কোচযতি পর্যশ্রু সোঽন্যতো বাতসংজ্ঞিতঃ||৫||

যদা তু স্বনিমিত্তাত্ কুপিতো বাযুর্মন্যাদিতোঽন্যতো বা তন্নিকটাদঙ্গাত্ পূর্বাত্তীব্রাং ব্যথাং প্রবর্তযেত্| পৈচ্ছিল্যাদিরহিতং নেত্রং সাশ্রু সঙ্কোচযতি| তদা স রোগো নাম্না অন্যতোবাতঃ||৫||

Adhikarana vAtaparyayaH (6) · Śloka 6

তদ্বজ্জিহ্যং ভবেন্নেত্রমূনং বা বাতপর্যযে||৬||

বাতপর্যযাখ্যে রোগে তদ্বদিতি পূর্ববন্মন্যারুজাদিকেন নেত্রং জিহ্যং কুটিলং চিত্রন্যস্তমিব ভবত্যূনং বা প্রমাণেন ভবতি ||৬||

Adhikarana pittABiShyandaH (7) · Śloka 7

দাহো ধূমাযনং শোফঃ স্যাবতা বর্ত্মনোর্বহিঃ| অতঃক্লেদোঽশ্রু পীতোষ্ণং রাগঃ পীতাভদর্শনম্| ক্ষারোক্ষিতক্ষতাক্ষিত্বং পিত্তাভিষ্যন্দলক্ষণম্||৭||

দাহাদিকং পিত্তাভিষ্যন্দলক্ষণম্| ধূমপ্রবেশ ইব ধূমাযনম্| ক্ষারেণোক্ষিতো যো ব্রণস্তত্তুল্যব্রণাক্ষিতা ভবতি||৭||

Adhikarana pittAdhimanthaH (8) · Śloka 8

জ্বলদঙ্গারকীর্ণাভং যকৃত্পিণ্ডসমপ্রভম্| অধিমন্যে ভবেন্নেত্রম্.......................||৮||

অস্মিন্নুপেক্ষযা পিত্তাধিমন্থীভূতে জ্বলদঙ্গারকীর্ণাভনেত্রত্বাদিকং লিঙ্গম্||৮||

Adhikarana kaPABiShyandalakShaNam (9) · Śloka 9

........................স্যন্দে তু কফসম্ভবে| জাড্যং শোফো মহান্ কণ্ডূর্নিদ্রান্নানভিনন্দনম্| সান্দ্রস্নিগ্ধবহুশ্বেতপিচ্ছাবদ্ দূষিকাঽশ্রুতা||৯||

কফেঽভিষ্যন্দে জাড্যাদিকং লিঙ্গম্| অনভিনন্দনমন্নস্য| সান্দ্রাদিগুণবদ্ দূষিকা সান্দ্রাদিগুণবদশ্রুতা চ||৯||

Adhikarana kaPAdhimanthalakShaNam (10) · Śloka 10

অধিমন্থে নতং কৃষ্ণমুন্নতং শুক্লমণ্ডলম্| প্রসেকো নাসিকাধ্মানং পাংসুপূর্ণমিবেক্ষণম্||১০||

অস্মিন্নেবোপেক্ষযা কফাধিমন্থীভূতে কৃষ্ণং নতত্বাদিলক্ষণম্||১০||

Adhikarana raktABiShyandalakShaNam (11) · Śloka 11

রক্তাশ্রুরাজীদূষীকা রক্তমণ্ডলদর্শনম্| রক্তস্যন্দেন নযনং সপিত্তস্যন্দলক্ষণম্||১১||

রক্তাভিষ্যন্দে পিত্তাভিষ্যন্দলক্ষণান্তং লিঙ্গম্||১১||

Adhikarana raktAdhimanthalakShaNam (12) · Śloka 12

মন্থেঽক্ষিতাম্রপর্যন্তমুত্পাটনসমানরুক্| রাগেণ বন্ধূকনিভং তাম্যতি স্পর্শনাক্ষমম্| অসৃঙ্নিমগ্নারিষ্টাভং কৃষ্ণমগ্ন্যাভদর্শনম্||১২||

অস্মিন্নেব রক্তাধিমন্থীভূতে তাম্রপর্যন্তমক্ষি ভবত্যুত্পাটনসমানরুগাদিস্বরূপং তেন সদৃশং কৃষ্ণং যস্মিন্নক্ষ্ণি|| ১২||

Adhikarana adhimanthasAmAnyalakShaNam (13) · Śloka 13

অধিমন্থা যথাস্বং চ সর্বে স্যন্দাধিকব্যথাঃ| শঙ্খদন্তকপোলেষু কপালে চাতি রুক্করাঃ||১৩||

সর্বে চাধিমন্থা যথাস্বদেষেভ্যোঽভিষ্যন্দেভ্যোঽধিকব্যথা ভবন্তি| বাতাধিমন্থো বাতাভিষ্যন্দাধিকব্যথঃ| এবং সর্বত্র বাচ্যম্| তে চাধিমন্থাঃ শঙ্খাদিকেঽতিরুক্করাঃ||১৩||

Adhikarana shuShkAkShipAkaH (14) · Śloka 14

বাতপিত্তাতুরং ঘর্ষতোদভেদোপদেহবত্| রূক্ষদারুণবর্ত্মাক্ষিকৃচ্ছ্রোন্মীলনিমীলনম্| বিকূণনবিশুষ্কত্বশীতেচ্ছাশূলপাকবত্| উক্তঃ শুষ্কাক্ষিপাকোঽযম্................||১৪||

বাতপিত্তেনাতুরং পীডিতমক্ষি ঘর্ষতোদাদিগুণং ভবতি| স রোগো নাম্না শুষ্কাক্ষিপাক উক্তঃ||১৪||

Adhikarana sashophapAkaH (15) · Śloka 15

..................সশোফঃ স্যাত্ত্রিভির্মলৈঃ| সরক্তস্তত্র শোফোঽতিরুদ্গাহষ্ঠীবনাদিমান্| পক্বোদুম্বরসঙ্কাশং জাযতে শুক্লমণ্ডলম্| অশ্রূষ্ণশীতবিশদপিচ্ছিলাচ্ছঘনং মুহুঃ||১৫||

সশোফাখ্যস্তু পাকঃ সরক্তৈস্ত্রিভির্দোষৈর্ভবতি| তত্র সশোফে পাকেঽতিরুগাদিমান্ শোফঃ| নেত্রে চ শুক্লমণ্ডলং পক্বোদুম্বরসঙ্কাশং জাযতে| উষ্ণত্বাদিগুণং চাশ্রু জাযতে||১৫||

Adhikarana alpashophaH (16) · Śloka 16

অল্পশোফোঽল্পশোফস্তু পাকোঽন্যৈর্লক্ষণৈস্তথা||১৬||

যস্ত্বক্ষিপাকোঽল্পশোফোঽন্যৈঃ পক্বোদুম্বরসঙ্কাশাদিকৈরনন্তরোক্তসশোফাখ্যপাকাক্ষিলক্ষণৈর্যুক্তো ভবতি স নাম্নাঽল্পশোফঃ||১৬||

Adhikarana akShipAkAtyayaH (17) · Śloka 17

অক্ষিপাকাত্যযে শোফঃ সংরম্ভঃ কলুষাশ্রুতা| কফোপদিগ্ধমসিতং সিতং প্রক্লেদরাগবত্| দাহো দর্শনসংরোধো বেদনাশ্চানবস্থিতা||১৭||

অক্ষিপাকাত্যযাখ্যে রোগে শোফাদিকং লিঙ্গম্| সংরম্ভো বেদনাযা উদ্রেকঃ| বেদনা অনবস্থিতাশ্চলস্বরূপাঃ||১৭||

Adhikarana amloShitaH (18) · Śloka 18

অন্নসারোঽম্লতাং নীতঃ পিত্তরক্তোল্বণৈর্মলৈঃ| সিরাভির্নেত্রমারূঢঃ করোতি শ্যাবলোহিতম্| সশোফদাহপাকাশ্রু ভৃশং চাবিলদর্শনম্| অম্লোষিতোঽযম্............................||১৮||

যোঽন্নস্য সারঃ স পিত্তরক্তাধিকৈস্ত্রিভির্মলৈরম্লত্বং নীতঃ সিরাভিশ্চ নেত্রমারূঢঃ সন্ নেত্রং শ্যাবলোহিতং করোতি| অযং রোগো নাম্না অম্লোষিতঃ||১৮||

Adhikarana sarvagAnAM sa~gkhyAsamprAptiH (19) · Śloka 19

............ইত্যুক্তাঃ গদাঃ ষোডশ সর্বগাঃ||১৯||

ইতি ষোডশ ব্যাধযঃ সর্বগা উক্তাঃ||১৯||

Adhikarana asAdhyatAnirdeshaH (20-18) · Śloka 18

হতাধিমন্থমেতেষু সাক্ষিপাকাত্যযং ত্যজেত্| বাতাদ্ভূতং পঞ্চরাত্রেণ দৃষ্টিং সপ্তাহেন শ্লেষ্মজাতোঽধিমন্থঃ| রক্তোত্পন্নো হন্তি তদ্বত্ত্রিরাত্রান্ মিথ্যাচারাত্ পৈত্তিকঃ সদ্য এব||২০|| ইতি বৈদ্যপতিসিংহগুপ্তস্য সূনোর্বাগ্ভটস্য কৃতাবষ্টাঙ্গসংগ্রহসংহিতাযামুত্তরতন্ত্রে সর্বাক্ষিরোগবিজ্ঞানীয নামাষ্টাদশোঽধ্যাযঃ||১৮||

এতেষু চ মধ্যে হতাধিমন্থমক্ষিপাকাত্যযং চাসাধ্যত্বাত্ত্যজেত্| বাতোদ্ভূত ইত্যাদি সুবোধম্| দৃষ্টিং হন্তীতি সর্বত্র সম্বধ্যতে| ইতি শ্রীমন্মহামহোপাধ্যাযেন্দুবিরচিতাযামষ্টাঙ্গসংগ্রহব্যাখ্যাযাং শশিলেখাযামুত্তরতন্ত্রে অষ্টাদশোঽধ্যাযঃ