17. kṣatakṣīṇacikitsitam

Adhikarana 1 (1-2) · Śloka 2

অথাতঃ ক্ষতক্ষীণচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

অপস্মাররোগেণ বিষমোচ্চপতনাদিভ্য উরঃক্ষতোঽপি ভবতি, ততঃ ক্ষতক্ষীণো ভবতি, তত্সম্বন্ধাদপস্মারমনু ক্ষতক্ষীণচিকিত্সিতমুচ্যতে| তত্র ক্ষতক্ষীণরূপাদ্ বক্ষ্যমাণস্ত্রীসেবাদিকারণকশুক্রৌজঃক্ষযাচ্চ জাতো ব্যাধিঃ প্রধানম্ ‘উরো বিরুজ্যতে’ ইত্যাদিনা বক্ষ্যমাণলক্ষণকঃ কারণে কার্যোপচারাত্ ‘উরঃক্ষত’ ইত্যুচ্যতে; যদা ‘ক্ষীণক্ষত’ ইতি পাঠস্তদাঽপি ক্ষীণশব্দেন শুক্রৌজঃক্ষযযুক্তঃ পুরুষ উচ্যতে; তথা ক্ষীণে চ পুরুষে ক্ষতং ভবতীতি হেতোঃ ‘ক্ষতক্ষীণ’ ইত্যুচ্যতে| অন্যে তু ক্ষতশ্চ ক্ষযশ্চ ইতি ক্ষতক্ষয ইত্যাহুঃ; তেন রোগদ্বযমেতত্| তথা ‘উরোরুক্ শোণিতচ্ছর্দিঃ’ ইত্যাদিনা ক্ষতস্য ক্ষীণস্য চ লক্ষণং করিষ্যতি; তস্মিন্ পক্ষে ‘অব্যক্তং লক্ষণং তস্য’ ইতি, তথা ‘সাধ্যো বলবতো নবঃ’ ইত্যাদাবেকবচননির্দেশোঽনুপপন্নঃ, তেনৈকস্যৈব ক্ষতক্ষীণস্য হেতুকৃতং লক্ষণদ্বৈবিধ্যং; কিংবা ক্ষতক্ষযকারণযোঃ ক্ষতধাতুক্ষযযোস্তদ্বিধলক্ষণকারণাভিধানং পূর্বরূপাবস্থাযাং ব্যাধিপ্রতিক্রিযার্থং জ্ঞেযম্||১-২||

Adhikarana 2 (3) · Śloka 3

উদারকীর্তির্ব্রহ্মর্ষিরাত্রেযঃ পরমার্থবিত্| ক্ষতক্ষীণচিকিত্সার্থমিদমাহ চিকিত্সিতম্||৩||

ব্রহ্মর্ষিরিত্যনেন দেবর্ষিত্বরাজর্ষিত্বে আত্রেযস্য নিষেধতি| চিকিত্সার্থমিতি প্রতিক্রিযার্থম্| চিকিত্সিতং চিকিত্সাভিধাযকগ্রন্থম্||৩||

Adhikarana 3 (4-8) · Śloka 8

ধনুষাঽঽযস্যতোঽত্যর্থং ভারমুদ্বহতো গুরুম্| পততো বিষমোচ্চেভ্যো বলিভিঃ সহ যুধ্যতঃ||৪|| বৃষং হযং বা ধাবন্তং দম্যং বাঽন্যং নিগৃহ্ণতঃ| শিলাকাষ্ঠাশ্মনির্ঘাতান্ ক্ষিপতো নিঘ্নতঃ পরান্||৫|| অধীযানস্য বাঽত্যুচ্চৈর্দূরং বা ব্রজতো দ্রুতম্| মহানদীং বা তরতো হযৈর্বা সহ ধাবতঃ||৬|| সহসোত্পততো দূরং তূর্ণং চাতিপ্রনৃত্যতঃ| তথাঽন্যৈঃ কর্মভিঃ ক্রূরৈর্ভৃশমভ্যাহতস্য চ||৭|| বিক্ষতে বক্ষসি ব্যাধির্বলবান্ সমুদীর্যতে| স্ত্রীষু চাতিপ্রসক্তস্য রূক্ষাল্পপ্রমিতাশিনঃ||৮||

চিকিত্সা চ নিদানাদিনা জ্ঞাতস্যৈব ব্যাধের্ভবতি, তেন ক্ষতনিদানমেব তাবদাহ- ধনুষেত্যাদি| আযস্যত ইতি শরীরমাযাস্যতঃ| বলিভিরিতি স্বাপেক্ষযা বলাধিকৈঃ| নিগৃহ্ণত ইতি বারযতঃ| নির্ঘাতঃ অস্ত্রবিশেষঃ, কিংবা নির্ঘাতঃ শিলাদীনাং প্রেরণবিশেষোঽতিবলসম্পাদিতঃ| অভ্যাহতস্য পরৈরভিহতস্য| ব্যাধিরিতি বক্ষ্যমাণলক্ষণঃ ক্ষতক্ষযাখ্যো ব্যাধিঃ; অন্যে তু ব্যাধিশব্দেন ক্ষতমেবাহুঃ, “দোষাদিষ্বপি ব্যাধিশব্দো বর্ততে” ইতি বচনাত্| ন চাস্মিন্ রাজযক্ষ্মরূপতা শঙ্কনীযা, যত উরঃক্ষতস্ত্রিদোষজন্য এব, ভিন্নসম্প্রাপ্তিশ্চ “অযথাবলমারম্ভৈর্জন্তোরুরসি বিক্ষতে| বাযুঃ প্রকুপিতো দোষাবুদীর্যোভৌ বিধাবতি” (চি.অ.৮) ইত্যাদিনোক্তা, লক্ষণানি ভিন্নান্যেব “উরো বিরুজ্যতে” ইত্যাদিনা বক্ষ্যমাণলক্ষণেভ্য উক্তানি| অত এবেহানযোর্ভেদং বক্ষ্যতি “উপেক্ষিতে ভবেদস্মিন্ননুবন্ধো হি যক্ষ্মণঃ” ইতি| স্ত্রীষু চাতিপ্রসক্তস্য রূক্ষাল্পপ্রমিতাশিনঃ বলবান্ ব্যাধিঃ সমুদীর্যত ইতি সম্বন্ধঃ| প্রমিতাশনম্ একরসাভ্যাসঃ, কিংবাঽতীতকালভোজনম্||৪-৮||

Adhikarana 4 (9-11) · Śloka 12

উরো বিরুজ্যতে তস্য ভিদ্যতেঽথ বিভজ্যতে| প্রপীড্যেতে ততঃ পার্শ্বে শুষ্যত্যঙ্গং প্রবেপতে||৯|| ক্রমাদ্বীর্যং বলং বর্ণো রুচিরগ্নিশ্চ হীযতে| জ্বরো ব্যথা মনোদৈন্যং বিড্ভেদোঽগ্নিবধাদপি||১০|| দুষ্টঃ শ্যাবঃ সুদুর্গন্ধঃ পীতো বিগ্রথিতো বহুঃ| কাসমানস্য চ শ্লেষ্মা সরক্তঃ সম্প্রবর্ততে||১১|| স ক্ষতঃ ক্ষীযতেঽত্যর্থং তথা শুক্রৌজসোঃ ক্ষযাত্|১২|

ক্ষতক্ষযলক্ষণমাহ- উর ইত্যাদিনা| ভিদ্যত ইতি বিদীর্যতে| অগ্নিবধাদপীতি অত্রাগ্নিবধং বিনা ব্যাধিমহিম্না বিড্ভেদো ভবতীতি দর্শযতি| অন্যে তু ‘বিড্ভেদোঽগ্নিবধস্তথা’ ইতি পঠন্তি| দুষ্টঃ ব্যাপন্নঃ| ক্ষীযত ইতি ধাতুক্ষযবান্ ভবতি; ন কেবলং ক্ষতাদেব ক্ষীযতে, কিন্তু অতিস্ত্রীসেবাদিনা কৃতাচ্ছুক্রৌজঃ- ক্ষযাদপি ক্ষীযতে ইতরধাতুক্ষযবান্ ভবতি||৯-১১||-

Adhikarana 5 (12-13) · Śloka 13

অব্যক্তং লক্ষণং তস্য পূর্বরূপমিতি স্মৃতম্||১২|| উরোরুক্শোণিতচ্ছর্দিঃ কাসো বৈশেষিকঃ ক্ষতে| ক্ষীণে সরক্তমূত্রত্বং পার্শ্বপৃষ্ঠকটিগ্রহঃ||১৩||

পূর্বরূপমাহ- অব্যক্তমিত্যাদি| অব্যক্তমিতি অল্পত্বেন যথোক্তলক্ষণতোঽসম্পূর্ণম্| উরোরুগিত্যাদিগ্রন্থস্তু প্রাযেণ ব্যাকৃতঃ| কাসো বৈশেষিক ইতি বিশিষ্টঃ, স চ বিশেষো ‘দুষ্টঃ শ্যাবঃ’ ইত্যাদিনা প্রোক্তো জ্ঞেযঃ; কিংবা বৈশেষিকোঽধিকো জ্ঞেযঃ| ক্ষীণে ইতি শুক্রৌজসী ক্ষীণে| অন্যে তু উরোরুগিত্যাদিনাঽবস্থাদ্বযস্য লক্ষণদ্বযমেতদ্বর্ণযন্তি||১২-১৩||

Adhikarana 6 (14) · Śloka 14

অল্পলিঙ্গস্য দীপ্তাগ্নেঃ সাধ্যো বলবতো নবঃ| পরিসংবত্সরো যাপ্যঃ সর্বলিঙ্গং তু বর্জযেত্||১৪||

চিকিত্সাপ্রবৃত্ত্যর্থং সাধ্যাদিবিভাগমাহ- অল্পেত্যাদি| পরিসংবত্সরঃ বর্ষাতীতঃ||১৪||

Adhikarana 7 (15-20) · Śloka 20

উরো মত্বা ক্ষতং লাক্ষাং পযসা মধুসংযুতাম্| সদ্য এব পিবেজ্জীর্ণে পযসাঽদ্যাত্ সশর্করম্||১৫|| পার্শ্ববস্তিরুজী চাল্পপিত্তাগ্নিস্তাং সুরাযুতাম্| ভিন্নবিট্কঃ সমুস্তাতিবিষাপাঠাং সবত্সকাম্||১৬|| লাক্ষাং সর্পির্মধূচ্ছিষ্টং জীবনীযগণং সিতাম্| ত্বক্ক্ষীরীং সমিতাং ক্ষীরে পক্ত্বা দীপ্তানলঃ পিবেত্||১৭|| ইক্ষ্বালিকাবিসগ্রন্থিপদ্মকেশরচন্দনৈঃ| শৃতং পযো মধুযুতং সন্ধানার্থং পিবেত্ ক্ষতী||১৮|| যবানাং চূর্ণমাদায ক্ষীরসিদ্ধং ঘৃতপ্লুতম্| জ্বরে দাহে সিতাক্ষৌদ্রসক্তূন্ বা পযসা পিবেত্||১৯|| মধূকমধুকদ্রাক্ষাত্বক্ক্ষীরীপিপ্পলীবলাঃ| কাসী পার্শ্বাস্থিশূলী চ লিহ্যাত্সঘৃতমাক্ষিকাঃ||২০||

জ্ঞাতরোগবিশেষেণ কর্তব্যাং চিকিত্সামাহ- উরো মত্বেত্যাদি| উরসঃ সদ্যঃ ক্ষতং মত্বা লাক্ষাং পিবেদিতি যোজনা| সশর্করমিতি শর্করাসহিতমন্নম্| ভিন্নবিট্কঃ সমুস্তাতিবিষাপাঠাং লাক্ষাং পিবেত্| অত্র যে ‘দ্বিবত্সকাম্’ ইতি পঠন্তি তে বত্সকভাগদ্বযং গ্রাহযন্তি; কিংবা বত্সকদ্বযমেব দ্বিবত্সকশব্দেন গৃহ্যতে; তথা হি- “বৃহত্ফলঃ শ্বেতপুষ্পঃ স্নিগ্ধপত্রঃ পুমান্ ভবেত্| শ্যামা চারুণপুষ্পা স্ত্রী ফলপুষ্পৈস্তথাঽণুভিঃ” (ক.অ.৫) ইতি কল্পে কুটজঃ স্ত্রীপুরুষবিভাগেন দ্বিবিধ উক্তঃ| সন্ধানার্থমিতি ক্ষতোরঃসন্ধানার্থম্| মধূকশব্দেনেহ মধূকপুষ্পং গ্রাহ্যম্||১৫-২০||

Adhikarana 8 (21-24) · Śloka 24

এলাপত্রত্বচোঽর্ধাক্ষাঃ পিপ্পল্যর্ধপলং তথা| সিতামধুকখর্জূরমৃদ্বীকাশ্চ পলোন্মিতাঃ||২১|| সঞ্চূর্ণ্য মধুনা যুক্তা গুটিকাঃ সম্প্রকল্পযেত্| অক্ষমাত্রাং ততশ্চৈকাং ভক্ষযেন্না দিনে দিনে||২২|| কাসং শ্বাসং জ্বরং হিক্কাং ছর্দিং মূর্চ্ছাং মদং ভ্রমম্| রক্তনিষ্ঠীবনং তৃষ্ণাং পার্শ্বশূলমরোচকম্||২৩|| শোষপ্লীহাঢ্যবাতাংশ্চ স্বরভেদং ক্ষতং ক্ষযম্| গুটিকা তর্পণী বৃষ্যা রক্তপিত্তং চ নাশযেত্||২৪|| ইত্যেলাদিগুটিকা|

এলাপত্রত্বচ ইত্যাদিনা এলাদিগুটিকামাহ| যুক্ত্যেতি যাবতা মধুনা গুটিকা ভবন্তি তাবন্মানং মধু দেযম্||২১-২৪||

Adhikarana 9 (25-26) · Śloka 26

রক্তেঽতিবৃত্তে দক্ষাণ্ডং যূষৈস্তোযেন বা পিবেত্| চটকাণ্ডরসং বাঽপি রক্তং বা ছাগজাঙ্গলম্||২৫|| চূর্ণং পৌনর্নবং রক্তশালিতণ্ডুলশর্করম্| রক্তষ্ঠীবী পিবেত্ সিদ্ধং দ্রাক্ষারসপযোঘৃতৈঃ||২৬||

দক্ষঃ গোষ্ঠকুক্কুটঃ| ছাগজাঙ্গলমিতি ছাগভবং জাঙ্গলহরিণাদিভবং বা| চূর্ণং পৌনর্নবমিত্যাদৌ সিদ্ধমিতি সাধিতম্| চূর্ণসাধনং দ্রাক্ষারসাদিদ্রবেণ অগ্নিসংযোগাত্ কর্তব্যম্| উক্তং হি জতূকর্ণে- “পুনর্নবারক্তশালীদ্রাক্ষাসিতাচূর্ণং পযোঘৃতযুতং সিদ্ধম্” ইতি||২৫-২৬||

Adhikarana 10 (27-34) · Śloka 34

মধূকমধুকক্ষীরসিদ্ধং বা তণ্ডুলীযকম্| মূঢবাতস্ত্বজামেদঃ সুরাভৃষ্টং সসৈন্ধবম্||২৭|| ক্ষামঃ ক্ষীণঃ ক্ষতোরস্কস্ত্বনিদ্রঃ সবলেঽনিলে| শৃতক্ষীরসরেণাদ্যাত্ সক্ষৌদ্রঘৃতশর্করম্||২৮|| শর্করাং যবগোধূমৌ জীবকর্ষভকৌ মধু| শৃতক্ষীরানুপানং বা লিহ্যাত্ ক্ষীণঃ ক্ষতী কৃশঃ||২৯|| ক্রব্যাদমাংসনির্যূহং ঘৃতভৃষ্টং পিবেচ্চ সঃ| পিপ্পলীক্ষৌদ্রসংযুক্তং মাংসশোণিতবর্ধনম্||৩০|| ন্যগ্রোধোদুম্বরাশ্বত্থপ্লক্ষশালপ্রিযঙ্গুভিঃ| তালমস্তকজম্বূত্বক্প্রিযালৈশ্চ সপদ্মকৈঃ||৩১|| সাশ্বকর্ণৈঃ শৃতাত্ ক্ষীরাদদ্যাজ্জাতেন সর্পিষা| শাল্যোদনং ক্ষতোরস্কঃ ক্ষীণশুক্রশ্চ মানবঃ||৩২|| যষ্ট্যাহ্বনাগবলযোঃ ক্বাথে ক্ষীরসমং ঘৃতম্| পযস্যাপিপ্পলীবাংশীকল্কসিদ্ধং ক্ষতে শুভম্||৩৩|| কোললাক্ষারসে তদ্বত্ ক্ষীরাষ্টগুণসাধিতম্| কল্কৈঃ কট্বঙ্গদার্বীত্বগ্বত্সকত্বক্ফলৈর্ঘৃতম্||৩৪||

মধূকেত্যাদৌ মধূকমধুককল্কেন ক্ষীরেণ সমং সাধিতং তণ্ডুলীযকশাকম্| সবলে ইতি বলবত্যনিলে| ক্রব্যাদাঃ মাংসভুজো মৃগপক্ষিণঃ| ক্ষীরাজ্জাতেনেতি ক্ষীরাবস্থাযামেব গৃহীতেন| যষ্ট্যাহ্বেত্যাদৌ সমক্বাথক্ষীরাভ্যাং ঘৃতাচ্চাতুর্গুণ্যম্| বাংশী বংশলোচনা| কোলেত্যাদৌ তদ্বদিতি ক্ষতে হিতম্; অত্র কোললাক্ষারসস্য চ ঘৃতাচ্চাতুর্গুণ্যং, ক্ষীরং চাষ্টগুণং বদন্তি; কিংবা কোললাক্ষারসযোঃ সমত্বমেব ক্ষীরেণ; অযং চ ন্যাযোঽপস্মারাধ্যাযে নির্দিষ্টঃ||২৭-৩৪||

Adhikarana 11 (35-43) · Śloka 43

জীবকর্ষভকৌ বীরাং জীবন্তীং নাগরং শটীম্| চতস্রঃ পর্ণিনীর্মেদে কাকোল্যৌ দ্বে নিদিগ্ধিকে||৩৫|| পুনর্নবে দ্বে মধুকমাত্মগুপ্তাং শতাবরীম্| ঋদ্ধিং পরূষকং ভার্গীং মৃদ্বীকাং বৃহতীং তথা||৩৬|| শৃঙ্গাটকং তামলকীং পযস্যাং পিপ্পলীং বলাম্| বদরাক্ষোটখর্জূরবাতামাভিষুকাণ্যপি||৩৭|| ফলানি চৈবমাদীনি কল্কান্ কুর্বীত কার্ষিকান্| ধাত্রীরসবিদারীক্ষুচ্ছাগমাংসরসং পযঃ||৩৮|| কুর্যাত্ প্রস্থোন্মিতং তেন ঘৃতপ্রস্থং বিপাচযেত্| প্রস্থার্ধং মধুনঃ শীতে শর্করার্ধতুলাং তথা||৩৯|| দ্বিকার্ষিকাণি পত্রৈলাহেমত্বঙ্মরিচানি চ| বিনীয চূর্ণিতং তস্মাল্লিহ্যান্মাত্রাং সদা নরঃ||৪০|| অমৃতপ্রাশমিত্যেতন্নরাণামমৃতং ঘৃতম্| সুধামৃতরসং প্রাশ্যং ক্ষীরমাংসরসাশিনা||৪১|| নষ্টশুক্রক্ষতক্ষীণদুর্বলব্যাধিকর্শিতান্| স্ত্রীপ্রসক্তান্ কৃশান্ বর্ণস্বরহীনাংশ্চ বৃংহযেত্||৪২|| কাসহিক্কাজ্বরশ্বাসদাহতৃষ্ণাস্রপিত্তনুত্| পুত্রদং বমিমূর্চ্ছাহৃদ্যোনিমূত্রামযাপহম্||৪৩|| ইত্যমৃতপ্রাশঘৃতম্|

দ্বে নিদিগ্ধিকে ইতি বচনেন বৃহতী ক্ষুদ্রা চ গ্রাহ্যা| পযস্যা ক্ষীরবিদারী| বাতামাভিষুকাণি তু ঔত্তরাপথিকানি ফলানি| এবমাদীনি এবম্প্রকারাণ্যন্যানি বাতপিত্তহরাণি| ধাত্রীরসানাং চ যদ্যপি “পঞ্চপ্রভৃতি যত্র স্যুর্দ্রবাণি স্নেহসংবিধৌ| তত্র স্নেহসমান্যাহুঃ” ইতি বচনেন প্রস্থমানত্বং সিদ্ধং, তথাঽপি এতত্পরিভাষার্থদার্ঢ্যার্থমেবৈতন্মানকথনং জ্ঞেযম্| পলার্ধকত্বমিহ মরিচাদীনাং মিলিতানাং, সমাহারপ্রধানত্বান্নির্দেশস্য; বৃদ্ধাস্তু প্রত্যেকমেব পলার্ধকত্বং বদন্তি| সুধা ভৌমী ভোজ্যা, অমৃতং তু দেবভোজ্যম্||৩৫-৪৩||

Adhikarana 12 (44-47) · Śloka 47

শ্বদংষ্ট্রোশীরমঞ্জিষ্ঠাবলাকাশ্মর্যকত্তৃণম্| দর্ভমূলং পৃথক্পর্ণীং পলাশর্ষভকৌ স্থিরাম্||৪৪|| পলিকং সাধযেত্তেষাং রসে ক্ষীরচতুর্গুণে| কল্কঃ স্বগুপ্তাজীবন্তীমেদর্ষভকজীবকৈঃ||৪৫|| শতাবর্যৃদ্ধিমৃদ্বীকাশর্করাশ্রাবণীবিসৈঃ| প্রস্থঃ সিদ্ধো ঘৃতাদ্বাতপিত্তহৃদ্দ্র(দ্ভ)বশূলনুত্||৪৬|| মূত্রকৃচ্ছ্রপ্রমেহার্শঃকাসশোষক্ষযাপহঃ| ধনুঃস্ত্রীমদ্যভারাধ্বখিন্নানাং বলমাংসদঃ||৪৭|| ইতি শ্বদংষ্ট্রাদিঘৃতম্|

শ্বদংষ্ট্রেত্যাদৌ ক্বাথ্যদ্রব্যপরিমাণানুসারেণ পাদোনপ্রস্থত্রযং জলং দত্ত্বা চতুর্ভাগাবশেষেণ চতুশ্চত্বারিংশত্ক্বাথফলানি ভবন্তি| ক্ষীরং চাত্র চতুর্গুণং ঘৃতাত্; কিংবা ক্বাথচতুর্গুণং ক্ষীরম্||৪৪-৪৭||

Adhikarana 13 (48-49) · Śloka 49

মধুকাষ্টপলদ্রাক্ষাপ্রস্থক্বাথে ঘৃতং পচেত্| পিপ্পল্যষ্টপলে কল্কে প্রস্থং সিদ্ধে চ শীতলে||৪৮|| পৃথগষ্টপলং ক্ষৌদ্রশর্করাভ্যাং বিমিশ্রযেত্| সমসক্তু ক্ষতক্ষীণে রক্তগুল্মে চ তদ্ধিতম্||৪৯||

মধুকেত্যাদাবপি ক্বাথ্যমানানুসারেণ ক্বাথস্য সার্ধপ্রস্থো ভবতি| সমসক্তু ইতি সমসক্তুঘৃতম্||৪৮-৪৯||

Adhikarana 14 (50-55) · Śloka 55

ধাত্রীফলবিদারীক্ষুজীবনীযরসৈর্ঘৃতম্| অজাগোপযসোশ্চৈব সপ্ত প্রস্থান্ পচেদ্ভিষক্||৫০|| সিদ্ধশীতে সিতাক্ষৌদ্রদ্বিপ্রস্থং বিনযেচ্চ তত্| যক্ষ্মাপস্মারপিত্তাসৃক্কাসমেহক্ষযাপহম্||৫১|| বযঃস্থাপনমাযুষ্যং মাংসশুক্রবলপ্রদম্| ঘৃতং তু পিত্তেঽভ্যধিকে লিহ্যাদ্বাতেঽধিকে পিবেত্||৫২|| লীঢং নির্বাপযেত্ পিত্তমল্পত্বাদ্ধন্তি নানলম্| আক্রামত্যনিলং পীতমূষ্মাণং নিরুণদ্ধি চ||৫৩|| ক্ষামক্ষীণকৃশাঙ্গানামেতান্যেব ঘৃতানি তু| ত্বক্ক্ষীরীশর্করালাজচূর্ণৈঃ স্ত্যানানি যোজযেত্||৫৪|| সর্পির্গুডান্ সমধ্বংশাঞ্জগ্ধ্বা চানু পযঃ পিবেত্| রেতো বীর্যং বলং পুষ্টিং তৈরাশুতরমাপ্নুযাত্||৫৫|| ইতি সর্পির্গুডাঃ|

ঘৃতং ত্বিত্যাদিনা লেহযোগ্যানি যানি শর্করাদিযোগাদ্ঘৃতান্যুক্তানি তানি পিত্তে লেহ্যতযা কর্তব্যানি, যানি তু শর্করাদিরহিতত্বেন পানযোগ্যানি তানি বাতে কর্তব্যানীতি দর্শযতি; কিংবা স্ত্যানাবস্থাযোগীনি উপযোগাল্লেহ্যতযা পিত্তে প্রযোক্তব্যানি, তান্যেব বিলীনাবস্থামাপন্নানি বাযৌ প্রযোক্তব্যানি| ঘৃতলেহস্য ঘৃতপানস্য চ পৃথক্ ফলমাহ- নির্বাপযেদিত্যাদি| অল্পত্বাদিতি লেহত্বেনৈবাল্পত্বাত্, লেহস্য কর্ষমানত্বেনোক্তত্বাত্| আক্রমতীতি জযতি| নিরুণদ্ধীতি প্রতিহন্তি; ‘ন রুণদ্ধি’ ইতি কেচিত্ পঠন্তি| ক্ষামেত্যাদৌ ক্ষামঃ ক্লান্তদেহঃ, ক্ষীণঃ দুর্বলঃ, কৃশঃ হীনমাংসঃ| ত্বক্ক্ষীর্যাদীনাং তাবন্মানং জ্ঞেযং যাবতা ঘৃতস্য স্ত্যানত্বম্| সমধ্বংশানিত্যনেন মধুনঃ ত্বক্ক্ষীর্যাদিসমানতামাহ||৫০-৫৫||

Adhikarana 15 (56-61) · Śloka 61

বলা বিদারী হ্রস্বা চ পঞ্চমূলী পুনর্নবা| পঞ্চানাং ক্ষীরিবৃক্ষাণাং শুঙ্গা মুষ্ট্যংশকা অপি||৫৬|| এষাং কষাযে দ্বিক্ষীরে বিদার্যাজরসাংশিকে| জীবনীযৈঃ পচেত্ কল্কৈরক্ষমাত্রৈর্ঘৃতাঢকম্||৫৭|| সিতাপলানি পূতে চ শীতে দ্বাত্রিংশতং ক্ষিপেত্| গোধূমপিপ্পলীবাংশীচূর্ণং শৃঙ্গাটকস্য চ||৫৮|| সমাক্ষিকং কৌডবিকং তত্ সর্বং খজমূর্চ্ছিতম্| স্ত্যানং সর্পির্গুডান্ কৃত্বা ভূর্জপত্রেণ বেষ্টযেত্||৫৯|| তাঞ্জগ্ধ্বা পলিকান্ ক্ষীরং মদ্যং বাঽনুপিবেত্ কফে| শোষে কাসে ক্ষতে ক্ষীণে শ্রমস্ত্রীভারকর্শিতে||৬০|| রক্তনিষ্ঠীবনে তাপে পীনসে চোরসি স্থিতে| শস্তাঃ পার্শ্বশিরঃশূলে ভেদে চ স্বরবর্ণযোঃ||৬১|| ইতি দ্বিতীযসর্পির্গুডাঃ|

বলেত্যাদি| ক্ষীরিবৃক্ষা বটোদুম্বরাশ্বত্থপ্লক্ষকপীতনাঃ| উক্তং চ শালাক্যে “উদুম্বরো বটোঽশ্বত্থো মধূকঃ প্লক্ষ এব চ| পঞ্চৈতে ক্ষীরিণো বৃক্ষা অস্মিংস্তন্ত্রে প্রকীর্তিতাঃ” ইতি| মুষ্ট্যংশকা ইতি পলমানাঃ| অত্র চ বলাদীনাং ত্রযোদশপলোপনীতানামষ্টগুণে জলে ক্বাথশ্চতুর্থাংশাবশেষ ইতি ষড্বিংশতিক্বাথপলানি, এতত্কষাযাদ্বিগুণং ক্ষীরং, বিদারীরসশ্ছাগমাংসরসশ্চ কষাযসমঃ; এবং ত্রিংশত্পলাধিকং পলশতমিহ ঘৃতাঢকে পক্তব্যং ভবতি| অন্যে তু ক্বাথ্যাত্ ষোডশগুণজলদানপরিভাষযা সাধিতে ক্বাথে দ্বিপঞ্চাশত্ক্বাথপলান্যাহুঃ; এতদনুসারেণ ক্ষীরাদিমানমপ্যধিকং ভবতীত্যাহুঃ| কিন্তু ক্বাথত্রযোদশপলেঽত্র পানীযং তথা পক্তব্যং যথা ঘৃতসমঃ ক্বাথো ভবতি| ক্বাথো হ্যত্র চতুর্গুণদ্রবসাধ্যে ঘৃতে স্নেহসম এব ভবতি| এতত্ক্বাথদ্বিগুণং ক্ষীরং সমশ্চ বিদারীরসশ্ছাগমাংসরসশ্চ দেযঃ; কিংবা বিদার্যাজমাংসরসযোর্মিলিত্বা দ্ব্যাঢকাংশো দেযঃ| উক্তং হি জতূকর্ণে- “বৃশ্চীবং পঞ্চমূলং বলাং বিদারীং বটাদিশুঙ্গাংশ্চ| নিষ্ক্বাথ্য দ্বিক্ষীরে ছাগবিদারীরসে চ সমে| জীবনীযগণকল্কৈঃ পক্ত্বা ঘৃতাঢকং” ইতি| অত্র হি ক্বাথ্যদ্রব্যমানমনিযতমিতি বিশেষঃ, ক্বাথস্তু স্নেহসম এব| খজঃ মন্থানদণ্ডঃ, দশাঙ্গুলো বা হস্তঃ| ভূর্জপত্রবেষ্টনং চ শক্ত্যুত্কর্ষার্থম্||৫৬-৬১||

Adhikarana 16 (62-65) · Śloka 65

ত্বক্ক্ষীরীশ্রাবণীদ্রাক্ষামূর্বর্ষভকজীবকৈঃ| বীরর্ধিক্ষীরকাকোলীবৃহতীকপিকচ্ছুভিঃ||৬২|| খর্জূরফলমেদাভিঃ ক্ষীরপিষ্টৈঃ পলোন্মিতৈঃ| ধাত্রীবিদারীক্ষুরসপ্রস্থৈঃ প্রস্থং ঘৃতাত্ পচেত্||৬৩|| শর্করার্ধতুলাং শীতে ক্ষৌদ্রার্ধপ্রস্থমেব চ| দত্ত্বা সর্পির্গুডান্ কুর্যাত্কাসহিক্কাজ্বরাপহান্||৬৪|| যক্ষ্মাণং তমকং শ্বাসং রক্তপিত্তং হলীমকম্| শুক্রনিদ্রাক্ষযং তৃষ্ণাং হন্যুঃ কার্শ্যং সকামলম্||৬৫|| ইতি তৃতীযাঃ সর্পির্গুডাঃ|

ত্বক্ক্ষীরীত্যাদৌ শ্রাবণী মুণ্ডিতিকা, বীরা বিদারীকন্দঃ||৬২-৬৫||

Adhikarana 17 (66-69) · Śloka 69

নবমামলকং দ্রাক্ষামাত্মগুপ্তাং পুনর্নবাম্| শতাবরীং বিদারীং চ সমঙ্গাং পিপ্পলীং তথা||৬৬|| পৃথগ্দশপলান্ ভাগান্ পলান্যষ্টৌ চ নাগরাত্| যষ্ট্যাহ্বসৌবর্চলযোর্দ্বিপলং মরিচস্য চ||৬৭|| ক্ষীরতৈলঘৃতানাং চ ত্র্যাঢকে শর্করাশতে| ক্বথিতে তানি চূর্ণানি দত্ত্বা বিল্বসমান্ গুডান্||৬৮|| কুর্যাত্তান্ ভক্ষযেত্ ক্ষীণঃ ক্ষতঃ শুষ্কশ্চ মানবঃ| তেন সদ্যো রসাদীনাং বৃদ্ধ্যা পুষ্টিং স বিন্দতি||৬৯|| ইতি চতুর্থসর্পির্গুডাঃ|

দ্রাক্ষামিত্যাদৌ যষ্ট্যাহ্বসৌবর্চলযোর্মিলিত্বা দ্বিপলম্| মরিচস্য ‘দ্বিপলং’ ইতি শেষঃ| উক্তং হি জতূকর্ণে- “ঘৃততৈলপযস্ত্র্যাঢকে সিতাং চ তুলাং প্রপাচ্য দ্রাক্ষাবিদারীবৃশ্চীবশতাবরীকৃষ্ণাশুণ্ঠীবলাধাত্রীশ্চ দশপলিকাঃ প্রপাচযেত্, যষ্ট্যাহ্বং রুচকং চ পলিকম্” ইত্যাদি| ক্বথিত ইতি ভাষযা ক্ষীণে এব ক্ষীরে চূর্ণপ্রক্ষেপং দর্শযতি||৬৬-৬৯||

Adhikarana 18 (70-77) · Śloka 77

গোক্ষীরার্ধাঢকং সর্পিঃ প্রস্থমিক্ষুরসাঢকম্| বিদার্যাঃ স্বরসাত্প্রস্থং রসাত্প্রস্থং চ তৈত্তিরাত্||৭০|| দদ্যাত্ সিধ্যতি তস্মিংস্তু পিষ্টানিক্ষুরসৈরিমান্| মধূকপুষ্পকুডবং প্রিযালকুডবং তথা||৭১|| কুডবার্ধং তুগাক্ষীর্যাঃ খর্জূরাণাং চ বিংশতিম্| পৃথগ্বিভীতকানাং চ পিপ্পল্যাশ্চ চতুর্থিকাম্||৭২|| ত্রিংশত্পলানি খণ্ডাচ্চ মধুকাত্ কর্ষমেব চ| তথাঽর্ধপলিকান্যত্র জীবনীযানি দাপযেত্||৭৩|| সিদ্ধেঽস্মিন্ কুডবং ক্ষৌদ্রং শীতে ক্ষিপ্ত্বাঽথ মোদকান্| কারযেন্মরিচাজাজীপলচূর্ণাবচূর্ণিতান্||৭৪|| বাতাসৃক্পিত্তরোগেষু ক্ষতকাসক্ষযেষু চ| শুষ্যতাং ক্ষীণশুক্রাণাং রক্তে চোরসি সংস্থিতে||৭৫|| কৃশদুর্বলবৃদ্ধানাং পুষ্টিবর্ণবলার্থিনাম্| যোনিদোষকৃতস্রাবহতানাং চাপি যোষিতাম্||৭৬|| গর্ভার্থিনীনাং গর্ভশ্চ স্রবেদ্যাসাং ম্রিযেত বা| ধন্যা বল্যা হিতাস্তাভ্যঃ শুক্রশোণিতবর্ধনাঃ||৭৭|| ইতি পঞ্চমসর্পির্মোদকাঃ|

গোক্ষীরেত্যাদৌ গোক্ষীরং কারণতযোচ্যতে ন ঘৃতপাকার্থং, তথাহি সতি প্রক্ষেপ্যচূর্ণেন মোদকা ন ভবেযুঃ| চতুর্থিকাং পলম্||৭০-৭৭||

Adhikarana 19 (78-84) · Śloka 84

বস্তিদেশে বিকুর্বাণে স্ত্রীপ্রসক্তস্য মারুতে| বাতঘ্নান্ বৃংহণান্ বৃষ্যান্ যোগাংস্তস্য প্রযোজযেত্||৭৮|| শর্করাপিপ্পলীচূর্ণৈঃ সর্পিষা মাক্ষিকেণ চ| সংযুক্তং বা শৃতং ক্ষীরং পিবেত্ কাসজ্বরাপহম্||৭৯|| ফলাম্লং সর্পিষা ভৃষ্টং বিদারীক্ষুরসে শৃতম্| স্ত্রীষু ক্ষীণঃ পিবেদ্যূষং জীবনং বৃংহণং পরম্||৮০|| সক্তূনাং বস্ত্রপূতানাং মন্থং ক্ষৌদ্রঘৃতান্বিতম্| যবান্নসাত্ম্যো দীপ্তাগ্নিঃ ক্ষতক্ষীণঃ পিবেন্নরঃ||৮১|| জীবনীযোপসিদ্ধং বা জাঙ্গলং ঘৃতভর্জিতম্| রসং প্রযোজযেত্ ক্ষীণে ব্যঞ্জনার্থং সশর্করম্||৮২|| গোমহিষ্যশ্বনাগাজৈঃ ক্ষীরৈর্মাংসরসৈস্তথা| যবান্নং ভোজযেদ্যূষৈঃ ফলাম্লৈর্ঘৃতসংস্কৃতৈঃ||৮৩|| দীপ্তেঽগ্নৌ বিধিরেষঃ স্যান্মন্দে দীপনপাচনঃ| যক্ষ্মিণাং বিহিতো গ্রাহী ভিন্নে শকৃতি চেষ্যতে||৮৪||

বিকুর্বাণে ইতি শূলাদিবিকারং কুর্বাণে| শর্করেত্যাদৌ প্রক্ষেপন্যাযেন ক্ষীরে শর্করাদিপ্রক্ষেপঃ| বস্ত্রপূতানামিতি বস্ত্রান্তরালপতিতানাম্| মন্দেঽগ্নৌ যক্ষ্মিণাং যো বিহিতঃ ভিন্নে শকৃতি চ যো গ্রাহী স বিধিরিষ্যত ইতি জ্ঞেযম্||৭৮-৮৪||

Adhikarana 20 (85-87) · Śloka 87

পলিকং সৈন্ধবং শুণ্ঠী দ্বে চ সৌবর্চলাত্ পলে| কুডবাংশানি বৃক্ষাম্লং দাডিমং পত্রমর্জকাত্||৮৫|| একৈকং মরিচাজাজ্যোর্ধান্যকাদ্দ্বে চতুর্থিকে| শর্করাযাঃ পলান্যত্র দশ দ্বে চ প্রদাপযেত্||৮৬|| কৃত্বা চূর্ণমতো মাত্রামন্নপানে প্রযোজযেত্| রোচনং দীপনং বল্যং পার্শ্বার্তিশ্বাসকাসনুত্||৮৭|| ইতি সৈন্ধবাদিচূর্ণম্|

পলিকমিতি পলমানম্||৮৫-৮৭||

Adhikarana 21 (88-90) · Śloka 90

একা ষোডশিকা ধান্যাদ্দ্বে দ্বেঽজাজ্যজমোদযোঃ| তাভ্যাং দাডিমবৃক্ষাম্লং দ্বির্দ্বিঃ সৌবর্চলাত্পলম্||৮৮|| শুণ্ঠ্যাঃ কর্ষং দধিত্থস্য মধ্যাত্ পঞ্চ পলানি চ| তচ্চূর্ণং ষোডশপলে শর্করাযা বিমিশ্রযেত্||৮৯|| ষাডবোঽযং প্রদেযঃ স্যাদন্নপানেষু পূর্ববত্| মন্দানলে শকৃদ্ভেদে যক্ষ্মিণামগ্নিবর্ধনঃ||৯০|| ইতি ষাডবঃ|

ষোডশিকা পলম্| দাডিমবৃক্ষাম্লং দ্বির্দ্বিরিতি পূর্বদ্বিপলাপেক্ষযা দ্বিগুণং প্রত্যেকং চতুঃপলমিতি দর্শযতি| পূর্ববদিত্যনেন পূর্বযোগসমানফলমাহ| অত্র জতূকর্ণঃ- “পলিকে ধান্যকরুচকে দ্বৌ জীরকদীপ্যকৌ শুণ্ঠ্যাশ্চ পলং কপিত্থদাডিমবৃক্ষাম্লানাং কুডবম্” ইত্যাদি||৮৮-৯০||

Adhikarana 22 (91-92) · Śloka 92

পিবেন্নাগবলামূলমর্ধকর্ষবিবর্ধিতম্ | পলং ক্ষীরযুতং মাসং ক্ষীরবৃত্তিরনন্নভুক্||৯১|| এষ প্রযোগঃ পুষ্ট্যাযুর্বলারোগ্যকরঃ পরঃ| মণ্ডূকপর্ণ্যাঃ কল্পোঽযং শুণ্ঠীমধুকযোস্তথা||৯২||

নাগবলেত্যাদৌ অর্ধকর্ষবিবর্ধিতমিতি অর্ধকর্ষেণৈব বর্ধিতং পলং মাসমেকং পেযং কেবলং ক্ষীরবর্তিনা| উক্তং হি জতূকর্ণে- “নাগবলামূলমর্ধকর্ষবৃদ্ধ্যা পলমানং মাসং পেযং ক্ষীরমাত্রবৃত্তিনা” ইতি||৯১-৯২||

Adhikarana 23 (93-94) · Śloka 94

যদ্যত্ সন্তর্পণং শীতমবিদাহি হিতং লঘু| অন্নপানং নিষেব্যং তত্ক্ষতক্ষীণৈঃ সুখার্থিভিঃ||৯৩|| যচ্চোক্তং যক্ষ্মিণাং পথ্যং কাসিনাং রক্তপিত্তিনাম্| তচ্চ কুর্যাদবেক্ষ্যাগ্নিং ব্যাধিং সাত্ম্যং বলং তথা||৯৪||

শীতং চাপি স্পর্শে শান্তিকারি বিদাহি ভবতি, তদর্থমবিদাহীত্যুক্তম্||৯৩-৯৪||

Adhikarana 24 (95) · Śloka 95

উপেক্ষিতে ভবেত্তস্মিন্ননুবন্ধো হি যক্ষ্মণঃ| প্রাগেবাগমনাত্তস্য তস্মাত্তং ত্বরযা জযেত্||৯৫||

ক্ষতক্ষীণস্য ত্বরযা প্রতিকর্তব্যতামাহ- উপেক্ষিতে ইত্যাদি| তস্যেতি যক্ষ্মণঃ||৯৫||

Adhikarana 25 (96-97) · Śloka 97

তত্র শ্লোকৌ- ক্ষতক্ষযসমুত্থানং সামান্যপৃথগাকৃতিম্| অসাধ্যযাপ্যসাধ্যত্বং সাধ্যানাং সিদ্ধিমেব চ||৯৬|| উক্তবাঞ্জ্যেষ্ঠশিষ্যায ক্ষতক্ষীণচিকিত্সিতে| তত্ত্বার্থবিদ্বীতরজস্তমোদোষঃ পুনর্বসুঃ||৯৭||

সঙ্গ্রহে সামান্যপৃথগাকৃতিমিতি ক্ষতোত্থস্য ক্ষযোত্থস্য চ ‘উরো বিরুজ্যত’ ইত্যাদি পৃথগ্লক্ষণং কৃতম্||৯৬-৯৭||

Adhikarana puShpikA · Śloka 11

ইত্যগ্নিবেশকৃতে তন্ত্রেঽপ্রাপ্তে দৃঢবলপূরিতে চিকিত্সিতস্থানে ক্ষতক্ষীণচিকিত্সিতং নামৈকাদশোঽধ্যাযঃ||১১||

ইতি শ্রীচক্রপাণিদত্তকৃতাযাং চরকতাত্পর্যব্যাখ্যাযামাযুর্বেদদীপিকাযাং চিকিত্সাস্থানে ক্ষতক্ষীণচিকিত্সিতং নামৈকাদশোঽধ্যাযঃ||১১||