22. pāṇḍurōgacikitsitam

Adhikarana 1 (1-2) · Śloka 2

অথাতঃ পাণ্ডুরোগচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

গ্রহণীদোষচিকিত্সিতে ক্রিযামাণে তীক্ষ্ণাদিনা পিত্তজননাদ্গ্রহণীচিকিত্সিতানন্তরং পিত্তপ্রধানপাণ্ডুরোগচিকিত্সিতমুচ্যতে| পাণ্ডুনা বক্ষ্যমাণহরিতাদিবর্ণেভ্যঃ প্রধানেন বর্ণেনোপলক্ষিতো রোগঃ পাণ্ডুরোগঃ| উক্তং হি সুশ্রুতে- “সর্বেষু চৈতেষু হি পাণ্ডুভাবো যতোঽধিকোঽতঃ খলু পাণ্ডুরোগঃ” (সু.উ.অ.৪৪) ইতি| কামলা-হলীমকাদিচিকিত্সা চ পাণ্ডুরোগভেদত্বাদেব তেষামিহ বক্তব্যা; কিংবা ‘পাণ্ডুরোগাদীনাং চিকিত্সিতং পাণ্ডুরোগচিকিত্সিতম্’ ইতি পরিগ্রহাত্ কামলাদিচিকিত্সিতমপি প্রতিজ্ঞাতমেব||১-২||

Adhikarana 2 (3) · Śloka 3

পাণ্ডুরোগাঃ স্মৃতাঃ পঞ্চ বাতপিত্তকফৈস্ত্রযঃ| চতুর্থঃ সন্নিপাতেন পঞ্চমো ভক্ষণান্মৃদঃ||৩||

ত্রিশোথীযে যদ্যপি পাণ্ডুরোগঃ পঞ্চসঙ্খ্যাক উক্তস্তথাঽপীহ পুনস্তদনুবাদেন সুশ্রুতোক্তচতুঃসঙ্খ্যাত্বং নিষেধযতি| উক্তং হি সুশ্রুতে- “পাণ্ড্বামযোঽষ্টার্ধবিধঃ প্রদিষ্টঃ পৃথক্সমস্তৈর্যুগপঞ্চ দোষৈঃ” (সু.উ.অ.৪৪) ইতি| তত্র হি মৃদ্ভক্ষণজঃ সন্নিপাতজে এবাবরুদ্ধঃ||৩||

Adhikarana 3 (4-6) · Śloka 6

দোষাঃ পিত্তপ্রধানাস্তু যস্য কুপ্যন্তি ধাতুষু| শৈথিল্যং তস্য ধাতূনাং গৌরবং চোপজাযতে||৪|| ততো বর্ণবলস্নেহা যে চান্যেঽপ্যোজসো গুণাঃ| ব্রজন্তি ক্ষযমত্যর্থং দোষদূষ্যপ্রদূষণাত্||৫|| সোঽল্পরক্তোঽল্পমেদস্কো নিঃসারঃ শিথিলেন্দ্রিযঃ| বৈবর্ণ্যং ভজতে, তস্য হেতুং শৃণু সলক্ষণম্||৬||

দোষা ইত্যাদিনা সম্প্রাপ্তিমাহ| পিত্তং প্রধানং যযোস্তে পিত্তপ্রধানাঃ; বহুবচনং চ ব্যক্তিবহুত্বাপেক্ষযা, নতু পারমার্থিকম্| গৌরবং ক্রিযাস্বসামর্থ্যাত্; গৌরবং পাণ্ডুরোগিণো নিঃসারধাতুত্বাদিতি ব্রুবতে| ওজসো গুণা ইতি ওজসো রক্তধাতুরূপস্য যে গুণাঃ; কিংবা ওজস এব যে দশগুণাঃ ক্ষীরসমানা উক্তাস্তে জ্ঞেযাঃ| ওজসঃ ক্ষযেনৈব স্নেহক্ষযে লব্ধে পুনঃ স্নেহক্ষযাভিধানং বিশেষক্ষযাভিধানার্থম্| দোষৈর্দূষ্যাণাং প্রকৃষ্টাদ্দূষণাদিতি দোষদূষ্যপ্রদূষণাত্| নিঃসারঃ অপগতধাতুসারঃ; “অষ্টৌ সারাঃ” (বি.অ.৮) ইত্যাদিনা প্রোক্তসারবিরহিত ইত্যর্থঃ| শিথিলেন্দ্রিযঃ দুর্বলেন্দ্রিযঃ| স ইতি পুমান্| যদ্যপি রক্তপিত্তযোরেকযোনিত্বাত্ পিত্তেনেহ রক্তবৃদ্ধির্ভাব্যা, তথাঽপীহ রক্তক্ষযো রক্তপোষকরসস্য পিত্তেন ক্ষপণাদ্ রক্তপোষকসারভাগানুত্পাদাচ্চ| যদ্যপি পিত্তং তেজোরূপতযা বর্ণকরমিহোচ্যতে, যদুক্তং- “তেজোধাতুরপ্যুদকান্তরীক্ষধাতুপ্রাযোঽবদাতবর্ণকরঃ” (শা.অ.৮) ইতি, তথাঽপি বিকৃতত্বাত্ পিত্তমিহ বিকৃতবর্ণকৃদেব ভবতি||৪-৬||

Adhikarana 4 (7-11) · Śloka 12

ক্ষারাম্ললবণাত্যুষ্ণবিরুদ্ধাসাত্ম্যভোজনাত্| নিষ্পাবমাষপিণ্যাকতিলতৈলনিষেবণাত্||৭|| বিদগ্ধেঽন্নে দিবাস্বপ্নাদ্ব্যাযামান্মৈথুনাত্তথা| প্রতিকর্মর্তুবৈষম্যাদ্বেগানাং চ বিধারণাত্||৮|| কামচিন্তাভযক্রোধশোকোপহতচেতসঃ| সমুদীর্ণং যদা পিত্তং হৃদযে সমবস্থিতম্||৯|| বাযুনা বলিনা ক্ষিপ্তং সম্প্রাপ্য ধমনীর্দশ| প্রপন্নং কেবলং দেহং ত্বঙ্মাংসান্তরমাশ্রিতম্||১০|| প্রদূষ্য কফবাতাসৃক্ত্বঙ্মাংসানি করোতি তত্| পাণ্ডুহারিদ্রহরিতান্ বর্ণান্ বহুবিধাংস্ত্বচি||১১|| স পাণ্ডুরোগ ইত্যুক্তঃ ...|১২|

ক্ষারেত্যাদিনা সমানং হেতুমাহ| নিষ্পাবঃ শিম্বঃ| ব্যাযামমৈথুনে বিদগ্ধেঽন্নে এব ক্রিযমাণে রোগহেতুনী| প্রতিকর্মণাং বমনাদীনামৃতূনাং চ বৈষম্যং প্রতিকর্মর্তুবৈষম্যম্| ধমনীর্দশ ইতি হৃদযাশ্রিতা দশ ধমনীঃ| কেবলমিতি কৃত্স্নম্| ‘প্রদূষ্য কফবাতাসৃক্’ ইতি পাঠে বিক্ষিপ্তস্য বাযোঃ পিত্তেন দূষণং, যদা তু ‘কফপিত্তাসৃক্’ ইতি পাঠস্তদা পিত্তেন হৃদযস্থেন স্থানান্তরস্থস্য পিত্তস্য দুষ্টির্জেযা| সমুদীর্ণমিত্যাদিনা চেযং সম্প্রাপ্তিঃ পূর্বোক্তসামান্যসম্প্রাপ্তেরেব প্রপঞ্চঃ||৭-১১||-

Adhikarana 5 (12) · Śloka 12

... তস্য লিঙ্গং ভবিষ্যতঃ| হৃদযস্পন্দনং রৌক্ষ্যং স্বেদাভাবঃ শ্রমস্তথা||১২||

তস্যেত্যাদিনা পূর্বরূপমাহ| ‘স্বেদাবাধঃ’ ইতি কেচিত্ পঠন্তি||১২||

Adhikarana 6 (13-16) · Śloka 16

সম্ভূতেঽস্মিন্ ভবেত্ সর্বঃ কর্ণক্ষ্বেডী হতানলঃ| দুর্বলঃ সদনোঽন্নদ্বিট্ শ্রমভ্রমনিপীডিতঃ||১৩|| গাত্রশূলজ্বরশ্বাসগৌরবারুচিমান্নরঃ| মৃদিতৈরিব গাত্রৈশ্চ পীডিতোন্মথিতৈরিব||১৪|| শূনাক্ষিকূটো হরিতঃ শীর্ণলোমা হতপ্রভঃ| কোপনঃ শিশিরদ্বেষী নিদ্রালুঃ ষ্ঠীবনোঽল্পবাক্||১৫|| পিণ্ডিকোদ্বেষ্টকট্যূরুপাদরুক্সদনানি চ| ভবন্ত্যারোহণাযাসৈর্বিশেষশ্চাস্য বক্ষ্যতে||১৬||

সম্ভূতেঽস্মিন্নিতি উত্পন্নে পাণ্ডুরোগে| কর্ণক্ষ্বেডীত্যাদি সামান্যং লক্ষণং; কর্ণক্ষ্বেডী কর্ণনাদবান্| অন্নদ্বিডিত্যনেন অন্নাগ্রহ উচ্যতে, অরুচিমানিত্যনেন প্রার্থিতান্নভক্ষণাসামর্থ্যমুচ্যতে| শিশিরদ্বেষীতি শীতদ্বেষী; শিশিরদ্বেষিতা চ পিত্তরোগেঽপ্যস্মিন্ রোগমহিম্না ভবতি| পিণ্ডিকোদ্বেষ্টনং পিণ্ডিকাপীডা| আরোহণেনাযাসৈরিতি কেচিদ্বিভাগং বর্ণযন্তি| বিশেষশ্চাস্য বক্ষ্যতে ইতি পাণ্ডুরোগস্য বাতজত্বাদিবিশেষগতো হেতুলিঙ্গবিশেষো বক্ষ্যত ইত্যর্থঃ||১৩-১৬||

Adhikarana 7 (17-18) · Śloka 18

আহারৈরুপচারৈশ্চ বাতলৈঃ কুপিতোঽনিলঃ| জনযেত্কৃষ্ণপাণ্ডুত্বং তথা রূক্ষারুণাঙ্গতাম্||১৭|| অঙ্গমর্দং রুজং তোদং কম্পং পার্শ্বশিরোরুজম্| বর্চঃশোষাস্যবৈরস্যশোফানাহবলক্ষযান্||১৮||

আহারৈরিত্যাদিনা বাতজস্য হেতুলক্ষণে প্রাহ| সামান্যলক্ষণানি সর্বত্র ভবন্তি, বিশেষলক্ষণৈস্তু বিশেষাবগতিঃ||১৭-১৮||

Adhikarana 8 (19-22) · Śloka 22

পিত্তলস্যাচিতং পিত্তং যথোক্তৈঃ স্বৈঃ প্রকোপণৈঃ| দূষযিত্বা তু রক্তাদীন্ পাণ্ডুরোগায কল্পতে||১৯|| স পীতো হরিতাভো বা জ্বরদাহসমন্বিতঃ| তৃষ্ণামূর্চ্ছাপিপাসার্তঃ পীতমূত্রশকৃন্নরঃ||২০|| স্বেদনঃ শীতকামশ্চ ন চান্নমভিনন্দতি| কটুকাস্যো ন চাস্যোষ্ণমুপশেতেঽম্লমেব চ||২১|| উদ্গারোঽম্লো বিদাহশ্চ বিদগ্ধেঽন্নেঽস্য জাযতে| দৌর্গন্ধ্যং ভিন্নবর্চস্ত্বং দৌর্বল্যং তম এব চ||২২||

পিত্তলস্যেত্যাদিনা পৈত্তিকমাহ| সর্বোঽপি পাণ্ডুরোগঃ পিত্তজঃ, তথাঽপ্যযং বিশেষেণ দোষান্তরাসম্পৃক্তপ্রবলপিত্তজন্যত্বাত্ পৈত্তিক ইত্যুচ্যতে; যথা পৈত্তিকং রক্তপিত্তম্; অত এবাত্র পিত্তাতিপ্রবলতোপদর্শনার্থং পিত্তলস্যেত্যনেন পিত্তপ্রকৃতিতাঽপি কারণত্বেনোক্তা, নান্যত্র ‘বাতলস্য, শ্লেষ্মলস্য’ ইতি বা কৃতম্| যথোক্তৈরিতি যো হ্যম্লেত্যাদিনোক্তৈরিহৈব| রক্তাদীনিতি রক্তপ্রকারান্, তেন বলবাতাদীনামপি গ্রহণম্| তৃষ্ণামূর্চ্ছাপিপাসার্ত ইত্যত্র তৃষ্ণানিমিত্তা মূর্চ্ছা তৃষ্ণামূর্চ্ছা, তেন পিপাসযা সমং ন পৌনরুক্ত্যম্; অন্যে তু তৃষ্ণামিহ ক্ষুধামাহুঃ, কেচিত্ ‘তৃষ্ণামূর্চ্ছাপরীতস্য’ ইতি পঠন্তি||১৯-২২||

Adhikarana 9 (23-25) · Śloka 25

বিবৃদ্ধঃ শ্লেষ্মলৈঃ শ্লেষ্মা পাণ্ডুরোগং স পূর্ববত্| করোতি গৌরবং তন্দ্রা ছর্দিং শ্বেতাবভাসতাম্||২৩|| প্রসেকং লোমহর্ষং চ সাদং মূর্চ্ছাং ভ্রমং ক্লমম্| শ্বাসং কাসং তথাঽঽলস্যমরুচিং বাক্স্বরগ্রহম্||২৪|| শুক্লমূত্রাক্ষিবর্চস্ত্বং কটুরূক্ষোষ্ণকামতাম্| শ্বযথুং মধুরাস্যত্বমিতি পাণ্ড্বামযঃ কফাত্||২৫||

বিবৃদ্ধ ইত্যাদিনা কফজমাহ| পূর্ববদিতি রক্তাদীন্ সন্দূষ্য||২৩-২৫||

Adhikarana 10 (26) · Śloka 26

সর্বান্নসেবিনঃ সর্বে দুষ্টা দোষাস্ত্রিদোষজম্| ত্রিদোষলিঙ্গং কুর্বন্তি পাণ্ডুরোগং সুদুঃসহম্||২৬||

সর্বান্নেত্যাদিনা সান্নিপাতিকং ব্যাকরোতি| ত্রিদোষলিঙ্গমিতি প্রত্যেকদোষলিঙ্গসমুদাযযুক্তম্||২৬||

Adhikarana 11 (27-30) · Śloka 30

মৃত্তিকাদনশীলস্য কুপ্যত্যন্যতমো মলঃ| কষাযা মারুতং, পিত্তমূষরা, মধুরা কফম্||২৭|| কোপযেন্মৃদ্রসাদীংশ্চ রৌক্ষ্যাদ্ভুক্তং বিরূক্ষযেত্ | পূরযত্যবিপক্বৈব স্রোতাংসি নিরুণদ্ধি চ||২৮|| ইন্দ্রিযাণাং বলং হত্বা তেজো বীর্যৌজসী তথা| পাণ্ডুরোগং করোত্যাশু বলবর্ণাগ্নিনাশনম্||২৯|| শূনগণ্ডাক্ষিকূটভ্রূঃ শূনপান্নাভিমেহনঃ| ক্রিমিকোষ্ঠোঽতিসার্যেত মলং সাসৃক্ কফান্বিতম্||৩০||

মৃত্তিকেত্যাদিনা মৃদ্ভক্ষণজমাহ| অত্র চ দোষসম্বন্ধে সত্যপি মৃদেব ব্যপদেশিকা ন দোষাঃ, তস্যা এব চিকিত্সাভেদলিঙ্গভেদকর্তৃত্বাত্| কষাযা মারুতমিত্যাদিনা মৃদোঽপি বাতাদিগতলিঙ্গং দর্শযতি| ঊষরেতি ক্ষারানুরসা| রসাদীন্ ভুক্তং চ বিরূক্ষযেদিতি যোজ্যম্| অবিপক্বৈবেতি স্বরূপাবস্থিতৈব কেবলং স্রোতাংসি পূরযতি রুণদ্ধি চ; স্রোতোবিরোধেন রসাদীনাং ন সম্যগ্বলং ভবতি| বলবর্ণাগ্নিনাশনমিত্যনেন বলাদিহানিং দর্শযতি||২৭-৩০||

Adhikarana 12 (31-33) · Śloka 33

পাণ্ডুরোগশ্চিরোত্পন্নঃ খরীভূতো ন সিধ্যতি| কালপ্রকর্ষাচ্ছূনো না যশ্চ পীতানি পশ্যতি||৩১|| বদ্ধাল্পবিট্কং সকফং হরিতং যোঽতিসার্যতে| দীনঃ শ্বেতাতিদিগ্ধাঙ্গশ্ছর্দিমূর্চ্ছাতৃষার্দিতঃ||৩২|| স নাস্ত্যসৃক্ক্ষযাদ্যশ্চ পাণ্ডুঃ শ্বেতত্বমাপ্নুযাত্| ইতি পঞ্চবিধস্যোক্তং পাণ্ডুরোগস্য লক্ষণম্||৩৩||

পাণ্ডুরোগ ইত্যাদিনাঽসাধ্যলক্ষণমাহ| খরীভূত ইতি অত্যর্থরূক্ষঃ| কালেত্যাদিনাঽপরমসাধ্যলক্ষণম্| শ্বেতাতিদিগ্ধাঙ্গ ইতি শ্বেতবর্ণলিপ্তাঙ্গ ইত্যর্থঃ||৩১-৩৩||

Adhikarana 13 (34-38) · Śloka 39

পাণ্ডুরোগী তু যোঽত্যর্থং পিত্তলানি নিষেবতে| তস্য পিত্তমসৃগ্মাংসং দগ্ধ্বা রোগায কল্পতে||৩৪|| হারিদ্রনেত্রঃ স ভৃশং হারিদ্রত্বঙ্নখাননঃ| রক্তপীতশকৃন্মূত্রো ভেকবর্ণো হতেন্দ্রিযঃ||৩৫|| দাহাবিপাকদৌর্বল্যসদনারুচিকর্ষিতঃ| কামলা বহুপিত্তৈষা কোষ্ঠশাখাশ্রযা মতা||৩৬|| কালান্তরাত্ খরীভূতা কৃচ্ছ্রা স্যাত্ কুম্ভকামলা| কৃষ্ণপীতশকৃন্মূত্রো ভৃশং শূনশ্চ মানবঃ||৩৭|| সরক্তাক্ষিমুখচ্ছর্দিবিণ্মূত্রো যশ্চ তাম্যতি| দাহারুচিতৃষানাহতন্দ্রামোহসমন্বিতঃ||৩৮|| নষ্টাগ্নিসঞ্জ্ঞঃ ক্ষিপ্রং হি কামলাবান্ বিপদ্যতে|৩৯|

পাণ্ডুরোগীত্যাদিনা কামলামাহ| পাণ্ডুরোগীতি বচনাত্ পাণ্ডুরোগস্যৈব হেতুবিশেষেণ কামলাদিরূপাঽবস্থা উত্পদ্যতে; অত এব চ হারীতে কামলাদীনামপি পাণ্ডুরোগত্বমেবোক্তম্| বচনং হি- “বাতেন পিত্তেন কফেন চৈব ত্রিদোষমৃদ্ভক্ষণসম্ভবে চ| দ্বে কামলে চৈব হলীমকশ্চ স্মৃতোঽষ্টধৈবং খলু পাণ্ডুরোগঃ” ইতি; অন্যা তু সুশ্রুতোক্তা কামলা ভিন্না ভবতি, “যো হ্যামযান্তে সহসাঽম্লমন্নমদ্যাদপথ্যান্যপি তস্য পিত্তম্| করোতি পাণ্ডুং বদনং বিশেষাত্ পূর্বেরিতৌ তন্দ্রিবলক্ষযৌ চ” (সু. উ. অ. ৪৪) ইত্যাদিনা পৃথক্কামলাহেতুরুক্তঃ; বাগ্ভটেঽপি- “ভবেত্ পিত্তোল্বণস্যাসৌ পাণ্ডুরোগাদৃতেঽপি চ” (বা. নি. অ. ১৩) ইতি; ইহ তু পাণ্ডুরোগেঽপি ভবেত্ পাণ্ডুরোগাদ্বিনাঽপি ভবেত্, যথা প্রমেহাশ্রিতাঃ পিডিকাঃ প্রমেহেষু ভবন্তি বিনা প্রমেহমপি ভবন্তি; তথা পাণ্ডুরোগিণোঽপ্যুক্তা কামলা পৃথগপি ভবতি| কোষ্ঠশাখাশ্রযা বহুপিত্তা পাণ্ডুরোগপূর্বিকা ভবতি, যা তু কেবলং শাখাশ্রযা অল্পপিত্তা চ বক্তব্যা সা স্বতন্ত্রাঽপি ভবতীতি কেচিত্, অত এব তস্যা রূক্ষশীতেত্যাদিনা পৃথগেব হেতুং লিঙ্গং চাধ্যাযশেষে বক্ষ্যতি| বহুপিত্তেত্যনেন কেবলং শাখাশ্রযাযা অল্পপিত্তত্বং সূচযতি; অম্লকটুতীক্ষ্ণোপযোগং শাখাশ্রযিপিত্তস্য কোষ্ঠানযনার্থং বক্ষ্যতি| খরীভূতেতি কঠোরতামুপগতা| কুম্ভকামলেতি অবস্থাভেদেন কোষ্ঠগতকামলাযাঃ সঞ্জ্ঞা; কুম্ভঃ কোষ্ঠঃ, তদাশ্রযা কামলা কুম্ভকামলা| অস্যাং চ শোথোঽপি লক্ষণং ভবতি| উক্তং হি সুশ্রুতে- “ভেদস্তু তস্যাঃ খলু কুম্ভসাহ্বঃ শোথো মহাংস্তত্র চ পর্বভেদঃ” (সু. উ. অ. ৪৪) ইতি||৩৪-৩৮||-

Adhikarana 14 (39-43) · Śloka 43

সাধ্যানামিতরেষাং তু প্রবক্ষ্যামি চিকিত্সিতম্||৩৯|| তত্র পাণ্ড্বামযী স্নিগ্ধস্তীক্ষ্ণৈরূর্ধ্বানুলোমিকৈঃ| সংশোধ্যো মৃদুভিস্তিক্তৈঃ কামলী তু বিরেচনৈঃ||৪০|| তাভ্যাং সংশুদ্ধকোষ্ঠাভ্যাং পথ্যান্যন্নানি দাপযেত্| শালীন্ সযবগোধূমান্ পুরাণান্ যূষসংহিতান্||৪১|| মুদ্গাঢকীমসূরৈশ্চ জাঙ্গলৈশ্চ রসৈর্হিতৈঃ| যথাদোষং বিশিষ্টং চ তযোর্ভৈষজ্যমাচরেত্||৪২|| পঞ্চগব্যং মহাতিক্তং কল্যাণকমথাপি বা| স্নেহনার্থং ঘৃতং দদ্যাত্ কামলাপাণ্ডুরোগিণে||৪৩||

তত্রেত্যাদিনা চিকিত্সামাহ| ঊর্ধ্বানুলোমিকৈরিত্যনেন ঊর্ধ্বহরানুলোমনবমনবিরেচনযোরপি গ্রহণমুক্তং; যতঃ পাণ্ডুরোগেঽপি “কফপাণ্ডুস্তু গোমূত্রক্লিন্নযুক্তাং হরীতকীম্” ইত্যাদিনা বিরেচনং বক্ষ্যতি| তাভ্যামিতি পাণ্ডুরোগকামলাভ্যাম্| ‘তাভ্যাং সংশুদ্ধকোষ্ঠায’ ইতি পাঠপক্ষে তাভ্যামিতি বমনবিরেচনাভ্যাম্| বিশিষ্টমিত্যাদি বিশিষ্টভৈষজ্যমিহৈব কামলাযাং পাণ্ডুরোগে চ বক্ষ্যমাণং জ্ঞেযম্||৩৯-৪৩||

Adhikarana 15 (44-49) · Śloka 49

দাডিমাত্ কুডবো ধান্যাত্ কুডবার্ধং পলং পলম্| চিত্রকাচ্ছৃঙ্গবেরাচ্চ পিপ্পল্যষ্টমিকা তথা||৪৪|| তৈঃ কল্কৈর্বিংশতিপলং ঘৃতস্য সলিলাঢকে| সিদ্ধং হৃত্পাণ্ডুগুল্মার্শঃপ্লীহবাতকফার্তিনুত্||৪৫|| দীপনং শ্বাসকাসঘ্নং মূঢবাতে চ শস্যতে| দুঃখপ্রসবিনীনাং চ বন্ধ্যানাং চৈব গর্ভদম্||৪৬|| ইতি দাডিমাদ্যং ঘৃতম্| কটুকা রোহিণী মুস্তং হরিদ্রে বত্সকাত্ পলম্| পটোলং চন্দনং মূর্বা ত্রাযমাণা দুরালভা||৪৭|| কৃষ্ণা পর্পটকো নিম্বো ভূনিম্বো দেবদারু চ| তৈঃ কার্ষিকৈর্ঘৃতপ্রস্থঃ সিদ্ধঃ ক্ষীরচতুর্গুণঃ||৪৮|| রক্তপিত্তং জ্বরং দাহং শ্বযথুং স ভগন্দরম্| অর্শাংস্যসৃগ্দরং চৈব হন্তি বিস্ফোটকাংস্তথা||৪৯|| ইতি কটুকাদ্যং ঘৃতম্|

দাডিমেত্যাদৌ অষ্টমিকা দ্বিকর্ষমুক্তম্| উক্তং হি- “দ্বে সুবর্ণে পলার্ধং স্যাচ্ছুক্তিরষ্টমিকাঽপি চ” (ক.অ.১২) ইতি||৪৪-৪৯||

Adhikarana 16 (50) · Śloka 50

পথ্যাশতরসে পথ্যাবৃন্তার্ধশতকল্কবান্| প্রস্থঃ সিদ্ধো ঘৃতাত্ পেযঃ স পাণ্ড্বামযগুল্মনুত্||৫০|| ইতি পথ্যাঘৃতম্|

পথ্যাশতেন ক্বাথঃ কর্তব্যঃ; অত্র চ তথা ক্বাথার্থং জলং দেযং যথা চতুর্ভাগাবশিষ্টং সদ্ঘৃতচতুর্গুণং ভবতি; অত এব দ্রোণমানং জলং দেযম্| পথ্যাবৃন্তার্ধশতং হরীতকীফলবন্ধানার্ধশতম্; অন্যে তু পথ্যাবৃন্তচূর্ণং হরীতকীফলস্যৈব চূর্ণং, তদস্থিশূন্যমিত্যাহুঃ||৫০||

Adhikarana 17 (51) · Śloka 51

দন্ত্যাশ্চতুষ্পলরসে পিষ্টৈর্দন্তীশলাটুভিঃ| তদ্বত্প্রস্থো ঘৃতাত্সিদ্ধঃ প্লীহপাণ্ড্বর্তিশোফজিত্||৫১|| ইতি দন্তীঘৃতম্|

দন্তীত্যাদৌ দন্ত্যাঃ ক্বাথো ঘৃতাচ্চতুর্গুণঃ স্থাপ্যঃ; তন্ত্রান্তরদর্শনাত্ প্রস্থমান এবাত্র ক্বাথো ভবতি| উক্তং হ্যন্যত্র- “নিকুম্ভকুডবাক্বাথে প্রস্থে তত্কল্কসংযুতম্| সর্পিঃপ্রস্থং পচেত্ প্লীহকামলাপাণ্ডুরোগনুত্” ইতি||৫১||

Adhikarana 18 (52) · Śloka 52

পুরাণসর্পিষঃ প্রস্থো দ্রাক্ষার্ধপ্রস্থসাধিতঃ| কামলাগুল্মপাণ্ড্বর্তিজ্বরমেহোদরাপহঃ||৫২|| ইতি দ্রাক্ষাঘৃতম্|

পুরাণেত্যাদৌ জলমনুক্তদ্রবত্বাদ্ভবতি| দ্রাক্ষাপ্রস্থার্ধং তু কল্কঃ||৫২||

Adhikarana 19 (53) · Śloka 53

হরিদ্রাত্রিফলানিম্ববলামধুকসাধিতম্| সক্ষীরং মাহিষং সর্পিঃ কামলাহরমুত্তমম্||৫৩|| ইতি হরিদ্রাদিঘৃতম্|

হরিদ্রেত্যাদৌ দ্রবান্তরাভাবাত্ ক্ষীরমেব চতুর্গুণম্||৫৩||

Adhikarana 20 (54) · Śloka 55

গোমূত্রে দ্বিগুণে দার্ব্যাঃ কল্কাক্ষদ্বযসাধিতঃ| দার্ব্যাঃ পঞ্চপলক্বাথে কল্কে কালীযকে পরঃ||৫৪|| মাহিষাত্ সর্পিষঃ প্রস্থঃ পূর্বঃ পূর্বে পরে পরঃ|৫৫|

দার্ব্যাঃ কল্কাক্ষদ্বযসাধিতো মাহিষসর্পিষঃ প্রস্থ ইতি যোজ্যম্| দার্ব্যাঃ পঞ্চপলক্বাথে ইত্যত্রাপি পূর্বঘৃতানুসারাত্ পঞ্চপলদার্বীক্বাথোঽপি ঘৃতাদ্দ্বিগুণ এব কর্তব্যঃ| কালীযককল্কোঽপি পূর্ববদক্ষদ্বযমান এব| পূর্বঃ পূর্বে ইতি পূর্বে পাণ্ডুরোগে, দার্বীকল্কগোমূত্রসিদ্ধো ঘৃতপ্রস্থঃ; পরে তু কামলাখ্যে, পরঃ দার্বীক্বাথকালীযকল্কসিদ্ধঃ; ‘দেযঃ’ ইতি শেষঃ||৫৪||-

Adhikarana 21 (55-69) · Śloka 69

স্নেহৈরেভিরুপক্রম্য স্নিগ্ধং মত্বা বিরেচযেত্||৫৫|| পযসা মূত্রযুক্তেন বহুশঃ কেবলেন বা| দন্তীফলরসে কোষ্ণে কাশ্মর্যাঞ্জলিনা শৃতম্||৫৬|| দ্রাক্ষাঞ্জলিং মৃদিত্বা বা দদ্যাত্ পাণ্ড্বামযাপহম্| দ্বিশর্করং ত্রিবৃচ্চূর্ণং পলার্ধং পৈত্তিকঃ পিবেত্||৫৭|| কফপাণ্ডুস্তু গোমূত্রক্লিন্নযুক্তাং হরীতকীম্| আরগ্বধং রসেনেক্ষোর্বিদার্যামলকস্য চ||৫৮|| সত্র্যূষণং বিল্বপত্রং পিবেন্না কামলাপহম্| দন্ত্যর্ধপলকল্কং বা দ্বিগুডং শীতবারিণা||৫৯|| কামলী ত্রিবৃতাং বাঽপি ত্রিফলাযা রসৈঃ পিবেত্| বিশালাত্রিফলামুস্তকুষ্ঠদারুকলিঙ্গকান্||৬০|| কার্ষিকানর্ধকর্ষাংশাং কুর্যাদতিবিষাং তথা| কর্ষৌ মধুরসাযা দ্বৌ সর্বমেতত্ সুখাম্বুনা||৬১|| মৃদিতং তং রসং পূতং পীত্বা লিহ্যাচ্চ মধ্বনু| কাসং শ্বাসং জ্বরং দাহং পাণ্ডুরোগমরোচকম্||৬২|| গুল্মানাহামবাতাংশ্চ রক্তপিত্তং চ নাশযেত্| ত্রিফলাযা গুডূচ্যা বা দার্ব্যা নিম্বস্য বা রসম্||৬৩|| শীতং মধুযুতং প্রাতঃ কামলার্তঃ পিবেন্নরঃ| ক্ষীরমূত্রং পিবেত্ পক্ষং গব্যং মাহিষমেব বা||৬৪|| পাণ্ডুর্গোমূত্রযুক্তং বা সপ্তাহং ত্রিফলারসম্| তরুজান্ জ্বলিতান্মূত্রে নির্বাপ্যামৃদ্য চাঙ্কুরান্||৬৫|| মাতুলুঙ্গস্য তত্ পূতং পাণ্ডুশোথহরং পিবেত্| স্বর্ণক্ষীরী ত্রিবৃচ্ছ্যামে ভদ্রদারু সনাগরম্||৬৬|| গোমূত্রাঞ্জলিনা পিষ্টং মূত্রে বা ক্বথিতং পিবেত্| ক্ষীরমেভিঃ শৃতং বাঽপি পিবেদ্দোষানুলোমনম্||৬৭|| হরীতকীং প্রযোগেণ গোমূত্রেণাথবা পিবেত্| জীর্ণে ক্ষীরেণ ভুঞ্জীত রসেন মধুরেণ বা||৬৮|| সপ্তরাত্রং গবাং মূত্রে ভাবিতং বাঽপ্যযোরজঃ| পাণ্ডুরোগপ্রশান্ত্যর্থং পযসা পাযযেদ্ভিষক্||৬৯||

কাশ্মর্যং গম্ভারীফলম্| শৃতমিতি ফাণ্টকষাযবিধিনা প্রক্ষিপ্তং, দ্রাক্ষাঞ্জলিং মৃদিত্বেত্যনেন স্ফুটমেব ফাণ্টকষাযং দর্শযতি| দ্বিশর্করমিত্যাদৌ ত্রিবৃচ্চূর্ণং পলার্ধং দ্বিশর্করযুক্তং সত্ সার্ধপলমানং ভবতি| গোমূত্রক্লিন্নযুক্তামিতি গোমূত্রেণ ক্লিন্নাং কল্কীকৃতাং তথা গোমূত্রেণ যুক্তামালোডিতাং পিবেত্| অন্যে তু আরগ্বধরসেন হরীতকীং পিবেদিতি যোজযন্তি, ইক্ষ্বাদিরসেন সত্রিকটুং বিল্বপত্রং পিবেদিতি যোজযন্তি| আরগ্বধং সত্রিকটুকং বিদার্যা আমলকস্য চ রসেন পিবেদিত্যপরোঽর্থঃ| বিশালেত্যাদৌ ফাণ্টকষাযবদ্দ্রব্যাত্ পলমানাত্ চতুষ্পলং দ্রবং বদন্তি বৃদ্ধাঃ||৫৫-৬৯||

Adhikarana 22 (70-71) · Śloka 71

ত্র্যূষণত্রিফলামুস্তবিডঙ্গচিত্রকাঃ সমাঃ| নবাযোরজসো ভাগাস্তচ্চূর্ণং ক্ষৌদ্রসর্পিষা||৭০|| ভক্ষযেত্ পাণ্ডুহৃদ্রোগকুষ্ঠার্শঃকামলাপহম্| নবাযসমিদং চূর্ণং কৃষ্ণাত্রেযেণ ভাষিতম্||৭১|| ইতি নবাযসচূর্ণম্|

নবাযোরজসো ভাগ ইতি একভাগাপেক্ষযা নবগুণত্বমযোরজসঃ; তেন ত্র্যূষণাদীনাং মিলিতানাং চূর্ণেন সমমযোরজঃ||৭০-৭১||

Adhikarana 23 (72-79) · Śloka 80

গুডনাগরমণ্ডূরতিলাংশান্মানতঃ সমান্| পিপ্পলীদ্বিগুণাং কুর্যাদ্গুটিকাং পাণ্ডুরোগিণে||৭২|| ত্র্যূষণং ত্রিফলা মুস্তং বিডঙ্গং চব্যচিত্রকৌ| দার্বীত্বঙ্মাক্ষিকো ধাতুর্গ্রন্থিকং দেবদারু চ||৭৩|| এতান্ দ্বিপলিকান্ভাগাংশ্চূর্ণং কুর্যাত্ পৃথক্ পৃথক্| মণ্ডূরং দ্বিগুণং চূর্ণাচ্ছুদ্ধমঞ্জনসন্নিভম্||৭৪|| গোমূত্রেঽষ্টগুণে পক্ত্বা তস্মিংস্তত্ প্রক্ষিপেত্ততঃ| উদুম্বরসমান্কৃত্বা বটকাংস্তান্ যথাগ্নি না||৭৫|| উপযুঞ্জীত তক্রেণ সাত্ম্যং জীর্ণে চ ভোজনম্| মণ্ডূরবটকা হ্যেতে প্রাণদাঃ পাণ্ডুরোগিণাম্||৭৬|| কুষ্ঠান্যজীর্ণকং শোথমূরুস্তম্ভং কফামযান্| অর্শাংসি কামলাং মেহং প্লীহানং শমযন্তি চ||৭৭|| ইতি মণ্ডূরবটকাঃ| তাপ্যাদ্রিজতুরূপ্যাযোমলাঃ পঞ্চপলাঃ পৃথক্| চিত্রকত্রিফলাব্যোষবিডঙ্গৈঃ পলিকৈঃ সহ||৭৮|| শর্করাষ্টপলোন্মিশ্রাশ্চূর্ণিতা মধুনাঽঽপ্লুতাঃ| অভ্যস্যাস্ত্বক্ষমাত্রা হি জীর্ণে হিতমিতাশিনা||৭৯|| কুলত্থকাকমাচ্যাদিকপোতপরিহারিণা|৮০|

মণ্ডূরং পুরাণং লোহকিট্টম্||৭২-৭৯||-

Adhikarana 24 (80-86) · Śloka 86

ত্রিফলাযাস্ত্রযো ভাগাস্ত্রযস্ত্রিকটুকস্য চ||৮০|| ভাগশ্চিত্রকমূলস্য বিডঙ্গানাং তথৈব চ| পঞ্চাশ্মজতুনো ভাগাস্তথা রূপ্যমলস্য চ||৮১|| মাক্ষিকস্য চ শুদ্ধস্য লৌহস্য রজসস্তথা| অষ্টৌ ভাগাঃ সিতাযাশ্চ তত্সর্বং সূক্ষ্মচূর্ণিতম্||৮২|| মাক্ষিকেণাপ্লুতং স্থাপ্যমাযসে ভাজনে শুভে| উদুম্বরসমাং মাত্রাং ততঃ খাদেদ্যথাগ্নি না||৮৩|| দিনে দিনে প্রযুঞ্জীত জীর্ণে ভোজ্যং যথেপ্সিতম্| বর্জযিত্বা কুলত্থানি কাকমাচীং কপোতকম্||৮৪|| যোগরাজ ইতি খ্যাতো যোগোঽযমমৃতোপমঃ| রসাযনমিদং শ্রেষ্ঠং সর্বরোগহরং শিবম্||৮৫|| পাণ্ডুরোগং বিষং কাসং যক্ষ্মাণং বিষমজ্বরম্| কুষ্ঠান্যজীর্ণকং মেহং শোষং শ্বাসমরোচকম্||৮৬|| বিশেষাদ্ধন্ত্যপস্মারং কামলাং গুদজানি চ| ইতি যোগরাজঃ|

ত্রিফলেত্যাদৌ রৌপ্যমলং রূপ্যস্য যত্ কিট্টং ভবতি তজ্জ্ঞেযম্| মাক্ষিকস্যেতি মাক্ষিকধাতোঃ| অশ্মজত্বাদীনাং চতুর্ণাং পঞ্চভাগাঃ প্রত্যেকং; কিংবা পঞ্চাশ্মজতুনো ভাগাঃ, তথা রূপ্যমলস্য চেতি রূপ্যমলস্যেতি শিলাজতুবিশেষণং; তেন রূপ্যমলরূপং যদুক্তং শিলাজতু “রাজতং কটুকং” (চি.অ.১,পা.৩) ইত্যাদিনা, তদিহ গৃহ্যতে||৮০-৮৬||-

Adhikarana 25 (87-99) · Śloka 99

কৌটজত্রিফলানিম্বপটোলঘননাগরৈঃ||৮৭|| ভাবিতানি দশাহানি রসৈর্দ্বিত্রিগুণানি বা| শিলাজতুপলান্যষ্টৌ তাবতী সিতশর্করা||৮৮|| ত্বক্ক্ষীরী পিপ্পলী ধাত্রী কর্কটাখ্যা পলোন্মিতা| নিদিগ্ধ্যাঃ ফলমূলাভ্যাং পলং যুক্ত্যা ত্রিগন্ধকম্| চূর্ণিতং মধুনঃ কুর্যাত্ ত্রিপলেনাক্ষিকান্ গুডান্| দাডিমাম্বুপযঃপক্ষিরসতোযসুরাসবান্||৯০|| তান্ ভক্ষযিত্বাঽনুপিবেন্নিরন্নো ভুক্ত এব বা| পাণ্ডুকুষ্ঠজ্বরপ্লীহতমকার্শোভগন্দরান্||৯১|| পূতিহৃচ্ছুক্রমূত্রাগ্নিদোষশোষগরোদরান্ | কাসাসৃগ্দরপিত্তাসৃক্শোথগুল্মগলামযান্||৯২|| তে চ সর্বব্রণান্ হন্যুঃ সর্বরোগহরাঃ শিবাঃ| ইতি শিলাজতুবটকাঃ| পুনর্নবা ত্রিবৃদ্ব্যোষবিডঙ্গং দারু চিত্রকম্||৯৩|| কুষ্ঠং হরিদ্রে ত্রিফলা দন্তী চব্যং কলিঙ্গকাঃ| পিপ্পলী পিপ্পলীমূলং মুস্তং চেতি পলোন্মিতম্||৯৪|| মণ্ডূরং দ্বিগুণং চূর্ণাদ্গোমূত্রে দ্ব্যাঢকে পচেত্| কোলবদ্গুটিকাঃ কৃত্বা তক্রেণালোড্য না পিবেত্||৯৫|| তাঃ পাণ্ডুরোগান্ প্লীহানমর্শাংসি বিষমজ্বরম্| শ্বযথুং গ্রহণীদোষং হন্যুঃ কুষ্ঠং ক্রিমীংস্তথা||৯৬|| ইতি পুনর্নবামণ্ডূরম্| দার্বীত্বক্ ত্রিফলা ব্যোষং বিডঙ্গমযসো রজঃ| মধুসর্পির্যুতং লিহ্যাত্ কামলাপাণ্ডুরোগবান্||৯৭|| তুল্যা অযোরজঃপথ্যাহরিদ্রাঃ ক্ষৌদ্রসর্পিষা| চূর্ণিতাঃ কামলী লিহ্যাদ্গুডক্ষৌদ্রেণ বাঽভযাঃ||৯৮|| ত্রিফলা দ্বে হরিদ্রে চ কটুরোহিণ্যযোরজঃ| চূর্ণিতং ক্ষৌদ্রসর্পির্ভ্যাং স লেহঃ কামলাপহঃ||৯৯||

ভাবিতানীত্যাদি| দ্বিগুণত্রিগুণদশাহানি ভাবিতানি| রসৈরিতি কৌটজাদিক্বাথৈঃ| কৌটজং কুটজফলম্| অত্র ভাবনা শিলাজতূক্তেনৈব বিধিনা কর্তব্যা; ক্বাথ্যক্বাথমানে চ তন্ত্রান্তরং- “তুল্যং গিরিজেন জলে চতুর্গুণে ভাবনৌষধং ক্বাথ্যম্| তত্ক্বাথে পাদাংশে পূতোষ্ণে প্রক্ষিপেদ্গিরিজম্|| তত্সমরসতাং যাতং সংশুষ্কং প্রক্ষিপেদ্রসে ভূযঃ” ইতি; এবং চান্যত্রাপি ভাবনাবিধৌ ক্বাথ্যক্কাথমানৌ জ্ঞেযৌ| ফলমূলাভ্যাং পলমিতি মিলিত্বা পলম্| যুক্ত্যা ত্রিগন্ধকমিতি যাবতা ত্রিগন্ধেন সাধুগন্ধো ভবতি তাবন্মাত্রং ত্রিগন্ধং জ্ঞেযং; ত্রিগন্ধং চ পত্রত্বগেলা উচ্যন্তে, “ত্রিগন্ধং তু সমাখ্যাতং ত্বগেলাপত্রকৈঃ সমৈঃ| তদেব তু সমাখ্যাতং চাতুর্জাতং সকেসরম্” ইতি| পূত্যাদিভির্দোষশব্দঃ প্রত্যেকং সম্বধ্যতে||৮৭-৯৯||

Adhikarana 26 (100-101) · Śloka 101

দ্বিপলাংশাং তুগাক্ষীরীং নাগরং মধুযষ্টিকাম্| প্রাস্থিকীং পিপ্পলীং দ্রাক্ষাং শর্করার্ধতুলাং শুভাম্||১০০|| ধাত্রীফলরসদ্রোণে চূর্ণিতং লেহবত্ পচেত্| শীতং মধুপ্রস্থযুতং লিহ্যাত্ পাণিতলং ততঃ||১০১|| হন্ত্যেষ কামলাং পিত্তং পাণ্ডুং কাসং হলীমকম্| ইতি ধাত্র্যবলেহঃ|

দ্বিপলাংশামিত্যাদৌ দ্রাক্ষা প্রাস্থিকী| ধাত্রীফলরসঃ ধাত্রীস্বরসঃ||১০০-১০১||-

Adhikarana 27 (102-104) · Śloka 104

ত্র্যূষণং ত্রিফলা চব্যং চিত্রকো দেবদারু চ||১০২|| বিডঙ্গান্যথ মুস্তং চ বত্সকং চেতি চূর্ণযেত্| মণ্ডূরতুল্যং তচ্চূর্ণং গোমূত্রেঽষ্টগুণে পচেত্||১০৩|| শনৈঃ সিদ্ধাস্তথা শীতাঃ কার্যাঃ কর্ষসমা গুডাঃ| যথাগ্নি ভক্ষণীযাস্তে প্লীহপাণ্ড্বামযাপহাঃ||১০৪|| গ্রহণ্যর্শোনুদশ্চৈব তক্রবাট্যাশিনঃ স্মৃতাঃ| ইতি মণ্ডূরবটকাঃ|

ত্র্যূষণাদীনামষ্টাবিংশতিপলানি, মণ্ডূরং চ দ্বিগুণং, সমুদিতং চূর্ণং চতুরধিকাশীতিপলমানং ভবতি| পৃথগিতি পাঠান্মণ্ডূরচূর্ণমেব পৃথঙ্মূত্রে পক্তব্যং, তস্মিন্ সিধ্যতি ত্র্যূষণাদীনাং চূর্ণং প্রক্ষেপ্যম্| শুদ্ধমিতিপদেন মণ্ডূরস্য ধ্মাপনগোমূত্রনির্বাপণাদিনা শুদ্ধিং দর্শযতি| কেচিত্তু গোমূত্রমষ্টগুণং প্রত্যাসন্নমণ্ডূরাদেব বদন্তি; অযমেব পক্ষঃ সাধু প্রতিভাতি||১০২-১০৪||-

Adhikarana 28 (105-110) · Śloka 110

মঞ্জিষ্ঠা রজনী দ্রাক্ষা বলামূলান্যযোরজঃ||১০৫|| লোধ্রং চৈতেষু গৌডঃ স্যাদরিষ্টঃ পাণ্ডুরোগিণাম্| ইতি গৌডোঽরিষ্টঃ| বীজকাত্ষোডশপলং ত্রিফলাযাশ্চ বিংশতিঃ||১০৬|| দ্রাক্ষাযাঃ পঞ্চ লাক্ষাযাঃ সপ্ত দ্রোণে জলস্য তত্| সাধ্যং পাদাবশেষে তু পূতশেষে সমাবপেত্||১০৭|| শর্করাযাস্তুলাং প্রস্থং মাক্ষিকস্য চ কার্ষিকম্| ব্যোষং ব্যাঘ্রনখোশীরং ক্রমুকং সৈলবালুকম্||১০৮|| মধুকং কুষ্ঠমিত্যেতচ্চূর্ণিতং ঘৃতভাজনে| যবেষু দশরাত্রং তদ্গ্রীষ্মে দ্বিঃ শিশিরে স্থিতম্||১০৯|| পিবেত্তদ্গ্রহণীপাণ্ডুরোগার্শঃশোথগুল্মনুত্| মূত্রকৃচ্ছ্রাশ্মরীমেহকামলাসন্নিপাতজিত্||১১০|| বীজকারিষ্ট ইত্যেষ আত্রেযেণ প্রকীর্তিতঃ| ইতি বীজকারিষ্টঃ|

বীজকাত্ ষোডশপলমিত্যত্র কেচিত্ ‘দ্বির্বীজকপলান্যষ্টৌ’ ইতি পঠন্তি, তত্রাপি স এবার্থঃ| বীজকঃ অসনঃ| ব্যাঘ্রনখঃ নখীভেদ এব| দ্বিঃ শিশিরে ইতি বিংশতিরাত্রস্থিতম্||১০৫-১১০||-

Adhikarana 29 (111-113) · Śloka 113

ধাত্রীফলসহস্রে দ্বে পীডযিত্বা রসং তু তম্||১১১|| ক্ষৌদ্রাষ্টাংশেন সংযুক্তং কৃষ্ণার্ধকুডবেন চ| শর্করার্ধতুলোন্মিশ্রং পক্ষং স্নিগ্ধঘটে স্থিতম্||১১২|| প্রপিবেন্মাত্রযা প্রাতর্জীর্ণে হিতমিতাশনঃ| কামলাপাণ্ডুহৃদ্রোগবাতাসৃগ্বিষমজ্বরান্||১১৩|| কাসহিক্কারুচিশ্বাসাংশ্চৈষোঽরিষ্টঃ প্রণাশযেত্| ইতি ধাত্র্যরিষ্টঃ|

ধাত্রীত্যাদৌ ধাত্রীফলসহস্রদ্বযস্য স্বরস এব গ্রাহ্যঃ||১১১-১১৩||-

Adhikarana 30 (114) · Śloka 115

স্থিরাদিভিঃ শৃতং তোযং পানাহারে প্রশস্যতে||১১৪|| পাণ্ডূনাং, কামলার্তানাং মৃদ্বীকামলকীরসঃ|১১৫|

কামলার্তানাং মৃদ্বীকামলকীরসঃ পানাহারে প্রশস্যত ইত্যর্থঃ||১১৪||-

Adhikarana 31 (115-116) · Śloka 117

পাণ্ডুরোগপ্রশান্ত্যর্থমিতি প্রোক্তং মহর্ষিণা||১১৫|| বিকল্প্যমেতদ্ভিষজা পৃথগ্দোষবলং প্রতি| বাতিকে স্নেহভূযিষ্ঠং, পৈত্তিকে তিক্তশীতলম্||১১৬|| শ্লৈষ্মিকে কটুতিক্তোষ্ণং , বিমিশ্রং সান্নিপাতিকে|১১৭|

বিকল্প্যমিত্যনেনোক্তং বিকল্পবিধিমাহ- বাতিকে ইত্যাদি||১১৫-১১৬||-

Adhikarana 32 (117-122) · Śloka 123

নিপাতযেচ্ছরীরাত্তু মৃত্তিকাং ভক্ষিতাং ভিষক্||১১৭|| যুক্তিজ্ঞঃ শোধনৈস্তীক্ষ্ণৈঃ প্রসমীক্ষ্য বলাবলম্| শুদ্ধকাযস্য সর্পীংষি বলাধানানি যোজযেত্||১১৮|| ব্যোষং বিল্বং হরিদ্রে দ্বে ত্রিফলা দ্বে পুনর্নবে| মুস্তান্যযোরজঃ পাঠা বিডঙ্গং দেবদারু চ||১১৯|| বৃশ্চিকালী চ ভার্গী চ সক্ষীরৈস্তৈঃ সমৈর্ঘৃতম্| সাধযিত্বা পিবেদ্যুক্ত্যা নরো মৃদ্দোষপীডিতঃ||১২০|| তদ্বত্ কেশরযষ্ট্যাহ্বপিপ্পলীক্ষারশাদ্বলৈঃ| মৃদ্ভক্ষণাদাতুরস্য লৌল্যাদবিনিবর্তিনঃ||১২১|| দ্বেষ্যার্থং ভাবিতাং কামং দদ্যাত্তদ্দোষনাশনৈঃ| বিঙ্গৈলাতিবিষযা নিম্বপত্রেণ পাঠযা||১২২|| বার্তাকৈঃ কটুরোহিণ্যা কৌটজৈর্মূর্বযাঽপি বা|১২৩|

নিপাতযেদিত্যাদিনা মৃজ্জপাণ্ডুরোগচিকিত্সামাহ| শাদ্বলং দূর্বা| মৃদ্ভক্ষণাদবিনিবর্তিনঃ সক্তস্যেত্যর্থঃ| ভাবিতামিতি তদ্দোষনাশনৈর্দ্রব্যৈঃ সংস্কৃতাম্| মূর্বযাঽপি বেত্যন্তো গ্রন্থঃ পূর্বেণ সম্বধ্যতে||১১৭-১২২||-

Adhikarana 33 (123) · Śloka 124

যথাদোষং প্রকুর্বীত ভৈষজ্যং পাণ্ডুরোগিণাম্||১২৩|| ক্রিযাবিশেষ এষোঽস্য মতো হেতুবিশেষতঃ|১২৪|

পাণ্ডুরোগোক্তং দোষবিশেষচিকিত্সিতং মৃজ্জেঽপ্যতিদিশতি- যথাদোষমিত্যাদি| এষ ইতি মৃজ্জে পাণ্ডুরোগে প্রোক্তঃ||১২৩||-

Adhikarana 34 (124-127) · Śloka 128

তিলপিষ্টনিভং যস্তু বর্চঃ সৃজতি কামলী||১২৪|| শ্লেষ্মণা রুদ্ধমার্গং তত্ পিত্তং কফহরৈর্জযেত্| রূক্ষশীতগুরুস্বাদুব্যাযামৈর্বেগনিগ্রহৈঃ||১২৫|| কফসম্মূর্চ্ছিতো বাযুঃ স্থানাত্ পিত্তং ক্ষিপেদ্বলী| হারিদ্রনেত্রমূত্রত্বক্ শ্বেতবর্চাস্তদা নরঃ||১২৬|| ভবেত্ সাটোপবিষ্টম্ভো গুরুণা হৃদযেন চ| দৌর্বল্যাল্পাগ্নিপার্শ্বার্তিহিক্কাশ্বাসারুচিজ্বরৈঃ||১২৭|| ক্রমেণাল্পেঽনুসজ্যেত পিত্তে শাখাসমাশ্রিতে|১২৮|

তিলপিষ্টনিভমিত্যাদিনা শাখাশ্রযকামলাচিকিত্সিতং লক্ষণপূর্বকমাহ| শ্লেষ্মণা রুদ্ধমার্গমিতি কোষ্ঠস্থেন শ্লেষ্মণা শাখাশ্রযি পিত্তং কামলাজনকং রুদ্ধমার্গং কোষ্ঠগমনার্থং নিষিদ্ধমার্গমিতি যাবত্| এতদেব রূক্ষেত্যাদিনা বিস্তরেণাহ| শ্বেতবর্চা ইতি কোষ্ঠস্থপিত্তস্য মলরঞ্জকস্য বহির্নির্গমাদ্বৃদ্ধেন শ্লেষ্মণা শ্বেতবর্চা ভবতি| ক্রমেণেতি জ্বরান্তৈরনুষজ্জতে| অল্পে পিত্তে শাখাশ্রিতে ইতি সম্বন্ধঃ||১২৪-১২৭||-

Adhikarana 35 (128-129) · Śloka 130

বর্হিতিত্তিরিদক্ষাণাং রূক্ষাম্লৈঃ কটুকৈ রসৈঃ||১২৮|| শুষ্কমূলককৌলত্থৈর্যূষৈশ্চান্নানি ভোজযেত্| মাতুলুঙ্গরসং ক্ষৌদ্রপিপ্পলীমরিচান্বিতম্||১২৯|| সনাগরং পিবেত্ পিত্তং তথাঽস্যৈতি স্বমাশযম্|১৩০|

বর্হীত্যাদিনা কফহরং পিত্তবৃদ্ধিকরং চ সমং চিকিত্সিতং প্রাহ, যতঃ শাখাশ্রযদোষস্য বৃদ্ধিঃ কোষ্ঠানযনার্থম্; উক্তং হি- “বৃদ্ধ্যাঽভিষ্যন্দনাত্ পাকাত্ স্রোতোমুখবিশোধনাত্| শাখাং মুক্ত্বা মলাঃ কোষ্ঠং যান্তি বাযোশ্চ নিগ্রহাত্” (সূ.অ.২৮) ইতি||১২৮-১২৯||-

Adhikarana 36 (130-131) · Śloka 132

কটুতীক্ষ্ণোষ্ণলবণৈর্ভৃশাম্লৈশ্চাপ্যুপক্রমঃ||১৩০|| আপিত্তরাগাচ্ছকৃতো বাযোশ্চাপ্রশমাদ্ভবেত্| স্বস্থানমাগতে পিত্তে পুরীষে পিত্তরঞ্জিতে||১৩১|| নিবৃত্তোপদ্রবস্য স্যাত্ পূর্বঃ কামলিকো বিধিঃ|১৩২|

আপিত্তরাগাচ্ছকৃত ইতি যাবত্ কোষ্ঠমার্গস্থো মলো ন রঞ্জতে তাবত্ পিত্তবর্ধনম্| পূর্ব ইতি পূর্বোক্তঃ| কামলিকো বিধিরিতি কোষ্ঠাশ্রযিকামলাচিকিত্সিতং কর্তব্যমিত্যর্থঃ||১৩০-১৩১||-

Adhikarana 37 (132-133) · Śloka 134

যদা তু পাণ্ডোর্বর্ণঃ স্যাদ্ধরিতশ্যাবপীতকঃ||১৩২|| বলোত্সাহক্ষযস্তন্দ্রা মন্দ্রাগ্নিত্বং মৃদুজ্বরঃ| স্ত্রীষ্বহর্ষোঽঙ্গমর্দশ্চ শ্বাসস্তৃষ্ণাঽরুচির্ভ্রমঃ||১৩৩|| হলীমকং তদা তস্য বিদ্যাদনিলপিত্ততঃ|১৩৪|

যদেত্যাদিনা হলীমকমাহ| অযমেব তন্ত্রান্তরে লাঘবসঞ্জ্ঞযা অলসসঞ্জ্ঞযা চোচ্যতে| উক্তং হি সুশ্রুতে- “জ্বরাঙ্গমর্দভ্রমদাহতন্দ্রাক্ষযান্বিতো লাঘবকোঽলসশ্চ| তং বাতপিত্তাদ্ধরিপীতনীলং হলীমকং কেচিদুদাহরন্তি” (সু.উ.অ.৪৪) ইতি| যচ্চাপি তত্র ভিন্নবর্চস্ত্বং সা চাপি কামলাবস্থৈব ন পৃথগ্রোগঃ| উক্তং হি তন্ত্রান্তরে- “সন্তাপো ভিন্নবর্চস্ত্বং বহিরন্তে চ পীনতা| পাণ্ডুতা নেত্ররাগশ্চ পানকীলক্ষণং মতম্” ইতি||১৩২-১৩৩||-

Adhikarana 38 (134-137) · Śloka 138

গুডূচীস্বরসক্ষীরসাধিতং মাহিষং ঘৃতম্||১৩৪|| স পিবেত্ত্রিবৃতাং স্নিগ্ধো রসেনামলকস্য তু| বিরিক্তো মধুরপ্রাযং ভজেত্ পিত্তানিলাপহম্||১৩৫|| দ্রাক্ষালেহং চ পূর্বোক্তং সর্পীংষি মধুরাণি চ| যাপনান্ ক্ষীরবস্তীংশ্চ শীলযেত্সানুবাসনান্||১৩৬|| মার্দ্বীকারিষ্টযোগাংশ্চ পিবেদ্যুক্ত্যাঽগ্নিবৃদ্ধযে| কাসিকং চাভযালেহং পিপ্পলীং মধুকং বলাম্||১৩৭|| পযসা চ প্রযুঞ্জীত যথাদোষং যথাবলম্|১৩৮|

গুডূচীত্যাদিনা হলীমকচিকিত্সামাহ| দ্রাক্ষালেহং চ পূর্বোক্তমিতি ‘দ্বিপলাংশাং তুগাক্ষীরী’ ইত্যাদিগ্রন্থোক্তমিহৈব| যাপনাবস্তযঃ সিদ্ধিস্থানে প্রোক্তাঃ| কাসিকং চাভযালেহমিতি অগস্ত্যহরীতকীম্||১৩৪-১৩৭||-

Adhikarana 39 (138-139) · Śloka 139

তত্র শ্লোকৌ- পাণ্ডোঃ পঞ্চবিধস্যোক্তং হেতুলক্ষণভেষজম্||১৩৮|| কামলা দ্বিবিধা তেষাং সাধ্যাসাধ্যত্বমেব চ| তেষাং বিকল্পো যশ্চান্যো মহাব্যাধির্হলীমকঃ| তস্য চোক্তং সমাসেন ব্যঞ্জনং সচিকিত্সিতম্||১৩৯||

পাণ্ডোঃ পশ্চবিধস্যেত্যাদিনা সঙ্গ্রহমাহ| স চ ব্যক্ত এব||১৩৮-১৩৯||

Adhikarana puShpikA · Śloka 16

ইত্যগ্নিবেশকৃতে তন্ত্রেঽপ্রাপ্তে দৃঢবলসম্পূরিতে চিকিত্সাস্থানে পাণ্ডুরোগচিকিত্সিতং নাম ষোডশোঽধ্যাযঃ||১৬||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং চিকিত্সাস্থানে পাণ্ডুরোগচিকিত্সিতং নাম ষোডশোঽধ্যাযঃ||১৬||