7. vājīkaraṇā'dhyāyaḥ - māṣaparṇabhr̥tīyō vājīkaraṇapādaḥ

Adhikarana 1 (1-2) · Śloka 2

ಅಥಾತೋ ಮಾಷಪರ್ಣಭೃತೀಯಂ ವಾಜೀಕರಣಪಾದಂ ವ್ಯಖ್ಯಾಸ್ಯಾಮಃ||೧|| ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨||

ಮಾಷರ್ಣಭೃತೀಯಸಮ್ಬನ್ಧೋಽಪಿ ಪೂರ್ವವತ್||೧-೨||

Adhikarana 2 (3-5) · Śloka 5

ಮಾಷಪರ್ಣಭೃತಾಂ ಧೇನುಂ ಗೃಷ್ಟಿಂ ಪುಷ್ಟಾಂ ಚತುಃಸ್ತನೀಮ್| ಸಮಾನವರ್ಣವತ್ಸಾಂ ಚ ಜೀವದ್ವತ್ಸಾಂ ಚ ಬುದ್ಧಿಮಾನ್||೩|| ರೋಹಿಣೀಮಥವಾ ಕೃಷ್ಣಾಮೂರ್ಧ್ವಶೃಙ್ಗೀಮದಾರುಣಾಮ್| ಇಕ್ಷ್ವಾದಾಮರ್ಜುನಾದಾಂ ವಾ ಸಾನ್ದ್ರಕ್ಷೀರಾಂ ಚ ಧಾರಯೇತ್||೪|| ಕೇವಲಂ ತು ಪಯಸ್ತಸ್ಯಾಃ ಶೃತಂ ವಾಽಶೃತಮೇವ ವಾ| ಶರ್ಕರಾಕ್ಷೌದ್ರಸರ್ಪಿರ್ಭಿರ್ಯುಕ್ತಂ ತದ್ವೃಷ್ಯಮುತ್ತಮಮ್||೫||

ಗೃಷ್ಟಿಮ್ ಏಕವಾರಪ್ರಸೂತಾಮ್| ಚತುಃಸ್ತನೀಮಿತ್ಯನೇನ ಸಮ್ಪೂರ್ಣಚತುಃಸ್ತನೀಂ ದರ್ಶಯತಿ| ರೋಹಿಣೀಮಿತಿ ಲೋಹಿತವರ್ಣಾಮ್| ಊರ್ಧ್ವಶೃಙ್ಗತ್ವಂ ವಿಶುದ್ಧಬಹುಕ್ಷೀರಾಯಾ ಏವ ಭವತೀತಿ ವಚನಾಜ್ಜ್ಞೇಯಮ್| ಇಕ್ಷ್ವಾದೇತಿ ಇಕ್ಷುದಣ್ಡಭಕ್ಷಾ| ಅರ್ಜುನಾದಾ ಅರ್ಜುನವೃಕ್ಷಪತ್ರಭಕ್ಷಾ| ಇಕ್ಷ್ವಾದಾ ವಾ, ಅರ್ಜುನಾದಾ ವಾ, ಮಾಷಪರ್ಣಭೃತಾ ವೇತಿ ವಿಕಲ್ಪತ್ರಯಮ್| ಪಯಃ ಶೃತಮಶೃತಂ ವೇತಿ ದ್ವೌ ಯೋಗೌ| ಶರ್ಕರಾಕ್ಷೌದ್ರಸರ್ಪಿರ್ಭಿರ್ಯುಕ್ತಂ ತದಿತಿ ತೃತೀಯಃ| ಏತತ್ಪ್ರಯೋಗೋಽಪಿ ಜತೂಕರ್ಣೇ- “ತಸ್ಯಾಃ ಕ್ಷೀರಂ ಶರ್ಕರಾಕ್ಷೌದ್ರಯುಕ್ತಂ ವಾ ಕೇವಲಂ ಶೃತಮಶೃತಂ ವಾ” ಇತಿ||೩-೫||

Adhikarana 3 (6-7) · Śloka 7

ಶುಕ್ರಲೈರ್ಜೀವನೀಯೈಶ್ಚ ಬೃಂಹಣೈರ್ಬಲವರ್ಧನೈಃ| ಕ್ಷೀರಸಞ್ಜನನೈಶ್ಚೈವ ಪಯಃ ಸಿದ್ಧಂ ಪೃಥಕ್ ಪೃಥಕ್||೬|| ಯುಕ್ತಂ ಗೋಧೂಮಚೂರ್ಣೇನ ಸಘೃತಕ್ಷೌದ್ರಶರ್ಕರಮ್| ಪರ್ಯಾಯೇಣ ಪ್ರಯೋಕ್ತವ್ಯಮಿಚ್ಛತಾ ಶುಕ್ರಮಕ್ಷಯಮ್||೭||

ಪರ್ಯಾಯೇಣೇತಿ ಪೃಥಕ್ ಪೃಥಕ್ ಪ್ರಯೋಕ್ತವ್ಯಂ; ತೇನ ಪಞ್ಚಭಿರ್ಗಣೈಃ ಪಞ್ಚ ಯೋಗಾ ಭವನ್ತಿ||೬-೭||

Adhikarana 4 (8-10) · Śloka 10

ಮೇದಾಂ ಪಯಸ್ಯಾಂ ಜೀವನ್ತೀಂ ವಿದಾರೀಂ ಕಣ್ಟಕಾರಿಕಾಮ್| ಶ್ವದಂಷ್ಟ್ರಾಂ ಕ್ಷೀರಿಕಾಂ ಮಾಷಾನ್ ಗೋಧೂಮಾಞ್ಛಾಲಿಷಷ್ಟಿಕಾನ್||೮|| ಪಯಸ್ಯರ್ಧೋದಕೇ ಪಕ್ತ್ವಾ ಕಾರ್ಷಿಕಾನಾಢಕೋನ್ಮಿತೇ| ವಿವರ್ಜಯೇತ್ ಪಯಃಶೇಷಂ ತತ್ ಪೂತಂ ಕ್ಷೌದ್ರಸರ್ಪಿಷಾ||೯|| ಯುಕ್ತಂ ಸಶರ್ಕರಂ ಪೀತ್ವಾ ವೃದ್ಧಃ ಸಪ್ತತಿಕೋಽಪಿ ವಾ| ವಿಪುಲಂ ಲಭತೇಽಪತ್ಯಂ ಯುವೇವ ಚ ಸ ಹೃಷ್ಯತಿ||೧೦||

ವಿವರ್ಜಯೇದಿತಿ ಮೇದಾದಿಕಲ್ಕಂ ವರ್ಜಯೇತ್| ವೃದ್ಧಃ ಸಪ್ತತೇರರ್ವಾಗಿತಿ ಜ್ಞೇಯಮ್| ಸಪ್ತತಿಕಸ್ಯ ತು ಯದ್ಯಪಿ ಶುಕ್ರನಿವೃತ್ತಿರುಕ್ತಾ, ತಥಾಽಪಿ ವೃಷ್ಯಪ್ರಭಾವಾದ್ಭವತೀತಿ ವಿಜ್ಞೇಯಮ್||೮-೧೦||

Adhikarana 5 (11) · Śloka 11

ಮಣ್ಡಲೈರ್ಜಾತರೂಪಸ್ಯ ತಸ್ಯಾ ಏವ ಪಯಃ ಶೃತಮ್| ಅಪತ್ಯಜನನಂ ಸಿದ್ಧಂ ಸಘೃತಕ್ಷೌದ್ರಶರ್ಕರಮ್||೧೧||

ಜಾತರೂಪಸ್ಯೇತಿ ಸುವರ್ಣಸ್ಯ; ಮಣ್ಡಲರೂಪಾಽಽಕೃತಿರಿಹ ಸುವರ್ಣಸ್ಯ ಪ್ರಭಾವಾದ್ವೃಷ್ಯಪ್ರಯೋಗೋಪಕಾರಿಣೀ ಭವತೀತಿ ವಚನಾಜ್ಜ್ಞೇಯಮ್| ತಸ್ಯಾ ಏವೇತಿ ಮಾಷಪರ್ಣಭೃತಧೇನ್ವಾಃ||೧೧||

Adhikarana 6 (12-14) · Śloka 14

ತ್ರಿಂಶತ್ ಸುಪಿಷ್ಟಾಃ ಪಿಪ್ಪಲ್ಯಃ ಪ್ರಕುಞ್ಚೇ ತೈಲಸರ್ಪಿಷೋಃ| ಭೃಷ್ಟಾಃ ಸಶರ್ಕರಾಕ್ಷೌದ್ರಾಃ ಕ್ಷೀರಧಾರಾವದೋಹಿತಾಃ||೧೨|| ಪೀತ್ವಾ ಯಥಾಬಲಂ ಚೋರ್ಧ್ವಂ ಷಷ್ಟಿಕಂ ಕ್ಷೀರಸರ್ಪಿಷಾ| ಭುಕ್ತ್ವಾ ನ ರಾತ್ರಿಮಸ್ತಬ್ಧಂ ಲಿಙ್ಗಂ ಪಶ್ಯತಿ ನಾ ಕ್ಷರತ್||೧೩|| (ಇತಿ ವೃಷ್ಯಃ ಪಿಪ್ಪಲೀಯೋಗಃ)| ಶ್ವದಂಷ್ಟ್ರಾಯಾ ವಿದಾರ್ಯಾಶ್ಚ ರಸೇ ಕ್ಷೀರಚತುರ್ಗುಣೇ| ಘೃತಾಢ್ಯಃ ಸಾಧಿತೋ ವೃಷ್ಯೋ ಮಾಷಷಷ್ಟಿಕಪಾಯಸಃ||೧೪|| (ಇತಿ ವೃಷ್ಯಪಾಯಸಯೋಗಃ)|

ಪ್ರಕುಞ್ಚಂ ಪಲಮ್| ಕ್ಷೀರಧಾರಾವದೋಹಿತಾ ಇತಿ ಪಿಪ್ಪಲೀಕಲ್ಕಾದುಪರಿ ಕ್ಷೀರಧಾರಾವದೋಹಃ ಕರ್ತವ್ಯಃ; ಕ್ಷೀರಂ ಚ ತಾವದ್ದೋಹ್ಯಂ ಯಾವತಾ ಪಾನಯೋಗ್ಯಾಃ ಪಿಪ್ಪಲ್ಯೋ ಭವನ್ತಿ||೧೨-೧೪||

Adhikarana 7 (15-17) · Śloka 17

ಫಲಾನಾಂ ಜೀವನೀಯಾನಾಂ ಸ್ನಿಗ್ಧಾನಾಂ ರುಚಿಕಾರಿಣಾಮ್| ಕುಡವಶ್ಚೂರ್ಣಿತಾನಾಂ ಸ್ಯಾತ್ ಸ್ವಯಙ್ಗುಪ್ತಾಫಲಸ್ಯ ಚ||೧೫|| ಕುಡವಶ್ಚೈವ ಮಾಷಾಣಾಂ ದ್ವೌ ದ್ವೌ ಚ ತಿಲಮುದ್ಗಯೋಃ| ಗೋಧೂಮಶಾಲಿಚೂರ್ಣಾನಾಂ ಕುಡವಃ ಕುಡವೋ ಭವೇತ್||೧೬|| ಸರ್ಪಿಷಃ ಕುಡವಶ್ಚೈಕಸ್ತತ್ ಸರ್ವಂ ಕ್ಷೀರಮರ್ದಿತಮ್ | ಪಕ್ತ್ವಾ ಪೂಪಲಿಕಾಃ ಖಾದೇದ್ಬಹ್ವ್ಯಃ ಸ್ಯುರ್ಯಸ್ಯ ಯೋಷಿತಃ||೧೭|| (ಇತಿ ವೃಷ್ಯಪೂಪಲಿಕಾಃ)|

ಫಲಾನಾಮಿತ್ಯಾದಿ| ಫಲಾನಾಮಿತಿ ಜೀವನೀಯಾನಾಮಿತ್ಯಾದಿಭಿಸ್ತ್ರಿಭಿಃ ಪ್ರತ್ಯೇಕಮಭಿಸಮ್ಬಧ್ಯತೇ| ಜೀವನೀಯಾನಾಮಿತಿ ಷಟ್ಕಕಷಾಯವರ್ಗೋಕ್ತಾನಾಂ ಜೀವಕರ್ಷಭಾದೀನಾಂ ದಶಾನಾಮ್| ಸ್ನಿಗ್ಧಾನಾಮಿತಿ ಸ್ನೇಹೋಪಗಾನಾಂ ಮೃದ್ವೀಕಾದೀನಾಂ ದಶಾನಾಂ ಸಪ್ತಕಕಷಾಯವರ್ಗೋಕ್ತಾನಾಮ್| ತಥಾ ರುಚಿಕಾರಿಣಾಮಿತಿ ಚತುಷ್ಕಕಷಾಯವರ್ಗೋಕ್ತಾನಾಮಾಮ್ರಾದೀನಾಂ ಹೃದ್ಯಾನಾಂ ದಶಾನಾಮಿತಿ| ಏಷಾಂ ಜೀವನೀಯಪ್ರಭೃತೀನಾಂ ಫಲಾನಾಂ ಚೂರ್ಣಿತಾನಾಂ ಮಿಲಿತ್ವಾ ಕುಡವೋ ಗ್ರಾಹ್ಯಃ| ಅನ್ಯದತಿರೋಹಿತಾರ್ಥಮ್| ತಥಾ ಹ್ಯಯಂ ಪ್ರಯೋಗೋ ಜತೂಕರ್ಣೇ ಚ ಪಠ್ಯತೇ- “ದ್ರಾಕ್ಷಾಖರ್ಜೂರಮಾಷಾಜಡಾಗೋಧೂಮಶಾಲಿಘೃತಾನಾಂ ಕುಡವಃ, ತಿಲಮುದ್ಗೌ ದ್ವಿಕೌಡವಿಕೌ ಚೂರ್ಣಯಿತ್ವಾ” ಇತ್ಯಾದಿ||೧೫-೧೭||

Adhikarana 8 (18) · Śloka 18

ಘೃತಂ ಶತಾವರೀಗರ್ಭಂ ಕ್ಷೀರೇ ದಶಗುಣೇ ಪಚೇತ್| ಶರ್ಕರಾಪಿಪ್ಪಲೀಕ್ಷೌದ್ರಯುಕ್ತಂ ತದ್ವೃಷ್ಯಮುತ್ತಮಮ್||೧೮|| (ಇತಿ ವೃಷ್ಯಂ ಶತಾವರೀಘೃತಮ್)|

ಘೃತಂ ಶತಾವರೀತ್ಯಾದೌ ಶರ್ಕರಾದೀನಾಂ ಪ್ರಕ್ಷೇಪ್ಯಾಣಾಮನ್ಯತೋದೃಷ್ಟನ್ಯಾಯಾದ್ಘೃತಾತ್ ಪಾದಿಕತ್ವಂ (ಘೃತಸ್ಯ ಪ್ರಾಸ್ಥಿಕತ್ವಮ್ )||೧೮||

Adhikarana 9 (19) · Śloka 19

ಕರ್ಷಂ ಮಧುಕಚೂರ್ಣಸ್ಯ ಘೃತಕ್ಷೌದ್ರಸಮಾಂಶಿಕಮ್ | ಪ್ರಯುಙ್ಕ್ತೇ ಯಃ ಪಯಶ್ಚಾನು ನಿತ್ಯವೇಗಃ ಸ ನಾ ಭವೇತ್||೧೯|| (ಇತಿ ವೃಷ್ಯಮಧುಕಯೋಗಃ)|

ಕರ್ಷಮಿತ್ಯಾದಿಕಾನ್ತಾಃ ಪಞ್ಚದಶ ಪ್ರಯೋಗಾಃ||೧೯||

Adhikarana 10 (20-25) · Śloka 25

ಘೃತಕ್ಷೀರಾಶನೋ ನಿರ್ಭೀರ್ನಿರ್ವ್ಯಾಧಿರ್ನಿತ್ಯಗೋ ಯುವಾ| ಸಙ್ಕಲ್ಪಪ್ರವಣೋ ನಿತ್ಯಂ ನರಃ ಸ್ತ್ರೀಷು ವೃಷಾಯತೇ||೨೦|| ಕೃತೈಕಕೃತ್ಯಾಃ ಸಿದ್ಧಾರ್ಥಾ ಯೇ ಚಾನ್ಯೋಽನ್ಯಾನುವರ್ತಿನಃ| ಕಲಾಸು ಕುಶಲಾಸ್ತುಲ್ಯಾಃ ಸತ್ತ್ವೇನ ವಯಸಾ ಚ ಯೇ||೨೧|| ಕುಲಮಾಹಾತ್ಮ್ಯದಾಕ್ಷಿಣ್ಯಶೀಲಶೌಚಸಮನ್ವಿತಾಃ| ಯೇ ಕಾಮನಿತ್ಯಾ ಯೇ ಹೃಷ್ಟಾ ಯೇ ವಿಶೋಕಾ ಗತವ್ಯಥಾಃ||೨೨|| ಯೇ ತುಲ್ಯಶೀಲಾ ಯೇ ಭಕ್ತಾ ಯೇ ಪ್ರಿಯಾ ಯೇ ಪ್ರಿಯಂವದಾಃ| ತೈರ್ನರಃ ಸಹ ವಿಸ್ರಬ್ಧಃ ಸುವಯಸ್ಯೈರ್ವೃಷಾಯತೇ||೨೩|| ಅಭ್ಯಙ್ಗೋತ್ಸಾದನಸ್ನಾನಗನ್ಧಮಾಲ್ಯವಿಭೂಷಣೈಃ| ಗೃಹಶಯ್ಯಾಸನಸುಖೈರ್ವಾಸೋಭಿರಹತೈಃ ಪ್ರಿಯೈಃ||೨೪|| ವಿಹಙ್ಗಾನಾಂ ರುತೈರಿಷ್ಟೈಃ ಸ್ತ್ರೀಣಾಂ ಚಾಭರಣಸ್ವನೈಃ| ಸಂವಾಹನೈರ್ವರಸ್ತ್ರೀಣಾಮಿಷ್ಟಾನಾಂ ಚ ವೃಷಾಯತೇ||೨೫||

ಘೃತಕ್ಷೀರಾಶನ ಇತ್ಯಾದಿನಾ ತು ವೃಷ್ಯತ್ವಾರ್ಥಿನ ಆಹಾರಾಚಾರಾಭಿಧಾನಮ್| ನಿತ್ಯಮಿತ್ಯನೇನ ವ್ಯವಾಯನಿತ್ಯತಯಾ ಶುಕ್ರಮಾರ್ಗಾನವರೋಧೇನ ವ್ಯವಾಯಶಕ್ತಿಂ ದರ್ಶಯತಿ| ಕೃತಮೇಕಂ ಕೃತ್ಯಂ ಯೈಸ್ತೇ ತಥಾ, ಏತಚ್ಚ ಅನ್ಯೋಽನ್ಯಾರ್ಥರಾಗಕಾರಣಮ್| ಸಿದ್ಧಾರ್ಥಾ ಇತಿ ಸಿದ್ಧಸಾಧ್ಯಾಃ, ಅಕೃತಾರ್ಥಾ ಹಿ ವ್ಯಾಕುಲಮನಸೋ ನ ಕಾಮಕ್ಷಮಾಃ| ವೃಷಾಯತ ಇತಿ ಉಪಚಿತಪ್ರವೃತ್ತ್ಯುನ್ಮುಖಶುಕ್ರೋ ಭವತಿ||೨೦-೨೫||

Adhikarana 11 (26-28) · Śloka 28

ಮತ್ತದ್ವಿರೇಫಾಚರಿತಾಃ ಸಪದ್ಮಾಃ ಸಲಿಲಾಶಯಾಃ| ಜಾತ್ಯುತ್ಪಲಸುಗನ್ಧೀನಿ ಶೀತಗರ್ಭಗೃಹಣಿ ಚ||೨೬|| ನದ್ಯಃ ಫೇನೋತ್ತರೀಯಾಶ್ಚ ಗಿರಯೋ ನೀಲಸಾನವಃ| ಉನ್ನತಿರ್ನೀಲಮೇಘಾನಾಂ, ರಮ್ಯಚನ್ದ್ರೋದಯಾ ನಿಶಾಃ||೨೭|| ವಾಯವಃ ಸುಖಸಂಸ್ಪರ್ಶಾಃ ಕುಮುದಾಕರಗನ್ಧಿನಃ| ರತಿಭೋಗಕ್ಷಮಾ ರಾತ್ರ್ಯಃ ಸಙ್ಕೋಚಾಗುರುವಲ್ಲಭಾಃ||೨೮||

‘ಮತ್ತದ್ವಿರೇಫಾಚರಿತಾಃ’ ಇತ್ಯಾದಿ ‘ಗೃಹಣಿ ಚ’ ಇತ್ಯನ್ತಂ ಯೋಗ್ಯತಯಾ ಋತುವಿಭಾಗೇನಾನುಕ್ತಮಪಿ ಗ್ರೀಷ್ಮ ಏವ ಜ್ಞೇಯಂ, ತಥಾ ‘ಮೇಘಾನಾಂ’ ಇತ್ಯನ್ತಂ ಪ್ರಾವೃಷಿ, ತಥಾ ‘ಗನ್ಧಿನಃ’ ಇತ್ಯನ್ತಂ ಶರದಿ, ‘ವಲ್ಲಭಾಃ’ ಇತ್ಯನ್ತಂ ಚ ವಿಧಾನಂ ಹೇಮನ್ತಶಿಶಿರಯೋರ್ಜ್ಞೇಯಮ್| ಸಙ್ಕೋಚಂ ಕುಙ್ಕುಮಂ, ಸಙ್ಕೋಚಾಗುರುಣೋಃ ಸಮಾಲಭನಾರ್ಥಂ ವಲ್ಲಭಾ ಯಾಸು ನಿಶಾಸು ತಾಸ್ತಥಾ||೨೬-೨೮||

Adhikarana 12 (29-31) · Śloka 31

ಸುಖಾಃ ಸಹಾಯಾಃ ಪರಪುಷ್ಟಘುಷ್ಟಾಃ ಫುಲ್ಲಾ ವನಾನ್ತಾ ವಿಶದಾನ್ನಪಾನಾಃ| ಗಾನ್ಧರ್ವಶಬ್ದಾಶ್ಚ ಸುಗನ್ಧಯೋಗಾಃ ಸತ್ತ್ವಂ ವಿಶಾಲಂ ನಿರುಪದ್ರವಂ ಚ||೨೯|| ಸಿದ್ಧಾರ್ಥತಾ ಚಾಭಿನವಶ್ಚ ಕಾಮಃ ಸ್ತ್ರೀ ಚಾಯುಧಂ ಸರ್ವಮಿಹಾತ್ಮಜಸ್ಯ| ವಯೋ ನವಂ ಜಾತಮದಶ್ಚ ಕಾಲೋ ಹರ್ಷಸ್ಯ ಯೋನಿಃ ಪರಮಾ ನರಾಣಾಮ್||೩೦|| ತತ್ರ ಶ್ಲೋಕಃ- ಪ್ರಹರ್ಷಯೋನಯೋ ಯೋಗಾ ವ್ಯಾಖ್ಯಾತಾ ದಶ ಪಞ್ಚ ಚ| ಮಾಷಪರ್ಣಭೃತೀಯೇಽಸ್ಮಿನ್ ಪಾದೇ ಶುಕ್ರಬಲಪ್ರದಾಃ ||೩೧||

ಸುಖಾ ಇತ್ಯಾದಿಗ್ರನ್ಥವಿಧಾನಂ ತು ವಸನ್ತಾಭಿಪ್ರಾಯವಿಹಿತಮನ್ಯತ್ರಾಪ್ಯವಿರುದ್ಧಮ್| ಆತ್ಮಜಸ್ಯೇತಿ ಮನ್ಮಥಸ್ಯ| ಜಾತಮದಃ ಕಾಲೋ ವಸನ್ತಾದಿಃ||೨೯-೩೧||

Adhikarana puShpikA · Śloka 3

ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇ ಚಿಕಿತ್ಸಾಸ್ಥಾನೇ ವಾಜೀಕರಣಾಧ್ಯಾಯೇ ಮಾಷಪರ್ಣಭೃತೀಯೋ ನಾಮ ವಾಜೀಕರಣಪಾದಸ್ತೃತೀಯಃ||೩||

ಇತಿ ಶ್ರೀಚಕ್ರಪಾಣಿದತ್ತವಿರಚಿತಾಯಾಂ ಚರಕತಾತ್ಪರ್ಯಟೀಕಾಯಾಮಾಯುರ್ವೇದದೀಪಿಕಾಯಾಂ ಚಿಕಿತ್ಸಾಸ್ಥಾನೇ ವಾಜೀಕರಣಾಧ್ಯಾಯೇ ಮಾಷಪರ್ಣಭೃತೀಯೋ ನಾಮ ತೃತೀಯಃ ಪಾದಃ||೩||