Adhikarana 1 (1-2) · Śloka 2
ಅಥಾತಃ ಪುಮಾಞ್ಜಾತಬಲಾದಿಕಂ ವಾಜೀಕರಣಪಾದಂ ವ್ಯಾಖ್ಯಾಸ್ಯಾಮಃ||೧|| ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨||
अथातः पुमाञ्जातबलादिकं वाजीकरणपादं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
ಪಾರಿಶೇಷ್ಯಾತ್ ಪುಮಾಞ್ಜಾತಬಲಾದಿಕ ಉಚ್ಯತೇ| ಪುಮಾಞ್ಜಾತಬಲಾದಯಃ ಶಬ್ದಾ ಅಸ್ಮಿನ್ ವಿದ್ಯನ್ತ ಇತಿ ಪುಮಾಞ್ಜಾತಬಲಾದಿಕಃ; ಆಸಿಕ್ತಕ್ಷೀರಿಕವಚ್ಛಬ್ದಸಿದ್ಧಿಃ||೧-೨||
Adhikarana 2 (3-10) · Śloka 10
ಪುಮಾನ್ ಯಥಾ ಜಾತಬಲೋ ಯಾವದಿಚ್ಛಂ ಸ್ತ್ರಿಯೋ ವ್ರಜೇತ್| ಯಥಾ ಚಾಪತ್ಯವಾನ್ ಸದ್ಯೋ ಭವೇತ್ತದುಪದೇಕ್ಷ್ಯತೇ||೩|| ನ ಹಿ ಜಾತಬಲಾಃ ಸರ್ವೇ ನರಾಶ್ಚಾಪತ್ಯಭಾಗಿನಃ| ಬೃಹಚ್ಛರೀರಾ ಬಲಿನಃ ಸನ್ತಿ ನಾರೀಷು ದುರ್ಬಲಾಃ||೪|| ಸನ್ತಿ ಚಾಲ್ಪಾಶ್ರಯಾಃ ಸ್ತ್ರೀಷು ಬಲವನ್ತೋ ಬಹುಪ್ರಜಾಃ| ಪ್ರಕೃತ್ಯಾ ಚಾಬಲಾಃ ಸನ್ತಿ ಸನ್ತಿ ಚಾಮಯದುರ್ಬಲಾಃ||೫|| ನರಾಶ್ಚಟಕವತ್ ಕೇಚಿದ್ ವ್ರಜನ್ತಿ ಬಹುಶಃ ಸ್ತ್ರಿಯಮ್| ಗಜವಚ್ಚ ಪ್ರಸಿಞ್ಚನ್ತಿ ಕೇಚಿನ್ನ ಬಹುಗಾಮಿನಃ||೬|| ಕಾಲಯೋಗಬಲಾಃ ಕೇಚಿತ್ ಕೇಚಿದಭ್ಯಸನಧ್ರುವಾಃ| ಕೇಚಿತ್ ಪ್ರಯತ್ನೈರ್ವ್ಯಜ್ಯನ್ತೇ ವೃಷಾಃ ಕೇಚಿತ್ ಸ್ವಭಾವತಃ||೭|| ತಸ್ಮಾತ್ ಪ್ರಯೋಗಾನ್ ವಕ್ಷ್ಯಾಮೋ ದುರ್ಬಲಾನಾಂ ಬಲಪ್ರದಾನ್| ಸುಖೋಪಭೋಗಾನ್ ಬಲಿನಾಂ ಭೂಯಶ್ಚ ಬಲವರ್ಧನಾನ್||೮|| ಪೂರ್ವಂ ಶುದ್ಧಶರೀರಾಣಾಂ ನಿರೂಹೈಃ ಸಾನುವಾಸನೈಃ| ಬಲಾಪೇಕ್ಷೀ ಪ್ರಯುಞ್ಜೀತ ಶುಕ್ರಾಪತ್ಯವಿವರ್ಧನಾನ್||೯|| ಘೃತತೈಲರಸಕ್ಷೀರಶರ್ಕರಾಮಧುಸಂಯುತಾಃ| ಬಸ್ತಯಃ ಸಂವಿಧಾತವ್ಯಾಃ ಕ್ಷೀರಮಾಂಸರಸಾಶಿನಾಮ್||೧೦||
पुमान् यथा जातबलो यावदिच्छं स्त्रियो व्रजेत्| यथा चापत्यवान् सद्यो भवेत्तदुपदेक्ष्यते||३|| न हि जातबलाः सर्वे नराश्चापत्यभागिनः| बृहच्छरीरा बलिनः सन्ति नारीषु दुर्बलाः||४|| सन्ति चाल्पाश्रयाः स्त्रीषु बलवन्तो बहुप्रजाः| प्रकृत्या चाबलाः सन्ति सन्ति चामयदुर्बलाः||५|| नराश्चटकवत् केचिद् व्रजन्ति बहुशः स्त्रियम्| गजवच्च प्रसिञ्चन्ति केचिन्न बहुगामिनः||६|| कालयोगबलाः केचित् केचिदभ्यसनध्रुवाः| केचित् प्रयत्नैर्व्यज्यन्ते वृषाः केचित् स्वभावतः||७|| तस्मात् प्रयोगान् वक्ष्यामो दुर्बलानां बलप्रदान्| सुखोपभोगान् बलिनां भूयश्च बलवर्धनान्||८|| पूर्वं शुद्धशरीराणां निरूहैः सानुवासनैः| बलापेक्षी प्रयुञ्जीत शुक्रापत्यविवर्धनान्||९|| घृततैलरसक्षीरशर्करामधुसंयुताः| बस्तयः संविधातव्याः क्षीरमांसरसाशिनाम्||१०||
🔊 Audio coming soon
ಜಾತಬಲತ್ವೇ ಸತ್ಯಪಿ ನಾವಶ್ಯಮಪತ್ಯಭಾಗಿತ್ವಂ ಭವತೀತಿ ಕೃತ್ವಾ ‘ಯಥಾ ಜಾತಬಲಃ’ ಇತ್ಯುಕ್ತೇಽಪಿ ‘ಯಥಾ ಚಾಪತ್ಯವಾನ್ ಭವೇತ್’ ಇತ್ಯುಕ್ತಮ್| ತದೇವ ಶುಕ್ರವೈಚಿತ್ರ್ಯಂ ಸ್ಫೋಟಯತಿ- ನ ಹೀತ್ಯಾದಿ| ‘ನ ಹಿ ಜಾತಬಲಾಃ ಸರ್ವೇ’ ಇತ್ಯೇಕಃ ಪಕ್ಷಃ, ತಥಾ ‘ನರಾ ನಾಪತ್ಯಭಾಗಿನಃ ಸರ್ವೇ’ ಇತಿ ದ್ವಿತೀಯಃ ಪಕ್ಷೋ ಜ್ಞೇಯಃ| ಏತಚ್ಛುಕ್ರಬಲಭೇದಪ್ರಸಙ್ಗಾದಪರಾನಪಿ ಶುಕ್ರಬಲವಿಶೇಷಾನಾಹ- ಬೃಹಚ್ಛರೀರಾ ಇತ್ಯಾದಿ| ಅಲ್ಪಾಶ್ರಯಾ ಅಲ್ಪಶರೀರಾಃ, ಏತೇ ಚ ಶುಕ್ರಸಾರತ್ವೇನ ನಾರೀಷು ಬಲವನ್ತೋ ಬಹುಪ್ರಜಾಶ್ಚ ಭವನ್ತಿ| ಗಜವತ್ ಪ್ರಸಿಞ್ಚನ್ತೀತಿ ಶುಕ್ರಂ ಬಹು ವಿಸೃಜನ್ತಿ| ಕಾಲಯೋಗೇನ ಹೇಮನ್ತಾದಿಕಾಲಸಮ್ಬನ್ಧೇನ ವ್ಯವಾಯೇ ಬಲವನ್ತೋ ಭವನ್ತೀತಿ ಕಾಲಯೋಗಬಲಾಃ| ಅಭ್ಯಸನಧ್ರುವಾ ಇತಿ ವ್ಯವಾಯಾಭ್ಯಾಸೇನೈವ ವ್ಯವಾಯಸಮರ್ಥಾ ಭವನ್ತಿ| ಏವಂ ಪ್ರಯತ್ನೈರ್ವ್ಯಜ್ಯನ್ತ ಇತಿ ವೃಷ್ಯಪ್ರಯೋಗೈಃ ಸ್ತ್ರೀಷು ಪ್ರವರ್ತನ್ತೇ| ಸುಖೋಪಭೋಗಾನಿತಿ ಸುಖಾನುಷ್ಠಾನಾನ್| ನಿರೂಹಾನುವಾಸನಶುದ್ಧಾನಾಂ ವೃಷ್ಯಪ್ರಯೋಗಾಃ ಫಲದಾ ಭವನ್ತೀತಿ ನಿರೂಹಾನುವಾಸನಾಭಿಧಾನಮ್||೩-೧೦||
Adhikarana 3 (11-14) · Śloka 14
ಪಿಷ್ಟ್ವಾ ವರಾಹಮಾಂಸಾನಿ ದತ್ತ್ವಾ ಮರಿಚಸೈನ್ಧವೇ| ಕೋಲವದ್ಗುಲಿಕಾಃ ಕೃತ್ವಾ ತಪ್ತೇ ಸರ್ಪಿಷಿ ವರ್ತಯೇತ್ ||೧೧|| ವರ್ತನಸ್ತಮ್ಭಿತಾಸ್ತಾಶ್ಚ ಪ್ರಕ್ಷೇಪ್ಯಾಃ ಕೌಕ್ಕುಟೇ ರಸೇ| ಘೃತಾಢ್ಯೇ ಗನ್ಧಪಿಶುನೇ ದಧಿದಾಡಿಮಸಾರಿಕೇ||೧೨|| ಯಥಾ ನ ಭಿನ್ದ್ಯಾದ್ಗುಲಿ(ಟಿ)ಕಾಸ್ತಥಾ ತಂ ಸಾಧಯೇದ್ರಸಮ್| ತಂ ಪಿಬನ್ ಭಕ್ಷಯಂಸ್ತಾಶ್ಚ ಲಭತೇ ಶುಕ್ರಮಕ್ಷಯಮ್||೧೩|| ಮಾಂಸಾನಾಮೇವಮನ್ಯೇಷಾಂ ಮೇದ್ಯಾನಾಂ ಕಾರಯೇದ್ಭಿಷಕ್| ಗುಟಿಕಾಃ ಸರಸಾಸ್ತಾಸಂ ಪ್ರಯೋಗಃ ಶುಕ್ರವರ್ಧನಃ||೧೪|| (ಇತಿ ವೃಷ್ಯಾ ಮಾಂಸಗುಟಿಕಾಃ)|
पिष्ट्वा वराहमांसानि दत्त्वा मरिचसैन्धवे| कोलवद्गुलिकाः कृत्वा तप्ते सर्पिषि वर्तयेत् ||११|| वर्तनस्तम्भितास्ताश्च प्रक्षेप्याः कौक्कुटे रसे| घृताढ्ये गन्धपिशुने दधिदाडिमसारिके||१२|| यथा न भिन्द्याद्गुलि(टि)कास्तथा तं साधयेद्रसम्| तं पिबन् भक्षयंस्ताश्च लभते शुक्रमक्षयम्||१३|| मांसानामेवमन्येषां मेद्यानां कारयेद्भिषक्| गुटिकाः सरसास्तासं प्रयोगः शुक्रवर्धनः||१४|| (इति वृष्या मांसगुटिकाः)|
🔊 Audio coming soon
ವರ್ತನಸ್ತಮ್ಭಿತಾ ಇತಿ ವರ್ತನೇನ ಕಠಿನೀಕೃತಾಃ| ದಧಿದಾಡಿಮಸಾರಾಭ್ಯಾಂ ಸಂಸ್ಕೃತಂ ದಧಿದಾಡಿಮಸಾರಿಕಮ್| ದಾಡಿಮಸಾರಶ್ಚ ದಾಡಿಮರಸಃ| ಮಾಂಸಾನಾಮಿತ್ಯಾದಿ ಅತಿದೇಶಯೋಗೋ ದ್ವಿತೀಯಃ| ಮೇದ್ಯಾನಾಮಿತಿ ಮೇದುರಾಣಾಮ್||೧೧-೧೪||
Adhikarana 4 (15-16) · Śloka 16
ಮಾಷಾನಙ್ಕುರಿತಾಞ್ಛುದ್ಧಾನ್ ವಿತುಷಾನ್ ಸಾಜಡಾಫಲಾನ್| ಘೃತಾಢ್ಯೇ ಮಾಹಿಷರಸೇ ದಧಿದಾಡಿಮಸಾರಿಕೇ||೧೫|| ಪ್ರಕ್ಷಿಪೇನ್ಮಾತ್ರಯಾ ಯುಕ್ತೋ ಧಾನ್ಯಜೀರಕನಾಗರೈಃ| ಭುಕ್ತಃ ಪೀತಶ್ಚ ಸ ರಸಃ ಕುರುತೇ ಶುಕ್ರಮಕ್ಷಯಮ್||೧೬|| (ಇತಿ ವೃಷ್ಯೋ ಮಾಹಿಷರಸಃ)|
माषानङ्कुरिताञ्छुद्धान् वितुषान् साजडाफलान्| घृताढ्ये माहिषरसे दधिदाडिमसारिके||१५|| प्रक्षिपेन्मात्रया युक्तो धान्यजीरकनागरैः| भुक्तः पीतश्च स रसः कुरुते शुक्रमक्षयम्||१६|| (इति वृष्यो माहिषरसः)|
🔊 Audio coming soon
ಅಜಡಾ ಶೂಕಶಿಮ್ಬೀ| ಭುಕ್ತಃ ಪೀತಶ್ಚೇತಿ ಪೂರ್ವಯೋಗವದ್ಧನಭಾಗಸ್ಯ ಭೋಜನಂ, ದ್ರವಸ್ಯ ಚ ಪಾನಂ ಜ್ಞೇಯಮ್||೧೫-೧೬||
Adhikarana 5 (17-18) · Śloka 18
ಆರ್ದ್ರಾಣಿ ಮತ್ಸ್ಯಮಾಂಸಾನಿ ಶಫರೀರ್ವಾ ಸುಭಾರ್ಜಿತಾಃ| ತಪ್ತೇ ಸರ್ಪಿಷಿ ಯಃ ಖಾದೇತ್ ಸ ಗಚ್ಛೇತ್ ಸ್ತ್ರೀಷು ನ ಕ್ಷಯಮ್||೧೭|| ಘೃತಭೃಷ್ಟಾನ್ ರಸೇ ಚ್ಛಾಗೇ ರೋಹಿತಾನ್ ಫಲಸಾರಿಕೇ| ಅನುಪೀತರಸಾನ್ ಸ್ನಿಗ್ಧಾನಪತ್ಯಾರ್ಥೀ ಪ್ರಯೋಜಯೇತ್||೧೮|| (ಇತಿ ವೃಷ್ಯಘೃತಭೃಷ್ಟಮತ್ಸ್ಯಮಾಂಸಾನಿ)|
आर्द्राणि मत्स्यमांसानि शफरीर्वा सुभार्जिताः| तप्ते सर्पिषि यः खादेत् स गच्छेत् स्त्रीषु न क्षयम्||१७|| घृतभृष्टान् रसे च्छागे रोहितान् फलसारिके| अनुपीतरसान् स्निग्धानपत्यार्थी प्रयोजयेत्||१८|| (इति वृष्यघृतभृष्टमत्स्यमांसानि)|
🔊 Audio coming soon
ಮತ್ಸ್ಯಶಬ್ದೇನ ಪ್ರಧಾನಕಲ್ಪನಯಾ ರೋಹಿತಂ ವದನ್ತಿ| ಫಲಸಾರಿಕ ಇತಿ ದಾಡಿಮಾಮಲಕಾದಿಫಲಸಾರಸಂಸ್ಕೃತಮ್||೧೭-೧೮||
Adhikarana 6 (19-22) · Śloka 22
ಕುಟ್ಟಕಂ ಮತ್ಸ್ಯಮಾಂಸಾನಾಂ ಹಿಙ್ಗುಸೈನ್ಧವಧಾನ್ಯಕೈಃ| ಯುಕ್ತಂ ಗೋಧೂಮಚೂರ್ಣೇನ ಘೃತೇ ಪೂಪಲಿಕಾಃ ಪಚೇತ್||೧೯|| ಮಾಹಿಷೇ ಚ ರಸೇ ಮತ್ಸ್ಯಾನ್ ಸ್ನಿಗ್ಧಾಮ್ಲಲವಣಾನ್ ಪಚೇತ್| ರಸೇ ಚಾನುಗತೇ ಮಾಂಸಂ ಪೋಥಯೇತ್ತತ್ರ ಚಾವಪೇತ್||೨೦|| ಮರಿಚಂ ಜೀರಕಂ ಧಾನ್ಯಮಲ್ಪಂ ಹಿಙ್ಗು ನವಂ ಘೃತಮ್| ಮಾಷಪೂಪಲಿಕಾನಾಂ ತದ್ಗರ್ಭಾರ್ಥಮುಪಕಲ್ಪಯೇತ್||೨೧|| ಏತೌ ಪೂಪಲಿಕಾಯೋಗೌ ಬೃಂಹಣೌ ಬಲವರ್ಧನೌ| ಹರ್ಷಸೌಭಾಗ್ಯದೌ ಪುತ್ರ್ಯೌ ಪರಂ ಶುಕ್ರಾಭಿವರ್ಧನೌ||೨೨|| (ಇತಿ ವೃಷ್ಯೌ ಪೂಪಲಿಕಾಯೋಗೌ)|
कुट्टकं मत्स्यमांसानां हिङ्गुसैन्धवधान्यकैः| युक्तं गोधूमचूर्णेन घृते पूपलिकाः पचेत्||१९|| माहिषे च रसे मत्स्यान् स्निग्धाम्ललवणान् पचेत्| रसे चानुगते मांसं पोथयेत्तत्र चावपेत्||२०|| मरिचं जीरकं धान्यमल्पं हिङ्गु नवं घृतम्| माषपूपलिकानां तद्गर्भार्थमुपकल्पयेत्||२१|| एतौ पूपलिकायोगौ बृंहणौ बलवर्धनौ| हर्षसौभाग्यदौ पुत्र्यौ परं शुक्राभिवर्धनौ||२२|| (इति वृष्यौ पूपलिकायोगौ)|
🔊 Audio coming soon
ಕುಟ್ಟಕಮಿತಿ ಕುಟ್ಟನೇನಾಣುಶಃ ಕೃತಮ್||೧೯-೨೨||
Adhikarana 7 (23-27) · Śloka 27
ಮಾಷಾತ್ಮಗುಪ್ತಾಗೋಧೂಮಶಾಲಿಷಷ್ಟಿಕಪೈಷ್ಟಿಕಮ್| ಶರ್ಕರಾಯಾ ವಿದಾರ್ಯಾಶ್ಚ ಚೂರ್ಣಮಿಕ್ಷುರಕಸ್ಯ ಚ||೨೩|| ಸಂಯೋಜ್ಯ ಮಸೃಣೇ ಕ್ಷೀರೇ ಘೃತೇ ಪೂಪಲಿಕಾಃ ಪಚೇತ್| ಪಯೋಽನುಪಾನಾಸ್ತಾಃ ಶೀಘ್ರಂ ಕುರ್ವನ್ತಿ ವೃಷತಾಂ ಪರಾಮ್||೨೪|| (ಇತಿ ವೃಷ್ಯಾ ಮಾಷಾದಿಪೂಪಲಿಕಾಃ)| ಶರ್ಕರಾಯಾಸ್ತುಲೈಕಾ ಸ್ಯಾದೇಕಾ ಗವ್ಯಸ್ಯ ಸರ್ಪಿಷಃ| ಪ್ರಸ್ಥೋ ವಿದಾರ್ಯಾಶ್ಚೂರ್ಣಸ್ಯ ಪಿಪ್ಪಲ್ಯಾಃ ಪ್ರಸ್ಥ ಏವ ಚ||೨೫|| ಅರ್ಧಾಢಕಂ ತುಗಾಕ್ಷೀರ್ಯಾಃ ಕ್ಷೌದ್ರಸ್ಯಾಭಿನವಸ್ಯ ಚ| ತತ್ಸರ್ವಂ ಮೂರ್ಚ್ಛಿತಂ ತಿಷ್ಠೇನ್ಮಾರ್ತಿಕೇ ಘೃತಭಾಜನೇ||೨೬|| ಮಾತ್ರಾಮಗ್ನಿಸಮಾಂ ತಸ್ಯ ಪ್ರಾತಃ ಪ್ರಾತಃ ಪ್ರಯೋಜಯೇತ್| ಏಷ ವೃಷ್ಯಃ ಪರಂ ಯೋಗೋ ಬಲ್ಯೋ ಬೃಂಹಣ ಏವ ಚ||೨೭||
माषात्मगुप्तागोधूमशालिषष्टिकपैष्टिकम्| शर्कराया विदार्याश्च चूर्णमिक्षुरकस्य च||२३|| संयोज्य मसृणे क्षीरे घृते पूपलिकाः पचेत्| पयोऽनुपानास्ताः शीघ्रं कुर्वन्ति वृषतां पराम्||२४|| (इति वृष्या माषादिपूपलिकाः)| शर्करायास्तुलैका स्यादेका गव्यस्य सर्पिषः| प्रस्थो विदार्याश्चूर्णस्य पिप्पल्याः प्रस्थ एव च||२५|| अर्धाढकं तुगाक्षीर्याः क्षौद्रस्याभिनवस्य च| तत्सर्वं मूर्च्छितं तिष्ठेन्मार्तिके घृतभाजने||२६|| मात्रामग्निसमां तस्य प्रातः प्रातः प्रयोजयेत्| एष वृष्यः परं योगो बल्यो बृंहण एव च||२७||
🔊 Audio coming soon
ಇಕ್ಷುರಕಃ ಕೋಕಿಲಾಕ್ಷಃ||೨೩-೨೭||
Adhikarana 8 (28-29) · Śloka 29
ಶತಾವರ್ಯಾ ವಿದಾರ್ಯಾಶ್ಚ ತಥಾ ಮಾಷಾತ್ಮಗುಪ್ತಯೋಃ| ಶ್ವದಂಷ್ಟ್ರಾಯಾಶ್ಚ ನಿಷ್ಕ್ವಾಥಾಞ್ಜಲೇಷು ಚ ಪೃಥಕ್ ಪೃಥಕ್||೨೮|| ಸಾಧಯಿತ್ವಾ ಘೃತಪ್ರಸ್ಥಂ ಪಯಸ್ಯಷ್ಟಗುಣೇ ಪುನಃ| ಶರ್ಕರಾಮಧುಯುಕ್ತಂ ತದಪತ್ಯಾರ್ಥೀ ಪ್ರಯೋಜಯೇತ್||೨೯|| (ಇತ್ಯಪತ್ಯಕರಂ ಘೃತಮ್)|
शतावर्या विदार्याश्च तथा माषात्मगुप्तयोः| श्वदंष्ट्रायाश्च निष्क्वाथाञ्जलेषु च पृथक् पृथक्||२८|| साधयित्वा घृतप्रस्थं पयस्यष्टगुणे पुनः| शर्करामधुयुक्तं तदपत्यार्थी प्रयोजयेत्||२९|| (इत्यपत्यकरं घृतम्)|
🔊 Audio coming soon
ಶರ್ಕರಾಮಧುಸಂಯುಕ್ತಮಿತ್ಯತ್ರ ಪ್ರಕ್ಷೇಪನ್ಯಾಯಾತ್ ಪಾದಿಕತ್ವಂ ಶರ್ಕರಾಮಧುನೋಃ||೨೮-೨೯||
Adhikarana 9 (30-32) · Śloka 32
ಘೃತಪಾತ್ರಂ ಶತಗುಣೇ ವಿದಾರೀಸ್ವರಸೇ ಪಚೇತ್| ಸಿದ್ಧಂ ಪುನಃ ಶತಗುಣೇ ಗವ್ಯೇ ಪಯಸಿ ಸಾಧಯೇತ್||೩೦|| ಶರ್ಕರಾಯಾಸ್ತುಗಾಕ್ಷೀರ್ಯಾಂ ಕ್ಷೌದ್ರಸ್ಯೇಕ್ಷುರಕಸ್ಯ ಚ| ಪಿಪ್ಪಲ್ಯಾಃ ಸಾಜಡಾಯಾಶ್ಚ ಭಾಗೈಃ ಪಾದಾಂಶಿಕೈರ್ಯುತಮ್||೩೧|| ಗುಲಿ(ಟಿ)ಕಾಃ ಕಾರಯೇದ್ವೈದ್ಯೋ ಯಥಾ ಸ್ಥುಲಮುದುಮ್ಬರಮ್| ತಾಸಾಂ ಪ್ರಯೋಗಾತ್ ಪುರುಷಃ ಕುಲಿಙ್ಗ ಇವ ಹೃಷ್ಯತಿ||೩೨|| (ಇತಿ ವೃಷ್ಯಗುಟಿಕಾಃ)|
घृतपात्रं शतगुणे विदारीस्वरसे पचेत्| सिद्धं पुनः शतगुणे गव्ये पयसि साधयेत्||३०|| शर्करायास्तुगाक्षीर्यां क्षौद्रस्येक्षुरकस्य च| पिप्पल्याः साजडायाश्च भागैः पादांशिकैर्युतम्||३१|| गुलि(टि)काः कारयेद्वैद्यो यथा स्थुलमुदुम्बरम्| तासां प्रयोगात् पुरुषः कुलिङ्ग इव हृष्यति||३२|| (इति वृष्यगुटिकाः)|
🔊 Audio coming soon
ಪಾದಾಂಶಿಕೈರಿತಿ ಘೃತಾಪೇಕ್ಷಯಾ ಪಾದಪ್ರಮಾಣೈಃ||೩೦-೩೨||
Adhikarana 10 (33-35) · Śloka 35
ಸಿತೋಪಲಾಪಲಶತಂ ತದರ್ಧಂ ನವಸರ್ಪಿಷಃ| ಕ್ಷೌದ್ರಪಾದೇನ ಸಂಯುಕ್ತಂ ಸಾಧಯೇಜ್ಜಲಪಾದಿಕಮ್||೩೩|| ಸಾನ್ದ್ರಂ ಗೋಧೂಮಚೂರ್ಣಾನಾಂ ಪಾದಂ ಸ್ತೀರ್ಣೇ ಶಿಲಾತಲೇ| ಶುಚೌ ಶ್ಲಕ್ಷ್ಣೇ ಸಮುತ್ಕೀರ್ಯ ಮರ್ದನೇನೋಪಪಾದಯೇತ್||೩೪|| ಶುದ್ಧಾ ಉತ್ಕಾರಿಕಾಃ ಕಾರ್ಯಶ್ಚನ್ದ್ರಮಣ್ಡಲಸನ್ನಿಭಾಃ| ತಾಸಾಂ ಪ್ರಯೋಗಾದ್ಗಜವನ್ನಾರೀಃ ಸನ್ತರ್ಪಯೇನ್ನರಃ||೩೫|| (ಇತಿ ವೃಷ್ಯೋತ್ಕಾರಿಕಾ)|
सितोपलापलशतं तदर्धं नवसर्पिषः| क्षौद्रपादेन संयुक्तं साधयेज्जलपादिकम्||३३|| सान्द्रं गोधूमचूर्णानां पादं स्तीर्णे शिलातले| शुचौ श्लक्ष्णे समुत्कीर्य मर्दनेनोपपादयेत्||३४|| शुद्धा उत्कारिकाः कार्यश्चन्द्रमण्डलसन्निभाः| तासां प्रयोगाद्गजवन्नारीः सन्तर्पयेन्नरः||३५|| (इति वृष्योत्कारिका)|
🔊 Audio coming soon
ಸಮುತ್ಕೀರ್ಯೇತಿ ವಿಸ್ತೀರ್ಯ| ಉತ್ಕಾರಿಕಾಃ ಕಾರ್ಯಾ ಇತ್ಯತ್ರ ಪುನಃ ಪಾಕೇನೈವೋತ್ಕಾರಿಕಾಕರಣಮ್||೩೩-೩೫||
Adhikarana 11 (36-45) · Śloka 45
ಯತ್ ಕಿಞ್ಚಿನ್ಮಧುರಂ ಸ್ನಿಗ್ಧಂ ಜೀವನಂ ಬೃಂಹಣಂ ಗುರು| ಹರ್ಷಣಂ ಮನಸಶ್ಚೈವ ಸರ್ವಂ ತದ್ವೃಷ್ಯಮುಚ್ಯತೇ||೩೬|| ದ್ರವ್ಯೈರೇವಂವಿಧೈಸ್ತಸ್ಮಾದ್ಭಾವಿತಃ ಪ್ರಮದಾಂ ವ್ರಜೇತ್| ಆತ್ಮವೇಗೇನ ಚೋದೀರ್ಣಃ ಸ್ತ್ರೀಗುಣೈಶ್ಚ ಪ್ರಹರ್ಷಿತಃ||೩೭|| ಗತ್ವಾ ಸ್ನಾತ್ವಾ ಪಯಃ ಪೀತ್ವಾ ರಸಂ ವಾಽನು ಶಯೀತ ನಾ| ತಥಾಽಸ್ಯಾಪ್ಯಾಯತೇ ಭೂಯಃ ಶುಕ್ರಂ ಚ ಬಲಮೇವ ಚ||೩೮|| ಯಥಾ ಮುಕುಲಪುಷ್ಪಸ್ಯ ಸು(ಖ) ಗನ್ಧೋ ನೋಪಲಭ್ಯತೇ| ಲಭ್ಯತೇ ತದ್ವಿಕಾಶಾತ್ತು ತಥಾ ಶುಕ್ರಂ ಹಿ ದೇಹಿನಾಮ್||೩೯|| ನರ್ತೇ ವೈ ಷೋಡಶಾದ್ವರ್ಷಾತ್ ಸಪ್ತತ್ಯಾಃ ಪರತೋ ನ ಚ| ಆಯುಷ್ಕಾಮೋ ನರಃ ಸ್ತ್ರೀಭಿಃ ಸಂಯೋಗಂ ಕರ್ತುಮರ್ಹತಿ||೪೦|| ಅತಿಬಾಲೋ ಹ್ಯಸಮ್ಪೂರ್ಣಸರ್ವಧಾತುಃ ಸ್ತ್ರಿಯಂ ವ್ರಜನ್| ಉಪಶುಷ್ಯೇತ ಸಹಸಾ ತಡಾಗಮಿವ ಕಾಜಲಮ್||೪೧|| ಶುಷ್ಕಂ ರೂಕ್ಷಂ ಯಥಾ ಕಾಷ್ಠಂ ಜನ್ತುದಗ್ಧಂ ವಿಜರ್ಜರಮ್| ಸ್ಪೃಷ್ಟಮಾಶು ವಿಶೀರ್ಯೇತ ತಥಾ ವೃದ್ಧಃ ಸ್ತ್ರಿಯೋ ವ್ರಜನ್||೪೨|| ಜರಯಾ ಚಿನ್ತಯಾ ಶುಕ್ರಂ ವ್ಯಾಧಿಭಿಃ ಕರ್ಮಕರ್ಷಣಾತ್| ಕ್ಷಯಂ ಗಚ್ಛತ್ಯನಶನಾತ್ ಸ್ತ್ರೀಣಾಂ ಚಾತಿನಿಷೇವಣಾತ್||೪೩|| ಕ್ಷಯಾದ್ಭಯಾದವಿಶ್ರಮ್ಭಾಚ್ಛೋಕಾತ್ ಸ್ತ್ರೀದೋಷದರ್ಶನಾತ್| ನಾರೀಣಾಮರಸಜ್ಞತ್ವಾದವಿಚಾರಾದಸೇವನಾತ್||೪೪|| ತೃಪ್ತಸ್ಯಾಪಿ ಸ್ತ್ರಿಯೋ ಗನ್ತುಂ ನ ಶಕ್ತಿರುಪಜಾಯತೇ| ದೇಹಸತ್ತ್ವಬಲಾಪೇಕ್ಷೀ ಹರ್ಷಃ ಶಕ್ತಿಶ್ಚ ಹರ್ಷಜಾ||೪೫||
यत् किञ्चिन्मधुरं स्निग्धं जीवनं बृंहणं गुरु| हर्षणं मनसश्चैव सर्वं तद्वृष्यमुच्यते||३६|| द्रव्यैरेवंविधैस्तस्माद्भावितः प्रमदां व्रजेत्| आत्मवेगेन चोदीर्णः स्त्रीगुणैश्च प्रहर्षितः||३७|| गत्वा स्नात्वा पयः पीत्वा रसं वाऽनु शयीत ना| तथाऽस्याप्यायते भूयः शुक्रं च बलमेव च||३८|| यथा मुकुलपुष्पस्य सु(ख) गन्धो नोपलभ्यते| लभ्यते तद्विकाशात्तु तथा शुक्रं हि देहिनाम्||३९|| नर्ते वै षोडशाद्वर्षात् सप्तत्याः परतो न च| आयुष्कामो नरः स्त्रीभिः संयोगं कर्तुमर्हति||४०|| अतिबालो ह्यसम्पूर्णसर्वधातुः स्त्रियं व्रजन्| उपशुष्येत सहसा तडागमिव काजलम्||४१|| शुष्कं रूक्षं यथा काष्ठं जन्तुदग्धं विजर्जरम्| स्पृष्टमाशु विशीर्येत तथा वृद्धः स्त्रियो व्रजन्||४२|| जरया चिन्तया शुक्रं व्याधिभिः कर्मकर्षणात्| क्षयं गच्छत्यनशनात् स्त्रीणां चातिनिषेवणात्||४३|| क्षयाद्भयादविश्रम्भाच्छोकात् स्त्रीदोषदर्शनात्| नारीणामरसज्ञत्वादविचारादसेवनात्||४४|| तृप्तस्यापि स्त्रियो गन्तुं न शक्तिरुपजायते| देहसत्त्वबलापेक्षी हर्षः शक्तिश्च हर्षजा||४५||
🔊 Audio coming soon
ಅನುಕ್ತವಾಜೀಕರಣಂ ಸಙ್ಗೃಹ್ಣನ್ನಾಹ- ಯತ್ಕಿಞ್ಚಿದಿತ್ಯಾದಿ| ಭಾವಿತ ಇತಿ ವಚನಾತ್ ಪ್ರಯೋಗೇಣ ಶರೀರಭಾವನಾಯಾಂ ಸತ್ಯಾಂ ಸ್ತ್ರೀಸೇವಾ ಸಮ್ಭವತೀತಿ ದರ್ಶಯತಿ| ಆತ್ಮವೇಗೇನೇತಿ ಸಙ್ಕಲ್ಪಜಾತೇನಾತ್ಮವೇಗೇನ| ಬಾಲಸ್ಯ ತಡಾಗದೃಷ್ಟಾನ್ತೇನ ಪುನರಪಿ ಶುಕ್ರಸದ್ಭಾವಂ ಕಫಪ್ರಾಧಾನ್ಯಂ ಚ ದರ್ಶಯತಿ; ವೃದ್ಧಸ್ಯ ತು ಜನ್ತುಜಗ್ಧತ್ವಾದಿದೃಷ್ಟಾನ್ತೇನ ವಿನಷ್ಟಸ್ಯಾಪುನರ್ಭಾವಂ ಶುಕ್ರಸ್ಯ ತಥಾಽಭೂಯಿಷ್ಠತಾಂ ಚ ದರ್ಶಯತಿ| ನನು ತೃಪ್ತಸ್ಯ ಶರೀರಬಲಂ ಭವತ್ಯೇವ, ತತ್ ಕಿಂ ತೃಪ್ತಸ್ಯ ಸ್ತ್ರಿಯೋ ಗನ್ತುಮಸಾಮರ್ಥ್ಯಮಿತ್ಯಾಹ- ದೇಹೇತ್ಯಾದಿ| ಏತೇನ ಸತ್ಯಪಿ ತೃಪ್ತಿಜನಿತೇ ಬಲೇ ಕ್ಷಯಾದಿನಾ ದೇಹಮನಸೋರುಪಹತತ್ವಾದ್ಧರ್ಷೋ ನ ಭವತಿ, ಹರ್ಷಾಭಾವಾದ್ ವ್ಯವಾಯಶಕ್ತಿರ್ನ ಭವತೀತ್ಯುಕ್ತಂ ಭವತಿ||೩೬-೪೫||
Adhikarana 12 (46-49) · Śloka 49
ರಸ ಇಕ್ಷೌ ಯಥಾ ದಧ್ನಿ ಸರ್ಪಿಸ್ತೈಲಂ ತಿಲೇ ಯಥಾ| ಸರ್ವತ್ರಾನುಗತಂ ದೇಹೇ ಶುಕ್ರಂ ಸಂಸ್ಪರ್ಶನೇ ತಥಾ||೪೬|| ತತ್ ಸ್ತ್ರೀಪುರುಷಸಂಯೋಗೇ ಚೇಷ್ಟಾಸಙ್ಕಲ್ಪಪೀಡನಾತ್| ಶುಕ್ರಂ ಪ್ರಚ್ಯವತೇ ಸ್ಥಾನಾಜ್ಜಲಮಾರ್ದ್ರಾತ್ ಪಟಾದಿವ||೪೭|| ಹರ್ಷಾತ್ತರ್ಷಾತ್ ಸರತ್ವಾಚ್ಚ ಪೈಚ್ಛಿಲ್ಯಾದ್ಗೌರವಾದಪಿ| ಅಣುಪ್ರವಣಭಾವಾಚ್ಚ ದ್ರುತತ್ವಾನ್ಮಾರುತಸ್ಯ ಚ||೪೮|| ಅಷ್ಟಾಭ್ಯ ಏಭ್ಯೋ ಹೇತುಭ್ಯಃ ಶುಕ್ರಂ ದೇಹಾತ್ ಪ್ರಸಿಚ್ಯತೇ| ಚರತೋ ವಿಶ್ವರೂಪಸ್ಯ ರೂಪದ್ರವ್ಯಂ ಯದುಚ್ಯತೇ||೪೯||
रस इक्षौ यथा दध्नि सर्पिस्तैलं तिले यथा| सर्वत्रानुगतं देहे शुक्रं संस्पर्शने तथा||४६|| तत् स्त्रीपुरुषसंयोगे चेष्टासङ्कल्पपीडनात्| शुक्रं प्रच्यवते स्थानाज्जलमार्द्रात् पटादिव||४७|| हर्षात्तर्षात् सरत्वाच्च पैच्छिल्याद्गौरवादपि| अणुप्रवणभावाच्च द्रुतत्वान्मारुतस्य च||४८|| अष्टाभ्य एभ्यो हेतुभ्यः शुक्रं देहात् प्रसिच्यते| चरतो विश्वरूपस्य रूपद्रव्यं यदुच्यते||४९||
🔊 Audio coming soon
ಸಮ್ಪ್ರತಿ, ಸಮ್ಭವತಿ ಶುಕ್ರಂ ಯಥಾ ದೇಹೇ, ಸ್ಥಿತಂ ಯಥಾ ಚ ಪ್ರವರ್ತತೇ, ತದಾಹ- ರಸ ಇತ್ಯಾದಿ| ಇಕ್ಷ್ವಾದಿದೃಷ್ಟಾನ್ತತ್ರಯೇಣಾನತಿಪ್ರಯತ್ನಾಲ್ಪಪ್ರಯತ್ನಮಹಾಪ್ರಯತ್ನವಾಹ್ಯಶುಕ್ರಾನ್ ಪುರುಷಾನ್ ಯಥಾಕ್ರಮಂ ದರ್ಶಯತಿ| ಸಂಸ್ಪರ್ಶನ ಇತಿ ಸಂಸ್ಪರ್ಶನವತಿ, ತೇನ ಕೇಶಾದೌ ಸಂಸ್ಪರ್ಶನಾವ್ಯಾಪ್ತೇಃ ಶುಕ್ರಮಪಿ ನಾಸ್ತೀತಿ ದರ್ಶಯತಿ| ಸ್ತ್ರೀಪುರುಷಸಂಯೋಗೋ ಮಿಶ್ರೀಭಾವಃ| ಚೇಷ್ಟಾ ವ್ಯವಾಯಚೇಷ್ಟಾ, ಸಙ್ಕಲ್ಪೋ ಯೋಷಿದನುರಾಗಃ, ಪೀಡನಂ ನಾರೀಪುರುಷಯೋಃ ಪರಸ್ಪರಸಮ್ಮೂರ್ಚ್ಛನಮ್; ಅತ್ರ ಚ ನಾರೀಪುರುಷಸಂಯೋಗಃ ಪ್ರಧಾನಂ ಕಾರಣಂ, ತತ್ಸಹಕಾರಿಣಿ ಚೇಷ್ಟಾದೀನಿ| ಆರ್ದ್ರಪಟದೃಷ್ಟಾನ್ತೇನಾಶ್ರಯಾನುಪಘಾತೇನ ಶುಕ್ರಸ್ರವಣಂ ದರ್ಶಯತಿ| ಅಪರಮಪಿ ಶುಕ್ರಪ್ರವೃತ್ತಿಹೇತುಮಾಹ- ಹರ್ಷಾದಿತ್ಯಾದಿ| ಹರ್ಷಃ ಸಙ್ಕಲ್ಪಪೂರ್ವಕಶುಕ್ರೋದ್ರೇಕಧ್ವಜೋಚ್ಛ್ರಾಯಾದಿಕಾರೀಚ್ಛಾ| ತರ್ಷಃ ವನಿತಾಭಿಲಾಷಃ| ಸರತ್ವಮ್ ಅಸ್ಥೈರ್ಯಮ್| ಅನುಪ್ರವಣಭಾವಃ ಅಣುತ್ವೇ ಸತಿ ಬಹಿರ್ನಿರ್ಗಮನಸ್ವಭಾವಃ| ದ್ರುತತ್ವಾನ್ಮಾರುತಸ್ಯ ಚೇತಿ ಶುಕ್ರಪ್ರೇರಕಸ್ಯ ವಾಯೋರಭಿದ್ರವಣಶೀಲತ್ವಾದಿತ್ಯರ್ಥಃ| ಏತೇ ಚ ಯದ್ಯಪಿ ಹೇತವಸ್ತಥಾಽಪಿ ಪ್ರಾಧಾನ್ಯಾತ್ ಪ್ರಥಮಪ್ರತಿಪಾದಿತಸ್ತ್ರೀಪುರುಷಸಂಯೋಗಾದಿರೂಪಹೇತೂನಾಂ ಸಮಷ್ಟೌ ನೈವಾಮೀ ಗಣಿತಾಃ| ಚರತ ಇತಿ ನಾನಾಮಾನುಷಪಶ್ವಾದಿಜಾತಿಷು ಭ್ರಮತಃ| ವಿಶ್ವರೂಪಸ್ಯೇತಿ ಆತ್ಮನಃ| ತಥಾ ಹ್ಯಾತ್ಮಪರ್ಯಾಯೇಷೂಕ್ತಂ- “ಸ ವಿಶ್ವಕರ್ಮಾ ಸ ಚ ವಿಶ್ವರೂಪಃ” (ಶಾ.ಅ.೨) ಇತಿ| ರೂಪದ್ರವ್ಯಮಿತಿ ರೂಪಪ್ರಾಕ್ತನಕಾರಣಮ್| ಏತೇನ, ಅವ್ಯಕ್ತಸ್ಯಾತ್ಮನೋ ವ್ಯಕ್ತಶರೀರನಿರ್ವೃತ್ತೌ ಶುಕ್ರಂ ಹೇತುರಿತ್ಯುಕ್ತಂ ಭವತಿ| ಶುಕ್ರಂ ಚೇಹ ಪ್ರಕರಣಾಗತತ್ವೇನೋಕ್ತಂ; ತೇನ ಆರ್ತವಮಪ್ಯಾತ್ಮನೋ ರೂಪದ್ರವ್ಯಂ ಜ್ಞೇಯಮ್||೪೬-೪೯||
Adhikarana 13 (50) · Śloka 50
ಬಹಲಂ ಮಧುರಂ ಸ್ನಿಗ್ಧಮವಿಸ್ರಂ ಗುರು ಪಿಚ್ಛಿಲಮ್| ಶುಕ್ಲಂ ಬಹು ಚ ಯಚ್ಛುಕ್ರಂ ಫಲವತ್ತದಸಂಶಯಮ್||೫೦||
बहलं मधुरं स्निग्धमविस्रं गुरु पिच्छिलम्| शुक्लं बहु च यच्छुक्रं फलवत्तदसंशयम्||५०||
🔊 Audio coming soon
ಪ್ರಶಸ್ತಶುಕ್ರಗುಣಾನಾಹ- ಬಹಲಮಿತ್ಯಾದಿ||೫೦||
Adhikarana 14 (51) · Śloka 51
ಯೇನ ನಾರೀಷು ಸಾಮರ್ಥ್ಯಂ ವಾಜೀವಲ್ಲಭತೇ ನರಃ| ವ್ರಜೇಚ್ಚಾಭ್ಯಧಿಕಂ ಯೇನ ವಾಜೀಕರಣಮೇವ ತತ್||೫೧||
येन नारीषु सामर्थ्यं वाजीवल्लभते नरः| व्रजेच्चाभ्यधिकं येन वाजीकरणमेव तत्||५१||
🔊 Audio coming soon
ವಾಜೀಕರಣಶಬ್ದನಿರುಕ್ತಿಮಾಹ- ಯೇನೇತ್ಯಾದಿ| ವ್ರಜೇಚ್ಚಾಭ್ಯಧಿಕಮಿತಿ ಪುನಃ ಪುನರ್ಗಚ್ಛೇತ್; ‘ವ್ಯಜ್ಯತೇ’ ಇತಿ ವಾ ಪಾಠಃ, ತತ್ರಾಪಿ ಭೂಯೋ ಗಮನೇನ ನಾರೀಷು ಪುಂಸ್ತ್ವೇನ ವ್ಯಜ್ಯತೇ| ‘ವ್ಯಜ್ಯಾತ್’ ಇತಿ ಪಾಠೇಽಪಿ ಸ ಏವಾರ್ಥೋ ವಿದ್ವದ್ಭಿಃ ಸುಚಿನ್ತನೀಯಃ| ಅನೇನ ನಿರುಕ್ತೇನ ತ್ರಿವಿಧಮಪಿ ವೃಷ್ಯಮವರುಧ್ಯತೇ; ಯಥಾ- ಶುಕ್ರವೃದ್ಧಿಕರಂ ಚ ಮಾಷಾದಿ, ತಥಾ ಸ್ರುತಿಕರಂ ಸಙ್ಕಲ್ಪಾದಿ, ಶುಕ್ರಸ್ರುತಿವೃದ್ಧಿಕರಂ ಕ್ಷೀರಾದಿ| ಯದುಕ್ತಮನ್ಯತ್ರ- “ಶುಕ್ರಸ್ರುತಿಕರಂ ಕಿಞ್ಚಿತ್ ಕಿಞ್ಚಿಚ್ಛುಕ್ರವಿವರ್ಧನಮ್| ಸ್ರುತಿವೃದ್ಧಿಕರಂ ಕಿಞ್ಚಿತ್ ತ್ರಿವಿಧಂ ವೃಷ್ಯಮುಚ್ಯತೇ” ಇತಿ| ತ್ರಿವಿಧಮಪಿ ಹೀದಂ ವ್ಯವಾಯೇ ಬಲವತ್ತ್ವಂ ಪುನಃ ಪುನರ್ವ್ಯವಾಯಶಕ್ತಿಂ ಚ ಕರೋತಿ||೫೧||
Adhikarana 15 (52-53) · Śloka 53
ತತ್ರ ಶ್ಲೋಕೌ- ಹೇತುರ್ಯೋಗೋಪದೇಶಸ್ಯ ಯೋಗಾ ದ್ವಾದಶ ಚೋತ್ತಮಾಃ| ಯತ್ ಪೂರ್ವಂ ಮೈಥುನಾತ್ ಸೇವ್ಯಂ ಸೇವ್ಯಂ ಯನ್ಮೈಥುನಾದನು||೫೨|| ಯದಾ ನ ಸೇವ್ಯಾಃ ಪ್ರಮದಾಃ ಕೃತ್ಸ್ನಃ ಶುಕ್ರವಿನಿಶ್ಚಯಃ| ನಿರುಕ್ತಂ ಚೇಹ ನಿರ್ದಿಷ್ಟಂ ಪುಮಾಞ್ಜಾತಬಲಾದಿಕೇ||೫೩||
तत्र श्लोकौ- हेतुर्योगोपदेशस्य योगा द्वादश चोत्तमाः| यत् पूर्वं मैथुनात् सेव्यं सेव्यं यन्मैथुनादनु||५२|| यदा न सेव्याः प्रमदाः कृत्स्नः शुक्रविनिश्चयः| निरुक्तं चेह निर्दिष्टं पुमाञ्जातबलादिके||५३||
🔊 Audio coming soon
ಹೇತುರಿತ್ಯಾದಿ| ಸಙ್ಗ್ರಹೋ ವ್ಯಕ್ತಃ||೫೨-೫೩||
Adhikarana puShpikA · Śloka 2
ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇ ಚಿಕಿತ್ಸಾಸ್ಥಾನೇ ವಾಜೀಕರಣಾಧ್ಯಾಯೇ ಪುಮಾಞ್ಜಾತಬಲಾದಿಕೋ ನಾಮ ವಾಜೀಕರಣಪಾದಶ್ಚತುರ್ಥಃ||೪|| ಸಮಾಪ್ತಶ್ಚಾಯಂ ದ್ವಿತೀಯೋ ವಾಜೀಕರಣಾಧ್ಯಾಯಃ||೨||
इत्यग्निवेशकृते तन्त्रे चरकप्रतिसंस्कृते चिकित्सास्थाने वाजीकरणाध्याये पुमाञ्जातबलादिको नाम वाजीकरणपादश्चतुर्थः||४|| समाप्तश्चायं द्वितीयो वाजीकरणाध्यायः||२||
🔊 Audio coming soon
ಇತಿ ಶ್ರೀಚಕ್ರಪಾಣಿದತ್ತವಿರಚಿತಾಯಾಮಾಯುರ್ವೇದದೀಪಿಕಾಯಾಂ ಚರಕತಾತ್ಪರ್ಯಟೀಕಾಯಾಂ ಚಿಕಿತ್ಸಾಸ್ಥಾನೇ ವಾಜೀಕರಣಾಧ್ಯಾಯೇ ಪುಮಾಞ್ಜಾತಬಲಾದಿಕೋ ನಾಮ ವಾಜೀಕರಣಪಾದಶ್ಚತುರ್ಥಃ||೪|| ಇತಿ ವಾಜೀಕರಣಾಧ್ಯಾಯೋ ದ್ವಿತೀಯಃ||೨||