Adhikarana 1 (1-2) · Śloka 2
অথাতঃ সংযোগশরমূলীযং বাজীকরণপাদং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथातः संयोगशरमूलीयं वाजीकरणपादं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
স্বস্থোজস্করত্বসামান্যাত্ রসাযনমনু বাজীকরণং বাচ্যং, তত্রাপি বাজীকরণে প্রবৃত্ত্যুপদর্শকপ্রকরণযুক্তত্বাদাদৌ সংযোগশরমূলীয উচ্যতে| সংযোগঃ শরমূলানামস্মিন্নস্তীতি সংযোগশরমূলীযঃ||১-২||
Adhikarana 2 (3) · Śloka 4
বাজীকরণমন্বিচ্ছেত্ পুরুষো নিত্যমাত্মবান্| তদাযত্তৌ হি ধর্মার্থৌ প্রীতিশ্চ যশ এব চ||৩|| পুত্রস্যাযতনং হ্যেতদ্গুণাশ্চৈতে সুতাশ্রযাঃ|৪|
वाजीकरणमन्विच्छेत् पुरुषो नित्यमात्मवान्| तदायत्तौ हि धर्मार्थौ प्रीतिश्च यश एव च||३|| पुत्रस्यायतनं ह्येतद्गुणाश्चैते सुताश्रयाः|४|
🔊 Audio coming soon
অবাজী বাজীবাত্যর্থং মৈথুনে শক্তঃ ক্রিযতে যেন তদ্বাজীকরণম্| উক্তং হি- “বাজীবাতিবলো যেন যাত্যপ্রতিহতঃ স্ত্রিযম্” ইত্যাদি| অন্বিচ্ছেদিতি রসাযনান্মহাফলাত্ তদপেক্ষযাঽল্পফলং বাজীকরণং পশ্চাদিচ্ছেত্| পুরুষ ইতি পদেন তরুণপুরুষগ্রাহিণা বালবৃদ্ধৌ নিষিদ্ধব্যবাযৌ নিরাকরোতি| উক্তং হি- “অতিবালো হ্যসম্পূর্ণসর্বধাতুঃ স্ত্রিযো ব্রজন্| উপতপ্যেত সহসা তডাগমিব কাজলম্|| শুষ্কং রূক্ষং যথা কাষ্ঠং জন্তুজগ্ধং বিজর্জরম্| স্পৃষ্টমাশু বিশীর্যেত তথা বৃদ্ধঃ স্ত্রিযো ব্রজন্” ইতি| নিত্যমিত্যনেন ন রসাযনবত্ সকৃত্প্রযোগো বৃষ্যস্য, কিন্ত্বাহারবত্ সর্বদোপযোগ ইতি দর্শযতি| আত্মবানিত্যনেন দুরাত্মনো বৃষ্যকরণং নিষেধতি, স হি বৃষ্যোপযোগাদুপচিতধাতুঃ সন্নগম্যাগমনমপি কুর্যাত্| ধর্মাদযো বৃষযাযত্তা এব যথা ভবন্তি তদাহ- পুত্রস্যেত্যাদি| আযতনং কারণম্| এতে গুণা ইতি ধর্মাদযঃ; বৃষ্যপ্রযোগজনিতঃ পুত্রো ধর্মাদীন্ পিতুঃ সম্পাদযতীত্যর্থঃ| বাজীকরণসেবযা চেহ যুক্ত্যৈব ঋতুকালে চ মৈথুনং প্রাধান্যেনাভিপ্রেতং, তেন তিস্রৈষণীযে ত্রয উপস্তম্ভাঃ (সূ.অ.১১) ইত্যাদিগ্রন্থেন ব্রহ্মচর্যং যদুক্তং, তদ্ ঋতুকালে যথাবিধিকৃতমৈথুনাপ্রতিষেধকমিতি ন বিরোধঃ||৩||-
Adhikarana 3 (4-7) · Śloka 8
বাজীকরণমগ্র্যং চ ক্ষেত্রং স্ত্রী যা প্রহর্ষিণী||৪|| ইষ্টা হ্যোকৈকশোঽপ্যর্থা পরং প্রীতিকরা স্মৃতাঃ| কিং পুনঃ স্ত্রীশরীরে যে সঙ্ঘাতেন প্রতিষ্ঠিতাঃ||৫|| (সঙ্ঘাতো হীন্দ্রিযার্থানাং স্ত্রীষু নান্যত্র বিদ্যতে)| স্ত্র্যাশ্রযো হীন্দ্রিযার্থো যঃ স প্রীতিজননোঽধিকম্| স্ত্রীষু প্রীতির্বিশেষেণ স্ত্রীষ্বপত্যং প্রতিষ্ঠিতম্||৬|| ধর্মার্থৌ স্ত্রীষু লক্ষ্মীশ্চ স্ত্রীষু লোকাঃ প্রতিষ্ঠিতাঃ| সুরূপা যৌবনস্থা যা লক্ষণৈর্যা বিভূষিতা||৭|| যা বশ্যা শিক্ষিতা যা চ সা স্ত্রী বৃষ্যতমা মতা|৮|
वाजीकरणमग्र्यं च क्षेत्रं स्त्री या प्रहर्षिणी||४|| इष्टा ह्योकैकशोऽप्यर्था परं प्रीतिकरा स्मृताः| किं पुनः स्त्रीशरीरे ये सङ्घातेन प्रतिष्ठिताः||५|| (सङ्घातो हीन्द्रियार्थानां स्त्रीषु नान्यत्र विद्यते)| स्त्र्याश्रयो हीन्द्रियार्थो यः स प्रीतिजननोऽधिकम्| स्त्रीषु प्रीतिर्विशेषेण स्त्रीष्वपत्यं प्रतिष्ठितम्||६|| धर्मार्थौ स्त्रीषु लक्ष्मीश्च स्त्रीषु लोकाः प्रतिष्ठिताः| सुरूपा यौवनस्था या लक्षणैर्या विभूषिता||७|| या वश्या शिक्षिता या च सा स्त्री वृष्यतमा मता|८|
🔊 Audio coming soon
সর্ববাজীকরণেভ্যঃ প্রধানরূপং বাজীকরণমাহ- বাজীত্যাদি| ক্ষেত্রমিব ক্ষেত্রং, তত্র শুক্ররূপবীজপ্ররোহণাত্| অর্থা ইতি শব্দাদযঃ, তে চ স্ত্রীগতাধররস-কলবিঙ্করুত-রূপাদযঃ প্রসিদ্ধা এব| ধর্মার্থৌ স্ত্রীষ্বিতি সহৈব পত্ন্যা ধর্মশ্চর্য ইত্যাদ্যুপদেশাদ্ধর্মঃ, তথাঽনুরক্তা গৃহিণী অর্থরক্ষণাদি করোতীত্যর্থ ইত্যর্থঃ| স্ত্রিযা লক্ষ্ম্যাঃ সংযোগে ধনসম্পদ্ভবতীতি স্ত্রীষু লক্ষ্মীঃ প্রতিষ্ঠিতেত্যর্থঃ| বশ্যা আযত্তা| শিক্ষিতেতি কামশাস্ত্রোক্তগীতবাদিত্রলাস্যাদিচতুঃষষ্টিকলাশিক্ষিতা||৪-৭||-
Adhikarana 4 (8-15) · Śloka 16
নানাভক্ত্যা তু লোকস্য দৈবযোগাচ্চ যোষিতাম্||৮|| তং তং প্রাপ্য বিবর্ধন্তে নরং রূপাদযো গুণাঃ| বযোরূপবচোহাবৈর্যা যস্য পরমাঙ্গনা||৯|| প্রবিশত্যাশু হৃদযং দৈবাদ্বা কর্মণোঽপি বা| হৃদযোত্সবরূপা যা যা সমানমনঃশযা||১০|| সমানসত্ত্বা যা বশ্যা যা যস্য প্রীযতে প্রিযৈঃ| যা পাশভূতা সর্বেষামিন্দ্রিযাণাং পরৈর্গুণৈঃ||১১|| যযা বিযুক্তো নিস্ত্রীকমরতির্মন্যতে জগত্| যস্যা ঋতে শরীরং না ধত্তে শূন্যমিবেন্দ্রিযৈঃ||১২|| শোকোদ্বেগারতিভযৈর্যাং দৃষ্ট্বা নাভিভূযতে| যাতি যাং প্রাপ্য বিস্রম্ভং দৃষ্ট্বা হৃষ্যত্যতীব যাম্||১৩|| অপূর্বামিব যাং যাতি নিত্যং হর্ষাতিবেগতঃ| গত্বা গত্বাঽপি বহুশো যাং তৃপ্তিং নৈব গচ্ছতি||১৪|| সা স্ত্রী বৃষ্যতমা তস্য নানাভাবা হি মানবাঃ| অতুল্যগোত্রাং বৃষ্যাং চ প্রহৃষ্টাং নিরুপদ্রবাম্||১৫|| শুদ্ধস্নাতাং ব্রজেন্নারীমপত্যার্থী নিরামযঃ|১৬|
नानाभक्त्या तु लोकस्य दैवयोगाच्च योषिताम्||८|| तं तं प्राप्य विवर्धन्ते नरं रूपादयो गुणाः| वयोरूपवचोहावैर्या यस्य परमाङ्गना||९|| प्रविशत्याशु हृदयं दैवाद्वा कर्मणोऽपि वा| हृदयोत्सवरूपा या या समानमनःशया||१०|| समानसत्त्वा या वश्या या यस्य प्रीयते प्रियैः| या पाशभूता सर्वेषामिन्द्रियाणां परैर्गुणैः||११|| यया वियुक्तो निस्त्रीकमरतिर्मन्यते जगत्| यस्या ऋते शरीरं ना धत्ते शून्यमिवेन्द्रियैः||१२|| शोकोद्वेगारतिभयैर्यां दृष्ट्वा नाभिभूयते| याति यां प्राप्य विस्रम्भं दृष्ट्वा हृष्यत्यतीव याम्||१३|| अपूर्वामिव यां याति नित्यं हर्षातिवेगतः| गत्वा गत्वाऽपि बहुशो यां तृप्तिं नैव गच्छति||१४|| सा स्त्री वृष्यतमा तस्य नानाभावा हि मानवाः| अतुल्यगोत्रां वृष्यां च प्रहृष्टां निरुपद्रवाम्||१५|| शुद्धस्नातां व्रजेन्नारीमपत्यार्थी निरामयः|१६|
🔊 Audio coming soon
রূপাদিব্যতিরেকেণাপি কাচিত্ কস্যচিত্ কর্মবশাদ্বৃষ্যা স্ত্রী ভবতীতি দর্শযন্নাহ- নানেত্যাদি| দৈবযোগাদিতি প্রাক্তনকর্মবশাত্| বিবর্ধন্ত ইতি বৃষ্যত্বং সম্পাদযন্তি| হাবো নরং প্রতি স্ত্রীণাং শৃঙ্গারচেষ্টাবিশেষঃ| উক্তং চ ভরতেন- “প্রকাশরূপকং সত্ত্বং সত্ত্বোত্প্লবাঃ সমুদ্গতাঃ| তেভ্যো হাবাদিনিষ্পত্তিরিত্যাহুঃ পরমর্ষযঃ” ইতি| দৈবাদিতি প্রাক্তনকর্মণঃ| কর্মণ ইতি ঐহিকাদ্বশীকরণাদিকর্মণঃ| মনঃশযঃ কামঃ| পাশভূতেতি মন-ইন্দ্রিযবন্ধহেতুত্বাত্| ‘নানাভাবা হি মানবাঃ’ ইত্যনেন রূপাদিগুণযোগেন (ন) সর্বপুরুষান্ প্রতি স্ত্রীণাং প্রিযত্বমিতি দর্শযতি||৮-১৫||-
Adhikarana 5 (16-23) · Śloka 24
অচ্ছাযশ্চৈকশাখশ্চ নিষ্ফলশ্চ যথা দ্রুমঃ||১৬|| অনিষ্টগন্ধশ্চৈকশ্চ নিরপত্যস্তথা নরঃ| চিত্রদীপঃ সরঃ শুষ্কমধাতুর্ধাতুসন্নিভঃ||১৭|| নিষ্প্রজস্তৃণপূলীতি মন্তব্যঃ পুরুষাকৃতিঃ| অপ্রতিষ্ঠশ্চ নগ্নশ্চ শূন্যশ্চৈকেন্দ্রিযশ্চ না||১৮|| মন্তব্যো নিষ্ক্রিযশ্চৈব যস্যাপত্যং ন বিদ্যতে| বহুমূর্তির্বহুমুখো বহুব্যূহো বহুক্রিযঃ||১৯|| বহুচক্ষুর্বহুজ্ঞানো বহ্বাত্মা চ বহুপ্রজঃ| মঙ্গল্যেঽযং প্রশস্যোঽযং ধন্যোঽযং বীর্যবানযম্||২০|| বহুশাখোঽযমিতি চ স্তূযতে না বহুপ্রজঃ| প্রীতির্বলং সুখং বৃত্তির্বিস্তারো বিপুলং কুলম্||২১|| যশো লোকাঃ সুখোদর্কাস্তুষ্টিশ্চাপত্যসংশ্রিতাঃ| তস্মাদপত্যমন্বিচ্ছন্ গুণাংশ্চাপত্যসংশ্রিতান্||২২|| বাজীকরণনিত্যঃ স্যাদিচ্ছন্ কামসুখানি চ| উপভোগসুখান্ সিদ্ধান্ বীর্যাপত্যবিবর্ধনান্||২৩|| বাজীকরণসংযোগান্ প্রবক্ষ্যাম্যত উত্তরম্|২৪|
अच्छायश्चैकशाखश्च निष्फलश्च यथा द्रुमः||१६|| अनिष्टगन्धश्चैकश्च निरपत्यस्तथा नरः| चित्रदीपः सरः शुष्कमधातुर्धातुसन्निभः||१७|| निष्प्रजस्तृणपूलीति मन्तव्यः पुरुषाकृतिः| अप्रतिष्ठश्च नग्नश्च शून्यश्चैकेन्द्रियश्च ना||१८|| मन्तव्यो निष्क्रियश्चैव यस्यापत्यं न विद्यते| बहुमूर्तिर्बहुमुखो बहुव्यूहो बहुक्रियः||१९|| बहुचक्षुर्बहुज्ञानो बह्वात्मा च बहुप्रजः| मङ्गल्येऽयं प्रशस्योऽयं धन्योऽयं वीर्यवानयम्||२०|| बहुशाखोऽयमिति च स्तूयते ना बहुप्रजः| प्रीतिर्बलं सुखं वृत्तिर्विस्तारो विपुलं कुलम्||२१|| यशो लोकाः सुखोदर्कास्तुष्टिश्चापत्यसंश्रिताः| तस्मादपत्यमन्विच्छन् गुणांश्चापत्यसंश्रितान्||२२|| वाजीकरणनित्यः स्यादिच्छन् कामसुखानि च| उपभोगसुखान् सिद्धान् वीर्यापत्यविवर्धनान्||२३|| वाजीकरणसंयोगान् प्रवक्ष्याम्यत उत्तरम्|२४|
🔊 Audio coming soon
সম্প্রতি বৃষ্যপ্রযোগসাধ্যস্য পুত্রস্যোপাদেযতাং দর্শযন্নাহ- অচ্ছায ইত্যাদি| একশাখ ইতি একস্বরূপ ইত্যর্থঃ| চিত্রলিখিতো দীপশ্চিত্রদীপঃ| অধাতুর্ধাতুসন্নিভ ইতি অসুবর্ণাদিরূপঃ সুবর্ণাদিবদাভাসতে যো জাতুষকঙ্কণাদিঃ| পূলী নপুংসকধর্মিত্বাত্| তৃণপূলী পুরুষাকৃতিরিতি ভাষযা পুরুষার্থক্রিযাবিরহিত্বং দর্শযতি| কামসুখানি চেত্যনেন পুত্রোত্পাদারিক্তং নাতিশ্লাঘ্যং ফলং দর্শযতি| কামসুখানি হি ঐহিকান্যেব পরং ন পুত্রবদুভযলোকোপকারকাণি| উপভোগে মৈথুনে সুখং কুর্বন্তীত্যুপভোগসুখাঃ; কিংবা, উপভোক্তুং সুখা উপভোগসুখাঃ| বীর্যং শুক্রম্||১৬-২৩||-
Adhikarana 6 (24-32) · Śloka 33
শরমূলেক্ষুমূলানি কাণ্ডেক্ষুঃ সেক্ষুবালিকা||২৪|| শতাবরী পযস্যা চ বিদারী কণ্টকারিকা| জীবন্তী জীবকো মেদা বীরা চর্ষভকো বলা||২৫|| ঋদ্ধির্গোক্ষুরকং রাস্না সাত্মগুপ্তা পুনর্নবা| এষাং ত্রিপলিকান্ ভাগান্ মাষাণামাঢকং নবম্||২৬|| বিপাচযেজ্জলদ্রোণে চতুর্ভাগং চ শেষযেত্| তত্র পেষ্যাণি মধুকং দ্রাক্ষা ফল্গূনি পিপ্পলী||২৭|| আত্মগুপ্তা মধুকানি খর্জূরাণি শতাবরী| বিদার্যামলকেক্ষূণাং রসস্য চ পৃথক্ পৃথক্||২৮|| সর্পিষশ্চাঢকং দদ্যাত্ ক্ষীরদ্রোণং চ তদ্ভিষক্| সাধযেদ্ঘৃতশেষং চ সুপূতং যোজযেত্ পুনঃ||২৯|| শর্করাযাস্তুগাক্ষীর্যাশ্চূর্ণৈঃ প্রস্থোন্মিতৈঃ পৃথক্| পলৈশ্চতুর্ভির্মাগধ্যাঃ পলেন মরিচস্য চ||৩০|| ত্বগেলাকেশরাণাং চ চূর্ণৈরর্ধপলোন্মিতৈঃ| মধুনঃ কুডবাভ্যাং চ দ্বাভ্যাং তত্কারযেদ্ভিষক্||৩১|| পলিকা গুলিকাস্ত্যানাস্তা যথাগ্নি প্রযোজযেত্| এষ বৃষ্যঃ পরং যোগো বৃংহণো বলবর্ধনঃ||৩২|| অনেনাশ্ব ইবোদীর্ণো বলী লিঙ্গং সমর্পযেত্|৩৩| (ইতি বৃংহণীগুটিকা)|
शरमूलेक्षुमूलानि काण्डेक्षुः सेक्षुवालिका||२४|| शतावरी पयस्या च विदारी कण्टकारिका| जीवन्ती जीवको मेदा वीरा चर्षभको बला||२५|| ऋद्धिर्गोक्षुरकं रास्ना सात्मगुप्ता पुनर्नवा| एषां त्रिपलिकान् भागान् माषाणामाढकं नवम्||२६|| विपाचयेज्जलद्रोणे चतुर्भागं च शेषयेत्| तत्र पेष्याणि मधुकं द्राक्षा फल्गूनि पिप्पली||२७|| आत्मगुप्ता मधुकानि खर्जूराणि शतावरी| विदार्यामलकेक्षूणां रसस्य च पृथक् पृथक्||२८|| सर्पिषश्चाढकं दद्यात् क्षीरद्रोणं च तद्भिषक्| साधयेद्घृतशेषं च सुपूतं योजयेत् पुनः||२९|| शर्करायास्तुगाक्षीर्याश्चूर्णैः प्रस्थोन्मितैः पृथक्| पलैश्चतुर्भिर्मागध्याः पलेन मरिचस्य च||३०|| त्वगेलाकेशराणां च चूर्णैरर्धपलोन्मितैः| मधुनः कुडवाभ्यां च द्वाभ्यां तत्कारयेद्भिषक्||३१|| पलिका गुलिकास्त्यानास्ता यथाग्नि प्रयोजयेत्| एष वृष्यः परं योगो बृंहणो बलवर्धनः||३२|| अनेनाश्व इवोदीर्णो बली लिङ्गं समर्पयेत्|३३| (इति बृंहणीगुटिका)|
🔊 Audio coming soon
কাণ্ডেক্ষুঃ বৃহদিক্ষুঃ| ইক্ষুবালিকা খগ্গালিকা| পযস্যা ক্ষীরবিদারী| বীরা ক্ষীরকাকোলী| ফল্গুঃ কাষ্ঠোদুম্বরিকা| শতাবরীত্যন্তেন কল্কচ্ছেদঃ| বংশরোচনা তুগাক্ষীরী, অন্যে বংশরোচনানুকারি পার্থিবদ্রব্যং তালধীতি বদন্তি| স্ত্যানা ইতি ঘনাঃ||২৪-৩২||-
Adhikarana 7 (33-37) · Śloka 38
মাষাণামাত্মগুপ্তাযা বীজানামাঢকং নবম্||৩৩|| জীবকর্ষভকৌ বীরাং মেদামৃদ্ধিং শতাবরীম্| মধুকং চাশ্বগন্ধাং চ সাধ্যেত্ কুডবোন্মিতাম্||৩৪|| রসে তস্মিন্ ঘৃতপ্রস্থং গব্যং দশগুণং পযঃ| বিদারীণাং রসপ্রস্থং প্রস্থমিক্ষুরসস্য চ||৩৫|| দত্ত্বা মৃদ্বগ্নিনা সাধ্যং সিদ্ধং সর্পির্নিধাপযেত্| শর্করাযাস্তুগাক্ষীর্যাঃ ক্ষৌদ্রস্য চ পৃথক্ পৃথক্||৩৬|| ভাগাংশ্চতুষ্পলাংস্তত্র পিপ্পল্যাশ্চাবপেত্ পলম্| পলং পূর্বমতো লীঢ্বা ততোঽন্নমুপযোজযেত্||৩৭|| য ইচ্ছেদক্ষযং শুক্রং শেফসশ্চোত্তমং বলম্|৩৮| (ইতি বাজীকরণং ঘৃতম্)|
माषाणामात्मगुप्ताया बीजानामाढकं नवम्||३३|| जीवकर्षभकौ वीरां मेदामृद्धिं शतावरीम्| मधुकं चाश्वगन्धां च साध्येत् कुडवोन्मिताम्||३४|| रसे तस्मिन् घृतप्रस्थं गव्यं दशगुणं पयः| विदारीणां रसप्रस्थं प्रस्थमिक्षुरसस्य च||३५|| दत्त्वा मृद्वग्निना साध्यं सिद्धं सर्पिर्निधापयेत्| शर्करायास्तुगाक्षीर्याः क्षौद्रस्य च पृथक् पृथक्||३६|| भागांश्चतुष्पलांस्तत्र पिप्पल्याश्चावपेत् पलम्| पलं पूर्वमतो लीढ्वा ततोऽन्नमुपयोजयेत्||३७|| य इच्छेदक्षयं शुक्रं शेफसश्चोत्तमं बलम्|३८| (इति वाजीकरणं घृतम्)|
🔊 Audio coming soon
দ্বিতীযপ্রযোগে রসে ইতি ক্বাথে||৩৩-৩৭||-
Adhikarana 8 (38-41) · Śloka 41
শর্করা মাষবিদলাস্তুগাক্ষীরী পযো ঘৃতম্||৩৮|| গোধূমচূর্ণষষ্ঠানি সর্পিষ্যুত্কারিকাং পচেত্| তাং নাতিপক্বাং মৃদিতাং কৌক্কুটে মধুরে রসে||৩৯|| সুগন্ধে প্রক্ষিপেদুষ্ণে যথা সান্দ্রীভবেদ্রসঃ| এষ পিণ্ডরসো বৃষ্যঃ পৌষ্টিকো বলবর্ধনঃ||৪০|| অনেনাশ্ব ইবোদীর্ণো বলী লিঙ্গং সমর্পযেত্| শিখিতিত্তিরিহংসানামেবং পিণ্ডরসো মতঃ| বলবর্ণস্বরকরঃ পুমাংস্তেন বৃষাযতে||৪১|| (ইতি বাজীকরণপিণ্ডরসাঃ )|
शर्करा माषविदलास्तुगाक्षीरी पयो घृतम्||३८|| गोधूमचूर्णषष्ठानि सर्पिष्युत्कारिकां पचेत्| तां नातिपक्वां मृदितां कौक्कुटे मधुरे रसे||३९|| सुगन्धे प्रक्षिपेदुष्णे यथा सान्द्रीभवेद्रसः| एष पिण्डरसो वृष्यः पौष्टिको बलवर्धनः||४०|| अनेनाश्व इवोदीर्णो बली लिङ्गं समर्पयेत्| शिखितित्तिरिहंसानामेवं पिण्डरसो मतः| बलवर्णस्वरकरः पुमांस्तेन वृषायते||४१|| (इति वाजीकरणपिण्डरसाः )|
🔊 Audio coming soon
উত্কারিকা মূষিকোত্করাকারা (?)| শিখিতিত্তিরিহংসানাং পিণ্ডরসৈর্ব্যস্তসমস্তাশ্চত্বারঃ পিণ্ডরসাঃ||৩৮-৪১||
Adhikarana 9 (42-49) · Śloka 49
ঘৃতং মাষান্ সবস্তাণ্ডান্ সাধযেন্মাহিষে রসে| ভর্জযেত্তং রসং পূতং ফলাম্লং নবসর্পিষি||৪২|| ঈষত্সলবণং যুক্তং ধান্যজীরকনাগরৈঃ| এষ বৃষ্যশ্চ বল্যশ্চ বৃংহণশ্চ রসোত্তমঃ||৪৩|| (ইতি বৃষ্যমাহিষরসঃ)| চটকাংস্তিত্তিরিরসে তিত্তিরীন্ কৌক্কুটে রসে| কুক্কুটান্ বার্হিণরসে হাংসে বার্হিণমেব চ||৪৪|| নবসর্পিষি সন্তপ্তান্ ফলাম্লান্ কারযেদ্রসান্| মধুরান্ বা যথাসাত্ম্যং গন্ধাঢ্যান্ বলবর্ধনান্||৪৫|| (ইত্যন্যে বৃষ্যরসাঃ)| তৃপ্তিং চটকমাংসানাং গত্বা যোঽনুপিবেত্ পযঃ| ন তস্য লিঙ্গশৈথিল্যং স্যান্ন শুক্রক্ষযো নিশি||৪৬|| (ইতি বৃষ্যমাংসম্)| মাষযূষেণ যো ভুক্ত্বা ঘৃতাঢ্যং ষষ্টিকৌদনম্| পযঃ পিবতি রাত্রিং স কৃত্স্নাং জাগর্তি বেগবান্||৪৭|| (ইতি বৃষ্যমাষযোগঃ)| ন না স্বপিতি রাত্রিষু নিত্যস্তব্ধেন শেফসা| তৃপ্তঃ কুক্কুটমাংসানা ভৃষ্টানাং নক্ররেতসি||৪৮|| (ইতি বৃষ্যঃ কুক্কুটমাংসপ্রযোগঃ)| নিঃস্রাব্য মত্স্যাণ্ডরসং ভৃষ্টং সর্পিষি ভক্ষযেত্| হংসবর্হিণদক্ষাণামেবমণ্ডানি ভক্ষযেত্||৪৯|| (ইতি বৃষ্যোঽণ্ডরসঃ)|
घृतं माषान् सबस्ताण्डान् साधयेन्माहिषे रसे| भर्जयेत्तं रसं पूतं फलाम्लं नवसर्पिषि||४२|| ईषत्सलवणं युक्तं धान्यजीरकनागरैः| एष वृष्यश्च बल्यश्च बृंहणश्च रसोत्तमः||४३|| (इति वृष्यमाहिषरसः)| चटकांस्तित्तिरिरसे तित्तिरीन् कौक्कुटे रसे| कुक्कुटान् बार्हिणरसे हांसे बार्हिणमेव च||४४|| नवसर्पिषि सन्तप्तान् फलाम्लान् कारयेद्रसान्| मधुरान् वा यथासात्म्यं गन्धाढ्यान् बलवर्धनान्||४५|| (इत्यन्ये वृष्यरसाः)| तृप्तिं चटकमांसानां गत्वा योऽनुपिबेत् पयः| न तस्य लिङ्गशैथिल्यं स्यान्न शुक्रक्षयो निशि||४६|| (इति वृष्यमांसम्)| माषयूषेण यो भुक्त्वा घृताढ्यं षष्टिकौदनम्| पयः पिबति रात्रिं स कृत्स्नां जागर्ति वेगवान्||४७|| (इति वृष्यमाषयोगः)| न ना स्वपिति रात्रिषु नित्यस्तब्धेन शेफसा| तृप्तः कुक्कुटमांसाना भृष्टानां नक्ररेतसि||४८|| (इति वृष्यः कुक्कुटमांसप्रयोगः)| निःस्राव्य मत्स्याण्डरसं भृष्टं सर्पिषि भक्षयेत्| हंसबर्हिणदक्षाणामेवमण्डानि भक्षयेत्||४९|| (इति वृष्योऽण्डरसः)|
🔊 Audio coming soon
নিশীত্যনেন সকলনিশামৈথুনেঽপিতি দর্শযতি| হংসেত্যাদি হংসবর্হিদক্ষাণামণ্ডপ্রযোগা যদ্যপি ভিন্নাঃ, তথাঽপি প্রযোগাপেক্ষযা এক এবাযং প্রযোগঃ| এবং সঙ্গ্রহোক্তাঃ হংসবর্হিদক্ষাণামেকপ্রযোগেণ পঞ্চদশপ্রযোগাঃ পূর্যন্তে||৪২-৪৯||-
Adhikarana 10 (50-51) · Śloka 51
ভবতশ্চাত্র- স্রোতঃসু শুদ্ধেষ্বমলে শরীরে বৃষ্যং যদা না মিতমত্তি কালে| বৃষাযতে তেন পরং মনুষ্যস্তদ্বৃংহণং চৈব বলপ্রদং চ||৫০|| তস্মাত্ পুরা শোধনমেব কার্যং বলানুরূপং ন হি বৃষ্যযোগাঃ| সিধ্যন্তি দেহে মলিনে প্রযুক্তাঃ ক্লিষ্টে যথা বাসসি রাগযোগাঃ||৫১||
भवतश्चात्र- स्रोतःसु शुद्धेष्वमले शरीरे वृष्यं यदा ना मितमत्ति काले| वृषायते तेन परं मनुष्यस्तद्बृंहणं चैव बलप्रदं च||५०|| तस्मात् पुरा शोधनमेव कार्यं बलानुरूपं न हि वृष्ययोगाः| सिध्यन्ति देहे मलिने प्रयुक्ताः क्लिष्टे यथा वाससि रागयोगाः||५१||
🔊 Audio coming soon
বৃষ্যযোগাশ্চ শুদ্ধদেহৈরেব কর্তব্যা ইতি দর্শযন্নাহ- স্রোতঃস্বিত্যাদি| মিতমিতি মাত্রাবত্| ক্লিষ্টে ইতি ম্লানে||৫০-৫১||
Adhikarana 11 (52-53) · Śloka 53
তত্র শ্লোকৌ- বাজীকরণসামর্থ্যং ক্ষেত্রং স্ত্রী যস্য চৈব যা| যে দোষা নিরপত্যানাং গুণাঃ পুত্রবতাং চ যে||৫২|| দশ পঞ্চ চ সংযোগা বীর্যাপত্যবিবর্ধনাঃ| উক্তাস্তে শরমূলীযে পাদে পুষ্টিবলপ্রদাঃ||৫৩||
तत्र श्लोकौ- वाजीकरणसामर्थ्यं क्षेत्रं स्त्री यस्य चैव या| ये दोषा निरपत्यानां गुणाः पुत्रवतां च ये||५२|| दश पञ्च च संयोगा वीर्यापत्यविवर्धनाः| उक्तास्ते शरमूलीये पादे पुष्टिबलप्रदाः||५३||
🔊 Audio coming soon
সঙ্গ্রহে যস্য চৈব যেতি যস্য যা বৃষ্যেত্যর্থঃ||৫২-৫৩||
Adhikarana puShpikA · Śloka 1
ইত্যগ্নিবেশকৃতে তন্ত্রে চরকপ্রতিসংস্কৃতে চিকিত্সাস্থানে বাজীকরণাধ্যাযে সংযোগশরমূলীযো নাম বাজীকরণপাদঃ প্রথমঃ||১||
इत्यग्निवेशकृते तन्त्रे चरकप्रतिसंस्कृते चिकित्सास्थाने वाजीकरणाध्याये संयोगशरमूलीयो नाम वाजीकरणपादः प्रथमः||१||
🔊 Audio coming soon
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং চিকিত্সিতস্থানে বাজীকরণাধ্যাযে সংযোগশরমূলীযো নাম বাজীকরণপাদঃ প্রথমঃ||১||