Adhikarana 1 (1-2) · Śloka 2
ಅಥಾತಃ ಸಂಯೋಗಶರಮೂಲೀಯಂ ವಾಜೀಕರಣಪಾದಂ ವ್ಯಾಖ್ಯಾಸ್ಯಾಮಃ||೧|| ಇತಿ ಹ ಸ್ಮಾಹ ಭಗವಾನಾತ್ರೇಯಃ||೨||
अथातः संयोगशरमूलीयं वाजीकरणपादं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
ಸ್ವಸ್ಥೋಜಸ್ಕರತ್ವಸಾಮಾನ್ಯಾತ್ ರಸಾಯನಮನು ವಾಜೀಕರಣಂ ವಾಚ್ಯಂ, ತತ್ರಾಪಿ ವಾಜೀಕರಣೇ ಪ್ರವೃತ್ತ್ಯುಪದರ್ಶಕಪ್ರಕರಣಯುಕ್ತತ್ವಾದಾದೌ ಸಂಯೋಗಶರಮೂಲೀಯ ಉಚ್ಯತೇ| ಸಂಯೋಗಃ ಶರಮೂಲಾನಾಮಸ್ಮಿನ್ನಸ್ತೀತಿ ಸಂಯೋಗಶರಮೂಲೀಯಃ||೧-೨||
Adhikarana 2 (3) · Śloka 4
ವಾಜೀಕರಣಮನ್ವಿಚ್ಛೇತ್ ಪುರುಷೋ ನಿತ್ಯಮಾತ್ಮವಾನ್| ತದಾಯತ್ತೌ ಹಿ ಧರ್ಮಾರ್ಥೌ ಪ್ರೀತಿಶ್ಚ ಯಶ ಏವ ಚ||೩|| ಪುತ್ರಸ್ಯಾಯತನಂ ಹ್ಯೇತದ್ಗುಣಾಶ್ಚೈತೇ ಸುತಾಶ್ರಯಾಃ|೪|
वाजीकरणमन्विच्छेत् पुरुषो नित्यमात्मवान्| तदायत्तौ हि धर्मार्थौ प्रीतिश्च यश एव च||३|| पुत्रस्यायतनं ह्येतद्गुणाश्चैते सुताश्रयाः|४|
🔊 Audio coming soon
ಅವಾಜೀ ವಾಜೀವಾತ್ಯರ್ಥಂ ಮೈಥುನೇ ಶಕ್ತಃ ಕ್ರಿಯತೇ ಯೇನ ತದ್ವಾಜೀಕರಣಮ್| ಉಕ್ತಂ ಹಿ- “ವಾಜೀವಾತಿಬಲೋ ಯೇನ ಯಾತ್ಯಪ್ರತಿಹತಃ ಸ್ತ್ರಿಯಮ್” ಇತ್ಯಾದಿ| ಅನ್ವಿಚ್ಛೇದಿತಿ ರಸಾಯನಾನ್ಮಹಾಫಲಾತ್ ತದಪೇಕ್ಷಯಾಽಲ್ಪಫಲಂ ವಾಜೀಕರಣಂ ಪಶ್ಚಾದಿಚ್ಛೇತ್| ಪುರುಷ ಇತಿ ಪದೇನ ತರುಣಪುರುಷಗ್ರಾಹಿಣಾ ಬಾಲವೃದ್ಧೌ ನಿಷಿದ್ಧವ್ಯವಾಯೌ ನಿರಾಕರೋತಿ| ಉಕ್ತಂ ಹಿ- “ಅತಿಬಾಲೋ ಹ್ಯಸಮ್ಪೂರ್ಣಸರ್ವಧಾತುಃ ಸ್ತ್ರಿಯೋ ವ್ರಜನ್| ಉಪತಪ್ಯೇತ ಸಹಸಾ ತಡಾಗಮಿವ ಕಾಜಲಮ್|| ಶುಷ್ಕಂ ರೂಕ್ಷಂ ಯಥಾ ಕಾಷ್ಠಂ ಜನ್ತುಜಗ್ಧಂ ವಿಜರ್ಜರಮ್| ಸ್ಪೃಷ್ಟಮಾಶು ವಿಶೀರ್ಯೇತ ತಥಾ ವೃದ್ಧಃ ಸ್ತ್ರಿಯೋ ವ್ರಜನ್” ಇತಿ| ನಿತ್ಯಮಿತ್ಯನೇನ ನ ರಸಾಯನವತ್ ಸಕೃತ್ಪ್ರಯೋಗೋ ವೃಷ್ಯಸ್ಯ, ಕಿನ್ತ್ವಾಹಾರವತ್ ಸರ್ವದೋಪಯೋಗ ಇತಿ ದರ್ಶಯತಿ| ಆತ್ಮವಾನಿತ್ಯನೇನ ದುರಾತ್ಮನೋ ವೃಷ್ಯಕರಣಂ ನಿಷೇಧತಿ, ಸ ಹಿ ವೃಷ್ಯೋಪಯೋಗಾದುಪಚಿತಧಾತುಃ ಸನ್ನಗಮ್ಯಾಗಮನಮಪಿ ಕುರ್ಯಾತ್| ಧರ್ಮಾದಯೋ ವೃಷಯಾಯತ್ತಾ ಏವ ಯಥಾ ಭವನ್ತಿ ತದಾಹ- ಪುತ್ರಸ್ಯೇತ್ಯಾದಿ| ಆಯತನಂ ಕಾರಣಮ್| ಏತೇ ಗುಣಾ ಇತಿ ಧರ್ಮಾದಯಃ; ವೃಷ್ಯಪ್ರಯೋಗಜನಿತಃ ಪುತ್ರೋ ಧರ್ಮಾದೀನ್ ಪಿತುಃ ಸಮ್ಪಾದಯತೀತ್ಯರ್ಥಃ| ವಾಜೀಕರಣಸೇವಯಾ ಚೇಹ ಯುಕ್ತ್ಯೈವ ಋತುಕಾಲೇ ಚ ಮೈಥುನಂ ಪ್ರಾಧಾನ್ಯೇನಾಭಿಪ್ರೇತಂ, ತೇನ ತಿಸ್ರೈಷಣೀಯೇ ತ್ರಯ ಉಪಸ್ತಮ್ಭಾಃ (ಸೂ.ಅ.೧೧) ಇತ್ಯಾದಿಗ್ರನ್ಥೇನ ಬ್ರಹ್ಮಚರ್ಯಂ ಯದುಕ್ತಂ, ತದ್ ಋತುಕಾಲೇ ಯಥಾವಿಧಿಕೃತಮೈಥುನಾಪ್ರತಿಷೇಧಕಮಿತಿ ನ ವಿರೋಧಃ||೩||-
Adhikarana 3 (4-7) · Śloka 8
ವಾಜೀಕರಣಮಗ್ರ್ಯಂ ಚ ಕ್ಷೇತ್ರಂ ಸ್ತ್ರೀ ಯಾ ಪ್ರಹರ್ಷಿಣೀ||೪|| ಇಷ್ಟಾ ಹ್ಯೋಕೈಕಶೋಽಪ್ಯರ್ಥಾ ಪರಂ ಪ್ರೀತಿಕರಾ ಸ್ಮೃತಾಃ| ಕಿಂ ಪುನಃ ಸ್ತ್ರೀಶರೀರೇ ಯೇ ಸಙ್ಘಾತೇನ ಪ್ರತಿಷ್ಠಿತಾಃ||೫|| (ಸಙ್ಘಾತೋ ಹೀನ್ದ್ರಿಯಾರ್ಥಾನಾಂ ಸ್ತ್ರೀಷು ನಾನ್ಯತ್ರ ವಿದ್ಯತೇ)| ಸ್ತ್ರ್ಯಾಶ್ರಯೋ ಹೀನ್ದ್ರಿಯಾರ್ಥೋ ಯಃ ಸ ಪ್ರೀತಿಜನನೋಽಧಿಕಮ್| ಸ್ತ್ರೀಷು ಪ್ರೀತಿರ್ವಿಶೇಷೇಣ ಸ್ತ್ರೀಷ್ವಪತ್ಯಂ ಪ್ರತಿಷ್ಠಿತಮ್||೬|| ಧರ್ಮಾರ್ಥೌ ಸ್ತ್ರೀಷು ಲಕ್ಷ್ಮೀಶ್ಚ ಸ್ತ್ರೀಷು ಲೋಕಾಃ ಪ್ರತಿಷ್ಠಿತಾಃ| ಸುರೂಪಾ ಯೌವನಸ್ಥಾ ಯಾ ಲಕ್ಷಣೈರ್ಯಾ ವಿಭೂಷಿತಾ||೭|| ಯಾ ವಶ್ಯಾ ಶಿಕ್ಷಿತಾ ಯಾ ಚ ಸಾ ಸ್ತ್ರೀ ವೃಷ್ಯತಮಾ ಮತಾ|೮|
वाजीकरणमग्र्यं च क्षेत्रं स्त्री या प्रहर्षिणी||४|| इष्टा ह्योकैकशोऽप्यर्था परं प्रीतिकरा स्मृताः| किं पुनः स्त्रीशरीरे ये सङ्घातेन प्रतिष्ठिताः||५|| (सङ्घातो हीन्द्रियार्थानां स्त्रीषु नान्यत्र विद्यते)| स्त्र्याश्रयो हीन्द्रियार्थो यः स प्रीतिजननोऽधिकम्| स्त्रीषु प्रीतिर्विशेषेण स्त्रीष्वपत्यं प्रतिष्ठितम्||६|| धर्मार्थौ स्त्रीषु लक्ष्मीश्च स्त्रीषु लोकाः प्रतिष्ठिताः| सुरूपा यौवनस्था या लक्षणैर्या विभूषिता||७|| या वश्या शिक्षिता या च सा स्त्री वृष्यतमा मता|८|
🔊 Audio coming soon
ಸರ್ವವಾಜೀಕರಣೇಭ್ಯಃ ಪ್ರಧಾನರೂಪಂ ವಾಜೀಕರಣಮಾಹ- ವಾಜೀತ್ಯಾದಿ| ಕ್ಷೇತ್ರಮಿವ ಕ್ಷೇತ್ರಂ, ತತ್ರ ಶುಕ್ರರೂಪಬೀಜಪ್ರರೋಹಣಾತ್| ಅರ್ಥಾ ಇತಿ ಶಬ್ದಾದಯಃ, ತೇ ಚ ಸ್ತ್ರೀಗತಾಧರರಸ-ಕಲವಿಙ್ಕರುತ-ರೂಪಾದಯಃ ಪ್ರಸಿದ್ಧಾ ಏವ| ಧರ್ಮಾರ್ಥೌ ಸ್ತ್ರೀಷ್ವಿತಿ ಸಹೈವ ಪತ್ನ್ಯಾ ಧರ್ಮಶ್ಚರ್ಯ ಇತ್ಯಾದ್ಯುಪದೇಶಾದ್ಧರ್ಮಃ, ತಥಾಽನುರಕ್ತಾ ಗೃಹಿಣೀ ಅರ್ಥರಕ್ಷಣಾದಿ ಕರೋತೀತ್ಯರ್ಥ ಇತ್ಯರ್ಥಃ| ಸ್ತ್ರಿಯಾ ಲಕ್ಷ್ಮ್ಯಾಃ ಸಂಯೋಗೇ ಧನಸಮ್ಪದ್ಭವತೀತಿ ಸ್ತ್ರೀಷು ಲಕ್ಷ್ಮೀಃ ಪ್ರತಿಷ್ಠಿತೇತ್ಯರ್ಥಃ| ವಶ್ಯಾ ಆಯತ್ತಾ| ಶಿಕ್ಷಿತೇತಿ ಕಾಮಶಾಸ್ತ್ರೋಕ್ತಗೀತವಾದಿತ್ರಲಾಸ್ಯಾದಿಚತುಃಷಷ್ಟಿಕಲಾಶಿಕ್ಷಿತಾ||೪-೭||-
Adhikarana 4 (8-15) · Śloka 16
ನಾನಾಭಕ್ತ್ಯಾ ತು ಲೋಕಸ್ಯ ದೈವಯೋಗಾಚ್ಚ ಯೋಷಿತಾಮ್||೮|| ತಂ ತಂ ಪ್ರಾಪ್ಯ ವಿವರ್ಧನ್ತೇ ನರಂ ರೂಪಾದಯೋ ಗುಣಾಃ| ವಯೋರೂಪವಚೋಹಾವೈರ್ಯಾ ಯಸ್ಯ ಪರಮಾಙ್ಗನಾ||೯|| ಪ್ರವಿಶತ್ಯಾಶು ಹೃದಯಂ ದೈವಾದ್ವಾ ಕರ್ಮಣೋಽಪಿ ವಾ| ಹೃದಯೋತ್ಸವರೂಪಾ ಯಾ ಯಾ ಸಮಾನಮನಃಶಯಾ||೧೦|| ಸಮಾನಸತ್ತ್ವಾ ಯಾ ವಶ್ಯಾ ಯಾ ಯಸ್ಯ ಪ್ರೀಯತೇ ಪ್ರಿಯೈಃ| ಯಾ ಪಾಶಭೂತಾ ಸರ್ವೇಷಾಮಿನ್ದ್ರಿಯಾಣಾಂ ಪರೈರ್ಗುಣೈಃ||೧೧|| ಯಯಾ ವಿಯುಕ್ತೋ ನಿಸ್ತ್ರೀಕಮರತಿರ್ಮನ್ಯತೇ ಜಗತ್| ಯಸ್ಯಾ ಋತೇ ಶರೀರಂ ನಾ ಧತ್ತೇ ಶೂನ್ಯಮಿವೇನ್ದ್ರಿಯೈಃ||೧೨|| ಶೋಕೋದ್ವೇಗಾರತಿಭಯೈರ್ಯಾಂ ದೃಷ್ಟ್ವಾ ನಾಭಿಭೂಯತೇ| ಯಾತಿ ಯಾಂ ಪ್ರಾಪ್ಯ ವಿಸ್ರಮ್ಭಂ ದೃಷ್ಟ್ವಾ ಹೃಷ್ಯತ್ಯತೀವ ಯಾಮ್||೧೩|| ಅಪೂರ್ವಾಮಿವ ಯಾಂ ಯಾತಿ ನಿತ್ಯಂ ಹರ್ಷಾತಿವೇಗತಃ| ಗತ್ವಾ ಗತ್ವಾಽಪಿ ಬಹುಶೋ ಯಾಂ ತೃಪ್ತಿಂ ನೈವ ಗಚ್ಛತಿ||೧೪|| ಸಾ ಸ್ತ್ರೀ ವೃಷ್ಯತಮಾ ತಸ್ಯ ನಾನಾಭಾವಾ ಹಿ ಮಾನವಾಃ| ಅತುಲ್ಯಗೋತ್ರಾಂ ವೃಷ್ಯಾಂ ಚ ಪ್ರಹೃಷ್ಟಾಂ ನಿರುಪದ್ರವಾಮ್||೧೫|| ಶುದ್ಧಸ್ನಾತಾಂ ವ್ರಜೇನ್ನಾರೀಮಪತ್ಯಾರ್ಥೀ ನಿರಾಮಯಃ|೧೬|
नानाभक्त्या तु लोकस्य दैवयोगाच्च योषिताम्||८|| तं तं प्राप्य विवर्धन्ते नरं रूपादयो गुणाः| वयोरूपवचोहावैर्या यस्य परमाङ्गना||९|| प्रविशत्याशु हृदयं दैवाद्वा कर्मणोऽपि वा| हृदयोत्सवरूपा या या समानमनःशया||१०|| समानसत्त्वा या वश्या या यस्य प्रीयते प्रियैः| या पाशभूता सर्वेषामिन्द्रियाणां परैर्गुणैः||११|| यया वियुक्तो निस्त्रीकमरतिर्मन्यते जगत्| यस्या ऋते शरीरं ना धत्ते शून्यमिवेन्द्रियैः||१२|| शोकोद्वेगारतिभयैर्यां दृष्ट्वा नाभिभूयते| याति यां प्राप्य विस्रम्भं दृष्ट्वा हृष्यत्यतीव याम्||१३|| अपूर्वामिव यां याति नित्यं हर्षातिवेगतः| गत्वा गत्वाऽपि बहुशो यां तृप्तिं नैव गच्छति||१४|| सा स्त्री वृष्यतमा तस्य नानाभावा हि मानवाः| अतुल्यगोत्रां वृष्यां च प्रहृष्टां निरुपद्रवाम्||१५|| शुद्धस्नातां व्रजेन्नारीमपत्यार्थी निरामयः|१६|
🔊 Audio coming soon
ರೂಪಾದಿವ್ಯತಿರೇಕೇಣಾಪಿ ಕಾಚಿತ್ ಕಸ್ಯಚಿತ್ ಕರ್ಮವಶಾದ್ವೃಷ್ಯಾ ಸ್ತ್ರೀ ಭವತೀತಿ ದರ್ಶಯನ್ನಾಹ- ನಾನೇತ್ಯಾದಿ| ದೈವಯೋಗಾದಿತಿ ಪ್ರಾಕ್ತನಕರ್ಮವಶಾತ್| ವಿವರ್ಧನ್ತ ಇತಿ ವೃಷ್ಯತ್ವಂ ಸಮ್ಪಾದಯನ್ತಿ| ಹಾವೋ ನರಂ ಪ್ರತಿ ಸ್ತ್ರೀಣಾಂ ಶೃಙ್ಗಾರಚೇಷ್ಟಾವಿಶೇಷಃ| ಉಕ್ತಂ ಚ ಭರತೇನ- “ಪ್ರಕಾಶರೂಪಕಂ ಸತ್ತ್ವಂ ಸತ್ತ್ವೋತ್ಪ್ಲವಾಃ ಸಮುದ್ಗತಾಃ| ತೇಭ್ಯೋ ಹಾವಾದಿನಿಷ್ಪತ್ತಿರಿತ್ಯಾಹುಃ ಪರಮರ್ಷಯಃ” ಇತಿ| ದೈವಾದಿತಿ ಪ್ರಾಕ್ತನಕರ್ಮಣಃ| ಕರ್ಮಣ ಇತಿ ಐಹಿಕಾದ್ವಶೀಕರಣಾದಿಕರ್ಮಣಃ| ಮನಃಶಯಃ ಕಾಮಃ| ಪಾಶಭೂತೇತಿ ಮನ-ಇನ್ದ್ರಿಯಬನ್ಧಹೇತುತ್ವಾತ್| ‘ನಾನಾಭಾವಾ ಹಿ ಮಾನವಾಃ’ ಇತ್ಯನೇನ ರೂಪಾದಿಗುಣಯೋಗೇನ (ನ) ಸರ್ವಪುರುಷಾನ್ ಪ್ರತಿ ಸ್ತ್ರೀಣಾಂ ಪ್ರಿಯತ್ವಮಿತಿ ದರ್ಶಯತಿ||೮-೧೫||-
Adhikarana 5 (16-23) · Śloka 24
ಅಚ್ಛಾಯಶ್ಚೈಕಶಾಖಶ್ಚ ನಿಷ್ಫಲಶ್ಚ ಯಥಾ ದ್ರುಮಃ||೧೬|| ಅನಿಷ್ಟಗನ್ಧಶ್ಚೈಕಶ್ಚ ನಿರಪತ್ಯಸ್ತಥಾ ನರಃ| ಚಿತ್ರದೀಪಃ ಸರಃ ಶುಷ್ಕಮಧಾತುರ್ಧಾತುಸನ್ನಿಭಃ||೧೭|| ನಿಷ್ಪ್ರಜಸ್ತೃಣಪೂಲೀತಿ ಮನ್ತವ್ಯಃ ಪುರುಷಾಕೃತಿಃ| ಅಪ್ರತಿಷ್ಠಶ್ಚ ನಗ್ನಶ್ಚ ಶೂನ್ಯಶ್ಚೈಕೇನ್ದ್ರಿಯಶ್ಚ ನಾ||೧೮|| ಮನ್ತವ್ಯೋ ನಿಷ್ಕ್ರಿಯಶ್ಚೈವ ಯಸ್ಯಾಪತ್ಯಂ ನ ವಿದ್ಯತೇ| ಬಹುಮೂರ್ತಿರ್ಬಹುಮುಖೋ ಬಹುವ್ಯೂಹೋ ಬಹುಕ್ರಿಯಃ||೧೯|| ಬಹುಚಕ್ಷುರ್ಬಹುಜ್ಞಾನೋ ಬಹ್ವಾತ್ಮಾ ಚ ಬಹುಪ್ರಜಃ| ಮಙ್ಗಲ್ಯೇಽಯಂ ಪ್ರಶಸ್ಯೋಽಯಂ ಧನ್ಯೋಽಯಂ ವೀರ್ಯವಾನಯಮ್||೨೦|| ಬಹುಶಾಖೋಽಯಮಿತಿ ಚ ಸ್ತೂಯತೇ ನಾ ಬಹುಪ್ರಜಃ| ಪ್ರೀತಿರ್ಬಲಂ ಸುಖಂ ವೃತ್ತಿರ್ವಿಸ್ತಾರೋ ವಿಪುಲಂ ಕುಲಮ್||೨೧|| ಯಶೋ ಲೋಕಾಃ ಸುಖೋದರ್ಕಾಸ್ತುಷ್ಟಿಶ್ಚಾಪತ್ಯಸಂಶ್ರಿತಾಃ| ತಸ್ಮಾದಪತ್ಯಮನ್ವಿಚ್ಛನ್ ಗುಣಾಂಶ್ಚಾಪತ್ಯಸಂಶ್ರಿತಾನ್||೨೨|| ವಾಜೀಕರಣನಿತ್ಯಃ ಸ್ಯಾದಿಚ್ಛನ್ ಕಾಮಸುಖಾನಿ ಚ| ಉಪಭೋಗಸುಖಾನ್ ಸಿದ್ಧಾನ್ ವೀರ್ಯಾಪತ್ಯವಿವರ್ಧನಾನ್||೨೩|| ವಾಜೀಕರಣಸಂಯೋಗಾನ್ ಪ್ರವಕ್ಷ್ಯಾಮ್ಯತ ಉತ್ತರಮ್|೨೪|
अच्छायश्चैकशाखश्च निष्फलश्च यथा द्रुमः||१६|| अनिष्टगन्धश्चैकश्च निरपत्यस्तथा नरः| चित्रदीपः सरः शुष्कमधातुर्धातुसन्निभः||१७|| निष्प्रजस्तृणपूलीति मन्तव्यः पुरुषाकृतिः| अप्रतिष्ठश्च नग्नश्च शून्यश्चैकेन्द्रियश्च ना||१८|| मन्तव्यो निष्क्रियश्चैव यस्यापत्यं न विद्यते| बहुमूर्तिर्बहुमुखो बहुव्यूहो बहुक्रियः||१९|| बहुचक्षुर्बहुज्ञानो बह्वात्मा च बहुप्रजः| मङ्गल्येऽयं प्रशस्योऽयं धन्योऽयं वीर्यवानयम्||२०|| बहुशाखोऽयमिति च स्तूयते ना बहुप्रजः| प्रीतिर्बलं सुखं वृत्तिर्विस्तारो विपुलं कुलम्||२१|| यशो लोकाः सुखोदर्कास्तुष्टिश्चापत्यसंश्रिताः| तस्मादपत्यमन्विच्छन् गुणांश्चापत्यसंश्रितान्||२२|| वाजीकरणनित्यः स्यादिच्छन् कामसुखानि च| उपभोगसुखान् सिद्धान् वीर्यापत्यविवर्धनान्||२३|| वाजीकरणसंयोगान् प्रवक्ष्याम्यत उत्तरम्|२४|
🔊 Audio coming soon
ಸಮ್ಪ್ರತಿ ವೃಷ್ಯಪ್ರಯೋಗಸಾಧ್ಯಸ್ಯ ಪುತ್ರಸ್ಯೋಪಾದೇಯತಾಂ ದರ್ಶಯನ್ನಾಹ- ಅಚ್ಛಾಯ ಇತ್ಯಾದಿ| ಏಕಶಾಖ ಇತಿ ಏಕಸ್ವರೂಪ ಇತ್ಯರ್ಥಃ| ಚಿತ್ರಲಿಖಿತೋ ದೀಪಶ್ಚಿತ್ರದೀಪಃ| ಅಧಾತುರ್ಧಾತುಸನ್ನಿಭ ಇತಿ ಅಸುವರ್ಣಾದಿರೂಪಃ ಸುವರ್ಣಾದಿವದಾಭಾಸತೇ ಯೋ ಜಾತುಷಕಙ್ಕಣಾದಿಃ| ಪೂಲೀ ನಪುಂಸಕಧರ್ಮಿತ್ವಾತ್| ತೃಣಪೂಲೀ ಪುರುಷಾಕೃತಿರಿತಿ ಭಾಷಯಾ ಪುರುಷಾರ್ಥಕ್ರಿಯಾವಿರಹಿತ್ವಂ ದರ್ಶಯತಿ| ಕಾಮಸುಖಾನಿ ಚೇತ್ಯನೇನ ಪುತ್ರೋತ್ಪಾದಾರಿಕ್ತಂ ನಾತಿಶ್ಲಾಘ್ಯಂ ಫಲಂ ದರ್ಶಯತಿ| ಕಾಮಸುಖಾನಿ ಹಿ ಐಹಿಕಾನ್ಯೇವ ಪರಂ ನ ಪುತ್ರವದುಭಯಲೋಕೋಪಕಾರಕಾಣಿ| ಉಪಭೋಗೇ ಮೈಥುನೇ ಸುಖಂ ಕುರ್ವನ್ತೀತ್ಯುಪಭೋಗಸುಖಾಃ; ಕಿಂವಾ, ಉಪಭೋಕ್ತುಂ ಸುಖಾ ಉಪಭೋಗಸುಖಾಃ| ವೀರ್ಯಂ ಶುಕ್ರಮ್||೧೬-೨೩||-
Adhikarana 6 (24-32) · Śloka 33
ಶರಮೂಲೇಕ್ಷುಮೂಲಾನಿ ಕಾಣ್ಡೇಕ್ಷುಃ ಸೇಕ್ಷುವಾಲಿಕಾ||೨೪|| ಶತಾವರೀ ಪಯಸ್ಯಾ ಚ ವಿದಾರೀ ಕಣ್ಟಕಾರಿಕಾ| ಜೀವನ್ತೀ ಜೀವಕೋ ಮೇದಾ ವೀರಾ ಚರ್ಷಭಕೋ ಬಲಾ||೨೫|| ಋದ್ಧಿರ್ಗೋಕ್ಷುರಕಂ ರಾಸ್ನಾ ಸಾತ್ಮಗುಪ್ತಾ ಪುನರ್ನವಾ| ಏಷಾಂ ತ್ರಿಪಲಿಕಾನ್ ಭಾಗಾನ್ ಮಾಷಾಣಾಮಾಢಕಂ ನವಮ್||೨೬|| ವಿಪಾಚಯೇಜ್ಜಲದ್ರೋಣೇ ಚತುರ್ಭಾಗಂ ಚ ಶೇಷಯೇತ್| ತತ್ರ ಪೇಷ್ಯಾಣಿ ಮಧುಕಂ ದ್ರಾಕ್ಷಾ ಫಲ್ಗೂನಿ ಪಿಪ್ಪಲೀ||೨೭|| ಆತ್ಮಗುಪ್ತಾ ಮಧುಕಾನಿ ಖರ್ಜೂರಾಣಿ ಶತಾವರೀ| ವಿದಾರ್ಯಾಮಲಕೇಕ್ಷೂಣಾಂ ರಸಸ್ಯ ಚ ಪೃಥಕ್ ಪೃಥಕ್||೨೮|| ಸರ್ಪಿಷಶ್ಚಾಢಕಂ ದದ್ಯಾತ್ ಕ್ಷೀರದ್ರೋಣಂ ಚ ತದ್ಭಿಷಕ್| ಸಾಧಯೇದ್ಘೃತಶೇಷಂ ಚ ಸುಪೂತಂ ಯೋಜಯೇತ್ ಪುನಃ||೨೯|| ಶರ್ಕರಾಯಾಸ್ತುಗಾಕ್ಷೀರ್ಯಾಶ್ಚೂರ್ಣೈಃ ಪ್ರಸ್ಥೋನ್ಮಿತೈಃ ಪೃಥಕ್| ಪಲೈಶ್ಚತುರ್ಭಿರ್ಮಾಗಧ್ಯಾಃ ಪಲೇನ ಮರಿಚಸ್ಯ ಚ||೩೦|| ತ್ವಗೇಲಾಕೇಶರಾಣಾಂ ಚ ಚೂರ್ಣೈರರ್ಧಪಲೋನ್ಮಿತೈಃ| ಮಧುನಃ ಕುಡವಾಭ್ಯಾಂ ಚ ದ್ವಾಭ್ಯಾಂ ತತ್ಕಾರಯೇದ್ಭಿಷಕ್||೩೧|| ಪಲಿಕಾ ಗುಲಿಕಾಸ್ತ್ಯಾನಾಸ್ತಾ ಯಥಾಗ್ನಿ ಪ್ರಯೋಜಯೇತ್| ಏಷ ವೃಷ್ಯಃ ಪರಂ ಯೋಗೋ ಬೃಂಹಣೋ ಬಲವರ್ಧನಃ||೩೨|| ಅನೇನಾಶ್ವ ಇವೋದೀರ್ಣೋ ಬಲೀ ಲಿಙ್ಗಂ ಸಮರ್ಪಯೇತ್|೩೩| (ಇತಿ ಬೃಂಹಣೀಗುಟಿಕಾ)|
शरमूलेक्षुमूलानि काण्डेक्षुः सेक्षुवालिका||२४|| शतावरी पयस्या च विदारी कण्टकारिका| जीवन्ती जीवको मेदा वीरा चर्षभको बला||२५|| ऋद्धिर्गोक्षुरकं रास्ना सात्मगुप्ता पुनर्नवा| एषां त्रिपलिकान् भागान् माषाणामाढकं नवम्||२६|| विपाचयेज्जलद्रोणे चतुर्भागं च शेषयेत्| तत्र पेष्याणि मधुकं द्राक्षा फल्गूनि पिप्पली||२७|| आत्मगुप्ता मधुकानि खर्जूराणि शतावरी| विदार्यामलकेक्षूणां रसस्य च पृथक् पृथक्||२८|| सर्पिषश्चाढकं दद्यात् क्षीरद्रोणं च तद्भिषक्| साधयेद्घृतशेषं च सुपूतं योजयेत् पुनः||२९|| शर्करायास्तुगाक्षीर्याश्चूर्णैः प्रस्थोन्मितैः पृथक्| पलैश्चतुर्भिर्मागध्याः पलेन मरिचस्य च||३०|| त्वगेलाकेशराणां च चूर्णैरर्धपलोन्मितैः| मधुनः कुडवाभ्यां च द्वाभ्यां तत्कारयेद्भिषक्||३१|| पलिका गुलिकास्त्यानास्ता यथाग्नि प्रयोजयेत्| एष वृष्यः परं योगो बृंहणो बलवर्धनः||३२|| अनेनाश्व इवोदीर्णो बली लिङ्गं समर्पयेत्|३३| (इति बृंहणीगुटिका)|
🔊 Audio coming soon
ಕಾಣ್ಡೇಕ್ಷುಃ ಬೃಹದಿಕ್ಷುಃ| ಇಕ್ಷುವಾಲಿಕಾ ಖಗ್ಗಾಲಿಕಾ| ಪಯಸ್ಯಾ ಕ್ಷೀರವಿದಾರೀ| ವೀರಾ ಕ್ಷೀರಕಾಕೋಲೀ| ಫಲ್ಗುಃ ಕಾಷ್ಠೋದುಮ್ಬರಿಕಾ| ಶತಾವರೀತ್ಯನ್ತೇನ ಕಲ್ಕಚ್ಛೇದಃ| ವಂಶರೋಚನಾ ತುಗಾಕ್ಷೀರೀ, ಅನ್ಯೇ ವಂಶರೋಚನಾನುಕಾರಿ ಪಾರ್ಥಿವದ್ರವ್ಯಂ ತಾಲಧೀತಿ ವದನ್ತಿ| ಸ್ತ್ಯಾನಾ ಇತಿ ಘನಾಃ||೨೪-೩೨||-
Adhikarana 7 (33-37) · Śloka 38
ಮಾಷಾಣಾಮಾತ್ಮಗುಪ್ತಾಯಾ ಬೀಜಾನಾಮಾಢಕಂ ನವಮ್||೩೩|| ಜೀವಕರ್ಷಭಕೌ ವೀರಾಂ ಮೇದಾಮೃದ್ಧಿಂ ಶತಾವರೀಮ್| ಮಧುಕಂ ಚಾಶ್ವಗನ್ಧಾಂ ಚ ಸಾಧ್ಯೇತ್ ಕುಡವೋನ್ಮಿತಾಮ್||೩೪|| ರಸೇ ತಸ್ಮಿನ್ ಘೃತಪ್ರಸ್ಥಂ ಗವ್ಯಂ ದಶಗುಣಂ ಪಯಃ| ವಿದಾರೀಣಾಂ ರಸಪ್ರಸ್ಥಂ ಪ್ರಸ್ಥಮಿಕ್ಷುರಸಸ್ಯ ಚ||೩೫|| ದತ್ತ್ವಾ ಮೃದ್ವಗ್ನಿನಾ ಸಾಧ್ಯಂ ಸಿದ್ಧಂ ಸರ್ಪಿರ್ನಿಧಾಪಯೇತ್| ಶರ್ಕರಾಯಾಸ್ತುಗಾಕ್ಷೀರ್ಯಾಃ ಕ್ಷೌದ್ರಸ್ಯ ಚ ಪೃಥಕ್ ಪೃಥಕ್||೩೬|| ಭಾಗಾಂಶ್ಚತುಷ್ಪಲಾಂಸ್ತತ್ರ ಪಿಪ್ಪಲ್ಯಾಶ್ಚಾವಪೇತ್ ಪಲಮ್| ಪಲಂ ಪೂರ್ವಮತೋ ಲೀಢ್ವಾ ತತೋಽನ್ನಮುಪಯೋಜಯೇತ್||೩೭|| ಯ ಇಚ್ಛೇದಕ್ಷಯಂ ಶುಕ್ರಂ ಶೇಫಸಶ್ಚೋತ್ತಮಂ ಬಲಮ್|೩೮| (ಇತಿ ವಾಜೀಕರಣಂ ಘೃತಮ್)|
माषाणामात्मगुप्ताया बीजानामाढकं नवम्||३३|| जीवकर्षभकौ वीरां मेदामृद्धिं शतावरीम्| मधुकं चाश्वगन्धां च साध्येत् कुडवोन्मिताम्||३४|| रसे तस्मिन् घृतप्रस्थं गव्यं दशगुणं पयः| विदारीणां रसप्रस्थं प्रस्थमिक्षुरसस्य च||३५|| दत्त्वा मृद्वग्निना साध्यं सिद्धं सर्पिर्निधापयेत्| शर्करायास्तुगाक्षीर्याः क्षौद्रस्य च पृथक् पृथक्||३६|| भागांश्चतुष्पलांस्तत्र पिप्पल्याश्चावपेत् पलम्| पलं पूर्वमतो लीढ्वा ततोऽन्नमुपयोजयेत्||३७|| य इच्छेदक्षयं शुक्रं शेफसश्चोत्तमं बलम्|३८| (इति वाजीकरणं घृतम्)|
🔊 Audio coming soon
ದ್ವಿತೀಯಪ್ರಯೋಗೇ ರಸೇ ಇತಿ ಕ್ವಾಥೇ||೩೩-೩೭||-
Adhikarana 8 (38-41) · Śloka 41
ಶರ್ಕರಾ ಮಾಷವಿದಲಾಸ್ತುಗಾಕ್ಷೀರೀ ಪಯೋ ಘೃತಮ್||೩೮|| ಗೋಧೂಮಚೂರ್ಣಷಷ್ಠಾನಿ ಸರ್ಪಿಷ್ಯುತ್ಕಾರಿಕಾಂ ಪಚೇತ್| ತಾಂ ನಾತಿಪಕ್ವಾಂ ಮೃದಿತಾಂ ಕೌಕ್ಕುಟೇ ಮಧುರೇ ರಸೇ||೩೯|| ಸುಗನ್ಧೇ ಪ್ರಕ್ಷಿಪೇದುಷ್ಣೇ ಯಥಾ ಸಾನ್ದ್ರೀಭವೇದ್ರಸಃ| ಏಷ ಪಿಣ್ಡರಸೋ ವೃಷ್ಯಃ ಪೌಷ್ಟಿಕೋ ಬಲವರ್ಧನಃ||೪೦|| ಅನೇನಾಶ್ವ ಇವೋದೀರ್ಣೋ ಬಲೀ ಲಿಙ್ಗಂ ಸಮರ್ಪಯೇತ್| ಶಿಖಿತಿತ್ತಿರಿಹಂಸಾನಾಮೇವಂ ಪಿಣ್ಡರಸೋ ಮತಃ| ಬಲವರ್ಣಸ್ವರಕರಃ ಪುಮಾಂಸ್ತೇನ ವೃಷಾಯತೇ||೪೧|| (ಇತಿ ವಾಜೀಕರಣಪಿಣ್ಡರಸಾಃ )|
शर्करा माषविदलास्तुगाक्षीरी पयो घृतम्||३८|| गोधूमचूर्णषष्ठानि सर्पिष्युत्कारिकां पचेत्| तां नातिपक्वां मृदितां कौक्कुटे मधुरे रसे||३९|| सुगन्धे प्रक्षिपेदुष्णे यथा सान्द्रीभवेद्रसः| एष पिण्डरसो वृष्यः पौष्टिको बलवर्धनः||४०|| अनेनाश्व इवोदीर्णो बली लिङ्गं समर्पयेत्| शिखितित्तिरिहंसानामेवं पिण्डरसो मतः| बलवर्णस्वरकरः पुमांस्तेन वृषायते||४१|| (इति वाजीकरणपिण्डरसाः )|
🔊 Audio coming soon
ಉತ್ಕಾರಿಕಾ ಮೂಷಿಕೋತ್ಕರಾಕಾರಾ (?)| ಶಿಖಿತಿತ್ತಿರಿಹಂಸಾನಾಂ ಪಿಣ್ಡರಸೈರ್ವ್ಯಸ್ತಸಮಸ್ತಾಶ್ಚತ್ವಾರಃ ಪಿಣ್ಡರಸಾಃ||೩೮-೪೧||
Adhikarana 9 (42-49) · Śloka 49
ಘೃತಂ ಮಾಷಾನ್ ಸಬಸ್ತಾಣ್ಡಾನ್ ಸಾಧಯೇನ್ಮಾಹಿಷೇ ರಸೇ| ಭರ್ಜಯೇತ್ತಂ ರಸಂ ಪೂತಂ ಫಲಾಮ್ಲಂ ನವಸರ್ಪಿಷಿ||೪೨|| ಈಷತ್ಸಲವಣಂ ಯುಕ್ತಂ ಧಾನ್ಯಜೀರಕನಾಗರೈಃ| ಏಷ ವೃಷ್ಯಶ್ಚ ಬಲ್ಯಶ್ಚ ಬೃಂಹಣಶ್ಚ ರಸೋತ್ತಮಃ||೪೩|| (ಇತಿ ವೃಷ್ಯಮಾಹಿಷರಸಃ)| ಚಟಕಾಂಸ್ತಿತ್ತಿರಿರಸೇ ತಿತ್ತಿರೀನ್ ಕೌಕ್ಕುಟೇ ರಸೇ| ಕುಕ್ಕುಟಾನ್ ಬಾರ್ಹಿಣರಸೇ ಹಾಂಸೇ ಬಾರ್ಹಿಣಮೇವ ಚ||೪೪|| ನವಸರ್ಪಿಷಿ ಸನ್ತಪ್ತಾನ್ ಫಲಾಮ್ಲಾನ್ ಕಾರಯೇದ್ರಸಾನ್| ಮಧುರಾನ್ ವಾ ಯಥಾಸಾತ್ಮ್ಯಂ ಗನ್ಧಾಢ್ಯಾನ್ ಬಲವರ್ಧನಾನ್||೪೫|| (ಇತ್ಯನ್ಯೇ ವೃಷ್ಯರಸಾಃ)| ತೃಪ್ತಿಂ ಚಟಕಮಾಂಸಾನಾಂ ಗತ್ವಾ ಯೋಽನುಪಿಬೇತ್ ಪಯಃ| ನ ತಸ್ಯ ಲಿಙ್ಗಶೈಥಿಲ್ಯಂ ಸ್ಯಾನ್ನ ಶುಕ್ರಕ್ಷಯೋ ನಿಶಿ||೪೬|| (ಇತಿ ವೃಷ್ಯಮಾಂಸಮ್)| ಮಾಷಯೂಷೇಣ ಯೋ ಭುಕ್ತ್ವಾ ಘೃತಾಢ್ಯಂ ಷಷ್ಟಿಕೌದನಮ್| ಪಯಃ ಪಿಬತಿ ರಾತ್ರಿಂ ಸ ಕೃತ್ಸ್ನಾಂ ಜಾಗರ್ತಿ ವೇಗವಾನ್||೪೭|| (ಇತಿ ವೃಷ್ಯಮಾಷಯೋಗಃ)| ನ ನಾ ಸ್ವಪಿತಿ ರಾತ್ರಿಷು ನಿತ್ಯಸ್ತಬ್ಧೇನ ಶೇಫಸಾ| ತೃಪ್ತಃ ಕುಕ್ಕುಟಮಾಂಸಾನಾ ಭೃಷ್ಟಾನಾಂ ನಕ್ರರೇತಸಿ||೪೮|| (ಇತಿ ವೃಷ್ಯಃ ಕುಕ್ಕುಟಮಾಂಸಪ್ರಯೋಗಃ)| ನಿಃಸ್ರಾವ್ಯ ಮತ್ಸ್ಯಾಣ್ಡರಸಂ ಭೃಷ್ಟಂ ಸರ್ಪಿಷಿ ಭಕ್ಷಯೇತ್| ಹಂಸಬರ್ಹಿಣದಕ್ಷಾಣಾಮೇವಮಣ್ಡಾನಿ ಭಕ್ಷಯೇತ್||೪೯|| (ಇತಿ ವೃಷ್ಯೋಽಣ್ಡರಸಃ)|
घृतं माषान् सबस्ताण्डान् साधयेन्माहिषे रसे| भर्जयेत्तं रसं पूतं फलाम्लं नवसर्पिषि||४२|| ईषत्सलवणं युक्तं धान्यजीरकनागरैः| एष वृष्यश्च बल्यश्च बृंहणश्च रसोत्तमः||४३|| (इति वृष्यमाहिषरसः)| चटकांस्तित्तिरिरसे तित्तिरीन् कौक्कुटे रसे| कुक्कुटान् बार्हिणरसे हांसे बार्हिणमेव च||४४|| नवसर्पिषि सन्तप्तान् फलाम्लान् कारयेद्रसान्| मधुरान् वा यथासात्म्यं गन्धाढ्यान् बलवर्धनान्||४५|| (इत्यन्ये वृष्यरसाः)| तृप्तिं चटकमांसानां गत्वा योऽनुपिबेत् पयः| न तस्य लिङ्गशैथिल्यं स्यान्न शुक्रक्षयो निशि||४६|| (इति वृष्यमांसम्)| माषयूषेण यो भुक्त्वा घृताढ्यं षष्टिकौदनम्| पयः पिबति रात्रिं स कृत्स्नां जागर्ति वेगवान्||४७|| (इति वृष्यमाषयोगः)| न ना स्वपिति रात्रिषु नित्यस्तब्धेन शेफसा| तृप्तः कुक्कुटमांसाना भृष्टानां नक्ररेतसि||४८|| (इति वृष्यः कुक्कुटमांसप्रयोगः)| निःस्राव्य मत्स्याण्डरसं भृष्टं सर्पिषि भक्षयेत्| हंसबर्हिणदक्षाणामेवमण्डानि भक्षयेत्||४९|| (इति वृष्योऽण्डरसः)|
🔊 Audio coming soon
ನಿಶೀತ್ಯನೇನ ಸಕಲನಿಶಾಮೈಥುನೇಽಪಿತಿ ದರ್ಶಯತಿ| ಹಂಸೇತ್ಯಾದಿ ಹಂಸಬರ್ಹಿದಕ್ಷಾಣಾಮಣ್ಡಪ್ರಯೋಗಾ ಯದ್ಯಪಿ ಭಿನ್ನಾಃ, ತಥಾಽಪಿ ಪ್ರಯೋಗಾಪೇಕ್ಷಯಾ ಏಕ ಏವಾಯಂ ಪ್ರಯೋಗಃ| ಏವಂ ಸಙ್ಗ್ರಹೋಕ್ತಾಃ ಹಂಸಬರ್ಹಿದಕ್ಷಾಣಾಮೇಕಪ್ರಯೋಗೇಣ ಪಞ್ಚದಶಪ್ರಯೋಗಾಃ ಪೂರ್ಯನ್ತೇ||೪೨-೪೯||-
Adhikarana 10 (50-51) · Śloka 51
ಭವತಶ್ಚಾತ್ರ- ಸ್ರೋತಃಸು ಶುದ್ಧೇಷ್ವಮಲೇ ಶರೀರೇ ವೃಷ್ಯಂ ಯದಾ ನಾ ಮಿತಮತ್ತಿ ಕಾಲೇ| ವೃಷಾಯತೇ ತೇನ ಪರಂ ಮನುಷ್ಯಸ್ತದ್ಬೃಂಹಣಂ ಚೈವ ಬಲಪ್ರದಂ ಚ||೫೦|| ತಸ್ಮಾತ್ ಪುರಾ ಶೋಧನಮೇವ ಕಾರ್ಯಂ ಬಲಾನುರೂಪಂ ನ ಹಿ ವೃಷ್ಯಯೋಗಾಃ| ಸಿಧ್ಯನ್ತಿ ದೇಹೇ ಮಲಿನೇ ಪ್ರಯುಕ್ತಾಃ ಕ್ಲಿಷ್ಟೇ ಯಥಾ ವಾಸಸಿ ರಾಗಯೋಗಾಃ||೫೧||
भवतश्चात्र- स्रोतःसु शुद्धेष्वमले शरीरे वृष्यं यदा ना मितमत्ति काले| वृषायते तेन परं मनुष्यस्तद्बृंहणं चैव बलप्रदं च||५०|| तस्मात् पुरा शोधनमेव कार्यं बलानुरूपं न हि वृष्ययोगाः| सिध्यन्ति देहे मलिने प्रयुक्ताः क्लिष्टे यथा वाससि रागयोगाः||५१||
🔊 Audio coming soon
ವೃಷ್ಯಯೋಗಾಶ್ಚ ಶುದ್ಧದೇಹೈರೇವ ಕರ್ತವ್ಯಾ ಇತಿ ದರ್ಶಯನ್ನಾಹ- ಸ್ರೋತಃಸ್ವಿತ್ಯಾದಿ| ಮಿತಮಿತಿ ಮಾತ್ರಾವತ್| ಕ್ಲಿಷ್ಟೇ ಇತಿ ಮ್ಲಾನೇ||೫೦-೫೧||
Adhikarana 11 (52-53) · Śloka 53
ತತ್ರ ಶ್ಲೋಕೌ- ವಾಜೀಕರಣಸಾಮರ್ಥ್ಯಂ ಕ್ಷೇತ್ರಂ ಸ್ತ್ರೀ ಯಸ್ಯ ಚೈವ ಯಾ| ಯೇ ದೋಷಾ ನಿರಪತ್ಯಾನಾಂ ಗುಣಾಃ ಪುತ್ರವತಾಂ ಚ ಯೇ||೫೨|| ದಶ ಪಞ್ಚ ಚ ಸಂಯೋಗಾ ವೀರ್ಯಾಪತ್ಯವಿವರ್ಧನಾಃ| ಉಕ್ತಾಸ್ತೇ ಶರಮೂಲೀಯೇ ಪಾದೇ ಪುಷ್ಟಿಬಲಪ್ರದಾಃ||೫೩||
तत्र श्लोकौ- वाजीकरणसामर्थ्यं क्षेत्रं स्त्री यस्य चैव या| ये दोषा निरपत्यानां गुणाः पुत्रवतां च ये||५२|| दश पञ्च च संयोगा वीर्यापत्यविवर्धनाः| उक्तास्ते शरमूलीये पादे पुष्टिबलप्रदाः||५३||
🔊 Audio coming soon
ಸಙ್ಗ್ರಹೇ ಯಸ್ಯ ಚೈವ ಯೇತಿ ಯಸ್ಯ ಯಾ ವೃಷ್ಯೇತ್ಯರ್ಥಃ||೫೨-೫೩||
Adhikarana puShpikA · Śloka 1
ಇತ್ಯಗ್ನಿವೇಶಕೃತೇ ತನ್ತ್ರೇ ಚರಕಪ್ರತಿಸಂಸ್ಕೃತೇ ಚಿಕಿತ್ಸಾಸ್ಥಾನೇ ವಾಜೀಕರಣಾಧ್ಯಾಯೇ ಸಂಯೋಗಶರಮೂಲೀಯೋ ನಾಮ ವಾಜೀಕರಣಪಾದಃ ಪ್ರಥಮಃ||೧||
इत्यग्निवेशकृते तन्त्रे चरकप्रतिसंस्कृते चिकित्सास्थाने वाजीकरणाध्याये संयोगशरमूलीयो नाम वाजीकरणपादः प्रथमः||१||
🔊 Audio coming soon
ಇತಿ ಶ್ರೀಚಕ್ರಪಾಣಿದತ್ತವಿರಚಿತಾಯಾಂ ಚರಕತಾತ್ಪರ್ಯಟೀಕಾಯಾಮಾಯುರ್ವೇದದೀಪಿಕಾಯಾಂ ಚಿಕಿತ್ಸಿತಸ್ಥಾನೇ ವಾಜೀಕರಣಾಧ್ಯಾಯೇ ಸಂಯೋಗಶರಮೂಲೀಯೋ ನಾಮ ವಾಜೀಕರಣಪಾದಃ ಪ್ರಥಮಃ||೧||