34. vātavyādhicikitsitam

Adhikarana 1 (1-2) · Śloka 2

অথাতো বাতব্যাধিচিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

ঊরুস্তম্ভভেষজেন বিরূক্ষণাদ্বাতপ্রকোপো ভবতীতি সম্বন্ধাদূরুস্তম্ভানন্তরং বাতব্যাধিচিকিত্সিতমুচ্যতে| তত্র বাত এব ব্যাধির্বাতব্যাধিরিতি পক্ষে বাত এব তত্তদ্দূষ্যসম্প্রাপ্তঃ সর্বাঙ্গৈকাঙ্গরূপতামাপন্নো বিবিধপীডাকর্তৃত্বাদ্বাতব্যাধিরুচ্যতে; যদা তু বাতাদ্ব্যাধির্বাতব্যাধিরিতি পক্ষস্তদা বাতদোষাদ্ দোষদূষ্যসম্মূর্চ্ছনবিশেষরূপঃ সর্বাঙ্গৈকাঙ্গরূপো ব্যাধির্বাতব্যাধিরুচ্যতে| জ্বরাদযস্তু যদ্যপি বাতাদুত্পদ্যন্তে, তথাঽপি তে দোষান্তরেণাপি বাতং বিনা ভবন্তীতি কৃত্বা নাত্র শাস্ত্রে বাতব্যাধিশব্দেনোচ্যন্তে | যেঽপি চাত্র কফপিত্তাবৃতবাতবিকারা বাতব্যাধিত্বেন বক্তব্যাঃ, তেঽপি প্রধানং বাতং বিনা ন ভবন্তীতি কৃত্বা বাতব্যাধিরূপা এব| ন চ বাচ্যং যথা বাতিকা নানাত্মজা ব্যাধযঃ পৃথক্ চিকিত্সযোচ্যন্তে, তথা পিত্তজাঃ কফজাশ্চ চিকিত্স্যন্তামিতি; যতঃ পিত্তকফকৃতানাং নানাত্মজানাং ব্যাধীনাং ন তথা প্রাধান্যং যথা বাতজানাং; তেন বাতজানামেবাবিষ্কৃততমানাং পৃথক্ চিকিত্সোচ্যতে, কফপিত্তজানাং ত্বাবিষ্কৃতানাং বমনবিরেচনাদিকা কফপিত্তচিকিত্সেতি জ্ঞেযম্||১-২||

Adhikarana 2 (3) · Śloka 3

বাযুরাযুর্বলং বাযুর্বাযুর্ধাতা শরীরিণাম্| বাযুর্বিশ্বমিদং সর্বং প্রভুর্বাযুশ্চ কীর্তিতঃ||৩||

বাযোর্বিকারান্ জ্ঞাপযিতুং স্বভাবজ্ঞানানন্তরীযকত্বাদ্বিকৃতিজ্ঞানস্য স্বভাবমেব তাবদাহ- বাযুরিত্যাদি| যদ্যপি শরীরেন্দ্রিযসত্ত্বাত্মসংযোগ আযুঃ, তথাঽপি তাদৃশসংযোগে প্রধানত্বাত্ প্রকৃতিস্থো বাযুরপ্যাযুরুচ্যতে| এবং বলস্যাপি হেতুর্বাযুরিতি কৃত্বা শরীরাধারতযা বলাধারহেতুর্বাযুরেব বলমিত্যুক্তঃ| বিশ্বতা প্রভুতা চ বাযোর্বাতকলাকলীযে প্রতিপাদিতৈব||৩||

Adhikarana 3 (4) · Śloka 4

অব্যাহতগতির্যস্য স্থানস্থঃ প্রকৃতৌ স্থিতঃ| বাযুঃ স্যাত্সোঽধিকং জীবেদ্বীতরোগঃ সমাঃ শতম্||৪||

বাযোরাযুর্হেতুত্বং দর্শযন্নাহ- অব্যাহতেত্যাদি| অব্যাহতগতিঃ অপরিত্যক্তস্বমার্গঃ | স্থানস্থ ইতি ন বিমার্গঃ| প্রকৃতৌ স্থিত ইতি অক্ষীণবৃদ্ধঃ| বীতরোগ ইতি নীরোগঃ||৪||

Adhikarana 4 (5-11) · Śloka 11

প্রাণোদানসমানাখ্যব্যানাপানৈঃ স পঞ্চধা| দেহং তন্ত্রযতে সম্যক্ স্থানেষ্বব্যাহতশ্চরন্||৫|| স্থানং প্রাণস্য মূর্ধোরঃকণ্ঠজিহ্বাস্যনাসিকাঃ | ষ্ঠীবনক্ষবথূদ্গারশ্বাসাহারাদি কর্ম চ||৬|| উদানস্য পুনঃ স্থানং নাভ্যুরঃ কণ্ঠ এব চ| বাক্প্রবৃত্তিঃ প্রযত্নৌর্জোবলবর্ণাদি কর্ম চ||৭|| স্বেদদোষাম্বুবাহীনি স্রোতাংসি সমধিষ্ঠিতঃ| অন্তরগ্নেশ্চ পার্শ্বস্থঃ সমানোঽগ্নিবলপ্রদঃ||৮|| দেহং ব্যাপ্নোতি সর্বং তু ব্যানঃ শীঘ্রগতির্নৃণাম্| গতিপ্রসারণাক্ষেপনিমেষাদিক্রিযঃ সদা||৯|| বৃষণৌ বস্তিমেঢ্রং চ নাভ্যূরূ বঙ্ক্ষণৌ গুদম্| অপানস্থানমন্ত্রস্থঃ শুক্রমূত্রশকৃন্তি চ||১০|| সৃজত্যার্তবগর্ভৌ চ যুক্তাঃ স্থানস্থিতাশ্চ তে| স্বকর্ম কুর্বতে দেহো ধার্যতে তৈরনামযঃ||১১||

প্রাণোদানেত্যাদিনা ব্যবহারার্থং সঞ্জ্ঞোপদর্শনপূর্বকং প্রাণাদীনাং স্থানং কর্ম চাহ| দেহং তন্ত্রযতে ইতি ধারযতে| স্থানেষ্বিতি বক্ষ্যমাণাত্মীযস্থানেষু| আহারাদীত্যত্র আদিগ্রহণাদন্নবিধারণাদীনি গৃহ্যন্তে| কর্ম চেতি প্রাণস্য বাযোরিত্যর্থঃ| প্রাণোদানযোর্যদ্যপি সমানমুরঃস্থানং, তথাঽপি কর্মভেদাদ্ভেদ এব; যথৈকগৃহস্থিতমালাকারকুম্ভকারযোঃ| প্রযতনং প্রযত্নঃ, ঊর্জ উত্সাহঃ; প্রযত্নাদিকর্মত্বেন প্রযত্নৌর্জোবলবর্ণনিষ্পাদনমুচ্যতে| স্বেদদোষাম্বুবাহীনীত্যাদৌ স্বেদবাহীনি তথা অম্বুবাহীনি চ স্রোতাংসি স্রোতোবিমানে (বি.অ.৫) পৃথগেবোক্তানি জ্ঞেযানি, দোষবহানি চ স্রোতাংসি সর্বশরীরচরাণ্যেব, উক্তং হি “বাতপিত্তশ্লেষ্মণাং পুনঃ সর্বশরীরচরাণাং সর্বস্রোতাংস্যযনভূতানি” (বি.অ.৫) ইতি| গতীত্যাদৌ আদিশব্দেনাকুঞ্চনপ্রসারণাদীনাং চ গ্রহণম্| অন্ত্রস্থ ইতি অন্ত্রাণি চাপানস্থানমিত্যর্থঃ| সৃজতীতি নিঃসারযতীতি যাবত্| আর্তবগর্ভৌ চ সৃজতীতি সম্বন্ধঃ| এতানি কর্মাণি যাদৃশাঃ কুর্বন্তি তদাহ- যুক্তা ইত্যাদি; যুক্তা ইতি অব্যাপন্নাঃ| স্থানস্থিতা ইতি যথোক্তস্থানস্থিতাঃ| যস্মাদেবম্ভূতা অতো দেহো ধার্যতে তৈরনামযঃ||৫-১১||

Adhikarana 5 (12-14) · Śloka 14

বিমার্গস্থা হ্যযুক্তা বা রোগৈঃ স্বস্থানকর্মজৈঃ| শরীরং পীডযন্ত্যেতে প্রাণানাশু হরন্তি চ||১২|| সঙ্খ্যামপ্যতিবৃত্তানাং তজ্জানাং হি প্রধানতঃ| অশীতির্নখভেদাদ্যা রোগাঃ সূত্রে নিদর্শিতাঃ||১৩|| তানুচ্যমানান্ পর্যাযৈঃ সহেতূপক্রমাঞ্ছৃণু| কেবলং বাযুমুদ্দিশ্য স্থানভেদাত্তথাঽঽবৃতম্||১৪||

বাতানাং বৈগুণ্যকার্যমাহ- বিমার্গস্থা ইত্যাদি| স্বস্থানকর্মজৈরিতি যস্য বাযোর্যত্ স্থানমুক্তং তত্স্থানগতৈঃ, তথা ষ্ঠীবনাদি যদ্বাযোঃ কর্মোক্তং তজ্জৈশ্চ রোগৈঃ শরীরং পীডযন্তি প্রাণান্ বা মহতা রোগেণ হরন্তি চ| অত্র চ বাযোরেব ভূরিপ্রধানরোগকর্তৃতযা ভিন্নচিকিত্সাপ্রযোজকাঃ পঞ্চভেদা উক্তা ন পিত্তকফযোঃ, অনতিপ্রযোজনত্বাত্| তথা হি তন্ত্রান্তরে পিত্তমপি পাচক-রঞ্জক-সাধকালোচক-ভ্রাজকভেদাত্ পঞ্চবিধমুক্তং; তেষাং চ যথাক্রমং জঠরহৃদযদৃষ্টিত্বক্স্থানত্বমুক্তং; তথা শ্লেষ্মাঽপি বোধক-শ্লেষ্মক-তর্পকাবলম্বক ক্লেদকভেদাত্ পঞ্চবিধঃ, তেষাং চ স্থানানি যথাক্রমং হৃদযামাশযজিহ্বাশিরঃ সন্ধযঃ, কর্মাণি চ যথাক্রমমবলম্বন-ক্লেদন-রসবোধনাক্ষতর্পণ-সন্ধিসংশ্লেষাণি পৃথগুক্তানি| প্রকৃতবাতব্যাধিকথনাযাত্র সঙ্খ্যাদিনির্দেশঃ| তজ্জানামিতি পঞ্চবাতজানাম্| সূত্রে ইতি মহারোগাধ্যাযে (সূ.অ.২০)| উচ্যমানানিতি নখভেদাদীন্ যথাস্থূলমুচ্যমানান্| পর্যাযৈরিতি সঞ্জ্ঞান্তরৈঃ| কথং পুনস্তেঽশীতিনখভেদাদ্যা উপদিষ্টাঃ? উচ্যতে- কেবলং বাযুমুদ্দিশ্য কেচিদ্গদা বেপথ্বাদয উক্তাঃ, তথা চাবৃতং বাতমুদ্দিশ্য কেচিদুক্তাঃ “লিঙ্গং পিত্তাবৃতে দাহস্তৃষ্ণা” ইত্যাদিনা||১২-১৪||

Adhikarana 6 (15-18) · Śloka 19

রূক্ষশীতাল্পলঘ্বন্নব্যবাযাতিপ্রজাগরৈঃ| বিষমাদুপচারাচ্চ দোষাসৃক্স্রবণাদতি||১৫|| লঙ্ঘনপ্লবনাত্যধ্বব্যাযামাতিবিচেষ্টিতৈঃ| ধাতূনাং সঙ্ক্ষযাচ্চিন্তাশোকরোগাতিকর্ষণাত্||১৬|| দুঃখশয্যাসনাত্ ক্রোধাদ্দিবাস্বপ্নাদ্ভযাদপি| বেগসন্ধারণাদামাদভিঘাতাদভোজনাত্||১৭|| মর্মাঘাতাদ্গজোষ্ট্রাশ্বশীঘ্রযানাপতংসনাত্| দেহে স্রোতাংসি রিক্তানি পূরযিত্বাঽনিলো বলী||১৮|| করোতি বিবিধান্ ব্যাধীন্ সর্বাঙ্গৈকাঙ্গসংশ্রিতান্|১৯|

সম্প্রতি নিদানমাহ- রূক্ষেত্যাদি| বিষমাদুপচারাদিতি উপচারবৈরূপ্যাত্| দোষাসৃগিত্যাদৌ দোষশব্দেন পুরীষমপি গৃহ্যতে| অপতংসনং গজাদিভ্যঃ পতনং, কিংবা অবতংসনং ধাতূনাং কর্ষণম্; উক্তং হি খরনাদে- “বিলিখত্যতিতৈক্ষ্ণ্যাদ্যত্ স্মৃতমুল্লেখনং হি তত্| বিকর্ষত্যতিধাতূন্ যত্তচ্চোক্তমব(প)তংসনম্” ইতি| রিক্তানীতি তুচ্ছানি, স্নেহাদিগুণশূন্যানীত্যর্থঃ||১৫-১৮||-

Adhikarana 7 (19) · Śloka 20

অব্যক্তং লক্ষণং তেষাং পূর্বরূপমিতি স্মৃতম্||১৯|| আত্মরূপং তু তদ্ব্যক্তমপাযো লঘুতা পুনঃ|২০|

অব্যক্তং লক্ষণমিত্যাদিনা পূর্বরূপমাহ | আত্মরূপমিতি বর্তমানরোগরূপম্| অপাযো লঘুতা পুনরিতি বাতব্যাধীনামপাযোঽপগমনং শরীরস্য লঘুতা বাতব্যাধিলিঙ্গবিগমেন, শরীরকল্যতেতি যাবত্; কিংবা অপাযো লঘুতা ন সর্বথা বাতলিঙ্গাভাবঃ, যেন প্রকৃতলিঙ্গানি সন্ত্যেব||১৯||-

Adhikarana 8 (20-23) · Śloka 24

সঙ্কোচঃ পর্বণাং স্তম্ভো ভেদোঽস্থ্নাং পর্বণামপি||২০|| লোমহর্ষঃ প্রলাপশ্চ পাণিপৃষ্ঠশিরোগ্রহঃ| খাঞ্জ্যপাঙ্গুল্যকুব্জত্বং শোষোঽঙ্গানামনিদ্রতা||২১|| গর্ভশুক্ররজোনাশঃ স্পন্দনং গাত্রসুপ্ততা| শিরোনাসাক্ষিজত্রূণাং গ্রীবাযাশ্চাপি হুণ্ডনম্||২২|| ভেদস্তোদার্তিরাক্ষেপো মোহশ্চাযাস এব চ| এবংবিধানি রূপাণি করোতি কুপিতোঽনিলঃ||২৩|| হেতুস্থানবিশেষাচ্চ ভবেদ্রোগবিশেষকৃত্|২৪|

কুপিতানাং কার্যমাহ- সঙ্কোচ ইত্যাদি| এতে চ সঙ্কোচাদযো ব্যাধযোঽপি ভবন্তি; উক্তং হি- “ব্যাধযস্তে তদাত্বে তু লিঙ্গানীষ্টানি নামযাঃ” (নি.অ.৮) ইতি| হুণ্ডনং শিরঃপ্রভৃতীনামন্তঃপ্রবেশঃ; অন্যে তু কেশভূমিস্ফুটনং শঙ্খললাটভেদশ্চ শিরোহুণ্ডনং, নাসাহুণ্ডনং ঘ্রাণনাশঃ, অক্ষিহুণ্ডনম্ অক্ষিব্যুদাসঃ, জত্রুহুণ্ডনং বক্ষোপরোধঃ, গ্রীবাহুণ্ডনং গ্রীবাস্তম্ভঃ| বাতব্যাধিবিশেষোত্পাদে হেতুমাহ- হেতুস্থানবিশেষাদিত্যাদি| হেতুবিশেষঃ পিত্তাবরণাদিঃ, স্থানবিশেষঃ কোষ্ঠাদিঃ, কিংবা হেতুকৃতঃ স্থানবিশেষঃ; উক্তং হি- “প্রকুপিতাস্তু প্রকোপণবিশেষাদ্ দূষ্যবিশেষান্ দূষযন্তঃ” (বি.অ.৬) ইত্যাদি| কেচিত্তু ‘দেহে স্থানবিশেষাচ্চ’ ইতি পঠন্তি||২০-২৩||-

Adhikarana 9 (24-37) · Śloka 38

তত্র কোষ্ঠাশ্রিতে দুষ্টে নিগ্রহো মূত্রবর্চসোঃ||২৪|| ব্রধ্নহৃদ্রোগগুল্মার্শঃপার্শ্বশূলং চ মারুতে| সর্বাঙ্গকুপিতে বাতে গাত্রস্ফুরণভঞ্জনে||২৫|| বেদনাভিঃ পরীতশ্চ স্ফুটন্তীবাস্য সন্ধযঃ| গ্রহো বিণ্মূত্রবাতানাং শূলাধ্মানাশ্মশর্করাঃ||২৬|| জঙ্ঘোরুত্রিকপাত্পৃষ্ঠরোগশোষৌ গুদস্থিতে| হৃন্নাভিপার্শ্বোদররুক্তৃষ্ণোদ্গারবিসূচিকাঃ||২৭|| কাসঃ কণ্ঠাস্যশোষশ্চ শ্বাসশ্চামাশযস্থিতে| পক্বাশযস্থোঽন্ত্রকূজং শূলাটোপৌ করোতি চ||২৮|| কৃচ্ছ্রমূত্রপুরীষত্বমানাহং ত্রিকবেদনাম্| শ্রোত্রাদিষ্বিন্দ্রিযবধং কুর্যাদ্দুষ্টসমীরণঃ||২৯|| ত্বগ্রূক্ষা স্ফুটিতা সুপ্তা কৃশা কৃষ্ণা চ তুদ্যতে| আতন্যতে সরাগা চ পর্বরুক্ ত্বক্স্থিতেঽনিলে||৩০|| রুজস্তীব্রাঃ সসন্তাপা বৈবর্ণ্যং কৃশতাঽরুচিঃ| গাত্রে চারূংষি ভুক্তস্য স্তম্ভশ্চাসৃগ্গতেঽনিলে||৩১|| গুর্বঙ্গং তুদ্যতেঽত্যর্থং দণ্ডমুষ্টিহতং তথা| সরুক্ শ্রমিতমত্যর্থং মাংসমেদোগতেঽনিলে||৩২|| ভেদোঽস্থিপর্বণাং সন্ধিশূলং মাংসবলক্ষযঃ| অস্বপ্নঃ সন্ততা রুক্ চ মজ্জাস্থিকুপিতেঽনিলে||৩৩|| ক্ষিপ্রং মুঞ্চতি বধ্নাতি শুক্রং গর্ভমথাপি বা| বিকৃতিং জনযেচ্চাপি শুক্রস্থঃ কুপিতোঽনিলঃ||৩৪|| বাহ্যাভ্যন্তরমাযামং খল্লিং কুব্জত্বমেব চ| সর্বাঙ্গৈকাঙ্গরোগাংশ্চ কুর্যাত্ স্নাযুগতোঽনিলঃ||৩৫|| শরীরং মন্দরুক্শোফং শুষ্যতি স্পন্দতে তথা| সুপ্তাস্তন্ব্যো মহত্যো বা সিরা বাতে সিরাগতে||৩৬|| বাতপূর্ণদৃতিস্পর্শঃ শোথঃ সন্ধিগতেঽনিলে| প্রসারণাকুঞ্চনযোঃ প্রবৃত্তিশ্চ সবেদনা||৩৭|| (ইত্যুক্তং স্থানভেদেন বাযোর্লক্ষণমেব চ)|৩৮|

স্থানবিশেষকৃতমেব ব্যাধিভেদমাহ- তত্র কোষ্ঠাশ্রিতে ইত্যাদি| সর্বাঙ্গকুপিতে ইতি কৃত্স্নদেহকুপিতে| গুদস্থিতে ইতি উত্তরগুদস্থিতে| আতন্যতে বিস্তার্যতে| ভুক্তস্য স্তম্ভ ইতি ভুক্তবতো গাত্রস্তম্ভো ভবতীতি| গুর্বঙ্গমিত্যাদি মাংসগে মেদেগে চ লক্ষণং সমানং, তথা ভেদোঽস্থিপর্বণামিত্যাদি অস্থিমজ্জগযোঃ সমানং লক্ষণম্| সমানেঽপি লক্ষণে বিবিধাশিতপীতীযোক্তবিশিষ্টধাতুলক্ষণৈর্বিশেষ উন্নেযঃ| সন্ততেতি সানুবন্ধা | ক্ষিপ্রং মুঞ্চতি বধ্নাতীতি ব্যবাযকালে ক্ষিপ্রং মুঞ্চতি বা চিরং ধারযতে, তথা গর্ভমপি ক্ষিপ্রং মুঞ্চতি বা চিরং ধারযতি| বিকৃতমিতি ব্যঙ্গত্বাদিনানাবিকারযুক্তং গর্ভং জনযতি| বাহ্যেত্যাদিনা স্নাযুগতবাতলক্ষণত্বেনোক্তানি বহিরাযামাদীন্যগ্রে বক্তব্যানি | মন্দরুক্শোফমিতি মন্দরুজং মন্দশোফং চ| সুপ্তা ইতি নিঃস্পন্দাঃ||২৪-৩৭||-

Adhikarana 10 (38-42) · Śloka 42

অতিবৃদ্ধঃ শরীরার্ধমেকং বাযুঃ প্রপদ্যতে| যদা তদোপশোষ্যাসৃগ্বাহুং পাদং চ জানু চ||৩৮|| তস্মিন্ সঙ্কোচযত্যর্ধে মুখং জিহ্মং করোতি চ| বক্রীকরোতি নাসাভ্রূললাটাক্ষিহনূস্তথা||৩৯|| ততো বক্রং ব্রজত্যাস্যে ভোজনং বক্রনাসিকম্ | স্তব্ধং নেত্রং কথযতঃ ক্ষবথুশ্চ নিগৃহ্যতে||৪০|| দীনা জিহ্মা সমুত্ক্ষিপ্তা কলা সজ্জতি চাস্য বাক্| দন্তাশ্চলন্তি বাধ্যেতে শ্রবণৌ ভিদ্যতে স্বরঃ||৪১|| পাদহস্তাক্ষিজঙ্ঘোরুশঙ্খশ্রবণগণ্ডরুক্ | অর্ধে তস্মিন্মুখার্ধে বা কেবলে স্যাত্তদর্দিতম্||৪২||

ইদানীমতিবলান্ বাতবিকারানভিধাতুমুদ্যতোঽর্দিতমাহ- অতিবৃদ্ধ ইত্যাদি| অতিবৃদ্ধগ্রহণেন বাযোর্বলবত্প্রকোপমাহ| একমিতি বামং দক্ষিণং বা সঙ্কোচযতি বাহুং, পাদং, জানু চ; বক্রং চ জিহ্মং করোতি| বক্রং ব্রজতি ভোজনমিতি ন সমং মুখেন খাদতি, কিন্তু বক্রৈকদেশেন| দীনেতি অগম্ভীরা| জিহ্মেতি কুটিলা| সমুত্ক্ষিপ্তেতি অতিত্বরিতা| কলেতি অব্যক্তা| বাধ্যেতে শ্রবণাবিতি যদ্যপি একপার্শ্বাশ্রযো বিকারোঽযং, তথাঽপি প্রভাবাত্ কর্ণযোর্বাধাঽত্র ভবতি| কেবল ইতি অর্ধে এব ন কৃত্স্নে| ননু যদা দেহার্ধব্যাপিত্বমর্দিতস্য তদাঽর্দিতেন অর্ধাঙ্গস্য কো ভেদঃ? ব্রূমঃ-অর্দিতো বেগিতযা ন সর্বকালং ভবতি, অর্ধাঙ্গস্তু সর্বকালং ব্যাপ্য ভবতি; উক্তং হি- “স্বস্থঃ স্যাদর্দিতাদীনাং মুহুর্বেগাগমে গতে” ইতি| কিংবা যথোক্তবিশিষ্টলক্ষণোঽর্দিতঃ, অর্ধাঙ্গে তু নৈতানি সর্বাণি ভবন্তি||৩৮-৪২||

Adhikarana 11 (43-44) · Śloka 45

মন্যে সংশ্রিত্য বাতোঽন্তর্যদা নাডীঃ প্রপদ্যতে| মন্যাস্তম্ভং তদা কুর্যাদন্তরাযামসঞ্জ্ঞিতম্||৪৩|| অন্তরাযম্যতে গ্রীবা মন্যা চ স্তভ্যতে ভৃশম্| দন্তানাং দংশনং লালা পৃষ্ঠাযামঃ শিরোগ্রহঃ||৪৪|| জৃম্ভা বদনসঙ্গশ্চাপ্যন্তরাযামলক্ষণম্| (ইত্যুক্তস্ত্বন্তরাযামো ...|৪৫|

মন্যে ইত্যাদিনা অন্তরাযামমাহ| অন্তর্যদা নাডীঃ প্রপদ্যতে ইতি মন্যাসম্বদ্ধা এব অন্তর্গতাঃ সিরাঃ প্রপদ্যত ইত্যর্থঃ| অন্তরাযামসঞ্জ্ঞিতমিতি এবংবিধো মন্যাস্তম্ভ অন্তরাযাম উচ্যতে; অপরস্তু মন্যাস্তম্ভো বক্ষ্যমাণবহিরাযাম ইতি বক্তব্যঃ| তন্ত্রান্তরে তু মন্যাস্তম্ভ আযামযোঃ পূর্বরূপত্বেনোক্তঃ| অন্তরাযম্যত ইতি অন্তঃ আকৃষ্যতে| পৃষ্ঠাযাম ইতি পৃষ্ঠবহির্নির্গতিঃ||৪৩-৪৪||-

Adhikarana 12 (45-48) · Śloka 48

...বহিরাযাম উচ্যতে)||৪৫|| পৃষ্ঠমন্যাশ্রিতা বাহ্যাঃ শোষযিত্বা সিরা বলী| বাযুঃ কুর্যাদ্ধনুস্তম্ভং বহিরাযামসঞ্জ্ঞকম্||৪৬|| চাপবন্নাম্যমানস্য পৃষ্ঠতো নীযতে শিরঃ| উর উত্ক্ষিপ্যতে মন্যা স্তব্ধা গ্রীবাঽবমৃদ্যতে||৪৭|| দন্তানাং দশনং জৃম্ভা লালাস্রাবশ্চ বাগ্গ্রহঃ| জাতবেগো নিহন্ত্যেষ বৈকল্যং বা প্রযচ্ছতি||৪৮||

পৃষ্ঠেত্যাদি বহিরাযামলক্ষণম্| পৃষ্ঠমন্যাশ্রিতা ইতি পৃষ্ঠানুগতমন্যাসম্বদ্ধাঃ| বাহ্যা ইতি সিরাবিশেষণম্| বাহ্যাশ্চ সিরাঃ পৃষ্ঠগতা এব| কেচিত্তু পৃষ্ঠমন্যাশ্রিত ইতি বাতবিশেষণং পঠন্তি| পৃষ্ঠতো নীযতে ইতি পৃষ্ঠং প্রতি আকৃষ্যতে| জাতবেগ ইতি উদ্বেগঃ | এতৌ চাযামৌ “বাহ্যাভ্যন্তরমাযামং খল্লীং কুব্জত্বমেব চ| সর্বৈকাঙ্গরোগাংশ্চ কুর্যাত্ স্নাযুগতোঽনিলঃ” ইত্যনেন স্নাযুগতানিলজন্যাবুক্তৌ, ইহ চ সিরাগতবাতজন্যত্বেনোক্তৌ, তেনোভযবচনাত্ সিরাস্নাযুগতবাতজন্যাবেব ভবতঃ| উক্তং হ্যন্যত্র- “মহাহেতুর্বলী বাযুঃ সিরাঃ সস্নাযুকণ্ডরাঃ| মন্যাপৃষ্ঠাশ্রিতা বাহ্যাঃ সংশোষ্যাযামযেদ্বহিঃ” ইত্যাদি||৪৫-৪৮||

Adhikarana 13 (49) · Śloka 50

হনুমূলে স্থিতো বন্ধাত্ সংস্রযত্যনিলো হনূ| বিবৃতাস্যত্বমথবা কুর্যাত্ স্তব্ধমবেদনম্||৪৯|| হনুগ্রহং চ সংস্তভ্য হনুং(নূ)সংবৃতবক্রতাম্|৫০|

হনুস্তম্ভসঙ্কোচযোর্লক্ষণমাহ- হনুমূলে স্থিত ইত্যাদি| সংস্রযতীতি চ্যাবযতি| বিবৃতাস্যত্বমথবেতি অত্রাথবাশব্দেন সংবৃতবক্ত্রতা পাক্ষিকী চাপেক্ষতে| সংস্তভ্যেতি নিশ্চলীকৃত্য সংবৃতমুখতাং করোতি| এতদ্দ্বযমপি হনুস্তম্ভ এব||৪৯||-

Adhikarana 14 (50) · Śloka 51

মুহুরাক্ষিপতি ক্রুদ্ধো গাত্রাণ্যাক্ষেপকোঽনিলঃ||৫০|| পাণিপাদং চ সংশোষ্য সিরাঃ সস্নাযুকণ্ডরাঃ|৫১|

মুহুরিত্যাদি আক্ষেপলক্ষণম্||৫০||-

Adhikarana 15 (51) · Śloka 52

পাণিপাদশিরঃপৃষ্ঠশ্রোণীঃ স্তভ্নাতি মারুতঃ||৫১|| দণ্ডবত্স্তব্ধগাত্রস্য দণ্ডকঃ সোঽনুপক্রমঃ|৫২|

পাণিপাদং চ সংশোষ্যেত্যাদি দণ্ডাক্ষেপকসম্প্রাপ্তিকথনম্| পাণিপাদশির ইত্যাদি দণ্ডকলক্ষণম্||৫১||-

Adhikarana 16 (52) · Śloka 53

স্বস্থঃ স্যাদর্দিতাদীনাং মুহুর্বেগে গতেঽগতে||৫২|| পীড্যতে পীডনৈস্তৈস্তৈর্ভিষগেতান্ বিবর্জযেত্|৫৩|

অর্দিতাদীনাং দণ্ডকান্তানাং সমানং রূপমাহ- স্বস্থঃ স্যাদিত্যাদি| অর্দিতহনুস্তম্ভাদিষু যত্র মুহুর্মুহুর্বেগিত্বং দৃশ্যতে তদর্দিতান্তর্গতমেব জ্ঞেযম্||৫২||-

Adhikarana 17 (53-55) · Śloka 55

হত্বৈকং মারুতঃ পক্ষং দক্ষিণং বামমেব বা||৫৩|| কুর্যাচ্চেষ্টানিবৃত্তিং হি রুজং বাক্স্তম্ভমেব চ| গৃহীত্বাঽর্ধং শরীরস্য সিরাঃ স্নাযূর্বিশোষ্য চ||৫৪|| পাদং সঙ্কোচযত্যেকং হস্তং বা তোদশূলকৃত্| একাঙ্গরোগং তং বিদ্যাত্ সর্বাঙ্গং সর্বদেহজম্||৫৫||

হত্বৈকমিত্যাদি পক্ষবধলক্ষণম্| গৃহীত্বাঽর্ধমিত্যাদি একাঙ্গলক্ষণম্| সর্বাঙ্গং সর্বদেহজমিতি সর্বাঙ্গলক্ষণম্||৫৩-৫৫||

Adhikarana 18 (56-57) · Śloka 57

স্ফিক্পূর্বা কটিপৃষ্ঠোরুজানুজঙ্ঘাপদং ক্রমাত্| গৃধ্রসী স্তম্ভরুক্তোদৈর্গৃহ্ণাতি স্পন্দতে মুহুঃ||৫৬|| বাতাদ্বাতকফাত্তন্দ্রাগৌরবারোচকান্বিতা| খল্লী তু পাদজঙ্ঘোরুকরমূলাবমোটনী||৫৭||

স্ফিক্পূর্বেত্যাদি| প্রথমং স্ফিচং স্তম্ভরুক্তোদৈর্গৃহ্ণাতি, পশ্চাত্তু কটিপৃষ্ঠোরুজানুজঙ্ঘাপদং গৃহ্ণাতি সা গৃধ্রসী বাতাত্; বাতকফাত্তু সা পূর্বোক্তলক্ষণা সতী তন্দ্রাদ্যন্বিতা ভবতি; এবং গৃধ্রসীদ্বযং “দ্বে গৃধ্রস্যৌ বাতাদ্ বাতকফাচ্চ” (সূ.অ.১৯) ইত্যনেনোক্তং বিবৃতং ভবতি||৫৬-৫৭||

Adhikarana 19 (58) · Śloka 58

স্থানানামনুরূপৈশ্চ লিঙ্গৈঃ শেষান্ বিনির্দিশেত্|৫৮|

অনুক্তনখভেদাদিপরিগ্রহার্থমাহ- স্থানানামিত্যাদি| শেষান্ নখভেদাদীন্ নখগুল্ফাদীনামনুরূপৈর্লিঙ্গৈর্ভেদশূলাদিভির্নির্দিশেদিতি জ্ঞেযম্| কিচিত্ ‘স্থাননামানুরূপৈঃ’ ইতি পঠন্তি| তত্র নখস্থানানুরূপং ভেদসঞ্জ্ঞানুরূপং চ লিঙ্গং নখস্ফুটনরূপং ভবতি| এবং চাপরবাতবিকারেষ্বপি মহারোগোক্তেষু স্থানানুরূপলিঙ্গযোগোঽনুসর্তব্যঃ|৫৮|-

Adhikarana 20 (58-60) · Śloka 61

সর্বেষ্বেতেষু সংসর্গং পিত্তাদ্যৈরুপলক্ষযেত্||৫৮|| বাযোর্ধাতুক্ষযাত্ কোপো মার্গস্যাবরণেন চ (বা)| বাতপিত্তকফা দেহে সর্বস্রোতোঽনুসারিণঃ||৫৯|| বাযুরেব হি সূক্ষ্মত্বাদ্দ্বযোস্তত্রাপ্যুদীরণঃ | কুপিতস্তৌ সমুদ্ধূয তত্র তত্র ক্ষিপন্ গদান্||৬০|| করোত্যাবৃতমার্গত্বাদ্রসাদীংশ্চোপশোষযেত্|৬১|

বাতস্য পিত্তাদিসংসর্গং জ্ঞাপযন্নাহ- সর্বেষ্বিত্যাদি| পিত্তাদ্যৈরিতি পিত্তকফরক্তপুরীষাদিভিঃ| অথাবৃতস্য বাযোঃ কথং কুপিতত্বং ভবতি যাবতা আবৃতো দুর্বল এব ভবতীত্যাহ- বাযোরিত্যাদি| ধাতুক্ষযাদিতি সারক্ষযাত্| মার্গাবরণেন বেগপ্রতিবন্ধাদেব কুপিতো ভবতি| অথ ভবতু মার্গরোধাদ্বাতকোপঃ, আবরকেণ তু পিত্তেন কফেন চাস্য কথং ন সম্বন্ধো ভবতীত্যাহ- বাতপিত্তেত্যাদি| ত্রিতযমেলকেঽপি বাযোঃ প্রাধান্যমাহ- বাযুরেব হি সূক্ষ্মত্বাদিতি; সূক্ষ্মমার্গানুসারিতযা প্রেরকত্বাত্| তস্মাত্ ত্রিষ্বপি দোষেষু বাযুরেবোক্তন্যাযেন প্রধানম্, অতঃ কুপিতঃ পিত্তকফৌ সমুদ্ধূয তাভ্যামাবৃতমার্গোঽপি তত্র তত্র প্রদেশে গদান্ করোতি; তথা রসাদীংশ্চ তত্র তত্র ক্ষিপন্ সংশোষযেত্||৫৮-৬০||-

Adhikarana 21 (61-71) · Śloka 72

লিঙ্গং পিত্তাবৃতে দাহস্তৃষ্ণা শূলং ভ্রমস্তমঃ ||৬১|| কট্বম্ললবণোষ্ণৈশ্চ বিদাহঃ শীতকামিতা| শৈত্যগৌরবশূলানি কট্বাদ্যুপশযোঽধিকম্||৬২|| লঙ্ঘনাযাসরূক্ষোষ্ণকামিতা চ কফাবৃতে| রক্তাবৃতে সদাহার্তিস্ত্বঙ্মাংসান্তরজো ভৃশম্||৬৩|| ভবেত্ সরাগঃ শ্বযথুর্জাযন্তে মণ্ডলানি চ| কঠিনাশ্চ বিবর্ণাশ্চ পিডকাঃ শ্বযথুস্তথা||৬৪|| হর্ষঃ পিপীলিকানাং চ সঞ্চার ইব মাংসগে| চলঃ স্নিগ্ধো মৃদুঃ শীতঃ শোফোঽঙ্গেষ্বরুচিস্তথা||৬৫|| আঢ্যবাত ইতি জ্ঞেযঃ স কৃচ্ছ্রো মেদসাঽঽবৃতঃ| স্পর্শমস্থ্নাঽঽবৃতে তূষ্ণং পীডনং চাভিনন্দতি||৬৬|| সম্ভজ্যতে সীদতি চ সূচীভিরিব তুদ্যতে| মজ্জাবৃতে বিনামঃ স্যাজ্জৃম্ভণং পরিবেষ্টনম্||৬৭|| শূলং তু পীড্যমানে চ পাণিভ্যাং লভতে সুখম্| শুক্রাবেগোঽতিবেগো বা নিষ্ফলত্বং চ শুক্রগে||৬৮|| ভুক্তে কুক্ষৌ চ রুগ্জীর্ণে শাম্যত্যন্নাবৃতেঽনিলে| মূত্রাপ্রবৃত্তিরাধ্মানং বস্তৌ মূত্রাবৃতেঽনিলে||৬৯|| বর্চসোঽতিবিবন্ধোঽধঃ স্বে স্থানে পরিকৃন্ততি| ব্রজত্যাশু জরাং স্নেহো ভুক্তে চানহ্যতে নরঃ||৭০|| চিরাত্ পীডিতমন্নেন দুঃখং শুষ্কং শকৃত্ সৃজেত্| শ্রোণীবঙ্ক্ষণপৃষ্ঠেষু রুগ্বিলোমশ্চ মারুতঃ||৭১|| অস্বস্থং হৃদযং চৈব বর্চসা ত্বাবৃতেঽনিলে|৭২|

আবরণকৃতং বাতকোপং দর্শযিত্বা আবরণবিশেষকৃতং লিঙ্গমাহ- লিঙ্গং পিত্তাবৃতে ইত্যাদি| কট্বাদ্যুপশয ইতি কটূষ্ণাদিকফবিপরীতৈরুপশযঃ| অধিকমিতি বাতহরৈরপ্যুপশযো নাধিকো ভবতীতি দর্শযতি| মাংসগে ইতি মাংসাবৃতে| মাংসগতস্য রক্তাদিগতস্য চ বাতস্য পূর্বমেব লক্ষণমুক্তম্, ইহ তু রক্তাদ্যাবৃতস্য লক্ষণমুচ্যত ইতি বিশেষঃ| আঢ্যবাতেতি আযুর্বেদসঞ্জ্ঞেযং মেদসাঽঽবৃতবাতস্য| স্বস্থানে ইতি পক্বাশযে| পরিকৃন্ততি পরিকর্তিকাং জনযতি||৬১-৭১||-

Adhikarana 22 (72-74) · Śloka 74

সন্ধিচ্যুতির্হনুস্তম্ভঃ কুঞ্চনং কুব্জতাঽর্দিতঃ||৭২|| পক্ষাঘাতোঽঙ্গসংশোষঃ পঙ্গুত্বং খুডবাততা| স্তম্ভনং চাঢ্যবাতশ্চ রোগা মজ্জাস্থিগাশ্চ যে||৭৩|| এতে স্থানস্য গাম্ভীর্যাদ্যত্নাত্ সিধ্যন্তি বা ন বা| নবান্ বলবতস্ত্বেতান্ সাধযেন্নিরুপদ্রবান্||৭৪||

সাধ্যাসাধ্যবিভাগমাহ- সন্ধিচ্যুতিরিত্যাদি| অত্র কুব্জত্বপঙ্গুত্বাদযো যদ্যপি সাক্ষান্ন প্রপঞ্চিতাস্তথাঽপি শেষাতিদেশেনৈব তল্লক্ষণং জ্ঞেযম্| খুডবাততা গুল্ফবাততা, কিংবা সন্ধিগতবাততা| মজ্জাস্থিগা ইতি মজ্জাস্থ্যাবৃতমজ্জাস্থিগতবাতজন্যা ইত্যর্থঃ| স্থানস্য গাম্ভীর্যাদিতি গম্ভীরস্থানাশ্রিতত্বাত্; অন্যে তু গাম্ভীর্যং কৃতাস্পদত্বমাহুঃ| যত্নাত্ সিধ্যন্তি বা নবেতি পাক্ষিকসিদ্ধিবচনমিতরবৈদ্যাভিপ্রাযেণ জ্ঞেযম্; আচার্যস্তু আচার্যপ্রখ্যো বা বৈদ্যঃ সাধযত্যেব বলাত্, ইতরবৈদ্যস্তু নাবশ্যং সর্বত্রাব্যাহতজ্ঞানো ভবতি, তেন সংশযাভিধানং; ততশ্চ ন পারমার্থিকী সন্দিগ্ধতা এতাদৃশানাং সাধ্যতাং প্রতীতি জ্ঞেযম্| নবানামপ্যেষাং নিরুপদ্রবতযা সাধ্যতামাহ- নবানিত্যাদি| উপদ্রবাশ্চাত্র শৃঙ্গগ্রাহিকযাঽনুক্তা অপি সামান্যোপদ্রবলক্ষণযুক্তা এব কেচিদ্গদা বিজ্ঞেযাঃ; কিংবা অধ্যাযশেষে ‘হৃদ্রোগো বিদ্রধিঃ’ ইত্যাদিনা বক্ষ্যমাণা উপদ্রবা জ্ঞেযাঃ||৭২-৭৪||

Adhikarana 23 (75-82) · Śloka 83

ক্রিযামতঃ পরং সিদ্ধাং বাতরোগাপহাং শৃণু| কেবলং নিরুপস্তম্ভমাদৌ স্নেহৈরুপাচরেত্||৭৫|| বাযুং সর্পির্বসাতৈলমজ্জপানৈর্নরং ততঃ| স্নেহক্লান্তং সমাশ্বাস্য পযোভিঃ স্নেহযেত্ পুনঃ||৭৬|| যূষৈর্গ্রাম্যাম্বুজানূপরসৈর্বা স্নেহসংযুতৈঃ| পাযসৈঃ কৃশরৈঃ সাম্ললবণৈরনুবাসনৈঃ||৭৭|| নাবনৈস্তর্পণৈশ্চান্নৈঃ সুস্নিগ্ধং স্বেদযেত্ততঃ| স্বভ্যক্তং স্নেহসংযুক্তৈর্নাডীপ্রস্তরসঙ্করৈঃ||৭৮|| তথাঽন্যৈর্বিবিধৈঃ স্বেদৈর্যথাযোগমুপাচরেত্| স্নেহাক্তং স্বিন্নমঙ্গং তু বক্রং স্তব্ধমথাপি বা||৭৯|| শনৈর্নামযিতুং শক্যং যথেষ্টং শুষ্কদারুবত্| হর্ষতোদরুগাযামশোথস্তম্ভগ্রহাদযঃ||৮০|| স্বিন্নস্যাশু প্রশাম্যন্তি মার্দবং চোপজাযতে| স্নেহশ্চ ধাতূন্সংশুষ্কান্ পুষ্ণাত্যাশু প্রযোজিতঃ||৮১|| বলমগ্নিবলং পুষ্টিং প্রাণাংশ্চাপ্যভিবর্ধযেত্| অসকৃত্তং পুনঃ স্নেহৈঃ স্বেদৈশ্চাপ্যুপপাদযেত্||৮২|| তথা স্নেহমৃদৌ কোষ্ঠে ন তিষ্ঠন্ত্যনিলামযাঃ|৮৩|

অবসরপ্রাপ্তাং ক্রিযামাহ- ক্রিযামত ইত্যাদি| কেবলমিত্যাদৌ কেবলমিতি অসংসৃষ্টম্| নিরুপস্তম্ভমিতি অনাবৃতম্| কৈঃ? স্নেহৈঃ| কথং চোপাচরেদিত্যাহ- সর্পির্বসাতৈলমজ্জপানৈরিতি| স্নেহপানপ্রযোগানন্তরং কর্তব্যমাহ- নরং ততঃ স্নেহক্লান্তমিত্যাদি| স্নেহক্লান্তমিতি স্নেহপানোদ্বিগ্নং স্নেহগ্লানং চ| সমাশ্বাস্যেতি বিশ্রমযিত্বা | স্নেহযেদিতিপদং তর্পণৈঃ পানৈরিত্যন্তং যাবদনুবর্ততে| অন্যৈরিতি কুটীভূস্বেদাদিভিঃ| যথাযোগমিতি সর্বথা স্নেহপূর্বকস্বেদম্| স্নেহপূর্বকস্বেদগুণমাহ- স্নেহাক্তং স্বিন্নমিত্যাদি| স্বেদাধ্যাযে “স্নেহপূর্বং প্রযুক্তেন” (সূ.অ.১৪) ইত্যাদিনোক্তোঽপ্যযং স্নেহপূর্বকস্বেদগুণঃ পুনঃ প্রকরণাগতত্বাদুচ্যতে| আশু প্রযোজিত ইতি পদং পুষ্ণাতীত্যনেন সম্বধ্যতে| অনিলামযা ন তিষ্ঠন্তি ন স্থাযিনো ভবন্তীত্যর্থঃ||৭৫-৮২||-

Adhikarana 24 (83-88) · Śloka 89

যদ্যনেন সদোষত্বাত্ কর্মণা ন প্রশাম্যতি||৮৩|| মৃদুভিঃ স্নেহসংযুক্তৈরৌষধৈস্তং বিশোধযেত্| ঘৃতং তিল্বকসিদ্ধং বা সাতলাসিদ্ধমেব বা||৮৪|| পযসৈরণ্ডতৈলং বা পিবেদ্দোষহরং শিবম্| স্নিগ্ধাম্ললবণোষ্ণাদ্যৈরাহারৈর্হি মলশ্চিতঃ||৮৫|| স্রোতো বদ্ধ্বাঽনিলং রুন্ধ্যাত্তস্মাত্তমনুলোমযেত্ | দুর্বলো যোঽবিরেচ্যঃ স্যাত্তং নিরূহৈরুপাচরেত্||৮৬|| পাচনৈর্দীপনীযৈর্বা ভোজনৈস্তদ্যুতৈর্নরম্| সংশুদ্ধস্যোত্থিতে চাগ্নৌ স্নেহস্বেদৌ পুনর্হিতৌ||৮৭|| স্বাদ্বম্ললবণস্নিগ্ধৈরাহারৈঃ সততং পুনঃ| নাবনৈর্ধূমপানৈশ্চ সর্বানেবোপপাদযেত্||৮৮|| ইতি সামান্যতঃ প্রোক্তং বাতরোগচিকিত্সিতম্|৮৯|

যদ্যনেন সদোষত্বাদিত্যাদি| অত্র কেবলো নিরুপস্তম্ভশ্চ বাযুশ্চিকিত্স্যত্বেনাধিকৃতঃ, তস্য সদোষত্বমনুপপন্নং; ততঃ সদোষত্বং কর্মণি যোজনীযং; তেন কর্মণোঽবিশুদ্ধত্বাদ্ বাযুর্ন প্রশাম্যতি, কর্মণশ্চোক্তস্যাপ্যত্রাশুদ্ধির্মলজনকত্বাত্; বক্ষ্যতি হি “স্নিগ্ধাম্ললবণোষ্ণাদ্যৈরাহারৈর্হি মলশ্চিতঃ” ইত্যাদি| কিংবা সদোষত্বাদিত্যনেনোত্তরকালীনং বাযোঃ সংশমনমুচ্যতে, অসংসৃষ্টত্বমনুপস্তম্ভত্বং চ যদুক্তং তদুপক্রমারম্ভকালে জ্ঞেযম্| সদোষত্বং চ স্নেহপ্রযোগেণানুপশমে সংশোধনকরণে চ হেতুঃ| সমলত্বমেবোত্তরকালীনং কুতো ভবতীত্যাহ- স্নিগ্ধেত্যাদি| দুর্বলো যোঽবিরেচ্য ইতি দুর্বলত্বপ্রকর্ষেণাবিরেচ্য ইত্যর্থঃ| তথা হি “অনাস্থাপ্যাস্ত্বজীর্ণী” (সি.অ.২) ইত্যাদৌ অতিদুর্বলঃ পঠিতঃ| অত্যর্থং দুর্বলতযা বস্ত্যনর্হেঽপি বিধিমাহ- পাচনৈর্দীপনীযৈশ্চেতি| পাচনং কিঞ্চিন্ন দীপনং, যথা পটোলং দীপনং; দীপনং কিঞ্চিন্ন পাচনং যথা ত্রিফলা; উক্তং হি সুশ্রুতে- “ত্রিফলা কফপিত্তঘ্নী মেহকুষ্ঠবিনাশিনী| চক্ষুষ্যা দীপনী চ” (সু.সূ.অ.৩৮) ইতি; অতঃ পাচনৈরিত্যস্য দীপনৈরিতি বিশেষণং কৃতম্| ভোজ্যৈর্বা তদ্যুতৈরিতি পাচনদীপনসংযুক্তৈর্ভোজ্যৈঃ| উত্থিতে চাগ্নৌ ইতি দীপ্তে বহ্নৌ||৮৩-৮৮||-

Adhikarana 25 (89-98) · Śloka 99

বিশেষতস্তু কোষ্ঠস্থে বাতে ক্ষারং পিবেন্নরঃ||৮৯|| পাচনৈর্দীপনৈর্যুক্তৈরম্লৈর্বা পাচযেন্মলান্| গুদপক্বাশযস্থে তু কর্মোদাবর্তনুদ্ধিতম্||৯০|| আমাশযস্থে শুদ্ধস্য যথাদোষহরীঃ ক্রিযাঃ| সর্বাঙ্গকুপিতেঽভ্যঙ্গো বস্তযঃ সানুবাসনাঃ||৯১|| স্বেদাভ্যঙ্গাবগাহাশ্চ হৃদ্যং চান্নং ত্বগাশ্রিতে| শীতাঃ প্রদেহা রক্তস্থে বিরেকো রক্তমোক্ষণম্||৯২|| বিরেকো মাংসমেদঃস্থে নিরূহাঃ শমনানি চ| বাহ্যাভ্যন্তরতঃ স্নেহৈরস্থিমজ্জগতং জযেত্||৯৩|| হর্ষোঽন্নপানং শুক্রস্থে বলশুক্রকরং হিতম্| বিবদ্ধমার্গং দৃষ্ট্বা বা শুক্রং দদ্যাদ্বিরেচনম্||৯৪|| বিরিক্তপ্রতিভুক্তস্য পূর্বোক্তাং কারযেত্ ক্রিযাম্| গর্ভে শুষ্কে তু বাতেন বালানাং চাপি শুষ্যতাম্||৯৫|| সিতাকাশ্মর্যমধুকৈর্হিতমুত্থাপনে পযঃ| হৃদি প্রকুপিতে সিদ্ধমংশুমত্যা পযো হিতম্||৯৬|| মত্স্যান্নাভিপ্রদেশস্থে সিদ্ধান্ বিল্বশলাটুভিঃ| বাযুনা বেষ্ট্যমানে তু গাত্রে স্যাদুপনাহনম্||৯৭|| তৈলং সঙ্কুচিতেঽভ্যঙ্গো মাষসৈন্ধবসাধিতম্| বাহুশীর্ষগতে নস্যং পানং চৌত্তরভক্তিকম্||৯৮|| বস্তিকর্ম ত্বধো নাভেঃ শস্যতে চাবপীডকঃ|৯৯|

স্থানবিশেষেণ ক্রিযাবিশেষমাহ- বিশেষতস্ত্বিত্যাদিনা অধো নাভেঃ শস্যতে চাবপীডক ইত্যন্তেন| ক্ষারং যবক্ষারম্, উক্তং হি “যাবশূকঃ স্রংসনীযপাচনীযার্শোঘ্নানাং” (সূ.অ.২৫); কিংবা ক্ষারমিতি গ্রহণ্যাদিনির্দিষ্টং দীপনক্ষারম্| উদাবর্তনুত্কর্ম ত্রিমর্মীযে “তং তৈলশীতজ্বরনাশনাক্তং” (চি.অ.২৬) ইত্যাদিনোক্তং জ্ঞেযম্| স্বেদা ইত্যাদি ত্বগ্গতানিলচিকিত্সিতম্| প্রহর্ষঃ মনোহর্ষণম্| বিরেচনানন্তরং প্রতিভোজিতো বিরিক্তপ্রতিভুক্তঃ| পূর্বোক্তামিতি শুক্রজননহর্ষিণীং ক্রিযাম্| উত্থাপনে ইতি পুষ্টিজননে সিতাদিভিঃ সিদ্ধং পযো হিতম্| অংশুমতী শালপর্ণী|| মত্স্যানিতি নাভিপ্রদেশে কুপিতে বাতে মত্স্যা বিল্বশলাটুভিঃ সমং সিদ্ধা দেযাঃ| নাভিপ্রদেশকোপশ্চ বাতস্যানুক্তোঽপীহ তত্র ভবশূলতোদাদিভির্জ্ঞেযঃ| বেষ্ট্যমান ইতি অবমোট্যমানে| উপনাহনং চ বাতহরদ্রব্যৈরেব কর্তব্যম্| নস্যে পানে চ ঔত্তরভক্তিকং মাষসৈন্ধবসাধিতমেব তৈলং জ্ঞেযম্| তত্র চ মাষস্য ক্বাথঃ, সৈন্ধবস্য কল্কঃ| সর্পিষোঽবপীডকঃ যত্র সর্পিঃ পীত্বা তত্পীডকমন্নং ভুজ্যতে||৮৯-৯৮||-

Adhikarana 26 (99-103) · Śloka 103

অর্দিতে নাবনং মূর্ধ্নি তৈলং তর্পণমেব চ||৯৯|| নাডীস্বেদোপনাহাশ্চাপ্যানূপপিশিতৈর্হিতাঃ| স্বেদনং স্নেহসংযুক্তং পক্ষাঘাতে বিরেচনম্||১০০|| অন্তরাকণ্ডরাগুল্ফং সিরা বস্ত্যগ্নিকর্ম চ| গৃধ্রসীষু প্রযুঞ্জীত খল্ল্যাং তূষ্ণোপনাহনম্||১০১|| পাযসৈঃ কৃশরৈর্মাংসৈঃ শস্তং তৈলঘৃতান্বিতৈঃ| ব্যাত্তাননে হনুং স্বিন্নামঙ্গুষ্ঠাভ্যাং প্রপীড্য চ||১০২|| প্রদেশিনীভ্যাং চোন্নাভ্য চিবুকোন্নামনং হিতম্| স্রস্তং স্বং গমযেত্স্থানং স্তব্ধং স্বিন্নং বিনামযেত্||১০৩||

অর্দিতাদিচিকিত্সামাহ- অর্দিতে ইত্যাদি| তর্পণমিতি নাবনবিশেষণং; কিংবা তর্পণং সন্তর্পণমেব| অন্তরাকণ্ডরাগুল্ফং সিরেতি কণ্ডরাগুল্ফযোর্মধ্যে সিরাব্যধনং কর্তব্যম্| গৃধ্রসীষ্বিতি বহুবচনং ব্যক্তিভেদতযা| ব্যাত্তাননমিতি বিবৃতাস্যম্| প্রদেশিনী অঙ্গুষ্ঠানন্তরাঽঙ্গুলী||৯৯-১০৩||

Adhikarana 27 (104) · Śloka 104

প্রত্যেকং স্থানদূষ্যাদিক্রিযাবৈশেষ্যমাচরেত্ |১০৪|

অনুক্তবিশেষচিকিত্সোপগ্রহণার্থমাহ- প্রত্যেকমিত্যাদি| স্থানং পক্বাশযাদি, দূষ্যং রসরক্তাদি, আদিগ্রহণাদাবরণগ্রহণম্| স্থানদূষ্যাপেক্ষঃ ক্রিযাবিশেষস্তু ‘কোষ্ঠস্থে’ ইত্যাদিনৈবোক্তঃ|১০৪|-

Adhikarana 28 (104-105) · Śloka 106

সর্পিস্তৈলবসামজ্জসেকাভ্যঞ্জনবস্তযঃ ||১০৪|| স্নিগ্ধাঃ স্বেদা নিবাতং চ স্থানং প্রাবরণানি চ| রসাঃ পযাংসি ভোজ্যানি স্বাদ্বম্ললবণানি চ||১০৫|| বৃংহণং যচ্চ তত্ সর্বং প্রশস্তং বাতরোগিণাম্|১০৬|

সর্ববাতবিকারসমানং চিকিত্সিতমাহ- সর্পিস্তৈলমিত্যাদি||১০৪-১০৫||-

Adhikarana 29 (106-117) · Śloka 118

বলাযাঃ পঞ্চমূলস্য দশমূলস্য বা রসে||১০৬|| অজশীর্ষাম্বুজানূপমাংসাদপিশিতৈঃ পৃথক্| সাধযিত্বা রসান্ স্নিগ্ধান্দধ্যম্লব্যোষসংস্কৃতান্||১০৭|| ভোজযেদ্বাতরোগার্তং তৈর্ব্যক্তলবণৈর্নরম্| এতৈরেবোপনাহাংশ্চ পিশিতৈঃ সম্প্রকল্পযেত্||১০৮|| ঘৃততৈলযুতৈঃ সাম্লৈঃ ক্ষুণ্ণস্বিন্নৈরনস্থিভিঃ| পত্রোত্ক্বাথপযস্তৈলদ্রোণ্যঃ স্যুরবগাহনে||১০৯|| স্বভ্যক্তানাং প্রশস্যন্তে সেকাশ্চানিলরোগিণাম্| আনূপৌদকমাংসানি দশমূলং শতাবরীম্||১১০|| কুলত্থান্ বদরান্মাষাংস্তিলান্রাস্নাং যবান্ বলাম্| বসাদধ্যারনালাম্লৈঃ সহ কুম্ভ্যাং বিপাচযেত্||১১১|| নাডীস্বেদং প্রযুঞ্জীত পিষ্টৈশ্চাপ্যুপনাহনম্| তৈশ্চ সিদ্ধং ঘৃতং তৈলমভ্যঙ্গং পানমেব চ||১১২|| মুস্তং কিণ্বং তিলাঃ কুষ্ঠং সুরাহ্বং লবণং নতম্| দধিক্ষীরচতুঃস্নেহৈঃ সিদ্ধং স্যাদুপনাহনম্||১১৩|| উত্কারিকাবেসবারক্ষীরমাষতিলৌদনৈঃ| এরণ্ডবীজগোধূমযবকোলস্থিরাদিভিঃ||১১৪|| সস্নেহৈঃ সরুজং গাত্রমালিপ্য বহলং ভিষক্| এরণ্ডপত্রৈর্বধ্নীযাদ্রাত্রৌ কল্যং বিমোক্ষযেত্||১১৫|| ক্ষীরাম্বুনা ততঃ সিক্তং পুনশ্চৈবোপনাহিতম্| মুঞ্চেদ্রাত্রৌ দিবাবদ্ধং চর্মভিশ্চ সলোমভিঃ||১১৬|| ফলানাং তৈলযোনীনামম্লপিষ্টান্ সুশীতলান্| প্রদেহানুপনাহাংশ্চ গন্ধৈর্বাতহরৈরপি||১১৭|| পাযসৈঃ কৃশরৈশ্চৈব কারযেত্ স্নেহসংযুতৈঃ|১১৮|

বলাযা ইত্যাদৌ পৃথক্শব্দাদ্ বলাদযস্ত্রযঃ সাধনদ্রব্যপ্রযোগাঃ, তেষ্বজশীর্ষাদযশ্চত্বারঃ পৃথক্ সাধ্যাঃ, এবং দ্বাদশ রসা ভবন্তি| কল্যমিতি প্রভাতে| ফলানাং তৈলযোনীনামিতি তিলাতস্যাদীনাম্| প্রদেহানুপনাহাংশ্চেত্যত্র প্রদেহ উপনাহাপেক্ষযা তনুর্লেপঃ| গন্ধৈরিতি অগুর্বাদ্যৈঃ||১০৬-১১৭||-

Adhikarana 30 (118-135) · Śloka 136

রূক্ষশুদ্ধানিলার্তানামতঃ স্নেহান্ প্রচক্ষ্মহে||১১৮|| বিবিধান্ বিবিধব্যাধিপ্রশমাযামৃতোপমান্| দ্রোণেঽম্ভসঃ পচেদ্ভাগান্ দশমূলাচ্চতুষ্পলান্||১১৯|| যবকোলকুলত্থানাং ভাগৈঃ প্রস্থোন্মিতৈঃ সহ| পাদশেষে রসে পিষ্টৈর্জীবনীযৈঃ সশর্করৈঃ||১২০|| তথা খর্জূরকাশ্মর্যদ্রাক্ষাবদরফল্গুভিঃ| সক্ষীরৈঃ সর্পিষঃ প্রস্থঃ সিদ্ধঃ কেবলবাতনুত্||১২১|| নিরত্যযঃ প্রযোক্তব্যঃ পানাভ্যঞ্জনবস্তিষু| চিত্রকং নাগরং রাস্নাং পৌষ্করং পিপ্পলীং শটীম্||১২২|| পিষ্ট্বা বিপাচযেত্ সর্পির্বাতরোগহরং পরম্| বলাবিল্বশৃতে ক্ষীরে ঘৃতমণ্ডং বিপাচযেত্||১২৩|| তস্য শুক্তিঃ প্রকুঞ্চো বা নস্যং মূর্ধগতেঽনিলে| গ্রাম্যানূপৌদকানাং তু ভিত্বাঽস্থীনি পচেজ্জলে||১২৪|| তং স্নেহং দশমূলস্য কষাযেণ পুনঃ পচেত্| জীবকর্ষভকাস্ফোতাবিদারীকপিকচ্ছুভিঃ||১২৫|| বাতঘ্নৈর্জীবনীযৈশ্চ কল্কৈর্দ্বিক্ষীরভাগিকম্| তত্সিদ্ধং নাবনাভ্যঙ্গাত্তথা পানানুবাসনাত্||১২৬|| সিরাপর্বাস্থিকোষ্ঠস্থং প্রণুদত্যাশু মারুতম্| যে স্যুঃ প্রক্ষীণমজ্জানঃ ক্ষীণশুক্রৌজসশ্চ যে||১২৭|| বলপুষ্টিকরং তেষামেতত্ স্যাদমৃতোপমম্| তদ্বত্সিদ্ধা বসা নক্রমত্স্যকূর্মচুলূকজা||১২৮|| প্রত্যগ্রা বিধিনাঽনেন নস্যপানেষু শস্যতে| প্রস্থঃ স্যাত্ত্রিফলাযাস্তু কুলত্থকুডবদ্বযম্||১২৯|| কৃষ্ণগন্ধাত্বগাঢক্যোঃ পৃথক্ পঞ্চপলং ভবেত্| রাস্নাচিত্রকযোর্দ্বে দ্বে দশমূলং পলোন্মিতম্||১৩০|| জলদ্রোণে পচেত্ পাদশেষে প্রস্থোন্মিতং পৃথক্| সুরারনালদধ্যম্লসৌবীরকতুষোদকম্||১৩১|| কোলদাডিমবৃক্ষাম্লরসং তৈলং বসাং ঘৃতম্| মজ্জানং চ পযশ্চৈব জীবনীযপলানি ষট্||১৩২|| কল্কং দত্ত্বা মহাস্নেহং সম্যগেনং বিপাচযেত্| সিরামজ্জাস্থিগে বাতে সর্বাঙ্গৈকাঙ্গরোগিষু||১৩৩|| বেপনাক্ষেপশূলেষু তদভ্যঙ্গে প্রযোজযেত্| নির্গুণ্ড্যা মূলপত্রাভ্যাং গৃহীত্বা স্বরসং ততঃ||১৩৪|| তেন সিদ্ধং সমং তৈলং নাডীকুষ্ঠানিলার্তিষু| হিতং পামাপচীনাং চ পানাভ্যঞ্জনপূরণম্||১৩৫|| কার্পাসাস্থিকুলত্থানাং রসে সিদ্ধং চ বাতনুত্|১৩৬|

রূক্ষশুদ্ধেত্যাদৌ শুদ্ধানিলার্তাঃ কেবলবাতপীডিতাঃ| ঘৃতমণ্ডঃ ঘৃতস্যোপরিতনো ভাগঃ| শুক্তিঃ অর্ধপলং, প্রকুঞ্চঃ পলম্| তদ্বত্সিদ্ধেতি বলাবিল্বপ্রভৃতিশৃতক্ষীরসিদ্ধা| চুলুকী শিশুমারঃ| প্রত্যগ্রেতি অভিনবা| নস্যপানেষ্বিতি নস্যেষু পানেষু চ | কৃষ্ণগন্ধাত্বক্ শোভাঞ্জনত্বক্| মহাস্নেহমিতি চতুঃস্নেহম্| তেন সিদ্ধং তৈলমিত্যত্র সমমিতি নির্গুণ্ডীরসসমং, নতু সমশব্দঃ সহার্থঃ; সহার্থস্য তৃতীযযৈবোক্তত্বাত্| নাডী নাডীব্রণঃ; নাডীব্রণস্য সুশ্রুতাদিষু পঞ্চবিধত্বমুক্তং জ্ঞেযম্| অপচী চ হন্বস্থিকক্ষাদিদেশভবা||১১৮-১৩৫||-

Adhikarana 31 (136-137) · Śloka 138

মূলকস্বরসে ক্ষীরসমে স্থাপ্যং ত্র্যহং দধি||১৩৬|| তস্যাম্লস্য ত্রিভিঃ প্রস্থৈস্তৈলপ্রস্থং বিপাচযেত্| যষ্ট্যাহ্বশর্করারাস্নালবণার্দ্রকনাগরৈঃ||১৩৭|| সুপিষ্টৈঃ পলিকৈঃ পানাত্তদভ্যঙ্গাচ্চ বাতনুত্|১৩৮|

মূলকস্বরস ইত্যাদৌ মূলকস্বরসে সমক্ষীরে দধি স্থাপ্যং; তস্যাম্লস্যেতি মূলরসাদেরম্লতাঙ্গতস্য| অত্র চ ত্রিভিঃ প্রস্থৈরিতি বচনাত্ মূলকরসাদীনাং প্রত্যেকং প্রস্থমানত্বম্| উক্তং হি জতূকর্ণে- “বিপচেদ্ দধিমূলকরসপযসা” ইত্যাদি||১৩৬-১৩৭||-

Adhikarana 32 (138-141) · Śloka 142

পঞ্চমূলকষাযেণ পিণ্যাকং বহুবার্ষিকম্||১৩৮|| পক্ত্বা তস্য রসং পূত্বা তৈলপ্রস্থং বিপাচযেত্| পযসাঽষ্টগুণেনৈতত্ সর্ববাতবিকারনুত্||১৩৯|| সংসৃষ্টে শ্লেষ্মণা চৈতদ্বাতে শস্তং বিশেষতঃ| যবকোলকুলত্থানাং শ্রেযস্যাঃ শুষ্কমূলকাত্||১৪০|| বিল্বাচ্চাঞ্জলিমেকৈকং দ্রবৈরম্লৈর্বিপাচযেত্| তেন তৈলং কষাযেণ ফলাম্লৈঃ কটুভিস্তথা||১৪১|| পিষ্টৈঃ সিদ্ধং মহাবাতৈরার্তঃ শীতে প্রযোজযেত্|১৪২|

পঞ্চমূলকষাযেণেত্যাদৌ পঞ্চমূলীকষাযং তথা পিণ্যাকক্বথিতং জলং চ পৃথগ্দেযমিতি কেচিদ্বদন্তি, বযং তু পঞ্চমূলীকষাযেণৈব জলস্থানীযেন সাধিতপিণ্যাকস্য রসমত্রেচ্ছামঃ| পাঠশ্চ ‘পঞ্চমূলীকষাযেণ পিণ্যাকং বহুবার্ষিকম্| পক্ত্বা তস্য রসং পূত্বা’ ইত্যাদি পঠ্যতে; জাতূকর্ণেঽপি “পিণ্যাকং বহুবার্ষিকং স্থিরাদিসলিলে পচেত্, রসেঽস্মিনষ্টগুণেন পযসা তৈলং সাধ্যম্” ইতি| দ্রবৈরম্লৈরিতি কাঞ্জিকতক্রাদিভিঃ| ফলাম্লৈরিতি অম্লফলৈর্দাডিমাদিভিঃ||১৩৮-১৪১||-

Adhikarana 33 (142-156) · Śloka 156

সর্ববাতবিকারাণাং তৈলান্যন্যান্যতঃ শৃণু||১৪২|| চতুষ্প্রযোগাণ্যাযুষ্যবলবর্ণকরাণি চ| রজঃশুক্রপ্রদোষঘ্নান্যপত্যজননানি চ||১৪৩|| নিরত্যযানি সিদ্ধানি সর্বদোষহরাণি চ| সহাচরতুলাযাশ্চ রসে তৈলাঢকং পচেত্||১৪৪|| মূলকল্কাদ্দশপলং পযো দত্ত্বা চতুর্গুণম্| সিদ্ধেঽস্মিঞ্ছর্করাচূর্ণাদষ্টাদশপলং ভিষক্||১৪৫|| বিনীয দারুণেষ্বেতদ্বাতব্যাধিষু যোজযেত্| শ্বদংষ্ট্রাস্বরসপ্রস্থৌ দ্বৌ সমৌ পযসা সহ||১৪৬|| ষট্পলং শৃঙ্গবেরস্য গুডস্যাষ্টপলং তথা| তৈলপ্রস্থং বিপক্বং তৈর্দদ্যাত্ সর্বানিলার্তিষু||১৪৭|| জীর্ণে তৈলে চ দুগ্ধেন পেযাকল্পঃ প্রশস্যতে| বলাশতং গুডূচ্যাশ্চ পাদং রাস্নাষ্টভাগিকম্||১৪৮|| জলাঢকশতে পক্ত্বা দশভাগস্থিতে রসে| দধিমস্ত্বিক্ষুনির্যাসশুক্তৈস্তৈলাঢকং সমৈঃ||১৪৯|| পচেত্ সাজপযোঽর্ধাংশৈঃ কল্কৈরেভিঃ পলোন্মিতৈঃ| শটীসরলদার্বেলামঞ্জিষ্ঠাগুরুচন্দনৈঃ||১৫০|| পদ্মকাতিবিষামুস্তসূর্পপর্ণীহরেণুভিঃ| যষ্ট্যাহ্বসুরসব্যাঘ্রনখর্ষভকজীবকৈঃ||১৫১|| পলাশরসকস্তূরীনলিকাজাতিকোষকৈঃ| স্পৃক্কাকুঙ্কুমশৈলেযজাতীকটুফলাম্বুভিঃ||১৫২|| ত্বচাকুন্দুরুকর্পূরতুরুষ্কশ্রীনিবাসকৈঃ | লবঙ্গনখকক্কোলকুষ্ঠমাংসীপ্রিযঙ্গুভিঃ||১৫৩|| স্থৌণেযতগরধ্যামবচামদনপল্লবৈঃ| সনাগকেশরৈঃ সিদ্ধে ক্ষিপেচ্চাত্রাবতারিতে||১৫৪|| পত্রকল্কং ততঃ পূতং বিধিনা তত্ প্রযোজযেত্| শ্বাসং কাসং জ্বরং হিক্কাং ছর্দিং গুল্মান্ ক্ষতং ক্ষযম্||১৫৫|| প্লীহশোষাবপস্মারমলক্ষ্মীং চ প্রণাশযেত্| বলাতৈলমিদং শ্রেষ্ঠং বাতব্যাধিবিনাশনম্||১৫৬|| (অগ্নিবেশায গুরুণা কৃষ্ণাত্রেযেণ ভাষিতম্)| ইতি বলাতৈলম্|

চতুষ্প্রযোগাণীতি পানাভ্যঞ্জননস্যানুবাসনযোগীনি| সহাচরেত্যাদৌ মূলকল্কাদ্দশপলমিত্যনেন সহচরমূলাদেব দশপলঃ কল্কো দেযঃ; জতূকর্ণে ত্বত্র মূলকস্যৈব কল্ক উক্তঃ| জীর্ণে তৈলে ইত্যাদি পীতে তৈলে জীর্ণে সতি| ক্ষীরেণ পেযাবিধানমত্র প্রযোগসাত্ম্যত্বাত্| গুডূচ্যাঃ পাদমিতি পঞ্চবিংশতিপলানি| রাস্নাষ্টভাগিকমিতি গতাপেক্ষযা রাস্নাযা অষ্টভাগেনার্ধত্রযোদশপলানি ভবন্তি| সাজপযোঽর্ধাংশমিতি ছাগক্ষীরার্ধযুক্তম্| সূর্পপর্ণ্যৌ মুদ্গমাষপর্ণ্যৌ| রসঃ গন্ধরসঃ| নলিকা স্বনামখ্যাতা| কটুফলা লতাকস্তূরী, অন্যে সুগন্ধি দক্ষিণাপথপ্রসিদ্ধং পদ্যল(?)মাহুঃ| তুরুষ্কঃ সিল্হকঃ| নখীস্বল্পনখী| পত্রকল্কমিতি সুগন্ধিত্বাদস্য তৈলস্য গন্ধশাস্রপরিভাষযা পত্রকল্কো দেয ইত্যুচ্যতে; গন্ধশাস্ত্রে চ “চূর্ণস্বরসপুষ্পাণাং সিদ্ধশীতেঽবতারিতে| দীযতে গন্ধবৃদ্ধ্যর্থং পত্রকল্কো মনীষিভিঃ” ইতি; তেনাত্র কর্পূরাদিপত্রকল্কোঽবতারিতে এব দেযঃ||১৪২-১৫৬||-

Adhikarana 34 (157-164) · Śloka 164

অমৃতাযাস্তুলাঃ পঞ্চ দ্রোণেষ্বষ্টস্বপাং পচেত্||১৫৭|| পাদশেষে সমক্ষীরং তৈলস্য দ্ব্যাঢকং পচেত্| এলামাংসীনতোশীরসারিবাকুষ্ঠচন্দনৈঃ||১৫৮|| বলাতামলকীমেদাশতপুষ্পর্ধিজীবকৈঃ | কাকোলীক্ষীরকাকোলীশ্রাবণ্যতিবলানখৈঃ||১৫৯|| মহাশ্রাবণিজীবন্তীবিদারীকপিকচ্ছুভিঃ| শতাবরীমহামেদাকর্কটাখ্যাহরেণুভিঃ||১৬০|| বচাগোক্ষুরকৈরণ্ডরাস্নাকালাসহাচরৈঃ| বীরাশল্লকিমুস্তত্বক্পত্রর্ষভকবালকৈঃ||১৬১|| সহৈলাকুঙ্কুমস্পৃক্কাত্রিদশাহ্বৈশ্চ কার্ষিকৈঃ| মঞ্জিষ্ঠাযাস্ত্রিকর্ষেণ মধুকাষ্টপলেন চ||১৬২|| কল্কৈস্তত্ ক্ষীণবীর্যাগ্নিবলসম্মূঢচেতসঃ| উন্মাদারত্যপস্মারৈরার্তাংশ্চ প্রকৃতিং নযেত্||১৬৩|| বাতব্যাধিহরং শ্রেষ্ঠং তৈলাগ্র্যমমৃতাহ্বযম্| (কৃষ্ণাত্রেযেণ গুরুণা ভাষিতং বৈদ্যপূজিতম্)||১৬৪|| ইত্যমৃতাদ্যং তৈলম্|

অমৃতাযা ইত্যাদৌ মহাশ্রাবণী বৃহন্মুণ্ডিতিকা| কালা কালানুসারিবা| ত্রিদশাহ্বঃ দেবদারুঃ||১৫৭-১৬৪||

Adhikarana 35 (165-166) · Śloka 166

রাস্নাসহস্রনির্যূহে তৈলদ্রোণং বিপাচযেত্| গন্ধৈর্হৈমবতৈঃ পিষ্টৈরেলাদ্যৈশ্চানিলার্তিনুত্||১৬৫|| কল্পোঽযমশ্বগন্ধাযাং প্রসারণ্যাং বলাদ্বযে| ক্বাথকল্কপযোভির্বা বলাদীনাং পচেত্ পৃথক্||১৬৬|| ইতি রাস্নাতৈলম্|

রাস্নাসহস্রনির্যূহে ইত্যাদৌ হৈমবতৈরিতি হিমালযভূতৈঃ অগরুকুষ্ঠক্ষেমকাদিভিঃ| এলাদ্যৈরিতি অমৃতাদ্যে এলামাংসীনতেত্যাদিনোক্তৈঃ| এষ কল্প ইত্যনন্তরোক্তরাস্নাকল্পো বলাদিষ্বপি বক্তব্যঃ| বলাদীনামিতি অনন্তরোক্তানাং বলাপ্রসারণ্যশ্বগন্ধানাম্||১৬৫-১৬৬||

Adhikarana 36 (167-171) · Śloka 171

মূলকস্বরসং ক্ষীরং তৈলং দধ্যম্লকাঞ্জিকম্| তুল্যং বিপাচযেত্ কল্কৈর্বলাচিত্রকসৈন্ধবৈঃ||১৬৭|| পিপ্পল্যতিবিষারাস্নাচবিকাগুরুশিগ্রুকৈঃ| ভল্লাতকবচাকুষ্ঠশ্বদংষ্ট্রাবিশ্বভেষজৈঃ||১৬৮|| পুষ্করাহ্বশটীবিল্বশতাহ্বানতদারুভিঃ| তত্সিদ্ধং পীতমত্যুগ্রান্ হন্তি বাতাত্মকান্ গদান্||১৬৯|| ইতি মূলকাদ্যং তৈলম্| বৃষমূলগুডূচ্যোশ্চ দ্বিশতস্য শতস্য চ| চিত্রকাত্ সাশ্বগন্ধাচ্চ ক্বাথে তৈলাঢকং পচেত্||১৭০|| সক্ষীরং বাযুনা ভগ্নে দদ্যাজ্জর্জরিতে তথা| প্রাক্তৈলাবাপসিদ্ধং চ ভবেদেতদ্গুণোত্তরম্||১৭১|| ইতি বৃষমূলাদিতৈলম্|

বৃষমূলেত্যাদৌ অশ্বগন্ধাচিত্রকাভ্যাং মিলিতাভ্যাং তুলা| প্রাক্তৈলাবাপসিদ্ধমিতি মূলকস্বরসমিত্যাদ্যুক্ততৈলকল্কেন সমং বৃষমূলাদিক্বাথেন চ সিদ্ধম্| ভবেত্তদ্দ্বিগুণোত্তরমিতি পাঠে বৃষমূলাদিক্বাথসিদ্ধাত্তৈলাদ্ দ্বিগুণং শ্রেষ্ঠম্||১৬৭-১৭১||

Adhikarana 37 (172-182) · Śloka 182

রাস্নাশিরীষযষ্ট্যাহ্বশুণ্ঠীসহচরামৃতাঃ||১৭২|| স্যোনাকদারুশম্পাকহযগন্ধাত্রিকণ্টকাঃ| এষাং দশপলান্ ভাগান্ কষাযমুপকল্পযেত্||১৭৩|| ততস্তেন কষাযেণ সর্বগন্ধৈশ্চ কার্ষিকৈঃ| দধ্যারনালমাষাম্বুমূলকেক্ষুরসৈঃ শুভৈঃ||১৭৪|| পৃথক্ প্রস্থোন্মিতৈঃ সার্ধং তৈলপ্রস্থং বিপাচযেত্| প্লীহমূত্রগ্রহশ্বাসকাসমারুতরোগনুত্ ||১৭৫|| এতন্মূলকতৈলাখ্যং বর্ণাযুর্বলবর্ধনম্| ইতি মূলকতৈলম্| যবকোলকুলত্থানাং মত্স্যানাং শিগ্রুবিল্বযোঃ| রসেন মূলকানাং চ তৈলং দধিপযোন্বিতম্||১৭৬|| সাধযিত্বা ভিষগ্দদ্যাত্ সর্ববাতামযাপহম্| লশুনস্বরসে সিদ্ধং তৈলমেভিশ্চ বাতনুত্||১৭৭|| তৈলান্যেতান্যৃতুস্নাতামঙ্গনাং পাযযেত চ| পীত্বাঽন্যতমমেষাং হি বন্ধ্যাঽপি জনযেত্ সুতম্||১৭৮|| যচ্চ শীতজ্বরে তৈলমগুর্বাদ্যমুদাহৃতম্| অনেকশতশস্তচ্চ সিদ্ধং স্যাদ্বাতরোগনুত্||১৭৯|| বক্ষ্যন্তে যানি তৈলানি বাতশোণিতকেঽপি চ| তানি চানিলশান্ত্যর্থং সিদ্ধিকামঃ প্রযোজযেত্||১৮০|| নাস্তি তৈলাত্ পরং কিঞ্চিদৌষধং মারুতাপহম্| ব্যবায্যুষ্ণগুরুস্নেহাত্ সংস্কারাদ্বলবত্তরম্||১৮১|| গণৈর্বাতহরৈস্তস্মাচ্ছতশোঽথ সহস্রশঃ| সিদ্ধং ক্ষিপ্রতরং হন্তি সূক্ষ্মমার্গস্থিতান্ গদান্||১৮২||

সর্বগন্ধৈশ্চেতি বলাতৈলোক্তৈঃ সর্বগন্ধৈঃ| সার্ধমিতি সহিতম্| মূলকতৈলাখ্যমিতিসঞ্জ্ঞযা তত্র রাস্নাদীনাং মূলেনৈব ক্বাথসাধনং দর্শযতি| লশুনস্বরসে ইত্যাদৌ এভিশ্চেতি যবাদিক্বাথৈরনন্তরোক্তৈঃ| অনেকশতশস্তচ্চ সিদ্ধমিতি অনেকশতশস্তেনৈব বিদ্যানেন সাধিতং সদিত্যর্থঃ||১৭২-১৮২||

Adhikarana 38 (183-188) · Śloka 188

ক্রিযা সাধারণী সর্বা সংসৃষ্টে চাপি শস্যতে| বাতে পিত্তাদিভিঃ স্রোতঃস্বাবৃতেষু বিশেষতঃ||১৮৩|| পিত্তাবৃতে বিশেষেণ শীতামুষ্ণাং তথা ক্রিযাম্| ব্যত্যাসাত্ কারযেত্ সর্পির্জীবনীযং চ শস্যতে||১৮৪|| ধন্বমাংসং যবাঃ শালির্যাপনাঃ ক্ষীরবস্তযঃ| বিরেকঃ ক্ষীরপানং চ পঞ্চমূলীবলাশৃতম্||১৮৫|| মধুযষ্টিবলাতৈলঘৃতক্ষীরৈশ্চ সেচনম্| পঞ্চমূলকষাযেণ কুর্যাদ্বা শীতবারিণা||১৮৬|| কফাবৃতে যবান্নানি জাঙ্গলা মৃগপক্ষিণঃ| স্বেদাস্তীক্ষ্ণা নিরূহাশ্চ বমনং সবিরেচনম্||১৮৭|| জীর্ণং সর্পিস্তথা তৈলং তিলসর্ষপজং হিতম্| সংসৃষ্টে কফপিত্তাভ্যাং পিত্তমাদৌ বিনির্জযেত্||১৮৮||

সম্প্রতি দোষান্তরাদিসংসৃষ্টবাতচিকিত্সামাহ- ক্রিযা সাধারণীত্যাদি| সাধারণীতি যা বাতে সা সংসর্গিণি চ পিত্তাদৌ সমানা সংসর্গহিতেতি যাবত্; ন কেবলং সংসৃষ্টে বাযৌ সাধারণী, কিন্তু বাতপিত্তাদিভিঃ স্রোতঃস্বাবৃতেষ্বপি সাধারণী কর্তব্যা| বাতেন বাতাবরণমগ্রে বক্ষ্যতি| কেচিত্তু ‘বাতে পিত্তাদিভিঃ’ ইতি পঠন্তি; অযং পাঠঃ সুগমঃ| বিশিষ্টসূত্রিতাং ক্রিযামাহ- পিত্তাবৃতে ইত্যাদি| ব্যত্যাসাদিতি পরিবর্তনেন শীতাং কৃত্বোষ্ণাম্, উষ্ণাং চ কৃত্বা শীতাং কুর্যাদিত্যর্থঃ| যাপনা বস্তযঃ সিদ্ধৌ বক্ষ্যমাণাঃ| পিত্তমাদৌ বিনির্জযেদিতি বচনেন কফাপেক্ষযা পিত্তস্যাশুকারিতযা পিত্তজযমেবোপদিশতি||১৮৩-১৮৮||

Adhikarana 39 (189-198) · Śloka 199

আমাশযগতং মত্বা কফং বমনমাচরেত্||১৮৯|| পক্বাশযে বিরেকং তু পিত্তে সর্বত্রগে তথা| স্বেদৈর্বিষ্যন্দিতঃ শ্লেষ্মা যদা পক্বাশযে স্থিতঃ||১৯০|| পিত্তং বা দর্শযেল্লিঙ্গং বস্তিভিস্তৌ বিনির্হরেত্| শ্লেষ্মণাঽনুগতং বাতমুষ্ণৈর্গোমূত্রসংযুতৈঃ||১৯১|| নিরূহৈঃ পিত্তসংসৃষ্টং নির্হরেত্ ক্ষীরসংযুতৈঃ| মধুরৌষধসিদ্ধৈশ্চ তৈলৈস্তমনুবাসযেত্||১৯২|| শিরোগতে তু সকফে ধূমনস্যাদি কারযেত্| হৃতে পিত্তে কফে যঃ স্যাদুরঃস্রোতোঽনুগোঽনিলঃ||১৯৩|| সশেষঃ স্যাত্ ক্রিযা তত্র কার্যা কেবলবাতিকী| শোণিতেনাবৃতে কুর্যাদ্বাতশোণিতকীং ক্রিযাম্||১৯৪|| প্রমেহবাতমেদোঘ্নীমামবাতে প্রযোজযেত্| স্বেদাভ্যঙ্গরসক্ষীরস্নেহা মাংসাবৃতে হিতাঃ||১৯৫|| মহাস্নেহোঽস্থিমজ্জস্থে পূর্ববদ্রেতসাঽঽবৃতে| অন্নাবৃতে তদুল্লেখঃ পাচনং দীপনং লঘু||১৯৬|| মূত্রলানি তু মূত্রেণ স্বেদাঃ সোত্তরবস্তযঃ| শকৃতা তৈলমৈরণ্ডং স্নিগ্ধোদাবর্তবত্ক্রিযা ||১৯৭|| স্বস্থানস্থো বলী দোষঃ প্রাক্ তং স্বৈরৌষধৈর্জযেত্| বমনৈর্বা বিরেকৈর্বা বস্তিভিঃ শমনেন বা||১৯৮|| (ইত্যুক্তমাবৃতে বাতে পিত্তাদিভির্যথাযথম্ )|১৯৯|

আমাশযগতং মত্বা কফমিতি বাতানুবন্ধিকফস্যৈবেযং চিকিত্সা| পক্বাশযে বিরেকং ত্বিত্যত্র ‘কফে’ ইত্যনুবর্ততে| সর্বত্রগে ইতি অন্যস্থানগতেঽপি পিত্তে| যদ্যপি দোষান্তরস্থানগতে তদ্দোষপ্রধানমেব কর্ম বমনং বস্তির্বা যুক্তঃ, তথাঽপ্যনেন বিরেচনমপি তত্র যৌগিকমিতি দর্শযতি| সকফে ইতি সকফে বাতে| ‘উরঃস্রোতোগতে’ ইতি কেচিত্ পঠন্তি, তত্র সূক্ষ্মস্রোতোঽনুগতে ইত্যর্থঃ| প্রমেহবাতমেদোঘ্নীমিতি প্রমেহঘ্নীং বাতঘ্নীং মেদোঘ্নীং চ| মহাস্নেহ ইতি চতুঃস্নেহোঽত্রৈবোক্তঃ| পূর্ববদ্রেতসাঽঽবৃতে ইতি শুক্রস্থে বাতে যা ক্রিযা পূর্বমুক্তা সা রেতসাঽঽবৃতেঽপি বাতে কার্যা| উল্লেখ ইতি উল্লেখনং বমনম্| মূত্রলানীতি মূত্রবৈরেচনিকানি| শকৃতা ইতি মলেন| স্বস্থানস্থ ইত্যাদি স্বস্থানস্থো যস্মাত্ স্থানোপবৃংহণাদ্বলী দোষো ভবতি তস্মাত্ প্রাক্ স্বৈরৌষধৈর্জযেত্| কতমৈঃ স্বৈরৌষধৈরিত্যাহ- বমনৈরিত্যাদি| শমনেনেতি কফাদিশমনেনৈব; শমনং চ শোধনানন্তরং শোধনানর্হে বা জ্ঞেযম্||১৮৯-১৯৮||-

Adhikarana 40 (199-205) · Śloka 206

মারুতানাং হি পঞ্চানামন্যোন্যাবরণে শৃণু||১৯৯|| লিঙ্গং ব্যাসসমাসাভ্যামুচ্যমানং মযাঽনঘ!| প্রাণো বৃণোত্যুদানাদীন্ প্রাণং বৃণ্বন্তি তেঽপি চ||২০০|| উদানাদ্যাস্তথাঽন্যোন্যং সর্ব এব যথাক্রমম্| বিংশতির্বরণান্যেতান্যুল্বণানাং পরস্পরম্||২০১|| মারুতানাং হি পঞ্চানাং তানি সম্যক্ প্রতর্কযেত্| সর্বেন্দ্রিযাণাং শূন্যত্বং জ্ঞাত্বা স্মৃতিবলক্ষযম্||২০২|| ব্যানে প্রাণাবৃতে লিঙ্গং কর্ম তত্রোর্ধ্বজত্রুকম্| স্বেদোঽত্যর্থং লোমহর্ষস্ত্বগ্দোষঃ সুপ্তগাত্রতা||২০৩|| প্রাণে ব্যানাবৃতে তত্র স্নেহযুক্তং বিরেচনম্| প্রাণাবৃতে সমানে স্যুর্জডগদ্গদমূকতাঃ||২০৪|| চতুষ্প্রযোগাঃ শস্যন্তে স্নেহাস্তত্র সযাপনাঃ| সমানেনাবৃতেঽপানে গ্রহণীপার্শ্বহৃদ্গদাঃ||২০৫|| শূলং চামাশযে তত্র দীপনং সর্পিরিষ্যতে|২০৬|

মারুতানামন্যোন্যাবরণমাহ- মারুতানামিত্যাদি| যদ্যপি চেহ বাযোরমূর্তত্বং বাতকলাকলীযে প্রোক্তং, তথাঽপীদমমূর্তত্বমকঠিনবাচকং ন ত্ববযবপ্রতিষেধকং; তেন বাযোঃ বায্বন্তরেণ গতিহননরূপমাবরণমুপপন্নমেব; দৃষ্টা চ বাযুনা বায্বন্তরেণোপহতেন বাতকুণ্ডলিতা বহিরপি, তেনোপপন্নমাবরণং বাতানাং পরস্পরম্| প্রাণো বৃণোত্যুদানাদীনিত্যাদিনা বিংশত্যাবরণান্যুক্তানি| প্রাণো বৃণোত্যুদানাদীনিত্যনেন চত্বার্যাবরণানি, প্রাণং বৃণ্বন্তি তেঽপি চেত্যনেন চ চত্বারি, উদানাদ্যাস্তথাঽন্যোন্যমিত্যনেন দ্বাদশাবরণান্যুচ্যন্তে| তত্রোদানেন ব্যানাদীনাং ত্রযাণামাবরণে ত্রীণি, তথা ব্যানাদ্যৈশ্চোদানাবরণে ত্রীণি, তথা ব্যানেন সমানাপানাবরণে দ্বে, তাভ্যাং চ ব্যানাবরণে দ্বে, পরিশিষ্টযোশ্চান্যোন্যাবরণে দ্বে, এবং দ্বাদশাবরণানি পূর্বাষ্টকযুক্তানি বিংশতির্ভবন্তি| উল্বণানামিতি বৃদ্ধানাং; কিংবা উল্বণানামিতি আবিষ্কৃততমানাং মিলিতানাং পঞ্চানাং; তেনৈতেষামেকদ্বিত্র্যাদিসংসর্গেণাবার্যাবরকতযা ভেদাদ্বহুবিধমাবরণং ভবতীতি দর্শযতি||১৯৯-২০৫||-

Adhikarana 41 (206-213) · Śloka 217

শিরোগ্রহঃ প্রতিশ্যাযো নিঃশ্বাসোচ্ছ্বাসসঙ্গ্রহঃ||২০৬|| হৃদ্রোগো মুখশোষশ্চাপ্যুদানে প্রাণসংবৃতে| তত্রোর্ধ্বভাগিকং কর্ম কার্যমাশ্বাসনং তথা||২০৭|| কর্মৌজোবলবর্ণানাং নাশো মৃত্যুরথাপি বা| উদানেনাবৃতে প্রাণে তং শনৈঃ শীতবারিণা||২০৮|| সিঞ্চেদাশ্বাসযেচ্চৈনং সুখং চৈবোপপাদযেত্| উর্ধ্বগেনাবৃতেঽপানে ছর্দিশ্বাসাদযো গদাঃ||২০৯|| স্যুর্বাতে তত্র বস্ত্যাদি ভোজ্যং চৈবানুলোমনম্| মোহোঽল্পোঽগ্নিরতীসার ঊর্ধ্বগেঽপানসংবৃতে||২১০|| বাতে স্যাদ্বমনং তত্র দীপনং গ্রাহি চাশনম্| বম্যাধ্মানমুদাবর্তগুল্মার্তিপরিকর্তিকাঃ||২১১|| লিঙ্গং ব্যানাবৃতেঽপানে তং স্নিগ্ধৈরনুলোমযেত্| অপানেনাবৃতে ব্যানে ভবেদ্বিণ্মূত্ররেতসাম্||২১২|| অতিপ্রবৃত্তিস্তত্রাপি সর্বং সঙ্গ্রহণং মতম্| মূর্চ্ছা তন্দ্রা প্রলাপোঽঙ্গসাদোঽগ্ন্যোজোবলক্ষযঃ||২১৩|| সমানেনাবৃতে ব্যানে ব্যাযামো লঘুভোজনম্| স্তব্ধতাঽল্পাগ্নিতাঽস্বেদশ্চেষ্টাহানির্নিমীলনম্||২১৪|| উদানেনাবৃতে ব্যানে তত্র পথ্যং মিতং লঘু| পঞ্চান্যোন্যাবৃতানেবং বাতান্ বুধ্যেত লক্ষণৈঃ||২১৫|| এষাং স্বকর্মণাং হানির্বৃদ্ধির্বাঽঽবরণে মতা| যথাস্থূলং সমুদ্দিষ্টমেতদাবরণেঽষ্টকম্||২১৬|| সলিঙ্গভেষজং সম্যগ্বুধানাং বুদ্ধিবৃদ্ধযে|২১৭|

শিরোগ্রহ ইত্যাদিনা অষ্টাবাবরণানি প্রাযোভাবীনি অনুক্তশেষোপগ্রহণার্থমাহ| ঊর্ধ্বভাগিকং কর্মেতি উপর্যুক্তস্নেহপাননস্যাদিকম্| শ্বাসাদয ইতি শ্বাসহিক্কাদযঃ| ঊর্ধ্বগেনেতি উদানেন| অনুক্তজ্ঞানার্থমাবরণস্বরূপমাহ- এষাং স্বকর্মণামিত্যাদি| অত্র আবার্যাণাং বলীযসাঽঽবরণাত্ স্বকর্মহানির্ভবতি, আবরকস্য তূত্সর্গতঃ স্বকর্মবৃদ্ধির্ভবতি, তথা আবরণেন চ আবার্যঃ প্রকুপিতো ভবতি তদা স্বকর্মণাং বৃদ্ধির্ভবতীতি ব্যবস্থা; অন্যে তু আবরণীযস্য স্বকর্মহানিঃ, আবরকস্য তূত্সর্গতো বৃদ্ধির্ভবতীতি ব্যবস্থামাহুঃ||২০৬-২১৩||-

Adhikarana 42 (217-218) · Śloka 219

স্থানান্যবেক্ষ্য বাতানাং বৃদ্ধিং হানিং চ কর্মণাম্||২১৭|| দ্বাদশাবরণান্যন্যান্যভিলক্ষ্য ভিষগ্জিতম্| কুর্যাদভ্যঞ্জনস্নেহপানবস্ত্যাদি সর্বশঃ||২১৮|| ক্রমমুষ্ণমনুষ্ণং বা ব্যত্যাসাদবচারযেত্|২১৯|

অনুক্তাবরণলক্ষণজ্ঞানোপাযমাহ- স্থানান্যবেক্ষ্যেত্যাদি| কর্মবৃদ্ধিহানিব্যাখ্যানমত্রাপি পূর্ববত্| স্থানান্যবেক্ষ্যেত্যনেন বাতানামুক্তস্থানগতবিকারেণ চ বাতবিকৃতির্জ্ঞাতব্যেতি দর্শযতি| উষ্ণং ক্রমমনুষ্ণং চেত্যত্র যদ্যপ্যুষ্ণ এব ক্রমো বাতে যুজ্যতে, তথাঽপি স্থানাপেক্ষযা রক্তাদিদূষ্যং ক্রমবিপর্যযস্য কারণং জ্ঞেযম্||২১৭-২১৮||-

Adhikarana 43 (219-220) · Śloka 221

উদানং যোজযেদূর্ধ্বমপানং চানুলোমযেত্||২১৯|| সমানং শমযেচ্চৈব ত্রিধা ব্যানং তু যোজযেত্| প্রাণো রক্ষ্যশ্চতুর্ভ্যোঽপি স্থানে হ্যস্য স্থিতির্ধ্রুবা||২২০|| স্বং স্থানং গমযেদেবং বৃতানেতান্ বিমার্গগান্|২২১|

বিকৃতবাতানাং প্রকৃতিস্থাপনমাহ- উদানং যোজযেদূর্ধ্বমিত্যাদি| এতচ্চ স্বমার্গযোজনং বাতানাং যথোক্তবমনাদিক্রিযাযোগবিধানেন কর্তব্যম্| সমানং শমযেদিতি দেহমধ্যস্থিতং কুর্যাদিত্যর্থঃ| ত্রিধা ব্যানং তু যোজযেদিতি ঊর্ধ্বমধো মধ্যে ত্রিধা যোজযেত্| প্রাণো রক্ষ্য ইতি স্থানে এব যাপনীযঃ | চতুর্ভ্যোঽপীত্যনেন ইতরবাতেভ্যোঽস্যাত্যর্থরক্ষণীযতামাহ| কুতোঽযং বিশেষরক্ষণীয ইত্যাহ- স্থানে ত্বস্য স্থিতির্ধ্রুবেতি; অস্য প্রাণস্য, স্থানে সম্যগবস্থানে সতি, স্থিতিঃ জীবনরূপা, ধ্রুবা নিশ্চিতা||২১৯-২২০||-

Adhikarana 44 (221-230) · Śloka 231

মূর্চ্ছা দাহো ভ্রমঃ শূলং বিদাহঃ শীতকামিতা||২২১|| ছর্দনং চ বিদগ্ধস্য প্রাণে পিত্তসমাবৃতে| ষ্ঠীবনং ক্ষবথূদ্গারনিঃশ্বাসোচ্ছ্বাসসঙ্গ্রহঃ||২২২|| প্রাণে কফাবৃতে রূপাণ্যরুচিশ্ছর্দিরেব চ| মূর্চ্ছাদ্যানি চ রূপাণি দাহো নাভ্যুরসঃ ক্লমঃ||২২৩|| ওজোভ্রংশশ্চ সাদশ্চাপ্যুদানে পিত্তসংবৃতে| আবৃতে শ্লেষ্মণোদানে বৈবর্ণ্যং বাক্স্বরগ্রহঃ||২২৪|| দৌর্বল্যং গুরুগাত্রত্বমরুচিশ্চোপজাযতে| অতিস্বেদস্তৃষা দাহো মূর্চ্ছা চারুচিরেব চ||২২৫|| পিত্তাবৃতে সমানে স্যাদুপঘাতস্তথোষ্মণঃ| অস্বেদো বহ্নিমান্দ্যং চ লোমহর্ষস্তথৈব চ||২২৬|| কফাবৃতে সমানে স্যাদ্গাত্রাণাং চাতিশীততা| ব্যানে পিত্তাবৃতে তু স্যাদ্দাহঃ সর্বাঙ্গগঃ ক্লমঃ||২২৭|| গাত্রবিক্ষেপসঙ্গশ্চ সসন্তাপঃ সবেদনঃ| গুরুতা সর্বগাত্রাণাং সর্বসন্ধ্যস্থিজা রুজঃ||২২৮|| ব্যানে কফাবৃতে লিঙ্গং গতিসঙ্গস্তথাঽধিকঃ | হারিদ্রমূত্রবর্চস্ত্বং তাপশ্চ গুদমেঢ্রযোঃ||২২৯|| লিঙ্গং পিত্তাবৃতেঽপানে রজসশ্চাতিবর্তনম্| ভিন্নামশ্লেষ্মসংসৃষ্টগুরুবর্চঃপ্রবর্তনম্||২৩০|| শ্লেষ্মণা সংবৃতেঽপানে কফমেহস্য চাগমঃ|২৩১|

প্রাণাদীনাং পিত্তেন কফেন তথা পিত্তকফাভ্যাং চাবরণলক্ষণান্যাহ- মূর্চ্ছা দাহো ভ্রম ইত্যাদি| মূর্চ্ছাদ্যানি মূর্চ্ছা দাহ ইত্যাদিনা প্রাগুক্তানি| উপঘাতস্তথোষ্মণ ইতি অত্র পিত্তেনাপ্যাবৃতে সমানে অগ্ন্যুত্তেজনাভাবাদূষ্মণ উপঘাতো জ্ঞেযঃ| গাত্রবিক্ষেপসঙ্গঃ গাত্রবিক্ষেপণোপরমঃ| রজস ইতি আর্তবস্য||২২১-২৩০||-

Adhikarana 45 (231-235) · Śloka 236

লক্ষণানাং তু মিশ্রত্বং পিত্তস্য চ কফস্য চ||২৩১|| উপলক্ষ্য ভিষগ্বিদ্বান্ মিশ্রমাবরণং বদেত্| যদ্যস্য বাযোর্নির্দিষ্টং স্থানং তত্রেতরৌ স্থিতৌ||২৩২|| দোষৌ বহুবিধান্ ব্যাধীন্ দর্শযেতাং যথানিজান্| আবৃতং শ্লেষ্মপিত্তাভ্যাং প্রাণং চোদানমেব চ||২৩৩|| গরীযস্ত্বেন পশ্যন্তি ভিষজঃ শাস্ত্রচক্ষুষঃ| বিশেষাজ্জীবিতং প্রাণে উদানে সংশ্রিতং বলম্||২৩৪|| স্যাত্তযোঃ পীডনাদ্ধানিরাযুষশ্চ বলস্য চ| সর্বেঽপ্যেতেঽপরিজ্ঞাতাঃ পরিসংবত্সরাস্তথা||২৩৫|| উপেক্ষণাদসাধ্যাঃ স্যুরথবা দুরুপক্রমাঃ |২৩৬|

মিশ্রমাবরণমিতি মিশ্রিতকফপিত্তাবরণম্| যথানিজানিতি যথাত্মীযান্| গরীযস্ত্বেনেতি অধিকত্বেন| এতদ্গরীযস্ত্বে হেতুমাহ- বিশেষাদিত্যাদি| সংশ্রিতমিতি অধীনম্| অপরিজ্ঞাতা ইতি যাথাতথ্যেনাজ্ঞাতাঃ| সম্যগ্জ্ঞাতা অপ্যুপেক্ষণাদ্, যাথাতথ্যেন জ্ঞাতা অপি পরিসংবত্সরাস্তথেতি যোজনীযম্||২৩১-২৩৫||-

Adhikarana 46 (236-245) · Śloka 245

হৃদ্রোগো বিদ্রধিঃ প্লীহা গুল্মোঽতীসার এব চ||২৩৬|| ভবন্ত্যুপদ্রবাস্তেষামাবৃতানামুপেক্ষণাত্| তস্মাদাবরণং বৈদ্যঃ পবনস্যোপলক্ষযেত্||২৩৭|| পঞ্চাত্মকস্য বাতেন পিত্তেন শ্লেষ্মণাঽপি বা| ভিষগ্জিতমতঃ সম্যগুপলক্ষ্য সমাচরেত্||২৩৮|| অনভিষ্যন্দিভিঃ স্নিগ্ধৈঃ স্রোতসাং শুদ্ধিকারকৈঃ| কফপিত্তাবিরুদ্ধং যদ্যচ্চ বাতানুলোমনম্||২৩৯|| সর্বস্থানাবৃতেঽপ্যাশু তত্ কার্যং মারুতে হিতম্| যাপনা বস্তযঃ প্রাযো মধুরাঃ সানুবাসনাঃ||২৪০|| প্রসমীক্ষ্য বলাধিক্যং মৃদু বা স্রংসনং হিতম্| রসাযনানাং সর্বেষামুপযোগঃ প্রশস্যতে||২৪১|| শৈলস্য জতুনোঽত্যর্থং পযসা গুগ্গুলোস্তথা| লেহং বা ভার্গবপ্রোক্তমভ্যসেত্ ক্ষীরভুঙ্নরঃ||২৪২|| অভযামলকীযোক্তমেকাদশসিতাশতম্ | অপানেনাবৃতে সর্বং দীপনং গ্রাহি ভেষজম্||২৪৩|| বাতানুলোমনং যচ্চ পক্বাশযবিশোধনম্| ইতি সঙ্ক্ষেপতঃ প্রোক্তমাবৃতানাং চিকিত্সিতম্||২৪৪|| প্রাণাদীনাং ভিষক্ কুর্যাদ্বিতর্ক্য স্বযমেব তত্| পিত্তাবৃতে তু পিত্তঘ্নৈর্মারুতস্যাবিরোধিভিঃ| কফাবৃতে কফঘ্নৈস্তু মারুতস্যানুলোমনৈঃ||২৪৫||

হৃদ্রোগেত্যাদিনা উপদ্রবানাহ| পঞ্চাত্মকস্যেতি প্রাণাদিভেদেন পঞ্চস্বরূপস্য| প্রসমীক্ষ্যেত্যাদৌ বলাধিক্যে সতি স্রংসনং মৃদু কর্তব্যমিত্যভিপ্রাযঃ| অত্যর্থং প্রশস্যত ইতি সম্বন্ধঃ| লেহং বা ভার্গবপ্রোক্তমিতি চ্যবনপ্রাশং, চ্যবনো হি ভার্গব উচ্যতে| উক্তং হি আযুর্বেদসমুত্থানে “ভার্গবশ্চ্যবনঃ কামী বৃদ্ধঃ সন্ বিকৃতিং গতঃ” (চি.অ.১পা.৪) ইতি| বাতস্যানুলোমনং চিকিত্সিতং কুর্যাদিতি নিযোজনীযম্||২৩৬-২৪৫||

Adhikarana 47 (246) · Śloka 246

লোকে বায্বর্কসোমানাং দুর্বিজ্ঞেযা যথা গতিঃ| তথা শরীরে বাতস্য পিত্তস্য চ কফস্য চ||২৪৬||

বাতাদীনাং দুর্বিজ্ঞেযতাং দৃষ্টান্তেন দর্শযতি- লোক ইত্যাদি|||২৪৬||

Adhikarana 48 (247) · Śloka 247

ক্ষযং বৃদ্ধিং সমত্বং চ তথৈবাবরণং ভিষক্| বিজ্ঞায পবনাদীনাং ন প্রমুহ্যতি কর্মসু||২৪৭||

ক্ষযমিত্যাদৌ আবরণমপি ক্ষযবৃদ্ধিসম্বন্ধান্তর্নির্দিষ্টমেব, তথাঽপ্যাবরণস্য বিশেষলক্ষণচিকিত্সার্থং পৃথগভিধানম্| কর্মস্বিতি চিকিত্সাসু||২৪৭||

Adhikarana 49 (248-249) · Śloka 249

তত্র শ্লোকৌ- পঞ্চাত্মনঃ স্থানবশাচ্ছরীরে স্থানানি কর্মাণি চ দেহধাতোঃ| প্রকোপহেতুঃ কুপিতশ্চ রোগান্ স্থানেষু চান্যেষু বৃতোঽবৃতশ্চ||২৪৮|| প্রাণেশ্বরঃ প্রাণভৃতাং করোতি ক্রিযা চ তেষামখিলা নিরুক্তা| তাং দেশসাত্ম্যর্তুবলান্যবেক্ষ্য প্রযোজযেচ্ছাস্ত্রমতানুসারী||২৪৯||

পঞ্চাত্মন ইত্যাদিসঙ্গ্রহে পঞ্চাত্মনঃ স্থানবশাদিতি চ্ছেদঃ| দেহধাতোরিতি দেহধারকরূপস্য বাযোরবিকৃতস্যেত্যর্থঃ| উক্তচিকিত্সাকরণাপেক্ষণীযং সঙ্গ্রহেণাহ- তামিত্যাদি| দেশাদ্যপেক্ষা সূত্রস্থানেঽস্মাভির্বিবৃতা দেশাদিভেদেন প্রতর্কণীযা, বিস্তরভীত্যা তু ন প্রপঞ্চ্যতে||২৪৮-২৪৯||

Adhikarana puShpikA · Śloka 28

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে চিকিত্সাস্থানে বাতব্যাধিচিকিত্সিতং নামাষ্টাবিংশোঽধ্যাযঃ||২৮||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং চিকিত্সাস্থানে বাতব্যাধিচিকিত্সিতং নামাষ্টাবিংশোঽধ্যাযঃ||২৮||