Adhikarana 1 (1-2) · Śloka 2
অথাতো যোনিব্যাপচ্চিকিত্সিতং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथातो योनिव्यापच्चिकित्सितं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
বাতরক্তচিকিত্সানন্তরং পারিশেষ্যাদ্ বাতকৃতত্বাচ্চ যোনিব্যাপচ্চিকিত্সিতমুচ্যতে| উক্তং হি- “ন হি বাতাদৃতে যোনির্নারীণাং সম্প্রদুষ্যতি” ইতি||১-২||
Adhikarana 2 (3-8) · Śloka 8
দিব্যতীর্থৌষধিমতশ্চিত্রধাতুশিলাবতঃ| পুণ্যে হিমবতঃ পার্শ্বে সুরসিদ্ধর্ষিসেবিতে||৩|| বিহরন্তং তপোযোগাত্তত্ত্বজ্ঞানার্থদর্শিনম্| পুনর্বসুং জিতাত্মানমগ্নিবেশোঽনু পৃষ্টবান্||৪|| ভগবন্! যদপত্যানাং মূলং নার্যঃ পরং নৃণাম্| তদ্বিঘাতো গদৈশ্চাসাং ক্রিযতে যোনিমাশ্রিতৈঃ||৫|| তস্মাত্তেষাং সমুত্পত্তিমুত্পন্নানাং চ লক্ষণম্| সৌষধং শ্রোতুমিচ্ছামি প্রজানুগ্রহকাম্যযা||৬|| ইতি শিষ্যেণ পৃষ্টস্তু প্রোবাচর্ষিবরোঽত্রিজঃ| বিংশতির্ব্যাপদো যোনের্নির্দিষ্টা রোগসঙ্গ্রহে||৭|| মিথ্যাচারেণ তাঃ স্ত্রীণাং প্রদুষ্টেনার্তবেন চ| জাযন্তে বীজদোষাচ্চ দৈবাচ্চ শৃণু তাঃ পৃথক্||৮||
दिव्यतीर्थौषधिमतश्चित्रधातुशिलावतः| पुण्ये हिमवतः पार्श्वे सुरसिद्धर्षिसेविते||३|| विहरन्तं तपोयोगात्तत्त्वज्ञानार्थदर्शिनम्| पुनर्वसुं जितात्मानमग्निवेशोऽनु पृष्टवान्||४|| भगवन्! यदपत्यानां मूलं नार्यः परं नृणाम्| तद्विघातो गदैश्चासां क्रियते योनिमाश्रितैः||५|| तस्मात्तेषां समुत्पत्तिमुत्पन्नानां च लक्षणम्| सौषधं श्रोतुमिच्छामि प्रजानुग्रहकाम्यया||६|| इति शिष्येण पृष्टस्तु प्रोवाचर्षिवरोऽत्रिजः| विंशतिर्व्यापदो योनेर्निर्दिष्टा रोगसङ्ग्रहे||७|| मिथ्याचारेण ताः स्त्रीणां प्रदुष्टेनार्तवेन च| जायन्ते बीजदोषाच्च दैवाच्च शृणु ताः पृथक्||८||
🔊 Audio coming soon
দিব্যানি তীর্থানি গঙ্গাদীনি, দিব্যাশ্চৌষধ্যো ব্রহ্মসুবর্চলৈন্দ্রীপ্রভৃতযো যস্মিন্ তস্য দিব্যতীর্থৌষধিমতঃ| চিত্রধাতুঃ নানাবর্ণধাতুঃ| তত্ত্বজ্ঞানেন সম্যগ্জ্ঞানেন অর্থান্ দ্রষ্টুং শীলং যস্য তং তত্ত্বজ্ঞানার্থদর্শিনম্| মূলমিতি কারণম্| তদ্বিঘাত ইতি অপত্যকারণবিঘাতঃ| তেষামিতি যোনিগদানাম্| সমুত্পত্তিমিতি উত্পত্তিকারণং, কার্যে কারণোপচারাত্| রোগসঙ্গ্রহে ইতি অষ্টোদরীযে (সূ.অ.১৯)| মিথ্যাচারেণ অসম্যগাহারাচারেণ, প্রদুষ্টেনার্তবেনেতি দুষ্টার্তবেন , যোনিব্যাপদ্ভবতি| বীজদোষাদিতি আর্তবগতবীজদুষ্টেঃ, সা পশ্চাদ্বক্তব্যা| দৈবাদিতি প্রাক্তনাধর্মবশাত্| এতেষাং চ যথাযোগ্যতযা কারণত্বমগ্রে বক্ষ্যমাণকারণত্বভেদেন যোনিব্যাপত্সূন্নেযং, দৈবং তু সর্বত্রৈব সাধারণকারণং বিশিষ্টদৃষ্টকারণাদর্শনে সতি কার্যদর্শনাদুন্নেযম্||৩-৮||
Adhikarana 3 (9-15) · Śloka 15
বাতলাহারচেষ্টাযা বাতলাযাঃ সমীরণঃ| বিবৃদ্ধো যোনিমাশ্রিত্য যোনেস্তোদং সবেদনম্||৯|| স্তম্ভং পিপীলিকাসৃপ্তিমিব কর্কশতাং তথা| করোতি সুপ্তিমাযাসং বাতজাংশ্চাপরান্ গদান্||১০|| সা স্যাত্ সশব্দরুক্ফেনতনুরূক্ষার্তবাঽনিলাত্| ব্যাপত্কট্বম্ললবণক্ষারাদ্যৈঃ পিত্তজা ভবেত্||১১|| দাহপাকজ্বরোষ্ণার্তা নীলপীতাসিতার্তবা| ভৃশোষ্ণকুণপস্রাবা যোনিঃ স্যাত্পিত্তদূষিতা||১২|| কফোঽভিষ্যন্দিভির্বৃদ্ধো যোনিং চেদ্দূষযেত্ স্ত্রিযাঃ| স কুর্যাত্ পিচ্ছিলাং শীতাং কণ্ডুগ্রস্তাল্পবেদনাম্||১৩|| পাণ্ডুবর্ণাং তথা পাণ্ডুপিচ্ছিলার্তববাহিনীম্| সমশ্নন্ত্যা রসান্ সর্বান্দূষযিত্বা ত্রযো মলাঃ||১৪|| যোনিগর্ভাশযস্থাঃ স্বৈর্যোনিং যুঞ্জন্তি লক্ষণৈঃ| সা ভবেদ্দাহশূলার্তা শ্বেতপিচ্ছিলবাহিনী||১৫||
वातलाहारचेष्टाया वातलायाः समीरणः| विवृद्धो योनिमाश्रित्य योनेस्तोदं सवेदनम्||९|| स्तम्भं पिपीलिकासृप्तिमिव कर्कशतां तथा| करोति सुप्तिमायासं वातजांश्चापरान् गदान्||१०|| सा स्यात् सशब्दरुक्फेनतनुरूक्षार्तवाऽनिलात्| व्यापत्कट्वम्ललवणक्षाराद्यैः पित्तजा भवेत्||११|| दाहपाकज्वरोष्णार्ता नीलपीतासितार्तवा| भृशोष्णकुणपस्रावा योनिः स्यात्पित्तदूषिता||१२|| कफोऽभिष्यन्दिभिर्वृद्धो योनिं चेद्दूषयेत् स्त्रियाः| स कुर्यात् पिच्छिलां शीतां कण्डुग्रस्ताल्पवेदनाम्||१३|| पाण्डुवर्णां तथा पाण्डुपिच्छिलार्तववाहिनीम्| समश्नन्त्या रसान् सर्वान्दूषयित्वा त्रयो मलाः||१४|| योनिगर्भाशयस्थाः स्वैर्योनिं युञ्जन्ति लक्षणैः| सा भवेद्दाहशूलार्ता श्वेतपिच्छिलवाहिनी||१५||
🔊 Audio coming soon
বাতলেত্যাদৌ বাতলাযা ইতি বিশেষেণ বাতিকযোনিব্যাপদুত্পাদোপদর্শনার্থম্| পিপীলিকাসৃপ্তিমিতি পিপীলিকাপরিসর্পণাকারাং বেদনাম্| সশব্দরুক্ফেনতনুরূক্ষার্তবেতি অনৃতাবপ্যেবম্ভূতার্তবা ভবতি, তেন বাতিকপ্রদররূপেযং যোনিব্যাপত্; এবমেব পৈত্তিক-শ্লৈষ্মিক-সান্নিপাতিক-যোনিব্যাপদামপি পৈত্তিক-কফজ-সান্নিপাতিকপ্রদরত্বং বর্ণযন্তি| রক্তযোনিরিহ অসৃগ্দরসঞ্জ্ঞযা চিকিত্সাপ্রস্তাবে বক্তব্যা; তেন সৈব প্রদররূপা| থে তু এতদ্ব্যাপদাং প্রদরং ভিন্নমেব মন্যন্তে, তে প্রদরচিকিত্সার্থং প্রকরণান্তরমত্রাধ্যাযে পঠিষ্যন্তি| সমশ্নন্ত্যা ইতি পথ্যাপথ্যমেলকেনোপযুঞ্জন্ত্যাঃ||৯-১৫||
Adhikarana 4 (16-17) · Śloka 17
রক্তপিত্তকরৈর্নার্যা রক্তং পিত্তেন দূষিতম্| অতিপ্রবর্ততে যোন্যাং লব্ধে গর্ভেঽপি সাসৃজা ||১৬|| যোনিগর্ভাশযস্থং চেত্ পিত্তং সন্দূষযেদসৃক্| সাঽরজস্কা মতা কার্শ্যবৈবর্ণ্যজননী ভৃশম্||১৭||
रक्तपित्तकरैर्नार्या रक्तं पित्तेन दूषितम्| अतिप्रवर्तते योन्यां लब्धे गर्भेऽपि सासृजा ||१६|| योनिगर्भाशयस्थं चेत् पित्तं सन्दूषयेदसृक्| साऽरजस्का मता कार्श्यवैवर्ण्यजननी भृशम्||१७||
🔊 Audio coming soon
রক্তপিত্তকরৈরিত্যাদৌ গর্ভে লব্ধেঽপি রক্তমতিপ্রবর্ততে, তেনাস্যা গর্ভো ন তিষ্ঠতি; সাসৃজা রক্তযোনিরিত্যর্থঃ| যে তু ‘সাঽপ্রজা’ ইতি পঠন্তি, তে “যস্যাং লব্ধেঽপি গর্ভে অসৃগতিপ্রবর্ততে, সা তাদৃশরক্তস্রুত্যা অপ্রজা ভবতি; ইযং চ রক্তযোনিরুচ্যত ইতি রক্তাতিস্রুত্যৈব লভ্যতে” ইতি ব্যাখ্যানযন্তি| যোনৌ গর্ভাশযে চ তিষ্ঠতীতি যোনিগর্ভাশযস্থং পিত্তম্| অরজস্কেতি অনার্তবা||১৬-১৭||
Adhikarana 5 (18) · Śloka 18
যোন্যামধাবনাত্ কণ্ডূং জাতাঃ কুর্বন্তি জন্তবঃ| সা স্যাদচরণা কণ্ড্বা তযাঽতিনরকাঙ্ক্ষিণী||১৮||
योन्यामधावनात् कण्डूं जाताः कुर्वन्ति जन्तवः| सा स्यादचरणा कण्ड्वा तयाऽतिनरकाङ्क्षिणी||१८||
🔊 Audio coming soon
অচরণেতি ধাবনাচরণাদচরণা| কণ্ড্বা তযেতি কৃমিজনিতযোনিকণ্ড্বা ||১৮||
Adhikarana 6 (19) · Śloka 19
পবনোঽতিব্যবাযেন শোফসুপ্তিরুজঃ স্ত্রিযাঃ| করোতি কুপিতো যোনৌ সা চাতিচরণা মতা||১৯||
पवनोऽतिव्यवायेन शोफसुप्तिरुजः स्त्रियाः| करोति कुपितो योनौ सा चातिचरणा मता||१९||
🔊 Audio coming soon
ব্যবাযস্যাতিচরণেনোত্পন্না ব্যাপদতিচরণা||১৯||
Adhikarana 7 (20) · Śloka 20
মৈথুনাদতিবালাযাঃ পৃষ্ঠকট্যূরুবঙ্ক্ষণম্| রুজন্ দূষযতে যোনিং বাযুঃ প্রাক্চরণা হি সা||২০||
मैथुनादतिबालायाः पृष्ठकट्यूरुवङ्क्षणम्| रुजन् दूषयते योनिं वायुः प्राक्चरणा हि सा||२०||
🔊 Audio coming soon
রুজন্নিতি দুঃখযন্| উচিতব্যবাযকালাত্ প্রাক্ ব্যবাযাচরণাত্ প্রাক্চরণা উচ্যতে||২০||
Adhikarana 8 (21-22) · Śloka 22
গর্ভিণ্যাঃ শ্লেষ্মলাভ্যাসাচ্ছর্দিনিঃশ্বাসনিগ্রহাত্| বাযুঃ ক্রুদ্ধঃ কফং যোনিমুপনীয প্রদূষযেত্||২১|| পাণ্ডুং সতোদমাস্রাবং শ্বেতং স্রবতি বা কফম্| কফবাতামযব্যাপ্তা সা স্যাদ্যোনিরুপপ্লুতা||২২||
गर्भिण्याः श्लेष्मलाभ्यासाच्छर्दिनिःश्वासनिग्रहात्| वायुः क्रुद्धः कफं योनिमुपनीय प्रदूषयेत्||२१|| पाण्डुं सतोदमास्रावं श्वेतं स्रवति वा कफम्| कफवातामयव्याप्ता सा स्याद्योनिरुपप्लुता||२२||
🔊 Audio coming soon
গর্ভিণ্যা ইত্যাদৌ আস্রাবমিতি শ্লেষ্মবিলক্ষণমাস্রাবম্| কফবাতামযৈরুপপ্লুতত্বাত্ ‘উপপ্লুতা’ ইত্যুচ্যতে||২১-২২||
Adhikarana 9 (23-24) · Śloka 24
পিত্তলাযা নৃসংবাসে ক্ষবথূদ্গারধারণাত্| পিত্তসম্মূর্চ্ছিতো বাযুর্যোনিং দূষযতি স্ত্রিযাঃ||২৩|| শূনা স্পর্শাক্ষমা সার্তির্নীলপীতমসৃক্ স্রবেত্| শ্রোণিবঙ্ক্ষণপৃষ্ঠার্তিজ্বরার্তাযাঃ পরিপ্লুতা||২৪||
पित्तलाया नृसंवासे क्षवथूद्गारधारणात्| पित्तसम्मूर्च्छितो वायुर्योनिं दूषयति स्त्रियाः||२३|| शूना स्पर्शाक्षमा सार्तिर्नीलपीतमसृक् स्रवेत्| श्रोणिवङ्क्षणपृष्ठार्तिज्वरार्तायाः परिप्लुता||२४||
🔊 Audio coming soon
নৃসংবাসে ইতি রমণসমযে| সর্বতো বাতপিত্তবিকারোপপ্লুতত্বাত্ পরিপ্লুতা||২৩-২৪||
Adhikarana 10 (25-26) · Śloka 26
বেগোদাবর্তনাদ্যোনিমুদাবর্তযতেঽনিলঃ| সা রুগার্তা রজঃ কৃচ্ছ্রেণোদাবৃত্তং বিমুঞ্চতি||২৫|| আর্তবে সা বিমুক্তে তু তত্ক্ষণং লভতে সুখম্| রজসো গমনাদূর্ধ্বং জ্ঞেযোদাবর্তিনী বুধৈঃ||২৬||
वेगोदावर्तनाद्योनिमुदावर्तयतेऽनिलः| सा रुगार्ता रजः कृच्छ्रेणोदावृत्तं विमुञ्चति||२५|| आर्तवे सा विमुक्ते तु तत्क्षणं लभते सुखम्| रजसो गमनादूर्ध्वं ज्ञेयोदावर्तिनी बुधैः||२६||
🔊 Audio coming soon
যোনিমুদাবর্তযতে ইতি যোনিমুদাবর্তবাতাং করোতি| উদাবৃত্তমিতি ঊর্ধ্বং নীতম্| বিকারেণ রজস ঊর্ধ্বগমনাত্ ‘উদাবর্তিনী’ ইত্যুচ্যতে||২৫-২৬||
Adhikarana 11 (27) · Śloka 28
অকালে বাহমানাযা গর্ভেণ পিহিতোঽনিলঃ| কর্ণিকাং জনযেদ্যোনৌ শ্লেষ্মরক্তেন মূর্চ্ছিতঃ||২৭|| রক্তমার্গাবরোধিন্যা সা তযা কর্ণিনী মতা|২৮|
अकाले वाहमानाया गर्भेण पिहितोऽनिलः| कर्णिकां जनयेद्योनौ श्लेष्मरक्तेन मूर्च्छितः||२७|| रक्तमार्गावरोधिन्या सा तया कर्णिनी मता|२८|
🔊 Audio coming soon
অকালে বাহমানাযা ইত্যাদি অপ্রাপ্তে গর্ভনিষ্ক্রমণকালে প্রবাহণং কুর্বন্ত্যাঃ| কর্ণিকামিতি কর্ণিকাকারং গ্রন্থিম্||২৭||-
Adhikarana 12 (28) · Śloka 29
রৌক্ষ্যাদ্বাযুর্যদা গর্ভং জাতং জাতং বিনাশযেত্||২৮|| দুষ্টশোণিতজং নার্যাঃ পুত্রঘ্নী নাম সা মতা|২৯|
रौक्ष्याद्वायुर्यदा गर्भं जातं जातं विनाशयेत्||२८|| दुष्टशोणितजं नार्याः पुत्रघ्नी नाम सा मता|२९|
🔊 Audio coming soon
রৌক্ষ্যাদিতি রূক্ষগুণোত্কর্ষাত্| দুষ্টশোণিতজমিতি বচনাদিহ বাযুনাঽঽর্তবদুষ্টিরপি ক্রিযতে ইতি দর্শযতি| অত্র চ যদ্যপি সামান্যেনৈব গর্ভবিনাশ উক্তঃ, তথাঽপি পুত্রস্যৈব প্রাধান্যাত্ ‘পুত্রঘ্নী’ ইতি ব্যপদেশো জ্ঞেযঃ||২৮||-
Adhikarana 13 (29-30) · Śloka 31
ব্যবাযমতিতৃপ্তাযা ভজন্ত্যাস্ত্বন্নপীডিতঃ||২৯|| বাযুর্মিথ্যাস্থিতাঙ্গাযা যোনিস্রোতসি সংস্থিতঃ| বক্রযত্যাননং যোন্যাঃ সাঽস্থিমাংসানিলার্তিভিঃ||৩০|| ভৃশার্তির্মৈথুনাশক্তা যোনিরন্তর্মুখী মতা|৩১|
व्यवायमतितृप्ताया भजन्त्यास्त्वन्नपीडितः||२९|| वायुर्मिथ्यास्थिताङ्गाया योनिस्रोतसि संस्थितः| वक्रयत्याननं योन्याः साऽस्थिमांसानिलार्तिभिः||३०|| भृशार्तिर्मैथुनाशक्ता योनिरन्तर्मुखी मता|३१|
🔊 Audio coming soon
ব্যবাযমতিতৃপ্তাযা ইত্যাদৌ অতিতৃপ্তাযা ব্যবাযং ভজন্ত্যাঃ ব্যবাযকালে মিথ্যাস্থিতাঙ্গাযা অন্নপীডিতো বাযুর্যোনেরাননমন্তর্মুখং বক্রযতি; বক্রযতীতিপদেন বক্রতযাঽন্তর্মুখনযনমভিপ্রেতম্||২৯-৩০||-
Adhikarana 14 (31) · Śloka 32
গর্ভস্থাযাঃ স্ত্রিযা রৌক্ষ্যাদ্বাযুর্যোনিং প্রদূষযন্||৩১|| মাতৃদোষাদণুদ্বারাং কুর্যাত্ সূচীমুখী তু সা|৩২|
गर्भस्थायाः स्त्रिया रौक्ष्याद्वायुर्योनिं प्रदूषयन्||३१|| मातृदोषादणुद्वारां कुर्यात् सूचीमुखी तु सा|३२|
🔊 Audio coming soon
গর্ভস্থাযা ইত্যাদৌ রৌক্ষ্যাদিতি রূক্ষগুণাত্| মাতৃদোষাদিতি মাতুর্গর্ভকালে বাতপ্রকোপহেতুসেবারূপাপচারাত্||৩১||-
Adhikarana 15 (32) · Śloka 33
ব্যবাযকালে রুন্ধন্ত্যা বেগান্ প্রকুপিতোঽনিলঃ||৩২|| কুর্যাদ্বিণ্মূত্রসঙ্গার্তিং শোষং যোনিমুখস্য চ|৩৩|
व्यवायकाले रुन्धन्त्या वेगान् प्रकुपितोऽनिलः||३२|| कुर्याद्विण्मूत्रसङ्गार्तिं शोषं योनिमुखस्य च|३३|
🔊 Audio coming soon
শোষং যোনিমুখস্যেত্যনেন যোনিমুখশোষাচ্ছুষ্কযোনিসঞ্জ্ঞা ব্যাকৃতা ভবতি||৩২||-
Adhikarana 16 (33) · Śloka 34
ষডহাত্ সপ্তরাত্রাদ্বা শুক্রং গর্ভাশযং গতম্||৩৩|| সরুজং নীরুজং বাঽপি যা স্রবেত্ সা তু বামিনী|৩৪|
षडहात् सप्तरात्राद्वा शुक्रं गर्भाशयं गतम्||३३|| सरुजं नीरुजं वाऽपि या स्रवेत् सा तु वामिनी|३४|
🔊 Audio coming soon
ষডহাদিত্যাদিনা শুক্রবমনাদ্ ‘বামিনী’ ইত্যুচ্যতে||৩৩||-
Adhikarana 17 (34) · Śloka 35
বীজদোষাত্তু গর্ভস্থমারুতোপহতাশযা||৩৪|| নৃদ্বেষিণ্যস্তনী চৈব ষণ্ঢী স্যাদনুপক্রমা|৩৫|
बीजदोषात्तु गर्भस्थमारुतोपहताशया||३४|| नृद्वेषिण्यस्तनी चैव षण्ढी स्यादनुपक्रमा|३५|
🔊 Audio coming soon
বীজদোষাদিতি সামান্যবচনেনাপি আর্তবরূপবীজদোষ এব জ্ঞেযঃ, তদ্দোষস্যৈব গর্ভাশযোপঘাতকরত্বাত্| উক্তং হি- “যদা হ্যস্যাঃ শোণিতে গর্ভাশযবীজভাগঃ প্রদোষমাপদ্যতে তদা বন্ধ্যাং জনযতি” (শা.অ.৪) ইতি| মারুতোপহতাশযেতি মারুতোপহতগর্ভাশযা| অস্তনী ঈষত্স্তনী||৩৪||-
Adhikarana 18 (35-36) · Śloka 37
বিষমং দুঃখশয্যাযাং মৈথুনাত্ কুপিতোঽনিলঃ||৩৫|| গর্ভাশযস্য যোন্যাশ্চ মুখং বিষ্টম্ভযেত্ স্ত্রিযাঃ| অসংবৃতমুখী সার্তী রূক্ষফেনাস্রবাহিনী||৩৬|| মাংসোত্সন্না মহাযোনিঃ পর্ববঙ্ক্ষণশূলিনী|৩৭|
विषमं दुःखशय्यायां मैथुनात् कुपितोऽनिलः||३५|| गर्भाशयस्य योन्याश्च मुखं विष्टम्भयेत् स्त्रियाः| असंवृतमुखी सार्ती रूक्षफेनास्रवाहिनी||३६|| मांसोत्सन्ना महायोनिः पर्ववङ्क्षणशूलिनी|३७|
🔊 Audio coming soon
বিষমমিতি ক্রিযাবিশেষণং, বিষমং যথা ভবতি তথা মৈথুনাদিত্যর্থঃ| বিষ্টম্ভযেদিতি বিস্তারযেত্| মাংসোত্সন্নেতি উত্সন্নমাংসা||৩৫-৩৬||-
Adhikarana 19 (37-38) · Śloka 39
ইত্যেতৈর্লক্ষণৈঃ প্রোক্তা বিংশতির্যোনিজা গদাঃ||৩৭|| ন শুক্রং ধারযত্যেভির্দোষৈর্যোনিরুপদ্রুতা| তস্মাদ্গর্ভং ন গৃহ্ণাতি স্ত্রী গচ্ছত্যামযান্ বহূন্||৩৮|| গুল্মার্শঃপ্রদরাদীংশ্চ বাতাদ্যৈশ্চাতিপীডনম্|৩৯|
इत्येतैर्लक्षणैः प्रोक्ता विंशतिर्योनिजा गदाः||३७|| न शुक्रं धारयत्येभिर्दोषैर्योनिरुपद्रुता| तस्माद्गर्भं न गृह्णाति स्त्री गच्छत्यामयान् बहून्||३८|| गुल्मार्शःप्रदरादींश्च वाताद्यैश्चातिपीडनम्|३९|
🔊 Audio coming soon
দোষৈর্যোনিরুপদ্রুতেত্যনেন দোষশব্দেন যোনিদূষকা যথোক্তা গদা উচ্যন্তে; উক্তং হি- “রোগা হ্যপি দোষশব্দং লভন্তে” (বি.অ.৬) ইতি| তস্মাদিতি যোন্যুপদ্রবাত্| প্রদরাদীংশ্চেত্যত্র যোনিব্যাপদ্বিশেষমেব প্রদরমাহুঃ, তেন যোনিব্যাপত্প্রকারং প্রদররূপং দোষোত্পাদং বর্ণযন্তি; যে তু যোনিব্যাপদ্ভিন্নমেব প্রদরমিচ্ছন্তি, তেষামত্র প্রদরপাঠে বিরোধো নাস্ত্যেব||৩৭-৩৮||-
Adhikarana 20 (39-40) · Śloka 41
আসাং ষোডশ যাস্ত্বন্ত্যা আদ্যে দ্বে পিত্তদোষজে||৩৯|| পরিপ্লুতা বামিনী চ বাতপিত্তাত্মিকে মতে| কর্ণিন্যুপপ্লুতে বাতকফাচ্ছেষাস্তু বাতজাঃ||৪০|| দেহং বাতাদযস্তাসাং স্বৈর্লিঙ্গৈঃ পীডযন্তি হি|৪১|
आसां षोडश यास्त्वन्त्या आद्ये द्वे पित्तदोषजे||३९|| परिप्लुता वामिनी च वातपित्तात्मिके मते| कर्णिन्युपप्लुते वातकफाच्छेषास्तु वातजाः||४०|| देहं वातादयस्तासां स्वैर्लिङ्गैः पीडयन्ति हि|४१|
🔊 Audio coming soon
সম্প্রতি আদ্যব্যাপচ্চতুষ্টযং ত্যক্ত্বা শেষষোডশব্যাপত্সু বাতাদিলিঙ্গচিকিত্সাজ্ঞানার্থং দোষবিভাগং দর্শযন্নাহ- আসামিত্যাদি| আদ্যে দ্বে ইতি রক্তযোন্যরজস্কে| দেহং বাতাদয ইত্যাদি| তাসাং বাতাদিবিভাগেনোক্তযোনিব্যাপদাং বাতাদযো দেহং স্বৈর্লিঙ্গৈঃ পীডযন্তি, তেন বাতাদ্যধিকত্বং তাসামুপপন্নমিতি ভাবঃ; অন্যে তু দেহশব্দেনাত্র যোনিস্থানমেবোচ্যত ইত্যাহুঃ||৩৯-৪০||-
Adhikarana 21 (41-48) · Śloka 49
স্নেহনস্বেদবস্ত্যাদি বাতজাস্বনিলাপহম্||৪১|| কারযেদ্রক্তপিত্তঘ্নং শীতং পিত্তকৃতাসু চ| শ্লেষ্মজাসু চ রূক্ষোষ্ণং কর্ম কুর্যাদ্বিচক্ষণঃ||৪২|| সন্নিপাতে বিমিশ্রং তু সংসৃষ্টাসু চ কারযেত্| স্নিগ্ধস্বিন্নাং তথা যোনিং দুঃস্থিতাং স্থাপযেত্পুনঃ||৪৩|| পাণিনা নামযেজ্জিহ্মাং সংবৃতাং বর্ধযেত্ পুনঃ| প্রবেশযেন্নিঃসৃতাং চ বিবৃতাং পরিবর্তযেত্||৪৪|| যোনিঃ স্থানাপবৃত্তা হি শল্যভূতা মতা স্ত্রিযাঃ| সর্বাং ব্যাপন্নযোনিং তু কর্মভির্বমনাদিভিঃ||৪৫|| মৃদুভিঃ পঞ্চভির্নারীং স্নিগ্ধস্বিন্নামুপাচরেত্| সর্বতঃ সুবিশুদ্ধাযাঃ শেষং কর্ম বিধীযতে||৪৬|| বাতব্যাধিহরং কর্ম বাতার্তানাং সদা হিতম্| ঔদকানূপজৈর্মাংসৈঃ ক্ষীরৈঃ সতিলতণ্ডুলৈঃ||৪৭|| সবাতঘ্নৌষধৈর্নাডীকুম্ভীস্বেদৈরুপাচরেত্| অক্তাং লবণতৈলেন সাশ্মপ্রস্তরসঙ্করৈঃ||৪৮|| স্বিন্নাং কোষ্ণাম্বুসিক্তাঙ্গীং বাতঘ্নৈর্ভোজযেদ্রসৈঃ|৪৯|
स्नेहनस्वेदबस्त्यादि वातजास्वनिलापहम्||४१|| कारयेद्रक्तपित्तघ्नं शीतं पित्तकृतासु च| श्लेष्मजासु च रूक्षोष्णं कर्म कुर्याद्विचक्षणः||४२|| सन्निपाते विमिश्रं तु संसृष्टासु च कारयेत्| स्निग्धस्विन्नां तथा योनिं दुःस्थितां स्थापयेत्पुनः||४३|| पाणिना नामयेज्जिह्मां संवृतां वर्धयेत् पुनः| प्रवेशयेन्निःसृतां च विवृतां परिवर्तयेत्||४४|| योनिः स्थानापवृत्ता हि शल्यभूता मता स्त्रियाः| सर्वां व्यापन्नयोनिं तु कर्मभिर्वमनादिभिः||४५|| मृदुभिः पञ्चभिर्नारीं स्निग्धस्विन्नामुपाचरेत्| सर्वतः सुविशुद्धायाः शेषं कर्म विधीयते||४६|| वातव्याधिहरं कर्म वातार्तानां सदा हितम्| औदकानूपजैर्मांसैः क्षीरैः सतिलतण्डुलैः||४७|| सवातघ्नौषधैर्नाडीकुम्भीस्वेदैरुपाचरेत्| अक्तां लवणतैलेन साश्मप्रस्तरसङ्करैः||४८|| स्विन्नां कोष्णाम्बुसिक्ताङ्गीं वातघ्नैर्भोजयेद्रसैः|४९|
🔊 Audio coming soon
লিঙ্গানন্তরং চিকিত্সামাহ- স্নেহনেত্যাদি| স্নেহনাদীনামনিলাপহত্বে সিদ্ধেঽপি অনিলাপহমিতি বিশেষণং বিশেষেণানিলাপহদ্রব্যকৃতস্নেহনাদিপ্রতিপাদনার্থম্| সংসৃষ্টাস্বিতি দ্বন্দ্বজাসু| স্থাপযেদিতি সুস্থিতাং কৃত্বা স্থাপযেত্| দুঃস্থিতাস্থাপনপ্রকারমাহ- পাণিনেত্যাদি| স্নিগ্ধস্বিন্নামিতি সর্বত্রানুবর্ততে| জিহ্মামিতি বক্রাম্| বিবৃতামিতি বিবৃতমুখীম্| পরিবর্তযেদিতি পরিতো বর্তনেন সংবৃতাং কুর্যাত্| পঞ্চভিরিতিপদং সকলকর্মণাং মৃদুতযা কর্তব্যোপদর্শনার্থম্| অত্র চ বমনাদীনাং সর্বদেহোপকারকতযা যোনিগতরোগহরণেঽপি সামর্থ্যং ভবত্যেবেতি জ্ঞেযম্| শেষং কর্মেতি বক্ষ্যমাণম্||৪১-৪৮||-
Adhikarana 22 (49-62) · Śloka 62
বলাদ্রোণদ্বযক্বাথে ঘৃততৈলাঢকং পচেত্||৪৯|| স্থিরাপযস্যাজীবন্তীবীরর্ষভকজীবকৈঃ| শ্রাবণীপিপ্পলীমুদ্গপীলুমাষাখ্যপর্ণিভিঃ||৫০|| শর্করাক্ষীরকাকোলীকাকনাসাভিরেব চ| পিষ্টৈশ্চতুর্গুণক্ষীরে সিদ্ধং পেযং যথাবলম্||৫১|| বাতপিত্তকৃতান্ রোগান্ হত্বা গর্ভং দধাতি তত্| কাশ্মর্যত্রিফলাদ্রাক্ষাকাসমর্দপরূষকৈঃ||৫২|| পুনর্নবাদ্বিরজনীকাকনাসাসহচরৈঃ| শতাবর্যা গুডূচ্যাশ্চ প্রস্থমক্ষসমৈর্ঘৃতাত্||৫৩|| সাধিতং যোনিবাতঘ্নং গর্ভদং পরমং পিবেত্| পিপ্পলীকুঞ্চিকাজাজীবৃষকং সৈন্ধবং বচাম্||৫৪|| যবক্ষারাজমোদে চ শর্করাং চিত্রকং তথা| পিষ্ট্বা সর্পিষি ভৃষ্টানি পাযযেত্ প্রসন্নযা||৫৫|| যোনিপার্শ্বার্তিহৃদ্রোগগুল্মার্শোবিনিবৃত্তযে| বৃষকং মাতুলুঙ্গস্য মূলানি মদযন্তিকাম্||৫৬|| পিবেত্ সলবণৈর্মদ্যৈঃ পিপ্পলীকুঞ্চিকে তথা| রাস্নাশ্বদংষ্ট্রাবৃষকৈঃ পিবেচ্ছূলে শৃতং পযঃ||৫৭|| গুডূচীত্রিফলাদন্তীক্বাথৈশ্চ পরিষেচযেত্| সৈন্ধবং তগরং কুষ্ঠং বৃহতী দেবদারু চ||৫৮|| সমাংশৈঃ সাধিতং কল্কৈস্তৈলং ধার্যং রুজাপহম্| গুডূচীমালতীরাস্নাবলামধুকচিত্রকৈঃ||৫৯|| নিদিগ্ধিকাদেবদারুযূথিকাভিশ্চ কার্ষিকৈঃ| তৈলপ্রস্থং গবাং মূত্রে ক্ষীরে চ দ্বিগুণে পচেত্||৬০|| বাতার্তাযাঃ পিচুং দদ্যাদ্যোনৌ চ প্রণযেত্ততঃ| বাতার্তানাং চ যোনীনাং সেকাভ্যঙ্গপিচুক্রিযাঃ||৬১|| (উষ্ণাঃ স্নিগ্ধাঃ প্রকর্তব্যাস্তৈলানি স্নেহনানি চ )| হিংস্রাকল্কং তু বাতার্তা কোষ্ণমভ্যজ্য ধারযেত্| পঞ্চবল্কস্য পিত্তার্তা শ্যামাদীনাং কফাতুরা||৬২||
बलाद्रोणद्वयक्वाथे घृततैलाढकं पचेत्||४९|| स्थिरापयस्याजीवन्तीवीरर्षभकजीवकैः| श्रावणीपिप्पलीमुद्गपीलुमाषाख्यपर्णिभिः||५०|| शर्कराक्षीरकाकोलीकाकनासाभिरेव च| पिष्टैश्चतुर्गुणक्षीरे सिद्धं पेयं यथाबलम्||५१|| वातपित्तकृतान् रोगान् हत्वा गर्भं दधाति तत्| काश्मर्यत्रिफलाद्राक्षाकासमर्दपरूषकैः||५२|| पुनर्नवाद्विरजनीकाकनासासहचरैः| शतावर्या गुडूच्याश्च प्रस्थमक्षसमैर्घृतात्||५३|| साधितं योनिवातघ्नं गर्भदं परमं पिबेत्| पिप्पलीकुञ्चिकाजाजीवृषकं सैन्धवं वचाम्||५४|| यवक्षाराजमोदे च शर्करां चित्रकं तथा| पिष्ट्वा सर्पिषि भृष्टानि पाययेत् प्रसन्नया||५५|| योनिपार्श्वार्तिहृद्रोगगुल्मार्शोविनिवृत्तये| वृषकं मातुलुङ्गस्य मूलानि मदयन्तिकाम्||५६|| पिबेत् सलवणैर्मद्यैः पिप्पलीकुञ्चिके तथा| रास्नाश्वदंष्ट्रावृषकैः पिबेच्छूले शृतं पयः||५७|| गुडूचीत्रिफलादन्तीक्वाथैश्च परिषेचयेत्| सैन्धवं तगरं कुष्ठं बृहती देवदारु च||५८|| समांशैः साधितं कल्कैस्तैलं धार्यं रुजापहम्| गुडूचीमालतीरास्नाबलामधुकचित्रकैः||५९|| निदिग्धिकादेवदारुयूथिकाभिश्च कार्षिकैः| तैलप्रस्थं गवां मूत्रे क्षीरे च द्विगुणे पचेत्||६०|| वातार्तायाः पिचुं दद्याद्योनौ च प्रणयेत्ततः| वातार्तानां च योनीनां सेकाभ्यङ्गपिचुक्रियाः||६१|| (उष्णाः स्निग्धाः प्रकर्तव्यास्तैलानि स्नेहनानि च )| हिंस्राकल्कं तु वातार्ता कोष्णमभ्यज्य धारयेत्| पञ्चवल्कस्य पित्तार्ता श्यामादीनां कफातुरा||६२||
🔊 Audio coming soon
বলাদ্রোণদ্বযেত্যাদৌ বলাদ্রোণদ্বযস্য ক্বাথে ইতি, বলাযাঃ দ্রোণদ্বযপ্রমাণক্বাথে ইতি বা, উভযথাঽপি দ্রোণদ্বযমান এব ক্বাথো ভবতি| পযস্যা অর্কপুষ্পী| মুদ্গপীলুমাষাখ্যৈঃ পর্ণীশব্দঃ প্রত্যেকমভিসম্বধ্যতে; তত্র পীলুপর্ণী মোরটা, কেচিন্মূর্বামাহুঃ| প্রসন্না মদিরাযা উপরিতনো ভাগঃ| শূলে ইতি যোনিশূলে| তৈলং ধার্যমিতি রুজার্তাযাং যোনৌ ধার্যম্| যোনৌ চ প্রণযেদিতি যোনাবুত্তরবস্তিনা প্রবেশযেত্| শ্যামাদীনামিতি রোগভিষগ্জিতীযে “শ্যামাত্রিবৃচ্চতুরঙ্গুল...” (বি.অ.৮) ইত্যাদিনোক্তানাম্||৪৯-৬২||
Adhikarana 23 (63-69) · Śloka 70
পিত্তলানাং তু যোনীনাং সেকাভ্যঙ্গপিচুক্রিযাঃ| শীতাঃ পিত্তহরাঃ কার্যাঃ স্নেহনার্থং ঘৃতানি চ||৬৩|| (পিত্তঘ্নৌষধসিদ্ধানি কার্যাণি ভিষজা তথা )| শতাবরীমূলতুলাশ্চতস্রঃ সম্প্রপীডযেত্||৬৪|| রসেন ক্ষীরতুল্যেন পচেত্তেন ঘৃতাঢকম্| জীবনীযৈঃ শতাবর্যা মৃদ্বীকাভিঃ পরূষকৈঃ||৬৫|| পিষ্টৈঃ প্রিযালৈশ্চাক্ষাংশৈর্দ্বিযষ্টিমধুকৈর্ভিষক্| সিদ্ধে শীতে চ মধুনঃ পিপ্পল্যাশ্চ পলাষ্টকম্||৬৬|| সিতাদশপলোন্মিশ্রাল্লিহ্যাত্ পাণিতলং ততঃ| যোন্যসৃক্শুক্রদোষঘ্নং বৃষ্যং পুংসবনং চ তত্||৬৭|| ক্ষতং ক্ষযং রক্তপিত্তং কাসং শ্বাসং হলীমকম্| কামলাং বাতরক্তং চ বীসর্পং হৃচ্ছিরোগ্রহম্||৬৮|| উন্মাদারত্যপস্মারান্ বাতপিত্তাত্মকাঞ্জযেত্| ইতি বৃহচ্ছতাবরীঘৃতম্| এবমেব ক্ষীরসর্পির্জীবনীযোপসাধিতম্||৬৯|| গর্ভদং পিত্তলানাং চ যোনীনাং স্যাদ্ভিষগ্জিতম্|৭০|
पित्तलानां तु योनीनां सेकाभ्यङ्गपिचुक्रियाः| शीताः पित्तहराः कार्याः स्नेहनार्थं घृतानि च||६३|| (पित्तघ्नौषधसिद्धानि कार्याणि भिषजा तथा )| शतावरीमूलतुलाश्चतस्रः सम्प्रपीडयेत्||६४|| रसेन क्षीरतुल्येन पचेत्तेन घृताढकम्| जीवनीयैः शतावर्या मृद्वीकाभिः परूषकैः||६५|| पिष्टैः प्रियालैश्चाक्षांशैर्द्वियष्टिमधुकैर्भिषक्| सिद्धे शीते च मधुनः पिप्पल्याश्च पलाष्टकम्||६६|| सितादशपलोन्मिश्राल्लिह्यात् पाणितलं ततः| योन्यसृक्शुक्रदोषघ्नं वृष्यं पुंसवनं च तत्||६७|| क्षतं क्षयं रक्तपित्तं कासं श्वासं हलीमकम्| कामलां वातरक्तं च वीसर्पं हृच्छिरोग्रहम्||६८|| उन्मादारत्यपस्मारान् वातपित्तात्मकाञ्जयेत्| इति बृहच्छतावरीघृतम्| एवमेव क्षीरसर्पिर्जीवनीयोपसाधितम्||६९|| गर्भदं पित्तलानां च योनीनां स्याद्भिषग्जितम्|७०|
🔊 Audio coming soon
হতাবরীমূলতুলা ইত্যাদৌ আর্দ্রশতাবরীমূলপীডনেন যাবদ্রসো ভবতি তেন সমং ক্ষীরঘৃতং বক্ষ্যমাণকল্কৈঃ পাচনীযম্| দ্বিযষ্টিমধুকৈরিতি দ্বিভাগমধুযষ্টিকৈঃ, কিংবা জলজস্থলজযষ্টিমধুকদ্বযযুক্তৈঃ| এবমেবেত্যাদৌ শতাবরীচতুঃশতরসসমেনেত্যর্থঃ| ক্ষীরোত্থিতং সর্পিঃ ক্ষীরসর্পিঃ| জীবনীযান্যত্র কল্কঃ||৬৩-৬৯||-
Adhikarana 24 (70-72) · Śloka 73
যোন্যাং শ্লেষ্মপ্রদুষ্টাযাং বর্তিঃ সংশোধনী হিতা||৭০|| বারাহে বহুশঃ পিত্তে ভাবিতৈর্লক্তকৈঃ কৃতা| ভাবিতং পযসাঽর্কস্য যবচূর্ণং সসৈন্ধবম্||৭১|| বর্তিঃ কৃতা মুহুর্ধার্যা ততঃ সেচ্যা সুখাম্বুনা| পিপ্পল্যা মরিচৈর্মাষৈঃ শতাহ্বাকুষ্ঠসৈন্ধবৈঃ||৭২|| বর্তিস্তুল্যা প্রদেশিন্যা ধার্যা যোনিবিশোধনী|৭৩|
योन्यां श्लेष्मप्रदुष्टायां वर्तिः संशोधनी हिता||७०|| वाराहे बहुशः पित्ते भावितैर्लक्तकैः कृता| भावितं पयसाऽर्कस्य यवचूर्णं ससैन्धवम्||७१|| वर्तिः कृता मुहुर्धार्या ततः सेच्या सुखाम्बुना| पिप्पल्या मरिचैर्माषैः शताह्वाकुष्ठसैन्धवैः||७२|| वर्तिस्तुल्या प्रदेशिन्या धार्या योनिविशोधनी|७३|
🔊 Audio coming soon
পযসাঽর্কস্যেতি অর্কক্ষীরেণ| সেচ্যেতি পরিষিঞ্চনীযা| প্রদেশিনীতুল্যা প্রদেশিন্যঙ্গুলীসমানা পরিণাহেন দৈর্ঘ্যেণ চ||৭০-৭২||-
Adhikarana 25 (73-83) · Śloka 84
উদুম্বরশলাটূনাং দ্রোণমব্দ্রোণসংযুতম্||৭৩|| সপঞ্চবল্ককুলকমালতীনিম্বপল্লবম্ | নিশাং স্থাপ্য জলে তস্মিংস্তৈলপ্রস্থং বিপাচযেত্||৭৪|| লাক্ষাধবপলাশত্বঙ্নির্যাসৈঃ শাল্মলেন চ| পিষ্টৈঃ সিদ্ধস্য তৈলস্য পিচুং যোনৌ নিধাপযেত্||৭৫|| সশর্করৈঃ কষাযৈশ্চ শীতৈঃ কুর্বীত সেচনম্| পিচ্ছিলা বিবৃতা কালদুষ্টা যোনিশ্চ দারুণা||৭৬|| সপ্তাহাচ্ছুধ্যতি ক্ষিপ্রমপত্যং চাপি বিন্দতি| উদুম্বরস্য দুগ্ধেন ষট্কৃত্বো ভাবিতাত্তিলাত্||৭৭|| তৈলং ক্বাথেন তস্যৈব সিদ্ধং ধার্যং চ পূর্ববত্| ধাতক্যামলকীপত্রস্রোতোজমধুকোত্পলৈঃ||৭৮|| জম্ব্বাম্রমধ্যকাসীসলোধ্রকট্ফলতিন্দুকৈঃ| সৌরাষ্ট্রিকাদাডিমত্বগুদুম্বরশলাটুভিঃ||৭৯|| অক্ষমাত্রৈরজামূত্রে ক্ষীরে চ দ্বিগুণে পচেত্| তৈলপ্রস্থং পিচুং দদ্যাদ্যোনৌ চ প্রণযেত্ততঃ||৮০|| কটীপৃষ্ঠত্রিকাভ্যঙ্গং স্নেহবস্তিং চ দাপযেত্| পিচ্ছিলা স্রাবিণী যোনির্বিপ্লুতোপপ্লুতা তথা||৮১|| উত্তানা চোন্নতা শূনা সিধ্যেত্ সস্ফোটশূলিনী| করীরধবনিম্বার্কবেণুকোশাম্রজাম্ববৈঃ||৮২|| জিঙ্গিনীবৃষমূলানাং ক্বাথৈর্মার্দ্বীকসীধুভিঃ| সশুক্তৈর্ধাবনং মিশ্রৈর্যোন্যাস্রাববিনাশনম্||৮৩|| কুর্যাত্ সতক্রগোমূত্রশুক্তৈর্বা ত্রিফলারসৈঃ|৮৪|
उदुम्बरशलाटूनां द्रोणमब्द्रोणसंयुतम्||७३|| सपञ्चवल्ककुलकमालतीनिम्बपल्लवम् | निशां स्थाप्य जले तस्मिंस्तैलप्रस्थं विपाचयेत्||७४|| लाक्षाधवपलाशत्वङ्निर्यासैः शाल्मलेन च| पिष्टैः सिद्धस्य तैलस्य पिचुं योनौ निधापयेत्||७५|| सशर्करैः कषायैश्च शीतैः कुर्वीत सेचनम्| पिच्छिला विवृता कालदुष्टा योनिश्च दारुणा||७६|| सप्ताहाच्छुध्यति क्षिप्रमपत्यं चापि विन्दति| उदुम्बरस्य दुग्धेन षट्कृत्वो भावितात्तिलात्||७७|| तैलं क्वाथेन तस्यैव सिद्धं धार्यं च पूर्ववत्| धातक्यामलकीपत्रस्रोतोजमधुकोत्पलैः||७८|| जम्ब्वाम्रमध्यकासीसलोध्रकट्फलतिन्दुकैः| सौराष्ट्रिकादाडिमत्वगुदुम्बरशलाटुभिः||७९|| अक्षमात्रैरजामूत्रे क्षीरे च द्विगुणे पचेत्| तैलप्रस्थं पिचुं दद्याद्योनौ च प्रणयेत्ततः||८०|| कटीपृष्ठत्रिकाभ्यङ्गं स्नेहबस्तिं च दापयेत्| पिच्छिला स्राविणी योनिर्विप्लुतोपप्लुता तथा||८१|| उत्ताना चोन्नता शूना सिध्येत् सस्फोटशूलिनी| करीरधवनिम्बार्कवेणुकोशाम्रजाम्बवैः||८२|| जिङ्गिनीवृषमूलानां क्वाथैर्मार्द्वीकसीधुभिः| सशुक्तैर्धावनं मिश्रैर्योन्यास्रावविनाशनम्||८३|| कुर्यात् सतक्रगोमूत्रशुक्तैर्वा त्रिफलारसैः|८४|
🔊 Audio coming soon
উদুম্বরশলাটূনামিত্যাদৌ পঞ্চবল্কাদিসহিতানামুদুম্বরশলাটূনাং দ্রোণং সমভাগজলং গৃহীতব্যম্| নির্যাসৈরিতি পলাশস্যৈব নির্যাসৈঃ, লাক্ষা চ পলাশব্যতিরেকেণ ভবতীতি জ্ঞেযম্| সশর্করৈঃ কষাযৈরিতি উদুম্বরশলাট্বাদিকৃতকষাযৈরেবেত্যর্থঃ| কালদুষ্টা চিরকালদুষ্টা| উদুম্বরস্য দুগ্ধেনেতি উদুম্বরক্ষীরেণ| ক্বাথেন তস্যৈবেতি উদুম্বরস্য ক্বাথেন| সৌরাষ্ট্রিকা তুবরী মৃত্তিকা| অজামূত্রে ক্ষীরে চেতি অজামূত্রক্ষীরে প্রত্যেকং দ্বিগুণে| উত্তানেতি উন্নতা| করীরঃ মরুজদ্রুমঃ| কোষাম্রঃ স্বনামখ্যাতঃ| জিঙ্গিনী প্রসিদ্ধা||৭৩-৮৩||-
Adhikarana 26 (84-85) · Śloka 86
পিপ্পল্যযোরজঃপথ্যাপ্রযোগা মধুনা হিতাঃ||৮৪|| শ্লেষ্মলাযাং কটুপ্রাযাঃ সমূত্রা বস্তযো হিতাঃ| পিত্তে সমধুরক্ষীরা বাতে তৈলাম্লসংযুতাঃ||৮৫|| সন্নিপাতসমুত্থাযাঃ কর্ম সাধারণং হিতম্|৮৬|
पिप्पल्ययोरजःपथ्याप्रयोगा मधुना हिताः||८४|| श्लेष्मलायां कटुप्रायाः समूत्रा बस्तयो हिताः| पित्ते समधुरक्षीरा वाते तैलाम्लसंयुताः||८५|| सन्निपातसमुत्थायाः कर्म साधारणं हितम्|८६|
🔊 Audio coming soon
কর্মসাধারণং বাতাদিজযোনিদোষোক্তং মিলিতং ত্রিদোষজাযাং কর্তব্যম্||৮৪-৮৫||-
Adhikarana 27 (86-89) · Śloka 90
রক্তযোন্যামসৃগ্বর্ণৈরনুবন্ধং সমীক্ষ্য চ||৮৬|| ততঃ কুর্যাদ্যথাদোষং রক্তস্থাপনমৌষধম্| তিলচূর্ণং দধি ঘৃতং ফাণিতং শৌকরী বসা||৮৭|| ক্ষৌদ্রেণ সংযুতং পেযং বাতাসৃগ্দরনাশনম্| বরাহস্য রসো মেদ্যঃ সকৌলত্থোঽনিলাধিকে||৮৮|| শর্করাক্ষৌদ্রযষ্ট্যাহ্বনাগরৈর্বা যুতং দধি| পযস্যোত্পলশালূকবিসকালীযকাম্বুদম্||৮৯|| সপযঃশর্করাক্ষৌদ্রং পৈত্তিকেঽসৃগ্দরে পিবেত্|৯০|
रक्तयोन्यामसृग्वर्णैरनुबन्धं समीक्ष्य च||८६|| ततः कुर्याद्यथादोषं रक्तस्थापनमौषधम्| तिलचूर्णं दधि घृतं फाणितं शौकरी वसा||८७|| क्षौद्रेण संयुतं पेयं वातासृग्दरनाशनम्| वराहस्य रसो मेद्यः सकौलत्थोऽनिलाधिके||८८|| शर्कराक्षौद्रयष्ट्याह्वनागरैर्वा युतं दधि| पयस्योत्पलशालूकबिसकालीयकाम्बुदम्||८९|| सपयःशर्कराक्षौद्रं पैत्तिकेऽसृग्दरे पिबेत्|९०|
🔊 Audio coming soon
রক্তযোন্যামিত্যাদি| অসৃগ্বর্ণৈরনুবন্ধং বীক্ষ্যেতি অসৃগ্বর্ণবিশেষৈর্দোষানুবন্ধং পরীক্ষ্য||৮৬-৮৯||-
Adhikarana 28 (90-95) · Śloka 96
পাঠা জম্ব্বাম্রযোর্মধ্যং শিলোদ্ভেদং রসাঞ্জনম্||৯০|| অম্বষ্ঠা শাল্মলীশ্লেষং সমঙ্গাং বত্সকত্বচম্| বাহ্লীকাতিবিষে বিল্বং মুস্তং লোধ্রং সগৈরিকম্||৯১|| কট্বঙ্গং মরিচং শুণ্ঠীং মৃদ্বীকাং রক্তচন্দনম্| কট্ফলং বত্সকানন্তাধাতকীমধুকার্জুনম্||৯২|| পুষ্যেণোদ্ধৃত্য তুল্যানি সূক্ষ্মচূর্ণানি কারযেত্| তানি ক্ষৌদ্রেণ সংযোজ্য পিবেত্তণ্ডুলবারিণা||৯৩|| অর্শঃসু চাতিসারেষু রক্তং যচ্চোপবেশ্যতে| দোষাগন্তুকৃতা যে চ বালানাং তাংশ্চ নাশযেত্||৯৪|| যোনিদোষং রজোদোষং শ্বেতং নীলং সপীতকম্| স্ত্রীণাং শ্যাবারুণং যচ্চ প্রসহ্য বিনিবর্তযেত্||৯৫|| চূর্ণং পুষ্যানুগং নাম হিতমাত্রেযপূজিতম্|৯৬| ইতি পুষ্যানুগচূর্ণম্|
पाठा जम्ब्वाम्रयोर्मध्यं शिलोद्भेदं रसाञ्जनम्||९०|| अम्बष्ठा शाल्मलीश्लेषं समङ्गां वत्सकत्वचम्| बाह्लीकातिविषे बिल्वं मुस्तं लोध्रं सगैरिकम्||९१|| कट्वङ्गं मरिचं शुण्ठीं मृद्वीकां रक्तचन्दनम्| कट्फलं वत्सकानन्ताधातकीमधुकार्जुनम्||९२|| पुष्येणोद्धृत्य तुल्यानि सूक्ष्मचूर्णानि कारयेत्| तानि क्षौद्रेण संयोज्य पिबेत्तण्डुलवारिणा||९३|| अर्शःसु चातिसारेषु रक्तं यच्चोपवेश्यते| दोषागन्तुकृता ये च बालानां तांश्च नाशयेत्||९४|| योनिदोषं रजोदोषं श्वेतं नीलं सपीतकम्| स्त्रीणां श्यावारुणं यच्च प्रसह्य विनिवर्तयेत्||९५|| चूर्णं पुष्यानुगं नाम हितमात्रेयपूजितम्|९६| इति पुष्यानुगचूर्णम्|
🔊 Audio coming soon
পাঠেত্যাদৌ অম্বষ্ঠা পাঠাভেদঃ; অন্যে তু পাঠাভাগদ্বযগ্রহণার্থং পুনঃ ‘অম্বষ্ঠা’ ইতি পদং বর্ণযন্তি| উক্তং হি- “ঘৃতে তৈলে চ যোগে চ যদ্দ্রব্যং পুনরুচ্যতে| ভাগতো দ্বিগুণং তদ্ধি গ্রহণীযং মনীষিভিঃ” ইতি| শাল্মলীশ্লেষমিতি শাল্মলীবেষ্টকম্| বাহ্লীকমিতি কুঙ্কুমম্| পুষ্যেণেতি পুষ্যনক্ষত্রেণোদ্ধৃত্য; পুষ্যনক্ষত্রোদ্ধরণং চাত্রাদৃষ্টদ্বারোপকারকং জ্ঞেযম্| নীলং শ্বেতং সপীতকমিত্যাদি রজোদোষবিশেষণম্||৯০-৯৫||-
Adhikarana 29 (96-99) · Śloka 100
তণ্ডুলীযকমূলং তু সক্ষৌদ্রং তণ্ডুলাম্বুনা||৯৬|| রসাঞ্জনং চ লাক্ষাং চ ছাগেন পযসা পিবেত্| পত্রকল্কৌ ঘৃতে ভৃষ্টৌ রাজাদনকপিত্থযোঃ||৯৭|| পিত্তানিলহরৌ, পৈত্তে সর্বথৈবাস্রপিত্তজিত্| মধুকং ত্রিফলাং লোধ্রং মুস্তং সৌরাষ্ট্রিকাং মধু||৯৮|| মদ্যৈর্নিম্বগুডূচ্যৌ বা কফজেঽসৃগ্দরে পিবেত্| বিরেচনং মহাতিক্তং পৈত্তিকেঽসৃগ্দরে পিবেত্||৯৯|| হিতং গর্ভপরিস্রাবে যচ্চোক্তং তচ্চ কারযেত্|১০০|
तण्डुलीयकमूलं तु सक्षौद्रं तण्डुलाम्बुना||९६|| रसाञ्जनं च लाक्षां च छागेन पयसा पिबेत्| पत्रकल्कौ घृते भृष्टौ राजादनकपित्थयोः||९७|| पित्तानिलहरौ, पैत्ते सर्वथैवास्रपित्तजित्| मधुकं त्रिफलां लोध्रं मुस्तं सौराष्ट्रिकां मधु||९८|| मद्यैर्निम्बगुडूच्यौ वा कफजेऽसृग्दरे पिबेत्| विरेचनं महातिक्तं पैत्तिकेऽसृग्दरे पिबेत्||९९|| हितं गर्भपरिस्रावे यच्चोक्तं तच्च कारयेत्|१००|
🔊 Audio coming soon
বিরেচনমিত্যাদৌ বিরেচনমেব ত্রিবৃতাদি পিবেত্, তথা মহাতিক্তকং ঘৃতং কুষ্ঠোক্তং পিবেদিতি যোজ্যম্| গর্ভপরিস্রাবে যচ্চোক্তমিতি জাতিসূত্রীযে (বি.অ.৮) গর্ভস্রাবচিকিত্সিতং যদুক্তং তত্ কারযেত্||৯৬-৯৯||-
Adhikarana 30 (100-115) · Śloka 116
কাশ্মর্যকুটজক্বাথসিদ্ধমুত্তরবস্তিনা||১০০|| রক্তযোন্যরজস্কানাং পুত্রঘ্ন্যাশ্চ হিতং ঘৃতম্| মৃগাজাবিবরাহাসৃগ্দধ্যম্লফলসর্পিষা ||১০১|| অরজস্কা পিবেত্ সিদ্ধং জীবনীযৈঃ পযোঽপি বা| কর্ণিন্যচরণাশুষ্কযোনিপ্রাক্চরণাসু চ||১০২|| কফবাতে চ দাতব্যং তৈলমুত্তরবস্তিনা| গোপিত্তে মত্স্যপিত্তে বা ক্ষৌমং ত্রিঃসপ্তভাবিতম্||১০৩|| মধুনা কিণ্বচূর্ণং বা দদ্যাদচরণাপহম্| স্রোতসাং শোধনং কণ্ডূক্লেদশোফহরং চ তত্||১০৪|| বাতঘ্নৈঃ শতপাকৈশ্চ তৈলৈঃ প্রাগতিচারিণী| আস্থাপ্যা চানুবাস্যা চ স্বেদ্যা চানিলসূদনৈঃ||১০৫|| স্নেহদ্রব্যৈস্তথাঽঽহারৈরুপনাহৈশ্চ যুক্তিতঃ| শতাহ্বাযবগোধূমকিণ্বকুষ্ঠপ্রিযঙ্গুভিঃ||১০৬|| বলাখুপর্ণিকাশ্র্যাহ্বৈঃ সংযাবো ধারণঃ স্মৃতঃ| বামিন্যুপপ্লুতানাং চ স্নেহস্বেদাদিকঃ ক্রমঃ||১০৭|| কার্যস্ততঃ স্নেহপিচুস্ততঃ সন্তর্পণং ভবেত্| শল্লকীজিঙ্গিনীজম্বূধবত্বক্পঞ্চবল্কলৈঃ||১০৮|| কষাযৈঃ সাধিতঃ স্নেহপিচুঃ স্যাদ্বিপ্লুতাপহঃ| কর্ণিন্যাং বর্তিকা কুষ্ঠপিপ্পল্যর্কাগ্রসৈন্ধবৈঃ||১০৯|| বস্তমূত্রকৃতা ধার্যা সর্বং চ শ্লেষ্মনুদ্ধিতম্| ত্রৈবৃতং স্নেহনং স্বেদো গ্রাম্যানূপৌদকা রসাঃ||১১০|| দশমূলপযোবস্তিশ্চোদাবর্তানিলার্তিষু| ত্রৈবৃতেনানুবাস্যা চ বস্তিশ্চোত্তরসঞ্জ্ঞিতঃ||১১১|| এতদেব মহাযোন্যাং স্রস্তাযাং চ বিধীযতে| বসা ঋক্ষবরাহাণাং ঘৃতং চ মধুরৈঃ শৃতম্||১১২|| পূরযিত্বা মহাযোনিং বধ্নীযাত্ ক্ষৌমলক্তকৈঃ| প্রস্রস্তাং সর্পিষাঽভ্যজ্য ক্ষীরস্বিন্নাং প্রবেশ্য চ||১১৩|| বধ্নীযাদ্বেশবারস্য পিণ্ডেনামূত্রকালতঃ| যচ্চ বাতবিকারাণাং কর্মোক্তং তচ্চ কারযেত্||১১৪|| সর্বব্যাপত্সু মতিমান্মহাযোন্যাং বিশেষতঃ| নহি বাতাদৃতে যোনির্নারীণাং সম্প্রদুষ্যতি||১১৫|| শমযিত্বা তমন্যস্য কুর্যাদ্দোষস্য ভেষজম্|১১৬|
काश्मर्यकुटजक्वाथसिद्धमुत्तरबस्तिना||१००|| रक्तयोन्यरजस्कानां पुत्रघ्न्याश्च हितं घृतम्| मृगाजाविवराहासृग्दध्यम्लफलसर्पिषा ||१०१|| अरजस्का पिबेत् सिद्धं जीवनीयैः पयोऽपि वा| कर्णिन्यचरणाशुष्कयोनिप्राक्चरणासु च||१०२|| कफवाते च दातव्यं तैलमुत्तरबस्तिना| गोपित्ते मत्स्यपित्ते वा क्षौमं त्रिःसप्तभावितम्||१०३|| मधुना किण्वचूर्णं वा दद्यादचरणापहम्| स्रोतसां शोधनं कण्डूक्लेदशोफहरं च तत्||१०४|| वातघ्नैः शतपाकैश्च तैलैः प्रागतिचारिणी| आस्थाप्या चानुवास्या च स्वेद्या चानिलसूदनैः||१०५|| स्नेहद्रव्यैस्तथाऽऽहारैरुपनाहैश्च युक्तितः| शताह्वायवगोधूमकिण्वकुष्ठप्रियङ्गुभिः||१०६|| बलाखुपर्णिकाश्र्याह्वैः संयावो धारणः स्मृतः| वामिन्युपप्लुतानां च स्नेहस्वेदादिकः क्रमः||१०७|| कार्यस्ततः स्नेहपिचुस्ततः सन्तर्पणं भवेत्| शल्लकीजिङ्गिनीजम्बूधवत्वक्पञ्चवल्कलैः||१०८|| कषायैः साधितः स्नेहपिचुः स्याद्विप्लुतापहः| कर्णिन्यां वर्तिका कुष्ठपिप्पल्यर्काग्रसैन्धवैः||१०९|| बस्तमूत्रकृता धार्या सर्वं च श्लेष्मनुद्धितम्| त्रैवृतं स्नेहनं स्वेदो ग्राम्यानूपौदका रसाः||११०|| दशमूलपयोबस्तिश्चोदावर्तानिलार्तिषु| त्रैवृतेनानुवास्या च बस्तिश्चोत्तरसञ्ज्ञितः||१११|| एतदेव महायोन्यां स्रस्तायां च विधीयते| वसा ऋक्षवराहाणां घृतं च मधुरैः शृतम्||११२|| पूरयित्वा महायोनिं बध्नीयात् क्षौमलक्तकैः| प्रस्रस्तां सर्पिषाऽभ्यज्य क्षीरस्विन्नां प्रवेश्य च||११३|| बध्नीयाद्वेशवारस्य पिण्डेनामूत्रकालतः| यच्च वातविकाराणां कर्मोक्तं तच्च कारयेत्||११४|| सर्वव्यापत्सु मतिमान्महायोन्यां विशेषतः| नहि वातादृते योनिर्नारीणां सम्प्रदुष्यति||११५|| शमयित्वा तमन्यस्य कुर्याद्दोषस्य भेषजम्|११६|
🔊 Audio coming soon
মৃগাজাবীত্যাদৌ মৃগাদীনামসৃক্ দধ্যম্লফলসর্পিষা পিবেদিতি যোজ্যম্| ‘অম্লক্ষৌদ্রসর্পিষা’ ইতি বা পাঠঃ| তৈলমুত্তরবস্তিনেত্যত্র জীবনীযসিদ্ধং তৈলং যোজ্যম্| গোপিত্তে ইত্যাদৌ দদ্যাদিতি যোনৌ দদ্যাদিত্যর্থঃ| প্রাগতিচারিণীতি প্রাক্চরণাতিচরণে| সংযাব উত্কারিকা| ধারণঃ স্মৃত ইতি বামিন্যা বীজধারণকারক ইত্যর্থঃ| ত্রৈবৃতং স্নেহনমিতি সর্পিস্তৈলবসাস্নেহনম্| এতদেবেতি ত্রৈবৃতমেব অনুবাসনবস্ত্যুত্তরবস্তিষু| আমূত্রকালত ইতি মূত্রকালপর্যন্তং বন্ধনং কুর্যাত্| সর্বযোনিব্যাপত্সু বাতচিকিত্সাকরণে হেতুমাহ- নহি বাতাদৃত ইত্যাদি||১০০-১১৫||-
Adhikarana 31 (116-125) · Śloka 126
রোহীতকান্মূলকল্কং পাণ্ডুরেঽসৃগ্দরে পিবেত্||১১৬|| জলেনামলকীবীজং কল্কং বা সসিতামধুম্| মধুনাঽঽমলকাচ্চূর্ণং রসং বা লেহযেচ্চ তাম্||১১৭|| ন্যগ্রোধত্বক্কষাযেণ লোধ্রকল্কং তথা পিবেত্| আস্রাবে ক্ষৌমপট্টং বা ভাবিতং তেন ধারযেত্||১১৮|| প্লক্ষত্বক্চূর্ণপিণ্ডং বা ধারযেন্মধুনা কৃতম্| যোন্যা স্নেহাক্তযা লোধ্রপ্রিযঙ্গুমধুকস্য বা||১১৯|| ধার্যা মধুযুতা বর্তিঃ কষাযাণাং চ সর্বশঃ| স্রাবচ্ছেদার্থমভ্যক্তাং ধূপযেদ্বা ঘৃতাপ্লুতৈঃ||১২০|| সরলাগুগ্গুলুযবৈঃ সতৈলকটুমত্স্যকৈঃ| কাসীসং ত্রিফলা কাঙ্ক্ষী সমঙ্গাঽঽম্রাস্থি ধাতকী||১২১|| পৈচ্ছিল্যে ক্ষৌদ্রসংযুক্তশ্চূর্ণো বৈশদ্যকারকঃ| পলাশসর্জজম্বূত্বক্সমঙ্গামোচধাতকীঃ||১২২|| সপিচ্ছিলাপরিক্লিন্নাস্তম্ভনঃ কল্ক ইষ্যতে| স্তব্ধানাং কর্কশানাং চ কার্যং মার্দবকারকম্||১২৩|| ধারযেদ্বেশবারং বা পাযসং কৃশরাং তথা| দুর্গন্ধানাং কষাযঃ স্যাত্তৌবরঃ কল্ক এব বা||১২৪|| চূর্ণং বা সর্বগন্ধানাং পূতিগন্ধাপকর্ষণম্| এবং যোনিষু শুদ্ধাসু গর্ভং বিন্দন্তি যোষিতঃ||১২৫|| অদুষ্টে প্রাকৃতে বীজে জীবোপক্রমণে সতি|১২৬|
रोहीतकान्मूलकल्कं पाण्डुरेऽसृग्दरे पिबेत्||११६|| जलेनामलकीबीजं कल्कं वा ससितामधुम्| मधुनाऽऽमलकाच्चूर्णं रसं वा लेहयेच्च ताम्||११७|| न्यग्रोधत्वक्कषायेण लोध्रकल्कं तथा पिबेत्| आस्रावे क्षौमपट्टं वा भावितं तेन धारयेत्||११८|| प्लक्षत्वक्चूर्णपिण्डं वा धारयेन्मधुना कृतम्| योन्या स्नेहाक्तया लोध्रप्रियङ्गुमधुकस्य वा||११९|| धार्या मधुयुता वर्तिः कषायाणां च सर्वशः| स्रावच्छेदार्थमभ्यक्तां धूपयेद्वा घृताप्लुतैः||१२०|| सरलागुग्गुलुयवैः सतैलकटुमत्स्यकैः| कासीसं त्रिफला काङ्क्षी समङ्गाऽऽम्रास्थि धातकी||१२१|| पैच्छिल्ये क्षौद्रसंयुक्तश्चूर्णो वैशद्यकारकः| पलाशसर्जजम्बूत्वक्समङ्गामोचधातकीः||१२२|| सपिच्छिलापरिक्लिन्नास्तम्भनः कल्क इष्यते| स्तब्धानां कर्कशानां च कार्यं मार्दवकारकम्||१२३|| धारयेद्वेशवारं वा पायसं कृशरां तथा| दुर्गन्धानां कषायः स्यात्तौवरः कल्क एव वा||१२४|| चूर्णं वा सर्वगन्धानां पूतिगन्धापकर्षणम्| एवं योनिषु शुद्धासु गर्भं विन्दन्ति योषितः||१२५|| अदुष्टे प्राकृते बीजे जीवोपक्रमणे सति|१२६|
🔊 Audio coming soon
পাণ্ডুরে প্রদরে ইতি শ্বেতপ্রদরে| ভাবিতং তেনেতি ন্যগ্রোধত্বক্কষাযেণ ভাবিতম্| কটুমত্স্যকঃ শফরী, শুষ্কমত্স্যো বা| কাঙ্ক্ষী সৌরাষ্ট্রী মৃত্| অদুষ্টে ইত্যাদৌ প্রাকৃতে বীজে ইতি সহজগুণসম্পন্নে শুক্রশোণিতবীজে অদুষ্টে সতি; এবম্ভূতসংসর্গে জীবোপক্রমণে সত্যেব গর্ভং যোষিতঃ বিন্দন্তি; জীবোপক্রমণং পূর্বকর্মপ্রেরিতাত্ সুযোগাদ্ভবতি||১১৬-১২৫||-
Adhikarana 32 (126) · Śloka 127
পঞ্চকর্মবিশুদ্ধস্য পুরুষস্যাপি চেন্দ্রিযম্||১২৬|| পরীক্ষ্য বর্ণৈর্দোষাণাং দুষ্টং তদ্ঘ্নৈরুপাচরেত্|১২৭|
पञ्चकर्मविशुद्धस्य पुरुषस्यापि चेन्द्रियम्||१२६|| परीक्ष्य वर्णैर्दोषाणां दुष्टं तद्घ्नैरुपाचरेत्|१२७|
🔊 Audio coming soon
যস্মাত্ পুরুষস্য শুক্রমপ্যত্র কারণং গর্ভে, গর্ভশ্চাপেক্ষিতঃ, তস্মাচ্ছুক্রস্যাপি পরীক্ষাপূর্বিকাং চিকিত্সামাহ- পঞ্চকর্মেত্যাদি| ইন্দ্রিযমিতি শুক্রম্| পরীক্ষণাদ্দোষাণাং বাতাদীনাং বর্ণৈর্যদি দুষ্টং ভবতি তদা বাতাদিবর্ণযোগাদ্বাতাদিহরৈর্ভেষজৈরুপাচরেদিত্যর্থঃ||১২৬||-
Adhikarana 33 (127-132) · Śloka 132
ভবন্তি চাত্র- সলিঙ্গা ব্যাপদো যোনেঃ সনিদানচিকিত্সিতাঃ||১২৭|| উক্তা বিস্তরতঃ সম্যঙ্মুনিনা তত্ত্বদর্শিনা| পুনরেবাগ্নিবেশস্তু পপ্রচ্ছ ভিষজাং বরম্||১২৮|| আত্রেযমুপসঙ্গম্য শুক্রদোষাস্ত্বযাঽনঘ!| রোগাধ্যাযে সমুদ্দিষ্টা হ্যষ্টৌ পুংসামশেষতঃ||১২৯|| তেষাং হেতুং ভিষক্শ্রেষ্ঠ! দুষ্টাদুষ্টস্য চাকৃতিম্| চিকিত্সিতং চ কার্ত্স্ন্যেন ক্লৈব্যং যচ্চ চতুর্বিধম্||১৩০|| উপদ্রবেষু যোনীনাং প্রদরো যশ্চ কীর্তিতঃ| তেষাং নিদানং লিঙ্গং চ চিকিত্সাং চৈব তত্ত্বতঃ||১৩১|| সমাসব্যাসভেদেন প্রব্রূহি ভিষজাংবর!| তস্মৈ শুশ্রূষমাণায প্রোবাচ মুনিপুঙ্গবঃ||১৩২||
भवन्ति चात्र- सलिङ्गा व्यापदो योनेः सनिदानचिकित्सिताः||१२७|| उक्ता विस्तरतः सम्यङ्मुनिना तत्त्वदर्शिना| पुनरेवाग्निवेशस्तु पप्रच्छ भिषजां वरम्||१२८|| आत्रेयमुपसङ्गम्य शुक्रदोषास्त्वयाऽनघ!| रोगाध्याये समुद्दिष्टा ह्यष्टौ पुंसामशेषतः||१२९|| तेषां हेतुं भिषक्श्रेष्ठ! दुष्टादुष्टस्य चाकृतिम्| चिकित्सितं च कार्त्स्न्येन क्लैब्यं यच्च चतुर्विधम्||१३०|| उपद्रवेषु योनीनां प्रदरो यश्च कीर्तितः| तेषां निदानं लिङ्गं च चिकित्सां चैव तत्त्वतः||१३१|| समासव्यासभेदेन प्रब्रूहि भिषजांवर!| तस्मै शुश्रूषमाणाय प्रोवाच मुनिपुङ्गवः||१३२||
🔊 Audio coming soon
অত্রান্তরে ‘পুনরেব’ ইত্যাদিগ্রন্থং শুক্রদোষাদিলক্ষণচিকিত্সাভিধাযকং কেচিত্ পঠন্তি; তচ্চান্যে অনার্ষং বদন্তি, উপপত্তিং চ বর্ণযন্তি যত্- শুক্রদোষা বাজীকরণেনৈব চিকিত্সিতাঃ, ক্লৈব্যং চ শারীরে এব প্রতিপাদিতম্, অতঃ পুনর্নাভিধানমর্হতি, প্রদরশ্চৈবেহ যোনিব্যাপত্তৌ চিকিত্সিত ইতি; যে তু পঠন্তি তে পূর্বোক্তসঙ্ক্ষেপস্য বিস্তরাভিধানমেতদিতি বর্ণযন্তি| এবমস্যার্ষত্ববিবাদেঽপি কাশ্মীরাদিদেশানুমতত্বাত্ কিঞ্চিদ্ ব্যাকরণং কুর্ম এব||১২৭-১৩২||
Adhikarana 34 (133-138) · Śloka 139
বীজং যস্মাদ্ব্যবাযে তু হর্ষযোনিসমুত্থিতম্| শুক্রং পৌরুষমিত্যুক্তং তস্মাদ্বক্ষ্যামি তচ্ছৃণু||১৩৩|| যথা বীজমকালাম্বুকৃমিকীটাগ্নিদূষিতম্| ন বিরোহতি সন্দুষ্টং তথা শুক্রং শরীরিণাম্||১৩৪|| অতিব্যবাযাদ্ব্যাযামাদসাত্ম্যানাং চ সেবনাত্| অকালে বাঽপ্যযোনৌ বা মৈথুনং ন চ গচ্ছতঃ||১৩৫|| রূক্ষতিক্তকষাযাতিলবণাম্লোষ্ণসেবনাত্| নারীণামরসজ্ঞানাং গমনাজ্জরযা তথা||১৩৬|| চিন্তাশোকাদবিস্রম্ভাচ্ছস্ত্রক্ষারাগ্নিবিভ্রমাত্| ভযাত্ক্রোধাদভীচারাদ্ব্যাধিভিঃ কর্শিতস্য চ||১৩৭|| বেগাঘাতাত্ ক্ষতাচ্চাপি ধাতূনাং সম্প্রদূষণাত্| দোষাঃ পৃথক্ সমস্তা বা প্রাপ্য রেতোবহাঃ সিরাঃ||১৩৮|| শুক্রং সন্দূষযন্ত্যাশু ...|১৩৯|
बीजं यस्माद्व्यवाये तु हर्षयोनिसमुत्थितम्| शुक्रं पौरुषमित्युक्तं तस्माद्वक्ष्यामि तच्छृणु||१३३|| यथा बीजमकालाम्बुकृमिकीटाग्निदूषितम्| न विरोहति सन्दुष्टं तथा शुक्रं शरीरिणाम्||१३४|| अतिव्यवायाद्व्यायामादसात्म्यानां च सेवनात्| अकाले वाऽप्ययोनौ वा मैथुनं न च गच्छतः||१३५|| रूक्षतिक्तकषायातिलवणाम्लोष्णसेवनात्| नारीणामरसज्ञानां गमनाज्जरया तथा||१३६|| चिन्ताशोकादविस्रम्भाच्छस्त्रक्षाराग्निविभ्रमात्| भयात्क्रोधादभीचाराद्व्याधिभिः कर्शितस्य च||१३७|| वेगाघातात् क्षताच्चापि धातूनां सम्प्रदूषणात्| दोषाः पृथक् समस्ता वा प्राप्य रेतोवहाः सिराः||१३८|| शुक्रं सन्दूषयन्त्याशु ...|१३९|
🔊 Audio coming soon
শুক্রগুণোপবর্ণনে হেতুমাহ- বীজং যস্মাদিত্যাদি| যস্মাদ্বীজভূতং গর্ভস্য শুক্রং তস্মাদ্বক্ষ্যামি| ব্যবাযেষু হর্ষ এব যোনিঃ কারণং তস্মাদুত্থিতম্| পৌরুষমিতি পুরুষচিহ্নং, শুক্রেণৈব হি পুরুষো ব্যজ্যতে| মৈথুনং ন চ গচ্ছত ইতি উচিতমৈথুনকালে মৈথুনাগমনং শুক্রবেগপ্রতীঘাতাদেব দর্শযতি| অবিস্রম্ভাদিতি অবিশ্বাসাত্||১৩৩-১৩৮||-
Adhikarana 35 (139-145) · Śloka 146
... তদ্বক্ষ্যামি বিভাগশঃ| ফেনিলং তনু রূক্ষং চ বিবর্ণং পূতি পিচ্ছিলম্||১৩৯|| অন্যধাতূপসংসৃষ্টমবসাদি তথাঽষ্টমম্| ফেনিলং তনু রূক্ষং চ কৃচ্ছ্রেণাল্পং চ মারুতাত্||১৪০|| ভবত্যুপহতং শুক্রং ন তদ্গর্ভায কল্পতে| সনীলমথবা পীতমত্যুষ্ণং পূতিগন্ধি চ||১৪১|| দহল্লিঙ্গং বিনির্যাতি শুক্রং পিত্তেন দূষিতম্| শ্লেষ্মণা বদ্ধমার্গং তু ভবত্যত্যর্থপিচ্ছিলম্||১৪২|| স্ত্রীণামত্যর্থগমনাদভিঘাতাত্ ক্ষতাদপি| শুক্রং প্রবর্ততে জন্তোঃ প্রাযেণ রুধিরান্বযম্||১৪৩|| বেগসন্ধারণাচ্ছুক্রং বাযুনা বিহতং পথি| কৃচ্ছ্রেণ যাতি গ্রথিতমবসাদি তথাঽঽষ্টমম্||১৪৪|| ইতি দোষাঃ সমাখ্যাতাঃ শুক্রস্যাষ্টৌ সলক্ষণাঃ| স্নিগ্ধং ঘনং পিচ্ছিলং চ মধুরং চাবিদাহি চ||১৪৫|| রেতঃ শুদ্ধং বিজানীযাচ্ছ্বেতং স্ফটিকসন্নিভম্|১৪৬|
... तद्वक्ष्यामि विभागशः| फेनिलं तनु रूक्षं च विवर्णं पूति पिच्छिलम्||१३९|| अन्यधातूपसंसृष्टमवसादि तथाऽष्टमम्| फेनिलं तनु रूक्षं च कृच्छ्रेणाल्पं च मारुतात्||१४०|| भवत्युपहतं शुक्रं न तद्गर्भाय कल्पते| सनीलमथवा पीतमत्युष्णं पूतिगन्धि च||१४१|| दहल्लिङ्गं विनिर्याति शुक्रं पित्तेन दूषितम्| श्लेष्मणा बद्धमार्गं तु भवत्यत्यर्थपिच्छिलम्||१४२|| स्त्रीणामत्यर्थगमनादभिघातात् क्षतादपि| शुक्रं प्रवर्तते जन्तोः प्रायेण रुधिरान्वयम्||१४३|| वेगसन्धारणाच्छुक्रं वायुना विहतं पथि| कृच्छ्रेण याति ग्रथितमवसादि तथाऽऽष्टमम्||१४४|| इति दोषाः समाख्याताः शुक्रस्याष्टौ सलक्षणाः| स्निग्धं घनं पिच्छिलं च मधुरं चाविदाहि च||१४५|| रेतः शुद्धं विजानीयाच्छ्वेतं स्फटिकसन्निभम्|१४६|
🔊 Audio coming soon
বক্ষ্যামীতি দুষ্টং শুক্রং বক্ষ্যামি রুধিরান্বযমিতি রুধিরযুক্তম্| শুক্রাভিধানপ্রসঙ্গাদ্বিশুদ্ধশুক্রলক্ষণমাহ- স্নিগ্ধমিত্যাদি||১৩৯-১৪৫||-
Adhikarana 36 (146-152) · Śloka 153
বাজীকরণযোগৈস্তৈরুপযোগসুখৈর্হিতৈঃ||১৪৬|| রক্তপিত্তহরৈর্যোগৈর্যোনিব্যাপদিকৈস্তথা| দুষ্টং যদা ভবেচ্ছুক্রং তদা তত্ সমুপাচরেত্||১৪৭|| ঘৃতং চ জীবনীযং যচ্চ্যবনপ্রাশ এব চ| গিরিজস্য প্রযোগশ্চ রেতোদোষানপোহতি||১৪৮|| বাতান্বিতে হিতাঃ শুক্রে নিরূহাঃ সানুবাসনাঃ| অভযামলকীযং চ পৈত্তে শস্তং রসাযনম্ ||১৪৯|| মাগধ্যমৃতলোহানাং ত্রিফলাযা রসাযনম্| কফোত্থিতং শুক্রদোষং হন্যাদ্ভল্লাতকস্য চ||১৫০|| যদন্যধাতুসংসৃষ্টং শুক্রং তদ্বীক্ষ্য যুক্তিতঃ| যথাদোষং প্রযুঞ্জীত দোষধাতুভিষগ্জিতম্||১৫১|| সর্পিঃ পযো রসাঃ শালির্যবগোধূমষষ্টিকাঃ| প্রশস্তাঃ শুক্রদোষেষু বস্তিকর্ম বিশেষতঃ||১৫২|| ইত্যষ্টশুক্রদোষাণাং মুনিনোক্তং চিকিত্সিতম্|১৫৩|
वाजीकरणयोगैस्तैरुपयोगसुखैर्हितैः||१४६|| रक्तपित्तहरैर्योगैर्योनिव्यापदिकैस्तथा| दुष्टं यदा भवेच्छुक्रं तदा तत् समुपाचरेत्||१४७|| घृतं च जीवनीयं यच्च्यवनप्राश एव च| गिरिजस्य प्रयोगश्च रेतोदोषानपोहति||१४८|| वातान्विते हिताः शुक्रे निरूहाः सानुवासनाः| अभयामलकीयं च पैत्ते शस्तं रसायनम् ||१४९|| मागध्यमृतलोहानां त्रिफलाया रसायनम्| कफोत्थितं शुक्रदोषं हन्याद्भल्लातकस्य च||१५०|| यदन्यधातुसंसृष्टं शुक्रं तद्वीक्ष्य युक्तितः| यथादोषं प्रयुञ्जीत दोषधातुभिषग्जितम्||१५१|| सर्पिः पयो रसाः शालिर्यवगोधूमषष्टिकाः| प्रशस्ताः शुक्रदोषेषु बस्तिकर्म विशेषतः||१५२|| इत्यष्टशुक्रदोषाणां मुनिनोक्तं चिकित्सितम्|१५३|
🔊 Audio coming soon
মাগধ্যমৃতেত্যাদৌ অমৃতা আমলকী| ভল্লাতকস্যেত্যত্র রসাযনমিতি অনুবর্ততে||১৪৬-১৫২||-
Adhikarana 37 (153) · Śloka 154
রেতোদোষোদ্ভবং ক্লৈব্যং যস্মাচ্ছুদ্ধ্যৈব সিধ্যতি||১৫৩|| ততো বক্ষ্যামি তে সম্যগগ্নিবেশ! যথাতথম্|১৫৪|
रेतोदोषोद्भवं क्लैब्यं यस्माच्छुद्ध्यैव सिध्यति||१५३|| ततो वक्ष्यामि ते सम्यगग्निवेश! यथातथम्|१५४|
🔊 Audio coming soon
শুদ্ধ্যৈবেতি রেতঃশুদ্ধ্যৈব; সিদ্ধ্যতি প্রশাম্যতি||১৫৩||-
Adhikarana 38 (154-157) · Śloka 157
বীজধ্বজোপঘাতাভ্যাং জরযা শুক্রসঙ্ক্ষযাত্||১৫৪|| ক্লৈব্যং সম্পদ্যতে তস্য শৃণু সামান্যলক্ষণম্| সঙ্কল্পপ্রবণো নিত্যং প্রিযাং বশ্যামপি স্ত্রিযম্||১৫৫|| ন যাতি লিঙ্গশৈথিল্যাত্ কদাচিদ্যাতি বা যদি| শ্বাসার্তঃ স্বিন্নগাত্রশ্চ মোঘসঙ্কল্পচেষ্টিতঃ||১৫৬|| ম্লানশিশ্নশ্চ নির্বীজঃ স্যাদেতত্ ক্লৈব্যলক্ষণম্| সামান্যলক্ষণং হ্যেতদ্বিস্তরেণ প্রবক্ষ্যতে||১৫৭||
बीजध्वजोपघाताभ्यां जरया शुक्रसङ्क्षयात्||१५४|| क्लैब्यं सम्पद्यते तस्य शृणु सामान्यलक्षणम्| सङ्कल्पप्रवणो नित्यं प्रियां वश्यामपि स्त्रियम्||१५५|| न याति लिङ्गशैथिल्यात् कदाचिद्याति वा यदि| श्वासार्तः स्विन्नगात्रश्च मोघसङ्कल्पचेष्टितः||१५६|| म्लानशिश्नश्च निर्बीजः स्यादेतत् क्लैब्यलक्षणम्| सामान्यलक्षणं ह्येतद्विस्तरेण प्रवक्ष्यते||१५७||
🔊 Audio coming soon
সঙ্কল্পেত্যাদৌ লিঙ্গশৈথিল্যাদিতি লিঙ্গানুত্থানাত্| মোঘে নিষ্ফলে সঙ্কল্পচেষ্টিতে যস্য সঃ||১৫৪-১৫৭||
Adhikarana 39 (158-161) · Śloka 163
শীতরূক্ষাল্পসঙ্ক্লিষ্টবিরুদ্ধাজীর্ণভোজনাত্ | শোকচিন্তাভযত্রাসাত্ স্ত্রীণাং চাত্যর্থসেবনাত্||১৫৮|| অভিচারাদবিস্রম্ভাদ্রসাদীনাং চ সঙ্ক্ষযাত্| বাতাদীনাং চ বৈষম্যাত্তথৈবানশনাচ্ছ্রমাত্||১৫৯|| নারীণামরসজ্ঞত্বাত্ পঞ্চকর্মাপচারতঃ| বীজোপঘাতাদ্ভবতি পাণ্ডুবর্ণঃ সুদুর্বলঃ||১৬০|| অল্পপ্রাণোঽল্পহর্ষশ্চ প্রমদাসু ভবেন্নরঃ| হৃত্পাণ্ডুরোগতমককামলাশ্রমপীডিতঃ||১৬১|| ছর্দ্যতীসারশূলার্তঃ কাসজ্বরনিপীডিতঃ| বীজোপঘাতজং ক্লৈব্যং ...|১৬৩|
शीतरूक्षाल्पसङ्क्लिष्टविरुद्धाजीर्णभोजनात् | शोकचिन्ताभयत्रासात् स्त्रीणां चात्यर्थसेवनात्||१५८|| अभिचारादविस्रम्भाद्रसादीनां च सङ्क्षयात्| वातादीनां च वैषम्यात्तथैवानशनाच्छ्रमात्||१५९|| नारीणामरसज्ञत्वात् पञ्चकर्मापचारतः| बीजोपघाताद्भवति पाण्डुवर्णः सुदुर्बलः||१६०|| अल्पप्राणोऽल्पहर्षश्च प्रमदासु भवेन्नरः| हृत्पाण्डुरोगतमककामलाश्रमपीडितः||१६१|| छर्द्यतीसारशूलार्तः कासज्वरनिपीडितः| बीजोपघातजं क्लैब्यं ...|१६३|
🔊 Audio coming soon
বাযোঃ ক্ষযাদ্ বীজক্ষযানুপপত্তেঃ বাতাদীনাং চ সঙ্ক্ষযাদিত্যত্র প্রাকৃতবাতাদিক্ষযে শরীরবৈগুণ্যাদেব শুক্রানুত্পাদো জ্ঞেযঃ||১৫৮-১৬১||-
Adhikarana 40 (162-175) · Śloka 176
... ধ্বজভঙ্গকৃতং শৃণু||১৬২|| অত্যম্ললবণক্ষারবিরুদ্ধাসাত্ম্যভোজনাত্| অত্যম্বুপানাদ্বিষমাত্ পিষ্টান্নগুরুভোজনাত্||১৬৩|| দধিক্ষীরানূপমাংসসেবনাদ্ব্যাধিকর্ষণাত্| কন্যানাং চৈব গমনাদযোনিগমনাদপি||১৬৪|| দীর্ঘরোগাং চিরোত্সৃষ্টাং তথৈব চ রজস্বলাম্| দুর্গন্ধাং দুষ্টযোনিং চ তথৈব চ পরিস্রুতাম্ ||১৬৫|| ঈদৃশীং প্রমদাং মোহাদ্যো গচ্ছেত্ কামহর্ষিতঃ| চতুষ্পদাভিগমনাচ্ছেফসশ্চাভিঘাততঃ||১৬৬|| অধাবনাদ্বা মেঢ্রস্য শস্ত্রদন্তনখক্ষতাত্| কাষ্ঠপ্রহারনিষ্পেষাচ্ছূকানাং চাতিসেবনাত্||১৬৭|| রেতসশ্চ প্রতীঘাতাদ্ধ্বজভঙ্গঃ প্রবর্ততে| (ভবন্তি যানি রূপাণি তস্য বক্ষ্যাম্যতঃ পরম্)| শ্বযথুর্বেদনা মেঢ্রে রাগশ্চৈবোপলক্ষ্যতে||১৬৮|| স্ফোটাশ্চ তীব্রা জাযন্তে লিঙ্গপাকো ভবত্যপি| মাংসবৃদ্ধির্ভবেচ্চাস্য ব্রণাঃ ক্ষিপ্রং ভবন্ত্যপি||১৬৯|| পুলাকোদকসঙ্কাশঃ স্রাবঃ শ্যাবারুণপ্রভঃ| বলযীকুরুতে চাপি কঠিনশ্চ পরিগ্রহঃ||১৭০|| জ্বরস্তৃষ্ণা ভ্রমো মূর্চ্ছা চ্ছর্দিশ্চাস্যোপজাযতে| রক্তং কৃষ্ণং স্রবেচ্চাপি নীলমাবিললোহিতম্||১৭১|| অগ্নিনেব চ দগ্ধস্য তীব্রো দাহঃ সবেদনঃ| বস্তৌ বৃষণযোর্বাঽপি সীবন্যাং বঙ্ক্ষণেষু চ||১৭২|| কদাচিত্পিচ্ছিলো বাঽপি পাণ্ডুঃ স্রাবশ্চ জাযতে| শ্বযথুর্জাযতে মন্দঃ স্তিমিতোঽল্পপরিস্রবঃ||১৭৩|| চিরাচ্চ পাকং ব্রজতি শীঘ্রং বাঽথ প্রমুচ্যতে| জাযন্তে ক্রিমযশ্চাপি ক্লিদ্যতে পূতিগন্ধি চ||১৭৪|| বিশীর্যতে মণিশ্চাস্য মেঢ্রং মুষ্কাবথাপি চ| ধ্বজভঙ্গকৃতং ক্লৈব্যমিত্যেতত্ সমুদাহৃতম্||১৭৫|| এতং পঞ্চবিধং কেচিদ্ধ্বজভঙ্গং প্রচক্ষতে|১৭৬|
... ध्वजभङ्गकृतं शृणु||१६२|| अत्यम्ललवणक्षारविरुद्धासात्म्यभोजनात्| अत्यम्बुपानाद्विषमात् पिष्टान्नगुरुभोजनात्||१६३|| दधिक्षीरानूपमांससेवनाद्व्याधिकर्षणात्| कन्यानां चैव गमनादयोनिगमनादपि||१६४|| दीर्घरोगां चिरोत्सृष्टां तथैव च रजस्वलाम्| दुर्गन्धां दुष्टयोनिं च तथैव च परिस्रुताम् ||१६५|| ईदृशीं प्रमदां मोहाद्यो गच्छेत् कामहर्षितः| चतुष्पदाभिगमनाच्छेफसश्चाभिघाततः||१६६|| अधावनाद्वा मेढ्रस्य शस्त्रदन्तनखक्षतात्| काष्ठप्रहारनिष्पेषाच्छूकानां चातिसेवनात्||१६७|| रेतसश्च प्रतीघाताद्ध्वजभङ्गः प्रवर्तते| (भवन्ति यानि रूपाणि तस्य वक्ष्याम्यतः परम्)| श्वयथुर्वेदना मेढ्रे रागश्चैवोपलक्ष्यते||१६८|| स्फोटाश्च तीव्रा जायन्ते लिङ्गपाको भवत्यपि| मांसवृद्धिर्भवेच्चास्य व्रणाः क्षिप्रं भवन्त्यपि||१६९|| पुलाकोदकसङ्काशः स्रावः श्यावारुणप्रभः| वलयीकुरुते चापि कठिनश्च परिग्रहः||१७०|| ज्वरस्तृष्णा भ्रमो मूर्च्छा च्छर्दिश्चास्योपजायते| रक्तं कृष्णं स्रवेच्चापि नीलमाविललोहितम्||१७१|| अग्निनेव च दग्धस्य तीव्रो दाहः सवेदनः| बस्तौ वृषणयोर्वाऽपि सीवन्यां वङ्क्षणेषु च||१७२|| कदाचित्पिच्छिलो वाऽपि पाण्डुः स्रावश्च जायते| श्वयथुर्जायते मन्दः स्तिमितोऽल्पपरिस्रवः||१७३|| चिराच्च पाकं व्रजति शीघ्रं वाऽथ प्रमुच्यते| जायन्ते क्रिमयश्चापि क्लिद्यते पूतिगन्धि च||१७४|| विशीर्यते मणिश्चास्य मेढ्रं मुष्कावथापि च| ध्वजभङ्गकृतं क्लैब्यमित्येतत् समुदाहृतम्||१७५|| एतं पञ्चविधं केचिद्ध्वजभङ्गं प्रचक्षते|१७६|
🔊 Audio coming soon
শূকানাং চাতিসেবনাদিতি লিঙ্গাতিবৃদ্ধ্যর্থং কৃতশূকাতিযোগাত্| এতং পঞ্চবিধং কেচিদ্ ধ্বজভঙ্গং বদন্তি; তথোক্তেন বাতপিত্তকফরক্তসন্নিপাতভেদেন পঞ্চবিধত্বমিত্যর্থঃ| তত্র শ্বযথুর্বেদনা মেঢ্রে ইত্যাদি বাতেন, স্ফোটাশ্চেত্যাদি পিত্তেন, মাংসবৃদ্ধিরিত্যাদি কফেন, জ্বরস্তৃষ্ণেত্যাদি রক্তেন, অগ্নিনেবেত্যাদি সন্নিপাতেন||১৬২-১৭৫||-
Adhikarana 41 (176-180) · Śloka 181
ক্লৈব্যং জরাসম্ভবং হি প্রবক্ষ্যাম্যথ তচ্ছৃণু||১৭৬|| জঘন্যমধ্যপ্রবরং বযস্ত্রিবিধমুচ্যতে| অতিপ্রবযসাং শুক্রং প্রাযশঃ ক্ষীযতে নৃণাম্||১৭৭|| রসাদীনাং সঙ্ক্ষযাচ্চ তথৈবাবৃষ্যসেবনাত্| বলবীর্যেন্দ্রিযাণাং চ ক্রমেণৈব পরিক্ষযাত্||১৭৮|| পরিক্ষযাদাযুষশ্চাপ্যনাহারাচ্ছ্রমাত্ ক্লমাত্| জরাসম্ভবজং ক্লৈব্যমিত্যেতৈর্হেতুভির্নৃণাম্||১৭৯|| জাযতে তেন সোঽত্যর্থং ক্ষীণধাতুঃ সুদুর্বলঃ| বিবর্ণো দুর্বলো দীনঃ ক্ষিপ্রং ব্যাধিমথাশ্নুতে||১৮০|| এতজ্জরাসম্ভবং হি ...|১৮১|
क्लैब्यं जरासम्भवं हि प्रवक्ष्याम्यथ तच्छृणु||१७६|| जघन्यमध्यप्रवरं वयस्त्रिविधमुच्यते| अतिप्रवयसां शुक्रं प्रायशः क्षीयते नृणाम्||१७७|| रसादीनां सङ्क्षयाच्च तथैवावृष्यसेवनात्| बलवीर्येन्द्रियाणां च क्रमेणैव परिक्षयात्||१७८|| परिक्षयादायुषश्चाप्यनाहाराच्छ्रमात् क्लमात्| जरासम्भवजं क्लैब्यमित्येतैर्हेतुभिर्नृणाम्||१७९|| जायते तेन सोऽत्यर्थं क्षीणधातुः सुदुर्बलः| विवर्णो दुर्बलो दीनः क्षिप्रं व्याधिमथाश्नुते||१८०|| एतज्जरासम्भवं हि ...|१८१|
🔊 Audio coming soon
জঘন্যেত্যাদৌ প্রবরং বয ইতি বার্ধক্যম্| প্রাযশঃ ক্ষীযত ইতি বচনাত্ কদাচিত্ প্রবযসামপি শুক্রসারাণাং বৃষ্যসেবিনাং চ ন ক্ষীযতে শুক্রমিতি দর্শযতি| প্রবযসাং শুক্রক্ষযে হেতুমাহ- রসাদীনামিত্যাদি| এতে চ রসক্ষযাদযো হেতবো বার্ধক্যস্বভাবাদেব ভবন্তি||১৭৬-১৮০||-
Adhikarana 42 (181-190) · Śloka 191
... চতুর্থং ক্ষযজং শৃণু| অতীব চিন্তনাচ্চৈব শোকাত্ক্রোধাদ্ভযাত্তথা||১৮১|| ঈর্ষ্যোত্কণ্ঠামদোদ্বেগান্ সদা বিশতি যো নরঃ| কৃশো বা সেবতে রূক্ষমন্নপানং তথৌষধম্||১৮২|| দুর্বলপ্রকৃতিশ্চৈব নিরাহারো ভবেদ্যদি| অসাত্ম্যভোজনাচ্চাপি হৃদযে যো ব্যবস্থিতঃ||১৮৩|| রসঃ প্রধানধাতুর্হি ক্ষীযেতাশু ততো নৃণাম্| রক্তাদযশ্চ ক্ষীযন্তে ধাতবস্তস্য দেহিনঃ||১৮৪|| শুক্রাবসানাস্তেভ্যোঽপি শুক্রং ধাম পরং মতম্| চেতসো বাঽতিহর্ষেণ ব্যবাযং সেবতেঽতি যঃ||১৮৫|| তস্যাশু ক্ষীযতে শুক্রং ততঃ প্রাপ্নোতি সঙ্ক্ষযম্| ঘোরং ব্যাধিমবাপ্নোতি মরণং বা স গচ্ছতি||১৮৬|| শুক্রং তস্মাদ্বিশেষেণ রক্ষ্যমারোগ্যমিচ্ছতা| এবং নিদানলিঙ্গাভ্যামুক্তং ক্লৈব্যং চতুর্বিধম্||১৮৭|| কেচিত্ ক্লৈব্যে ত্বসাধ্যে দ্বে ধ্বজভঙ্গক্ষযোদ্ভবে| বদন্তি শেফসশ্ছেদাদ্বৃষণোত্পাটনেন চ||১৮৮|| মাতাপিত্রোর্বীজদোষাদশুভৈশ্চাকৃতাত্মনঃ| গর্ভস্থস্য যদা দোষাঃ প্রাপ্য রেতোবহাঃসিরাঃ||১৮৯|| শোষযন্ত্যাশু তন্নাশাদ্রেতশ্চাপ্যুপহন্যতে| তত্র সম্পূর্ণসর্বাঙ্গঃ স ভবত্যপুমান্ পুমান্||১৯০|| এতে ত্বসাধ্যা ব্যাখ্যাতাঃ সন্নিপাতসমুচ্ছ্রযাত্|১৯১|
... चतुर्थं क्षयजं शृणु| अतीव चिन्तनाच्चैव शोकात्क्रोधाद्भयात्तथा||१८१|| ईर्ष्योत्कण्ठामदोद्वेगान् सदा विशति यो नरः| कृशो वा सेवते रूक्षमन्नपानं तथौषधम्||१८२|| दुर्बलप्रकृतिश्चैव निराहारो भवेद्यदि| असात्म्यभोजनाच्चापि हृदये यो व्यवस्थितः||१८३|| रसः प्रधानधातुर्हि क्षीयेताशु ततो नृणाम्| रक्तादयश्च क्षीयन्ते धातवस्तस्य देहिनः||१८४|| शुक्रावसानास्तेभ्योऽपि शुक्रं धाम परं मतम्| चेतसो वाऽतिहर्षेण व्यवायं सेवतेऽति यः||१८५|| तस्याशु क्षीयते शुक्रं ततः प्राप्नोति सङ्क्षयम्| घोरं व्याधिमवाप्नोति मरणं वा स गच्छति||१८६|| शुक्रं तस्माद्विशेषेण रक्ष्यमारोग्यमिच्छता| एवं निदानलिङ्गाभ्यामुक्तं क्लैब्यं चतुर्विधम्||१८७|| केचित् क्लैब्ये त्वसाध्ये द्वे ध्वजभङ्गक्षयोद्भवे| वदन्ति शेफसश्छेदाद्वृषणोत्पाटनेन च||१८८|| मातापित्रोर्बीजदोषादशुभैश्चाकृतात्मनः| गर्भस्थस्य यदा दोषाः प्राप्य रेतोवहाःसिराः||१८९|| शोषयन्त्याशु तन्नाशाद्रेतश्चाप्युपहन्यते| तत्र सम्पूर्णसर्वाङ्गः स भवत्यपुमान् पुमान्||१९०|| एते त्वसाध्या व्याख्याताः सन्निपातसमुच्छ्रयात्|१९१|
🔊 Audio coming soon
কেচিদিত্যাদৌ ধ্বজভঙ্গক্ষযোদ্ভবে বক্ষ্যমাণবিশিষ্টধ্বজভঙ্গক্ষযোদ্ভবে, তে চাসাধ্যে| বৃষণোত্পাটনেন চেত্যন্তেন ধ্বজভঙ্গ উক্তঃ, ক্ষযজং তু মাতাপিত্রোরিত্যাদিনোচ্যতে| স পুমান্ স্ত্রীষু পুরুষব্যাপারকরণাসমর্থত্বাদপুমান্ ভবতি||১৮১-১৯০||-
Adhikarana 43 (191-195) · Śloka 195
চিকিত্সিতমতস্তূর্ধ্বং সমাসব্যাসতঃ শৃণু||১৯১|| শুক্রদোষেষু নির্দিষ্টং ভেষজং যন্মযাঽনঘ!| ক্লৈব্যোপশান্তযে কুর্যাত্ ক্ষীণক্ষতহিতং চ যত্||১৯২|| বস্তযঃ ক্ষীরসর্পীংষি বৃষ্যযোগাশ্চ যে মতাঃ| রসাযনপ্রযোগাশ্চ সর্বানেতান্ প্রযোজযেত্||১৯৩|| সমীক্ষ্য দেহদোষাগ্নিবলং ভেষজকালবিত্| ব্যবাযহেতুজে ক্লৈব্যে তথা ধাতুবিপর্যযাত্ ||১৯৪|| দৈবব্যপাশ্রযং চৈব ভেষজং চাভিচারজে | সমাসেনৈতদুদ্দিষ্টং ভেষজং ক্লৈব্যশান্তযে||১৯৫||
चिकित्सितमतस्तूर्ध्वं समासव्यासतः शृणु||१९१|| शुक्रदोषेषु निर्दिष्टं भेषजं यन्मयाऽनघ!| क्लैब्योपशान्तये कुर्यात् क्षीणक्षतहितं च यत्||१९२|| बस्तयः क्षीरसर्पींषि वृष्ययोगाश्च ये मताः| रसायनप्रयोगाश्च सर्वानेतान् प्रयोजयेत्||१९३|| समीक्ष्य देहदोषाग्निबलं भेषजकालवित्| व्यवायहेतुजे क्लैब्ये तथा धातुविपर्ययात् ||१९४|| दैवव्यपाश्रयं चैव भेषजं चाभिचारजे | समासेनैतदुद्दिष्टं भेषजं क्लैब्यशान्तये||१९५||
🔊 Audio coming soon
ব্যবাযহেতুজে ইতিপদং বীজদোষোত্পন্নসহজব্যুদাসার্থম্| ধাতুবিপর্যযাদিতি দোষবৈষম্যাত্| দৈবব্যপাশ্রযমিত্যাদিনা অভিচারাদিজক্লৈব্যচিকিত্সাং ব্রূতে| অভিচারাদিজং চ ক্লৈব্যং দৈবব্যপাশ্রযচিকিত্সাভিধানাদেব স্বীকর্তব্যম্||১৯১-১৯৫||
Adhikarana 44 (196-203) · Śloka 204
বিস্তরেণ প্রবক্ষ্যামি ক্লৈব্যানাং ভেষজং পুনঃ| সুস্বিন্নস্নিগ্ধগাত্রস্য স্নেহযুক্তং বিরেচনম্||১৯৬|| অন্নাশনং ততঃ কুর্যাদথবাঽঽস্থাপনং পুনঃ| প্রদদ্যান্মতিমান্ বৈদ্যস্ততস্তমনুবাসযেত্||১৯৭|| পলাশৈরণ্ডমুস্তাদ্যৈঃ পশ্চাদাস্থাপযেত্ততঃ| বাজীকরণযোগাশ্চ পূর্বং যে সমুদাহৃতাঃ||১৯৮|| ভিষজা তে প্রযোজ্যাঃ স্যুঃ ক্লৈব্যে বীজোপঘাতজে| ধ্বজভঙ্গকৃতং ক্লৈব্যং জ্ঞাত্বা তস্যাচরেত্ ক্রিযাম্||১৯৯|| প্রদেহান্ পরিষেকাংশ্চ কুর্যাদ্বা রক্তমোক্ষণম্| স্নেহপানং চ কুর্বীত সস্নেহং চ বিরেচনম্||২০০|| অনুবাসং ততঃ কুর্যাদথবাঽঽস্থাপনং পুনঃ| ব্রণবচ্চ ক্রিযাঃ সর্বাস্তত্র কুর্যাদ্বিচক্ষণঃ||২০১|| জরাসম্ভবজে ক্লৈব্যে ক্ষযজে চৈব কারযেত্| স্নেহস্বেদোপপন্নস্য সস্নেহং শোধনং হিতম্||২০২|| ক্ষীরসর্পির্বৃষ্যযোগা বস্তযশ্চৈব যাপনাঃ| রসাযনপ্রযোগাশ্চ তযোর্ভেষজমুচ্যতে||২০৩|| বিস্তরেণৈতদুদ্দিষ্টং ক্লৈব্যানাং ভেষজং মযা|২০৪|
विस्तरेण प्रवक्ष्यामि क्लैब्यानां भेषजं पुनः| सुस्विन्नस्निग्धगात्रस्य स्नेहयुक्तं विरेचनम्||१९६|| अन्नाशनं ततः कुर्यादथवाऽऽस्थापनं पुनः| प्रदद्यान्मतिमान् वैद्यस्ततस्तमनुवासयेत्||१९७|| पलाशैरण्डमुस्ताद्यैः पश्चादास्थापयेत्ततः| वाजीकरणयोगाश्च पूर्वं ये समुदाहृताः||१९८|| भिषजा ते प्रयोज्याः स्युः क्लैब्ये बीजोपघातजे| ध्वजभङ्गकृतं क्लैब्यं ज्ञात्वा तस्याचरेत् क्रियाम्||१९९|| प्रदेहान् परिषेकांश्च कुर्याद्वा रक्तमोक्षणम्| स्नेहपानं च कुर्वीत सस्नेहं च विरेचनम्||२००|| अनुवासं ततः कुर्यादथवाऽऽस्थापनं पुनः| व्रणवच्च क्रियाः सर्वास्तत्र कुर्याद्विचक्षणः||२०१|| जरासम्भवजे क्लैब्ये क्षयजे चैव कारयेत्| स्नेहस्वेदोपपन्नस्य सस्नेहं शोधनं हितम्||२०२|| क्षीरसर्पिर्वृष्ययोगा बस्तयश्चैव यापनाः| रसायनप्रयोगाश्च तयोर्भेषजमुच्यते||२०३|| विस्तरेणैतदुद्दिष्टं क्लैब्यानां भेषजं मया|२०४|
🔊 Audio coming soon
পলাশৈরণ্ডমুস্তাদ্যৈরিতি এরণ্ডপলাশাদ্যৈর্মুস্তাদ্যৈশ্চ ব্যবস্থিতৈরিত্যর্থঃ| তত্রৈরণ্ডপত্রাদিঃ “এরণ্ডমূলপলাশাত্” (সি.অ.১২) ইত্যাদিনা গ্রন্থে বক্ষ্যমাণঃ সিদ্ধৌ, মুস্তাদিশ্চ যাপনাবস্তিঃ| বস্তিদ্বযেঽপ্যত্র বহুবচনং ব্যক্তিসদ্ভাবাপেক্ষযা জ্ঞেযম্||১৯৬-২০৩||-
Adhikarana 45 (204-224) · Śloka 224
যঃ পূর্বমুক্তঃ প্রদরঃ শৃণু হেত্বাদিভিস্তু তম্||২০৪|| যাঽত্যর্থং সেবতে নারী লবণাম্লগুরূণি চ| কটূন্যথ বিদাহীনি স্নিগ্ধানি পিশিতানি চ||২০৫|| গ্রাম্যৌদকানি মেদ্যানি কৃশরাং পাযসং দধি | শুক্তমস্তুসুরাদীনি ভজন্ত্যাঃ কুপিতোঽনিলঃ||২০৬|| রক্তং প্রমাণমুত্ক্রম্য গর্ভাশযগতাঃ সিরাঃ| রজোবহাঃ সমাশ্রিত্য রক্তমাদায তদ্রজঃ||২০৭|| যস্মাদ্বিবর্ধযত্যাশু রসভাবাদ্বিমানতা | তস্মাদসৃগ্দরং প্রাহুরেতত্তন্ত্রবিশারদাঃ||২০৮|| রজঃ প্রদীর্যতে যস্মাত্ প্রদরস্তেন স স্মৃতঃ| সামান্যতঃ সমুদ্দিষ্টং কারণং লিঙ্গমেব চ||২০৯|| চতুর্বিধং ব্যাসতস্তু বাতাদ্যৈঃ সন্নিপাততঃ| অতঃপরং প্রবক্ষ্যামি হেত্বাকৃতিভিষগ্জিতম্||২১০|| রূক্ষাদিভির্মারুতস্তু রক্তমাদায পূর্ববত্| কুপিতঃ প্রদরং কুর্যাল্লক্ষণং তস্য মে শৃণু||২১১|| ফেনিলং তনু রূক্ষং চ শ্যাবং চারুণমেব চ| কিংশুকোদকসঙ্কাশং সরুজং বাঽথ নীরুজম্||২১২|| কটিবঙ্ক্ষণহৃত্পার্শ্বপৃষ্ঠশ্রোণিষু মারুতঃ| কুরুতে বেদনাং তীব্রামেতদ্বাতাত্মকং বিদুঃ||২১৩|| অম্লোষ্ণলবণক্ষারৈঃ পিত্তং প্রকুপিতং যদা| পূর্ববত্ প্রদরং কুর্যাত্ পৈত্তিকং লিঙ্গতঃ শৃণু||২১৪|| সনীলমথবা পীতমত্যুষ্ণমসিতং তথা| নিতান্তরক্তং স্রবতি মুহুর্মুহুরথার্তিমত্||২১৫|| দাহরাগতৃষামোহজ্বরভ্রমসমাযুতম্| অসৃগ্দরং পৈত্তিকং স্যাচ্ছ্লৈষ্মিকং তু প্রবক্ষ্যতে||২১৬|| গুর্বাদিভির্হেতুভিশ্চ পূর্ববত্ কুপিতঃ কফঃ| প্রদরং কুরুতে তস্য লক্ষণং তত্ত্বতঃ শৃণু||২১৭|| পিচ্ছিলং পাণ্ডুবর্ণং চ গুরু স্নিগ্ধং চ শীতলম্| স্রবত্যসৃক্ শ্লেষ্মলং চ ঘনং মন্দরুজাকরম্||২১৮|| ছর্দ্যরোচকহৃল্লাসশ্বাসকাসসমন্বিতম্| (বক্ষ্যতে ক্ষীরদোষাণাং সামান্যমিহ কারণম্||২১৯|| যত্তদেব ত্রিদোষস্য কারণং প্রদরস্য তু)| ত্রিলিঙ্গসংযুতং বিদ্যান্নৈকাবস্থমসৃগ্দরম্||২২০|| নারী ত্বতিপরিক্লিষ্টা যদা প্রক্ষীণশোণিতা| সর্বহেতুসমাচারাদতিবৃদ্ধস্তদাঽনিলঃ||২২১|| রক্তমার্গেণ সৃজতি প্রত্যনীকবলং কফম্| দুর্গন্ধং পিচ্ছিলং পীতং বিদগ্ধং পিত্ততেজসা||২২২|| বসাং মেদশ্চ যাবদ্ধি সমুপাদায বেগবান্| সৃজত্যপত্যমার্গেণ সর্পির্মজ্জবসোপমম্||২২৩|| শশ্বত্ স্রবত্যথাস্রাবং তৃষ্ণাদাহজ্বরান্বিতাম্| ক্ষীণরক্তাং দুর্বলাং স তামসাধ্যাং বিবর্জযেত্||২২৪||
यः पूर्वमुक्तः प्रदरः शृणु हेत्वादिभिस्तु तम्||२०४|| याऽत्यर्थं सेवते नारी लवणाम्लगुरूणि च| कटून्यथ विदाहीनि स्निग्धानि पिशितानि च||२०५|| ग्राम्यौदकानि मेद्यानि कृशरां पायसं दधि | शुक्तमस्तुसुरादीनि भजन्त्याः कुपितोऽनिलः||२०६|| रक्तं प्रमाणमुत्क्रम्य गर्भाशयगताः सिराः| रजोवहाः समाश्रित्य रक्तमादाय तद्रजः||२०७|| यस्माद्विवर्धयत्याशु रसभावाद्विमानता | तस्मादसृग्दरं प्राहुरेतत्तन्त्रविशारदाः||२०८|| रजः प्रदीर्यते यस्मात् प्रदरस्तेन स स्मृतः| सामान्यतः समुद्दिष्टं कारणं लिङ्गमेव च||२०९|| चतुर्विधं व्यासतस्तु वाताद्यैः सन्निपाततः| अतःपरं प्रवक्ष्यामि हेत्वाकृतिभिषग्जितम्||२१०|| रूक्षादिभिर्मारुतस्तु रक्तमादाय पूर्ववत्| कुपितः प्रदरं कुर्याल्लक्षणं तस्य मे शृणु||२११|| फेनिलं तनु रूक्षं च श्यावं चारुणमेव च| किंशुकोदकसङ्काशं सरुजं वाऽथ नीरुजम्||२१२|| कटिवङ्क्षणहृत्पार्श्वपृष्ठश्रोणिषु मारुतः| कुरुते वेदनां तीव्रामेतद्वातात्मकं विदुः||२१३|| अम्लोष्णलवणक्षारैः पित्तं प्रकुपितं यदा| पूर्ववत् प्रदरं कुर्यात् पैत्तिकं लिङ्गतः शृणु||२१४|| सनीलमथवा पीतमत्युष्णमसितं तथा| नितान्तरक्तं स्रवति मुहुर्मुहुरथार्तिमत्||२१५|| दाहरागतृषामोहज्वरभ्रमसमायुतम्| असृग्दरं पैत्तिकं स्याच्छ्लैष्मिकं तु प्रवक्ष्यते||२१६|| गुर्वादिभिर्हेतुभिश्च पूर्ववत् कुपितः कफः| प्रदरं कुरुते तस्य लक्षणं तत्त्वतः शृणु||२१७|| पिच्छिलं पाण्डुवर्णं च गुरु स्निग्धं च शीतलम्| स्रवत्यसृक् श्लेष्मलं च घनं मन्दरुजाकरम्||२१८|| छर्द्यरोचकहृल्लासश्वासकाससमन्वितम्| (वक्ष्यते क्षीरदोषाणां सामान्यमिह कारणम्||२१९|| यत्तदेव त्रिदोषस्य कारणं प्रदरस्य तु)| त्रिलिङ्गसंयुतं विद्यान्नैकावस्थमसृग्दरम्||२२०|| नारी त्वतिपरिक्लिष्टा यदा प्रक्षीणशोणिता| सर्वहेतुसमाचारादतिवृद्धस्तदाऽनिलः||२२१|| रक्तमार्गेण सृजति प्रत्यनीकबलं कफम्| दुर्गन्धं पिच्छिलं पीतं विदग्धं पित्ततेजसा||२२२|| वसां मेदश्च यावद्धि समुपादाय वेगवान्| सृजत्यपत्यमार्गेण सर्पिर्मज्जवसोपमम्||२२३|| शश्वत् स्रवत्यथास्रावं तृष्णादाहज्वरान्विताम्| क्षीणरक्तां दुर्बलां स तामसाध्यां विवर्जयेत्||२२४||
🔊 Audio coming soon
যঃ পূর্বমুক্তঃ প্রদর ইত্যাদৌ উপদ্রবরূপতযা পূর্বমুক্তঃ প্রদর ইতি বদন্তি; কিন্তু রক্তযোনিচিকিত্সিতে অসৃগ্দরসঞ্জ্ঞযৈব রক্তযোনিকথনেন নির্দিষ্টদোষভেদেন চ তত্রৈব রক্তযোনিরসৃগ্দররূপা ব্যাকৃ(হৃ)তা, তেনেহ পুনরসৃগ্দরলক্ষণাভিধানং পূর্বটীকাকৃতামসম্মতম্| ইহ যেঽপ্যমুং গ্রন্থং পঠন্তি, তে তস্যৈবাযং প্রভেদঃ প্রপঞ্চো বাঽভিধীযত ইতি বর্ণযন্তি| বযং তু ভূরিপুস্তকেষ্বেবং পাঠদর্শনাদস্য ব্যাখ্যানং কুর্মঃ| গর্ভাশযগতা ইতি গর্ভাশযসম্বদ্ধাঃ| অসৃগ্দরশব্দব্যুত্পত্তিমাহ- কুপিতোঽনিল ইত্যাদি| রক্তং প্রমাণমুত্ক্রম্য ইতি রক্তং প্রমাণাধিকং কৃত্বা রক্তমাদায তদ্রজো যস্মাদ্বিবর্ধযতি (বৃদ্ধেন রক্তেন যোজযিত্বা রজো বিবর্ধযতি যস্মাত্ ) পবনস্তস্মাদসৃগ্রজোমেলকরূপত্বাদযং ব্যাধিরসৃগ্দর ইত্যুচ্যতে| ‘প্রদীর্যতে ইতি বিস্তারিতো ভবতি’ ইতি প্রদরঃ, ‘অসৃগ্ দীর্যতে যস্মিন্নিতি অসৃগ্দর’ ইত্যেষাঽপি নিরুক্তিরত্র বোদ্ধব্যা| নৈকাবস্থমিতি বাতকৃতনানাবস্থাযুক্তম্| নারী ত্বিত্যাদিনা এতদনুবন্ধকৃতামবস্থামাহ||২০৪-২২৪||
Adhikarana 46 (225-228) · Śloka 228
মাসান্নিষ্পিচ্ছদাহার্তি পঞ্চরাত্রানুবন্ধি চ| নৈবাতিবহু নাত্যল্পমার্তবং শুদ্ধমাদিশেত্||২২৫|| গুঞ্জাফলসবর্ণং চ পদ্মালক্তকসন্নিভম্ | ইন্দ্রগোপকসঙ্কাশমার্তবং শুদ্ধমাদিশেত্||২২৬|| যোনীনাং বাতলাদ্যানাং যদুক্তমিহ ভেষজম্| চতুর্ণাং প্রদরাণাং চ তত্ সর্বং কারযেদ্ভিষক্||২২৭|| রক্তাতিসারিণাং যচ্চ তথা শোণিতপিত্তিনাম্| রক্তার্শসাং চ যত্ প্রোক্তং ভেষজং তচ্চ কারযেত্||২২৮||
मासान्निष्पिच्छदाहार्ति पञ्चरात्रानुबन्धि च| नैवातिबहु नात्यल्पमार्तवं शुद्धमादिशेत्||२२५|| गुञ्जाफलसवर्णं च पद्मालक्तकसन्निभम् | इन्द्रगोपकसङ्काशमार्तवं शुद्धमादिशेत्||२२६|| योनीनां वातलाद्यानां यदुक्तमिह भेषजम्| चतुर्णां प्रदराणां च तत् सर्वं कारयेद्भिषक्||२२७|| रक्तातिसारिणां यच्च तथा शोणितपित्तिनाम्| रक्तार्शसां च यत् प्रोक्तं भेषजं तच्च कारयेत्||२२८||
🔊 Audio coming soon
বিশুদ্ধার্তবস্য বিশুদ্ধার্তবকথনপ্রসঙ্গাল্লক্ষণমাহ- মাসাদিত্যাদি| পঞ্চরাত্রানুবন্ধীতি উদ্ভূততযা পঞ্চরাত্রমনুবধ্নাতীতি পঞ্চরাত্রানুবন্ধি, দ্বাদশরাত্রানুবন্ধিত্বাদার্তবকালস্য; কিংবা দ্বাদশরাত্রপর্যন্তং গর্ভারম্ভকত্বমার্তবস্য নতু প্রবৃত্তিরিতি জ্ঞেযম্| গুঞ্জাফলসবর্ণমিত্যাদিনা বর্ণভেদশ্চার্তবে প্রকৃতিভেদাদেব ভবতি||২২৫-২২৮||
Adhikarana 47 (229-231) · Śloka 231
ধাত্রীস্তনস্তন্যসম্পদুক্তা বিস্তরতঃ পুরা| স্তন্যসঞ্জননং চৈব স্তন্যস্য চ বিশোধনম্||২২৯|| বাতাদিদুষ্টে লিঙ্গং চ ক্ষীণস্য চ চিকিত্সিতম্| তত্সর্বমুক্তং যে ত্বষ্টৌ ক্ষীরদোষাঃ প্রকীর্তিতাঃ||২৩০|| বাতাদিষ্বেব তান্ বিদ্যাচ্ছাস্ত্রচক্ষুর্ভিষক্তমঃ| ত্রিবিধাস্তু যতঃ শিষ্যাস্ততো বক্ষ্যামি বিস্তরম্||২৩১||
धात्रीस्तनस्तन्यसम्पदुक्ता विस्तरतः पुरा| स्तन्यसञ्जननं चैव स्तन्यस्य च विशोधनम्||२२९|| वातादिदुष्टे लिङ्गं च क्षीणस्य च चिकित्सितम्| तत्सर्वमुक्तं ये त्वष्टौ क्षीरदोषाः प्रकीर्तिताः||२३०|| वातादिष्वेव तान् विद्याच्छास्त्रचक्षुर्भिषक्तमः| त्रिविधास्तु यतः शिष्यास्ततो वक्ष्यामि विस्तरम्||२३१||
🔊 Audio coming soon
সম্প্রতি প্রদরং সচিকিত্সিতমভিধায স্ত্রীরোগাভিধানপ্রসঙ্গাদপরমপি স্ত্রীরোগং স্তন্যদোষমভিধিত্সুরাহ- ধাত্রীস্তনস্তন্যেত্যাদি| বাতাদিদুষ্টে ইত্যাদি বাতাদিবিকারেষ্বেবান্তর্নিবিষ্টমিত্যর্থঃ| ত্রিবিধাস্তু যতো শিষ্যাস্ততো বক্ষ্যামীতি ত্রিবিধপ্রভেদেষু শিষ্যেষু মন্দবুদ্ধিশিষ্যাণাং সুখপ্রতিপত্ত্যর্থম্||২২৯-২৩১||
Adhikarana 48 (232-281) · Śloka 282
অজীর্ণাসাত্ম্যবিষমবিরুদ্ধাত্যর্থভোজনাত্| লবণাম্লকটুক্ষারপ্রক্লিন্নানাং চ সেবনাত্||২৩২|| মনঃশরীরসন্তাপাদস্বপ্নান্নিশি চিন্তনাত্| প্রাপ্তবেগপ্রতীঘাতাদপ্রাপ্তোদীরণেন চ||২৩৩|| পরমান্নং গুডকৃতং কৃশরাং দধি মন্দকম্ | অভিষ্যন্দীনি মাংসানি গ্রাম্যানূপৌদকানি চ||২৩৪|| ভুক্ত্বা ভুক্ত্বা দিবাস্বপ্নান্মদ্যস্যাতিনিষেবণাত্| অনাযাসাদভীঘাতাত্ ক্রোধাচ্চাতঙ্ককর্শনৈঃ||২৩৫|| দোষাঃ ক্ষীরবহাঃ প্রাপ্য সিরাঃ স্তন্যং প্রদূষ্য চ| কুর্যুরষ্টবিধং ভূযো দোষতস্তন্নিবোধ মে||২৩৬|| বৈরস্যং ফেনসঙ্ঘাতো রৌক্ষ্যং চেত্যনিলাত্মকে| পিত্তাদ্বৈবর্ণ্যদৌর্গন্ধ্যে স্নেহপৈচ্ছিল্যগৌরবম্||২৩৭|| কফাদ্ভবতি রূক্ষাদ্যৈরনিলঃ স্বৈঃ প্রকোপণৈঃ| ক্রুদ্ধঃ ক্ষীরাশযং প্রাপ্য রসং স্তন্যস্য দূষযেত্||২৩৮|| বিরসং বাতসংসৃষ্টং কৃশীভবতি তত্ পিবন্| ন চাস্য স্বদতে ক্ষীরং কৃচ্ছ্রেণ চ বিবর্ধতে||২৩৯|| তথৈব বাযুঃ কুপিতঃ স্তন্যমন্তর্বিলোডযন্| করোতি ফেনসঙ্ঘাতং তত্তু কৃচ্ছ্রাত্ প্রবর্ততে||২৪০|| তেন ক্ষামস্বরো বালো বদ্ধবিণ্মূত্রমারুতঃ| বাতিকং শীর্ষরোগং বা পীনসং বাঽধিগচ্ছতি||২৪১|| পূর্ববত্ কুপিতঃ স্তন্যে স্নেহং শোষযতেঽনিলঃ| রূক্ষং তত্ পিবতো রৌক্ষ্যাদ্বলহ্রাসঃ প্রজাযতে||২৪২|| পিত্তমুষ্ণাদিভিঃ ক্রুদ্ধং স্তন্যাশযমভিপ্লুতম্| করোতি স্তন্যবৈবর্ণ্যং নীলপীতাসিতাদিকম্||২৪৩|| বিবর্ণগাত্রঃ স্বিন্নঃ স্যাত্তৃষ্ণালুর্ভিন্নবিট্ শিশুঃ| নিত্যমুষ্ণশরীরশ্চ নাভিনন্দতি তং স্তনম্||২৪৪|| পূর্ববত্ কুপিতে পিত্তে দৌর্গন্ধ্যং ক্ষীরমৃচ্ছতি| পাণ্ড্বামযস্তত্পিবতঃ কামলা চ ভবেচ্ছিশোঃ||২৪৫|| ক্রুদ্ধো গুর্বাদিভিঃ শ্লেষ্মা ক্ষীরাশযগতঃ স্ত্রিযাঃ| স্নেহান্বিতত্বাত্তত্ক্ষীরমতিস্নিগ্ধং করোতি তু||২৪৬|| ছর্দনঃ কুন্থনস্তেন লালালুর্জাযতে শিশুঃ| নিত্যোপদিগ্ধৈঃ স্রোতোভির্নিদ্রাক্লমসমন্বিতঃ ||২৪৭|| শ্বাসকাসপরীতস্তু প্রসেকতমকান্বিতঃ| অভিভূয কফঃ স্তন্যং পিচ্ছিলং কুরুতে যদা||২৪৮|| লালালুঃ শূনবক্ত্রাক্ষির্জডঃ স্যাত্তত্ পিবঞ্ছিশুঃ| কফঃ ক্ষীরাশযগতো গুরুত্বাত্ ক্ষীরগৌরবম্||২৪৯|| করোতি গুরু তত্ পীত্বা বালো হৃদ্রোগমৃচ্ছতি| অন্যাংশ্চ বিবিধাত্রোগান্কুর্যাত্ক্ষীরসমাশ্রিতান্||২৫০|| ক্ষীরে বাতাদিভির্দুষ্টে সম্ভবন্তি তদাত্মকাঃ| তত্রাদৌ স্তন্যশুদ্ধ্যর্থং ধাত্রীং স্নেহোপপাদিতাম্||২৫১|| সংস্বেদ্য বিধিবদ্বৈদ্যো বমনেনোপপাদযেত্| বচাপ্রিযঙ্গুযষ্ট্যাহ্বফলবত্সকসর্ষপৈঃ||২৫২|| কল্কৈর্নিম্বপটোলানাং ক্বাথৈঃ সলবণৈর্বমেত্| সম্যগ্বান্তাং যথান্যাযং কৃতসংসর্জনাং ততঃ||২৫৩|| দোষকালবলাপেক্ষী স্নেহযিত্বা বিরেচযেত্| ত্রিবৃতামভযাং বাঽপি ত্রিফলারসসংযুতাম্||২৫৪|| পাযযেন্মধুসংযুক্তামভযাং বাঽপি কেবলাম্| (পাযযেন্মূত্রসংযুক্তাং বিরেকার্থং চ শাস্ত্রবিত্ )||২৫৫|| সম্যগ্বিরিক্তাং মতিমান্ কৃতসংসর্জনাং পুনঃ| ততো দোষাবশেষঘ্নৈরন্নপানৈরুপাচরেত্ ||২৫৬|| শালযঃ ষষ্টিকা বা স্যুঃ শ্যামাকা ভোজনে হিতাঃ| প্রিযঙ্গবঃ কোরদূষা যবা বেণুযবাস্তথা||২৫৭|| বংশবেত্রকলাযাশ্চ শাকার্থে স্নেহসংস্কৃতাঃ| মুদ্গান্ মসূরান্ যূষার্থে কুলত্থাংশ্চ প্রকল্পযেত্||২৫৮|| নিম্ববেত্রাগ্রকুলকবার্তাকামলকৈঃ শৃতান্| সব্যোষসৈন্ধবান্ যূষান্দাপযেত্স্তন্যশোধনান্||২৫৯|| শশান্ কপিঞ্জলানেণান্ সংস্কৃতাংশ্চ প্রদাপযেত্| শার্ঙ্গেষ্টাসপ্তপর্ণত্বগশ্বগন্ধাশৃতং জলম্||২৬০|| পাযযেতাথবা স্তন্যশুদ্ধযে রোহিণীশৃতম্| অমৃতাসপ্তপর্ণত্বক্ক্বাথং চৈব সনাগরম্||২৬১|| কিরাততিক্তকক্বাথং শ্লোকপাদেরিতান্ পিবেত্| ত্রীনেতান্স্তন্যশুদ্ধ্যর্থমিতি সামান্যভেষজম্||২৬২|| কীর্তিতং স্তন্যদোষাণাং পৃথগন্যং নিবোধত| পাযযেদ্বিরসক্ষীরাং দ্রাক্ষামধুকসারিবাঃ||২৬৩|| শ্লক্ষ্ণপিষ্টাং পযস্যাং চ সমালোড্য সুখাম্বুনা| পঞ্চকোলকুলত্থৈশ্চ পিষ্টৈরালেপযেত্ স্তনৌ||২৬৪|| শুষ্কৌ প্রক্ষাল্য নির্দুহ্যাত্তথা স্তন্যং বিশুধ্যতি| ফেনসঙ্ঘাতবত্ক্ষীরং যস্যাস্তাং পাযযেত্ স্ত্রিযম্||২৬৫|| পাঠানাগরশার্ঙ্গেষ্টামূর্বাঃ পিষ্ট্বা সুখাম্বুনা| অঞ্জনং নাগরং দারু বিল্বমূলং প্রিযঙ্গবঃ||২৬৬|| স্তনযোঃ পূর্ববত্ কার্যং লেপনং ক্ষীরশোধনম্| কিরাততিক্তকং শুণ্ঠীং সামৃতাং ক্বাথযেদ্ভিষক্||২৬৭|| তং ক্বাথং পাযযেদ্ধাত্রীং স্তন্যদোষনিবর্হণম্| স্তনৌ চালেপযেত্ পিষ্টৈর্যবগোধূমসর্ষপৈঃ||২৬৮|| ষড্বিরেকাশ্রিতীযোক্তৈরৌষধৈঃ স্তন্যশোধনৈঃ| রূক্ষক্ষীরা পিবেত্ ক্ষীরং তৈর্বা সিদ্ধং ঘৃতং পিবেত্||২৬৯|| পূর্ববজ্জীবকাদ্যং চ পঞ্চমূলং প্রলেপনম্| স্তনযোঃ সংবিধাতব্যং সুখোষ্ণং স্তন্যশোধনম্||২৭০|| যষ্টীমধুকমৃদ্বীকাপযস্যাসিন্ধুবারিকাঃ| শীতাম্বুনা পিবেত্কল্কং ক্ষীরবৈবর্ণ্যনাশনম্||২৭১|| দ্রাক্ষামধুককল্কেন স্তনৌ চাস্যাঃ প্রলেপযেত্| প্রক্ষাল্য বারিণা চৈব নির্দুহ্যাত্তৌ পুনঃ পুনঃ||২৭২|| বিষাণিকাজশৃঙ্গ্যৌ চ ত্রিফলাং রজনীং বচাম্| পিবেচ্ছীতাম্বুনা পিষ্ট্বা ক্ষীরদৌর্গন্ধ্যনাশিনীম্||২৭৩|| লিহ্যাদ্বাঽপ্যভযাচূর্ণং সব্যোষং মাক্ষিকপ্লুতম্| ক্ষীরদৌর্গন্ধ্যনাশার্থং ধাত্রী পথ্যাশিনী তথা||২৭৪|| সারিবোশীরমঞ্জিষ্ঠাশ্লেষ্মাতককুচন্দনৈঃ| পত্রাম্বুচন্দনোশীরৈঃ স্তনৌ চাস্যাঃ প্রলেপযেত্||২৭৫|| স্নিগ্ধক্ষীরা দারুমুস্তপাঠাঃ পিষ্ট্বা সুখাম্বুনা| পীত্বা সসৈন্ধবাঃ ক্ষিপ্রং ক্ষীরশুদ্ধিমবাপ্নুযাত্||২৭৬|| পাযযেত্ পিচ্ছিলক্ষীরাং শার্ঙ্গেষ্টামভযাং বচাম্| মুস্তনাগরপাঠাশ্চ পীতাঃ স্তন্যবিশোধনাঃ||২৭৭|| তক্রারিষ্টং পিবেচ্চাপি যদুক্তং গুদজাপহম্| বিদারীবিল্বমধুকৈঃ স্তনৌ চাস্যাঃ প্রলেপযেত্||২৭৮|| ত্রাযমাণামৃতানিম্বপটোলত্রিফলাশৃতম্| গুরুক্ষীরা পিবেদাশু স্তন্যদোষবিশুদ্ধযে||২৭৯|| পিবেদ্বা পিপ্পলীমূলচব্যচিত্রকনাগরম্| বলানাগরশার্ঙ্গেষ্টামূর্বাভির্লেপযেত্ স্তনৌ||২৮০|| পৃশ্নিপর্ণীপযস্যাভ্যাং স্তনৌ চাস্যাঃ প্রলেপযেত্| অষ্টাবেতে ক্ষীরদোষা হেতুলক্ষণভেষজৈঃ||২৮১|| নির্দিষ্টাঃ ক্ষীরদোষোত্থাস্তথোক্তাঃ কেচিদামযাঃ|২৮২|
अजीर्णासात्म्यविषमविरुद्धात्यर्थभोजनात्| लवणाम्लकटुक्षारप्रक्लिन्नानां च सेवनात्||२३२|| मनःशरीरसन्तापादस्वप्नान्निशि चिन्तनात्| प्राप्तवेगप्रतीघातादप्राप्तोदीरणेन च||२३३|| परमान्नं गुडकृतं कृशरां दधि मन्दकम् | अभिष्यन्दीनि मांसानि ग्राम्यानूपौदकानि च||२३४|| भुक्त्वा भुक्त्वा दिवास्वप्नान्मद्यस्यातिनिषेवणात्| अनायासादभीघातात् क्रोधाच्चातङ्ककर्शनैः||२३५|| दोषाः क्षीरवहाः प्राप्य सिराः स्तन्यं प्रदूष्य च| कुर्युरष्टविधं भूयो दोषतस्तन्निबोध मे||२३६|| वैरस्यं फेनसङ्घातो रौक्ष्यं चेत्यनिलात्मके| पित्ताद्वैवर्ण्यदौर्गन्ध्ये स्नेहपैच्छिल्यगौरवम्||२३७|| कफाद्भवति रूक्षाद्यैरनिलः स्वैः प्रकोपणैः| क्रुद्धः क्षीराशयं प्राप्य रसं स्तन्यस्य दूषयेत्||२३८|| विरसं वातसंसृष्टं कृशीभवति तत् पिबन्| न चास्य स्वदते क्षीरं कृच्छ्रेण च विवर्धते||२३९|| तथैव वायुः कुपितः स्तन्यमन्तर्विलोडयन्| करोति फेनसङ्घातं तत्तु कृच्छ्रात् प्रवर्तते||२४०|| तेन क्षामस्वरो बालो बद्धविण्मूत्रमारुतः| वातिकं शीर्षरोगं वा पीनसं वाऽधिगच्छति||२४१|| पूर्ववत् कुपितः स्तन्ये स्नेहं शोषयतेऽनिलः| रूक्षं तत् पिबतो रौक्ष्याद्बलह्रासः प्रजायते||२४२|| पित्तमुष्णादिभिः क्रुद्धं स्तन्याशयमभिप्लुतम्| करोति स्तन्यवैवर्ण्यं नीलपीतासितादिकम्||२४३|| विवर्णगात्रः स्विन्नः स्यात्तृष्णालुर्भिन्नविट् शिशुः| नित्यमुष्णशरीरश्च नाभिनन्दति तं स्तनम्||२४४|| पूर्ववत् कुपिते पित्ते दौर्गन्ध्यं क्षीरमृच्छति| पाण्ड्वामयस्तत्पिबतः कामला च भवेच्छिशोः||२४५|| क्रुद्धो गुर्वादिभिः श्लेष्मा क्षीराशयगतः स्त्रियाः| स्नेहान्वितत्वात्तत्क्षीरमतिस्निग्धं करोति तु||२४६|| छर्दनः कुन्थनस्तेन लालालुर्जायते शिशुः| नित्योपदिग्धैः स्रोतोभिर्निद्राक्लमसमन्वितः ||२४७|| श्वासकासपरीतस्तु प्रसेकतमकान्वितः| अभिभूय कफः स्तन्यं पिच्छिलं कुरुते यदा||२४८|| लालालुः शूनवक्त्राक्षिर्जडः स्यात्तत् पिबञ्छिशुः| कफः क्षीराशयगतो गुरुत्वात् क्षीरगौरवम्||२४९|| करोति गुरु तत् पीत्वा बालो हृद्रोगमृच्छति| अन्यांश्च विविधात्रोगान्कुर्यात्क्षीरसमाश्रितान्||२५०|| क्षीरे वातादिभिर्दुष्टे सम्भवन्ति तदात्मकाः| तत्रादौ स्तन्यशुद्ध्यर्थं धात्रीं स्नेहोपपादिताम्||२५१|| संस्वेद्य विधिवद्वैद्यो वमनेनोपपादयेत्| वचाप्रियङ्गुयष्ट्याह्वफलवत्सकसर्षपैः||२५२|| कल्कैर्निम्बपटोलानां क्वाथैः सलवणैर्वमेत्| सम्यग्वान्तां यथान्यायं कृतसंसर्जनां ततः||२५३|| दोषकालबलापेक्षी स्नेहयित्वा विरेचयेत्| त्रिवृतामभयां वाऽपि त्रिफलारससंयुताम्||२५४|| पाययेन्मधुसंयुक्तामभयां वाऽपि केवलाम्| (पाययेन्मूत्रसंयुक्तां विरेकार्थं च शास्त्रवित् )||२५५|| सम्यग्विरिक्तां मतिमान् कृतसंसर्जनां पुनः| ततो दोषावशेषघ्नैरन्नपानैरुपाचरेत् ||२५६|| शालयः षष्टिका वा स्युः श्यामाका भोजने हिताः| प्रियङ्गवः कोरदूषा यवा वेणुयवास्तथा||२५७|| वंशवेत्रकलायाश्च शाकार्थे स्नेहसंस्कृताः| मुद्गान् मसूरान् यूषार्थे कुलत्थांश्च प्रकल्पयेत्||२५८|| निम्बवेत्राग्रकुलकवार्ताकामलकैः शृतान्| सव्योषसैन्धवान् यूषान्दापयेत्स्तन्यशोधनान्||२५९|| शशान् कपिञ्जलानेणान् संस्कृतांश्च प्रदापयेत्| शार्ङ्गेष्टासप्तपर्णत्वगश्वगन्धाशृतं जलम्||२६०|| पाययेताथवा स्तन्यशुद्धये रोहिणीशृतम्| अमृतासप्तपर्णत्वक्क्वाथं चैव सनागरम्||२६१|| किराततिक्तकक्वाथं श्लोकपादेरितान् पिबेत्| त्रीनेतान्स्तन्यशुद्ध्यर्थमिति सामान्यभेषजम्||२६२|| कीर्तितं स्तन्यदोषाणां पृथगन्यं निबोधत| पाययेद्विरसक्षीरां द्राक्षामधुकसारिवाः||२६३|| श्लक्ष्णपिष्टां पयस्यां च समालोड्य सुखाम्बुना| पञ्चकोलकुलत्थैश्च पिष्टैरालेपयेत् स्तनौ||२६४|| शुष्कौ प्रक्षाल्य निर्दुह्यात्तथा स्तन्यं विशुध्यति| फेनसङ्घातवत्क्षीरं यस्यास्तां पाययेत् स्त्रियम्||२६५|| पाठानागरशार्ङ्गेष्टामूर्वाः पिष्ट्वा सुखाम्बुना| अञ्जनं नागरं दारु बिल्वमूलं प्रियङ्गवः||२६६|| स्तनयोः पूर्ववत् कार्यं लेपनं क्षीरशोधनम्| किराततिक्तकं शुण्ठीं सामृतां क्वाथयेद्भिषक्||२६७|| तं क्वाथं पाययेद्धात्रीं स्तन्यदोषनिबर्हणम्| स्तनौ चालेपयेत् पिष्टैर्यवगोधूमसर्षपैः||२६८|| षड्विरेकाश्रितीयोक्तैरौषधैः स्तन्यशोधनैः| रूक्षक्षीरा पिबेत् क्षीरं तैर्वा सिद्धं घृतं पिबेत्||२६९|| पूर्ववज्जीवकाद्यं च पञ्चमूलं प्रलेपनम्| स्तनयोः संविधातव्यं सुखोष्णं स्तन्यशोधनम्||२७०|| यष्टीमधुकमृद्वीकापयस्यासिन्धुवारिकाः| शीताम्बुना पिबेत्कल्कं क्षीरवैवर्ण्यनाशनम्||२७१|| द्राक्षामधुककल्केन स्तनौ चास्याः प्रलेपयेत्| प्रक्षाल्य वारिणा चैव निर्दुह्यात्तौ पुनः पुनः||२७२|| विषाणिकाजशृङ्ग्यौ च त्रिफलां रजनीं वचाम्| पिबेच्छीताम्बुना पिष्ट्वा क्षीरदौर्गन्ध्यनाशिनीम्||२७३|| लिह्याद्वाऽप्यभयाचूर्णं सव्योषं माक्षिकप्लुतम्| क्षीरदौर्गन्ध्यनाशार्थं धात्री पथ्याशिनी तथा||२७४|| सारिवोशीरमञ्जिष्ठाश्लेष्मातककुचन्दनैः| पत्राम्बुचन्दनोशीरैः स्तनौ चास्याः प्रलेपयेत्||२७५|| स्निग्धक्षीरा दारुमुस्तपाठाः पिष्ट्वा सुखाम्बुना| पीत्वा ससैन्धवाः क्षिप्रं क्षीरशुद्धिमवाप्नुयात्||२७६|| पाययेत् पिच्छिलक्षीरां शार्ङ्गेष्टामभयां वचाम्| मुस्तनागरपाठाश्च पीताः स्तन्यविशोधनाः||२७७|| तक्रारिष्टं पिबेच्चापि यदुक्तं गुदजापहम्| विदारीबिल्वमधुकैः स्तनौ चास्याः प्रलेपयेत्||२७८|| त्रायमाणामृतानिम्बपटोलत्रिफलाशृतम्| गुरुक्षीरा पिबेदाशु स्तन्यदोषविशुद्धये||२७९|| पिबेद्वा पिप्पलीमूलचव्यचित्रकनागरम्| बलानागरशार्ङ्गेष्टामूर्वाभिर्लेपयेत् स्तनौ||२८०|| पृश्निपर्णीपयस्याभ्यां स्तनौ चास्याः प्रलेपयेत्| अष्टावेते क्षीरदोषा हेतुलक्षणभेषजैः||२८१|| निर्दिष्टाः क्षीरदोषोत्थास्तथोक्ताः केचिदामयाः|२८२|
🔊 Audio coming soon
ক্বাথং চৈব সনাগরমিত্যত্র নাগরকৃত এব ক্বাথো জ্ঞেযঃ| পূর্ববজ্জীবকাদ্যমিত্যত্র জীবকাদ্যং জীবনীযম্||২৩২-২৮১||-
Adhikarana 49 (282-287) · Śloka 287
দোষদূষ্যমলাশ্চৈব মহতাং ব্যাধযশ্চ যে||২৮২|| ত এব সর্বে বালানাং মাত্রা ত্বল্পতরা মতা| নিবৃত্তির্বমনাদীনাং মৃদুত্বং পরতন্ত্রতাম্||২৮৩|| বাক্চেষ্টযোরসামর্থ্যং বীক্ষ্য বালেষু শাস্ত্রবিত্| ভেষজং স্বল্পমাত্রং তু যথাব্যাধি প্রযোজযেত্||২৮৪|| মধুরাণি কষাযাণি ক্ষীরবন্তি মৃদূনি চ| প্রযোজযেদ্ভিষগ্বালে মতিমানপ্রমাদতঃ||২৮৫|| অত্যর্থস্নিগ্ধরূক্ষোষ্ণমম্লং কটুবিপাকি চ| গুরু চৌষধপানান্নমেতদ্বালেষু গর্হিতম্||২৮৬|| সমাসাত্ সর্বরোগাণামেতদ্বালেষু ভেষজম্| নির্দিষ্টং শাস্ত্রবিদ্বৈদ্যঃ প্রবিবিচ্য প্রযোজযেত্||২৮৭||
दोषदूष्यमलाश्चैव महतां व्याधयश्च ये||२८२|| त एव सर्वे बालानां मात्रा त्वल्पतरा मता| निवृत्तिर्वमनादीनां मृदुत्वं परतन्त्रताम्||२८३|| वाक्चेष्टयोरसामर्थ्यं वीक्ष्य बालेषु शास्त्रवित्| भेषजं स्वल्पमात्रं तु यथाव्याधि प्रयोजयेत्||२८४|| मधुराणि कषायाणि क्षीरवन्ति मृदूनि च| प्रयोजयेद्भिषग्बाले मतिमानप्रमादतः||२८५|| अत्यर्थस्निग्धरूक्षोष्णमम्लं कटुविपाकि च| गुरु चौषधपानान्नमेतद्बालेषु गर्हितम्||२८६|| समासात् सर्वरोगाणामेतद्बालेषु भेषजम्| निर्दिष्टं शास्त्रविद्वैद्यः प्रविविच्य प्रयोजयेत्||२८७||
🔊 Audio coming soon
দুষ্টক্ষীরসেবনাদুত্পন্নবালবিকারাণাং স্বরূপং দর্শযিত্বা যথাকর্তব্যং ভেষজমাহ- দোষেত্যাদি| দোষা বাতাদযঃ, দূষ্যাণি রক্তাদীনি, মলাঃ শকৃন্মূত্রস্বেদাদযঃ| এতে দোষাদযো য এব মহতাং ত এব বালানামপি ভবন্তি, কিন্তু বালান্ প্রাপ্য তেষাং দোষাদীনাং মাত্রা ত্বল্পতরেতি বিশেষঃ; তেন দোষাদিমাত্রাপেক্ষা ভেষজমাত্রাঽপ্যল্পা ভবতীতি ভাবঃ| নিবৃত্তির্বমনাদীনামিত্যাদি| দ্বিবিধা বালা ভবন্তি- স্বতন্ত্রবৃত্তযঃ, পরতন্ত্রবৃত্তযশ্চ; তত্র পরতন্ত্রত্বং বালেষু বীক্ষ্য বমনাদীনাং নিবৃত্তিঃ কর্তব্যা, বাক্চেষ্টযোশ্চ বালস্য সামর্থ্যং বীক্ষ্য স্বতন্ত্রতাযাং জাতাযাং বমনাদীনাং মৃদুত্বং শাস্ত্রবিদ্বৈদ্যঃ প্রযোজযেত্, তথা সংশমনমপি ভেষজমল্পমাত্রং যথাব্যাধি বালেষু প্রযোজযেদিতি বাক্যার্থঃ; কিংবা বালেষু মৃদুত্বং পরতন্ত্রতাং চ বীক্ষ্য বমনাদীনাং নিবৃত্তির্বিধাতব্যা, বাক্চেষ্টযোশ্চ বালেষু সামর্থ্যং বীক্ষ্য সংশমনং ভেষজমল্পমাত্রং যথাব্যাধি প্রযোজযেদিতি যোজনীযম্| মধুরাণীত্যাদিনা বালেষু কর্তব্যং ভেষজমাহ| অত্যর্থমিত্যাদি প্রযোজযেদিত্যন্তো গ্রন্থ আর্ষত্বে সবিবাদঃ||২৮২-২৮৭||
Adhikarana 50 (288) · Śloka 288
ভবন্তি চাত্র- ইতি সর্ববিকারাণামুক্তমেতচ্চিকিত্সিতম্| স্থানমেতদ্ধি তন্ত্রস্য রহস্যং পরমুত্তমম্ ||২৮৮||
भवन्ति चात्र- इति सर्वविकाराणामुक्तमेतच्चिकित्सितम्| स्थानमेतद्धि तन्त्रस्य रहस्यं परमुत्तमम् ||२८८||
🔊 Audio coming soon
ইতি সর্ববিকারাণামিত্যাদিনা চিকিত্সাস্থানোক্তমর্থমুপসঙ্গৃহ্ণাতি| সর্ববিকারাণামিতি বচনেন অনুক্তানামপি বিকারাণামেতচ্চিকিত্সাবীজসূত্রমিতি দর্শযতি| রহস্যমিতি অত্যন্তোপযুক্তচিকিত্সাভিধাযকতযা গোপ্যং, ন কস্মৈচিত্ পাপিষ্ঠায প্রকাশনীযমিতি||২৮৮||
Adhikarana 51 (289-290) · Śloka 290
অস্মিন্ সপ্তদশাধ্যাযাঃ কল্পাঃ সিদ্ধয এব চ| নাসাদ্যন্তেঽগ্নিবেশস্য তন্ত্রে চরকসংস্কৃতে||২৮৯|| তানেতান্ কাপিলবলিঃ শেষান্ দৃঢবলোঽকরোত্| তন্ত্রস্যাস্য মহার্থস্য পূরণার্থং যথাতথম্||২৯০||
अस्मिन् सप्तदशाध्यायाः कल्पाः सिद्धय एव च| नासाद्यन्तेऽग्निवेशस्य तन्त्रे चरकसंस्कृते||२८९|| तानेतान् कापिलबलिः शेषान् दृढबलोऽकरोत्| तन्त्रस्यास्य महार्थस्य पूरणार्थं यथातथम्||२९०||
🔊 Audio coming soon
সম্প্রতি দৃঢবলঃ স্বকীযসংস্কারবিষযং দর্শযন্নাহ- অস্মিন্নিত্যাদি| সপ্তদশাধ্যাযা ইতি চিকিত্সাস্থানে সপ্তদশাধ্যাযাঃ; তে চ চরকসংস্কৃতান্ যক্ষ্মচিকিত্সিতান্তানষ্টাবধ্যাযান্, তথাঽর্শোঽতীসারবিসর্পদ্বিব্রণীযমদাত্যযোক্তান্ বিহায জ্ঞেযাঃ| (পরিশিষ্টসংস্কারস্যাদৃষ্টাতিশযসম্পাদ্যত্বাদাত্মনোঽদৃষ্টাতিশযমেব দর্শযন্নাহ- তচ্ছঙ্করমিত্যাদি )||২৮৯-২৯০||
Adhikarana 52 (291) · Śloka 291
রোগা যেঽপ্যত্র নোদ্দিষ্টা বহুত্বান্নামরূপতঃ| তেষামপ্যেতদেব স্যাদ্দোষাদীন্ বীক্ষ্য ভেষজম্||২৯১||
रोगा येऽप्यत्र नोद्दिष्टा बहुत्वान्नामरूपतः| तेषामप्येतदेव स्याद्दोषादीन् वीक्ष्य भेषजम्||२९१||
🔊 Audio coming soon
সম্প্রতি উক্তানুক্তরোগচিকিত্সাতিদেশার্থমাহ- রোগা যেঽপ্যত্রেত্যাদি| এতদেবেত্যাদি এতচ্চিকিত্সাস্থানাদ্যুক্তং ভেষজম্; এতদেব হি ভেষজং নামরূপাদিনা বিশেষেণানুক্তানাং সামান্যতশ্চ বাতাদিজন্যতযোক্তান্ রোগানপেক্ষ্য তথাযুক্তং সদ্ ভেষজং ভবতীত্যর্থঃ| দোষাদীনিতি দোষদূষ্যনিদানান্যগ্রে বক্ষ্যমাণানি; কিংবা দোষ-ভেষজ-দেশ-কাল-বল-শরীরাহার-সাত্ম্য-সত্ত্ব-প্রকৃতি-বযাংসি সূত্রস্থানোক্তানি||২৯১||
Adhikarana 53 (292) · Śloka 292
দোষদূষ্যনিদানানাং বিপরীতং হিতং ধ্রুবম্| উক্তানুক্তান্ গদান্ সর্বান্ সম্যগ্যুক্তং নিযচ্ছতি||২৯২||
दोषदूष्यनिदानानां विपरीतं हितं ध्रुवम्| उक्तानुक्तान् गदान् सर्वान् सम्यग्युक्तं नियच्छति||२९२||
🔊 Audio coming soon
অথ কথমেতদ্ভেষজমনুক্তানাং গদানাং ভেষজং ভবতীত্যাহ- দোষদূষ্যেত্যাদি| দোষা বাতাদযঃ, দূষ্যাণি রক্তাদীনি, নিদানানি রূক্ষাদীনি, এষাং ব্যস্তানাং সমস্তানাং বা যদ্ বিপরীতং, হিতমিতি ভেষজং, তত্ সম্যগ্যুক্তং সদুক্তানুক্তান্ গদান্ ধ্রুবং নিযচ্ছতি; উক্তানিতি নামরূপাদিভিঃ, অনুক্তানিতি নামরূপাদিবিশেষেণানুক্তান্| এতেন যদেবৈতদ্ দোষাদিবিপরীততযা প্রতিপাদিতং ভবতি তদৈবানুক্তানামপি গদানাং দোষাদীন্ বুদ্ধ্বা সম্যগ্যুক্তং ভেষজং ভবতীতি দর্শযতি| যদ্যপি চ যন্নিদানবিপরীতং ভেষজং তদ্দোষবিপরীতেনৈব গ্রহীতুং পার্যতে, যতো নিদানেন দোষপ্রকোপঃ ক্রিযতে, তস্য চ দোষস্য বিপরীতং যথা রূক্ষনিদানবৃদ্ধে বাযৌ রূক্ষে যো বিপরীতঃ স্নেহঃ স নিদানেঽপি বিপরীত এব; তথাঽপি দোষস্যৈবাংশবৈপরীত্যেন ভেষজপ্রযোগোপদর্শনার্থং নিদানবিপরীতোপাদানমিহ| যথা- যদি বাযুঃ সর্বাত্মনা প্রকুপিতস্তদা তস্য বাযোর্যদ্বিপরীতং তৈলং তত্ কর্তব্যং, যদা তু শীতেন বাযুর্বৃদ্ধস্তদা সর্বাত্মনা বিরুদ্ধং তৈলমুত্সৃজ্য যদেব শীতত্বে হিতং তস্যৈব শীতগুণস্য প্রশমার্থং হেতুবিপরীতমুষ্ণং ভেষজং প্রযুজ্যতে| অত এবোক্তং- “শীতেনোষ্ণকৃতান্ রোগাঞ্ শমযন্তি ভিষগ্বিদঃ” (বি.অ.৩) ইত্যাদি| ইহ তু দোষাদীনাং গ্রহণাদ্ দোষদূষ্যসমুদাযাত্মা ব্যাধিরপি লভ্যতে, তেন ব্যাধিবিপরীতমপি ভেষজমবরুদ্ধম্| বিপরীতশব্দেন চেহ প্রতিকূলমুচ্যতে, ন বিপরীতগুণমাত্রং; তেন বিপর্যস্তার্থকারিণামপি ভেষজানাং গ্রহণং ভবতি| যত্তু সমানমেব ক্ষীণানাং দোষাণাং ধাতূনাং বা ভেষজং ভবতি তদ্ দোষাদিক্ষযব্যাধিবৃদ্ধিজনকতযা বিপরীতমেব, যেন তত্র ন দোষাদযঃ প্রতিকর্তব্যাঃ কিন্তু তত্ক্ষযাঃ, তেন ক্ষযে দোষাদিবিপরীতং সম্যগ্যুক্তং সদ্দোষাদীন্ নিযচ্ছতীত্যুক্তং, ততো দোষাদিসমানমেব বিপরীতমিতি ন কশ্চিদ্দোষঃ||২৯২||
Adhikarana 54 (293) · Śloka 293
দেশকালপ্রমাণানাং সাত্ম্যাসাত্ম্যস্য চৈব হি| সম্যগ্যোগোঽন্যথা হ্যেষাং পথ্যমপ্যন্যথা ভবেত্||২৯৩||
देशकालप्रमाणानां सात्म्यासात्म्यस्य चैव हि| सम्यग्योगोऽन्यथा ह्येषां पथ्यमप्यन्यथा भवेत्||२९३||
🔊 Audio coming soon
অথ যেন সম্যগ্যোগেন যুক্তং ভেষজং কার্যকরং ভবতি তমেব সম্যগ্যোগমাহ- দেশকালেত্যাদি| এষাং তু দেশাদিযোগানামুদাহরণান্যাচার্যেণৈব কৃতানি ‘আস্যাদামাশযস্থান্’ ইত্যাদিনা ‘নাতিদোষং চ বহ্বপি’ ইত্যন্তেন| তত্র দেশ আতুররূপ এবোক্তঃ, ভূমিরূপদেশাপেক্ষা তু যোজনা সাত্ম্যাপেক্ষযোজনাভিধানেনৈব গৃহীতা| কালঃ ষড্বিধো দিনাতুরৌষধাদিভিঃ| তত্রৌষধকালো দশবিধঃ| প্রমাণমৌষধস্য ত্রিবিধম্- অল্পং, বহু, সমং চ| সাত্ম্যং দ্বিবিধং দেশশরীরযোঃ; ব্যাধিসাত্ম্যং ত্বৌষধান্তর্নিবিষ্টমেব; ঋতুসাত্ম্যং চ কালগৃহীতং; প্রমাণসাত্ম্যগ্রহণং সম্যগ্যোগেনৈব কৃতম্| অসাত্ম্যং যত্ সাত্ম্যবিপরীতম্| সম্যগ্যোগঃ যথাবত্প্রযোগঃ| বিপর্যযে দোষমাহ- অন্যথা হ্যেষাং পথ্যমপ্যন্যথা ভবেত্; এষাং দেশাদীনাম্, অন্যথেতি অসম্যগ্যোগে, পথ্যমপীতি ভেষজং দোষাদিপরীতমপি, অন্যথেতি অপথ্যং ভবতি| যানি চাপরাণি বলসত্ত্বাদীনি দশবিধদোষাদ্যন্তর্গতানি পরীক্ষ্যাণি নেহোক্তানি তানি দোষাদিষ্বন্তর্ভাবনীযানি||২৯৩||
Adhikarana 55 (294-295) · Śloka 295
আস্যাদামাশযস্থান্ হি রোগান্ নস্তঃশিরোগতান্| গুদাত্ পক্বাশযস্থাংশ্চ হন্ত্যাশু দত্তমৌষধম্||২৯৪|| শরীরাবযবোত্থেষু বিসর্পপিডকাদিষু| যথাদেশং প্রদেহাদি শমনং স্যাদ্বিশেষতঃ||২৯৫||
आस्यादामाशयस्थान् हि रोगान् नस्तःशिरोगतान्| गुदात् पक्वाशयस्थांश्च हन्त्याशु दत्तमौषधम्||२९४|| शरीरावयवोत्थेषु विसर्पपिडकादिषु| यथादेशं प्रदेहादि शमनं स्याद्विशेषतः||२९५||
🔊 Audio coming soon
শরীরাপেক্ষসম্যগ্যোগোদাহরণমাহ- আস্যাদিত্যাদি| আস্যাদিত্যাদৌ তৃতীযাস্থানে পঞ্চমী; তেনাস্যেন দত্তমৌষধং বমনাদ্যামাশযস্থান্ গদানাশুতরং নিহন্তি| এবং নাসযা দত্তমৌষধং শিরোগতান্ হন্তি| গুদেন দত্তং পক্বাশযস্থান্ হন্তি| বহিঃ পরিসার্জনভেষজপ্রযোগং শরীরদেশাপেক্ষমাহ- শরীরাবযবোত্থেষ্বিত্যাদি| যথাদেশমিতি ব্যাধিদেশে| প্রদেহাদীনি প্রদেহপরিষেকোপনাহাদীনি||২৯৪-২৯৫||
Adhikarana 56 (296-312) · Śloka 312
দিনাতুরৌষধব্যাধিজীর্ণলিঙ্গর্ত্ববেক্ষণম্ | কালং বিদ্যাদ্দিনাবেক্ষঃ পূর্বাহ্ণে বমনং যথা||২৯৬|| রোগ্যবেক্ষো যথা প্রাতর্নিরন্নো বলবান্ পিবেত্| ভেষজং লঘুপথ্যান্নৈর্যুক্তমদ্যাত্তু দুর্বলঃ||২৯৭|| ভৈষজ্যকালো ভুক্তাদৌ মধ্যে পশ্চান্মুহুর্মুহুঃ| সামুদ্গং ভক্তসংযুক্তং গ্রাসগ্রাসান্তরে দশ||২৯৮|| অপানে বিগুণে পূর্বং, সমানে মধ্যভোজনম্| ব্যানে তু প্রাতরশিতমুদানে ভোজনোত্তরম্||২৯৯|| বাযৌ প্রাণে প্রদুষ্টে তু গ্রাসগ্রাসান্তরিষ্যতে| শ্বাসকাসপিপাসাসু ত্ববচার্যং মুহুর্মুহুঃ||৩০০|| সামুদ্গং হিক্কিনে দেযং লঘুনাঽন্নেন সংযুতম্| সম্ভোজ্যং ত্বৌষধং ভোজ্যৈর্বিচিত্রৈররুচৌ হিতম্||৩০১|| জ্বরে পেযাঃ কষাযাশ্চ ক্ষীরং সর্পির্বিরেচনম্| ষডহে ষডহে দেযং কালং বীক্ষ্যামযস্য চ||৩০২|| ক্ষুদ্বেগমোক্ষৌ লঘুতা বিশুদ্ধির্জীর্ণলক্ষণম্| তদা ভেষজমাদেযং স্যাদ্ধি দোষবদন্যথা||৩০৩|| চযাদযশ্চ দোষাণাং বর্জ্যং সেব্যং চ যত্র যত্| ঋতাববেক্ষ্যং যত্ কর্ম পূর্বং সর্বমুদাহৃতম্||৩০৪|| (উপক্রমাণাং করণং প্রতিষেধে চ কারণম্| ব্যাখ্যাতমবলানাং সবিকল্পানামবেক্ষণে||৩০৫|| মুহুর্মুহুশ্চ রোগাণামবস্থামাতুরস্য চ| অবেক্ষমাণস্তু ভিষক্ চিকিত্সাযাং ন মুহ্যতি)||৩০৬|| ইত্যেবং ষড্বিধং কালমনবেক্ষ্য ভিষগ্জিতম্| প্রযুক্তমহিতায স্যাত্ সস্যস্যাকালবর্ষবত্||৩০৭|| ব্যাধীনামৃত্বহোরাত্রবযসাং ভোজনস্য চ| বিশেষো ভিদ্যতে যস্তু কালাবেক্ষঃ স উচ্যতে||৩০৮|| বসন্তে শ্লেষ্মজা রোগাঃ শরত্কালে তু পিত্তজাঃ| বর্ষাসু বাতিকাশ্চৈব প্রাযঃ প্রাদুর্ভবন্তি হি||৩০৯|| নিশান্তে দিবসান্তে চ বর্ষান্তে বাতজা গদাঃ| প্রাতঃ ক্ষপাদৌ কফজাস্তযোর্মধ্যে তু পিত্তজাঃ||৩১০|| বযোন্তমধ্যপ্রথমে বাতপিত্তকফামযাঃ| বলবন্তো ভবন্ত্যেব স্বভাবাদ্বযসো নৃণাম্||৩১১|| জীর্ণান্তে বাতজা রোগা জীর্যমাণে তু পিত্তজাঃ| শ্লেষ্মজা ভুক্তমাত্রে তু লভন্তে প্রাযশো বলম্||৩১২||
दिनातुरौषधव्याधिजीर्णलिङ्गर्त्ववेक्षणम् | कालं विद्याद्दिनावेक्षः पूर्वाह्णे वमनं यथा||२९६|| रोग्यवेक्षो यथा प्रातर्निरन्नो बलवान् पिबेत्| भेषजं लघुपथ्यान्नैर्युक्तमद्यात्तु दुर्बलः||२९७|| भैषज्यकालो भुक्तादौ मध्ये पश्चान्मुहुर्मुहुः| सामुद्गं भक्तसंयुक्तं ग्रासग्रासान्तरे दश||२९८|| अपाने विगुणे पूर्वं, समाने मध्यभोजनम्| व्याने तु प्रातरशितमुदाने भोजनोत्तरम्||२९९|| वायौ प्राणे प्रदुष्टे तु ग्रासग्रासान्तरिष्यते| श्वासकासपिपासासु त्ववचार्यं मुहुर्मुहुः||३००|| सामुद्गं हिक्किने देयं लघुनाऽन्नेन संयुतम्| सम्भोज्यं त्वौषधं भोज्यैर्विचित्रैररुचौ हितम्||३०१|| ज्वरे पेयाः कषायाश्च क्षीरं सर्पिर्विरेचनम्| षडहे षडहे देयं कालं वीक्ष्यामयस्य च||३०२|| क्षुद्वेगमोक्षौ लघुता विशुद्धिर्जीर्णलक्षणम्| तदा भेषजमादेयं स्याद्धि दोषवदन्यथा||३०३|| चयादयश्च दोषाणां वर्ज्यं सेव्यं च यत्र यत्| ऋताववेक्ष्यं यत् कर्म पूर्वं सर्वमुदाहृतम्||३०४|| (उपक्रमाणां करणं प्रतिषेधे च कारणम्| व्याख्यातमबलानां सविकल्पानामवेक्षणे||३०५|| मुहुर्मुहुश्च रोगाणामवस्थामातुरस्य च| अवेक्षमाणस्तु भिषक् चिकित्सायां न मुह्यति)||३०६|| इत्येवं षड्विधं कालमनवेक्ष्य भिषग्जितम्| प्रयुक्तमहिताय स्यात् सस्यस्याकालवर्षवत्||३०७|| व्याधीनामृत्वहोरात्रवयसां भोजनस्य च| विशेषो भिद्यते यस्तु कालावेक्षः स उच्यते||३०८|| वसन्ते श्लेष्मजा रोगाः शरत्काले तु पित्तजाः| वर्षासु वातिकाश्चैव प्रायः प्रादुर्भवन्ति हि||३०९|| निशान्ते दिवसान्ते च वर्षान्ते वातजा गदाः| प्रातः क्षपादौ कफजास्तयोर्मध्ये तु पित्तजाः||३१०|| वयोन्तमध्यप्रथमे वातपित्तकफामयाः| बलवन्तो भवन्त्येव स्वभावाद्वयसो नृणाम्||३११|| जीर्णान्ते वातजा रोगा जीर्यमाणे तु पित्तजाः| श्लेष्मजा भुक्तमात्रे तु लभन्ते प्रायशो बलम्||३१२||
🔊 Audio coming soon
দেশমনু কালাপেক্ষসম্যগ্যোগোদাহরণানি কালবিভাগপূর্বকমাহ- দিনাতুরৌষধেত্যাদি| দিনাদিভিরবেক্ষণশব্দঃ সম্বধ্যতে; অবেক্ষণম্ অবেক্ষা| অত্র দিনাবেক্ষাদিকালান্ ক্রমাদুদাহরতি- দিনাবেক্ষ ইত্যাদি| রোগ্যবেক্ষ ইতি রোগিণো বিশেষং বলবত্ত্বমবলবত্ত্বং চাবেক্ষ্য ভবতীত্যর্থঃ| নিরন্ন ইতি ঔষধমুপযুজ্যাপি উপক্ষণমভুঞ্জানঃ| ঔষধাবেক্ষানগদকালানাহ- ভৈষজ্যকালা ইত্যাদি| অত্র ভুক্তাদাবিত্যনেন কালদ্বযমুচ্যতে; যথা প্রাতরেব নিরন্নং, তথা প্রাগ্ভোজনং চ| তথা পশ্চাদিত্যনেন চ কালদ্বযমেব প্রাতর্ভোজনোত্তরকালং, অপরং তু সাযং ভোজনোত্তরকালম্| মধ্যেভুক্তং তু যদর্ধং ভুক্ত্বোপযুজ্যতে, পশ্চাত্ পুনরর্ধং ভুজ্যতে| মুহুর্মুহুর্ভুক্তং নাম যদ্ভোজনসমযে প্রতিক্ষণং ভুজ্যতে| সামুদ্গং নাম যদ্ভক্তস্যাদাবন্তে চ ভুজ্যতে, তত্সমুদ্গবদাহারাবরণাত্ ‘সামুদ্গং’ ইত্যভিধীযতে| ভুক্তমিতি পদং ভুক্তাদাবিত্যাদিভিঃ প্রত্যেকং সম্বধ্যতে| অন্তরাভক্তং নাম যদন্নেন সংযোগাত্ সংস্কারাদ্বা তদ্বিমিশ্রিতং ভুজ্যতে| গ্রাসগ্রাসান্তরং তু ভুক্তং নাম যদ্ গ্রাসানাং মধ্যেষু ভুজ্যতে| অন্যে তু ‘গ্রাসগ্রাসান্তরে’ ইতি পঠন্তি, একং চ ভেষজকালং বদন্তি; ভুক্তমিতিপদেন চ ভেষজকালান্তরমভিধায দশৌষধকালপূরণং কুর্বন্তি| অত এব ‘বাযৌ প্রাণে প্রদুষ্টে তু গ্রাসগ্রাসান্তরিষ্যতে’ ইতি বচনেন চাচার্যেণৈক এব কাল উক্তঃ| তত্র গ্রাসস্য গ্রাসান্তরমধ্যে যদৌষধং তদ্ গ্রাসগ্রাসান্তরমুচ্যতে| ভুক্তমিত্যস্য লক্ষণং- ভুক্তং লঘুনাঽন্নেন সংযুতমিতি; লঘুনা পেযাদিনা অন্নেন সংযুতং যদ্ভুজ্যতে তদ্ভুক্তমুচ্যতে| সম্ভোজ্যং ত্বৌষধৈরিত্যাদিনা তু যদৌষধসংস্কৃতমন্নমুপযুজ্যতে অলঘু লঘু বা তত্ সম্ভুক্তশব্দেনোচ্যতে| যে তু ‘গ্রাসে গ্রাসান্তরে’ ইতি পঠন্তি, তে প্রাণে প্রদুষ্টে গ্রাসে গ্রাসান্তরে বা ভেষজোপযোগেন কালদ্বযং বর্ণযন্তি, লঘুনাঽন্নেন সংযুতমিতিপদং সম্ভোজ্যমিত্যস্যৈব বিশেষণং বর্ণযন্তি; ভুক্তমিতি তু পদং বিবরণগ্রন্থেঽপি সর্বাত্মকালোপযোজনীযভেষজবিশেষণমিতি ব্যাখ্যানযন্তি| এবং ব্যবস্থিতে ‘অপানে বিগুণে’ ইত্যাদিভেষজকালবিবরণং ব্যক্তমেবেতি ন পুনর্ব্যাহ্রিযতে| এতে চ কালা যদ্যপি রোগবিশেষবিষযতযা বিহিতাঃ, তথাঽপি ভেষজস্যৈবামী বিগুণাপানাদিবিধেযস্য কালা ভবন্তি| অপানবৈগুণ্যাদযস্তু গদা ইহ ভেষজবিষযতযোপাত্তাঃ| তেনাপানে বিগুণে যদৌষধং তস্যাপ্যেতে কালা ইত্যাদিনিবন্ধো বোদ্ধব্যঃ| যস্তু ব্যাধ্যবেক্ষঃ কালঃ স ব্যাধ্যবস্থারূপ ইহ বক্তব্য ইতি বিশেষঃ| ঔষধাবেক্ষং কালমভিধায ব্যাধ্যবেক্ষং কালমাহ- জ্বরে পেযা ইত্যাদি| অত্র চ পেযাকষাযসর্পিঃক্ষীরবিরেচনানামুত্সর্গবিধযা জ্বরাহাদারভ্য ষডহে যথাক্রমং দেযত্বমুচ্যতে| ষডহাতিক্রমে পেযাদানং ন বিরোধমাবহতি, সামান্যবিধের্বিরোধবিধিনা বাধনস্য সর্বত্রৈবানুমতত্বাত্| তেন লঙ্ঘিতস্য কষাযষডহে পেযাদানং যত্ প্রসজ্যতে “লঙ্ঘিতং বমিতং কালে যবাগূভিরুপাচরেত্” (চি.অ.৩) ইতি বচনেন, তদপি ন বিরোধি; তস্য চ শ্লোকস্য প্রপঞ্চো জ্বরচিকিত্সিত এব কৃত ইতি নেহ ক্রিযতে| কালং বীক্ষ্যামযস্য ত্বিতি অবস্থারূপং কালং জ্বরলক্ষণস্যামযস্য বীক্ষ্য ষডহে পেযা দেযেত্যর্থঃ| জীর্ণলিঙ্গাপেক্ষং কালমাহ- ক্ষুদ্বেগেত্যাদি| ক্ষুদিতি বুভুক্ষা ভবতি, বেগমোক্ষ ইতি পুরীষাদিনির্গমঃ| লঘুতা বিশুদ্ধিরিতি হৃদযোদ্গারবিশুদ্ধিঃ| জীর্ণলক্ষণমিতি জীর্ণান্নলক্ষণম্| এতচ্চ জীর্ণলক্ষণং যদ্যপি রসবিমানেঽপ্যভিহিতং, তথাঽপীহ কালাবেক্ষযা প্রকরণাগতত্বাদভিধানং ন পুনরুক্তদোষকরম্| তদা ভেষজমাদেযমিতি বচনেন প্রাতর্যদৌষধমনন্নং দীযতে তদ্ভেষজং প্রত্যবমৃশতি, যদন্নোত্তরকালং তদজীর্ণ এব প্রাতরাশে দীযতে; কিংবা ভোজনোত্তরকালমপি যদৌষধং দীযতে তদপি দিনান্তরভুক্তেঽন্নে জীর্ণ এব দীযতে| অন্যথা স্যাদ্ধি দোষবদিত্যত্র কেচিদ্ ‘দ্বিদোষবত্’ ইতি পঠন্তি, তেন জীর্যতি জীর্যমাণে চ দোষদ্বযযুক্তং স্যাদিত্যর্থঃ| ‘স্যাত্তু দোষবদন্যথা’ ইতি পাঠ আকরঃ| ঋতুরূপকালাবেক্ষং সম্যগ্যোগং বিভজতে- চযাদযশ্চেত্যাদি| চযাদয ইতি চযপ্রকোপপ্রশমাঃ| তে চ চযাদযো যথা- কফস্য হেমন্তে চযঃ, প্রকোপো বসন্তে, গ্রীষ্মে প্রশম ইত্যাদিস্বভাবঃ| বর্জ্যং সেব্যং চ ঋতাবুক্তং, তত্রৈব চ গুর্বন্নাদি বর্জ্যমুক্তং, তেন তত্রৈব তজ্জ্ঞেযম্| উপক্রমাণামিত্যাদিকং সার্ধং শ্লোকং কেচিত্ পঠন্তি; তমনার্ষং বদন্তি| উক্তষঙ্বিধকালানবেক্ষপ্রযোগেঽনিষ্টফলং সদৃষ্টান্তমাহ- ইত্যেবমিত্যাদি| যথা সস্যস্যাকালবর্ষেণ পীডা মরণং বা ভবতি, তদ্বদৌষধমপি ষড্বিধমকালানবেক্ষমুপযুক্তং ক্লেশায বিনাশায বা ভবতি| পুনরন্যথা কালাবেক্ষং যোগং দর্শযন্তঃ কেচিত্ পঠন্তি- ব্যাধীনামৃত্বহোরাত্রনিযমাদিশ্লোকচতুষ্টযম্, এতদপি নাতিপ্রসিদ্ধম্||২৯৬-৩১২||
Adhikarana 57 (313-314) · Śloka 314
নাল্পং হন্ত্যৌষধং ব্যাধিং যথাঽঽপোঽল্পা মহানলম্| দোষবচ্চাতিমাত্রং স্যাত্সস্যস্যাত্যুদকং যথা||৩১৩|| সম্প্রধার্য বলং তস্মাদামযস্যৌষধস্য চ| নৈবাতিবহু নাত্যল্পং ভৈষজ্যমবচারযেত্||৩১৪||
नाल्पं हन्त्यौषधं व्याधिं यथाऽऽपोऽल्पा महानलम्| दोषवच्चातिमात्रं स्यात्सस्यस्यात्युदकं यथा||३१३|| सम्प्रधार्य बलं तस्मादामयस्यौषधस्य च| नैवातिबहु नात्यल्पं भैषज्यमवचारयेत्||३१४||
🔊 Audio coming soon
প্রমাণবিশেষাবেক্ষং যোগং দর্শযন্নাহ- নাল্পমিত্যাদি| যদ্যপি চেহ ভেষজস্য প্রমাণং শৃঙ্গগ্রাহিকযা নোক্তং, তথাঽপীহ “দোষপ্রমাণানুরূপো হি ভৈষজ্যপ্রমাণবিকল্পো বলপ্রমাণবিশেষাপেক্ষো ভবতি” (বি.অ.৮) ইত্যাদিনোক্তং মধ্যভেষজপ্রমাণং জ্ঞেযম্||৩১৩-৩১৪||
Adhikarana 58 (315-319) · Śloka 320
ঔচিত্যাদ্যস্য যত্ সাত্ম্যং দেশস্য পুরুষস্য চ| অপথ্যমপি নৈকান্তাত্তত্ত্যজংল্লভতে সুখম্||৩১৫|| বাহ্লীকাঃ পহ্লবাশ্চীনাঃ শূলীকা যবনাঃ শকাঃ| মাংসগোধূমমাধ্বীকশস্ত্রবৈশ্বানরোচিতাঃ||৩১৬|| মত্স্যসাত্ম্যাস্তথা প্রাচ্যাঃ ক্ষীরসাত্ম্যাশ্চ সৈন্ধবাঃ| অশ্মকাবন্তিকানাং তু তৈলাম্লং সাত্ম্যমুচ্যতে||৩১৭|| কন্দমূলফলং সাত্ম্যং বিদ্যান্মলযবাসিনাম্| সাত্ম্যং দক্ষিণতঃ পেযা মন্থশ্চোত্তরপশ্চিমে ||৩১৮|| মধ্যদেশে ভবেত্ সাত্ম্যং যবগোধূমগোরসাঃ| তেষাং তত্সাত্ম্যযুক্তানি ভৈষজান্যবচারযেত্||৩১৯|| সাত্ম্যং হ্যাশু বলং ধত্তে নাতিদোষং চ বহ্বপি|৩২০|
औचित्याद्यस्य यत् सात्म्यं देशस्य पुरुषस्य च| अपथ्यमपि नैकान्तात्तत्त्यजंल्लभते सुखम्||३१५|| बाह्लीकाः पह्लवाश्चीनाः शूलीका यवनाः शकाः| मांसगोधूममाध्वीकशस्त्रवैश्वानरोचिताः||३१६|| मत्स्यसात्म्यास्तथा प्राच्याः क्षीरसात्म्याश्च सैन्धवाः| अश्मकावन्तिकानां तु तैलाम्लं सात्म्यमुच्यते||३१७|| कन्दमूलफलं सात्म्यं विद्यान्मलयवासिनाम्| सात्म्यं दक्षिणतः पेया मन्थश्चोत्तरपश्चिमे ||३१८|| मध्यदेशे भवेत् सात्म्यं यवगोधूमगोरसाः| तेषां तत्सात्म्ययुक्तानि भैषजान्यवचारयेत्||३१९|| सात्म्यं ह्याशु बलं धत्ते नातिदोषं च बह्वपि|३२०|
🔊 Audio coming soon
অথ সাত্ম্যাবেক্ষং সম্যগ্যোগং বিভজন্নাহ- ঔচিত্যাদ্যস্যেত্যাদি| ঔচিত্যাদিতি অভ্যাসাত্, অপথ্যমপি যদ্যস্য পুরুষস্য সাত্ম্যং তদেকান্তাত্ ত্যজন্ ন সুখং লভতে ইতি যোজনা| একান্তাত্ ঝটিতি সর্বথা চ ত্যজন্| এতেনাপথ্যমপি সাত্ম্যমেকান্তাত্ ত্যজতঃ সুখং ন ভবতীতি দর্শযতি; পথ্যস্য সাত্ম্যস্য পরিত্যাগে তু নিতরামেব দুঃখং ভবতীতি দর্শযতি| দেশশব্দেন চেহ দেশবাচিনো জনপদা অভিপ্রেতাঃ| তেন দেশসাত্ম্যশব্দেন তদ্দেশজাতত্বেনৈব পুরুষৈর্যত্ সেব্যতে তত্ সাধারণং সাত্ম্যং গৃহ্যতে| পুরুষসাত্ম্যগ্রহণেন তু যত্ প্রতিনিযতপুরুষস্যৈবাভ্যাসাত্ সাত্ম্যতাং যাতি তত্ পুরুষপ্রতিনিযতং সাত্ম্যং গৃহ্যতে| যত্তু পূর্বং “দেশানামামযানাং চ বিপরীতগুণং গুণৈঃ| সাত্ম্যমিচ্ছন্তি” (সূ.অ.৬) ইত্যনেন দেশসাত্ম্যমুক্তং, তদ্দেশবিপরীতগুণত্বেন তদ্দেশনিবাসিনাং পুরুষাণাং সাত্ম্যমুক্তম্; ইদং তু দেশবিপরীতগুণং ভবতু মা ভবতু বা, তথাঽপি তদ্দেশনিবাসিনামভ্যাসেন সাত্ম্যং তদিহ সাত্ম্যমুচ্যত ইতি বিশেষঃ| পুরুষসাত্ম্যস্য প্রাযঃ প্রতিপুরুষং ভিন্নত্বেনানিযতত্বাচ্ছৃঙ্গগ্রাহিকযা উদাহরণং ন কৃতম্| তেন দেশাভ্যাসসাত্ম্যানি প্রসিদ্ধান্যুদাহরতি- বাহ্লীকা ইত্যাদি| বৈশ্বানরোচিতা ইতি অত্রোচিতশব্দেনাভ্যাস উচ্যতে| তৈলং চাম্লং চেতি তৈলাম্লম্| দক্ষিণত ইতি দক্ষিণাপথে| উত্তরে চ পশ্চিমে চেতি উত্তরপশ্চিমে| তেষামিত্যত্র তচ্ছব্দেন জনপদাঃ পুরুষাশ্চ গৃহ্যন্তে| তেন তত্সাত্ম্যযুক্তানীতি উক্তদেশসাত্ম্যযুক্তপুরুষসাত্ম্যযুক্তানি| সাত্ম্যোপযোগফলমাহ- সাত্ম্যং হ্যাশু বলমিত্যাদি| বহ্বপীতি অতিমাত্রমপি||৩১৫-৩১৯||-
Adhikarana 59 (320) · Śloka 321
যোগৈরেব চিকিত্সন্ হি দেশাদ্যজ্ঞোঽপরাধ্যতি||৩২০|| বযোবলশরীরাদিভেদা হি বহবো মতাঃ |৩২১|
योगैरेव चिकित्सन् हि देशाद्यज्ञोऽपराध्यति||३२०|| वयोबलशरीरादिभेदा हि बहवो मताः |३२१|
🔊 Audio coming soon
উক্তদেশাদিপরীক্ষাব্যতিরেকেণ কেবলং যথোক্তযোগৈরেব চিকিত্সাং কুর্বতো দোষমাহ- যোগৈরেবেত্যাদি| দেশাদ্যজ্ঞ ইত্যনেন দেশাদ্যজ্ঞানাদ্ দেশাদিবিগুণচিকিত্সাকারকং পুরুষং লক্ষযতি| অপরাধ্যতি ন ঈপ্সিতং সাধযতি| দেশাদ্যজ্ঞ ইত্যত্রাদিশব্দেন কালাদীনামুক্তানাং তথা প্রদেশান্তরোক্তবযো-বল-শরীর-প্রকৃতি-সত্ত্বানাং গ্রহণম্| দেশাদ্যজ্ঞঃ কুতোঽপরাধ্যতীত্যাহ- বযোবলেত্যাদি| আদিশব্দেন প্রকৃতিসত্ত্বাদীনাং গ্রহণম্| যস্মাদ্বযোবলাদিভেদা বহবশ্চিকিত্সাবেক্ষণীযাশ্চিকিত্সকানাং মতাঃ সন্তি, তস্মাদ্ দেশাদিনিরপেক্ষা চিকিত্সা ক্রিযমাণা ন ঈপ্সিতং সাধযতীতি ভাবঃ||৩২০||-
Adhikarana 60 (321-325) · Śloka 326
তথাঽন্তঃসন্ধিমার্গাণাং দোষাণাং গূঢচারিণাম্||৩২১|| ভবেত্ কদাচিত্ কার্যাঽপি বিরুদ্ধাভিমতা ক্রিযা| পিত্তমন্তর্গতং গূঢং স্বেদসেকোপনাহনৈঃ||৩২২|| নীযতে বহিরুষ্ণৈর্হি তথোষ্ণং শমযন্তি তে| বাহ্যৈশ্চ শীতৈঃ সেকাদ্যৈরূষ্মাঽন্তর্যাতি পীডিতঃ||৩২৩|| সোঽন্তর্গূঢং কফং হন্তি শীতং শীতৈস্তথা জযেত্| শ্লক্ষ্ণপিষ্টো ঘনো লেপশ্চন্দনস্যাপি দাহকৃত্||৩২৪|| ত্বগ্গতস্যোষ্মণো রোধাচ্ছীতকৃচ্চান্যথাঽগুরোঃ| ছর্দিঘ্নী মক্ষিকাবিষ্ঠা মক্ষিকৈব তু বামযেত্||৩২৫|| দ্রব্যেষু স্বিন্নজগ্ধেষু চৈব তেষ্বেব বিক্রিযা|৩২৬|
तथाऽन्तःसन्धिमार्गाणां दोषाणां गूढचारिणाम्||३२१|| भवेत् कदाचित् कार्याऽपि विरुद्धाभिमता क्रिया| पित्तमन्तर्गतं गूढं स्वेदसेकोपनाहनैः||३२२|| नीयते बहिरुष्णैर्हि तथोष्णं शमयन्ति ते| बाह्यैश्च शीतैः सेकाद्यैरूष्माऽन्तर्याति पीडितः||३२३|| सोऽन्तर्गूढं कफं हन्ति शीतं शीतैस्तथा जयेत्| श्लक्ष्णपिष्टो घनो लेपश्चन्दनस्यापि दाहकृत्||३२४|| त्वग्गतस्योष्मणो रोधाच्छीतकृच्चान्यथाऽगुरोः| छर्दिघ्नी मक्षिकाविष्ठा मक्षिकैव तु वामयेत्||३२५|| द्रव्येषु स्विन्नजग्धेषु चैव तेष्वेव विक्रिया|३२६|
🔊 Audio coming soon
সামান্যোক্তচিকিত্সাযাঃ প্রকারান্তরেণাপি বিশিষ্টার্থকর্তৃত্বমাহ- তথাঽন্তরিত্যাদি| অন্তর্মার্গাঃ কোষ্ঠাশ্রযিণঃ, সন্ধিমার্গা মধ্যমার্গাশ্রযিণঃ| গূঢচারিণামিতি অন্তঃসন্ধিগতত্বেনাব্যক্তগতীনাং দোষাণাং বিরুদ্ধাভিমতাঽপি ক্রিযা কদাচিদ্ভবতি, বিরুদ্ধাভিমতা বিপরীতত্বেন খ্যাতা| কিংবা ন কেবলং বযোবলাদিভেদা বহবো মতাঃ কিন্তু অন্তঃসন্ধিমার্গাণাং দোষাণাং গূঢচারিণাং ভেদা বহবশ্চিকিত্সাবেক্ষণীযা মতা ইতি; ততো গূঢচারিণো দোষভেদেন চিকিত্সাভেদো ভবেত্ কদাচিদিত্যাদি যোজনীযম্| বিরুদ্ধাভিমতক্রিযাকরণোদাহরণমাহ- পিত্তমন্তর্গতমিত্যাদিনা| নীযতে বহিরিতি বাহ্যরোমকূপনিঃসারণেন নীযতে বহিরুষ্ণৈঃ| তথেতি তথা উক্তেন প্রকারেণ উষ্ণং পিত্তমুষ্ণৈঃ স্বেদাদিভিঃ শমযন্তি| সম্প্রতি শীতেন চিকিত্সিতেন শীতশ্লেষ্মশমনোদাহরণমাহ- বাহ্যৈশ্চেত্যাদি| পীডিত ইতি বহির্গচ্ছন্ নিরুদ্ধঃ| অথ প্রত্যনীকস্যাপি কল্পনাবিশেষাদন্যথাকর্তৃত্বমাহ- শ্লক্ষ্ণপিষ্ট ইত্যাদি| ত্বগ্গতস্যোষ্মণো রোধাদিতি ত্বঙ্মার্গেণ নির্গচ্ছত ঊষ্মণো রোধাত্| শীতকৃচ্চান্যথাঽগুরোরিতি অগুরোরুষ্ণস্যাপি পিষ্টোঽঘনশ্চ লেপঃ শীতকৃত্ স্যাদিত্যর্থঃ| বিরুদ্ধক্রিযাভিধানপ্রসঙ্গেন সমুদাযাপেক্ষযৈকদেশস্য বিরুদ্ধকার্যকরণোদাহরণমাহ- ছর্দিঘ্নীত্যাদি| দ্রব্যেষু স্বিন্নজগ্ধেষ্বেবং তেষ্বেব বিক্রিযেতি অনেন মক্ষিকাবিষ্ঠারম্ভকেষু দ্রব্যেষু মক্ষিকাজঠরাগ্নিস্বিন্নেষু এবং বিক্রিযা মক্ষিকাশরীরগততযা বিষ্ঠাগততযা চ বিরুদ্ধা ক্রিযা যথোক্তা ভবতীতি বাক্যার্থঃ; স্বিন্নজগ্ধেষ্বিতি খাদিতানন্তরমগ্নিপক্বেষু, বিক্রিযেতি বিরুদ্ধক্রিযা| কিংবা সংস্কারেণ পূর্বদ্রব্যকার্যবিরুদ্ধোদাহরণার্থমাহ- দ্রব্যেষ্বিত্যাদি| অস্মিন্ পক্ষে ‘জগ্ধেষু’ ইত্যস্য স্থানে ‘দগ্ধেষু’ ইতি পঠন্তি| তত্র লাজসক্তূনাং সিদ্ধপিণ্ডেষু স্বিন্নতযা লাজবিপরীতা গুরুত্বেনাগ্নিবধাদিকারিকা ক্রিযা; তথা উত্পলনালেষু দগ্ধেষু ক্ষারতযা শীতবিরুদ্ধা ক্রিযা ছেদনাদিক্রিযা ইত্যাদ্যুদাহার্যম্| যদা ‘যস্মিন্ জগ্ধেষু’ ইতি পাঠঃ, তদাঽপি স্বিন্নানন্তরং জগ্ধেষ্বিতি কৃত্বা সক্তুসিদ্ধপিণ্ডক এবোদাহরণং জ্ঞেযম্||৩২১-৩২৫||-
Adhikarana 61 (326) · Śloka 327
তস্মাদ্দোষৌষধাদীনি পরীক্ষ্য দশ তত্ত্বতঃ||৩২৬|| কুর্যাচ্চিকিত্সিতং প্রাজ্ঞো ন যোগৈরেব কেবলম্|৩২৭|
तस्माद्दोषौषधादीनि परीक्ष्य दश तत्त्वतः||३२६|| कुर्याच्चिकित्सितं प्राज्ञो न योगैरेव केवलम्|३२७|
🔊 Audio coming soon
পরীক্ষাফলমুপসংহরতি- তস্মাদিত্যাদি| দোষৌষধাদীনি উপকল্পনীযে (সূ.অ.১৫) একাদশ পঠিতানি, বিমানে চ দ্বাদশ পঠিতানি, তেন তদ্গ্রহণেনেহোক্তং দশসঙ্খ্যত্বং ব্যাহন্যতে; তেন দৃঢবলেনৈব নিরূহপ্রস্তাবে যানি দোষৌষধাদীনি দশ নির্দিষ্টানি “সমীক্ষ্য দোষৌষধদেশকালসাত্ম্যাগ্নিসত্ত্বৌকবযোবলানি” (সি.অ.৩) ইত্যনেন, তান্যেবাত্র দশ গৃহ্যন্তে| এতদ্দশক এবোপকল্পনীযোক্তৈকাদশকস্য পরীক্ষ্যস্য তথা বিমানোক্তদ্বাদশকস্য চাবরোধঃ| তথাহি- উপকল্পনীযে এতদ্দশত অন্যে প্রকৃতিশরীরাহারা উক্তাঃ; তত্র শরীরস্য প্রকৃতেশ্চ দেশশব্দেন ভূম্যাতুরগ্রাহিণা গ্রহণম্, উক্তং হি- “দেশো ভূমিরাতুরশ্চ” (বি.অ.৮) ইতি; আহারস্য তু সাত্ম্যগ্রহণেনৈব গ্রহণম্| বিমানে চ যো দ্বাদশো বিকারঃ পঠিতঃ, স দোষগ্রহণগৃহীতঃ| এবং সর্বোপকল্পনীযাদ্যুক্তার্থোপগ্রহো ব্যাখ্যেযঃ| যত্তু আষাঢবর্মপ্রভৃতিভিরতদ্গুণবহুব্রীহিপক্ষাশ্রযেণোপকল্পনীযোক্তানামেব দশত্বং ব্যাখ্যাতমিহ, তদ্ হ্যশাব্দমসঙ্গতং চ| ন যোগৈরেবেতি ন প্রযোগমাত্রেণ||৩২৬||-
Adhikarana 62 (327-328) · Śloka 329
নিবৃত্তোঽপি পুনর্ব্যাধিঃ স্বল্পেনাযাতি হেতুনা||৩২৭|| ক্ষীণে মার্গীকৃতে দেহে শেষঃ সূক্ষ্ম ইবানলঃ| তস্মাত্তমনুবধ্নীযাত্ প্রযোগেণানপাযিনা||৩২৮|| সিদ্ধ্যর্থং প্রাক্প্রযুক্তস্য সিদ্ধস্যাপ্যৌষধস্য তু|৩২৯|
निवृत्तोऽपि पुनर्व्याधिः स्वल्पेनायाति हेतुना||३२७|| क्षीणे मार्गीकृते देहे शेषः सूक्ष्म इवानलः| तस्मात्तमनुबध्नीयात् प्रयोगेणानपायिना||३२८|| सिद्ध्यर्थं प्राक्प्रयुक्तस्य सिद्धस्याप्यौषधस्य तु|३२९|
🔊 Audio coming soon
সম্প্রতি চিকিত্সযা নিবৃত্তে ব্যাধৌ কর্তব্যং দর্শযন্নাহ- নিবৃত্তোঽপি পুনরিত্যাদি| নিবৃত্ত ইব নিবৃত্তঃ, কিঞ্চিদবশিষ্টদোষরূপমূলঃ; ন তু সর্বথা নিবৃত্তঃ, তস্য তুল্যহেতুনা প্রত্যাগমনবিরোধাত্, তথা সূক্ষ্মানলদৃষ্টান্তবিসদৃশত্বাচ্চ| ক্ষীণে অপচিতমাংসাদিকে| মার্গীকৃতে ইতি ব্যাধ্যপ্রতিবন্ধকতযা মার্গসদৃশীকৃতে| শেষ ইতি অনলবিশেষণম্| অপিশব্দেন নিবৃত্তোঽপি যদা স্বল্পেন হেতুনা আযাতি তদা প্রশমাভিমুখো নিতরামেবাযাতীতি দর্শযতি| এবং ব্যবস্থিতে কর্তব্যমাহ- তস্মাদিত্যাদি| অনুবধ্নীযাত্ প্রযোগেণেতি পুনরপ্যনুবন্ধভেষজপ্রযোগং কুর্যাত্| অনপাযিনেতি রোগান্তরাকারকেণ| কিমর্থমনুবধ্নীযাদিত্যাহ- দার্ঢ্যার্থমিতি| প্রযুক্তসিদ্ধৌষধকৃতব্যাধিনিবৃত্তিলক্ষণস্যার্থস্য দার্ঢ্যার্থং, স্থৈর্যার্থমিতি যাবত্||৩২৭-৩২৮||-
Adhikarana 63 (329-330) · Śloka 331
কাঠিন্যাদূনভাবাদ্বা দোষোঽন্তঃ কুপিতো মহান্||৩২৯|| পথ্যৈর্মৃদ্বল্পতাং নীতো মৃদুদোষকরো ভবেত্| পথ্যমপ্যশ্নতস্তস্মাদ্যো ব্যাধিরুপজাযতে||৩৩০|| জ্ঞাত্বৈবং বৃদ্ধিমভ্যাসমথবা তস্য কারযেত্|৩৩১|
काठिन्यादूनभावाद्वा दोषोऽन्तः कुपितो महान्||३२९|| पथ्यैर्मृद्वल्पतां नीतो मृदुदोषकरो भवेत्| पथ्यमप्यश्नतस्तस्माद्यो व्याधिरुपजायते||३३०|| ज्ञात्वैवं वृद्धिमभ्यासमथवा तस्य कारयेत्|३३१|
🔊 Audio coming soon
অপরমপি প্রযোগানুবন্ধবিষযমাহ- কাঠিন্যাদিত্যাদি| কাঠিন্যাদিতি দোষচযরূপসংহতত্বাত্| ঊনভাবাত্ অচযপ্রকোপাত্; অচযেঽপি চ দোষাণাং প্রকোপো ভবত্যেব; যথা- বলবদ্বিগ্রহাদিভির্বাযোঃ, পিতস্য ক্রোধাদিভিঃ, শ্লেষ্মণশ্চ দিবাস্বপ্নাদিভিঃ; অযং চাচযপ্রকোপো ঘনাবযবোপচযাকর্তৃত্বাত্ ‘ঊনভাবাত্ প্রকোপ’ ইত্যুচ্যতে| দোষোঽন্তঃকুপিতো মহানিত্যত্র কাঠিন্যাত্ কুপিত ঊনভাবাচ্চ কুপিতো মহান্ ভবতীতি ব্যবস্থা| কাঠিন্যাদ্ধি অচযকোপোঽন্তরেব প্রাযো ভবতি, ঊনভাবাত্তু অচযপ্রকোপঃ প্রসরণস্বভাবত্বাত্তু লঘুচযবন্ধসারো(?)ঽপি মহান্ ভবতি| মৃদ্বল্পতাং নীত ইতি যথাক্রমং, তেন যঃ কাঠিন্যাদন্তঃকুপিতঃ স মৃদুতাং নীতঃ, স্থূলভাবান্মাহান্ কুপিতোঽল্পতাং নীতঃ; মৃদুদোষকর ইতি অল্পবিকারকরঃ| কিংবা কাঠিন্যাদিতি দোষদূষ্যসম্বন্ধকৃতস্থৈর্যাত্, ঊনভাবাদিতি যথোক্তকাঠিন্যং বিনা| অন্তরিতি শরীরানুত্তানদেশে| মহানিতি চ পদং দ্বাভ্যামপি সম্বধ্যতে| একস্য কারণপ্রচযেন মহত্ত্বম্| পথ্যমপ্যশ্নত ইতি হিতমপি ভেষজমুপযুঞ্জানস্য| উপজাযত ইতি মৃদুতযা অল্পতযা বা অনুবর্ততে| জ্ঞাত্বৈবমিতি পথ্যমিদমস্য ভেষজম্, অযং তু ব্যাধিরিতি, মহত্ত্বাদ্গম্ভীরত্বাদ্বা সর্বথা ন নিবর্ততে মগ্নঃ, এবং জ্ঞাত্বা তথৈব পূর্বপ্রযুক্তপ্রযোগস্য বৃদ্ধিং বা অভ্যাসং বা কারযেত্, ন তত্প্রযোগাশ্রযপ্রযোগান্তরং কুর্যাত্; বৃদ্ধির্মাত্রাধিক্যম্, অভ্যাসঃ সততোপযোগঃ| অযমর্থোঽন্যত্রাপ্যুক্তঃ- “অভ্যস্যমানাঃ ক্রমশস্তু যোগা জযন্তি রোগান্ বলিনঃ স্থিরাংশ্চ| তস্মাদখিন্নঃ পুরুষোঽভ্যুপেযাদ্যোগপ্রযোগান্ সমুদীর্ণরোগে” ইতি||৩২৯-৩৩০||-
Adhikarana 64 (331-333) · Śloka 334
সাতত্যাত্স্বাদ্বভাবাদ্বা পথ্যং দ্বেষ্যত্বমাগতম্||৩৩১|| কল্পনাবিধিভিস্তৈস্তৈঃ প্রিযত্বং গমযেত্ পুনঃ| মনসোঽর্থানুকূল্যাদ্ধি তুষ্টিরূর্জা রুচির্বলম্||৩৩২|| সুখোপভোগতা চ স্যাদ্ব্যাধেশ্চাতো বলক্ষযঃ| লৌল্যাদ্দোষক্ষযাদ্ব্যাধের্বৈধর্ম্যাচ্চাপি যা রুচিঃ||৩৩৩|| তাসু পথ্যোপচারঃ স্যাদ্যোগেনাদ্যং বিকল্পযেত্|৩৩৪|
सातत्यात्स्वाद्वभावाद्वा पथ्यं द्वेष्यत्वमागतम्||३३१|| कल्पनाविधिभिस्तैस्तैः प्रियत्वं गमयेत् पुनः| मनसोऽर्थानुकूल्याद्धि तुष्टिरूर्जा रुचिर्बलम्||३३२|| सुखोपभोगता च स्याद्व्याधेश्चातो बलक्षयः| लौल्याद्दोषक्षयाद्व्याधेर्वैधर्म्याच्चापि या रुचिः||३३३|| तासु पथ्योपचारः स्याद्योगेनाद्यं विकल्पयेत्|३३४|
🔊 Audio coming soon
উক্তসততোপযোগে যদি পথ্যং সাতত্যাত্ সততোপযোগাদ্ধেতোর্দ্বেষ্যত্বমাগতং ভবতি, তথা স্বাদ্বভাবাদ্বা অনিষ্টত্বাদ্দ্বেষ্যত্বমাগতং ভবতি, তদাঽপি তদেব পথ্যং তৈস্তৈঃ কল্পনাবিধিভিঃ স্বরসশৃতকল্কাদিভিঃ সূদশাস্ত্রোক্তৈশ্চ বিধানৈঃ পুনরাতুরস্য প্রিযত্বমাপাদযেত্| স্বাদ্বপি সততোপযোগাদপ্রিযং ভবতীতি দৃষ্টম্, অস্বাদু তু স্বভাবাদেবাপ্রিযম্| স্বাদুশব্দেনাত্র প্রিযো রসোঽভিধীযতে| প্রিযত্বাপাদনপ্রযোজনমাহ- মনসোঽর্থানুকূল্যাদিত্যাদি|- মনসোঽনুকূলভেষজাদিরূপানুকল্পনাত্| ঊর্জা মনোবলম্| সুখোপভোগতা ভেষজস্যাপ্রাতিকূল্যেনোপযোগঃ| অত্র চাতিতৃষ্ণাদিভ্যঃ সুখোপভোগান্তে বিরেচনে অরুচৌ কর্তব্যমভিধায রুচিবিশেষে কর্তব্যতামাহ- লৌল্যাদিতি| অত্র লৌল্যাদেব হি কস্যচিত্পুরুষস্য কস্মিংশ্চিদ্বিশেষে রুচির্ভবতি; দোষক্ষযাদপি ক্বচিদ্রুচির্ভবতি; তথা ব্যাধিযুক্তস্য চ পেযে রুচির্ভবতি; ব্যাধিমহিম্না ক্বচিদ্রুচির্ভবতি, যথা- পাণ্ডুরোগে মৃত্তিকাযাং; বৈধর্ম্যাচ্চ রুচির্ভবতি, যথা- স্নিগ্ধস্য রূক্ষে, মধুরস্য চাম্লে; যদুক্তম্- “অম্লেন কেচিদ্বিহতা মনুষ্যা মাধুর্যযোগে প্রণযীভবন্তি” (সু.সূ.অ.৪৬) ইতি; কিংবা ব্যাধিবৈধর্ম্যাদিত্যেক এব হেতুঃ; অত্রোদাহরণং যথা- শ্লেষ্মজ্বরেঽম্লকটুকেচ্ছুতা| এতৈর্লৌল্যাদিভিঃ প্রত্যেকং জনিতা রুচিঃ, আসু রুচিষু লৌল্যাদিজনিতাসু পথ্যোপচারঃ স্যাত্, পথ্যমেব দেযং নাপথ্যমিত্যর্থঃ| অত্র যদি পথ্যং চ ভবতি রুচিবিষযং চ ভবতি তদা সাধ্বেব, যদা তু রুচিবিষযমপথ্যং স্যাত্ তদা কর্তব্যমাহ- যোগেনাদ্যং বিকল্পযেদিতি|- ভেষজযোগেনাদ্যম্ ইচ্ছাবিষযং ভোজ্যং সংস্কৃত্য দদ্যাদিত্যর্থঃ| অন্যৈস্তু লৌল্যাদিদোষজা ত্রিবিধাঽত্রারুচিরুচ্যতে; তত্র লৌল্যজাযামরুচৌ পথ্যোপচারঃ, দোষক্ষযজাযামরুচৌ যোগেনেতি সম্যগ্যোগেনোপচারঃ, ব্যাধিবৈধর্ম্যজাযাং চাদ্যমদনীযং ব্যাধিপ্রত্যনীকপ্রযোগৈরুপকল্পযেদিতি ব্যাখ্যাতম্| পূর্বমেব তু ব্যাখ্যানমাদ্রিযামহে||৩৩১-৩৩৩||-
Adhikarana 65 (334-341) · Śloka 341
তত্র শ্লোকাঃ- বিংশতির্ব্যাপদো যোনের্নিদানং লিঙ্গমেব চ||৩৩৪|| চিকিত্সা চাপি নির্দিষ্টা শিষ্যাণাং হিতকাম্যযা| শুক্রদোষাস্তথা চাষ্টৌ নিদানাকৃতিভেষজৈঃ||৩৩৫|| ক্লৈব্যান্যুক্তানি চত্বারি চত্বারঃ প্রদরাস্তথা| তেষাং নিদানং লিঙ্গং চ ভৈষজ্যং চৈব কীর্তিতম্||৩৩৬|| ক্ষীরদোষাস্তথা চাষ্টৌ হেতুলিঙ্গভিষগ্জিতৈঃ| রেতসো রজসশ্চৈব কীর্তিতং শুদ্ধিলক্ষণম্||৩৩৭|| উক্তানুক্তচিকিত্সা চ সম্যগ্যোগস্তথৈব চ| দেশাদিগুণশংসা চ কালঃ ষঙ্বিধ এব চ||৩৩৮|| দেশে দেশে চ যত্ সাত্ম্যং যথা বৈদ্যোঽপরাধ্যতি| চিকিত্সা চাপি নির্দিষ্টা দোষাণাং গূঢচারিণাম্||৩৩৯|| যো হি সম্যঙ্ন জানাতি শাস্ত্রং শাস্ত্রার্থমেব চ| ন কুর্যাত্ স ক্রিযাং চিত্রমচক্ষুরিব চিত্রকৃত্||৩৪০|| অগ্নিবেশকৃতে তন্ত্রে চরকপ্রতিসংস্কৃতে| চিকিত্সিতমিদং স্থানং ষষ্ঠং পরিসমাপিতম্||৩৪১||
तत्र श्लोकाः- विंशतिर्व्यापदो योनेर्निदानं लिङ्गमेव च||३३४|| चिकित्सा चापि निर्दिष्टा शिष्याणां हितकाम्यया| शुक्रदोषास्तथा चाष्टौ निदानाकृतिभेषजैः||३३५|| क्लैब्यान्युक्तानि चत्वारि चत्वारः प्रदरास्तथा| तेषां निदानं लिङ्गं च भैषज्यं चैव कीर्तितम्||३३६|| क्षीरदोषास्तथा चाष्टौ हेतुलिङ्गभिषग्जितैः| रेतसो रजसश्चैव कीर्तितं शुद्धिलक्षणम्||३३७|| उक्तानुक्तचिकित्सा च सम्यग्योगस्तथैव च| देशादिगुणशंसा च कालः षङ्विध एव च||३३८|| देशे देशे च यत् सात्म्यं यथा वैद्योऽपराध्यति| चिकित्सा चापि निर्दिष्टा दोषाणां गूढचारिणाम्||३३९|| यो हि सम्यङ्न जानाति शास्त्रं शास्त्रार्थमेव च| न कुर्यात् स क्रियां चित्रमचक्षुरिव चित्रकृत्||३४०|| अग्निवेशकृते तन्त्रे चरकप्रतिसंस्कृते| चिकित्सितमिदं स्थानं षष्ठं परिसमापितम्||३४१||
🔊 Audio coming soon
বিংশতিরিত্যাদিসঙ্গ্রহঃ সুবোধ এব||৩৩৪-৩৪১||
Adhikarana puShpikA · Śloka 30
ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে চিকিত্সাস্থানে যোনিব্যাপচ্চিকিত্সিতং নাম ত্রিংশোঽধ্যাযঃ||৩০|| ইতি চরকসংহিতাযাং ষষ্ঠং চিকিত্সিতস্থানং সম্পূর্ণম্|
इत्यग्निवेशकृते तन्त्रे चरकप्रतिसंस्कृतेऽप्राप्ते दृढबलसम्पूरिते चिकित्सास्थाने योनिव्यापच्चिकित्सितं नाम त्रिंशोऽध्यायः||३०|| इति चरकसंहितायां षष्ठं चिकित्सितस्थानं सम्पूर्णम्|
🔊 Audio coming soon
ইতি শ্রীনারাযণদত্তাত্মজশ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং চিকিত্সাস্থানে যোনিব্যাপচ্চিকিত্সিতং নাম ত্রিংশোঽধ্যাযঃ||৩০||