Adhikarana 1 (1-3) · Śloka 3
অথাতঃ পরিমর্শনীযমিন্দ্রিযং ব্যাখ্যাস্যামঃ||১||
ইতি হ স্মাহ ভগবানাত্রেযঃ||২||
বর্ণে স্বরে চ গন্ধে চ রসে চোক্তং পৃথক্ পৃথক্|
লিঙ্গং মুমূর্ষতাং সম্যক্ স্পর্শেষ্বপি নিবোধত||৩||
View original
अथातः परिमर्शनीयमिन्द्रियं व्याख्यास्यामः||१||
इति ह स्माह भगवानात्रेयः||२||
वर्णे स्वरे च गन्धे च रसे चोक्तं पृथक् पृथक्|
लिङ्गं मुमूर्षतां सम्यक् स्पर्शेष्वपि निबोधत||३||
ইন্দ্রিযার্থানুগতরিষ্টপারিশেষ্যাত্ স্পর্শগতরিষ্টাভিধাযকং পরিমর্শনীযমিন্দ্রিযমুচ্যতে; ইমমেব চাধ্যাযসম্বন্ধং দর্শযন্নাহ- বর্ণে স্বরে চেত্যাদি||১-৩||
Adhikarana 2 (4) · Śloka 4
স্পর্শপ্রাধান্যেনৈবাতুরস্যাযুষঃ প্রমাণাবশেষং জিজ্ঞাসুঃ প্রকৃতিস্থেন পাণিনা শরীরমস্য কেবলং স্পৃশেত্, পরিমর্শযেদ্বাঽন্যেন|
পরিমৃশতা তু খল্বাতুরশরীরমিমে ভাবাস্তত্র তত্রাববোদ্ধব্যা ভবন্তি|
তদ্যথা- সততং স্পন্দমানানাং শরীরদেশানামস্পন্দনং, নিত্যোষ্মণাং শীতীভাবঃ, মৃদূনাং দারুণত্বং, শ্লক্ষ্ণানাং খরত্বং, সতামসদ্ভাবঃ , সন্ধীনাং স্রংসভ্রংশচ্যবনানি; মাংসশোণিতযোর্বীতীভাবঃ, দারুণত্বং, স্বেদানুবন্ধঃ, স্তম্ভো বা; যচ্চান্যদপি কিঞ্চিদীদৃশং স্পর্শানাং লক্ষণং ভৃশবিকৃতমনিমিত্তং স্যাত্|
ইতি লক্ষণং স্পৃশ্যানাং ভাবানামুক্তং সমাসেন||৪||
View original
स्पर्शप्राधान्येनैवातुरस्यायुषः प्रमाणावशेषं जिज्ञासुः प्रकृतिस्थेन पाणिना शरीरमस्य केवलं स्पृशेत्, परिमर्शयेद्वाऽन्येन|
परिमृशता तु खल्वातुरशरीरमिमे भावास्तत्र तत्रावबोद्धव्या भवन्ति|
तद्यथा- सततं स्पन्दमानानां शरीरदेशानामस्पन्दनं, नित्योष्मणां शीतीभावः, मृदूनां दारुणत्वं, श्लक्ष्णानां खरत्वं, सतामसद्भावः , सन्धीनां स्रंसभ्रंशच्यवनानि; मांसशोणितयोर्वीतीभावः, दारुणत्वं, स्वेदानुबन्धः, स्तम्भो वा; यच्चान्यदपि किञ्चिदीदृशं स्पर्शानां लक्षणं भृशविकृतमनिमित्तं स्यात्|
इति लक्षणं स्पृश्यानां भावानामुक्तं समासेन||४||
স্পর্শেনেতি বক্তব্যে যত্ ‘স্পর্শপ্রাধান্যেন’ ইতি করোতি, তেন অস্পর্শগ্রাহ্যমপি চক্ষুর্লোহিতত্বাদি রিষ্টমিহ স্পর্শপরীক্ষ্যমধ্যে ওঘাদাযাতং বক্তব্যমিতি দর্শযতি| প্রকৃতিস্থেনেতি নাত্যুষ্ণশীতেন| কেবলমিতি কৃত্স্নম্| গুরুদারাদেঃ স্বযং স্পর্শো যদা ন যুজ্যতে তদা কর্তব্যমাহ- পরিমর্শযেদ্বাঽন্যেনেতি| সতামসদ্ভাব ইতি অত্র চ বৃষ্ণাদীনাং সতামিতি জ্ঞেযং, স্থূলাবযবানাং রিষ্টেঽপ্যভাবদর্শনাত্| স্রংসঃ মনাগ্গমনং, ভ্রংশস্তু সুদূরাধোগমনং, ধাবনং তু পার্শ্বতো গমনম্| বীতীভাবঃ অতিক্ষীণত্বম্| লক্ষণমিতি মরণলক্ষণম্| সমাসেনেতি চ্ছেদঃ||৪||
Adhikarana 3 (5-6) · Śloka 6
তদ্ব্যাসতোঽনুব্যাখ্যাস্যামঃ- তস্য চেত্ পরিমৃশ্যমানং পৃথক্ত্বেন পাদজঙ্ঘোরুস্ফিগুদরপার্শ্বপৃষ্ঠেষিকাপাণিগ্রীবাতাল্বোষ্ঠললাটং স্বিন্নং শীতং স্তব্ধং দারুণং বীতমাংসশোণিতং বা স্যাত্, পরাসুরযং পুরুষো ন চিরাত্ কালং মরিষ্যতীতি বিদ্যাত্|
তস্য চেত্ পরিমৃশ্যমানানি পৃথক্ত্বেন গুল্ফজানুবঙ্ক্ষণগুদবৃষণমেঢ্রনাভ্যংসস্তনমণিকপর্শুকাহনুনাসিকাকর্ণাক্ষিভ্রূশঙ্খাদীনি স্রস্তানি ব্যস্তানি চ্যুতানি স্থানেভ্যঃ স্কন্নানি বা স্যুঃ, পরাসুরযং পুরুষোঽচিরাত্ কালং মরিষ্যতীতি বিদ্যাত্||৫||
তথাঽস্যোচ্ছ্বাসমন্যাদন্তপক্ষ্মচক্ষুঃকেশলোমোদরনখাঙ্গুলীরালক্ষযেত্|
তস্য চেদুচ্ছ্বাসোঽতিদীর্ঘোঽতিহ্রস্বো বা স্যাত্, পরাসুরিতি বিদ্যাত্|
তস্য চেন্মন্যে পরিমৃশ্যমানে ন স্পন্দেযাতাং, পরাসুরিতি বিদ্যাত্|
তস্য চেদ্দন্তাঃ পরিকীর্ণাঃ শ্বেতা জাতশর্করাঃ স্যুঃ, পরাসুরিতি বিদ্যাত্|
তস্য চেত্ পক্ষ্মাণি জটাবদ্ধানি স্যুঃ, পরাসুরিতি বিদ্যাত্|
তস্য চেচ্চক্ষুষী প্রকৃতিহীনে, বিকৃতিযুক্তে- অত্যুত্পিণ্ডিতে, অতিপ্রবিষ্টে, অতিজিহ্মে, অতিবিষমে, অতিমুক্তবন্ধনে, অতিপ্রস্রুতে, সততোন্মিষিতে, সততনিমিষিতে, নিমিষোন্মেষাতিপ্রবৃত্তে, বিভ্রান্তদৃষ্টিকে, বিপরীতদৃষ্টিকে, হীনদৃষ্টিকে, ব্যস্তদৃষ্টিকে , নকুলান্ধে, কপোতান্ধে, অলাতবর্ণে, কৃষ্ণপীতনীলশ্যাবতাম্রহরিতহারিদ্রশুক্লবৈকারিকাণাং বর্ণানামন্যতমেনাতিপ্লুতে বা স্যাতাং, তদা পরাসুরিতি বিদ্যাত্|
অথাস্য কেশলোমান্যাযচ্ছেত্, তস্য চেত্ কেশলোমান্যাযম্যমানানি প্রলুচ্যেরন্ ন চেদ্বেদযেযুস্তং পরাসুরিতি বিদ্যাত্|
তস্য চেদুদরে সিরাঃ প্রকাশেরঞ্ শ্যাবতাম্রনীলহারিদ্রশুক্লা বা স্যুঃ, পরাসুরিতি বিদ্যাত্|
তস্য চেন্নখা বীতমাংসশোণিতাঃ পক্বজাম্বববর্ণাঃ স্যুঃ, পরাসুরিতি বিদ্যাত্|
অথাস্যাঙ্গুলীরাযচ্ছেত্; তস্য চেদঙ্গুলয আযম্যমানা ন স্ফুটেযুঃ, পরাসুরিতি বিদ্যাত্||৬||
View original
तद्व्यासतोऽनुव्याख्यास्यामः- तस्य चेत् परिमृश्यमानं पृथक्त्वेन पादजङ्घोरुस्फिगुदरपार्श्वपृष्ठेषिकापाणिग्रीवाताल्वोष्ठललाटं स्विन्नं शीतं स्तब्धं दारुणं वीतमांसशोणितं वा स्यात्, परासुरयं पुरुषो न चिरात् कालं मरिष्यतीति विद्यात्|
तस्य चेत् परिमृश्यमानानि पृथक्त्वेन गुल्फजानुवङ्क्षणगुदवृषणमेढ्रनाभ्यंसस्तनमणिकपर्शुकाहनुनासिकाकर्णाक्षिभ्रूशङ्खादीनि स्रस्तानि व्यस्तानि च्युतानि स्थानेभ्यः स्कन्नानि वा स्युः, परासुरयं पुरुषोऽचिरात् कालं मरिष्यतीति विद्यात्||५||
तथाऽस्योच्छ्वासमन्यादन्तपक्ष्मचक्षुःकेशलोमोदरनखाङ्गुलीरालक्षयेत्|
तस्य चेदुच्छ्वासोऽतिदीर्घोऽतिह्रस्वो वा स्यात्, परासुरिति विद्यात्|
तस्य चेन्मन्ये परिमृश्यमाने न स्पन्देयातां, परासुरिति विद्यात्|
तस्य चेद्दन्ताः परिकीर्णाः श्वेता जातशर्कराः स्युः, परासुरिति विद्यात्|
तस्य चेत् पक्ष्माणि जटाबद्धानि स्युः, परासुरिति विद्यात्|
तस्य चेच्चक्षुषी प्रकृतिहीने, विकृतियुक्ते- अत्युत्पिण्डिते, अतिप्रविष्टे, अतिजिह्मे, अतिविषमे, अतिमुक्तबन्धने, अतिप्रस्रुते, सततोन्मिषिते, सततनिमिषिते, निमिषोन्मेषातिप्रवृत्ते, विभ्रान्तदृष्टिके, विपरीतदृष्टिके, हीनदृष्टिके, व्यस्तदृष्टिके , नकुलान्धे, कपोतान्धे, अलातवर्णे, कृष्णपीतनीलश्यावताम्रहरितहारिद्रशुक्लवैकारिकाणां वर्णानामन्यतमेनातिप्लुते वा स्यातां, तदा परासुरिति विद्यात्|
अथास्य केशलोमान्यायच्छेत्, तस्य चेत् केशलोमान्यायम्यमानानि प्रलुच्येरन् न चेद्वेदयेयुस्तं परासुरिति विद्यात्|
तस्य चेदुदरे सिराः प्रकाशेरञ् श्यावताम्रनीलहारिद्रशुक्ला वा स्युः, परासुरिति विद्यात्|
तस्य चेन्नखा वीतमांसशोणिताः पक्वजाम्बववर्णाः स्युः, परासुरिति विद्यात्|
अथास्याङ्गुलीरायच्छेत्; तस्य चेदङ्गुलय आयम्यमाना न स्फुटेयुः, परासुरिति विद्यात्||६||
পৃষ্ঠেষিকা পৃষ্ঠবংশঃ| পৃথক্ত্বেনেতি একৈকশ্যেন| মণিকঃ করবাহুসন্ধিঃ| মন্যে গলপার্শ্বগতে ধমন্যৌ| উচ্ছ্বাসদৈর্ঘ্যহ্রাসৌ নাসাগ্রদত্তকরস্পর্শাদুপলভ্যেতে| পরিকীর্ণা ইতি মললিপ্তাঃ| দন্তাদিশ্বেতত্বং চক্ষুর্গ্রাহ্যমপি স্পর্শপরীক্ষণীযদন্তধর্মপ্রস্তাবাদুচ্যতে| চক্ষুষী প্রকৃতিহীনে বিকৃতিযুক্তে ইতি সামান্যবচনং; তস্য বিবরণম্- অত্যুত্পিণ্ডিতে ইত্যাদি| অত্যুত্পিণ্ডিতে ইতি অত্যর্থনির্গতে | অতিজিহ্মে অতিকুটিলে| অতিবিষমে ইতি একং সংবৃতম্, অপরং বিস্তৃতমিতি| নিমেষোন্মেষক্রিযাযামত্যর্থং প্রবর্তেতে ইতি নিমেষোন্মেষাতিপ্রবৃত্তে| বিপরীতদৃষ্টিকে ইতি কেযূরদৃষ্টিকে; কিংবা বিপরীতদৃষ্টিকে অন্যথাগ্রাহিণী| হীনদৃষ্টিকে অদূরদর্শিনী, নষ্টদৃষ্টিকে বা| নকুলান্ধকপোতান্ধলক্ষণে গ্রন্থঃ- “নকুলান্ধস্তু রূপাণি দিবা শুক্লানি পশ্যতি| কপোতান্ধস্তু রূপাণি দিবা কৃষ্ণানি পশ্যতি” ইতি| অলাতস্তু তপ্তাঙ্গারঃ| ইহ চক্ষুর্গতারিষ্টাভিধানপ্রস্তাবাদস্পর্শগ্রাহ্মমপি চক্ষুষোরলাতবর্ণত্বাদিকমুচ্যতে| উদরানুগতাঃ সিরাস্ত্বিহ স্পর্শনগ্রাহ্যা ভবন্তীতি উক্তাঃ; তত্প্রসঙ্গাচ্চক্ষুর্গ্রাহ্যাঃ সিরাবর্ণা অপ্যুক্তাঃ| আযচ্ছেদিতি স্ফোটযেত্| নখাঙ্গুলিগতারিষ্টপরীক্ষাযাং তু স্পর্শোঽপি ব্যাপ্রিযত এবেতি কৃত্বা তদরিষ্টমপীহোক্তম্||৫-৬||
Adhikarana 4 (7) · Śloka 7
তত্র শ্লোকঃ- এতান্ স্পৃশ্যান্ বহূন্ ভাবান্ যঃ স্পৃশন্নববুধ্যতে|
আতুরে ন স সম্মোহমাযুর্জ্ঞানস্য গচ্ছতি||৭||
View original
तत्र श्लोकः- एतान् स्पृश्यान् बहून् भावान् यः स्पृशन्नवबुध्यते|
आतुरे न स सम्मोहमायुर्ज्ञानस्य गच्छति||७||
এতান্ স্পৃশ্যানিতি বাহুল্যাদুক্তম্; এবং স্পৃশন্নিত্যেতদপি বাহুল্যাদুক্তম্| ‘আযুর্জ্ঞানস্যেতি’ পাঠপক্ষে ষষ্ঠী সম্বন্ধবিবক্ষাযাম্||৭||
Adhikarana puShpikA · Śloka 3
ইত্যগ্নিবেশকৃতে তন্ত্রে চরকপ্রতিসংস্কৃতে ইন্দ্রিযস্থানে পরিমর্শনীযমিন্দ্রিযং নাম তৃতীযোঽধ্যাযঃ||৩||
View original
इत्यग्निवेशकृते तन्त्रे चरकप्रतिसंस्कृते इन्द्रियस्थाने परिमर्शनीयमिन्द्रियं नाम तृतीयोऽध्यायः||३||
ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযামিন্দ্রিযস্থানে পরিমর্শনীযমিন্দ্রিযং নাম তৃতীযোঽধ্যাযঃ||৩||