4. dhāmārgavakalpaḥ

Adhikarana 1 (1-2) · Śloka 2

অথাতো ধামার্গবকল্পং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

উক্তসম্বন্ধাদ্ধামার্গবকল্পোঽভিধীযতে||১-২||

Adhikarana 2 (3) · Śloka 3

কর্কোটকী কোঠফলা মহাজালিনিরেব চ| ধামার্গবস্য পর্যাযা রাজকোশাতকী তথা||৩||

তত্র কর্কোটকীত্যাদিনা পর্যাযকথনম্| ধামার্গবঃ পীতঘোষকঃ||৩||

Adhikarana 3 (4) · Śloka 5

গরে গুল্মোদরে কাসে বাতে শ্লেষ্মাশযস্থিতে| কফে চ কণ্ঠবক্রস্থে কফসঞ্চযজেষু চ||৪|| রোগেষ্বেষু প্রযোজ্যং স্যাত্ স্থিরাশ্চ গুরবশ্চ যে|৫|

স্থিরাশ্চ গুরবশ্চ যে ইত্যত্র ‘গদাঃ’ ইতি শেষঃ||৪||-

Adhikarana 4 (5) · Śloka 5

ফলং পুষ্পং প্রবালং চ বিধিনা তস্য সংহরেত্||৫||

বিধিনেতি ভেষজগ্রহণোক্তেন বিধিনা||৫||

Adhikarana 5 (6) · Śloka 6

প্রবালস্বরসং শুষ্কং কৃত্বা চ গুলিকাঃ পৃথক্| কোবিদারাদিভিঃ পেযাঃ কষাযৈর্মধুকস্য চ||৬||

প্রবালেত্যাদিনা নবযোগানাহ| প্রবালস্য স্বরসঃ প্রবালস্বরসঃ| অত্র কোবিদারাদিকষাযৈর্গুডিকাকরণং পানং চ জ্ঞেযম্||৬||

Adhikarana 6 (7) · Śloka 7

পুষ্পাদিষু পযোযোগাশ্চত্বারঃ পঞ্চমী সুরা| পূর্ববত্...|৭|

পুষ্পাদিষ্বিত্যাদিনা জীমূতককল্পবিধানেন নির্দিষ্টাশ্চত্বারঃ ক্ষীরপ্রযোগাঃ, পঞ্চমশ্চ সুরাযোগোঽতিদিশ্যতে; তে চ ‘পযঃ পুষ্পেঽস্য’ (ক. অ. ২) ইত্যাদিনোক্তা জ্ঞেযাঃ| পূর্ববদিতি পূর্বেণ সম্বধ্যতে|৭|-

Adhikarana 7 (7-8) · Śloka 9

... জীর্ণশুষ্কাণামতঃ কল্পঃ প্রবক্ষ্যতে||৭|| মধুকস্য কষাযেণ বীজকণ্ঠোদ্ধৃতং ফলম্| সগুডং ব্যুষিতং রাত্রিং কোবিদারাদিভিস্তথা||৮|| দদ্যাদ্গুল্মোদরার্তেভ্যো যে চাপ্যন্যে কফামযাঃ|৯|

জীর্ণশুষ্কাণামিত্যাদিনা নবকষাযযোগানাহ, তথা ‘জাত্যাঃ’ ইত্যাদিনা একাদশ কষাযযোগান্ বক্ষ্যতি; এবং বিংশতিঃ কষাযযোগাঃ সঙ্গ্রহে বক্ষ্যমাণাঃ পূর্যন্তে| বীজকণ্ঠোদ্ধৃতং ফলমিতি যত্র বীজানি বদ্ধানি সন্তি স বীজকণ্ঠ উদ্ধৃতো যস্মিন্ তদ্বীজকণ্ঠোদ্ধৃতং ফলম্| অত্র চ পূর্বনিপাতানিযম আহিতাগ্ন্যাদিপূর্বনিপাতবদ্বোধ্যঃ| এবম্ভূতং চ ফলং কষাযেণ সগুডেন পূরিতং রাত্রিব্যুষিতং কর্তব্যম্| উক্তং হি জতূকর্ণে- ধামার্গবকল্পে- “ধামার্গবফলেষূদ্ধৃতবীজমধ্যেষু সগুডোষিতাঃ কোবিদারাদিকষাযা নব” ইতি| গুল্মিনাং চাবস্থাযাং বমনং হিতমেব, তেনেহ গুল্মবিষযতযা বমনোপদর্শনং ন বিরোধি||৭-৮||-

Adhikarana 8 (9) · Śloka 9

দদ্যাদন্নেন সংযুক্তং ছর্দিহৃদ্রোগশান্তযে||৯||

দদ্যাদিত্যাদিনা একোঽন্নযোগ উচ্যতে| অন্নে চ ধামার্গবস্য সংযোগেনৈকো যোগঃ||৯||

Adhikarana 9 (10) · Śloka 10

চূর্ণৈর্বাঽপ্যুত্পলাদীনি ভাবিতানি প্রভূতশঃ| রসক্ষীরযবাগ্বাদিতৃপ্তো ঘ্রাত্বা বমেত্ সুখম্||১০||

চূর্ণৈরিত্যাদিনা ঘ্রেযে একযোগমাহ| উত্পলাদীনাং চাত্র ভেদোঽবিবক্ষিতঃ উত্পলস্যৈক এব ঘ্রেযযোগঃ| অত্র আদিশব্দেন সৌগন্ধিকপদ্মাদীনাং গ্রহণম্| প্রভূতশশ্চূর্ণৈর্ভাবিতানীতি জ্ঞেযম্||১০||

Adhikarana 10 (11-12) · Śloka 12

চূর্ণীকৃতস্য বর্তিং বা কৃত্বা বদরসম্মিতাম্| বিনীযাঞ্জলিমাত্রে তু পিবেদ্গোঽশ্বশকৃদ্রসে ||১১|| পৃষতর্ষ্যকুরঙ্গাহ্বগজোষ্ট্রাশ্বতরাবিকে| শ্বদংষ্ট্রখরখঙ্গানাং চৈবং পেযা শকৃদ্রসে ||১২||

চূর্ণীকৃতস্যেত্যাদিনা গোঽশ্বশকৃদ্রসে ইতি দ্বৌ যোগৌ| তথা পৃষতেত্যাদিদশযোগৈঃ সমং শকৃদ্রসযোগসম্বন্ধাদ্দ্বাদশ শকৃদ্যোগা উচ্যন্তে| পৃষতঃ বিন্দুচিত্রিতহরিণঃ; ঋষ্যঃ নীলাণ্ডঃ, কুরঙ্গঃ চঞ্চলগতিঃ, অশ্বতরঃ বেগসরঃ, শ্বদংষ্ট্রঃ চতুর্দংষ্ট্রো মৃগবিশেষঃ||১১-১২||

Adhikarana 11 (13-14) · Śloka 15

জীবকর্ষভকৌ বীরামাত্মগুপ্তাং শতাবরীম্| কাকোলীং শ্রাবণীং মেদাং মহামেদাং মধূলিকাম্||১৩|| একৈকশোঽভিসঞ্চূর্ণ্য সহ ধামার্গবেণ তে| শর্করামধুসংযুক্তা লেহা হৃদ্দাহকাসিনাম্||১৪|| সুখোদকানুপানাঃ স্যুঃ পিত্তোষ্মসহিতে কফে|১৫|

জীবকেত্যাদিনা দশ লেহানাহ| মধূলিকা ‘মর্কটহস্ত’ ইতি খ্যাতা| অত্র লেহেষু ধামার্গবাদিতরদ্রব্যচূর্ণস্য সমানত্বং; মধুশর্করযোশ্চ তাবতী মাত্রা যাবত্যা লেহত্বাপত্তির্ভবতি| পিত্তোষ্মসহিতে কফে ইতি উদ্যতোষ্মগুণেন পিত্তেন যুক্তে কফে; অন্যে তু পিত্তোষ্মশব্দেন পিত্তোষ্মণা কৃতং জ্বরমাহুঃ||১৩-১৪||-

Adhikarana 12 (15) · Śloka 15

ধান্যতুম্বুরুযূষেণ কল্কঃ সর্ববিষাপহঃ||১৫||

ধান্যেত্যাদিনৈকং কল্কযোগমাহ| ধান্যতুম্বরুক্বাথ এব ধান্যতুম্বুরুযূষঃ| উক্তং হি জতূকণ “ধান্যতুম্বুরুরসেন কল্কো বিষনুত্” ইতি||১৫|

Adhikarana 13 (16-17) · Śloka 18

জাত্যাঃ সৌমনসাযিন্যা রজন্যাশ্চোরকস্য চ| বৃশ্চীরস্য মহাক্ষুদ্রসহাহৈমবতস্য চ||১৬|| বিম্ব্যাঃ পুনর্নবাযা বা কাসমর্দস্য বা পৃথক্ | একং ধামার্গবং দ্বে বা কষাযে পরিমৃদ্য তু||১৭|| পূতং মনোবিকারেষু পিবেদ্বমনমুত্তমম্|১৮|

জাত্যা ইত্যাদিনা একাদশকষাযযোগানাহ| জাতী সৌমনস্যাযিনী, অন্যে যূথিকাং বদন্তি| বৃশ্চীরঃ শ্বেতপুনর্নবা| মহাসহা ক্ষুদ্রসহা মুদ্গমাষপর্ণ্যৌ| হৈমবতী বচা||১৬-১৭||-

Adhikarana 14 (18) · Śloka 18

তচ্ছৃতক্ষীরজং সর্পিঃ সাধিতং বা ফলাদিভিঃ||১৮||

তচ্ছৃতেত্যাদিনৈকং ঘৃতযোগমাহ||১৮||

Adhikarana 15 (19-20) · Śloka 20

তত্র শ্লোকৌ- পল্লবে নব চত্বারঃ ক্ষীর একঃ সুরাসবে| কষাযে বিংশতিঃ কল্কে দশ দ্বৌ চ শকৃদ্রসে||১৯|| অন্ন একস্তথা ঘ্রেযে দশ লেহাস্তথা ঘৃতম্| কল্পে ধামার্গবস্যোক্তাঃ ষষ্টির্যোগা মহর্ষিণা||২০||

পল্লবে নবেত্যাদিসঙ্গ্রহে ব্যুত্ক্রমসঙ্গ্রহাভিধানং ছন্দোঽনুরোধাত্| দশ দ্বৌ চেতি দ্বাদশেত্যর্থঃ||১৯-২০||

Adhikarana puShpikA · Śloka 4

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে কল্পস্থানে ধামার্গবকল্পো নাম চতুর্থোঽধ্যাযঃ||৪||

ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং কল্পস্থানে ধামার্গবকল্পো নাম চতুর্থোঽধ্যাযঃ||৪||