Adhikarana 1 (1-3) · Śloka 3
অথাতঃ সপ্তলাশঙ্খিনীকল্পং ব্যাখ্যাস্যামঃ||১||
ইতি হ স্মাহ ভগবানাত্রেযঃ||২||
সপ্তলা চর্মসাহ্বা চ বহুফেনরসা চ সা|
শঙ্খিনী তিক্তলা চৈব যবতিক্তাঽক্ষি(ক্ষ)পীডকঃ||৩||
View original
अथातः सप्तलाशङ्खिनीकल्पं व्याख्यास्यामः||१||
इति ह स्माह भगवानात्रेयः||२||
सप्तला चर्मसाह्वा च बहुफेनरसा च सा|
शङ्खिनी तिक्तला चैव यवतिक्ताऽक्षि(क्ष)पीडकः||३||
পূর্বাধ্যাযোক্তসম্বন্ধাদেব সপ্তলাশঙ্খিনীকল্পোঽভিধীযতে| ইহ চাধ্যাযে যে যোগা অভিধীযন্তে তে সপ্তলযা বা শঙ্খিন্যা বা উভাভ্যাং বা সম্পাদ্যন্তে শ্যামাত্রিবৃদ্যোগবত্||১-৩||
Adhikarana 2 (4-5) · Śloka 5
তে গুল্মগরহৃদ্রোগকুষ্ঠশোফোদরাদিষু|
বিকাসিতীক্ষ্ণরূক্ষত্বাদ্যোজ্যে শ্লেষ্মাধিকেষু তু||৪||
নাতিশুষ্কং ফলং গ্রাহ্যং শঙ্খিন্যা নিস্তুষীকৃতম্|
সপ্তলাযাশ্চ মূলানি গৃহীত্বা ভাজনে ক্ষিপেত্||৫||
View original
ते गुल्मगरहृद्रोगकुष्ठशोफोदरादिषु|
विकासितीक्ष्णरूक्षत्वाद्योज्ये श्लेष्माधिकेषु तु||४||
नातिशुष्कं फलं ग्राह्यं शङ्खिन्या निस्तुषीकृतम्|
सप्तलायाश्च मूलानि गृहीत्वा भाजने क्षिपेत्||५||
তে গুল্মেত্যাদি| তে সপ্তলাশঙ্খিন্যৌ||৪-৫||
Adhikarana 3 (6-8) · Śloka 8
অক্ষমাত্রং তযোঃ পিণ্ডং প্রসন্নালবণাযুতম্|
হৃদ্রোগে কফবাতোত্থে গুল্মে চৈব প্রযোজযেত্||৬||
প্রিযালপীলুকর্কন্ধুকোলাম্রাতকদাডিমৈঃ|
দ্রাক্ষাপনসখর্জূরবদরাম্লপরূষকৈঃ||৭||
মৈরেযে দধিমণ্ডেঽম্লে সৌবীরকতুষোদকে|
সীধৌ চাপ্যেষ কল্পঃ স্যাত্ সুখং শীঘ্রবিরেচনঃ||৮||
View original
अक्षमात्रं तयोः पिण्डं प्रसन्नालवणायुतम्|
हृद्रोगे कफवातोत्थे गुल्मे चैव प्रयोजयेत्||६||
प्रियालपीलुकर्कन्धुकोलाम्रातकदाडिमैः|
द्राक्षापनसखर्जूरबदराम्लपरूषकैः||७||
मैरेये दधिमण्डेऽम्ले सौवीरकतुषोदके|
सीधौ चाप्येष कल्पः स्यात् सुखं शीघ्रविरेचनः||८||
অক্ষমাত্রমিত্যাদিনা কল্কস্য প্রসন্নালবণযুক্তস্য প্রিযালাদিকষাযেষু ষোডশযোগা ভবন্তি| অত্র যদ্যপি মৈরেযৈক্ষবৌ ন কষাযৌ তথাঽপি বহুকষাযান্তর্গতত্বাত্ কষাযাবেব বক্তব্যৌ, সঙ্গ্রহে ‘কষাযা দশ ষট্’ ইত্যনেন ব্যপদিষ্টৌ| কষাযশব্দেন কল্ককষাযোঽভিপ্রেতঃ| কর্কন্ধূকোলবদরশব্দেন ত্রিপ্রকারবদরগ্রহণম্||৬-৮||
Adhikarana 4 (9-11) · Śloka 11
তৈলং বিদারিগন্ধাদ্যৈঃ পযসি ক্বথিতে পচেত্|
সপ্তলাশঙ্খিনীকল্কে ত্রিবৃচ্ছ্যামার্ধভাগিকে||৯||
দধিমণ্ডেন সন্নীয সিদ্ধং তত্ পাযযেত চ|
শঙ্খিনীচূর্ণভাগৌ দ্বৌ তিলচূর্ণস্য চাপরঃ||১০||
হরীতকীকষাযেণ তৈলং তত্পীডিতং পিবেত্|
অতসীসর্ষপৈরণ্ডকরঞ্জষ্বেষ সংবিধিঃ||১১||
View original
तैलं विदारिगन्धाद्यैः पयसि क्वथिते पचेत्|
सप्तलाशङ्खिनीकल्के त्रिवृच्छ्यामार्धभागिके||९||
दधिमण्डेन सन्नीय सिद्धं तत् पाययेत च|
शङ्खिनीचूर्णभागौ द्वौ तिलचूर्णस्य चापरः||१०||
हरीतकीकषायेण तैलं तत्पीडितं पिबेत्|
अतसीसर्षपैरण्डकरञ्जष्वेष संविधिः||११||
তৈলমিত্যাদিনা প্রথমস্তৈলযোগঃ| ত্রিবৃচ্ছ্যামার্ধভাগিকে ইতি সপ্তলাশঙ্খিনীকল্কযোরর্ধভাগেন ত্রিবৃচ্ছ্যামাকল্কো দেযঃ| শঙ্খিনীত্যাদিনা পঞ্চতৈলযোগানাহ, এবং ষট্তৈলযোগা ভবন্তি| তৈলং তত্পীডিতমিতি শঙ্খিনীচূর্ণং তিলচূর্ণং চ হরীতকীকষাযেণ সন্ধায পীডিতং তত্ তৈলং পিবেদিতি| অতস্যাদিষ্বেষ সংবিধিরিতি বচনেন তিলস্থানেঽতস্যাদীনাং প্রযোগং বিধত্তে||৯-১১||
Adhikarana 5 (12-16) · Śloka 16
শঙ্খিনীসপ্তলাসিদ্ধাত্ ক্ষীরাদ্যদুদিযাদ্ঘৃতম্|
কল্কভাগে তযোরেব ত্রিবৃচ্ছ্যামার্ধসংযুতে||১২||
ক্ষীরেণালোড্য সম্পক্বং পিবেত্তচ্চ বিরেচনম্|
দন্তীদ্রবন্ত্যোঃ কল্পোঽযমজশৃঙ্গ্যজগন্ধযোঃ||১৩||
ক্ষীরিণ্যা নীলিকাযাশ্চ তথৈব চ করঞ্জযোঃ|
মসূরবিদলাযাশ্চ প্রত্যক্পর্ণ্যাস্তথৈব চ||১৪||
দ্বিবর্গার্ধাংশকল্কেন তদ্বত্ সাধ্যং ঘৃতং পুনঃ|
শঙ্খিনীসপ্তলাধাত্রীকষাযে সাধযেদ্ঘৃতম্ ||১৫||
ত্রিবৃত্কল্পেন সর্পিশ্চ ত্রযো লেহাশ্চ লোধ্রবত্ |
সুরাকম্পিল্লযোর্যোগঃ কার্যো লোধ্রবদেব চ||১৬||
View original
शङ्खिनीसप्तलासिद्धात् क्षीराद्यदुदियाद्घृतम्|
कल्कभागे तयोरेव त्रिवृच्छ्यामार्धसंयुते||१२||
क्षीरेणालोड्य सम्पक्वं पिबेत्तच्च विरेचनम्|
दन्तीद्रवन्त्योः कल्पोऽयमजशृङ्ग्यजगन्धयोः||१३||
क्षीरिण्या नीलिकायाश्च तथैव च करञ्जयोः|
मसूरविदलायाश्च प्रत्यक्पर्ण्यास्तथैव च||१४||
द्विवर्गार्धांशकल्केन तद्वत् साध्यं घृतं पुनः|
शङ्खिनीसप्तलाधात्रीकषाये साधयेद्घृतम् ||१५||
त्रिवृत्कल्पेन सर्पिश्च त्रयो लेहाश्च लोध्रवत् |
सुराकम्पिल्लयोर्योगः कार्यो लोध्रवदेव च||१६||
শঙ্খিনীসপ্তলেত্যাদি প্রথমং ঘৃতম্| দন্তীদ্রবন্ত্যোরিত্যাদিনা দ্বিদ্বিদ্রব্যকল্কেন সপ্তলাশঙ্খিনীকল্কার্ধেন পূর্বঘৃতবত্পাকাচ্চ পঞ্চঘৃতযোগা অপরে| দ্রবন্তী দন্তীভেদঃ| অজশৃঙ্গী বিষাণিকা| ক্ষীরিণী দুগ্ধিকা| মসূরবিদলা শ্যামলতা| প্রত্যক্পর্ণী মূষিকপর্ণী| দ্বিবর্গার্ধাংশকল্কেনেতি দন্ত্যাদিদ্বিবর্গশঙ্খিনীসপ্তলার্ধভাগিকেন কল্কেন| শঙ্খিনীত্যাদিনা সপ্তমং ঘৃতং, ত্রিবৃত্কল্কেনেত্যাদ্যষ্টমং ঘৃতম্| অত্র ত্বধিকৃতত্বাত্ সপ্তলাশঙ্খিন্যোর্দ্বিগুণঃ কষাযো বিধীযতে| লোধ্রবদিতি লোধ্রকল্পবত্; লোধ্রকল্পে যথা ত্রযো লেহাঃ “চতুরঙ্গুলকল্পেন” (ক.অ.৯) ইত্যাদিনোক্তাঃ, তেন লোধ্রস্থানে সপ্তলাশঙ্খিনীযোগঃ কর্তব্যঃ| তথা সুরাযোগঃ কম্পিল্লযোগশ্চ লোধ্রবদিতি অত্রাপি লোধ্রস্থানে সপ্তলাশঙ্খিনীপ্রক্ষেপঃ কর্তব্যঃ||১২-১৬||
Adhikarana 6 (17) · Śloka 17
দন্তীদ্রবন্ত্যোঃ কল্পেন সৌবীরকতুষোদকে|
অজগন্ধাজশৃঙ্গ্যোশ্চ তদ্বত্ স্যাতাং বিরেচনে||১৭||
View original
दन्तीद्रवन्त्योः कल्पेन सौवीरकतुषोदके|
अजगन्धाजशृङ्ग्योश्च तद्वत् स्यातां विरेचने||१७||
দন্তীদ্রবন্ত্যোরিত্যাদিনা সন্ধানচতুষ্টযমাহ| এতত্ সন্ধানচতুষ্টযং পূর্বসুরাযোগেন সমং ‘পঞ্চ মদ্যে” ইতি বচনেন সঙ্গ্রহগৃহীতং; সৌবীরকাদীনাং চ মদ্যশব্দেনাভিধানমিহাসূতত্বসামান্যাজ্জ্ঞেযম্| দন্তীদ্রবন্ত্যোঃ কল্পেনেতি অনাগতাবেক্ষণেন দন্তীদ্রবন্তীকল্পে সৌবীরকতুষোদকে যে বক্তব্যে তদ্বিধানমিহাপ্যতিদিশতি| তত্র “অজগন্ধাকষাযেণ সৌবীরকতুষোদকে” (ক.অ.১২) ইতি বক্তব্যং, তেনেহাপ্যজগন্ধাকষাযযুক্তসপ্তলাশঙ্খিন্যোঃ সৌবীরকতুষোদকে কর্তব্যে| অত্র “তথা দন্তীদ্রবন্ত্যোশ্চ কষাযে সাজগন্ধযোঃ| গৌডঃ কার্যোঽজশৃঙ্গ্যা চ স বৈ সুখবিরেচনঃ” (ক.অ.১২) ইত্যনেনোক্তস্য গৌডারিষ্টস্য দন্তীদ্রবন্তীকল্পোক্তস্য বিধানমতিদিশতি||১৭||
Adhikarana 7 (18-19) · Śloka 19
তত্র শ্লোকৌ- কষাযা দশ ষট্ চৈব ষট্ তৈলেঽষ্টৌ চ সর্পিষি|
পঞ্চ মদ্যে ত্রযো লেহা যোগঃ কম্পিল্লকে তথা||১৮||
সপ্তলাশঙ্খিনীভ্যাং তে ত্রিংশদুক্তা নবাধিকাঃ|
যোগাঃ সিদ্ধাঃ সমস্তাভ্যামেকশোঽপি চ তে হিতাঃ||১৯||
View original
तत्र श्लोकौ- कषाया दश षट् चैव षट् तैलेऽष्टौ च सर्पिषि|
पञ्च मद्ये त्रयो लेहा योगः कम्पिल्लके तथा||१८||
सप्तलाशङ्खिनीभ्यां ते त्रिंशदुक्ता नवाधिकाः|
योगाः सिद्धाः समस्ताभ्यामेकशोऽपि च ते हिताः||१९||
কষাযা ইত্যাদিসঙ্গ্রহো ব্যাকৃতঃ||১৮-১৯||
Adhikarana puShpikA · Śloka 11
ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে কল্পস্থানে সপ্তলাশঙ্খিনীকল্পো নামৈকাদশোঽধ্যাযঃ||১১||
View original
इत्यग्निवेशकृते तन्त्रे चरकप्रतिसंस्कृतेऽप्राप्ते दृढबलसम्पूरिते कल्पस्थाने सप्तलाशङ्खिनीकल्पो नामैकादशोऽध्यायः||११||
ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং কল্পস্থানে সপ্তলাশঙ্খিনীকল্পো নামৈকাদশোঽধ্যাযঃ||১১||