1. jvaranidānam

Adhikarana 1 (1-2) · Śloka 2

অথাতো জ্বরনিদানং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

সঙ্ক্ষেপেণ হেতুলিঙ্গাভিধাযকং সূত্রস্থানমনু প্রপঞ্চেন হেতুলিঙ্গাভিধাযকং নিদানস্থানমুচ্যতে; হেতুলিঙ্গজ্ঞানপূর্বিকা হি চিকিত্সা সাধ্বী ভবতি| যচ্চ চিকিত্সাসূত্রমাত্রমভিধাতব্যং, তদুপশযান্তর্গতমেবেতি কৃত্বা; কিংবা, হেতুলিঙ্গাভিধানস্যাপি চিকিত্সার্থত্বাচ্চিকিত্সাসূত্রমাত্রাভিধানমিহ | তত্রাপি চ শারীরবিকারেষু প্রধানত্বাজ্জ্বরস্যৈব নিদানমাদাবুচ্যতে| যথা চ জ্বরঃ প্রধানং তথাঽত্রৈব ‘জ্বরস্তু খলু’ ইত্যাদিনা বক্ষ্যতি; তথা চিকিত্সিতেঽপি বক্ষ্যতি- “দেহেন্দ্রিযমনস্তাপী সর্বরোগাগ্রজো বলী” (চি.অ.৩) ইত্যাদি| যত্তু বক্ষ্যতি- “পুরা গুল্মোত্পত্তিরভূত্” (নি.অ.৮) ইতি; তত্র পুরাশব্দ আদ্যাবির্ভাবে গুল্মস্য বর্ততে, নতু জ্বরস্য প্রাগ্ভাবে; দক্ষাধ্বরোদ্ধ্বংসে হি জ্বরপরিগৃহীতানাং প্রাণিনাং দিক্ষু বিদ্রাবণাদিনা গুল্মোত্পত্তেরুক্তত্বাত্| নিদানং কারণমিহোচ্যতে, তচ্চেহ ব্যাধিজনকং ব্যাধিবোধকং চ সামান্যেনোচ্যতে| তত্র ব্যাধিজনকং নিদানং হেতুঃ, ব্যাধিবোধকং চ কারণং নিদানপূর্বরূপরূপোপশযসম্প্রাপ্তিরূপম্| তত্র হেতুরূপং নিদানং জনকং চ ভবতি, ব্যাধের্বোধকং চ ভবতি| অত এব প্রথমম্ ‘ইহ খলু’ ইত্যাদিনা হেতুমভিধায তস্যোপলব্ধির্নিদানেত্যাদিনা পুনর্হেতুরপ্যুক্তঃ| জ্বরস্য নিদানং জ্বরনিদানম্| কিংবা, নিদানশব্দো জনককারণবচন এব; তং জ্বরস্য জনককারণং নিদানমধিকৃত্য কৃতোঽধ্যাযো জ্বরনিদানম্| তেন পূর্বরূপাদীনামপি জ্ঞপ্তিহেতূনাং তথা চিকিত্সাসূত্রস্য চ গ্রহণম্||১-২||

Adhikarana 2 (3) · Śloka 3

ইহ খলু হেতুর্নিমিত্তমাযতনং কর্তা কারণং প্রত্যযঃ সমুত্থানং নিদানমিত্যনর্থান্তরম্| তত্ত্রিবিধম্- অসাত্ম্যেন্দ্রিযার্থসংযোগঃ, প্রজ্ঞাপরাধঃ, পরিণামশ্চেতি||৩||

তদেবং জ্বরনিদানে বক্তব্যে সর্বব্যাধিসাধারণমেব নিদানং বক্তুমুদ্যতঃ সামান্যপূর্বকত্বাদ্বিশেষস্য, তত্রাপ্যুত্পন্নস্য ব্যাধের্লক্ষণং যুক্তমিতি কৃত্বা উত্পত্তিহেতুমেব ব্যবহারার্থং লক্ষণার্থং চ পর্যাযৈরাহ- ইহ খল্বিত্যাদি| ইহেতি ইহ প্রকরণে কারণাভিধাযকে হেত্বাদযোঽনর্থান্তরে ; প্রকরণান্তরে অর্থান্তরেঽপি হেত্বাদিশব্দা ভবন্তীতি দর্শযতি; যথা- বক্ষ্যতি- “হেতুরকৃতকত্বাত্” (বি.অ.৮) ইতি, তথা “দশৈবাযতনানি স্যুঃ” (সূ.অ.২৯), তথা “কর্তা, মন্তা, বেদিতা, বোদ্ধা” (শা.অ.৪) ইত্যাদৌ, প্রত্যযস্য লডাদৌ, উত্থানস্য উদ্গমনাদৌ| হেত্বাদিভূরিপর্যাযকথনং শাস্ত্রে ব্যবহারার্থং, তথা হেত্বাদিশব্দানামর্থান্তরেঽপি বর্তমানত্বে পর্যাযান্তরেণ সমং সামানাধিকরণ্যাত্ কারণ এব বৃত্তির্নিযম্যতে; তেন, একস্মিন্নর্থে যস্মিংস্তে শব্দাঃ প্রবর্তন্তে তত্ কারণমিতরহেত্বাদ্যর্থেভ্যো ব্যবচ্ছিদ্যতে; তেন, লক্ষণার্থং চ পর্যাযাভিধানং ভবতি| এবমন্যত্রাপি ব্যাধ্যাদিপর্যাযাভিধানেঽপি ব্যাখ্যেযম্| ইহ চাষ্টসঙ্খ্যাযা মঙ্গলত্বেন, তথাঽষ্টবিধব্যাধিজ্বরাদ্যভিধানানুষঙ্গাচ্চাষ্টাবেব হেতুপর্যাযা উক্তাঃ; তেনাপরেঽপি যোনিমূলমুখপ্রকৃত্যাদযো হেতুপর্যাযা বোদ্ধব্যাঃ, তে চ তন্ত্রবিস্তরভযান্নোক্তাঃ| এবং রোগপর্যাযান্তরানভিধানেঽপি গ্রন্থবিস্তরভযাদ্যনুসরণীযম্| হেতোর্ভেদমাহ- তত্ ত্রিবিধমিত্যাদি| এতচ্চাসাত্ম্যেন্দ্রিযার্থসংযোগাদি দীর্ঘঞ্জীবিতীযে তিস্রৈষণীযে চ প্রপঞ্চিতমিতি নেহ প্রপঞ্চ্যতে| অত্র পাঠাদেব ত্রিত্বে সিদ্ধে ত্রিবিধমিতিবচনং বহুপ্রপঞ্চস্যাপ্যসাত্ম্যেন্দ্রিযার্থসংযোগাদেস্ত্রৈবিধ্যানতিক্রমোপদর্শনার্থং, তথা প্রত্যেকমযোগাতিযোগমিথ্যাযোগভেদাত্ত্রিবিধত্বদর্শনার্থং চ| এতচ্চ হেতুত্রিতযমুক্তমপি পুনঃ প্রকরণবশাদুচ্যমানমিহ ন পুনরুক্তং দোষমাবহতি| এতচ্চাসাত্ম্যেন্দ্রিযার্থাদেস্ত্রৈবিধ্যং মূলকারণং প্রতি নিযামকং, তেন “জ্বরসন্তাপাদ্রক্তপিত্তমুদীর্যতে” (নি.অ.৮) ইত্যাদ্যুক্তরোগাদিরূপপ্রত্যাসন্নকারণানবরোধো নোদ্ভাবনীযঃ| কিংবা, রক্তপিত্তাদিকারণে জ্বরাদাবপ্যসাত্ম্যেন্দ্রিযার্থসংযোগাদ্যেব মূলকারণং, তেন জ্বরাদিকার্যে রক্তপিত্তাদৌ জ্বরাদিকারণমেব মূলকারণং ভবতি| “কালবুদ্ধীন্দ্রিযার্থানাং যোগো মিথ্যা ন চাতি চ” (সূ.অ.১) ইতি পূর্বোক্তক্রমভেদেনেহাসাত্ম্যেন্দ্রিযার্থসংযোগস্যাদাবভিধানেন সর্বেষামেবৈষাং রোগকর্তৃত্বে প্রাধান্যং দর্শযতি, মা ভূদেকান্তাভিধানেন প্রধানতানিযমঃ| যদ্যপি চ মূলভূতত্বেন প্রজ্ঞাপরাধঃ প্রধানং ভবতি , তথাঽপি প্রত্যাসন্নকারণত্বেন তথাঽবুদ্ধিপূর্বকস্যাপ্যুত্কটশব্দমিথ্যাযোগাদেরপি কারণত্বেনাসাত্ম্যেন্দ্রিযার্থসংযোগোঽপি প্রধানম্| যদ্যপি কালো দুষ্পরিহরত্বেন প্রধানং, তথাঽপি সোঽপীন্দ্রিযার্থপরাধীনত্বেনাপ্রধানং, কালাতিযোগাদযো হীন্দ্রিযার্থশীতাদ্যতিযোগাদিভ্য এব প্রাযো ভবন্তি||৩||

Adhikarana 3 (4) · Śloka 4

অতস্ত্রিবিধা ব্যাধযঃ প্রাদুর্ভবন্তি- আগ্নেযাঃ, সৌম্যাঃ, বাযব্যাশ্চ; দ্বিবিধাশ্চাপরে- রাজসাঃ, তামসাশ্চ||৪||

হেতোর্হেতুত্বং কার্যে ভবতীতি হেতুকার্যং ব্যাধিমাহ- অতস্ত্রিবিধা ইত্যাদি| ন চাত্র যথাসঙ্খ্যম্, একরূপাদপি হেতোস্ত্রিবিধব্যাধ্যুত্পাদাত্| অত্রাপি ত্রিবিধবচনমানন্ত্যেঽপি রোগাণামাগ্নেযত্বাদ্যনতিক্রমোপদর্শনার্থম্| আগ্নেযাঃ পৈত্তিকাঃ, সৌম্যাঃ কফজাঃ, বাযব্যাঃ বাতজাঃ| যদ্যপি প্রধানত্বেন বাযব্যা এব প্রথমং নির্দেষ্টুং যুজ্যন্তে, তথাঽপীহ জ্বরে পিত্তস্য প্রধানত্বাদাগ্নেযাভিধানম্| আগ্নেযসৌম্যবাযব্যা ইতি সমাসেনৈকৈকস্মাদপ্যসাত্ম্যেন্দ্রিযার্থসংযোগাদেস্ত্রিবিধরোগোত্পত্তিত্বং দর্শযতি, অসমাসে হি যথাসঙ্খ্যমপি শঙ্ক্যেত| অন্যথাঽপি ব্যাধীনুক্তহেতুজানাহ- দ্বিবিধাশ্চাপরে ইত্যাদি| রাজসতামসানাং চ বিচ্ছিদ্য পাঠেনেহ তন্ত্রে শারীরব্যাধ্যধিকারপ্রবৃত্তেঽনধিকারত্বেনাপ্রপঞ্চনীযত্বং দর্শযতি, অভিধানং চ রাজসতামসযোরিহ ব্যাধিকথনস্য ন্যূনতাপরিহারার্থম্| আগন্তবশ্চাভিঘাতাদিজা রোগা আগ্নেযাদিষ্বেবান্তর্ভবন্তি; যতস্তত্রাপি হি দোষপ্রকোপোঽব্যপদেশ্যোঽস্ত্যেব; কিংবা, অপরে ইতি অপ্রধানাঃ, পরো হি শ্রেষ্ঠ উচ্যতে; অপ্রধানত্বে চোক্তৈবোপপত্তিঃ||৪||

Adhikarana 4 (5) · Śloka 5

তত্র ব্যাধিরামযো গদ আতঙ্কো যক্ষ্মা জ্বরো বিকারো রোগ ইত্যনর্থান্তরম্||৫||

ব্যাধীনামাগ্নেযাদিবিভাগং দর্শযিত্বা ব্যবহারার্থং লক্ষণার্থং চ পর্যাযানাহ- তত্র ব্যাধিরিত্যাদি| অত্রাপি পর্যাযাণামনর্থান্তরেণাতঙ্কাদিশব্দানাং ভযাদ্যর্থতাব্যুদাসাদ্ব্যাধিলক্ষণত্বং বোধ্যম্| আতঙ্কশব্দেন হি ভযমপ্যুচ্যতে, বিকারশব্দেন হি ইন্দ্রিযাদযোঽপি ষোডশ বিকারা উচ্যন্তে| তথা ব্যাধ্যাদিশব্দানাং ব্যুত্পত্ত্যা রোগধর্মা লক্ষণীযাঃ| তথা হি- বিবিধং দুঃখমাদধাতীতি ব্যাধিঃ; প্রাযেণামসমুত্থত্বেনাময ইত্যুচ্যতে; আতঙ্ক ইতি দুঃখযুক্তত্বেন কৃচ্ছ্রজীবনং করোতি, বচনং হি- “আতঙ্কঃ কৃচ্ছ্রজীবনে” ইতি; যক্ষ্মশব্দেন চ রাজযক্ষ্মবদনেকরোগযুক্তত্বং বিকারাণাং দর্শযতি; জ্বরশব্দেন চ দেহমনঃসন্তাপকরত্বং; বিকারশব্দেন চ শরীরমনসোরন্যথাকরণত্বং ব্যাধের্দর্শযতি; রোগশব্দেন চ রুজাকর্তৃত্বম্||৫||

Adhikarana 5 (6) · Śloka 6

তস্যোপলব্ধির্নিদানপূর্বরূপলিঙ্গোপশযসম্প্রাপ্তিতঃ||৬||

ইদানীং ব্যাধের্জনকহেতুমভিধায তথা তদ্ধেতুজন্যং চ ব্যাধিমুক্ত্বা তস্য ব্যাধের্জ্ঞানোপাযমাহ- তস্যেত্যাদি| অবিজ্ঞাতে হি ব্যাধৌ চিকিত্সা ন প্রবর্ততে, অতঃ সামান্যেন ব্যাধিজ্ঞানোপাযনিদানপঞ্চকাভিধানং যুক্তম্||৬||

Adhikarana 6 (7) · Śloka 7

তত্র নিদানং কারণমিত্যুক্তমগ্রে||৭||

নিদানং বিবৃণোতি- তত্রেত্যাদি| অগ্রে উক্তমিতি ‘ইহ খলু’ ইত্যাদিনা ‘পরিণামশ্চ’ ইত্যন্তেন| কারণং চ ব্যাধীনাং সন্নিকৃষ্টং বাতাদি, বিপ্রকৃষ্টং চার্থানামযোগাদি; পুনর্বিপ্রকৃষ্টং কারণং রক্তপিত্তস্য জ্বরসন্তাপ ইত্যাদি; পুনশ্চ ব্যাধীনাং সামান্যেন বিপ্রকৃষ্টং কারণমুক্তং যথা- “প্রাগপি চাধর্মাদৃতে ন রোগোত্পত্তিরভূত্” (বি.অ.৩) ইত্যাদি; তদেতত্ সর্বমপি কারণশব্দেন গ্রাহ্যম্| তত্রাধর্মকার্যত্বেন ব্যাধীনাং দৈবব্যপাশ্রযপ্রাযশ্চিত্তবলিমঙ্গলেত্যাদিচিকিত্সাসাধ্যত্বং প্রতীযতে, রুদ্রকোপভবত্বেন চ জ্বরস্য মহাপ্রভাবত্বং তথাঽঽগ্নেযত্বং চ প্রতীযতে; ক্রোধো হ্যাগ্নেযঃ, তেন তন্মযো জ্বরোঽপ্যাগ্নেযঃ| তথাচ বচনম্- “ঊষ্মা পিত্তাদৃতে নাস্তি জ্বরো নাস্ত্যূষ্মণা বিনা| তস্মাত্ পিত্তবিরুদ্ধানি ত্যজেত্ পিত্তাধিকেঽধিকম্” (বা.চি.অ.১) ইতি| বাতাদিজন্যত্বজ্ঞানেন চ বাতাদিবিপরীতভেষজসাধ্যত্বং তথাঽনুদ্ভূতবাতাদিবিকারান্তরসম্বন্ধোঽপি ভাবী কল্প্যতে| অসাত্ম্যরূক্ষাদিহেতুসেবাদর্শনেন চ ভাবী ব্যাধিস্তজ্জন্য উন্নীযতে| ব্যাধিপরীক্ষাযাং চ সন্দেহে জাতে যস্য ব্যাধের্হেতুসেবা দৃশ্যতে, স পরিকল্প্যতে; এবমাদি হেতুনা ব্যাধিপরীক্ষণম্||৭||

Adhikarana 7 (8) · Śloka 8

পূর্বরূপং প্রাগুত্পত্তি লক্ষণং ব্যাধেঃ||৮||

নিদানানন্তরীযকত্বাত্ পূর্বরূপাদীনাং নিদানানন্তরং পূর্বরূপাদীন্যুচ্যন্তে , অতঃ পূর্বরূপলক্ষণমাহ- পূর্বেত্যাদি| উত্পত্তেঃ প্রাক্ প্রাগুত্পত্তি| এতেন উত্পত্তেঃ পূর্বং যদ্ভবিষ্যদ্ব্যাধের্লক্ষণং তত্ পূর্বরূপম্| নিদানসেবা তু ভাবিব্যাধিবোধিকা ভবত্যপি নিদানশব্দগৃহীতত্বাদেব তথা লক্ষণশব্দানভিধেযত্বাচ্চ ন পূর্বরূপশব্দেনোচ্যতে| উক্তং হ্যন্যত্র- “স্থানসংশ্রযিণঃ ক্রুদ্ধা ভাবিব্যাধিপ্রবোধকম্| লিঙ্গং কুর্বন্তি যদ্দোষাঃ পূর্বরূপং তদুচ্যতে” ইতি| ন চ বাচ্যং যদনুত্পন্নস্যাবিদ্যমানস্য ব্যাধেঃ কথং লক্ষণং ভবতীতি; যতো মেঘাদপি ভাবিনী বৃষ্টিরনুমীযতে, তথা রোহিণ্যুদযং দৃষ্ট্বা কৃত্তিকোদযোঽনুমীযতে| তচ্চ পূর্বরূপং দ্বিবিধম্- একং ভাবিব্যাধ্যব্যক্তরূপং, যদুক্তম্- “অব্যক্তং লক্ষণং তস্য পূর্বরূপমিতি স্মৃতম্” (চি.অ.১১) ইতি, তথা “লিঙ্গমব্যক্তমল্পত্বাদ্ব্যাধীনাং তদ্যথাযথম্” (বা. নি. অ.১) ইতি ; দ্বিতীযং তু দোষদূষ্যসম্মূর্চ্ছনাবস্থাজন্যমব্যক্তলিঙ্গাদন্যদেব; যথা- জ্বরে বালপ্রদ্বেষরোমহর্ষাদি; ন হ্যেতত্ পূর্বরূপং জ্বরাবস্থাযাং নিযমেন ব্যক্তং ভবতি, কিন্তু জ্বরপূর্বকাল এব; যত্র তু ব্যক্তং ভবতি, স চাসাধ্যো মতঃ| অত এবৈবম্ভূতপূর্বরূপাভিপ্রাযেণৈবারিষ্টে বক্ষ্যতি- “পূর্বরূপাণি সর্বাণি জ্বরোক্তান্যতিমাত্রযা| যং বিশন্তি বিশত্যেনং মৃত্যুর্জ্বরপুরস্সরঃ” (ইং.অ.৫) ইতি; তথা- “অন্যস্যাপি চ রোগস্য পূর্বরূপাণি যং নরম্| বিশন্ত্যনেন কল্পেন তস্যাপি মরণং ধ্রুবম্” (ইং.অ.৫) ইতি| এতদ্ধি যদ্যব্যক্তলক্ষণপূর্বরূপাভিপ্রাযেণ বচনং স্যাত্তদা সর্বজ্বরাণামসাধ্যত্বং স্যাত্, যতঃ পূর্বরূপাবস্থাযামব্যক্তানি লক্ষণানি জ্বরে জাতে ব্যক্তানি সর্বাণি সর্বত্রৈব ভবন্তি; তস্মাত্ পূর্বরূপাবস্থাপ্রতিনিযতপূর্বরূপাভিপ্রাযেণৈবৈতদ্বচনম্| অব্যক্ততা চ লক্ষণানামিযমেব- যদল্পত্বেনাস্ফুটত্বম্| যত্তু পূর্বরূপং দোষদূষ্যসম্মূর্চ্ছনাবস্থানিযতং তদ্ ব্যাধিমাত্রস্য গমকং, ন তদ্দোষবিশেষং গমযতি| এতত্পূর্বরূপাভিপ্রাযেণ চ বাগ্ভটেঽপ্যুক্তং যত্- “প্রাগ্রূপং যেন লক্ষ্যতে| উত্পিত্সুরামযো দোষবিশেষেণানধিষ্ঠিতঃ ” (বা. নি.অ.১) ইতি| যত্তু অব্যক্তলিঙ্গং রূপং পূর্বরূপং, তদ্দোষবিশেষমপি ব্যাধের্গমযতি, যদুক্তং হারীতে- “ইতি পূর্বরূপমষ্টানাং জ্বরাণাং সামান্যতঃ, বিশেষতস্তু জৃম্ভাঙ্গমর্দভূযিষ্ঠং হৃদযোদ্বেগি বাতজম্” ইত্যাদি, তথা সুশ্রুতেঽপ্যুক্তং- “সামান্যতো, বিশেষাত্তু জৃম্ভাঽত্যর্থং সমীরণাত্| পিত্তান্নযনযোর্দাহঃ কফান্নান্নাভিনন্দনম্” (সু.উ.অ.৩৯) ইতি, এতদ্ধি পূর্বরূপং ভাবিজ্বরলিঙ্গমেবাব্যক্তমল্পত্বেনেতি জ্ঞেযম্| ব্যক্তে হি জ্বরে বাতাদিজে জৃম্ভাদযঃ পূর্বরূপাপেক্ষযাঽত্যর্থং ভবন্তি| এবং পূর্বরূপদ্বৈবিধ্যে যত্র বিশিষ্টং পূর্বরূপমস্তি তত্র সাক্ষাদেবাভিধীযতে, যত্র বিশিষ্টং নাস্তি তত্র লিঙ্গমাত্রং বক্ষ্যতি; তেনাব্যক্তান্যেব লিঙ্গানি পূর্বরূপমিতি তত্র জ্ঞাতব্যম্ ||৮||

Adhikarana 8 (9) · Śloka 9

প্রাদুর্ভূতলক্ষণং পুনর্লিঙ্গম্| তত্র লিঙ্গমাকৃতির্লক্ষণং চিহ্নং সংস্থানং ব্যঞ্জনং রূপমিত্যনর্থান্তরম্||৯||

লক্ষণমাহ- প্রাদুর্ভূতেত্যাদি| উত্পন্নব্যাধেঃ স্বরূপং, তথা বাতাদ্যামপক্বাদিবিশেষণবিশিষ্টং ব্যাধিং নিদানোপশযসম্প্রাপ্তিব্যতিরিক্তং যদ্বোধযতি, তল্লিঙ্গম্| অনেন চ ব্যাধিপ্রতিনিযতং লিঙ্গং যথা- জ্বরস্য সন্তাপঃ, তথা অতিসরণমতীসারস্যেত্যাদি গৃহ্যতে; তথা বাতাদিকৃতং চ বাতাদিজ্বরস্য বিষমারম্ভবিসর্গিত্বাদি গৃহ্যতে; তথা আমপক্বজীর্ণজ্বরলক্ষণাদীনি বিশিষ্টব্যাধিবোধকানি গৃহ্যন্তে; তথা উপদ্রবাশ্চাসাধ্যতাদ্যবস্থাপন্নব্যাধিবোধকত্বেন লক্ষণান্যেব| রিষ্টং তু মরণস্য পূর্বরূপমেব| নিদানাদযস্তু যদ্যপ্যুত্পন্নব্যাধিগমকা অপি ভবন্তি, তথাঽপি পৃথগ্লক্ষণানির্দেশান্ন তে ইহ লিঙ্গশব্দেনোচ্যন্তে| ব্যবহারার্থং তথা লক্ষণার্থং চ লিঙ্গপর্যাযানাহ- তত্র লিঙ্গমিত্যাদি| অস্মিন্নর্থেঽনর্থান্তরমিতি লিঙ্গলক্ষণেঽর্থেঽভিধেযেঽনর্থান্তরং, প্রকরণান্তরে ত্বর্থান্তরেঽপি লিঙ্গাদযো ভবন্তি; যথা- “বলী লিঙ্গং সমর্পযেত্” (চি.অ.২) ইত্যত্র শেফ উচ্যতে, তথা “সংস্থানমাকৃতির্জ্ঞেযা সুষমা বিষমা চ যা” (ই.অ.৭); তথা “লক্ষণবচ্চোদাহরণবচ্চ” (বি.অ.৮), তথা “তৈলসর্পির্ভ্যাং ব্যঞ্জনান্যুপকল্পযেত্”, তথা “রূপস্য সত্ত্বস্য চ সন্ততির্যা” (শা.অ.২) ইত্যাদৌ| ননু, যথেহ ‘অস্মিন্নর্থে’ ইত্যুক্তং তথা হেতুব্যাধিসম্প্রাপ্তিপর্যাযাভিধানেঽপি ‘অস্মিন্নর্থে’ ইতি বক্তব্যম্| ন, হেতুপর্যাযাভিধানে তাবত্ ‘ইহ খলু’ ইত্যনেনৈব তদর্থ উক্ত এব, সম্প্রাপ্তিপর্যাযকথনে চ ব্যাধেরিতি পদেনৈব ‘অস্মিন্নর্থে’ ইতিপদস্যার্থো লভ্যত এব, গদপর্যাযেষু তু নার্থান্তরতা প্রাযো দৃশ্যতে, তেন তত্র ‘অস্মিন্নর্থে’ ইতি ন কৃতম্| অযং চাচার্যাভিপ্রাযো যত্- যত্রান্যার্থতাং শব্দস্য পশ্যতি, তত্রৈব ‘অস্মিন্নর্থে’ ইতি করোতি, যথা- ‘সমবেতানাং পুনর্দোষাণামংশাংশবিকল্পো বিকল্পোঽস্মিন্নর্থে’ ইতি| বিকল্পশব্দো হ্যযমন্যত্রাপি বর্ততে, যথা- “অন্যৈশ্চ বিকল্পৈর্বিকল্পিতানাং” (বি.অ.১), তথা “বিকল্পো ন ত্বসাধ্যানাং” (সূ.অ.১০) ইত্যাদি| ননু পূর্বরূপোপশযযোঃ কিমিতি পর্যাযানভিধানম্? ব্রূমঃ- পূর্বরূপস্য তাবত্ পর্যাযাভিধানং যদেব রূপস্য তদেব; যতঃ, রূপাদয এব হি পূর্বশব্দযুক্তাঃ পূর্বরূপপর্যাযা ভবন্তি; উপশযস্তু চিকিত্সা, তস্যাস্তু পর্যাযাশ্চিকিত্সিত এব স্বাধিকারত্বেন বক্তব্যা ইতি নেহ পুনরুক্তাঃ||৯||

Adhikarana 9 (10) · Śloka 10

উপশযঃ পুনর্হেতুব্যাধিবিপরীতানাং বিপরীতার্থকারিণাং চৌষধাহারবিহারাণামুপযোগঃ সুখানুবন্ধঃ||১০||

উপশযমাহ- উপশয ইত্যাদি| উপশযনমুপশযঃ সুখানুবন্ধ ইত্যর্থঃ| হেতুনা, তথা ব্যাধিনা, তথা হেতুব্যাধিভ্যাং চ বিপরীতা হেতুব্যাধিবিপরীতাঃ; তেষামৌষধাহারবিহারাণাং, তথা হেতুব্যাধিবিপরীতার্থকারিণাং চৌষধান্নবিহারাণাং; সুখানুবন্ধ ইতি সুখরূপোঽনুবন্ধঃ, অনুবন্ধশ্চ সুখকারণমিত্যর্থঃ | অযং চোপশযো গূঢলিঙ্গে চ ব্যাধৌ জ্ঞানোপাযো ভবতি| যদুক্তং- “গূঢলিঙ্গং ব্যাধিমুপশযানুপশযাভ্যাং পরীক্ষেত” (বি.অ.৪) ইতি; উক্তং চ ত্রিশোথীযে- “স্নেহোষ্ণমর্দনাভ্যাং চ প্রণশ্যেত্ স চ বাতিকঃ” (সূ.অ.১৮)| অত্র চ বিপরীতার্থকারি তদেবোচ্যতে যদবিপরীততযাঽঽপাততঃ প্রতীযমানং বিপরীতস্যার্থং প্রশমলক্ষণং করোতি| অত্রোদাহরণানি লিখ্যন্তে- হেতুবিপরীতমৌষধং যথা- শীতকফজে জ্বরে শুণ্ঠ্যাদ্যুষ্ণং ভেষজং, হেতুবিপরীতমন্নং যথা- শ্রমানিলজে জ্বরে রসৌদনঃ, হেতুবিপরীতো বিহারো যথা- দিবাস্বপ্নোত্থকফে রাত্রৌ জাগরণং, ব্যাধিবিপরীতমৌষধং যথা- অতীসারে স্তম্ভনং পাঠাদি, ব্যাধিবিপরীতমন্নং যথা- অতীসারে স্তম্ভনং মসূরাদি, ব্যাধিবিপরীতো বিহারো যথা- উদাবর্তে প্রবাহণং, হেতুব্যাধিবিপরীতমৌষধং যথা- বাতশোথে বাতহরং শোথহরং চ দশমূলং, হেতুব্যাধিবিপরীতমন্নং যথা- শীতোত্থজ্বরে উষ্ণা জ্বরঘ্নী চ যবাগূঃ, হেতুব্যাধিবিপরীতো বিহারো যথা- স্নিগ্ধদিবাস্বপ্নজাযাং তন্দ্রাযাং রূক্ষং তন্দ্রাবিপরীতং চ রাত্রিজাগরণং , হেতুবিপরীতার্থকার্যৌষধং যথা- পিত্তপ্রধানে পচ্যমানে শোথে পিত্তকর উষ্ণ উপনাহঃ, হেতুবিপরীতার্থকার্যন্নং যথা- পচ্যমানে পিত্তপ্রধানে শোথে বিদাহ্যন্নং, হেতুবিপরীতার্থকারী বিহারো যথা- বাতোন্মাদে সন্ত্রাসনং, ব্যাধিবিপরীতার্থকার্যৌষধং যথা- ছর্দ্যাং বমনকারকং মদনফলাদি; ব্যাধিবিপরীতার্থকার্যন্নং যথা- অতীসারে বিরেককারকং ক্ষীরং, উক্তং হি- “বহুদোষস্য দীপ্তাগ্নেঃ সপ্রাণস্য ন তিষ্ঠতি| পৈত্তিকো যদ্যতীসারঃ পযসা তং বিরেচযেত্” (চি. অ.১৯) ইতি; ব্যাধিবিপরীতার্থকারী বিহারো যথা- ছর্দ্যাং বমনসাধ্যাযাং বমনার্থং প্রবাহণং; হেতুব্যাধিবিপরীতার্থকার্যৌষধং যথা- অগ্নিনা প্লুষ্টেঽগুর্বাদিনা লেপঃ, উষ্ণং হি হেতাবগ্নৌ ব্যাধৌ চ দাহেঽনুগুণং প্রতিভাতি; হেতুব্যাধিবিপরীতার্থকার্যন্নং যথা- মদ্যপানোত্থে মদাত্যযে মদকারকং মদ্যং; হেতুব্যাধিবিপরীতার্থকারী বিহারো যথা- ব্যাযামজনিতসম্মূঢবাতে জলপ্রতরণাদিরূপো ব্যাযামঃ, অযং হেতৌ ব্যাযামে ব্যাধৌ চ সম্মূঢবাতেঽনুগুণঃ প্রতিভাতি| ননূপশযবদনুপশযোঽপি ব্যাধিপরীক্ষকোঽস্তি, উচ্যতে চ- “গূঢলিঙ্গং ব্যাধিমুপশযানুপশযাভ্যাং পরীক্ষেত” (বি. অ.৪), তথা বাগ্ভটেঽপ্যুক্তং- “বিপরীতোঽনুপশযঃ স হ্যসাত্ম্যমিতি স্মৃতঃ” (বা. নি. অ.১) ইতি; সত্যমস্তি চ, পরং নিদানগ্রহণেনৈব গৃহীতত্বান্ন পৃথগুচ্যতে; অনুপশযোঽপি হেতুসেবযৈব ভবতি||১০||

Adhikarana 10 (11) · Śloka 11

সম্প্রাপ্তির্জাতিরাগতিরিত্যনর্থান্তরং ব্যাধেঃ||১১||

যদ্যপি সম্প্রাপ্ত্যনন্তরং লিঙ্গপ্রাদুর্ভাবঃ, তথাঽপি সম্প্রাপ্তের্ব্যাধিনিরূপণং প্রত্যল্পপ্রযোজনত্বাচ্ছেষতঃ সম্প্রাপ্তিমাহ- সম্প্রাপ্তিরিত্যাদি| জাতিঃ জন্ম; সম্প্রাত্প্যাগতিজাতিশব্দৈর্যোঽর্থোঽভিধীযতে সা ব্যাধেঃ সম্প্রাপ্তিরিত্যর্থঃ| অ(ত)ত্রৈকে ব্যাধিজন্মমাত্রমন্ত্যকারণব্যাপারজন্যং সম্প্রাপ্তিমাহুঃ| ইযং চ সম্প্রাপ্তির্যদ্যপি নিদানাদিবদ্ ব্যাধিবোধিকা ন ভবতি, তথাঽপি নানুত্পন্নস্য ব্যাধের্লক্ষণং ভবতীতি কৃত্বা উপপত্তের্ব্যাধ্যুপলম্ভকত্বং বর্ণযন্তি| এতচ্চান্যে ন মন্যন্তে, যতো নৈবং সতি সম্প্রাপ্তিতঃ কশ্চিদ্বিশেষো ব্যাধেরধিগম্যতে| ন চাযং নিযমঃ- যদুত্পন্ন এব পরং ব্যাধিরুপলভ্যতে, যতো নিদানপূর্বরূপাভ্যামনুত্পন্নোঽপি ব্যাধির্ভাবিত্বেন বুধ্যতে| তস্মাদ্ ব্যাধিজনকদোষব্যাপারবিশেষযুক্তং ব্যাধিজন্মেহ সম্প্রাপ্তিশব্দেন বাচ্যম্, অত এব পর্যাযে ‘আগতিঃ’ ইত্যুক্তম্| আগতির্হি উত্পাদকারণস্য ব্যাধিজননপর্যন্তং গমনম্| ইযং চ সম্প্রাপ্তির্ব্যাধিবিশেষং বোধযত্বেব| যথা জ্বরে- ‘স যদা প্রকুপিতঃ প্রবিশ্যামাশযম্’ ইত্যারভ্য ‘তদা জ্বরমভিনির্বর্তযতি’ ইত্যন্তেন যা সম্প্রাপ্তিরুচ্যতে, তযা জ্বরস্যামাশযদূষকত্বাগ্ন্যুপঘাতকত্বরসদূষকত্বাদযো ধর্মাঃ প্রতীযন্তে| ন চ বাচ্যং- দোষাণামযমামাশযদূষকত্বাদির্ধর্মঃ , ততশ্চ কারণধর্মাণাং নিদানগ্রহণেনৈব গ্রহণং ভবতীতি; যতঃ, কারণধর্মোঽপ্যযং ব্যাধিজনকদোষব্যাপাররূপঃ সম্প্রাপ্তিশব্দেন বিশেষবোধনার্থং পৃথক্ কৃত্বোচ্যতে; যথা- লিঙ্গত্বাবিশেষেঽপি ভাবিব্যাধিবোধকত্ববিশেষাত্ পূর্বরূপং পৃথগুচ্যতে, অত এব বাগ্ভটেঽপ্যেবমেব সম্প্রাপ্তিলক্ষণমুক্তং- “যথাদুষ্টেন দোষেণ যথা চানুবিসর্পতা| নির্বৃত্তিরামযস্যাসৌ সম্প্রাপ্তির্জাতিরাগতিঃ ” (বা. নি.অ.১) ইতি||১১||

Adhikarana 11 (12(1)) · Śloka 12

সা সঙ্খ্যাপ্রাধান্যবিধিবিকল্পবলকালবিশেষৈর্ভিদ্যতে|১২|

সম্প্রতি সম্প্রাপ্তেঃ প্রতিব্যাধিব্যক্তিভিন্নাযাঃ সর্বত্র ব্যাধৌ তত্প্রযোজনাভাবান্ন ভেদো বক্তব্যঃ, যস্তূপযুক্তো ভবতি সম্প্রাপ্তিবিশেষস্তমভিধাস্যত্যেব, “স যদা প্রকুপিতঃ প্রবিশ্যামাশযম্” ইত্যাদিনা গ্রন্থেন; অতঃ সর্বসম্প্রাপ্ত্যনভিধানান্ন্যূনতাদোষপরিহারার্থং সর্বব্যাধিসাধারণান্ সম্প্রাপ্তিভেদানাহ- সা সঙ্খ্যেত্যাদি|- সা সম্প্রাপ্তিঃ সঙ্খ্যাদিভির্ভিদ্যতে ইতি সঙ্খ্যাদিভিন্নে ব্যাধৌ ভিন্না ভবতীত্যর্থঃ; যতো ন ভিন্নানাং ভাবানামভিন্নোত্পত্তির্ভবতি, কিন্তর্হি ভিন্নৈব ভবতি; যদ্যপি চ প্রতিব্যাধি ব্যক্তাঽপি সম্প্রাপ্তির্ভিন্নৈব ভবতি, তথাঽপি স ভেদঃ সম্প্রাপ্তেরিহ প্রযোজনাভাবান্নোচ্যতে; যতঃ, সঙ্খ্যাপ্রাধান্যবিধ্যাদিতুল্যাসু জ্বরব্যক্তিষু একরূপনিদানলিঙ্গচিকিত্সিতাসু ভেদপ্রতিপাদনে ন কিঞ্চিত্ প্রযোজনমস্তি, সঙ্খ্যাদিভিন্নে তু জ্বরাদৌ নিদানলিঙ্গচিকিত্সাভেদোঽস্তি, অতঃ সঙ্খ্যাদিভেদজনকাযাঃ সম্প্রাপ্তের্ভেদকথনমুচিতমেব||১২(১)||

Adhikarana 12 (12(2)) · Śloka 12

সঙ্খ্যা তাবদ্যথা- অষ্টৌ জ্বরাঃ, পঞ্চ গুল্মাঃ, সপ্ত কুষ্ঠান্যেবমাদিঃ|১২|

সঙ্খ্যাভেদমুদাহরতি- সঙ্খ্যা তাবদিত্যাদি| যদ্যপি প্রাধান্যাদিভেদভিন্নেঽপি ব্যাধৌ সঙ্খ্যাভেদোঽস্ত্যেব, তথাঽপীহ যৈব শাস্ত্রসিদ্ধা অষ্টৌদরীযাদিপ্রতিপাদিতা সঙ্খ্যা সৈব সঙ্খ্যাশব্দেন প্রাপ্তা| অত এবাষ্টৌ জ্বরা ইত্যভিধায দ্বিবিধং শোণিতপিত্তমিতি ক্রমাত্ প্রাপ্তং রক্তপিত্তং নোদাহৃতং; যতঃ দ্বিবিধত্বং হি রক্তপিত্তস্য বিধিভেদে প্রবিশতি ন সঙ্খ্যাযাং, ‘দ্বিবিধং শোণিতপিত্তম্’ ইতি বিধিশব্দেনৈবোক্তত্বাত্||১২(২)||

Adhikarana 13 (12(3)) · Śloka 12

প্রাধান্যং পুনর্দোষাণাং তরতমাভ্যামুপলভ্যতে| তত্র দ্বযোস্তরঃ, ত্রিষু তম ইতি|১২|

প্রাধান্যং পুনরিত্যাদৌ তরতমাভ্যামিতি তরতমশব্দাভিধেযাভ্যাং বৃদ্ধিভ্যাম্| তরতমশব্দযোর্বিষযং বিভজতে- দ্বযোরিত্যাদি|- দ্বযোস্তর ইতি দ্বযোর্দোষযোর্বৃদ্ধযোস্তরপ্রযোগো ভবতি- বৃদ্ধতর ইতি| এবং ত্রিষু তম ইতি ত্রিষু দোষেষু বৃদ্ধেষু সত্সু তমপ্রযোগো ভবতি- বৃদ্ধতম ইতি| তদেবং দ্বন্দ্বারব্ধে বিকারেঽন্যতরদোষস্য তরশব্দলক্ষিতেন প্রাধান্যেন সম্প্রাপ্তির্ভিদ্যতে, তথা ত্রিদোষারব্ধে বিকারে তমশব্দলক্ষিতান্যতমদোষপ্রাধান্যাত্ সম্প্রাপ্তির্ভিদ্যতে, ইত্যুক্তং ভবতি||১২(৩)||

Adhikarana 14 (12(4)) · Śloka 12

বিধির্নাম- দ্বিবিধা ব্যাধযো নিজাগন্তুভেদেন, ত্রিবিধাস্ত্রিদোষভেদেন, চতুর্বিধাঃ সাধ্যাসাধ্যমৃদুদারুণভেদেন|১২|

সম্প্রাপ্তিভেদং ক্রমাগতং বিধিমাহ- বিধির্নাম দ্বিবিধা ব্যাধযো নিজাগন্তুভেদেনেত্যাদিনা| বিধিরিতি বিধিকৃত ইত্যর্থঃ| তেন দ্বিবিধত্বাদযো ভেদা যতো ভবন্তি স বিধিঃ; বিধিশ্চ প্রকারো ভেদ ইত্যর্থঃ| সাধ্যাসাধ্যমৃদুদারুণভেদেনেতি সাধ্যাসাধ্যগতেন মৃদুদারুণভেদেন; তেন, মৃদুসাধ্যং সুখসাধ্যং, দারুণসাধ্যং কৃচ্ছ্রসাধ্যং রোহিণীবলযাদি, তথা মৃদ্বসাধ্যং যাপ্যং, দারুণাসাধ্যং প্রত্যাখ্যেযমিতি ভেদচতুষ্টম্| যদ্যপি চ সঙ্খ্যাপ্রাধান্যাদিকৃতোঽপি ব্যাধের্বিধিভেদো ভবত্যেব, তথাঽপি সঙ্খ্যাদিভেদানাং স্বসঞ্জ্ঞযৈব গৃহীতত্বাদ্গোবলীবর্দন্যাযাত্ সঙ্খ্যাদ্যগৃহীতে ব্যাধিপ্রকারেঽযং বিধিশব্দো বর্তনীযঃ||১২(৪)||

Adhikarana 15 (12(5)) · Śloka 12

সমবেতানাং পুনর্দোষাণামংশাংশবলবিকল্পো বিকল্পোঽস্মিন্নর্থে|১২|

ক্রমাগতং বিকল্পমাহ- সমবেতানামিত্যাদি|- সমবেতানামিতি সর্বেষাং; তেন, একশো দ্বিশো মিলিতানাং চ দোষাণাং গ্রহণম্| অংশমংশং প্রতি বলমংশাংশবলং, তস্য বিকল্প উত্কর্ষাপকর্ষরূপোংঽশাংশবলবিকল্পঃ; এবম্ভূতো দোষাণামংশাংশবলবিকল্পোঽস্মিন্নর্থ ইতি অস্মিন্ প্রকরণে বিকল্প উচ্যতে| প্রকরণান্তরে তু বিকল্পশব্দেন ভেদমাত্রমুচ্যতে; যথা- “বিকল্পো ন ত্বসাধ্যানাং” (সূ.অ.১০) ইত্যাদাবিতি ভাবঃ| তত্র দোষাণামংশাংশবিকল্পো যথা- বাতে প্রকুপিতেঽপি কদাচিদ্বাতস্য শীতাংশো বলবান্ ভবতি, কদাচিল্লঘ্বংশঃ, কদাচিদ্রূক্ষাংশঃ, কদাচিল্লঘুরূক্ষাংশ ইত্যাদি; এবং পিত্তকফযোরপ্যুদাহার্যোংঽশাংশবিকল্পঃ; অযং চাংশাংশবলবিকল্পো দোষাণাং শীতাদিগুণোদ্ভূতহেতুভেদাদ্ভবতি||১২(৫)||

Adhikarana 16 (12) · Śloka 12

বলকালবিশেষঃ পুনর্ব্যাধীনামৃত্বহোরাত্রাহারকালবিধিবিনিযতো ভবতি||১২||

বলকালবিশেষমাহ- বলেত্যাদি|- বলস্য কালো বলকালঃ, তস্য বিশেষো বসন্তপূর্বাহ্ণাদির্বলকালবিশেষঃ| ঋতবশ্চাহোরাত্রাহারযোঃ কালাশ্চ ঋত্বহোরাত্রাহারকালাঃ, তেষাং ভেদো বিধিঃ, তত্র বিশেষেণ নিযতো বলকালবিশেষঃ ঋত্বহোরাত্রাহারকালবিধিবিনিযতঃ; তত্র ঋতুবিনিযতো বলকালবিশেষো যথা- শ্লেষ্মজ্বরস্য বসন্তঃ, অহোরাত্রবিনিযতো যথা- শ্লেষ্মজ্বরস্য পূর্বাহ্ণঃ প্রদোষশ্চ, আহারবিনিযতো যথা- শ্লেষ্মজ্বরস্য ভুক্তমাত্রকালঃ, এবমাদ্যুন্নেযম্| কেচিত্তু বিধিশব্দেন পূর্বকৃতং কর্ম ব্রুবতে, তত্রাপি কর্মনিযতো বলকালবিশেষঃ পচ্যমানকর্মকাল এব জ্ঞেযঃ| এষু চ বলকালেষু যদ্যপি ব্যাধেরভূতপ্রাদুর্ভাবরূপা সম্প্রাপ্তির্ন ভবতি, তথাঽপি ব্যাধিসন্তানে তত্কালং ব্যাধ্যুত্পত্তৌ সম্প্রাপ্তির্ভিন্নৈব ভবতীতি মন্তব্যম্| ইযং চ কালবিশেষপ্রাপ্ত্যা বলবদ্ব্যাধিজনিকা সম্প্রাপ্তির্ব্যাধের্বিশেষং স্ফুটমেব বোধযতি| যতঃ পূর্বাহ্ণে বলসম্প্রাপ্ত্যা জ্বরস্য কফজত্বমুন্নীযতে, মধ্যাহ্নে চ বলপ্রাপ্ত্যা পিত্তজত্বমিত্যাদি| ইহ চ সম্প্রাপ্তেরেব বিশেষাঃ সঙ্খ্যাদিকৃতা উক্তাঃ, ন তু নিদানাদীনাং বিশেষাঃ; যতো নিদানাদিবিশেষাঃ প্রতিব্যাধিবক্ষ্যমাণভেদেনৈবোপযুক্তাঃ| যতো যাদৃগ্ জ্বরে নিদানং ন তাদৃগ্ রক্তপিত্তে; যে চ পূর্বরূপাদিবিশেষা জ্বরে, ন তে রক্তপিত্তাদৌ, কিন্তু ভিন্নজাতীযা এব| স চ ভেদো নিদানাদীনাং ব্যাধিভেদগমকত্বেনোপযুক্তো ব্যাধিভেদকথন এব বক্তব্যঃ| সম্প্রাপ্তেস্তু সঙ্খ্যাদিভেদঃ সর্বব্যাধিষ্বেকজাতীযত্বেন ন বিশেষগমক ইতি ইহৈব সর্বব্যাধিনিদানে কথ্যতে; নিদানাদিবিশেষাস্তু প্রতিব্যাধিবিশিষ্টত্বেন নেহ প্রপঞ্চেনোচ্যন্তে| অত এব চাত্রৈবাধ্যাযে সম্প্রাপ্তেঃ সামান্যাভিধানেনৈবোক্তত্বাত্ সম্প্রাপ্তিং পরিত্যজ্য নিদানাদিবিশেষং প্রতিজানীতে- তস্য নিদানপূর্বরূপলিঙ্গোপশযবিশেষাননুব্যাখ্যাস্যাম ইতি||১২||

Adhikarana 17 (13) · Śloka 13

তস্মাদ্ব্যাধীন্ ভিষগনুপহতসত্ত্ববুদ্ধির্হেত্বাদিভির্ভাবৈর্যথাবদনুবুদ্ধ্যেত||১৩||

যস্মাদিমে নিদানাদয উক্তেন ন্যাযেন ব্যাধিপরীক্ষাযামুপযুক্তাঃ, তস্মাদ্ব্যাধীন্ ভিষগ্ হেত্বাদিভিঃ পরীক্ষেতেতি যোজনা| ন চ বাচ্যং যত্- নিদানাদীনাং মধ্যে চেদন্যতমেনাপি ব্যাধিপরিচ্ছেদং কর্তুং সমর্থস্তত্ কিং পঞ্চকাভিধানেনেতি; যতো যাবন্তো জ্ঞানোপাযা ব্যাধীনাং তে সর্ব এবোপদর্শনীযাঃ| তত্র যো নিদানং বিস্মৃতবান্, তস্য পূর্বরূপাদিভির্ব্যাধিঃ পরীক্ষ্যতে; তথা যত্র চ পূর্বরূপাদযো বিস্মৃতাঃ সন্দিগ্ধা বা, তত্রোপশযেন পরীক্ষা ভবতি; এবং কফজত্বসন্দেহে জ্বরস্য সম্প্রাপ্তিরপি পূর্বাহ্ণে ভুক্তমাত্রে বা ভবন্তী কফজত্বং গমযতীত্যাদি প্রযোজনমনুসরণীযম্| তথা পূর্বরূপেণাপি লিঙ্গসামান্যনিশ্চয উক্তঃ; যদুক্তং- “হারিদ্রবর্ণং রুধিরং চ মূত্রং বিনা প্রমেহস্য হি পূর্বরূপৈঃ| যো মূত্রযেত্তং ন বদেত্ প্রমেহং রক্তস্য পিত্তস্য হি স প্রকোপঃ” (চি.অ.৬) ইতি| তথা লিঙ্গনিশ্চিতেঽপি ব্যাধৌ পূর্বরূপেণাসাধ্যত্বমুক্তং, যথা- “পূর্বরূপাণি সর্বাণি জ্বরোক্তান্যতিমাত্রযা| যং বিশন্তি বিশত্যেনং মৃত্যুর্জ্বরপুরঃসরঃ” (ই.অ.৫) ইতি| তস্মান্নিদানাদিপঞ্চকমভিধাতব্যমেব| ননু, লিঙ্গেন ব্যাধিঃ পরীক্ষণীয ইতি বচনাল্লিঙ্গব্যতিরিক্তো ব্যাধিরিত্যুক্তং ভবতি; তত্র চ ন লিঙ্গসমুদাযব্যতিরিক্তো ব্যাধিরুপলভ্যতে, বিষমারম্ভিবিসর্গিত্বাদযো হি সন্তাপসহিতা জ্বরাঃ, তথা প্রতিশ্যাযকাসাদ্যেকাদশরূপমেলক এব যক্ষ্মা| নৈবং, লিঙ্গত্বেন শাস্ত্রে প্রতিপাদিতানাং তদতিরিক্তব্যাধ্যভাবে লিঙ্গত্বানুপপত্তেঃ, বচনং হি- “বিষমারম্ভমূলৈশ্চ জ্বর একো নিরুচ্যতে” (নি.অ.৮) ইতি| বিকারশ্চৈহ দোষদূষ্যমেলকবিশেষো জ্বরাদিশব্দেনোচ্যতে| স চ দোষদূষ্যবিশেষাত্মা জ্বরোঽরুচ্যাদিভ্যো দোষদূষ্যবৈষম্যবিশেষেভ্যোঽর্থান্তরমেব| ন চ বাচ্যং জ্বরলিঙ্গারুচ্যঙ্গমর্দাদিরূপধাতুবৈষম্যবিশেষমেলকো জ্বরোঽস্তু, অলং তদতিরিক্তজ্বরকল্পনযা, লিঙ্গলিঙ্গিভাবশ্চ সমুদাযসমুদাযিভেদাদ্ভবিষ্যতীতি; যত এবমপ্যরুচ্যঙ্গমর্দাদিধাতুবৈষম্যানুগতো ধাতুবৈষম্যবিশেষো জ্বররূপোঽবযবীতি ভিন্ন এব বক্তব্যঃ; জঙ্ঘাবাহুশিরোন্তরাধ্যবযবানতিরিক্তমেব শরীরমবযবিরূপম্| দুঃখমেব ব্যাধিরিতি পূর্বমেব পরাকৃতং, তেন দুঃখরূপত্বাদ্ব্যাধেরবযবিত্বং ন সম্ভবতীতি ন বাচ্যম্| লিঙ্গানি তু স্বরূপেণ ব্যাধযো ভবন্তি, তে চ বোদ্ধব্যব্যাধ্যপেক্ষযা লিঙ্গানি ভবন্তি| তদুক্তং- “ব্যাধযস্তে তদাত্বে তু লিঙ্গানীষ্টানি নামযাঃ” (নি.অ.৮) ইতি| লিঙ্গলিঙ্গিভাবশ্চ জিজ্ঞাসাবশাদ্ভবতি| যদ্বক্ষ্যতি- “বিষমারম্ভমূলানাং লিঙ্গমেকং জ্বরো মতঃ| বিষমারম্ভমূলৈশ্চ জ্বর একো নিরুচ্যতে” (নি.অ.৮) ইতি| অস্য চার্থমপস্মারনিদানে প্রকরণাগতং ব্যাখ্যাস্যামঃ| তস্মাত্ সুস্থিতং ব্যাধিগমকত্বং নিদানাদিপঞ্চকস্যেত্যর্থঃ||১৩||

Adhikarana 18 (14) · Śloka 14

ইত্যর্থসঙ্গ্রহো নিদানস্থানস্যোদ্দিষ্টো ভবতি| তং বিস্তরেণোপদিশন্তো ভূযস্তরমতোঽনুব্যাখ্যাস্যামঃ||১৪||

ইতীত্যাদৌ ইতি পরিসমাপ্তৌ| নিদানস্থানস্যেতি সর্বব্যাধিনিদানস্য| অর্থসঙ্গ্রহ ইত্যনেনৈব সঙ্ক্ষেপার্থাভিধানে লব্ধে উদ্দিষ্ট ইতি সঙ্ক্ষেপাভিধাযিপদকরণেন সঙ্ক্ষেপস্যাপি সঙ্ক্ষেপাভিধানমেতদিতি দর্শযতি| তমিতি সামান্যনিদানোদ্দেশম্, অতো নিদানোদ্দেশমাত্রতো ভূযস্তরমুপদিশন্তো বিস্তরেণ ব্যাখ্যাস্যাম ইতি যোজনা| তেনৈতদতিসঙ্ক্ষেপকথনাপেক্ষযা প্রপঞ্চকথনমেবেহ বিস্তরশব্দার্থ ইতি দর্শযতি; তেন নিদানাদীনাং যাবদ্বিস্তরকথনমুত্তরত্রোপপন্নং ভবতি||১৪||

Adhikarana 19 (15) · Śloka 15

তত্র প্রথমত এব তাবদাদ্যাঁল্লোভাভিদ্রোহকোপপ্রভবানষ্টৌ ব্যাধীন্নিদানপূর্বেণ ক্রমেণ ব্যাখ্যাস্যামঃ, তথা সূত্রসঙ্গ্রহমাত্রং চিকিত্সাযাঃ| চিকিত্সিতেষু চোত্তরকালং যথোপচিতবিকারাননুব্যাখ্যাস্যামঃ ||১৫||

তত্রেত্যাদিনা জ্বরাদ্যষ্টবিধরোগস্য নিদানস্থানে কথনং প্রতিজানীতে| প্রথমত এব তাবদিত্যনেন পশ্চাচ্চিকিত্সাভিধেযানর্শঃ- প্রভৃতীন্ সূচযতি| আদ্য নিত্যনেন আদৌ দক্ষাধ্বরোদ্ধ্বংসে উত্পন্না যে তেষামিহ কথনং দর্শযতি| যদ্যপি চ রাজযক্ষ্মা পৃথগেবোত্পন্নঃ, বচনং হি- “অতিব্যবাযাত্ পুনর্নক্ষত্ররাজস্য যক্ষ্মা” (নি.অ.৮) ইতি, তথাঽপ্যস্য প্রাধান্যাদিহাভিধানম্| যদ্যপি চ দক্ষাধ্বরোদ্ধ্বংসোদ্ভূতানপস্মারান্তানভিধায পৃথগুত্পন্নস্য যক্ষ্মণোঽভিধানমুচিতং, তথাঽপ্যুন্মাদাপস্মারযোরাগন্তুত্বেন শোষমপ্যভিধাযান্তেঽভিধানম্| লোভাভিদ্রোহপ্রভবানিত্যনেন জনপদোদ্ধ্বংসনীযে “প্রাগপি চাধর্মাদৃতে ন রোগোত্পত্তিরভূত্” (বি.অ.৩) ইত্যনেন বক্ষ্যমাণানাং জ্বরাদীনাং লোভাভিদ্রোহজন্যতাং দর্শযতি, অনেনাধর্মজত্বং জ্বরাদীনামুক্তং ভবতি| নিদানপূর্বেণেতি নিদানপ্রথমেন| ক্রমেণেতি রোগসামান্যোক্তনিদানপূর্বরূপরূপোপশযসম্প্রাপ্তিরূপেণ| অযং চ ক্রমঃ ক্বচিত্ প্রযোজনবশাদ্বাধ্যতে; যথাঽত্রৈব জ্বরেঽগ্রে হি রূপমভিধায পূর্বরূপমভিধাতব্যম্| ক্রমভেদপ্রযোজনং চেহ যত্- রূপাণ্যত্র প্রতিজ্বরমভিধাতব্যানি, ন তু প্রাগ্রূপাণি প্রতিজ্বরমভিধাতব্যানি; তেন সর্বসাধারণত্বাত্ সর্বমভিধায প্রাগ্রূপং সামান্যমভিধাতব্যম্| তথা, সূত্রসঙ্গ্রহমাত্রং চিকিত্সাযা ব্যাখ্যাস্যাম ইতি সম্বন্ধঃ| নিদানে চ চিকিত্সাভিধানপ্রযোজনং প্রাগেবোক্তম্| সূত্রমিতি কৃত্বা যত্ সঙ্গ্রহমিতি করোতি তেন সূত্রস্যাপি সঙ্ক্ষেপেণাভিধানং দর্শযতি; তথা চিকিত্সাসূত্রমপীহ কিঞ্চিন্ন বক্তব্যং, যথা- লঙ্ঘনকালযবাগ্বাদযঃ| চিকিত্সিতেষ্বিত্যনেনৈব চোত্তরকালত্বে লব্ধে পুনরুত্তরকালমিতি বচনং চিকিত্সিতস্থানেঽপি জ্বরাদ্যভিধানোত্তরকালমেব যথোপচিতবিকারাণাং নিদানাদিকথনং দর্শযতি| যথোপচিতমিতি যে যে উপচিতা বিকারাঃ শোথার্শঃপ্রভৃতযস্তান্| কিংবা, ‘যথাচিতম্’ ইতি পাঠঃ, তত্রাপি যথাপ্রধানমিত্যর্থ উন্নেযঃ| চিকিত্সিতে চ বিকারাণাং নিদানাদ্যভিধানং নিদানাদিনাঽব্যবধানেন প্রতীতে বিষযে চিকিত্সা সম্যক্ প্রতীযত ইত্যভিপ্রাযেণ| অত এব চ জ্বরাদীনামপি পুনর্নিদানাদ্যভিধাস্যতি, ইহ তু জ্বরাদীনাং নিদানাদ্যভিধানং বহুবক্তব্যত্বেন স্থানভেদং কৃত্বা কৃতম্| স্থানভেদকরণেন চ চিকিত্সাবদাযুর্বেদে নিদানস্যাপি জ্ঞেযত্বেন প্রাধান্যং দর্শযতি||১৫||

Adhikarana 20 (16) · Śloka 16

ইহ খলু জ্বর এবাদৌ বিকারাণামুপদিশ্যতে, তত্প্রথমত্বাচ্ছারীরাণাম্||১৬||

ইহ খল্বিতি অষ্টবিধব্যাধিনিদানে বক্তব্যে| শারীরাণামিত্যনেন কামক্রোধাদিমানসং রোগং প্রতি ন জ্বরস্য প্রথমত্বমিতি দর্শযতি||১৬||

Adhikarana 21 (17) · Śloka 17

অথ খল্বষ্টাভ্যঃ কারণেভ্যো জ্বরঃ সঞ্জাযতে মনুষ্যাণাং; তদ্যথা- বাতাত্, পিত্তাত্, কফাত্, বাতপিত্তাভ্যাং, বাতকফাভ্যাং, পিত্তকফাভ্যাং, বাতপিত্তকফেভ্যঃ, আগন্তোরষ্টমাত্ কারণাত্||১৭||

জ্বরস্য নিরূপণীযস্য কারণকৃতং ভেদমাহ- অথেত্যাদি| এতচ্চ কারণং বাতাদি সন্নিকৃষ্টম্| মনুষ্যাণামিতিবচনেন গোগজশকুন্যাদীনাং নাবশ্যমিদং জ্বরাষ্টত্বমনুগামীতি দর্শযতি; তথাহি- হস্ত্যাদীনাং পাকলাদযো নাষ্টবিধাঃ প্রতিপাদ্যন্তে| আগন্তোরিতি বক্তব্যে অষ্টমাদিতি বচনমাগন্তোরভিঘাতাদিচতুষ্কারণভেদেঽপ্যেকত্বোপদর্শনার্থম্| আগন্তুর্হি কারণভেদোত্পন্নোঽপ্যেকরূপ এব, যত আগন্তুঃ সর্বো ব্যথাপূর্বমেব ভবতি; যস্তু তত্র, “কামশোকভযাদ্বাযুঃ” (চি.অ.৩) ইত্যাদিনা ভেদো বক্তব্যঃ, স বাতাদিকৃত এবেতি ভাবঃ||১৭||

Adhikarana 22 (18) · Śloka 18

তস্য নিদানপূর্বরূপলিঙ্গোপশযবিশেষাননুব্যাখ্যাস্যামঃ ||১৮||

তস্যেত্যাদৌ তস্যেতি জ্বরস্য| বিশেষানিতি নিদানাদিভিঃ প্রত্যেকং সম্বধ্যতে| নিদানাদিবিশেষাশ্চেহ রোগান্তররক্তপিত্তাদ্যপেক্ষযা তথা পরস্পরং বাতাদিজ্বরাপেক্ষযা চ যথাসম্ভবং বোদ্ধব্যাঃ| তেন পূর্বরূপবিশেষ ইহ রক্তপিত্তাদিপূর্বরূপাপেক্ষযা বোদ্ধব্যঃ, পূর্বরূপস্য বিশেষেণেহানভিধানাত্| উপশযবিশেষানভিধানং চ নিদানবিশেষাভিধানাদেব লভ্যতে, যতো নিদানবিপর্যযেণোপশযমভিধাস্যতি| পূর্বরূপং চেহ বিশিষ্টমব্যক্তলিঙ্গবিশেষরূপমেব জ্ঞেযম্| সম্প্রাপ্তেস্তু বক্ষ্যমাণাযা ইহাপ্রতিজ্ঞানং, তস্যাঃ সর্বরোগে সম্প্রাপ্তিভেদাভিধানে চ কথিতত্বাত্, তথা নিদানাদিবত্ সম্প্রাপ্তের্ব্যাধিবোধনং প্রত্যপ্রধানত্বাচ্চ; যশ্চ সম্প্রাপ্তিভেদোঽভিধাতব্যঃ স সর্বরোগসাধারণ এব; ভেদস্তু তস্যা বাতাদিদোষমাত্রকৃত এব, বাতাদিভেদশ্চ নিদানভেদ এব| অন্যে তু ব্রুবতে- সম্প্রাপ্তিং নাভিধাস্যত্যেবাযং, যদেতত্ ‘স যদা প্রকুপিতঃ’ ইত্যাদ্যভিধাস্যতি, তন্নিদানরূপবাতাদিধর্মকথনমিতি কৃত্বা নিদানান্তর্গতমেব||১৮||

Adhikarana 23 (19) · Śloka 19

রূক্ষলঘুশীতবমনবিরেচনাস্থাপনশিরোবিরেচনাতিযোগব্যাযামবেগসন্ধারণানশনাভিঘাত- ব্যবাযোদ্বেগশোকশোণিতাতিষেকজাগরণবিষমশরীরন্যাসেভ্যোঽতিসেবিতেভ্যো বাযুঃ প্রকোপমাপদ্যতে||১৯||

রূক্ষেত্যাদি| বাতপ্রকোপণং প্রতি রূক্ষস্য প্রধানত্বেনাগ্রেঽভিধানং, রূক্ষো হি গুণো বাতগুণেষু প্রধানম্| আস্থাপনং যদ্যপি বাতহরমুক্তম্- “আস্থাপনানুবাসনং তু খলু সর্বোপক্রমেভ্যো বাতবিকারেষু প্রধানম্” (সূ.অ.২০) ইতি বচনাত্, তথাঽপীহাস্থাপনস্যাতিযোগো বাতহেতুরুক্ত এবেতি ন দোষঃ| বচনং হি- “উত্ক্লেশাগ্নিবধৌ স্নেহান্নিরূহাত্ পবনাদ্ভযম্” (সি.অ.৪) ইতি| নিরূহশ্চানুবাসনং কৃত্বা যুক্ত এব, মাত্রাকৃতশ্চ সাধারণবাতহর ইতি সিদ্ধান্তঃ||১৯||

Adhikarana 24 (20) · Śloka 20

স যদা প্রকুপিতঃ প্রবিশ্যামাশযমূষ্মণা সহ মিশ্রীভূযাদ্যমাহারপরিণামধাতুং রসনামানমন্ববেত্য রসস্বেদবহানি স্রোতাংসি পিধাযাগ্নিমুপহত্য পক্তিস্থানাদূষ্মাণং বহির্নিরস্য কেবলং শরীরমনুপ্রপদ্যতে, তদা জ্বরমভিনির্বর্তযতি||২০||

স যদেত্যাদিনা সম্প্রাপ্তিমাহ| যদেতি বচনাদেবঙ্কুপিতোঽপি বাযুর্যদাঽঽমাশযপ্রবেশাদিসম্প্রাপ্তিযুক্তো ভবতি তদৈব জ্বরং করোতি, নান্যদেতি দর্শযতি| প্রবিশ্যামাশযমিত্যনেন জ্বরকর্তুর্দোষস্যামাশযদূষকত্বং দর্শযতি| অত এব সর্বজ্বরেষ্বামাশযবিশুদ্ধ্যর্থং লঙ্ঘনমুত্সর্গতো বদন্তি| যদ্যপি চামাশযপ্রবেশাদেবোষ্মণাঽপি মিশ্রত্বং লভ্যত এব, যত আমাশয এব বহ্নিস্থানং, “নাভিস্তনান্তরং জন্তোরামাশয ইতি স্মৃতঃ” (বি.অ.২) ইতি বচনাত্, তথাঽপি বহ্নিস্থানস্যামাশযৈকদেশত্বেনামাশযপ্রবেশেঽপি নাবশ্যং গ্রহণীরূপবহ্নিস্থানদুষ্টির্বিশেষেণ লভ্যত ইতি; অত এবোক্তম্- ঊষ্মণা সহ মিশ্রীভূযেতি| রসনামানমিত্যুচ্যমানে আহাররসেঽপি মধুররসাদৌ প্রসক্তিঃ স্যাত্, অত উক্তম্- আহারপরিণামধাতুমিতি; আহারপরিণামভবো ধাতুরাহারপরিণামধাতুঃ, তমিতি| আহারপরিণামধাতুত্বং চ পরম্পরযা রক্তাদিষ্বপ্যস্তীত্যাহ- আদ্যমিতি; প্রথমমিত্যর্থঃ| রসমিতি বক্তব্যে রসনামানমিতি যত্ করোতি তেন রসতীতি রস ইতি ব্যুত্পত্তিমাত্রেণ রক্তাদিষু রসসঞ্জ্ঞাং নিষেধযতি, যত্রৈব রসসঞ্জ্ঞা রূঢা তং গ্রাহযতি; এবমন্যত্রাপি চ যত্ পদমধিকার্থমিহ প্রতীযতে তত্ স্পষ্টার্থমেব, যতস্ত্রিবিধশিষ্যবুদ্ধিহিতমেব বিস্পষ্টার্থং তন্ত্রং যুজ্যতে| অন্বিতি যথোক্তক্রমেণ| অবেত্যেতি গত্বা| পিধাযেতি অবরুধ্য| পক্তিস্থানাত্ পাচকাগ্নিস্থানাত্| ঊষ্মাণমিতি পাচকবহ্নিম্| বহিরিতি পক্তিস্থানব্যতিরিক্তশরীরে| যদ্যপি চোষ্মাণং নিরস্যেতিবচনাদেব পক্তিস্থানাদিতি লভ্যতে, তথাঽপি পক্তিস্থানাদিতিবচনেন পক্তিস্থানাত্ কৃত্স্নস্য বহ্নের্নিরসনং দর্শযতি, ইহ চোষ্মশব্দেন পাচকাগ্নিং ব্যপদিশন্ পাচকস্য বহ্নেরূষ্মরূপতাং দর্শযতি, বাহ্যবহ্নিসদৃশজ্বালাকরং পিত্তং নিষেধযতি| অত এব চ বহ্নের্নিরসনাদগ্নিমান্দ্যং জ্বরে দর্শিতং ভবতি| বাযুশ্চাত্রাতিবৃদ্ধত্বেন বহ্নের্নিরাসকঃ, তেনাগ্নিদীপ্তিং ন করোতি; যত্র হি প্রেরকমাত্রো ভবতি বাযুস্তত্র বহ্নের্বৃদ্ধিং করোতি; যথা - মেদস্বিনঃ কোষ্ঠে চরন্ বাযুরগ্নিবৃদ্ধিকরো ভবতি||২০||

Adhikarana 25 (21) · Śloka 21

তস্যেমানি লিঙ্গানি ভবন্তি; তদ্যথা- বিষমারম্ভবিসর্গিত্বম্, ঊষ্মণো বৈষম্যং, তীব্রতনুভাবানবস্থানানি জ্বরস্য, জরণান্তে দিবসান্তে নিশান্তে ঘর্মান্তে বা জ্বরস্যাভ্যাগমনমভিবৃদ্ধির্বা, বিশেষেণ পরুষারুণবর্ণত্বং নখনযনবদনমূত্রপুরীষত্বচামত্যর্থং ক্লৃপ্তীভাবশ্চ; অনেকবিধোপমাশ্চলাচলাশ্চ বেদনাস্তেষাং তেষামঙ্গাবযবানাং; তদ্যথা- পাদযোঃ সুপ্ততা, পিণ্ডিকযোরুদ্বেষ্টনং, জানুনোঃ কেবলানাং চ সন্ধীনাং বিশ্লেষণম্, ঊর্বোঃ সাদঃ, কটীপার্শ্বপৃষ্ঠস্কন্ধবাহ্বংসোরসাং চ ভগ্নরুগ্ণমৃদিতমথিতচটিতাবপাটিতাবনুন্নত্বমিব , হন্বোশ্চাপ্রসিদ্ধিঃ, স্বনশ্চ কর্ণযোঃ, শঙ্খযোর্নিস্তোদঃ, কষাযাস্যতা আস্যবৈরস্যং বা, মুখতালুকণ্ঠশোষঃ, পিপাসা, হৃদযগ্রহঃ, শুষ্কচ্ছর্দিঃ, শুষ্ককাসঃ, ক্ষবথূদ্গারবিনিগ্রহঃ, অন্নরসখেদঃ, প্রসেকারোচকাবিপাকাঃ, বিষাদজৃম্ভাবিনামবেপথুশ্রমভ্রমপ্রলাপপ্রজাগররোমহর্ষদন্তহর্ষাঃ, উষ্ণাভিপ্রাযতা, নিদানোক্তানামনুপশযো বিপরীতোপশযশ্চেতি বাতজ্বরস্য লিঙ্গানি ভবন্তি||২১||

লিঙ্গান্যাহ- তদ্যথা বিষমেত্যাদি| তদিতি সামান্যেন স্ত্রীলিঙ্গপুংলিঙ্গনপুংসকলিঙ্গবক্ষ্যমাণরূপপ্রত্যবমর্শকং , সর্বলিঙ্গপ্রত্যবমর্শে হি তদিতি সর্বনাম যুক্তম্| যথেতি উদাহরণে| আরম্ভ উত্পাদঃ, বিসর্গো মোক্ষঃ, তৌ বিষমৌ যস্য স বিষমারম্ভবিসর্গী; বিষমত্বং চ কদাচিচ্ছিরো গৃহীত্বা ভবতি, কদাচিত্ পৃষ্ঠং, কদাচিজ্জঙ্ঘে ইত্যাদি; এবং মোক্ষোঽপি কদাচিচ্ছিরোঽগ্রে মুচ্যতে ইত্যাদি; কিংবা, জ্বরারম্ভমোক্ষকালানবস্থিতত্বমেব বৈষম্যম্| ঊষ্মণো বৈষম্যমিতি ক্বচিচ্ছরীরপ্রদেশে মহানূষ্মা, ক্বচিন্মন্দ ইত্যাদি| তীব্রতনুভাবানবস্থানানীতি তীব্রভাবস্তনুভাবশ্চ জ্বরস্য কালাপ্রতিনিযত ইত্যর্থঃ| এতত্সর্বং বাযোরনবস্থিতত্বেনোপপন্নম্| যচ্চ বাযোর্জরণান্তদিবসান্তাদিষু বলবত্কার্যকর্তৃত্বমুক্তং, তদপি প্রাযিকত্বেন জ্ঞেযম্| অন্যথা, এতদেবারম্ভাদিবৈষম্যং ন স্যাত্| যদি কালবিশেষে জরণান্তাদৌ শরীরপ্রদেশবিশেষে চ জঙ্ঘাদৌ প্রতিনিযমেন বাতকোপঃ স্যাত্, তদা শরীরপ্রদেশবিশেষে বাতস্থানে জঙ্ঘাদৌ কালবিশেষে জরণান্তাদৌ চ বাতপ্রকোপঃ প্রাযিকো জ্ঞেযঃ| এতমেব প্রাযিকবাতকালমাশ্রিত্যাহ- জরণান্ত ইত্যাদি| ঘর্মান্ত ইতি প্রাবৃষি মুক্তিভাববতো জ্বরস্য সততকাদেরভ্যাগমনং, নিত্যানুষক্তস্য ত্বতিবৃদ্ধিরিতি ব্যবস্থা| পরুষারুণত্বং চ নখাদিষ্বেব প্রব্যক্তমুপলভ্যত ইতি কৃত্বা নখাদয ইহোচ্যন্তে| ত্বগ্গ্রহণেনৈব বদনগ্রহণে লব্ধেঽপি বদনগ্রহণং বদনত্বচি বিশেষেণ পরুষত্বাদিদর্শনার্থম্| ক্লৃপ্তীভাবঃ অপ্রবৃত্তিঃ, সা চ যোগ্যতযা মূত্রপুরীষযোরেব নখাদিষূক্তযোর্মন্তব্যা; কিংবা, ক্লৃপ্তীভাবো ভেদঃ স্ফুটনমিতি যাবত্; স চ নখাদীনাম্| চলাশ্চ কাশ্চিদ্বেদনা অচলাশ্চ কাশ্চিন্নিত্যানুষক্তত্বেনেতি চলাচলাঃ; কিংবা অত্যর্থং চলাশ্চলাঃ| পিণ্ডিকা জান্বধো জঙ্ঘামধ্যমাংসপিণ্ডিকা | ভগ্নং কিঞ্চিদবশেষেণ চ্ছিন্নং, রুগ্ণং কিঞ্চিচ্ছিন্নং, মৃদিতং পার্শ্বাবমোটিতম্, অবপাটিতম্ একদেশোত্পাটিতম্, অবনুন্নং প্রেরিতম্; এষাং চ ভগ্নাদীনাং লোকত এবার্থাবগতিঃ, যতো লৌকিকৈরেবৈতে শব্দাঃ প্রসিদ্ধত্বেন তত্র তত্র শাস্ত্রেঽভিধীযন্তে | হন্বোরপ্রসিদ্ধিরিতি হন্বোঃ স্বব্যাপারাকরণম্| আস্যবৈরস্যমিতি অরসজ্ঞতা| অন্নরসখেদঃ অন্নরসে খেদোঽবসাদোঽন্নরসখেদঃ, সর্বরসেষ্বনিচ্ছেত্যর্থঃ| অরুচিস্তু বক্ষ্যমাণা বক্ত্রে প্রবিষ্টান্নানভ্যবহরণাদ্বোদ্ধব্যা| উষ্ণাভিপ্রাযতা উষ্ণপ্রিযতা| নিদানোক্তানামনুপশয ইতি বচনেনৈব বিপরীত উপশযোঽর্থলব্ধোঽপি স্পষ্টার্থমুচ্যতে; কিংবা, অর্থাপত্তেরনৈকান্তিকত্বেন উচ্যতে; যথা- নবজ্বরে দিবাস্বপ্নে প্রতিষিদ্ধেঽর্থাপত্ত্যা পুরাণজ্বরে দিবাস্বপ্নঃ প্রাপ্নোতি, অথ চ তত্র দিবাস্বপ্নো ন বিহিত ইত্যর্থাপত্তেরনৈকান্তিকত্বং বদন্তি| নিদানোক্তানামিত্যত্রোক্তগ্রহণাদ্যদেব নিদানত্বেনোক্তং তস্যৈবানুপশযিত্বং নিদর্শযতি ন পুনর্যস্যাপাততো নিদানত্বং প্রতিভাতি; তেন, মদাত্যযাদৌ মদ্যাদের্নিদানত্বেন প্রতীযমানস্যাপি উপশযিত্বমেব||২১||

Adhikarana 26 (22-24) · Śloka 24

উষ্ণাম্ললবণক্ষারকটুকাজীর্ণভোজনেভ্যোঽতিসেবিতেভ্যস্তথা তীক্ষ্ণাতপাগ্নিসন্তাপশ্রমক্রোধবিষমাহারেভ্যশ্চ পিত্তং প্রকোপমাপদ্যতে||২২|| তদ্যদা প্রকুপিতমামাশযাদূষ্মাণমুপসৃজ্যাদ্যমাহারপরিণামধাতুং রসনামানমন্ববেত্য রসস্বেদবহানি স্রোতাংসি পিধায দ্রবত্বাদগ্নিমুপহত্য পক্তিস্থানাদূষ্মাণং বহির্নিরস্য প্রপীডযত্ কেবলং শরীরমনুপ্রপদ্যতে, তদা জ্বরমভিনির্বর্তযতি||২৩|| তস্যেমানি লিঙ্গানি ভবন্তি; তদ্যথা- যুগপদেব কেবলে শরীরে জ্বরস্যাভ্যাগমনমভিবৃদ্ধির্বা ভুক্তস্য বিদাহকালে মধ্যন্দিনেঽর্ধরাত্রে শরদি বা বিশেষেণ, কটুকাস্যতা, ঘ্রাণমুখকণ্ঠৌষ্ঠতালুপাকঃ, তৃষ্ণা, মদো, ভ্রমো, মূর্চ্ছা, পিত্তচ্ছর্দনম্, অতীসারঃ, অন্নদ্বেষঃ, সদনং, খেদঃ, প্রলাপঃ, রক্তকোঠাভিনির্বৃত্তিঃ শরীরে, হরিতহারিদ্রত্বং নখনযনবদনমূত্রপুরীষত্বচাম্, অত্যর্থমূষ্মণস্তীব্রভাবঃ, অতিমাত্রং দাহঃ, শীতাভিপ্রাযতা, নিদানোক্তানুপশযো বিপরীতোপশযশ্চেতি পিত্তজ্বরলিঙ্গানি ভবন্তি||২৪||

উষ্ণেত্যাদিনা পিত্তজ্বরমাহ- তদ্যথেত্যাদি|- পূর্ববদ্ব্যাখ্যেযম্| দ্রবত্বাদগ্নিমুপহত্যেতিবচনাদুষ্ণস্যাপি পিত্তস্য দ্রবত্বেনাগ্নিবিপরীতেন গুণেনাগ্নিহন্তৃতাং দর্শযতি| বক্ষ্যতি হি গ্রহণ্যধ্যাযে- “আপ্লাবযদ্ধন্ত্যনলং জলং তপ্তমিবানলম্” (চি.অ.১৫) ইতি| বহির্নিরস্য প্রপীডযদিতিবচনেন পিত্তজ্বরে বাতজ্বর ইব ন সহসা বহ্নিক্ষেপণং ভবতি, কিন্তু শনৈঃ স্তোকক্রমেণেতি দর্শযতি| যুগপদেবেতি ন বৈষম্যেণ| অভ্যাগমনমভিবৃদ্ধির্বেতি চ পূর্বেণ যুগপদেবেত্যাদিনা পরেণ চ বিশেষেণেত্যন্তেন চ গ্রন্থেন সম্বধ্যতে| কোঠাভিনির্বৃত্তিঃ শরীর ইতি চ্ছেদঃ||২২-২৪||

Adhikarana 27 (25-26) · Śloka 26

স্নিগ্ধগুরুমধুরপিচ্ছিলশীতাম্ললবণদিবাস্বপ্নহর্ষাব্যাযামেভ্যোঽতিসেবিতেভ্যঃ শ্লেষ্মা প্রকোপমাপদ্যতে||২৫|| স যদা প্রকুপিতঃ প্রবিশ্যামাশযমূষ্মণা সহমিশ্রীভূযাদ্যমাহারপরিণামধাতুং রসনামানমন্ববেত্য রসস্বেদবহানি স্রোতাংসি পিধাযাগ্নিমুপহত্য পক্তিস্থানাদূষ্মাণং বহির্নিরস্য প্রপীডযন্ কেবলং শরীরমনুপ্রপদ্যতে, তদা জ্বরমভিনির্বর্তযতি||২৬||

স্নিগ্ধেত্যাদিনা শ্লেষ্মজ্বরমাহ| স যদেত্যাদি পূর্ববত্ কফজ্বরেঽপি ব্যাখ্যেযম্| ননু, শ্লেষ্মণ আমাশযঃ স্থানং, তত্ কিং প্রবিশ্যামাশযমিতি বচনেন? নৈবং, শ্লেষ্মণ উরোঽপি প্রধানং স্থানং, তেনেহোরঃস্থস্যাপি শ্লেষ্মণ আমাশযপ্রবেশং দর্শযতি| যত্র কেবলামাশযবৃত্তি পিত্তং, তত্র ‘আমাশযং প্রবিশ্য’ ইতি ন কৃতং, কিন্তু ‘আমাশযাদূষ্মাণমুপসৃজ্য’ ইতি কৃতং; পিত্তং হ্যামাশযপ্রবিষ্টমেব ভবতি, তচ্চামাশযৈকদেশস্থং গ্রহণীরূপামাশযৈকদেশং বহ্নিস্থানং স্বস্থানাদ্গচ্ছতীতি যুক্তম্||২৫-২৬||

Adhikarana 28 (27) · Śloka 27

তস্যেমানি লিঙ্গানি ভবন্তি; তদ্যথা- যুগপদেব কেবলে শরীরে জ্বরস্যাভ্যাগমনমভিবৃদ্ধির্বা ভুক্তমাত্রে পূর্বাহ্ণে পূর্বরাত্রে বসন্তকালে বা বিশেষেণ, গুরুগাত্রত্বম্, অনন্নাভিলাষঃ, শ্লেষ্মপ্রসেকঃ, মুখমাধুর্যং, হৃল্লাসঃ, হৃদযোপলেপঃ, স্তিমিতত্বং, ছর্দিঃ, মৃদ্বগ্নিতা, নিদ্রাধিক্যং, স্তম্ভঃ, তন্দ্রা, কাসঃ, শ্বাসঃ, প্রতিশ্যাযঃ, শৈত্যং, শ্বৈত্যং চ নখনযনবদনমূত্রপুরীষত্বচাম্, অত্যর্থং চ শীতপিডকা ভৃশমঙ্গেভ্য উত্তিষ্ঠন্তি, উষ্ণাভিপ্রাযতা, নিদানোক্তানুপশযো বিপরীতোপশযশ্চ; ইতি (শ্লেষ্মজ্বরলিঙ্গানি ভবন্তি)||২৭||

যুগপদিতি এককালম্; একদৈব কফজ্বরে সর্বশরীরব্যাপ্ত্যা আগমনমভিবৃদ্ধির্বা ভবতীতি দর্শযতি| শীতপিডকাস্তন্ত্রান্তরে শ্বেতপিডকা উচ্যন্তে| ‘তস্যেমানি লিঙ্গানি ভবন্তি’ ইত্যেতাবতৈব কফজ্বরলিঙ্গত্বে লব্ধে পুনঃ ‘শ্লেষ্মজ্বরলিঙ্গানি ভবন্তি’ ইতি বচনং কিমর্থং? ব্রূমঃ- তস্যেতিপদেন স্বদোষমাত্রপ্রত্যবমর্শোঽপি স্যাত্, তেন দোষলিঙ্গতৈব পরং লিঙ্গানাং মা স্যাদিত্যেতদর্থং পুনরভিধানম্; কিংবা, পূর্বপ্রতিজ্ঞযা লিঙ্গানাং প্রাগবচ্ছেদ উক্তঃ, উত্তরেণ শ্লেষ্মজ্বরলিঙ্গানি ভবন্তীত্যনেনান্ত্যাবচ্ছেদ উচ্যতে; এবমন্যত্রাপি বাতজ্বরাদৌ পূর্বরূপে চ পুনরুক্তিঃ পরিহর্তব্যা||২৭||

Adhikarana 29 (28) · Śloka 28

বিষমাশনাদনশনাদন্নপরিবর্তাদৃতুব্যাপত্তেরসাত্ম্যগন্ধোপঘ্রাণাদ্বিষোপহতস্য চোদকস্যোপযোগাদ্গরেভ্যো গিরীণাং চোপশ্লেষাত্ স্নেহস্বেদবমনবিরেচনাস্থাপনানুবাসনশিরোবিরেচনানামযথাবত্প্রযোগাত্ মিথ্যাসংসর্জনাদ্বা স্ত্রীণাং চ বিষমপ্রজননাত্ প্রজাতানাং চ মিথ্যোপচারাদ্ যথোক্তানাং চ হেতূনাং মিশ্রীভাবাদ্যথানিদানং দ্বন্দ্বানামন্যতমঃ সর্বে বা ত্রযো দোষা যুগপত্ প্রকোপমাপদ্যন্তে, তে প্রকুপিতাস্তযৈবানুপূর্ব্যা জ্বরমভিনির্বর্তযন্তি||২৮||

বিষমাশনাদিত্যাদিনা দ্বান্দ্বিকসান্নিপাতিকজ্বরানাহ| অনশনং যদ্যপি ন পিত্তশ্লেষ্মকরং, তথাঽপ্যগ্নিমান্দ্যকরত্বাত্ত্রিদোষকরমপি ভবতি; কিংবা এষু বিষমাশনাদিষু যথাযোগ্যতযা দ্বন্দ্বকারণত্বং ত্রিদোষকারণত্বং চোন্নেযং, তেনানশনং বাতপিত্তকরং বোদ্ধব্যং; যত্তু পিত্তহরত্বমুক্তমনশনস্য, তত্তু পিত্তদ্রবাংশক্ষযাত্| বচনং হি- “কফপিত্তে দ্রবে ধাতূ সহেতে লঙ্ঘনং মহত্” ইতি| অন্নপরিবর্তাদিতি সহসৈবাক্রমেণ কৃতাভ্যস্তান্নপরিবর্তাত্| অসাত্ম্যগন্ধো গন্ধদ্রব্যস্য নাসিকযাঽন্তঃপ্রবেশাদ্যথা দোষকরো ভবতি ন তথাঽসাত্ম্যরূপাদযঃ, তে হি নাবশ্যং শরীরং বিশন্তি, তেন নেহাসাত্ম্যরূপাদয উক্তাঃ| যথানিদানমিতি যদা দ্বযোর্নিদানং সেব্যতে তদা দ্বন্দ্বঃ, যদা ত্রযাণাং নিদানং সেব্যতে তদা ত্রযো দোষাঃ; দ্বন্দ্বেঽপি যদা বাতপিত্তযোর্নিদানং সেব্যতে তদা বাতপিত্তরূপং দ্বন্দ্বম্; এবমন্যদপি কুপ্যতীত্যর্থঃ| সর্বে ত্রযো দোষা ইত্যনেনৈব লব্ধেঽপি যুগপদিতিবচনং ক্রমপ্রকোপপ্রতিষেধার্থং, যুগপদেব প্রকোপমাপদ্যন্তে ন ক্রমেণেত্যর্থঃ||২৮||

Adhikarana 30 (29) · Śloka 29

তত্র তথোক্তানাং জ্বরলিঙ্গানাং মিশ্রীভাববিশেষদর্শনাদ্দ্বান্দ্বিকমন্যতমং জ্বরং সান্নিপাতিকং বা বিদ্যাত্||২৯||

জ্বরলিঙ্গানামিত্যাদৌ মিশ্রীভাববিশেষো বাতপিত্তলিঙ্গং বা, বাতশ্লেষ্মলিঙ্গং বা, পিত্তশ্লেষ্মলিঙ্গং বা| অন্যতমমিতি বাতপিত্তজ্বরাদিকম্||২৯||

Adhikarana 31 (30) · Śloka 30

অভিঘাতাভিষঙ্গাভিচারাভিশাপেভ্য আগন্তুর্হি ব্যথাপূর্বোঽষ্টমো জ্বরো ভবতি| স কিঞ্চিত্কালমাগন্তুঃ কেবলো ভূত্বা পশ্চাদ্দোষৈরনুবধ্যতে| তত্রাভিঘাতজো বাযুনা দুষ্টশোণিতাধিষ্ঠানেন, অভিষঙ্গজঃ পুনর্বাতপিত্তাভ্যাম্, অভিচারাভিশাপজৌ তু সন্নিপাতেনানুবধ্যেতে||৩০||

আগন্তুজ্বরমাহ- অভিঘাতেত্যাদি| অভিঘাতো লগুডাদ্যভিঘাতঃ, অভিষঙ্গঃ কামাদ্যভিষঙ্গঃ, অভিচারোঽথর্বমন্ত্রাদির্জ্বরকরঃ, অভিশাপস্তু গুরুসিদ্ধাদ্যভিশপনম্; এতত্ প্রধানত্বেন চতুর্বিধং কারণমিহোক্তং; তেন, ওষধিগন্ধভূতাভিষঙ্গদুষ্টগ্রহনিরীক্ষণাদযোঽপ্যাগন্তুজ্বরহেতবো বোদ্ধব্যাঃ; কিংবা, অভিঘাতগ্রহণেন শরীরাভিহননবাচিনাঽসাত্ম্যগন্ধাদযো গ্রাহ্যাঃ, অভিষঙ্গেণ তু ভূতাভিষঙ্গাদযঃ| ব্যথাপূর্বমিতি আগন্তৌ প্রথমং ব্যথা ভবতি, পশ্চাদ্দোষানুবন্ধকৃতানি লক্ষণানীতি দর্শযতি; কিংবা, ব্যথাপূর্বমিতিবচনাদাগন্তৌ জ্বরে ব্যথৈব পূর্বরূপমিতি বদন্তি| রূপং তু যদেব জ্বরস্য প্রাত্যাত্মিকং সন্তাপরূপং তদেব বাতজ্বরাদিলক্ষণরহিতং বোদ্ধব্যং প্রথমতঃ, উত্তরকালীনদোষানুবন্ধে তু যথাবক্ষ্যমাণদোষলিঙ্গান্যেব ভবন্তি| অষ্টম ইতিবচনেনাভিঘাতাদিহেতুচতুষ্টযযোগপ্রাপ্তং চাতুর্বিধ্যং নিষেধ্য ব্যথাপূর্বকত্বেনৈকরূপযোগাদেকবিধত্বং চতুর্ণাং দর্শযতি; চাতুর্বিধ্যে হ্যাগন্তোর্নাষ্টমত্বং, নবমত্বাদযোঽপি স্যুঃ| কিঞ্চিত্কালমিতি স্তোককালং; কেচিত্ ত্র্যহং বদন্তি, অন্যে সপ্তাহমাহুঃ| আগন্তৌ হি সপ্তাহাদূর্ধ্বং দোষলিঙ্গানি ভবন্তীতি দৃষ্টম্| তত্র যস্যাগন্তোর্যাদৃশো দোষানুবন্ধো ভবতি তমাহ- তত্রাভিঘাতেত্যাদি| বাতপিত্তাভ্যামিতি কশ্চিদ্বাতেন, কশ্চিত্ পিত্তেন, কশ্চিদ্বাতপিত্তাভ্যাম্| বচনং হি- “কামশোকভযাদ্বাযুঃ, ক্রোধাত্ পিত্তং, ত্রযো মলাঃ| ভূতাভিষঙ্গাত্ কুপ্যন্তি ভূতসামান্যলক্ষণাঃ” (চি.অ.৩) ইতি| ভূতাভিষঙ্গে তু যদ্যপি ত্রিদোষপ্রকোপ উক্তঃ, তথাঽপি তত্র বাতপিত্তযোরেবৈতদ্বচনবলাত্ প্রাধান্যম্||৩০||

Adhikarana 32 (31) · Śloka 31

স সপ্তবিধাজ্জ্বরাদ্বিশিষ্টলিঙ্গোপক্রমসমুত্থানত্বাদ্বিশিষ্টো বেদিতব্যঃ, কর্মণা সাধারণেন চোপচর্যতে | ইত্যষ্টবিধা জ্বরপ্রকৃতিরুক্তা||৩১||

আগন্তোর্নিজাদ্ভেদমাহ- স ইত্যাদি| বিশেষলিঙ্গতা আগতোর্ব্যথাপূর্বকব্যাখ্যানে ব্যাকৃতা, সমুত্থানবিশেষোঽপ্যভিঘাতাদিরুক্তঃ, উপক্রমবিশেষোঽপি ‘সাধারণেন কর্মণা চোপচর্যতে’ ইতি বচনেনৈবাত্র কথ্যতে| সাধারণেনেতি দৈবযুক্তিব্যপাশ্রযেণ; দৈবব্যপাশ্রযং হি বলিমঙ্গলহোমাদি, যুক্তিব্যপাশ্রযং হি লঘ্বশনাপতর্পণযবাগূকষাযপানাদি| প্রকৃতিরুক্তেতি স্বভাবোঽপি বাতাদিজ্বরাণাং নিদানাদ্যুপহিত উক্ত ইত্যর্থঃ||৩১||

Adhikarana 33 (32) · Śloka 32

জ্বরস্ত্বেক এব সন্তাপলক্ষণঃ| তমেবাভিপ্রাযবিশেষাদ্দ্বিবিধমাচক্ষতে, নিজাগন্তুবিশেষাচ্চ| তত্র নিজং দ্বিবিধং ত্রিবিধং চতুর্বিধং সপ্তবিধং চাহুর্ভিষজো বাতাদিবিকল্পাত্||৩২||

নিজাগন্তুবিশেষাচ্চ দ্বিবিধমিতি সম্বন্ধঃ| নিজং দ্বিবিধমিত্যাদৌ দ্বৈবিধ্যং (সংসৃষ্টাসংসৃষ্টজন্যত্বেন ) শীতোষ্ণাভিপ্রাযভেদাত্, ত্রিবিধং ত্রিদোষভেদাত্, চতুর্বিধং প্রত্যেকং বাতাদিদোষজন্যভেদাত্| তত্র চাতুর্বিধ্যে দ্বন্দ্বজ্বরাঃ প্রতিক্ষিপ্যন্তে, তেষাং প্রত্যেকং বাতাদিজ্বরসদৃশত্বাত্; ত্রিদোষজ্বরস্তু অসাধ্যতাযোগাত্ কৃচ্ছ্রসাধ্যতাযোগাদ্বা পৃথগুচ্যতে||৩২||

Adhikarana 34 (33) · Śloka 33

তস্যেমানি পূর্বরূপাণি ভবন্তি; তদ্যথা- মুখবৈরস্যং, গুরুগাত্রত্বম্, অনন্নাভিলাষঃ, চক্ষুষোরাকুলত্বম্, অশ্র্বাগমনং, নিদ্রাধিক্যম্, অরতিঃ, জৃম্ভা, বিনামঃ, বেপথুঃ, শ্রমভ্রমপ্রলাপজাগরণরোমহর্ষদন্তহর্ষাঃ, শব্দশীতবাতাতপসহত্বাসহত্বম্, অরোচকাবিপাকৌ, দৌর্বল্যম্, অঙ্গমর্দঃ, সদনম্, অল্পপ্রাণতা, দীর্ঘসূত্রতা, আলস্যম্, উচিতস্য কর্মণো হানিঃ, প্রতীপতা স্বকার্যেষু, গুরূণাং বাক্যেষ্বভ্যসূযা, বালেভ্যঃ প্রদ্বেষঃ, স্বধর্মেষ্বচিন্তা, মাল্যানুলেপনভোজনপরিক্লেশনং, মধুরেভ্যশ্চ ভক্ষেভ্যঃ প্রদ্বেষঃ, অম্ললবণকটুকপ্রিযতা চ, ইতি জ্বরস্য পূর্বরূপাণি ভবন্তি প্রাক্সন্তাপাত্; অপি চৈনং সন্তাপার্তমনুবধ্নন্তি||৩৩||

তস্যেমানীত্যাদিনা সর্বজ্বরসাধারণং পূর্বরূপমাহ| এতানি চ পূর্বরূপাণ্যাগন্তোরপীত্যেকে বদন্তি; অন্যে তু নিজানামেবৈতানীতি বদন্তি, আগন্তোস্তু ব্যথৈব পূর্বরূপম্| অত্রাপ্যনন্নাভিলাষারোচকযোঃ পূর্ববদ্ভেদঃ| দৌর্বল্যং শরীরবলহানিঃ, অল্পপ্রাণতা চ মানসবলহানির্বোদ্ধব্যা; কিংবা দৌর্বল্যং মাংসাপচযঃ| দীর্ঘসূত্রতা চিরেণ কার্যকর্তৃত্বম্| জ্বরপূর্বরূপাণি ভবন্তি প্রাক্সন্তাপাদিতি চ্ছেদঃ, জ্বররূপসন্তাপাত্ প্রাগেতানি পূর্বরূপাণি ভবন্তীত্যর্থঃ| অপিচ সন্তাপার্তমনুবধ্নন্তীত্যনেন প্রব্যক্তেঽপি জ্বরে কানিচিত্পূর্বরূপাণি মুখবৈরস্যারুচ্যাদীনি ভবন্তীতি দর্শযতি| ন চৈবং পূর্বরূপানুবৃত্তৌ রিষ্টত্বং বাচ্যং; যতঃ সর্বপূর্বরূপাণামতিমাত্রানুবর্তনং রিষ্টমুক্তম্| বচনং হি- “পূর্বরূপাণি সর্বাণি জ্বরোক্তান্যতিমাত্রযা| যং বিশন্তি বিশত্যেনং মৃত্যুর্জ্বরপুরঃসরঃ” (ই.অ.৫) ইতি; কিংবা, অস্য শ্লোকস্যান্য এবার্থঃ, তমিন্দ্রিযে বক্ষ্যামঃ| ন চারুচ্যাদীনাং ব্যক্তজ্বরভাবিত্বেন পূর্বরূপত্বং হন্যতে, যতো লিঙ্গান্তরযুক্তান্যরুচ্যাদীনি লিঙ্গানি ভবন্তি, লিঙ্গান্তরবিরহিতানি তু পূর্বরূপাণি||৩৩||

Adhikarana 35 (34) · Śloka 34

ইত্যেতান্যেকৈকশো জ্বরলিঙ্গানি ব্যাখ্যাতানি ভবন্তি বিস্তরসমাসাভ্যাম্||৩৪||

একৈকশো জ্বরলিঙ্গানীত্যত্র লিঙ্গশব্দেন নিদানপূর্বরূপাদীন্যুচ্যন্তে| বিস্তরসমাসাভ্যামিতি বিস্তরেণ বাতাদিজ্বরোক্তাঃ, সমাসেন সংসর্গসন্নিপাতজাঃ; যস্ত্বত্র সমাসেনোক্তঃ স চিকিত্সিতে প্রপঞ্চনীয ইতি ভাবঃ||৩৪||

Adhikarana 36 (35) · Śloka 35

জ্বরস্তু খলু মহেশ্বরকোপপ্রভবঃ, সর্বপ্রাণভৃতাং প্রাণহরো, দেহেন্দ্রিযমনস্তাপকরঃ, প্রজ্ঞাবলবর্ণহর্ষোত্সাহহ্রাসকরঃ , শ্রমক্লমমোহাহারোপরোধসঞ্জননঃ; জ্বরযতি শরীরাণীতি জ্বরঃ, নান্যে ব্যাধযস্তথা দারুণা বহূপদ্রবা দুশ্চিকিত্স্যাশ্চ যথাঽযম্| স সর্বরোগাধিপতিঃ, নানাতির্যগ্যোনিষু চ বহুবিধৈঃ শব্দৈরভিধীযতে| সর্বে প্রাণভৃতঃ সজ্বরা এব জাযন্তে সজ্বরা এব ম্রিযন্তে চ; স মহামোহঃ, তেনাভিভূতাঃ প্রাগ্দৈহিকং দেহিনঃ কর্ম কিঞ্চিদপি ন স্মরন্তি, সর্বপ্রাণভৃতাং চ জ্বর এবান্তে প্রাণানাদত্তে||৩৫||

সম্প্রতি জ্বরস্য মহাপ্রভাবতাং দর্শযিতুং পূর্বোত্পত্তিপ্রকারমাহ- জ্বরস্ত্বিত্যাদি| মহেশ্বরকোপপ্রভব ইত্যনেন জ্বরচিকিত্সিতে “দ্বিতীযে হি যুগে শর্বমক্রোধব্রতমাস্থিতম্” (চি.অ.৩) ইত্যাদিগ্রন্থে বক্ষ্যমাণাং জ্বরোত্পত্তিমাহ| ক্রোধভবত্বেন চ শ্লেষ্মজন্যস্যাপ্যাগ্নেযত্বং দর্শযতি; ক্রোধো হ্যগ্নিরূপঃ, তেন তন্মযোঽপি জ্বরস্তথৈব; অত এবোক্তম্- “ঊষ্মা পিত্তাদৃতে নাস্তি জ্বরো নাস্ত্যূষ্মণা বিনা| তস্মাত্ পিত্তবিরুদ্ধানি ত্যজেত্ পিত্তাধিকেঽধিকম্” (বা.চি.অ.১) ইতি| ন চ রুদ্রকোপভবত্বেন লোভাভিদ্রোহপ্রভবত্বং জ্বরস্য বিরুধ্যতে; যতো রুদ্রকোপোদ্ভূত এব জ্বরো লোভাভিদ্রোহস্বরূপপাপাচারপ্রাপ্ত্যা পুরা মনুষ্যেষু ভূতঃ| সর্বপ্রাণিনাং জ্বর এব প্রাণহর ইতি মরণকালে সর্বপ্রাণিনাং জ্বর এব প্রাণহর ইতি দর্শযতি| দেহেন্দ্রিযমনস্তাপকর ইত্যত্র প্রত্যেকং তাপলক্ষণং জ্বরচিকিত্সিতে বোদ্ধব্যং “বৈচিত্ত্যমরতির্গ্লানির্মনঃসন্তাপলক্ষণম্” (চি.অ.৩) ইত্যাদিনা| জ্বরযতি সন্তাপযতি| ইতিশব্দো হেতৌ; তেন, যস্মাদুক্তমহেশ্বরক্রোধপ্রভবত্বাদিযুক্তঃ, তস্মাত্| সর্বরোগাণামধিপতিরিবেতি সর্বরোগাধিপতিঃ| নানাবিধৈঃ শব্দৈরিতি হস্তিষু পাকলো, গোষু খেরিকো , মত্স্যানামিন্দ্রজালো, বিহঙ্গানাং ভ্রামরক ইত্যাদিশব্দৈঃ| সর্বপ্রাণভৃতঃ সজ্বরা এব জাযন্তে সজ্বরা এব ম্রিযন্তে চ তত্ কিমিতি তেষাং জন্মনি মরণে বা সন্তাপাত্মা জ্বরো ন লক্ষ্যত ইত্যাহ- স মহামোহ ইতি; জন্মমরণযোর্মহামোহরূপো জ্বরো ভবতি, ন সন্তাপাত্মেত্যর্থঃ| অত এবোক্তং- “জ্বরপ্রভাবো জন্মাদৌ নিধনে চ মহত্তমঃ” (চি.অ.৩) ইতি| জন্মনি মহামোহরূপতামাহ- তেনেত্যাদি| প্রাগ্দৈহিকং জন্মান্তরকৃতম্| ননু, শুদ্ধসত্ত্বানুগমাত্ প্রাগ্দৈহিকং স্মরণং যুক্তং; বচনং হি- “যদা তেনৈব শুদ্ধেন মনসা যুজ্যতে, তদা জাতিমতিক্রান্তামপি স্মরতি” (শা.অ.৩) ইতি| ন, তস্য শুদ্ধমনঃসত্ত্বানুবৃত্তেরপবাদত্বাদেতত্পরিত্যজ্যান্যত্র জ্বরস্য প্রাগ্দৈহিকবিস্মারকত্বং জ্ঞেযম্| মরণে মহামোহতামাহ- সর্বপ্রাণভৃতামিত্যাদি| জ্বর এব মহামোহরূপ এবেতি ভাবঃ; তেন ম্রিযমাণাঃ সর্বে মহামোহং প্রবিশন্তীত্যর্থঃ||৩৫||

Adhikarana 37 (36) · Śloka 36

তত্র পূর্বরূপদর্শনে জ্বরাদৌ বা হিতং লঘ্বশনমপতর্পণং বা, জ্বরস্যামাশযসমুত্থত্বাত্; ততঃ কষাযপানাভ্যঙ্গস্নেহস্বেদপ্রদেহপরিষেকানুলেপনবমনবিরেচনাস্থাপনানুবাসনোপশমন- নস্তঃকর্মধূপধূমপানাঞ্জনক্ষীরভোজনবিধানং চ যথাস্বং যুক্ত্যা প্রযোজ্যম্||৩৬||

সম্প্রতি সূত্রিতং চিকিত্সাসূত্রমাহ- তত্রেত্যাদি| যদ্যপি চিকিত্সিতে জ্বরাদৌ লঙ্ঘনং বক্ষ্যতি, তথাঽপীহ পাক্ষিকলঘ্বশনবিধানং ন বিরোধি, লঘ্বশনস্যাপি লাঘবকর্তৃত্বেনৈব লঙ্ঘনত্বাত্; কিংবা, যত্র বাতাদিজ্বরে লঙ্ঘনং ন কর্তব্যং তত্র লঘ্বশনং বোদ্ধব্যম্, অপতর্পণং চ লঙ্ঘনমেব| অথ কিমিতি বাতিকেঽপি জ্বরে বাতকারকং লঘ্বশনমপতর্পণং বা কার্যমিত্যাহ- আমাশযসমুত্থত্বাদিত্যাদি| আমাশযসম্বন্ধেন বাতোঽপি মনাগ্লঙ্ঘনীযঃ স্থানাপেক্ষযা ভবতীতি ভাবঃ| বচনং হি- “স্থানং জযেদ্ধি পূর্বং স্থানস্যাবিরোধেন” ইতি||৩৬||

Adhikarana 38 (37-40) · Śloka 40

জীর্ণজ্বরেষু তু সর্বেষ্বেব সর্পিষঃ পানং প্রশস্যতে যথাস্বৌষধসিদ্ধস্য; সর্পির্হি স্নেহাদ্বাতং শমযতি, সংস্কারাত্ কফং, শৈত্যাত্ পিত্তমূষ্মাণং চ; তস্মাজ্জীর্ণজ্বরেষু সর্বেষ্বেব সর্পির্হিতমুদকমিবাগ্নিপ্লুষ্টেষু দ্রব্যেষ্বিতি||৩৭|| ভবন্তি চাত্র- যথা প্রজ্বলিতং বেশ্ম পরিষিঞ্চন্তি বারিণা| নরাঃ শান্তিমভিপ্রেত্য তথা জীর্ণজ্বরে ঘৃতম্||৩৮|| স্নেহাদ্বাতং শমযতি, শৈত্যাত্ পিত্তং নিযচ্ছতি| ঘৃতং তুল্যগুণং দোষং সংস্কারাত্তু জযেত্ কফম্||৩৯|| নান্যঃ স্নেহস্তথা কশ্চিত্ সংস্কারমনুবর্ততে| যথা সর্পিরতঃ সর্পিঃ সর্বস্নেহোত্তমং মতম্||৪০||

যথাস্বৌষধসিদ্ধস্যেতি বাতাদিজ্বরে বাতজ্বরাদিহরদ্রব্যসিদ্ধস্য| কথং সর্পিঃ সর্বত্র কার্যমিত্যাহ- সর্পির্হি স্নেহাদিত্যাদি| সংস্কারাত্ কফমিতি কটুতিক্তাদিকফহরসংস্কারাত্| যদ্যপি চ ‘যথাস্বৌষধসিদ্ধস্য’ ইতি বচনাদ্বাতেঽপি বাতহরসংস্কৃতমেব সর্পির্বিহিতং , তথাঽপি বাতে রূক্ষবিপরীতেন স্নেহেনাপি সর্পির্বাতহরমেব, পিত্তেঽপ্যুষ্ণবিপরীতশৈত্যান্বিতং, কফে তু সর্পিষঃ স্নেহশৈত্যাদিনা সমানেন কশ্চিন্ন স্বাভাবিকো বিরোধিগুণোঽস্তি কিন্তু সংস্কারাদ্ধিতমেবেতি দর্শযতি| ঊষ্মাণং চেতি জ্বরপ্রভাবভূতমূষ্মাণং; ন পিত্তোষ্মাণং, তস্য পিত্তগ্রহণেনৈব গ্রহণাত্| অনেন জ্বরস্যোষ্মহরণেন সর্পিষো জ্বরব্যাধিপ্রত্যনীকত্বং দর্শিতং ভবতি| অত্র বাতশমনং সর্পিষোঽভিধায পিত্তশমনেঽভিধাতব্যে কফশমনমুচ্যতে, শেষতো বক্তব্যোষ্মরূপব্যাধিপ্রত্যনীকতযাঽপি পিত্তশমনহেতোঃ শৈত্যস্য সমানগুণত্বাত্; যদি ত্বিহ মধ্যে পিত্তপ্রশমনমুচ্যতে, তদা পুনঃ সংস্কারাত্ কফমিত্যুক্ত্বা শৈত্যাদূষ্মাণমিতি বক্তব্যং স্যাত্| যত্র তু শ্লোকপাঠে ব্যাধিপ্রত্যনীকত্বং ঘৃতস্য পৃথঙ্নোক্তং; তত্র, ‘স্নেহাদ্বাতং শমযতি’ ইত্যাদৌ বাতমনু পিত্তমেব কৃতমিতি সাধু কৃতম্| তস্মাদিতি দোষব্যাধিপ্রত্যনীকত্বাত্| জীর্ণজ্বরেষ্বিতি বচনেনামজ্বরে নিষেধযতি, সামে হি সমানগুণত্বাত্ সর্পিরহিতম্| শান্তিমিতি সন্তাপশান্তিম্| অভিপ্রেত্যেতি বুদ্ধ্যা স্বীকৃত্য, তথা জীর্ণজ্বরে ঘৃতং ‘দদাতি’ ইতি শেষঃ| নন্বত্র, শ্লোকে সর্পির্গুণকথনে কিমিতি ব্যাধিরূপোষ্মশমনং নোচ্যতে? ব্রূমঃ- পিত্তোষ্মাব্যতিরিক্তত্বেন জ্বরোষ্মণঃ পিত্তশমনেনৈব লব্ধত্বাত্| ননু যদ্যেবং গদ্যপাঠে পৃথঙ্ন তর্হি পঠনীয ঊষ্মা? ব্রূমঃ- যাবানূষ্মা শারীরঃ স পৈত্ত এব, যতো ব্রূতে- “ঊষ্মা পিত্তাদৃতে নাস্তি” (বা.চি.অ.১) ইত্যাদি, তথা “পিত্তাদূষ্মোষ্মণঃ পক্তির্নরাণামুপজাযতে” (সূ.অ.১৭) ইতি; কিন্তু, নাসাবূষ্মা কদাচিত্ পিত্তেন সাম্যেঽপ্যেকো ভবতি, যথা- কফজ্বরে; কদাচিত্ত্বধিকে পিত্তে বহ্নিরূপ ঊষ্মা মন্দো ভবতি, যথা- পিত্তাগ্নিমান্দ্যে; তদেবমূষ্মা পিত্তাদ্ভিন্নোঽভিন্নশ্চ ভবতি; তত্র ভেদং গৃহীত্বা গদ্যপাঠে পৃথগ্ জ্বরোষ্মা পঠিতঃ, শ্লোকপাঠে ত্বভেদবিবক্ষযা ন পৃথক্ পঠিতঃ| জ্বরে তু পিত্তোষ্মা জ্বরপ্রভাবেণ বর্ধতে, স চ প্রভাবো জ্বরস্য দোষদূষ্যবিশেষাত্মকস্য, তথা “জ্বরস্ত্রিপাদস্ত্রিশিরঃ” ইত্যাদ্যুক্তপ্রাণিবিশেষস্য জ্ঞেযঃ| ননু সর্পিঃ কথং পিত্তং হন্তি? যতঃ, যথা পিত্তবিপরীতশৈত্যং সর্পিষি, তথা পিত্তসমানঃ স্নেহোঽপ্যস্তি| নৈবং, পিত্তে “সস্নেহং” (সূ.অ.১) ইতীষদর্থেন সশব্দেনাল্পস্য স্নেহস্যাভিধানাত্, উষ্ণত্বং তু পিত্তে প্রধানম্| যদ্যপি পিত্তং জলেনাপ্যারব্ধং, তথাঽপি তত্র শৈত্যমভিভূযাগ্নিকৃতমৌষ্ণ্যমেবাধিকং ভবতি, তথা তেজসো রৌক্ষ্যেণ জলকৃতস্নেহোঽপি পিত্তেঽভিভূযতে, দ্রবত্বং তু জলকৃতং তেজসা নাভিভূযতে, দৃশ্যতে হ্যগ্নিসম্পৃক্তে জলে দ্রবত্বমল্পস্নেহতা উষ্ণতা চেতি| কিংবা, কিমনেন তপ্তজলদৃষ্টান্তেন, অদৃষ্টকৃত এবাযং ভূতানামুত্পাদঃ; তেন, কশ্চিতেব গুণঃ পাঞ্চভৌতিকত্বেঽপি দ্রব্যাণামাবির্ভূতো ভবতি, নতু সর্বে; যথা- শালিষু তোযকৃতং মধুরত্বং, ন তু গৌরবমিত্যুক্তং সূত্রস্থানে| উত্সর্গতঃ সস্নেহস্যাপি পিত্তস্য কদাচিত্তেজোভূযস্ত্বেন রূক্ষত্বমপি ভবতি জীর্ণজ্বরে, তেন স্নিগ্ধশীতং সর্পির্হিতং তত্র ভবতীতি ন দোষঃ| অত এবোক্তং চিকিত্সিতে- “রূক্ষং তেজো জ্বরকরং” (চি.অ.৩) ইত্যাদি| ন চ বাচ্যং- যত্- সাংসিদ্ধিকমপি চেত্ পিত্তস্য স্নিগ্ধত্বমপৈতি তদা বাতস্যাপি রৌক্ষ্যং কিমিতি নাপৈতীতি; যতো বিচিত্রা এব হি গুণা অপ্রতিক্ষেপণীযাঃ প্রতিক্ষেপণীযাশ্চ; তত্র যে ন সর্বদা দৃশ্যন্তে বাতশৈত্য-পিত্তস্নেহাদযঃ, ত এব প্রতিক্ষেপণীযাঃ; নান্যে, তথৈব দৃষ্টত্বাত্| তুল্যগুণমিতি সর্বথা তুল্যগুণম্| ননু সংস্কারাত্ কফহন্তৃত্বে সংস্কারেণৈব কফো হন্যতে , কস্তত্র সর্পিষো ব্যাপার ইত্যাহ- নান্য ইত্যাদি| নান্য ইতি তৈলাদিঃ| সংস্কারমনুবর্তত ইতি সংস্কারকদ্রব্যকার্যং করোতি| এতেনৈতদ্দর্শযতি- যত্- তেনৈব দ্রব্যেণ যাদৃঙ্মানেন ঘৃতং সংস্ক্রিযতে, অন্যত্র তৈলাদিস্নেহস্তথৈব যদি সংস্ক্রিযতে তদা ঘৃতমেবান্যস্নেহেভ্যো বিশেষেণ সংস্কারকদ্রব্যকার্যং করোতি; অযং ঘৃতপ্রভাবোঽধিকঃ, তেন সংস্কারাত্ কফবিজযে ঘৃতমেব কর্তব্যমিত্যর্থঃ| প্রপঞ্চিতশ্চাযমর্থঃ স্নেহাধ্যাযে||৩৭-৪০||

Adhikarana 39 (41) · Śloka 41

গদ্যোক্তো যঃ পুনঃ শ্লোকৈরর্থঃ সমনুগীযতে| তদ্ব্যক্তিব্যবসাযার্থং দ্বিরুক্তং তন্ন গর্হ্যতে||৪১||

ননু স্নেহাদ্বাতং শমযতীত্যাদিগ্রন্থো গদ্যেনৈবোক্তঃ, তত্ কিমর্থং শ্লোকেনোচ্যত ইত্যাহ- গদ্যোক্তো য ইত্যাদি| তদ্ব্যক্তিব্যবসাযার্থমিত্যত্র তদ্ব্যক্তির্গদ্যোক্তার্থস্য ব্যক্তিঃ প্রসন্নতেতি যাবত্, ব্যবসাযঃ অধ্যবসাযো গ্রহণমিত্যর্থঃ; যস্মাত্ পূর্বোক্তার্থস্পষ্টীকরণার্থং পুনঃ শ্লোকেনাভিধানং, তস্মাত্ প্রযোজনান্তরযুক্তত্বান্ন পুনরুক্তিদোষ ইতি ভাবঃ| গদ্যোক্তাপেক্ষযা শ্লোকাভিধানং সুখগ্রহণং ভবতীতি লোকসিদ্ধমেব| অত্র চ গদ্যোক্ত ইত্যুপলক্ষণং, তেন শ্লোকোক্তোঽপি শ্লোকেনোচ্যত ইতি বোদ্ধব্যং; যথা- আরগ্বধীযে| এবং গদ্যোক্তোঽপি গদ্যেনেতি বোদ্ধব্যং; যথা- প্রপঞ্চেন কারণাদ্যভিধাযোক্তম্- “এবমসাত্ম্যেন্দ্রিযার্থসংযোগঃ প্রজ্ঞাপরাধঃ পরিণামশ্চ” (সূ.অ.১১) ইত্যাদি| তথা শ্লোকেনোক্তোঽপি গদ্যেনোচ্যতে, যথা- “ব্রহ্মণা হি যথা প্রোক্তং” (সূ.অ.১) ইত্যাদি শ্লোকেনাভিধায আদ্যেঽধ্যাযে পুনরন্যত্রোক্তং- “যমাযুর্বেদমশ্বিনৌ মহ্যং প্রাযচ্ছেতাম্” (চি.অ.১.পা.৪) ইত্যাদি| অত্র শ্লোকাভিধানমেব সুখগ্রহণার্থমিতি জ্ঞেযম্| কিংবা, তদ্ব্যক্তিব্যবসাযার্থমিতি যথাযোগ্যতযা বোদ্ধব্যম্| তেন, প্রপঞ্চাভিধানমর্থব্যক্ত্যর্থং বোদ্ধব্যং, সঙ্ক্ষেপাভিধানং তু ব্যবসাযার্থং; তেন গদ্যশ্লোকাভিধানাভ্যাং ব্যক্তিব্যবসাযৌ ক্রিযেতে| তত্র প্রপঞ্চাভিধানেঽর্থস্য ব্যক্তিঃ স্ফুটৈবেতি, সঙ্ক্ষেপাভিধানং তু প্রপঞ্চাপেক্ষযা সুখগ্রহণং ভবতি||৪১||

Adhikarana 40 (42-44) · Śloka 44

তত্র শ্লোকাঃ- ত্রিবিধং নামপর্যাযৈর্হেতুং পঞ্চবিধং গদম্| গদলক্ষণপর্যাযান্ ব্যাধেঃ পঞ্চবিধং গ্রহম্||৪২|| জ্বরমষ্টবিধং তস্য প্রকৃষ্টাসন্নকারণম্| পূর্বরূপং চ রূপং চ ভেষজং সঙ্গ্রহেণ চ||৪৩|| ব্যাজহার জ্বরস্যাগ্রে নিদানে বিগতজ্বরঃ| ভগবানগ্নিবেশায প্রণতায পুনর্বসুঃ||৪৪||

সঙ্গ্রহে যদ্যপি হেতুপর্যাযাঃ পূর্বমুক্তাস্তদনু হেতুত্রৈবিধ্যং, তথাঽপি ছন্দোঽনুরোধেন তদ্বিপর্যযকথনম্| নামরূপা যোগরূঢাঃ পর্যাযা নামপর্যাযাঃ| পঞ্চবিধং গদমিতি আগ্নেযাদিভেদেন| ‘গদপর্যাযনামানি’ ইতি পাঠে যল্লিঙ্গপর্যাযাভিধানং তস্য ব্যাধিপঞ্চবিধগ্রহশব্দেনৈব ‘তস্যোপলব্ধিঃ’ ইত্যাদিগ্রন্থান্তর্নিবিষ্টসকলার্থস্য গৃহীতত্বাদ্গ্রহণম্; ‘গদলক্ষণপর্যাযান্’ ইতি পাঠে তু পূর্বপক্ষো নাস্ত্যেব, পাঠস্তু নাযমতিপ্রসিদ্ধঃ| প্রকৃষ্টাসন্নকারণং জ্বরস্য রূক্ষাদি প্রকৃষ্টম্, আসন্নং বাতাদি; তথা প্রকৃষ্টং রুদ্রকোপঃ, আসন্নং তু রূক্ষাদি| যদ্যপি রূপাত্ পশ্চাত্ পূর্বরূপমুক্তং, তথাঽপি ছন্দোনুরোধাত্ পূর্বরূপমগ্রে কৃতং; কিংবা, বাতাদিজবিশিষ্টজ্বরলক্ষণানামব্যক্তানাং বিশিষ্টজ্বরপূর্বরূপতাং সূচযতা পূর্বরূপং পূর্বঙ্কৃতং; বাতাদিজ্বরলক্ষণানি হ্যব্যক্তানি পূর্বরূপাণি ভবন্তি||৪২-৪৪||

Adhikarana puShpikA · Śloka 1

ইত্যগ্নিবেশকৃতে তন্ত্রে চরকপ্রতিসংস্কৃতে নিদানস্থানে জ্বরনিদানং নাম প্রথমোঽধ্যাযঃ||১||

ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং নিদানস্থানে জ্বরনিদানং নাম প্রথমোঽধ্যাযঃ||১||