4. snēhavyāpatsiddhiḥ

Adhikarana 1 (1-2) · Śloka 2

অথাতঃ স্নেহব্যাপত্সিদ্ধিং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||

পূর্বসিদ্ধৌ বিল্বতৈলাদীন্যভ্যঙ্গসেবানুবাসনার্থং নির্দিষ্টানি, তদভিধাযিকা চেযং সিদ্ধিরিত্যনন্তরং স্নেহব্যাপত্সিদ্ধিরুচ্যতে; স্নেহানামানুবাসনিকানাং তদ্ব্যাপদাং চ ভেষজানামভিধাযিকা সিদ্ধিঃ||১-২||

Adhikarana 2 (3) · Śloka 3

স্নেহবস্তীন্নিবোধেমান্ বাতপিত্তকফাপহান্| মিথ্যাপ্রণিহিতানাং চ ব্যাপদঃ সচিকিত্সিতাঃ||৩||

অধ্যাযবক্তব্যমাহ- স্নেহবস্তীনিত্যাদি| বস্তিপ্রযোজ্যাঃ স্নেহা এতচ্ছ্লোকাভিহিতা ইত্যর্থঃ; প্রপঞ্চানভিধেযা যে ত্বপরেঽত্রার্থাঃ “স্নেহবস্তিং নিরূহং চ” ইত্যাদিনা বক্তব্যাঃ, তে ন প্রপঞ্চবাচ্যা ইতি তে ন প্রতিজ্ঞাতাঃ||৩||

Adhikarana 3 (4-7) · Śloka 7

দশমূলং বলাং রাস্নামশ্বগন্ধাং পুনর্নবাম্| গুডূচ্যেরণ্ডভূতীকভার্গীবৃষকরোহিষম্||৪|| শতাবরীং সহচরং কাকনাসাং পলাংশিকম্ | যবমাষাতসীকোলকুলত্থান্ প্রসৃতোন্মিতান্||৫|| চতুর্দ্রোণেঽম্ভসঃ পক্ত্বা দ্রোণশেষেণ তেন চ| তৈলাঢকং সমক্ষীরং জীবনীযৈঃ পলোন্মিতৈঃ||৬|| অনুবাসনমেতদ্ধি সর্ববাতবিকারনুত্| আনূপানাং বসা তদ্বজ্জীবনীযোপসাধিতা||৭||

দশমূলমিত্যাদৌ ভূতীকং কত্তৃণং যবানিকা বা; কাকনাসা বাযসীফলম্, অন্যে তু বাসাফলং ‘কাযুযাটুটী’ ইতি খ্যাতং দ্রব্যান্তরমেবাহুঃ| এতদ্ দশমূলস্থিতবিল্বেন বিল্বতৈলমিতি বদন্তি||৪-৭||

Adhikarana 4 (8) · Śloka 8

শতাহ্বাযববিল্বাম্লৈঃ সিদ্ধং তৈলং সমীরণে| সৈন্ধবেনাগ্নিতপ্তেন তপ্তং চানিলনুদ্ধৃতম্||৮||

আনূপানামিত্যাদৌ তদ্বদিতি পূর্বক্বাথেন সাধিতা| শতাহ্বেত্যাদি যোগান্তরম্| সৈন্ধবেনেত্যপি যোগান্তরম্||৮||

Adhikarana 5 (9-12) · Śloka 12

জীবন্তীং মদনং মেদাং শ্রাবণীং মধুকং বলাম্| শতাহ্বর্ষভকৌ কৃষ্ণাং কাকনাসাং শতাবরীম্||৯|| স্বগুপ্তাং ক্ষীরকাকোলীং কর্কটাখ্যাং শটীং বচাম্| পিষ্ট্বা তৈলং ঘৃতং ক্ষীরে সাধযেত্তচ্চতুর্গুণে||১০|| বৃংহণং বাতপিত্তঘ্নং বলশুক্রাগ্নিবর্ধনম্| মূত্ররেতোরজোদোষান্ হরেত্তদনুবাসনম্||১১|| লাভতশ্চন্দনাদ্যৈশ্চ পিষ্টৈঃ ক্ষীরচতুর্গুণম্| তৈলপাদং ঘৃতং সিদ্ধং পিত্তঘ্নমনুবাসনম্||১২||

জীবন্তীমিত্যাদিনা যমকমনুবাসনম্| এতদ্যমকং পূর্বাধ্যাযে জীবনীযসঞ্জ্ঞযা ব্যাপদিষ্টম্| লাভত ইতি যথালাভম্| চন্দনাদ্যং জ্বরচিকিত্সিতোক্তম্| তৈলং পাদং যস্মিন্ তত্ তৈলপাদম্||৯-১২||

Adhikarana 6 (13-17) · Śloka 17

সৈন্ধবং মদনং কুষ্ঠং শতাহ্বাং নিচুলং বচাম্ | হ্রীবেরং মধুকং ভার্গীং দেবদারু সকট্ফলম্||১৩|| নাগরং পুষ্করং মেদাং চবিকাং চিত্রকং শটীম্| বিডঙ্গাতিবিষে শ্যামাং হরেণুং নীলিনীং স্থিরাম্||১৪|| বিল্বাজমোদে কৃষ্ণাং চ দন্তীং রাস্নাং চ পেষযেত্| সাধ্যমেরণ্ডজং তৈলং তৈলং বা কফরোগনুত্||১৫|| ব্রধ্নোদাবর্তগুল্মার্শঃপ্লীহমেহাঢ্যমারুতান্| আনাহমশ্মরীং চৈব হন্যাত্তদনুবাসনাত্||১৬|| মদনৈর্বাঽম্লসংযুক্তৈর্বিল্বাদ্যেন গণেন বা| তৈলং কফহরৈর্বাঽপি কফঘ্নং কল্পযেদ্ভিষক্||১৭||

মদনৈর্বাঽম্লসংযুক্তৈরিত্যত্র মদনস্য কল্কত্বম্, কাঞ্জিকাদীনামম্লানাং দ্রবত্বম্| এতচ্চ মদনতৈলমিতি খ্যাতম্| বিল্বাদ্যো গণঃ দশমূলং; দশমূলং চাত্র ক্বাথকল্কাভ্যামপি দেযম্| উক্তং হি- “ক্বাথকল্কাবনির্দেশে গণাত্তস্মাত্ সমাবপেত্” ইতি| কফহরৈরিতি পূর্বোধ্যাযোক্তকফহরভেষজৈঃ, কিংবা ত্রিকটুকপঞ্চকোলাদিভিঃ||১৩-১৭||

Adhikarana 7 (18-24) · Śloka 24

বিডঙ্গৈরণ্ডরজনীপটোলত্রিফলামৃতাঃ| জাতীপ্রবালনির্গুণ্ডীদশমূলাখুপর্ণিকাঃ||১৮|| নিম্বপাঠাসহচরশম্পাককরবীরকাঃ| এষাং ক্বাথেন বিপচেত্তৈলমেভিশ্চ কল্কিতৈঃ||১৯|| ফলবিল্বত্রিবৃত্কৃষ্ণারাস্নাভূনিম্বদারুভিঃ| সপ্তপর্ণবচোশীরদার্বীকুষ্ঠকলিঙ্গকৈঃ||২০|| লতাগৌরীশতাহ্বাগ্নিশটীচোরকপৌষ্করৈঃ | তত্ কুষ্ঠানি ক্রিমীন্ মেহানর্শাংসি গ্রহণীগদম্||২১|| ক্লীবতাং বিষমাগ্নিত্বং মলং দোষত্রযং তথা| প্রযুক্তং প্রণুদত্যাশু পানাভ্যঙ্গানুবাসনৈঃ||২২|| ব্যাধিব্যাযামকর্মাধ্বক্ষীণাবলনিরোজসাম্| ক্ষীণশুক্রস্য চাতীব স্নেহবস্তির্বলপ্রদঃ||২৩|| পাদজঙ্ঘোরুপৃষ্ঠাংসকটীনাং স্থিরতাং পরাম্| জনযেদপ্রজানাং চ প্রজাং স্ত্রীণাং তথা নৃণাম্||২৪||

বিডঙ্গেত্যাদৌ এভিশ্চ কল্কিতৈরিতি বক্ষ্যমাণৈঃ| লতা মঞ্জিষ্ঠা, গৌরী হরিদ্রা| স্নেহবস্তির্বলপ্রদ ইতি এতৈস্তৈলৈঃ কৃতঃ স্নেহবস্তিরিত্যর্থঃ||১৮-২৪||

Adhikarana 8 (25) · Śloka 25

বাতপিত্তকফাত্যন্নপুরীষৈরাবৃতস্য চ| অভুক্তে চ প্রণীতস্য স্নেহবস্তেঃ ষডাপদঃ||২৫||

বাতপিত্তেত্যাদিনা স্নেহবস্তের্ব্যাপদঃ প্রাহ| এতাশ্চ ব্যাপদো মিথ্যাযোগেন স্নেহস্য ক্রিযমাণা উচ্যন্তে; প্রতিজ্ঞাতং হি ‘মিথ্যাপ্রণিহিতানাং চ ব্যাপদ’ ইতি, তেন স্নেহাযোগাতিযোগজন্যব্যাপদামিহানবসর এব; অনুবাসনাযোগাতিযোগজন্যাশ্চ ব্যাপদঃ কল্পনাসিদ্ধাবেবোক্তাঃ; তদ্ভেষজং চাতিস্নেহিতে শোধনবস্তিঃ, অস্নেহিতে পুনঃ স্নেহবস্তিদানমেব জ্ঞেযম্| এতচ্চ “তস্মান্নিরূঢঃ সংস্নেহ্যো নিরূহ্যশ্চানুবাসিতঃ” ইত্যাদিনোক্তত্বাত্ প্রসঙ্গেনেহোক্তম্ ||২৫||

Adhikarana 9 (26-28) · Śloka 28

শীতোঽল্পো বাঽধিকে বাতে পিত্তেঽত্যুষ্ণঃ কফে মৃদুঃ| অতিভুক্তে গুরুর্বর্চঃসঞ্চযেঽল্পবলস্তথা||২৬|| দত্তস্তৈরাবৃতঃ স্নেহো ন যাত্যভিভবাদপি | অভুক্তেঽনাবৃতত্বাচ্চ যাত্যূর্ধ্বং তস্য লক্ষণম্||২৭|| অঙ্গমর্দজ্বরাধ্মানশীতস্তম্ভোরুপীডনৈঃ | পার্শ্বরুগ্বেষ্টনৈর্বিদ্যাত্ স্নেহং বাতাবৃতং ভিষক্||২৮||

যথাক্রমং ষড্ব্যাপদাং হেতুমাহ- শীত ইত্যাদি| গুরুরিতি গুরুত্বযুক্তঃ | বর্চঃসঞ্চযেঽল্পবল ইতি সঞ্চিতে মলে সতি অল্পবলো বর্চঃসঞ্চযপ্রবর্তনাক্ষম ইত্যর্থঃ| তৈরাবৃত ইতি পদং প্রত্যেকং বাতাদিষু পঞ্চসু যোজনীযম্| অভিভবাদপীতি বাতাদিনাঽঽবৃতমার্গত্বান্ন যাতি; তথা তেন বাতাদিনোল্বণেনাভিভূতগুণত্বাচ্চ ন আযাতি| অনাবৃতত্বাদিতি অন্নেনোর্ধ্বমার্গস্যাপিহিতত্বাত্| তস্য লক্ষণমিতি যথাক্রমং বাতাদ্যাবৃতস্য লক্ষণং বক্ষ্যমাণমঙ্গমর্দাদি| বেষ্টনৈরিতি পার্শ্ববেষ্টনৈরেব| এতে চ স্তম্ভাদযো বাতাবৃতস্নেহমহিম্নৈব জাযন্তে, তেন স্নেহপ্রযোগাত্ পূর্বং ন ভবন্ত্যেব||২৬-২৮||

Adhikarana 10 (29-31) · Śloka 31

স্নিগ্ধাম্ললবণোষ্ণৈস্তং রাস্নাপীতদ্রুতৈলিকৈঃ | সৌবীরকসুরাকোলকুলত্থযবসাধিতৈঃ||২৯|| নিরূহৈর্নির্হরেত্ সম্যক্ সমূত্রৈঃ পাঞ্চমূলিকৈঃ| তাভ্যামেব চ তৈলাভ্যাং সাযং ভুক্তেঽনুবাসযেত্||৩০|| দাহরাগতৃষামোহতমকজ্বরদূষণৈঃ| বিদ্যাত্ পিত্তাবৃতং স্বাদুতিক্তৈস্তং বস্তিভির্হরেত্||৩১||

রাস্নাতৈলং “রাস্নাসহস্রনির্যূহে” (চি.অ.২৮) ইত্যাদিনা বিহিতং বাতব্যাধাবুক্তম্| পীতদ্রুতৈলং চ পীতদ্রু-সৌবীরকাদিদ্রবেণ সাধ্যমিতি ব্রুবতে| তাভ্যামিতি রাস্নাপীতদ্রুতৈলাভ্যাম্||২৯-৩১||

Adhikarana 11 (32-33) · Śloka 33

তন্দ্রাশীতজ্বরালস্যপ্রসেকারুচিগৌরবৈঃ| সম্মূর্চ্ছাগ্লানিভির্বিদ্যাচ্ছ্লেষ্মণা স্নেহমাবৃতম্||৩২|| কষাযকটুতীক্ষ্ণোষ্ণৈঃ সুরামূত্রোপসাধিতৈঃ| ফলতৈলযুতৈঃ সাম্লৈর্বস্তিভিস্তং বিনির্হরেত্||৩৩||

ফলতৈলং পূর্বব্যাহৃতমেব জ্ঞেযম্||৩২-৩৩||

Adhikarana 12 (34-35) · Śloka 35

ছর্দিমূর্চ্ছারুচিগ্লানিশূলনিদ্রাঙ্গমর্দনৈঃ | আমলিঙ্গৈঃ সদাহৈস্তং বিদ্যাদত্যশনাবৃতম্||৩৪|| কটূনাং লবণানাং চ ক্বাথৈশ্চূর্ণৈশ্চ পাচনম্| বিরেকো মৃদুরত্রামবিহিতা চ ক্রিযা হিতা||৩৫||

আমলিঙ্গৈরিতি আমলক্ষণৈরালস্যাদিভিঃ| আমবিহিতা ক্রিযেতি “আমং প্রদুষ্টমন্নাভিভূতং পুনরুল্লিখেত্” (বি.অ.২) ইত্যাদিনা বিহিতাঽনুসর্তব্যা||৩৪-৩৫||

Adhikarana 13 (36-37) · Śloka 37

বিণ্মূত্রানিলসঙ্গার্তিগুরুত্বাধ্মানহৃদ্গ্রহৈঃ| স্নেহং বিডাবৃতং জ্ঞাত্বা স্নেহস্বেদৈঃ সবর্তিভিঃ||৩৬|| শ্যামাবিল্বাদিসিদ্ধৈশ্চ নিরূহৈঃ সানুবাসনৈঃ| নির্হরেদ্বিধিনা সম্যগুদাবর্তহরেণ চ||৩৭||

স্নেহং বিডাবৃতমিত্যাদৌ বর্তিভিরিতি ফলবর্তিভিঃ, কেচিত্তু ‘বস্তিভিঃ’ ইতি পঠন্তি| শ্যামাবিল্বাদীনি চ শ্যামা চ বিল্বাদীনি দশমূলানি চ শ্যামাবিল্বাদীনি; কিংবা, শ্যামাদীন্যপ্যত্র কল্পোক্তানি নব গৃহ্যন্তে; তৈর্নিরূহস্য তথাঽনুবাসনস্য চ সাধনমিহ জ্ঞেযম্| উদাবর্তহরেণেতি ত্রিমর্মীযোক্তোদাবর্তচিকিত্সিতেন||৩৬-৩৭||

Adhikarana 14 (38-40) · Śloka 40

অভুক্তে শূন্যপাযৌ বা বেগাত্ স্নেহোঽতিপীডিতঃ| ধাবত্যূর্ধ্বং ততঃ কণ্ঠাদূর্ধ্বেভ্যঃ খেভ্য এত্যপি||৩৮|| মূত্রশ্যামাত্রিবৃত্সিদ্ধো যবকোলকুলত্থবান্| তত্সিদ্ধতৈল ইষ্টোঽত্র নিরূহঃ সানুবাসনঃ||৩৯|| কণ্ঠাদাগচ্ছতঃ স্তম্ভকণ্ঠগ্রহবিরেচনৈঃ| ছর্দিঘ্নীভিঃ ক্রিযাভিশ্চ তস্য কার্যং নিবর্তনম্||৪০||

অভুক্তে ইত্যাদিহেতুত্রযং স্নেহবস্তেরূর্ধ্বগমনকারণং জ্ঞেযং; পূর্বং চ যদ্যপ্যভোজনদানমেব কারণং প্রতিশ্রুতং, তথাঽপ্যেককার্যতযা চিকিত্সিতসামান্যাচ্চ শূন্যপাযুত্বাতিপীডনে অপ্যত্র হেতুত্বেনোক্তে; শূন্যপাযুত্বং চাধোনিরোধাকর্তৃতযা স্নেহমূর্ধ্বং নযতি| ঊর্ধ্বেভ্যঃ খেভ্য ইতি মুখনাসাদিভ্যঃ| এতীতি নির্গচ্ছতি| অপিশব্দান্মুখাদিনির্গমনস্য কাদাচিত্কত্বং দর্শযতি| তত্সিদ্ধতৈল ইতি মূত্রশ্যামাদিসাধিততৈলেন যুক্তঃ| সানুবাসন ইতি তত্সিদ্ধতৈলেন চানুবাসনং দেযম্| আগচ্ছত ইতি আগমনসময এব স্তম্ভাদি কর্তব্যম্| স্তম্ভঃ ব্যজনশীতজলসেকাদিনা; কণ্ঠগ্রহঃ ঊর্ধ্বগমনপ্রতিষেধার্থং কণ্ঠপীডনম্| ছর্দিঘ্নীঃ ক্রিযাঃ ছর্দিশ্চিকিত্সিতে “মনোঽভিঘাতে তু মনোঽনুকূলাঃ” ইত্যাদিনা “সুখ এব জেতুম্” (চি.অ.২০) ইত্যন্তেনোক্তা ইহাভিপ্রেতা জ্ঞেযাঃ||৩৮-৪০||

Adhikarana 15 (41) · Śloka 41

যস্য নোপদ্রবং কুর্যাত্ স্নেহবস্তিরনিঃসৃতঃ| সর্বেঽল্পো বাঽঽবৃতো রৌক্ষ্যাদুপেক্ষ্যঃ স বিজানতা||৪১||

বাতাদ্যাবৃতস্নেহপ্রবর্তনমভিধায অপ্রবর্তনীযস্নেহমাহ- যস্য নোপদ্রবমিত্যাদি| নোপদ্রবং কুর্যাদিতি অনিঃসৃতোঽপি স্তম্ভরুগাদীনূর্ধ্বোক্তান্ন কুর্যাত্| অল্পো বাঽঽবৃত ইতি স্তোকনিঃসৃতঃ, স্তোকশ্চ বৃতঃ| বৃতস্যাপি স্তম্ভাদ্যুপদ্রবাকরণে হেতুমাহ- রৌক্ষ্যাদিতি| তদাঽত্যর্থরূক্ষতযা শরীরস্য তিষ্ঠন্নপি স্নেহো ন ব্যাপদমাবহতীত্যর্থঃ; উপেক্ষ্য ইতি ন তত্র যথোক্তবাতাবৃতস্নেহচিকিত্সা কর্তব্যেত্যর্থঃ; অন্যত্রাপ্যুক্তম্- “অহোরাত্রাদপি স্নেহঃ প্রত্যাগচ্ছন্ন দূষ্যতি| কুর্যাদ্বস্তিগুণাংশ্চাপি জীর্ণস্ত্বল্পগুণো ভবেত্” (সু.চি.অ.৩৭) ইতি||৪১||

Adhikarana 16 (42-45) · Śloka 45

যুক্তস্নেহং দ্রবোষ্ণং চ লঘুপথ্যোপসেবনম্| ভুক্তবান্ মাত্রযা ভোজ্যমনুবাস্যস্ত্র্যহাত্ত্র্যহাত্||৪২|| ধান্যনাগরসিদ্ধং হি তোযং দদ্যাদ্বিচক্ষণঃ| ব্যুষিতায নিশাং কল্যমুষ্ণং বা কেবলং জলম্||৪৩|| স্নেহাজীর্ণং জরযতি শ্লেষ্মাণং তদ্ভিনত্তি চ| মারুতস্যানুলোম্যং চ কুর্যাদুষ্ণোদকং নৃণাম্||৪৪|| বমনে চ বিরেকে চ নিরূহে সানুবাসনে| তস্মাদুষ্ণোদকং দেযং বাতশ্লেষ্মোপশান্তযে||৪৫||

উত্পন্নব্যাপত্প্রতীকারমভিধাযাব্যাপন্নানুবাসনানুগুণং ভোজনমাহ- যুক্তস্নেহমিত্যাদি| যুক্তস্নেহমিতি অব্যাপন্নস্নেহমিতি ভাবঃ| উপসেবনং ভোজনম্| ত্র্যহাদিতি বিধানং প্রাযিকম্| ধান্যেত্যাদৌ ষডঙ্গবিধিনা তোযং সাধনীযম্| কল্যমিতি প্রভাতে| স্নেহাজীর্ণমিতি স্নেহস্যাজীর্ণং কোষ্ঠোপলেপকমংশম্||৪২-৪৫||

Adhikarana 17 (46-47) · Śloka 47

রূক্ষনিত্যস্তু দীপ্তাগ্নির্ব্যাযামী মারুতামযী| বঙ্ক্ষণশ্রোণ্যুদাবৃত্তবাতাশ্চার্হা দিনে দিনে||৪৬|| এষাং চাশু জরাং স্নেহো যাত্যম্বু সিকতাস্বিব| অতোঽন্যেষাং ত্র্যহাত্প্রাযঃ স্নেহং পচতি পাবকঃ||৪৭||

প্রত্যহানুবাসনীযানাহ- রূক্ষনিত্যস্ত্বিত্যাদি| বঙ্ক্ষণশ্রোণিগতশ্চ তথোদাবৃত্তশ্চ বাতো যেষাং তে বঙ্ক্ষণশ্রোণ্যুদাবৃত্তবাতাঃ| অর্হা ইতি অনুবাসনার্হাঃ| উক্তং চান্যত্র- “রূক্ষস্য বহুবাতস্য স্নেহবস্তিং দিনে দিনে| দদ্যাদ্বৈদ্যস্ততোঽন্যেষামগ্ন্যাবাধভযাত্ত্র্যহাত্” (সু.চি.অ.৩৭) ইতি| প্রত্যহদানত্র্যহদানোপপত্তিমাহ- এষামিত্যাদি| ত্র্যহাত্ স্নেহং পচতীতি পক্বাশযোপলেপকং স্নেহং বহির্নিঃসৃতেনোষ্মণা পচতি; যদ্যপ্যত্রাগ্নিনোর্ধ্বস্থিতেন তাদৃশঃ সম্বন্ধঃ স্নেহস্য নাস্তি, তথাঽপি জাঠরস্যৈব বিমিশ্রিতৈরবযবৈস্তত্পাকো বক্তব্যঃ| প্রাযঃশব্দেন পঞ্চাহপাকমপি দর্শযতি, তেন পঞ্চাহদানমপ্যনুবাসনে মন্দাগ্নিং প্রতি প্রাগুক্তং জ্ঞেযম্, উক্তং হি- “পরতস্ত্র্যহে বা দ্ব্যহেঽনুবাস্যোঽহনি পঞ্চমে বা” (সি.অ.১০) ইতি||৪৬-৪৭||

Adhikarana 18 (48-49) · Śloka 49

ন ত্বামং প্রণযেত্ স্নেহং স হ্যভিষ্যন্দযেদ্গুদম্| সাবশেষং চ কুর্বীত বাযুঃ শেষে হি তিষ্ঠতি||৪৮|| ন চৈব গুদকণ্ঠাভ্যাং দদ্যাত্ স্নেহমনন্তরম্| উভযস্মাত্ সমং গচ্ছন্ বাতমগ্নিং চ দূষযেত্||৪৯||

আমমিতি অপক্বম্| প্রণযেদিতি অনুবাসনং দদ্যাত্| সাবশেষং কুর্বীতেতি ন নিঃশেষং দদ্যাত্| গুদকণ্ঠাভ্যামিতি অনুবাসনপানাভ্যাম্| অনন্তরমিতি এককালম্| বাতমগ্নিং চ দূষযেদিতি অত্র বাতদূষণমজীর্ণজনকতযা বাতাবরণাচ্চ জ্ঞেযম্||৪৮-৪৯||

Adhikarana 19 (50-51) · Śloka 51

স্নেহবস্তিং নিরূহং বা নৈকমেবাতিশীলযেত্| উত্ক্লেশাগ্নিবধৌ স্নেহান্নিরূহাত্ পবনাদ্ভযম্||৫০|| তস্মান্নিরূঢঃ সংস্নেহ্যো নিরূহ্যশ্চানুবাসিতঃ| স্নেহশোধনযুক্ত্যৈবং বস্তিকর্ম ত্রিদোষনুত্||৫১||

নিরূহানুবাসনযোঃ পরস্পরাব্যবধানদানে দোষমাহ- স্নেহবস্তিং নিরূহং বেত্যাদি| একমেবিতি পরস্পরানন্তরিতম্| উত্ক্লেশঃ কফপিত্তোত্ক্লেশঃ| নিরূহাত্ পবনাদ্ভযমিতি নিরন্তরনিরূহেণ শরীরস্য শোধনাতিযোগাত্ পবনাদ্ভযং ভবতি| নিরূঢঃ সংস্নেহ্য ইতি নিরূহেণ স্রোতঃসু শোধিতেষু কফপিত্তজযে কৃতে স্নেহবস্তিরভ্যস্যঃ; তথাঽনুবাসিতশ্চ সম্যগনুবাসনেন হি স্নিগ্ধঃ সন্নিরূহ্য এব| এবং প্রযুজ্যমানস্নেহনিরূহযোস্ত্রিদোষহন্তৃত্বং স্নেহেন বাতজযান্নিরূহেণ কফপিত্তজযাদ্ভবতীত্যাহ- স্নেহশোধনেত্যাদি| শোধনমিহ নিরূহোঽভিপ্রেতঃ||৫০-৫১||

Adhikarana 20 (52-54) · Śloka 54

কর্মব্যাযামভারাধ্বযা(পা)নস্ত্রীকর্ষিতেষু চ| দুর্বলে বাতভগ্নে চ মাত্রাবস্তিঃ সদা মতঃ||৫২|| যথেষ্টাহারচেষ্টস্য সর্বকালং নিরত্যযঃ| হ্রস্বাযাঃ স্নেহমাত্রাযা মাত্রাবস্তিঃ সমো ভবেত্||৫৩|| বল্যং সুখোপচর্যং চ সুখং সৃষ্টপুরীষকৃত্| স্নেহমাত্রাবিধানং হি বৃংহণং বাতরোগনুত্||৫৪||

অনুবাসনবিশেষস্য মাত্রাবস্তের্বিষযং প্রমাণং গুণাংশ্চ যথাক্রমমাহ- কর্মেত্যাদি| কর্মাত্র কন্দুকচালনাদি , ব্যাযামঃ ধনুরাকর্ষণাদিঃ| বাতভগ্নে বাতেন পীডিতে| সদেতি প্রত্যহম্| হ্রস্বাযা ইতি অর্ধাহঃপরিণমনীযাযাঃ; উক্তং হি- “অহোরাত্রমহঃ কৃত্স্নং দিনার্ধং চ প্রতীক্ষতে| উত্তমা মধ্যমা হ্রস্বা স্নেহমাত্রা জরাং প্রতি” (সূ.অ.১৩) ইতি| তন্ত্রান্তরে স্নেহমাত্রাত্রযং প্রমাণৈরেবোক্তং; যথা- “ষট্পলী তু ভবেজ্জ্যেষ্ঠা, মধ্যমা ত্রিপলী ভবেত্| কনীযসী সার্ধপলা ত্রিধা মাত্রাঽনুবাসনে” ইতি| সুশ্রুতেনাপি বস্তিপ্রমাণমুক্তং; যথা অনুবাসনে- “তস্যাপি বিকল্পোঽর্ধার্ধমাত্রাবকৃষ্টোঽপরিহার্যো মাত্রাবস্তিঃ” (সু.চি.অ.৩৫) ইতি| অনেন চ সার্ধপলমানো মাত্রাবস্তিরুক্তো ভবতি; তত্র হি ষট্পলঃ স্নেহবস্তিরুক্তঃ, অনুবাসনং তু ত্রিপলম্| সুখোপচর্যমিতি চেষ্টাহারনিযমাভাবাদেব||৫২-৫৪||

Adhikarana 21 (55-56) · Śloka 56

তত্র শ্লোকৌ- বাতাদীনাং শমাযোক্তাঃ প্রবরাঃ স্নেহবস্তযঃ| তেষাং চাজ্ঞপ্রযুক্তানাং ব্যাপদঃ সচিকিত্সিতাঃ||৫৫|| প্রাগ্ভোজ্যং স্নেহবস্তের্যদ্ ধ্রুবং যেঽর্হাস্ত্র্যহাচ্চ যে স্নেহবস্তিবিধিশ্চোক্তো মাত্রাবস্তিবিধিস্তথা||৫৬||

সঙ্গ্রহে ভোজ্যগ্রহণেন ধান্যনাগরজলাদ্যপি সঙ্গ্রাহ্যম্| ধ্রুবং যেঽর্হা ইতি প্রত্যহমনুবাসনীযাঃ| বিধিশ্চোক্ত ইতি ‘ন ত্বামং প্রণযেত্’ ইত্যাদিগ্রন্থোক্তোঽর্থঃ||৫৫-৫৬||

Adhikarana puShpikA · Śloka 4

ইত্যগ্নিবেশকৃতে তন্ত্রে চরকপ্রতিসংস্কৃতেঽপ্রাপ্তে দৃঢবলসম্পূরিতে সিদ্ধিস্থানে স্নেহব্যাপত্সিদ্ধির্নাম চতুর্থোঽধ্যাযঃ||৪||

ইতি শ্রীচক্রপাণিদত্তবিরচিতাযামাযুর্বেদদীপিকাযাং চরকতাত্পর্যটীকাযাং সিদ্ধিস্থানে স্নেহব্যাপত্সিদ্ধির্নাম চতুর্থোঽধ্যাযঃ||৪||