Adhikarana 1 (1-2) · Śloka 2
অথাত উপকল্পনীযমধ্যাযং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथात उपकल्पनीयमध्यायं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
স্নেহস্বেদোপপন্নস্য সংশোধনমনন্তরমিত্যনেনৈবোক্তাত্ সম্বন্ধাত্ স্বেদাধ্যাযানন্তরং শোধনবিধেরভিধাযকমুপকল্পনীযমাহ| উপকল্পনীযমিতি শোধনোপকল্পনামধিকৃত্য কৃতোঽধ্যায উপকল্পনীযঃ||১-২||
Adhikarana 2 (3-4) · Śloka 4
ইহ খলু রাজানং রাজমাত্রমন্যং বা বিপুলদ্রব্যং বমনং বিরেচনং বা পাযযিতুকামেন ভিষজা প্রাগেবৌষধপানাত্ সম্ভারা উপকল্পনীযা ভবন্তি সম্যক্চৈব হি গচ্ছত্যৌষধে প্রতিভোগার্থাঃ, ব্যাপন্নে চৌষধে ব্যাপদঃ পরিসঙ্খ্যায প্রতীকারার্থাঃ; ন হি সন্নিকৃষ্টে কালে প্রাদুর্ভূতাযামাপদি সত্যপি ক্রযাক্রযে সুকরমাশু সম্ভরণমৌষধানাং যথাবদিতি||৩|| এবংবাদিনং ভগবন্তমাত্রেযমগ্নিবেশ উবাচ- ননু ভগবন্! আদাবেব জ্ঞানবতা তথা প্রতিবিধাতব্যং যথা প্রতিবিহিতে সিধ্যেদেবৌষধমেকান্তেন, সম্যক্প্রযোগনিমিত্তা হি সর্বকর্মণাং সিদ্ধিরিষ্টা, ব্যাপচ্চাসম্যক্প্রযোগনিমিত্তা; অথ সম্যগসম্যক্ চ সমারব্ধং কর্ম সিদ্ধ্যতি ব্যাপদ্যতে বাঽনিযমেন, তুল্যং ভবতি জ্ঞানমজ্ঞানেনেতি||৪||
इह खलु राजानं राजमात्रमन्यं वा विपुलद्रव्यं वमनं विरेचनं वा पाययितुकामेन भिषजा प्रागेवौषधपानात् सम्भारा उपकल्पनीया भवन्ति सम्यक्चैव हि गच्छत्यौषधे प्रतिभोगार्थाः, व्यापन्ने चौषधे व्यापदः परिसङ्ख्याय प्रतीकारार्थाः; न हि सन्निकृष्टे काले प्रादुर्भूतायामापदि सत्यपि क्रयाक्रये सुकरमाशु सम्भरणमौषधानां यथावदिति||३|| एवंवादिनं भगवन्तमात्रेयमग्निवेश उवाच- ननु भगवन्! आदावेव ज्ञानवता तथा प्रतिविधातव्यं यथा प्रतिविहिते सिध्येदेवौषधमेकान्तेन, सम्यक्प्रयोगनिमित्ता हि सर्वकर्मणां सिद्धिरिष्टा, व्यापच्चासम्यक्प्रयोगनिमित्ता; अथ सम्यगसम्यक् च समारब्धं कर्म सिद्ध्यति व्यापद्यते वाऽनियमेन, तुल्यं भवति ज्ञानमज्ञानेनेति||४||
🔊 Audio coming soon
রাজ্ঞ ইব মাত্রা পরিচ্ছদো যস্য স রাজমাত্রঃ| বিপুলদ্রব্যস্তু বণিগাদিঃ| পরিসঙ্খ্যাযেতি জ্ঞাত্বা| ক্রযঃ পণ্যম্, আক্রযো মূল্যম্| অনিযমেনেতি সম্যগারব্ধং সিধ্যতি ব্যাপদ্যতে চ||৩-৪||
Adhikarana 3 (5) · Śloka 5
তমুবাচ ভগবানাত্রেযঃ- শক্যং তথা প্রতিবিধাতুমস্মাভিরস্মদ্বিধৈর্বাঽপ্যগ্নিবেশ! যথা প্রতিবিহিতে সিধ্যেদেবৌষধমেকান্তেন, তচ্চ প্রযোগসৌষ্ঠবমুপদেষ্টুং যথাবত্; নহি কশ্চিদস্তি য এতদেবমুপদিষ্টমুপধারযিতুমুত্সহেত, উপধার্য বা তথা প্রতিপত্তুং প্রযোক্তুং বা; সূক্ষ্মাণি হি দোষভেষজদেশকালবলশরীরাহারসাত্ম্যসত্ত্বপ্রকৃতিবযসামবস্থান্তরাণি, যান্যনুচিন্ত্যমানানি বিমলবিপুলবুদ্ধেরপি বুদ্ধিমাকুলীকুর্যুঃ কিং পুনরল্পবুদ্ধেঃ; তস্মাদুভযমেতদ্যথাবদুপদেক্ষ্যামঃ- সম্যক্প্রযোগং চৌষধানাং, ব্যাপন্নানাং চ ব্যাপত্সাধনানি সিদ্ধিষূত্তরকালম্||৫||
तमुवाच भगवानात्रेयः- शक्यं तथा प्रतिविधातुमस्माभिरस्मद्विधैर्वाऽप्यग्निवेश! यथा प्रतिविहिते सिध्येदेवौषधमेकान्तेन, तच्च प्रयोगसौष्ठवमुपदेष्टुं यथावत्; नहि कश्चिदस्ति य एतदेवमुपदिष्टमुपधारयितुमुत्सहेत, उपधार्य वा तथा प्रतिपत्तुं प्रयोक्तुं वा; सूक्ष्माणि हि दोषभेषजदेशकालबलशरीराहारसात्म्यसत्त्वप्रकृतिवयसामवस्थान्तराणि, यान्यनुचिन्त्यमानानि विमलविपुलबुद्धेरपि बुद्धिमाकुलीकुर्युः किं पुनरल्पबुद्धेः; तस्मादुभयमेतद्यथावदुपदेक्ष्यामः- सम्यक्प्रयोगं चौषधानां, व्यापन्नानां च व्यापत्साधनानि सिद्धिषूत्तरकालम्||५||
🔊 Audio coming soon
প্রযোগসৌষ্ঠবং প্রযোগসুষ্ঠুত্বং, যথাবদুপদেষ্টুং শক্যমস্মাভিরস্মদ্বিধৈর্বেতি যোজনা| এতদিতি প্রযোগসৌষ্ঠবম্| এবমিতি যথাবদ্| উপধারযিতুমিতি গ্রন্থেন ধারযিতুম্| প্রতিপত্তুমিতি অর্থতো গ্রহীতুম্| সূক্ষ্মাণীত্যাদি সূক্ষ্মাণীব সূক্ষ্মাণি দুর্বোধত্বেন; তত্র দোষস্যাবস্থান্তরাণি- ক্ষযস্তথা বৃদ্ধিস্তথা সমত্বং, এবমূর্ধ্বদেহগমনং তথাঽধোদেহগমনং তির্যগ্গমনং বা, তথা শাখাশ্রযিত্বং কোষ্ঠাশ্রযিত্বং মধ্যমার্গাশ্রযিত্বং, তথা স্বদেশগমনং পরদেশগমনং, তথা স্বতন্ত্রত্বং পরতন্ত্রত্বং, তথাংঽশাংশবিকল্পঃ, তথা ধাতুবিশেষাশ্রযিত্বং, তথা কালপ্রকৃতিদূষ্যানুগুণত্বাদিকৃত্স্নতন্ত্রপ্রতিপাদিতানি জ্ঞেযানি; এবং ভেষজস্যাবস্থান্তরাণি- তরুণত্বং, বৃদ্ধত্বম্, আর্দ্রত্বং, শুষ্কত্বং, দ্রব্যান্তরসংযুক্তত্বং, স্বরসাদিকল্পনাযোগিত্বং, রসবীর্যবিপাকৈঃ প্রভাবৈশ্চ তস্মিন্ দেহে দোষাদৌ তত্তত্কার্যকর্তৃত্বমেবমাদীনি; দেশস্ত্বানূপজাঙ্গলসাধারণপ্রশস্তাদিভেদভিন্নঃ; কালাবস্থান্তরাণি তু ঋতুভেদাঃ, পূর্বাহ্ণাদিশ্চ তথা ব্যাধ্যবস্থা জ্বরাষ্টাহাদয ইত্যেবমাদীনি; বলং তু সহজং যুক্তিকৃতং তথা কালকৃতমুত্কৃষ্টাপকৃষ্টমধ্যাদিভেদভিন্নং; শরীরং তু স্থূলত্বকৃশত্বসারবত্ত্বনিঃসারবত্ত্বাদি, তথা পরিপালনীযদৃষ্টিমর্মাদ্যবযববিশেষাদিভিশ্চ ভিন্নম্; আহারস্তু প্রকৃতিকরণসংযোগরাশিভেদাদিভির্ভিন্নঃ; সাত্ম্যং তু দেশতঃ কালতো ব্যাধিতঃ প্রকৃতিতঃ স্বভাবতোঽভ্যাসতশ্চ ভিন্নং ভবতি; সত্ত্বং তু ভযশৌর্যবিষাদহর্ষাদিযোগভিন্নং ভবতি; প্রকৃতিভেদাস্ত্বনেকপ্রকারভিন্নবাতাদ্যারব্ধত্বেন বোদ্ধব্যাঃ; বযোভেদাস্তু বাল্যযৌবনবার্ধক্যতদবান্তরভেদাঃ ; এতানি দোষাদ্যবস্থান্তরাণি চিকিত্সাপ্রযোগে যথাযথাঽপেক্ষ্যন্তে, তদুদাহরণং শাস্ত্রেঽনুসরণীযম্, ইহ লিখ্যমানং তু বিস্তরত্বং গ্রন্থস্যাবহতীতি নোক্তম্| উভযমেতদুত্তরকালং সিদ্ধিষূপদেক্ষ্যাম ইতি যোজনা||৫||
Adhikarana 4 (6) · Śloka 6
ইদানীং তাবত্ সম্ভারান্ বিবিধানপি সমাসেনোপদেক্ষ্যামঃ; তদ্যথা- দৃঢং নিবাতং প্রবাতৈকদেশং সুখপ্রবিচারমনুপত্যকং ধূমাতপজলরজসামনভিগমনীযমনিষ্ঠানাং চ শব্দস্পর্শরসরূপগন্ধানাং সোদপানোদূখলমুসলবর্চঃস্থানস্নানভূমিমহানসং বাস্তুবিদ্যাকুশলঃ প্রশস্তং গৃহমেব তাবত্ পূর্বমুপকল্পযেত্||৬||
इदानीं तावत् सम्भारान् विविधानपि समासेनोपदेक्ष्यामः; तद्यथा- दृढं निवातं प्रवातैकदेशं सुखप्रविचारमनुपत्यकं धूमातपजलरजसामनभिगमनीयमनिष्ठानां च शब्दस्पर्शरसरूपगन्धानां सोदपानोदूखलमुसलवर्चःस्थानस्नानभूमिमहानसं वास्तुविद्याकुशलः प्रशस्तं गृहमेव तावत् पूर्वमुपकल्पयेत्||६||
🔊 Audio coming soon
বিবিধানপীতি অপিশব্দঃ সমাসেনাপীত্যেবংরূপো জ্ঞেযঃ; তেন গৃহাদযোঽপি বিস্তরেণোচ্যন্তে, সঙ্গ্রহণীযাদযশ্চ সমাসেনেতি দ্বযমপি সুস্থং স্যাত্; যদি বা ‘দ্বিবিধানপি’ ইতি পাঠঃ, তেন ভোগার্থানি তথা ব্যাপত্সাধনানি গৃহ্যন্তে| অনুপত্যকং যদ্ বিদূরমন্যস্য মহতো গৃহস্য| উদকং পীযতে যেন তদুদপানম্||৬||
Adhikarana 5 (7) · Śloka 7
ততঃ শীলশৌচাচারানুরাগদাক্ষ্যপ্রাদক্ষিণ্যোপপন্নানুপচারকুশলান্ সর্বকর্মসু পর্যবদাতান্ সূপৌদনপাচকস্নাপকসংবাহকোত্থাপকসংবেশকৌষধপেষকাংশ্চ পরিচারকান্ সর্বকর্মস্বপ্রতিকূলান্, তথা গীতবাদিত্রোল্লাপকশ্লোকগাথাখ্যাযিকেতিহাসপুরাণকুশলানভিপ্রাযজ্ঞাননুমতাংশ্চ দেশকালবিদঃ পারিষদ্যাংশ্চ, তথা লাবকপিঞ্জিলশশহরিণৈণকালপুচ্ছকমৃগমাতৃকোরভ্রান্, গাং দোগ্ধ্রীং শীলবতীমনাতুরাং জীবদ্বত্সাং সুপ্রতিবিহিততৃণশরণপানীযাং, পাত্র্যাচমনীযোদকোষ্ঠমণিকঘটপিঠরপর্যোগকুম্ভীকুম্ভকুণ্ডশরাব- দর্বীকটোদঞ্চনপরিপচনমন্থানচর্মচেলসূত্রকার্পাসোর্ণাদীনি চ, শযনাসনাদীনি চোপন্যস্তভৃঙ্গারপ্রতিগ্রহাণি সুপ্রযুক্তাস্তরণোত্তরপ্রচ্ছদোপধানানি সোপাশ্রযাণি সংবেশনোপবেশনস্নেহস্বেদাভ্যঙ্গপ্রদেহপরিষেকানুলেপনবমনবিরেচনাস্থাপনানুবাসন- শিরোবিরেচনমূত্রোচ্চারকর্মণামুপচারসুখানি, সুপ্রক্ষালিতোপধানাশ্চ সুশ্লক্ষ্ণখরমধ্যমা দৃষদঃ, শস্ত্রাণি চোপকরণার্থানি, ধূমনেত্রং চ, বস্তিনেত্রং চোত্তরবস্তিকং চ, কুশহস্তকং চ, তুলাং চ, মানভাণ্ডং চ, ঘৃততৈলবসামজ্জক্ষৌদ্রফাণিতলবণেন্ধনোদকমধুসীধুসুরাসৌবীরকতুষোদক- মৈরেযমেদকদধিদধিমণ্ডোদস্বিদ্ধান্যাম্লমূত্রাণি চ, তথা শালিষষ্টিকমুদ্গমাষযবতিলকুলত্থবদরমৃদ্বীকাকাশ্মর্যপরূষকাভযামলকবিভীতকানি, নানাবিধানি চ স্নেহস্বেদোপকরণানি দ্রব্যাণি, তথৈবোর্ধ্বহরানুলোমিকোভযভাঞ্জি, সঙ্গ্রহণীযদীপনীযপাচনীযোপশমনীযবাতহরাদিসমাখ্যাতানি চৌষধানি; যচ্চান্যদপি কিঞ্চিহ্যাপদঃ পরিসঙ্খ্যায প্রতীকারার্থমুপকরণং বিদ্যাত্, যচ্চ প্রতিভোগার্থং, তত্তদুপকল্পযেত্||৭||
ततः शीलशौचाचारानुरागदाक्ष्यप्रादक्षिण्योपपन्नानुपचारकुशलान् सर्वकर्मसु पर्यवदातान् सूपौदनपाचकस्नापकसंवाहकोत्थापकसंवेशकौषधपेषकांश्च परिचारकान् सर्वकर्मस्वप्रतिकूलान्, तथा गीतवादित्रोल्लापकश्लोकगाथाख्यायिकेतिहासपुराणकुशलानभिप्रायज्ञाननुमतांश्च देशकालविदः पारिषद्यांश्च, तथा लावकपिञ्जिलशशहरिणैणकालपुच्छकमृगमातृकोरभ्रान्, गां दोग्ध्रीं शीलवतीमनातुरां जीवद्वत्सां सुप्रतिविहिततृणशरणपानीयां, पात्र्याचमनीयोदकोष्ठमणिकघटपिठरपर्योगकुम्भीकुम्भकुण्डशराव- दर्वीकटोदञ्चनपरिपचनमन्थानचर्मचेलसूत्रकार्पासोर्णादीनि च, शयनासनादीनि चोपन्यस्तभृङ्गारप्रतिग्रहाणि सुप्रयुक्तास्तरणोत्तरप्रच्छदोपधानानि सोपाश्रयाणि संवेशनोपवेशनस्नेहस्वेदाभ्यङ्गप्रदेहपरिषेकानुलेपनवमनविरेचनास्थापनानुवासन- शिरोविरेचनमूत्रोच्चारकर्मणामुपचारसुखानि, सुप्रक्षालितोपधानाश्च सुश्लक्ष्णखरमध्यमा दृषदः, शस्त्राणि चोपकरणार्थानि, धूमनेत्रं च, बस्तिनेत्रं चोत्तरबस्तिकं च, कुशहस्तकं च, तुलां च, मानभाण्डं च, घृततैलवसामज्जक्षौद्रफाणितलवणेन्धनोदकमधुसीधुसुरासौवीरकतुषोदक- मैरेयमेदकदधिदधिमण्डोदस्विद्धान्याम्लमूत्राणि च, तथा शालिषष्टिकमुद्गमाषयवतिलकुलत्थबदरमृद्वीकाकाश्मर्यपरूषकाभयामलकबिभीतकानि, नानाविधानि च स्नेहस्वेदोपकरणानि द्रव्याणि, तथैवोर्ध्वहरानुलोमिकोभयभाञ्जि, सङ्ग्रहणीयदीपनीयपाचनीयोपशमनीयवातहरादिसमाख्यातानि चौषधानि; यच्चान्यदपि किञ्चिह्यापदः परिसङ्ख्याय प्रतीकारार्थमुपकरणं विद्यात्, यच्च प्रतिभोगार्थं, तत्तदुपकल्पयेत्||७||
🔊 Audio coming soon
প্রাদক্ষিণ্যম্ আনুকূল্যম্| উল্লাপকং স্তোত্রম্, ইতিহাসঃ অজ্ঞাযমানকর্তৃকাপ্তোপদেশঃ| মৃগমাতৃকা পৃথূদরো হরিণঃ| শরণং গৃহম্| আচমনীযোদকোষ্ঠম্ আচমানার্থমুদককোষ্ঠং; কিংবা আচম্যতে যেন পাত্রেণ তদাচমনং; মণিকো গোলকঃ , পিঠরঃ স্থালী, পর্যোগঃ কটাহঃ, কুম্ভো দৃঢাবযবোঽল্পমুখো ঘটঃ, কটঃ তৃণাদিরচিতমাসনম্, উদঞ্চনং পিধানশরাবঃ, পরিপচনং তৈলপাচনিকা| ঊর্ণা গড্ডররোমাণি| সুপ্রক্ষালিতেত্যাদৌ উপধানঃ শিলাপুত্র ইতি প্রসিদ্ধঃ, দৃষদঃ পাষাণপট্টকাঃ| শস্ত্রাণি চোপকরণার্থানীতি কুদ্দালকর্তরীপ্রভৃতীনি| কুশহস্তকং সম্মার্জনী; অন্যে তু আর্দ্রদ্রব্যপরিপচনমভিদধতি| মানভাণ্ডং প্রতিমানম্||৭||
Adhikarana 6 (8-9) · Śloka 9
ততস্তং পুরুষং যথোক্তাভ্যাং স্নেহস্বেদাভ্যাং যথার্হমুপপাদযেত্, তং চেদস্মিন্নন্তরে মানসঃ শারীরো বা ব্যাধিঃ কশ্চিত্তীব্রতরঃ সহসাঽভ্যাগচ্ছেত্তমেব তাবদস্যোপাবর্তযিতুং যতেত, ততস্তমুপাবর্ত্য তাবন্তমেবৈনং কালং তথাবিধেনৈব কর্মণোপাচরেত্||৮|| ততস্তং পুরুষং স্নেহস্বেদোপপন্নমনুপহতমনসমভিসমীক্ষ্য সুখোষিতং সুপ্রজীর্ণভক্তং শিরঃস্নাতমনুলিপ্তগাত্রং স্রগ্বিণমনুপহতবস্ত্রসংবীতং দেবতাগ্নিদ্বিজগুরুবৃদ্ধবৈদ্যানর্চিতবন্তমিষ্টে নক্ষত্রতিথিকরণমুহূর্তে কারযিত্বা ব্রাহ্মণান্ স্বস্তিবাচনং প্রযুক্তাভিরাশীর্ভিরভিমন্ত্রিতাং মধুমধুকসৈন্ধবফাণিতোপহিতাং মদনফলকষাযমাত্রাং পাযযেত্||৯||
ततस्तं पुरुषं यथोक्ताभ्यां स्नेहस्वेदाभ्यां यथार्हमुपपादयेत्, तं चेदस्मिन्नन्तरे मानसः शारीरो वा व्याधिः कश्चित्तीव्रतरः सहसाऽभ्यागच्छेत्तमेव तावदस्योपावर्तयितुं यतेत, ततस्तमुपावर्त्य तावन्तमेवैनं कालं तथाविधेनैव कर्मणोपाचरेत्||८|| ततस्तं पुरुषं स्नेहस्वेदोपपन्नमनुपहतमनसमभिसमीक्ष्य सुखोषितं सुप्रजीर्णभक्तं शिरःस्नातमनुलिप्तगात्रं स्रग्विणमनुपहतवस्त्रसंवीतं देवताग्निद्विजगुरुवृद्धवैद्यानर्चितवन्तमिष्टे नक्षत्रतिथिकरणमुहूर्ते कारयित्वा ब्राह्मणान् स्वस्तिवाचनं प्रयुक्ताभिराशीर्भिरभिमन्त्रितां मधुमधुकसैन्धवफाणितोपहितां मदनफलकषायमात्रां पाययेत्||९||
🔊 Audio coming soon
তং চেত্যাদৌ অস্মিন্নন্তর ইতি স্নেহস্বেদকরণসমযে| তাবন্তমেব কালমিতি যাবতা কালেনাগতব্যাধিপ্রশমঃ কৃতস্তাবন্তম্| ইষ্ট ইতি শোধনকর্তৃপুরুষনক্ষত্রাদ্যনুগুণে ঔষধপ্রযোগার্থং বিহিত ইত্যর্থঃ; যদুক্তং জ্যোতিষ- “পুষ্যো হস্তস্তথা জ্যেষ্ঠা রোহিণী শ্রবণাশ্বিনৌ| স্বাতি সৌম্যং চ ভৈষজ্যে কুর্যাদন্যত্র বর্জযেত্” ইত্যাদি| কারযিত্বেতি স্বস্তিবাচনং কারযিত্বা||৮-৯||
Adhikarana 7 (10-11) · Śloka 11
মদনফলকষাযমাত্রাপ্রমাণং তু খলু সর্বসংশোধনমাত্রাপ্রমাণানি চ প্রতিপুরুষমপেক্ষিতব্যানি ভবন্তি; যাবদ্ধি যস্য সংশোধনং পীতং বৈকারিকদোষহরণাযোপপদ্যতে ন চাতিযোগাযোগায, তাবদস্য মাত্রাপ্রমাণং বেদিতব্যং ভবতি||১০|| পীতবন্তং তু খল্বেনং মুহূর্তমনুকাঙ্ক্ষেত, তস্য যদা জানীযাত্ স্বেদপ্রাদুর্ভাবেণ দোষং প্রবিলযনমাপদ্যমানং, লোমহর্ষেণ চ স্থানেভ্যঃ প্রচলিতং, কুক্ষিসমাধ্মাপনেন চ কুক্ষিমনুগতং, হৃল্লাসাস্যস্রবণাভ্যামপি চোর্ধ্বমুখীভূতম্, অথাস্মৈ জানুসমমসম্বাধং সুপ্রযুক্তাস্তরণোত্তরপ্রচ্ছদোপধানং সোপাশ্রযমাসনমুপবেষ্টুং প্রযচ্ছেত্, প্রতিগ্রহাংশ্চোপচারযেত্, লালাটপ্রতিগ্রহে পার্শ্বোপগ্রহণে নাভিপ্রপীডনে পৃষ্ঠোন্মর্দনে চানপত্রপণীযাঃ সুহৃদোঽনুমতাঃ প্রযতেরন্||১১||
मदनफलकषायमात्राप्रमाणं तु खलु सर्वसंशोधनमात्राप्रमाणानि च प्रतिपुरुषमपेक्षितव्यानि भवन्ति; यावद्धि यस्य संशोधनं पीतं वैकारिकदोषहरणायोपपद्यते न चातियोगायोगाय, तावदस्य मात्राप्रमाणं वेदितव्यं भवति||१०|| पीतवन्तं तु खल्वेनं मुहूर्तमनुकाङ्क्षेत, तस्य यदा जानीयात् स्वेदप्रादुर्भावेण दोषं प्रविलयनमापद्यमानं, लोमहर्षेण च स्थानेभ्यः प्रचलितं, कुक्षिसमाध्मापनेन च कुक्षिमनुगतं, हृल्लासास्यस्रवणाभ्यामपि चोर्ध्वमुखीभूतम्, अथास्मै जानुसममसम्बाधं सुप्रयुक्तास्तरणोत्तरप्रच्छदोपधानं सोपाश्रयमासनमुपवेष्टुं प्रयच्छेत्, प्रतिग्रहांश्चोपचारयेत्, लालाटप्रतिग्रहे पार्श्वोपग्रहणे नाभिप्रपीडने पृष्ठोन्मर्दने चानपत्रपणीयाः सुहृदोऽनुमताः प्रयतेरन्||११||
🔊 Audio coming soon
প্রতিপুরুষমপেক্ষিতব্যানীত্যনেন প্রতিপুরুষং শোধনমাত্রাভেদং দর্শযতি| যাবদ্ধীত্যাদি মাত্রাশিতীযোক্তঃ ‘যাবদ্ধ্যস্যাশনং’ (সূ.অ.৫) ইত্যাদিগ্রন্থব্যাখ্যানানুসারেণ ব্যাখ্যেযম্| অনুকাঙ্ক্ষেতেতি পরীক্ষযন্ ধারযেত্| অসম্বাধমিতি অসঙ্কীর্ণম্| প্রতিগৃহ্ণন্তীতি প্রতিগ্রহঃ পতদ্গ্রহাঃ| ললাটপ্রতিগ্রহাদয অনপত্রপণীযা অলজ্জাবিষযাঃ||১০-১১||
Adhikarana 8 (12) · Śloka 12
অথৈনমনুশিষ্যাত্- বিবৃতোষ্ঠতালুকণ্ঠো নাতিমহতা ব্যাযামেন বেগানুদীর্ণানুদীরযন্ কিঞ্চিদবনম্য গ্রীবামূর্ধ্বশরীরমুপবেগমপ্রবৃত্তান্ প্রবর্তযন্ সুপরিলিখিতনখাভ্যামঙ্গুলিভ্যামুত্পলকুমুদসৌগন্ধিকনালৈর্বা কণ্ঠমভিস্পৃশন্ সুখং প্রবর্তযস্বেতি, স তথাবিধং কুর্যাত্; ততোঽস্য বেগান্ প্রতিগ্রহগতানবেক্ষেতাবহিতঃ, বেগবিশেষদর্শনাদ্ধি কুশলো যোগাযোগাতিযোগবিশেষানুপলভেত, বেগবিশেষদর্শী পুনঃ কৃত্যং যথার্হমববুধ্যেত লক্ষণেন; তস্মাদ্বেগানবেক্ষেতাবহিতঃ||১২||
अथैनमनुशिष्यात्- विवृतोष्ठतालुकण्ठो नातिमहता व्यायामेन वेगानुदीर्णानुदीरयन् किञ्चिदवनम्य ग्रीवामूर्ध्वशरीरमुपवेगमप्रवृत्तान् प्रवर्तयन् सुपरिलिखितनखाभ्यामङ्गुलिभ्यामुत्पलकुमुदसौगन्धिकनालैर्वा कण्ठमभिस्पृशन् सुखं प्रवर्तयस्वेति, स तथाविधं कुर्यात्; ततोऽस्य वेगान् प्रतिग्रहगतानवेक्षेतावहितः, वेगविशेषदर्शनाद्धि कुशलो योगायोगातियोगविशेषानुपलभेत, वेगविशेषदर्शी पुनः कृत्यं यथार्हमवबुध्येत लक्षणेन; तस्माद्वेगानवेक्षेतावहितः||१२||
🔊 Audio coming soon
উপবেগং বেগসমীপম্; এতেন সর্বথাঽপ্রবৃত্তে বেগে প্রবর্তনং নিষেধযতি| বেগবিশেষদর্শনাদ্ধীত্যাদিগ্রন্থস্য ভাবিনো যোগাযোগাদীন্ বেগবিষযানুপলভ্য তর্কযতীত্যর্থঃ; কিংবা, সিদ্ধৌ বৈগিকী শুদ্ধিরভিধাতব্যা “জঘন্যমধ্যপ্রবরে তু বেগাশ্চত্বার ইষ্টা বমনে ষডষ্টৌ” (সি.অ.১) ইত্যাদিনা, তামনেন দর্শযতি||১২||
Adhikarana 9 (13) · Śloka 13
তত্রামূন্যযোগযোগাতিযোগবিশেষজ্ঞানানি ভবন্তি; তদ্যথা- অপ্রবৃত্তিঃ কুতশ্চিত্ কেবলস্য বাঽপ্যৌষধস্য বিভ্রংশো বিবন্ধো বেগানামযোগলক্ষণানি ভবন্তি; কালে প্রবৃত্তিরনতিমহতী ব্যথা যথাক্রমং দোষহরণং স্বযং চাবস্থানমিতি যোগলক্ষণানি ভবন্তি, যোগেন তু দোষপ্রমাণবিশেষেণ তীক্ষ্ণমৃদুমধ্যবিভাগো জ্ঞেযঃ; যোগাধিক্যেন তু ফেনিলরক্তচন্দ্রিকোপগমনমিত্যতিযোগলক্ষণানি ভবন্তি| তত্রাতিযোগাযোগনিমিত্তানিমানুপদ্রবান্ বিদ্যাত্- আধ্মানং পরিকর্তিকা পরিস্রাবো হৃদযোপসরণমঙ্গগ্রহো জীবাদানং বিভ্রংশঃ স্তম্ভঃ ক্লমশ্চেত্যুপদ্রবাঃ||১৩||
तत्रामून्ययोगयोगातियोगविशेषज्ञानानि भवन्ति; तद्यथा- अप्रवृत्तिः कुतश्चित् केवलस्य वाऽप्यौषधस्य विभ्रंशो विबन्धो वेगानामयोगलक्षणानि भवन्ति; काले प्रवृत्तिरनतिमहती व्यथा यथाक्रमं दोषहरणं स्वयं चावस्थानमिति योगलक्षणानि भवन्ति, योगेन तु दोषप्रमाणविशेषेण तीक्ष्णमृदुमध्यविभागो ज्ञेयः; योगाधिक्येन तु फेनिलरक्तचन्द्रिकोपगमनमित्यतियोगलक्षणानि भवन्ति| तत्रातियोगायोगनिमित्तानिमानुपद्रवान् विद्यात्- आध्मानं परिकर्तिका परिस्रावो हृदयोपसरणमङ्गग्रहो जीवादानं विभ्रंशः स्तम्भः क्लमश्चेत्युपद्रवाः||१३||
🔊 Audio coming soon
অপ্রবৃত্তিঃ কুতশ্চিদিতি সর্বস্যৈবাপ্রবৃত্তিঃ; তথা কেবলস্য কৃত্স্নস্য শোধনীযদোষস্যাপ্রবৃত্তিঃ; তথৌষধস্য বিভ্রংশঃ প্রাতিলোম্যেন গমনং; যথা- বমনস্যাধ ঊর্ধ্বং চ বিরেচনস্য, এতদেব সিদ্ধাবুক্তং- “অযোগঃ প্রাতিলোম্যেন নচাঽল্পং বা প্রবর্তনম্” (সি. অ.৬) ইতি| কিংবা, কুতশ্চিদ্ধাঽপ্রবৃত্তিঃ স্তোকদোষপ্রবৃত্তিরিত্যর্থঃ, তথা কেবলস্য চাপ্যৌষধস্য প্রবৃত্তিরিতি যোজনা| যথাক্রমমিতি বমনে প্রথমং শ্লেষ্মা, তদনু পিত্তং, তদনু বাযুঃ; যদুক্তং- “ক্রমাত্ কফঃ পিত্তমথানিলশ্চ যস্যৈতি সম্যগ্বমিতঃ স ইষ্টঃ” (সি. অ.১) ইতি| সম্যগ্যোগোঽপি হর্তব্যদোষস্যাল্পত্বমধ্যত্বোত্কৃষ্টত্বেন ত্রিবিধো ভবতীতি দর্শযন্নাহ- যোগেন ত্বিত্যাদি| তুশব্দোঽবধারণে, তেন যোগেনৈব যঃ প্রমাণবিশেষোঽল্পাদিস্তেন, ন ত্বযোগাতিযোগাভ্যামিত্যর্থঃ; অযং চ তীক্ষ্ণাদিযোগবিভাগঃ পেযাক্রমোত্কর্ষার্থঃ, তথাহি বক্ষ্যতি সিদ্ধৌ- “পেযাং বিলেপীং” (সি. অ.১.) ইত্যাদি| তত্রাতিযোগেত্যাদৌ আধ্মানাদযঃ শোধনসিদ্ধৌ “বহুদোষস্য রূক্ষস্য” (সি. অ.৬) ইত্যাদিনা গ্রন্থেন প্রপঞ্চেন বক্তব্যাঃ, অতস্তত্রৈষাং যোগাতিযোগজন্যো যশ্চাযোগজন্যঃ স স্ফুটো জ্ঞেযঃ||১৩||
Adhikarana 10 (14-15) · Śloka 15
যোগেন তু খল্বেনং ছর্দিতবন্তমভিসমীক্ষ্য সুপ্রক্ষালিতপাণিপাদাস্যং মুহূর্তমাশ্বাস্য, স্নৈহিকবৈরেচনিকোপশমনীযানাং ধূমানামন্যতমং সামর্থ্যতঃ পাযযিত্বা, পুনরেবোদকমুপস্পর্শযেত্||১৪|| উপস্পৃষ্টোদকং চৈনং নিবাতমাগারমনুপ্রবেশ্য সংবেশ্য চানুশিষ্যাত্- উচ্চৈর্ভাষ্যমত্যাশনমতিস্থানমতিচঙ্ক্রমণং ক্রোধশোকহিমাতপাবশ্যাযাতিপ্রবাতান্ যানযানং গ্রাম্যধর্মমস্বপনং নিশি দিবা স্বপ্নং বিরুদ্ধাজীর্ণাসাত্ম্যাকালপ্রমিতাতিহীনগুরুবিষমভোজনবেগসন্ধারণোদীরণমিতি ভাবানেতান্মনসাঽপ্যসেবমানঃ সর্বমহো গমযস্বেতি | স তথা কুর্যাত্||১৫||
योगेन तु खल्वेनं छर्दितवन्तमभिसमीक्ष्य सुप्रक्षालितपाणिपादास्यं मुहूर्तमाश्वास्य, स्नैहिकवैरेचनिकोपशमनीयानां धूमानामन्यतमं सामर्थ्यतः पाययित्वा, पुनरेवोदकमुपस्पर्शयेत्||१४|| उपस्पृष्टोदकं चैनं निवातमागारमनुप्रवेश्य संवेश्य चानुशिष्यात्- उच्चैर्भाष्यमत्याशनमतिस्थानमतिचङ्क्रमणं क्रोधशोकहिमातपावश्यायातिप्रवातान् यानयानं ग्राम्यधर्ममस्वपनं निशि दिवा स्वप्नं विरुद्धाजीर्णासात्म्याकालप्रमितातिहीनगुरुविषमभोजनवेगसन्धारणोदीरणमिति भावानेतान्मनसाऽप्यसेवमानः सर्वमहो गमयस्वेति | स तथा कुर्यात्||१५||
🔊 Audio coming soon
স্নৈহিকাদিধূমপানবিকল্পঃ পুরুষপ্রকৃত্যপেক্ষঃ; অত এব সামর্থ্যত ইত্যুক্তং, যদ্যস্য যুজ্যত ইত্যর্থঃ| অতিস্থানমিতি অত্যর্থং দণ্ডাযমানত্বেনাবস্থিতিঃ| প্রমিতভোজনম্ একরসাভ্যাসঃ| অতিহীনং নষ্টশক্তিকং ধান্যাদি| গুরুশব্দেন স্বভাবগুরুলট্টুকচিপিটকাদের্যথোক্তমাত্রযাঽপি ভোজননিষেধঃ||১৪-১৫||
Adhikarana 11 (16) · Śloka 16
অথৈনং সাযাহ্নে পরে বাঽহ্নি সুখোদকপরিষিক্তং পুরাণানাং লোহিতশালিতণ্ডুলানাং স্ববক্লিন্নাং মণ্ডপূর্বাং সুখোষ্ণাং যবাগূং পাযযেদগ্নিবলমভিসমীক্ষ্য, এবং দ্বিতীযে তৃতীযে চান্নকালে, চতুর্থে ত্বন্নকালে তথাবিধানামেব শালিতণ্ডুলানামুত্স্বিন্নাং বিলেপীমুষ্ণোদকদ্বিতীযামস্নেহলবণামল্পস্নেহলবণাং বা ভোজযেত্, এবং পঞ্চমে ষষ্ঠে চান্নকালে, সপ্তমে ত্বন্নকালে তথাবিধানামেব শালীনাং দ্বিপ্রসৃতং সুস্বিন্নমোদনমুষ্ণোদকানুপানং তনুনা তনুস্নেহলবণোপপন্নেন মুদ্গযূষেণ ভোজযেত্, এবমষ্টমে নবমে চান্নকালে, দশমে ত্বন্নকলে লাবকপিঞ্জলাদীনামন্যতমস্য মাংসরসেনৌদকলাবণিকেন নাতিসারবতা ভোজযেদুষ্ণোদকানুপানম্; এবমেকাদশে দ্বাদশে চান্নকালে; অত ঊর্ধ্বমন্নগুণান্ ক্রমেণোপভুঞ্জানঃ সপ্তরাত্রেণ প্রকৃতিভোজনমাগচ্ছেত্||১৬||
अथैनं सायाह्ने परे वाऽह्नि सुखोदकपरिषिक्तं पुराणानां लोहितशालितण्डुलानां स्ववक्लिन्नां मण्डपूर्वां सुखोष्णां यवागूं पाययेदग्निबलमभिसमीक्ष्य, एवं द्वितीये तृतीये चान्नकाले, चतुर्थे त्वन्नकाले तथाविधानामेव शालितण्डुलानामुत्स्विन्नां विलेपीमुष्णोदकद्वितीयामस्नेहलवणामल्पस्नेहलवणां वा भोजयेत्, एवं पञ्चमे षष्ठे चान्नकाले, सप्तमे त्वन्नकाले तथाविधानामेव शालीनां द्विप्रसृतं सुस्विन्नमोदनमुष्णोदकानुपानं तनुना तनुस्नेहलवणोपपन्नेन मुद्गयूषेण भोजयेत्, एवमष्टमे नवमे चान्नकाले, दशमे त्वन्नकले लावकपिञ्जलादीनामन्यतमस्य मांसरसेनौदकलावणिकेन नातिसारवता भोजयेदुष्णोदकानुपानम्; एवमेकादशे द्वादशे चान्नकाले; अत ऊर्ध्वमन्नगुणान् क्रमेणोपभुञ्जानः सप्तरात्रेण प्रकृतिभोजनमागच्छेत्||१६||
🔊 Audio coming soon
সাযাহ্ন ইত্যাদৌ সম্যগগ্নিশুদ্ধিলক্ষণভূতে সাযাহ্নে, কিঞ্চিত্ত্ববিশুদ্ধাবপরেঽহ্নি| যদুক্তং সিদ্ধৌ- “বমিতং লঙ্ঘযেত্ সম্যগ্জীর্ণলিঙ্গান্যবেক্ষযন্| তানি দৃষ্ট্বা তু পেযাদিক্রমং কুর্যান্ন লঙ্ঘনম্” (সি. অ.৬) ইতি| মণ্ডপূর্বাং মণ্ডপ্রধানাম্| অযং চ দ্বাদশকালনিবর্তনীযঃ ক্রমঃ প্রধানশুদ্ধিশুদ্ধে জ্ঞেযঃ, মধ্যে ত্বষ্টানুকালিকঃ, তথাঽল্পে চতুরনুকালিকঃ; উক্তং হি- “পেযাং বিলেপীং” (সি. অ.১) ইত্যাদি| অন্নগুণান্ মধুরাদীন্ গুরুকঠিনাদীংশ্চ| এতচ্চ সংসর্জনক্রমাদূর্ধ্বং সপ্তরাত্রেণ প্রকৃতিভোজনগমনং তদা কর্তব্যং যদি বমনানন্তরং বিরেচনং ন কর্তব্যং ভবতি, তত্করণে তু সংসর্জনক্রমাদূর্ধ্বমেব স্নেহপানং; যদুক্তং- “সংসৃষ্টভক্তং নবমেঽহ্নি সর্পিস্তং পাযযেদ্বাঽপ্যনুবাসযেদ্বা” (সি. অ.১) ইতি| তথা সুশ্রুতেঽপ্যুক্তং- “পক্ষাদ্বিরেকো বান্তস্য” (সু.চি. অ.৩৬) ইতি| যদি সংসর্জনক্রমং তথাঽনুগুণাভ্যাসং চ কৃত্বা স্নেহঃ ক্রিযতে, তদা পক্ষাদ্বিরেকো বান্তস্য ন স্যাত্||১৬||
Adhikarana 12 (17-18) · Śloka 18
অথৈনং পুনরেব স্নেহস্বেদাভ্যামুপপাদ্যানুপহতমনসমভিসমীক্ষ্য সুখোষিতং সুপ্রজীর্ণভক্তং কৃতহোমবলিমঙ্গলজপপ্রাযশ্চিত্তমিষ্টে তিথিনক্ষত্রকরণমুহূর্তে ব্রাহ্মণান্ স্বস্তি বাচযিত্বা ত্রিবৃত্কল্কমক্ষমাত্রং যথার্হালোডনপ্রতিবিনীতং পাযযেত্ প্রসমীক্ষ্য দোষভেষজদেশকালবলশরীরাহারসাত্ম্যসত্ত্বপ্রকৃতিবযসামবস্থান্তরাণি বিকারাংশ্চ, সম্যক্ বিরিক্তং চৈনং বমনোক্তেন ধূমবর্জেন বিধিনোপপাদযেদাবলবর্ণপ্রকৃতিলাভাত্, বলবর্ণোপপন্নং চৈনমনুপহতমনসমভিসমীক্ষ্য সুখোষিতং সুপ্রজীর্ণভক্তং শিরঃস্নাতমনুলিপ্তগাত্রং স্রগ্বিণমনুপহতবস্ত্রসংবীতমনুরূপালঙ্কারালঙ্কৃতং সুহৃদাং দর্শযিত্বা জ্ঞাতীনাং দর্শযেত্, অথৈনং কামেষ্ববসৃজেত্||১৭|| ভবন্তি চাত্র- অনেন বিধিনা রাজা রাজমাত্রোঽথবা পুনঃ| যস্য বা বিপুলং দ্রব্যং স সংশোধনমর্হতি||১৮||
अथैनं पुनरेव स्नेहस्वेदाभ्यामुपपाद्यानुपहतमनसमभिसमीक्ष्य सुखोषितं सुप्रजीर्णभक्तं कृतहोमबलिमङ्गलजपप्रायश्चित्तमिष्टे तिथिनक्षत्रकरणमुहूर्ते ब्राह्मणान् स्वस्ति वाचयित्वा त्रिवृत्कल्कमक्षमात्रं यथार्हालोडनप्रतिविनीतं पाययेत् प्रसमीक्ष्य दोषभेषजदेशकालबलशरीराहारसात्म्यसत्त्वप्रकृतिवयसामवस्थान्तराणि विकारांश्च, सम्यक् विरिक्तं चैनं वमनोक्तेन धूमवर्जेन विधिनोपपादयेदाबलवर्णप्रकृतिलाभात्, बलवर्णोपपन्नं चैनमनुपहतमनसमभिसमीक्ष्य सुखोषितं सुप्रजीर्णभक्तं शिरःस्नातमनुलिप्तगात्रं स्रग्विणमनुपहतवस्त्रसंवीतमनुरूपालङ्कारालङ्कृतं सुहृदां दर्शयित्वा ज्ञातीनां दर्शयेत्, अथैनं कामेष्ववसृजेत्||१७|| भवन्ति चात्र- अनेन विधिना राजा राजमात्रोऽथवा पुनः| यस्य वा विपुलं द्रव्यं स संशोधनमर्हति||१८||
🔊 Audio coming soon
অথৈনমিতি কৃতসংসর্জনক্রমম্| প্রতিবিনীতম্ আলোডিতম্| দোষাদযঃ পূর্ববদ্ব্যাখ্যেযাঃ| বিকারাংশ্চেতি কুষ্ঠজ্বরাদীন্ বিরেচনসাধ্যান্; পূর্বং তু “সূক্ষ্মাণি হি” ইত্যাদৌ বিকারো নোক্তঃ, তস্য পরীক্ষ্যত্বেনৈব গ্রহণাত্; কিংবা দোষগ্রহণেনৈব তত্র বিকারগ্রহণম্| কামেষু ঈপ্সিতেষু, অবসৃজেত্ নির্যন্ত্রণং কুর্যাত্||১৭-১৮||
Adhikarana 13 (19-21) · Śloka 21
দরিদ্রস্ত্বাপদং প্রাপ্য প্রাপ্তকালং বিশোধনম্| পিবেত্ কামমসম্ভৃত্য সম্ভারানপি দুর্লভান্||১৯|| ন হি সর্বমনুষ্যাণাং সন্তি সর্বে পরিচ্ছদাঃ| ন চ রোগা ন বাধন্তে দরিদ্রানপি দারুণাঃ||২০|| যদ্যচ্ছক্যং মনুষ্যেণ কর্তুমৌষধমাপদি| তত্তত্ সেব্যং যথাশক্তি বসনান্যশনানি চ||২১||
दरिद्रस्त्वापदं प्राप्य प्राप्तकालं विशोधनम्| पिबेत् काममसम्भृत्य सम्भारानपि दुर्लभान्||१९|| न हि सर्वमनुष्याणां सन्ति सर्वे परिच्छदाः| न च रोगा न बाधन्ते दरिद्रानपि दारुणाः||२०|| यद्यच्छक्यं मनुष्येण कर्तुमौषधमापदि| तत्तत् सेव्यं यथाशक्ति वसनान्यशनानि च||२१||
🔊 Audio coming soon
সম্প্রতি দরিদ্রস্য যথোক্তং সম্ভারমকৃত্বাঽপি সংশোধনকরণমাহ- দরিদ্র ইত্যাদি| দুর্লভানিতি বচনেন সুলভানি দরিদ্রেণাঽপ্যুত্পাদনীযানি||১৯-২১||
Adhikarana 14 (22) · Śloka 22
মলাপহং রোগহরং বলবর্ণপ্রসাদনম্| পীত্বা সংশোধন সম্যগাযুষা যুজ্যতে চিরম্||২২||
मलापहं रोगहरं बलवर्णप्रसादनम्| पीत्वा संशोधन सम्यगायुषा युज्यते चिरम्||२२||
🔊 Audio coming soon
সংশোধনকরণগুণমাহ- মলাপহমিত্যাদি||২২||
Adhikarana 15 (23-25) · Śloka 25
তত্র শ্লোকাঃ- ঈশ্বরাণাং বসুমতাং বমনং সবিরেচনম্| সম্ভারা যে যদর্থং চ সমানীয প্রযোজযেত্||২৩|| যথা প্রযোজ্যা মাত্রা যা যদযোগস্য লক্ষণম্| যোগাতিযোগযোর্যচ্চ দোষা যে চাপ্যুপদ্রবাঃ||২৪|| যদসেব্যং বিশুদ্ধেন যশ্চ সংসর্জনক্রমঃ| তত্ সর্বং কল্পনাধ্যাযে ব্যাজহার পুনর্বসুঃ||২৫||
तत्र श्लोकाः- ईश्वराणां वसुमतां वमनं सविरेचनम्| सम्भारा ये यदर्थं च समानीय प्रयोजयेत्||२३|| यथा प्रयोज्या मात्रा या यदयोगस्य लक्षणम्| योगातियोगयोर्यच्च दोषा ये चाप्युपद्रवाः||२४|| यदसेव्यं विशुद्धेन यश्च संसर्जनक्रमः| तत् सर्वं कल्पनाध्याये व्याजहार पुनर्वसुः||२५||
🔊 Audio coming soon
সঙ্গ্রহে- ঈশ্বরাঃ সবিলাসাঃ; তেন রাজ্ঞো রাজমাত্রস্য চ গ্রহণম্| প্রযোজযেদিতি ‘সম্ভারান্’ ইতি শেষঃ||২৩-২৫||
Adhikarana puShpikA · Śloka 15
ইত্যগ্নিবেশকৃতে তন্ত্রে চরকপ্রতিসংস্কৃতে শ্লোকস্থানে উপকল্পনীযো নাম পঞ্চদশোঽধ্যাযঃ||১৫||
इत्यग्निवेशकृते तन्त्रे चरकप्रतिसंस्कृते श्लोकस्थाने उपकल्पनीयो नाम पञ्चदशोऽध्यायः||१५||
🔊 Audio coming soon
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং সূত্রস্থানে নির্দেশচতুষ্কে পঞ্চদশোঽধ্যাযঃ||১৫||