Adhikarana 5 (6-7) · Śloka 7
তচ্ছ্রুত্বা বাক্যং কাঙ্কাযনো বাহ্লীকভিষগুবাচ- এবমেতদ্যথা ভগবানাহ, এতান্যেব বাতপ্রকোপণানি ভবন্তি; অতো বিপরীতানি বাতস্য প্রশমনানি ভবন্তি, প্রকোপণবিপর্যযো হি ধাতূনাং প্রশমকারণমিতি||৬||
তচ্ছ্রুত্বা বাক্যং বডিশো ধামার্গব উবাচ- এবমেতদ্যথা ভগবানাহ, এতান্যেব বাতপ্রকোপপ্রশমনানি ভবন্তি|
যথা হ্যেনমসঙ্ঘাতমনবস্থিতমনাসাদ্য প্রকোপণপ্রশমনানি প্রকোপযন্তি প্রশমযন্তি বা, তথাঽনুব্যাখ্যাস্যামঃ- বাতপ্রকোপণানি খলু রূক্ষলঘুশীতদারুণখরবিশদশুষিরকরাণি শরীরাণাং, তথাবিধেষু শরীরেষু বাযুরাশ্রযং গত্বাঽঽপ্যাযমানঃ প্রকোপমাপদ্যতে; বাতপ্রশমনানি পুনঃস্নিগ্ধগুরূষ্ণশ্লক্ষ্ণমৃদুপিচ্ছিলঘনকরাণি শরীরাণাং, তথাবিধেষু শরীরেষু বাযুরসজ্যমানশ্চরন্ প্রশান্তিমাপদ্যতে||৭||
View original
तच्छ्रुत्वा वाक्यं काङ्कायनो बाह्लीकभिषगुवाच- एवमेतद्यथा भगवानाह, एतान्येव वातप्रकोपणानि भवन्ति; अतो विपरीतानि वातस्य प्रशमनानि भवन्ति, प्रकोपणविपर्ययो हि धातूनां प्रशमकारणमिति||६||
तच्छ्रुत्वा वाक्यं बडिशो धामार्गव उवाच- एवमेतद्यथा भगवानाह, एतान्येव वातप्रकोपप्रशमनानि भवन्ति|
यथा ह्येनमसङ्घातमनवस्थितमनासाद्य प्रकोपणप्रशमनानि प्रकोपयन्ति प्रशमयन्ति वा, तथाऽनुव्याख्यास्यामः- वातप्रकोपणानि खलु रूक्षलघुशीतदारुणखरविशदशुषिरकराणि शरीराणां, तथाविधेषु शरीरेषु वायुराश्रयं गत्वाऽऽप्यायमानः प्रकोपमापद्यते; वातप्रशमनानि पुनःस्निग्धगुरूष्णश्लक्ष्णमृदुपिच्छिलघनकराणि शरीराणां, तथाविधेषु शरीरेषु वायुरसज्यमानश्चरन् प्रशान्तिमापद्यते||७||
শরীরাণামিতি শরীরাবযবানাম্| শুষিরকরাণি রন্ধ্রকরাণি| আশ্রযমিতি সমানগুণস্থানম্| আপ্যাযমানঃ চীযমানঃ| দারুণবিপরীতো মৃদুঃ, শুষিরবিপরীতো ঘনঃ| অসজ্যমানঃ অনবতিষ্ঠমানঃ, ক্ষীযমাণাবযব ইতি যাবত্| এতেনৈতদুক্তং ভবতি- যদ্যপি বাযুনা বাতকারণানাং বাতশমনানাং বা তথা সম্বন্ধো নাস্তি, তথাঽপি শরীরসম্বদ্ধৈস্তৈর্বাতস্য শরীরচারিণঃ সম্বন্ধো ভবতি, ততশ্চ বাতস্য সমানগুণযোগাদ্বৃদ্ধির্বিপরীতগুণযোগাচ্চ হ্রাস উপপন্ন এবেতি||৬-৭||
Adhikarana 6 (8) · Śloka 8
তচ্ছ্রুত্বা বডিশবচনমবিতথমৃষিগণৈরনুমতমুবাচ বার্যোবিদো রাজর্ষিঃ- এবমেতত্ সর্বমনপবাদং যথা ভগবানাহ|
যানি তু খলু বাযোঃ কুপিতাকুপিতস্য শরীরাশরীরচরস্য শরীরেষু চরতঃ কর্মাণি বহিঃশরীরেভ্যো বা ভবন্তি, তেষামবযবান্ প্রত্যক্ষানুমানোপদেশৈঃ সাধযিত্বা নমস্কৃত্য বাযবে যথাশক্তি প্রবক্ষ্যামঃ- বাযুস্তন্ত্রযন্ত্রধরঃ, প্রাণোদানসমানব্যানাপানাত্মা, প্রবর্তকশ্চেষ্টানামুচ্চাবচানাং, নিযন্তা প্রণেতা চ মনসঃ, সর্বেন্দ্রিযাণামুদ্যোজকঃ, সর্বেন্দ্রিযার্থানামভিবোঢা, সর্বশরীরধাতুব্যূহকরঃ, সন্ধানকরঃ শরীরস্য, প্রবর্তকো বাচঃ, প্রকৃতিঃ স্পর্শশব্দযোঃ, শ্রোত্রস্পর্শনযোর্মূলং, হর্ষোত্সাহযোর্যোনিঃ, সমীরণোঽগ্নেঃ, দোষসংশোষণঃ , ক্ষেপ্তা বহির্মলানাং, স্থূলাণুস্রোতসাং ভেত্তা, কর্তাগর্ভাকৃতীনাম্, আযুষোঽনুবৃত্তিপ্রত্যযভূতো ভবত্যকুপিতঃ|
কুপিতস্তু খলু শরীরে শরীরং নানাবিধৈর্বিকারৈরুপতপতি বলবর্ণসুখাযুষামুপঘাতায , মনো ব্যাহর্ষযতি , সর্বেন্দ্রিযাণ্যুপহন্তি, বিনিহন্তি গর্ভান্ বিকৃতিমাপাদযত্যতিকালং বা ধারযতি, ভযশোকমোহদৈন্যাতিপ্রলাপাঞ্জনযতি, প্রাণাংশ্চোপরুণদ্ধি|
প্রকৃতিভূতস্য খল্বস্য লোকে চরতঃ কর্মাণীমানি ভবন্তি; তদ্যথা- ধরণীধারণং, জ্বলনোজ্জ্বালনম্, আদিত্যচন্দ্রনক্ষত্রগ্রহগণানাং সন্তানগতিবিধানং, সৃষ্টিশ্চ মেঘানাম্, অপাং বিসর্গঃ, প্রবর্তনং স্রোতসাং, পুষ্পফলানাং চাভিনির্বর্তনম্, উদ্ভেদনং চৌদ্ভিদানাম্, ঋতূনাং প্রবিভাগঃ, বিভাগো ধাতূনাং, ধাতুমানসংস্থানব্যক্তিঃ, বীজাভিসংস্কারঃ, শস্যাভিবর্ধনমবিক্লেদোপশোষণে , অবৈকারিকবিকারশ্চেতি|
প্রকুপিতস্য খল্বস্য লোকেষু চরতঃ কর্মাণীমানি ভবন্তি; তদ্যথা- শিখরিশিখরাবমথনম্, উন্মথনমনোকহানাম্, উত্পীডনং সাগরাণাম্, উদ্বর্তনং সরসাং, প্রতিসরণমাপগানাম্, আকম্পনং চ ভূমেঃ, আধমনমম্বুদানাং , নীহারনির্হ্রাদপাংশুসিকতামত্স্যভেকোরগক্ষাররুধিরাশ্মাশনিবিসর্গঃ, ব্যাপাদনং চ ষণ্ণামৃতূনাং, শস্যানামসঙ্ঘাতঃ, ভূতানাং চোপসর্গঃ, ভাবানাং চাভাবকরণং, চতুর্যুগান্তকরাণাং মেঘসূর্যানলানিলানাং বিসর্গঃ; স হি ভগবান্ প্রভবশ্চাব্যযশ্চ, ভূতানাং ভাবাভাবকরঃ, সুখাসুখযোর্বিধাতা, মৃত্যুঃ, যমঃ, নিযন্তা, প্রজাপতিঃ, অদিতিঃ, বিশ্বকর্মা, বিশ্বরূপঃ, সর্বগঃ, সর্বতন্ত্রাণাং বিধাতা, ভাবানামণুঃ, বিভুঃ, বিষ্ণুঃ, ক্রান্তা লোকানাং, বাযুরেব ভগবানিতি||৮||
View original
तच्छ्रुत्वा बडिशवचनमवितथमृषिगणैरनुमतमुवाच वार्योविदो राजर्षिः- एवमेतत् सर्वमनपवादं यथा भगवानाह|
यानि तु खलु वायोः कुपिताकुपितस्य शरीराशरीरचरस्य शरीरेषु चरतः कर्माणि बहिःशरीरेभ्यो वा भवन्ति, तेषामवयवान् प्रत्यक्षानुमानोपदेशैः साधयित्वा नमस्कृत्य वायवे यथाशक्ति प्रवक्ष्यामः- वायुस्तन्त्रयन्त्रधरः, प्राणोदानसमानव्यानापानात्मा, प्रवर्तकश्चेष्टानामुच्चावचानां, नियन्ता प्रणेता च मनसः, सर्वेन्द्रियाणामुद्योजकः, सर्वेन्द्रियार्थानामभिवोढा, सर्वशरीरधातुव्यूहकरः, सन्धानकरः शरीरस्य, प्रवर्तको वाचः, प्रकृतिः स्पर्शशब्दयोः, श्रोत्रस्पर्शनयोर्मूलं, हर्षोत्साहयोर्योनिः, समीरणोऽग्नेः, दोषसंशोषणः , क्षेप्ता बहिर्मलानां, स्थूलाणुस्रोतसां भेत्ता, कर्तागर्भाकृतीनाम्, आयुषोऽनुवृत्तिप्रत्ययभूतो भवत्यकुपितः|
कुपितस्तु खलु शरीरे शरीरं नानाविधैर्विकारैरुपतपति बलवर्णसुखायुषामुपघाताय , मनो व्याहर्षयति , सर्वेन्द्रियाण्युपहन्ति, विनिहन्ति गर्भान् विकृतिमापादयत्यतिकालं वा धारयति, भयशोकमोहदैन्यातिप्रलापाञ्जनयति, प्राणांश्चोपरुणद्धि|
प्रकृतिभूतस्य खल्वस्य लोके चरतः कर्माणीमानि भवन्ति; तद्यथा- धरणीधारणं, ज्वलनोज्ज्वालनम्, आदित्यचन्द्रनक्षत्रग्रहगणानां सन्तानगतिविधानं, सृष्टिश्च मेघानाम्, अपां विसर्गः, प्रवर्तनं स्रोतसां, पुष्पफलानां चाभिनिर्वर्तनम्, उद्भेदनं चौद्भिदानाम्, ऋतूनां प्रविभागः, विभागो धातूनां, धातुमानसंस्थानव्यक्तिः, बीजाभिसंस्कारः, शस्याभिवर्धनमविक्लेदोपशोषणे , अवैकारिकविकारश्चेति|
प्रकुपितस्य खल्वस्य लोकेषु चरतः कर्माणीमानि भवन्ति; तद्यथा- शिखरिशिखरावमथनम्, उन्मथनमनोकहानाम्, उत्पीडनं सागराणाम्, उद्वर्तनं सरसां, प्रतिसरणमापगानाम्, आकम्पनं च भूमेः, आधमनमम्बुदानां , नीहारनिर्ह्रादपांशुसिकतामत्स्यभेकोरगक्षाररुधिराश्माशनिविसर्गः, व्यापादनं च षण्णामृतूनां, शस्यानामसङ्घातः, भूतानां चोपसर्गः, भावानां चाभावकरणं, चतुर्युगान्तकराणां मेघसूर्यानलानिलानां विसर्गः; स हि भगवान् प्रभवश्चाव्ययश्च, भूतानां भावाभावकरः, सुखासुखयोर्विधाता, मृत्युः, यमः, नियन्ता, प्रजापतिः, अदितिः, विश्वकर्मा, विश्वरूपः, सर्वगः, सर्वतन्त्राणां विधाता, भावानामणुः, विभुः, विष्णुः, क्रान्ता लोकानां, वायुरेव भगवानिति||८||
শরীরাশরীরচরস্যেতি বাতস্বরূপকথনং, তেন শরীরেষু চরত ইতি বহিঃ শরীরেভ্যো বেতি চ পুনরুক্তং ন ভবতি| অত্রাবযবানিতি বদন্ কার্ত্স্ন্যাভিধানমশক্যং বহুপ্রপঞ্চত্বাদিতি দর্শযতি| সাধযিত্বা প্রতিপাদ্য| বাতকর্মসু প্রত্যক্ষাণি বচনাদীনি, মনঃপ্রেরণাদ্যনুমেযং, গর্ভাকৃতিকরণাদ্যাগমগম্যম্| তন্ত্রং শরীরং, যদুক্তং- “তন্ত্রযন্ত্রেষু ভিন্নেষু তমোঽন্ত্যং প্রবিবিক্ষতাম্” (ইং. অ.১২) ইতি, তদেব যন্ত্রং; যদি বা, তন্ত্রস্য যন্ত্রং সন্ধযঃ| প্রাণাদ্যাত্মা প্রাণাদিস্বরূপঃ| চেষ্টাবিশেষণম্- উচ্চাবচানাং, বিবিধানামিত্যর্থঃ, কিংবা শুভাশুভানামিত্যর্থঃ| নিযন্তা অনীপ্সিতে বিষযে প্রবর্তমানস্য মনসঃ, প্রণেতা চ মনস এবেপ্সিতেঽর্থে| উদ্যোজকঃ প্রেরকঃ; কিংবা ‘উদ্যোগকারক’ ইতি পাঠঃ, সোঽপ্যভিন্নার্থঃ| অভিবোঢেবাভিবোঢা সর্বেন্দ্রিযার্থগ্রাহকত্বেন; তচ্চাস্য বাযুমযেন স্পর্শনেন্দ্রিযেণ সর্বেন্দ্রিযাণাং ব্যাপকত্বাত্ পূর্বাধ্যাযপ্রতিপাদিতেন ন্যাযেন বোদ্ধব্যম্| ব্যূহকরঃ সঙ্ঘাতকরো রচনাকর ইতি যাবত্ | প্রকৃতিঃ কারণং, শব্দকারণত্বং চ বাযোর্নিত্যমাকাশানুপ্রবেশাত্; উক্তং হি খাদীন্যভিধায- “তেষামেকগুণঃ পূর্বো গুণবৃদ্ধিঃ পরে পরে” (শা. অ.১) ইতি| তথা পুনরুক্তং খাদীন্যভিধায “বিষ্টং হ্যপরং পরেণ” (ন্যা.দ. অ.২. আ.১.সূ.৬৬) ইতি| শ্রবণমূলত্বং বাযোঃ কর্ণশষ্কুলীরচনাবিশেষে ব্যাপ্রিযমাণত্বাত্; মূলং প্রধানকারণম্| উত্সাহঃ কার্যেষূদ্যোগো মনসঃ| যোনিঃ অভিব্যক্তিকারণম্| দোষসংশোষণঃ শরীরক্লেদসংশোষণঃ| ভেত্তা কর্তা; এতচ্চ শরীরোত্পত্তিকালে| ভূত শব্দঃ স্বরূপবচনঃ| উপঘাতাযেতি ছেদঃ| গর্ভানিতি বিকৃতিমাপাদযত্যতিকালং ধারযতীত্যনেন চ সম্বধ্যতে| আদিত্যাদীনাং সন্তানেনাবিচ্ছেদেন গতিবিধানং সন্তানগতিবিধানম্| স্রোতসামিতি নদীনাম্| প্রবিভাগো বিভক্তলক্ষণম্ | ধাতূনামিতি পৃথিব্যাদীনাং, ধাতবঃ কার্যদ্রব্যাণি প্রস্তরাদীনি; মানং পরিমাণং, সংস্থানমাকৃতিঃ, তযোর্ব্যক্তিরভিব্যক্তিঃ, তত্র কারণমিতি যাবত্| বীজস্য শাল্যাদেঃ, অভিসংস্কারোঽঙ্কুরজননশক্তিঃ| অবিক্লেদঃ পাককালাদর্বাগবিক্লিন্নত্বম্, উপশোষণং চ পাকেন যবাদীনামার্দ্রাণামেব, অবিক্লেদোপশোষণে শস্যানামেব| অবৈকারিকবিকারেণ সর্বস্মিন্নেব জগতি প্রকৃতিরূপে কারণত্বং ব্রূতে| শিখরী পর্বতঃ| অনোকহো বৃক্ষঃ| ঊর্ধ্বং বর্তনমুদ্বর্তনম্| প্রতিসরণং প্রতীপগমনম্| বিসর্জনং বিসর্গঃ, স চ পৃথঙ্নীহারাদিভিঃ সম্বধ্যতে; নীহারঃ শিশিরসমূহঃ, নির্হ্রাদো মেঘং বিনা গর্জিতম্, অশনিঃ বজ্রভেদোঽগ্নিঃ| অসঙ্ঘাতঃ অনুত্পাদোঽনুপচযো বা| উপসর্গঃ মরকাদিপ্রাদুর্ভাবঃ| মেঘসূর্যেত্যাদৌ বিসর্গঃ সৃষ্টিঃ| বাযুরিহ দেবতারূপোঽভিপ্রেতঃ, তেন তস্য ভূতরূপচতুর্যুগান্তকরানিলকরণমবিরুদ্ধম্; এবং যদন্যদপ্যনুপপদ্যমানং বাযোস্তদপি দেবতারূপত্বেনৈব সমাধেযম্| সম্প্রতি সামান্যেন পুনঃ কুপিতাকুপিতস্য বাযোঃ স্বরূপমুচ্যতে- স হি ভগবানিত্যাদি| প্রভবঃ কারণম্| অব্যযঃ অক্ষযঃ| ভূতানামিত্যুত্তরেণ সম্বধ্যতে| মৃত্যুযমাদিভেদাশ্চাগমে জ্ঞেযাঃ| সর্বতন্ত্রাণাং সর্বকর্মণাং; তন্ত্রশব্দঃ কর্মবচনোঽপ্যস্তি, যদুক্তং- “বস্তিস্তন্ত্রাণাং” (সূ. অ.২৫); কর্মণামিত্যর্থঃ||৮||