Adhikarana 1 (1-2) · Śloka 2
অথাতো রোগানীকং বিমানং ব্যাখ্যাস্যামঃ||১|| ইতি হ স্মাহ ভগবানাত্রেযঃ||২||
अथातो रोगानीकं विमानं व्याख्यास्यामः||१|| इति ह स्माह भगवानात्रेयः||२||
🔊 Audio coming soon
পূর্বাধ্যাযে স্রোতোরূপাধিষ্ঠানভেদেন রোগানভিধায প্রভাবাদিভেদেন রোগানভিধাতুং রোগানীকং বিমানমুচ্যতে| রোগানীকমিতি রোগসমূহঃ||১-২||
Adhikarana 2 (3) · Śloka 3
দ্বে রোগানীকে ভবতঃ প্রভাবভেদেন- সাধ্যম্, অসাধ্যং চ; দ্বে রোগানীকে বলভেদেন- মৃদু, দারুণং চ; দ্বে রোগানীকে অধিষ্ঠানভেদেন- মনোঽধিষ্ঠানং, শরীরাধিষ্ঠানং চ; দ্বে রোগানীকে নিমিত্তভেদেন- স্বধাতুবৈষম্যনিমিত্তম্, আগন্তুনিমিত্তং চ; দ্বে রোগানীকে আশযভেদেন- আমাশযসমুত্থং, পক্বাশযসমুত্থং চেতি| এবমেতত্ প্রভাববলাধিষ্ঠাননিমিত্তাশযভেদাদ্দ্বৈধং সদ্ভেদপ্রকৃত্যন্তরেণ ভিদ্যমানমথবাঽপি সন্ধীযমানং স্যাদেকত্বং বহুত্বং বা| একত্বং তাবদেকমেব রোগানীকং, দুঃখসামান্যাত্ ; বহুত্বং তু দশ রোগানীকানি প্রভাবভেদাদিনা ভবন্তি; বহুত্বমপি সঙ্খ্যেযং স্যাদসঙ্খ্যেযং বা| তত্র সঙ্খ্যেযং তাবদ্যথোক্তমষ্টোদরীযে, অপরিসঙ্খ্যেযং পুনর্যথা- মহারোগাধ্যাযে রুগ্বর্ণসমুত্থানাদীনামসঙ্খ্যেযত্বাত্||৩||
द्वे रोगानीके भवतः प्रभावभेदेन- साध्यम्, असाध्यं च; द्वे रोगानीके बलभेदेन- मृदु, दारुणं च; द्वे रोगानीके अधिष्ठानभेदेन- मनोऽधिष्ठानं, शरीराधिष्ठानं च; द्वे रोगानीके निमित्तभेदेन- स्वधातुवैषम्यनिमित्तम्, आगन्तुनिमित्तं च; द्वे रोगानीके आशयभेदेन- आमाशयसमुत्थं, पक्वाशयसमुत्थं चेति| एवमेतत् प्रभावबलाधिष्ठाननिमित्ताशयभेदाद्द्वैधं सद्भेदप्रकृत्यन्तरेण भिद्यमानमथवाऽपि सन्धीयमानं स्यादेकत्वं बहुत्वं वा| एकत्वं तावदेकमेव रोगानीकं, दुःखसामान्यात् ; बहुत्वं तु दश रोगानीकानि प्रभावभेदादिना भवन्ति; बहुत्वमपि सङ्ख्येयं स्यादसङ्ख्येयं वा| तत्र सङ्ख्येयं तावद्यथोक्तमष्टोदरीये, अपरिसङ्ख्येयं पुनर्यथा- महारोगाध्याये रुग्वर्णसमुत्थानादीनामसङ्ख्येयत्वात्||३||
🔊 Audio coming soon
বলভেদেনেত্যত্র মৃদু অল্পবলং, দারুণং তু মহাবলং জ্ঞেযম্| দারুণং কিঞ্চিত্কালাতিপাতাদেব বলবত্ত্বান্মারযতি| যদুক্তং- “সন্তি হ্যেবংবিধা রোগাঃ সাধ্যা দারুণসম্মতাঃ| যে হন্যুরনুপক্রান্তা মিথ্যারম্ভেণ বা পুনঃ” (সূ.অ.১৮) ইতি| আমাশযসমুত্থত্বেন আমাশযাশ্রযাঃ কফপিত্তজাঃ সর্বে গদা গৃহ্যন্তে, পক্বাশযসমুত্থগ্রহণেন সর্বে বাতজাঃ; এবং সর্ববিকারাবরোধঃ| দ্বৈধং সদিতি দ্বৈবিধ্যং সত্| ভেদপ্রকৃত্যন্তরেণেতি ভেদকারণান্তরেণ| অথবাঽপি সন্ধীযমানমিতি একীক্রিযমাণম্, একবুদ্ধিকারকানুগতধর্মান্তরেণেতি বোদ্ধব্যম্| দুঃখসামান্যাদিতি দুঃখকর্তৃত্বেন সর্বরোগানুগতেন সাধারণেন রূপেণ সর্ব এব রোগা একরূপা ভবন্তি| বহুত্বমপীতি উক্তপ্রভাবভেদাদিকৃতত্বাদপি বহুত্বমিত্যর্থঃ| সঙ্খ্যেযত্বমষ্টোদরীযে “অষ্টচত্বারিংশদ্রোগাধিকরণান্যস্মিন্ সঙ্গ্রহে” (সূ.অ.১৯) ইত্যাদিনোক্তম্| অসঙ্খ্যেযত্বং মহারোগাধ্যাযে তথা ত্রিশোফীযে চ “ত এবাপরিসঙ্খ্যেযা ভিদ্যমানা ভবন্তি হি| রুজাবর্ণসমুত্থানস্থানসংস্থাননামভিঃ” (সূ.অ.১৮) ইত্যনেনোক্তম্||৩||
Adhikarana 3 (4) · Śloka 4
ন চ সঙ্খ্যেযাগ্রেষু ভেদপ্রকৃত্যন্তরীযেষু বিগীতিরিত্যতো দোষবতী স্যাদত্র কাচিত্ প্রতিজ্ঞা, ন চাবিগীতিরিত্যতঃ স্যাদদোষবতী| ভেত্তা হি ভেদ্যমন্যথাভিনত্তি, অন্যথা পুরস্তাদ্ভিন্নং ভেদপ্রকৃত্যন্তরেণ ভিন্দন্ ভেদসঙ্খ্যাবিশেষমাপাদযত্যনেকধা, ন চ পূর্বং ভেদাগ্রমুপহন্তি| সমানাযামপি খলু ভেদপ্রকৃতৌ প্রকৃতানুপ্রযোগান্তরমপেক্ষ্যম্ | সন্তি হ্যর্থান্তরাণি সমানশব্দাভিহিতানি, সন্তি চানর্থান্তরাণি পর্যাযশব্দাভিহিতানি| সমানো হি রোগশব্দো দোষেষু চ ব্যাধিষু চ; দোষা হ্যপি রোগশব্দমাতঙ্কশব্দং যক্ষ্মশব্দং দোষপ্রকৃতিশব্দং বিকারশব্দং চ লভন্তে, ব্যাধযশ্চ রোগশব্দমাতঙ্কশব্দং যক্ষ্মশব্দং দোষপ্রকৃতিশব্দং বিকারশব্দং চ লভন্তে| তত্র দোষেষু চৈব ব্যাধিষু চ রোগশব্দঃ সমানঃ, শেষেষু তু বিশেষবান্||৪||
न च सङ्ख्येयाग्रेषु भेदप्रकृत्यन्तरीयेषु विगीतिरित्यतो दोषवती स्यादत्र काचित् प्रतिज्ञा, न चाविगीतिरित्यतः स्याददोषवती| भेत्ता हि भेद्यमन्यथाभिनत्ति, अन्यथा पुरस्ताद्भिन्नं भेदप्रकृत्यन्तरेण भिन्दन् भेदसङ्ख्याविशेषमापादयत्यनेकधा, न च पूर्वं भेदाग्रमुपहन्ति| समानायामपि खलु भेदप्रकृतौ प्रकृतानुप्रयोगान्तरमपेक्ष्यम् | सन्ति ह्यर्थान्तराणि समानशब्दाभिहितानि, सन्ति चानर्थान्तराणि पर्यायशब्दाभिहितानि| समानो हि रोगशब्दो दोषेषु च व्याधिषु च; दोषा ह्यपि रोगशब्दमातङ्कशब्दं यक्ष्मशब्दं दोषप्रकृतिशब्दं विकारशब्दं च लभन्ते, व्याधयश्च रोगशब्दमातङ्कशब्दं यक्ष्मशब्दं दोषप्रकृतिशब्दं विकारशब्दं च लभन्ते| तत्र दोषेषु चैव व्याधिषु च रोगशब्दः समानः, शेषेषु तु विशेषवान्||४||
🔊 Audio coming soon
ননু সঙ্খ্যেযত্বমসঙ্খ্যেযত্বং চ বিরুদ্ধাবেতৌ ধর্মৌ, তথৈকত্বমনেকত্বং চেতি বিরুদ্ধৌ, তত্ কথং বিরুদ্ধত্বেন খ্যাতৌ ধর্মাবেকস্মিন্ রোগে ঘটেতামিত্যাহ- ন চেত্যাদি| সঙ্খ্যেযাগ্রেষ্বিতি সঙ্খ্যেযরোগপরিমাণেষু, অগ্রশব্দঃ পরিমাণে বর্ততে; যথা- একৈকস্য ভেদাগ্রমপরিসঙ্খ্যেযং ভবতি, ভেদসঙ্খ্যারূপং পরিমাণমিত্যর্থঃ| ভেদপ্রকৃত্যন্তরীযেষ্বিতি ভেদকারণান্তরভবেষু| বিরুদ্ধা গীতিঃ বিগীতিঃ কথনং ; যথা- ‘একং চানেকং চ তত্’ ইত্যাদিকা বিরুদ্ধা গীতিঃ| অত ইতি যথোক্তবিগীতিযোগাত্, ন দোষবতী কাচিত্ প্রতিজ্ঞা; যথা- একানেকরূপান্তরগমনরূপা অত্রোক্তা স্যাদিতি যোজনা| বিগীতৌ দোষাভাবং দর্শযিত্বা ভেদকারণান্তরকৃতাযামবিগীতাবপি দোষো ভবতীতি দর্শযন্নাহ- ন চাবিগীতিরিত্যাদি| যদি হি ‘একং রোগানীকং রুজাসামান্যাত্’ ইত্যভিধায পুনঃ ‘একং রোগানীকং প্রভাবভেদাত্’ ইত্যবিরুদ্ধা একতাখ্যাযিকাঽবিগীতিঃ ক্রিযতে, সা বিরুদ্ধৈব স্যাত্; যতো ন প্রভাবভেদেন রোগাণামেকত্বমুপপন্নং, কিন্তু দ্বৈধমেবেতি ভাবঃ| বিগীতৌ দোষাভাবে হেতুমাহ- ভেত্তা হীত্যাদি|- ভেত্তা পুরুষঃ, ভেদ্যং রোগম্, অন্যথা দ্বিত্বাদিনা ভিনত্তি, অন্যথা একত্বেন পুরস্তাদ্ভেদিতং চান্যথা ভিনত্তীতি| অস্যার্থং ব্যাকরোতি- ভেদপ্রকৃত্যন্তরেণেত্যাদিনা| অনেকধেতি দ্বে রোগানীকে, তথা দশ রোগানীকানীত্যাদি| ন চ পূর্বং ভেদাগ্রং ভেদপ্রমাণমুপহন্তি| এবং মন্যতে- যদ্ধর্মযোগবিবক্ষযৈকত্বমুক্তং, তদ্ধর্মযোগবিবক্ষযৈব যদি বহুত্বমপ্যুচ্যতে রোগাণাং ততো বিরোধো ভবতি, ন হি তদেবৈকং চানেকং চেত্যুপপন্নং; যদা তু ধর্মান্তরযোগবিবক্ষযা বহুত্বমুচ্যতে, ন তদা বিরোধঃ; বহুত্বাভিধানকালে বহূনামেব রোগধর্মাণাং বিবক্ষিতত্বাত্; তেন রোগাণামেকত্বমেকধর্মবিষযং, বহুত্বং চ বহুধর্মবিষযমিতি নাস্তি বিরোধঃ| ননু যত্রাসমানং ভেদকারণং তত্র কারণান্তরকৃতত্বাদুক্তন্যাযেন বিগীতিঃ সাধ্বী ভবতু, যত্র তু দশ রোগানীকানি প্রভাবাদিদ্বৈবিধ্যাদুচ্যন্তে, তত্র কথং দ্বে রোগানীকে ইতি দ্বিত্বকৃতং দ্বৈবিধ্যমভিধায পুনর্দ্বিত্বাদিভেদেনৈব দশত্বমুচ্যতে? সমানো হ্যযং দ্বিশব্দো দ্বিত্বে দশত্বে চ রোগাণাং হেতুরিত্যাহ- সমানাযামপীতি; সমানশব্দাভিধেযত্বেনাপাততঃ সমানত্বেন প্রতিভাসমানাযামিত্যর্থঃ| প্রকৃতানুপ্রযোগান্তরমপেক্ষ্যমিতি প্রকৃতস্য সমানশব্দেনাভিহিতস্য যদ্ভেদখ্যাপকং পশ্চাত্প্রযোগান্তরং, তদপেক্ষণীযং বিগীতিসমাধানার্থমিত্যর্থঃ| এতেনৈতদ্দর্শযতি- যদ্যপি দ্বিশব্দো রোগপ্রভাবে তথা রোগবলাদৌ চ সমানঃ, তথাঽপ্যেকত্র ‘প্রভাবভেদাত্’ ইত্যনুপ্রযোগান্তরমপেক্ষ্য প্রভাবদ্বৈবিধ্যে বর্ততে, তথা ‘বলভেদাত্’ ইত্যনুপ্রযোগান্তরমপেক্ষ্য চ দ্বিশব্দো বলদ্বৈবিধ্যে বর্তত ইত্যাদি| তেনার্থান্তরাভিধাযিভির্দ্বিশব্দৈর্ভিদ্যমানস্য দশত্বমপ্যুপপন্নং তথা দ্বিত্বং চেতি ভাবঃ| দৃষ্টান্তার্থমেকেন শব্দেনানেকার্থাভিধানমাহ- সন্তি হীত্যাদি| অর্থান্তরাণি পর্যাযশব্দানভিহিতা অর্থাঃ| তত্রোদাহরণমাহ- সমানো হীত্যাদি|- দোষেষু ব্যাধিষু চ সমান উভযবাচকত্বেন তুল্যো রোগশব্দঃ; তেন রোগদোষসমানত্বেনাভিধেযসমানানাং রোগাতঙ্কযক্ষ্মাদিশব্দানাং সর্বেষামেব বক্ষ্যমাণানাং গ্রহণম্| শেষেষ্বিতি হেত্বাদিষু| বিশেষবানিতি অভিধানরূপবিশেষবানিত্যর্থঃ||৪||
Adhikarana 4 (5-6) · Śloka 6
তত্র ব্যাধযোঽপরিসঙ্খ্যেযা ভবন্তি, অতিবহুত্বাত্| দোষাস্তু খলু পরিসঙ্খ্যেযা ভবন্তি, অনতিবহুত্বাত্| তস্মাদ্যথাচিত্রং বিকারানুদাহরণার্থম্, অনবশেষেণ চ দোষান্ ব্যাখ্যাস্যামঃ| রজস্তমশ্চ মানসৌ দোষৌ| তযোর্বিকারাঃ কামক্রোধলোভমোহের্ষ্যামানমদশোকচিত্তো(ন্তো)দ্বেগভযহর্ষাদযঃ| বাতপিত্তশ্লেষ্মাণস্তু খলু শারীরা দোষাঃ| তেষামপি চ বিকারা জ্বরাতীসারশোফশোষশ্বাসমেহকুষ্ঠাদযঃ| ইতি দোষাঃ কেবলা ব্যাখ্যাতা বিকারৈকদেশশ্চ||৫|| তত্র খল্বেষাং দ্বযানামপি দোষাণাং ত্রিবিধং প্রকোপণং; তদ্যথা- অসাত্ম্যেন্দ্রিযার্থসংযোগঃ, প্রজ্ঞাপরাধঃ, পরিণামশ্চেতি||৬||
तत्र व्याधयोऽपरिसङ्ख्येया भवन्ति, अतिबहुत्वात्| दोषास्तु खलु परिसङ्ख्येया भवन्ति, अनतिबहुत्वात्| तस्माद्यथाचित्रं विकारानुदाहरणार्थम्, अनवशेषेण च दोषान् व्याख्यास्यामः| रजस्तमश्च मानसौ दोषौ| तयोर्विकाराः कामक्रोधलोभमोहेर्ष्यामानमदशोकचित्तो(न्तो)द्वेगभयहर्षादयः| वातपित्तश्लेष्माणस्तु खलु शारीरा दोषाः| तेषामपि च विकारा ज्वरातीसारशोफशोषश्वासमेहकुष्ठादयः| इति दोषाः केवला व्याख्याता विकारैकदेशश्च||५|| तत्र खल्वेषां द्वयानामपि दोषाणां त्रिविधं प्रकोपणं; तद्यथा- असात्म्येन्द्रियार्थसंयोगः, प्रज्ञापराधः, परिणामश्चेति||६||
🔊 Audio coming soon
তত্রাপি রোগশব্দাভিধেযতযা সমানেঽপি দোষে তথা বিকারে চ পরিসঙ্খ্যেযাপরিসঙ্খ্যেয(ত্ব)রূপা বিগীতিরস্ত্যথ চাদোষ ইত্যভিপ্রাযেণাহ- তত্রেত্যাদি| একৈকস্মিন্ দোষে বহবো বিকারা ভবন্তীত্যভিপ্রাযেণ বিকারাপেক্ষযা দোষাণামনতিবহুত্বং জ্ঞেযম্| যথাচিত্রমিতি যথাবিন্যাসং, তেন যানেব পূর্বাচার্যা বিকারানধিকতমত্বেনোক্তবন্তস্তানেব ব্যাখ্যাস্যামঃ; নতু সর্বান্, অশক্যত্বাত্| কিংবা, ‘যথোচিতম্ ’ ইতি পাঠঃ| অনবশেষেণ চ দোষানিত্যনেন দোষা অনতিবহুত্বেনানবশেষেণাপ্যভিধাতুং শক্যন্ত ইতি প্রকাশযতি| তত্র মানসদোষবিকারযোরনল্পবক্তব্যত্বেনাগ্রেঽভিধানম্||৫-৬||
Adhikarana 5 (7) · Śloka 7
প্রকুপিতাস্তু খলু তে প্রকোপণবিশেষাদ্দূষ্যবিশেষাচ্চ বিকারবিশেষানভিনির্বর্তযন্ত্যপরিসঙ্খ্যেযান্||৭||
प्रकुपितास्तु खलु ते प्रकोपणविशेषाद्दूष्यविशेषाच्च विकारविशेषानभिनिर्वर्तयन्त्यपरिसङ्ख्येयान्||७||
🔊 Audio coming soon
ননু পরিমিতাদ্দোষরূপাত্ কারণাত্ কথমপরিমিতা বিকারা ভবন্তীত্যাহ- প্রকুপিতাস্ত্বিত্যাদি| হেতুবিশেষদুষ্টো হি স এব দোষো দূষ্যান্তরগতশ্চ বিভিন্নশক্তিযোগাদ্বহূন্ বিকারান্ করোতীতি যুক্তমেব| উক্তং চ- “স এব কুপিতো দোষঃ সমুত্থানবিশেষতঃ| স্থানান্তরগতশ্চৈব বিকারান্ কুরুতে বহূন্” (সূ.অ.১৮) ইতি||৭||
Adhikarana 6 (8) · Śloka 8
তে চ বিকারাঃ পরস্পরমনুবর্তমানাঃ কদাচিদনুবধ্নন্তি কামাদযো জ্বরাদযশ্চ||৮||
ते च विकाराः परस्परमनुवर्तमानाः कदाचिदनुबध्नन्ति कामादयो ज्वरादयश्च||८||
🔊 Audio coming soon
বিকারাণাং শারীরমানসানাং পরস্পরং সংসর্গমাহ- তে চ বিকারা ইত্যাদি| অনুবর্তমানা ইত্যনেন যদৈব জ্বরাদযঃ কামাদযো বা বলবত্ত্বেন চিরকালমনুবর্তন্তে, তদৈবানুবধ্নন্তি প্রাযঃ; যদা তু স্তোককালাবস্থাযিনো ভবন্তি, ন তদা প্রাযোঽনুবধ্নন্তীত্যর্থঃ| কিংবা, অনুবর্তমানাঃ পরস্পরবলমভিবর্ধযন্তঃ| অত্র চ পরস্পরশব্দেন শারীরাণাং শারীরেণ, মানসানাং মানসেন, শারীরাণাং মানসেন, মানসানাং শারীরেণ চানুবন্ধো জ্ঞেযঃ||৮||
Adhikarana 7 (9) · Śloka 9
নিযতস্ত্বনুবন্ধো রজস্তমসোঃ পরস্পরং, ন হ্যরজস্কং তমঃ প্রবর্ততে ||৯||
नियतस्त्वनुबन्धो रजस्तमसोः परस्परं, न ह्यरजस्कं तमः प्रवर्तते ||९||
🔊 Audio coming soon
বিকারানুবন্ধং দর্শযিত্বা দোষানুবন্ধমাহ- নিযতস্ত্বিত্যাদি||৯||
Adhikarana 8 (10) · Śloka 10
(প্রাযঃ) শারীরদোষাণামেকাধিষ্ঠানীযানাং সন্নিপাতঃ সংসর্গো বা সমানগুণত্বাত্; দোষা হি দূষণৈঃ সমানাঃ||১০||
(प्रायः) शारीरदोषाणामेकाधिष्ठानीयानां सन्निपातः संसर्गो वा समानगुणत्वात्; दोषा हि दूषणैः समानाः||१०||
🔊 Audio coming soon
শারীরদোষানুবন্ধমাহ- শারীরেত্যাদি| একাধিষ্ঠানীযানামিত্যনেনৈকশরীরাধিষ্ঠানপ্রত্যাসত্ত্যা চ সংসর্গা দোষাণাং ভবন্তীতি দর্শযতি| সমানগুণত্বাদিতি হেতুং বিবৃণোতি- দোষা হীত্যাদি| দূষণৈরিতি হেতুভিঃ; প্রাযো হি শারীরাণাং বাতাদীনাং সমান এব হেতুর্ভবতি; যথা- হ্যম্লং লবণং কটু চ পিত্তকরং ; তত্রাম্লং সকফং পিত্তং করোতি, লবণং চ সপিত্তং কফং করোতি, কটু তু সবাতং পিত্তং করোতি| তথা বসন্তঃ শ্লেষ্মকারকোঽপ্যাদানত্বেন বাতপিত্তে চ করোতি, তথা বর্ষাস্বপি পিত্তং চীযমানং শরদি প্রকুপ্য কফানুগতমেব কুপ্যতি, তথা গ্রীষ্মো বাতচযং রূক্ষত্বেন কুর্বন্ উষ্ণত্বেন মনাক্ পিত্তচযমপি করোতীত্যনুসরণীযম্||১০||
Adhikarana 9 (11) · Śloka 11
তত্রানুবন্ধ্যানুবন্ধকৃতো বিশেষঃ- স্বতন্ত্রো ব্যক্তলিঙ্গো যথোক্তসমুত্থানপ্রশমো ভবত্যনুবন্ধ্যঃ, তদ্বিপরীতলক্ষণস্ত্বনুবন্ধঃ| অনুবন্ধ্যলক্ষণসমন্বিতাস্তত্র যদি দোষা ভবন্তি তত্ত্রিকং সন্নিপাতমাচক্ষতে, দ্বযং বা সংসর্গম্| অনুবন্ধ্যানুবন্ধবিশেষকৃতস্তু বহুবিধো দোষভেদঃ| এবমেষ সঞ্জ্ঞাপ্রকৃতো ভিষজাং দোষেষু ব্যাধিষু চ নানাপ্রকৃতিবিশেষব্যূহঃ ||১১||
तत्रानुबन्ध्यानुबन्धकृतो विशेषः- स्वतन्त्रो व्यक्तलिङ्गो यथोक्तसमुत्थानप्रशमो भवत्यनुबन्ध्यः, तद्विपरीतलक्षणस्त्वनुबन्धः| अनुबन्ध्यलक्षणसमन्वितास्तत्र यदि दोषा भवन्ति तत्त्रिकं सन्निपातमाचक्षते, द्वयं वा संसर्गम्| अनुबन्ध्यानुबन्धविशेषकृतस्तु बहुविधो दोषभेदः| एवमेष सञ्ज्ञाप्रकृतो भिषजां दोषेषु व्याधिषु च नानाप्रकृतिविशेषव्यूहः ||११||
🔊 Audio coming soon
এনমেব দোষানুবন্ধমনুবন্ধ্যানুবন্ধভেদেন দর্শযিতুমনুবন্ধ্যানুবন্ধলক্ষণমেবাহ- তত্রেত্যাদি| অনুবন্ধ্যস্য অনুবন্ধস্য চ বিশেষোঽনুবন্ধ্যানুবন্ধবিশেষঃ ‘স্বতন্ত্র’ ইত্যাদিগ্রন্থলক্ষণীযঃ| স্বতন্ত্র ইত্যস্যৈব বিবরণং- ব্যক্তলিঙ্গ ইত্যাদি| যথোক্তসমুত্থানপ্রশম ইতি স্বহেতুসমুত্থিতঃ স্বচিকিত্সযৈব প্রশমনীযঃ| কিংবা, স্বতন্ত্র ইত্যেনাপি স্ববিকারকরণে প্রাধান্যমুচ্যতে ; স্বতন্ত্রো হি দোষঃ প্রকোপকালে বিকারান্ করোতি, অস্বতন্ত্রস্তু স্বতন্ত্রপ্রকোপকাল এব বিকারং প্রধানদোষেরিতঃ সন্ করোতি| তদ্বিপরীতলক্ষণ ইতি অনেনাব্যক্তলিঙ্গোঽস্বহেতুপ্রকুপিতঃ পরচিকিত্সাপ্রশমনীযশ্চানুবন্ধ ইতি লভ্যতে; অনুবন্ধো হ্যবলবত্ত্বেন ন লিঙ্গং ব্যক্তং করোতি, তথা পরহেতুনা কিঞ্চিদনুগুণেন কৃতঃ পরচিকিত্সযৈব কিঞ্চিদনুগুণযা শাম্যতি| যথা- শরদি শ্লেষ্মা পিত্তহেতুনা জলাদ্যম্লবিপাকেন জন্যতে, স চ পিত্তচিকিত্সযৈব তিক্তসর্পিরাদিকযা কফেঽপ্যনুগুণযা শাম্যতি| দ্বযং বাঽনুবন্ধ্যলক্ষণং প্রাপ্তং সংসর্গমাচক্ষত ইতি যোজনা| অনুবন্ধ্যশব্দশ্চাযং ব্যক্তলিঙ্গতাদিধর্মযুক্তে দোষে বর্ততে| তেনাপ্রধানানুগমনীযে সন্নিপাতে অনুবন্ধাভাবেঽপ্যনুবন্ধ ইতি ব্যপদেশো ভবত্যেব অনুবন্ধ্যানুবন্ধরূপসংসর্গবিশেষেণ কৃতঃ| সঞ্জ্ঞাপ্রকৃত ইতি অনুবন্ধ্যানুবন্ধসন্নিপাতসংসর্গজ্বরাতিসারাদিসঞ্জ্ঞাকৃত ইত্যর্থঃ| নানাপ্রকৃতিবিশেষব্যূহ ইতি যথোক্তনানাকারণবিশেষকৃতো জ্বরাতিসারাদিরূপো ব্যধীনাং দোষাণাং চ সমূহ ইত্যর্থঃ| ভিষজামিতিপদেন চ বৈদ্যানামেবেযং সমযসিদ্ধাঽনুবন্ধ্যাদিসঞ্জ্ঞেতি দর্শযতি||১১||
Adhikarana 10 (12) · Śloka 12
অগ্নিষু তু শারীরেষু চতুর্বিধো বিশেষো বলভেদেন ভবতি| তদ্যথা- তীক্ষ্ণো, মন্দঃ, সমো, বিষমশ্চেতি| তত্র তীক্ষ্ণোঽগ্নিঃ সর্বাপচারসহঃ, তদ্বিপরীতলক্ষণস্তু মন্দঃ, সমস্তু খল্বপচারতো বিকৃতিমাপদ্যতেঽনপচারতস্তু প্রকৃতাববতিষ্ঠতে, সমলক্ষণবিপরীতলক্ষণস্তু বিষম ইতি| এতে চতুর্বিধা ভবন্ত্যগ্নযশ্চতুর্বিধানামেব পুরুষাণাম্| তত্র সমবাতপিত্তশ্লেষ্মণাং প্রকৃতিস্থানাং সমা ভবন্ত্যগ্নযঃ, বাতলানাং তু বাতাভিভূতেঽগ্ন্যধিষ্ঠানে বিষমা ভবন্ত্যগ্নযঃ, পিত্তলানাং তু পিত্তাভিভূতে হ্যগ্ন্যধিষ্ঠানে তীক্ষ্ণা ভবন্ত্যগ্নযঃ, শ্লেষ্মলানাং তু শ্লেষ্মাভিভূতেঽগ্ন্যধিষ্ঠানে মন্দা ভবন্ত্যগ্নযঃ||১২||
अग्निषु तु शारीरेषु चतुर्विधो विशेषो बलभेदेन भवति| तद्यथा- तीक्ष्णो, मन्दः, समो, विषमश्चेति| तत्र तीक्ष्णोऽग्निः सर्वापचारसहः, तद्विपरीतलक्षणस्तु मन्दः, समस्तु खल्वपचारतो विकृतिमापद्यतेऽनपचारतस्तु प्रकृताववतिष्ठते, समलक्षणविपरीतलक्षणस्तु विषम इति| एते चतुर्विधा भवन्त्यग्नयश्चतुर्विधानामेव पुरुषाणाम्| तत्र समवातपित्तश्लेष्मणां प्रकृतिस्थानां समा भवन्त्यग्नयः, वातलानां तु वाताभिभूतेऽग्न्यधिष्ठाने विषमा भवन्त्यग्नयः, पित्तलानां तु पित्ताभिभूते ह्यग्न्यधिष्ठाने तीक्ष्णा भवन्त्यग्नयः, श्लेष्मलानां तु श्लेष्माभिभूतेऽग्न्यधिष्ठाने मन्दा भवन्त्यग्नयः||१२||
🔊 Audio coming soon
দোষভেদবিকারভেদমভিধায শরীরস্থিতেঃ প্রধানকারণস্যাগ্নের্ভেদমাহ- অগ্নিষ্বিত্যাদি| শারীরেষ্বিতি সামান্যবচনেন সর্বশরীরগতানগ্নীন্ গ্রাহযতি, বিবরণে তু জঠরাগ্নেরেব ‘তীক্ষ্ণোঽগ্নিঃ সর্বাপচারসহঃ’ ইত্যাদিনা যচ্চাতুর্বিধ্যমুক্তং, তজ্জঠরাগ্নিতীক্ষ্ণতাদিমূলকমেব ত্বগগ্ন্যাদিতীক্ষ্ণত্বাদিকমিতি জ্ঞাপযতি| বচনং হি- “তন্মূলাস্তে হি তদ্বৃদ্ধিক্ষযবৃদ্ধিক্ষযাত্মকাঃ” (চি.অ.১৫) ইতি| যদ্যপি সমোঽগ্নিঃ শস্তত্বেনাগ্রেঽভিধাতুং যুজ্যতে, তথাঽপি সমতশ্চ তীক্ষ্ণস্যৈব প্রাধান্যোপদর্শনার্থমিহাগ্রেঽভিধানং; সমস্য হি প্রাধান্যং নির্বিকারত্বেনৈব সুস্থিতং, তীক্ষ্ণস্য তু সর্বাপচারসহত্বেন প্রাধান্যম্| তদ্বিপরীতলক্ষণ ইতি স্বল্পাপচারমপি যো ন সহতে, স মন্দ ইত্যর্থঃ| সমলক্ষণবিপরীতলক্ষণ ইতি কদাচিদ্বিষমোঽপচারাদপি ন বিক্রিযতে, কদাচিদ্বিক্রিযতে| সমবাতপিত্তশ্লেষ্মণামিত্যুক্তেঽপি প্রকৃতিস্থানামিতি পদং বৃদ্ধানাং সমবাতপিত্তশ্লেষ্মণাং প্রতিষেধার্থম্| প্রকৃতিশব্দস্য কারণাদ্যনেকার্থতাব্যুদাসার্থং সমবাতপিত্তশ্লেষ্মণামিতি কৃতম্| বাতাভিভূতেঽগ্ন্যধিষ্ঠানে ইতি বচনেন বাতলানামপি যদৈবাগ্ন্যধিষ্ঠানোপঘাতো বাতেন ক্রিযতে, তদৈব বৈষম্যং ভবতি| এবং পিত্তাভিভূত ইত্যাদাবপি ব্যাখ্যেযম্||১২||
Adhikarana 11 (13) · Śloka 13
তত্র কেচিদাহুঃ- ন সমবাতপিত্তশ্লেষ্মাণো জন্তবঃ সন্তি, বিষমাহারোপযোগিত্বান্মনুষ্যাণাং; তস্মাচ্চ বাতপ্রকৃতযঃ কেচিত্, কেচিত্ পিত্তপ্রকৃতযঃ, কেচিত্ পুনঃ শ্লেষ্মপ্রকৃতযো ভবন্তীতি| তচ্চানুপপন্নং, কস্মাত্ কারণাত্? সমবাতপিত্তশ্লেষ্মাণং হ্যরোগমিচ্ছন্তি ভিষজঃ, যতঃ প্রকৃতিশ্চারোগ্যম্, আরোগ্যার্থা চ ভেষজপ্রবৃত্তিঃ, সা চেষ্টরূপা, তস্মাত্ সন্তি সমবাতপিত্তশ্লেষ্মাণঃ; ন খলু সন্তি বাতপ্রকৃতযঃ পিত্তপ্রকৃতযঃ শ্লেষ্মপ্রকৃতযো বা| তস্য তস্য কিল দোষস্যাধিক্যাত্ সা সা দোষপ্রকৃতিরুচ্যতে মনুষ্যাণাং, ন চ বিকৃতেষু দোষেষু প্রকৃতিস্থত্বমুপপদ্যতে, তস্মান্নৈতাঃ প্রকৃতযঃ সন্তি; সন্তি তু খলু বাতলাঃ পিত্তলাঃ শ্লেষ্মলাশ্চ, অপ্রকৃতিস্থাস্তু তে জ্ঞেযাঃ||১৩||
तत्र केचिदाहुः- न समवातपित्तश्लेष्माणो जन्तवः सन्ति, विषमाहारोपयोगित्वान्मनुष्याणां; तस्माच्च वातप्रकृतयः केचित्, केचित् पित्तप्रकृतयः, केचित् पुनः श्लेष्मप्रकृतयो भवन्तीति| तच्चानुपपन्नं, कस्मात् कारणात्? समवातपित्तश्लेष्माणं ह्यरोगमिच्छन्ति भिषजः, यतः प्रकृतिश्चारोग्यम्, आरोग्यार्था च भेषजप्रवृत्तिः, सा चेष्टरूपा, तस्मात् सन्ति समवातपित्तश्लेष्माणः; न खलु सन्ति वातप्रकृतयः पित्तप्रकृतयः श्लेष्मप्रकृतयो वा| तस्य तस्य किल दोषस्याधिक्यात् सा सा दोषप्रकृतिरुच्यते मनुष्याणां, न च विकृतेषु दोषेषु प्रकृतिस्थत्वमुपपद्यते, तस्मान्नैताः प्रकृतयः सन्ति; सन्ति तु खलु वातलाः पित्तलाः श्लेष्मलाश्च, अप्रकृतिस्थास्तु ते ज्ञेयाः||१३||
🔊 Audio coming soon
বিষমাহারোপযোগিত্বাদিতি নাযং পুরুষস্তুলাধারধৃতমিবাহারমুপযুঙ্ক্তে, তেনাবশ্যমত্র বাতাদিষ্বন্যতমোঽপি দোষো বিকৃতো ভবতীতি ভাবঃ| সমবাতপিত্তশ্লেষ্মাণমিত্যাদিনা অস্তি তাবদারোগ্যং পুরুষেষু বৈদ্যব্যবহারসিদ্ধমিতি দর্শযতি| তেন, যাদৃগিদং দোষাণাং কলাকাষ্ঠাদিবৈষম্যং পরিত্যজ্যাবির্ভূতবিকারাকারিত্বেনাদূরান্তরং সাম্যমিষ্যতে, তাদৃগেব প্রকৃতাবপি সাম্যমস্ত্যেবেতি ভাবঃ| অন্যে তু বৈষম্যং নাদ্রিযন্ত এব, ব্যপদেশ্যরোগাজনকত্বাত্| দোষপ্রকৃতিরিতি দুষ্টদোষভাবিতা প্রকৃতিরিত্যর্থঃ||১৩||
Adhikarana 12 (14) · Śloka 14
তেষাং তু খলু চতুর্বিধানাং পুরুষাণাং চত্বার্যনুপ্রণিধানানি শ্রেযস্করাণি ভবন্তি| তত্র সমসর্বধাতূনাং সর্বাকারসমম্, অধিকদোষাণাং তু ত্রযাণাং যথাস্বং দোষাধিক্যমভিসমীক্ষ্য দোষপ্রতিকূলযোগীনি ত্রীণ্যনু(ন্ন)প্রণিধানানি শ্রেযস্করাণি ভবন্তি যাবদগ্নেঃ সমীভাবাত্, সমে তু সমমেব কার্যম্; এবং চেষ্টা ভেষজপ্রযোগাশ্চাপরে| তান্ বিস্তরেণানুব্যাখ্যাস্যামঃ||১৪||
तेषां तु खलु चतुर्विधानां पुरुषाणां चत्वार्यनुप्रणिधानानि श्रेयस्कराणि भवन्ति| तत्र समसर्वधातूनां सर्वाकारसमम्, अधिकदोषाणां तु त्रयाणां यथास्वं दोषाधिक्यमभिसमीक्ष्य दोषप्रतिकूलयोगीनि त्रीण्यनु(न्न)प्रणिधानानि श्रेयस्कराणि भवन्ति यावदग्नेः समीभावात्, समे तु सममेव कार्यम्; एवं चेष्टा भेषजप्रयोगाश्चापरे| तान् विस्तरेणानुव्याख्यास्यामः||१४||
🔊 Audio coming soon
দোষে প্রবৃদ্ধে প্রতিকূলতযা যোগীনি দোষপ্রতিকূলযোগীনি| ত্রীণি বাতপিত্তশ্লেষ্মপ্রতিকূলানি| সমে ত্বিতি সমতাং গতে বহ্নৌ, যথোচিতবিধানেন (বাতপ্রকৃত্যাদীনাং ) সমমেবানুপ্রণিধানং কর্তব্যম্| এবমিত্যনেন প্রকারেণ চেষ্টাভেষজযোরপি প্রযোগা বাতাদীনাং ভবন্তি; যে তু, এবমিত্যনেন চতুর্বিধেনোক্তেন প্রকারেণেতি বদন্তি, তে সমপ্রকৃতীনাং চ সমব্যাযামাদিচেষ্টা ভেষজং চ ঋতুচর্যাবিধেযং বমনাদিকারকং সূচ্যতেঽনেনেতি ব্যাখ্যানযন্তি||১৪||
Adhikarana 13 (15-16) · Śloka 16
ত্রযস্তু পুরুষা ভবন্ত্যাতুরাঃ, তে ত্বনাতুরাস্তন্ত্রান্তরীযাণাং ভিষজাম্| তদ্যথা- বাতলঃ, পিত্তলঃ, শ্লেষ্মলশ্চেতি| তেষামিদং বিশেষবিজ্ঞানং- বাতলস্য বাতনিমিত্তাঃ, পিত্তলস্য পিত্তনিমিত্তাঃ, শ্লেষ্মলস্য শ্লেষ্মনিমিত্তা ব্যাধযঃ প্রাযেণ বলবন্তশ্চ ভবন্তি||১৫|| তত্র বাতলস্য বাতপ্রকোপণান্যাসেবমানস্য ক্ষিপ্রং বাতঃ প্রকোপমাপদ্যতে, ন তথেতরৌ দোষৌ; স তস্য প্রকোপমাপন্নো যথোক্তৈর্বিকারৈঃ শরীরমুপতপতি বলবর্ণসুখাযুষামুপঘাতায| তস্যাবজযনং- স্নেহস্বেদৌ বিধিযুক্তৌ, মৃদূনি চ সংশোধনানি স্নেহোষ্ণমধুরাম্ললবণযুক্তানি, তদ্বদভ্যবহার্যাণি, অভ্যঙ্গোপনাহনোদ্বেষ্টনোন্মর্দনপরিষেকাবগাহনসংবাহনাবপীডনবিত্রাসনবিস্মাপনবিস্মারণানি, সুরাসববিধানং, স্নেহাশ্চানেকযোনযো দীপনীযপাচনীযবাতহরবিরেচনীযোপহিতাস্তথা শতপাকাঃ সহস্রপাকাঃ সর্বশশ্চ প্রযোগার্থাঃ, বস্তযঃ, বস্তিনিযমঃ সুখশীলতা চেতি||১৬||
त्रयस्तु पुरुषा भवन्त्यातुराः, ते त्वनातुरास्तन्त्रान्तरीयाणां भिषजाम्| तद्यथा- वातलः, पित्तलः, श्लेष्मलश्चेति| तेषामिदं विशेषविज्ञानं- वातलस्य वातनिमित्ताः, पित्तलस्य पित्तनिमित्ताः, श्लेष्मलस्य श्लेष्मनिमित्ता व्याधयः प्रायेण बलवन्तश्च भवन्ति||१५|| तत्र वातलस्य वातप्रकोपणान्यासेवमानस्य क्षिप्रं वातः प्रकोपमापद्यते, न तथेतरौ दोषौ; स तस्य प्रकोपमापन्नो यथोक्तैर्विकारैः शरीरमुपतपति बलवर्णसुखायुषामुपघाताय| तस्यावजयनं- स्नेहस्वेदौ विधियुक्तौ, मृदूनि च संशोधनानि स्नेहोष्णमधुराम्ललवणयुक्तानि, तद्वदभ्यवहार्याणि, अभ्यङ्गोपनाहनोद्वेष्टनोन्मर्दनपरिषेकावगाहनसंवाहनावपीडनवित्रासनविस्मापनविस्मारणानि, सुरासवविधानं, स्नेहाश्चानेकयोनयो दीपनीयपाचनीयवातहरविरेचनीयोपहितास्तथा शतपाकाः सहस्रपाकाः सर्वशश्च प्रयोगार्थाः, बस्तयः, बस्तिनियमः सुखशीलता चेति||१६||
🔊 Audio coming soon
ন তথেতরৌ দোষাবিতি সত্যাঽপি হেতুসেবযেত্যর্থঃ; অন্যথা বাতপ্রকোপণসেবযা পিত্তশ্লেষ্মণোর্বৃদ্ধিরেব নাস্তি| বিত্রাসনাদযো যদ্যপি বাতকারকাস্তথাঽপি বাতজনিতোন্মাদবিনাশকত্বেন চোক্তা ইতি জ্ঞেযম্| উন্মাদে হি বিত্রাসনাদি ভেষজমভিধাযোক্তং- “তেন যাতি শমং তস্য সর্বতো বিপ্লুতং মনঃ” (চি.অ.৯) ইতি| সর্বশঃ প্রযোগার্থা ইতি পানাভ্যঙ্গবস্ত্যাদিভিঃ প্রযোজনীযা ইত্যর্থঃ| বস্তিনিযম ইতি বস্তৌ যথোক্তনিযমসেবেত্যর্থঃ; কিংবা বস্তিনিযমশব্দেন সিদ্ধৌ বক্ষ্যমাণকর্ম-কাল-যোগরূপং বস্তিসঙ্খ্যানিযমং কর্তব্যতযা দর্শযতি| বক্ষ্যতি হি- “ত্রিংশন্মতাঃ কর্মসু বস্তিযোগাঃ কালস্ততোঽর্ধেন ততশ্চ যোগঃ” (সি.অ.১) ইতি| সুখশীলতা সততসুখসেবিত্বম্||১৫-১৬||
Adhikarana 14 (17) · Śloka 17
পিত্তলস্যাপি পিত্তপ্রকোপণান্যাসেবমানস্য ক্ষিপ্রং পিত্তং প্রকোপমাপদ্যতে, ন তথেতরৌ দোষৌ; তদস্য প্রকোপমাপন্নং যথোক্তৈর্বিকারৈঃ শরীরমুপতপতি বলবর্ণসুখাযুষামুপঘাতায| তস্যাবজযনং- সর্পিষ্পানং, সর্পিষা চ স্নেহনম্, অধশ্চ দোষহরণং, মধুরতিক্তকষাযশীতানাং চৌষধাভ্যবহার্যাণামুপযোগঃ, মৃদুমধুরসুরভিশীতহৃদ্যানাং গন্ধানাং চোপসেবা, মুক্তামণিহারাবলীনাং চ পরমশিশিরবারিসংস্থিতানাং ধারণমুরসা, ক্ষণে ক্ষণেঽগ্র্যচন্দনপ্রিযঙ্গুকালীযমৃণালশীতবাতবারিভিরুত্পলকুমুদকোকনদসৌগন্ধিকপদ্মানুগতৈশ্চ বারিভিরভিপ্রোক্ষণং, শ্রুতিসুখমৃদুমধুরমনোঽনুগানাং চ গীতবাদিত্রাণাং শ্রবণং, শ্রবণং চাভ্যুদযানাং, সুহৃদ্ভিঃ সংযোগঃ, সংযোগশ্চেষ্টাভিঃ স্ত্রীভিঃ শীতোপহিতাংশুকস্রগ্ধারিণীভিঃ, নিশাকরাংশুশীতলপ্রবাতহর্ম্যবাসঃ, শৈলান্তরপুলিনশিশিরসদনবসনব্যজনপবনসেবনং, রম্যাণাং চোপবনানাং সুখশিশিরসুরভিমারুতোপহিতানামুপসেবনং, সেবনং চ পদ্মোত্পলনলিনকুমুদসৌগন্ধিকপুণ্ডরীকশতপত্রহস্তানাং , সৌম্যানাং চ সর্বভাবানামিতি||১৭||
पित्तलस्यापि पित्तप्रकोपणान्यासेवमानस्य क्षिप्रं पित्तं प्रकोपमापद्यते, न तथेतरौ दोषौ; तदस्य प्रकोपमापन्नं यथोक्तैर्विकारैः शरीरमुपतपति बलवर्णसुखायुषामुपघाताय| तस्यावजयनं- सर्पिष्पानं, सर्पिषा च स्नेहनम्, अधश्च दोषहरणं, मधुरतिक्तकषायशीतानां चौषधाभ्यवहार्याणामुपयोगः, मृदुमधुरसुरभिशीतहृद्यानां गन्धानां चोपसेवा, मुक्तामणिहारावलीनां च परमशिशिरवारिसंस्थितानां धारणमुरसा, क्षणे क्षणेऽग्र्यचन्दनप्रियङ्गुकालीयमृणालशीतवातवारिभिरुत्पलकुमुदकोकनदसौगन्धिकपद्मानुगतैश्च वारिभिरभिप्रोक्षणं, श्रुतिसुखमृदुमधुरमनोऽनुगानां च गीतवादित्राणां श्रवणं, श्रवणं चाभ्युदयानां, सुहृद्भिः संयोगः, संयोगश्चेष्टाभिः स्त्रीभिः शीतोपहितांशुकस्रग्धारिणीभिः, निशाकरांशुशीतलप्रवातहर्म्यवासः, शैलान्तरपुलिनशिशिरसदनवसनव्यजनपवनसेवनं, रम्याणां चोपवनानां सुखशिशिरसुरभिमारुतोपहितानामुपसेवनं, सेवनं च पद्मोत्पलनलिनकुमुदसौगन्धिकपुण्डरीकशतपत्रहस्तानां , सौम्यानां च सर्वभावानामिति||१७||
🔊 Audio coming soon
যথোক্তৈরিতি মহারোগাধ্যাযোক্তৈঃ| অধশ্চ দোষহরণমিতি বিরেচনাদিত্যর্থঃ| অগ্র্যচন্দনং ধবলচন্দম্| হস্তানামিতি কলাপানাম্||১৭||
Adhikarana 15 (18) · Śloka 18
শ্লেষ্মলস্যাপি শ্লেষ্মপ্রকোপণান্যাসেবমানস্য ক্ষিপ্রং শ্লেষ্মা প্রকোপমাপদ্যতে, ন তথেতরৌ দোষৌ; স তস্য প্রকোপমাপন্নো যথোক্তৈর্বিকারৈঃ শরীরমুপতপতি বলবর্ণসুখাযুষামুপঘাতায| তস্যাবজযনং- বিধিযুক্তানি তীক্ষ্ণোষ্ণানি সংশোধনানি, রূক্ষপ্রাযাণি চাভ্যবহার্যাণি কটুকতিক্তকষাযোপহিতানি, তথৈব ধাবনলঙ্ঘনপ্লবনপরিসরণজাগরণনিযুদ্ধব্যবাযব্যাযামোন্মর্দনস্নানোত্সাদনানি, বিশেষতস্তীক্ষ্ণানাং দীর্ঘকালস্থিতানাং চ মদ্যানামুপযোগঃ, সধূমপানঃ সর্বশশ্চোপবাসঃ, তথোষ্ণং বাসঃ, সুখপ্রতিষেধশ্চ সুখার্থমেবেতি||১৮||
श्लेष्मलस्यापि श्लेष्मप्रकोपणान्यासेवमानस्य क्षिप्रं श्लेष्मा प्रकोपमापद्यते, न तथेतरौ दोषौ; स तस्य प्रकोपमापन्नो यथोक्तैर्विकारैः शरीरमुपतपति बलवर्णसुखायुषामुपघाताय| तस्यावजयनं- विधियुक्तानि तीक्ष्णोष्णानि संशोधनानि, रूक्षप्रायाणि चाभ्यवहार्याणि कटुकतिक्तकषायोपहितानि, तथैव धावनलङ्घनप्लवनपरिसरणजागरणनियुद्धव्यवायव्यायामोन्मर्दनस्नानोत्सादनानि, विशेषतस्तीक्ष्णानां दीर्घकालस्थितानां च मद्यानामुपयोगः, सधूमपानः सर्वशश्चोपवासः, तथोष्णं वासः, सुखप्रतिषेधश्च सुखार्थमेवेति||१८||
🔊 Audio coming soon
শ্লেষ্মবিজযার্থং রূক্ষস্যৈব হিতত্বেন রূক্ষাণীতি বক্তব্যে যদ্রূক্ষপ্রাযাণীতি করোতি, তেনাত্যর্থরূক্ষান্নস্য বাতানুগুণত্বেন তথা ধাত্বপোষকত্বেন চাসেব্যত্বং দর্শযতি; উক্তং হি রসবিমানে- “স্নিগ্ধমশ্নীযাত্; স্নিগ্ধং হি ভুক্তং স্বদতে, ভুক্তমৌদর্যমগ্নিমুদীরযতি” (বি.অ.১) ইত্যাদি| লঙ্ঘনম্ উত্প্লুত্য গমনং, পরিসরণং কুণ্ডলরূপভ্রমণম্| সর্বশশ্চোপবাস ইতি সর্বলঙ্ঘনানি| যদুক্তং- “চতুষ্প্রকারা সংশুদ্ধিঃ পিপাসা মারুতাতপৌ| পাচনান্যুপবাসশ্চ ব্যাযামশ্চেতি লঙ্ঘনম্” (সূ.অ.২২) ইতি| উপবাসশব্দো হ্যত্র লঙ্ঘনে বর্ততে| সুখার্থমিতি আযতিসুখার্থং; সুখপ্রতিষেধাদ্ধি শ্লেষ্মক্ষযে ভূতে শ্লেষ্মবিকারাভাবলক্ষণং সুখং ভবতি||১৮||
Adhikarana 16 (19) · Śloka 19
ভবতি চাত্র- সর্বরোগবিশেষজ্ঞঃ সর্বকার্যবিশেষবিত্| সর্বভেষজতত্ত্বজ্ঞো রাজ্ঞঃ প্রাণপতির্ভবেদিতি||১৯||
भवति चात्र- सर्वरोगविशेषज्ञः सर्वकार्यविशेषवित्| सर्वभेषजतत्त्वज्ञो राज्ञः प्राणपतिर्भवेदिति||१९||
🔊 Audio coming soon
যথোক্তাধ্যাযজ্ঞানাদেব সর্বরোগাভিজ্ঞং স্তৌতি- সর্বেত্যাদিনা| প্রাণান্ পাতি রক্ষতীতি প্রাণপতিঃ||১৯||
Adhikarana 17 (20-22) · Śloka 22
তত্র শ্লোকাঃ- প্রকৃত্যন্তরভেদেন রোগানীকবিকল্পনম্| পরস্পরাবিরোধশ্চ সামান্যং রোগদোষযোঃ||২০|| দোষসঙ্খ্যা বিকারাণামেকদেশঃ প্রকোপণম্| জরণং প্রতি চিন্তা চ কাযাগ্নের্ধুক্ষণানি চ||২১|| নরাণাং বাতলাদীনাং প্রকৃতিস্থাপনানি চ| রোগানীকে বিমানেঽস্মিন্ ব্যাহৃতানি মহর্ষিণা||২২||
तत्र श्लोकाः- प्रकृत्यन्तरभेदेन रोगानीकविकल्पनम्| परस्पराविरोधश्च सामान्यं रोगदोषयोः||२०|| दोषसङ्ख्या विकाराणामेकदेशः प्रकोपणम्| जरणं प्रति चिन्ता च कायाग्नेर्धुक्षणानि च||२१|| नराणां वातलादीनां प्रकृतिस्थापनानि च| रोगानीके विमानेऽस्मिन् व्याहृतानि महर्षिणा||२२||
🔊 Audio coming soon
সঙ্গ্রহে জরযতীতি জরণো বহ্নিঃ, তং প্রতি চিন্তা ‘অগ্নিষু’ ইত্যাদিনা কৃতা| প্রকৃতিস্থাপনানীতি ভেষজানি||২০-২২||
Adhikarana puShpikA · Śloka 6
ইত্যগ্নিবেশকৃতে তন্ত্রে চরকপ্রতিসংস্কৃতে বিমানস্থানে রোগানীকবিমানং নাম ষষ্ঠোঽধ্যাযঃ||৬||
इत्यग्निवेशकृते तन्त्रे चरकप्रतिसंस्कृते विमानस्थाने रोगानीकविमानं नाम षष्ठोऽध्यायः||६||
🔊 Audio coming soon
ইতি শ্রীচক্রপাণিদত্তবিরচিতাযাং চরকতাত্পর্যটীকাযামাযুর্বেদদীপিকাযাং বিমানস্থানে রোগানীকবিমানং নাম ষষ্ঠোঽধ্যাযঃ||৬||