32. aśmarīnidānam

Adhikarana ashmarInidAnaM samprAptishca (1-2) · Śloka 2

অথাশ্মরীনিদানম্ | বাতপিত্তকফৈস্তিস্রশ্চতুর্থী শুক্রজাঽপরা | প্রাযঃ শ্লেষ্মাশ্রযাঃ সর্বা অশ্মর্যঃ স্যুর্যমোপমাঃ ||১|| বিশোষযেদ্বস্তিগতং সশুক্রং মূত্রং সপিত্তং পবনঃ কফং বা | যদা তদাঽশ্মর্যুপজাযতে তু ক্রমেণ পিত্তেষ্বিব রোচনা গোঃ ||২|| নৈকদোষাশ্রযাঃ সর্বাঃ... | (চ. চি. অ. ২৬) |

মূত্ররোধিত্বসাধর্ম্যাদশ্মরীমাহ– বাতেত্যাদি| শ্লেষ্মাশ্রযা ইতি শ্লেষ্মসমবাযিকারণাঃ, শুক্রজাং বিনা; তত্র শুক্রস্যৈব সমবাযিকারণত্বাত্| তথাচ দৃঢবলঃ– “বিশোষযেদ্বস্তিগতং সশুক্রং” (চ. চি. অ. ২৬) ইত্যাদি, এতচ্চ সামান্যোক্তমপি বিশেষেণ সম্বধ্যতে| যথা– হল্ঙ্যাদিসূত্রে ‘দীর্ঘাত্’ ইতি বিশেষণং ঙ্যাভ্যাং সম্বধ্যতে, ন তু হলা| অত এবাত্র প্রাযোগ্রহণং কৃতবান্| অন্যে তু শুক্রাশ্মর্যামপি কফকারণত্বমিচ্ছন্ত্যেব, বিরোধাভাবাত্| প্রাযঃশব্দশ্চাত্র বিশেষার্থঃ| যমোপমা ইতি অসতি চিকিত্সিতে অবশ্যমেব মারকত্বাত্| বিশোষযেদিত্যাদি পিত্তেষ্বিবেতি বাতশোষিতেষু| নৈকদোষাশ্রয ইতি ত্রিদোষজাঃ, উদ্গতদোষেণ ব্যপদেশঃ||১-২||

Adhikarana ashmarIpUrvarUpam (3) · Śloka 3

... অথাসাং পূর্বলক্ষণম্ | বস্ত্যাধ্মানং তদাসন্নদেশেষু পরিতোঽতিরুক্ ||৩|| মূত্রে বস্তসগন্ধত্বং মূত্রকৃচ্ছ্রং জ্বরোঽরুচিঃ | (বা. নি. অ. ৯) |

পূর্বরূপমাহ– অথেত্যাদি| বস্তসগন্ধত্বং বস্তসমানগন্ধত্বম্||৩||–

Adhikarana ashmarIsAmAnyalakShaNam (4-5) · Śloka 5

সামান্যলিঙ্গং রুঙ্নাভিসেবনীবস্তিমূর্ধসু ||৪|| বিশীর্ণধারং মূত্রং স্যাত্তযা মার্গে নিরোধিতে | তদ্ব্যপাযাত্ সুখং মেহেদচ্ছং গোমেদকোপমম্ ||৫|| তত্সঙ্ক্ষোভাত্ ক্ষতে সাস্রমাযাসাচ্চাতিরুগ্ভবেত্ | (বা. নি. অ. ৯) |

তাসাং সামান্যলক্ষণমাহ– সামান্যেত্যাদি| রুক্ শূলং, বস্তিমূর্ধা নাভেরধোদেশঃ| বিশীর্ণধারং সবিচ্ছেদধারম্| তযা অশ্মর্যা| মার্গো মূত্রবাহিস্রোতঃ| তদ্ব্যপাযাত্ বাযুনা কদাচিদশ্মরীকৃতমার্গরোধব্যপগমাত্| মেহেত্ মূত্রযেত্| অচ্ছমনাবিলম্| গোমেদকোপমমিতি গোমেদকো লোহিতমণিস্তদ্বর্ণম্| তত্সঙ্ক্ষোভাত্ নিরুদ্ধমার্গমূত্রেণ পীডনাদশ্মরীসম্পাতাদ্বা ক্ষতে জাতে মূত্রবহাদৌ, সাস্রং সরক্তং মূত্রং প্রবর্ততে| আযাসাত্ প্রবাহণাদিজনিতক্লমাত্||৪-৫||–

Adhikarana vAtajAshmarIlakShaNam (6-7) · Śloka 7

তত্র বাতাদ্ভৃশং চার্তো দন্তান্ খাদতি বেপতে ||৬|| গৃহ্ণাতি মেহনং নাভিং পীডযত্যনিশং ক্বণন্ | সানিলং মুঞ্চতি শকৃন্মুহুর্মেহতি বিন্দুশঃ ||৭|| শ্যাবারুণাঽশ্মরী চাস্য স্যাচ্চিতা কণ্টকৈরিব | (বা. নি. অ. ৯) |

বাতজামাহ– তত্রেত্যাদি| ক্বণন্ আর্তনাদং কুর্বন্| সানিলং সশব্দং মূত্রপ্রবৃত্ত্যর্থং কৃতাতিকুন্থনাত্| মেহতি বিন্দুশ ইতি বিন্দুং বিন্দুং মূত্রযতি, “বহ্বল্পার্থাচ্ছস্ কারকাদন্যতরস্যাম্” ইতি অল্পার্থে শস্প্রত্যযঃ| শ্যাবেত্যাদি| অশ্মর্যা আকারকথনম্; এতচ্চাকৃষ্টানাং প্রত্যক্ষসংবাদেন শাস্ত্রপ্রামাণ্যখ্যাপনার্থমিত্যাহুঃ, আকৃষ্টাসু দোষোচিতচিকিত্সার্থমিত্যন্যে||৬-৭||–

Adhikarana pittajAshmarIlakShaNam (8) · Śloka 8

পিত্তেন দহ্যতে বস্তিঃ পচ্যমান ইবোষ্মবান্ ||৮|| ভল্লাতকাস্থিসংস্থানা রক্তপীতাঽসিতাঽশ্মরী | (বা. নি. অ. ৯) |

পিত্তজামাহ– পিত্তেনেত্যাদি| পচ্যমানঃ ক্ষারেণেব| ঊষ্মবান্ উষ্ণস্পর্শঃ| অসিতা কৃষ্ণা||৮||–

Adhikarana shleShmajAshmarIlakShaNam (9) · Śloka 9

বস্তির্নিস্তুদ্যত ইব শ্লেষ্মণা শীতলো গুরুঃ ||৯|| অশ্মরী মহতী শ্লক্ষ্ণা মধুবর্ণাঽথবা সিতা | (বা. নি. অ. ৯) |

শ্লেষ্মজামাহ– বস্তিরিত্যাদি| শ্লক্ষ্ণা মসৃণা| মধুবর্ণা ঈষত্ পিঙ্গলশুক্লা||৯||–

Adhikarana pUrvoktAshmarINAM sukhasAdhyalakShaNam (10) · Śloka 10

এতা ভবন্তি বালানাং তেষামেব চ ভূযসা ||১০|| আশ্রযোপচযাল্পত্বাদ্গ্রহণাহরণে সুখাঃ | (বা. নি. অ. ৯) |

এতা ইতি ত্রিদোষজা বালানাং স্যুঃ, তেষাং তন্নিদানাভ্যাসাত্| ভূযসা প্রাযেণ, তেন মহতামপি ত্রিদোষজা ভবন্তি| তেষামেব বালানাং গ্রহণাহরণে সুখা ইতি সম্বন্ধঃ| আশ্রযোপচযাল্পত্বাদিতি আশ্রযো বস্তিঃ, উপচযঃ স্থৌল্যং, তযোরল্পত্বং; তচ্চ তদ্দেহাল্পত্বাত্| আহরণং পাটনাদিপূর্বকমাকর্ষণং, গ্রহণং তদর্থমেবাঙ্গুলিভ্যাং ধারণম্| উক্তং হি সুশ্রুতে– “প্রাযেণৈতাস্তিস্রোঽশ্মর্যো দিবাস্বপ্নসমশনাধ্যশনশীতস্নিগ্ধমধুরাহারপ্রিযত্বাদ্বিশেষেণ বালানাং ভবন্তি, তেষামেবাল্পবস্তিকাযত্বাদল্পমাংসোপচযাচ্চ বস্তেঃ সুখগ্রহণাহরণা ভবন্তি|” (সু. নি. অ. ৩) ইতি||১০||–

Adhikarana shukrAshmaryA nidAnasamprAptipUrvakaM lakShaNam (11-13) · Śloka 13

শুক্রাশ্মরী তু মহতাং জাযতে শুক্রধারণাত্ ||১১|| স্থানাচ্চ্যুতমমুক্তং হি মুষ্কযোরন্তরেঽনিলঃ | শোষযত্যুপসঙ্গৃহ্য শুক্রং তচ্ছুক্রমশ্মরী ||১২|| বস্তিরুঙ্মূত্রকৃচ্ছ্রত্বমুষ্কশ্বযথুকারিণী | তস্যামুত্পন্নমাত্রাযাং শুক্রমেতি বিলীযতে ||১৩|| পীডিতে ত্ববকাশেঽস্মিন্... | (বা. নি. অ. ৯) |

শুক্রাশ্মরীমাহ– শুক্রেত্যাদি| তুশব্দোঽবধারণে; তেন মহতামেব নতু বালানাং, তেষাং বক্ষ্যমাণসম্প্রাপ্তেরভাবাত্; ন তু শুক্রাভাবাত্, অন্যথা ষড্ধাতুকত্বং স্যাত্| শুক্রধারণাদুপস্থিতশুক্রবেগস্য মৈথুনাকরণাত্| মুষ্কযোরন্তরে ‘মেঢ্রেণ সহ’ ইতি শেষঃ| সুশ্রুতে হি ‘মেঢ্রবৃষণযোরন্তরে’ (সু. নি. অ. ৩) ইত্যেবোক্তম্| মেঢ্রবৃষণমধ্যগতবস্তিমুখ ইত্যর্থঃ, তত্রৈব শুক্রবহস্রোতসো বস্তিমুখেন সহ সম্বন্ধাত্| তথাভূতং শুক্রমেবাশ্মরীতি| বস্তিরুক্ বস্তিশূলং, মুষ্কশ্বযথুকারিণী বৃষণযোঃ শোথকারিণী| তস্যাং শুক্রাশ্মর্যাম্| এতি বর্ততে| তুশব্দোঽবধারণে| অবকাশেঽস্মিন্নিতি মেঢ্রবৃষণযোরন্তরে| অস্মিন্নেব পীডিতে সতি বিলীযতে প্রবিলযমাপদ্যত ইত্যর্থঃ| অত এব সুশ্রুতঃ– “পীডিতমাত্রে চ তস্মিন্নেবাবকাশে প্রবিলযমাপদ্যতে|” (সু. নি. অ. ৩) ইতি||১১-১৩||–

Adhikarana sharkarAlakShaNam (14) · Śloka 14

...অশ্মর্যেব চ শর্করা |১৪| (বা. নি. অ. ৯) |

সৈবাবস্থাভেদাদশ্মরী শর্করা, পঞ্চমী ন ভবতীত্যাহ– অশ্মর্যেব চেতি| চকারাত্ সিকতাঽপি ভবতীতি মন্তব্যম্| অত এব ‘শর্করা সিকতান্বিতা’ ইতি বক্ষ্যতি| শর্করাসিকতযোশ্চ মহত্ত্বাল্পত্বাভ্যাং ভেদঃ|১৪|–

Adhikarana ashmaryupadravAH (14-16) · Śloka 16

অণুশো বাযুনা ভিন্না সা তস্মিন্ননুলোমগে ||১৪|| নিরেতি সহ মূত্রেণ প্রতিলোমে নিরুধ্যতে | (বা. নি. অ. ৯) | মূত্রস্রোতঃপ্রবৃত্তা সা সক্তা কুর্যাদুপদ্রবান্ ||১৫|| দৌর্বল্যং সদনং কার্শ্যং কুক্ষিশূলমথারুচিম্ | পাণ্ডুত্বমুষ্ণবাতং চ তৃষ্ণাং হৃত্পীডনং বমিম্ ||১৬|| (সু. নি. অ. ৩) |

কথমশ্মরী শর্করা ভবতীত্যাহ– অণুশ ইত্যাদি| অণুশোঽল্পশঃ| অত্রার্থে সুশ্রুতঃ– ‘পবনেঽনুগুণে সা তু নিরেত্যল্পা বিশেষতঃ| সা ভিন্নমূর্তির্বাতেন শর্করেত্যভিধীযতে||’ (সু. নি. অ. ৬) ইতি| মূত্রস্রোতঃপ্রবৃত্তা সা সক্তেতি মূত্রমার্গগা সতী সংলগ্নেত্যর্থঃ||১৪-১৬||

Adhikarana ashmaryA asAdhyalakShaNam (17) · Śloka 17

প্রশূননাভিবৃষণং বদ্ধমূত্রং রুজাতুরম্ | অশ্মরী ক্ষপযত্যাশু সিকতা শর্করান্বিতা ||১৭|| (সু. সূ. অ. ৩৩) |

অসাধ্যলক্ষণমাহ– প্রশূনেত্যাদি| রুজাতুরং শূলপীডিতমিত্যর্থঃ||১৭||

Adhikarana puShpikA · Śloka 32

ইতি শ্রীমাধবকরবিরচিতে মাধবনিদানেঽশ্মরীনিদানং সমাপ্তম্ ||৩২||

ইতি শ্রীবিজযরক্ষিতকৃতাযাং মধুকোশব্যাখ্যাযামশ্মরীনিদানং সমাপ্তম্||৩২||