৬১. অসৃগ্দরনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্ত্রীপুংসাং সাধারণান্ বিকারানভিধায পুম্প্রতিনিযতস্যোপদংশাদেরুক্তত্বাত্ স্ত্রীনিযতরোগাভিধানম্| তত্র চ যোনিব্যাপত্তিবিশেষেঽপ্যার্তবপ্রবৃত্তিসদ্ভাবাত্ প্রথমং দুষ্টার্তবপ্রবৃত্তিস্বরূপং প্রদরমাহ– বিরুদ্ধেত্যাদি| বিরুদ্ধমদ্যং দুষ্টমদ্যম্; অথবা বিরুদ্ধং সংযোগাদিবিরুদ্ধং, মদ্যং চ স্বরূপতঃ| অজীর্ণাদপক্বভোজনাত্| অতিকর্ষণাত্ লঙ্ঘনাদ্যতিযোগেন ক্ষীণধাতুত্বাত্| তং শ্লেষ্মপিত্তানিলসন্নিপাতৈরিত্যত্র শ্লেষ্মণোঽগ্রেঽভিধানং শ্লেষ্মজেঽপি বেদনাসূচনার্থম্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

অথ প্রদরনিদানারম্ভঃ| তস্য নিদানমাহ– বিরুদ্ধেত্যাদি| বিরুদ্ধমদ্যং ব্যাপন্নং মদ্যং, কিংবা বিরুদ্ধং ক্ষীরমত্স্যাদি মদ্যং চ| তস্য সঙ্খ্যাসম্প্রাপ্তিমাহ– তমিত্যাদি| বৃদ্ধাঃ বৃদ্ধবৈদ্যাঃ||১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্য সামান্যরূপমাহ– অসৃগ্দরমিত্যাদি| সবেদনং সশূলম্| অসৃগ্ দীর্যতে চ্যবতে যস্মিন্নিত্যসৃগ্দরং; তন্ত্রান্তরমত্র– “তদেবাতিপ্রসঙ্গেন প্রবৃত্তমনৃতাবপি| অসৃগ্দরং বিজানীযাত্ পুরস্তাদুক্তলক্ষণম্||” (সু. শা. অ. ২) ইতি| তদেবেতি আর্তবম্|২|–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

আর্তবাতিপ্রবৃত্তৌ উপদ্রবানাহ– তস্যাতিবৃত্তৌ দৌর্বল্যমিত্যাদি| রোগাশ্চ বাতজা ইতি আক্ষেপককম্পাদযঃ||২||

আতঙ্কদর্পণ ব্যাখ্যা (বাচস্পতি বৈদ্য কৃত)

উপদ্রবানাহ– তস্যেত্যাদি| অতিপ্রবৃত্তৌ অতিপ্রবৃদ্ধৌ দৌর্বল্যাদযঃ| বাতজা ইতি আক্ষেপাপতানকম্পাদযঃ||২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

শ্লৈষ্মিকাদিভেদেন বিশেষলক্ষণান্যাহ– আমমিত্যাদি| আমম্ আমরসানুবিদ্ধম্| সপিচ্ছাপ্রতিমমিতি পিচ্ছা শাল্মল্যাদিনির্যাসঃ, তত্সদৃশং পিচ্ছিলমিত্যর্থঃ; সশব্দ ঈষদর্থে| পুলাকতোযপ্রতিমং প্রক্ষালিতপললতোযসদৃশম্; অন্যে পুলাকং গবেধুকমাহুঃ| পিত্তার্তিযুক্তং দাহচিমিচিমাদিযুক্তম্| ভৃশবেগি বহুবেগি| বাতার্তি তোদাদিলক্ষণম্| পিশিতোদকাভং মাংসপ্রক্ষালনজলসদৃশম্| সক্ষৌদ্রসর্পির্হরিতালবর্ণমিতি নানাবর্ণত্বং ত্রিদোষকোপাদেব| ক্ষৌদ্রবর্ণং মনাক্কপিলং, সর্পির্বর্ণং বিলীনঘৃতবত্ কিঞ্চিদরুণং চ| মজ্জপ্রকাশং মজ্জা অস্থিস্নেহঃ, তত্সমম্| কুণপং শবগন্ধি| তচ্চাপ্যসাধ্যমিতি চিকিত্সানিবৃত্ত্যর্থম্||৩-৫||

আতঙ্কদর্পণ ব্যাখ্যা (বাচস্পতি বৈদ্য কৃত)

তত্র শ্লেষ্মজমাহ– আমমিত্যাদি| আমম্ আমরসসংযুক্তং, সপিচ্ছাপ্রতিমং, সদ্যঃস্রুতশাল্যাদিমণ্ডতুল্যং, পিচ্ছিলমিত্যর্থঃ| পুলাকতোযপ্রতিমং গবেধুকান্নবারিবত্, অন্যে পুলাকং তুচ্ছধান্যমাহুঃ| পিত্তজমাহ– সেত্যাদি| পিত্তার্তিযুক্তং সন্তাপাদিযুক্তং, ভৃশবেগি বহুধারং ভূরিপ্রবৃত্তি| বাতিকমাহ– রূক্ষেত্যাদি| পিশিতোদকাভং মাংসপ্রক্ষালনোদকবর্ণম্| ত্রিদোষমাহ– সেত্যাদি| ক্ষৌদ্রবর্ণং মনাক্কপিলং সর্পির্বর্ণং বিলীনঘৃতবত্, হরিতালবর্ণং পীতং, মজ্জপ্রকাশং মজ্জাঽস্থিস্নেহঃ তত্সমং, কুণপং শবগন্ধি, অসাধ্যমিতি চিকিত্সানিবৃত্ত্যর্থম্||৩-৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

বিশুদ্ধার্তবলক্ষণমাহ– মাসাদিত্যাদি| নিষ্পিচ্ছদাহার্তীতি অপিচ্ছিলমদাহমশূলাদি বেদনম্, এতেন বিকৃতবাতাদিলিঙ্গরহিতমিত্যর্থঃ| পঞ্চরাত্রানুবন্ধীতি “পঞ্চরাত্রং প্রভূতপ্রবৃত্ত্যাঽনুবধ্নাতীত্যর্থঃ|” অল্পপ্রবৃত্ত্যা পঞ্চরাত্রাত্ পরতোঽপ্যনুবধ্নাতি| তদুক্তং হারীতে– ‘ ষোডশদিবসান্যৃতুকালঃ’| ইতি| বিদেহেঽপ্যুক্তম্– “স্ত্রীণামৃতুর্ভবতি ষোডশ বাসরাণি|” ইতি| শশাসৃগিত্যাদিনা বর্ণদ্বযং বাতাদিপ্রকৃতিভেদাত্| যচ্চাপ্সু ন বিরজ্যতে ইতি যেনার্তবেন রঞ্জিতং বস্ত্রমপ্সু প্রক্ষালিতং সল্লোহিতং ন ভবতি তদ্বিশুদ্ধম্| তথাচ হিরণ্যাক্ষঃ– “সুরেন্দ্রগোপসঙ্কাশং স্নিগ্ধং চ মধুগন্ধি চ| অপিচ্ছিলমশীতং চ যদ্বাসো ন বিরঞ্জযেত্||” ইতি||৬-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

শুদ্ধার্তবলক্ষণমাহ– মাসেত্যাদি| অপিচ্ছদাহার্তীতি অপিচ্ছিলম্, অদাহম্, অশূলাদিবেদনম্, এতেন বিকৃতবাতাদিলক্ষণরহিতমিত্যর্থঃ| পঞ্চরাত্রানুবন্ধীতি পঞ্চরাত্রং প্রভূতপ্রবৃত্ত্যাঽনুবধ্নাতি যদিত্যর্থঃ| অল্পপ্রবৃত্যা পঞ্চরাত্রাত্পরতোঽপ্যনুবধ্নাতি| যদুক্তং হারীতে– “ষোডশদিবসান্যৃতুকালঃ” ইতি| বিদেহোঽপ্যুক্তবান্– “স্ত্রীণামৃতুর্ভবতি ষোডশ বাসরাণি” ইতি| পুনশ্চ শুদ্ধলক্ষণমাহ– শশেত্যাদি|| বর্ণদ্বযাভিধানং বাতাদিপ্রকৃতিভেদেন বর্ণভেদাত্| যচ্চাপ্সু ন বিরজ্যত ইতি যদার্তবং কর্পটগতং সত্ অপ্সু জলেষু সংযুজ্যমানেষু ন বিবর্ণং ভবতি| অযমর্থঃ– যত্ ধৌতং সত্ বাসো ন বিরঞ্জযতি| যদুক্তং হিরণ্যাক্ষে– “ইন্দ্রগোপকসঙ্কাশং স্নিগ্ধং চ মধুগন্ধি চ| অপিচ্ছিলমশীতং চ যদ্বাসো ন বিরঞ্জযেত্||” ইতি||৬-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযামসৃগ্দরনিদানং সমাপ্তম্||৬১||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং প্রদরনিদানম্||৬১||