55. kṣudrarōganidānam

Adhikarana ajagallikAlakShaNam (1) · Śloka 1

অথ ক্ষুদ্ররোগনিদানম্ | স্নিগ্ধাঃ সবর্ণা গ্রন্থিতা নীরুজো মুদ্গসন্নিভাঃ | কফবাতোত্থিতা জ্ঞেযা বালানামজগল্লিকাঃ ||১|| (সু. নি. অ. ১৩) |

বিসর্পাদীনামক্ষুদ্রহেতুলক্ষণচিকিত্সিতানামভিধানেন ক্ষুদ্রহেতুলক্ষণচিকিত্সিতানাং ক্ষুদ্ররোগাণাং পারিশেষ্যাত্ ক্ষুদ্ররোগনিদানম্| ননু, যদি ক্ষুদ্রত্বমেষাং হেতুলক্ষণচিকিত্সাল্পত্বেন তর্হি অগ্নিরোহিণীবল্মীকাদীনাং ত্রিদোষজত্বেন হেত্বাদিবাহুল্যাত্ কথং ক্ষুদ্রত্বং? নৈবং, বাহুল্যেন তাবত্, ছত্রিণো গচ্ছন্তীতিবত্; কিংবা অবান্তরভেদবিরহঃ ক্ষুদ্রত্বং, যেনাত্র বক্তব্যানামজগল্লিকাদীনাং ন দোষদূষ্যাদিকৃতভূরিসঙ্খ্যাভেদেন ব্রণজ্বরাদিবান্নির্দেশঃ, কিন্তু প্রত্যেকং স্তোকসঙ্খ্যযাঽভিধানং তেষাম্| অন্যস্ত্বাহ– ক্ষুদ্রশব্দোঽল্পে রৌদ্রে চ বর্ততে, তেন যথাযোগ্যং সর্বত্র ব্যবস্থা দৃশ্যতে; রৌদ্রে ক্ষুদ্রশব্দো যথা– “ক্ষুদ্রা মৃগা যত্র শান্তাশ্চেরুরন্যৈঃ সমং মৃগৈঃ|” ইতি| ক্ষুদ্রাণাং বালানাং রোগাঃ ক্ষুদ্ররোগা ইতি কেচিত্| এবমপ্যজগল্লিকাহিপূতনাদীনামেব পরিগ্রহো ন ত্বন্যেষাম্| সঙ্ক্ষেপেণ চতুশ্চত্বারিংশদ্বিকারানত্র বক্তব্যান্ ক্রমেণ দর্শযতি– স্নিগ্ধেত্যাদি| ভোজে তু মূষিকাকর্ণমুষ্ককোশফলার্শঃপ্রভৃতযোঽধিকবিকারাঃ পঠ্যন্তে, তে চ সুশ্রুতে বিকারস্যানন্ত্যাদনুমতা এব| বালানামিতি প্রাযোভাবিত্বাদুক্তং, তেনাবালানামপি দৃশ্যমানাঃ সঙ্গচ্ছন্তে||১||

Adhikarana yavaprakhyAlakShaNam (2) · Śloka 2

যবাকারা সুকঠিনা গ্রথিতা মাংসসংশ্রিতা | পিডকা কফবাতাভ্যাং যবপ্রখ্যেতি সোচ্যতে ||২|| (সু. নি. অ. ১৩) |

যবপ্রখ্যামাহ– যবাকারেত্যাদি| যবাকারেতি যববন্মধ্যে স্থূলা||২||

Adhikarana antrAlajIlakShaNam (3) · Śloka 3

ঘনামবক্ত্রাং পিডকামুন্নতাং পরিমণ্ডলাম্ | অন্ত্রালজীমল্পপূযাং তাং বিদ্যাত্ কফবাতজাম্ ||৩|| (সু. নি. অ. ১৩) |

অন্ত্রালজীমাহ– ঘনামিত্যাদি| অন্ত্রালজী স্নাযুগতা ভোজবচনাদবগন্তব্যা| যদুক্তম্– “শ্লেষ্মানিলৌ শ্রিতৌ স্নাযুং পিডকাং পরিমণ্ডলাম্| দুষ্টৌ জনযতোঽবক্ত্রামল্পপূযামকণ্ডুরাম্|| আমোদুম্বরসঙ্কাশাং বিদ্যাদন্ত্রালজীং তু তাম্||” ইতি||৩||

Adhikarana vivRutAlakShaNam (4) · Śloka 4

বিবৃতাস্যাং মহাদাহাং পক্বোদুম্বরসন্নিভাম্ | বিবৃতামিতি তাং বিদ্যাত্ পিত্তোত্থাং পরিমণ্ডলাম্ ||৪|| (সু. নি. অ. ১৩) |

বিবৃতামাহ– বিবৃতাস্যামিত্যাদি| পিত্তেনাধিকপাকাদ্বিবৃতমুখতাযাং বিবৃতাসঞ্জ্ঞা||৪||

Adhikarana kacchapikAlakShaNam (5) · Śloka 5

গ্রথিতাঃ পঞ্চ বা ষড্বা দারুণাঃ কচ্ছপোপমাঃ | কফানিলাভ্যাং পিডকা জ্ঞেযাঃ কচ্ছপিকা বুধৈঃ ||৫|| (সু. নি. অ. ১৩) |

কচ্ছপিকালক্ষণমাহ– গ্রথিতা ইত্যাদি| দারুণাঃ কঠিনাঃ| মধ্যোন্নতত্বেন পর্যন্তাল্পত্বেন চ কচ্ছপিকাসঞ্জ্ঞা||৫||

Adhikarana valmIkalakShaNam (6-7) · Śloka 7

গ্রীবাংসকক্ষাকরপাদদেশে সন্ধৌ গলে বা ত্রিভিরেব দোষৈঃ | গ্রন্থিঃ স বল্মীকবদক্রিযাণাং জাতঃ ক্রমেণৈব গতঃ প্রবৃদ্ধিম্ ||৬|| মুখৈরনেকৈঃ স্রুতিতোদবদ্ভির্বিসর্পবত্ সর্পতি চোন্নতাগ্রৈঃ | বল্মীকমাহুর্ভিষজো বিকারং নিষ্প্রত্যনীকং চিরজং বিশেষাত্ ||৭||

বল্মীকলক্ষণমাহ– গ্রীবাংসেত্যাদি| বল্মীকবদিত্যনেন প্রচুরশিখরত্বেন সমুচ্ছ্রিতত্বং দূরাবগাঢমূলত্বং চ খ্যাপ্যতে| অত এব চিকিত্সাযামবগাঢমূলশোধনার্থমগ্নিক্ষারাভ্যাং চিকিত্সেদিত্যুক্তম্||৬-৭||

Adhikarana indraviddhAlakShaNam (8) · Śloka 8

পদ্মকর্ণিকবন্মধ্যে পিডকাভিঃ সমাচিতাম্ | ইন্দ্রবিদ্ধাং তু তাং বিদ্যাদ্বাতপিত্তোত্থিতাং ভিষক্ ||৮|| (সু. নি. অ. ১৩) |

ইন্দ্রবিদ্ধামাহ– পদ্মকর্ণিকবদিত্যাদি| পদ্মকর্ণিকবন্মধ্যে ইতি পদ্মবরাটবত্||৮||

Adhikarana gardabhikAlakShaNam (9) · Śloka 9

মণ্ডলং বৃত্তমুত্সন্নং সরক্তং পিডকাচিতম্ | রুজাকরীং গর্দভিকাং তাং বিদ্যাদ্বাতপিত্তজাম্ ||৯||

গর্দভিকামাহ– মণ্ডলমিত্যাদি| গর্দভিকা যদ্যপি সমানতন্ত্রে ন পঠ্যতে, তথাঽপি সর্বত্র সুশ্রুতেঽভিধীযতে; অবিগীতপাঠেন ব্যবস্থিতৈব||৯||

Adhikarana pAShANagardabhalakShaNam (10) · Śloka 10

বাতশ্লেষ্মসমুদ্ভূতঃ শ্বযথুর্হনুসন্ধিজঃ | স্থিরো মন্দরুজঃ স্নিগ্ধো জ্ঞেযঃ পাষাণগর্দভঃ ||১০||

পাষাণগর্দভলক্ষণমাহট্ঠ বাতেত্যাদি| স্থিরঃ কঠিনঃ, পাষাণবত্ কাঠিন্যাত্ পাষাণগর্দভঃ| পাষাণগর্দভঃ লোকে ‘গলবট্ট’ ইতি খ্যাতঃ||১০||

Adhikarana panasikAlakShaNam (11) · Śloka 11

কর্ণস্যাভ্যন্তরে জাতাং পিডকামুগ্রবেদনাম্ | স্থিরাং পনসিকাং তাং তু বিদ্যাদ্বাতকফোত্থিতাম্ ||১১||

পনসিকামাহ– কর্ণস্যেত্যাদি| এষা ভোজে ‘সমন্ততঃ’ ইতি বচনাত্ কর্ণস্য বহিরপি ভবতীতি কেচিদ্ব্যাচক্ষতে| যদুক্তম্– “কফবাতৌ প্রকুপিতৌ মাংসমাশ্রিত্য কর্ণযোঃ| সমন্ততঃ পরিস্তব্ধাং কুরুতঃ পিডকাং স্থিরাম্|| বিষমাং দাহসংযুক্তাং বিদ্যাত্ পনসিকাং তু তাম্|” ইতি| তত্তু ন সম্যক্, সমন্তত ইত্যস্য কর্ণাভ্যন্তর এবোপপন্নত্বাত্| দৃশ্যতে বাহ্যরন্ধ্রে শালূকাকারেযমিতি কেচিত্| অস্যাং বাতকফজাযাং ভোজে দাহপাঠো বিকৃতিবিষমসমবাযাদধিষ্ঠানভূতরক্তপ্রভাবাদ্বাঽবগন্তব্যঃ||১১||

Adhikarana jAlagardabhalakShaNam (12) · Śloka 12

বিসর্পবত্ সর্পতি যঃ শোথস্তনুরপাকবান্ | দাহজ্বরকরঃ পিত্তাত্ স জ্ঞেযো জালগর্দভঃ ||১২|| (সু. নি. অ. ১৩) |

জালগর্দভলক্ষণমাহ– বিসর্পবদিত্যাদি| অপাকবানিতি ঈষত্পাকবান্, পিত্তকৃতত্বেন সর্বথা পাকাভাবস্যাযুক্তত্বাদিতি চক্রঃ; কিন্তু পাকরহিত এবাযমুপলভ্যতে [ পিত্তাদিত্যুদ্ভূতপিত্তাত্, তেন ভোজোক্তং পিত্তোল্বণদোষত্রযজন্যত্বমস্যাবিরুদ্ধং ভবতি| স যদাহ– “পিত্তোত্কটাস্ত্রযো দোষা জনযন্তি ত্বগাশ্রিতাঃ| শ্যাবং রক্তং তনুং শোথমপাকং বহুবেদনম্|| বিসর্পিণং সদাহং চ তৃষ্ণাজ্বরসমন্বিতম্| বিসর্পমাহুস্তং ব্যাধিমপরে জালগর্দভম্||” ইতি| জতুকর্ণস্ত্বাহ– “ পিত্তাধিকস্তত্র তীব্রদাহো রক্তপাকো বিসর্পজ্বরকরো জালগর্দভঃ|” ইতি| অযমগ্নিবাত ইতি খ্যাতো বিকারঃ||১২||

Adhikarana irivellikA-kakShAlakShaNam (13-14) · Śloka 14

পিডকামুত্তমাঙ্গস্থাং বৃত্তামুগ্ররুজাজ্বরাম্ | সর্বাত্মিকাং সর্বলিঙ্গাং জানীযাদিরিবেল্লিকাম্ ||১৩|| বাহুপার্শ্বাংসকক্ষেষু কৃষ্ণস্ফোটাং সবেদনাম্ | পিত্তপ্রকোপসম্ভূতাং কক্ষামিত্যভিনির্দিশেত্ ||১৪|| (সু. নি. অ. ১৩) |

ইরিবেল্লিকালক্ষণমাহ– পিডকামিত্যাদি| সর্বাত্মিকাং সর্বলিঙ্গামিতি সর্বাত্মিকাং সর্বদোষজাম্| সর্বাত্মিকামিত্যনেনৈব সর্বলিঙ্গত্বে সিদ্ধে পুনঃ সর্বলিঙ্গামিতি বচনং বিকৃতিবিষমসমবাযারব্ধলিঙ্গব্যতিরেকেণ প্রত্যেকদোষলিঙ্গযুক্ততাং খ্যাপযতি||১৩-১৪||

Adhikarana gandhamAlAlakShaNam (15) · Śloka 15

একামেতাদৃশীং দৃষ্ট্বা পিডকাং স্ফোটসন্নিভাম্ | ত্বগ্গতাং পিত্তকোপেন গন্ধমালাং প্রচক্ষতে ||১৫|| (সু. নি. অ. ১৩) |

গন্ধমালামাহ– একামিত্যাদি| একামেতাদৃশীমিতি কক্ষোক্তৈককৃষ্ণস্ফোটসদৃশীম্||১৫||

Adhikarana agnirohiNIlakShaNam (16-17) · Śloka 17

কক্ষভাগেষু যে স্ফোটা জাযন্তে মাংসদারণাঃ | অন্তর্দাহজ্বরকরা দীপ্তপাবকসন্নিভাঃ ||১৬|| সপ্তাহাদ্বা দশাহাদ্বা পক্ষাদ্বা হন্তি মানবম্ | তামগ্নিরোহিণীং বিদ্যাদসাধ্যাং সর্বদোষজাম্ ||১৭|| (সু. নি. অ. ১৩) |

অগ্নিরোহিণীলক্ষণমাহ– কক্ষেত্যাদি| সপ্তাহাদ্বা দশাহাদ্বেত্যভিধানমসাধ্যত্বখ্যাপকমনুপক্রমাদ্বোদ্ধব্যম্| উপক্রমাত্ পুনরিযং সাধ্যৈব, অত এবাস্যাশ্চিকিত্সাভিধানং; চরকেণাপ্যগ্নিরোহিণীং প্রত্যভিহিতম্– “সন্তি হ্যেবংবিধা রোগাঃ সাধ্যা দারুণসম্মতাঃ| যে হন্যুরনুপক্রান্তা মিথ্যারম্ভেণ বা পুনঃ||” (চ. সূ. অ. ১৮) ইতি| তন্ত্রান্তরমপি– “পিত্তরক্তোত্কটা দোষাঃ প্রদীপ্তাঙ্গারসন্নিভান্| কক্ষভাগেষু কুর্বন্তি তীব্রদাহরুজাজ্বরান্|| মাংসাবদারণান্ স্ফোটান্ যে হন্যুরনুপক্রমাত্| পক্ষাদ্দশাহাদর্বাগ্বা সা জ্ঞেযা বহ্নিরোহিণী||” ইতি| বাতপিত্তকফাধিক্যাদ্যথাক্রমং সপ্তাহাদিবিকল্পঃ||১৬-১৭||

Adhikarana cippa-kunakhalakShaNam (18-19) · Śloka 19

নখমাংসমধিষ্ঠায বাযুঃ পিত্তঃ চ দেহিনাম্ | কুর্বতে দাহপাকৌ চ তং ব্যাধিং চিপ্পমাদিশেত্ ||১৮|| তদেবাল্পতরৈর্দোষৈঃ পরুষং কুনখং বদেত্ ||১৯|| (সু. নি. অ. ১৩) |

চিপ্পমাহ– নখেত্যাদি| তং ব্যাধিং চিপ্পমিতি চিপ্পমঙ্গুলীবেষ্টকমিতি খ্যাতম্| চরকে ত্বক্ষতনামাযং বিকারঃ| যদুক্তম্– “রোগোঽক্ষতশ্চর্মনখান্তরে স্যান্মাংসাস্রদোষী ভৃশদাহপাকঃ|” (চ. চি. অ. ১২) ইতি||১৮-১৯||

Adhikarana anushayIlakShaNam (20) · Śloka 20

গম্ভীরামল্পসংরম্ভাং সবর্ণামুপরিস্থিতাম্ | পাদস্যানুশযীং তাং তু বিদ্যাদন্তঃপ্রপাকিনীম্ ||২০|| (সু. নি. অ. ১৩) |

অনুশযীলক্ষণমাহ– গম্ভীরামিত্যাদি| গম্ভীরামিত্যন্তঃপাকেন| অল্পসংরম্ভামিত্যল্পশোথাম্||২০||

Adhikarana vidArikAlakShaNam (21) · Śloka 21

বিদারীকন্দবদ্বৃত্তা কক্ষাবঙ্ক্ষণসন্ধিষু | বিদারিকা ভবেদ্রক্তা সর্বজা সর্বলক্ষণা ||২১|| (সু. নি. অ. ১৩) |

বিদারীলক্ষণমাহ– বিদারীত্যাদি| ‘বিদারিকা ভবেদ্রক্তা সর্বজা সর্বলক্ষণা’ ইত্যত্র কেচিদসর্বজা, অসর্বলক্ষণেতি উভযত্রাপি নঞঃ প্রযোগমিচ্ছন্তি; তেনাসর্বজা ইতি সর্বদোষৈঃ সন্নিপতিতৈর্ন ভবতি, অসর্বলক্ষণেতি সন্নিপাতলক্ষণরহিতেত্যর্থঃ| তেন প্রত্যেকদোষদ্বন্দ্বজত্বেন ষড্বিধা সন্নিপাতমাত্রেণ ন ভবতীতি বাক্যার্থঃ| কিন্ত্বযং পক্ষো যদ্যভিমতঃ স্যাদাচার্যস্য, তদা ব্যক্ত্যর্থং ‘ষড্বিধা দ্ব্যেকদোষজা’ ইতি পদং কৃতং স্যাত্; কিঞ্চ বহুপ্রপঞ্চত্বেন ক্ষুদ্রত্বাসঙ্গতিশ্চ| অপরে ‘ সর্বজা সর্বলক্ষণা’ ইতি পঠন্তি; তদপি ন সঙ্গতং, সর্বৈর্দোষৈর্ন ভবতি অথ সর্বদোষলক্ষণা ভবতি হন্ত তর্হি লিঙ্গিনমন্তরেণ লিঙ্গপ্রাদুর্ভাবপ্রসঙ্গঃ| অন্যে তূত্তরপদ এব নঞঃ প্রযোগাত্ ‘সর্বজাঽসর্বলক্ষণা’ ইতি বদন্তি; তত্র যদি সর্বেষাং লক্ষণানি সর্বলক্ষণানি তান্যবিদ্যমানানি যস্যামিতি, তদা কথং লিঙ্গমন্তরেণ লিঙ্গিনঃ পরোক্ষস্য পরিচ্ছেদোদযঃ| অথ সর্বাণি চ তানি লক্ষণানি অবিদ্যমানানি যস্যামিতি, সন্নিপাতজত্বেঽপ্যসম্পূর্ণলক্ষণেত্যর্থঃ| এতদপি ন সঙ্গতং, যদ্যযং পক্ষোঽভীষ্টঃ স্যাত্তদাঽসর্বলক্ষণেতি ন বক্তব্যমত্র স্যাত্, সর্বত্র ন্যাযস্যাস্য সমানত্বাত্; হেত্বনুরূপকোপবলেন হি সর্বত্র সর্বার্ধাল্পলিঙ্গসঙ্গতিঃ; অসম্পূর্ণলক্ষণত্বেন দোষাণাং হীনবলত্বং সমবৃদ্ধানামনারম্ভকত্বং বা শক্যমেবাস্মিন্ পক্ষে বক্তুং, কিন্তু তন্নাদ্রিযন্তে; ততশ্চোভযত্রাপি নঞঃ প্রযোগং বিনা ‘সর্বজা সর্বলক্ষণা’ ইতি পাঠো যুক্তঃ| সর্বজেত্যভিধাযাপি সর্বলক্ষণেতি বচনমিরিবেল্লিকাযামিব প্রকৃতিসমসমবাযজন্যবাতাদিলক্ষণদর্শনার্থং, তেন বিকৃতিবিষমসমবাযজন্যাসাধ্যত্বাদিলক্ষণানি ন ভবন্তি| অস্মিন্নপি পাঠে সর্বজা সর্বৈরেকাদিপ্রকারৈর্বাতাদিভির্জন্যতে, এবং সর্বলক্ষণেতি বক্তুং পার্যতে, কিন্তু ক্ষুদ্ররোগত্বাদ্দোষভেদেন গণনা ন যুক্তা| চরকে ত্বিযং কফমারুতজা পঠ্যতে| যদুক্তম্– “জ্বরান্বিতা বঙ্ক্ষণকক্ষসন্ধৌ বর্তির্নিরর্তিঃ কঠিনা মতা যা| বিদারিকা সা কফমারুতাভ্যাম্|” (চ. চি. অ. ১২) ইতি| তেনাত্রাপ্যল্পপিত্তযুক্তকফবাতজত্বেন সর্বজত্বং জ্ঞেযম্| যথা– জ্বরযোগেনাল্পপিত্তত্বম্| যদুক্তম্– “ঊষ্মা পিত্তাদৃতে নাস্তি জ্বরো নাস্ত্যূষ্মণা বিনা|” (বা. চি. অ. ১) ইতি, “বিদারীমিতি তাং বিদ্যাত্ সর্বজাং সর্বলক্ষণাম্|” ইতি পাঠান্তরে ন কশ্চিদ্ব্যাখ্যানপ্রপঞ্চঃ||২১||

Adhikarana sharkarArbudalakShaNam (22-24) · Śloka 24

প্রাপ্য মাংসসিরাস্নাযূঃ শ্লেষ্মা মেদস্তথাঽনিলঃ | গ্রন্থিং করোত্যসৌ ভিন্নো মধুসর্পির্বসানিভম্ ||২২|| স্রবত্যাস্রাবমনিলস্তত্র বৃদ্ধিং গতঃ পুনঃ | মাংসং সংশোষ্য গ্রথিতাং শর্করাং জনযেত্ততঃ ||২৩|| দুর্গন্ধি ক্লিন্নমত্যর্থং নানাবর্ণং ততঃ সিরাঃ | স্রবন্তি রক্তং সহসা তং বিদ্যাচ্ছর্করার্বুদম্ ||২৪|| (সু. নি. অ. ১৩) |

শর্করামাহ– প্রাপ্যেত্যাদি| ইযমেব শর্করার্বুদস্য হেতুঃ| অস্যাং কফানিলৌ দোষৌ, মাংসসিরাস্নাযুমেদাংসি দূষ্যাণি| অনিলস্তত্র বৃদ্ধিং গত ইতি পূর্বমেব তাবদ্বৃদ্ধোঽনিলো ধাতুক্ষযেণ বৃদ্ধিমতিশযেন গতো মাংসং বিশোষ্য কাঠিন্যাত্ শর্করাতুল্যাং শর্করাং জনযতি অতঃ শর্করাযাস্তুল্যং শর্করার্বুদং ভবতি| দুর্গন্ধি ক্লিন্নমিত্যাদিনা শর্করোত্পন্নং শর্করার্বুদলক্ষণং, শর্করার্বুদং চ শর্করাবস্থৈবেত্যেক এবাযং বিকারঃ; তেন ন সঙ্খ্যাতিরেকঃ| নানাবর্ণমিতি ঘৃতমেদোবসাবর্ণং রক্তম্| তত ইতি শর্করার্বুদাদেব| ভোজেঽপি পঠ্যতে– “তমেব ভিন্নং দুর্গন্ধং ঘৃতমেদোনিভং সিরাঃ| স্রবন্তি স্রাবমনিশং তদা স্যাচ্ছর্করার্বুদম্||” ইতি| তমেবেতি গ্রন্থিম্||২২-২৪||

Adhikarana pAdadArIlakShaNam (25) · Śloka 25

পরিক্রমণশীলস্য বাযুরত্যর্থরূক্ষযোঃ | পাদযোঃ কুরুতে দারীং পাদদারীং তমাদিশেত্ ||২৫|| (সু. নি. অ. ১৩) |

পাদদারীমাহ– পরিক্রমণশীলস্যেত্যাদি| পরিক্রমণং পাদবিহরণং, দারী দারণমাত্রং, বিপাদিকাকুষ্ঠং তু পিডকা সবিদারণেতি ভেদঃ||২৫||

Adhikarana kadaralakShaNam (26) · Śloka 26

শর্করোন্মথিতে পাদে ক্ষতে বা কণ্টকাদিভিঃ | গ্রন্থিঃ কোলবদুত্সন্নো জাযতে কদরং হি তত্ ||২৬|| (সু. নি. অ. ১৩) |

কদরমাহ– শর্করোন্মথিত ইত্যাদি| কদরং কোলাষ্ঠীতি খ্যাতম্| ‘কোলবত্’ ইত্যস্য স্থানে ‘কীলবত্’ ইতি পাঠান্তরম্| কদরং হস্তেঽপি ভবতি| তথাচ ভোজঃ– “হস্তযোঃ পাদযোশ্চাপি গম্ভীরানুগতং খরম্| মাংসকীলং জনযতঃ কুপিতৌ কফমারুতৌ|| সশল্যমিব তং দেশং মন্যতে তেন পীডিতঃ| শর্করাকদরং কেচিন্মন্যন্তে বাতকণ্টকম্||” ইতি| কোলবদিতি বদরবত্||২৬||

Adhikarana alasalakShaNam (27) · Śloka 27

ক্লিন্নাঙ্গুল্যন্তরৌ পাদৌ কণ্ডূদাহরুজান্বিতৌ | দুষ্টকর্দমসংস্পর্শাদলসং তং বিভাবযেত্ ||২৭|| (সু. নি. অ. ১৩) |

অলসকলক্ষণমাহ– ক্লিন্নেত্যাদি| অযং কফরক্তজো বিকারঃ ‘পাকুযা’ ইতি খ্যাতঃ| অত্র কণ্ডূঃ কফস্য, দাহরুজে রক্তস্য||২৭||

Adhikarana indraluptalakShaNam (28-29) · Śloka 29

রোমকূপানুগং পিত্তং বাতেন সহ মূর্ছিতম্ | প্রচ্যাবযতি রোমাণি ততঃ শ্লেষ্মা সশোণিতঃ ||২৮|| রুণদ্ধি রোমকূপাংস্তু ততোঽন্যেষামসম্ভবঃ | তদিন্দ্রলুপ্তং খালিত্যং রুহ্যেতি চ বিভাব্যতে ||২৯|| (সু. নি. অ. ১৩) |

ইন্দ্রলুপ্তস্য লক্ষণমাহ– রোমকূপেত্যাদি| এতত্ত্রিভির্দোষৈঃ সশোণিতৈঃ স্বভাবান্নিযতকালব্যাপারৈর্ভবতি| এতচ্চ স্ত্রীণাং ন ভবতীতি বিদেহবচনাদ্ব্যাখ্যানযন্তি| যদুক্তম্– “অত্যন্তসুকুমারাঙ্গ্যো রজো দুষ্টং স্রবন্তি চ| অব্যাযামরতা যস্মাত্তস্মান্ন খলিতিঃ স্ত্রিযাঃ||” ইতি| অব্যাযামাদ্বাতপিত্তযোরকোপেন নাতিরোমচ্যুতিঃ, রজঃস্রাবেণ চ স্রোতোঽবরোধাভাবাচ্চ্যুতানামপি রোম্ণাং পুনর্বিরোহঃ; কিন্তু স্ত্রীষ্বপি খলিতিদর্শনাত্ প্রাযিকং বিদেহবচনম্| খালিত্যং রুহ্যেতি চ তস্য পর্যাযকথনম্| তথাচ ভোজঃ– “তদিন্দ্রলুপ্তমিত্যাহুঃ খল্লীং রুহ্যাং চ কেচন|” ইতি| কার্তিকস্ত্বাহ– “ইন্দ্রলুপ্তং শ্মশ্রুণি ভবতি, খালিত্যং শিরস্যেব, রুহ্যা চ সর্বদেহে|” ইতি| আগমস্ত্বত্র নাস্তি||২৮-২৯||

Adhikarana dAruNakalakShaNam (30) · Śloka 30

দারুণা কণ্ডুরা রূক্ষা কেশভূমিঃ প্রপাট্যতে | কফমারুতকোপেন বিদ্যাদ্দারুণকং তু তম্ ||৩০|| (সু. নি. অ. ১৩) |

দারুণলক্ষণমাহ– দারুণেত্যাদি| দারুণেতি কঠিনা| কফমারুতকোপেনেতি যদ্যপ্যুক্তং তথাপি পিত্তরক্তানুবন্ধোঽপ্যত্র দ্রষ্টব্যঃ| তথাহি বিদেহঃ– “যদত্র পটলাভাসং সরুজস্কং শিরস্ত্বচি| পরুষং জাযতে জন্তোস্তস্য রূপং বিশেষতঃ|| তোদৈঃ সমন্বিতং বাতাত্ সকণ্ডূগৌরবং কফাত্| সপিপাসং সদাহার্তিরাগং পিত্তাস্রজং তথা||” ইতি| অত্র বচনে সদাহরাগং চ পিত্তাত্, সার্তি তু রক্তাত্, অর্তির্হি রক্তজাঽপি ভবতি| যদুক্তম্– “রক্তং হি ব্যম্লতাং যাতি তচ্চেন্নাস্তি ন চাস্তি রুক্|” ইতি| দারুণং ‘রুক্খী’ ইতি লোকে||৩০||

Adhikarana arUMShikAlakShaNam (31) · Śloka 31

অরূংষি বহুবক্ত্রাণি বহুক্লেদীনি মূর্ধ্নি তু | কফাসৃক্ক্রিমিকোপেন নৃণাং বিদ্যাদরূংষিকাম্ ||৩১|| (সু. নি. অ. ১৩) |

অরূংষিকামাহ– অরূংষীত্যাদিনা| অরূংষীতি ব্রণাঃ||৩১||

Adhikarana palitalakShaNam (32) · Śloka 32

ক্রোধশোকশ্রমকৃতঃ শরীরোষ্মা শিরোগতঃ | পিত্তং চ কেশান্ পচতি পলিতং তেন জাযতে ||৩২|| (সু. নি. অ. ১৩) |

পলিতমাহ– ক্রোধেত্যাদি| শরীরোষ্মেতি দেহাগ্নিঃ| পিত্তং চেতি পিত্তমপি শিরোগতং পলিতহেতুঃ| ননু, পিত্তমেবাগ্নিঃ, তত্র তত্র পিত্তস্য পাচকত্বেনাভিধানাত্; যদুক্তবান্ সুশ্রুতঃ– “ ন পাকঃ পিত্তাদৃতে” (সু. সূ. অ. ১৭) ইতি, তথা– “পিত্তে তস্মিন্ পাচকোঽগ্নিরিতি সঞ্জ্ঞা” (সু. সূ. অ. ২১) ইতি, তথা স এব– “ন খলু পিত্তব্যতিরেকেণান্যোঽগ্নিরুপলভ্যতে, আগ্নেযে তু পিত্তে দহনপচনদারণাদিষ্বভিবর্তমানেঽগ্নিদুপচারঃ ক্রিযতে অন্তরগ্নিরিতি, ক্ষীণে হ্যগ্নিগুণে তত্সমানদ্রব্যোপযোগাদতিবৃদ্ধে শীতক্রিযোপযোগাদাগমাচ্চ পশ্যামঃ ন খলু পিত্তব্যতিরেকেণান্যোঽগ্নিঃ|” (সু. সূ. অ. ২১) ইতি; চরকাচার্যোঽপ্যাহ– “দর্শনং পক্তিরূষ্মা চ ক্ষুত্তৃষ্ণা দেহমার্দবম্| প্রভাপ্রসাদৌ মেধা চ পিত্তকর্মাবিকারজম্|” (চ. সূ. অ. ১৮) ইতি; পাকস্যান্যথানুপপত্ত্যা চাগ্নেরঙ্গীকারঃ; কিঞ্চ মন্দেঽগ্নৌ পিত্তকরমরীচাদিদ্রব্যোপযোগাদগ্নের্বৃদ্ধিঃ, পিত্তপ্রতিকূলশীতমধুরাদিদ্রব্যোপযোগাচ্চোপশম উপলভ্যতে; যদি হি পিত্তাদ্ভিন্নোঽগ্নিঃ স্যাত্তদা পিত্তস্য বৃদ্ধিহ্রাসানুবিধানমস্যানুপপন্নং স্যাত্, ন হি তুহিনকরমণ্ডলে হিমভাজি অহিমোপলম্ভঃ, অতুহিনমণ্ডলে অহিমভাজি ভগবতি ভাস্করে অভিমতহিমোপলম্ভঃ, যদ্যতো ভিন্নং তত্ততো ভেদেনোপলভ্যতে, যথা সাগরাদজগরঃ, ন চৈবং পিত্তাদগ্নিঃ, তত্ কুতঃ পিত্তাদগ্নেঃ পৃথগুপাদানমিতি? অত্র প্রত্যভিধীযতে– ন তাবদন্তরগ্নিঃ পিত্তাদভিন্নঃ, ভেদসাধকপ্রমাণস্য ভূযঃ সদ্ভাবাত্; তথাহ্যভেদে “সমদোষঃ সমাগ্নিশ্চ” (সু. সূ. অ. ১৫) ইত্যত্র, “সমপ্রকোপৌ দোষাণাং সর্বেষামগ্নিসংশ্রযৌ” ইত্যত্র চ দোষপদলব্ধত্বাদগ্নেঃ পৃথগুপাদানমসঙ্গতং; তীক্ষ্ণঃ পিত্তেন চেতি স্বাত্মনি ক্রিযাবিরোধাদসঙ্গতং; যত্ পুনঃ “ন খলু পিত্তব্যতিরেকেণান্যোঽগ্নিঃ” ইত্যাদ্যুক্তং তদ্ভেদমেব সাধযতি, উপচারাভিধানাত্; ন হ্যভেদে উপচারঃ সম্ভবতি| যদপ্যগ্নেঃ পিত্তবৃদ্ধিহ্রাসানুবিধানমভিহিতং তদপ্রযোজকং, ভেদেঽপি সমানত্বেন তদুপপত্তেঃ| যথা কফবৃদ্ধিহ্রাসকরসৌম্যাগ্নেযদ্রব্যাভ্যাং শুক্রস্য বৃদ্ধিহ্রাসৌ দৃষ্টৌ, ন চ কফশুক্রযোরৈক্যং; কিঞ্চ ঘৃতং পিত্তশমনমগ্নেশ্চ দীপনং, পিত্তস্য সঞ্চযাদৌ নাগ্নের্বৃদ্ধিঃ; পেযাদিকং চাগ্নিকরং, ন পিত্তকৃত্; ততশ্চ পিত্তাদ্বিলক্ষণোঽন্তরগ্নিঃ| স চ দ্রবতেজঃসমুদাযাত্মকস্য পিত্তস্য তেজোভাগো ন বহিরনলবদ্ভস্মাঙ্গারাকারঃ, সমুদাযতশ্চ সমুদাযী অন্য এব করচরণাদিভ্য ইব শরীরম্; অত্যন্তভেদেন চাগ্রহণং তস্য নিত্যসংশ্লেষণশালিত্বাত্| পিত্তস্য তেজোংঽশঃ এব পাচ(ব)কঃ, তদাহ ভোজঃ– “দৃঢমুষ্ণোচিতং হ্যেতত্ পিত্তোষ্মা পচতীতি যত্| মূর্ছিতো রসবীর্যাভ্যাং সমানব্যানসংহিতঃ||” ইত্যারভ্য, “তস্মাত্ তেজোমযং পিত্তং পিত্তোষ্মা যঃ স পক্তিমান্| স কাযাগ্নিঃ স কাযোষ্মা স পক্তা স চ জীবনঃ||” ইতি| পিত্তৈকদেশত্বাত্তেজসি পিত্তোপচারমাশ্রিত্য সুশ্রুতেনোক্তম্– “ ন পাকঃ পিত্তাদৃতে|” ইতি, তথা “ন খলু পিত্তব্যতিরেকেণান্যোঽগ্নিঃ|” ইতি| এবমন্যদপ্যগ্নেরভেদসাধকং বচনং সমাধেযম্| ননু, যদি তীক্ষ্ণঃ পিত্তেনেত্যুক্তং, তত্ কথং পিত্তেনৈবাগ্নেঃ প্রশমনমভিধীযতে| যদুক্তং চরকে– “কট্বজীর্ণবিদাহ্যম্লক্ষারাদ্যৈঃ পিত্তমুল্বণম্| আপ্লাবযদ্ধন্ত্যনলং জলং তপ্তমিবানলম্||” (চ. চি. অ. ১৫) ইতি; উচ্যতে– যদা কটুকেন রূক্ষোষ্ণেন পিত্তং বৃদ্ধং ভবতি, তদা তেজোভাগরূপাযাঃ পিত্তস্যাবস্থাযা উল্বণত্বাত্তীক্ষ্ণঃ পিত্তেনেতি সঙ্গতং; যদা অম্ললবণেন স্নিগ্ধোষ্ণেন কফানুগমনভাজা বৃদ্ধং পিত্তং তদা পিত্তস্য দ্রবাবস্থাযা উদ্রিক্তত্বাত্ নির্বাপণমগ্নেরুক্তমিতি| জতুকণেঽপ্যুক্তম্– “কুপিতেন বাযুনা দীপস্যেবাগ্নের্নির্বাপণং, পিত্তেনোষ্ণজলবত্, কফেনাম্বুবত্|” ইতি| ততশ্চ যুক্তমগ্নেঃ পৃথগুপাদানমিতি| অগ্নিশ্চ পিত্তগতত্বেন ক্রোধকৃতো ভবত্যেব, ক্রোধেন পিত্তকোপাত্; শোকশ্রমাভ্যাং তু জনিতবাতেন শরীরোষ্মণোঽপি বিক্ষেপণাত্ শিরোগতত্বং, তেনানিলোঽপি লভ্যতে, পিত্তং চ সাক্ষাদুপাত্তং, চকারেণ শ্লেষ্মাঽপি কেশশুক্লতাকরো গৃহ্যতে| এতেন দোষত্রযসহিতশরীরোষ্মা পলিতহেতুরিতি বাক্যার্থশ্চরকোক্তার্থেন সহ সংবাদী ভবতি| যদাহ– “তেজোঽনিলাদ্যৈঃ সহ কেশভূমিং দগ্ধ্বা তু কুর্যাত্ খলিতং নরস্য| কিঞ্চিত্তু দগ্ধ্বা পলিতানি কুর্যাদ্ধরিত্প্রভত্বং চ শিরোরুহাণাম্||” (চ. চি. অ. ২) ইতি| এতচ্চাকালজপলিতব্যাপকং লক্ষণম্| কালজে তু ক্রোধাদিগ্রহণং কারণান্তরোপলক্ষণং, তেন বযঃপরিণামকৃতশ্চোষ্মা দোষত্রযযুক্তঃ কালজপলিতহেতুঃ, অন্যথা কালজপলিতস্য সঙ্গ্রহো ন স্যাত্| কিংবা কালজং স্বাভাবিকত্বাদেব নোচ্যতে| অন্যে তু পিত্তগতশ্চেচ্ছরীরোষ্মা তত্ কিমুভযোরুপাদানেনেত্যভিধায শরীরোষ্মা পিত্তং চেতি কর্তৃদ্বযমাচক্ষতে; তেন নাত্রৈকস্মিন্ বিষযে সমুচ্চযঃ, কিং তর্হি বিষযভেদাত্| কর্তৃদ্বযং; তত্র শরীরোষ্মা বৈকৃতং পলিতং করোতি, পিত্তং চ প্রাকৃতং পিত্তপ্রকৃতেঃ পলিতং করোতি| যদুক্তম্– “পিত্তপ্রকৃতিরকালজবলীপলিতযুক্তশ্চ ভবতি” ইতি| এবং স্বাভাবিকজরাপলিতমপি পিত্তেনৈবাস্য হেতোঃ ক্লৃপ্তত্বাত্| ন চোষ্মকৃতত্বেন পলিতস্যাদোষজত্বপ্রসঙ্গঃ, ঊষ্মণঃ পিত্তধর্মত্বেন পিত্তেঽন্তর্ভাবাত্||৩২||

Adhikarana yuvAnapiDakAlakShaNam (33) · Śloka 34

শাল্মলীকণ্টকপ্রখ্যাঃ কফমারুতরক্তজাঃ | যুবানপিডকা যূনাং বিজ্ঞেযা মুখদূষিকাঃ ||৩৩|| (সু. নি. অ. ১৩) |৩৪|

যুবানপিডকালক্ষণমাহ– শাল্মলীত্যাদি| যুবানপিডকা লোকে ‘বরণ্ডকা’ উচ্যতে| যূনামাননপিডকা যুবানপিডকা, পৃষোদরাদিত্বান্নকারলোপঃ; এষা চ যূনামেব, মুখ এব, স্বভাবাত্||৩৩||

Adhikarana padminIkaNTakalakShaNam (34) · Śloka 34

কণ্টকৈরাচিতং বৃত্তং মণ্ডলং পাণ্ডুকণ্ডুরম্ | পদ্মিনীকণ্টকপ্রখ্যৈস্তদাখ্যং কফবাতজম্ ||৩৪|| (সু. নি. অ. ১৩) |

পদ্মিনীকণ্টকমাহ– কণ্টকৈরিত্যাদি| তদাখ্যমিতি পদ্মিনীকণ্টকাখ্যম্||৩৪||

Adhikarana jatumaNilakShaNam (35) · Śloka 35

সমমুত্সন্নমরুজং মণ্ডলং কফরক্তজম্ | সহজং লক্ষ্ম চৈকেষাং লক্ষ্যো জতুমণিস্তু সঃ ||৩৫|| (সু. নি. অ. ১৩) |

জতুমণিমাহ– সমমিত্যাদি| সমং মসৃণম্| উত্সন্নমুদ্গতম্| অযং ‘জটুল’ ইতি লোকে প্রসিদ্ধঃ| কফরক্তজমিতি প্রাধান্যেনোক্তং, তেন– চরকোক্তং ত্রিদোষজত্বমপ্যস্যোপপন্নং ভবতি| যদুক্তং তেন– “কৃষ্ণঃ স্নিগ্ধো জতুমণির্জ্ঞেযো বাতোত্তরৈস্ত্রিভিঃ| অরুজং ত্বপরৈরুক্তং লক্ষ্মেত্যাহুর্ভিষগ্বরাঃ||” ইতি| সহজং লক্ষ্ম চৈকেষামিতি একেষামাচার্যাণাং মতেন সহজং লক্ষ্ম লক্ষণং স্ত্রীপুংসযোরঙ্গভেদেন শুভাশুভফলপ্রদং ভবতি| সহজং শরীরেণ সহ জাতং জন্মকালপ্রবৃত্তমিত্যর্থঃ||৩৫||

Adhikarana maShakalakShaNam (36) · Śloka 36

অবেদনং স্থিরং চৈব যস্মিন্ গাত্রে প্রদৃশ্যতে | মাষবত্কৃষ্ণমুত্সন্নমনিলান্মষকং তু তত্ ||৩৬|| (সু. নি. অ. ১৩) |

মষকলিঙ্গমাহ– অবেদনমিত্যাদি| স্থিরং কঠিনমিতি গযদাসঃ; অচলমিতি যুক্তং, ভোজে মৃদ্বিতি পাঠাত্| মষকমাদিশেদিতি মাষশব্দাত্ “ইবে প্রতিকৃতৌ” ইতি কন্, নৈরুক্ত্যেন চ বিধিনা হ্রস্বত্বম্| অত্র চকারেণ কফমেদসী সমুচ্চীযেতে| তথা চ ভোজঃ– “বাতেরিতে ত্বচি যদা দূষ্যেতে কফমেদসী| শ্লক্ষ্ণং মৃদু সবর্ণং চ কুরুতো মষকং বদেত্||” ইতি||৩৬||

Adhikarana tilakAlakalakShaNam (37) · Śloka 37

কৃষ্ণানি তিলমাত্রাণি নীরুজানি সমানি চ | বাতপিত্তকফোচ্ছোষাত্তান্ বিদ্যাত্তিলকালকান্ ||৩৭|| (সু. নি. অ. ১৩) |

তিলকালকলক্ষণমাহ– কৃষ্ণানীত্যাদি| ‘বাতপিত্তকফোচ্ছোষাত্’ ইতি পাঠে বাতপিত্তাভ্যাং হেতুভ্যাং কফস্যোচ্ছোষঃ শোষণং তস্মাত্| অন্যে চরকং দৃষ্ট্বা ‘বাতপিত্তাসৃগুচ্ছোষাত্’ ইতি পঠন্তি| তথাচ চরকঃ– “যস্য পিত্তং প্রকুপিতং শোণিতং প্রাপ্য শুষ্যতি| তিলকা বিপ্লবা ব্যঙ্গা নীলিকা চাস্য জাযতে||” (চ. সূ. অ. ১৮) ইতি; অস্মিন্ বচনে বাতোঽপ্যবগন্তব্যঃ, তেনাপি শোষস্য ক্রিযমাণত্বাত্| অন্যেঽপি তন্ত্রান্তরং দৃষ্ট্বা ‘বাতপিত্তকফোত্সেকাত্’ ইতি পঠন্তি| উত্সেকাদিত্যুদ্রেকাত্| তথাহি তন্ত্রান্তরম্– “মারুতঃ পিত্তমাদায কফরক্তসমাশ্রিতঃ| চিনোতি তিলমাত্রাণি ত্বচি তে তিলকালকাঃ||” ইতি; কিন্ত্বস্মিন্নপি তন্ত্রে কফরক্তসমাশ্রিত ইত্যনেন কফরক্তযোরাশ্রিতবাতেন পিত্তসহিতেনোচ্ছোষাদেব তিলকালকে কার্ষ্ণ্যস্য সম্ভবোঽবগম্যতে, ততশ্চ ‘বাতপিত্তকফোচ্ছোষাত্’ ইতি পাঠো যুজ্যতে| ‘বাতপিত্তরসোদ্রেকাত্’ ইতি পাঠান্তরম্||৩৭||

Adhikarana nyacchalakShaNam (38) · Śloka 38

মহদ্বা যদি বা চাল্পং শ্যাবং বা যদি বাঽসিতম্ | নীরুজং মণ্ডলং গাত্রে ন্যচ্ছমিত্যভিধীযতে ||৩৮|| (সু. নি. অ. ১৩) |

ন্যচ্ছলিঙ্গমাহ– মহদ্বেত্যাদি| অসিতং কৃষ্ণম্| ‘নীরুজং মণ্ডলম্’ ইত্যস্য স্থানে ‘সহজং মণ্ডলম্’ ইতি কেচিত্ পঠন্তি, তেন জন্মকালপ্রবৃত্তং ন্যচ্ছমিচ্ছন্তি, অত এব ন্যচ্ছস্য পর্যাযে লাঞ্ছনমিতি তৈঃ পঠ্যতে| যথা– “ন্যচ্ছং লাঞ্ছনমুচ্যতে” ইতি| লাঞ্ছনং লক্ষণম্| অত্র ভোজবচনাত্ পিত্তরক্তান্বিতো বাযুঃ কারণম্| যদাহ– “রক্তপিত্তান্বিতো বাযুস্ত্বক্প্রদেশাশ্রিতো যদা| জনযেন্মণ্ডলং কৃষ্ণং শ্যাবং বা ন্যচ্ছমাদিশেত্||” ইতি| অত্র শ্যাবত্বপক্ষে মুখেতরদেশ এব সম্ভবেন বহুলত্বেন ব্যঙ্গাদ্ভেদোঽবগন্তব্যঃ||৩৮||

Adhikarana vya~ggalakShaNam (39) · Śloka 39

ক্রোধাযাসপ্রকুপিতো বাযুঃ পিত্তেন সংযুতঃ | মুখমাগত্য সহসা মণ্ডলং বিসৃজত্যতঃ ||৩৯|| নীরুজং তনুকং শ্যাবং মুখে ব্যঙ্গং তমাদিশেত্ | (সু. নি. অ. ১৩) |

ব্যঙ্গলিঙ্গমাহ– ক্রোধাযাসেত্যাদি| শ্যাবমিতি শুক্লানুবিদ্ধকৃষ্ণবর্ণম্| অস্য ‘ছ্যাবক’ ইতি ‘মেছেতা’ ইতি চ লোকে খ্যাতিঃ||৩৯||–

Adhikarana nIlikAlakShaNam (40) · Śloka 40

কৃষ্ণমেবঙ্গুণং গাত্রে মুখে বা নীলিকাং বিদুঃ ||৪০||

নীলিকালক্ষণমাহ– কৃষ্ণমেবঙ্গুণমিত্যাদি| এবঙ্গুণমিতি নীরুজতনুকমণ্ডলধর্মম্| ব্যঙ্গোক্তদোষোঽত্রাপি বোদ্ধব্যঃ, সম্মূর্ছনবিশেষাত্তু নীলত্বকারী| কৃষ্ণন্যচ্ছাদতিকৃষ্ণত্বেন ভিন্না নীলিকা, ব্যঙ্গনীলিকযোস্তু ব্যক্ত এব ভেদঃ– শ্যাবো ব্যঙ্গঃ, কৃষ্ণা নীলিকা; ভোজে তু নীলিকা গাত্র এবোক্তা| যদুক্তম্– “মারুতঃ ক্রোধহর্ষাভ্যামূর্ধ্বগো মুখমাশ্রিতঃ| পিত্তেন সহ সংযুক্তঃ করোতি বদনত্বচি|| নীরুজং তনুকং শ্যাবং ব্যঙ্গং তমিতি নির্দিশেত্| কৃষ্ণমেবঙ্গুণং গাত্রে নীলিকাং তাং বিনির্দিশেত্||” ইতি||৪০||

Adhikarana parivartikAlakShaNam (41-43) · Śloka 43

মর্দনাত্ পীডনাদ্বাঽতি তথৈবাপ্যভিঘাততঃ | মেঢ্রচর্ম যদা বাযুর্ভজতে সর্বতশ্চরন্ ||৪১|| তদা বাতোপসৃষ্টত্বাত্তচ্চর্ম পরিবর্ততে | মণেরধস্তাত্ কোশশ্চ গ্রন্থিরূপেণ লম্বতে ||৪২|| সরুজাং বাতসম্ভূতাং তাং বিদ্যাত্ পরিবর্তিকাম্ | সকণ্ডূঃ কঠিনা বাপি সৈব শ্লেষ্মসমুত্থিতা ||৪৩|| (সু. নি. অ. ১৩) |

মেঢ্রগতাভিঘাতজে রোগত্রযে পরিবর্তিকামাহ– মর্দনাদিত্যাদি| পীডনাদ্বাঽতীত্যতিশব্দো মর্দনপীডনাভ্যাং সহ সম্বধ্যতে| অতিযোগাদেব তে বাতং কোপযতঃ| সর্বতশ্চরন্নিতি ব্যানঃ, ‘সর্বতশ্চরঃ’ ইতি পাঠে স এবার্থ| পরিবর্তত ইতি সর্বতো বিবর্ততে| কোষ ইতি চর্মকোষঃ| পরিবর্তিকেতি বৃতধাতোঃ “রোগাখ্যাযাং ণ্বুল্ বহুলম্” ইতি ণ্বুল্ (বৃত-ণক-আপ্)| এবমবপাটিকাযাং চ বোদ্ধব্যম্| অস্যাং বাতজাযামপি পিত্তানুবন্ধাদ্দাহপাকৌ ভবতঃ, কফসম্বন্ধস্তু ‘সকণ্ডূঃ কঠিনা বাপি’ ইত্যাদিনাঽভিহিতঃ| ভোজেঽপ্যুক্তম্– “মণেরধো মেঢ্রচর্ম ব্যানস্তু পরিবর্তযেত্| সশূলতোদদাহাদ্যৈর্বিজ্ঞেযা পরিবর্তিকা|| শ্লৈষ্মিকী কঠিনা স্নিগ্ধা কণ্ডূমত্যল্পবেদনা|” ইতি||৪১-৪৩||

Adhikarana avapATikAlakShaNam (44) · Śloka 44

অল্পীযঃখাং যদা হর্ষাদ্বলাদ্গচ্ছেত্ স্ত্রিযং নরঃ | হস্তাভিঘাতাদপি বা চর্মণ্যুদ্বর্তিতে বলাত্ ||৪৪|| যস্যাবপাট্যতে চর্ম তাং বিদ্যাদবপাটিকাম্ | (সু. নি. অ. ১৩) |

অবপাটিকামাহ– অল্পীযঃখামিত্যাদি| অল্পীযঃখামিত্যল্পতরং খং যোনিমুখং যস্যাঃ সা তথা, কন্যা হি অনার্তবা অল্পীযঃখা ভবতি| অত্র হেত্বন্তরং হস্তাভিঘাতাদপি বেতি| উদ্বর্তিত ইতি ঊর্ধ্বং বর্তিতে| যস্যাবপাট্যত ইতি স্বযমেব বিদীর্যতে| এষা চ পৃথক্ দোষত্রযেণানুবধ্যতে| তথা চ ভোজঃ– “মর্দনাদভিঘাতাদ্বা কন্যাযোনিপ্রপীডনাত্| লক্ষ্যতে যদি মেঢ্রস্য চর্ম দর্ভৈরিব ক্ষতম্|| জ্ঞেযাঽবপাটিকা সা তু পৃথগ্দোষৈঃ সমন্বিতা| বাতাত্ সা পরুষা রূক্ষা শূলনিস্তোদকারিণী|| পিত্তাত্ সদাহা রক্তাদ্বা দাহতৃষ্ণাসমন্বিতা| শ্লৈষ্মিকী কঠিনা স্নিগ্ধা কণ্ডূমত্যল্পবেদনা||” ইতি||৪৪||–

Adhikarana niruddhaprakashalakShaNam (45-47) · Śloka 47

বাতোপসৃষ্টে মেঢ্রে বৈ চর্ম সংশ্রযতে মণিম্ ||৪৫|| মণিশ্চর্মোপনদ্ধস্তু মূত্রস্রোতো রুণদ্ধি চ | নিরুদ্ধপ্রকশে তস্মিন্ মন্দধারমবেদনম্ ||৪৬|| মূত্রং প্রবর্ততে জন্তোর্মণির্বিব্রিযতে ন চ | নিরুদ্ধপ্রকশং বিদ্যাত্ সরুজং বাতসম্ভবম্ ||৪৭|| (সু. নি. অ. ১৩) |

নিরুদ্ধপ্রকশমাহ– বাতোপসৃষ্ট ইত্যাদি| সংশ্রযত ইতি সমগ্রং শ্রযতে, অত্রৈব নীযত ইত্যর্থঃ| অবপাটিকা ত্বরূঢা চর্মসঙ্কোচান্নিরুদ্ধপ্রকশো ভবতীতি ব্রুবতে, সন্নিরুদ্ধগুদবত্ স্বতন্ত্রোঽপি ভবতীতি শক্যতে বক্তুং; নিরুদ্ধপ্রকাশ ইত্যস্মিন্নর্থে নিরুদ্ধপ্রকশঃ, নৈরুক্তেন চ রূপসিদ্ধিঃ| মূত্রস্রোতঃ সঙ্কুচিতচর্মপীডনেন মণেঃ স্বল্পদ্বারত্বান্মূত্রস্রোতো রুণদ্ধি| অবেদনমিত্যস্য স্থানে সবেদনমিতি কেচিত্| অত্র ভোজাভিপ্রাযেণ ব্যাচক্ষতে– একদা নিরুদ্ধে স্রোতসি সবেদনমন্যদা তু প্রকাশে মূত্রং মন্দধারং প্রবর্ততে, মণিশ্চ নাবদীর্যতে মূত্রেণেতি| তথা চ ভোজঃ– “মেঢ্রান্তে চর্মণি যদা মারুতঃ কুপিতো ভৃশম্| দ্বারং রুণদ্ধি স শনৈঃ প্রকাশশ্চ মুহুর্ভবেত্|| মূত্রং মূত্রযতে কৃচ্ছ্রাত্ প্রকাশস্তু যদা ভবেত্| বাতোপসৃষ্টমেঢ্রস্তু মণির্ন চ বিদীর্যতে|| নিরুদ্ধং চ প্রকাশং চ ব্যাধিং বিদ্যাত্ সুদারুণম্||” ইতি| সুশ্রুতে তু নিরুদ্ধপ্রকাশত্বাত্ নিরুদ্ধপ্রকশঃ| মণির্বিব্রিযতে ন চেতি মণির্বিবৃতো ন ভবতি||৪৫-৪৭||

Adhikarana sanniruddhagudalakShaNam (48-49) · Śloka 49

বেগসন্ধারণাদ্বাযুর্বিহতো গুদসংশ্রিতঃ | নিরুণদ্ধি মহাস্রোতঃ সূক্ষ্মদ্বারং করোতি চ ||৪৮|| মার্গস্য সৌক্ষ্ম্যাত্ কৃচ্ছ্রেণ পুরীষং তস্য গচ্ছতি | সন্নিরুদ্ধগুদং ব্যাধিমেতং বিদ্যাত্ সুদারুণম্ ||৪৯|| (সু. নি. অ. ১৩) |

মূত্রমার্গরোধকনিরুদ্ধপ্রকাশানন্তরং পুরীষমার্গরোধকং সন্নিরুদ্ধগুদমাহ– বেগসন্ধারণাদিত্যাদি| তস্যেতি গুদস্য| ‘মহত্স্রোত’| ইতি পাঠে তু মহত্স্রোতো গুদবিবরং, নিরুদ্ধপ্রকাশবদত্রাপি চর্মসঙ্কোচাত্ সন্নিরুদ্ধগুদম্||৪৮-৪৯||

Adhikarana ahipUtanalakShaNam (50-51) · Śloka 51

শকৃন্মূত্রসমাযুক্তেঽধৌতেঽপানে শিশোর্ভবেত্ | স্বিন্নে বাঽস্নাপ্যমানে বা কণ্ডূ রক্তকফোদ্ভবা ||৫০|| কণ্ডূযনাত্ততঃ ক্ষিপ্রং স্ফোটঃ স্রাবশ্চ জাযতে | একীভূতং ব্রণৈর্ঘোরং তং বিদ্যাদহিপূতনম্ ||৫১|| (সু. নি. অ. ১৩) |

অহিপূতনমাহ– শকৃন্মূত্রেত্যাদি| অপান ইতি গুদে, স্বিন্নে স্বেদবতি, অস্নাপ্যমানে অক্রিযমাণক্ষালনে; স্বেদমলক্লেদাদেব কণ্ডূর্ভবতীত্যর্থঃ| একীভূতমিতি অপানং ব্রণৈঃ সহৈকীভূতম্| অহিপূতনং চ বালানামেব ভবতি, ভোজে পুনরিদং দুষ্টস্তন্যপানাদপি ভবতীতি পঠিতম্| যদুক্তম্– “দুষ্টস্তন্যস্য পানেন মলস্যাক্ষালনেন চ| কণ্ডূদাহরুজাবদ্ভিঃ পিডকৈশ্চ সমাচিতা|| সম্ভবন্তি যথাদোষং দারুণা হ্যহিপূতনা||” ইতি||৫০-৫১||

Adhikarana vRuShaNakacchUlakShaNam (52-53) · Śloka 53

স্নানোত্সাদনহীনস্য মলো বৃষণসংস্থিতঃ | যদা প্রক্লিদ্যতে স্বেদাত্ কণ্ডূং জনযতে তদা ||৫২|| কণ্ডূযনাত্ততঃ ক্ষিপ্রং স্ফোটঃ স্রাবশ্চ জাযতে | প্রাহুর্বৃষণকচ্ছূং তাং শ্লেষ্মরক্তপ্রকোপজাম্ ||৫৩|| (সু. নি. অ. ১৩) |

অহিপূতনাসমানহেতুলিঙ্গতযা গুদাশ্রযং গুদভ্রংশমুল্লঙ্ঘ্যানন্তরং বৃষণকচ্ছূমাহ– স্নানোত্সাদনহীনস্যেত্যাদি| এষা চ নিদানবিশেষাত্ প্রাযো বৃষণভাবিত্বাত্ বিশিষ্টচিকিত্সোপযোগিত্বাচ্চ কুষ্টোক্তকচ্ছূতো ভেদেন পঠ্যতে||৫২-৫৩||

Adhikarana gudabhraMshalakShaNam (54) · Śloka 54

প্রবাহণাতীসারাভ্যাং নির্গচ্ছতি গুদং বহিঃ | রূক্ষদুর্বলদেহস্য গুদভ্রংশং তমাদিশেত্ ||৫৪|| (সু. নি. অ. ১৩) |

গুদভ্রংশলিঙ্গমাহ– প্রবাহণেত্যাদি| প্রবাহণং প্রকর্ষেণ কুন্থনম্| ‘বাহ প্রযত্নে’ ইত্যস্য রূপম্| প্রবাহণেনাতিবেগোদীরণেন বাতকোপঃ, অতীসারেণ তু ধাতুক্ষযাত্; যদি বা প্রবাহণেনাতীসারেণ চাধোগতমারুতত্বেন গুদনির্গমো রূক্ষাদিদেহস্য||৫৪||

Adhikarana varAhadaMShTralakShaNam (55) · Śloka 55

সদাহো রক্তপর্যন্তস্ত্বক্পাকী তীব্রবেদনঃ | কণ্ডূমাঞ্জ্বরকারী চ স স্যাচ্ছূকরদংষ্ট্রকঃ ||৫৫||

বরাহদংষ্ট্রলিঙ্গমাহ– সদাহ ইত্যাদি| অযং ‘বরাহদাঢ’ ইতি লোকে প্রসিদ্ধঃ||৫৫||

Adhikarana puShpikA · Śloka 55

ইতি শ্রীমাধবকরবিরচিতে মাধবনিদানে ক্ষুদ্ররোগনিদানং সমাপ্তম্ ||৫৫||

ইতি শ্রীকণ্ঠদত্তকৃতাযাং মধুকোশব্যাখ্যাযাং ক্ষুদ্ররোগনিদানং সমাপ্তম্||৫৫||