49. kuṣṭhanidānam

Adhikarana kuShThanidAnam (1-6) · Śloka 6

অথ কুষ্ঠনিদানম্ | বিরোধীন্যন্নপানানি দ্রবস্নিগ্ধগুরূণি চ | ভজতামাগতাং ছর্দিং বেগাংশ্চান্যান্ প্রতিঘ্নতাম্ ||১|| ব্যাযামমতিসন্তাপমতিভুক্ত্বা নিষেবিণাম্ | ঘর্মশ্রমভযার্তানাং দ্রুতং শীতাম্বুসেবিনাম্ ||২|| অজীর্ণাধ্যশিনাং চৈব পঞ্চকর্মাপচারিণাম্ | নবান্নদধিমত্স্যাতিলবণাম্লনিষেবিণাম্ ||৩|| মাষমূলকপিষ্টান্নতিলক্ষীরগুডাশিনাম্ | ব্যবাযং চাপ্যজীর্ণেঽন্নে নিদ্রাং চ ভজতাং দিবা ||৪|| বিপ্রান্ গুরূন্ ধর্ষযতাং পাপং কর্ম চ কুর্বতাম্ | বাতাদযস্ত্রযো দুষ্টাস্ত্বগ্রক্তং মাংসমম্বু চ ||৫|| দূষযন্তি স কুষ্ঠানাং সপ্তকো দ্রব্যসঙ্গ্রহঃ | অতঃ কুষ্ঠানি জাযন্তে সপ্ত চৈকাদশৈব চ ||৬|| (চ. চি. অ. ৭) |

অষ্টাদশসঙ্খ্যারূপেণ তুল্যত্বাত্ কুষ্ঠনিদানমুচ্যতে| বিশেষেণ কুষ্ঠজনকং নিদানমাহ– বিরোধীনীত্যাদি| বিরোধীনি “ন মত্স্যান্ পযসাঽভ্যবহরেত্” (চ. সূ. অ. ২৬) ইত্যাদিনোক্তানি| ভজতামিতি পূর্বেণ সম্বধ্যতে| আগতামিতি উপস্থিতবেগাম্| বেগাংশ্চান্যানিতি মূত্রপুরীষাদিবেগান্| ব্যাযামমতিসন্তাপমতিভুক্ত্বেতি ভুক্ত্বা ব্যাযামমতিযুজ্য সন্তাপমতিযুজ্য চ নিষেবিণামিতি এতযোরেব সেবনশীলানাং; নিষেবিণামিত্যনেন সহ প্রথমতঃ সম্বন্ধে কৃদ্যোগলক্ষণা ষষ্ঠী স্যাত্, ততশ্চ ব্যাযামস্যাতিসন্তাপস্যাতিনিষেবিণামিতি প্রযোগঃ প্রসজ্যেত| “শীতোষ্ণলঙ্ঘনাহারান্ ক্রমং মুক্ত্বা নিষেবিণাম্” ইতি পাঠান্তরে শীতোষ্ণাদীনাং যদা যেন ক্রমেণ সেব্যত্বমুক্তং, তদ্বৈপরীত্যেন তান্ সেব্যমানান্| শীতোষ্ণলঙ্ঘনাহারানিত্যনন্তরং প্রতীতি দ্রষ্টব্যং, তেন শীতোষ্ণাদীন্ প্রতি যঃ ক্রমস্তং মুক্ত্বা এতেষামেব নিষেবিণাম্| ঘর্মশ্রমভযার্তানামিতি ঘর্মাদিভিরার্তত্বে সতি দ্রুতমবিশ্রম্য শীতাম্বুসেবিনাম্| ঘর্ম আতপঃ| অজীর্ণাধ্যশিনামিতি অজীর্ণমামমন্নম্, অপক্বমিতি যাবত্, তদ্ভুঞ্জানানাম্; অধ্যশিনামাহারে এবাপরিণতে ভুঞ্জানানাম্| অশিনামিতি অজীর্ণাধিশব্দাভ্যাং সহ সম্বন্ধ্যতে| পঞ্চকর্মাপচারিণামিতি পঞ্চকর্মণি ক্রিযমাণে অপচারিণাম্| নবান্নদধিমত্স্যানীতি অতিশব্দো নবান্নাদিভিঃ সর্বৈঃ সম্বধ্যতে| ব্যবাযং চাপ্যজীর্ণ ইতি বিদগ্ধাদিরূপে অজীর্ণে| ধর্ষযতামিতি অভিভবতাম্| পাপং কর্ম চ কুর্বতামিত্যনেনৈব বিপ্রাদিধর্ষণে লব্ধে পুনস্তদ্বচনং বিশেষার্থম্| দোষদূষ্যসঙ্গ্রহমাহ– বাতাদয ইত্যাদিনা| বাতাদীনাং ত্রিত্বে প্রতীতেঽপি ত্রয ইতি বচনং সর্বকুষ্ঠেষু মিলিতানামেব ত্রযাণাং দুষ্টিপ্রদর্শনার্থম্| দ্রব্যসঙ্গ্রহ ইতি দ্রব্যমারম্ভকং কারণমুচ্যতে; যথা– “রসনার্থো রসস্তস্য দ্রব্যমাপঃ ক্ষিতিস্তথা|” (চ. সূ. অ. ১) ইতি| অর্থলব্ধমপি সপ্তকমিতি পদং সর্বত্র সপ্তকনিযমার্থং পুনরুক্তম্| ননু, বিসর্পাণাং সমুত্পাদে এতাবত্যেব সামগ্রী, যদুক্তম্– “রক্তং লসীকা ত্বঙ্মাংসং দূষ্যং দোষাস্ত্রযো মলাঃ| বিসর্পাণাং সমুত্পত্তৌ বিজ্ঞেযাঃ সপ্ত ধাতবঃ||” (চ. চি. অ. ২১) ইতি| লসীকযা চ তত্রোদকমুচ্যতে, তত্ কিন্নিবন্ধনঃ কুষ্ঠবিসর্পযোর্ভেদঃ? উচ্যতে– কুষ্ঠং চিরক্রিযৈঃ স্থিরৈরপ্রবলরক্তপিত্তৈর্দোষৈর্জন্যতে, বিসর্পস্ত্বচিরবিসর্পণশীলৈঃ প্রবলরক্তপিত্তৈঃ; কুষ্ঠে গুরুপ্রধর্ষণপরদ্রব্যাপহারাদযো নিমিত্তং, ন বিসর্পে| অন্যে ত্বাহুঃ– বিসর্পা বাতাদিভিরেকৈকশোঽপি ভবন্তি, যদুক্তম্– “পৃথক্ ত্রযস্ত্রিভিশ্চৈকো বিসর্পা দ্বন্দ্বজাস্ত্রযঃ|” (চ. চি. অ. ২১) ইতি, কুষ্ঠং তু ত্রিদোষজমেবেতি| কিং ত্বেতত্সমাধানং ত্রিদোষজত্বেঽপি বিসর্পাণামেকদোষজকুষ্ঠবদেকদোষজত্বকীর্তনং সঙ্গতমিতি ন মনোহরম্| অতঃ কুষ্ঠানীতি অত ইত্যস্মাত্ দোষদূষ্যসমুদাযাত্| সপ্ত চৈকাদশৈব চেতি বিচ্ছেদপাঠেন সপ্তানাং মহাকুষ্ঠত্বমেকাদশানাং ক্ষুদ্রত্বমিতি বোধযতি||১-৬||

Adhikarana kuShThAnAM tridoShajatve~apyulbaNadoSheNa saptaprakAratA (7) · Śloka 7

কুষ্ঠানি সপ্তধা দোষৈঃ পৃথগ্দ্বন্দ্বৈঃ সমাগতৈঃ | সর্বেষ্বপি ত্রিদোষেষু ব্যপদেশোঽধিকস্ত্বতঃ ||৭|| (বা. নি. অ. ১৪) |

কুষ্ঠানাং ত্রিদোষজত্বেঽপি উল্বণদোষেণ সপ্তপ্রকারতামাহ– কুষ্ঠানীত্যাদি| দোষৈঃ পৃথক্ ত্রযঃ, দ্বন্দ্বৈস্ত্রযঃ, সমাগতৈঃ সন্নিপাতৈরেক ইতি সপ্তত্বম্| ব্যপদেশোঽধিকং ত্বতঃ ইতি যথা– বাতেন কুষ্ঠং কাপালমিত্যাদি||৭||

Adhikarana kuShThapUrvarUpam (8-9) · Śloka 9

অতিশ্লক্ষ্ণখরস্পর্শস্বেদাস্বেদবিবর্ণতাঃ | দাহঃ কণ্ডূস্ত্বচি স্বাপস্তোদঃ কোঠোন্নতির্ভ্রমঃ ||৮|| ব্রণানামধিকং শূলং শীঘ্রোত্পত্তিশ্চিরস্থিতিঃ | রূঢানামপি রূক্ষত্বং নিমিত্তঽল্পেঽতিকোপনম্ ||৯|| রোমহর্ষোঽসৃজঃ কার্ষ্ণ্যং কুষ্ঠলক্ষণমগ্রজম্ | (বা. নি. অ. ১৪) |

পূর্বরূপমাহ– অতিশ্লক্ষ্ণেত্যাদিনা| অতিশ্লক্ষ্ণঃ অতিমসৃণঃ| খরো রূক্ষঃ (খরঃ কর্কশঃ), অতিশ্লক্ষ্ণো বা খরো বা স্পর্শঃ| স্বেদাস্বেদৌ স্বেদবহস্রোতোঽবরোধানবরোধকৃতৌ| স্বাপঃ স্পর্শাজ্ঞানম্| কোঠোন্নতিঃ বরটীদষ্টসঙ্কাশঃ শোথঃ কোঠঃ, তস্যোন্নতিঃ| শীঘ্রোত্পত্তিশ্চিরস্থিতিশ্চ ব্রণানামেব| নিমিত্তেঽল্পেঽতিকোপনমিতি অন্যথাঽপি দুষ্টশোণিতত্বাদ্ব্রণানাং দেহগতানামল্পেঽপি হেতৌ কোপঃ| কুষ্ঠলক্ষণমগ্রজমিতি কুষ্ঠানাং পূর্বরূপমিত্যর্থঃ||৮-৯||–

Adhikarana kApAla-audumbara-maNDala-RuShyajihva-puNDarIka-sidhma-kAkaNakalakShaNam (10-16) · Śloka 16

কৃষ্ণারুণকপালাভং যদ্রূক্ষং পরুষং তনু ||১০|| কাপালং তোদবহুলং তত্কুষ্ঠং বিষমং স্মৃতম্ | রুগ্দাহরাগকণ্ডূভিঃ পরীতং রোমপিঞ্জরম্ ||১১|| উদুম্বরফলাভাসং কুষ্ঠমৌদুম্বরং বদেত্ | শ্বেতং রক্তং স্থিরং স্ত্যানং স্নিগ্ধমুত্সন্নমণ্ডলম্ ||১২|| কৃচ্ছ্রমন্যোন্যসংযুক্তং কুষ্ঠং মণ্ডলমুচ্যতে | কর্কশং রক্তপর্যন্তমন্তঃশ্যাবং সবেদনম্ ||১৩|| যদৃষ্যজিহ্বসংস্থানমৃষ্যজিহ্বং তদুচ্যতে | সশ্বেতং রক্তপর্যন্তং পুণ্ডরীকদলোপমম্ ||১৪|| সোত্সেধং চ সরাগং চ পুণ্ডরীকং তদুচ্যতে | শ্বেতং তাম্রং তনু চ যদ্রজো ঘৃষ্টং বিমুঞ্চতি ||১৫|| প্রাযশ্চোরসি তত্ সিধ্মমলাবুকুসুমোপমম্ | যত্ কাকণন্তিকাবর্ণং সপাকং তীব্রবেদনম্ ||১৬|| ত্রিদোষলিঙ্গং তত্ কুষ্ঠং কাকণং নৈব সিধ্যতি | (চ. চি. অ. ৭) |

সপ্তমহাকুষ্ঠানাং লক্ষণমাহ– কৃষ্ণারুণকপালাভমিত্যাদি| কৃষ্ণারুণকপালাভং কৃষ্ণারুণকপালবর্ণং, কপালং খর্পরশকলম্| পরুষং খরস্পর্শম্| তনু তনুত্বক্, বিষমং দুশ্চিকিত্স্যম্| ঔদুম্বরমাহ– রুগিত্যাদি| রোমপিঞ্জরমিতি রোমভিঃ পিঞ্জরং কপিলরোমমিত্যর্থঃ| মণ্ডলকুষ্ঠমাহ– শ্বেতেত্যাদি| স্থিরং কঠিনং, স্ত্যানমার্দ্রং সজলং বা| উত্সন্নমণ্ডলমুদ্গতমণ্ডলম্| কৃচ্ছ্রং কৃচ্ছ্রসাধ্যম্| অন্যোন্যসংযুক্তমিতি অপরাপরৈর্মিলিতম্| ঋষ্যজিহ্বমাহ– কর্কশমিত্যাদি| ঋষ্যজিহ্বসংস্থানমিতি ঋষ্যো নীলাণ্ডো হরিণঃ, ‘রোভু’ ইতি প্রসিদ্ধঃ, তস্য জিহ্বাকারম্| পুণ্ডরীকমাহ– সশ্বেতমিত্যাদি| পুণ্ডরীকদলোপমমিতি পুণ্ডরীকং রক্তপদ্মং তত্পত্রোপমং, তেন সশ্বেতং রক্তপর্যন্তম্| সরাগমিতি সলোহিতং, মধ্যে শ্বেতলোহিতমিত্যর্থঃ| সিধ্মলক্ষণমাহ– শ্বেতমিত্যাদি| শ্বেতং তাম্রমিতি শ্বেতলোহিতাত্মকম্| প্রাযশ্চোরসীত্যুরসি তদ্বাহুল্যেন ভবতি, কফপ্রধানত্বাত্| প্রাযোগ্রহণাদন্যত্রাপি ভবতি| কাকণমাহ– যদিত্যাদি| যত্ কাকণন্তিকাবর্ণমিতি কাকণন্তিকা গুঞ্জা| গুঞ্জাসবর্ণত্বেন চ মধ্যে কৃষ্ণমন্তে রক্তম্, অথবা মধ্যে রক্তমন্তে কৃষ্ণম্| কুষ্ঠত্বেনৈব ত্রিদোষলক্ষণত্বে সিদ্ধে ত্রিদোষলিঙ্গমিতি পুনরুক্তং প্রবলদোষত্রযলিঙ্গত্বোপদর্শনার্থম্| ইতি সপ্তমহাকুষ্ঠানি| মহত্ত্বং চৈষাং শীঘ্রমুত্তরোত্তরধাত্ববগাহনবহুদোষজত্বক্রিযাভূযস্ত্বযোগাত্||১০-১৬||–

Adhikarana ekakuShTha-carmAkhya-kiTibha-vaipAdika-alasaka-dadru-carmadala-pAmA-kacchu-visphoTa-shatAru-vicarcikAlakShaNam (17-22) · Śloka 22

অস্বেদনং মহাবাস্তু যন্মত্স্যশকলোপমম্ ||১৭|| তদেককুষ্ঠং, চর্মাখ্যং বহলং হস্তিচর্মবত্ | শ্যাবং কিণখরস্পর্শং পরুষং কিটিভং স্মৃতম্ ||১৮|| বৈপাদিকং পাণিপাদস্ফুটনং তীব্রবেদনম্ | কণ্ডূমদ্ভিঃ সরাগৈশ্চঃ গণ্ডৈরলসকং চিতম্ ||১৯|| সকণ্ডূরাগপিডকং দদ্রুমণ্ডলমুদ্গতম্ | রক্তং সশূলং কণ্ডূমত্ সস্ফোটং যদ্গলত্যপি | তচ্চর্মদলমাখ্যাতং সংস্পর্শাসহমুচ্যতে ||২০|| (চ. চি. অ. ৭) | সূক্ষ্মা বহ্ব্যঃ পিডকাঃ স্রাববত্যঃ পামেত্যুক্তাঃ কণ্ডুমত্যঃ সদাহাঃ | সৈব স্ফোটৈস্তীব্রদাহৈরুপেতা জ্ঞেযা পাণ্যোঃ কচ্ছুরুগ্রা স্ফিচোশ্চ ||২১|| স্ফোটাঃ শ্যাবারুণাভাসা বিস্ফোটাঃ স্যুস্তনুত্বচঃ | রক্তং শ্যাবং সদাহার্তি শতারুঃ স্যাদ্বহুব্রণম্ ||২২|| সকণ্ডূঃ পিডকা শ্যাবা বহুস্রাবা বিচর্চিকা | (চ. চি. অ. ৭) |

অতঃ পরমেকাদশক্ষুদ্রকুষ্ঠান্যুচ্যন্তে– অস্বেদনমিত্যাদি| মহাবাস্তু মহাস্থানম্| মত্স্যশকলোপমমিতি মত্স্যস্য ত্বক্সদৃশম্| চর্মাখ্যং চর্মকুষ্ঠম্| বহলমপত্তলম্| কিটিভমাহ– শ্যাবমিত্যাদি| কিণখরস্পর্শমিতি কিণো ব্রণস্থানম্| পরুষং রূক্ষম্| বৈপাদিকমিতি বিপাদিকাযাঃ স্বার্থেঽণ্| অলসকমাহ– কণ্ডূমদ্ভিরিত্যাদি| গণ্ডৈরিতি স্ফোটৈঃ| দদ্রুমণ্ডলমাহ– কণ্ড্বিত্যাদি| দদ্রুমণ্ডলমিতি মণ্ডলরূপতযোত্পাদাত্ দদ্রুমণ্ডলমিতি কীর্তনম্| ননু, কথমস্য চরকে ক্ষুদ্রত্বেনাভিধানং, সুশ্রুতে মহাকুষ্ঠে দদ্রোরুক্তত্বাত্; তথা সিধ্ম চরকে মহাকুষ্ঠে, সুশ্রুতে ক্ষুদ্রকুষ্ঠে দর্শিতম্| উচ্যতে– অসিতা দদ্রুরবগাঢমূলা সুশ্রুতে মহাকুষ্ঠম্, অসিতেতরদদ্রুশ্চরকেঽনবগাঢমূলা ক্ষুদ্রকুষ্ঠং, সুশ্রুতে অসিতেতরদদ্র্বা বিসর্পকুষ্ঠেঽন্তর্ভাবঃ, বিসর্পণযোগাত্; তথাঽবগাঢং সিধ্ম চরকে মহাকুষ্ঠং, সিধ্মপুষ্পিকা তু ত্বঙ্মাত্রগতা সুশ্রুতে ক্ষুদ্রকুষ্ঠম্; অসিতদদ্রৌ অসিতসিধ্মনোঽবরোধ ইতি গদাধরঃ| জেজ্জটস্ত্বাহ– চরকোক্তং সিধ্মৈব সুশ্রুতে দদ্রুশব্দাভিহিতং, নামভেদঃ কেবলং পরং ন বস্তুভেদঃ, সন্তি হ্যর্থান্তরাণি সমানশব্দাভিহিতানীত্যবিরোধঃ| কিন্ত্বিযমসাধ্বী ব্যাখ্যা, লক্ষণবৈলক্ষণ্যাত্; কিঞ্চ চরকসুশ্রুতযোঃ কুষ্ঠং প্রতি বহুপ্রকারো বিরোধঃ, তথাহি সুশ্রুতোক্তমরুণং ন চরকে পঠ্যতে, মণ্ডলং চরকোক্তং ন সুশ্রুতে, ক্ষুদ্রকুষ্ঠে চরকোক্তচর্মাখ্যালসকশতারুপ্রভৃতীনি ন সুশ্রুতে, সুশ্রুতোক্তক্ষুদ্রকুষ্ঠালসকাদযশ্চ ন চরকে; তস্মাদযং সমাধিরুচিতঃ– কুষ্ঠানামসঙ্খ্যেযত্বমিতি কেচিত্ চরকে, কেচিত্ সুশ্রুতে কুষ্ঠপ্রকারা উচ্যন্তে| উক্তং হি চরকে– “কুষ্ঠং সপ্তবিধম্, অষ্টাদশবিধম্, অসঙ্খ্যেযং বা|” (চ. নি. অ. ৫) ইতি| চর্মদলমাহ– রক্তমিত্যাদি| যদ্গলত্যপীতি গলতি বিদীর্যতে| শতারুমাহ– রক্তেত্যাদি| শতারুরিতি বহুব্রণযোগান্বিতং নাম| বিচর্চিকামাহ– সকণ্ড্বিত্যাদি| সকণ্ডূঃ পিডকা শ্যাবা বহুস্রাবা বিচর্চিকেতি অত্র কফকার্যং কণ্ডূঃ, বহুস্রাবত্বং পিত্তাত্, শ্যাবত্বং বাতাত্; এবং সর্বত্র দোষত্রযলিঙ্গমূহ্যম্| ননু, এককুষ্ঠমারভ্য বিচর্চিকাপর্যন্তেন দ্বাদশক্ষুদ্রকুষ্ঠানি ভবন্তি, তত্ কথমেকাদশেতি? উচ্যতে– বিচর্চিকৈব পাদযোর্ভবন্তী বিদারণযোগাদ্বিপাদিকা ভবতি, তেন ন সঙ্খ্যাতিরেকঃ| তথা চ ভোজঃ– “দোষাঃ প্রদূষ্য ত্বঙ্মাংসং পাণিপাদসমাশ্রিতাঃ| পিডকাং জনযন্ত্যাশু দাহকণ্ডূসমন্বিতাম্|| দাল্যতে ত্বক্ খরা রূক্ষা পাণ্যোর্জ্ঞেযা বিচর্চিকা| পাদে বিপাদিকা জ্ঞেযা স্থানান্যত্বাদ্বিচর্চিকা||” ইতি গদাধরঃ| অন্যে ত্বাহুঃ– সৈব স্ফোটৈস্তীব্রদাহৈরিত্যভিধানেন পামৈব তীব্রদাহবৃহত্স্ফোটযুক্তা কচ্ছূঃ, ন ততো ভিন্নেতি||১৭-২২||–

Adhikarana doShatrayaniyataM kuShThali~ggam (23-24) · Śloka 25

খরং শ্যাবারুণং রূক্ষং বাতাত্ কুষ্ঠং সবেদনম্ ||২৩|| পিত্তাত্ প্রক্বথিতং দাহরাগস্রাবান্বিতং মতম্ | কফাত্ ক্লেদি ঘনং স্নিগ্ধং সকণ্ডূশৈত্যগৌরবম্ ||২৪|| দ্বিলিঙ্গং দ্বন্দ্বজং কুষ্ঠং, ত্রিলিঙ্গং সান্নিপাতিকম্ |২৫|

দোষত্রযনিযতং কুষ্ঠলিঙ্গমাহ– খরং শ্যাবারুণমিত্যাদি| শ্যাবারুণমিতি শ্যাবং বা অরুণং বা ভবতি| চরকে কুষ্ঠমধিকৃত্য দোষবিশেষকুষ্ঠজনকহেতূনাং পরস্পরং জ্ঞাপ্যজ্ঞাপকত্বমুক্তং; যথা– “কুষ্ঠবিশেষৈর্দোষাঃ দোষবিশেষৈঃ পুনঃ কুষ্ঠানি| জ্ঞাযন্তে তে হেতুং হেতুস্তাংশ্চ প্রকাশযতি||” (চ. চি. অ. ৭) ইতি||২৩-২৪||–

Adhikarana tvagAdisaptadhAtugatakuShThasya lakShaNAni (25-30) · Śloka 30

ত্বক্স্থে বৈবর্ণ্যমঙ্গেষু কুষ্ঠে রৌক্ষ্যং চ জাযতে ||২৫|| ত্বক্স্বাপো রোমহর্ষশ্চ স্বেদস্যাতিপ্রবর্তনম্ | কণ্ডূর্বিপূযকশ্চৈব কুষ্ঠে শোণিতসংশ্রিতে ||২৬|| বাহুল্যং বক্ত্রশোষশ্চ কার্কশ্যং পিডকোদ্গমঃ | তোদঃ স্ফোটঃ স্থিরত্বং চ কুষ্ঠে মাংসসমাশ্রিতে ||২৭|| কৌণ্যং গতিক্ষযোঽঙ্গানাং সম্ভেদঃ ক্ষতসর্পণম্ | মেদঃস্থানগতে লিঙ্গং প্রাগুক্তানি তথৈব চ ||২৮|| নাসাভঙ্গোঽক্ষিরাগশ্চ ক্ষতেষু ক্রিমিসম্ভবঃ | স্বরোপঘাতশ্চ ভবেদস্থিমজ্জসমাশ্রিতে ||২৯|| দম্পত্যোঃ কুষ্ঠবাহুল্যাদ্দুষ্টশোণিতশুক্রযোঃ | যদপত্যং তযোর্জাতং জ্ঞেযং তদপি কুষ্ঠিতম্ ||৩০|| (সু. নি. অ. ৫) |

ইদানীমুত্তরোত্তরসপ্তধাতুগতকুষ্ঠস্য লক্ষণং ক্রমেণাহ– ত্বক্স্থে বৈবর্ণ্যমিত্যাদি| ত্বক্শব্দেনাত্র রসোঽভিধীযতে, ধাতুপ্রস্তাবাত্; ত্বক্শব্দেন রসস্যাভিধানং তাত্স্থ্যাত্; জেজ্জটস্তু ত্বচমেবাহ| বাহ্যাযাস্ত্বচশ্চরকে উদকধরত্বেনোক্তে রসগ্রহণস্যানর্হত্বাদ্দ্বিতীযাঽসৃগ্ধরাঽত্রোক্তা, উদকাচ্চ রসো ভিন্নঃ; তথাহ্যুক্তম্– “উদকং দশাঞ্জলিমিতং, রসো নবাঞ্জলিমিতঃ|” (চ. শা. অ. ৭) ইতি| রসং বিহায রক্তাদ্যুক্তিশ্চ প্রাগেব রসং ক্রোডীকৃত্য তির্যক্সিরাগতৈর্দোষৈঃ কুষ্ঠজননাত্, সিরাসু রক্তব্যবস্থিতেশ্চেতি তস্যাশযঃ| সাক্ষাদ্রস ইত্যনভিধানাদ্বৃহত্কুষ্ঠং রসগতং ন ভবতীতি নাশঙ্কনীযম্| যতঃ সুশ্রুতেনৈবোক্তম্– “তেষাং তু মহত্ত্বং সর্বধাত্বনুসারিত্বাত্|” (সু. নি. অ. ৫) ইতি, সর্বশব্দেন চ রসস্যাপি গ্রহণম্| ভোজেঽপ্যুক্তম্– “প্রদুষ্টাঃ প্রচ্যুতা দোষা রসাসৃঙ্মাংসসংশ্রিতাঃ| কুষ্ঠানি জনযন্ত্যাশু শরীরেষু শরীরিণাম্||” ইতি| “ত্বক্স্রাবো রোমহর্ষশ্চ স্বেদস্যাতিপ্রবর্তনম্|” ইতি| এতত্ কেচিত্ শোণিতগতস্যৈব লিঙ্গং মন্যন্তে, অন্যে রসগতস্যেতি| ইহ রৌক্ষ্যং স্বেদাতিপ্রবৃত্তির্লোমহর্ষশ্চ কুষ্ঠারম্ভকদোষৈঃ স্বেদবহস্রোতোদুষ্ট্যা ভবতি| যদুক্তম্– “স্বেদবাহিষু দুষ্টেষু পারুষ্যং রোমহর্ষণম্| অতিস্বেদনমস্বেদঃ পরিদাহশ্চ জাযতে||” ইতি| বিপূযক ইতি বিশেষেণ পূযযোগিত্বম্| কৌণ্যং করভঙ্গঃ| অঙ্গানাং সম্ভেদ ইতি অঙ্গানাং ভঙ্গঃ| প্রাগুক্তানি তথৈব চেতি রসরক্তমাংসধাতুগতকুষ্ঠলিঙ্গানীত্যর্থঃ; এতচ্চৈকত্রাভিহিতমপি ক্রমেণ পরাপরধাতুদুষ্টৌ পূর্বপূর্বধাতুদুষ্টিলিঙ্গখ্যাপনপরং, ন্যাযস্য সমানত্বাত্| যদুচ্যতে– “সমানেষ্বর্থেষ্বেকত্রাভিহিতো বিধিরন্যত্রাপ্যাসঞ্জনীযঃ|” ইতি শুক্রগতকুষ্ঠলিঙ্গমাহ– দম্পত্যোরিত্যাদি| কুষ্ঠং শুক্রগতমপত্যেন ব্যজ্যত ইত্যর্থঃ| অত্র শুক্রদুষ্টিলক্ষণপ্রস্তাবেন তত্তুল্যকার্যা স্ত্রীগতাঽঽর্তবদুষ্টিরপ্যুক্তা| তদপীত্যপিশব্দাত্ পূর্বোক্তান্যপি রসাদিমজ্জান্তর্গতকুষ্ঠলিঙ্গানি ভবন্তি| কুষ্ঠিতমিতি সঞ্জাতং কুষ্ঠমস্যেতি তারকাদিত্বাদিতচ্| অত্র দুষ্টং শুক্রমার্তবং বা সর্বথা বীজত্বানুপঘাতাদপত্যজনকং, পরন্তু বিকৃতং জনযতীতি দ্রষ্টব্যম্||২৫-৩০||

Adhikarana kuShThasya sAdhyAsAdhyavicAraH (31-32) · Śloka 32

সাধ্যং ত্বগ্রক্তমাংসস্থং বাতশ্লেষ্মাধিকং চ যত্ | মেদসি দ্বন্দ্বজং যাপ্যং বর্জ্যং মজ্জাস্থিসংশ্রিতম্ ||৩১|| ক্রিমিতৃড্দাহমন্দাগ্নিসংযুক্তং যত্ত্রিদোষজম্ | প্রভিন্নং প্রস্রুতাঙ্গং চ রক্তনেত্রং হতস্বরম্ ||৩২|| পঞ্চকর্মগুণাতীতং কুষ্ঠং হন্তীহ মানবম্ | (সু. সূ. অ. ৩৩) |

সাধ্যাদিভেদমাহ– সাধ্যং ত্বগ্রক্তমাংসস্থমিত্যাদি| বাতশ্লেষ্মাধিকং চ যদিতি এককুষ্ঠকিটিভাদিবর্জ্যম্| মজ্জাস্থিসংশ্রিতমিতি অত্র মজ্জাস্থিপ্রত্যাসত্ত্যা শুক্রগতস্যাপ্যসাধ্যত্বং বোদ্ধব্যম্| প্রভিন্নমিতি বিদীর্ণম্| পঞ্চকর্মগুণাতীতমিতি পূর্বরূপক্রিযযা সহ রসাদিধাতূনাং চতুর্ণাং ক্রিযাকলাপাঃ পঞ্চকর্মাণি, তেষাং গুণা বীর্যাণি, তান্যতীতো যঃ স তথা, অস্থিমজ্জাগত ইত্যর্থঃ; তাশ্চ ক্রিযাঃ পূর্বরূপে শোধনমুভযতঃ; ত্বক্প্রাপ্তে শোধনালেপনাদি, রক্তপ্রাপ্তে শোধনালেপনকষাযপানশোণিতাবসেকাদি, এবং মাংসমেদসোরপি দ্রষ্টব্যমিতি| অথবা পঞ্চকর্মাণি বমনাদীনি, তেষাং গুণাঃ ফলানি, তান্যতীতম্||৩১-৩২||–

Adhikarana kuShTheShu pradhAnadoShavyapadeshaH (33-36) · Śloka 36

বাতেন কুষ্ঠং কাপালং পিত্তেনৌদুম্বরং কফাত্ ||৩৩|| মণ্ডলাখ্যং বিচর্চী চ ঋষ্যাখ্যং বাতপিত্তজম্ | চর্মৈককুষ্ঠং কিটিভং সিধ্মালসবিপাদিকাঃ ||৩৪|| বাতশ্লেষ্মোদ্ভবাঃ শ্লেষ্মপিত্তাদ্দদ্রুশতারুষী | পুণ্ডরীকং সবিস্ফোটং পামা চর্মদলং তথা ||৩৫|| সর্বৈঃ স্যাত্ কাকণং পূর্বত্রিকং দদ্রু সকাকণম্ | পুণ্ডরীকর্ষ্যজিহ্বে চ মহাকুষ্ঠানি সপ্ত তু ||৩৬|| (বা. নি. অ. ১৪) |

কুষ্ঠেষু চিকিত্সার্থং প্রধানং দোষমাহ– বাতেন কুষ্ঠং কাপালমিত্যাদি| বিচর্চ্যপি কফাত্তথেতি শ্লেষ্মপিত্তাত্, তেন দদ্রুপ্রভৃতি চর্মদলান্তং শ্লেষ্মপিত্তজমিত্যর্থঃ| পূর্বত্রিকমিতি কাপালোদুম্বরমণ্ডলাখ্যম্| অতঃ সপ্তমহাকুষ্ঠাদন্যত্ ক্ষুদ্রকুষ্ঠম্||৩৩-৩৬||

Adhikarana kilAsalakShaNam (37-39) · Śloka 39

কুষ্ঠৈকসম্ভবং শ্বিত্রং কিলাসং বারুণং ভবেত্ | নির্দিষ্টমপরিস্রাবি ত্রিধাতূদ্ভবসংশ্রযম্ ||৩৭|| বাতাদ্রূক্ষারুণং, পিত্তাত্তাম্রং কমলপত্রবত্ | সদাহং রোমবিধ্বংসি কফাচ্ছ্বেতং ঘনং গুরু ||৩৮|| সকণ্ডূরং ক্রমাদ্রক্তমাংসমেদঃসু চাদিশেত্ | বর্ণেনৈবেদৃগুভযং কৃচ্ছ্রং তচ্চোত্তরোত্তরম্ ||৩৯|| (বা. নি. অ. ১৪) |

ত্বগ্দুষ্টিতুল্যত্বাদত্রৈব কিলাসমাহ– কুষ্ঠৈকসম্ভবমিত্যাদি| কুষ্ঠেন সহ একং সমানং বিরুদ্ধাশনপাপকর্মাদি সম্ভবো নিদানং যস্য তত্তথা, কুষ্ঠেন সহ সমানচিকিত্সিতত্বং চ বোদ্ধব্যং, “কুর্যাচ্চাস্মৈ কুষ্ঠোক্তং বিধানম্” ইতি বচনাত্| চরকে ত্বস্য হেতুবিশেষোঽপি পঠ্যতে, যথা– “বচাংস্যতথ্যানি কৃতঘ্নভাবো নিন্দা গুরূণাং গুরুধর্ষণং চ| পাপক্রিযা পূর্বকৃতং চ কর্ম হেতুঃ কিলাসস্য বিরোধি চান্নম্||” (চ. চি. অ. ৭) ইতি| কিলাসমেব মাংসমেদঃসমাশ্রযণযোগত্বাদরুণং শ্বিত্রং চ ভণ্যতে| ত্বগ্গতমেব কিলাসং, তস্য লক্ষণং নির্দিষ্টমপরিস্রাবীতি| স্রাবো হি রক্তাদিদুষ্ট্যা ভবতি, তেনাস্য ত্বগ্গতত্বেন স্রাবাভাবঃ| উক্তং চ– “ত্বগ্গতং চ যদস্রাবি তত্ কিলাসং প্রকীর্তিতম্|” ইতি| ত্রিধাতূদ্ভবসংশ্রযমিতি ত্রিধাতুস্ত্রযো দোষাস্তথা রক্তমাংসমেদাংসি সংশ্রযোঽধিষ্ঠানং যস্য তত্তথা; অথবা ত্রিধাতুঃ রক্তমাংসমেদাংসি উদ্ভবায সংশ্রযো যস্য তত্তথা, দোষাস্তু সর্বসাধারণত্বাত্ লভ্যন্ত এব| ননু, যদি ধাতুত্রযাশ্রিতং কিলাসং, তত্ কথং “যদা ত্বচমতিক্রম্য তদ্ধাতূনবগাহতে| হিত্বা কিলাসসঞ্জ্ঞাং চ কুষ্ঠসঞ্জ্ঞাং লভেত্তদা||” ইতি বিশ্বামিত্রবচনং কিলাসসঞ্জ্ঞাপ্রতিক্ষেপকং ন বিরুধ্যতে? তথা “ত্বগ্গতমেব কিলাসং” (সু. নি. অ. ৫) ইতি সুশ্রুতেঽবধারণং বিরুদ্ধম্? উচ্যতে– বিশ্বামিত্রবচনস্য তাবদযমর্থঃ প্রত্যেতব্যঃ– যদোক্তরক্তাদিগতসমস্তকুষ্ঠলক্ষণজনকতযা ধাতূনবগাহতে তদা ন তত্ কিলাসং, কিং তর্হি কুষ্ঠজনকহেত্বন্তরবৃংহিতদোষোপপ্লবাত্ ধাতূন্ দূষযেত্, তথা হেতুলক্ষ্যলক্ষণমরুণাদিকুষ্ঠং তত্; অন্যদিতররক্তাদিগতকুষ্ঠলিঙ্গব্যতিরিক্তমুত্পাদসমকালভাবিরক্ততাম্রাদি-বর্ণতামাত্রকারকং রক্তাদিগতদোষজন্যং কিলাসমেব, অন্যথা রক্তাদিগতকিলাসলক্ষণেন চরকোক্তেন বিরোধঃ স্যাত্| স যদাহ– “দোষে রক্তাশ্রিতে রক্তং, তাম্রং মাংসসমাশ্রিতে| শ্বেতং মেদঃস্থিতে শ্বিত্রং, গুরু তচ্চোত্তরোত্তরম্||” (চ. চি. অ. ৭) ইতি| চরকে হি কিলাসস্যৈব ধাতুত্রযসম্বন্ধকৃতবর্ণেন দারুণাদিসঞ্জ্ঞান্তরমাত্রং কৃতং, সুশ্রুতেঽপি ত্বগ্গতমেবেত্যনেন রক্তাদিদুষ্ট্যা বিশিষ্টরক্তাদিগতমহাকুষ্ঠলিঙ্গরহিতত্বং, তথা ক্ষুদ্রকুষ্ঠবদ্যুগপদ্রক্তলসীকাত্বঙ্মাংসসন্দূষকত্ববিরহঃ খ্যাপ্যতে; অথবা এবকারোঽযোগব্যবচ্ছেদে, যথা– নীলং সরোজং ভবত্যেবেতি| উক্তপ্রকারেণ ধাতুত্রযমাত্রগতত্বেনৈকদোষজত্বেন চাস্য কুষ্ঠাদ্ভেদঃ; “শ্বিত্রসঞ্জ্ঞাং লভেত্তদা” ইতি জেজ্জটপাঠে তু শ্বিত্রসঞ্জ্ঞামাত্রব্যবহারঃ কিলাসস্য, ন পুনরর্থভেদঃ কশ্চিদিতি| ভালুকিনা তু ধাতুভেদেন কিলাসস্য সঞ্জ্ঞান্তরং দর্শিতম্– “বারুণং তত্তু বিজ্ঞেযং মাংসধাতুসমাশ্রযম্| মেদঃশ্রিতং ভবেচ্ছ্বিত্রং, দারুণং রক্তসংশ্রযম্||” ইতি| তথা চরকেঽপি– “দারুণং বারুণং শ্বিত্রং কিলাসং নামভিস্ত্রিভিঃ|” (চ. চি. অ. ৭) ইতি| তেনেহাপি তথা বোদ্ধব্যম্| ক্রমাদ্রক্তমাংসমেদঃসু চাদিশেদ্বর্ণেনৈবেদৃগুভযমিতি ঈদৃশমেব বর্ণেনারুণং তাম্রং শ্বেতং চ কিলাসং রক্তমাংসমেদঃসু যথাক্রমেণাদিশেত্| উভযমিতি ব্রণজং দোষজং চ তচ্ছ্বিত্রং ভবতি, তথাচ ভোজঃ– “শ্বিত্রং তু দ্বিবিধং বিদ্যাদ্দোষজং ব্রণজং তথা| তত্র মিথ্যোপচারাদ্ধি ব্রণস্য ব্রণজং স্মৃতম্|| দোষজং চ দ্বিধা প্রোক্তমাত্মজং পরজং তথা| পরসংস্কারসংস্পর্শাদ্যত্তত্ পরজমুচ্যতে| তদাত্মজং বিজানীযাদ্যদ্দেহেষ্বনিলাদিজম্||” ইতি| রক্তাদিধাতুত্রযগতস্য চ কিলাসস্য দূষ্যপ্রভাবাদ্যস্য কস্যাপি দোষস্য সম্বন্ধনিযতা এবারুণাদযো বর্ণা বোদ্ধব্যাঃ, যদি তু তত্র দোষনিযতো বর্ণঃ কল্প্যতে তদা বর্ণাতিদেশো ব্যর্থঃ স্যাত্, বাতাদ্রূক্ষারুণমিত্যাদিনৈব সিদ্ধত্বাত্| যদ্যেবং দোষেণাত্র বর্ণাভিধানং বিফলং, নির্বিষযত্বাত্; নৈবং, ত্বঙ্মাত্রগতে কিলাসে দোষবর্ণস্য চরিতার্থত্বাত্| হন্ত তর্হি কথং রক্তাদিগতত্বমস্য নিশ্চেতব্যং? ত্বগ্গতে স্বভাবেনারুণাদিবর্ণস্য সদ্ভাবেন সন্দিগ্ধত্বাত্| উচ্যতে– ক্রমেণারুণাদিবর্ণোত্পাদাদ্রক্তাদিগতত্বং নিশ্চেতব্যম্, উত্পত্তিমাত্রে ত্বরুণাদিযোগাত্ত্বগ্গতত্বমিতি||৩৭-৩৯||

Adhikarana kilAsasya sAdhyAsAdhya vicAraH (40-41) · Śloka 41

অশুক্লরোমাঽবহুলমসংশ্লিষ্টমথো নবম্ | অনগ্নিদগ্ধজং সাধ্যং শ্বিত্রং বর্জ্যমতোঽন্যথা ||৪০|| গুহ্যপাণিতলৌষ্ঠেষু জাতমপ্যচিরন্তনম্ | বর্জনীযং বিশেষেণ কিলাসং সিদ্ধিমিচ্ছতা ||৪১|| (অ. সং. নি. অ. ১৪) |

তস্য সাধ্যত্বমসাধ্যত্বং চাহ– অশুক্লেত্যাদি| অশুক্লরোম কৃষ্ণরোম, অবহুলং তনু, অসংশ্লিষ্টং পরস্পরমসংযুক্তম্, অনগ্নিদগ্ধজং অগ্নিদগ্ধজং যন্ন ভবতি, এতত্ সাধ্যম্| অতোঽন্যথা অতোঽন্যথোক্তসর্বপ্রকারমসাধ্যং, চরকেঽপ্যেবংবিধস্যাসাধ্যত্বমুক্তম্| যথা– “যচ্ছুক্লরোম বহুলং যত্ সংলগ্নং পরস্পরম্| যচ্চ বর্ষগণোপেতং তচ্ছ্বিত্রং নৈব সিধ্যতি||” (চ. চি. অ. ৭) ইতি| গুহ্যপাণিতলৌষ্ঠেষ্বিতি তলমত্র পাদতলং সুশ্রুতে ‘অন্তে জাতম্’ ইতি সামান্যেন নির্দেশাত্||৪০-৪১||

Adhikarana kuShThAdInAM saMsargajatvam (42-43) · Śloka 43

প্রসঙ্গাদ্গাত্রসংস্পর্শান্নিঃশ্বাসাত্ সহভোজনত্ | একশয্যাসনাচ্চৈব বস্ত্রমাল্যানুপলেনাত্ ||৪২|| কুষ্ঠং জ্বরশ্চ শোষশ্চ নেত্রাভিষ্যন্দ এব চ | ঔপসর্গিকরোগাশ্চ সঙ্ক্রামন্তি নরান্নরম্ ||৪৩|| (সু. নি. অ. ৫) |

কুষ্ঠস্য সংসর্গজপ্রসঙ্গেন সর্বানেব সংসর্গজান্ রোগানাহ– প্রসঙ্গাদিত্যাদি| প্রসঙ্গো মৈথুনম্, অথবা প্রসঙ্গঃ সাতত্যং; তেন কৃতাত্ গাত্রসংস্পর্শাদেঃ| ঔপসর্গিকরোগা ইতি ঔপসর্গিকাঃ পাপরোগাদযো ভূতোপসর্গজাশ্চ| সঙ্ক্রামন্তি আবিশন্তি| রোগসঙ্ক্রান্তিশ্চ কুষ্ঠিপ্রভৃতিপাপিজনসংসর্গেণ পাপসঙ্ক্রান্তের্বিকারপ্রভাবাদ্বা বোদ্ধব্যা||৪২-৪৩||

Adhikarana puShpikA · Śloka 49

ইতি শ্রীমাধবকরবিরচিতে মাধবনিদানে কুষ্ঠনিদানং সমাপ্তম্ ||৪৯||

ইতি শ্রীকণ্ঠদত্তকৃতাযাং মধুকোশব্যাখ্যাযাং কুষ্ঠনিদানং সমাপ্তম্||৪৯||