৪৯. কুষ্ঠনিদানম্

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অষ্টাদশসঙ্খ্যারূপেণ তুল্যত্বাত্ কুষ্ঠনিদানমুচ্যতে| বিশেষেণ কুষ্ঠজনকং নিদানমাহ– বিরোধীনীত্যাদি| বিরোধীনি “ন মত্স্যান্ পযসাঽভ্যবহরেত্” (চ. সূ. অ. ২৬) ইত্যাদিনোক্তানি| ভজতামিতি পূর্বেণ সম্বধ্যতে| আগতামিতি উপস্থিতবেগাম্| বেগাংশ্চান্যানিতি মূত্রপুরীষাদিবেগান্| ব্যাযামমতিসন্তাপমতিভুক্ত্বেতি ভুক্ত্বা ব্যাযামমতিযুজ্য সন্তাপমতিযুজ্য চ নিষেবিণামিতি এতযোরেব সেবনশীলানাং; নিষেবিণামিত্যনেন সহ প্রথমতঃ সম্বন্ধে কৃদ্যোগলক্ষণা ষষ্ঠী স্যাত্, ততশ্চ ব্যাযামস্যাতিসন্তাপস্যাতিনিষেবিণামিতি প্রযোগঃ প্রসজ্যেত| “শীতোষ্ণলঙ্ঘনাহারান্ ক্রমং মুক্ত্বা নিষেবিণাম্” ইতি পাঠান্তরে শীতোষ্ণাদীনাং যদা যেন ক্রমেণ সেব্যত্বমুক্তং, তদ্বৈপরীত্যেন তান্ সেব্যমানান্| শীতোষ্ণলঙ্ঘনাহারানিত্যনন্তরং প্রতীতি দ্রষ্টব্যং, তেন শীতোষ্ণাদীন্ প্রতি যঃ ক্রমস্তং মুক্ত্বা এতেষামেব নিষেবিণাম্| ঘর্মশ্রমভযার্তানামিতি ঘর্মাদিভিরার্তত্বে সতি দ্রুতমবিশ্রম্য শীতাম্বুসেবিনাম্| ঘর্ম আতপঃ| অজীর্ণাধ্যশিনামিতি অজীর্ণমামমন্নম্, অপক্বমিতি যাবত্, তদ্ভুঞ্জানানাম্; অধ্যশিনামাহারে এবাপরিণতে ভুঞ্জানানাম্| অশিনামিতি অজীর্ণাধিশব্দাভ্যাং সহ সম্বন্ধ্যতে| পঞ্চকর্মাপচারিণামিতি পঞ্চকর্মণি ক্রিযমাণে অপচারিণাম্| নবান্নদধিমত্স্যানীতি অতিশব্দো নবান্নাদিভিঃ সর্বৈঃ সম্বধ্যতে| ব্যবাযং চাপ্যজীর্ণ ইতি বিদগ্ধাদিরূপে অজীর্ণে| ধর্ষযতামিতি অভিভবতাম্| পাপং কর্ম চ কুর্বতামিত্যনেনৈব বিপ্রাদিধর্ষণে লব্ধে পুনস্তদ্বচনং বিশেষার্থম্| দোষদূষ্যসঙ্গ্রহমাহ– বাতাদয ইত্যাদিনা| বাতাদীনাং ত্রিত্বে প্রতীতেঽপি ত্রয ইতি বচনং সর্বকুষ্ঠেষু মিলিতানামেব ত্রযাণাং দুষ্টিপ্রদর্শনার্থম্| দ্রব্যসঙ্গ্রহ ইতি দ্রব্যমারম্ভকং কারণমুচ্যতে; যথা– “রসনার্থো রসস্তস্য দ্রব্যমাপঃ ক্ষিতিস্তথা|” (চ. সূ. অ. ১) ইতি| অর্থলব্ধমপি সপ্তকমিতি পদং সর্বত্র সপ্তকনিযমার্থং পুনরুক্তম্| ননু, বিসর্পাণাং সমুত্পাদে এতাবত্যেব সামগ্রী, যদুক্তম্– “রক্তং লসীকা ত্বঙ্মাংসং দূষ্যং দোষাস্ত্রযো মলাঃ| বিসর্পাণাং সমুত্পত্তৌ বিজ্ঞেযাঃ সপ্ত ধাতবঃ||” (চ. চি. অ. ২১) ইতি| লসীকযা চ তত্রোদকমুচ্যতে, তত্ কিন্নিবন্ধনঃ কুষ্ঠবিসর্পযোর্ভেদঃ? উচ্যতে– কুষ্ঠং চিরক্রিযৈঃ স্থিরৈরপ্রবলরক্তপিত্তৈর্দোষৈর্জন্যতে, বিসর্পস্ত্বচিরবিসর্পণশীলৈঃ প্রবলরক্তপিত্তৈঃ; কুষ্ঠে গুরুপ্রধর্ষণপরদ্রব্যাপহারাদযো নিমিত্তং, ন বিসর্পে| অন্যে ত্বাহুঃ– বিসর্পা বাতাদিভিরেকৈকশোঽপি ভবন্তি, যদুক্তম্– “পৃথক্ ত্রযস্ত্রিভিশ্চৈকো বিসর্পা দ্বন্দ্বজাস্ত্রযঃ|” (চ. চি. অ. ২১) ইতি, কুষ্ঠং তু ত্রিদোষজমেবেতি| কিং ত্বেতত্সমাধানং ত্রিদোষজত্বেঽপি বিসর্পাণামেকদোষজকুষ্ঠবদেকদোষজত্বকীর্তনং সঙ্গতমিতি ন মনোহরম্| অতঃ কুষ্ঠানীতি অত ইত্যস্মাত্ দোষদূষ্যসমুদাযাত্| সপ্ত চৈকাদশৈব চেতি বিচ্ছেদপাঠেন সপ্তানাং মহাকুষ্ঠত্বমেকাদশানাং ক্ষুদ্রত্বমিতি বোধযতি||১-৬||

আতঙ্কদর্পণ ব্যাখ্যা (বাচস্পতি বৈদ্য কৃত)

অষ্টাদশরূপসঙ্খ্যাতুল্যত্বাত্কুষ্ঠনিদানমুচ্যতে| বিশেষেণ কুষ্ঠজনকং নিদানমাহ– বিরোধীনীত্যাদি| এতদাচরতাং নৃণাং কুষ্ঠানি জাযন্তে ইতি সম্বন্ধঃ| বিরোধীনি ক্ষীরমত্স্যাদীনি ভজতামিতি সম্বধ্যতে| আগতামিতি উপস্থিতবেগাং ছর্দিং, তথা বেগাংশ্চান্যানিতি মূত্রপুরীষাদিবেগান্, প্রতিঘ্নতাং প্রতিঘাতং কুর্বতাম্| ব্যাযামমতিসন্তাপমতিভুক্ত্বেতি ভুক্ত্বা ব্যাযামমতিযুজ্য সন্তাপমতিযুজ্য নিষেবিণামিতি| এতযোরেব সেবনশীলানাং, নিষেবিণামিত্যনেন প্রথমতঃ সম্বন্ধে কৃদ্যোগলক্ষণা ষষ্ঠী স্যাত্; তত্র ব্যাযামস্যাতিসন্তাপস্যাতিনিষেবিণামিতি প্রযোগঃ প্রযুজ্যতে| শীতেত্যাদি শীতোষ্ণাদীনাং তু যদা যেন ক্রমেণ সেব্যত্বমুক্তং, তদ্বৈপরীত্যেন তান্ সেবমানানাম্| ঘর্ম আতপঃ| অজীর্ণাধ্যশিনামিত্যাদি| অজীর্ণমনগ্নিপক্বমন্নং, চর্বণমিতি যাবত্, তদ্ভোজিনাম্| অধ্যশিনাম্, আহার এবাপরিণতে ভুঞ্জানানাম্| অশিনামিতি অজীর্ণাধিভ্যাং সহ সম্বধ্যতে| পঞ্চকর্মাপচারিণামিতি পঞ্চ কর্মাণি বমনবিরেকাদীনি, তেষামপচারিণাং ব্যাপত্ত্বযোগিনাম্| নবান্নদধিমত্স্যাতীতি, অতিশব্দো নবান্নাদিগুডান্তৈঃ প্রত্যেকং সম্বধ্যতে| ব্যবাযং চাপ্যজীর্ণেঽন্নে ইত্যাদি| ব্যবাযং মৈথুনং, বিদগ্ধরূপে অজীর্ণে; দিবা চ নিদ্রাং ভজতাম্| ধর্ষযতামিতি অভিভবতাম্| পাপং কর্ম চ কুর্বতামিত্যনেনৈব বিপ্রাদিধর্ষণে লব্ধে পুনস্তদ্বচনং বিশেষার্থপ্রতিপাদকম্| দোষদূষ্যসঙ্গ্রহমাহ– বাতাদয ইত্যাদি| বাতাদীনাং ত্রিত্বে প্রতীতেঽপি ত্রয ইতি বচনং সর্বকুষ্ঠেষু মিলিতানামেব ত্রযাণাং দুষ্টিপ্রদর্শনার্থম্| দ্রব্যসঙ্গ্রহ ইতি দ্রব্যমারম্ভকং কারণমুচ্যতে| যথা– “রসনার্থো রসস্তস্য দ্রব্যমাপঃ ক্ষিতিস্তথা|” ইতি| অর্থলব্ধমপি সপ্তকমিতি পদং সর্বত্র সপ্তকনিযমার্থং পুনরুক্তম্| ননু, বিসর্পাণামপ্যুত্পত্ত্যাদৌ এতাবত্যেব সামগ্রী| যদুক্তম্– “রক্তং লসীকা ত্বঙ্মাংসং দূষ্যং দোষাস্ত্রযো মলাঃ| বিসর্পাণাং সমুত্পত্তৌ বিজ্ঞেযাঃ সপ্ত ধাতবঃ||” ইতি| তত্কুষ্ঠবিসর্পযোঃ কো ভেদঃ? উচ্যতে– কুষ্ঠং চিরক্রিযৈঃ স্থিরৈরপ্রবলরক্তপিত্তৈর্দোষৈর্জন্যতে, বিসর্পস্ত্বচিরবিসরণশীলৈঃ প্রবলরক্তপিত্তৈঃ, কুষ্ঠে গুরুপ্রধর্ষণপরদ্রব্যাপহারাদযো নিমিত্তং, ন বিসর্পে| অন্যে ত্বাহুঃ– বিসর্পা বাতাদিভিরেকৈকশোঽপি ভবন্তি, যদুক্তম্– “পৃথক্ত্রযস্ত্রিভিশ্চৈকো বিসর্পা দ্বন্দ্বজাস্ত্রযঃ|” ইতি; কুষ্ঠং ত্রিদোষজমেবেতি| কিন্ত্বযং সমাধিঃ ত্রিদোষজত্বেঽপি বিসর্পাণামেকদোষকুষ্ঠবদেকদোষজত্বকীর্তনং সঙ্গতমিতি ন মনোহরম্| কুষ্ঠসঙ্খ্যামাহ– অত ইত্যাদি| অত ইত্যস্মাদ্দোষদূষ্যসমুদাযাত্সপ্ত তথা একাদশ কুষ্ঠানি জাযন্তে| সপ্ত চৈকাদশৈবেতি বিচ্ছেদপাঠেন সপ্তানাং মহাকুষ্ঠত্বমেকদশানাং ক্ষুদ্রত্বমিতি বোধযতি||১-৬||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কুষ্ঠানাং ত্রিদোষজত্বেঽপি উল্বণদোষেণ সপ্তপ্রকারতামাহ– কুষ্ঠানীত্যাদি| দোষৈঃ পৃথক্ ত্রযঃ, দ্বন্দ্বৈস্ত্রযঃ, সমাগতৈঃ সন্নিপাতৈরেক ইতি সপ্তত্বম্| ব্যপদেশোঽধিকং ত্বতঃ ইতি যথা– বাতেন কুষ্ঠং কাপালমিত্যাদি||৭||

আতঙ্কদর্পণ ব্যাখ্যা (বাচস্পতি বৈদ্য কৃত)

কুষ্ঠানাং ত্রিদোষজত্বেঽপ্যুদ্রেকদোষেণ সপ্তপ্রকারত্বমাহ– কুষ্ঠানীত্যাদি| কুষ্ঠানি সপ্তধা সপ্তপ্রকারাণি, কথমিত্যাহ পৃথগ্দোষৈঃ বাতেন, পিত্তেন, শ্লেষ্মণা, ত্রীণি; তথা তৈরেব দোষৈর্দ্বন্দ্বৈর্বাতপিত্তাভ্যাং, বাতকফাভ্যাং, কফপিত্তাভ্যাং ত্রীণি, তথা তৈরেব দোষৈঃ সমাগতৈঃ সন্নিপতিতৈরেকম্, ইতি সপ্তত্বম্| নন্বেবং সত্যেকদোষজং দ্বিদোষজং কুষ্ঠং তত্সর্বং ত্রিদোষজং স্যাদিত্যাহ– সর্বেষ্বিত্যাদি| সর্বেষ্বপি কুষ্ঠেষু ত্রিদোষজেষু সত্স্বধিকত্বতঃ অধিকত্বাদ্ব্যপদেশো নির্দেশঃ কার্যঃ, সন্নিপাতস্য সমবিষমত্বাত্; যথা– বাতেন কুষ্ঠং কাপালমিত্যাদি||৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

পূর্বরূপমাহ– অতিশ্লক্ষ্ণেত্যাদিনা| অতিশ্লক্ষ্ণঃ অতিমসৃণঃ| খরো রূক্ষঃ (খরঃ কর্কশঃ), অতিশ্লক্ষ্ণো বা খরো বা স্পর্শঃ| স্বেদাস্বেদৌ স্বেদবহস্রোতোঽবরোধানবরোধকৃতৌ| স্বাপঃ স্পর্শাজ্ঞানম্| কোঠোন্নতিঃ বরটীদষ্টসঙ্কাশঃ শোথঃ কোঠঃ, তস্যোন্নতিঃ| শীঘ্রোত্পত্তিশ্চিরস্থিতিশ্চ ব্রণানামেব| নিমিত্তেঽল্পেঽতিকোপনমিতি অন্যথাঽপি দুষ্টশোণিতত্বাদ্ব্রণানাং দেহগতানামল্পেঽপি হেতৌ কোপঃ| কুষ্ঠলক্ষণমগ্রজমিতি কুষ্ঠানাং পূর্বরূপমিত্যর্থঃ||৮-৯||–

আতঙ্কদর্পণ ব্যাখ্যা (বাচস্পতি বৈদ্য কৃত)

পূর্বরূপমাহ– অতীত্যাদি| অতিশ্লক্ষ্ণাদিকং কুষ্ঠলক্ষণমপ্রজমিতি কুষ্ঠানাং পূর্বরূপমিত্যর্থঃ| অতিশ্লক্ষ্ণ ইতি অতিমসৃণঃ, খরো রূক্ষঃ, অতিশ্লক্ষ্ণো বা খরঃ স্পর্শঃ| স্বেদাঽস্বেদাবিতি স্বেদবহস্রোতোবরোধানবরোধকৃতৌ| বিবর্ণতা বৈবর্ণ্যং, দাহঃ সর্বাঙ্গীণঃ, কণ্ডূঃ ত্বচি, স্বাপঃ স্পর্শাজ্ঞত্বং, কোঠোন্নতিঃ বরটীদংশসঙ্কাশঃ শোফঃ কোঠঃ তস্যোন্নতিঃ, শ্রমোঽনাযাসজঃ| শীঘ্রোত্পত্তিশ্চিরস্থিতিঃ ব্রণানামেব| অল্পেঽপি নিমিত্তে কোপো ব্রণানাম্||৮-৯||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সপ্তমহাকুষ্ঠানাং লক্ষণমাহ– কৃষ্ণারুণকপালাভমিত্যাদি| কৃষ্ণারুণকপালাভং কৃষ্ণারুণকপালবর্ণং, কপালং খর্পরশকলম্| পরুষং খরস্পর্শম্| তনু তনুত্বক্, বিষমং দুশ্চিকিত্স্যম্| ঔদুম্বরমাহ– রুগিত্যাদি| রোমপিঞ্জরমিতি রোমভিঃ পিঞ্জরং কপিলরোমমিত্যর্থঃ| মণ্ডলকুষ্ঠমাহ– শ্বেতেত্যাদি| স্থিরং কঠিনং, স্ত্যানমার্দ্রং সজলং বা| উত্সন্নমণ্ডলমুদ্গতমণ্ডলম্| কৃচ্ছ্রং কৃচ্ছ্রসাধ্যম্| অন্যোন্যসংযুক্তমিতি অপরাপরৈর্মিলিতম্| ঋষ্যজিহ্বমাহ– কর্কশমিত্যাদি| ঋষ্যজিহ্বসংস্থানমিতি ঋষ্যো নীলাণ্ডো হরিণঃ, ‘রোভু’ ইতি প্রসিদ্ধঃ, তস্য জিহ্বাকারম্| পুণ্ডরীকমাহ– সশ্বেতমিত্যাদি| পুণ্ডরীকদলোপমমিতি পুণ্ডরীকং রক্তপদ্মং তত্পত্রোপমং, তেন সশ্বেতং রক্তপর্যন্তম্| সরাগমিতি সলোহিতং, মধ্যে শ্বেতলোহিতমিত্যর্থঃ| সিধ্মলক্ষণমাহ– শ্বেতমিত্যাদি| শ্বেতং তাম্রমিতি শ্বেতলোহিতাত্মকম্| প্রাযশ্চোরসীত্যুরসি তদ্বাহুল্যেন ভবতি, কফপ্রধানত্বাত্| প্রাযোগ্রহণাদন্যত্রাপি ভবতি| কাকণমাহ– যদিত্যাদি| যত্ কাকণন্তিকাবর্ণমিতি কাকণন্তিকা গুঞ্জা| গুঞ্জাসবর্ণত্বেন চ মধ্যে কৃষ্ণমন্তে রক্তম্, অথবা মধ্যে রক্তমন্তে কৃষ্ণম্| কুষ্ঠত্বেনৈব ত্রিদোষলক্ষণত্বে সিদ্ধে ত্রিদোষলিঙ্গমিতি পুনরুক্তং প্রবলদোষত্রযলিঙ্গত্বোপদর্শনার্থম্| ইতি সপ্তমহাকুষ্ঠানি| মহত্ত্বং চৈষাং শীঘ্রমুত্তরোত্তরধাত্ববগাহনবহুদোষজত্বক্রিযাভূযস্ত্বযোগাত্||১০-১৬||–

আতঙ্কদর্পণ ব্যাখ্যা (বাচস্পতি বৈদ্য কৃত)

সপ্তমহাকুষ্ঠানাং লক্ষণমাহ– কৃষ্ণেত্যাদি| কৃষ্ণারুণা যে স্ফুটিতঘট্যাঃ খণ্ডাস্তদ্বর্ণম্, অন্যে কৃষ্ণারুণকপালশর্করাবর্ণমাহুঃ| রূক্ষং রূক্ষস্পর্শং, পরুষং খরস্পর্শম্| তনু তনুত্বক্, তোদবহুলং তোদাঢ্যং, বিষমং দুশ্চিকিত্স্যম্| ঔদুম্বরং কুষ্ঠমাহ– রুগিত্যাদি| রুগ্দাহরাগকণ্ডূভির্যুক্তং, রোমপিঞ্জরমিতি রোমভিঃ পিঞ্জরং কপিলরোম ইত্যর্থঃ| উদুম্বরফলাভাসং পক্বোদুম্বরবর্ণম্| মণ্ডলকুষ্ঠমাহ– শ্বেতমিত্যাদি| এবংবিধং কুষ্ঠং মণ্ডলং মণ্ডলসঞ্জ্ঞযোচ্যতে, শ্বেতং রক্তং তদাভাসং, স্থিরং কঠিনং, স্ত্যানং সান্দ্রং সদলং বা, উত্সন্নমণ্ডলং উন্নতমণ্ডলং, কৃচ্ছ্রং কৃচ্ছ্রসাধ্যং, অন্যোন্যসংসক্তমিতি, পরস্পরৈর্মিলিতম্| ঋক্ষজিহ্বমাহ– কর্কশমিত্যাদি| কর্কশং খরস্পর্শম্| ঋক্ষো নীলাণ্ডো হরিণ ইতি, অন্যে ঋক্ষঃ ‘রীছ’ ইত্যাহুঃ, তজ্জিহ্বাকারম্| পুণ্ডরীকমাহ– সশ্বেতমিতি| পুণ্ডরীকং শ্বেতকমলং, তস্যোপমং, তেন সশ্বেতং রক্তপর্যন্তং মধ্যে শ্বেতং প্রান্তেষু রক্তম্| সোত্সেধমুন্নতম্| সরাগমিতি প্রান্তেঽধিকরাগপ্রতিপাদকং, সরাগমিত্যত্র ‘সদাহম্’ ইতি ক্বচিত্পাঠঃ| সিধ্মলক্ষণমাহ– শ্বেতমিত্যাদি| শ্বেতং তাম্রমিতি শ্বেতলোহিতাত্মকং, তনু অঘনং, যত্ ঘৃষ্টং সদ্রজশ্চূর্ণং মুঞ্চতীতি| প্রাযশ্চোরসীত্যাদি| উরসি বাহুল্যেন ভবতি, কফপ্রধানত্বাত্| প্রাযোগ্রহণাদন্যত্রাপি বোদ্ধব্যম্| কাকণমাহ– যদিত্যাদি| কাকণন্তিকা গুঞ্জা, তত্সমবর্ণত্বেন মধ্যে কৃষ্ণমন্তেঽতিরক্তম্, অথবা রক্তমন্তে কৃষ্ণং, তথা সপাকং, তথা তীব্রবেদনং, তথা ত্রিদোষলিঙ্গং, তত্ কাকণাখ্যং কুষ্ঠং নৈব সিধ্যতি| কুষ্ঠত্বেনৈব ত্রিদোষলিঙ্গত্বে সিদ্ধে ত্রিদোষলিঙ্গমিতি পুনরুক্তং তত্ প্রবলদোষত্রযলিঙ্গোপদর্শনার্থম্| ইতি সপ্ত মহাকুষ্ঠানি| মহত্ত্বং চৈষাং শীঘ্রমুত্তরোত্তরধাত্ববগাহনবহুলদোষজন্যত্বক্রিযাভূযস্ত্বযোগাত্||১০-১৬||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অতঃ পরমেকাদশক্ষুদ্রকুষ্ঠান্যুচ্যন্তে– অস্বেদনমিত্যাদি| মহাবাস্তু মহাস্থানম্| মত্স্যশকলোপমমিতি মত্স্যস্য ত্বক্সদৃশম্| চর্মাখ্যং চর্মকুষ্ঠম্| বহলমপত্তলম্| কিটিভমাহ– শ্যাবমিত্যাদি| কিণখরস্পর্শমিতি কিণো ব্রণস্থানম্| পরুষং রূক্ষম্| বৈপাদিকমিতি বিপাদিকাযাঃ স্বার্থেঽণ্| অলসকমাহ– কণ্ডূমদ্ভিরিত্যাদি| গণ্ডৈরিতি স্ফোটৈঃ| দদ্রুমণ্ডলমাহ– কণ্ড্বিত্যাদি| দদ্রুমণ্ডলমিতি মণ্ডলরূপতযোত্পাদাত্ দদ্রুমণ্ডলমিতি কীর্তনম্| ননু, কথমস্য চরকে ক্ষুদ্রত্বেনাভিধানং, সুশ্রুতে মহাকুষ্ঠে দদ্রোরুক্তত্বাত্; তথা সিধ্ম চরকে মহাকুষ্ঠে, সুশ্রুতে ক্ষুদ্রকুষ্ঠে দর্শিতম্| উচ্যতে– অসিতা দদ্রুরবগাঢমূলা সুশ্রুতে মহাকুষ্ঠম্, অসিতেতরদদ্রুশ্চরকেঽনবগাঢমূলা ক্ষুদ্রকুষ্ঠং, সুশ্রুতে অসিতেতরদদ্র্বা বিসর্পকুষ্ঠেঽন্তর্ভাবঃ, বিসর্পণযোগাত্; তথাঽবগাঢং সিধ্ম চরকে মহাকুষ্ঠং, সিধ্মপুষ্পিকা তু ত্বঙ্মাত্রগতা সুশ্রুতে ক্ষুদ্রকুষ্ঠম্; অসিতদদ্রৌ অসিতসিধ্মনোঽবরোধ ইতি গদাধরঃ| জেজ্জটস্ত্বাহ– চরকোক্তং সিধ্মৈব সুশ্রুতে দদ্রুশব্দাভিহিতং, নামভেদঃ কেবলং পরং ন বস্তুভেদঃ, সন্তি হ্যর্থান্তরাণি সমানশব্দাভিহিতানীত্যবিরোধঃ| কিন্ত্বিযমসাধ্বী ব্যাখ্যা, লক্ষণবৈলক্ষণ্যাত্; কিঞ্চ চরকসুশ্রুতযোঃ কুষ্ঠং প্রতি বহুপ্রকারো বিরোধঃ, তথাহি সুশ্রুতোক্তমরুণং ন চরকে পঠ্যতে, মণ্ডলং চরকোক্তং ন সুশ্রুতে, ক্ষুদ্রকুষ্ঠে চরকোক্তচর্মাখ্যালসকশতারুপ্রভৃতীনি ন সুশ্রুতে, সুশ্রুতোক্তক্ষুদ্রকুষ্ঠালসকাদযশ্চ ন চরকে; তস্মাদযং সমাধিরুচিতঃ– কুষ্ঠানামসঙ্খ্যেযত্বমিতি কেচিত্ চরকে, কেচিত্ সুশ্রুতে কুষ্ঠপ্রকারা উচ্যন্তে| উক্তং হি চরকে– “কুষ্ঠং সপ্তবিধম্, অষ্টাদশবিধম্, অসঙ্খ্যেযং বা|” (চ. নি. অ. ৫) ইতি| চর্মদলমাহ– রক্তমিত্যাদি| যদ্গলত্যপীতি গলতি বিদীর্যতে| শতারুমাহ– রক্তেত্যাদি| শতারুরিতি বহুব্রণযোগান্বিতং নাম| বিচর্চিকামাহ– সকণ্ড্বিত্যাদি| সকণ্ডূঃ পিডকা শ্যাবা বহুস্রাবা বিচর্চিকেতি অত্র কফকার্যং কণ্ডূঃ, বহুস্রাবত্বং পিত্তাত্, শ্যাবত্বং বাতাত্; এবং সর্বত্র দোষত্রযলিঙ্গমূহ্যম্| ননু, এককুষ্ঠমারভ্য বিচর্চিকাপর্যন্তেন দ্বাদশক্ষুদ্রকুষ্ঠানি ভবন্তি, তত্ কথমেকাদশেতি? উচ্যতে– বিচর্চিকৈব পাদযোর্ভবন্তী বিদারণযোগাদ্বিপাদিকা ভবতি, তেন ন সঙ্খ্যাতিরেকঃ| তথা চ ভোজঃ– “দোষাঃ প্রদূষ্য ত্বঙ্মাংসং পাণিপাদসমাশ্রিতাঃ| পিডকাং জনযন্ত্যাশু দাহকণ্ডূসমন্বিতাম্|| দাল্যতে ত্বক্ খরা রূক্ষা পাণ্যোর্জ্ঞেযা বিচর্চিকা| পাদে বিপাদিকা জ্ঞেযা স্থানান্যত্বাদ্বিচর্চিকা||” ইতি গদাধরঃ| অন্যে ত্বাহুঃ– সৈব স্ফোটৈস্তীব্রদাহৈরিত্যভিধানেন পামৈব তীব্রদাহবৃহত্স্ফোটযুক্তা কচ্ছূঃ, ন ততো ভিন্নেতি||১৭-২২||–

আতঙ্কদর্পণ ব্যাখ্যা (বাচস্পতি বৈদ্য কৃত)

অতঃ প্রভৃত্যেকাদশ ক্ষুদ্রকুষ্ঠান্যাহ– তত্র চর্মকুষ্ঠমাহ– অস্বেদনমিত্যাদি| তদেককুষ্ঠং নাম, অস্বেদনং স্বেদরহিতং, মহাবাস্তু মহাধিষ্ঠানম্| মত্স্যশকলোপমমিতি মত্স্যত্বক্খণ্ডসদৃশম্| চর্মকুষ্ঠমাহ– হস্তিচর্মবত্, বহুলমপত্তলম্| কিট্টিভমাহ– শ্যাবমিত্বাদি| তত্ কিট্টিভনাম কুষ্ঠং স্মৃতম্| শ্যাবং শ্যাববর্ণং, কিণখরস্পর্শমিতি কিণো ব্রণস্থানং, তদ্বত্ খরস্পর্শং কর্কশং, পরুষং রূক্ষং, কিট্টিভাখ্যং কুষ্ঠম্| বৈপাদিকমাহ– পাণিপাদযোঃ স্ফুটনং বিদারণং, বৈপাদিকং কুষ্ঠম্| অলসকুষ্ঠমাহ– কণ্ডূমদ্ভিরিতি| গণ্ডৈঃ স্ফোটৈঃ, চিতং যুক্তম্, অলসকাখ্যং কুষ্ঠম্| দদ্রুমণ্ডলমাহ– সকণ্ডূরাগাঃ কণ্ডূরাগসংযুক্তাঃ পিডকা যত্র তত্ সকণ্ডূরাগপিডিকং, তথা উদ্গতমুত্সন্নম্, এবংবিধং মণ্ডলং যত্, তদ্ দদ্রুনাম কুষ্ঠম্| ননু, কথমস্যাশ্চরকে ক্ষুদ্রত্বেনাভিধানং, সুশ্রুতে মহাকুষ্ঠত্বেনেতি, তথা সিধ্ম চরকে মহাকুষ্ঠে, সুশ্রুতে ক্ষুদ্রকুষ্ঠে দর্শিতং? উচ্যতে– অসিতা দদ্রুরবগাঢমূলা সুশ্রুতে মহাকুষ্ঠম্, অসিতেতরদদ্ব্রা বিসর্পকুষ্ঠেঽন্তর্ভাবঃ, বিসর্পণযোগাত্| তথা সিধ্ম চরকে মহাকুষ্ঠে, সিধ্মপুষ্পিকা তু ত্বঙ্মাত্রগতা সুশ্রুতে ক্ষুদ্রকুষ্ঠমিত্যাদি| চর্মদলমাহ– রক্তমিতি| দলযতি বিদারযতি, অস্পর্শসহং চ বস্ত্রাদিস্পর্শনাক্ষমং, তচ্চর্মদলনাম| পামামাহ– সূক্ষ্মা ইতি| এবংবিধাঃ পিডকাঃ পামা ইত্যুক্তা বৈদ্যৈরিত্যর্থঃ| বহ্ব্যঃ প্রভূতাঃ, স্রাববত্যঃ স্রাবযুক্তাঃ, কণ্ডূমত্যঃ কণ্ডূযুক্তাঃ| কচ্ছুমাহ– সৈবেতি| সৈব পামা পাণ্যোঃ হস্তযোঃ| স্ফিচোঃ কটিপ্রোথযোশ্চ কচ্ছুঃ কথ্যতে| তীব্রদাহৈঃ তীব্রসন্তাপৈঃ, স্ফোটৈরিত্যর্থঃ| স্ফোটমাহ– স্ফোটা ইতি| সুগমম্| শতারুমাহ– রক্তমিতি| শতারুরিতি বহুব্রণযোগাদন্বিতং নাম| বিচর্চিকামাহ– সকণ্ডূরিতি| সকণ্ডূঃ পিডকা ভবেত্| শ্যাবা বর্ণতঃ, বহুস্রাবা ভূরিপ্রস্রাবা| অত্র কফকার্যং কণ্ডূঃ, বহুস্রাবত্বং পিত্তাত্, শ্যাবত্বং বাতাত্, এবং সর্বত্র দোষত্রযলিঙ্গমূহ্যম্| নন্বেককুষ্ঠমারভ্য বিচর্চিকাপর্যন্তেন দ্বাদ্বশ কুষ্ঠানি ভবন্তি, তত্ কথমেকাদশেত্যুচ্যতে– বিচর্চিকৈব পাদযোর্ভবন্তী বিদারণযোগাদ্ বিপাদিকা কথ্যতে, তেন ন সঙ্খ্যাতিরেকঃ| তথা চ ভোজঃ– “দোষাঃ প্রদূষ্য ত্বঙ্মাংসং পাণিপাদসমাশ্রিতাঃ| পিডকা জনযন্ত্যাশু দাহকণ্ডূসমন্বিতাম্|| দহ্যতে ত্বক্ খরা রূক্ষা পাণ্যোর্জ্ঞেযা বিচর্চিকা| পাদে বিপাদিকা জ্ঞেযা স্থানান্যত্বাদ্বিচর্চিকা||” ইতি||১৭-২২||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

দোষত্রযনিযতং কুষ্ঠলিঙ্গমাহ– খরং শ্যাবারুণমিত্যাদি| শ্যাবারুণমিতি শ্যাবং বা অরুণং বা ভবতি| চরকে কুষ্ঠমধিকৃত্য দোষবিশেষকুষ্ঠজনকহেতূনাং পরস্পরং জ্ঞাপ্যজ্ঞাপকত্বমুক্তং; যথা– “কুষ্ঠবিশেষৈর্দোষাঃ দোষবিশেষৈঃ পুনঃ কুষ্ঠানি| জ্ঞাযন্তে তে হেতুং হেতুস্তাংশ্চ প্রকাশযতি||” (চ. চি. অ. ৭) ইতি||২৩-২৪||–

আতঙ্কদর্পণ ব্যাখ্যা (বাচস্পতি বৈদ্য কৃত)

দোষত্রযনিযতং কুষ্ঠলিঙ্গমাহ– খরমিত্যাদি| শ্যাবং অরুণং বা ভবতি, সবেদনং বেদনাযুক্তম্, এতদ্বাতকুষ্ঠং জানীযাত্| পিত্তাচ্চ প্রক্বথিতং শটিতমিব| যুক্তং চ কফাত্ ক্লেদি ক্লিন্নতাযুক্তং, ঘনং নিবিডম্| দ্বন্দ্বজে কুষ্ঠে দ্বিদোষলিঙ্গং, সান্নিপাতিকে ত্রিদোষলিঙ্গম্||২৩-২৪||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইদানীমুত্তরোত্তরসপ্তধাতুগতকুষ্ঠস্য লক্ষণং ক্রমেণাহ– ত্বক্স্থে বৈবর্ণ্যমিত্যাদি| ত্বক্শব্দেনাত্র রসোঽভিধীযতে, ধাতুপ্রস্তাবাত্; ত্বক্শব্দেন রসস্যাভিধানং তাত্স্থ্যাত্; জেজ্জটস্তু ত্বচমেবাহ| বাহ্যাযাস্ত্বচশ্চরকে উদকধরত্বেনোক্তে রসগ্রহণস্যানর্হত্বাদ্দ্বিতীযাঽসৃগ্ধরাঽত্রোক্তা, উদকাচ্চ রসো ভিন্নঃ; তথাহ্যুক্তম্– “উদকং দশাঞ্জলিমিতং, রসো নবাঞ্জলিমিতঃ|” (চ. শা. অ. ৭) ইতি| রসং বিহায রক্তাদ্যুক্তিশ্চ প্রাগেব রসং ক্রোডীকৃত্য তির্যক্সিরাগতৈর্দোষৈঃ কুষ্ঠজননাত্, সিরাসু রক্তব্যবস্থিতেশ্চেতি তস্যাশযঃ| সাক্ষাদ্রস ইত্যনভিধানাদ্বৃহত্কুষ্ঠং রসগতং ন ভবতীতি নাশঙ্কনীযম্| যতঃ সুশ্রুতেনৈবোক্তম্– “তেষাং তু মহত্ত্বং সর্বধাত্বনুসারিত্বাত্|” (সু. নি. অ. ৫) ইতি, সর্বশব্দেন চ রসস্যাপি গ্রহণম্| ভোজেঽপ্যুক্তম্– “প্রদুষ্টাঃ প্রচ্যুতা দোষা রসাসৃঙ্মাংসসংশ্রিতাঃ| কুষ্ঠানি জনযন্ত্যাশু শরীরেষু শরীরিণাম্||” ইতি| “ত্বক্স্রাবো রোমহর্ষশ্চ স্বেদস্যাতিপ্রবর্তনম্|” ইতি| এতত্ কেচিত্ শোণিতগতস্যৈব লিঙ্গং মন্যন্তে, অন্যে রসগতস্যেতি| ইহ রৌক্ষ্যং স্বেদাতিপ্রবৃত্তির্লোমহর্ষশ্চ কুষ্ঠারম্ভকদোষৈঃ স্বেদবহস্রোতোদুষ্ট্যা ভবতি| যদুক্তম্– “স্বেদবাহিষু দুষ্টেষু পারুষ্যং রোমহর্ষণম্| অতিস্বেদনমস্বেদঃ পরিদাহশ্চ জাযতে||” ইতি| বিপূযক ইতি বিশেষেণ পূযযোগিত্বম্| কৌণ্যং করভঙ্গঃ| অঙ্গানাং সম্ভেদ ইতি অঙ্গানাং ভঙ্গঃ| প্রাগুক্তানি তথৈব চেতি রসরক্তমাংসধাতুগতকুষ্ঠলিঙ্গানীত্যর্থঃ; এতচ্চৈকত্রাভিহিতমপি ক্রমেণ পরাপরধাতুদুষ্টৌ পূর্বপূর্বধাতুদুষ্টিলিঙ্গখ্যাপনপরং, ন্যাযস্য সমানত্বাত্| যদুচ্যতে– “সমানেষ্বর্থেষ্বেকত্রাভিহিতো বিধিরন্যত্রাপ্যাসঞ্জনীযঃ|” ইতি শুক্রগতকুষ্ঠলিঙ্গমাহ– দম্পত্যোরিত্যাদি| কুষ্ঠং শুক্রগতমপত্যেন ব্যজ্যত ইত্যর্থঃ| অত্র শুক্রদুষ্টিলক্ষণপ্রস্তাবেন তত্তুল্যকার্যা স্ত্রীগতাঽঽর্তবদুষ্টিরপ্যুক্তা| তদপীত্যপিশব্দাত্ পূর্বোক্তান্যপি রসাদিমজ্জান্তর্গতকুষ্ঠলিঙ্গানি ভবন্তি| কুষ্ঠিতমিতি সঞ্জাতং কুষ্ঠমস্যেতি তারকাদিত্বাদিতচ্| অত্র দুষ্টং শুক্রমার্তবং বা সর্বথা বীজত্বানুপঘাতাদপত্যজনকং, পরন্তু বিকৃতং জনযতীতি দ্রষ্টব্যম্||২৫-৩০||

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীমুত্তরোত্তরসপ্তধাতুগতকুষ্ঠলক্ষণং ক্রমেণোচ্যতে– ত্বগিত্যাদি| ত্বক্শব্দেনাত্র রসো বাচ্যঃ, ধাতুপ্রস্তাবাত্; ত্বক্শব্দেন রসস্যাভিধানং, তাত্স্থ্যাত্| বৃহত্কুষ্ঠং রসগতং ন ভবতীতি ন শঙ্কনীযং, যতঃ সুশ্রুতেনোক্তম্– “তেষাং তু মহত্ত্বং সর্বধাত্বনুসারিত্বাত্|” ইতি| অতঃ সর্বশব্দেন রসস্যাপি গ্রহণম্| ভোজেঽপ্যুক্তম্– “প্রদুষ্টাঃ প্রচ্যুতা দোষা রসাসৃঙ্মাংসসংশ্রিতাঃ| কুষ্ঠানি জনযন্ত্যাশু শরীরেষু শরীরিণাম্||” ইতি| বৈবর্ণ্যমঙ্গানাং বিবর্ণতা| রৌক্ষ্যং চ স্বেদাতিপ্রবৃত্তির্লোমহর্ষশ্চ কুষ্ঠারম্ভকৈর্দোষৈঃ স্বেদবহস্রোতোদুষ্ট্যা ভবতি| যদুক্তম্– “স্বেদবাহিষু দুষ্টেষু পারুষ্যং রোমহর্ষণম্| অতিস্বেদনমস্বেদঃ পরিদাহশ্চ জাযতে||” ইতি| রক্তগতমাহ– কণ্ডূরিত্যাদি| বিপূযক ইতি বিশেষেণ পূযযোগিত্বম্| মাংসগতমাহ– বাহুল্যমিত্যাদি| বাহুল্যং স্থূলমণ্ডলতা, স্ফোটঃ ত্বচঃ স্ফুটনং, স্থিরত্বমচলত্বম্| মেদোগতমাহ– কৌণ্যমিত্যাদি| কৌণ্যং করভঙ্গঃ, গতিক্ষযো গমনাশক্তিঃ, অঙ্গানাং সম্ভেদঃ অঙ্গভঙ্গঃ, ক্ষতপ্রসরণং, প্রাগুক্তানি রসরক্তমাংসগতলিঙ্গানি, এতচ্চৈকত্রাভিহিতমপি ক্রমেণ পরাপরধাতুদুষ্টৌ পূর্বধাতুদুষ্টিলিঙ্গখ্যাপনপরং, ন্যাযস্য সমানত্বাত্| যদুচ্যতে– “সমানেষ্বর্থেষ্বেকত্রাভিহিতো বিধিরন্যত্রাপ্যাসঞ্জনীযঃ” ইতি| অস্থিমজ্জগতমাহ– নাসেত্যাদি| নাসাযা ভঙ্গোঽবদরণম্, অক্ষিরাগো নেত্রলৌহিত্যং, ক্ষতেষু কৃমিসম্ভূতিঃ, স্বরহানিশ্চ| শুক্রগতকুষ্ঠলিঙ্গমাহ– দম্পত্যোরিত্যাদি| দম্পত্যোঃ স্ত্রীপুরুষযোঃ, কুষ্ঠবাহুল্যাত্ শুক্রার্তবযোর্দুষ্টিঃ, শুক্রগতকুষ্ঠমপত্যেন ব্যজ্যত ইত্যর্থঃ| অত্র শুক্রদুষ্টিলক্ষণপ্রস্তাবেন চ তত্তুল্যকার্যা স্ত্রীগতার্তবদুষ্টিরপ্যুক্তা| তদপীত্যপিশব্দাত্ পূর্বোক্তান্যপি রসাদিমজ্জান্তর্গতকুষ্ঠলিঙ্গানি ভবন্তি, অন্যে কুষ্ঠিলমিতি পঠন্তি; তত্রাপি স এবার্থঃ| তত্র দুষ্টং শুক্রমার্তবং বা সর্বথা বীজত্বানুপঘাতাদপত্যজনকং, পরং তু বিকৃতং জনযতীতি দ্রষ্টব্যম্||২৫-৩০||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

সাধ্যাদিভেদমাহ– সাধ্যং ত্বগ্রক্তমাংসস্থমিত্যাদি| বাতশ্লেষ্মাধিকং চ যদিতি এককুষ্ঠকিটিভাদিবর্জ্যম্| মজ্জাস্থিসংশ্রিতমিতি অত্র মজ্জাস্থিপ্রত্যাসত্ত্যা শুক্রগতস্যাপ্যসাধ্যত্বং বোদ্ধব্যম্| প্রভিন্নমিতি বিদীর্ণম্| পঞ্চকর্মগুণাতীতমিতি পূর্বরূপক্রিযযা সহ রসাদিধাতূনাং চতুর্ণাং ক্রিযাকলাপাঃ পঞ্চকর্মাণি, তেষাং গুণা বীর্যাণি, তান্যতীতো যঃ স তথা, অস্থিমজ্জাগত ইত্যর্থঃ; তাশ্চ ক্রিযাঃ পূর্বরূপে শোধনমুভযতঃ; ত্বক্প্রাপ্তে শোধনালেপনাদি, রক্তপ্রাপ্তে শোধনালেপনকষাযপানশোণিতাবসেকাদি, এবং মাংসমেদসোরপি দ্রষ্টব্যমিতি| অথবা পঞ্চকর্মাণি বমনাদীনি, তেষাং গুণাঃ ফলানি, তান্যতীতম্||৩১-৩২||–

আতঙ্কদর্পণ ব্যাখ্যা (বাচস্পতি বৈদ্য কৃত)

ইদানীং ধাত্বনুক্রমেঽপি সাধ্যাদিভেদমাহ– সাধ্যমিত্যাদি| ত্বগ্রক্তমাংসস্থং বাতশ্লেষ্মাধিকং চ যত্তত্ সাধ্যং, বাতশ্লেষ্মাধিকং চ যদিতি চর্মৈককুষ্ঠকিটিভসিধ্মালসবিপাদিকা বাতশ্লেষ্মজাঃ সাধ্যাঃ, মেদোগতং দ্বন্দ্বজং যাপ্যম্, অস্থিমজ্জাসংশ্রযং বর্জ্যম্| অত্র মজ্জাস্থিপ্রত্যাসত্ত্যা শুক্রস্য তদ্গতস্যাপ্যসাধ্যত্বং বোদ্ধব্যম্| পুনশ্চাসাধ্যলক্ষণমাহ– কৃমীত্যাদি| প্রভিন্নং বিদীর্ণং, প্রস্রুতাঙ্গং প্রস্রাবযুক্তশরীরং, হতস্বরং ঘর্ঘরস্বরং, পঞ্চকর্মগুণাতীতং পঞ্চকর্মাণি বমনাদীনি তেষাং গুণাঃ ফলানি, তানি নিষ্ফলীকৃত্য জাতম্||৩১-৩২||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কুষ্ঠেষু চিকিত্সার্থং প্রধানং দোষমাহ– বাতেন কুষ্ঠং কাপালমিত্যাদি| বিচর্চ্যপি কফাত্তথেতি শ্লেষ্মপিত্তাত্, তেন দদ্রুপ্রভৃতি চর্মদলান্তং শ্লেষ্মপিত্তজমিত্যর্থঃ| পূর্বত্রিকমিতি কাপালোদুম্বরমণ্ডলাখ্যম্| অতঃ সপ্তমহাকুষ্ঠাদন্যত্ ক্ষুদ্রকুষ্ঠম্||৩৩-৩৬||

আতঙ্কদর্পণ ব্যাখ্যা (বাচস্পতি বৈদ্য কৃত)

কুষ্ঠেষু চিকিত্সার্থং দোষপ্রাধান্যমাহ– বাতেনেত্যাদি| সুগমম্| অন্যদপি দোষপ্রাধান্যমাহ– চর্মেতি| দদ্রুশতারুষী দ্বে কুষ্ঠে ন কেবলং শ্লেষ্মপিত্তাত্, যাবত্পুণ্ডরীকং তথা বিস্ফোটং তথা পামা তথা চর্মদলং জাযতে, তথেতি শ্লেষ্মপিত্তাত্; তেন দদ্রুপ্রভৃতি চর্মদলান্তং শ্লেষ্মপিত্তাধিকসন্নিপাতজমিত্যর্থঃ| সর্বৈরিতি সর্বৈস্ত্রিভিরেব সমৈর্দোষৈঃ কাকণং নাম কুষ্ঠমুত্পদ্যতে| এতানি অষ্টাদশ কুষ্ঠানি ভবন্তি তেষাং মধ্যে পূর্বং ত্রিকমিতি কাপালোদুম্বরমণ্ডলাখ্যং দদ্রু কাকণং পুণ্ডরীকমৃক্ষজিহ্বং চেতি মহাকুষ্ঠানি স্যুঃ| অতঃ সপ্তমহাকুষ্ঠাদন্যত্ ক্ষুদ্রকুষ্ঠং বোদ্ধব্যম্||৩৩-৩৬||–

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ত্বগ্দুষ্টিতুল্যত্বাদত্রৈব কিলাসমাহ– কুষ্ঠৈকসম্ভবমিত্যাদি| কুষ্ঠেন সহ একং সমানং বিরুদ্ধাশনপাপকর্মাদি সম্ভবো নিদানং যস্য তত্তথা, কুষ্ঠেন সহ সমানচিকিত্সিতত্বং চ বোদ্ধব্যং, “কুর্যাচ্চাস্মৈ কুষ্ঠোক্তং বিধানম্” ইতি বচনাত্| চরকে ত্বস্য হেতুবিশেষোঽপি পঠ্যতে, যথা– “বচাংস্যতথ্যানি কৃতঘ্নভাবো নিন্দা গুরূণাং গুরুধর্ষণং চ| পাপক্রিযা পূর্বকৃতং চ কর্ম হেতুঃ কিলাসস্য বিরোধি চান্নম্||” (চ. চি. অ. ৭) ইতি| কিলাসমেব মাংসমেদঃসমাশ্রযণযোগত্বাদরুণং শ্বিত্রং চ ভণ্যতে| ত্বগ্গতমেব কিলাসং, তস্য লক্ষণং নির্দিষ্টমপরিস্রাবীতি| স্রাবো হি রক্তাদিদুষ্ট্যা ভবতি, তেনাস্য ত্বগ্গতত্বেন স্রাবাভাবঃ| উক্তং চ– “ত্বগ্গতং চ যদস্রাবি তত্ কিলাসং প্রকীর্তিতম্|” ইতি| ত্রিধাতূদ্ভবসংশ্রযমিতি ত্রিধাতুস্ত্রযো দোষাস্তথা রক্তমাংসমেদাংসি সংশ্রযোঽধিষ্ঠানং যস্য তত্তথা; অথবা ত্রিধাতুঃ রক্তমাংসমেদাংসি উদ্ভবায সংশ্রযো যস্য তত্তথা, দোষাস্তু সর্বসাধারণত্বাত্ লভ্যন্ত এব| ননু, যদি ধাতুত্রযাশ্রিতং কিলাসং, তত্ কথং “যদা ত্বচমতিক্রম্য তদ্ধাতূনবগাহতে| হিত্বা কিলাসসঞ্জ্ঞাং চ কুষ্ঠসঞ্জ্ঞাং লভেত্তদা||” ইতি বিশ্বামিত্রবচনং কিলাসসঞ্জ্ঞাপ্রতিক্ষেপকং ন বিরুধ্যতে? তথা “ত্বগ্গতমেব কিলাসং” (সু. নি. অ. ৫) ইতি সুশ্রুতেঽবধারণং বিরুদ্ধম্? উচ্যতে– বিশ্বামিত্রবচনস্য তাবদযমর্থঃ প্রত্যেতব্যঃ– যদোক্তরক্তাদিগতসমস্তকুষ্ঠলক্ষণজনকতযা ধাতূনবগাহতে তদা ন তত্ কিলাসং, কিং তর্হি কুষ্ঠজনকহেত্বন্তরবৃংহিতদোষোপপ্লবাত্ ধাতূন্ দূষযেত্, তথা হেতুলক্ষ্যলক্ষণমরুণাদিকুষ্ঠং তত্; অন্যদিতররক্তাদিগতকুষ্ঠলিঙ্গব্যতিরিক্তমুত্পাদসমকালভাবিরক্ততাম্রাদি-বর্ণতামাত্রকারকং রক্তাদিগতদোষজন্যং কিলাসমেব, অন্যথা রক্তাদিগতকিলাসলক্ষণেন চরকোক্তেন বিরোধঃ স্যাত্| স যদাহ– “দোষে রক্তাশ্রিতে রক্তং, তাম্রং মাংসসমাশ্রিতে| শ্বেতং মেদঃস্থিতে শ্বিত্রং, গুরু তচ্চোত্তরোত্তরম্||” (চ. চি. অ. ৭) ইতি| চরকে হি কিলাসস্যৈব ধাতুত্রযসম্বন্ধকৃতবর্ণেন দারুণাদিসঞ্জ্ঞান্তরমাত্রং কৃতং, সুশ্রুতেঽপি ত্বগ্গতমেবেত্যনেন রক্তাদিদুষ্ট্যা বিশিষ্টরক্তাদিগতমহাকুষ্ঠলিঙ্গরহিতত্বং, তথা ক্ষুদ্রকুষ্ঠবদ্যুগপদ্রক্তলসীকাত্বঙ্মাংসসন্দূষকত্ববিরহঃ খ্যাপ্যতে; অথবা এবকারোঽযোগব্যবচ্ছেদে, যথা– নীলং সরোজং ভবত্যেবেতি| উক্তপ্রকারেণ ধাতুত্রযমাত্রগতত্বেনৈকদোষজত্বেন চাস্য কুষ্ঠাদ্ভেদঃ; “শ্বিত্রসঞ্জ্ঞাং লভেত্তদা” ইতি জেজ্জটপাঠে তু শ্বিত্রসঞ্জ্ঞামাত্রব্যবহারঃ কিলাসস্য, ন পুনরর্থভেদঃ কশ্চিদিতি| ভালুকিনা তু ধাতুভেদেন কিলাসস্য সঞ্জ্ঞান্তরং দর্শিতম্– “বারুণং তত্তু বিজ্ঞেযং মাংসধাতুসমাশ্রযম্| মেদঃশ্রিতং ভবেচ্ছ্বিত্রং, দারুণং রক্তসংশ্রযম্||” ইতি| তথা চরকেঽপি– “দারুণং বারুণং শ্বিত্রং কিলাসং নামভিস্ত্রিভিঃ|” (চ. চি. অ. ৭) ইতি| তেনেহাপি তথা বোদ্ধব্যম্| ক্রমাদ্রক্তমাংসমেদঃসু চাদিশেদ্বর্ণেনৈবেদৃগুভযমিতি ঈদৃশমেব বর্ণেনারুণং তাম্রং শ্বেতং চ কিলাসং রক্তমাংসমেদঃসু যথাক্রমেণাদিশেত্| উভযমিতি ব্রণজং দোষজং চ তচ্ছ্বিত্রং ভবতি, তথাচ ভোজঃ– “শ্বিত্রং তু দ্বিবিধং বিদ্যাদ্দোষজং ব্রণজং তথা| তত্র মিথ্যোপচারাদ্ধি ব্রণস্য ব্রণজং স্মৃতম্|| দোষজং চ দ্বিধা প্রোক্তমাত্মজং পরজং তথা| পরসংস্কারসংস্পর্শাদ্যত্তত্ পরজমুচ্যতে| তদাত্মজং বিজানীযাদ্যদ্দেহেষ্বনিলাদিজম্||” ইতি| রক্তাদিধাতুত্রযগতস্য চ কিলাসস্য দূষ্যপ্রভাবাদ্যস্য কস্যাপি দোষস্য সম্বন্ধনিযতা এবারুণাদযো বর্ণা বোদ্ধব্যাঃ, যদি তু তত্র দোষনিযতো বর্ণঃ কল্প্যতে তদা বর্ণাতিদেশো ব্যর্থঃ স্যাত্, বাতাদ্রূক্ষারুণমিত্যাদিনৈব সিদ্ধত্বাত্| যদ্যেবং দোষেণাত্র বর্ণাভিধানং বিফলং, নির্বিষযত্বাত্; নৈবং, ত্বঙ্মাত্রগতে কিলাসে দোষবর্ণস্য চরিতার্থত্বাত্| হন্ত তর্হি কথং রক্তাদিগতত্বমস্য নিশ্চেতব্যং? ত্বগ্গতে স্বভাবেনারুণাদিবর্ণস্য সদ্ভাবেন সন্দিগ্ধত্বাত্| উচ্যতে– ক্রমেণারুণাদিবর্ণোত্পাদাদ্রক্তাদিগতত্বং নিশ্চেতব্যম্, উত্পত্তিমাত্রে ত্বরুণাদিযোগাত্ত্বগ্গতত্বমিতি||৩৭-৩৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ত্বগ্দুষ্টিতুল্যত্বাদত্রৈব কিলাসমাহ– কুষ্ঠৈকসম্ভবমিতি| কুষ্ঠেন সহ একঃ সমানঃ বিরুদ্ধাশনপাপকর্মাদি সম্ভবো নিদানং যস্য তত্তথা, কুষ্ঠতুল্যনিদানমিত্যর্থঃ| কুষ্ঠেন সহ সমানচিকিত্সিতত্বং চ বোদ্ধব্যম্| “কুর্যাচ্চাস্মৈ কুষ্ঠদুষ্টং বিধানম্|” ইতি বচনাত্| চরকে ত্বস্য হেতুবিশেষোঽপি পঠ্যতে| যথা– “বচাংস্যতথ্যানি কৃতঘ্নভাবো নিন্দা গুরূণাং গুরুধর্ষণং চ| পাপক্রিযা পূর্বকৃতং চ কর্ম হেতুঃ কিলাসস্য বিরোধি চান্নম্||” ইতি| কিলাসমেব মাংসমেদঃসমাশ্রযেণ যোগিত্বাদ্দারুণং শ্বিত্রমিতি ভণ্যতে| ত্বগ্গতমেব কিলাসং, তস্য লক্ষণং নির্দিষ্টম্– অপরিস্রাবীতি| স্রাবো হি রক্তাদিদুষ্ট্যা ভবতি, তেনাস্য ত্বগ্গতত্বেন স্রাবাভাবঃ| উক্তঞ্চ– “ত্বগ্গতং তু যদস্রাবি তত্কিলাসং প্রকীর্তিতম্|” ইতি| ত্রিধাতূদ্ভবসংশ্রযমিতি ত্রিধাতুশব্দেন পৃথগ্দোষাঃ, ত্রিধাতুঃ সংশ্রযো যস্য তত্তথা, অথবা ত্রিধাতুঃ রক্তমাংসমেদাংসি, তেন বাতাদিনা পৃথগুদ্ভব উত্পাদস্তথা রক্তমাংসমেদাংসি সংশ্রযোঽধিষ্ঠানং যস্য তত্তথা| বাতাদিনা ধাতুসংশ্রযভেদেন বর্ণভেদমাহ– বাতাদিত্যাদি| বাতাত্ শ্বিত্রং রূক্ষং স্পর্শতঃ, অরুণং রক্তং বর্ণতঃ| পিত্তাদিত্যাদি| পিত্তাত্ শ্বিত্রং কমলপত্রবত্ পদ্মদলমিব তাম্রং বর্ণেন ভবেত্| তথা সদাহং দাহযুক্তম্| রোমবিধ্বংসি রোমঘাতি| কফাদিতি কফাত্ শ্বিত্রং শ্বেতং শুক্লং, ঘনং সান্দ্রং, তথা গুরু অঙ্গেনানুভূযতে, তথা সহ কণ্ড্বা বর্ততে ইতি সকণ্ডু কণ্ডুযুক্তম্| ক্রমাদ্রক্তমাংসমেদস্সু চাদিশেত্ বর্ণেনৈবেদৃগুভযমিতি ঈদৃশমেব বর্ণেনারুণতাম্রশ্বেতেন কিলাসং রক্তমাংসমেদস্সু যথাক্রমেণাদিশেত্| উভযমিতি ব্রণজং দোষজমিতি তত্ শ্বিত্রং ভবতি| তথা চ ভোজঃ– “শ্বিত্রং তদ্দ্বিবিধং বিদ্যাদ্দোষজং ব্রণজং তথা| তত্র মিথ্যোপচারাদ্ধি ব্রণস্য ব্রণজং স্মৃতম্|| দোষজং দ্বিবিধং প্রোক্তমাত্মজং পরজং তথা| পরসংস্কারসংস্পর্শাদ্যত্তত্পরজমুচ্যতে|| তদাত্মজং বিজানীযাদ্যদ্দেহেষ্বনিলাদিজম্|” ইতি||৩৭-৩৯||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

তস্য সাধ্যত্বমসাধ্যত্বং চাহ– অশুক্লেত্যাদি| অশুক্লরোম কৃষ্ণরোম, অবহুলং তনু, অসংশ্লিষ্টং পরস্পরমসংযুক্তম্, অনগ্নিদগ্ধজং অগ্নিদগ্ধজং যন্ন ভবতি, এতত্ সাধ্যম্| অতোঽন্যথা অতোঽন্যথোক্তসর্বপ্রকারমসাধ্যং, চরকেঽপ্যেবংবিধস্যাসাধ্যত্বমুক্তম্| যথা– “যচ্ছুক্লরোম বহুলং যত্ সংলগ্নং পরস্পরম্| যচ্চ বর্ষগণোপেতং তচ্ছ্বিত্রং নৈব সিধ্যতি||” (চ. চি. অ. ৭) ইতি| গুহ্যপাণিতলৌষ্ঠেষ্বিতি তলমত্র পাদতলং সুশ্রুতে ‘অন্তে জাতম্’ ইতি সামান্যেন নির্দেশাত্||৪০-৪১||

আতঙ্কদর্পণ ব্যাখ্যা (বাচস্পতি বৈদ্য কৃত)

তস্য সাধ্যাঽসাধ্যত্বমাহ– অশুক্লেত্যাদি| অশুক্লরোম যাবন্ন রোমাণি শুক্লানি ভবন্তি, অবহুলং তনু, অসংশ্লিষ্টং মিথঃ পরস্পরমসংযুক্তম্, অগ্নিদগ্ধজং যন্ন ভবতি; এতত্সাধ্যম্| অতোঽন্যথা উক্তপ্রকারবিপরীতমসাধ্যম্| যদুক্তং চরকে– “যত্ শুক্লরোম বহুলং যত্সংলগ্নং পরস্পরম্| যচ্চ বর্ষগণোপেতং তচ্ছ্বিত্রং নৈব সিদ্ধ্যতি||” ইতি| অসাধ্যমাহ– গুহ্যেত্যাদি| এষু স্থানেষ্বনবমপি ত্যাজ্যম্| গুহ্যং লিঙ্গং, তলমত্র পাদতলম্||৪০-৪১||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

কুষ্ঠস্য সংসর্গজপ্রসঙ্গেন সর্বানেব সংসর্গজান্ রোগানাহ– প্রসঙ্গাদিত্যাদি| প্রসঙ্গো মৈথুনম্, অথবা প্রসঙ্গঃ সাতত্যং; তেন কৃতাত্ গাত্রসংস্পর্শাদেঃ| ঔপসর্গিকরোগা ইতি ঔপসর্গিকাঃ পাপরোগাদযো ভূতোপসর্গজাশ্চ| সঙ্ক্রামন্তি আবিশন্তি| রোগসঙ্ক্রান্তিশ্চ কুষ্ঠিপ্রভৃতিপাপিজনসংসর্গেণ পাপসঙ্ক্রান্তের্বিকারপ্রভাবাদ্বা বোদ্ধব্যা||৪২-৪৩||

আতঙ্কদর্পণ ব্যাখ্যা (বাচস্পতি বৈদ্য কৃত)

কুষ্ঠস্য সংসর্গজত্বপ্রসঙ্গেনৈব সংসর্গজান্ রোগানাহ– প্রসঙ্গাদিত্যাদি| প্রসঙ্গো মৈথুনম্, অথবা প্রসঙ্গো নৈরন্তর্যং, তেন কৃতাত্ গাত্রস্পর্শাদেঃ| ঔপসর্গিকরোগাদযো ভূতোপসর্গজা রোগাঃ| সঙ্ক্রামন্তি আবিশন্তি| রোগসঙ্ক্রান্তিশ্চ কুষ্ঠিপ্রভৃতিপাপিজনসংসর্গেণ পাপসঙ্ক্রান্তের্বিকারপ্রভাবাদ্বা বোদ্ধব্যা||৪২-৪৩||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং কুষ্ঠনিদানং সমাপ্তম্||৪৯||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যপ্রণীতাযাং মাধবনিদানব্যাখ্যাযামাতঙ্কদর্পণাখ্যাযাং কুষ্ঠনিদানম্||৪৯||