అథ నాడీవ్రణనిదానం | యః శోథమామమతిపక్వముపేక్షతేऽజ్ఞో యో వా వ్రణం ప్రచురపూయమసాధువృత్తః | అభ్యంతరం ప్రవిశతి ప్రవిదార్య తస్య స్థానాని పూర్వవిహితాని తతః సపూయః ||1|| (సు. ని. అ. 10) |
View original
अथ नाडीव्रणनिदानम् | यः शोथमाममतिपक्वमुपेक्षतेऽज्ञो यो वा व्रणं प्रचुरपूयमसाधुवृत्तः | अभ्यन्तरं प्रविशति प्रविदार्य तस्य स्थानानि पूर्वविहितानि ततः सपूयः ||१|| (सु. नि. अ. १०) |
🔊 Audio coming soon
Hide commentary
మధుకోశ వ్యాఖ్యా (విజయరక్షిత, శ్రీకంఠదత్త కృత)
భగ్నస్యాపి వ్రణస్యోపేక్షయా నాడీ భవతి, అతోऽనంతరం నాడీమాహ– యః శోథమిత్యాది| ఉపేక్షత ఇతి పీడనశోధనాదికం న కరోతి| ప్రచురపూయ ఇత్యనేన గంభీరపాకిత్వముక్తం| అసాధువృత్తః అహితాహారాచారః| స్థానాని పూర్వవిహితానీతి వ్రణాస్రావవిజ్ఞానీయోక్తాని త్వఙ్మాంససిరాస్నాయుసంధ్యస్థికోష్ఠమర్మాణి||1||
ఆతంకదర్పణ వ్యాఖ్యా (వాచస్పతి వైద్య కృత)
భగ్నస్యాపి వ్రణస్యోపేక్షయా నాడీసంభవాత్తదనంతరం నాడీమాహ– య ఇత్యాది| యోऽపక్వం శోఫమామమిత్యుపేక్షతే పీడనశోధనాదీని న కరోతి, అథవా యః యురుషః ప్రచురపూయం వ్రణముపేక్షతే ఇతి సంబంధః| ప్రచురపూయమిత్యనేన గంభీరపాకిత్వం దర్శయతి| అసాధువృత్తః అహితాహారాచారః| సపూయః తస్య పూర్వోక్తాని వ్రణాస్రావవిజ్ఞానీయోక్తాని త్వఙ్మాంససిరాస్నాయుసంధ్యస్థికోష్ఠమర్మాణి స్థానాని విదార్యాంతః ప్రవిశతి||1||