59. nētrarōganidānam

Adhikarana nayanarogahetuH (1-3) · Śloka 3

অথ নেত্ররোগনিদানম্ | উষ্ণাভিতপ্তস্য জলে প্রবেশাদ্দূরেক্ষণাত্ স্বপ্নবিপর্যযাচ্চ | স্বেদাদ্রজোধূমনিষেবণাচ্চ ছর্দের্বিঘাতাদ্বমনাতিযোগাত্ ||১|| দ্রবাত্তথাঽন্নান্নিশি সেবিতাচ্চ বিণ্মূত্রবাতক্রমনিগ্রহাচ্চ | প্রসক্তসংরোদনকোপশোকাচ্ছিরোঽভিঘাতাদতিমদ্যপানাত্ ||২|| তথা ঋতূনাং চ বিপর্যযেণ ক্লেশাভিঘাতাদতিমৈথুনাচ্চ | বাষ্পগ্রহাত্ সূক্ষ্মনিরীক্ষণাচ্চ নেত্রে বিকারাঞ্জনযন্তি দোষাঃ ||৩|| (সু. উ. তং. অ. ১) |

ইন্দ্রিযাধিষ্ঠানগতবিকারপারিশেষ্যান্নেত্ররোগাভিধানম্| এতে চ নযনরোগা বাতপিত্তকফরক্তসন্নিপাতাগন্তুজাঃ সন্তঃ ষট্সপ্ততিঃ| যদাহ সুশ্রুতঃ– “তৈস্ত্রিভিস্ত্রিংশদুক্তাস্তে কফেনাপ্যধিকাস্ত্রযঃ| রক্তজাঃ ষোডশ প্রোক্তাঃ সর্বজাঃ পঞ্চবিংশতিঃ|| বাহ্যৌ পুনর্দ্বৌ চ তথা রোগাঃ ষট্সপ্ততিঃ স্মৃতাঃ||” (সু. উ. তং. অ. ১) ইতি| ষট্সপ্ততিশ্চৈতে রোগা আশ্রযভেদেন সুশ্রুতেনৈব বিভক্তাঃ|| যদাহ– “নব সন্ধ্যাশ্রযাস্তেষু বর্ত্মজাস্ত্বেকবিংশতিঃ| শুক্লভাগে দশৈকশ্চ চত্বারঃ কৃষ্ণভাগজাঃ|| সর্বাশ্রযাঃ সপ্তদশ দৃষ্টিজা দ্বাদশৈব তু| দ্বৌ চ বাহ্যাশ্রযাবন্যাবনিমিত্তনিমিত্তজৌ|| ষট্সপ্ততির্নেত্ররোগাঃ সঙ্গ্রহেণ প্রকীর্তিতাঃ|” (সু. উ. তং. অ. ১) ইতি| নেত্রপ্রমাণং চ সুশ্রুতেনৈবোক্তং “বিদ্যাদ্ দ্ব্যঙ্গুলবাহুল্যং স্বাঙ্গুষ্ঠোদরসম্মিতম্| দ্ব্যঙ্গুলং সর্বতঃ সার্ধং ভিষঙ্নযনবুদ্বুদম্||” (সু. উ. তং. অ. ১) ইতি| দ্ব্যঙ্গুলবাহুল্যং বিস্তারেণ, অন্তঃস্বাঙ্গুষ্ঠোদরসম্মিতম্, দ্ব্যঙ্গুলং সর্বতঃ সার্ধমাযামেন| অন্যে দ্ব্যঙ্গুলবাহুল্যমিতি যদুক্তং তত্র দ্ব্যঙ্গুলমাননিযমং স্বাঙ্গুষ্ঠোদরসম্মিতমিত্যনেনাহুঃ| অযমর্থঃ– স্বেনাঙ্গুষ্ঠোদরেণ সম্মিতং দ্ব্যঙ্গুলবহুলং, দ্ব্যঙ্গুলং সর্বতঃ সার্ধমিতি চাযামবিস্তারাভ্যাং বোদ্ধব্যমিতি| ননু, যদ্যর্ধতৃতীযাঙ্গুলাযামং নেত্রং তর্হি “দ্ব্যঙ্গুলাযতং চ নযনম্” (সু. সূ. অ. ৩৫) ইত্যাতুরোপক্রমণীযোক্তং বিরুধ্যতে? নৈবং, বর্ত্মমণ্ডলং গৃহীত্বা গণনযাঽর্ধতৃতীযাঙ্গুলং, তদ্বিরহাত্ দ্ব্যঙ্গুলাযতমিতি ন বিরোধঃ| নযনরোগহেতুমাহ– উষ্ণাভিতপ্তস্যেত্যাদি| উষ্ণেনাতপাদিনা সন্তপ্তদেহস্য জলাবগাহনাত্, শীতাবৃতদেহস্যোর্ধ্বগতেনোষ্মণা |নযনতেজসোঽভিভবাচ্চক্ষূরোগোদযঃ স্বেদাদ্রজোধূমনিষেবণাচ্চেতি ঘর্মরজোধূমানাং নযনসম্বন্ধানাং হেতুত্বম্| ছর্দের্বিঘাতাত্ বান্তিবেগবিঘাতাত্| বমনাতিযোগাদতিবান্তেঃ| বিণ্মূত্রবাতক্রমনিগ্রহাত্ বিণ্মূত্রবাতানাং ক্রমেণ শনৈঃ শনৈর্নিগ্রহাত্ বেগবিধারণাত্| প্রসক্তসংরোদনশোককোপাদিতি প্রসক্তং নিরন্তরং কৃতসংরোদনাদেরিত্যর্থঃ| ঋতুবিপর্যযেণ একর্তুচর্যাযা অন্যর্তৌ করণেন| ক্লেশাভিঘাতাত্ ক্লেশঃ কাযাদিদুঃখং, তেনাভিসম্বন্ধাত্; বাষ্পনিগ্রহাত্ অশ্রুবেগধারণাত্| যদুক্তম্– “আনন্দজং বাঽপ্যথ শোকজং বা নেত্রোদকং প্রাপ্তমমুঞ্চতো হি| শিরোগুরুত্বং নযনামযাশ্চ ভবন্তি তীব্রাঃ সহ পীনসেন||” ইতি| নযনরোগসম্প্রাপ্তিশ্চ সুশ্রুতে পঠ্যতে– “ সিরানুসারিভির্দোষৈর্বিগুণৈরূর্ধ্বমাশ্রিতৈঃ| জাযন্তে নেত্রভাগেষু রোগাঃ পরমদারুণাঃ||” (সু. উ. তং. অ. ১) ইতি||১-৩||

Adhikarana abhiShyandabhedAH (4) · Śloka 4

বাতাত্ পিত্তাত্ কফাদ্রক্তাদভিষ্যন্দশ্চতুর্বিধঃ | প্রাযেণ জাযতে ঘোরঃ সর্বনেত্রামযাকরঃ ||৪||

সামান্যপূর্বকত্বাত্ বিশেষস্য, তথা সর্বনযনরোগহেতুত্বাচ্চ, আদৌ সর্বনযনগতমভিষ্যন্দমাহ– বাতাদিত্যাদি| ঘোর ইতি দুঃসহবেদনঃ| সর্বনেত্রামযাকর ইতি সর্বেষাং নেত্ররোগাণামধিমন্থাদীনামাকর উত্পত্তিকরত্বাত্; আকরঃ স্থানম্| অত এবাহ সুশ্রুতঃ– “প্রাযেণ সর্বে নযনামযাস্তে ভবন্ত্যভিষ্যন্দনিমিত্তমূলাঃ|” (সু. উ. তং. অ. ১) ইতি||৪||

Adhikarana vAtAbhiShyandalakShaNam (5) · Śloka 5

নিস্তোদনস্তম্ভনরোমহর্ষসঙ্ঘর্ষপারুষ্যশিরোঽভিতাপাঃ | বিশুষ্কভাবঃ শিশিরাশ্রুতা চ বাতাভিপন্নে নযনে ভবন্তি ||৫|| (সু. উ. তং. অ. ৬) |

বাতাভিষ্যন্দরূপমাহ– নিস্তোদনেত্যাদি| নিস্তোদনং সূচীব্যধনবদ্ব্যথা, স্তম্ভনং জডিমা, সঙ্ঘর্ষঃ করকরিকা, পারুষ্যং রূক্ষতা, শিরোঽভিতাপঃ শিরোব্যথা| বিশুষ্কভাবো দূষিকারহিতত্বং, ন ত্বাস্রাবরহিতত্বং, শিশিরাশ্রুতেত্যুক্তেঃ||৫||

Adhikarana pittAbhiShyandalakShaNam (6) · Śloka 6

দাহপ্রপাকৌ শিশিরাভিনন্দা ধূমাযনং বাষ্পসমুচ্ছ্রযশ্চ | উষ্ণাশ্রুতা পীতকনেত্রতা চ পিত্তাভিপন্নে নযনে ভবন্তি ||৬|| (সু. উ. তং. অ. ৬) |

পৈত্তিকলক্ষণমাহ– দাহপ্রপাকাবিত্যাদি| প্রপাকঃ প্রকৃষ্টপাকঃ| শিশিরাভিনন্দা শীতেচ্ছা| ধূমাযনং ধূমস্যোদ্বমনম্| বাষ্পসমুচ্ছ্রযো বাষ্পবাহুল্যম্||৬||

Adhikarana kaphAbhiShyandalakShaNam (7) · Śloka 7

উষ্ণাভিনন্দা গুরুতাঽক্ষিশোথঃ কণ্ডূপদেহাবতিশীততা চ | স্রাবো মুহুঃ পিচ্ছিল এব চাপি কফাভিপন্নে নযনে ভবন্তি ||৭|| (সু. উ. তং. অ. ৬) |

কফজলিঙ্গমাহ– উষ্ণাভিনন্দেত্যাদি| উপদেহঃ পিচ্চটবাহুল্যম্| শীততা নেত্রস্য| পিচ্ছিল ইতি স্রাববিশেষণম্| কফাভিপন্নে কফযুক্তে| নযনে চক্ষুষি| ভবন্তি জাযন্তে||৭||

Adhikarana raktAbhiShyandalakShaNam (8) · Śloka 8

তাম্রাশ্রুতা লোহিতনেত্রতা চ নাড্যঃ সমন্তাদতিলোহিতাশ্চ | পিত্তস্য লিঙ্গানি চ যানি তানি রক্তাভিপন্নে নযনে ভবন্তি ||৮|| (সু. উ. তং. অ. ৬) |

রক্তাভিষ্যন্দলক্ষণমাহ– তাম্রাশ্রুতেত্যাদি| পিত্তস্য লিঙ্গানীতি পিত্তাভিষ্যন্দলিঙ্গানি||৮||

Adhikarana adhimanthAnAmabhiShyandajatvam (9) · Śloka 9

বৃদ্ধৈরেতৈরভিষ্যন্দৈর্নরাণামক্রিযাবতাম্ | তাবন্তস্ত্বধিমন্থাঃ স্যুর্নযনে তীব্রবেদনাঃ ||৯|| (সু. উ. তং. অ. ৬) |

অধিমন্থানামভিষ্যন্দজত্বমাহ– বৃদ্ধৈরিত্যাদি| তাবন্ত ইতি অভিষ্যন্দৈর্বাতপিত্তকফরক্তজৈশ্চত্বারোঽধিমন্থাঃ প্রত্যেতব্যাঃ| তীব্রবেদনা ইতি সামান্যলক্ষণম্| বেদনাশব্দশ্চাত্র ব্যথামাত্রবাচী, তেন বাতিকাভিষ্যন্দাদ্বাতিক এবাধিমন্থস্তীব্রবাতজনিততোদাদিসকলবেদনঃ, এবং পিত্তজকফজরক্তজাশ্চাধিমন্থাঃ প্রত্যেতব্যাঃ||৯||

Adhikarana adhimanthasya sAmAnyalakShaNam (10) · Śloka 10

উত্পাট্যত ইবাত্যর্থং নেত্রং নির্মথ্যতে তথা | শিরসোঽর্ধং চ তং বিদ্যাদধিমন্থং স্বলক্ষণৈঃ ||১০|| (সু. উ. তং. অ. ৬) |

অস্যাপরং সামান্যলক্ষণমাহ– উত্পাট্যত ইত্যাদি| শিরসোঽর্ধমিত্যত্র পূর্বক্রিযে সম্বধ্যেতে, তেন শিরসোঽর্ধমুত্পাট্যতে তথা নির্মথ্যতে চেত্যর্থঃ| শিরসোঽর্ধে চ বেদনা ব্যাধিপ্রভাবাত্| স্বলক্ষণৈরিতি যথোক্তবাতাদ্যভিষ্যন্দলক্ষণৈঃ| স চাধিমন্ধঃ স্যন্দাত্মকঃ||১০||

Adhikarana adhimanthasya doShabhedena kAlAvadhiH (11) · Śloka 11

হন্যাদ্দৃষ্টিং শ্লৈষ্মিকঃ সপ্তরাত্রাদধিমন্থো রক্তজঃ পঞ্চরাত্রাত্ | ষড্রাত্রাদ্বাতিকো বৈ নিহন্যান্মিথ্যাচারাত্ পৈত্তিকঃ সদ্য এব ||১১|| (সু. উ. তং. অ. ৬) |

যাবতা কালেন মিথ্যাচারাদ্দৃষ্টিং হন্তি তমাহ– হন্যাদিত্যাদি| সদ্য এবেতি শ্লেষ্মণি সপ্তরাত্রস্যোক্তত্বাত্ সদ্যঃশব্দেনাত্র ত্রিরাত্রমুক্তং, বৈদ্যকে হি সদ্যঃশব্দস্য ত্রিরাত্রসপ্তরাত্রবাচিত্বেন দৃষ্টত্বাত্| কালাবধিরত্র ব্যাধিস্বভাবাত্||১১||

Adhikarana netrarogasya sAmatvalakShaNam (12) · Śloka 12

উদীর্ণবেদনং নেত্রং রাগশোথসমন্বিতম্ | ঘর্ষনিস্তোদশূলাশ্রুযুক্তমামান্বিতং বিদুঃ ||১২||

লঙ্ঘনপ্রলেপাদিবিধানার্থম্ অঞ্জনাদিনিষেধার্থং চ নেত্ররোগস্য সামত্বলক্ষণমাহ– উদীর্ণবেদনমিত্যাদি| উদীর্ণবেদনমুদ্গতবহুবেদনম্| ঘর্ষঃ করকরিকা| লঙ্ঘনাদিবিধানার্থমঞ্জনাদিনিষেধার্থং চ তন্ত্রান্তরম্– “স্বেদঃ প্রলেপস্তিক্তান্নং ধূমো দিনচতুষ্টযম্| লঙ্ঘনং চাক্ষিরোগাণামামানাং পাচনানি ষট্|| অঞ্জনং সর্পিষঃ পানং কষাযং গুরুভোজনম্| নেত্ররোগেষু সামেষু স্নানং চাপি বিবর্জযেত্||” ইতি||১২||

Adhikarana netrarogasya nirAmatvalakShaNam (13) · Śloka 13

মন্দবেদনতা কণ্ডূঃ সংরম্ভাশ্রুপ্রশান্ততা | প্রশস্তবর্ণতা চাক্ষ্ণোঃ সম্পক্বদোষমাদিশেত্ ||১৩||

নিরামলক্ষণমাহ– মন্দেত্যাদি| সংরম্ভাশ্রুপ্রশান্ততেতি সংরম্ভঃ শোথঃ তস্য, অশ্রুণো নেত্রজলস্য চ প্রশমঃ||১৩||

Adhikarana sashotha-ashothanetrapAkali~ggam (14) · Śloka 14

কণ্ডূপদেহাশ্রুযুতঃ পক্বোদুম্বরসন্নিভঃ | সংরম্ভী পচ্যতে যস্তু নেত্রপাকঃ স শোথজঃ | শোথহীনানি লিঙ্গানি নেত্রপাকে ত্বশোথজে ||১৪|| (সু. উ. তং. অ. ৬) |

সশোথপাকলিঙ্গমাহ– কণ্ডূপদেহাশ্রুযুত ইত্যাদি| পক্বোদুম্বরসন্নিভ ইতি লোহিতঃ| সংরম্ভীতি শোথবান্; কার্তিকস্তু মহারম্ভবানিত্যাহ; শোথস্ত্বনুক্তোঽপি গম্যতে, তত্প্রধানত্বাত্ পাকস্য, উত্তরত্র শোথহীনানীত্যস্যাভিধানাচ্চ| অযং ত্রিদোষজঃ, এবমশোথপাকশ্চ||১৪||

Adhikarana hatAdhimanthalakShaNam (15) · Śloka 15

উপেক্ষণাদক্ষি যদাঽধিমন্থো বাতাত্মকঃ সাদযতি প্রসহ্য | রুজাভিরুগ্রাভিরসাধ্য এষ হতাধিমন্থঃ খলু নাম রোগঃ ||১৫|| (সু. উ. তং. অ. ৬) |

হতাধিমন্থলক্ষণমাহ– উপেক্ষণাদিত্যাদি| অযং রোগো বিদেহে দৃষ্ট্যুত্ক্ষেপলক্ষণ একঃ, অন্যঃ সকলনযনশোষলক্ষণঃ পঠ্যতে| তদ্যথা– “অন্তর্গতঃ সিরাণাং তু যদা তিষ্ঠতি মারুতঃ| স তদা নযনং প্রাপ্য শীঘ্রং দৃষ্টিং নিরস্যতি|| তস্যাং নিরস্যমানাযাং নির্মন্থন্নিব মারুতঃ| নযনং নির্বমত্যাশু শূলতোদাধিমন্থনৈঃ||” ইতি| ইদং দৃষ্টিনির্গমলক্ষণম্, অত এবৈতস্মিন্নর্থে সুশ্রুতে কেচিত্ পঠন্তি– “অন্তঃ সিরাণাং শ্বসনঃ স্থিতো দৃষ্টিং প্রতিক্ষিপন্| হতাধিমন্থং জনযেত্তমসাধ্যং বিদুর্বুধাঃ||” ইতি| বিদেহ এব সকলাক্ষিশোষঃ পঠ্যতে– “অথবা শোষযেদক্ষি ক্ষীণতেজোবলাদযম্| তত্পদ্মমিব সংশুষ্কমবসীদতি লোচনম্|| হতাধিমন্থং তং বিদ্যাদসাধ্যং বাতকোপতঃ||” ইতি| অতঃ শোষার্থে উপেক্ষণাদক্ষীত্যাদি শ্লোকোঽবগন্তব্যঃ| সাদযতীতি শোষযতি| রুজাভিরুগ্রাভিরিতি রুজাভিস্তোদাদিভির্মহতীভিরুপলক্ষিতঃ||১৫||

Adhikarana vAtaparyayali~ggam (16) · Śloka 16

বারংবারং চ পর্যেতি ভ্রুবৌ নেত্রে চ মারুতঃ | রুজশ্চ বিবিধাস্তীব্রাঃ স জ্ঞেযো বাতপর্যযঃ ||১৬||

বাতপর্যযলিঙ্গমাহ– বারংবারমিত্যাদি| পর্যাযেণ ক্রমেণ কদাচিদ্ভ্রুবি, কদাচিল্লোচনে, বাযুস্তীব্রাং রুজাং করোতীতি বাতপর্যাযার্থঃ||১৬||

Adhikarana shuShkAkShipAkalakShaNam (17) · Śloka 17

যত্ কূণিতং দারুণরূক্ষবর্ত্ম সন্দহ্যতে চাবিলদর্শনং যত্ | সুদারুণং যত্ প্রতিবোধনে চ শুষ্কাক্ষিপাকোপহতং তদক্ষি ||১৭|| (সু. উ. তং. অ. ৬) |

শুষ্কাক্ষিপাকমাহ– যত্ কূণিতমিত্যাদি| কূণিতমিতি নিমীলিতম্| দারুণং কঠিনং রূক্ষং চ বাতশোষাত্ বর্ত্ম যস্য তদ্দারুণরূক্ষবর্ত্ম| সন্দহ্যতে সদাহং ভবতি| আবিলদর্শনমাকুলদর্শনম্| সুদারুণং কৃচ্ছ্রোন্মীলনম্| প্রতিবোধনে উন্মেষণে| সুদারুণং সুকঠিনমিতি গদাধরঃ| শুষ্কাক্ষিপাকোপহতং তদক্ষীতি তচ্ছুষ্কেণাক্ষিপাকেন উপহতমক্ষীত্যর্থঃ| অযং রোগঃ সরক্তবাতজন্যঃ| যদাহ করালঃ– “কূণিতং খরবর্ত্মাক্ষি কৃচ্ছ্রোন্মীলাবিলেক্ষণম্| সদাহং সাসৃজাদ্বাতাচ্ছুষ্কপাকান্বিতং বদেত্||” ইতি||১৭||

Adhikarana anyatovAtalakShaNam (18) · Śloka 18

যস্যাবটুকর্ণশিরোহনুস্থো মন্যাগতো বাঽপ্যনিলোঽন্যতো বা | কুর্যাদ্রুজং বৈ ভ্রুবি লোচনে চ তমন্যতোবাতমুদাহরন্তি ||১৮|| (সু. উ. তং. অ. ৬) |

অন্যতোবাতমাহ– যস্যেত্যাদি| অবটুর্ঘাটা| মন্যে গ্রীবাপার্শ্বসিরে| অন্যতো বেতি উক্তপ্রদেশাদিতরত্র পৃষ্ঠে, সপ্তম্যর্থে তসিঃ| অন্যত্র বাতস্য কারণস্যাবস্থানম্, অন্যত্র লোচনে ভ্রুবি চ রুজাং করোতীত্যন্যতোবাতঃ| বিদেহেঽপ্যুক্তম্– “ মন্যযোরন্তরে বাযুরুত্থিতঃ পৃষ্ঠতোঽপি বা| করোতি ভেদং নিস্তোদং শঙ্খে চাক্ষ্ণোর্ভ্রুবোস্তথা|| তমাহুরন্যতোবাতং রোগং দৃষ্টিবিদো জনাঃ||” ইতি||১৮||

Adhikarana amlAdhyuShitalakShaNam (19) · Śloka 19

শ্যাবং লোহিতপর্যন্তং সর্বং চাক্ষি প্রপচ্যতে | সদাহশোথং সাস্রাবমম্লাধ্যুষিতমম্লতঃ ||১৯||

অম্লাধ্যুষিতমাহ– শ্যাবমিত্যাদি| শ্যাবমীষন্নীলম্| অম্লত ইত্যম্লভোজনাত্| অম্লাধ্যুষিতমিতি পিত্তাধ্যুষিতং, কারণে কার্যোপচারাত্||১৯||

Adhikarana sirotpAtalakShaNam (20) · Śloka 20

অবেদনা বাঽপি সবেদনা বা যস্যাক্ষিরাজ্যো হি ভবন্তি তাম্রাঃ | মুহুর্বিরজ্যন্তি চ যাঃ স তাদৃগ্ব্যাধিঃ সিরোত্পাত ইতি প্রদিষ্টঃ ||২০|| (সু. উ. তং. অ. ৬) |

সিরোত্পাতমাহ– অবেদনা বাঽপীত্যাদি| অক্ষিরাজ্য ইতি অক্ষিসিরাঃ| বিরজ্যন্তীতি বিরক্তা ভবন্তি, বিশেষরক্তা ভবন্তীত্যর্থঃ| রক্তজোঽযম্||২০||

Adhikarana sirApraharShalakShaNam (21) · Śloka 21

মোহাত্ সিরোত্পাত উপেক্ষিতস্তু জাযেত রোগস্তু সিরাপ্রহর্ষঃ | তাম্রাভমস্রং স্রবতি প্রগাঢং তথা ন শক্নোত্যভিবীক্ষিতুং চ ||২১|| (সু. উ. তং. অ. ৬) |

সিরাপ্রহর্ষমাহ– মোহাদিত্যাদি| অযমপি রক্তজঃ| ইতি সর্বগতাঃ||২১||

Adhikarana savraNashuklalakShaNam (22) · Śloka 22

নিমগ্নরূপং তু ভবেদ্ধি কৃষ্ণে সূচ্যেব বিদ্ধং প্রতিভাতি যদ্বৈ | স্রাবং স্রবেদুষ্ণমতীব যচ্চ তত্ সব্রণং শুক্ল(ক্র)মুদাহরন্তি ||২২|| (সু. উ. তং. অ. ৫) |

সন্ধিবর্ত্মশুক্লকৃষ্ণদৃষ্টিগতেষু মধ্যে প্রাধান্যাদ্দৃষ্টিগতেষু বক্তুমুচিতেষু স্বল্পবক্তব্যতযা দৃষ্টিমণ্ডলপ্রত্যাসত্ত্যা কৃষ্ণগতবিকারাভিধানম্| তত্র সব্রণশুক্ললক্ষণমাহ– নিমগ্নরূপমিত্যাদিনা| রূপগ্রহণমাভাসনিষেধার্থং, তেন নিমগ্নরূপমেব| যত্ সূচ্যেবেত্যুপমানং বর্তুলত্বখ্যাপনায সূচীব্যধনবদ্বেদনাদর্শনায চ| স্রাবং স্রবেদুষ্ণমিতি স্রবেদুষ্ণমিত্যেতাবতৈব লব্ধে স্রাবে পুনঃ স্রাবগ্রহণং নিরন্তরস্রাবং লক্ষযতি| অতিশব্দস্তূষ্ণেন সম্বধ্যত ইতি কার্তিকঃ| উষ্ণস্রাবতা রক্তাত্মকত্বাত্| শুক্লস্যাত্র চাত্যন্তরুক্ বোদ্ধব্যা, সব্রণত্বাত্| যদাহ অব্রণলক্ষণে সুশ্রুতঃ– ‘নাতিরুগশ্রুযুক্তং’ (সু. উ. তং. অ. ৫) ইতি| তত্ স্রবণং সক্ষতং, ক্ষতে তু রুজা যুক্তৈব, নযনে তু সুকুমারে বিশেষেণোদাহরন্তি বিদেহপ্রভৃতযঃ| বিদেহেঽপ্যুক্তম্– “রক্তরাজীনিভং কৃষ্ণে ছিন্নাভং যচ্চ লক্ষ্যতে| সূচ্যগ্রেণেব তচ্ছুক্লমুষ্ণাশ্রুস্রাবি সব্রণম্||” ইতি||২২||

Adhikarana savraNashuklasya sAdhyAsAdhyatA (23) · Śloka 23

দৃষ্টেঃ সমীপে ন ভবেত্তু যচ্চ ন চাবগাঢং ন চ সংস্রবেদ্ধি | অবেদনং বা ন যুগ্মশুক্লং তত্ সিদ্ধিমাযাতি কদাচিদেব ||২৩|| (সু. উ. তং. অ. ৫) |

অস্যাসাধ্যতযা নির্দিষ্টস্যাবস্থাবশেন পাক্ষিকীং সিদ্ধিমাহ– দৃষ্টেঃ সমীপ ইত্যাদি| ক্ষতং হি স্বভাবত এব সংশ্রযোপঘাতকরম্, অতো দৃষ্টিসমীপে ন সাধ্যম্; উক্তবিপর্যযাত্তু দৃষ্টিসমীপেঽপি সুখসাধ্যমব্রণম্| ন চাবগাঢমেকত্বগ্গতম্| বিপর্যযাত্ত্ববগাঢমপ্যব্রণং সিধ্যতি| অত এবাব্রণে বক্ষ্যতি– গম্ভীরজাতমিতি| ন চ সংস্রবেদিতি ন চাত্যর্থং স্রবেত্, সংশব্দস্যাতিশযার্থত্বাত্| অবেদনং মন্দবেদনং, রক্তস্য কফানুগমাত্; বাতানুগমাদতিবেদনং তু ন সিধ্যতি| যুগ্মং চ ক্ষতশুক্লং কদাঽপি ন সিধ্যতি||২৩||

Adhikarana avraNashuklalakShaNam (24) · Śloka 24

স্যন্দাত্মকং কৃষ্ণগতং সচোষং শঙ্খেন্দুকুন্দপ্রতিমাবভাসম্ | বৈহাযসাভ্রপ্রতনুপ্রকাশমথাব্রণং সাধ্যতমং বদন্তি ||২৪|| (সু. উ. তং. অ. ৫) |

ইদানীমব্রণশুক্রলক্ষণমাহ– স্যন্দাত্মকমিত্যাদি| স্যন্দাত্মকমভিষ্যন্দনিমিত্তকং, সর্বেষামক্ষিরোগাণামভিষ্যন্দনিমিত্তত্বেঽপি চাস্য নিযমপ্রতিপাদনার্থমভিধানম্| বৈহাযসাভ্রপ্রতনুপ্রকাশমিতি বিহাযসি স্থিতং বৈহাযসং, ‘তস্য নিবাসঃ’ ইত্যণ্, বিহাযো নভঃ; আকাশস্থিতাভ্রবত্ প্রতনুপ্রকাশমিত্যর্থঃ| এতেনাচ্ছত্বং প্রতিপাদ্যতে| শুক্লত্বং তু শঙ্খেন্দুকুন্দপ্রতিমাবভাসমিত্যনেনৈব লব্ধম্| বৈহাযসাভ্রগ্রহণং সজলাভ্রব্যবচ্ছেদার্থং, তদ্ধি প্রাযঃ পার্বতং ভবতীতি কার্তিকঃ| সাধ্যতমং সুখসাধ্যম্| ননু, গম্ভীরজাতমিত্যাদিনা কৃচ্ছ্রাভিধানেনৈব তদ্বিপর্যযেণ সুখসাধ্যত্বাবগতিঃ সেত্স্যতি, তত্ কিং সাধ্যতমাভিধানেন? নৈবম্, অসত্যত্র সাধ্যতমাভিধানে উভযত্রাপি কৃচ্ছ্রত্বভ্রান্তিঃ স্যাদতস্তদভিধানম্||২৪||

Adhikarana avraNashuklasyAvasthAbhedena kRucchrasAdhyatvam (25) · Śloka 25

গম্ভীরজাতং বহুলং চ শুক্লং চিরোত্থিতং চাপি বদন্তি কৃচ্ছ্রম্ | বিচ্ছিন্নমধ্যং পিশিতাবৃতং বা চলং সিরাসূক্ষ্মমদৃষ্টিকৃচ্চ | দ্বিত্বগ্গতং লোহিতমন্ততশ্চ চিরোত্থিতং চাপি বিবর্জনীযম্ ||২৫|| (সু. উ. তং. অ. ৫) |

অব্রণস্যৈবাবস্থাভেদেন কৃচ্ছ্রত্বমাহ– গম্ভীরজাতমিত্যাদি| গম্ভীরজাতং দ্বিত্রিত্বগ্গতম্| বহুলং প্রতনুনোঽভ্রাদ্ঘনম্| অব্রণস্যৈবাবস্থাভেদেনাসাধ্যত্বমাহ– বিচ্ছিন্নমধ্যমিত্যাদি| বিচ্ছিন্নমধ্যং বিদীর্ণমাংসত্বাত্ সচ্ছিদ্রং, নিম্নমিতি যাবত্; তদ্বিপর্যযং তু পিশিতাবৃতমুন্নতমাংসরূপতযা| চলমিত্যনবস্থিতম্| সিরাসূক্ষ্মমিতি সিরাবৃতত্বাত্ সূক্ষ্মম্; অন্যে ‘ সিরাসক্তম্’ ইতি পঠন্তি, ব্যাচক্ষতে চ– সিরাসক্তং যতস্ততশ্চলং, সিরাণাং চলত্বাত্; সিরা হি মত্স্যবত্ পরিবর্তমানা মুহুর্মুহুশ্চলন্তি; অন্যে ‘ সিরাশুক্লম্’ ইতি পাঠান্তরং ব্যাচক্ষতে; সিরাভিঃ শুক্লং, সিরাশুক্লং সিরাশুক্লত্বহেতুকং; ন হি সিরাভবনং শুক্লত্বে হেতুরিতি গদাধরঃ| অদৃষ্টিকৃদিতি দর্শনাভাবকারি, দৃষ্টেঃ সমীপে ন ভবেদিত্যস্য বিপর্যযোঽযম্| দ্বিত্বগ্গতং দ্বিপটলাশ্রিতম্, এতদপরলিঙ্গসহিতমসাধ্যং, ন তু কেবলং; দ্বিত্বগ্গতস্য কৃচ্ছ্রত্বাভিধানাত্| লোহিতমন্ততশ্চেতি মধ্যে শুক্লমন্তে লোহিতং, ব্রণাকারেণ||২৫||

Adhikarana avraNashuklasyAsAdhyalakShaNam (26) · Śloka 26

উষ্ণাশ্রুপাতঃ পিডকা চ নেত্রে যস্মিন্ ভবেন্মুদ্গনিভং চ শুক্লম্ | তদপ্যসাধ্যং প্রবদন্তি কেচিদন্যচ্চ যত্তিত্তিরিপক্ষতুল্যম্ ||২৬|| (সু. উ. তং. অ. ৫) |

ন কেবলমেবংবিধং পরমসাধ্যং কিন্ত্বন্যাদৃশমপীত্যত আহ– উষ্ণাশ্রুপাত ইত্যাদি| পিডকা চ নেত্র ইত্যন্তং দ্বিত্বগ্গতশুক্লে| তথাঽঽহ বিদেহঃ– “একত্বগ্গতমেবং স্যাত্ দ্বিত্বগ্গতমিদং ভবেত্| চোষোষ্ণস্রাবদাহাস্তু তৃষ্ণা চ পিডকোদ্গমঃ||” ইতি মুদ্গনিভং চ শুক্লমিত্যাকারেণ, এতদ্দ্বিত্বগ্গতম্| তথা চ বিদেহঃ– “ব্যক্তমুদ্গফলাকারং শুক্লং দ্বিত্বগ্গতং ভবেত্|” ইতি| দ্বিত্রিত্বগ্গতস্যাব্রণশুক্রস্য কৃচ্ছ্রত্বে এতত্ পিডকোদ্গমমুদ্গফলাকারত্বেনৈবাসাধ্যত্বং বোধ্যম্| অন্যে পুনঃ সব্রণশুক্লস্য বিচ্ছিন্নমধ্যমিত্যাদিকমসাধ্যলক্ষণং বর্ণযন্তি| অত্র পক্ষে দ্বিত্বগ্গতমিতি কেবলমেবাসাধ্যলক্ষণম্, এতন্ন চাবগাঢমিত্যস্য বিপর্যযঃ| লোহিতমন্ততঃ, উষ্ণাশ্রুপাতঃ পিডকা চেত্যাদি দ্বিত্বগ্গতশুক্ললক্ষণমিতি| কিন্ত্বিযমত্রাসঙ্গতিঃ– বিচ্ছিন্নমধ্যং সচ্ছিদ্রং, তদ্যদি সচ্ছিদ্রত্বং সব্রণশুক্লস্যাভ্যুপগম্যতে, তদা নিমগ্নরূপমিত্যনেনৈব সিদ্ধত্বাত্ পুনরুক্তং স্যাত্, কিঞ্চ সব্রণশুক্লানন্তরমস্য পাঠো বিফলঃ স্যাত্| অন্যে তু সব্রণাব্রণশুক্লবিষযং সামান্যমসাধ্যলক্ষণমেতদাহুঃ; যথাযোগ্যতযা ক্বচিল্লিঙ্গান্তরযোগেন চ ব্যবস্থেতি চ বর্ণযন্তি| অসাধ্যত্বং বিদেহদন্যেষাং মতেনাহ– কেচিদিত্যাদি| তিত্তিরিপক্ষতুল্যমিতি শবলম্; এতচ্চানিষেধাদনুমতম্||২৬||

Adhikarana akShipAkAtyayalakShaNam (27) · Śloka 27

শ্বেতঃ সমাক্রামতি সর্বতো হি দোষেণ যস্যাসিতমণ্ডলং চ | তমক্ষিপাকাত্যযমক্ষিরোগং সর্বাত্মকং বর্জযিতব্যমাহুঃ ||২৭|| (সু. উ. তং. অ. ৫) |

ইদানীমক্ষিপাকাত্যযমাহ– শ্বেত ইত্যাদি| দোষেণ যঃ কৃতঃ শ্বেতঃ স সমাক্রামতি| সর্বাত্মকং ত্রিদোষজম্; অন্যে তু ‘স্যন্দাত্মকম্’ ইতি পঠিত্বা অভিষ্যন্দাত্মকমাহুঃ| তদা সর্বেষামভিষ্যন্দমূলত্বাদ্বিশেষার্থমভিধানম্||২৭||

Adhikarana ajakAjAtalakShaNam (28) · Śloka 28

অজাপুরীষপ্রতিমো রুজাবান্ সলোহিতো লোহিতপিচ্ছিলাস্রঃ | বিগৃহ্য কৃষ্ণং প্রচযোঽভ্যুপৈতি তচ্চাজকাজাতমিতি ব্যবস্যেত্ ||২৮|| (ইতি কৃষ্ণজাঃ) | (সু. উ. তং. অ. ৫) |

অজকাজাতমাহ– অজাপুরীষপ্রতিম ইত্যাদি| অজাপুরীষপ্রতিমঃ শুষ্কাজপুরীষতুল্যঃ| সলোহিত ঈষল্লোহিতঃ| বিগৃহ্য কৃষ্ণমিতি স্বোচ্ছ্রাযেণ কৃষ্ণদেশং মহত্ত্বাদ্বিচ্ছিদ্য| প্রচয ইতি প্রকৃষ্টশ্চযঃ উদ্গম ইতি যাবত্| অজকাযা মেদোবত্ সংশ্রযস্তৃতীযত্বগ্গতত্বেন মেদসঃ প্রচযো বোদ্ধব্যঃ| তথাচ বিদেহঃ– “কৃষ্ণেঽক্ষ্ণোর্যদ্ভবেচ্ছুক্লং ছাগলীবিট্সমপ্রভম্| সান্দ্রপিচ্ছিলরক্তাস্রং ত্রিত্বগ্গমজকেতি সা||” ইতি| ইতি কৃষ্ণজাঃ||২৮||

Adhikarana prathamapaTalasthadoShalakShaNam (29) · Śloka 29

প্রথমে পটলে দোষা যস্য দৃষ্ট্যাং ব্যবস্থিতাঃ | অব্যক্তানি স রূপাণি কদাচিদথ পশ্যতি ||২৯|| (সু. উ. তং. অ. ৫) |

কৃষ্ণাশ্রিতত্বাদ্ দৃষ্টিমণ্ডলস্য দৃষ্টিজা উচ্যন্তে| দৃষ্টিপ্রমাণং তু সুশ্রুতেনোক্তম্– “মসূরদলমাত্রাং তু পঞ্চভূতপ্রসাদজাম্|” (সু. উ. তং. অ. ৭) ইতি| অত্র মসূরদলমাত্রামিতি মসূরার্ধদলমাত্রাং, তথা চ নিমিঃ– “পঞ্চভূতাত্মিকা দৃষ্টির্মসূরার্ধদলোন্মিতিঃ|” ইতি| ননু, এবং তর্হি বিরুধ্যতে, যদাহ স এব পুনঃ– “নেত্রাযামত্রিভাগং চ কৃষ্ণমণ্ডলমুচ্যতে| কৃষ্ণাত্ সপ্তমমিচ্ছন্তি দৃষ্টিং দৃষ্টিবিদো জনাঃ||” (সু. উ. তং. অ. ১) ইতি, অত্র কৃষ্ণসপ্তমভাগত্বেন দৃষ্টেরুক্তত্বাত্| উচ্যতে– কৃষ্ণসপ্তমভাগত্বেনাপি মসূরার্ধদলপ্রমাণা দৃষ্টিরিত্যেক এবার্থঃ| ননু, এবমাতুরোপক্রমণীযোক্তং “ দ্ব্যঙ্গুলাযতং নযনং, নযনত্রিভাগপরিমাণা তারকা, নবমস্তারকাংশো দৃষ্টিমণ্ডলম্|” (সু. সূ. অ. ৩৫) ইতি বিরুধ্যতে| উচ্যতে– তত্র মণ্ডলাভিধানেন মণ্ডলসহিতাযা দৃষ্টেরুক্তিঃ, অত্র তু মণ্ডলরহিতাযা ইতি; মতভেদাদ্বা ন বিরোধঃ, তারকানবমাংশো দৃষ্টিরিতি শল্যমতং, তারকাসপ্তমাংশো দৃষ্টিরিতি শালাক্যসিদ্ধান্তেন| ননু, এবং তর্হি “দৃষ্টিশ্চ রোমকূপাশ্চ ন বর্ধন্তে” (সু. শা. অ. ৪) ইতি শারীরোক্তং বিরুধ্যতে, যতঃ কৃষ্ণসপ্তমভাগত্বেন দৃষ্টেরুক্তত্বাত্ কৃষ্ণবৃদ্ধ্যা তদ্বৃদ্ধেঃ সম্ভবাত্| নৈবম্, অঙ্গান্তরবন্ন বহু বর্ধত ইত্যভিপ্রাযেণোক্তং দৃষ্টির্ন বর্ধত ইতি| দৃষ্ট্যাং চ চত্বারি পটলানি| রসরক্তাশ্রযং বাহ্যং, দ্বিতীযং মাংসসংশ্রযং, তৃতীযং মেদঃসংশ্রযং, চতুর্থং কালকাস্থিসংস্থিতম্| তথা চ সুশ্রুতঃ– “তেজোজলাশ্রিতং বাহ্যং তেষ্বন্যত্ পিশিতাশ্রিতম্| মেদস্তৃতীযং পটলমাশ্রিতং ত্বস্থি চাপরম্| পঞ্চমাংশসমং দৃষ্টেস্তেষাং বাহুল্যমিষ্যতে||” (সু. উ. তং. অ. ১) ইতি| অত্র তেজঃশব্দেন রক্তং, জলশব্দেন চ রসো ব্যাখ্যাতঃ| তেষু পটলেষু বাহ্যাদিভেদেনাধিষ্ঠানবিশেষপ্রভাবাত্ দোষাণাং লিঙ্গবিশেষমাহ– প্রথমে পটল ইত্যাদি| প্রথমে পটলে সর্বাভ্যন্তরে পটলে কালকাস্থিসংশ্রযে; ন তু বাহ্যে, তত্র প্রথমং দোষলিঙ্গানুপলব্ধেঃ; যদি তু কুষ্ঠাদিবদ্বাহ্যং প্রথমং প্রদূষ্যাভ্যন্তরে দোষানুপ্রবেশঃ স্যাত্তদা প্রাগেব রোগস্তত্রোপলভ্যেত্, ন চৈবং দৃশ্যতে| তথাচ বিদেহঃ– “দৃষ্টেরন্তরমাদ্যং তু পটলং সমভিদ্রুতাঃ|” ইত্যারভ্য “একৈকমনুপদ্যন্তে পর্যাযাত্ পটলান্তরম্|” ইতি| প্রথমে পটল ইত্যাদিগ্রন্থাত্ পূর্বং কেচিত্ “ সিরাভিরভিসম্প্রাপ্য বিগুণোঽভ্যন্তরে ভৃশম্|” (সু. উ. তং. অ. ১) ইতি শ্লোকার্ধং সম্প্রাপ্তিরূপং পঠন্তি সুশ্রুতে, তচ্চ ‘ সিরানুসারিভির্দোষৈঃ’ (সু. উ. তং. অ. ১) ইত্যনেনৈব গতার্থমিত্যনার্ষং টীকাকারৈর্ব্যাখ্যাতম্| রূপাণীতি রূপবন্তি দ্রব্যাণি| কদাচিদথ পশ্যতীত্যনেনাত্রাধিষ্ঠানবিশেষাদ্দোস্যাল্পবলতা উক্তা ভবতি| অব্যক্তরূপাণ্যপি বক্ষ্যমাণভ্রমরারুণবর্ণাদিযুক্তানি বাতেন, পিত্তেনাদিত্যখদ্যোতাদিপীতনীলবর্ণানি, কফেন সিতবর্ণানি, রক্তেন রক্তবর্ণানি, সন্নিপাতেন চিত্রবর্ণানি; এবং দ্বিতীযতৃতীযচতুর্থপটলেষ্বপি ব্যাখ্যেযম্||২৯||

Adhikarana dvitIyapaTalagatadoShalakShaNam (30-32) · Śloka 32

দৃষ্টির্ভৃশং বিহ্বলতি দ্বিতীযং পটলং গতে | মক্ষিকামশকাংশ্চাপি জালকানি চ পশ্যতি ||৩০|| মণ্ডলানি পতাকাংশ্চ মরীচিং কুণ্ডলানি চ | পরিপ্লবাংশ্চ বিবিধান্ বর্ষমভ্রং তমাংসি চ ||৩১|| দূরস্থানি চ রূপাণি মন্যতে স সমীপতঃ | সমীপস্থানি দূরে চ দৃষ্টের্গোচরবিভ্রমাত্ ||৩২|| যত্নবানপি চাত্যর্থং সূচীপাশং ন পশ্যতি | (সু. উ. তং. অ. ৭) |

দ্বিতীযপটলগতস্য লিঙ্গমাহ– দৃষ্টির্ভৃশং বিহ্বলতীত্যাদি| বিহ্বলতি পুনঃ পুনঃ অসম্যগ্রূপং গৃহ্ণাতি, তথা অবিদ্যমানান্ মক্ষিকাদীন্ পশ্যতি; অথবা মক্ষিকেত্যাদিনা বিহ্বলত্বমেব ব্যাক্রিযতে| জালকানি জালান্যেব| মরীচীনিতি রশ্মীন্| পরিপ্লবানিতি মণ্ডূকাদীনাং পরি সর্বতঃ প্লবান্ গতীঃ| বিবিধানিতি ঊর্ধ্বাধস্তির্যগ্গতশ্লেষ্মাদিদোষবর্ণেন চ নানাবিধান্, অন্যে পরিপ্লবান্ বিবিধানিতি নানাবর্ণান্ জলপ্লবানিত্যাচক্ষতে| গোচরবিভ্রমাদিতি বিষযভ্রান্তেঃ| সূচীপাশং ন পশ্যতীতি সতোঽপি সূক্ষ্মস্যানুপলম্ভঃ; সূচীপাশং সূচীরন্ধ্রং, পাশং বা গুণম্||৩০-৩২||–

Adhikarana tRutIyapaTalagatadoShalakShaNam (33-34) · Śloka 34

ঊর্ধ্বং পশ্যতি নাধস্তাত্তৃতীযং পটলং গতে ||৩৩|| মহান্ত্যপি চ রূপাণি ছাদিতানীব চাম্বরৈঃ | কর্ণনাসাক্ষিহীনানি বিকৃতানীব পশ্যতি ||৩৪|| যথাদোষং চ রজ্যেত দৃষ্টির্দোষে বলীযসি | (সু. উ. তং. অ. ৭) |

তৃতীযপটলগতস্য লিঙ্গমাহ– ঊর্ধ্বং পশ্যতীত্যাদি| ঊর্ধ্বদর্শনাভিধানাদধোদর্শনস্য নিষেধসিদ্ধৌ তদভিধানং স্বরূপানুবাদার্থম্| ননু, পার্শ্বযোরীষদ্দর্শনার্থং কিমিত্যেতন্ন ভবতি? উচ্যতে– ঊর্ধ্বাধোগতত্বেনৈব পার্শ্বস্য পরিগ্রহাদিতি কার্তিকঃ| যদেতদ্রূপং পশ্যতি তত্ কীদৃশমিত্যত আহ– মহান্ত্যপীত্যাদি| “ছাদিতানীব চাম্বরৈরিতি আবৃতানীব বস্ত্রৈঃ|” ‘অম্বরে’ ইতি পাঠান্তরে আকাশে ছাদিতানি কেনাপি| বিকৃতানীবেতি ছিন্নকরপাদাদীনি| অত্র রাগপ্রাপ্তিমাহ– যথাদোষং চ রজ্যেত দৃষ্টির্দোষে বলীযসীতি| অস্যার্থঃ– যথাযথং দোষবর্ণৈররুণপীতসিতাদিভির্যুজ্যতে দৃষ্টিঃ; রাগশ্চাত্র বর্ণমাত্রবচনঃ| অত এব বক্ষ্যতি– “কফাত্ সিতঃ শোণিতজঃ সরক্ত” (সু. উ. তং. অ. ৭) ইতি| দোষে বলীযসীতি রক্তমাংসমেদঃসহাযে বলবতি দোষে, অন্যথা তু তৃতীযেঽপি রাগো ন ভবতীতি ব্যভিচারঃ সূচ্যত ইতি গদাধরঃ| ননু, তৃতীযে কথং রাগবর্ণনং, বাহ্যপটলেনাবৃতে দর্শনাসম্ভবাত্? ন চাশ্মরীবর্ণাভিধানবদাযুর্বেদপ্রামাণ্যার্থং ভবিষ্যতীতি, অশ্মর্যা উত্তরকালমাকৃষ্টৌ তথা প্রতীতেঃ, ইহ তু ন তাদৃক্| উচ্যতে– তৃতীযপটলগতস্য দোষস্য তথাস্বভাবাদ্বাহ্যে রাগোপলব্ধিঃ, তৃতীযপটলাদারভ্য রাগোদযঃ| যদাহ বিদেহঃ– “যথাস্বং রজ্যতে দৃষ্টির্দোষৈস্ত্রিপটলস্থিতৈঃ| চতুর্থপটলপ্রাপ্তৈর্মণ্ডলং রজ্যতে তু তৈঃ||” ইতি||৩৩-৩৪||–

Adhikarana adhaUrdhvAdipradeshasthadoShali~ggam (35-37) · Śloka 1

অধঃস্থিতে সমীপস্থং দূরস্থং চোপরিস্থিতে ||৩৫|| পার্শ্বস্থিতে তথা দোষে পার্শ্বস্থং নৈব পশ্যতি | সমন্ততঃ স্থিতে দোষে সঙ্কুলানীব পশ্যতি ||৩৬|| দৃষ্টিমধ্যস্থিতে দোষে মহদ্ধ্রস্বং চ পশ্যতি | দ্বিধা স্থিতে দ্বিধা পশ্যেদ্বহুধা চানবস্থিতে ||৩৭|| (সু. উ. তং. অ. ৭) | দোষে দৃষ্ট্যাশ্রিতে তির্যক্ স একং মন্যতে দ্বিধা ||১||

অধুনাধ ঊর্ধ্বমেবং যথাপ্রদেশং দৃষ্টৌ দোষাবস্থানে যথা ন পশ্যতি যাদৃগ্বা পশ্যতি তথা দর্শযিতুমাহ– অধঃস্থিত ইত্যাদি| সমীপস্থং দূরস্থং চেতি নৈব পশ্যতীতি সম্বন্ধঃ| সমন্তত ইতি সর্বতঃ| সঙ্কুলানীবেতি অন্যান্যরূপেণৈব মিশ্রাণি| অনবস্থিত ইতি অনিযতাবস্থান ইত্যর্থঃ||৩৫-৩৭||–

Adhikarana caturthapaTalagatadoShalakShaNam (38-40) · Śloka 40

তিমিরাখ্যঃ স বৈ দোষশ্চতুর্থং পটলং গতঃ ||৩৮|| রুণদ্ধি সর্বতো দৃষ্টিং লিঙ্গনাশমতঃ পরম্ | অস্মিন্নপি তমোভূতে নাতিরূঢে মহাগদে ||৩৯|| চন্দ্রাদিত্যৌ সনক্ষত্রাবন্তরীক্ষে চ বিদ্যুতঃ | নির্মলানি চ তেজাংসি ভ্রাজিষ্ণূন্যথ পশ্যতি ||৪০|| (সু. উ. তং. অ. ৭) |

চতুর্থপটলগতমাহ– তিমিরাখ্য ইত্যাদি| আন্ধ্যোত্পাদকতযা তিমিরসাধর্ম্যাত্তিমিরাখ্যঃ, দোষো রোগঃ, “দোষা অপি রোগাখ্যাং লভন্তে” ইত্যাগমাত্; স এব রোগঃ সর্বতো দৃষ্টিরোধাল্লিঙ্গনাশ উচ্যতে; লিঙ্গ্যতে জ্ঞাযতেঽনেনেতি লিঙ্গমিন্দ্রিযং দর্শনশক্তিঃ, তন্নাশোঽস্মিন্নিতি লিঙ্গনাশঃ| লিঙ্গনাশমতঃ পরং ‘বদন্তি’ ইতি শেষঃ| অস্মিন্নপি তমোভূত ইতি ভূতশব্দঃ সাদৃশ্যে, রূপস্যানুপলম্ভাদন্ধকারসদৃশে| নাতিরূঢে নাতিবৃদ্ধে, অতশ্চন্দ্রাদিত্যাদীনি ভাস্বন্তি বস্তূনি পশ্যতি| অন্তরীক্ষে চেত্যস্যোপাদানং ভূমেস্তমোমযত্বাত্, তত্র চ তমোঽভিভবাত্তাদৃশস্য চক্ষুষো দর্শনাশক্তেঃ||৩৮-৪০||

Adhikarana li~gganAshasya nIlikA-kAcasa~jj~jAntaram (41) · Śloka 41

স এব লিঙ্গনাশস্তু নীলিকা কাচসঞ্জ্ঞিতঃ |৪১| (সু. উ. তং. অ. ৭) |

তস্যৈব লিঙ্গনাশস্য সঞ্জ্ঞান্তরমাহ– স এব লিঙ্গনাশস্ত্বিত্যাদি| যস্তৃতীযপটলস্থিতঃ কাচসঞ্জ্ঞিতো দোষঃ স এবোপেক্ষযা চতুর্থে পটলে পুনর্লিঙ্গনাশো নীলিকা চ| তুশব্দঃ পুনরর্থে| কুতঃ পুনরযমৃজুরেব গ্রন্থো ন লগতি– নীলিকাকাচাভ্যাং পর্যাযাভ্যাং সঞ্জ্ঞিতো নীলিকাকাচসঞ্জ্ঞিত ইতি; নৈবং, তন্ত্রান্তরে তৃতীযপটলস্থিতে দোষে কাচাভিধানাত্| যদাহ নিমিঃ– “কাচ ইত্যেষ বিজ্ঞেযো যাপ্যস্ত্রিপটলোত্থিতঃ| চতুর্থপটলপ্রাপ্তো লিঙ্গনাশঃ স উচ্যতে|| প্রত্যাখ্যেযশ্চ কফজো ব্যাধিঃ সাধ্যস্তু তদ্বিদা|” ইতি| অত্রাপি তত্প্রত্যযাত্ তৃতীযপটলস্থস্য কাচসঞ্জ্ঞা, চতুর্থপটলপ্রাপ্তস্য প্রত্যাখ্যেযত্বং প্রত্যেতব্যম্| যত্ পুনর্লিঙ্গনাশোপাদানং তত্ সকলপর্যাযজ্ঞাপকার্থম্| গদাধরস্তু “নীলিকাবিশেষিতা কাচসঞ্জ্ঞা নীলিকাকাচসঞ্জ্ঞা” ইত্যাহ; এতেন তৃতীযপটলস্থদোষে কাচসঞ্জ্ঞা, চতুর্থে তু সা নীলিকযা বিশিষ্যতে ইতি ফলতি| একজাতীযতযা ত্রিচতুঃপটলযোরপি রোগাণাং ষট্ত্বমেব, নতু দ্বাদশত্বং; তেন ন সঙ্খ্যাতিরেকঃ| ইদমিদানীং চিন্ত্যতে– তৃতীযপটলস্থে দোষে কাচসঞ্জ্ঞা তিমিরসঞ্জ্ঞা চ, তর্হি কথং ন ষট্সঙ্খ্যাহানিঃ? কাচাত্তিমিরস্য ভিন্নত্বাত্, উক্তং চ– “ষড্ লিঙ্গনাশাঃ” ইতি; অথ মন্যসে, তিমিরাত্ কাচো ন ভিদ্যতে, তস্যাবস্থান্তরত্বাদিতি; ন, তদ্বিপরীতসাধকত্বাদ্ধেতোঃ; যতোঽভিষ্যন্দসিরোত্পাতাভ্যামধিমন্থসিরাহর্ষযোরবস্থান্তরত্বেঽপি ভিন্নত্বং প্রতীযতে| উচ্যতে– ভবত্যেবং, যদ্যবস্থান্তরত্বেঽপি বিশিষ্টনামপ্রাপ্তিস্তযোরিবাস্য প্রথমনামপরিত্যাগাত্ স্যাত্; ন চৈবং, “তিমিরাখ্যঃ স বৈ দ্ষঃ” (সু. উ. তং. অ. ৭) ইত্যভিধানাত্ তথাচ ‘তিমিরে রাগিণি’ ইতি বচনাত্; তস্মান্নাস্যাবস্থান্তরে পূর্বনামপরিত্যাগঃ, ততস্তিমিরাত্ কাচস্যাবস্থান্তরত্বেঽপ্যনন্যত্বং সাধু, যথা– সত্যপি যৌবনত্বে যজ্ঞদত্তস্য ন স্বাভিধেযহানিঃ, অতো ন সঙ্খ্যাতিরেকপ্রসঙ্গ ইতি|৪১|–

Adhikarana doShavisheSheNa rUpavisheShadarshanam (41-46) · Śloka 46

বাতেন চাপি রূপাণি ভ্রমন্তীব চ পশ্যতি ||৪১|| আবিলান্যরুণাভানি ব্যাবিদ্ধানীব মানবঃ | পিত্তেনাদিত্যখদ্যোতশক্রচাপতডিদ্গুণান্ ||৪২|| নৃত্যতশ্চৈব শিখিনঃ সর্বং নীলং চ পশ্যতি | কফেন পশ্যেদ্রূপাণি স্নিগ্ধানি চ সিতানি চ ||৪৩|| (গৌরচামরগৌরাণি শ্বেতাভ্রপ্রতিমানি চ | পশ্যেদসূক্ষ্মাণ্যত্যর্থং ব্যভ্রে চৈবাভ্রসম্প্লবম্) | সলিলপ্লাবিতানীব পরিজাড্যানি মানবঃ | পশ্যেদ্রক্তেন রক্তানি তমাংসি বিবিধানি চ ||৪৪|| স সিতান্যপি কৃষ্ণানি পীতান্যপি চ মানবঃ | সন্নিপাতেন চিত্রাণি বিপ্লুতানীব পশ্যতি ||৪৫|| বহুধা চ দ্বিধা চাপি সর্বাণ্যেব সমন্ততঃ | হীনাধিকাঙ্গান্যপি তু জ্যোতীংষ্যপি চ ভূযসা ||৪৬|| (সু. উ. তং. অ. ৭) |

দোষবিশেষেণ রূপবিশেষদর্শনমাহ– বাতেনেত্যাদি| অবিশেষেণ যদুক্তমেতত্ বাতে তত্ সর্বপটলেষু সম্বধ্যতে, তুল্যত্বান্ন্যাযস্য| ব্যাবিদ্ধানীব কুটিলানীব| খদ্যোতো জ্যোতিরিঙ্গণঃ, শক্রচাপ ইন্দ্রধনুঃ, গুণান্ রূপাণি, আদিত্যাদীনাং রূপাণীত্যর্থঃ| শিখিনো মযূরান্| সলিলপ্লাবিতানীব পরিজাড্যানীতি সলিলপ্লবনেনৈব স্তিমিতানীত্যর্থঃ| সিতানীতি শ্বেতানি| ননু, রক্তেন কথং সিতানীত্যুচ্যন্তে? শ্লেষ্মণা সিতরূপস্য দর্শিতত্বাত্| নৈবং, সিতান্যপি কৃষ্ণানি পীতানি পশ্যতীতি ব্যাখ্যানাদদোষঃ; স ইতি মানবঃ| রক্তেন কৃষ্ণপীতদর্শনং পিত্তসধর্মকত্বাদ্রক্তস্য| চিত্রাণীতি নানাবর্ণানি| বিপ্লুতানীবেতি বিপরীতানি| বিপরীতত্বমেব বিবৃণোতি– বহুধেত্যাদি| অযমর্থঃ– সন্নিপাতেন পূর্বপ্রকারেণ বহুবিধানি দ্বিবিধানি বা সর্বাণি দ্রব্যাণি পশ্যতি, তৃতীযপটলে হীনাধিকাঙ্গান্যপীতি গদাধরঃ||৪১-৪৬||

Adhikarana parimlAyisa~jj~jakatimiralakShaNam (47) · Śloka 47

পিত্তং কুর্যাত্ পরিম্লাযি মূর্ছিতং পিত্ততেজসা | পীতা দিশস্তু খদ্যোতান্ ভাস্করং চাপি পশ্যতি ||৪৭|| বিকীর্যমাণান্ খদ্যোতৈর্বৃক্ষাংস্তেজোভিরেব বা | (সু. উ. তং. অ. ৭) |

পিত্তেনাপরং পরিম্লাযিসঞ্জ্ঞকং তিমিরমাহ– পিত্তং কুর্যাদিত্যাদি| পরিম্লাযীতি পরিম্লাযি তিমিরম্; এতচ্চ রক্তমূর্ছিতপিত্তকৃতং পীতং নীলং বোদ্ধব্যম্| যদাহ সাত্যকিঃ– “এবমেব তু বিজ্ঞেযা নীলাঃ পিত্তসমুত্থিতাঃ| রক্তাঃ পিত্তোত্থিতাঃ পীতাঃ||” ইতি| অত্র বচনে কাচ ইতি বিশেষ্যত্বেন বোদ্ধব্যম্| মূর্ছিতং পিত্ততেজসেতি পিত্তস্য তেজো রক্তং, প্রসাদরূপত্বাত্; তেন মিশ্রিতম্| অন্যে তু ‘রক্ততেজসা’ ইতি পঠন্তি, রক্তস্য তেজো বলং রক্ততেজঃ; কেচিত্ ‘ভক্ততেজসা’ ইতি পঠন্তি, ভক্তস্য অন্নস্য তেজসা প্রসাদেন রসেনেত্যর্থঃ; রক্ততেজসেত্যত্রাপি রক্তার্থং তেজো রক্ততেজ ইতি রস এবাভিধাতুং শক্যতে, পিত্ততেজসেত্যত্রাপি পিত্তার্থং তেজঃ পিত্ততেজঃ; পিত্তশব্দেন সমানত্বেন তত্প্রসাদত্বেন চ রক্তমভিধায পূর্ব এবার্থঃ কর্তুং শক্যতে| তথা চ বিদেহঃ– “পিত্তং রক্তপ্রসাদেন মূর্ছযিত্বা চ মারুতম্|” ইত্যারভ্য “এষ যাপ্যঃ স্মৃতঃ কাচো ম্লাযীনাম্না শরীরিণাম্|” ইতি| ইদং ত্বন্যত্র রক্তপিত্তাভ্যাং পঠ্যতে| যদুক্তং – “বিদধাতি পরিম্লাযি পিত্তং রক্তেন সঙ্গতম্| তেন পীতা দিশঃ পশ্যেদুদ্যন্তমিব ভাস্করম্||” ইতি| অত্রাপি যদি রক্তশব্দেন রক্তার্থং যত্তদ্রক্তমিতি কুসৃষ্ট্যা রসোঽভিধীযতে, তদা পূর্বেণ সহ সমানার্থমেবৈতদ্বচনং স্যাদিতি| পরিম্লাযিরোগে তিমিরবতঃ পুংসো রাগগ্রহণে লিঙ্গমাহ– পীতা দিশ ইত্যাদি| বিকীর্যমাণানিতি আচ্ছাদ্যমানান্| যাপ্যশ্চাযং, তথাহি সাত্যকিঃ– “তৃতীযং পটলং প্রাপ্তং তিমিরং রাগি জাযতে| অরাগি তিমিরং সাধ্যমাদ্যং পটলমাশ্রিতম্|| কৃচ্ছ্রং দ্বিতীযে রাগি স্যাত্ তৃতীযে যাপ্যমুচ্যতে|” ইতি||৪৭||–

Adhikarana li~gganAshasya rAgaiH ShaDvidhatvam (48) · Śloka 48

বক্ষ্যামি ষড্বিধং রাগৈর্লিঙ্গনাশমতঃ পরম্ ||৪৮||

বাতাদিভেদেন ষড্বিধং তিমিরমভিধায রাগৈঃ ষড্বিধমাহ– বক্ষ্যামি ষড্বিধং রাগৈরিত্যাদি| সর্বানুগাং তিমিরসঞ্জ্ঞাং বিহায লিঙ্গনাশসঞ্জ্ঞযা কীর্তনং রাগপ্রকর্ষপ্রাপ্তেঃ||৪৮||

Adhikarana vAtikAdirAgoddeshaH (49) · Śloka 49

রাগোঽরুণো মারুতজঃ প্রদিষ্টো ম্লাযী চ নীলশ্চ তথৈব পিত্তাত্ | কফাত্ সিতঃ শোণিতজঃ সরক্তঃ সমস্তদোষপ্রভবো বিচিত্রঃ ||৪৯|| (সু. উ. তং. অ. ৭) |

বাতাদিরাগোদ্দেশমাহ– রাগোঽরুণ ইত্যাদি| ম্লাযী চ নীলশ্চ তথৈব পিত্তাদিতি ম্লাযী পীতনীলো বর্ণঃ| ননু, শেষে পরিম্লাযি পঠিতং তত্ কথমধুনা বাতরোগস্যানন্তরোক্তিঃ? নৈবং, রাগকালে বাযুরপ্যত্রাংশেন ব্যাপ্রিযতে ইতি প্রতিপাদনার্থমিতি কার্তিকঃ| পৈত্তিকরূপদ্বযস্যৈকত্রাভিধানেন লাঘবং স্যাদিতি যুক্তং, যত্তু প্রাগেব ন কৃতং তদেকবিকারশঙ্কানিরাসার্থম্||৪৯||

Adhikarana vAtikarAgasya vishiShTalakShaNam (50) · Śloka 50

অরুণং মণ্ডলং দৃষ্ট্যাং স্থূলকাচারুণপ্রভম্ |৫০| (সু. উ. তং. অ. ৭) |

উদ্দেশক্রমেণ বাতিকরাগস্যৈব বিশিষ্টলক্ষণমাহ– অরুণং মণ্ডলমিত্যাদি| অরুণং মণ্ডলং কীদৃশং ভবতীত্যত আহ– স্থূলকাচারুণপ্রভমিতি| স্থূলকাচস্যেব অরুণা প্রভা যস্য তত্তথা; এতেন বাহুল্যমরুণত্বং চ প্রতিপাদ্যতে| কাচোঽত্রারুণো বিবক্ষিতঃ|৫০|–

Adhikarana parimlAyino vishiShTali~ggam (50) · Śloka 50

পরিম্লাযিনি রোগে স্যান্ম্লাযি নীলং চ মণ্ডলম্ ||৫০|| দোষক্ষযাত্ স্বযং তত্র কদাচিত্ স্যাত্তু দর্শনম্ | (সু. উ. তং. অ. ৭) |

পরিম্লাযিনো বিশিষ্টলিঙ্গমাহ– পরিম্লাযিনীত্যাদি| অত্র গদাধরস্তু “রক্তজং মণ্ডলং দৃষ্ট্যাং স্থূলকাচানলপ্রভম্|” ইতি পঠিত্বা এতদপি পরিম্লাযিলক্ষণমাহ, ব্যাচষ্টে চ– বাহুল্যেন স্থূলকাচস্যেব বর্ণতঃ অনলস্যেব প্রভা যস্য তত্তথেতি, অনলপ্রভত্বেন পীতং মণ্ডলং ভবতি; পীতং চেষন্নীলং বোদ্ধব্যং, “ম্লাযি নীলং চ মণ্ডলম্” ইত্যভিধানাত্; তথা “পিত্তান্মণ্ডলমানীলং কাংস্যাভং পীতমেব চ|” (সু. উ. তং. অ. ৭) ইত্যুক্তম্; আনীলমীষন্নীলমিত্যর্থঃ| ম্লাযীতি ম্লানমিতি কার্তিকঃ| দোষক্ষযাদিতি কর্মক্ষযাত্; সত্যপি দোষরূপত্বে দর্শনসদ্ভাবাত্| ননু, কিং তর্হি দোষরূপং তাদৃশমেবাবতিষ্ঠতে উত ক্ষীণং বা? তত্র ন তাবদাদ্যঃ পক্ষঃ, দোষাণাং কৃতকার্যাণাং তথাত্বে দর্শনস্যাসঙ্গতত্বাত্; অথ দ্বিতীযস্তদা দোষস্যৈব ক্ষযাদিত্যাপতিতং কিমিতি কর্মক্ষযাদিতি স্বীক্রিযতে? নৈবং, বিনা দোষপ্রতীকারং দর্শনোদযাদ্বিকারস্বভাবাদিতি কার্তিকঃ| অন্যে তু কালবশাত্ বাতাদিদোষস্যৈব ক্ষযাত্ কদাচিদ্দর্শনং স্যাদিত্যাহুঃ, যতঃ কালাদিজমপি বিশেষং ক্বচিল্লক্ষণত্বেন পঠত্যেব, দোষশব্দেন চ কর্মণোঽভিধানমপ্রসিদ্ধং; কিংবা দোষক্ষযে এব কদাচিত্ কর্মক্ষযো হেতুরিষ্যতাং, কর্মণশ্চ কদাচিত্ ক্ষযো বৈচিত্র্যাত্| অথাত্রৈব কুত এবম্? উচ্যতে– অস্যৈবংবিধকর্মজন্যত্বাদিতি| গদাধরপাঠে রক্তজমিত্যত্র রক্তমিত্যুপলক্ষণং, তেন রক্তপিত্তজম্||৫০||–

Adhikarana vAtikAdirAgANAmuddiShTAnAM lakShaNam (51-54) · Śloka 54

অরুণং মণ্ডলং বাতাচ্চঞ্চলং পরুষং তথা ||৫১|| পিত্তান্মণ্ডলমানীলং কাংস্যাভং পীতমেব চ | শ্লেষ্মণা বহুলং পীতং শঙ্খকুন্দেন্দুপাণ্ডুরম্ ||৫২|| চলত্পদ্মপলাশস্থঃ শুক্লো বিন্দুরিবাম্ভসঃ | ( সঙ্কুচত্যাতপেঽত্যর্থঃ ছাযাযাং বিস্তৃতো ভবেত্) | মৃজ্যমানে চ নযনে মণ্ডলং তদ্বিসর্পতি ||৫৩|| প্রবালপদ্মপত্রাভং মণ্ডলং শোণিতাত্মকম্ | দৃষ্টিরাগো ভবেচ্চিত্রো লিঙ্গনাশে ত্রিদোষজে | যথাস্বং দোষলিঙ্গানি সর্বেষ্বেব ভবন্তি হি ||৫৪|| (সু. উ. তং. অ. ৭) | ( তথা নরঃ পিত্তবিদগ্ধদৃষ্টিঃ কফেন চান্যস্ত্বথ ধূমদর্শী | যো হ্রস্বজাত্যো নকুলান্ধতা চ গম্ভীরসঞ্জ্ঞাচ্চ তথৈব দৃষ্টিঃ) |

রাগোঽরুণো মারুতজ ইত্যাদি সূত্রং পূর্বোক্তং বিবৃণোতি– অরুণং মণ্ডলং বাতাদিত্যাদি| পিত্তান্মণ্ডলমানীলমিতি আনীলমীষন্নীলং পীতমেব, তেন রক্তসম্বন্ধে সতি কাংস্যাভম্| পীতমেব চেতি রসসম্বন্ধে পীতমেব, কাংস্যাভমাপাণ্ডুপীতমিত্যর্থঃ| কেচিদত্র কফজে পঠন্তি– “সঙ্কুচত্যাতপেঽত্যর্থং ছাযাযাং বিস্তৃতো ভবেত্|” (সু. উ. তং. অ. ৭) ইতি| শোণিতজে প্রবালেত্যাদৌ প্রবালং স্বনামখ্যাতং তদাভং, পদ্মপত্রাভং চ রক্তপদ্মপুষ্পদলাভম্| ত্রিদোষজে চিত্র ইত্যত্র যথাস্বং বাতাদিবর্ণবিভেদেন চিত্রত্বং বোদ্ধব্যং, যথাস্বমিত্যস্য বক্ষ্যমাণস্যাত্রাপি সম্বন্ধাত্; তেনাযমর্থঃ– যথাযথং বাতাদীনাং বর্ণভেদেন চিত্রবর্ণো ভবতি, উদ্দেশোক্তবর্ণচিত্রত্বে সাক্ষাদেতাদৃশবিবরণাভাব ইতি বিশেষঃ| যথাস্বং দোষলিঙ্গানীত্যস্যাভিধানং ন্যাযসিদ্ধস্যৈবার্থস্য দ্যোতনার্থম্| দোষলিঙ্গানি বাতাদীনাং ক্রমেণারুণাদিলিঙ্গান্যুক্তেষু জ্ঞাতব্যানি||৫১-৫৪||

Adhikarana dRuShTigatarogANAM sa~gkhyA (55) · Śloka 55

ষড্ লিঙ্গনাশাঃ ষডিমে চ রোগা দৃষ্ট্যাশ্রযাঃ ষট্ চ ষডেব বাচ্যাঃ |৫৫| (সু. উ. তং. অ. ৭) |

অতঃ পরমুক্তবক্ষ্যমাণবিকারযোঃ সঙ্খ্যাভিধানার্থমাহ– ষডিত্যাদি| ষড্ লিঙ্গনাশা ইত্যুক্তানুবাদোঽযম্| ষডিমে চ রোগা ইতি পিত্তবিদগ্ধদৃষ্ট্যাদযো বক্ষ্যমাণাঃ| ননু, উক্তানুবাদো যুক্তঃ, বক্ষ্যমাণানাং পুনঃ কিমর্থং সঙ্খ্যোক্তিঃ? নৈবং, পিত্তকফবিদগ্ধদৃষ্ট্যবস্থান্তরাভ্যাং দিবান্ধরাত্র্যন্ধাভ্যাং সঙ্খ্যাধিক্যনিরাসার্থম্, অত এব ষডেবেত্যবধারণং কৃতং, ষট্ চ ষডেব ইতি মিলিত্বা দ্বাদশ; অমুং চ গ্রন্থং কেচিদত্র সঙ্গ্রহে ন পঠন্ত্যেব|৫৫|–

Adhikarana pittavidagdhadRuShTilakShaNam (55-56) · Śloka 56

পিত্তেন দুষ্টেন সদা তু দৃষ্টিঃ পীতা ভবেদ্যস্য নরস্য কিঞ্চিত্ ||৫৫|| পীতানি রূপাণি চ তেন পশ্যেত্ স বৈ নরঃ পিত্তবিদগ্ধদৃষ্টিঃ | প্রাপ্তে তৃতীযং পটলং তু দোষে দিবা ন পশ্যেন্নিশি চেক্ষতে সঃ ||৫৬|| রাত্রৌ চ শীতানুগৃহীতদৃষ্টিঃ পিত্তাল্পভাবাদপি তানি পশ্যেত্ | (সু. উ. তং. অ. ৭) |

পিত্তবিদগ্ধদৃষ্টিলিঙ্গমাহ– পিত্তেনেত্যাদি| দৃষ্টিঃ পীতা ভবেদিতি প্রথমদ্বিতীযযোঃ পটলযোরিতি গম্যতে, যতঃ পরতঃ “প্রাপ্তে তৃতীযং পটলং” ইত্যভিধাস্যতি| ননু, যদ্যেবং কথং তিমিরাদস্যাঃ পার্থক্যম্? উচ্যতে– তৃতীযপটলপ্রাপ্তিমন্তরেণ বর্ণাসদ্ভাবাত্| এতচ্চ সতি বর্ণে পটলান্তরগতদোষলিঙ্গাভাবাত্ প্রত্যেতব্যম্| অস্মিন্নেব ব্যবস্থানে তাদৃক্ স্বরূপো দোষঃ কথমন্যবিকারং করোতীতি নাশঙ্কনীযম্, তজ্জনককর্মণো ভিন্নত্বেন সামগ্রীভেদাত্| অযং দিবান্ধঃ, দিবা ন পশ্যেদিতি বচনাত্| তানীতি রূপাণি| দোষে পিত্তে||৫৫-৫৬||–

Adhikarana shleShmavidagdhadRuShTilakShaNam (57-58) · Śloka 58

তথা নরঃ শ্লেষ্মবিদগ্ধদৃষ্টিস্তান্যেব শুক্লানি তু মন্যতে সঃ ||৫৭|| ত্রিষু স্থিতোঽল্পঃ পটলেষু দোষো নক্তান্ধ্যমাপাদযতি প্রসহ্য | দিবা স সূর্যানুগৃহীতদৃষ্টিঃ পশ্যেত্তু রূপাণি কফাল্পভাবাত্ ||৫৮|| (সু. উ. তং. অ. ৭) |

শ্লেষ্মবিদগ্ধদৃষ্টিলিঙ্গমাহ– তথা নরঃ শ্লেষ্মবিদগ্ধদৃষ্টিরিত্যাদি| এতাং চ প্রথমদ্বিতীযপটলাশ্রিতঃ শ্লেষ্মা জনযতি; পরতঃ ‘ত্রিষু’ ইত্যুক্তেঃ| তানীতি রূপাণি| ত্রিষু স্থিতোঽল্প ইত্যনেন দিবাদর্শনং প্রত্যানুকূল্যং খ্যাপ্যতে, যদি হি অনল্পদোষঃ স্যাত্তদা দিবাঽপি দর্শনং ন ভবেদেব| দোষোঽত্র কফঃ, তস্যৈব প্রক্রান্তত্বাত্; অযং নক্তান্ধঃ||৫৭-৫৮||

Adhikarana dhUmadarshIlakShaNam (59) · Śloka 59

শোকজ্বরাযাসশিরোঽভিতাপৈরভ্যাহতা যস্য নরস্য দৃষ্টিঃ | ধূম্রাংস্তথা পশ্যতি সর্বভাবান্ স ধূমদর্শীতি নরঃ প্রদিষ্টঃ ||৫৯|| (সু. উ. তং. অ. ৭) |

ধূমদর্শিনো লিঙ্গমাহ– শোকজ্বরাযাসেত্যাদি| শোকাদিভিঃ কারণৈঃ কুপিতেন পিত্তেনাভ্যাহতা উপহতা দৃষ্টিরিতি প্রত্যেতব্যম্, অস্য সুশ্রুতে রোগসঙ্গ্রহে পৈত্তিকগণেঽভিধানাত্| অযং চ রোগো বাহ্যপটলস্থেন দোষেণ জন্যত ইতি গদাধরঃ, তৃতীযপটলাশ্রিতদোষেণেতি কার্তিকঃ| দিবা ধূমান্ পশ্যতি, ন তু নক্তং; তদা পিত্তস্য ক্ষীণত্বাদিতি ব্যাখ্যানযন্তি||৫৯||

Adhikarana hrasvajADyalakShaNam (60) · Śloka 60

যো হ্রস্বজাড্যো দিবসেষু কৃচ্ছ্রাদ্ধ্রস্বানি রূপাণি চ তেন পশ্যেত্ |৬০| (সু. উ. তং. অ. ৭) |

হ্রস্বজাড্যলক্ষণমাহ– যো হ্রস্বজাড্য ইত্যাদি| তেন হ্রস্বজাড্যেন হ্রস্বানি রূপাণি দিবা যঃ পশ্যেত্ স হ্রস্বজাড্য ইতি যোজনা| অত্র দোষো দৃষ্টিমধ্যগতঃ| যদুক্তম্– “দৃষ্টিমধ্যগতে দোষে মহদ্ধ্রস্বং চ পশ্যতি|” ইতি| অযং পৈত্তিকঃ|৬০|–

Adhikarana nakulAndhyalakShaNam (60) · Śloka 60

বিদ্যোততে যস্য নরস্য দৃষ্টির্দোষাভিপন্না নকুলস্য যদ্বত্ ||৬০|| চিত্রাণি রূপাণি দিবা স পশ্যেত্ স বৈ বিকারো নকুলান্ধ্যসঞ্জ্ঞঃ | (সু. উ. তং. অ. ৭) |

নকুলান্ধ্যসঞ্জ্ঞমাহ– বিদ্যোততে যস্যেত্যাদি| নকুলস্য যদ্বত্ ব্যথা দৃষ্টির্বিদ্যোততে বর্ণেন প্রতিভাসতে তথাঽস্যেত্যর্থঃ| অতঃ সর্বদৃষ্টিমণ্ডলগতো রাগঃ সর্বদোষবর্ণশ্চ; দোষাভিপন্নেত্যত্র দোষশব্দস্যাবিশেষিত্বাদভিশব্দস্যাভিব্যাপ্ত্যর্থস্য প্রযোগাত্| এতৌ হ্রস্বজাড্যনকুলান্ধ্যৌ চতুঃপটলস্থিতদোষজন্যৌ সরাগৌ ন সাধ্যৌ| তথাচ বিদেহঃ– “নক্তমন্ধাস্তু চত্বারো যে পুরস্তাত্ প্রকীর্তিতাঃ| তেষামসাধ্যো নকুলো হ্রস্বজাড্যস্তথৈব চ|| বিশেষেণ ভবেযাতাং দ্বৌ চতুঃপটলাশ্রিতৌ| তৌ চ সম্প্রাপ্তরাগত্বাদসাধ্যৌ পরিকীর্তিতৌ||” ইতি| এতৌ চ রাত্র্যন্ধৌ প্রত্যেতব্যৌ, দিবা হ্রস্বচিত্ররূপদর্শনাভিধানেন রাত্রাবদর্শনপ্রতীতেঃ| বিদেহেন তু নক্তান্ধ্যে ত্রিত্বেঽপি চত্বার ইত্যুক্তং, নক্তান্ধ্যবাহুল্যেন দিবান্ধ্যেঽপি তত্প্রযোগাত্; ছত্রিণো গচ্ছন্তীতিবত্||৬০||

Adhikarana gambhIrikAlakShaNam (61) · Śloka 61

দৃষ্টির্বিরূপা শ্বসনোপসৃষ্টা সঙ্কোচমভ্যন্তরতস্তু যাতি ||৬১|| রুজাবগাঢা চ তমক্ষিরোগং গম্ভীরিকেতি প্রবদন্তি তজ্জ্ঞাঃ | (সু. উ. তং. অ. ৭) |

গম্ভীরিকালক্ষণমাহ– দৃষ্টিরিত্যাদি| বিরূপা বিকৃতা| শ্বসনোপসৃষ্টা বাতোপগতা, সঙ্কোচমভ্যন্তরতস্তু যাতীতি অন্তঃসঙ্কোচমেতি নিমজ্জতীত্যর্থঃ; “ সঙ্কুচ্যতেঽভ্যন্তরতশ্চ যাতি” ইতি পাঠান্তরেঽপ্যযমেবার্থঃ, ইযমবিশেষোক্তিঃ| সকলপটলগতবাতজন্যা অসাধ্যা, সুশ্রুতে গম্ভীরিকা তথেতি নির্দেশাত্||৬১||–

Adhikarana sanimittali~gganAsha-animittali~gganAshalakShaNam (62-64) · Śloka 64

বাহ্যৌ পুনর্দ্বাবিহ সম্প্রদিষ্টৌ নিমিত্ততশ্চাপ্যনিমিত্ততশ্চ ||৬২|| নিমিত্ততস্তত্র শিরোঽভিতাপাজ্জ্ঞেযস্ত্বভিষ্যন্দনিদর্শনঃ সঃ | ( বিদার্যতে সীদতি হীযতে বা নৃণামভিঘাতহৃতা চ দৃষ্টিঃ) | সুরর্ষিগন্ধর্বমহোরগাণাং সন্দর্শনেনাপি চ ভাস্করস্য ||৬৩|| হন্যেত দৃষ্টির্মনুজস্য যস্য স লিঙ্গনাশস্ত্বনিমিত্তসঞ্জ্ঞঃ | তত্রাক্ষি বিস্পৃষ্টমিবাবভাতি বৈদূর্যবর্ণা বিমলা চ দৃষ্টিঃ ||৬৪|| (ইতি দৃষ্টিগতাঃ) | (সু. উ. তং. অ. ৭) |

তদেবং শারীরান্ দ্বাদশ দৃষ্টিগতবিকারানভিধায সনিমিত্তানিমিত্তভেদাদাগন্তুবাহ্যজৌ নযনবিকারৌ (লিঙ্গনাশৌ) দর্শযন্নাহ– বাহ্যৌ পুনর্দ্বাবিহেত্যাদি| সম্প্রদিষ্টৌ কথিতাবৌপদ্রবিকাধ্যাযে “ তথা বাহ্যৌ পুনর্দ্বৌ” (সু. উ. তং. অ. ১) ইত্যাদিনা| বহির্ভবৌ বাহ্যৌ, আগন্তূ ইত্যর্থঃ| তত্র সনিমিত্তং দর্শযন্নাহ– নিমিত্ততস্তত্রেত্যাদি| শিরোঽভিতাপাদিতি শিরো অভি সর্বতস্তপ্যতে যেন বিষকুসুমগন্ধবাহিপবনস্পর্শাদিনা স শিরোঽভিতাপস্তস্মাত্; তেন সমস্তশিরস উপতাপান্নযনগতরুধিরাধিককোপো দৃষ্টেরপি শক্তের্ব্যাঘাতঃ| অভিষ্যন্দনিদর্শন ইতি রক্তাভিষ্যন্দলিঙ্গ ইতি গদাধরঃ; সুশ্রুতে রোগসঙ্গ্রহে সর্বজগণে দ্বযোরপ্যেতযোঃ পাঠাত্ সন্নিপাতজাভিষ্যন্দলক্ষণ ইতি কার্তিকঃ| অনিমিত্তমাহ– সুরর্ষিগন্ধর্বেত্যাদি| অনুপলভ্যমানবিশিষ্টসুরাদিদর্শননিমিত্তমাহুঃ| সন্দর্শনেন সম্যগ্দর্শনেন, হন্যেত হন্তুং সম্ভাব্যেত, ন ত্ববশ্যং হন্যেত ইত্যভিপ্রাযঃ| (দৃষ্টিরিতি দর্শনমুপলব্ধিরিত্যর্থঃ, ন তু দৃষ্টিমণ্ডলম্, অস্যাদৃষ্টিগতবিকারত্বাত্| লিঙ্গনাশপ্রযোগশ্চাত্র রূপগ্রহণাভাবসামান্যান্ন তু রূঢ্যা, তস্য চতুর্থপটলস্থতিমির এব রূঢত্বাত্|) তচ্চেদং দর্শনং কিমভিষ্যন্দবত্ সকলগোলকোপঘাতকং তিমিরত্বাদ্দৃষ্টিমাত্রোপঘাতকং বেতি শঙ্কানিরাসার্থমাহ– তত্রাক্ষীত্যাদি| বিস্পষ্টমিবেতি পূর্বাবস্থাতো বিশেষেণ প্রসন্নমিব গোলকাবচ্ছিন্নং চক্ষুরবভাসতে| দৃষ্টিরপি বৈডূর্যবর্ণা শ্যাবা দৃষ্টিঃ প্রকৃতিবর্ণেত্যর্থঃ| বিমলেতি বিগতকাচাদিমলা| অযং তাত্পর্যার্থঃ– পূর্বাবস্থাতঃ শক্তিমাত্রমুপহন্যতে, যতো দেবাদযো হি অবযবমদূষযন্ত এব শক্তিমাত্রমুপঘ্নন্তি| যদুক্তং চরকে– “দেবাদযোঽষ্টৌ হি মহানুভাবা ন দূষযন্তঃ পুরুষস্য দেহম্| বিশন্ত্যদৃশ্যাস্তরসা যথৈব ছাযাতপৌ দর্পণসূর্যকান্তৌ||” (চ. চি. অ. ৯) ইতি| ( এতৌ চ বাহ্যজৌ দৃষ্ট্যাধাননিরূপণীযতযা দৃষ্টিগতাবেব, অত এব তদধিকারনির্দিষ্টৌ, শারীরাভিপ্রাযেণ দ্বাদশবিধত্বমুক্তং, তেন ন সঙ্খ্যাতিরেকঃ,) দ্বাবপ্যেতাবসাধ্যৌ|| ইতি দৃষ্টিগতাঃ||৬২-৬৪||

Adhikarana prastAryarmalakShaNam (65) · Śloka 65

প্রস্তার্যর্ম তনু স্তীর্ণং শ্যাবং রক্তনিভং সিতে |৬৫|

অথ মণ্ডলগতনিদানাভিধানপারিশেষ্যাদ্ দৃষ্টিগতানন্তরং শুক্লমণ্ডলবর্ত্মপক্ষ্মমণ্ডলগতানাং নিদানাভিধানাবসরপ্রাপ্তৌ বর্ত্মাদিমণ্ডলপ্রতিযোগিতযা শুক্লমণ্ডলস্যান্তর্গতত্বাত্ সৌকুমার্যেণানন্তরং কৃত্বা চ নিদানোদ্দেশারম্ভঃ| তত্র প্রস্তারিশব্দাভিধানস্যার্মণো লক্ষণমাহ– প্রস্তারীত্যাদি| প্রস্তারীতি লক্ষ্যং, শেষং লক্ষণম্| তনু অবহলম্| স্তীর্ণং বিততম্| ( শ্যাবমীষন্নীলম্| রক্তনিভং রক্তবর্ণম্| অত্র শ্যাবরক্তযোর্বিরোধাত্ সমুচ্চযাভাবেন বিকল্পঃ| অত এবাহ নিমিঃ– “সমন্তাদ্বিসৃতঃ শ্যাবো রক্তো বা মাংসসঞ্চযঃ| সন্নিপাতেন দোষাণাং প্রস্তার্যর্ম তদুচ্যতে||” ইতি| গদাধরণ ঈষন্নীললোহিতবর্ণসমুচ্চয এব দর্শিতঃ| সিতে শুক্লভাগে)|৬৫|–

Adhikarana shuklArmalakShaNam (65) · Śloka 65

সশ্বেতং মৃদু শুক্লার্ম শুক্লে তদ্বর্ধতে চিরাত্ ||৬৫||

শুক্লার্মলক্ষণমাহ– সশ্বেতমিত্যাদি| সশ্বেতং কিঞ্চিচ্ছ্বেতম্| মৃদু কোমলম্| পরতো বক্ষ্যমাণং মাংসমিতি পদং সিংহাবলোকনন্যাযেন সম্বন্ধনীযম্| সশব্দস্যাধিকস্যোপাদানং সম্যক্ শ্বেতত্বপ্রতিপাদনার্থমিতি কার্তিকঃ| শুক্লে শুক্লমণ্ডলে| চিরাত্ চিরকালেন তদ্বর্ধতে, কফজত্বাত্||৬৫||

Adhikarana raktArmalakShaNam (66) · Śloka 66

পদ্মাভং মৃদু রক্তার্ম যন্মাংসং চীযতে সিতে |৬৬|

রক্তার্মলক্ষণমাহ– পদ্মাভমিত্যাদি| পদ্মাভমরুণপদ্মপত্রনিভম্| মৃদু কোমলং, সিতে শুক্লমণ্ডলে| চীযতে বৃদ্ধিমুপৈতি| এতদ্রক্তজম্|৬৬|–

Adhikarana adhimAMsArmalakShaNam (66) · Śloka 66

পৃথু মৃদ্বধিমাংসার্ম বহুলং চ যকৃন্নিভম্ |৬৬|

অধিমাংসার্মলক্ষণমাহ– পৃথ্বিত্যাদি| পৃথু বিততং, বিস্তীর্ণমিত্যর্থঃ| বহুলং স্থূলম্| লোহিতত্বেন যকৃন্নিভং, শ্যাববর্ণসম্বন্ধোঽপ্যত্র জ্ঞেযঃ; যথাঽঽহ সুশ্রুতঃ– “বিস্তীর্ণং মৃদু বহলং যকৃত্প্রকাশং শ্যাবং বা তদধিকমাংসজার্ম বিদ্যাত্|” (সু. উ. তং. অ. ৪) ইতি| অত্র শ্যাবং বেতি বাশব্দঃ সমুচ্চযে, তেন শ্যাবং লোহিতং চেত্যর্থঃ| এতচ্চ ত্রিদোষজং, সুশ্রুতে ত্রিদোষজপ্রকরণে পঠিতত্বাত্|৬৬|–

Adhikarana snAyvarmalakShaNam (66) · Śloka 66

স্থিরং প্রস্তারি মাংসাঢ্যং শুক্লং স্নায্বর্ম পঞ্চমম্ ||৬৬||

স্নায্বর্মলক্ষণমাহ– স্থিরমিত্যাদি| স্থিরং কঠিনম্| মাংসাঢ্যং বহুমাংসম্| শুষ্কমবিস্রাবি| ইদং চ প্রস্তার্যর্মোদ্ভবম্| তথা চ নিমিঃ– “প্রস্তারিণোঽর্মণঃ স্রাবং নিরুণদ্ধি যদাঽনিলঃ| বিনা স্রাবং বিশুষ্কং তত্ স্নায্বর্মেতি প্রকীর্তিতম্||” ইতি| ইদং তু সন্নিপাতজমপি সাধ্যম্||৬৬||

Adhikarana shuktikAlakShaNam (67) · Śloka 67

শ্যাবাঃ স্যুঃ পিশিতনিভাশ্চ বিন্দবো যে শুক্ত্যাভাঃ সিতনিযতাঃ স শুক্তিসঞ্জ্ঞঃ |৬৭| (সু. উ. তং. অ. ৭) |

শুক্তিকালক্ষণমাহ– শ্যাবা ইত্যাদি| শ্যাবাঃ পাণ্ডুশ্যামাঃ, পিশিতনিভা ইতি নিযমেন ভণিতাঃ, ( তেন পিশিতস্যেব নিযমেন ভা দীপ্তির্যেষাং তে তথা, সা চ প্রভা শ্যাবা ইতি সমভিব্যাহারেণ শ্যাববর্ণৈব; নত্বত্র মাংসস্যোপমানত্বং পিশিতনিভশব্দোঽভিধত্তে, বক্ষ্যমাণার্জুনে রুধিরোপমশব্দবত্, মাংসাত্মকত্বাদেব শুক্তিকাযাঃ)| সিতনিযতা ইতি সিতে শুক্লমণ্ডলে নিযতাঃ; শুক্ত্যাভা জলশুক্তিনিভাঃ, বর্ণসাম্যাত্; অত এব শুক্তিসঞ্জ্ঞঃ| অযং পিত্তজঃ| অত্র বাগ্ভটঃ “পিত্তং কুর্যাত্ সিতে বিন্দূনসিতশ্যাবপীতকান্| মলাক্তাদর্শতুল্যং বা সর্বং শুক্লং সদাহরুক্|| রোগোঽযং শুক্তিকাসঞ্জ্ঞঃ সশকৃদ্ভেদতৃড্জ্বরঃ||” (বা. উ. তং. অ. ১) ইতি|৬৭|–

Adhikarana arjunalakShaNam (67) · Śloka 67

একো যঃ শশরুধিরোপমশ্চ বিন্দুঃ শুক্লস্থো ভবতি তমর্জুনং বদন্তি ||৬৭|| (সু. উ. তং. অ. ৪) |

অর্জুনলক্ষণমাহ– এক ইত্যাদি| এক এব সন্ যঃ শশরুধিরবল্লোহিতো বিন্দুরূপশ্চ বিকারস্তমর্জুনং বদন্তীত্যর্থঃ| উক্তং চ কল্যাণবিনিশ্চয– “শক্রগোপনিভং শুক্লেঽর্জুনং রক্তপ্রকোপতঃ|” ইতি| এতেন বিন্দুরূপত্বে নিযমো নাস্তীতি জ্ঞেযম্| অত এব রবিগুপ্ত– “কৃষ্ণভাগে সিতং বিন্দুং শুক্লং বিদ্যাত্ কফাত্মকম্| রক্তং চ শুক্লভাগস্থমর্জুনং শোণিতোদ্ভবম্||” ইতি||৬৭||

Adhikarana piShTakalakShaNam (68) · Śloka 68

শ্লেষ্মমারুতকোপেন শুক্লে পিষ্টং সমুন্নতম্ | পিষ্টবত্ পিষ্টকং বিদ্ধি মলাক্তাদর্শসন্নিভম্ ||৬৮||

পিষ্টকলক্ষণমাহ– শ্লেষ্মমারুতকোপেনেত্যাদি| পিষ্টমিতি লক্ষণপদম্| পিষ্টবদিতি আলেপনপিষ্টতুল্যং শ্বেতত্বেন| পুনঃ পিষ্টকমিতি লক্ষ্যপদম্| সমুন্নতমুচ্ছূনম্| মলাক্তাদর্শসন্নিভমিতি ধূল্যাদিম্রক্ষিতদর্পণতুল্যম্| অযং কফবাতজঃ, অতঃ কফেনাচ্ছতযা, বাতেন কিঞ্চিত্ শ্যাবতযা মলাক্তদর্পণনিভত্বমস্যেত্যর্থঃ||৬৮||

Adhikarana sirAjAlalakShaNam (69) · Śloka 69

জালাভঃ কঠিনসিরো মহান্ সরক্তঃ সন্তানঃ স্মৃত ইহ জালসঞ্জ্ঞিতস্তু |৬৯| (সু. উ. তং. অ. ৪) |

সিরাজাললক্ষণমাহ– জালাভ ইত্যাদি| অনুলোমবিলোমসিরানিচযরচিতনিরন্তরবিবরগবাক্ষিভাবাত্ জালস্যেব আভা আকৃতির্যস্য স তথা| কঠিনসির ইত্যনেন সিরাণামেব সন্তানোঽযং বিকার ইতি দর্শযতি| সরক্ত ঈষল্লোহিতঃ| সন্তনোতি আচ্ছাদযতীতি সন্তানঃ, বহুলবচনাত্ কর্তরি ঘঞ্| অত্র বিন্দুশব্দোঽনুবর্তনীযঃ, স সর্বত্র বিশেষ্যঃ| জালসঞ্জ্ঞিত ইত্যত্র ‘ সিরাপূর্ব’ ইতি শেষঃ, তেন সিরাজালসঞ্জ্ঞিত ইত্যর্থঃ| অযং চ রক্তজঃ|৬৯|–

Adhikarana sirAjapiDakAlakShaNam (69) · Śloka 69

শুক্লস্থাঃ সিতপিডকাঃ সিরাবৃতা যাস্তা ব্রূযাদসিতসমীপজাঃ সিরাজাঃ |৬৯| (সু. উ. তং. অ. ৪) |

সিরাজপিডকালক্ষণমাহ– শুক্লস্থা ইত্যাদি| সিতপিডকা ইতি সিতবর্ণাঃ পিডকাঃ| সিরাবৃতাঃ সিরাব্যাপ্তাঃ| অসিতসমীপজা ইতি কৃষ্ণভাগাভ্যর্ণশুক্লজাঃ| সিরাপরিবৃতত্বাত্ সিরাজাঃ, নতু সাক্ষাত্ সিরাজাতা ইতি গদাধরঃ| অযং চ ত্রিদোষজঃ, ত্রিদোষজসাধ্যপ্রকরণে সুশ্রুতেন পঠিতত্বাত্|৬৯|–

Adhikarana balAsagrathitalakShaNam (69) · Śloka 69

কাংস্যাভোঽমৃদুরথ বারিবিন্দুকল্পো বিজ্ঞেযো নযনসিতে বলাসসঞ্জ্ঞঃ ||৬৯|| (ইতি শুক্লজাঃ) | (সু. উ. তং. অ. ৪) |

বলাসগ্রথিতলক্ষণমাহ– কাংস্যাভ ইত্যাদি| কাংস্যস্যেবাভা দীপ্তির্যস্য স তথা সিত ইত্যর্থঃ, বারিবিন্দুরিবোচ্ছূনত্বাত্| অমৃদুঃ কঠিনঃ, কফানিলজত্বাত্| তথা চ বিদেহঃ– “মারুতোত্পীডিতঃ শ্লেষ্মা শুক্লভাগে ব্যবস্থিতঃ| জলবিন্দুরিবোচ্ছূনো হ্যমৃদুঃ কফসম্ভবঃ|| বলাসগ্রথিতং নাম তং শোথং বৃত্তমাদিশেত্|” ইতি| ( ‘কোষাভ’ ইতি কশ্চিত্ পঠতি, কোষো মাংসকুড্মলঃ, তদাভস্তদাকারঃ; এতাবতাঽত্যর্থমুচ্ছূনত্বং প্রতিপাদ্যতে, বারিবিন্দুকল্প ইতি চ ঈষদুচ্ছূনতাঽপি, নযনসিতে শুক্লভাগে ইত্যর্থঃ|) বলাসসঞ্জ্ঞ ইত্যত্র গ্রথিতশব্দলোপঃ, তেন বলাসগ্রথিত ইতি সঞ্জ্ঞা| অত্র সিরোত্পাতসিরাহর্ষৌ বাগ্ভটেন পঠিতৌ| তথা হি– “রক্তরাজীনিভং শুক্লে উষ্যতেঽপি সবেদনম্| অশোথাশ্রূপদেহং চ শিরোত্পাতঃ সশোণিতম্| উপেক্ষিতঃ সিরোত্পাতো রাজীস্তা এব বর্ধযন্| কুর্যাত্ সাস্রং সিরাহর্ষং তেনাক্ষ্যুদ্বীক্ষণাক্ষমম্||” (বা. উ. অ. ১০) ইতি|| ইতি শুক্লজাঃ||৬৯||

Adhikarana pUyAlasalakShaNam (70) · Śloka 70

পক্বঃ শোথঃ সন্ধিজো যঃ সতোদঃ স্রবেত্ পূযং পূতি পূযালসাখ্যঃ |৭০| (সু. উ. তং. অ. ২) |

অথ মণ্ডলগতনিদানাভিধানপারিশেষ্যাদ্বর্ত্মমণ্ডলগতনিদানাভিধানে প্রাপ্তে কনীনিকাসন্ধ্যাদীনাং বর্ত্মমণ্ডলাভিযোগিতযাঽন্তর্গতত্বেনান্তরঙ্গত্বাত্ সন্ধিগতনিদানোদ্দেশারম্ভঃ| তে চ সন্ধযঃ ষট্| যদাহ সুশ্রুতঃ– “পক্ষ্মবর্ত্মগতঃ সন্ধির্বর্ত্মশুক্লগতোঽপরঃ| শুক্লকৃষ্ণগতস্ত্বন্যঃ কৃষ্ণদৃষ্টিগতস্তথা|| কনীনিকাগতো জ্ঞেযঃ ষষ্ঠশ্চাপাঙ্গগঃ স্মৃতঃ|” (সু. উ. তং. অ. ১) ইতি| নাসাসমীপনেত্রান্তঃ কনীনিকা; চক্ষুঃপুচ্ছস্যাধো নেত্রান্তোঽপাঙ্গঃ| তত্র পূযালসলক্ষণমাহ– পক্ব ইত্যাদি| সন্ধিজ ইতি কনীনিকাসন্ধিজঃ| যদাহ বিদেহঃ– “শোথক্লেদসমাবিষ্টং তোদভেদসমাকুলম্| পূযালসং তু তং বিদ্যাত্ সন্ধৌ কানীনিকে নৃণাম্||” ইতি| অযং ত্রিদোষজঃ, সুশ্রুতেন সাধ্যত্রিদোষজপ্রকরণে পঠিতত্বাত্|৭০|–

Adhikarana shleShmopanAhalakShaNam (70) · Śloka 70

গ্রন্থির্নাল্পো দৃষ্টিসন্ধাবপাকী কণ্ডূপ্রাযো নীরুজস্তূপনাহঃ ||৭০|| (সু. উ. তং. অ. ২) |

শ্লেষ্মোপনাহলক্ষণমাহ– গ্রন্থিরিত্যাদি| নাল্প ইতি মহান্| অপাকী ঈষত্পাকঃ; অত এব সুশ্রুতেঽল্পস্রাবঃ পঠিতঃ| দৃষ্টিসন্ধাবিতি কৃষ্ণদৃষ্টিমণ্ডলযোঃ সন্ধাবিত্যর্থঃ| কণ্ডূপ্রাযঃ কফপ্রাবল্যাত্| নীরুজোঽল্পরুজ ইত্যর্থঃ| তথাচ বিদেহঃ– “বাযুঃ শ্লেষ্মাণমাদায দৃষ্টিসন্ধৌ ব্যবস্থিতঃ| অরুণং কঠিনং গ্রন্থিং জনযেদল্পবেদনম্|| শ্লেষ্মোপনাহং তং বিদ্যাত্ স্রাবান্ বক্ষ্যাম্যতঃ পরম্|” ইতি| বাতশ্লেষ্মজন্যত্বেঽপি শ্লেষ্মপ্রাবল্যাত্ শ্লেষ্মোপনাহব্যপদেশঃ| আশ্রযপ্রভাবাদরুণত্বমত্র||৭০||

Adhikarana netrasrAvasamprAptiH (71) · Śloka 71

গত্বা সন্ধীনশ্রুমার্গেণ দোষাঃ কুর্যুঃ স্রাবান্ লক্ষণৈঃ স্বৈরুপেতান্ | তং হি স্রাবং নেত্রনাডীতি চৈকে তস্যা লিঙ্গং কীর্তযিষ্যে চতুর্ধা ||৭১|| (সু. উ. তং. অ. ২) |

চতুর্ণাং স্রাবাণাং সম্প্রাপ্তিমাহ– গত্বা সন্ধীনিত্যাদি| সন্ধীনিতি বহুবচননির্দেশাত্ সর্বনেত্রান্তর্গতাশ্চত্বারঃ সন্ধযো গৃহ্যন্তে| অশ্রুমার্গেণেতি অশ্রুবাহিন্যৌ ধমন্যৌ অশ্রুমার্গঃ, “দ্বে চাশ্রুবাহিন্যৌ” (সু. শা. অ. ৯) ইতি সুশ্রুতঃ; অশ্রুবহধমনীভ্যামিত্যর্থঃ| ননু, যদ্যশ্রুবহধমনীভ্যাং গত্বা দোষাঃ স্রাবানাপাদযন্তি, তত্ কথং “ সিরানুসারিভির্দোষৈঃ” ইত্যাদ্যুক্তা সম্প্রাপ্তির্ন ব্যাহন্যতে, সিরাধমন্যোরন্যত্বাত্| উচ্যতে– সামান্যবিশেষত্বাত্ সম্প্রাপ্ত্যভিধানদ্বযস্য; পূর্বা সম্প্রাপ্তিঃ সামান্যম্, ইতরা চ বিশেষ ইতি ন বিরোধঃ| অথবা “ সিরাধমনীস্রোতসামবিভাগঃ” (সু. শা. অ. ৯) ইতি পরকীযমতেন সিরাধমন্যোরৈক্যাদবিরোধঃ| অস্মিন্নর্থে সম্প্রাপ্ত্যুক্ত এবার্থো নিষ্পন্নীক্রিযতে| নেত্রনাডীতি চৈক ইতি ‘বদন্তি’ ইতি শেষঃ, অনিষেধাদনুমতমিদম্| ( দোষাঃ সন্নিপাতশ্লেষ্মরক্তপিত্তাত্মকাঃ| লক্ষণৈর্দোষলক্ষণৈঃ| উপেতান্ পরীতানিতি| গদাধরণ ‘লক্ষণৈঃ’ ইত্যস্য স্থানে ‘সর্বতঃ’ ইতি পঠিতং; দোষাঃ পরীতান্ স্বলক্ষণৈরিত্যর্থবিশেষাদধিগন্তব্যম্| চতুর্ধেতি সান্নিপাতিককফজরক্তজপিত্তজত্বভেদাত্| বাতজস্তু স্রাবো নাস্ত্যেব, ব্যাধিস্বভাবাত্; পিত্তজগলগণ্ডবত্)||৭১||

Adhikarana pUyasrAvalakShaNam (72) · Śloka 72

পাকাত্ সন্ধৌ সংস্রবেদ্যস্তু পূযং পূযাস্রাবোঽসৌ গদঃ সর্বজস্তু |৭২| (সু. উ. তং. অ. ২) |

চতুর্বিধস্রাবমধ্যে পূযাস্রাবলক্ষণমাহ– পাকাদিত্যাদি| সর্বজস্ত্রিদোষজ ইত্যর্থঃ| অস্য প্রত্যাখ্যেযত্বাদগ্রেঽভিধানং, যদ্যপ্যন্যেঽপি স্রাবা অসাধ্যত্বেনোক্তাস্তথাঽপি যাপ্যা বোদ্ধব্যাঃ| ‘পাকঃ’ ইতি পাঠে পাকঃ সংস্রবেত্ পাকবান্ শোথঃ স্রবেদিত্যর্থঃ, উপচারাত্; পাকস্য ক্রিযামাত্রত্বাত্|৭২|–

Adhikarana shleShmasrAvalakShaNam (72) · Śloka 72

শ্বেতং সান্দ্রং পিচ্ছিলং যঃ স্রবেত্তু শ্লেষ্মাস্রাবোঽসৌ বিকারো মতস্তু ||৭২|| (সু. উ. তং. অ. ২) |

শ্লেষ্মস্রাবলক্ষণমাহ– শ্বেতমিত্যাদি| সান্দ্রং ঘনম্||৭২||

Adhikarana raktasrAvalakShaNam (73) · Śloka 73

রক্তস্রাবঃ শোণিতোত্থো বিকারঃ স্রবেদ্দুষ্টং তত্র রক্তং প্রভূতম্ |৭৩| (সু. উ. তং. অ. ২) |

রক্তস্রাবলক্ষণমাহ– রক্তস্রাব ইত্যাদি| রক্তকৃতস্রাবো রক্তস্রাবঃ ( রক্তস্রাব ইত্যনেনৈব স্রবেদিত্যস্য লব্ধত্বাত্তদুক্তির্নিরন্তরস্রাবপ্রতিপাদনার্থমিতি কার্তিকঃ; ন চৈতত্ প্রভূতমিত্যনেন গতার্থম্, অনিরন্তরতযাঽপি প্রভূতস্রাবসম্ভবাত্)| রক্তস্রাব ইত্যনেনৈব রক্তজত্বে সিদ্ধে শোণিতজো বিকার ইতি যদুচ্যতে তদত্যন্তকুপিতরক্তজত্বপ্রতিপাদনার্থম্| কার্তিকস্ত্বাহ– পিত্তলিঙ্গপরিগ্রহার্থং, পিত্তেন সহ তুল্যত্বাত্ রক্তস্য| তথাচ ক্বচিত্ পাঠঃ “রক্তস্রাবঃ পিত্তলিঙ্গৈরুপেতঃ” ইতি|৭৩|–

Adhikarana pittasrAvalakShaNam (73) · Śloka 73

হরিদ্রাভং পীতমুষ্ণং জলাভং পিত্তাত্ স্রাবঃ সংস্রবেত্ সন্ধিমধ্যাত্ ||৭৩|| (সু. উ. তং. অ. ২) |

জলস্রাবপর্যাযস্য পিত্তস্রাবস্য লক্ষণমাহ– হরিদ্রাভমিত্যাদি| হরিদ্রাভং পীতলোহিতং বোদ্ধব্যং, পরতঃ পীতমিত্যস্যোক্তেঃ ( জলাভমিতি জলবত্ স্বচ্ছম্| উষ্ণমিতি সর্বত্রৈব সম্বধ্যতে| কেচিত্ ‘পীতম্’ ইত্যস্য স্থানে ‘নীলম্’ ইতি পঠন্তি| যত্তু ‘জলাভম্’ ইত্যস্য স্থানে ‘জলং বা’ ইতি, তদসঙ্গতং, সুশ্রুতেনোদ্দেশাবসরে জলস্রাবনামতযাঽস্যোদ্দেশাত্; তদ্ধি নাম জলবদাস্রাবোঽস্যেতি যোগতঃ সমাবেশিতম্| যদা তু ‘জলং বা’ ইতি পাঠঃ স্যাত্তদা কদাচিজ্জলাভতা স্যাদিতি ন সর্বত্র যোগব্যাপ্তিরিতি)| সন্ধিমধ্যাদিতি অবিশেষোক্তেঃ সর্বসন্ধিমধ্যাদিতি বোদ্ধব্যম্| ননু, বাতজস্রাবঃ কুতো নোক্তঃ, বাতেন স্রাবাভাবাদিতি চেত্; নৈবং, বাতাভিষ্যন্দে ‘শিশিরাশ্রুতা’ ইত্যুক্তের্বাতজোঽপি স্রাবো দর্শিতঃ| উচ্যতে– বিশিষ্টে অক্ষিপ্রদেশে কেবলবাযোঃ স্রাবজনকত্বং সম্বন্ধিতব্যমভিধানাত্| বিদেহেঽপি চত্বার এবোক্তাঃ– “সন্নিপাতাত্ কফাদ্রক্তাত্ পিত্তাত্ স্রাবোঽক্ষিসন্ধিষু|” ইতি||৭৩||

Adhikarana parvaNIlakShaNam (74) · Śloka 74

তাম্রা তন্বী দাহশূলোপপন্না রক্তাজ্জ্ঞেযা পর্বণী বৃত্তশোথা | জাতা সন্ধৌ কৃষ্ণশুক্লে... |৭৪| (সু. উ. তং. অ. ২) |

তদেবমসাধ্যানাং চতুর্ণাং স্রাবাণাং লক্ষণমভিধায পর্বণীলক্ষণমাহ– তাম্রেত্যারভ্য কৃষ্ণশুক্ল ইত্যন্তেন| ইযং রক্তজা কফানিলজা চ, রক্তজত্বমত্র সুশ্রুতে দর্শিতমাধিক্যেন|৭৪|–

Adhikarana alajIlakShaNam (74) · Śloka 74

...ঽলজী স্যাত্ তস্মিন্নেব খ্যাপিতা পূর্বলিঙ্গৈ ||৭৪|| (সু. উ. তং. অ. ২) |

অলজীলক্ষণমাহ– অলজী স্যাদিত্যাদি| তস্মিন্নেবেতি শুক্লকৃষ্ণসন্ধৌ, পূর্বলিঙ্গৈঃ পর্বণীলক্ষণৈরুপেতেত্যর্থঃ| ননু, এবং সতি স্থানলক্ষণযোরভেদেনানযোরভেদঃ স্যাদিতি চেত্; নৈবং, তনুত্বস্থূলত্বাভ্যাং পর্বণিকালজ্যোর্ভেদাত্| তথাচ বিদেহঃ– “শুক্লকৃষ্ণান্তঃসন্ধৌ তু চীযন্তেঽসৃক্কফানিলাঃ| পর্বণীপিডকা তৈস্তু জাযতে ত্বঙ্কুরোপমা|| তাম্রা সদাহচোষোষ্ণপীতকাশ্রুসমাকুলা| কফপিত্তে তু সম্মূর্ছ্য সহ রক্তেন মারুতঃ|| শুক্লকৃষ্ণান্তঃসন্ধৌ তু জনযেদ্গোস্তনাকৃতিম্| পিডকামলজীং তাং তু বিদ্ধি তোদাশ্রুসঙ্কুলাম্||” ইতি| কার্তিকস্ত্বভেদানুপপত্তিং শঙ্কমানঃ পূর্বলিঙ্গৈরিত্যন্যথা ব্যাচষ্টে– পূর্বোক্তাযাঃ প্রমেহপিডকাযা অলজ্যা লিঙ্গৈরিত্যর্থঃ| ইযং ত্রিদোষজা, অসাধ্যা চ||৭৪||

Adhikarana krimigranthilakShaNam (75) · Śloka 75

ক্রিমিগ্রন্থির্বর্ত্মনঃ পক্ষ্মণশ্চ কণ্ডূং কুর্যুঃ ক্রিমযঃ সন্ধিজাতাঃ | নানারূপা বর্ত্মশুক্লান্তসন্ধৌ চরন্ত্যন্তর্লোচনং দূষযন্তঃ ||৭৫|| (ইতি সন্ধিগতাঃ) | (সু. উ. তং. অ. ২) |

ক্রিমিগ্রন্থিলক্ষণমাহ– ক্রিমিগ্রন্থিরিত্যাদি| ( প্রথমং বর্ত্মশুক্লযোঃ সন্ধৌ ভূত্বা ক্রমেণ বর্ত্মনঃ পক্ষ্মণশ্চ সন্ধিজাতাঃ সম্ভাবিতং প্রাপ্তাঃ ক্রিমযো যত্র কণ্ডূং কুর্যুঃ স ক্রিমিগ্রন্থিঃ| স চাযং ক্রিমিগ্রন্থির্বর্ত্মশুক্লযোঃ সন্ধৌ ভবতি, তথৈব স্থিত্বা অন্তর্লোচনং নযনস্যাভ্যন্তরং চরন্তি ভক্ষযন্তি, দূষযন্তঃ সন্ত ইত্যর্থঃ| অত্রৈব বিদেহঃ– “বর্ত্মশুক্লস্য সন্ধৌ তু গ্রন্থিঃ পিত্তকফাত্মকঃ| ঊষ্মণা পচ্যতে গাঢং তত্র মূর্ছন্তি জন্তবঃ|| সুসূক্ষ্মজাতচরণা বর্ত্মপক্ষ্মসমাশ্রযাঃ| ততস্তে পূযসংসৃষ্টাঃ পতন্তি ক্রিমযস্তথা|| লক্ষণৈর্বিবিধৈর্যুক্তাঃ সন্নিপাতসমুত্থিতাঃ| ক্রিমিগ্রন্থিং তু তং বিদ্যাদ্দেহিনাং নেত্রদূষণম্||” ইতি| কার্তিকস্ত্বন্যথা পঠিত্বা ব্যাচষ্টে– ) “বর্ত্মনঃ পক্ষ্মণশ্চাপি কণ্ডূং কুর্যুঃ” ইত্যভিধানাত্ ক্রিমিগ্রন্থিঃ পক্ষ্মবর্ত্মসন্ধৌ ভবতীতি গম্যতে, কথমন্যথাঽন্যত্রাবস্থিতৈঃ ক্রিমিভিরন্যত্র কণ্ডূর্জন্যতে ইতি| এতচ্চ ন সম্যক্, বর্ত্মশুক্লান্তঃসন্ধাবিতি বিরোধপ্রসঙ্গাত্|| ইতি সন্ধিগতাঃ||৭৫||

Adhikarana utsa~ggapiDakAlakShaNam (76) · Śloka 76

অভ্যন্তরমুখী তাম্রা বাহ্যতো বর্ত্মনশ্চ যা | সোত্সঙ্গোত্সঙ্গপিডকা সর্বজা স্থূলকণ্ডুরা ||৭৬|| (সু. উ. তং. অ. ২) |

অথ সন্ধিগতরোগাভিধানানন্তরং পারিশেষ্যাত্ বর্ত্মশুক্লান্তঃসন্ধাবিত্যত্র বর্ত্মনির্দেশেন তদ্গতরোগনিদানারম্ভঃ| নযনগোলকাবরকং নিমেষোন্মেষাশ্রযং পটলদ্বযং বর্ত্ম উচ্যতে| সুশ্রুতে প্রথমোদ্দিষ্টত্বেন উত্সঙ্গপিডকালক্ষণমাহ– অভ্যন্তরমুখীত্যাদি| বর্ত্মন এবাভ্যন্তরে মুখং যস্যাঃ সা তথা| (ননু, কথং বাহ্যত ইতি? উচ্যতে– বাস্তূত্সেধেন বহিরপ্যুন্নততযা দর্শনাদ্বাহ্যত্বং, ন তু বাহ্যমুখত্বেন)| বাহ্যত ইতি সপ্তম্যর্থে তসিল্, এবং বর্ত্মন ইত্যত্রাপি| ইযং বিদেহসংবাদাদধরবর্ত্মান্তর্জাতা বোধ্যা| তাম্রা তাম্রবর্ণা| সোত্সঙ্গা সা উত্সঙ্গা উত্সঙ্গিনী, অর্শআদিত্বাদচ্| উত্সঙ্গপিডকেতি উত্সঙ্গে ক্রোডে বহ্ব্যঃ পিডকা যস্যাঃ সা| ( অন্যে তু সোত্সঙ্গা ক্রোডীকৃতপূযা| ‘উত্সঙ্গপিডকা’ ইতি নামেযম্| তত্রাপি কুক্কুটাণ্ডরসপূযতা চকারাদ্বোদ্ধব্যা) স্থূলকণ্ডুরেতি স্থূলা চাসৌ কণ্ডুরা চেতি কর্মধারযঃ, কণ্ডুরা কণ্ডুমতী, দোষাণাং কফপ্রাবল্যাত্| চকারেণাত্র বিদেহক্তকাঠিন্যাদি সঙ্গৃহীতম্| তথাচ বিদেহঃ– “বর্ত্মোত্সঙ্গেঽধরে জন্তোঃ সন্নিপাতাত্ প্রজাযতে| অভ্যন্তরমুখী স্থূলা বাহ্যতশ্চাপি দৃশ্যতে|| পিডকা পিডকাভিশ্চ চিতাঽন্যাভিঃ সমন্ততঃ| উত্সঙ্গপিডকা নাম কঠিনা মন্দবেদনা|| সা প্রভিন্না স্রবেত্ স্রাবং কুক্কুটাণ্ডরসোপমম্|” ইতি| সর্বজেতি সন্নিপাতভবা||৭৬||

Adhikarana kumbhIkAlakShaNam (77) · Śloka 77

বর্ত্মান্তে পিডকা ধ্মাতা ভিদ্যন্তে চ স্রবন্তি চ | কুম্ভীকাবীজপ্রতিমাঃ কুম্ভীকাঃ সন্নিপাতজাঃ ||৭৭|| (সু. উ. তং. অ. ৩) |

কুম্ভীকালক্ষণমাহ– বর্ত্মান্ত ইত্যাদি| পিডকা ইতি বহুবচননির্দেশাদ্বহ্ব্যঃ| ভিদ্যন্তে বিদীর্যন্তে তথা স্রবন্তি চ| ধ্মাতা ইতি ভিদ্যমানাঃ স্বযমেব পূর্ণোদরা ভবন্তীতি ধ্মাতাঃ| কুম্ভীকাবীজপ্রতিমা ইতি কুম্ভীকা কচ্ছদেশোদ্ভবা দাডিমফলাকারফলা লতা, তদ্বীজেন প্রতিমা যাসাং তা ইত্যর্থঃ; অন্যে ‘কুম্ভীকবীজসদৃশা’ ইতি পঠন্তি, তত্র কুম্ভীকঃ কুম্ভাডুলতা, তদ্বীজমপি দাডিমফলবীজাকারং; তত্সদৃশাঃ পিডকা উচ্যন্তে| কুম্ভীশব্দাত্ ‘ইবে প্রতিকৃতৌ’ ইতি কন্| এষা ত্রিদোষজা অসাধ্যা চ||৭৭||

Adhikarana pothakIlakShaNam (78) · Śloka 78

স্রাবিণ্যঃ কণ্ডুরা গুর্ব্যো রক্তসর্ষপসন্নিভাঃ | রুজাবত্যশ্চ পিডকাঃ পোথক্য ইতি কীর্তিতাঃ ||৭৮|| (সু. উ. তং. অ. ৩) |

পোথকীনাং লক্ষণমাহ– স্রাবিণ্য ইত্যাদি| স্রাবিণ্যো বহুস্রাবাঃ| গুর্ব্য ইতি গৌরবযুতাঃ| রুজাবত্য ইতি রক্তসম্বন্ধাত্, কফজা অপি বেদনান্বিতাঃ||৭৮||

Adhikarana vartmasharkarAlakShaNam (79) · Śloka 79

পিডকা যা খরা স্থূলা সূক্ষ্মাভিরভিসংবৃতা | বর্ত্মস্থা শর্করা নাম স রোগো বর্ত্মদূষকঃ ||৭৯|| (সু. উ. তং. অ. ৩) |

বর্ত্মশর্করালক্ষণমাহ– পিডকা যেত্যাদি| খরা খরস্পর্শা| সূক্ষ্মাভিরভিসংবৃতেতি সূক্ষ্মাভিঃ প্রকরণাত্ পিডকাভির্বেষ্টিতা| অত্রৈব বিদেহঃ– “সুসূক্ষ্মপিডকাকীর্ণা যা স্থূলা পিডকা খরা| জাযতে সন্নিপাতাত্তু বর্ত্মশর্করিকেতি সা||” ইতি||৭৯||

Adhikarana arshovartmalakShaNam (80) · Śloka 80

এর্বারুবীজপ্রতিমাঃ পিডকা মন্দবেদনাঃ | শ্লক্ষ্ণাঃ খরাশ্চ বর্ত্মস্থাস্তদর্শোবর্ত্ম কীর্ত্যতে ||৮০|| (সু. উ. তং. অ. ৩) |

অর্শোবর্ত্মলক্ষণমাহ– এর্বারুবীজেত্যাদি| এর্বারুঃ গ্রীষ্মকর্কটী| শ্লক্ষ্ণা অকর্কশা| বর্ত্মস্থা ইত্যবিশেষিতাভিধানাদন্তর্বহিশ্চ বর্ত্মনো ভবতীতি গম্যতে| ইযং সন্নিপাতজা| তথাচ নিমিঃ– “নীরুজা কঠিনা বর্ত্মপক্ষ্মান্তর্বাহ্যতোঽপি বা| পিডকা সন্নিপাতেন তদর্শোবর্ত্ম নির্দিশেত্||” ইতি||৮০||

Adhikarana shuShkArsholakShaNam (81) · Śloka 81

দীর্ঘাঙ্কুরঃ খরঃ স্তব্ধো দারুণোঽভ্যন্তরোদ্ভবঃ | ব্যাধিরেষোঽভিবিখ্যাতঃ শুষ্কার্শো নাম নামতঃ ||৮১|| (সু. উ. তং. অ. ৩) |

শুষ্কার্শোলক্ষণমাহ– দীর্ঘাঙ্কুর ইত্যাদি| খরঃ কর্কশঃ| স্তব্ধঃ কঠিনঃ, শুষ্কত্বাত্| দারুণঃ বহুদুঃখদত্বাত্| অভ্যন্তরোদ্ভব ইতি বর্ত্মাভ্যন্তরস্থিতঃ| অভিবিখ্যাতঃ কথিতঃ| নামতঃ প্রসিদ্ধিতঃ| সন্নিপাতজমিদম্| অত্র বিদেহঃ– “বর্ত্মাভ্যন্তর্গতং ত্বর্শঃ শুষ্কং স্থূলং চ দারুণম্| জাযতে সন্নিপাতেন তচ্ছুষ্কার্শঃ প্রকীর্তিতম্||” ইতি||৮১||

Adhikarana a~jjananAmikAlakShaNam (82) · Śloka 82

দাহতোদবতী তাম্রা পিডকা বর্ত্মসম্ভবা | মৃদ্বী মন্দরুজা সূক্ষ্মা জ্ঞেযা সাঽঞ্জননামিকা ||৮২|| (সু. উ. তং. অ. ৩) |

অঞ্জননামিকালক্ষণমাহ– দাহতোদবতীত্যাদি| ইযং রক্তজা||৮২||

Adhikarana bahulavartmalakShaNam (83) · Śloka 83

বর্ত্মোপচীযতে যস্য পিডকাভিঃ সমন্ততঃ | সবর্ণাভিঃ স্থিরাভিশ্চ বিদ্যাদ্বহুলবর্ত্ম তত্ ||৮৩|| (সু. উ. তং. অ. ৩) |

বহুলবর্ত্মলক্ষণমাহ– বর্ত্মোপচীযত ইত্যাদি| সবর্ণাভিস্ত্বক্সমানবর্ণাভিঃ| এতত্ সন্নিপাতাদেব||৮৩||

Adhikarana vartmabandhakalakShaNam (84) · Śloka 84

কণ্ডূমতাঽল্পতোদেন বর্ত্মশোথেন যো নরঃ | ন স সঞ্চ্ছাদযেদক্ষি যত্রাসৌ বর্ত্মবন্ধকঃ ||৮৪|| (সু. উ. তং. অ. ৩) |

বর্ত্মবন্ধকলক্ষণমাহ– কণ্ডূমতেত্যাদি| বর্ত্মশোথেনোপলক্ষিতো নরঃ স চক্ষুর্ন সঞ্চ্ছাদযেত্ সম্যক্ ছাদযিতুং ন শক্নুযাদিত্যর্থঃ| এষ সন্নিপাতজঃ||৮৪||

Adhikarana kliShTavartmalakShaNam (85) · Śloka 85

মৃদ্বল্পবেদনং তাম্রং যদ্বর্ত্ম সমমেব চ | অকস্মাচ্চ ভবেদ্রক্তং ক্লিষ্টবর্ত্মেতি তদ্বিদুঃ ||৮৫|| (সু. উ. তং. অ. ৩) |

ক্লিষ্টবর্ত্মলক্ষণমাহ– মৃদ্বল্পবেদনমিত্যাদি| রক্তজত্বেঽপ্যস্যাল্পবেদনত্বমধিককফদূষিতত্বাদ্রক্তস্য| বর্ত্মেতি বিদেহদর্শনাদ্বর্ত্মদ্বযং গ্রাহ্যম্, অত এব সমং যুগপদেবেত্যর্থঃ| অকস্মাদিত্যহেতোরনিযমেনৈবেত্যর্থঃ| তাম্রমিত্যনেনোপাত্তেঽপি লৌহিত্যে রক্তমিত্যুপাদানং হেত্বনিযমপ্রযুক্তং কাদাচিত্কং লৌহিত্যমিতি দ্যোতযতি| অত্রৈব বিদেহঃ– “ শ্লেষ্মরক্তেন দুষ্টেন ক্লিষ্টং মাংসমিবোভযম্| বন্ধুজীবনিভং বর্ত্ম ক্লিষ্টবর্ত্ম তদুচ্যতে||” ইতি| অন্যে সমমনুচ্ছূনং যাবদিত্যাচক্ষতে| অত্র পক্ষে ক্লিষ্টত্বং বেদনাতিযোগাদবগন্তব্যম্||৮৫||

Adhikarana vartmakardamalakShaNam (86) · Śloka 86

ক্লিষ্টং পুনঃ পিত্তযুতং শোণিতং বিদহেদ্যদা | ততঃ ক্লিন্নত্বমাপন্নমুচ্যতে বর্ত্মকর্দমঃ ||৮৬|| (সু. উ. তং. অ. ৩) |

বর্ত্মকর্দমলক্ষণমাহ– ক্লিষ্টং পুনরিত্যাদি| ( ক্লিষ্টমিতি প্রাগুক্তস্য কর্তৃত্বেনাযমর্থঃ– ক্লিষ্টং ক্লিষ্টবর্ত্মৈব যদা পিত্তলাভ্যাসাদধিকপিত্তং সচ্ছোণিতং বিদহেদ্বিরুদ্ধদাহেন সংযোজযেত্তদা ক্লিষ্টত্বমাপাদযতি, সঙ্ক্লেদত্বমাপন্নং বর্ত্ম বর্ত্মকর্দম উচ্যত ইতি যোজ্যম্|) “ততঃ কৃষ্ণত্বমাপন্নম্” ইত্যন্যে পঠন্তি| তত্র কৃষ্ণত্বং শোণিতবিদাহেনৈব| এবং চ সতি কৃষ্ণত্বেন কর্দমসঞ্জ্ঞাসমাবেশোঽপি ঘটত ইতি| কার্তিকস্ত্বন্যথা ব্যাচষ্টে– শোণিতমিতি কর্তৃপদং, তেন শোণিতং পিত্তযুক্তং কর্তৃভূতং, যদা পূর্বোক্তং ক্লিষ্টমেব বিদহেদিত্যাদি সর্বমপরং সমানং পূর্বেণ| অস্য তু সুশ্রুতে যত্ সান্নিপাতিকত্বমুক্তং তত্ কফপিত্তরক্তারব্ধত্বাত্; বাতকরণত্বস্যাশ্রুতেঃ||৮৬||

Adhikarana shyAvavartmalakShaNam (87) · Śloka 87

যদ্বর্ত্ম বাহ্যতোঽন্তশ্চ শ্যাবং শূলং সবেদনম্ | তদাহুঃ শ্যাববর্ত্মেতি বর্ত্মরোগবিশারদাঃ ||৮৭|| (সু. উ. তং. অ. ৩) |

শ্যাববর্ত্মলক্ষণমাহ– যদ্বর্ত্ম বাহ্যত ইত্যাদি| বহিরন্তশ্চ শ্যাবত্বং বাতকৃতম্| অত্রৈব শূলং চ জাযত ইত্যস্যান্তে “সবেদনং সকণ্ডু চ হ্যল্পক্লেদি ত্রিদোষজম্|” ইত্যপি কেচিত্ পঠন্তি, তদপ্যুপপন্নং; কফাত্ কণ্ডূঃ, অল্পক্লেদি পিত্তাত্, সবেদনং বাতাত্| অত্রৈব বিদেহঃ– “দুষ্টং শ্লেষ্মা মরুত্ পিত্তং বর্ত্মনোশ্চীযতে যদা| অগ্নিদগ্ধনিভং শ্যাবং শ্যাববর্ত্মেতি তদ্বিদুঃ||” ইতি| অত্র বাতাধিকত্বং বোদ্ধব্যম্||৮৭||

Adhikarana praklinnavartmalakShaNam (88) · Śloka 88

অরুজং বাহ্যতঃ শূনং বর্ত্ম যস্য নরস্য হি | প্রক্লিন্নবর্ত্ম তদ্বিদ্যাত্ ক্লিন্নমত্যর্থমন্ততঃ ||৮৮|| (সু. উ. তং. অ. ৩) |

প্রক্লিন্নবর্ত্মলক্ষণমাহ– অরুজমিত্যাদি| অরুজমল্পরুজম্| বাহ্যতঃ শূনমিতি বহিঃ শোথযুক্তম্| ক্লিন্নমত্যর্থমন্তত ইতি অন্তত উপান্তে ক্লেদবত্| গদাধরস্তু ক্লিন্নমন্তরিতি বিবৃণোতি| এতচ্চ চক্ষুষ্যণ পিল্লাখ্যযা পঠিতম্| তথা হি– “ভৃশং প্রক্লিদ্যতে বর্ত্ম কণ্ডূমন্মন্দবেদনম্| বিদ্যাত্ প্রক্লিন্নবর্ত্মেতি তত্ পিল্লং সন্নিপাতজম্||” ইতি| যদ্যেবং কথং বিদেহেঽক্লিন্নবর্ত্ম পিল্লাখ্যযা নির্দিশ্যতে?; যথা– “প্রক্ষালিতেঽথবা মৃষ্টে আনহ্যেত পুনঃ পুনঃ| অপরিক্লিন্নবর্ত্মেতি তত্ পিল্লমিতি নির্দিশেত্|” ইতি| তদেবং চক্ষুষ্যেণাভিধানং বিরুধ্যতে| কিঞ্চ সুশ্রুতে প্রক্লিন্নবর্ত্ম শ্লেষ্মসঙ্গ্রহে পঠিতং, পিল্লং চ সন্নিপাতজগণে; তত্ কথং প্রক্লিন্নবর্ত্ম পিল্লমিতি সঙ্গতম্? উচ্যতে– অক্লিন্নবর্ত্মেব পিল্লং, তস্য সন্নিপাতজত্বাত্; ন তু প্রক্লিন্নবর্ত্ম, তস্য কফাত্মকত্বাত্; যদি তু প্রক্লিন্নবর্ত্মৈব কফোল্বণসন্নিপাতজং পিল্লত্বেনাভ্যুপগম্যতে, এতত্ খ্যাপনায চ তস্য কফজসর্বগণযোর্নিবেশঃ কৃত ইতি স্বীক্রিযতে, তদা সন্নিপাতজগণে পিত্তেনাক্লিন্নবর্ত্ম ন পরিগৃহীতং স্যাত্; ততস্তদপরিগ্রহে ষট্সপ্ততিত্বোপসংহারো নেত্ররোগাণাং ন ঘটতে, পঞ্চসপ্ততেরভিধানাত্, পিল্লস্য প্রক্লিন্নবর্ত্মস্বরূপত্বেনাপৃথক্ত্বাত্| ননু, এবং তর্হি কথং “বিদ্যাত্ প্রক্লিন্নবর্ত্মেতি তত্ পিল্লং সন্নিপাতজম্|” ইতি সমর্থযিতব্যম্? উচ্যতে– ( অস্যাযমর্থঃ প্রত্যেতব্যঃ– যদা তদেব প্রক্লিন্নবর্ত্ম শ্লেষ্মাত্মকমেব সত্ বাতপিত্তাভ্যাং বিশেষকাভ্যামুপনিরুধ্যতে তদা সন্নিপাতজং সত্ অপরিক্লিন্নবর্ত্মার্থান্তরমাসাদযত্ পিল্লমিত্যভিধীযতে, তথা চোভযোরপ্যবিরোধঃ, উভাভ্যামেবাপরিক্লিন্নবর্ত্মন এব পিল্লাখ্যত্ববর্ণনাদিতি| অযং চ বাগ্ভটে কফোত্ক্লিন্নাখ্যতযা নিরুদ্ধঃ) কিঞ্চ যদি প্রক্লিন্নবর্ত্ম পিল্লং তত্ পৃথক্ত্বেন চাক্লিন্নবর্ত্ম অভবিষ্যত্, তদাস্যৌপদ্রবিকে সুশ্রুত দোষাত্মকত্বেন সাধ্যাদিভেদেন চাভিধানমকরিষ্যত্, ন চ কৃতং, তস্মাদক্লিন্নবর্ত্মনোঽবস্থান্তরমিতি||৮৮||

Adhikarana aklinnavartmalakShaNam (89) · Śloka 89

যস্য ধৌতান্যধৌতানি সম্বধ্যন্তে পুনঃ পুনঃ | বর্ত্মান্যপরিপক্বানি বিদ্যাদক্লিন্নবর্ত্ম তত্ ||৮৯|| (সু. উ. তং. অ. ৩) |

অপরিক্লিন্নবর্ত্মনো লক্ষণমাহ– যস্য ধৌতানীত্যাদি| এতদ্বাগ্ভটে পিল্লাখ্যম্| সম্বধ্যন্তে অন্যোন্যং লগ্নানি ভবন্তীত্যর্থঃ| তদিদং সম্বদ্ধত্বং কিং পূযসম্পর্কাদেব, তথা চ প্রক্লিন্নত্বমেব স্যাত্তদর্থমাহ– অপরিপক্বানীতি| এতদেব পিল্লাখ্যম্| অন্যত্র ক্বচিচ্চ পিল্লাখ্যমন্যথা পঠিতম্– “পিত্তশ্লেষ্মপ্রকোপেণ বর্ত্মান্তঃ পরিপাট্যতে| তাম্রং নির্লোম তচ্চাপি বিশিষ্টং পিল্ললক্ষণম্||” ইতি| এতদনাদৃতং, টীকাকৃদ্ভিরব্যাখ্যাতত্বাত্| বাগ্ভটেন কুকূণকাদীনামষ্টাদশানাং পিল্লাখ্যা কৃতা| বর্ত্মানীতি বহুবচনং নেত্রদ্বযে বর্ত্মচতুষ্টযত্বেন সঙ্গচ্ছতে, তেন নেত্রদ্বযগত এবাযং ব্যাধিরিতি কার্তিকঃ||৮৯||

Adhikarana vAtahatavartmalakShaNam (90) · Śloka 90

বিমুক্তসন্ধি নিশ্চেষ্টং বর্ত্ম যস্য ন মীল্যতে | এতদ্বাতহতং বর্ত্ম জানীযাদক্ষিচিন্তকঃ ||৯০|| (সু. উ. তং. অ. ৩) |

বাতহতবর্ত্মলক্ষণমাহ– বিমুক্তসন্ধীত্যাদি| বিমুক্তো বিশ্লিষ্টো বর্ত্মশুক্লগতঃ সন্ধির্যস্মাত্ তত্তথা, স্থানচ্যুতসন্ধি| নিশ্চেষ্টং নিমেষোন্মেষরহিতম্| সন্ধিবিশ্লেষাদেব তদাশ্রযাণাং নিমেষোন্মেষকারিণাং সিরাণামপি বিশ্লেষেণ নিমেষোন্মেষরহিতত্বমিত্যভিপ্রাযঃ| অত এবোক্তম্– ন মীল্যতে ন সঙ্কুচতীত্যর্থঃ| ‘নিমীল্যত’ ইতি পাঠান্তরং, তত্র নিমীলিতমেব তিষ্ঠতীত্যর্থঃ| ইদং যুক্তং, দৃষ্টত্বাত্| এতন্ন সাধ্যং, সুশ্রুতে অসাধ্যপ্রকরণে পঠিতত্বাদিতি||৯০||

Adhikarana vartmArbudalakShaNam (91) · Śloka 91

বর্ত্মান্তরস্থং বিষমং গ্রন্থিভূতমবেদনম্ | আচক্ষীতার্বুদমিতি সরক্তমবিলম্বিতম্ ||৯১|| (সু. উ. তং. অ. ৩) |

অর্বুদলক্ষণমাহ– বর্ত্মান্তরস্থমিত্যাদি| বর্ত্মনোঽভ্যন্তরস্থং, বাহ্যেঽপ্যুন্নতত্বদর্শনাদ্ বিষমম্| গ্রন্থিভূতং গ্রন্থিরূপেণ স্থিতম্| অবেদনমিতি ঈষদর্থে নঞ্, তেন গ্রন্থিরিবাল্পবেদনমিত্যর্থঃ; বেদনা চ বাতানুবন্ধেনৈব| সরক্তমিতি কিঞ্চিদ্রক্তং, পিত্তানুবন্ধাত্| অবিলম্বিতং শীঘ্রজন্মেত্যর্থঃ| কেচিদত্র ক্রিযাবিশেষণং ব্রুবতে, তেনাযমর্থঃ– অবিলম্বিতং শীঘ্রমাচক্ষীতার্বুদমিতি; কিন্ত্বেতন্ন সঙ্গতম্, অস্য ব্যাখ্যানস্য নিষ্প্রযোজনত্বাত্| অন্যে তু ‘ অবলম্বিতম্’ ইতি পঠন্তি| এতত্ সন্নিপাতজম্ ( অপাকি চ, তচ্চ কফেন)||৯১||

Adhikarana nimeShalakShaNam (92) · Śloka 92

নিমেষিণীঃ সিরা বাযুঃ প্রবিষ্টঃ সন্ধিসংশ্রযাঃ | প্রচালযতি বর্ত্মানি নিমেষং নাম তদ্বিদুঃ ||৯২|| (সু. উ. তং. অ. ৩) |

নিমেষলক্ষণমাহ– নিমেষিণীরিত্যাদি| নিমেষিণীঃ নিমেষকারিকাঃ সিরাঃ| সন্ধিসংশ্রযা ইতি বর্ত্মশুক্লগতা ইত্যর্থঃ| অযমসাধ্যো বাতজঃ| চক্ষুষ্যণ চ “উন্মেষণীঃ সিরা” ইত্যুক্তং; যদাহ– “উন্মেষণীঃ সিরা বাযুঃ প্রবিশ্য চাবতিষ্ঠতে| অত্যর্থং চালযেদ্বর্ত্ম নিমেষঃ স ন সিধ্যতি||” ইতি||৯২||

Adhikarana shoNitArsholakShaNam (93) · Śloka 93

যঃ স্থিতো বর্ত্মমধ্যে তু লোহিতো মৃদুরঙ্কুরঃ | তদ্রক্তজং শোণিতার্শশ্ছিন্নং ছিন্নং প্রবর্ধতে ||৯৩|| (সু. উ. তং. অ. ৩) |

শোণিতার্শোলক্ষণমাহ– যঃ স্থিত ইত্যাদি| অঙ্কুরাকারো মাংসোচ্ছ্রযোঽঙ্কুরঃ| এতদসাধ্যং; তথা চ বিদেহঃ– “বাযুঃ শোণিতমাদায সিরাণাং প্রমুখে স্থিতঃ| জনযত্যঙ্কুরং তাম্রং বর্ত্মনি চ্ছিন্নরোহণম্|| তচ্ছোণিতার্শোঽসাধ্যং স্যাদ্রক্তস্রাব্যথ নীরুজম্||” ইতি||৯৩||

Adhikarana lagaNalakShaNam (94) · Śloka 94

অপাকী কঠিনঃ স্থূলো গ্রন্থির্বর্ত্মভবোঽরুজঃ , লগণো নাম স ব্যাধির্লিঙ্গতঃ পরিকীর্তিতঃ ||৯৪|| (সু. উ. তং. অ. ৩) |

লগণলক্ষণমাহ– অপাকীত্যাদি| অপাকিত্বাদিকং শ্লেষ্মারব্ধত্বাদেব| তথা চ সাত্যকিঃ– “বর্ত্মোপরিষ্টাদ্যো গ্রন্থিঃ কঠিনো ন বিপচ্যতে| নীরুজো লগণো নাম রোগঃ শ্লেষ্মসমুদ্ভবঃ||” ইতি||৯৪||

Adhikarana bisavartmalakShaNam (95) · Śloka 95

ত্রযো দোষা বহিঃশোথং কুর্যুশ্ছিদ্রাণি বর্ত্মনোঃ | প্রস্রবন্ত্যন্তরুদকং বিসবদ্বিসবর্ত্ম তত্ ||৯৫|| (বা. উ. অ. ৮) |

বিসবর্ত্মলক্ষণমাহ– ত্রযো দোষা ইত্যাদি| বহিঃশোথমিতি বহিরুচ্ছূনত্বং যথা ভবতি তথা বর্ত্মনোশ্ছিদ্রাণি দোষাস্ত্রযঃ কুর্যুরিত্যর্থঃ| তানি ছিদ্রাণি অন্তর্মুখান্যেব, যদাহ– প্রস্রবন্ত্যন্তরুদকমিতি| ছিদ্রাণীতি বহুবচননির্দেশাদ্বহুমুখানি, অত্রাপি দোষাঃ কুর্যুরিতি সম্বন্ধঃ| অত এব বিসবত্ মৃণালবত্; তচ্চানেকচ্ছিদ্রযুক্তং ভবতি তদ্বত্| অত্রৈব চন্দ্রিকাকারঃ সুশ্রুতে পঠতি– “শূনং যদ্বর্ত্ম বহুভিঃ শ্লক্ষ্ণৈশ্ছিদ্রৈঃ সমন্বিতম্| বর্ত্মান্তরে বিসমিব বিসবর্ত্মেতি তত্ স্মৃতম্||” (সু. উ. তং. অ. ৩) ইতি| সাত্যকিরপ্যাহ– “বিসস্যাপাচিতস্যেব বহুমাংসসিরামুখম্| বিসবর্ত্মেতি জানীযাদ্দুশ্চিকিত্স্যং ত্রিদোষজম্||” ইতি||৯৫||

Adhikarana ku~jcanalakShaNam (96) · Śloka 96

বাতাদ্যা বর্ত্মসঙ্কোচং জনযন্তি মলা যদা | তদা দ্রষ্টুং ন শক্নোতি কুঞ্চনং নাম তদ্বিদুঃ ||৯৬||

কুঞ্চনলক্ষণমাহ– বাতাদ্যা ইত্যাদি| মলা ইত্যস্যাভিধানং দুষ্টত্বপ্রতিপাদনার্থং, যতো মলিনীকরণান্মলা ইত্যুচ্যন্তে| কুঞ্চনং চ কস্যাপি তন্ত্রস্য মাধবকরেণ লিখিতং ন সৌশ্রুতং, তেন সুশ্রুতোক্তষট্সপ্ততিসঙ্খ্যা ন হীযতে, এবং বক্ষ্যমাণেঽপি পক্ষ্মশাতে বোদ্ধব্যম্||৯৬||

Adhikarana pakShmakopalakShaNam (97-98) · Śloka 98

প্রচালিতানি বাতেন পক্ষ্মাণ্যক্ষি বিশন্তি হি | ঘৃষ্যন্ত্যক্ষি মুহুস্তানি সংরম্ভং জনযন্তি চ ||৯৭|| অসিতে সিতভাগে চ মূলকোষাত্ পতন্ত্যপি | পক্ষ্মকোপঃ স বিজ্ঞেযো ব্যাধিঃ পরমদারুণঃ ||৯৮||

পক্ষ্মকোপলক্ষণমাহ– প্রচালিতানীত্যাদি| প্রচালিতানি প্রকর্ষেণ চালিতানি, প্রতীপীকৃতানীত্যর্থঃ| পক্ষ্মাণি বর্ত্মরোমাণি বাতচালিতানি সন্তি নেত্রং প্রবিশন্তি অন্তর্মুখানি বর্ত্মন ইত্যর্থঃ| তান্যসিতে কৃষ্ণমণ্ডলে, সিতভাগে শুক্লমণ্ডলে বা, অক্ষি ঘৃষ্যন্তি ঘর্ষযন্তীত্যর্থঃ| অত এব সংরম্ভং শোথং জনযন্তি| মূলকোষাত্ পক্ষ্মকোষাত্, পতন্ত্যপীতি ‘পক্ষ্মাণি’ ইতি শেষঃ, অপিশব্দান্ন পতন্তি চ| ত্রিদোষজশ্চাযং, প্রচালনে বাতমাত্রকারণত্বমুক্তং; তথা চ| চন্দ্রিকাকারঃ পাঠান্তরং পঠতি– “পক্ষ্মাশযগতা দোষাস্তীক্ষ্ণাগ্রাণি খরাণি চ| নির্বর্তযন্তি পক্ষ্মাণি তৈর্ঘৃষ্টং চাক্ষি দূযতে|| উদ্ধৃতৈরুদ্ধৃতৈঃ শান্তিঃ পক্ষ্মভিশ্চোপজাযতে|” (সু. উ. তং. অ. ৩) ইতি| অত্র পক্ষ্মাশযো বর্ত্ম| বিদেহঽপ্যাহ– “যস্য বাতসম্বন্ধেন দোষাঃ প্রকুপিতাস্ত্রযঃ|” ইত্যাদিনেতি| কল্যাণবিনিশ্চয উপপক্ষ্ম পঠ্যতে– “পক্ষ্মোপরোধো বাতেন কোঠোঽন্তর্মুখরোমবান্| রোমৈরন্তর্মুখৈরন্যৈরুপপক্ষ্ম মলৈস্ত্রিভিঃ||” ইতি| উপপক্ষ্মণি যাদৃশী পূর্বসিদ্ধা তাদৃশী অপরাঽন্তর্মুখী পক্ষ্মপঙ্ক্তিরিতি ভেদঃ; অস্য পক্ষ্মোপরোধবিশেষত্বাত্ সমানচিকিত্স্যত্বাচ্চ পৃথগিহানভিধানম্||৯৭-৯৮||

Adhikarana pakShmashAtalakShaNam (99) · Śloka 102

বর্ত্মপক্ষ্মাশযগতং পিত্তং রোমাণি শাতযেত্ | কণ্ডূং দাহং চ কুরুতে পক্ষ্মশাতং তমাদিশেত্ ||৯৯|| নব সন্ধ্যাশ্রযাস্তেষু বর্ত্মজাস্ত্বেকবিংশতিঃ | শুক্লভাগে দশৈকশ্চ চত্বারঃ কৃষ্ণভাগজাঃ ||১০০|| সর্বাশ্রযাঃ সপ্তদশ দৃষ্টিজা দ্বাদশৈব তু | বাহ্যজৌ দ্বৌ সমাখ্যাতৌ রোগৌ পরমদারুণৌ ||১০১|| ভূয এতান্ প্রবক্ষ্যামি সঙ্খ্যারূপচিকিত্সিতৈঃ ||১০২|| (ইতি বর্ত্মগতাঃ) | (সু. উ. তং. অ. ১) |

পক্ষ্মশাতলক্ষণমাহ– বর্ত্মেত্যাদি| পক্ষ্মাশযোঽত্র পক্ষ্মমূলম্| শাতযেদুন্মূলযেদিত্যর্থঃ| অযং চ কফপৈত্তিকঃ, কণ্ডূদাহবত্ত্বাত্| অত্র কৃচ্ছ্রোন্মীলনং বাগ্ভটঃ পঠতি– “রোগান্ কুর্যুশ্চলস্তত্র প্রাপ্য বর্ত্মাশ্রযাঃ সিরাঃ| সুপ্তোত্থিতস্য কুরুতে বর্ত্মস্তম্ভং সবেদনম্|| পাংশুপূর্ণাভনেত্রত্বং কৃচ্ছ্রোন্মীলনমশ্রু চ| বিমর্দনাত্ স্যাচ্চ শমঃ কৃচ্ছ্রোন্মীলং বদন্তি তম্||” (বা. উ. অ. ৮) ইতি| অস্য চকারেণ সঙ্গ্রহঃ| পক্ষ্মণাং বর্ত্মাশ্রযত্বাদযমঘি বর্ত্মরোগ এব| ইতি বর্ত্মগতা একবিংশতির্ব্যাধযঃ সমাপ্তাঃ| ইতি বর্ত্মগতাঃ||৯৯||

Adhikarana puShpikA · Śloka 59

ইতি শ্রীমাধবকরবিরচিতে মাধবনিদানে নেত্ররোগনিদানং সমাপ্তম্ ||৫৯||

ইতি শ্রীকণ্ঠদত্তকৃতাযাং মধুকোশব্যাখ্যাযাং নেত্ররোগনিদানং সমাপ্তম্||৫৯||