৬৭. স্তন্যদুষ্টিনিদানম্

আতঙ্কদর্পণ ব্যাখ্যা (বাচস্পতি বৈদ্য কৃত)

অদৃশ্যস্যাপি স্তন্যস্য প্রসিদ্ধোপমানেন প্রবর্তনে হেতুং দর্শযন্নাহ– বিশন্নিত্যাদি| শুক্রলক্ষণং স্তন্যমুচ্যত ইতি শেষঃ| কুত ইত্যাহ– যথা শুক্রং বিশংস্তেষু ছিন্নেষ্বপি গাত্রেষু ন দৃশ্যতে, তস্মাদ্ধেতোঃ| দ্বিতীযং হেতুমাহ– সর্বদেহাশ্রিতত্বাদিতি| শুক্রবত্সমস্তশরীরাশ্রিতত্বাত্||১||

আতঙ্কদর্পণ ব্যাখ্যা (বাচস্পতি বৈদ্য কৃত)

শুক্রদৃষ্টান্তেন স্তন্যস্যাভ্যন্তরদর্শনং প্রতিপাদ্য তেনৈব দৃষ্টান্তেন বহিঃপ্রবর্তনং প্রতিপাদযন্নাহ– তদিত্যাদি| তদেব শুক্রং প্রবর্ততে বহির্নিঃসরতি| সংহর্ষাত্ বিশিষ্টসঙ্কল্পলক্ষণাত্| সংহর্ষে হেতুচতুষ্টযং নির্দিশন্নাহ– ইষ্টযুবতেরিত্যাদি| ইষ্টযুবতিদর্শনাদিহেতুচতুষ্টযেন যঃ সংহর্ষঃ, স সুপ্রসন্ন এব মনসি ভবতি, ইতি মনসোঽপি প্রসন্নস্য কারণত্বং দর্শযন্নাহ– সুপ্রসন্নেত্যাদি| তত্র হর্ষণে হেতুঃ সুপ্রসন্নমীর্ষ্যাদ্যনভিভূতং মন উচ্যতে| শুক্রেণ সহ প্রস্তুতস্য স্তন্যস্য সাধর্ম্যাদ্ধেতুং দর্শযন্নাহ– আহারেত্যাদি| পূর্বং স্তন্যমপি স্ত্রিযাঃ প্রতর্ততে, শুক্রমাহাররসযোনিত্বাত্প্রবর্ততে, স্তন্যমপি তথা, তস্মাত্প্রবর্ততে||২-৩||

আতঙ্কদর্পণ ব্যাখ্যা (বাচস্পতি বৈদ্য কৃত)

ননু শুক্রমাহাররসযোন্যপি সংহর্ষাত্কারণাত্প্রবর্ততে, অত্র চ কিং কারণমিত্যাহ– তদেবেত্যাদি| তদেব স্তন্যং শুক্রবত্ সম্প্রবর্ততে| অপত্যসংস্পর্শাদিকারণচতুষ্টযেঽপি স্নেহো মূলকারণমিতি তদেব দর্শযন্নাহ– স্নেহ ইত্যাদি| প্রস্রবে স্তন্যস্রবণে অত্রাপি চত্বারো হেতবঃ পরমেষ্টযুবতিস্থানেঽত্রাপত্যগ্রহণং, মূলহেতুহর্ষস্থানে স্নেহঃ, প্রসন্নস্থানে নিরন্তরঃ||৪||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্তনাশ্রিতত্বেন স্তন্যদুষ্টিমাহ– গুরুভির্বিবিধৈরিত্যাদি| গুরুভিরন্নৈর্হেতুভূতৈর্যে দুষ্টা দোষাস্তৈঃ প্রদূষিতম্||৫||

আতঙ্কদর্পণ ব্যাখ্যা (বাচস্পতি বৈদ্য কৃত)

স্তনাশ্রিতত্বেন স্তন্যস্য দুষ্টিমাহ– গুরুভিরিত্যাদি| গুরুভিরন্নৈর্হেতুভূতৈর্যে দুষ্টা দোষাস্তৈঃ প্রদূষিতং ধাত্র্যাঃ ক্ষীরং কুমারস্য নানারোগায কল্পতে| নানারোগানুত্পাদযতীত্যর্থঃ||৫||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

স্তন্যদুষ্টিলক্ষণমাহ– কষাযমিত্যাদি| সলিলপ্লাবীতি সলিলে যদুত্প্লবতে লাঘবাত্ তত্ সলিলপ্লাবি| এতদুপলক্ষণং, তেন তনুত্বাদ্যপি বোদ্ধব্যম্| কট্বম্ললবণমিতি কটু তিক্তং, তিক্তেঽপি কটুশব্দপ্রবৃত্তেরিতি বদন্তি| পীতরাজীমদিতি পীতরেখাযুক্তম্, তত্রাপি নীললোহিতাশ্চ রাজ্যো জ্ঞেযাঃ| পিত্তসঞ্জ্ঞিতমিতি পিত্তদুষ্টসঞ্জ্ঞিতম্| সঞ্জ্ঞিতমিত্যত্র সংযুতমিতি পাঠান্তরম্| তোযে নিমজ্জতি গুরুত্বাত্| অতিমাধুর্যাদ্যপি বোধ্যম্| প্রসন্নস্য তু সাধারণং মধুরপাণ্ডুত্বম্| অভিঘাতেনাপি স্তন্যং দুষ্টং সম্ভবত্যেব, কিন্তু তস্য বাতিকস্তন্যলক্ষণৈরেব সঙ্গ্রহণং কর্তব্যম্| স্তন্যস্বরূপং চ সুশ্রুতেনোক্তম্| তদ্যথা– “রসপ্রসাদো মধুরঃ পক্বাহারনিমিত্তজঃ| কৃত্স্নদেহাত্ স্তনৌ প্রাপ্তঃ স্তন্যমিত্যভিধীযতে||” (সু. নি. অ. ১০) ইতি||৬-৭||

আতঙ্কদর্পণ ব্যাখ্যা (বাচস্পতি বৈদ্য কৃত)

বাতিকমাহ– কষাযমিত্যাদি| সলিলপ্লাবি সলিলে যদুত্প্লবতে লাঘবাত্, এতদুপলক্ষণং, তেন তনুত্বাদ্যপ্যনুক্তং বোদ্ধব্যম্| পৈত্তিকমাহ– কট্বিত্যাদি| কটু তিক্তং, তিক্তেঽপি কটুশব্দস্য প্রবৃত্তেরিতি বদন্তি, পীতরাজীমদিতি পীতরেখাযুক্তম্, অত্রাপি নীললোহিতাশ্চ রাজ্যো বোদ্ধব্যাঃ| পিত্তসঞ্জ্ঞিতমিতি পিত্তদুষ্টমিতি সঞ্জ্ঞিতম্| শ্লৈষ্মিকমাহ– কফদুষ্টমিত্যাদি| তোযে নিমজ্জতীতি গুরুত্বাত্| অতিমাধুর্যাদ্যপি বোদ্ধব্যম্| সাংসর্গিকসান্নিপাতিকাবাহ– দ্বিলিঙ্গমিতি| সুগমম্||৬-৭||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

অবিকৃতস্তন্যমাহ– অদুষ্টমিত্যাদি| অম্বুনিক্ষিপ্তমেকীভবতি সর্বাত্মনা জলেন সহৈকীভবতীতি বোধ্যং, বাতাদিদুষ্টস্যাপ্যেকদেশেনৈকীভাবোপলম্ভাত্| অবিবর্ণমিতি অবিদ্যমানবাতাদিদুষ্টবর্ণম্| এতত্ সমদোষপ্রকৃতিক্ষীরস্য প্রসন্নস্য লক্ষণম্| অন্যে ত্ববিবর্ণমিত্যত্র নঞ্ ঈষদর্থে, তেন যদ্বাতাদিপ্রকৃতিবর্ণানুবিদ্ধমপি পাণ্ডুরমল্পদুষ্টত্বাত্তদ্ গৃহ্ণন্তি| কেচিত্ পাণ্ডুরস্থানে ‘সর্বশঃ’ ইতি পঠন্তি, তদা সর্বাত্মনা জলেন সহৈকীভবতীতি ব্যক্তোঽর্থঃ| অত্র পক্ষে অবিবর্ণমিত্যনেনৈবাদুষ্টশুক্লবর্ণতা জ্ঞেযা| প্রসন্নং প্রকৃতিস্থম্||৮||

আতঙ্কদর্পণ ব্যাখ্যা (বাচস্পতি বৈদ্য কৃত)

অবিকৃতং স্তন্যমাহ– অদুষ্টমিত্যাদি| অম্বুনিক্ষিপ্তমেকীভবতি সর্বাত্মনা জলেন সহৈকীভূতং ভবতীতি বোদ্ধব্যম্| অবিবর্ণমিতি অবিদ্যমানবাতাদিদুষ্টবর্ণম্||৮||

মধুকোশ ব্যাখ্যা (বিজযরক্ষিত, শ্রীকণ্ঠদত্ত কৃত)

ইতি শ্রীকণ্ঠদত্তকৃতাযাং মধুকোশব্যাখ্যাযাং স্তন্যদুষ্টিনিদানং সমাপ্তম্||৬৭||

আতঙ্কদর্পণ ব্যাখ্যা (বাচস্পতি বৈদ্য কৃত)

ইতি শ্রীবাচস্পতিবৈদ্যবিরচিতাযাং মাধবনিদানব্যাখ্যাযামাতঙ্কদর্পণাখ্যাযাং স্তন্যদুষ্টিনিদানম্||৬৭||