39. āturōpadravacikitsitam

Adhikarana 1 (1-2) · Śloka 2

অথাত আতুরোপদ্রবচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

অথাত ইত্যাদি| উপদ্রবন্তীত্যুপদ্রবা রোগাঃ, আতুরস্যোপদ্রবা আতুরোপদ্রবাঃ; তে চাত্র প্রাযেণ পঞ্চকর্মনিমিত্তা ব্যাপদঃ, তেষাং চিকিত্সিতং কারণগুণপ্রত্যনীকং বিধানম্| ‘আতুরোপক্রমচিকিত্সিতম্’ ইতি কেচিত্ পঠন্তি| স্নেহাদীনাং নিরূহান্তানামুপক্রমাণামন্তেঽগ্নিমান্দ্যমেবাবশ্যম্ভাবি, তত্সন্ধুক্ষণার্থং পেযাদিসংসর্জনোপদেশায বর্জ্যানাং চ ক্রোধাদীনাং প্রজ্ঞাপরাধাত্ করণে তজ্জব্যাধিপ্রশমনায চাতুরোপদ্রবচিকিত্সিতাভিধানম্||১-২||

Adhikarana 2 (3-5) · Śloka 5

স্নেহপীতস্য বান্তস্য বিরিক্তস্য স্রুতাসৃজঃ | নিরূঢস্য চ কাযাগ্নির্মন্দো ভবতি দেহিনঃ ||৩|| সোঽন্নৈরত্যর্থগুরুভিরুপযুক্তৈঃ প্রশাম্যতি | অল্পো মহদ্ভির্বহুভিশ্ছাদিতোঽগ্নিরিবেন্ধনৈঃ ||৪|| স চাল্পৈর্লঘুভিশ্চান্নৈরুপযুক্তৈর্বিবর্ধতে | কাষ্ঠৈরণুভিরল্পৈশ্চ সন্ধুক্ষিত ইবানলঃ ||৫||

ইদানীং স্নেহপানপূর্বকপশ্চকর্মণাং সোপপত্তিককর্মকরণাদ্ ব্যাপদাং নিবারণমুপদিশন্নাহ- স্নেহপীতস্যেত্যাদি| নিরূঢস্য চেতি চকারেণানুবাসিতমনুক্তং সমুচ্চিনোতি| ননু স্নেহপানাদযোঽনলপ্রবোধোদয হেতব ইত্যুক্তত্বাত্ কথং তৈর্মন্দোঽগ্নির্ভবতি দেহিনঃ? উচ্যতে, তত্কাল এব মন্দঃ, ক্রমেণ তু তেন দীপ্তো ভবতীতি ন দোষপ্রসঙ্গঃ| তস্য ক্রমেণ যথা প্রাকৃতাবস্থাপন্নত্বং ভবতি তথা নির্দিশন্নাহ- সোঽন্নৈরিত্যাদি||৩-৫||

Adhikarana 3 (6) · Śloka 6

হৃতদোষপ্রমাণেন সদাঽঽহারবিধিঃ স্মৃতঃ |৬|

তত্রোক্তপ্রমাণকারণমুদ্দিশন্নাহ - হৃতদোষেত্যাদি|৬|-

Adhikarana 4 (6) · Śloka 7

ত্রীণি চাত্র প্রমাণানি প্রস্থোঽর্ধাঢকমাঢকম্ ||৬|| তত্রাবরং প্রস্থমাত্রং দ্বে শেষে মধ্যমোত্তমে |৭|

তদেব কতিবিধং কিযত্প্রমাণমিত্যাহ- ত্রীণি চাত্রেত্যাদি||৬||-

Adhikarana 5 (7-11) · Śloka 12

প্রস্থে পরিস্রুতে দেযা যবাগূঃ স্বল্পতণ্ডুলা ||৭|| দ্বে চৈবার্ধাঢকে দেযে তিস্রশ্চাপ্যাঢকে গতে | বিলেপীমুচিতাদ্ভক্তাচ্চতুর্থাংশকৃতাং ততঃ ||৮|| দদ্যাদুক্তেন বিধিনা ক্লিন্নসিক্থামপিচ্ছিলাম্ | অস্নিগ্ধলবণং স্বচ্ছমুদ্গযূষযুতং ততঃ ||৯|| অংশদ্বযপ্রমাণেন দদ্যাত্ সুস্বিন্নমোদনম্ | ততস্তু কৃতসঞ্জ্ঞেন হৃদ্যেনেন্দ্রিযবোধিনা ||১০|| ত্রীনংশান্ বিতরেদ্ভোক্তুমাতুরাযৌদনং মৃদু | ততো যথোচিতং ভক্তং ভোক্তুমস্মৈ বিচক্ষণঃ ||১১|| লাবৈণহরিণাদীনাং রসৈর্দদ্যাত্ সুসংস্কৃতৈঃ |১২|

তেষু চ ত্রিষু দোষনির্হরণপ্রমাণেষু ত্রীনেবানুক্রমান্ ক্রমেণাহ- প্রস্থে পরিস্রুতে ইত্যাদি| প্রস্থশ্চাত্র সার্ধত্রযোদশপলঃ| যবাগূশব্দেন পেযা বিবক্ষিতা, স্বল্পতণ্ডুলা অষ্টাংশতণ্ডুলকৃতা; তদুক্তং- “পেযাং পিবেদুচিতভক্তকৃতাষ্টভাগাং ত্রির্দ্বিঃ সকৃত্প্রবরমধ্যজঘন্যশুদ্ধঃ”- ইতি| যবাগূরিত্যত্রৈকবচননির্দেশাদেকবারমিতি বোদ্ধব্যম্| দ্বে চৈবার্ধাঢকে ইত্যত্র দ্বে পেযে দ্বৌ বারাবিতি বোদ্ধব্যম্| তিস্রশ্চাপ্যাঢকে গতে ইত্যত্র তিস্রঃ পেযা ইতি বোদ্ধব্যম্| বিলেপীত্যাদি| উচিতাদভ্যস্তাত্তণ্ডুলাচ্চতুর্থভাগেন কৃতাম্| উক্তেন বিধিনেতি একদ্বিত্রিক্রমেণ| ক্লিন্নসিক্থাম্ অতিপক্বতণ্ডুলাম্| অপিচ্ছিলাং মণ্ডরহিতাং , যবাগূং দদ্যাত্ ‘ভিষক্’ ইত্যধ্যাহারঃ| অংশদ্বযপ্রমাণেনেত্যাদি| উচিতাদর্ধভাগতণ্ডুলাত্ কৃতং ভক্তমিত্যর্থঃ| ত্রীনংশানিতি ত্রিভাগকল্পিতং সম্যক্পক্বং ঘৃতমণ্ডেন সমন্বিতম্| তত ইত্যাদি|- ততোঽনন্তরং কৃতসঞ্জ্ঞেন যূষেণ সহ আতুরায রোগিণে ওদনং ভক্তমুচিতং তণ্ডুলাংশত্রযকৃতং ভোক্তুং বিতরেদ্ দদ্যাদিতি সম্বন্ধঃ| অস্য শ্লোকস্যাদৌ “ত্রিভাগকলিতং সম্যগকৃতেনাথ সম্মিতম্” ইতি প্রতিপুস্তকেষু পাঠো দৃশ্যতে স চ ন পঠনীযঃ, জেজ্জটাদিনিবন্ধকারৈঃ সর্বৈরপি পরিহৃতত্বাত্| ততো যথোচিতমিত্যাদি|- যথোচিতমিতি অংশচতুষ্টযপ্রমাণং পরিপূর্ণমিত্যর্থঃ| হৃতদোষপ্রমাণেনেত্যাদি দদ্যাত্ সুসংস্কৃতৈরিত্যন্তগ্রন্থেনৈতদুক্তং ভবতি- হীনশুদ্ধিশুদ্ধস্য পুরুষস্য তাবত্ প্রথমেঽন্নকালে উচিতভক্তকৃতাষ্টভাগাং পেযাং দদ্যাত্, তস্মিন্নেব দিনে দ্বিতীযেঽন্নকালে প্রকৃতিস্থাত্ জরণকালোচিতাদ্ভক্তাত্ চতুর্থাংশেন কৃতামতিপক্বতণ্ডুলাবযবাং মণ্ডরহিতাং বিলেপীং দদ্যাত্; দ্বিতীযেঽহ্নি তৃতীযেঽন্নকালেঽস্নিগ্ধালবণস্বচ্ছেনাকৃতমুদ্গযূষেণোচিতাদর্ধভাগতণ্ডুলকৃতং সুস্বিন্নমোদনং দদ্যাত্, তস্মিন্নেব দিনে চতুর্থেঽন্নকালে হৃদ্যেনেন্দ্রিযবোধিনা কৃতসঞ্জ্ঞেন যূষেণোচিততণ্ডুলাংশত্রযকৃতমোদনং ভোক্তুং দদ্যাত্; ততস্তৃতীযেঽহ্নি পঞ্চমেঽন্নকালে লাবৈণহরিণাদীনাং সুসংস্কৃতরসৈরংশচতুষ্টযপ্রমাণং ভক্তং ভোক্তুং দদ্যাত্, তৃতীযেঽহ্নি ষষ্ঠেঽন্নকালে প্রকৃতিভোজনমাগচ্ছেত্| মধ্যশুদ্ধিশুদ্ধস্য চ তাবদাদৌ দ্বযোরন্নকালযোঃ পেযাং দদ্যাত্, দ্বিতীযেঽহ্নি দ্বযোরপ্যন্নকালযোর্বিলেপিকাং, তৃতীযেঽহ্নি কালদ্বযেঽপ্যকৃতযূষং, চতুর্থেঽহ্নি কালদ্বযেঽপি কৃতযূষং, পঞ্চমেঽহ্নি কালদ্বযেঽপি মাংসরসমিত্যতঃ ষষ্ঠেঽহ্নি প্রকৃতিভোজনমাগচ্ছেত্| উত্তমশুদ্ধিশুদ্ধস্য চ তাবত্ প্রথমেঽহ্নি দ্বযোরপ্যন্নকালযোঃ পেযাং দদ্যাত্, দ্বিতীযেঽহ্নি প্রথমেঽন্নকালে পেযাং, দ্বিতীযে বিলেপিকাং; তৃতীযেঽহ্নি দ্বযোরপ্যন্নকালযোর্বিলেপিকাং; চতুর্থেঽহ্নি দ্বযোরপ্যন্নকালযোরকৃতযূষং; পঞ্চমেঽহ্নি প্রথমেঽন্নকালেঽকৃতযূষং, দ্বিতীযেঽন্নকালে কৃতযূষং; ষষ্ঠেঽহ্নি দ্বযোরপ্যন্নকালযোঃ কৃতযূষং; সপ্তমেঽহ্নি দ্বযোরপ্যন্নকালযোর্মাংসরসং; অষ্টমেঽহ্নি প্রথমেঽন্নকালে মাংসরসম্, অতোঽষ্টমদিবসস্য দ্বিতীযেঽন্নকালে প্রকৃতিভোজনমাহরেত্| গযী তু হীনশুদ্ধৌ প্রথমেঽন্নকালে উচিততণ্ডুলাষ্টভাগকৃতা পেযা, দ্বিতীযেঽন্নকালে তূচিততণ্ডুলচতুর্থভাগকৃতা বিলেপী, তৃতীযেঽন্নকালে তূচিততণ্ডুলার্ধভাগকৃতেন ভক্তেন সহ দকলাবণিকো যূষো রসো বা যথাদোষং, চতুর্থেঽন্নকালে তূচিততণ্ডুলভাগত্রযকৃতেন ভক্তেন সহ কৃতসঞ্জ্ঞো যূষঃ পিপ্পলীশৃঙ্গবেরসিদ্ধঃ কৃতো রসো বা যথাদোষং, ততো যথোচিতং পরিপূর্ণভক্তং সুসংস্কৃতেন রসেন যূষেণ বা দেযমিতি তৃতীযে দিনে প্রকৃতিভোজনম্| এবং মধ্যমোত্তমশুদ্ধৌ পেযাদীনাং দ্বিত্রিকালদানেন যথাক্রমং পঞ্চমে সপ্তমে চ দিনে প্রকৃতিভোজনম্| উক্তং চ, তন্ত্রান্তরে- “পেযাং বিলেপীমকৃতং কৃতং চ যূষং রসং ত্রীনুভযং তথৈকম্| ক্রমেণ সেবেত নরোঽন্নকালান্ প্রধানমধ্যাবরশুদ্ধিশুদ্ধঃ” (বা.সূ. অ.১৮)- ইতি||৭-১১||-

Adhikarana 6 (12) · Śloka 13

হীনমধ্যোত্তমেষ্বেষু বিরেকেষু প্রকীর্তিতঃ ||১২|| একদ্বিত্রিগুণঃ সম্যগাহারস্য ক্রমস্ত্বযম্ |১৩|

উক্তমেবানুক্রমং নিযমযন্নাহ- হীনেত্যাদি| প্রস্থে পরিস্রুতে হীনো বিরেকঃ, তস্মিন্ পেযাদিক্রম একৈকমন্নকালং দেযঃ; অর্ধাঢকে পরিস্রুতে মধ্যো বিরেকঃ, তস্মিন্ পেযাদিঃ প্রত্যেকং দ্বৌ দ্বাবন্নকালৌ দেযঃ; আঢকে পরিস্রুতে উত্তমো বিরেকঃ, তস্মিন্ পেযাদিঃ প্রত্যেকং ত্রীংস্ত্রীনন্নকালান্ দেযঃ| এষু পূর্বোক্তেষু হীনাদিবিরেকেষু হৃতদোষমানাপেক্ষযা একদ্বিত্রিগুণোঽযমাহারক্রমঃ সম্যক্ প্রকীর্তিতঃ; ততো মিথ্যাহীনাতিযোগেনাসম্যগিত্যর্থঃ| এতদুক্তং ভবতি- হীনে বিরেকে চতুর্ভিরন্নকালৈঃ সাযম্প্রাতিকভোজনাভ্যাং দ্ব্যহং, মধ্যে তদ্দ্বিগুণেন চতুরহং, উত্তমে তত্ত্রিগুণেন ষডহমিতি||১২||-

Adhikarana 7 (13) · Śloka 14

কফপিত্তাধিকান্মদ্যনিত্যান্ হীনবিশোধিতান্ ||১৩|| পেযাঽভিষ্যন্দযেত্তেষাং তর্পণাদিক্রমো হিতঃ |১৪|

ইদানীং ক্বচিদ্বিষযে পেযাদিক্রমনিষেধমাহ- কফেত্যাদি| যে কফপিত্তাধিকাস্তথা মদ্যনিত্যাস্তান্ হীনবিশোধিতান্ পেযাঽভিষ্যন্দযেত্ অভিষ্যণ্ণস্রোতস্কান্ কুর্যাত্, অতস্তেষাং হীনশোধিতানাং তর্পণাদিক্রমো হিতঃ| তত্র প্রথমেঽন্নকালে তর্পণং লাজসক্তুভিঃ কার্যং ততো যূষভক্তাদিকমিতি| তন্ত্রান্তরে চোক্তং- “স্রুতাল্পপিত্তশ্লেষ্মাণং মদ্যপং বাতপৈত্তিকম্| পেযাং ন পাযযেত্” (বা.সূ.অ.১৮)- ইত্যাদি| ননু তর্পণাদিক্রমস্বীকারে হীনবিরেকে প্রাক্প্রতিপাদিতস্য পেযাদিক্রমস্য নৈরর্থক্যম্? উচ্যতে- কফপিত্তাধিকমদ্যনিত্যৌ পরিত্যজ্যান্যত্র হীনবিরেকে পেযাদিক্রম ইতি||১৩||-

Adhikarana 8 (14) · Śloka 15

বেদনালাভনিযমশোকবৈচিত্ত্যহেতুভিঃ ||১৪|| নরানুপোষিতাংশ্চাপি বিরিক্তবদুপাচরেত্ |১৫|

ইদানীমশুদ্ধেঽপি ক্বচিদগ্নিমান্দ্যহেতৌ সঙ্ক্ষেপার্থং সংশোধনোক্তসংসর্জনানুক্রমমতিদেশেন নির্দিশন্নাহ- বেদনালাভনিযমেত্যাদি| বেদনাযা লাভো বেদনালাভঃ, অলাভ ইষ্টস্যেতি কেচিদাচক্ষতে, লাভোঽনিষ্টস্যেত্যন্যে, নিযম উপবাসাদিঃ, বৈচিত্ত্যম্ উন্মাদাদিঃ, এতৈর্হেতুভিরুপোষিতান্নরান্ বিরিক্তবদুপাচরেত্| তত্রাপি লঙ্ঘনমানেন হীনমধ্যোত্তমাভিহিতেন দ্ব্যহং চতুরহং ষডহমেবান্নসংসর্জনম্||১৪||-

Adhikarana 9 (15-16) · Śloka 16

আঢকার্ধাঢকপ্রস্থসঙ্খ্যা হ্যেষা বিরেচনে ||১৫|| শ্লেষ্মান্তত্বাদ্বিরেকস্য ন তামিচ্ছতি তদ্বিদঃ | একো বিরেকঃ শ্লেষ্মান্তো ন দ্বিতীযোঽস্তি কশ্চন ||১৬||

প্রাক্প্রতিপাদিতপ্রস্থার্ধাঢকাদিসঙ্খ্যাযা বিরেকৈকবিষযত্বং প্রতিপাদ্য কারণমুখেন নিরাকুর্বন্নাহ- আঢকার্ধাঢকেত্যাদি| অগ্ন্যধিষ্ঠানসম্প্লবাদত্যর্থমগ্নিমান্দ্যহেতৌ বিরেচন এবাঢকাদিসঙ্খ্যা, বমনাস্থাপনযোস্ত্বগ্ন্যধিষ্ঠানানভিভবেন তাদৃশাগ্নিমান্দ্যাভাবান্মাননিযমো নাস্তি; অত এব তদহরেব বমনে কুলত্থমুদ্গযূষভোজনং, আস্থাপনে মাংসরসভোজনমনুবাসনং চ| এতন্মতং নিরস্যন্নাহ- শ্লেষ্মান্তত্বাদিত্যাদি| অযমভিপ্রাযঃ- বিরেচনং নিঃশেষপিত্তনির্হরণায প্রযুজ্যতে, নিঃশেষপিত্তনির্হরণং চ তদৈবানুমীযতে যদা পিত্তপ্রবর্তনানন্তরং তত্ পরদেশস্থ আমরূপঃ কফঃ প্রবর্ততে; তস্মাত্ কফান্তিকত্বান্দ্বিরেকস্য তাং প্রস্থাদিকাং সঙ্খ্যাং বিরেচনবিদো নেচ্ছন্তি| এতেন বৈগিকোঽপি নিরাকৃতঃ, লৈঙ্গিকঃ পুনরেকান্তেন বিশুদ্ধ এব| যতো লৈঙ্গিকেঽপি কফান্তিকত্বমস্তি| তথাচ- ‘বমনে প্রসেকৌষধকফপিত্তানিলাঃ ক্রমেণ গচ্ছতি, এবমেব বিরেচনে পুরীষপিত্তৌষধকফা’ ইতি| অতো বৈগিকমানিকৌ বিরেকৌ গৌণতযা প্রতিপাদিতৌ ক্বচিদ্বালবৃদ্ধাদ্যবস্থাবশাত্ প্রযুক্তৌ কর্তব্যৌ| মুখ্যঃ পুনরেকঃ কফান্তিক এবেত্যাহ- একো বিরেক ইত্যাদি| ন দ্বিতীযোঽস্তীতি তৃতীযস্য পুনঃ কা কথা, এবং বমনমপ্যেকমেব| তথাচ ভোজঃ,- “তস্মান্মতিমতা নিত্যমাত্মানং পরিরক্ষতা| পিত্তান্তং বমনং স্থাপ্যং কফান্তং চ বিরেচনম্”- ইতি||১৫-১৬||

Adhikarana 10 (17-18) · Śloka 18

বলং যত্ত্রিবিধং প্রোক্তমতস্তত্র ক্রমস্ত্রিধা | তত্রানুক্রমমেকং তু বলস্থঃ সকৃদাচরেত্ ||১৭|| দ্বিরাচরেন্মধ্যবলস্ত্রীন্ বারান্ দুর্বলস্তথা | কেচিদেবং ক্রমং প্রাহুর্মন্দমধ্যোত্তমাগ্নিষু ||১৮||

এবং তর্হি তদাশ্রযান্নসংসর্জনত্রিত্বমপি নাস্তীতি প্রকারান্তরেণৈবান্নসংসর্জনত্রিত্বং তদাশ্রযং দর্শযন্নাহ- বলং যত্ত্রিবিধমিত্যাদি| বলমত্রোপচযলক্ষণমেব| যস্মাত্ প্রাগেক এব বিরেক উপবর্ণিতঃ, অতস্ত্রিবিধ আহারক্রমো বলং যত্ত্রিবিধং প্রোক্তং তত্র জ্ঞেযঃ| তত্র ত্রিবিধেঽপি বলে সর্বত্র ত্রিবিধমপ্যন্নসংসর্জনং প্রাপ্নোতি; ক্বচিত্ কঞ্চিন্নির্দিশন্নাহ- তত্রানুক্রমমিত্যাদি| তত্রৈব মতান্তরং দর্শযন্নাহ- কেচিদেবমিত্যাদি||১৭-১৮||

Adhikarana 11 (19-20) · Śloka 20

সংসর্গেণ বিবৃদ্ধেঽগ্নৌ দোষকোপভযাদ্ভজেত্ | প্রাক্ স্বাদুতিক্তৌ স্নিগ্ধাম্ললবণান্ কটুকং ততঃ ||১৯|| স্বাদ্বম্ললবণান্ ভূযঃ স্বাদুতিক্তাবতঃ পরম্ | স্নিগ্ধরূক্ষান্ রসাংশ্চৈব ব্যত্যাসাত্ স্বস্থবত্ততঃ ||২০||

অতঃ পরং ক্রমেণৈব কৃতসংসর্গস্য রসাবচারণক্রমমাহ- সংসর্গেণেত্যাদি| অন্নসংসর্জনক্রমবিবৃদ্ধেঽগ্নৌ দোষকোপভযাত্ স্নিগ্ধান্ মধুরাম্ললবণান্, রূক্ষান্ কটুতিক্তকষাযান্ রসান্, ব্যত্যাসাত্ বিপর্যযাত্, এবমত্রোক্তপরিপাট্যা ভজেত্| তত্র প্রবৃদ্ধাগ্নিহেতুবাতপিত্তস্যাবজযার্থমগ্নেঃ সমীকরণার্থং চ পূর্বং স্বাদুতিক্তকৌ, ততো বাতকফাবজযার্থমগ্নেঃ সন্ধুক্ষণার্থং চ ব্যত্যাসাদিতি প্রাগুক্তরসপ্রত্যনীকান্ স্নিগ্ধাম্ললবণকটুকান্| ততশ্চাম্ললবণকটুকজনিতপিত্তবাতাবজযার্থং স্বাদুতিক্তৌ, ততো ভূযঃ কষাযকটুকৌ, ততোঽন্যোন্যপ্রত্যনীকরসানাং স্নিগ্ধরূক্ষযোর্ব্যত্যাসাদুপযোগেন প্রকৃতিগো ভবেত্| বৃদ্ধবাগ্ভটস্ত্বাহ- “দদ্যান্মধুরহৃদ্যানি ততোঽম্ললবণৌ রসৌ| স্বাদুতিক্তৌ ততো ভূযঃ কষাযকটুকৌ ততঃ||অন্যোন্যপ্রত্যনীকানাং রসানাং স্নিগ্ধরূক্ষযোঃ| ব্যত্যাসাদুপযোগেন ক্রমাত্তং প্রকৃতিং নযেত্”||১৯-২০||

Adhikarana 12 (21) · Śloka 21

কেবলং স্নেহপীতো বা বান্তো যশ্চাপি কেবলম্ | স সপ্তরাত্রং মনুজো ভুঞ্জীত লঘু ভোজনম্ ||২১||

পঞ্চকর্মাঙ্গযোরেব স্নেহবমনযোর্যথোক্তান্নসংসর্জননিযমো নান্যত্রেতি দর্শযন্নাহ- কেবলমিত্যাদি| দোষরোগসংশমননিমিত্তং পীতস্নেহঃ কেবলং স্নেহপীতঃ, তথা বান্তশ্চ অজীর্ণভুক্তাদিনিমিত্তং কৃতবমনঃ| লঘুভোজনং মাত্রাদ্রব্যাভ্যাম্| ততোঽন্তরোক্তেনৈব বিধানেন স্বাদ্বাদীনশ্নীযাত্||২১||

Adhikarana 13 (22) · Śloka 22

কৃতঃ সিরাব্যধো যস্য কৃতং যস্য চ শোধনম্ | স না পরিহরেন্মাসং যাবদ্বা বলবান্ ভবেত্ ||২২||

স্নেহপীতস্যেত্যাদ্যেকবাক্যোক্তানাং পঞ্চানাং স্নেহপীতাদীনাং মধ্যে দ্বযোঃ কৃতসিরাব্যধবিরিক্তযোঃ পরিহারকালং গৌরবান্নির্দিশন্নাহ- কৃতঃ সিরাব্যধো যস্যেত্যাদি| যস্য সিরাব্যধঃ কৃতঃ, যস্য চ শোধনং বিরেচনাখ্যং কৃতং, তস্যোভযস্যাপি শোধনানন্তরং সপ্তরাত্রং কৃতসংসর্গস্য সপ্তাহাদূর্ধ্বং পরিপূর্ণাহারত্বেন স্বাদ্বাদিরসানাং ক্রমবিপর্যযাভ্যামুপসেবযা রসস্য শনৈঃ শনৈর্ধাত্বন্তরানুক্রমতো মাসেন শুক্রত্বাচ্ছনৈর্বলাবাপ্তিরুত্পদ্যতে; অত উক্তং- স না পরিহরেন্মাসমিতি| না পুরুষো বক্ষ্যমাণং ক্রোধাদিকং পরিহরেত্| তত্র কস্যচিদত্যন্তক্ষীণাগ্নের্জলসন্তানবদ্রসপ্রসরণেন মাসানন্তরমপি বললাভঃ, কস্যচিদ্দীপ্তাগ্নেঃ শব্দসন্তানবদ্রসপ্রসরণেন মাসাদর্বাগপি বললাভঃ স্যাদত উক্তং- যাবদ্বা বলবান্ ভবেদিতি||২২||

Adhikarana 14 (23) · Śloka 23

ত্র্যহং ত্র্যহং পরিহরেদেকৈকং বস্তিমাতুরঃ | তৃতীযে তু পরীহারে যথাযোগং সমাচরেত্ ||২৩||

চতুর্ষু স্নেহপীতাদিষু পূর্বোক্তোঽন্নসংসর্গকালনিযমঃ, বস্তৌ তু তাদৃশো নিযমো নাস্তি, কথং? দোষব্যাধিবলাপেক্ষযা বস্তেঃ পুনঃ পুনঃ শীলনাত্; তদুক্তং- অষ্টাদশাষ্টদশকানিত্যাদি; অত একৈকং বস্তিমুদ্দিশ্য বিশিষ্টং নিযমং দর্শযন্নাহ- ত্র্যহং ত্র্যহমিত্যাদি| একৈকং বস্তিং সেবিত্বা ত্র্যহং ত্র্যহং বক্ষ্যমাণং পরিহার্যং পরিহরেত্| তৃতীযে তু পরীহার ইত্যাদি| বিশেষেণ পরীহারে কৃতে সত্যনন্তরং চতুর্থপঞ্চমদিবসাদৌ, যথাযোগং যোগানতিক্রমেণ সম্যঙ্নিরূঢানুবাসিতযোগলক্ষণানতিক্রমেণ, সমাচরেদ্যথাসাত্ম্যমুপসেবেতেত্যর্থঃ| অন্যে তু ব্যাখ্যানযন্তি- একৈকং বস্তিমনুবাসনং দত্ত্বা ত্রীণি ত্রীণ্যহানি পরিহরেত্, তৃতীযে তু বস্তৌ গতে তৃতীযাদনুবাসনাদূর্ধ্বং, যথাযোগং যথাবস্থমগ্ন্যাদীনবেক্ষ্য, চতুঃপঞ্চদিবসানন্তরীকৃত্য, অনুবাসনং যোজনীযম্||২৩||

Adhikarana 15 (24) · Śloka 24

তৈলপূর্ণামমৃদ্ভাণ্ডসধর্মাণো ব্রণাতুরাঃ | স্নিগ্ধশুদ্ধাক্ষিরোগার্তা জ্বরাতীসারিণশ্চ যে ||২৪||

শুদ্ধসমানধর্মিণোঽন্যানপি দৃষ্টান্তেনাহ- তৈলপূর্ণামেত্যাদি| যথা তৈলপূর্ণমপক্বমৃদ্ভাজনমযত্নৈন চাল্যমানং বিশীর্যতে, তদ্বদযত্নেনোপচর্যমাণা ব্রণাতুরাদযোঽবস্থান্তরং প্রাপ্যন্তে; তস্মাদেতেঽপি সংশুদ্ধবদুপক্রম্যা ইতি তাত্পর্যার্থঃ||২৪||

Adhikarana 16 (25-37) · Śloka 37

ক্রুধ্যতঃ কুপিতং পিত্তং কুর্যাত্তাংস্তানুপদ্রবান্ | আযাস্যতঃ শোচতো বা চিত্তং বিভ্রমমৃচ্ছতি ||২৫|| মৈথুনোপগমাদ্ধোরান্ ব্যাধীনাপ্নোতি দুর্মতিঃ | আক্ষেপকং পক্ষঘাতমঙ্গপ্রগ্রহমেব চ ||২৬|| গুহ্যপ্রদেশে শ্বযথুং কাসশ্বাসৌ চ দারুণৌ | রুধিরং শুক্রবচ্চাপি সরজস্কং প্রবর্ততে ||২৭|| লভতে চ দিবাস্বপ্নাত্তাংস্তান্ ব্যাধীন্ কফাত্মকান্ | প্লীহোদরং প্রতিশ্যাযং পাণ্ডুতাং শ্বযথুং জ্বরম্ ||২৮|| মোহং সদনমঙ্গানামবিপাকং তথাঽরুচিম্ | তমসা চাভিভূতস্তু স্বপ্নমেবাভিনন্দতি ||২৯|| উচ্চৈঃ সম্ভাষণাদ্বাযুঃ শিরস্যাপাদযেদ্রুজম্ | আন্ধ্যং জাড্যমজিঘ্রত্বং বাধির্যং মূকতাং তথা ||৩০|| হনুমোক্ষমধীমন্থমর্দিতং চ সুদারুণম্ | নেত্রস্তম্ভং নিমেষং বা তৃষ্ণাং কাসং প্রজাগরম্ ||৩১|| লভতে দন্তচালং চ তাংস্তাংশ্চান্যানুপদ্রবান্ | যানযানেন লভতে ছর্দিমূর্চ্ছাভ্রমক্লমান্ ||৩২|| তথৈবাঙ্গগ্রহং ঘোরমিন্দ্রিযাণাং চ বিভ্রমম্ | চিরাসনাত্তথা স্থানাচ্ছ্রোণ্যাং ভবতি বেদনা ||৩৩|| অতিচঙ্ক্রমণাদ্বাযুর্জঙ্ঘযোঃ কুরুতে রুজঃ | সক্থিপ্রশোষং শোফং বা পাদহর্ষমথাপি বা ||৩৪|| শীতসম্ভোগতোযানাং সেবা মারুতবৃদ্ধযে | ততোঽঙ্গমর্দবিষ্টম্ভশূলাধ্মানপ্রবেপকাঃ ||৩৫|| বাতাতপাভ্যাং বৈবর্ণ্যং জ্বরং চাপি সমাপ্নুযাত্ | বিরুদ্ধাধ্যশনান্মৃত্যুং ব্যাধিং বা ঘোরমৃচ্ছতি ||৩৬|| অসাত্ম্যভোজনং হন্যাদ্বলবর্ণমসংশযম্ | অনাত্মবন্তঃ পশুবদ্ভুঞ্জতে যেঽপ্রমাণতঃ | রোগানীকস্য তে মূলমজীর্ণং প্রাপ্নুবন্তি হি ||৩৭||

পূর্বোক্তেষু স্নেহপীতাদিষু পঞ্চসু পরিহার্যাণামপরিহারেণ কিং ভবতীত্যাহ- ক্রুধ্যতঃ কুপিতমিত্যাদি| তাংস্তানুপদ্রবান্ দাহপিপাসাপ্রভৃতীন্| আযাস্যত ইত্যাদি| বিভ্রমং বিবিধং ভ্রমং সম্মোহমদাপস্মারোন্মাদাদিকং মানসং বিকারম্| মৈথুনোপগমাদিত্যাদি| তানেব ঘোরান্ ব্যাধীন্ বিবৃণ্বন্নাহ- আক্ষেপকমিত্যাদি| লভতে চ দিবাস্বপ্নাত্তানিত্যাদি| অজিঘ্রত্বং গন্ধাজ্ঞতা| মূকতাম্ অবাক্ত্বম্| অধিমন্থো দৃষ্টিরোগঃ| যানযানেন লভতে ইত্যাদি| যানযানেনাশ্বাদিগমনেন রথাচ্চ| চিরাসনাদিত্যাদি| অসনং স্থিতিভবনম্| স্থানম্ ঊর্ধ্বীভবনম্| অতিচঙ্ক্রমণাদিত্যাদি চঙ্ক্রমণং পরিভ্রমণম্| ‘শোফং বা’ ইত্যত্র ‘স্বাপং বা’ ইতি পাঠান্তরম্| শীতসম্ভোগতোযানামিত্যাদি| সম্ভোগঃ স্রক্চন্দনাদীনামুপভোগঃ| গযী তু ‘শীতসম্ভোগতোযানাং’ ইত্যত্র ‘শীতভোজনতোযানাং ইতি পঠতি| বাতাতপাভ্যামিত্যাদি| যথাক্রমং বাতাদ্ বৈবর্ণ্যং, আতপপ্রকুপিতাত্ পিত্তাজ্জ্বরঃ| বিরুদ্ধাধ্যশনান্মৃত্যুমিত্যাদি| পযোমত্স্যাদিভোজনং বিরুদ্ধাশনম্, অধ্যশনমজীর্ণে ভোজনং, তাভ্যাং মরণং ভযাবহো রোগো বা| অসাত্ম্যভোজনমিত্যাদি| যে অনাত্মবন্তঃ পুরুষা অপ্রমাণতঃ পশুবদ্ভুঞ্জতে তে অজীর্ণং প্রাপ্নুবন্তি; অজীর্ণং ত্রিবিধম্ আমবিদগ্ধবিষ্টব্ধভেদেন বাতাদিভিঃ, চতুর্থং রসাজীর্ণং পরিগৃহ্যতে| কিংবিশিষ্টং? রোগানীকস্য রোগসমূহস্য মূলম্| ক্রোধাদিষু ব্যাপত্সু আযাসশোকাভ্যামেকৈকা, চিরাসনস্থানাভ্যামপ্যন্যে, শীতসম্ভোগতোযানাং সেবযা পুনরেকৈকা, বাতাতপাভ্যাং দ্বে, তথা বিরুদ্ধাধ্যশনাভ্যাং দ্বে, অন্যাঃ সুবোধাঃ, ইত্যেবং পঞ্চদশ||২৫-৩৭||

Adhikarana 17 (38) · Śloka 38

ব্যাপদাং কারণং বীক্ষ্য ব্যাপত্স্বেতাসু বুদ্ধিমান্ | প্রযতেতাতুরারোগ্যে প্রত্যনীকেন হেতুনা ||৩৮||

তাসু সর্বাসু সঙ্ক্ষেপেণ চিকিত্সিতং নির্দিশন্নাহ- ব্যাপদামিত্যাদি| ব্যাপদাম্ উপদ্রবাণাং, কারণং বিপ্রকৃষ্টং ক্রোধাদিকং, সন্নিকৃষ্টং পিত্তাদিকং, বীক্ষ্য উপলভ্য, প্রত্যনীকেন হেতুনা বিপ্রকৃষ্টকারণপ্রত্যনীকেন উপদ্রবপ্রত্যনীকেন বাতাদিপ্রত্যনীকেন বা| অত এব বুদ্ধিমদ্গ্রহণং, বুদ্ধিমান্ ভিষগাতুরারোগ্যবিষযে প্রযত্নং কুর্বীত||৩৮||

Adhikarana 18 (39) · Śloka 39

বিরিক্তবান্তৈর্হরিণৈণলাবকাঃ শশশ্চ সেব্যঃ সমযূরতিত্তিরীঃ | সষষ্টিকাশ্চৈব পুরাণশালযস্তথৈব মুদ্গা লঘু যচ্চ কীর্তিতম্ ||৩৯||

অসাত্ম্যভোজনং বলবর্ণহরং প্রতিপাদিতং, তত্ কিমত্র সাত্ম্যং যদপেক্ষযাঽন্যদসাত্ম্যমিতি সাত্ম্যমেবাহ- বিরিক্তবান্তৈরিত্যাদি| ইহ নির্দিষ্টাদন্যদনুপদিষ্টমাহ- লঘু যচ্চ কীর্তিতমিতি| বিষ্কিরজাঙ্গলেষু শালিষষ্টিকেষু মুদ্গাদিষু চোক্তাদন্যদপি যচ্চ লঘু প্রোক্তং তচ্চ সেব্যমিত্যর্থঃ| জেজ্জটাচার্যস্ত্বন্যথা ব্যাখ্যানযতি, যথা- বিরিক্তবান্তৈরিত্যাদ্যারম্ভপ্রযোজনং বিরিক্তকথিতবিধিনিযমার্থং বমনানুক্তবিধিপ্রাপণার্থং চ; যতো বিরিক্তস্য প্রমাণাপেক্ষযা যবাগ্বাদিক্রম একশো দ্বিশস্ত্রিশশ্চ বিহিতো ন বান্তস্য||৩৯||

Adhikarana puShpikA · Śloka 39

ইতি সুশ্রুতসংহিতাযাং চিকিত্সাস্থানে আতুরোপদ্রবচিকিত্সিতং নামৈকোনচত্বারিংশোঽধ্যাযঃ ||৩৯||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে একোনচত্বারিংশত্তমোঽধ্যাযঃ||৩৯||