36. nētrabastivyāpaccikitsitam

Adhikarana 1 (1-2) · Śloka 2

অথাতো নেত্রবস্তিব্যাপচ্চিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||

নেত্রানন্তরমাদিশব্দো লুপ্তনির্দিষ্টো দ্রষ্টব্যঃ; তেন প্রণিধানদ্রব্যশয্যাব্যাপদোঽপি গৃহ্যন্তে||১-২||

Adhikarana 2 (3-5) · Śloka 5

অথ নেত্রে বিচলিতে তথা চৈব বিবর্তিতে | গুদে ক্ষতং রুজা বা স্যাত্তত্র সদ্যঃক্ষতক্রিযাঃ ||৩|| অত্যুত্ক্ষিপ্তেঽবসন্নে চ নেত্রে পাযৌ ভবেদ্রুজা | বিধিরত্রাপি পিত্তঘ্নঃ কার্যঃ স্নেহৈশ্চ সেচনম্ ||৪|| তির্যক্প্রণিহিতে নেত্রে তথা পার্শ্বাবপীডিতে | মুখস্যাবরণাদ্বস্তির্ন সম্যক্ প্রতিপদ্যতে | ঋজু নেত্রং বিধেযং স্যাত্তত্র সম্যগ্বিজানতা ||৫||

তত্র সদ্যঃ ক্ষতক্রিযা মধুঘৃতাভ্যঙ্গাদ্যাঃ| অত্যুত্ক্ষিপ্ত ইত্যাদি| অত্র অত্যুত্ক্ষিপ্তেঽবসন্নে চ নেত্রেঽভিঘাতেন বাতপৈত্তিকপাযুবেদনাযাম্| পিত্তঘ্ন ইতি মধুরশীতাদিঃ| স্নেহৈশ্চ সেচনমিতি ঘৃতাদিস্নেহসেচনং, তচ্চানিলাপহম্||৩-৫||

Adhikarana 3 (6-9) · Śloka 10

অতিস্থূলে কর্কশে চ নেত্রেঽস্ত্রিমতি ঘর্ষণাত্ | গুদে ভবেত্ ক্ষতং রুক্ চ সাধনং তস্য পূর্ববত্ ||৬|| আসন্নকর্ণিকে নেত্রে ভিন্নেঽণৌ বাঽপ্যপার্থকঃ | অবসেকো ভবেদ্বস্তেস্তস্মাদ্দোষান্ বিবর্জযেত্ ||৭|| প্রকৃষ্টকর্ণিকে রক্তং গুদমর্মপ্রপীডনাত্ | ক্ষরত্যত্রাপি পিত্তঘ্নো বিধির্বস্তিশ্চ পিচ্ছিলঃ ||৮|| হ্রস্বে ত্বণুস্রোতসি চ ক্লেশো বস্তিশ্চ পূর্ববত্ | প্রত্যাগচ্ছংস্ততঃকুর্যাদ্রোগান্ বস্তিবিঘাতজান্ ||৯|| দীর্ঘে মহাস্রোতসি চ জ্ঞেযমত্যবপীডবত্ |১০|

প্রণিধানদোষানভিধায নেত্রদোষাভিধানমাহ- অতিস্থূল ইত্যাদি| পূর্ববচ্ছব্দেন সদ্যঃক্ষতবত্ক্রিযেত্যর্থঃ| আসন্নকর্ণিকে বস্তিরপার্থকো ব্যর্থঃ| ভিন্নেঽণৌ অণুভিন্নে নেত্রে| অবসেকঃ ক্ষরণম্| প্রকৃষ্টকর্ণিকং ত্র্যঙ্গুলাদূর্ধ্বং চতুরঙ্গুলে সন্নিবিষ্টকর্ণিকম্| তত্রার্শোযন্ত্রেণ পঞ্চাঙ্গুলেনান্তঃপ্রবিষ্টেন স্থূলাগ্রত্বাদ্গুদক্ষণনং ন স্যাত্, বস্তিযন্ত্রেণ পুনস্তীক্ষ্ণাগ্রেণ চতুরঙ্গুলেন সদ্যঃ- প্রাণহরগুদমর্ম সম্পীড্যতে, অতস্তচ্চিকিত্সিতং যুক্তম্| হ্রস্বে যথোচিতপ্রমাণহীনে| অণুস্রোতসি সূক্ষ্মচ্ছিদ্রে | ক্লেশ ইতি অণুস্রোতঃপ্রবাহণোত্পন্নকালাতিক্রমেণ| বস্তিশ্চ পূর্ববদিতি সন্নিকৃষ্টকর্ণিকে যথা অপার্থকো বস্তিস্তদ্বদিতি| হ্রস্বত্বাদ্ধেতোরত্রাপি তথা; অত এব হেতোঃ প্রত্যাগচ্ছন্ ব্যাঘুটন্ বস্তিবিঘাতজান্ রোগান্ মূত্রাঘাতমূত্রকৃচ্ছ্রাদীন্ কুর্যাত্| চিকিত্সিতং চানুক্তমপি রোগাপেক্ষযা মূত্রাঘাতাদিচিকিত্সিতম্| জেজ্জটাচার্যস্তু ঈদৃশং ব্যাখ্যানযতি- পূর্ববদ্বস্তিঃ পিচ্ছাবস্তিরিত্যর্থঃ| দীর্ঘে মহাস্রোতসি চ যন্ত্রেঽত্যবপীডবন্নাসামুখান্নির্গমনং, গলপীডাদিচিকিত্সিতং চ জ্ঞেযম্||৬-৯||-

Adhikarana 4 (10-11) · Śloka 11

প্রস্তীর্ণে বহলে চাপি বস্তৌ দুর্বদ্ধদোষবত্ ||১০|| বস্তাবল্পেঽল্পতা বাঽপি দ্রব্যস্যাল্পা গুণা মতাঃ | দুর্বদ্ধে চাণুভিন্নে চ বিজ্ঞেযং ভিন্ননেত্রবত্ ||১১||

নেত্রদোষং তত্সাধনং চাভিধায বস্তিদোষং তচ্চিকিত্সিতং চাভিধাতুমাহ- প্রস্তীর্ণে ইত্যাদি| অল্পে যথোচিতপ্রমাণহীনে| বস্তেরল্পতযা চ দ্রব্যস্যাপ্যল্পতা, অত এব অল্পা গুণাঃ| ভিন্ননেত্রবদিতি ভিন্ননেত্রেণ তুল্যং, যথা ভিন্নে নেত্রে বস্তেরবসেকঃ, তদ্বদ্দুর্বদ্ধে ভিন্নে চ বস্তাবিত্যর্থঃ||১০-১১||

Adhikarana 5 (12-16) · Śloka 16

অতিপ্রপীডিতো বস্তিঃ প্রযাত্যামাশযং ততঃ | বাতেরিতো নাসিকাভ্যাং মুখতো বা প্রপদ্যতে ||১২|| তত্র তূর্ণং গলাপীডং কুর্যাচ্চাপ্যবধূননম্ | শিরঃকাযবিরেকৌ চ তীক্ষ্ণৌ সেকাংশ্চ শীতলান্ ||১৩|| শনৈঃ প্রপীডিতো বস্তিঃ পক্বাধানং ন গচ্ছতি | ন চ সম্পাদযত্যর্থং তস্মাদ্যুক্তং প্রপীডযেত্ ||১৪|| ভূযো ভূযোঽবপীডেন বাযুরন্তঃ প্রপীড্যতে | তেনাধ্মানং রুজশ্চোগ্রা যথাস্বং তত্র বস্তযঃ ||১৫|| কালাতিক্রমণাত্ ক্লেশো ব্যাধিশ্চাভিপ্রবর্ধতে | তত্র ব্যাধিবলঘ্নং তু ভূযো বস্তিং নিধাপযেত্ ||১৬||

বস্তিদোষানভিধায পীডনদোষানভিধাতুমাহ- অতিপ্রপীডিত ইত্যাদি| প্রপদ্যতে নির্গচ্ছতীত্যর্থঃ| অবধূননং কেশাদিষূত্ক্ষিপ্য চালনম্| সেকাংশ্চ শীতলান্ ক্ষীরেক্ষুরসযষ্টিমধুককষাযধান্যাম্লচুক্রাদিশীতদ্রব্যপরিষেকান্| শনৈঃ প্রপীডিতো মন্দপীডিতঃ| অর্থং ন সম্পাদযতি কার্যং ন করোতি| অন্তঃ ‘উদরস্য’ ইতি শেষঃ| তেনেতি উদরান্তর্গতেন বাযুনা| তত্রাধ্মানং রুজশ্চ| যথাস্বং বস্তয ইতি যে যস্যাত্মীযা বস্তযঃ প্রতীকারহেতুত্বেন| কালাতিক্রমণাদিত্যাদি| ব্যাধিশ্চাভিপ্রবর্ধতে ইতি চিরকালনেত্রাবস্থানহেতুকগুদমার্গাবরোধত্বেন প্রবৃত্ত্যভিমুখীভূতবাতবিঘাতেনানুলোমসাধ্যো ব্যাধিঃ প্রবর্ধত ইত্যর্থঃ||১২-১৬||

Adhikarana 6 (17-22) · Śloka 22

গুদোপদেহশোফৌ তু স্নেহোঽপক্বঃ করোতি হি | তত্র সংশোধনো বস্তির্হিতং চাপি বিরেচনম্ ||১৭|| হীনমাত্রাবুভৌ বস্তী নাতিকার্যকরৌ মতৌ | অতিমাত্রৌ তথাঽঽনাহক্লমাতীসারকারকৌ ||১৮|| মূর্চ্ছাং দাহমতীসারং পিত্তং চাত্যুষ্ণতীক্ষ্ণকৌ | মৃদুশীতাবুভৌ বাতবিবন্ধাধ্মানকারকৌ ||১৯|| তত্র হীনাদিষু হিতঃ প্রত্যনীকঃ ক্রিযাবিধিঃ | গুদবস্ত্যুপদেহং তু কুর্যাত্ সান্দ্রো নিরূহণঃ ||২০|| প্রবাহিকাং বা জনযেত্তনুরল্পগুণাবহঃ | তত্র সান্দ্রে তনুং বস্তিং তনৌ সান্দ্রং চ দাপযেত্ ||২১|| স্নিগ্ধোঽতিজাড্যকৃদ্রূক্ষঃ স্তম্ভাধ্মানকৃদুচ্যতে | বস্তিং রূক্ষমতিস্নিগ্ধে স্নিগ্ধং রূক্ষে চ দাপযেত্ ||২২||

পীডনদোষানভিধায দ্রব্যদোষান্নির্দিশন্নাহ- গুদোপদেহ ইত্যাদি| উপদেহ উপলেপঃ| ‘হিতং চাপি বিরেচনম্’ ইত্যত্র ‘রূক্ষং চাপি বিরেচনম্’ ইতি গযদাসঃ| হীনমাত্রাবিত্যাদি| উভৌ বস্তী স্নেহবস্তিনিরূহবস্তী| প্রত্যনীক ইতি হীনমাত্রেঽধিকমাত্রোঽতিমাত্রে হীনমাত্রঃ, তীক্ষ্ণে মৃদুঃ, মৃদৌ তীক্ষ্ণঃ, উষ্ণে শীতঃ, শীতে পুনরুষ্ণঃ| অতিজাড্যকৃত্ অতিশযেন ক্লেদকারী ||১৭-২২||

Adhikarana 7 (23-29) · Śloka 30

অতিপীডিতবদ্দোষান্ বিদ্ধি চাপ্যবশীর্ষকে | উচ্ছীর্ষকে সমুন্নাহং বস্তিঃ কুর্যাচ্চ মেহনম্ ||২৩|| তত্রোত্তরো হিতো বস্তিঃ সুস্বিন্নস্য সুখাবহঃ | ন্যুব্জস্য বস্তির্নাপ্নোতি পক্বাধানং বিমার্গগঃ ||২৪|| হৃদ্গুদং বাধতে চাত্র বাযুঃ কোষ্ঠমথাপি চ | উত্তানস্যাবৃতে মার্গে বস্তির্নান্তঃ প্রপদ্যতে ||২৫|| নেত্রসংবেজনভ্রান্তো বাযুশ্চান্তঃ প্রকুপ্যতি | দেহে সঙ্কুচিতে দত্তঃ সক্থ্নোরপ্যুভযোস্তথা ||২৬|| ন সম্যগনিলাবিষ্টো বস্তিঃ প্রত্যেতি দেহিনঃ | স্থিতস্য বস্তির্দত্তস্তু ক্ষিপ্রমাযাত্যবাঙ্মুখঃ ||২৭|| ন চাশযং তর্পযতি তস্মান্নার্থকরো হি সঃ | নাপ্নোতি বস্তির্দত্তস্তু কৃত্স্নং পক্বাশযং পুনঃ ||২৮|| দক্ষিণাশ্রিতপার্শ্বস্য বামপার্শ্বানুগো যতঃ | ন্যুব্জাদীনাং প্রদানং চ বস্তের্নৈব প্রশস্যতে ||২৯|| পশ্চাদনিলকোপোঽত্র যথাস্বং তত্র কারযেত্ |৩০|

দ্রব্যদোষানভিধায শয্যাদিদোষানভিধাতুমাহ- অতিপীডিতবদিত্যাদি| বিদ্ধি জানীহি| অতিপ্রপীডিতো বস্তিঃ প্রযাত্যামাশযমিত্যাদিবদিত্যর্থঃ | উচ্ছীর্ষকে উচ্ছ্রিতশিরস্কে পুরুষে বস্তির্দত্তঃ মেহনং মেঢ্রং সমুন্নাহং সম্যগুন্নাহো যত্র তত্তাদৃশমাধ্মাতং কুর্যাদিত্যর্থঃ| তস্যামাপদি সুন্নিগ্ধস্য পুরুষস্যোত্তরো বস্তিঃ হিতঃ সুখাবহ ইতি গযী| জেজ্জটাচার্যস্তু “উচ্ছীর্ষকে সমুন্নাহং কুর্যাত্ সস্নেহমেহনম্| তত্রোত্তরো হিতো বস্তিঃ সুস্নিগ্ধশ্চ সুখাবহঃ”- ইতি পঠিত্বা ব্যাখ্যানযতি- সস্নেহমেহনং স্নেহসংসৃষ্টমূত্রপ্রবর্তনং; তত্র প্রতীকার উত্তরো বস্তিরিতি সুস্নিগ্ধস্য শোধনো নিরূহ ইতি, ন পুনরুত্তরবস্তিরিতি| বৃদ্ধসুশ্রুতে চাযং পাঠোঽন্যথা; তথা চ- “উচ্ছীর্ষকে সমুন্নাহো বস্তেঃ কৃচ্ছ্রাচ্চ মেহনম্”- ইতি| ন্যুব্জস্য পুরুষস্য বিমার্গগো বস্তিঃ পক্বাধানং পক্বাশযং নাপ্নোতি| হৃদ্গুদং বাধতে বাযুঃ কোষ্ঠং চ বাধতে ইত্যর্থঃ| উত্তানস্যেত্যাদি| নেত্রসংবেজনং নেত্রকম্পনং, তেন ভ্রান্তো বাযুরিত্যর্থঃ| সক্থ্নোরূর্বোর্ন প্রত্যেতি ন প্রত্যাগচ্ছতি ন নিষ্কাসযতীত্যর্থঃ| অবাঙ্মুখঃ অধোমুখঃ| দক্ষিণাশ্রিতপার্শ্বস্য পুরুষস্য বস্তির্দত্তঃ সন্ কৃত্স্নং পক্বাশযং ন প্রাপ্নোতি| কুত ইত্যাহ- যতঃ পক্বাশযো বামপার্শ্বানুগো বামপার্শ্বমনুগচ্ছতি| উপসংহারব্যাজেন নিদানবর্জনং চিকিত্সিতমাহ- ন্যুব্জাদীনামিত্যাদি| অত্রৈব দোষসাধনং নির্দিশন্নাহ- পশ্চাদনিলকোপ ইত্যাদি| হৃদযপৃষ্ঠগুদাদিবাধাসু তত্তদ্ব্যাধ্যুপরমেণ ভেষজেনৈব সাধিতেন বস্তিনা সাধ্য ইত্যর্থঃ||২৩-২৯||-

Adhikarana 8 (30) · Śloka 30

ব্যাপদঃ স্নেহবস্তেস্তু বক্ষ্যন্তে তচ্চিকিত্সিতে ||৩০||

এবং প্রণিধাননেত্রদ্রব্যপীডনশয্যাদোষজা বৈদ্যনিমিত্তা এব ব্যাপদশ্চতুশ্চত্বারিংশতমভিধায বৈদ্যাতুরনিমিত্তাঃ স্নেহবস্তিভবা বক্তুকামঃ প্রাহ- ব্যাপদঃ স্নেহবস্তেরিত্যাদি||৩০||

Adhikarana 9 (31-50) · Śloka 50

অযোগাদ্যাস্তু বক্ষ্যামি ব্যাপদঃ সচিকিত্সিতাঃ | অনুষ্ণোঽল্পৌষধো হীনো বস্তির্নৈতি প্রযোজিতঃ ||৩১|| বিষ্টম্ভাধ্মানশূলৈশ্চ তমযোগং প্রচক্ষতে | তত্র তীক্ষ্ণো হিতো বস্তিস্তীক্ষ্ণং চাপি বিরেচনম্ ||৩২|| সশেষান্নেঽথবা ভুক্তে বহুদোষে চ যোজিতঃ | অত্যাশিতস্যাতিবহুর্বস্তির্মন্দোষ্ণ এব চ ||৩৩|| অনুষ্ণলবণস্নেহো হ্যতিমাত্রোঽথবা পুনঃ | তথা বহুপুরীষং চ ক্ষিপ্রমাধ্মাপযেন্নরম্ ||৩৪|| হৃত্কটীপার্শ্বপৃষ্ঠেষু শূলং তত্রাতিদারুণম্ | তত্র তীক্ষ্ণতরো বস্তির্হিতং চাপ্যনুবাসনম্ ||৩৫|| অতিতীক্ষ্ণোতিলবণো রূক্ষো বস্তিঃ প্রযোজিতঃ | সপিত্তং কোপযেদ্বাযুং কুর্যাচ্চ পরিকর্তিকাম্ ||৩৬|| নাভিবস্তিগুদং তত্র ছিনত্তীবাতিদেহিনঃ | পিচ্ছাবস্তির্হিতস্তস্য স্নেহশ্চ মধুরৈঃ শৃতঃ ||৩৭|| অত্যম্ললবণস্তীক্ষ্ণঃ পরিস্রাবায কল্পতে | দৌর্বল্যমঙ্গসাদশ্চ জাযতে তত্র দেহিনঃ ||৩৮|| পরিস্রবেত্ততঃ পিত্তং দাহং সঞ্জনযেদ্গুদে | পিচ্ছাবস্তির্হিতস্তত্র বস্তিঃ ক্ষীরঘৃতেন চ ||৩৯|| প্রবাহিকা ভবেত্তীক্ষ্ণান্নিরূহাত্ সানুবাসনাত্ | সদাহশূলং কৃচ্ছ্রেণ কফাসৃগুপবেশ্যতে ||৪০|| পিচ্ছাবস্তির্হিতস্তত্র পযসা চৈব ভোজনম্ | সর্পির্মধুরকৈঃ সিদ্ধং তৈলং চাপ্যনুবাসনম্ ||৪১|| অতিতীক্ষ্ণো নিরূহো বা সবাতে চানুবাসনঃ | হৃদযস্যোপসরণং কুরুতে চাঙ্গপীডনম্ ||৪২|| দোষৈস্তত্র রুজস্তাস্তা মদো মূর্চ্ছাঽঙ্গগৌরবম্ | সর্বদোষহরং বস্তিং শোধনং তত্র দাপযেত্ ||৪৩|| রূক্ষস্য বহুবাতস্য তথা দুঃশাযিতস্য চ | বস্তিরঙ্গগ্রহং কুর্যাদ্রূক্ষো মৃদ্বল্পভেষজঃ ||৪৪|| তত্রাঙ্গসাদঃ প্রস্তম্ভো জৃম্ভোদ্বেষ্টনবেপকাঃ | পর্বভেদশ্চ তত্রেষ্টাঃ স্বেদাভ্যঞ্জনবস্তযঃ ||৪৫|| অত্যুষ্ণতীক্ষ্ণোঽতিবহুর্দত্তোঽতিস্বেদিতস্য চ | অল্পদোষস্য বা বস্তিরতিযোগায কল্পতে ||৪৬|| বিরেচনাতিযোগেন সমানং তস্য লক্ষণম্ | পিচ্ছাবস্তিপ্রযোগশ্চ তত্র শীতঃ সুখাবহঃ ||৪৭|| অতিযোগাত্ পরং যত্র জীবাদানং বিরিক্তবত্ | দেযস্তত্র হিতশ্চাপ্সু পিচ্ছাবস্তিঃ সশোণিতঃ ||৪৮|| নবৈতা ব্যাপদো যাস্তু নিরূহং প্রত্যুদাহৃতাঃ | স্নেহবস্তিষ্বপি হি তা বিজ্ঞেযাঃ কুশলৈরিহ ||৪৯|| ইত্যুক্তা ব্যাপদঃ সর্বাঃ সলক্ষণচিকিত্সিতাঃ | ভিষজা চ তথা কার্যং যথৈতা ন ভবন্তি হি ||৫০||

অযোগাদিব্যাপদঃ সচিকিত্সিতা আহ- অযোগেত্যাদি| অল্পৌষধ ইতি অল্পানি ঔষধানি যত্র, এতেনাল্পৌষধত্বাদতৈক্ষ্ণ্যেন হীনবীর্যত্বমুক্তং, হীন ইতি সমুদাযস্যাল্পমাত্রত্বেন| নৈতি নাগচ্ছতি, বস্তিঃ বিষ্টম্ভাদিভিরুপলক্ষিতঃ| তীক্ষ্ণো হিতো বস্তিরিত্যুপলক্ষণং, তেন পূর্বোক্তগুণত্রযবিপরীত উষ্ণো বহুলভেষজো যথোচিতপ্রমাণো হিতঃ পূজিত ইত্যর্থঃ| সশেষান্নে ইত্যাদি| সশেষান্নে অন্নাজীর্ণশেষে, ভুক্তে চ নিরূহবস্তিঃ, তথা বহুদোষেঽনুষ্ণলবণস্নেহো নিরূহবস্তির্যোজিতো নরমাধ্মাপযেত্; নত্বনুবাসনঃ, তস্য সান্ন এব হিতত্বাত্| অত্যশিতস্য স্নেহবস্তিস্তথা মাত্রাশিতস্যাতিবহুর্মন্দোষ্ণতাযুক্তঃ স্নেহবস্তিরাধ্মানং জনযেত্ | পরিস্রাবায কল্পতে ইতি পরিস্রাবোঽযং কেবলপিত্তজো ন তু বমনবিরেচনপরিস্রাববত্ কফপিত্তসম্ভবঃ| তত্র পিত্তরক্তভূযিষ্ঠাযাং সর্পিষা, বাতরক্তভূযিষ্ঠাযাং তৈলেনানুবাসনম্| ক্ষীরেণ ভোজনং বাতপিত্তকফপ্রত্যনীকং; কফসংসর্গে তু কফহরদ্রব্যসংস্কৃতক্ষীরভোজনমিতি জ্ঞেযং, তন্ত্রান্তরদর্শনাত্| রুজস্তাস্তাঃ তোদাদযঃ, ওষচোষাদযঃ, কণ্ড্বাদযশ্চ| সর্বদোষহরমিতি সর্বদোষহরদ্রব্যক্বাথং, গোমূত্রত্রিবৃদাদিকল্কং শোধনং বস্তিং; শোধনত্বেনোর্ধ্বগতদোষমধো নযতি, সর্বদোষহরত্বেন সর্বানেব দোষান্ দুষ্টাঞ্ছমযতি| রূক্ষোঽত্র বাতপ্রকৃতিঃ| শীতঃ শীতোপচারশ্চ সুখাবহ ইত্যর্থঃ| বিরিক্তশব্দেনাত্র বিরেকাতিযোগোত্পন্নং জীবাদানম্; অতো বিরেকাতিযোগোত্পন্নজীবাদানবল্লিঙ্গচিকিত্সিতাভ্যামেতদ্বস্ত্যতিযোগোত্পন্নং জীবাদানং জ্ঞেযম্| তত্র বিশেষচিকিত্সিতমাহ- দেয ইত্যাদি| সশোণিত ইতি হেতুগর্ভং বিশেষণং, যতঃ পিচ্ছাবস্তিঃ সশোণিতোঽতঃ শোণিতাপগমরূপজীবাদানে দেয ইত্যর্থঃ||৩১-৫০||

Adhikarana 10 (51) · Śloka 51

পক্ষাদ্বিরেকো বান্তস্য ততশ্চাপি নিরূহণম্ | সদ্যো নিরূঢোঽনুবাস্যঃ সপ্তরাত্রাদ্বিরেচিতঃ ||৫১||

ইদানীং পঞ্চানাং কর্মণাং ক্রমেণ ক্রিযমাণানাং যতো যতো যদ্যদ্যাবতা কালেন করণীযং তত্তদুপদিশন্নাহ- পক্ষাদিত্যাদি| সম্যগ্যোগেন বান্তস্য পুরুষস্য বিরেচনং পক্ষান্নার্বাঙ্নাপি পরতঃ; তত্রার্বাক্ ক্রিযমাণং পুরুষানলবলযোরবলত্বাদ্ ব্যাপদমাবহতি, অতিপরতঃ পুনঃ স্নেহস্বেদাদিগুণোঽন্তরিতঃ স্যাত্; তস্মাত্ পক্ষাদেব বান্তো বিরেচনীযঃ| তত্র প্রধানশুদ্ধিমপেক্ষ্যান্নসংসর্গেণ দিনানি ষডতিক্রম্য মধুরাদিরসসংসর্গমাচরেত্| স্নেহপানেনাপি দিনানি ষডতিক্রমেত্| ততঃ স্বেদং সমাচরন্ লঘূষ্ণং ভুজ্যমানস্ত্র্যহং স্থিতশ্চতুর্থেঽহনি বিরেকং কুর্যাত্| ততস্তস্মাদ্বিরেকাদন্নসংসর্গেণ দিনানি ষডতিক্রম্যানন্তরং মধুরাদিরসসংসর্গং সমাচরন্ সপ্তরাত্রাদ্বিরেচিত ইতি বাক্যাদষ্টমাদিদিবসেষ্বনুবাসনানি যথাদোষং বিদধ্যাত্| ততঃ ষোডশেঽহ্নি স্নেহাভ্যক্তঃ স্বেদিতশ্চাস্থাপনং সেবেত| গযদাসস্তু চরকাচাযাভিপ্রাযেণ বিরেচনাদূর্ধ্বং ষডহং কৃতান্নসংসর্গস্যাবস্থাবিশেষেণ স্নেহপানমনুবাসনং চ দ্বযমপি মন্যতে| তথা চ চরকাচার্যবচনম্- “সংসৃষ্টভক্তং নবমেঽহ্নি সর্পিস্তং পাযযেতাপ্যনুবাসযেদ্বা”- (চ.সি.অ.১) ইতি| তত্র বিরেচনাদূর্ধ্বমন্নসংসর্গেণ দিনানি ষট্, ততো মধুরাদিরসসংসর্গমাচরেত্, স্নেহপানেনাপি দিনানি ষডতিক্রামেন্, ততো দিনত্রযং লঘূষ্ণং ভুঞ্জানশ্চতুর্থেঽহনি স্নেহাভ্যক্তঃ স্বেদিতশ্চাস্থাপনং সেবেত| স্নেহপানপূর্বকস্যানুবাসনপূর্বকস্য চাস্থাপনস্যাবস্থা গযদাসেন দর্শিতা; যথা- হীনবিরিক্তস্যাবশিষ্টপরিপক্বামসঞ্চযাবৃত বাযৌ স্নেহপানপূর্বকমাস্থাপনং ক্বচিদ্ব্যাধ্যবস্থাবশাত্ প্রাক্ স্নেহনবিরেচিতস্যাস্থাপনমিতি| নিরূঢঃ পুরুষঃ সদ্য এব তদ্দিবসে এবানুবাস্যঃ| এতেন দত্তনিরূহো যথোক্তং ভোজযিত্বাঽঽর্দ্রপাণিরেবানুবাস্যঃ| বিরেচিতস্তু সপ্তরাত্রাত্ পরতোঽনুবাস্যো নার্বাক্| উক্তং হি- “বিরেচনাত্ সপ্তরাত্রে গতে জাতবলায বৈ| কৃতান্নাযানুবাস্যায সম্যগ্দেযোঽনুবাসনঃ” (চি.অ.৩৭) ইতি| কেচিদন্যাদৃশং ব্যাখ্যানং কুর্বন্তি; তচ্চ গযদাসাচাযণ বহুধা দূষিতত্বাদস্মাভিরপ্যুপেক্ষিতম্||৫১||

Adhikarana puShpikA · Śloka 36

ইতি সুশ্রুতসংহিতাযাং চিকিত্সাস্থানে নেত্রবস্তিব্যাপচ্চিকিত্সিতং নাম ষট্ত্রিংশোঽধ্যাযঃ ||৩৬||

ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানে ষট্ত্রিংশত্তমোঽধ্যাযঃ||৩৬||