Adhikarana 1 (1-2) · Śloka 2
অথাতো নিরূহক্রমচিকিত্সিতং ব্যাখ্যাস্যামঃ ||১|| যথোবাচ ভগবান্ ধন্বন্তরিঃ ||২||
अथातो निरूहक्रमचिकित्सितं व्याख्यास्यामः ||१|| यथोवाच भगवान् धन्वन्तरिः ||२||
🔊 Audio coming soon
নিরূহস্য ক্রমো নিরূহক্রমঃ অনুক্রমবিধানং , স এব চিকিত্সিতং ব্যাধিপ্রতীকারঃ| নিরূহোপক্রমচিকিত্সিতমিতি কেচিত্ পঠন্তি, তন্মতেঽপি নিরূহোপক্রমো নিরূহারম্ভঃ, স এব চিকিত্সিতমিতি ব্যাখ্যানম্||১-২||
Adhikarana 2 (3-6) · Śloka 6
অথানুবাসিতমাস্থাপযেত্; স্বভ্যক্তস্বিন্নশরীরমুত্সৃষ্টবহির্বেগমবাতে শুচৌ বেশ্মনি মধ্যাহ্নে প্রততাযাং শয্যাযামধঃসুপরিগ্রহাযাং শ্রোণিপ্রদেশপ্রতিব্যূঢাযামনুপধানাযাং বামপার্শ্বশাযিনমাকুঞ্চিতদক্ষিণসক্থিমিতরপ্রসারিতসক্থিং সুমনসং জীর্ণান্নং বাগ্যতং সুনিষণ্ণদেহং বিদিত্বা, ততো বামপাদস্যোপরি নেত্রং কৃত্বেতরপাদাঙ্গুষ্ঠাঙ্গুলিভ্যাং কর্ণিকামুপরি নিষ্পীড্য, সব্যপাণিকনিষ্ঠিকানামিকাভ্যাং বস্তের্মুখার্ধং সঙ্কোচ্য, মধ্যমাপ্রদেশিন্যঙ্গুষ্ঠৈরর্ধং তু বিবৃতাস্যং কৃত্বা, বস্তাবৌষধং প্রক্ষিপ্য, দক্ষিণহস্তাঙ্গুষ্ঠেন প্রদেশিনীমধ্যমাভ্যাং চানুসিক্তমনাযতমবুদ্বুদমসঙ্কুচিতমবাতমৌষধাসন্নমুপসঙ্গৃহ্য , পুনরুপরি তদিতরেণ গৃহীত্বা দক্ষিণেনাবসিঞ্চেত্, ততঃ সূত্রেণৈবৌষধান্তে দ্বিস্ত্রির্বাঽঽবেষ্ট্য বধ্নীযাত্, অথ দক্ষিণেনোত্তানেন পাণিনা বস্তিং গৃহীত্বা বামহস্তমধ্যমাঙ্গুলিপ্রদেশিনীভ্যাং নেত্রমুপসঙ্গৃহ্যাঙ্গুষ্ঠেন নেত্রদ্বারং পিধায, ঘৃতাভ্যক্তাগ্রনেত্রং ঘৃতাক্তমুপাদায প্রযচ্ছেদনুপৃষ্ঠবংশং সমমুন্মুখমাকর্ণিকং নেত্রং প্রণিধত্স্বেতি ব্রূযাত্ ||৩|| বস্তিং সব্যে করে কৃত্বা দক্ষিণেনাবপীডযেত্ | একেনৈবাবপীডেন ন দ্রুতং ন বিলম্বিতম্ ||৪|| ততো নেত্রমপনীয ত্রিংশন্মাত্রাঃ পীডনকালাদুপেক্ষ্যোত্তিষ্ঠেত্যাতুরং ব্রূযাত্ | অথাতুরমুপবেশযেদুত্কুটুকং বস্ত্যাগমনার্থম্ | নিরূহপ্রত্যাগমনকালস্তু মুহূর্তো ভবতি ||৫|| অনেন বিধিনা বস্তিং দদ্যাদ্বস্তিবিশারদঃ | দ্বিতীযং বা তৃতীযং বা চতুর্থং বা যথার্থতঃ ||৬||
अथानुवासितमास्थापयेत्; स्वभ्यक्तस्विन्नशरीरमुत्सृष्टबहिर्वेगमवाते शुचौ वेश्मनि मध्याह्ने प्रततायां शय्यायामधःसुपरिग्रहायां श्रोणिप्रदेशप्रतिव्यूढायामनुपधानायां वामपार्श्वशायिनमाकुञ्चितदक्षिणसक्थिमितरप्रसारितसक्थिं सुमनसं जीर्णान्नं वाग्यतं सुनिषण्णदेहं विदित्वा, ततो वामपादस्योपरि नेत्रं कृत्वेतरपादाङ्गुष्ठाङ्गुलिभ्यां कर्णिकामुपरि निष्पीड्य, सव्यपाणिकनिष्ठिकानामिकाभ्यां बस्तेर्मुखार्धं सङ्कोच्य, मध्यमाप्रदेशिन्यङ्गुष्ठैरर्धं तु विवृतास्यं कृत्वा, बस्तावौषधं प्रक्षिप्य, दक्षिणहस्ताङ्गुष्ठेन प्रदेशिनीमध्यमाभ्यां चानुसिक्तमनायतमबुद्बुदमसङ्कुचितमवातमौषधासन्नमुपसङ्गृह्य , पुनरुपरि तदितरेण गृहीत्वा दक्षिणेनावसिञ्चेत्, ततः सूत्रेणैवौषधान्ते द्विस्त्रिर्वाऽऽवेष्ट्य बध्नीयात्, अथ दक्षिणेनोत्तानेन पाणिना बस्तिं गृहीत्वा वामहस्तमध्यमाङ्गुलिप्रदेशिनीभ्यां नेत्रमुपसङ्गृह्याङ्गुष्ठेन नेत्रद्वारं पिधाय, घृताभ्यक्ताग्रनेत्रं घृताक्तमुपादाय प्रयच्छेदनुपृष्ठवंशं सममुन्मुखमाकर्णिकं नेत्रं प्रणिधत्स्वेति ब्रूयात् ||३|| बस्तिं सव्ये करे कृत्वा दक्षिणेनावपीडयेत् | एकेनैवावपीडेन न द्रुतं न विलम्बितम् ||४|| ततो नेत्रमपनीय त्रिंशन्मात्राः पीडनकालादुपेक्ष्योत्तिष्ठेत्यातुरं ब्रूयात् | अथातुरमुपवेशयेदुत्कुटुकं बस्त्यागमनार्थम् | निरूहप्रत्यागमनकालस्तु मुहूर्तो भवति ||५|| अनेन विधिना बस्तिं दद्याद्बस्तिविशारदः | द्वितीयं वा तृतीयं वा चतुर्थं वा यथार्थतः ||६||
🔊 Audio coming soon
অনুক্রমপ্রণযনসম্বন্ধং দর্শযন্নাহ- অথানুবাসিতমিত্যাদি| অনুবাসিতং দত্তানুবাসনং স্নিগ্ধস্রোতোমার্গতযা সুখমেব দোষনির্হরণার্থমাস্থাপযেত্| নিরূহস্য প্রণিধানবিধানমাহ- স্বভ্যক্তমিত্যাদি| উত্সৃষ্টবহির্বেগং ত্যক্তবিণ্মূত্রাদিকম্| প্রততাযাং শয্যাযাং স্তব্ধাযাং, বিস্তীর্ণাযামিতি কেচিত্| অধঃসুপরিগৃহীতাযাং পাদতলযোঃ শোভনপ্রতিবাহকাযাম্| শ্রোণিপ্রদেশব্যূঢাযাং কটিপ্রদেশবিশালাযাং, ব্যূঢাযাং শোভনোন্নতাযামিতি কেচিদ্ ব্যাখ্যানযন্তি| অনুপধানাযাম্ অনুপশীর্ষকাযাম্ | সুনিষণ্ণদেহং শোভনং বিশ্রান্তশরীরম্| সব্যপাণিঃ বামকরঃ| ঔষধং প্রক্ষিপ্য উপসঙ্গ্রহণেন ক্রিযাবিশেষেণ| অনুত্সিক্তমূর্ধ্বক্ষরণরহিতং যথা ভবতি তথা সিক্তম্| অনাযতম্ অনতিদীর্ঘং (অচিরাত্ প্রবৃত্তম্)| অবুদ্বুদং বুদ্বুদরহিতম| অসঙ্কুচিতং বস্তুসঞ্চরণক্ষমম্| অবাতম্ ঔষধদানেন নিস্সারিতবাতম্| এবং দক্ষিণহস্তাঙ্গুষ্ঠেন প্রদেশিনীমধ্যমাভ্যাং চৌষধান্তমুপসঙ্গৃহ্য পুনর্দক্ষিণহস্তোপগৃহীতোপরি তদিতরেণ বামকরেণ গৃহীত্বা, দক্ষিণকরেণৈবৌষধান্তে সূত্রেণ দ্বিস্ত্রির্বাঽঽবেষ্ট্য বধ্নীযাত্| আকর্ণিকং কর্ণিকাং মর্যাদীকৃত্য| নেত্রং প্রণিধত্স্ব প্রবেশযেতি আতুরং প্রতি ভিষগ্ ব্রূযাদিতি সম্বন্ধঃ| নেত্রপ্রণিধানমভিধায বস্তিপীডনবিধিমাহ- বস্তিমিত্যাদি| ত্রিংশন্মাত্রা ইতি মাত্রামানং হি অগ্নিবেশেন ব্যাখ্যাতম্- “যাবত্পর্যেতি হস্তাগ্রং দক্ষিণং জানুমণ্ডলম্| নিমেষোন্মেষকালো বা সা মাত্রা পরিকীর্তিতা”- ইতি| পরাশরস্তু বস্তিকর্মণি মাত্রাসঙ্খ্যামাহ- “জানুমণ্ডলমাবেষ্ট্য দত্তে দক্ষিণপাণিনা| কৃষ্টনেত্রশ্ছটাশব্দশতং তিষ্ঠেদবেগবান্”- ইতি| তত্র পরাশরেণ ক্রূরকোষ্ঠপুরুষমঙ্গীকৃত্য মাত্রাশতমভিহিতং, শেষযোর্মধ্যমৃদুকোষ্ঠযোঃ সপ্ততিস্ত্রিংশদিত্যনুক্তমপ্যূহনীযং স্যাদিত্যেকে মন্যন্তে; যতঃ সুশ্রুতাচার্যেণাপি মৃদুকোষ্ঠপুরুষাপেক্ষযা প্রোক্তস্ত্রিংশন্মাত্রাপীডনকালঃ; অথবা ত্রিংশন্মাত্রানন্তরং বৈদ্যেনোত্তিষ্ঠেত্যুক্তে সতি আতুরস্যোত্থানোপবেশনোত্কুটুকভবনাদিকালবিলম্বেনৈব মাত্রাশতং পূর্ণং স্যাদিতি শাস্ত্রযোরবিরোধঃ| মুহূর্তঃ ঘটিকাদ্বযম্| মুহূর্তাদপ্রবর্তমানং শোধননিরূহৈরেব ব্যক্তক্ষারাম্ললবণৈর্হরেত্ | একত্র বিহিতং প্রণিধানং সঙ্ক্ষেপার্থমন্যত্রাপি নির্দিশন্নাহ- অনেনৈবেত্যাদি| চতুর্থং বা যথার্থত ইতি অর্থস্য প্রযোজনস্যানতিক্রমতো যথার্থতঃ| এতদুক্তং ভবতি- যদা সুনিরূঢলিঙ্গপ্রাপ্তো ভবতি তদা তত্র নির্হরণীযাভাবান্নিরূহণমপ্রযোজনমিতি ন দেযম্, অসম্যগ্দানেন ক্রূরকোষ্ঠতযা প্রভূতদেযত্বেন বা সুনিরূঢমপ্রাপ্তস্য নির্হরণীযো দোষোঽস্তীতি প্রযোজনমপেক্ষ্য চতুর্থমপি নিরূহং সুনিরূঢলিঙ্গার্থং প্রযোজযেত্| ‘চতুর্থং বা যথার্হতঃ’ ইতি পাঠে নিরূহসাধ্যপ্রযোজনানুরোধাচ্চতুর্থমপি পুটকং প্রযোজযেদিত্যর্থঃ||৩-৬||
Adhikarana 3 (7) · Śloka 7
সম্যঙ্নিরূঢলিঙ্গে তু প্রাপ্তে বস্তিং নিবারযেত্ |৭|
सम्यङ्निरूढलिङ्गे तु प्राप्ते बस्तिं निवारयेत् |७|
🔊 Audio coming soon
অমুমেবার্থং প্রকটযন্নাহ- সম্যগিত্যাদি| কেচিদ্রক্তমপ্যত্র চতুর্থং শমনীযমস্তীতি চতুর্থং বস্তিদানমাহুঃ; অপরে তু পশ্চাদ্দাহনির্বাপণার্থং মধুরশীতৈশ্চতুর্থোঽপি বস্তির্দেয ইতি বদন্তি|৭|-
Adhikarana 4 (7) · Śloka 8
বিশেষাত্ সুকুমারাণাং হীন এব ক্রমো হিতঃ ||৭|| অপি হীনক্রমং কুর্যান্ন তু কুর্যাদতিক্রমম্ |৮|
विशेषात् सुकुमाराणां हीन एव क्रमो हितः ||७|| अपि हीनक्रमं कुर्यान्न तु कुर्यादतिक्रमम् |८|
🔊 Audio coming soon
হীনযোগজাতিযোগজযোর্ব্যাপদোর্মধ্যে অতিযোগজা ব্যাপন্মহাত্যযং করোতীতি ততো বিভ্যদাহ- অপি হীনেত্যাদি||৭||-
Adhikarana 5 (8) · Śloka 9
যস্য স্যাদ্বস্তিরল্পোঽল্পবেগো হীনমলানিলঃ ||৮|| দুর্নিরূঢঃ স বিজ্ঞেযো মূত্রার্ত্যরুচিজাড্যবান্ |৯|
यस्य स्याद्बस्तिरल्पोऽल्पवेगो हीनमलानिलः ||८|| दुर्निरूढः स विज्ञेयो मूत्रार्त्यरुचिजाड्यवान् |९|
🔊 Audio coming soon
হীননিরূঢলক্ষণমাহ- যস্যেত্যাদি| অল্পঃ অল্পগুণমাত্রঃ| অল্পবেগঃ স্তোকবেগঃ| মূত্রার্তিঃ মূত্রপীডা| অল্পগুণমাত্রবস্ত্যুপযোগোত্ক্লেশিতমলাবরোধেন জাড্যমপটুতা||৮||-
Adhikarana 6 (9) · Śloka 10
যান্যেব প্রাঙ্মযোক্তানি লিঙ্গান্যতিবিরেচিতে ||৯|| তান্যেবাতিনিরূঢেঽপি বিজ্ঞেযানি বিপশ্চিতা |১০|
यान्येव प्राङ्मयोक्तानि लिङ्गान्यतिविरेचिते ||९|| तान्येवातिनिरूढेऽपि विज्ञेयानि विपश्चिता |१०|
🔊 Audio coming soon
অতিনিরূঢলিঙ্গমাহ- যানীত্যাদি| যান্যেব প্রাগুক্তানি শূলগুদভ্রংশকফাতিযোগাদীনি ||৯||-
Adhikarana 7 (10) · Śloka 11
যস্য ক্রমেণ গচ্ছন্তি বিট্পিত্তকফবাযবঃ ||১০|| লাঘবং চোপজাযেত সুনিরূঢং তমাদিশেত্ |১১|
यस्य क्रमेण गच्छन्ति विट्पित्तकफवायवः ||१०|| लाघवं चोपजायेत सुनिरूढं तमादिशेत् |११|
🔊 Audio coming soon
সম্যঙ্নিরূঢলিঙ্গমাহ- যস্যেত্যাদি| বিট্ মলঃ||১০||-
Adhikarana 8 (11-13) · Śloka 14
সুনিরূঢং ততো জন্তুং স্নাতবন্তং তু ভোজযেত্ ||১১|| পিত্তশ্লেষ্মানিলাবিষ্টং ক্ষীরযূষরসৈঃ ক্রমাত্ | সর্বং বা জাঙ্গলরসৈর্ভোজযেদবিকারিভিঃ ||১২|| ত্রিভাগহীনমর্ধং বা হীনমাত্রমথাপি বা | যথাগ্নিদোষং মাত্রেযং ভোজনস্য বিধীযতে ||১৩|| অনন্তরং ততো যুঞ্জ্যাদ্যথাস্বং স্নেহবস্তিনা |১৪|
सुनिरूढं ततो जन्तुं स्नातवन्तं तु भोजयेत् ||११|| पित्तश्लेष्मानिलाविष्टं क्षीरयूषरसैः क्रमात् | सर्वं वा जाङ्गलरसैर्भोजयेदविकारिभिः ||१२|| त्रिभागहीनमर्धं वा हीनमात्रमथापि वा | यथाग्निदोषं मात्रेयं भोजनस्य विधीयते ||१३|| अनन्तरं ततो युञ्ज्याद्यथास्वं स्नेहबस्तिना |१४|
🔊 Audio coming soon
সুনিরূঢস্য পশ্চাত্কর্ম নির্দিশন্নাহ- সুনিরূঢমিত্যাদি| কেচিদত্র নিরূঢলিঙ্গোত্পাদপুটপ্রত্যাগমানন্তরং পীতনাগরকর্ষতোযস্যোদ্বর্তনস্নানাদিকং মন্যন্তে| তদুক্তং- “ততঃ প্রত্যাগতে বস্তৌ বার্যুষ্ণং নাগরৈঃ শৃতম্| পাযযেত্ কৃতশৌচং চ স্নাপযেদুষ্ণবারিণা- ” ইতি| কিযদ্ভোজনং তদাহ- ত্রিভাগেত্যাদি| হীনমাত্রমথাপি বেত্যত্র মাত্রশব্দোঽল্পার্থঃ; তেন হীনমাত্রমল্পহীনম্| ততঃ মাত্রাবদ্ভোজনানন্তরম্| যথাস্বং যো য আত্মীযদোষাপেক্ষযা স্নেহবস্তিস্তেন স্নেহবস্তিনা যুঞ্জ্যাত্ পরং সুনিরূঢমেব পুরুষং নতু দুর্নিরূঢং, তত্র সদোষতযা যথাদোষং নিরূহণমেব কার্যম্| ন চাতিরূঢং, তত্রাতিবিরিক্তবদ্ভেষজং শীতপরিষেকপিচ্ছাবস্ত্যাদিকং নতু স্নেহবস্তিঃ; তথা চ বিদেহঃ- “অতিতীক্ষ্ণৈর্নিরূঢস্য হৃতদোষস্য সর্বতঃ| কঞ্চিদেবানভিপ্রেতং মার্গং স্নেহোঽনুগচ্ছতি”- ইতি| গযদাসস্ত পরিভাষিতং ষট্পলপ্রমাণং স্নেহবস্তিমত্র দেযং ন মন্যতে, কিঞ্চানুবাসনাখ্যং পলত্রযপ্রমাণং স্নেহবস্তিং দেযং মন্যতে| যত্র তু স্নেহবস্তিঃ স্বতন্ত্রঃ, তত্রৈব ষট্পলপ্রমাণঃ||১১-১৩||-
Adhikarana 9 (14) · Śloka 15
বিবিক্ততা মনস্তুষ্টিঃ স্নিগ্ধতা ব্যাধিনিগ্রহঃ ||১৪|| আস্থাপনস্নেহবস্ত্যোঃ সম্যগ্দানে তু লক্ষণম্ |১৫|
विविक्तता मनस्तुष्टिः स्निग्धता व्याधिनिग्रहः ||१४|| आस्थापनस्नेहबस्त्योः सम्यग्दाने तु लक्षणम् |१५|
🔊 Audio coming soon
ইদানীং সান্বাসনাস্থাপনস্য সম্যগ্দত্তস্য লক্ষণমাহ- বিবিক্ততেত্যাদি| বিবিক্ততা সম্যক্পৃথগবধারণং, মনস এবেন্দ্রিযার্থেষু সম্যগবধারণসামর্থ্যং, রসাদিধাতুবহস্রোতসামনাবৃতত্বং বা বিবিক্ততা||১৪||-
Adhikarana 10 (15) · Śloka 16
তদহস্তস্য পবনাদ্ভযং বলবদিষ্যতে ||১৫|| রসৌদনস্তেন শস্তস্তদহশ্চানুবাসনম্ |১৬|
तदहस्तस्य पवनाद्भयं बलवदिष्यते ||१५|| रसौदनस्तेन शस्तस्तदहश्चानुवासनम् |१६|
🔊 Audio coming soon
কুতঃ পুনর্নিরূহশুদ্ধস্য মন্দাগ্নেস্তদহরেব মাংসরসভোজনমনুবাসনযোজনং চেত্যাহ- তদহরিত্যাদি| নিরূহণাদ্বিড্বাতাদিপ্রবৃত্তিলক্ষণেন ধাতুক্ষযেণ কুপিতানিলস্য বলবদেব ভযমতস্তদহরেব রসৌদনভোজনং, তচ্চ নিরূহণমন্দীকৃতানলবধভযান্মাত্রাবত্; তথা পবনভযাত্তদহরেব দ্বাদশপ্রসৃতনিরূহচতুর্থাংশেন স্নেহেনানুবাসনম্| গযদাসস্তু সুনিরূঢস্য তদহঃ পলত্রযমেবানুবাসনং; তথা তদহশ্চেতি চকারো ভিন্নক্রমে, তেনানুবাসনং চেত্যত্র সম্বন্ধাদনুক্তোঽপি মাত্রাবস্তিশ্চাত্র সমুচ্চীযত ইতি মন্যতে; ন ষট্পলপ্রমাণং স্নেহবস্তিং, ভোজদর্শনাদিতি||১৫||-
Adhikarana 11 (16) · Śloka 17
পশ্চাদগ্নিবলং মত্বা পবনস্য চ চেষ্টিতম্ ||১৬|| অন্নোপস্তম্ভিতে কোষ্ঠে স্নেহবস্তির্বিধীযতে |১৭|
पश्चादग्निबलं मत्वा पवनस्य च चेष्टितम् ||१६|| अन्नोपस्तम्भिते कोष्ठे स्नेहबस्तिर्विधीयते |१७|
🔊 Audio coming soon
নিরূহণাদনন্তরং তৃতীযচতুর্থাদাবপি দিনে বস্তিদানমাহ- পশ্চাদিত্যাদি| পশ্চাত্ সান্বাসনান্নিরূহণাত্| অগ্নিবলং দীপ্তং বলং বযঃশক্ত্যনুরূপমুপলভ্য, পবনস্য চ চেষ্টিতং মত্বেতি সঞ্চলনশব্দকরস্ফুরণাদিকমবধার্য, অন্নপানেনাবষ্টব্ধে কোষ্ঠে স্নেহবস্তিরুত্তমমাত্রারূপঃ ষট্পলঃ ক্রিযতে| তথাচ তন্ত্রান্তরং- ‘দ্ব্যহাত্ত্র্যহাচ্চতুর্থে পঞ্চমে বা দদ্যান্নিরূহাদনুবাসনম্’ ইতি||১৬||-
Adhikarana 12 (17) · Śloka 18
অনাযান্তং মুহূর্তাত্তু নিরূহং শোধনৈর্হরেত্ ||১৭|| তীক্ষ্ণৈর্নিরূহৈর্মতিমান্ ক্ষারমূত্রাম্লসংযুতৈঃ |১৮|
अनायान्तं मुहूर्तात्तु निरूहं शोधनैर्हरेत् ||१७|| तीक्ष्णैर्निरूहैर्मतिमान् क्षारमूत्राम्लसंयुतैः |१८|
🔊 Audio coming soon
ততঃ পরং ঘটিকাদ্বযাদনাগচ্ছতো নিরূহস্য নির্হরণোপাযং দর্শযতি- অনাযান্তমিত্যাদি| নিরূহৈর্মতিমান্ হরেদিতি সম্বন্ধঃ| কথম্ভূতৈর্নিরূহৈরিত্যাহ- শোধনৈঃ তীক্ষ্ণৈঃ| ক্ষারমূত্রাম্লসংযুতৈঃ ক্ষারো যবক্ষারঃ, মূত্রং গোমূত্রম্, অম্লং কাঞ্জিকম্||১৭||-
Adhikarana 13 (18) · Śloka 19
বিগুণানিলবিষ্টব্ধং চিরং তিষ্ঠন্নিরূহণম্ ||১৮|| শূলারতিজ্বরানাহান্মরণং বা প্রবর্তযেত্ |১৯|
विगुणानिलविष्टब्धं चिरं तिष्ठन्निरूहणम् ||१८|| शूलारतिज्वरानाहान्मरणं वा प्रवर्तयेत् |१९|
🔊 Audio coming soon
বিগুণো বিপরীতঃ| অরতির্ন কুত্রচিদবস্থিতিশ্চেতসঃ||১৮||-
Adhikarana 14 (19-20) · Śloka 20
ন তু ভুক্তবতো দেযমাস্থাপনমিতি স্থিতিঃ ||১৯|| বিসূচিকাং বা জনযেচ্ছর্দিং বাঽপি সুদারুণাম্ | কোপযেত্ সর্বদোষান্ বা তস্মাদ্দদ্যাদভোজিনে ||২০||
न तु भुक्तवतो देयमास्थापनमिति स्थितिः ||१९|| विसूचिकां वा जनयेच्छर्दिं वाऽपि सुदारुणाम् | कोपयेत् सर्वदोषान् वा तस्माद्दद्यादभोजिने ||२०||
🔊 Audio coming soon
ভুক্তবতঃ কস্মাদাস্থাপনং নিষিধ্যতে তদাহ- ন ত্বিত্যাদি| ন তু ভুক্তবত ইত্যাদিনা য আস্থাপননিষেধোঽভিহিতস্তস্য দৃঢীকরণার্থং ভুক্তবতো বিসূচিকাদিদোষোদ্ভাবনযাঽভোজিনে দানমাহ- বিসূচিকাং বেত্যাদি||১৯-২০||
Adhikarana 15 (21-22) · Śloka 22
জীর্ণান্নস্যাশযে দোষাঃ পুংসঃ প্রব্যক্তিমাগতাঃ | নিঃশেষাঃ সুখমাযান্তি ভোজনেনাপ্রপীডিতাঃ ||২১|| নবাঽঽস্থাপনবিক্ষিপ্তমন্নমগ্নিঃ প্রধাবতি | তস্মাদাস্থাপনং দেযং নিরাহারায জানতা ||২২||
जीर्णान्नस्याशये दोषाः पुंसः प्रव्यक्तिमागताः | निःशेषाः सुखमायान्ति भोजनेनाप्रपीडिताः ||२१|| नवाऽऽस्थापनविक्षिप्तमन्नमग्निः प्रधावति | तस्मादास्थापनं देयं निराहाराय जानता ||२२||
🔊 Audio coming soon
বিসূচিকেত্যাদিদূষণোদ্ভাবনদ্বারেণাভোজিনে দানমভিধায জীর্ণান্নস্যেত্যাদ্যুক্তগুণদ্বারেণাপ্যভোজিন এব দানমাহ- জীর্ণান্নস্যেত্যাদি| প্রব্যক্তিং স্পষ্টতাং নিরাবরণতামিত্যর্থঃ||২১-২২||
Adhikarana 16 (23) · Śloka 23
আবস্থিকং ক্রমং চাপি বুদ্ধ্বা কার্যং নিরূহণম্ | মলেঽপকৃষ্টে দোষাণাং বলবত্ত্বং ন বিদ্যতে ||২৩||
आवस्थिकं क्रमं चापि बुद्ध्वा कार्यं निरूहणम् | मलेऽपकृष्टे दोषाणां बलवत्त्वं न विद्यते ||२३||
🔊 Audio coming soon
তীব্রশূলাধ্মানাদিরোগাবস্থস্যোপক্রমেণাপি নোর্ধ্বং শুদ্ধ্যতঃ ফলবর্ত্যাদিপ্রণিধানপূর্বকং ভুক্তবতোঽপি নিরূহদানং কর্তব্যং স্যাদত আহ- আবস্থিকমিত্যাদি||২৩||
Adhikarana 17 (24-28) · Śloka 28
ক্ষীরাণ্যম্লানি মূত্রাণি স্নেহাঃ ক্বাথা রসাস্তথা | লবণানি ফলং ক্ষৌদ্রং শতাহ্বা সর্ষপং বচা ||২৪|| এলা ত্রিকটুকং রাস্না সরলো দেবদারু চ | রজনী মধুকং হিঙ্গু কুষ্ঠং সংশোধনানি চ ||২৫|| কটুকা শর্করা মুস্তমুশীরং চন্দনং শটী | মঞ্জিষ্ঠা মদনং চণ্ডা ত্রাযমাণা রসাঞ্জনম্ ||২৬|| বিল্বমধ্যং যবানী চ ফলিনী শক্রজা যবাঃ | কাকোলী ক্ষীরকাকোলী জীবকর্ষভকাবুভৌ ||২৭|| তথা মেদা মহামেদা ঋদ্ধির্বৃদ্ধির্মধূলিকা | নিরূহেষু যথালাভমেষ বর্গো বিধীযতে ||২৮||
क्षीराण्यम्लानि मूत्राणि स्नेहाः क्वाथा रसास्तथा | लवणानि फलं क्षौद्रं शताह्वा सर्षपं वचा ||२४|| एला त्रिकटुकं रास्ना सरलो देवदारु च | रजनी मधुकं हिङ्गु कुष्ठं संशोधनानि च ||२५|| कटुका शर्करा मुस्तमुशीरं चन्दनं शटी | मञ्जिष्ठा मदनं चण्डा त्रायमाणा रसाञ्जनम् ||२६|| बिल्वमध्यं यवानी च फलिनी शक्रजा यवाः | काकोली क्षीरकाकोली जीवकर्षभकावुभौ ||२७|| तथा मेदा महामेदा ऋद्धिर्वृद्धिर्मधूलिका | निरूहेषु यथालाभमेष वर्गो विधीयते ||२८||
🔊 Audio coming soon
ইদানীং বস্তিযৌগিকানি দ্রব্যাণ্যুপদিশন্নাহ- ক্ষীরাণীত্যাদি| ফলং ত্রিফলা| সরলো বৃক্ষবিশেষঃ| সংশোধনানি ত্রিবৃদাদীনি| মদনং মদনফলম্| শক্রজা যবা ইন্দ্রযবাঃ| মধূলিকা তৃণবিশেষঃ ‘মর্কটিকা’ ইতি লোকে||২৪-২৮||
Adhikarana 18 (29) · Śloka 31
স্বস্থে ক্বাথস্য চত্বারো ভাগাঃ স্নেহস্য পঞ্চমঃ | ক্রুদ্ধেঽনিলে চতুর্থস্তু ষষ্ঠঃ পিত্তে কফেঽষ্টমঃ ||২৯|| সর্বেষু চাষ্টমো ভাগঃ কল্কানাং লবণং পুনঃ | ক্ষৌদ্রং মূত্রং ফলং ক্ষীরমম্লং মাংসরসং তথা ||৩০|| যুক্ত্যা প্রকল্পযেদ্ধীমান্ নিরূহে ... |৩১|
स्वस्थे क्वाथस्य चत्वारो भागाः स्नेहस्य पञ्चमः | क्रुद्धेऽनिले चतुर्थस्तु षष्ठः पित्ते कफेऽष्टमः ||२९|| सर्वेषु चाष्टमो भागः कल्कानां लवणं पुनः | क्षौद्रं मूत्रं फलं क्षीरमम्लं मांसरसं तथा ||३०|| युक्त्या प्रकल्पयेद्धीमान् निरूहे ... |३१|
🔊 Audio coming soon
সম্প্রতি নিরূহণেষু ক্বাথাদিষু প্রতিদোষং কিযতী কস্য মাত্রেত্যাহ- স্বস্থ ইত্যাদি| স্বস্থে সমবাতপিত্তকফে পুরুষে| দ্বাদশপ্রসৃতস্য নিরূহস্য ক্বাথস্য চত্বারো ভাগাশ্চত্বারঃ প্রসৃতাঃ অষ্টৌ পলানি| স্নেহস্য পঞ্চম ইতি চতুর্বিংশতিপলনিরূহাপেক্ষযা পাদোনপঞ্চপলানি| ক্রুদ্ধেঽনিলে চতুর্থ ইতি চতুর্থো ভাগঃ ষট্পলানীত্যর্থঃ | ষষ্ঠঃ পিত্তে ইতি ক্রুদ্ধে পিত্তে স্নেহস্য ষষ্ঠো ভাগশ্চত্বারি পলানীত্যর্থঃ| কফেঽষ্টম ইতি ক্রুদ্ধে কফে স্নেহস্যাষ্টমো ভাগস্ত্রীণি পলানীত্যর্থঃ| কষাযস্নেহৌ বিভজ্য কল্কভাগং দর্শযন্নাহ- সর্বেষ্বিতি| সর্বেষু বাতপিত্তশ্লেষ্মসু কল্কস্যাষ্টমো ভাগস্ত্রীণি পলানীত্যর্থঃ| ‘সর্বেষু স্বস্থাস্বস্থেষু’ ইতি গযী| লবণং পুনরিত্যাদি লবণাদীনি বিশেষপ্রমাণেনানুক্তান্যপি যুক্ত্যা দাপযেত্, যুক্ত্যা যোগেনেত্যর্থঃ| যথা যোগাতিযোগৌ ন ভবতঃ| ননু কষাযাদিবল্লবণাদিষু কুতো মাত্রা নোক্তা? সত্যং, লবণাদীনাং দোষভেষজযোঃ সামান্যবিশেষেণ গুণমবলোক্য সম্যগ্যোগসাধনমেব মানম্| তদ্যথা- বাতে ক্ষৌদ্রং মিতং, পিত্তে নাতিবহু, বহু পুনঃ কফে ইতি| এবমন্যেষ্বপি দ্রব্যেষু জ্ঞেযম্| নিযতে পুনর্মানে ক্বচিদ্যোগঃ ক্বচিদযোগ ইতি স্যাত্| এতদুক্তং ভবতি- কষাযাদিনা নিযতমানেন সহানিযতমানৈর্লবণাদিভির্যুক্ত্যা দ্বাদশ প্রসৃতাঃ পূরণীযা ইতি| ততো লবণাদীনাং মাত্রাং দোষভেষজযোঃ সামান্যবিশেষন্যাযেন গুণমবলোক্য সম্যক্ প্রকল্পযেত্| ক্বচিদ্বাতাদিবিষযসাত্ম্যমন্যথা পঠ্যতে| তথাহি- “মধুস্নেহনকল্কাখ্যকষাযাবাপতঃ ক্রমাত্| ত্রীণি ষড্ দ্বাদশ ত্রীণি পলান্যনিলরোগিণাম্| পিত্তে চত্বারি চত্বারি দ্বে দ্বিপঞ্চ চতুষ্টযম্| ষট্ ত্রীণি দ্বে দশ ত্রীণি কফে চাপি নিরূহণম্”- ইতি পূর্বাচার্যভণিতত্বাদ্দ্বযমপি মতং প্রমাণম্||২৯||
Adhikarana 19 (30-32) · Śloka 32
... কল্পনা ত্বিযম্ ||৩১|| কল্কস্নেহকষাযাণামবিবেকাদ্ভিষগ্বরৈঃ | বস্তেঃ সুকল্পনা প্রোক্তা তস্য দানং যথার্থকৃত্ ||৩২||
... कल्पना त्वियम् ||३१|| कल्कस्नेहकषायाणामविवेकाद्भिषग्वरैः | बस्तेः सुकल्पना प्रोक्ता तस्य दानं यथार्थकृत् ||३२||
🔊 Audio coming soon
নিরূহাবযবযোগিষু সম্যগ্যোগহেতুকমাত্রাং নিযম্য সমুদাযকল্পনামুদ্দিশন্নাহ- কল্পনা ত্বিযমিতি| কা পুনরিযমিত্যাহ কল্কস্নেহকষাযাণামিত্যাদি| অবিবেকাদিতি ল্যব্লোপে পঞ্চমী; তেন কল্কাদীনাং বিবেকাভাবমপৃথগ্ভাবং বীক্ষ্য সুকল্পনা ভিষগ্বরৈঃ প্রোক্তা| এতেন হস্তপ্রধাবনসীমন্তাদিকৃন্মিথ্যাযুক্তঃ| তথা চোক্তং- “ন ধাবত্যৌষধং পাণিং ন তিষ্ঠত্যবলিপ্য চ| ন করোতি চ সীমন্তং স নিরূহঃ সুযোজিতঃ”- ইতি| তস্য দানং যথার্থকৃদিতি বাতপিত্তকফশোণিতহরণশোধনসঙ্গ্রহণলেখনবৃংহণবাজীকরণরসাযনাদিযোগকৃত্||৩০-৩২||
Adhikarana 20 (33-36) · Śloka 36
দত্ত্বাঽঽদৌ সৈন্ধবস্যাক্ষং মধুনঃ প্রসৃতদ্বযম্ | পাত্রে তলেন মথ্নীযাত্তদ্বত্ স্নেহং শনৈঃ শনৈঃ ||৩৩|| সম্যক্ সুমথিতে দদ্যাত্ ফলকল্কমতঃ পরম্ | ততো যথোচিতান্ কল্কান্ ভাগৈঃ স্বৈঃ শ্লক্ষ্ণপেষিতান্ ||৩৪|| গম্ভীরে ভাজনেঽন্যস্মিন্মথ্নীযাত্তং খজেন চ | যথা বা সাধু মন্যেত ন সান্দ্রো ন তনুঃ সমঃ ||৩৫|| রসক্ষীরাম্লমূত্রাণাং দোষাবস্থামবেক্ষ্য তু | কষাযপ্রসৃতান্ পঞ্চ সুপূতাংস্তত্র দাপযেত্ ||৩৬||
दत्त्वाऽऽदौ सैन्धवस्याक्षं मधुनः प्रसृतद्वयम् | पात्रे तलेन मथ्नीयात्तद्वत् स्नेहं शनैः शनैः ||३३|| सम्यक् सुमथिते दद्यात् फलकल्कमतः परम् | ततो यथोचितान् कल्कान् भागैः स्वैः श्लक्ष्णपेषितान् ||३४|| गम्भीरे भाजनेऽन्यस्मिन्मथ्नीयात्तं खजेन च | यथा वा साधु मन्येत न सान्द्रो न तनुः समः ||३५|| रसक्षीराम्लमूत्राणां दोषावस्थामवेक्ष्य तु | कषायप्रसृतान् पञ्च सुपूतांस्तत्र दापयेत् ||३६||
🔊 Audio coming soon
বস্তিদ্রব্যাণি যেন ক্রমেণ যোজ্যন্তে তমাহ- দত্ত্বেত্যাদি| অক্ষঃ কর্ষমিত্যর্থঃ| মধুনঃ প্রসৃতদ্বযং চত্বারি পলানি| তলেন হস্ততলেন| তদ্বত্ স্নেহং মধুপ্রমাণম্| শনৈঃ শনৈরল্পমল্পং স্নেহং দত্ত্বেত্যর্থঃ| শনৈঃ শনৈরিত্যুত্তরত্রাপি সম্বধ্যতে| ফলকল্কমতঃ পরং অতঃ পরমস্মিন্ সুমথিতে ফলকল্কং মদনফলকল্কম্| তত ইত্যাদি ততঃ ফলকল্কাদিদানোত্তরম্| কল্কাদীন্ যথোচিতান্ বাতাদিষূচিতানতিক্রমেণ| ভাগৈঃ স্বৈরিতি অংশৈরাত্মীযৈঃ, যথা মদনফলেন সহ সর্বকল্কদ্রব্যাণাং পলত্রযং ভবত্যেবং কল্পিতৈঃ| শ্লক্ষ্ণপেষিতান্ সূক্ষ্মপেষিতান্ সূক্ষ্মপেষিতান্ কল্কান্ দদ্যাদিতি সম্বন্ধঃ| গম্ভীরে ইত্যাদি পূর্বপাত্রাদন্যস্মিন্ গম্ভীরভাজনে খজেন মথ্নীযাত্| খজোঽত্র পঞ্চাঙ্গুলো হস্তো মন্থানশ্চ| যথেত্যাদি মথ্নীত্যাদিত্রাপি সম্বন্ধনীযম্| এতেন করেণাপি মথ্নীযাদিত্যর্থঃ| রসেত্যাদি রসাদীনাং দোষাবস্থামপেক্ষ্য ‘মাত্রামর্পযেত্’ ইতি শেষঃ| তন্ত্রান্তরে নিরূহযোজনা প্রোক্তা- “মাক্ষিকং লবণং স্নেহং কল্কং ক্বাথমিতি ক্রমাত্| আবাপ্যাবাপ্য পাত্রে তন্মথ্নীযাদন্তরাঽন্তরা| সম্যক্ পাণিতলেনৈব নিরূহে যোজনাবিধিঃ”- ইতি||৩৩-৩৬||
Adhikarana 21 (37-41) · Śloka 41
অত ঊর্ধ্বং দ্বাদশপ্রসৃতান্ বক্ষ্যামঃ | দত্ত্বাঽঽদৌ সৈন্ধবস্যাক্ষং মধুনঃ প্রসৃতিদ্বযম্ | বিনির্মথ্য ততো দদ্যাত্ স্নেহস্য প্রসৃতিত্রযম্ ||৩৭|| একীভূতে ততঃ স্নেহে কল্কস্য প্রসৃতিং ক্ষিপেত্ | সম্মূর্চ্ছিতে কষাযং তু চতুঃপ্রসৃতিসম্মিতম্ ||৩৮|| বিতরেচ্চ তদাবাপমন্তে দ্বিপ্রসৃতোন্মিতম্ | এবং প্রকল্পিতো বস্তির্দ্বাদশপ্রসৃতো ভবেত্ ||৩৯|| জ্যেষ্ঠাযাঃ খলু মাত্রাযাঃ প্রমাণমিদমীরিতম্ | অপহ্রাসে ভিষক্কুর্যাত্তদ্বত্ প্রসৃতিহাপনম্ ||৪০|| যথাবযো নিরূহাণাং কল্পনেযমুদাহৃতা | সৈন্ধবাদিদ্রবান্তানাং সিদ্ধিকামৈর্ভিষগ্বরৈঃ ||৪১||
अत ऊर्ध्वं द्वादशप्रसृतान् वक्ष्यामः | दत्त्वाऽऽदौ सैन्धवस्याक्षं मधुनः प्रसृतिद्वयम् | विनिर्मथ्य ततो दद्यात् स्नेहस्य प्रसृतित्रयम् ||३७|| एकीभूते ततः स्नेहे कल्कस्य प्रसृतिं क्षिपेत् | सम्मूर्च्छिते कषायं तु चतुःप्रसृतिसम्मितम् ||३८|| वितरेच्च तदावापमन्ते द्विप्रसृतोन्मितम् | एवं प्रकल्पितो बस्तिर्द्वादशप्रसृतो भवेत् ||३९|| ज्येष्ठायाः खलु मात्रायाः प्रमाणमिदमीरितम् | अपह्रासे भिषक्कुर्यात्तद्वत् प्रसृतिहापनम् ||४०|| यथावयो निरूहाणां कल्पनेयमुदाहृता | सैन्धवादिद्रवान्तानां सिद्धिकामैर्भिषग्वरैः ||४१||
🔊 Audio coming soon
দ্বাদশপ্রসৃতিপ্রমাণসাধনং নির্দিশন্নাহ- অত ইত্যাদি| সম্মূর্চ্ছিতে সম্মিলিতে| বিতরেত্ দদ্যাত্| আবাপঃ পশ্চান্নিক্ষেপ্যং ক্ষীরকাঞ্জিকাদি দ্রব্যম্| দ্বিপ্রসৃতোন্মিতং চতুঃপলপ্রমাণম্| সৈন্ধবকর্ষস্তু স্তোকত্বাচ্চতুর্বিংশতিপলেষ্বেবান্তর্ভবতীত্যতিরিক্তদোষো ন বাচ্যঃ| অপহ্রাসে অপহ্রাসবিষযে স্তোককরণাভিলাষে প্রসৃতহাপনং পলদ্বযাদিত্যাগং ভিষক্ কুর্যাত্||৩৭-৪১||
Adhikarana 22 (42) · Śloka 42
অত ঊর্ধ্বং প্রবক্ষ্যন্তে বস্তযোঽত্র বিভাগশঃ | যথাদোষং প্রযুক্তা যে হন্যুর্নানাবিধান্ গদান্ ||৪২||
अत ऊर्ध्वं प्रवक्ष्यन्ते बस्तयोऽत्र विभागशः | यथादोषं प्रयुक्ता ये हन्युर्नानाविधान् गदान् ||४२||
🔊 Audio coming soon
বিভাগশঃ বিভাগেনেত্যর্থঃ| যথাদোষপ্রযুক্তা ইত্যত্র দোষশব্দো বাতাদিষু ব্যাধিষু চ প্রবর্ততে||৪২||
Adhikarana 23 (43-46) · Śloka 46
শম্পাকোরুবুবর্ষাভূবাজিগন্ধানিশাচ্ছদৈঃ | পঞ্চমূলীবলারাস্নাগুডূচীসুরদারুভিঃ ||৪৩|| ক্বথিতৈঃ পালিকৈরেভির্মদনাষ্টকসংযুতৈঃ | কল্কৈর্মাগধিকাম্ভোদহপুষামিসিসৈন্ধবৈঃ ||৪৪|| বত্সাহ্বযপ্রিযঙ্গূগ্রাযষ্ট্যাহ্বযরসাঞ্জনৈঃ | দদ্যাদাস্থাপনং কোষ্ণং ক্ষৌদ্রাদ্যৈরভিসংস্কৃতম্ ||৪৫|| পৃষ্ঠোরুত্রিকশূলাশ্মবিণ্মূত্রানিলসঙ্গিনাম্ | গ্রহণীমারুতার্শোঘ্নং রক্তমাংসবলপ্রদম্ ||৪৬||
शम्पाकोरुबुवर्षाभूवाजिगन्धानिशाच्छदैः | पञ्चमूलीबलारास्नागुडूचीसुरदारुभिः ||४३|| क्वथितैः पालिकैरेभिर्मदनाष्टकसंयुतैः | कल्कैर्मागधिकाम्भोदहपुषामिसिसैन्धवैः ||४४|| वत्साह्वयप्रियङ्गूग्रायष्ट्याह्वयरसाञ्जनैः | दद्यादास्थापनं कोष्णं क्षौद्राद्यैरभिसंस्कृतम् ||४५|| पृष्ठोरुत्रिकशूलाश्मविण्मूत्रानिलसङ्गिनाम् | ग्रहणीमारुतार्शोघ्नं रक्तमांसबलप्रदम् ||४६||
🔊 Audio coming soon
ইদানীং কুপিতানিলমধিকৃত্য বস্তিদানমাহ, তথা সর্ববস্তিদ্রব্যনিক্ষেপক্রমং চ| শম্পাকঃ কিরমালকঃ| নিশাচ্ছদঃ শটী| পঞ্চমূলী অত্র হ্রস্বা| অম্ভোদঃ মুস্তা| তত্র শম্পাকাদীনি সুরদারুপর্যন্তানি চতুর্দশপলপ্রমিতানি, মদনাষ্টকসংযুতানি চতুর্ভির্মদনফলৈঃ পলং ভবতি, এবং ষোডশপলানি দ্রব্যাণি জর্জরীকৃত্যাষ্টগুণমষ্টাবিংশত্যধিকশতপলপ্রমাণং জলং দত্ত্বা ক্বাথযেদ্ যাবদ্দ্বাত্রিংশত্ পলানি ভবন্তি, ততো বস্ত্রপূতং কৃত্বাঽষ্টপলং ক্বাথং গৃহ্ণীযাত্; চতুর্বারপ্রযোজনোঽযং ক্বাথঃ, দ্বিতীযং বা তৃতীযং বেত্যাদিনোক্তত্বাত্| ততশ্চ গম্ভীরং তাম্রভাজনমানীয, টঙ্কত্রযপরিমিতং সৈন্ধবং নিক্ষিপ্য , ক্ষৌদ্রমিত্যুক্তত্বাত্ পলত্রযপরিমিতং মধু চ করতলেন মথ্নীযাত্, ততঃ সৈন্ধবমধুনী একীকৃত্য, ক্ষৌদ্রাদ্যৈরভিসংস্কৃতমিত্যত্রাদ্যশব্দেন স্নেহক্ষীরকাঞ্জিকমূত্রমাংসরসাদীনাং সঙ্গৃহীতত্বাত ষট্পলপ্রমাণং পক্বং তৈলং প্রক্ষিপ্য মথ্নীযাত্; তদনু চৈকীভূত স্নেহে মাগধিকাদিরসাঞ্জনপর্যন্তনবদ্রব্যচূর্ণং সৈন্ধবটঙ্কত্রযেণ পলত্রযপ্রমিতং নিক্ষিপ্য মথ্নীযাত্; সৈন্ধবটঙ্কত্রযপ্রমাণস্যাদাবেব চ নিক্ষিপ্তত্বাত্ কল্কঃ পলত্রযপরিমিতো নিক্ষিপ্তো ভবতি; ততশ্চ দ্বাত্রিংশত্পলপরিমিতক্বাথমধ্যাদষ্টৌ পলান্যুদ্ধৃত্য তত্র নিক্ষিপেত্; তদনু চ মাংসরসস্য সার্ধপলং, ক্ষীরস্যাপি সার্ধং পলং, কাঞ্জিকস্যার্ধং পলং, তথা গোমূত্রস্যাপি তত্র নিক্ষিপ্যতে| এবং চতুর্বিংশতিপলানি ভবন্তি| এবং দ্বিতীযং তৃতীযং চতুর্থং বা পুটকং দদ্যাত্| অযং বস্তির্বাতরোগে চ প্রযোজ্যঃ||৪৩-৪৬||
Adhikarana 24 (47-50) · Śloka 50
গুডূচীত্রিফলারাস্নাদশমূলবলাপলৈঃ | ক্বথিতৈঃ শ্লক্ষ্ণপিষ্টৈস্তু প্রিযঙ্গুঘনসৈন্ধবৈঃ ||৪৭|| শতপুষ্পাবচাকৃষ্ণাযবানীকুষ্ঠবিল্বজৈঃ | সগুডৈরক্ষমাত্রৈস্তু মদনার্ধপলান্বিতৈঃ ||৪৮|| ক্ষৌদ্রতৈলঘৃতক্ষীরশুক্তকাঞ্জিকমস্তুভিঃ | সমালোড্য চ মূত্রেণ দদ্যাদাস্থাপনং পরম্ ||৪৯|| তেজোবর্ণবলোত্সাহবীর্যাগ্নিপ্রাণবর্ধনম্ | সর্বমারুতরোগঘ্নং বযঃস্থাপনমুত্তমম্ ||৫০||
गुडूचीत्रिफलारास्नादशमूलबलापलैः | क्वथितैः श्लक्ष्णपिष्टैस्तु प्रियङ्गुघनसैन्धवैः ||४७|| शतपुष्पावचाकृष्णायवानीकुष्ठबिल्वजैः | सगुडैरक्षमात्रैस्तु मदनार्धपलान्वितैः ||४८|| क्षौद्रतैलघृतक्षीरशुक्तकाञ्जिकमस्तुभिः | समालोड्य च मूत्रेण दद्यादास्थापनं परम् ||४९|| तेजोवर्णबलोत्साहवीर्याग्निप्राणवर्धनम् | सर्वमारुतरोगघ्नं वयःस्थापनमुत्तमम् ||५०||
🔊 Audio coming soon
গুডূচীত্যাদি| পলং মাংসম্| শেষং প্রসিদ্ধম্| গুডূচ্যাদীনি বলান্তানি ষোডশদ্রব্যাণি প্রত্যেকং পলমিতানি, তথা মাংসস্যাপি ষোডশপলানি, এবং সপ্তদশদ্রব্যাণি দ্বাত্রিংশত্পলপরিমিতানি, মাংসস্য বহুলত্বাচ্চতুর্গুণং ষট্ত্রিংশদধিকশতপলপ্রমাণং জলং দত্ত্বা ক্বাথযেত্, ততশ্চতুর্থাংশাবশিষ্টানি দ্বাত্রিংশত্পলানি গ্রাহ্যাণি, অত একপুটকস্যার্থে পলাষ্টকং গ্রাহ্যম্| প্রিযঙ্গ্বাদিদ্রব্যকল্কো যথোক্তপ্রমাণেন| বিল্বজং বিল্বফলম্| মধু পূর্ববত্, তৈলঘৃতে চ পূর্ববত্, ক্ষীরস্য দ্বিপলং; শুক্তকাঞ্জিকমস্তুগোমূত্রাণাং প্রত্যেকমর্ধপলমিত্যেবং চতুর্বিংশতিপলানি ভবন্তি| দ্রব্যনিক্ষেপক্রমঃ পূর্ববত্| তেজোবর্ণেত্যাদি তেজস্ত্বগ্গতং ভ্রাজকাগ্নিসঞ্জ্ঞং পিত্তম্| বর্ণো গৌরাদিঃ| বলং মাংসোপচযঃ| উত্সাহঃ চৈতসিকো ধর্মঃ| বীর্যং শক্তিঃ| প্রাণা অগ্নীষোমাদযঃ| অযমপি বাতে বাতরোগে চ যোজ্যঃ||৪৭-৫০||
Adhikarana 25 (51-54) · Śloka 54
কুশাদিপঞ্চমূলাব্দত্রিফলোত্পলবাসকৈঃ | সারিবোশীরমঞ্জিষ্ঠারাস্নারেণুপরূষকৈঃ ||৫১|| পালিকৈঃ ক্বথিতৈঃ সম্যগ্ দ্রব্যৈরেভিশ্চ পেষিতৈঃ | শৃঙ্গাটকাত্মগুপ্তেভকেসরাগুরুচন্দনৈঃ ||৫২|| বিদারীমিসিমঞ্জিষ্ঠাশ্যামেন্দ্রযবসিন্ধুজৈঃ | ফলপদ্মকযষ্ঠ্যাহ্বৈঃ ক্ষৌদ্রক্ষীরঘৃতাপ্লুতৈঃ ||৫৩|| দত্তমাস্থাপনং শীতমম্লহীনৈস্তথা দ্রবৈঃ | দাহাসৃগ্দরপিত্তাসৃক্পিত্তগুল্মজ্বরাঞ্জযেত্ ||৫৪||
कुशादिपञ्चमूलाब्दत्रिफलोत्पलवासकैः | सारिवोशीरमञ्जिष्ठारास्नारेणुपरूषकैः ||५१|| पालिकैः क्वथितैः सम्यग् द्रव्यैरेभिश्च पेषितैः | शृङ्गाटकात्मगुप्तेभकेसरागुरुचन्दनैः ||५२|| विदारीमिसिमञ्जिष्ठाश्यामेन्द्रयवसिन्धुजैः | फलपद्मकयष्ठ्याह्वैः क्षौद्रक्षीरघृताप्लुतैः ||५३|| दत्तमास्थापनं शीतमम्लहीनैस्तथा द्रवैः | दाहासृग्दरपित्तासृक्पित्तगुल्मज्वराञ्जयेत् ||५४||
🔊 Audio coming soon
ইদানীং কুপিতপিত্তমধিকৃত্য বস্তিদানমাহ- কুশাদীত্যাদি| কুশকাশনলদর্ভকাণ্ডেক্ষব ইতি কুশাদিপঞ্চমূলম্| অব্দো মুস্তা, উত্পলং নীলোত্পলম্, রেণুঃ পর্পটকঃ| আত্মগুপ্তা কপিকচ্ছূকঃ শ্যামা প্রিযঙ্গুঃ| ফলং মদনফলম্| পেষিতৈঃ পিষ্টৈঃ| কুশাদিসপ্তদশদ্রব্যাণি পলপ্রমিতানি, অষ্টগুণং ষট্ত্রিংশদধিকপলশতপ্রমাণং জলং দত্ত্বা ক্বাথযেত্, ততশ্চতুর্থাংশাবশিষ্টানি চতুস্ত্রিংশত্পলানি গ্রাহ্যাণি, অত একপুটকস্যার্থে ক্বাথপলাষ্টকং গ্রাহ্যং, শৃঙ্গাটকাদিযষ্টীমধুকান্তানাং পঞ্চদশদ্রব্যাণাং কল্কং পলত্রযপ্রমাণং, ‘পিত্তে নাতিবহু ক্ষৌদ্রং’ ইত্যুক্তত্বান্মধুনশ্চত্বারি পলানি, ক্রুদ্ধে পিত্তেঽষ্টমো ভাগঃ স্নেহস্য’ ইত্যুক্তত্বাদ্ ঘৃতস্য চত্বারি পলানি, ক্ষীরস্য পলদ্বযং, ‘অম্লহীনৈস্তথা দ্রবৈঃ’ ইত্যুক্তত্বান্মাংসরসস্যৈকং পলং, ইক্ষুরসস্য পলদ্বযং, এবং চতুর্বিংশতিপলানি ভবন্তি| দ্রব্যাণাং নিক্ষেপক্রমঃ পূর্ববত্| অযং বস্তিঃ পিত্তে পিত্তরোগে চ প্রযোজ্যঃ| ‘বিদারীমিসিমঞ্জিষ্ঠা’ ইত্যত্র মিসিস্থানে বিষেতি কেচিত্ পঠন্তি, তত্র বিষম্ অতিবিষা; বিষং বা বালকং, তোযনামত্বাত্||৫১-৫৪||
Adhikarana 26 (55-59) · Śloka 59
রোধ্রচন্দনমঞ্জিষ্ঠারাস্নানন্তাবলর্ধিভিঃ | সারিবাবৃষকাশ্মর্যমেদামধুকপদ্মকৈঃ ||৫৫|| স্থিরাদিতৃণমূলৈশ্চ ক্বাথঃ কর্ষত্রযোন্মিতৈঃ | পিষ্টৈর্জীবককাকোলীযুগর্ধিমধুকোত্পলৈঃ ||৫৬|| প্রপৌণ্ডরীকজীবন্তীমেদারেণুপরূষকৈঃ | অভীরুমিসিসিন্ধূত্থবত্সকোশীরপদ্মকৈঃ ||৫৭|| কসেরুশর্করাযুক্তৈঃ সর্পির্মধুপযঃপ্লুতৈঃ | দ্রবৈস্তীক্ষ্ণাম্লবর্জ্যৈশ্চ দত্তো বস্তিঃ সুশীতলঃ ||৫৮|| গুল্মাসৃগ্দরহৃত্পাণ্ডুরোগান্ সবিষমজ্বরান্ | অসৃক্পিত্তাতিসারৌ চ হন্যাত্পিত্তকৃতান্ গদান্ ||৫৯||
रोध्रचन्दनमञ्जिष्ठारास्नानन्ताबलर्धिभिः | सारिवावृषकाश्मर्यमेदामधुकपद्मकैः ||५५|| स्थिरादितृणमूलैश्च क्वाथः कर्षत्रयोन्मितैः | पिष्टैर्जीवककाकोलीयुगर्धिमधुकोत्पलैः ||५६|| प्रपौण्डरीकजीवन्तीमेदारेणुपरूषकैः | अभीरुमिसिसिन्धूत्थवत्सकोशीरपद्मकैः ||५७|| कसेरुशर्करायुक्तैः सर्पिर्मधुपयःप्लुतैः | द्रवैस्तीक्ष्णाम्लवर्ज्यैश्च दत्तो बस्तिः सुशीतलः ||५८|| गुल्मासृग्दरहृत्पाण्डुरोगान् सविषमज्वरान् | असृक्पित्तातिसारौ च हन्यात्पित्तकृतान् गदान् ||५९||
🔊 Audio coming soon
রোধ্রেত্যাদি| অনন্তা উত্পলসারিবা| স্থিরাদি লঘুপঞ্চমূলী, তৃণমূলং কুশাদিপঞ্চমূলং, অভীরুঃ শতাবরী| রোধ্রাদিতৃণমূল্যন্তানাং ত্রযোবিংশতিদ্রব্যাণাং কর্ষত্রযপ্রমিতত্বেন সপ্তদশপলানি কর্ষাধিকানি, অষ্টগুণমষ্টত্রিংশদধিকশতপলপ্রমাণং জলং দত্ত্বা ক্বাথযেত্, অতঃ সার্ধচতুস্ত্রিংশত্পলানি গ্রাহ্যাণি, অত একপুটকার্থে ক্বাথপলাষ্টকং গ্রাহ্যং, জীবকাদিশর্করান্তৈকোনবিংশতিদ্রব্যাণাং কল্কঃ পলত্রযপ্রমাণঃ, মধুঘৃতে পূর্ববত্, ‘দ্রবৈস্তীক্ষ্ণাম্লবর্জ্যৈঃ’ ইত্যুক্তত্বাত্ ক্ষীরমাংসরসেক্ষুরসাঃ পূর্ববত্, ইত্যেবং চতুর্বিংশতিপলানি ভবন্তি| দ্রব্যনিঃক্ষেপক্রমঃ পূর্ববত্| অযমপি বস্তিঃ পিত্তে পিত্তরোগে চ প্রযোজ্যঃ||৫৫-৫৯||
Adhikarana 27 (60-63) · Śloka 63
ভদ্রানিম্বকুলত্থার্ককোশাতক্যমৃতামরৈঃ | সারিবাবৃহতীপাঠামূর্বারগ্বধবত্সকৈঃ ||৬০|| ক্বাথঃ, কল্কস্তু কর্তব্যো বচামদনসর্ষপৈঃ | সৈন্ধবামরকুষ্ঠৈলাপিপ্পলীবিল্বনাগরৈঃ ||৬১|| কটুতৈলমধুক্ষারমূত্রতৈলাম্লসংযুতৈঃ | কার্যমাস্থাপনং তূর্ণং কামলাপাণ্ডুমেহিনাম্ ||৬২|| মেদস্বিনামনগ্নীনাং কফরোগাশনদ্বিষাম্ | গলগণ্ডগরগ্লানিশ্লীপদোদররোগিণাম্ ||৬৩||
भद्रानिम्बकुलत्थार्ककोशातक्यमृतामरैः | सारिवाबृहतीपाठामूर्वारग्वधवत्सकैः ||६०|| क्वाथः, कल्कस्तु कर्तव्यो वचामदनसर्षपैः | सैन्धवामरकुष्ठैलापिप्पलीबिल्वनागरैः ||६१|| कटुतैलमधुक्षारमूत्रतैलाम्लसंयुतैः | कार्यमास्थापनं तूर्णं कामलापाण्डुमेहिनाम् ||६२|| मेदस्विनामनग्नीनां कफरोगाशनद्विषाम् | गलगण्डगरग्लानिश्लीपदोदररोगिणाम् ||६३||
🔊 Audio coming soon
ইদানীং কুপিতকফমধিকৃত্য বস্তিদানমাহ- ভদ্রেত্যাদি| ভদ্রা কট্ফলং, ভদ্রাদিবত্সকান্তানাং ত্রযোদশদ্রব্যাণাং ষোডশপলানি অষ্টগুণমষ্টাবিংশত্যধিকশতপলপ্রমাণং জলং দত্ত্বা ক্বাথযেত্, অতো দ্বাত্রিংশত্পলানি গ্রাহ্যাণি, অত একপুটকস্যার্থে ক্বাথপলাষ্টকং, বচাদিনাগরান্তানাং দশদ্রব্যাণাং কল্কস্য পলত্রযং, কটুতৈলতিলতৈলযোস্ত্রীণি পলানি কফেঽষ্টম ইত্যুক্তত্বাত্, মধুনঃ পুনঃ ষট্পলানি, যবক্ষারস্যৈকপলং, মূত্রস্য সার্ধপলং তথা কাঞ্জিকস্য, এবং চতুর্বিংশতিপলানি| দ্রব্যনিক্ষেপক্রমঃ পূর্ববত্| অযং বস্তিঃ কফে কফরোগে চ যোজ্যঃ||৬০-৬৩||
Adhikarana 28 (64-66) · Śloka 66
দশমূলীনিশাবিল্বপটোলত্রিফলামরৈঃ | ক্বথিতৈঃ কল্কপিষ্টৈস্তু মুস্তসৈন্ধবদারুভিঃ ||৬৪|| পাঠামাগধিকেন্দ্রাহ্বৈস্তৈলক্ষারমধুপ্লুতৈঃ | কুর্যাদাস্থাপনং সম্যঙ্মূত্রাম্লফলযোজিতৈঃ ||৬৫|| কফপাণ্ডুগদালস্যমূত্রমারুতসঙ্গিনাম্ | আমাটোপাপচীশ্লেষ্মগুল্মক্রিমিবিকারিণাম্ ||৬৬||
दशमूलीनिशाबिल्वपटोलत्रिफलामरैः | क्वथितैः कल्कपिष्टैस्तु मुस्तसैन्धवदारुभिः ||६४|| पाठामागधिकेन्द्राह्वैस्तैलक्षारमधुप्लुतैः | कुर्यादास्थापनं सम्यङ्मूत्राम्लफलयोजितैः ||६५|| कफपाण्डुगदालस्यमूत्रमारुतसङ्गिनाम् | आमाटोपापचीश्लेष्मगुल्मक्रिमिविकारिणाम् ||६६||
🔊 Audio coming soon
দশমূলীত্যাদি| ইন্দ্রাহ্বঃ কুটজঃ| দশমূলাদ্যমরান্তসপ্তদশদ্রব্যাণি অষ্টগুণং ষট্ত্রিংশদধিকশতপলপ্রমাণং জলং দত্ত্বা ক্বাথযেত্, অতশ্চতুস্ত্রিংশত্পলানি গ্রাহ্যাণি, অত একপুটকস্যার্থে ক্বাথপলাষ্টকং গ্রাহ্যং, মুস্তাদীন্দ্রাহ্বান্তষড্দ্রব্যাণাং কল্কং পূর্ববত্, তথা তৈলমধুনোঃ প্রত্যেকং চত্বারি পলানি, ক্ষারস্যার্ধপলং, মূত্রস্য সার্ধপলং, তথা কাঞ্জিকস্য সার্ধপলং, মদনফলস্য সার্ধপলমিত্যেবং চতুর্বিংশতিপলানি ভবন্তি| দ্রব্যনিঃক্ষেপক্রমঃ পূর্ববত্| অযমপি বস্তিঃ কফে কফরোগে চ প্রযোজ্যঃ||৬৪-৬৬||
Adhikarana 29 (67-70) · Śloka 70
বৃষাশ্মভেদবর্ষাভূধান্যগন্ধর্বহস্তকৈঃ | দশমূলবলামূর্বাযবকোলনিশাচ্ছদৈঃ ||৬৭|| কুলত্থবিল্বভূনিম্বৈঃ ক্বথিতৈঃ পলসম্মিতৈঃ | কল্কৈর্মদনযষ্ট্যাহ্বষড্গ্রন্থামরসর্ষপৈঃ ||৬৮|| পিপ্পলীমূলসিন্ধূত্থযবানীমিসিবত্সকৈঃ | ক্ষৌদ্রেক্ষুক্ষীরগোমূত্রসর্পিস্তৈলরসাপ্লুতৈঃ ||৬৯|| তূর্ণমাস্থাপনং কার্যং সংসৃষ্টবহুরোগিণাম্ | গৃধ্রসীশর্করাষ্ঠীলাতূনীগুল্মগদাপহম্ ||৭০||
वृषाश्मभेदवर्षाभूधान्यगन्धर्वहस्तकैः | दशमूलबलामूर्वायवकोलनिशाच्छदैः ||६७|| कुलत्थबिल्वभूनिम्बैः क्वथितैः पलसम्मितैः | कल्कैर्मदनयष्ट्याह्वषड्ग्रन्थामरसर्षपैः ||६८|| पिप्पलीमूलसिन्धूत्थयवानीमिसिवत्सकैः | क्षौद्रेक्षुक्षीरगोमूत्रसर्पिस्तैलरसाप्लुतैः ||६९|| तूर्णमास्थापनं कार्यं संसृष्टबहुरोगिणाम् | गृध्रसीशर्कराष्ठीलातूनीगुल्मगदापहम् ||७०||
🔊 Audio coming soon
বৃষাশ্মভেদেত্যাদি| নিশাচ্ছদঃ শটী ষড্গ্রন্থা বচা| বৃষাদিভূনিম্বান্তানি ত্রযোবিংশতিদ্রব্যাণি ষোডশপলপ্রমিতানি অষ্টাবিংশত্যধিকশতপলমিতং জলং দত্ত্বা ক্বাথযেত্, অতো দ্বাত্রিংশত্পলানি গ্রাহ্যাণি, অত একপুটকস্যার্থে ক্বাথস্যাষ্টৌ পলানি, মদনাদিবত্সকান্তদশদ্রব্যাণাং কল্কস্য ত্রীণি পলানি, ক্ষৌদ্রস্য ত্রীণি পলানি, ইক্ষুক্ষীরগোমূত্রাণাং প্রত্যেকং সার্ধপলং ঘৃতস্য দ্বে পলে, তৈলস্য দ্বে, মাংসস্যার্ধপলম্| সংসৃষ্টবহুরোগিণামিত্যনেন সংসর্গসন্নিপাতরোগপ্রশমনত্বমুক্তং স্যাত্| তত্র সংসর্গো দোষদ্বযসমুদাযঃ, সন্নিপাতস্তু দোষত্রযসমুদাযঃ| তত্র সংসর্গে দ্বযোরেকস্য প্রকর্ষং প্রকল্প্য তদপেক্ষযা ক্ষৌদ্রস্নেহাদ্যাবাপদ্রব্যাণি পূর্বোক্তন্যাযেন স্ববুদ্ধ্যা পরিকল্প্য প্রযোজ্যানি| যদা তু সংসর্গস্তুল্যপ্রকর্ষো ভবতি তদা ক্ষৌদ্রাদীনাং গুণদোষান্নিপুণবুদ্ধ্যা বিচার্যোত্কর্ষাপকর্ষতযা মিশ্রমানেন নিক্ষিপ্য চতুর্বিংশতিপলানি পূরণীযানি| এবং দোষত্রযসংযোগেঽপি ক্ষৌদ্রাদিদ্রব্যাণামুত্কর্ষাপকর্ষঃ পরিকল্পনীযঃ||৬৭-৭০||
Adhikarana 30 (71- 76) · Śloka 76
রাস্নারগ্বধবর্ষাভূকটুকোশীরবারিদৈঃ | ত্রাযমাণামৃতারক্তাপঞ্চমূলীবিভীতকৈঃ ||৭১|| সবলৈঃ পালিকৈঃ ক্বাথঃ কল্কস্তু মদনান্বিতৈঃ | যষ্ট্যাহ্বমিসিসিন্ধূত্থফলিনীন্দ্রযবাহ্বযৈঃ ||৭২|| রসাঞ্জনরসক্ষৌদ্রদ্রাক্ষাসৌবীরসংযুতৈঃ | যুক্তো বস্তিঃ সুখোষ্ণোঽযং মাংসশুক্রবলৌজসাম্ ||৭৩|| আযুষোঽগ্নেশ্চ সংস্কর্তা হন্তি চাশু গদানিমান্ | গুল্মাসৃগ্দরবীসর্পমূত্রকৃচ্ছ্রক্ষতক্ষযান্ ||৭৪|| বিষমজ্বরমর্শাংসি গ্রহণীং বাতকুণ্ডলীম্ | জানুজঙ্ঘাশিরোবস্তিগ্রহোদাবর্তমারুতান্ ||৭৫|| বাতাসৃক্শর্করাষ্ঠীলাকুক্ষিশূলোদরারুচীঃ | রক্তপিত্তকফোন্মাদপ্রমেহাধ্মানহৃদ্গ্রহান্ ||৭৬||
रास्नारग्वधवर्षाभूकटुकोशीरवारिदैः | त्रायमाणामृतारक्तापञ्चमूलीबिभीतकैः ||७१|| सबलैः पालिकैः क्वाथः कल्कस्तु मदनान्वितैः | यष्ट्याह्वमिसिसिन्धूत्थफलिनीन्द्रयवाह्वयैः ||७२|| रसाञ्जनरसक्षौद्रद्राक्षासौवीरसंयुतैः | युक्तो बस्तिः सुखोष्णोऽयं मांसशुक्रबलौजसाम् ||७३|| आयुषोऽग्नेश्च संस्कर्ता हन्ति चाशु गदानिमान् | गुल्मासृग्दरवीसर्पमूत्रकृच्छ्रक्षतक्षयान् ||७४|| विषमज्वरमर्शांसि ग्रहणीं वातकुण्डलीम् | जानुजङ्घाशिरोबस्तिग्रहोदावर्तमारुतान् ||७५|| वातासृक्शर्कराष्ठीलाकुक्षिशूलोदरारुचीः | रक्तपित्तकफोन्मादप्रमेहाध्मानहृद्ग्रहान् ||७६||
🔊 Audio coming soon
রাস্নারগ্বধেত্যাদি| সবলৈঃ বলাসহিতৈঃ| রসো মাংসরসঃ| রাস্নাদিবলান্তষোডশদ্রব্যাণি পলপ্রমিতানি অষ্টগুণং জলং দত্ত্বা ক্বাথযেত্, ততো দ্বাত্রিংশত্পলানি গ্রাহ্যাণি, অত একপুটকস্যার্থে ক্বাথস্য পলাষ্টকং, মদনাদীন্দ্রযবান্তানাং ষণ্ণাং দ্রব্যাণাং কল্কস্য ত্রীণি পলানি, স্নেহস্য নিরূহণাঙ্গত্বাদনুক্তোঽপ্যত্র ষট্পলপ্রমাণো নিক্ষেপণীযঃ| তথাচ হারীতঃ- “স্নেহো গুডো মাংসরসঃ পযাংসি সাম্লানি মূত্রং মধু সৈন্ধবং চ| এতে নিরূহে বিদুষা প্রযোজ্যাঃ ক্বাথশ্চ কল্কো মদনাত্ ফলং চ ”- ইতি| মধুনস্ত্রীণি পলানি, রসাঞ্জনমাংসরসক্ষীরসৌবীরাণাং প্রত্যেকমেকপলমিত্যেবং চতুর্বিংশতিপলানি ভবন্তি| এষ বস্তিঃ স্বস্থাতুরবিষযঃ সর্বরোগহরশ্চ||৭১- ৭৬||
Adhikarana 31 (77) · Śloka 77
বাতঘ্নৌষধনিষ্ক্বাথাঃ সৈন্ধবত্রিবৃতাযুতাঃ | সাম্লাঃ সুখোষ্ণা যোজ্যাঃ স্যুর্বস্তযঃ কুপিতেঽনিলে ||৭৭||
वातघ्नौषधनिष्क्वाथाः सैन्धवत्रिवृतायुताः | साम्लाः सुखोष्णा योज्याः स्युर्बस्तयः कुपितेऽनिले ||७७||
🔊 Audio coming soon
তত্র বস্তিদানমাতুরবিষযমাশ্রিত্য কথিতমেব স্বস্থং প্রতি পুনঃ সঙ্ক্ষেপতো বাতাদিবিষযান্ বস্তীন্নির্দিশন্নাহ- বাতঘ্নৌষধনিষ্ক্বাথা ইত্যাদি| এতচ্চ বস্তয ইত্যস্য বিশেষণমত এব বহুবচনম্| তত্র বাতঘ্নৌষধানাং ভদ্রদার্বাদীনাং ষোডশপলপ্রমিতানামষ্টগুণজলে ক্বথিতানাং চতুর্ভাগাবশেষেণ ক্বাথস্য দ্বাত্রিংশত্পলানি, অত একপুটকস্যার্থে ক্বাথপলাষ্টকং, সৈন্ধবস্য টঙ্কত্রযং, বাতব্যাধাবুক্তস্য ত্রৈবৃতস্য স্নেহস্য ষট্পলানি, ক্ষীরাণ্যম্লানি মূত্রাণীত্যাদিবর্গমধ্যে যানি বাতহরদ্রব্যাণি তেষাং গুডসহিতস্য কল্কস্য পলত্রযং, নিরূহাঙ্গত্বান্মধুনঃ পলত্রযম্, অনুক্তান্যপ্যাবাপদ্রব্যাণি বাতহরাণি প্রযোজ্যান্যতো মাংসরসস্যৈকং পলং, তথা ক্ষীরস্য কাঞ্জিকস্য সটঙ্কাধিকং পলমেবং চতুর্বিংশতিপলানি ভবন্তি| বস্তয ইতি ত্রিপুটচতুঃপুটাপেক্ষং বহুবচনম্| এবং বক্ষ্যমাণযোগেষ্বপি বাচ্যম্||৭৭||
Adhikarana 32 (78) · Śloka 78
ন্যগ্রোধাদিগণক্বাথাঃ কাকোল্যাদিসমাযুতাঃ | বিধেযা বস্তযঃ পিত্তে সসর্পিষ্কাঃ সশর্করাঃ ||৭৮||
न्यग्रोधादिगणक्वाथाः काकोल्यादिसमायुताः | विधेया बस्तयः पित्ते ससर्पिष्काः सशर्कराः ||७८||
🔊 Audio coming soon
ন্যগ্রোধাদিগণক্বাথা ইত্যাদি| ন্যগ্রোধাদীনাং ষোডশপলপ্রমিতানাং ক্বাথঃ পূর্ববত্, অত একপুটকস্যার্থে ক্বাথপলাষ্টকং, কাকোল্যাদেঃ কল্কীকৃতস্য পলদ্বযং, ঘৃতস্য চত্বারি পলানি, শর্করাযাঃ পলম্, এতেন কাকোল্যাদিপলদ্বযেন শর্করাযাঃ পলসহিতেন কল্কপলত্রযং, নিরূহাঙ্গত্বাদনুক্তস্যাপি সৈন্ধবস্যাক্ষং, তথা মধুনোঽপি চত্বারি পলানি, ‘ক্ষীরাণ্যম্লানি মূত্রাণি’ ইত্যাদিবর্গমধ্যে যানি পিত্তহরদ্রব্যাণি তান্যপি প্রক্ষেপণীযানি, তেনেক্ষুরসস্য পলং, ক্ষীরস্য পাদোনং পলচতুষ্টযমিত্যেবং চতুর্বিংশতিপলানি ভবন্তি||৭৮||
Adhikarana 33 (79) · Śloka 79
আরগ্বধাদিনিষ্ক্বাথাঃ পিপ্পল্যাদিসমাযুতাঃ | সক্ষৌদ্রমূত্রা দেযাঃ স্যুর্বস্তযঃ কুপিতে কফে ||৭৯||
आरग्वधादिनिष्क्वाथाः पिप्पल्यादिसमायुताः | सक्षौद्रमूत्रा देयाः स्युर्बस्तयः कुपिते कफे ||७९||
🔊 Audio coming soon
আরগ্বধেত্যাদি| আরগ্বধাদীনাং ষোডশপলপ্রমিতানাং ক্বাথঃ পূর্ববত্, অত একপুটকস্যার্থে ক্বাথপলাষ্টকং, পিপ্পল্যাদিকল্কস্য পলত্রযং, মধুনঃ ষট্পলানি, অনুক্তস্যাপি সৈন্ধবস্য টঙ্কত্রযং, তথা কটুতৈলস্য ত্রীণি পলানি, মূত্রস্য সপ্তটঙ্কাধিকানি ত্রীণি পলানি, ইত্যেবং চতুর্বিংশতিপলানি ভবন্তি||৭৯||
Adhikarana 34 (80) · Śloka 80
শর্করেক্ষুরসক্ষীরঘৃতযুক্তাঃ সুশীতলাঃ | ক্ষীরবৃক্ষকষাযাঢ্যা বস্তযঃ শোণিতে হিতাঃ ||৮০||
शर्करेक्षुरसक्षीरघृतयुक्ताः सुशीतलाः | क्षीरवृक्षकषायाढ्या बस्तयः शोणिते हिताः ||८०||
🔊 Audio coming soon
শর্করেক্ষুরসক্ষীরেত্যাদি| ক্ষীরবৃক্ষকষাযেণাঢ্যাঃ স্ফীতাঃ প্রধানা ইত্যর্থঃ| ক্ষীরবৃক্ষাণাং ন্যগ্রোধাদীনাং ষোডশপলপ্রমিতানাং ক্বাথঃ পূর্ববত্, অনুক্তমপি সৈন্ধবং পূর্ববত্, ক্ষীরাদিবর্গমধ্যে কথিতশোণিতহরদ্রব্যাণাং কল্কস্য পলদ্বযম্, অনুক্তস্যাপি মধুনশ্চত্বারি পলানি তথা চ ঘৃতস্য, শর্করাযাঃ পলং তথেক্ষুরসস্য, ক্ষীরস্য টঙ্কসপ্তাধিকং পলত্রিতযমানমিত্যেবং চতুর্বিংশতিপলানি ভবন্তি| তদেব পিত্তং তদেব রক্তমিতি মনসি পর্যালোচ্য পিত্তমানেনাযমপি বস্তিঃ কল্পিতঃ||৮০||
Adhikarana 35 (81) · Śloka 81
শোধনদ্রব্যনিষ্ক্বাথাস্তত্কল্কস্নেহসৈন্ধবৈঃ | যুক্তাঃ খজেন মথিতবস্তযঃ শোধনাঃ স্মৃতাঃ ||৮১||
शोधनद्रव्यनिष्क्वाथास्तत्कल्कस्नेहसैन्धवैः | युक्ताः खजेन मथितबस्तयः शोधनाः स्मृताः ||८१||
🔊 Audio coming soon
শোধনদ্রব্যেত্যাদি| শোধনদ্রব্যাণাং বমনবিরেচনপঠিতানাং ক্বাথঃ পূর্ববত্, সৈন্ধবং চ, তেষামেব শোধনদ্রব্যাণাং কল্কস্য পলদ্বযং, স্নেহস্য ষট্পলানি, অনুক্তস্যাপি মধুনশ্চত্বারি পলানি, ক্ষীরস্যৈকং পলং, মূত্রস্য সার্ধপলং, তথা কাঞ্জিকস্যাপি, ইত্যেবং চতুর্বিংশতিপলানি ভবন্তি| ‘বস্তযঃ শোধনাঃ স্মৃতা’ ইতি সামান্যবাক্যত্বাত্ সামান্যবস্তিপরিভাষামানেনাযং বস্তিঃ পরিকল্পিতঃ, তথা বক্ষ্যমাণা অপি কল্পনীযাঃ, বাতাদিবিশেষং চ বীক্ষ্য বিশেষমানেন চ প্রযোজ্যাঃ||৮১||
Adhikarana 36 (82) · Śloka 82
ত্রিফলাক্বাথগোমূত্রক্ষৌদ্রক্ষারসমাযুতাঃ | ঊষকাদিপ্রতীবাপা বস্তযো লেখনাঃ স্মৃতাঃ ||৮২||
त्रिफलाक्वाथगोमूत्रक्षौद्रक्षारसमायुताः | ऊषकादिप्रतीवापा बस्तयो लेखनाः स्मृताः ||८२||
🔊 Audio coming soon
ত্রিফলাক্বাথেত্যাদি| ত্রিফলাক্বাথঃ পূর্ববত্, গোমূত্রস্য চ পলত্রযং, নিরূহণাঙ্গত্বাদনুক্তস্যাপি সৈন্ধবস্যাক্ষং, ক্ষৌদ্রস্য চত্বারি পলানি, যবক্ষারস্য কর্ষত্রযং, তথা নিরূহণাঙ্গত্বাত্ স্নেহঃ প্রাপ্তস্ততো লেখনীযস্য কটুতৈলস্য ষট্পলানি, ঊষকাদিদ্রব্যাণাং পলদ্বযমিত্যেবং চতুর্বিংশতিঃ||৮২||
Adhikarana 37 (83) · Śloka 83
বৃংহণদ্রব্যনিষ্ক্বাথাঃ কল্কৈর্মধুরকৈর্যুতাঃ | সর্পির্মাংসরসোপেতা বস্তযো বৃংহণাঃ স্মৃতাঃ ||৮৩||
बृंहणद्रव्यनिष्क्वाथाः कल्कैर्मधुरकैर्युताः | सर्पिर्मांसरसोपेता बस्तयो बृंहणाः स्मृताः ||८३||
🔊 Audio coming soon
বৃংহণেত্যাদি| বৃংহণদ্রব্যাণাং বিদারীগন্ধাদীনাং ক্বাথঃ পূর্ববত্, কল্কৈরিত্যাদিনা কাকোল্যাদীনাং কল্কপলদ্বযং, মধুনঃ পূর্ববত্, ঘৃতস্য ষট্পলানি, সৈন্ধবং পূর্ববত্, মাংসরসস্য সপ্তটঙ্কাধিকং পলত্রযমিত্যেবং চতুর্বিংশতিপলানি||৮৩||
Adhikarana 38 (84) · Śloka 84
চটকাণ্ডোচ্চটাক্বাথাঃ সক্ষীরঘৃতশর্করাঃ | আত্মগুপ্তাফলাবাপাঃ স্মৃতা বাজীকরা নৃণাম্ ||৮৪||
चटकाण्डोच्चटाक्वाथाः सक्षीरघृतशर्कराः | आत्मगुप्ताफलावापाः स्मृता वाजीकरा नृणाम् ||८४||
🔊 Audio coming soon
চটকেত্যাদি| চটকা গ্রামচটকাঃ তেষামণ্ডানি, উচ্চটা ঘুর্ঘুরাখ্যঃ শণঘণ্টকারফলোঽল্পো বিটপঃ সরযূপকণ্ঠে হিমবতি বারেন্দ্য্রাং চ প্রাযশ উপলভ্যতে, চটকাণ্ডোচ্চটানাং ষোডশপলপ্রমিতানাং ক্বাথঃ পূর্ববত্, অত একপুটকস্যার্থে পলাষ্টকং, ক্ষীরস্য পলচতুষ্টযং, মধুঘৃতে পূর্ববত্, শর্করাযা একং পলং তথা কপিকচ্ছূফলানাং, মধ্যে সৈন্ধবং চাল্পতরং প্রযোজ্যং নৈব বা ‘শুক্রার্থেষু ন তৈলগুডসৈন্ধবম্’ ইতি বচনাত্; ইত্যেবং চতুর্বিংশতিঃ| গযী তু চটকাণ্ডদ্রবোচ্চটাক্বাথৌ যেষু ইতি ব্যাখ্যাতি| তেন উচ্চটাযাং এব ক্বাথং মন্যতে| চটকাণ্ডদ্রবং তু স্বরূপেণৈব গৃহ্ণাতি||৮৪||
Adhikarana 39 (85-86) · Śloka 86
বদর্যৈরাবতীশেলুশাল্মলীধন্বনাঙ্কুরাঃ | ক্ষীরসিদ্ধাঃ ক্ষৌদ্রযুতাঃ সাস্রাঃ পিচ্ছিলসঞ্জ্ঞিতাঃ ||৮৫|| বারাহমাহিষৌরভ্রবৈডালৈণেযকৌক্কুটম্ | সদ্যস্কমসৃগাজং বা দেযং পিচ্ছিলবস্তিষু ||৮৬||
बदर्यैरावतीशेलुशाल्मलीधन्वनाङ्कुराः | क्षीरसिद्धाः क्षौद्रयुताः सास्राः पिच्छिलसञ्ज्ञिताः ||८५|| वाराहमाहिषौरभ्रबैडालैणेयकौक्कुटम् | सद्यस्कमसृगाजं वा देयं पिच्छिलबस्तिषु ||८६||
🔊 Audio coming soon
বদর্যৈরাবতীত্যাদি| ঐরাবতী নাগবলা, শেলুঃ শ্লেষ্মাতকঃ, ধন্বনো ধনুর্বৃক্ষঃ যস্য ‘ধামন’ ইতি লোকে প্রসিদ্ধিঃ, অঙ্কুরা অগ্রপল্লবাঃ| সাস্রাঃ সরুধিরাঃ| বদর্যাদ্যঙ্কুরান্ সমুদাযেন পলত্রযপ্রমিতান্ চতুর্বিংশতিপলপ্রমিতং দুগ্ধং দত্ত্বা, চতুর্গুণং জলং নিক্ষিপ্য ক্বাথযেত্, ততঃ ক্ষীরশেষং চতুর্বিংশতিপলানি গ্রাহ্যাণি; তত্র সামান্যপরিভাষোক্তত্বান্মধুনশ্চত্বারি পলান্যাবাপ্য, দ্রবত্বাদ্রুধিরস্য চত্বারি পলানীতি; এবং পিচ্ছাবস্তের্দ্বাত্রিংশত্পলানি ভবন্তি| তথা চোক্তম্- “পিচ্ছাবস্তের্ভবেত্ প্রস্থঃ পাদোনঃ কীর্তিতোঽপরঃ| চতুর্বিংশতিমুষ্টিশ্চ নিরূহঃ সমুদাহৃতঃ”- ইতি| এবমপরেষ্বপি পুটকেষু পিচ্ছাবস্তিমানং কল্পনীযম্| সাস্রা ইতি যদুক্তং তত্ কস্যাস্রমিত্যাহ- বারাহেত্যাদি| উরভ্রো মেষঃ, এণস্যেদম্ ঐণেযম্, এণঃ কৃষ্ণসার ইতি জেজ্জটাচার্যঃ, ব্রহ্মদেবস্তু এণ্যা ইদমৈণেযং, ন পুনরেণস্যেদং ঐণম্| সদ্যোজাতং সদ্যস্কং তত্কালীনং জীববতামেব গ্রাহ্যং, জীবানুসন্ধানার্থম্||৮৫-৮৬||
Adhikarana 40 (87) · Śloka 87
প্রিযঙ্গ্বাদিগণক্বাথা অম্বষ্ঠাদ্যেন সংযুতাঃ | সক্ষৌদ্রাঃ সঘৃতাশ্চৈব গ্রাহিণো বস্তযঃ স্মৃতাঃ ||৮৭||
प्रियङ्ग्वादिगणक्वाथा अम्बष्ठाद्येन संयुताः | सक्षौद्राः सघृताश्चैव ग्राहिणो बस्तयः स्मृताः ||८७||
🔊 Audio coming soon
প্রিযঙ্গ্বাদিগণক্বাথা ইত্যাদি| প্রিযঙ্গ্বাদিগণস্য ষোডশপলপ্রমিতানি দ্রব্যাণি অষ্টগুণং জলং দত্ত্বা ক্বাথযেত্, অতো দ্বাত্রিংশত্পলানি গ্রাহ্যাণি, অত একপুটকস্যার্থে ক্বাথস্যাষ্টৌ পলানি, অম্বষ্ঠাদ্যেমেতি অম্বষ্ঠাদ্যোঽত্র কল্করূপঃ প্রযোজ্যঃ, তথা চ বৃদ্ধবাগ্ভটঃ,- “গ্রাহী প্রিযঙ্গ্বম্বষ্ঠাদিক্বাথকল্কৈঃ ক্রমেণ”- ইতি| অতোঽম্বষ্ঠাদিসঙ্গ্রাহকদ্রব্যাণাং কল্কস্য ত্রীণি পলানি, মধুনশ্চত্বারি, সঙ্গ্রাহকদ্রব্যসিদ্ধঘৃতস্য ষট্পলানি, অনুক্তো যদ্যপীহাবাপস্তথাঽপি সঙ্গ্রাহকত্বাত্তক্রস্য ত্রীণি পলান্যেবং চতুর্বিংশতিঃ||৮৭||
Adhikarana 41 (88) · Śloka 88
এতেষ্বেব চ যোগেষু স্নেহাঃ সিদ্ধাঃ পৃথক্ পৃথক্ | সমস্তেষ্বথবা সম্যগ্বিধেযাঃ স্নেহবস্তযঃ ||৮৮||
एतेष्वेव च योगेषु स्नेहाः सिद्धाः पृथक् पृथक् | समस्तेष्वथवा सम्यग्विधेयाः स्नेहबस्तयः ||८८||
🔊 Audio coming soon
ননু য এতে নিরূহযোগাস্তেষু স্নেহাঃ কেনৌষধেন সিদ্ধা বিধেযা ইত্যাহ- এতেষ্বেব যোগেষ্বিত্যাদি| এতেষু পূর্বোক্তেষু গণেষু| স্নেহাঃ সর্পিরাদযঃ, অথবা রোগাপেক্ষযা||৮৮||
Adhikarana 42 (89) · Śloka 89
বন্ধ্যানাং শতপাকেন শোধিতানাং যথাক্রমম্ | বলাতৈলেন দেযাঃ স্যুর্বস্তযস্ত্রৈবৃতেন চ ||৮৯||
वन्ध्यानां शतपाकेन शोधितानां यथाक्रमम् | बलातैलेन देयाः स्युर्बस्तयस्त्रैवृतेन च ||८९||
🔊 Audio coming soon
যথাক্রমশোধিতানাং যৈঃ স্নেহৈঃ স্নেহবস্তযো দেযাস্তানাহ- বন্ধ্যানাং শতপাকেনেত্যাদি| যথাক্রমং স্নেহস্বেদবমনবিরেচনাস্থাপনশিরোবিরেচনৈঃ শোধিতানাং বন্ধ্যানাং নারীণাং বলাতৈলেন শতপাকেন ত্রৈবৃতেন বা বস্তযো দেযাঃ স্যুঃ ভবেযুঃ| তদেষু শতপাকমুত্পাদিতং বাতব্যাধৌ, বলাতৈলং মূঢগর্ভচিকিত্সিতে, ত্রৈবৃতং মহাবাতব্যাধৌ| তত্র ত্রিভিঃ স্নেহৈর্ঘৃততৈলবসাখ্যৈঃ বৃতং নির্মিতং ত্রিবৃতং, ত্রিবৃতমেব ত্রৈবৃতং, স্বার্থিকোঽণ্| তচ্চ বরণং ঘৃতাদীনামন্যোন্যস্যেত্যর্থাদ্গম্যতে| জেজ্জটাদযস্তু ত্রিভিস্তৈলবসামজ্জাভির্বৃতং ত্রিবৃতং মহাস্নেহাখ্যমিতি প্রতিপাদযন্তি||৮৯||
Adhikarana 43 (90) · Śloka 90
নরস্যোত্তমসত্ত্বস্য তীক্ষ্ণং বস্তিং নিধাপযেত্ | মধ্যমং মধ্যসত্ত্বস্য বিপরীতস্য বৈ মৃদুম্ ||৯০||
नरस्योत्तमसत्त्वस्य तीक्ष्णं बस्तिं निधापयेत् | मध्यमं मध्यसत्त्वस्य विपरीतस्य वै मृदुम् ||९०||
🔊 Audio coming soon
সত্ত্বভেদেন বস্তিত্রৈবিধ্যং প্রতিপাদযন্নাহ- নরস্যেত্যাদি| বিপরীতস্য হীনসত্ত্বস্যেত্যর্থঃ||৯০||
Adhikarana 44 (91) · Śloka 91
এবং কালং বলং দোষং বিকারং চ বিকারবিত্ | বস্তিদ্রব্যবলং চৈব বীক্ষ্য বস্তীন্ প্রযোজযেত্ ||৯১||
एवं कालं बलं दोषं विकारं च विकारवित् | बस्तिद्रव्यबलं चैव वीक्ष्य बस्तीन् प्रयोजयेत् ||९१||
🔊 Audio coming soon
এবং কালমিত্যাদি| কালে শীতেষু তীক্ষ্ণঃ, উষ্ণেষু মৃদুঃ, বসন্তশরদোঃ সাধারণঃ, শীতোষ্ণযোর্মধ্যঃ; এবং বলে শক্ত্যুপচযলক্ষাণে শ্রেষ্ঠে তীক্ষ্ণঃ, মধ্যে মধ্যঃ, কনিষ্ঠে মৃদুঃ; কফবাতে দোষে তীক্ষ্ণঃ, পিত্তরক্তে মৃদুঃ, কফপিত্তে মধ্যঃ; এবং বিকারেঽপি; চকারস্যানুক্তসমুচ্চযার্থত্বাত্ ক্রূরমধ্যমৃদুকোষ্ঠেষ্বপি বোদ্ধব্যম্||৯১||
Adhikarana 45 (92) · Śloka 92
দদ্যাদুত্ক্লেশনং পূর্বং মধ্যে দোষহরং পুনঃ | পশ্চাত্ সংশমনীযং চ দদ্যাদ্বস্তিং বিচক্ষণঃ ||৯২||
दद्यादुत्क्लेशनं पूर्वं मध्ये दोषहरं पुनः | पश्चात् संशमनीयं च दद्याद्बस्तिं विचक्षणः ||९२||
🔊 Audio coming soon
ইদানীমুত্ক্লেশনাদিনা বস্তিং ত্রিধা ভিন্দন্ তেষাং ভেদানাং কালবিশেষে প্রদানমাহ- দদ্যাদিত্যাদি| তত্রানুত্ক্লিষ্টদোষস্য আদাবুত্ক্লেশনং, মধ্যে দোষহরং, ততঃ পশ্চাদ্দোষশেষস্য সংশমনায সংশমনমিতি| উত্ক্লিষ্টদোষস্য দোষহরণসংশমনে এব কর্তব্যে| দোষহরস্য বস্তেঃ প্রথমপুটকদানেন সম্যগ্দোষানির্হরণে দ্বিতীযং তৃতীযং বা পুটকং দদ্যাত্, এবমুত্ক্লেশনসংশমনযোরপি বেদ্যম্| উত্ক্লিষ্টাদিজ্ঞানং তু দোষাণাং প্রকোপাদিলক্ষণেন ||৯২||
Adhikarana 46 (93-95) · Śloka 95
এরণ্ডবীজং মধুকং পিপ্পলী সৈন্ধবং বচা | হপুষাফলকল্কশ্চ বস্তিরুত্ক্লেশনঃ স্মৃতঃ ||৯৩|| শতাহ্বা মধুকং বীজং কৌটজং ফলমেব চ | সকাঞ্জিকঃ সগোমূত্রো বস্তির্দোষহরঃ স্মৃতঃ ||৯৪|| প্রিযঙ্গুর্মধুকং মুস্তা তথৈব চ রসাঞ্জনম্ | সক্ষীরঃ শস্যতে বস্তির্দোষাণাং শমনঃ পরঃ ||৯৫||
एरण्डबीजं मधुकं पिप्पली सैन्धवं वचा | हपुषाफलकल्कश्च बस्तिरुत्क्लेशनः स्मृतः ||९३|| शताह्वा मधुकं बीजं कौटजं फलमेव च | सकाञ्जिकः सगोमूत्रो बस्तिर्दोषहरः स्मृतः ||९४|| प्रियङ्गुर्मधुकं मुस्ता तथैव च रसाञ्जनम् | सक्षीरः शस्यते बस्तिर्दोषाणां शमनः परः ||९५||
🔊 Audio coming soon
অন্যে তু বৃদ্ধসুশ্রুতাধ্যাযিন উত্ক্লেশনাদ্যর্থমৌষধান্যত্র পঠন্তি- এরণ্ডবীজমিত্যাদি| এতানি এরণ্ডবীজেত্যাদিশ্লোকত্রযেণ পঠিতান্যৌষধানি উত্ক্লেশনাদ্যর্থং কল্কাবাপরূপতযা, বাতাদিবস্ত্যুক্তকল্কাবাপেষু কুশাগ্রবুদ্ধিনা দোষং মানং চ বিমৃশ্য অনুচিতপরিত্যাগোচিতস্বীকারেণ সমবেতানি কার্যাণি যথা মাত্রাধিকো মিথ্যামাত্রাযুক্তশ্চ বস্তির্ন ভবতীতি জেজ্জটাচার্যঃ| গযী তু দদ্যাদিত্যাদিকং যাপনবস্তিবিষযং মন্যতে| তেষাং তু দ্বিবিধং প্রযোজনং- স্বস্থস্য বাজীকরত্বং রসাযনহেতুত্বং চেত্যেকম্, অপরং চ ধাতুগতদোষহরণং; তত্র ধাতুগতদোষাণামুত্ক্লেশনাভাবাত্ তদুত্ক্লেশনাদ্যর্থম্মিদমুক্তমিত্যর্থঃ| এতে চোত্ক্লেশনাদ্যর্থমেরণ্ডবীজেত্যাদিশ্লোকত্রযেণ কল্কাবাপা যথাক্রমমুক্তাঃ| অন্যে তু হীনসত্ত্ববলকালদ্রব্যবিকারেষু কোষ্ঠবিশেষে চ মৃদবো বস্তযো দেযাঃ, তৈশ্চাপ্যুত্ক্লেশনে দোষাণাং হরণং, শেষস্য তু দোষস্য সংশমনমিত্যাহুঃ||৯৩-৯৫||
Adhikarana 47 (96-99) · Śloka 99
নৃপাণাং তত্সমানানাং তথা সুমহতামপি | নারীণাং সুকুমারাণাং শিশুস্থবিরযোরপি ||৯৬|| দোষনির্হরণার্থায বলবর্ণোদযায চ | সমাসেনোপদেক্ষ্যামি বিধানং মাধুতৈলিকম্ ||৯৭|| যানস্ত্রীভোজ্যপানেষু নিযমশ্চাত্র নোচ্যতে | ফলং চ বিপুলং দৃষ্টং ব্যাপদাং চাপ্যসম্ভবঃ ||৯৮|| যোজ্যস্ত্বতঃ সুখেনৈব নিরূহক্রমমিচ্ছতা | যদেচ্ছতি তদৈবৈষ প্রযোক্তব্যো বিপশ্চিতা ||৯৯||
नृपाणां तत्समानानां तथा सुमहतामपि | नारीणां सुकुमाराणां शिशुस्थविरयोरपि ||९६|| दोषनिर्हरणार्थाय बलवर्णोदयाय च | समासेनोपदेक्ष्यामि विधानं माधुतैलिकम् ||९७|| यानस्त्रीभोज्यपानेषु नियमश्चात्र नोच्यते | फलं च विपुलं दृष्टं व्यापदां चाप्यसम्भवः ||९८|| योज्यस्त्वतः सुखेनैव निरूहक्रममिच्छता | यदेच्छति तदैवैष प्रयोक्तव्यो विपश्चिता ||९९||
🔊 Audio coming soon
অথ কে তে মৃদবো বস্তয ইতি পৃষ্টো বিষযনির্দেশপূর্বং তানেব নির্দিশন্নাহ- নৃপাণামিত্যাদি| তত্সমানাং রাজতুল্যপুরুষাণাং বাণিজ্যব্যবহারিণাং বার্ধুষিকাণাম্| শিশুস্থবিরযোঃ বালবৃদ্ধযোঃ| দোষনির্হরণার্থায স্বস্থেঽপি কালৈককৃতদোষনির্হরণার্থায, বলবর্ণোদযায চ অপেতসকলদোষস্যেত্যর্থঃ| নিযমো নিষেধঃ| অত্র মাধুতৈলিকবিধানে| যদেচ্ছতীতি যদা যস্মিন্ কালে আতুর ইচ্ছতি তদা তস্মিন্ কালে বিপশ্চিতা বৈদ্যেন এষ বস্তিঃ প্রযোক্তব্যঃ, এতেন সার্বকালিকত্বমুক্তং ভবতি||৯৬-৯৯||
Adhikarana 48 (100-101) · Śloka 101
মধুতৈলে সমে স্যাতাং ক্বাথশ্চৈরণ্ডমূলজঃ | পলার্ধং শতপুষ্পাযাস্ততোঽর্ধং সৈন্ধবস্য চ ||১০০|| ফলেনৈকেন সংযুক্তঃ খজেন চ বিলোডিতঃ | দেযঃ সুখোষ্ণো ভিষজা মাধুতৈলিকসঞ্জ্ঞিতঃ ||১০১||
मधुतैले समे स्यातां क्वाथश्चैरण्डमूलजः | पलार्धं शतपुष्पायास्ततोऽर्धं सैन्धवस्य च ||१००|| फलेनैकेन संयुक्तः खजेन च विलोडितः | देयः सुखोष्णो भिषजा माधुतैलिकसञ्ज्ञितः ||१०१||
🔊 Audio coming soon
মধুতৈলে সমে স্যাতামিত্যাদি| পাদহীনাঃ সর্বে এব মাধুতৈলিকাঃ, ততশ্চ তথা কল্পনীযা যথা নব প্রসৃতা ভবন্তি; মধুতৈলযোঃ প্রসৃতাশ্চত্বারো দ্বিকর্ষাধিকাঃ, এরণ্ডমূলকষাযস্য তাবন্ত এব, শতপুষ্পাঽর্ধপলং, সৈন্ধবস্য কর্ষং, মদনফলং চৈকমিত্যেবং নবপ্রসৃতা ভবন্তি| অনযা কল্পনযা সর্ব এব মাধুতৈলিকাঃ কল্পনীযা ইতি জেজ্জটাচার্যঃ| গযী তু ‘পলেনৈকেন সংযুক্তঃ’ ইতি পঠিত্বা মৃদুনাঽনুক্তেনা মাংসরসকাঞ্জিকাদিনা পূরণং করোতি| এবমপরেষু চতুর্ষু নব প্রসৃতাঃ পূরণীযা ইত্যাহ||১০০-১০১||
Adhikarana 49 (102) · Śloka 102
বচামধুকতৈলং চ ক্বাথঃ সরসসৈন্ধবঃ | পিপ্পলীফলসংযুক্তো বস্তির্যুক্তরথঃ স্মৃতঃ ||১০২||
वचामधुकतैलं च क्वाथः सरससैन्धवः | पिप्पलीफलसंयुक्तो बस्तिर्युक्तरथः स्मृतः ||१०२||
🔊 Audio coming soon
বচামধুকেত্যাদি| বচাসৈন্ধবপিপ্পলীমদনফলানাং প্রত্যেকং কার্ষিকা ভাগাঃ, মধুতৈলযোশ্চত্বারঃ প্রসৃতাঃ কর্ষদ্বযাধিকাঃ, এরণ্ডমূলক্বাথস্তাবন্মাত্র এব; ইতি যুক্তরথাভিধানো মাধুতৈলিকঃ||১০২||
Adhikarana 50 (103) · Śloka 103
সুরদারু বরা রাস্না শতপুষ্পা বচা মধু | হিঙ্গুসৈন্ধবসংযুক্তো বস্তির্দোষহরঃ স্মৃতঃ ||১০৩||
सुरदारु वरा रास्ना शतपुष्पा वचा मधु | हिङ्गुसैन्धवसंयुक्तो बस्तिर्दोषहरः स्मृतः ||१०३||
🔊 Audio coming soon
সুরদার্বিত্যাদি| সুরদারুবরারাস্নাশতপুষ্পাবচাহিঙ্গুসৈন্ধবানাং তুল্যমানেনৈকং পলং, মধুতৈলযোঃ কর্ষদ্বযাধিকান্যষ্টৌ পলানি, এরণ্ডমূলক্বাথস্তাবন্মাত্র এব| এবং দোষহরাভিধানো মাধুতৈলিকঃ; কেচিদত্র হিঙ্গুস্থানে বিডং পঠন্তি||১০৩||
Adhikarana 51 (104) · Śloka 104
পঞ্চমূলীকষাযং চ তৈলং মাগধিকা মধু | বস্তিরেষ বিধাতব্যঃ সশতাহ্বঃ সসৈন্ধবঃ ||১০৪||
पञ्चमूलीकषायं च तैलं मागधिका मधु | बस्तिरेष विधातव्यः सशताह्वः ससैन्धवः ||१०४||
🔊 Audio coming soon
পঞ্চমূলীকষাযমিত্যাদি| পঞ্চমূলীকষাযস্য কর্ষদ্বযাধিকানি অষ্টৌ পলানি, মধুতৈলে অপি তাবন্মাত্রে এব, মাগধিকাশতাহ্বাসৈন্ধবানামেকং পলম্| অযং চ পাঞ্চমূলিকো মাধুতৈলিকঃ||১০৪||
Adhikarana 52 (105) · Śloka 105
যবকোলকুলত্থানাং ক্বাথো মাগধিকা মধু | সসৈন্ধবঃ সযষ্ট্যাহ্বঃ সিদ্ধবস্তিরিতি স্মৃতঃ ||১০৫||
यवकोलकुलत्थानां क्वाथो मागधिका मधु | ससैन्धवः सयष्ट्याह्वः सिद्धबस्तिरिति स्मृतः ||१०५||
🔊 Audio coming soon
যবকোলকুলত্থানাং পূর্ববত্ ক্বাথঃ, মধুতৈলেঽপি পূর্ববত্, মাগধিকাসৈন্ধবযষ্ট্যাহ্বানামেকং পলম্| সিদ্ধবস্ত্যভিধানোঽযং মাধুতৈলিকঃ| পঞ্চাপ্যেতে মাধুতৈলিকা উক্তাঃ||১০৫||
Adhikarana 53 (103-111) · Śloka 111
মুস্তাপাঠামৃতাতিক্তাবলারাস্নাপুনর্নবাঃ | মঞ্জিষ্ঠারগ্বধোশীরত্রাযমাণাখ্যগোক্ষুরান্ ||১০৬|| পালিকান্ পঞ্চমূলাল্পসহিতান্মদনাষ্টকম্ | জলাঢকে পচেত্ ক্বাথং পাদশেষং পুনঃ পচেত্ ||১০৭|| ক্ষীরার্ধাঢকসংযুক্তমাক্ষীরাত্ সুপরিস্রুতম্ | পাদেন জাঙ্গলরসস্তথা মধুঘৃতং সমম্ ||১০৮|| শতাহ্বাফলিনীযষ্টীবত্সকৈঃ সরসাঞ্জনৈঃ | কার্ষিকৈঃ সৈন্ধবোন্মিশ্রৈঃ কল্কৈর্বস্তিঃ প্রযোজিতঃ ||১০৯|| বাতাসৃঙ্মেহশোফার্শোগুল্মমূত্রবিবন্ধনুত্ | বিসর্পজ্বরবিড্ভঙ্গরক্তপিত্তবিনাশনঃ ||১১০|| বল্যঃ সঞ্জীবনো বৃষ্যশ্চক্ষুষ্যঃ শূলনাশনঃ | যাপনানামযং রাজা বস্তির্মুস্তাদিকো মতঃ ||১১১||
मुस्तापाठामृतातिक्ताबलारास्नापुनर्नवाः | मञ्जिष्ठारग्वधोशीरत्रायमाणाख्यगोक्षुरान् ||१०६|| पालिकान् पञ्चमूलाल्पसहितान्मदनाष्टकम् | जलाढके पचेत् क्वाथं पादशेषं पुनः पचेत् ||१०७|| क्षीरार्धाढकसंयुक्तमाक्षीरात् सुपरिस्रुतम् | पादेन जाङ्गलरसस्तथा मधुघृतं समम् ||१०८|| शताह्वाफलिनीयष्टीवत्सकैः सरसाञ्जनैः | कार्षिकैः सैन्धवोन्मिश्रैः कल्कैर्बस्तिः प्रयोजितः ||१०९|| वातासृङ्मेहशोफार्शोगुल्ममूत्रविबन्धनुत् | विसर्पज्वरविड्भङ्गरक्तपित्तविनाशनः ||११०|| बल्यः सञ्जीवनो वृष्यश्चक्षुष्यः शूलनाशनः | यापनानामयं राजा बस्तिर्मुस्तादिको मतः ||१११||
🔊 Audio coming soon
মাধুতৈলিকস্যাগ্রতো গযদাসাচার্যমতে মুস্তাদিস্থাপনবস্তির্নাস্তি, জেজ্জটাচার্যস্তু মুস্তাদিস্থাপনবস্তিং পঠতি ব্যাখ্যানযতি চ, তদ্ব্যাখ্যানাভিপ্রাযেণ মযাঽপ্যসৌ ব্যাখ্যাযতে- মুস্তাপাঠেত্যাদি| মুস্তাদীনি পঞ্চমূলাল্পসহিতান্যষ্টাদশপলানি, ততো মদনস্যাষ্টাভিঃ ফলৈর্দ্বিপলমিত্যেবং বিংশতিপলপ্রমিতানি জলাঢকেঽষ্টাবিংশত্যধিকশতপলপ্রমিতে পচেত্, ততো দ্বাত্রিংশত্পলপ্রমিতঃ ক্বাথোঽবশিষ্টো ভবতি, ততস্তং ক্বাথং পাদশেষং ক্ষীরার্ধাঢকসংযুক্তং দুগ্ধস্য চতুঃষষ্টিপলোপেতং পুনঃ পচেত্তাবদ্যাবত্ ক্ষীরাবশেষং প্রস্থদ্বযং চতুঃষষ্টিপলানি ভবতি, পাদেন প্রস্থস্যাষ্টৌ পলানি মাংসরসস্য, এবং দ্বাসপ্ততিপলানি ভবন্তি| অতো মধ্যাদেকস্য পুটস্যার্থে চতুর্বিংশতিপলানি গ্রাহ্যাণি; তত্র মধুনঃ প্রসৃতঃ সার্ধঃ, ঘৃতস্য তাবদিত্যেবং ষট্পলানি ক্ষিপ্যন্তে, শতাহ্বাদীনাং ষড্দ্রব্যাণাং কর্ষপ্রমিতানাং কল্কস্য সার্ধং পলং, নিরূহাঙ্গত্বান্মদনফলস্যার্ধপলমেবং কল্কস্য প্রসৃতো ভবতীত্যেকস্মিন্ পুটকে দ্বাত্রিংশত্পলপ্রমিতপ্রস্থো ভবতি; এবমপরমপি পুটকদ্বযং করণীযং, এবং পুটকত্রযস্যার্থে ষণ্ণবতিপলানি ভবন্তি| ইদং মুস্তাদিযাপনবস্তিমানং জেজ্জটাচার্যেণ তন্ত্রান্তরোক্তমধ্যমানেন কল্পিতং| তথা চ পরাশরঃ- “নিরূহস্য প্রমাণং তু প্রস্থং পাদোত্তরং স্মৃতম্| মধ্যমং প্রস্থমুদ্দিষ্টং হীনং চ কুডবাস্ত্রযঃ”- ইতি| গূঢপদভঙ্গটিপ্পণকারেণ পুনরন্যথা ব্যাখ্যাতম্| তথাহি- “মুস্তাদিদ্রব্যাণাং পালিকান্ ভাগান্ দ্রবত্বাদ্দ্বিগুণযা কল্পনযা জলস্যাঢকে অষ্টাবিংশত্যধিকে পলশতে পক্ত্বা পাদশেষং দ্বাত্রিংশত্পলপ্রমাণং ক্ষীরার্ধাঢকসংযুক্তং পুনঃ পচেদ্যাবত্ক্ষীরশেষং চতুঃষষ্টিপলানি ভবন্তি| ততশ্চ সপাদপ্রস্থে জাঙ্গলরসস্য পঞ্চ পলানি, মধুঘৃতং পৃথক্ সার্ধদ্বিপলসম্মিতং, শতাহ্বাদিককল্কস্য মদনফলাষ্টকেন যুক্তং পলদ্বযং প্রক্ষিপ্যৈকধ্যং ষট্সপ্তত্যা পলৈঃ পুটকত্রযং দেযম্||১০৩-১১১||
Adhikarana 54 (112) · Śloka 112
অবেক্ষ্য ভেষজং বুদ্ধ্যা বিকারং চ বিকারবিত্ | বীজেনানেন শাস্ত্রজ্ঞঃ কুর্যাদ্বস্তিশতান্যপি ||১১২||
अवेक्ष्य भेषजं बुद्ध्या विकारं च विकारवित् | बीजेनानेन शास्त्रज्ञः कुर्याद्बस्तिशतान्यपि ||११२||
🔊 Audio coming soon
অবেক্ষ্য ভেষজমিত্যাদি| তত্র ভেষজং ব্রণজ্বরাদিহরং, বিকারং চ ব্রণজ্বরাদিকং বাতাপিত্তকফসংসর্গসন্নিপাতজং শোণিতজং চ| চকারেণানুক্তং কালবলাদি সমুচ্চীযতে| ‘বাতঘ্নৌষধনিষ্ক্বাথা’ ইত্যাদিষু বস্তিষূক্তেন বীজেনেত্যর্থঃ||১১২||
Adhikarana 55 (113) · Śloka 113
অজীর্ণে ন প্রযুঞ্জীত দিবাস্বপ্নং চ বর্জযত্ | আহারাচারিকং শেষমন্যত্ কামং সমাচরেত্ ||১১৩||
अजीर्णे न प्रयुञ्जीत दिवास्वप्नं च वर्जयत् | आहाराचारिकं शेषमन्यत् कामं समाचरेत् ||११३||
🔊 Audio coming soon
অজীর্ণে নেত্যাদি| অন্যচ্ছেষমাহারাচারাশ্রিতং কর্ম কামং যথেষ্টং সমাচরেত্||১১৩||
Adhikarana 56 (114-117) · Śloka 117
যস্মান্মধু চ তৈলং চ প্রাধান্যেন প্রদীযতে | মাধুতৈলিক ইত্যেবং ভিষগ্ভির্বস্তিরুচ্যতে ||১১৪|| রথেষ্বপি চ যুক্তেষু হস্ত্যশ্বে চাপি কল্পিতে | যস্মান্ন প্রতিষিদ্ধোঽযমতো যুক্তরথঃ স্মৃতঃ ||১১৫|| বলোপচযবর্ণানাং যস্মাদ্ ব্যাধিশতস্য চ | ভবত্যেতেন সিদ্ধিস্তু সিদ্ধবস্তিরতো মতঃ ||১১৬|| সুখিনামল্পদোষাণাং নিত্যং স্নিগ্ধাশ্চ যে নরাঃ | মৃদুকোষ্ঠাশ্চ যে তেষাং বিধেযা মাধুতৈলিকাঃ ||১১৭||
यस्मान्मधु च तैलं च प्राधान्येन प्रदीयते | माधुतैलिक इत्येवं भिषग्भिर्बस्तिरुच्यते ||११४|| रथेष्वपि च युक्तेषु हस्त्यश्वे चापि कल्पिते | यस्मान्न प्रतिषिद्धोऽयमतो युक्तरथः स्मृतः ||११५|| बलोपचयवर्णानां यस्माद् व्याधिशतस्य च | भवत्येतेन सिद्धिस्तु सिद्धबस्तिरतो मतः ||११६|| सुखिनामल्पदोषाणां नित्यं स्निग्धाश्च ये नराः | मृदुकोष्ठाश्च ये तेषां विधेया माधुतैलिकाः ||११७||
🔊 Audio coming soon
বিশেষসঞ্জ্ঞযা মাধুতৈলিকানাহ- যস্মান্মধু চ তৈলমিত্যাদি||১১৪-১১৭||
Adhikarana 57 (118) · Śloka 118
মৃদুত্বাত্ পাদহীনত্বাদকৃত্স্নবিধিসেবনাত্ | একবস্তিপ্রদানাচ্চ সিদ্ধবস্তিষ্বযন্ত্রণা ||১১৮||
मृदुत्वात् पादहीनत्वादकृत्स्नविधिसेवनात् | एकबस्तिप्रदानाच्च सिद्धबस्तिष्वयन्त्रणा ||११८||
🔊 Audio coming soon
কস্মাদেতে নিযন্ত্রণাস্তদাহ- মৃদুত্বাদিত্যাদি| মৃদুবীর্যৈরৌষধৈঃ কল্পিতো মৃদুঃ| পাদহীনত্বাদিতি পাদেন হীনঃ পাদাভ্যাং বা হিনঃ, ততশ্চ পাদহীনা নব প্রসৃতা ভবন্তি, পাদাভ্যাং হীনাঃ ষট্প্রসৃতা ভবন্তি| অকৃত্স্নবিধিসেবনাদিতি বমনাদিসংস্কারবর্জনাত্| একবস্তিপ্রদানাচ্চেতি একপুটকপ্রদানাত্; ‘একাহং প্রণিধানাচ্চ’ ইতি কেচিত্ পঠন্তি, একাহমেব প্রণিধানং বস্তিদানমিত্যর্থঃ| পরং কালৈককৃতে দোষকোপে কদাচিত্ সম্যঙ্নিরূঢলক্ষণমবেক্ষ্য দ্বিত্র্যাদিবস্তিদানমপীতি পাঠবিশেষাদ্বিশিষ্টোঽর্থঃ; অতো ‘নৈকাহপ্রণিধানাত্’ ইত্যপরে পঠন্তি; তত্র শোধননিরূহবদেকাহমেব প্রণিধানং নাস্ত্যেব; কিং তর্হি সাধারণত্বাত্ সমধাতুষু বাজীকরণাদাবসকৃদ্দানমপীতি||১১৮||
Adhikarana puShpikA · Śloka 38
ইতি সুশ্রুতসংহিতাযাং চিকিত্সাস্থানে নিরূহক্রমচিকিত্সিতং নামাষ্টত্রিংশোঽধ্যাযঃ ||৩৮||
इति सुश्रुतसंहितायां चिकित्सास्थाने निरूहक्रमचिकित्सितं नामाष्टत्रिंशोऽध्यायः ||३८||
🔊 Audio coming soon
ইতি শ্রীডল্হ(হ্ল)ণবিরচিতাযাং নিবন্ধসঙ্গ্রহাখ্যাযাং সুশ্রুতব্যাখ্যাযাং চিকিত্সাস্থানেঽষ্টত্রিংশত্তমোঽধ্যাযঃ||৩৮||